JKW-KABAB-10-THA-017

🚧 This website is under continued development. We appreciate your patience!

Previous Text Back to Volume PageNext Text

ཐུགས་རྗེ་ཆེན་པོ་འགྲོ་འདུལ་ལས། ཚེ་སྒྲུབ་ཆེན་མོ།

Wylie title	thugs rje chen po 'gro 'dul las tshe sgrub chen mo
Location	mkhyen brtse'i bka' babs Volume 10, Text 17, Pages 481-494 (Folios 1a to 7b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	ཉང་རལ་ཉི་མ་འོད་ཟེར་, འཇམ་དབྱངས་མཁྱེན་བརྩེའི་དབང་པོ་ (nyang ral nyi ma 'od zer, 'jam dbyangs mkhyen brtse'i dbang po)
Source Author(s)	ཆོས་སེང་ (chos seng)
Citation	'jam dbyangs mkhyen brtse'i dbang po. thugs rje chen po 'gro 'dul las tshe sgrub chen mo. In Rdzong sar 'jam dbyangs mkhyen brtse'i dbang po'i bka' babs, Vol. 10: 481-494. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Longevity Rituals - tshe sgrub
Cycle	ཉང་གཏེར་ཐུགས་རྗེ་ཆེན་པོ་འགྲོ་འདུལ་ (nyang gter thugs rje chen po 'gro 'dul)
Deity	thugs rje chen po
Karchag page	JKW-KABAB-Volume-10-THA-Karchag
RTZ	In the Rinchen Terdzö: https://rtz.tsadra.org/index.php/Terdzo-ZHA-040
Colophon	First colophon (treasure) page 485: བདག་འདྲ་པདྨ་འབྱུང་གནས་ཀྱིས༔ འཆི་མེད་ཚེ་ཡི་དངོས་གྲུབ་ཐོབ༔ ཚེ་སྒྲུབ་ཆེན་པོ་འདི་བརྩམས་པས༔ འགྲོ་ཀུན་ཚེ་རིང་གྲུབ་ཐོབ་ཤོག༔ ཐུགས་རྗེ་ཆེན་པོའི་ཚེ་སྒྲུབ་ཆེན་མོ་རྫོགས་སོ༔ གཏེར་རྒྱ༔ སྦས་རྒྱ༔ གཏད་རྒྱ༔ རྒྱ་རྒྱ་རྒྱ༔ ༔ Second colophon (treasure) page 494: སློབ་དཔོན་པདྨ་འབྱུང་གནས་ཀྱིས་མཛད་པའི༔ ཐུགས་རྗེ་ཆེན་པོའི་ཚེ་སྒྲུབ་ཆེན་མོ་རྫོགས་སོ༔ གཏེར་རྒྱ༔ སྦས་རྒྱ༔ གཏད་རྒྱ༔ Second colophon (author) page 494: ཨོ་རྒྱན་པདྨ། མཁའ་འགྲོ་མཚོ་རྒྱལ། ཁྲི་སྲོང་ལྡེའུ་བཙན། མངའ་བདག་ཆེན་པོ། འགྲོ་བའི་མགོན་པོ། སྲས་བློ་ལྡན། མངའ་བདག་བདུད་འདུལ། མདོ་སྡེ་སེང་གེ །མངའ་བདག་པདྨ་དངོས་གྲུབ། དེ་ལ་བདག་ཆོས་སེང་གིས་ཞུས་པ་ལགས་སོ། །རྡོ་རྗེ་ལྟ་བུའི་ཚེ་ཐོབ་ཤོག །ལྷོ་བྲག་ལྕགས་ཕུར་དུ་བདག་ཆོས་སེང་གིས་སྨྱུ་གུ་ཕོག་ཚད་བྱས་ནས་བྲིས།།
	First colophon (treasure) page 485: bdag 'dra pad+ma 'byung gnas kyis:__'chi med tshe yi dngos grub thob:__tshe sgrub chen po 'di brtsams pas:__'gro kun tshe ring grub thob shog:__thugs rje chen po'i tshe sgrub chen mo rdzogs so:__gter rgya:__sbas rgya:__gtad rgya:__rgya rgya rgya: Second colophon (treasure) page 494: slob dpon pad+ma 'byung gnas kyis mdzad pa'i:__thugs rje chen po'i tshe sgrub chen mo rdzogs so:__gter rgya:__sbas rgya:__gtad rgya: Second colophon (author) page 494: o rgyan pad+ma/__mkha' 'gro mtsho rgyal/___khri srong lde'u btsan/__mnga' bdag chen po/__'gro ba'i mgon po/__sras blo ldan/__mnga' bdag bdud 'dul/__mdo sde seng ge__/mnga' bdag pad+ma dngos grub/__de la bdag chos seng gis zhus pa lags so/__/rdo rje lta bu'i tshe thob shog__/lho brag lcags phur du bdag chos seng gis smyu gu phog tshad byas nas bris

Tibetan Text

Wylie

[edit]

༄༅༔ ཐུགས་རྗེ་ཆེན་པོ་འགྲོ་འདུལ་ལས༔ ཚེ་སྒྲུབ་ཆེན་མོ་བཞུགས་སོ༔

ཐུགས་རྗེ་ཆེན་པོ་ལ་ཕྱག་འཚལ་ལོ༔ ཐུགས་རྗེ་ཆེན་པོ་ཚེ་དཔག་མེད༔ རྡོ་རྗེ་རིན་ཆེན་ཚེ་སྒྲུབ་ནི༔ དུས་མིན་འཆི་ལས་བཟློག་པ་དང་༔ ཚེ་དབུགས་ཉམས་དང་ཟད་པ་བསྲིང་༔ བཀྲ་ཤིས་ཚེ་ཡི་སྒྲུབ་པ་བསྟན༔ དཀྱིལ་འཁོར་རྫས་དང་ཏིང་འཛིན་དང་༔ སྔགས་དང་ལྷ་ཚོགས་བསྐུལ་བ་དང་༔ ཚེ་དབང་བསྐུར་ཅིང་བསྟིམ་བརྟན་དང་༔ བཀྲ་ཤིས་བརྗོད་དང་སྨོན་ལམ་མོ༔ དང་པོ་དཀྱིལ་འཁོར་བསྟན་པ་ནི༔ འགྲོ་བ་འདུལ་བའི་དཀྱིལ་འཁོར་བཞེངས༔ ཡང་ན་མཎྜལ་གཙང་མའི་སྟེང་༔ འབྲུ་བརྡལ་པདྨ་འདབ་དྲུག་བྱ༔ རྫས་ནི་ཚེ་ཡི་བུམ་པ་ནི༔ ཕྱི་ཡི་བུམ་པ་རིན་པོ་ཆེ༔ མ་གས་མ་ཆག་གཙང་མར་བྱ༔ ནང་ནི་མཚན་ལྡན་ཀ་པཱ་ལར༔ འབྲུ་མཆོག་བཅུད་ལྡན་མ་ཉམས་བླུགས༔ ནས་འབྲས་ཕྱེ་མ་མར་གྱིས་སྦྲུ༔ སྤོད་སྣ་ཚོགས་པས་བྲན་པ་ཡི༔ ཚེ་ཡི་འབྲང་རྒྱས་བཅས་ནས་ནི༔ རིལ་བུ་མཆེད་ཀྱི་གྲངས་དང་སྦྱར༔ སྨན་དང་བདུད་རྩི་ཚེ་ཆང་བླུགས༔ གསེར་གཡུ་གཉིས་ཀྱི་ཚེ་རྟེན་བྱ༔ ཚེ་བུམ་དཀྱིལ་འཁོར་དབུས་སུ་བཞག༔ བར་གཅོད་བགེགས་བསྐྲད་གུ་གུལ་བདུག༔ ཐུགས་རྗེ་ཆེན་པོའི་ད་ལ་ཡི༔ དམ་ཚིག་སེམས་དཔའི་དཀྱིལ་འཁོར་བསྐྱེད༔ ཡེ་ཤེས་དཀྱིལ་འཁོར་དགུག་གཞུག་བྱ༔ ཚེ་བུམ་གཞལ་ཡས་ཁང་ནང་དུ༔ ལྷ་ནི་མགོན་པོ་ཚེ་དཔག་མེད༔ སྐུ་མདོག་དམར་སེར་འོད་དང་ལྡན༔ ཞལ་གཅིག་ཕྱག་གཉིས་ཚེ་བུམ་བསྣམས༔ ཡུམ་ཡང་མཱ་མ་ཀཱི་ལ་འཁྱུད༔ རིགས་བཞི་ཡབ་ཡུམ་འཁོར་གྱིས་བསྐོར༔ སྐུ་མདོག་ཕྱག་མཚན་རིགས་ཀྱིས་སྟོན༔ གཡས་པ་རིགས་ཀྱི་ཕྱག་མཚན་ལ༔ གཡོན་པ་ཚེ་ཡི་བུམ་པ་འཛིན༔ བཀྲ་ཤིས་ལྷ་མོ་བརྒྱད་ཀྱིས་བསྐོར༔ ཚེ་བུམ་ནང་དུ་གསལ་བར་བསྐྱེད༔ སྔགས་ཀྱི་སྤྲོ་བསྡུ་བྱ་བ་ནི༔ ཚེ་བུམ་མགུལ་ནས་གཟུངས་ཐག་གདག༔ བདག་ཉིད་དཀྱིལ་འཁོར་ལྷར་གསལ་ལ༔ ཨོཾ་ཨཱཿཧཱུྃ་ཧྲཱིཿ ཨོཾ་མ་ཎི་པདྨེ་ཧཱུྃ༔ ཡི་གེ་བཅུ་པའི་བསྙེན་པ་བྱ༔ སྟོང་རྫོགས་ཚེ་ཡི་བསྙེན་པ་ནི༔ ཨོཾ་ཨཱཿཧཱུྃ་ཏྲཱྃ་ཧྲཱིཿབྷྲཱུྃ་བཛྲ་ཨཱ་ཡུ་ཤེ་ཨཱཿ སིདྡྷི་སིདྡྷི་ཧཱུྃ༔ ཞེས་ནི་བརྗོད་པའི་འཕྲོ་འདུ་ཡིས༔ ཐུགས་ཀའི་སྔགས་ཕྲེང་འཕྲོས་འདུས་པས༔ བུམ་པའི་ལྷ་ཚོགས་རྣམས་ལ་ཐིམ༔ བུམ་པའི་ལྷ་ལས་འོད་འཕྲོས་པས༔ ལྷ་དང་དྲང་སྲོང་རྣམས་ལ་ཕོག༔ མཆོད་མཉེས་བྱས་ནས་ཚེ་ལྷའི་བཅུད༔ དངོས་གྲུབ་ཚུལ་དུ་བདག་དང་ནི༔ བུམ་པའི་ལྷ་ཡི་ཐུགས་ཀར་ཐིམ༔ རིགས་ལྔ་བདེ་བར་གཤེགས་པ་ཡི༔ ཐུགས་ནས་འོད་ཀྱི་བཅུད་བླངས་ནས༔ ཚེ་ཡི་བུམ་པའི་ནང་དུ་ཐིམ༔ ཡང་ནི་སྔགས་ཀྱི་སྤྲོ་བསྡུ་ཡིས༔ བུམ་པའི་ལྷ་ཡི་ཐུགས་ཀ་ནས༔ བདག་དང་བསྒྲུབ་བྱའི་ཐུགས་ཀར་ཐིམ༔ འཆི་མེད་ཚེ་ཡི་དངོས་གྲུབ་བསྡུས༔ རྒྱས་བཏབ་སྙིང་གི་ནང་ན་གནས༔ ཧ་ཡ་གྲཱི་བས་སྒོ་བསྲུངས་བསམ༔ དེ་ནས་ཚེ་ཡི་ལྷ་ཚོགས་བསྐུལ༔ སྟོང་གསུམ་ལོ་ཀའི་ཁམས་ཀུན་ནས༔ ཚེ་ཉམས་པ་དང་ཚེ་ཟད་པ༔ ལྷ་སྲིན་ལག་ཏུ་ཚེ་ཤོར་བ༔ འཕྲོག་དང་བཀུག་ནས་བདག་ལ་བསྟིམས༔ དེ་ནས་ཡུམ་ལྔས་བསྟིམས་ལ་སྦ༔ དེ་ནས་ཚེ་ཡི་དབང་བསྐུར་ལ༔ བཀྲ་ཤིས་བརྗོད་དེ་དབང་བསྐུར་ལ༔ ཚེ་ཡི་འབྲང་རྒྱས་ཚེ་རིལ་དང་༔ ཚེ་ཆང་ལ་སོགས་དངོས་གྲུབ་བླང་༔ ཚེ་ཡི་དངོས་གྲུབ་ཐོབ་པར་འགྱུར༔ བདག་འདྲ་པདྨ་འབྱུང་གནས་ཀྱིས༔ འཆི་མེད་ཚེ་ཡི་དངོས་གྲུབ་ཐོབ༔ ཚེ་སྒྲུབ་ཆེན་པོ་འདི་བརྩམས་པས༔ འགྲོ་ཀུན་ཚེ་རིང་གྲུབ་ཐོབ་ཤོག༔ ཐུགས་རྗེ་ཆེན་པོའི་ཚེ་སྒྲུབ་ཆེན་མོ་རྫོགས་སོ༔ གཏེར་རྒྱ༔ སྦས་རྒྱ༔ གཏད་རྒྱ༔ རྒྱ་རྒྱ་རྒྱ༔ ༔ ཐུགས་རྗེ་ཆེན་པོ་ལ་ན་མོ༔ ཐུགས་རྗེ་ཆེན་པོའི་རིན་པོ་ཆེའི་ཚེ་སྒྲུབ་འདི་ལ་དོན་རྣམ་པ་དགུ་སྟེ༔ དཀྱིལ་འཁོར་བྲི་བ་དང་༔ རྫས་བཤམ་པ་དང་༔ ཚེའི་ཏིང་ངེ་འཛིན་དང་༔ སྔགས་ཀྱི་སྤྲོ་བསྡུ་བྱ་བ་དང་༔ ལྷ་ཚོགས་བསྐུལ་ཚེ་དགུག་པ་དང་༔ ཚེ་དབང་བསྐུར་བ་དང་༔ ཚེ་བསྟིམ་ཞིང་བརྟན་པ་དང་༔ བཀྲ་ཤིས་བརྗོད་པ་དང་༔ སྨོན་ལམ་གདབ་པའོ༔ དང་པོ་ད་ལ་བྲི་བ་ནི༔ ཚེ་སྒྲུབ་གཞུང་འཛུགས་ན༔ ཐུགས་རྗེ་ཆེན་པོ་འགྲོ་བ་འདུལ་བའི་ད་ལ་བཞེངས༔ གློ་བུར་དུ་ཚེ་ཆོག་བྱེད་ན། མཎྜལ་སྟེང་དུ་ནས་བརྡལ༔ པདྨ་འདབ་མ་དྲུག་པ་བྱས་ལ༔ དེའི་དབུས་སུ་ཚེ་བཅས་ལ་བཞག་གོ༔ གཉིས་པ་རྫས་བཤམ་པ་ནི༔ ཚེ་ཆོག་གཞན་དོན་བྱེད་ན༔ ཟངས་ལ་སོགས་པ་རིན་པོ་ཆེའི་བུམ་པའམ་རྫའམ་ཤིང་གི་བུམ་པ་ལ་བྱའོ༔ མ་གས་མ་ཆག་པ་ལ༔ དག་པར་བཀྲུས་ལ༔ མགུལ་ཆིངས་ལེགས་པར་བཅིང་བར་བྱའོ༔ ནང་ལྟར་ཚེའི་སྒྲུབ་པ་བྱེད་ན༔ ཚེ་བུམ་ཐོད་པ་མཚན་དང་ལྡན་པ་ལ་བྱའོ༔ བུམ་པའི་ནང་དུ་ཚེ་ཆང་ཞྀམ་ལ་མ་ཉམས་པ་མ་འབགས་པ་གཙང་མས་དགང་ངོ་༔ ཕྱིའི་ཚེ་ཆོག་ལ༔ ཀ་ར་བུ་རམ་སྦྲང་རྩི༔ ལན་ཚྭ་མར་རྣམས་བླུག༔ ནང་གི་ཚེ་སྒྲུབ་བྱེད་ན་བདུད་རྩི་སྨན་སྒྲུབ་སྨན་བླུག༔ བླ་གཡུ་ཁ་དོག་ལེགས་པ་དང་༔ ཚེ་རྟེན་གསེར་གྱི་སྦྲང་བུ་གཞུག༔ ཚེའི་འབྲང་རྒྱས་ནས་དང་འབྲས་དང་གྲོའི་ཕྱེ་མ༔ སྒ་དང་གོ་སྙོད་ལན་ཚྭ་སྦྲང་རྩི་བུ་རམ་དང་ཀ་ར་བཏབ་ལ་མར་ཁུས་སྦྲུས་ལ་ཚེའི་འབྲང་རྒྱས་བཅས་ལ༔ ཚེ་བུམ་ཁ་བཅད༔ རྟ་མགྲིན་དང་བདུད་རྩི་འཁྱིལ་བའི་སྔགས་ཀྱིས་བགེགས་བསྐྲད༔ གུ་གུལ་གྱི་དུད་པས་བདུག༔ ཨོཾ་བཛྲ་མ་ཧཱ་ཀྲོ་ཏ་ཧ་ཡ་གྷྲཱི་བ་ཧུ་ལུ་ཧུ་ལུ་ཧཱུྃ་ཕཊ༔ ཅེས་ཚེ་སྲོག་ལ་བར་དུ་གཅོད་པའི་བགེགས་བསྐྲད་དོ༔ ཚེ་བུམ་དཀྱིལ་འཁོར་དབུས་སུ་བཞག་གོ༔ གསུམ་པ་ཚེ་སྒྲུབ་པའི་ཏིང་ངེ་འཛིན༔ ཐུགས་རྗེ་ཆེན་པོའི་ཕྲིན་ལས་གཞུང་བསྲངས་ལ༔ དམ་ཚིག་གི་དཀྱིལ་འཁོར་བསྐྱེད༔ ཡེ་ཤེས་འདི་ལ་སྤྱན་དྲངས༔ མཆོད་བསྟོད་ལ་སོགས་པ་ཚང་བར་བྱའོ༔ དེ་ནས་ཚེ་བུམ་གྱི་ནང་དུ་བྷྲཱུྃ་ལས་གཞལ་ཡས་ཁང་བསྒོམ༔ པདྨ་འདབ་བཞི་པ་ཁྱམས་དང་བཅས་པའི་དཀྱིལ་འཁོར་བསྒོམ་མོ༔ དབུས་སུ་ཚེ་དཔག་མེད་སྐུ་མདོག་དམར་པོ་ཞལ་གཅིག་ཕྱག་གཉིས་པ༔ ཕྱག་གཉིས་ཡུམ་ལ་འཁྱུད་ནས་ཚེའི་བུམ་པ་འཛིན་པ༔ ཡུམ་མཱ་མ་ཀཱི་སྐུ་མདོག་དམར་པོ་ཚེའི་བུམ་པ་བསྣམས་ནས་ཡབ་ལ་འཁྱུད་པ༔ ཡབ་ཡུམ་མཉམ་པའི་སྐྱིལ་ཀྲུང་དུ་བཞུགས་ནས༔ སྙོམས་འཇུག་མཛད་པས་བྱང་ཆུབ་སེམས་དཀར་དམར་ཚེ་བུམ་གཞལ་ཡས་ཁང་དུ་ཁེངས་པར་བསྒོམ་མོ༔ ཕྱོགས་བཞིའི་པདྨ་འདབ་མ་བཞི་ལ༔ ཤར་དུ་རྡོ་རྗེ་སེམས་དཔའ་ཡབ་ཡུམ་མཐིང་༔ ལྷོར་རིན་ཆེན་འབྱུང་ལྡན་ཡབ་ཡུམ་སེར༔ ནུབ་ཏུ་ཐུགས་རྗེ་ཆེན་པོ་ཡབ་ཡུམ་དམར༔ བྱང་དུ་དོན་ཡོད་གྲུབ་པ་ཡབ་ཡུམ་ལྗང་༔ གཡས་རྡོ་རྗེ་དང་༔ རིན་པོ་ཆེ་དང་༔ པདྨ་དང་༔ རྒྱ་གྲམ་དང་༔ སོ་སོའི་རིགས་ཀྱི་ཕྱག་མཚན་ལ༔ གཡོན་ཐམས་ཅད་ཚེའི་བུམ་པ་འཛིན་པ༔ ཡབ་ཡུམ་མཉམ་པའི་སྐྱིལ་ཀྲུང་དུ་བཞུགས་ནས༔ སྙོམས་འཇུག་མཛད་ནས་བྱང་སེམས་ཚེའི་བདུད་རྩིར་འཁྱིལ་བར་བསམ་མོ༔ འཁོར་ཚེའི་ལྷ་མོ་བརྒྱད་ཀྱིས་ཚེ་འགུགས་ཤིང་༔ བགེགས་ཀྱི་ལག་ནས་ཚེ་འཕྲོག་པར་བསྒོམས་ལ༔ ཚེ་བུམ་གྱི་དལ་ལྷ་ཚོགས་སུ་གསལ་བར་བསྒོམ་མོ༔ བཞི་པ་ཚེ་སྒྲུབ་པའི་སྔགས་ཀྱིས་སྤྲོ་བསྡུ་བྱ་བ་ནི༔ ཚེའི་བུམ་པའི་མགུལ་ནས་ཤིང་བལ་གསུམ་སྒྲིལ་བྱས་པའི༔ གཟུངས་ཐག་གཙང་མ་དྲིས་བསངས་བ་བཏགས་ལ༔ སྒྲུབ་པ་པོའི་སྲིན་ལག་ལ་བཏགས༔ ཐུགས་རྗེ་ཆེན་པོའི་དཀྱིལ་འཁོར་ལྷ་ཚོགས་གསལ་བཏབས༔ ཨོཾ་ཨཱཿཧཱུྃ་ཧྲཱིཿ ཨོཾ་མ་ཎི་པདྨེ་ཧཱུྃ༔ ཞེས་བཟླས་པ་སྟོང་ཐོན་པ་དང་༔ དཀྱིལ་འཁོར་གྱི་ལྷ་ཚོགས་ལ་མཆོད་བསྟོད་བྱ༔ དེ་ནི་བསྙེན་པའོ༔ དེ་ནས་ཚེ་སྒྲུབ་ནི༔ ཨོཾ་ཨཱཿཧཱུྃ་ཏྲཱྃ་ཧྲཱྀཿཧཱ༔ བྷྲཱུྃ་བཛྲ་ཨཱ་ཡུ་ཥེ་སིདྡྷི་སིདྡྷི་ཧཱུྃ༔ ཞེས་བཟླས་པས། བདག་ཐུགས་རྗེ་ཆེན་པོའི་ཐུགས་ཀའི་སྔགས་ཕྲེང་གི་འོད་ཟེར་བུམ་པའི་ལྷ་ཚོགས་ལ་འཕྲོས༔ བུམ་པའི་ལྷ་ཚོགས་ཀྱི་ཐུགས་ཀ་ནས་སྔགས་ཀྱི་འོད་ཟེར་ཁམས་གསུམ་དུ་འཕྲོས་ཏེ༔ འདོད་ཁམས་གཟུགས་ཁམས་གཟུགས་མེད་ཁམས་ཀྱི་ལྷ་ལ་སོགས་པའི་ཚེ་དང་བཀྲག་བསྡུས་དྲང་སྲོང་ཚེའི་རིག་འཛིན་ཐོབ་པ་རྣམས་ལ་འོད་ཟེར་གྱིས་མཆོད༔ ཚེ་དང་དངོས་གྲུབ་བཅུད་བསྡུས་ལ་ཚེ་བུམ་དུ་བསྟིམ་མོ༔ ཡང་འོད་ཟེར་འོག་མིན་གྱི་གནས་སུ་འཕྲོས་པས༔ རིགས་ལྔ་ཡབ་ཡུམ་གྱི་ཐུགས་ཀར་བསྟིམ༔ སྐུ་གསུང་ཐུགས་མཉེས་པའི་མཆོད་པ་ཕུལ་བས༔ ཐུགས་ཀའི་ཡེ་ཤེས་ཀྱི་བཅུད་བླངས་ནས༔ ཚེའི་བུམ་པ་རིགས་ལྔའི་ཐུགས་ཀར་ཐིམ་པར་བསམ་མོ༔ ཡང་སྔགས་འདི་བཟླས་སོ༔ ཨཱོཾ་བྲཱུྃ་ཛྙཱ་ན་བཛྲ་ཨཱ་ཡུ་ཤེ་ཧཱུྃ་ཛཿ ཞེས་བཟླས་པས༔ བུམ་པའི་ལྷའི་ཐུགས་ཀ་ནས་བདག་དང་ཡོན་བདག་རྣམས་ཀྱི་ཐུགས་ཀར་ཐིམ་པས༔ འཆི་བ་མེད་པ་ཚེའི་དངོས་གྲུབ་ཐོབ༔ བདག་གཞན་གྱི་སྙིང་གི་ནང་ན་ཚེ་སྲོག་གི་སྙིང་པོ་ནྲྀ་ལྗང་ཁུ་གཅིག་ཡོད་པ་ལ་ཐིམ་ནས་ཚེ་སྲོག་བཀྲག་དང་མདངས་རྒྱས་ཏེ་རྒྱས་བཏབ་ནས་ཚེ་སྲོག་སྦས་པ་ལ༔ དཔལ་རྟ་མགྲིན་སྐུ་ཚོན་གང་བ་གཅིག་གིས༔ ཙིཏྟའི་སྒོ་བསྲུངས་ནས་བགེགས་ཀྱི་ཚེ་སྲོག་ལ་བར་དུ་མི་གཅོད་པར་བསམ་མོ༔ ལྔ་པ་ཚེའི་ལྷ་ཚོགས་བསྐུལ་བ་ནི༔ ཧཱུྃ༔ བཅོམ་ལྡན་མགོན་པོ་ཚེ་དཔག་མེད༔ སྐུ་མདོག་དམར་ལ་འོད་ཟེར་འཕྲོ༔ ཕྱག་ན་ཚེ་ཡི་བུམ་པ་བསྣམས༔ ཡུམ་ནི་མཱ་མ་ཀཱི་དང་སྦྱོར༔ དེའི་ཡང་གསང་ཐུགས་ཀྱི་གའུ༔ སྙིང་པོ་ཐུགས་ཀྱི་ཨཱཿཡུཿའདི༔ གནས་པར་གྱུར་པའི་འགྲོ་དྲུག་ལ༔ མགོན་པོ་ཚེ་བཞག་གནས་ཡིན་པས༔ གང་གི་ཚེ་དེ་གནས་པར་མཛོད༔ ཨཱོཾ་བྲཱུཾ་བཛྲ་ཨཱ་ཡུ་ཤེ་ཨཱཿ ཤར་གྱི་ཕྱོགས་ནས་ཚེ་དཔག་མེད༔ རྡོ་རྗེ་སེམས་དཔའ་ཚེ་ཡི་བདག༔ ཕྱག་ན་ཤེལ་གྱི་བུམ་པ་བསྣམས༔ འདུ་འབྲལ་མེད་པའི་ཚེ་ཁུག་ལ༔ འགྱུར་བ་མེད་པའི་ཚེ་སྩོལ་ཅིག༔ ཧཱུྃ་བྲཱུཾ་སིདྡྷི་བཛྲ་ཨཱ་ཡུ་ཤེ་ཧཱུྃ་ཛཿ ལྷོ་ཡི་ཕྱོགས་ནས་ཚེ་དཔག་མེད༔ རིན་ཆེན་འབྱུང་ལྡན་ཚེ་ཡི་བདག༔ ཕྱག་ན་གསེར་གྱི་བུམ་པ་བསྣམས༔ ལྷུན་གྱིས་གྲུབ་པའི་ཚེ་ཁུག་ལ༔ འདོད་པ་ཡིད་བཞིན་ཚེ་སྩོལ་ཅིག༔ སྭཱ་བྲཱུཾ་སིདྡྷི་རཏྣ་ཨཱ་ཡུ་ཤེ་ཧཱུྃ་ཛཿ ནུབ་ཀྱི་ཕྱོགས་ནས་ཚེ་དཔག་མེད༔ འཇིག་རྟེན་མགོན་པོ་ཚེ་ཡི་བདག༔ ཕྱག་ན་ཟངས་ཀྱི་བུམ་པ་བསྣམས༔ རྣམ་དག་བདུད་རྩིའི་ཚེ་ཁུག་ལ༔ འཕེལ་འགྲིབ་མེད་པའི་ཚེ་སྩོལ་ཅིག༔ ཧྲཱིཿབྲཱུྃ་སིདྡྷི་པདྨ་ཨཱ་ཡུ་ཤེ་ཧཱུྃ་ཛཿ བྱང་གི་ཕྱོགས་ནས་ཚེ་དཔག་མེད༔ དོན་ཡོད་གྲུབ་པ་ཚེ་ཡི་བདག༔ ཕྱག་ན་གཡུ་ཡི་བུམ་པ་བསྣམས༔ འཕོ་འགྱུར་མེད་པའི་ཚེ་ཁུག་ལ༔ སྐྱེ་འཆི་མེད་པའི་ཚེ་སྩོལ་ཅིག༔ ཧཱཿབྲཱུྃ་སིདྡྷི་ཀརྨ་ཨཱ་ཡུ་ཤེ་ཧཱུྃ་ཛཿ དེ་ནས་རིགས་ཀྱི་ཡུམ་བཞིས་ཚེ་བསྟིམ་ཞིང་སྦ་བ་ནི༔ ཤར་གྱི་ཕྱོགས་ནས་ཚེ་འཛིན་མ༔ རྡོ་རྗེའི་ཡུམ་སྟེ་ཀུན་ཏུ་བཟང་༔ རིན་ཆེན་ཤེལ་གྱི་བུམ་པ་བསྣམས༔ ཚེ་དང་བདུད་རྩིས་བཀང་ནས་ནི༔ རྡོ་རྗེ་འབར་བས་རྒྱས་ཐོབ་ལ༔ ཚེ་འདི་བཅོལ་ལོ་སྲོག་འདི་སྡོམས༔ ཧཱུྃ་ཨཱཿཡུཿནྲྀ་ཛཿ ལྷོ་ཡི་ཕྱོགས་ནས་ཚེ་འཛིན་མ༔ རིན་ཆེན་ཡུམ་སྟེ་གོས་དཀར་མོ༔ རིན་ཆེན་གསེར་གྱི་བུམ་པ་བསྣམས༔ ཚེ་དང་བདུད་རྩིས་བཀང་ནས་ནི༔ རིན་ཆེན་འབར་བས་རྒྱས་ཐོབ་ལ༔ ཚེ་འདི་བཅོལ་ལོ་སྲོག་འདི་སྡོམས༔ ཏྲཱྃ་ཨཱ་ཡུཿནྲྀ་ཛཿ ནུབ་ཀྱི་ཕྱོགས་ནས་ཚེ་འཛིན་མ༔ པདྨ་ཡུམ་སྟེ་ཁྲོ་གཉེར་མ༔ པདྨ་རཱ་གའི་བུམ་པ་བསྣམས༔ ཚེ་དང༴ པདྨ་འབར༴ ཚེ་འདི༴ ཧྲཱིཿཨཱ་ཡུཿནྲྀ་ཛཿ བྱང་གི་ཕྱོགས་ནས་ཚེ༴ ལས་ཀྱི་ཡུམ་སྟེ་དམ་ཚིག་སྒྲོལ༔ ཕྱག་ན་གཡུ་ཡི་བུམ་པ་བསྣམས༔ ཚེ་དང་བདུད་རྩིས་བཀང་ནས་ནི༔ རྒྱ་གྲམ་འབར་བས་རྒྱས་ཐོབ་ལ༔ ཚེ་འདི་བཅོལ་ལོ་སྲོག་འདི་སྡོམས༔ ཧཱ་ཨཱ་ཡུཿནྲྀ་ཛ༔ ཅེས་པས་ཡུམ་བཞིས་ཚེ་གནས་སུ་བསྟིམས་ནས་རྒྱས་བཏབ་པར་བསྒོམ་མོ༔ དེ་ནས་ཚེའི་ཕོ་ཉ་ལྷ་མོ་བརྒྱད་ཀྱིས་ཚེ་དགུག་པ༔ ཤར་ཕྱོགས་གངས་རི་དཀར་པོའི་གཞལ་ཡས་ནས༔ དཀར་མོ་མགྱོགས་མ་ཚེ་ཡི་བུམ་པ་འཛིན༔ ཐུགས་ཀྱི་སྤྲུལ་པ་ལྷ་མོ་དཀར་མོ་འབུམ༔ རྒྱལ་པོ་བརྒྱ་བྱིན་ལག་ནས་ཚེ་ཁུག་ཅིག༔ ནྲྀ་བྲཱུཾ་ཛཿཛཿ ལྷོ་ཕྱོགས་བཻཌཱུརྱ་ཡི་ཞིང་ཁམས་ནས༔ སྔོན་མོ་མགྱོགས་མ་ཚེ་ཡི༴ ཐུགས་ཀྱི་སྤྲུལ་པ་ལྷ་མོ་སྔོན་མོ་འབུམ༔ གཤིན་རྗེ་འཆི་བདག་ལག་ནས་ཚེ་ཁུག་ཅིག༔ ནྲྀ་བྲཱུཾ་ཛཿཛཿ ནུབ་ཕྱོགས་པདྨ་རཱ་གའི་གཞལ་ཡས་ནས༔ དམར་མོ་མགྱོགས་མ་ཚེ་ཡི་བུམ་པ་འཛིན༔ ཐུགས་ཀྱི་སྤྲུལ་པ་དམར་མོ་འབུམ་དང་བཅས༔ ས་བདག་ཀླུ་གཉན་ལག་ནས་ཚེ༴ ནྲྀ་བྲཱུཾ་ཛཿཛཿ བྱང་ཕྱོགས་ཨིནྡྲ་ནཱི་ལའི་གཞལ་ཡས༴ སེར་ལྗང་མགྱོགས་མ་ཚེ་ཡི༴ ཐུགས་ཀྱི་སྤྲུལ་པ་སེར་ལྗང་འབུམ་དང་བཅས༴ བདུད་དང་གནོད་སྦྱིན་ལག་ནས་ཚེ་ཁུག་ཅིག༔ ནྲྀ་བྲཱུཾ་ཛཿཛཿ ཡང་ཕྱག་རྒྱ་བཞིའི་ལྷ་མོས་ཚེ་དགུག་པ། ཁམས་གསུམ་གནས་ནས་ཚེ་འགུག་མ༔ ལྷ་མོ་རྡོ་རྗེ་ལྕགས་ཀྱུ་དཀར༔ ཕྱག་ན་ལྕགས་ཀྱུ་གའུ་བསྣམས༔ དྲོངས་ཤིག་དྲོངས་ཤིག་ཚེ་དྲོངས་ཤིག༔ བཛྲ་ཨཾ་གྷུ་ཤ་ནྲྀ་བྲཱུཾ་ཛཿཛཿ དུས་གསུམ་གནས་ནས་ཚེ་འགུགས་མ༔ ལྷ་མོ་རྡོ་རྗེ་ཞགས་པ་སེར༔ ཕྱག་ན་ཞགས་པ་གྭའུ་བསྣམས༔ དྲོངས་ཤིག་དྲོངས་ཤིག༴ བཛྲ་པཱ་ཤ་ཧཱུྃ་ནྲྀ་བྲཱུཾ་ཛཿཛཿ སྲིད་གསུམ་གནས་ནས༴ ལྷ་མོ་རྡོ་རྗེ་ལྕགས་སྒྲོག་དམར༔ ཕྱག་ན་ལྕགས་སྒྲོག་གྭའུ་བསྣམས༔ དྲོངས་ཤིག༴ བཛྲ་སྥོ་ཊ་བཾ་ནྲྀ་བྲཱུཾ་ཛཿཛཿ མཆོད་བསྟོད་གནས་ནས༴ ལྷ་མོ་རྡོ་རྗེ་དྲིལ་འཁྲོལ་སྔོ༔ ཕྱག་ན་དྲིལ་བུ་གའུ་བསྣམས༔ དྲོངས་ཤིག་དྲོངས༴ བཛྲ་གྷནྡྷེ་ཧོ་ནྲྀ་བྲཱུཾ་ཛཿཛཿ མགྱོགས་མ་རྣམས་ཀྱིས་ཚེ་དྲོངས་ལ༔ ལྷ་མོ་བཞི་ཡིས་ཚེ་སྟིམས་ལ༔ འཆི་མེད་རྡོ་རྗེས་རྒྱས་ཐོབ་ཅིག༔ བྱིན་ཆེན་རྣམས་ཀྱིས་བྱིན་ཕོབ་ལ༔ དབང་ཆེན་རྣམས་ཀྱིས་དབང་སྐུར་ཅིག༔ ཨཱ་ཡུ་ཤེ་ཛྙཱ་ན་ཛཿཛཿ ཞེས་བསྐུལ་བས༔ ལྷ་མོ་བརྒྱད་ཀྱིས་ཚེ་དྲངས་ཏེ༔ ཚེ་བསྟིམས་ནས༔ འཆི་བ་མེད་པའི་ཚེ་དང་ལྡན་པར་བསམ་མོ༔ དྲུག་པ་ཚེ་དབང་བསྐུར་བ་ནི༔ ཚེ་བུམ་བཏེགས་ཏེ་སྒྲུབ་པ་པོ་རྣམས་ཀྱི་སྤྱི་བོར་བཞག་ལ། བཅོམ་ལྡན་མགོན་པོ་ཚེ་དཔག་མེད༔ ཚེ་དཔག་མེད་ལ་ཕྱག་འཚལ་བསྟོད༔ སྐུ་གསུང་ཐུགས་ལྡན་མཁའ་དང་མཉམ༔ ཚེ་དཔག་མེད་ལ་ཕྱག་འཚལ་བསྟོད༔ ཚེ་ཡི་དབང་མཆོག་བསྐུར་དུ་གསོལ༔ ཨོཾ་བུདྡྷ་ཀ་ལ་ཤ་ཨ་བྷི་ཥིཉྩ་ཨོཾ༔ ཧཱུྃ་བཛྲ་ཀ་ལ་ཤ་ཨ་བྷི་ཥིཉྩ་ཧཱུྃ༔ ཏྲཱྃ་རཏྣ་ཀ་ལ་ཤ་ཨ་བྷི་ཥིཉྩ་ཏྲཱྃ༔ ཨཱཾ་པདྨ་ཀ་ལ་ཤ་ཨ་བྷི་ཥིཉྩ་ཨཱཿ ཧཱ་ཀརྨ་ཀ་ལ་ཤ་ཨ་བྷི་ཥིཉྩ་ཧཱ༔ ཚེའི་དབང་བསྐུར་བས༔ བཅོམ་ལྡན་འདས་ཚེ་དཔག་ཏུ་མེད་པའི་སྐུ་ཚེ་དང་ལོངས་སྤྱོད་དང་ལྡན་པའི་ཚེའི་དབང་དང་དངོས་གྲུབ་ཐོབ་པར་གྱུར་ཅིག༔ ཅེས་དབང་བསྐུར་རོ༔ བདུན་པ་ཚེ་བསྟིམ་ཞིང་བརྟན་པར་བྱ་བ་ནི༔ བཅོམ་ལྡན་མགོན་པོ་ཚེ་དཔག་མེད༔ ཨོཾ་སྐུ་ཡི་སྐུ་སྟེ་སྐུ་ལ་ཐིམ༔ ཕུང་པོ་ལྔ་ལ་རབ་ཏུ་ཐིམ༔ ཨཱཿགསུང་གི་གསུང་སྟེ་གསུང་ལ་ཐིམ༔ ལྗགས་ཀྱི་དབང་པོ་མཆོག་ལ་ཐིམ༔ ཧཱུྃ༔ ཐུགས་ཀྱི་ཐུགས་ཏེ་ཐུགས་ལ་ཐིམ༔ ཐུགས་ཀྱི་སྙིང་པོ་ཚེ་ལ་ཐིམ༔ ཞེས་ལུས་ངག་ཡིད་གསུམ་ལ་བསྟིམས་ནས་བརྟན་པར་བསམ་མོ༔ བརྒྱད་པ་བཀྲ་ཤིས་བརྗོད་ཅིང་དངོས་གྲུབ་བླངས༔ བཅོམ་ལྡན་མགོན་པོ་ཚེ་དཔག་མེད༔ འཆི་བ་མེད་པ་རྡོ་རྗེའི་ཚེ༔ སྤྲོས་པས་ཁམས་གསུམ་བཀྲག་དང་ལྡན༔ བསྡུས་པས་ལུས་ལ་གཟི་མདངས་འབར༔ བཅིངས་པས་རྡོ་རྗེ་ལུ་གུ་རྒྱུད༔ བརྟན་པས་མི་འགྱུར་རྡོ་རྗེ་འདྲ༔ བདག་ཅག་སྐལ་ལྡན་མཆེད་ལྕམ་ལ༔ འཆི་མེད་ཚེ་ཡི་དངོས་གྲུབ་སྩོལ༔ ཉིན་མཚན་གཉིས་ཀྱི་བཀྲ་ཤིས་པ༔ ཉི་ཟླ་བཞིན་དུ་རྒྱུན་ཆད་མེད༔ ལོ་བརྒྱ་འཚོ་བའི་བཀྲ་ཤིས་པ༔ ལོངས་སྤྱོད་ལྡན་ཞིང་ཕུན་སུམ་ཚོགས༔ སྟོན་བརྒྱ་མཐོང་བའི་བཀྲ་ཤིས་པ༔ ཆོས་དང་འཕྲད་ནས་སངས་རྒྱས་ཤོག༔ དགུ་པ་སྨོན་ལམ་གདབ་པ། ཚེ་ཟན་ཡེ་ཤེས་གསལ་བར་གྱུར༔ ཚེ་ཆང་བདུད་རྩི་བྱང་སེམས་གྱུར༔ ཚེ་མར་གསལ་སྟོང་ཐུགས་སུ་གྱུར༔ སྐུ་གསུམ་ཀློང་ཡངས་ཚེ་རུ་གྱུར༔ སྐྱེ་འཆི་མེད་པའི་ཚེ་ཐོབ་ཤོག༔ འགྱུར་བ་མེད་པའི་སྐུ་ཐོབ་ཤོག༔ ཅེས་བརྗོད་ལ༔ ཚེའི་འབྲང་རྒྱས་དང་ཚེ་རིལ་དངོས་གྲུབ་ཡིན་པས༔ ཚེ་བུམ་གྱི་ལྷ་རྣམས་འོད་དུ་ཞུ་བ་བསྟིམས་ལ་རོལ་ལོ༔ སློབ་དཔོན་པདྨ་འབྱུང་གནས་ཀྱིས་མཛད་པའི༔ ཐུགས་རྗེ་ཆེན་པོའི་ཚེ་སྒྲུབ་ཆེན་མོ་རྫོགས་སོ༔ གཏེར་རྒྱ༔ སྦས་རྒྱ༔ གཏད་རྒྱ༔ ཨོ་རྒྱན་པདྨ། མཁའ་འགྲོ་མཚོ་རྒྱལ། ཁྲི་སྲོང་ལྡེའུ་བཙན། མངའ་བདག་ཆེན་པོ། འགྲོ་བའི་མགོན་པོ། སྲས་བློ་ལྡན། མངའ་བདག་བདུད་འདུལ། མདོ་སྡེ་སེང་གེ །མངའ་བདག་པདྨ་དངོས་གྲུབ། དེ་ལ་བདག་ཆོས་སེང་གིས་ཞུས་པ་ལགས་སོ། །རྡོ་རྗེ་ལྟ་བུའི་ཚེ་ཐོབ་ཤོག །ལྷོ་བྲག་ལྕགས་ཕུར་དུ་བདག་ཆོས་སེང་གིས་སྨྱུ་གུ་ཕོག་ཚད་བྱས་ནས་བྲིས།།

[edit]

_____@#:__thugs rje chen po 'gro 'dul las:__tshe sgrub chen mo bzhugs so:[ ¿ ]thugs rje chen po la phyag 'tshal lo:__thugs rje chen po tshe dpag med:__rdo rje rin chen tshe sgrub ni:__dus min 'chi las bzlog pa dang :__tshe dbugs nyams dang zad pa bsring :__bkra shis tshe yi sgrub pa bstan:__dkyil 'khor rdzas dang ting 'dzin dang :__sngags dang lha tshogs bskul ba dang :__tshe dbang bskur cing bstim brtan dang :__bkra shis brjod dang smon lam mo:__dang po dkyil 'khor bstan pa ni:__'gro ba 'dul ba'i dkyil 'khor bzhengs:__yang na maN+Dal gtsang ma'i steng :__'bru brdal pad+ma 'dab drug bya:__rdzas ni tshe yi bum pa ni:__phyi yi bum pa rin po che:__ma gas ma chag gtsang mar bya:__nang ni mtshan ldan ka pA lar:__'bru mchog bcud ldan ma nyams blugs:__nas 'bras phye ma mar gyis sbru:__spod sna tshogs pas bran pa yi:__tshe yi 'brang rgyas bcas nas ni:__ril bu mched kyi grangs dang sbyar:__sman dang bdud rtsi tshe chang blugs:__gser g.yu gnyis kyi tshe rten bya:__tshe bum dkyil 'khor dbus su bzhag:__bar gcod bgegs bskrad gu gul bdug:__thugs rje chen po'i da la yi:__dam tshig sems dpa'i dkyil 'khor bskyed:__ye shes dkyil 'khor dgug gzhug bya:__tshe bum gzhal yas khang nang du:__lha ni mgon po tshe dpag med:__sku mdog dmar ser 'od dang ldan:__zhal gcig phyag gnyis tshe bum bsnams:__yum yang mA ma kI la 'khyud:__rigs bzhi yab yum 'khor gyis bskor:__sku mdog phyag mtshan rigs kyis ston:__g.yas pa rigs kyi phyag mtshan la:__g.yon pa tshe yi bum pa 'dzin:__bkra shis lha mo brgyad kyis bskor:__tshe bum nang du gsal bar bskyed:__sngags kyi spro bsdu bya ba ni:__tshe bum mgul nas gzungs thag gdag:__bdag nyid dkyil 'khor lhar gsal la:__oM AHhU~M hrIH__oM ma Ni pad+me hU~M:__yi ge bcu pa'i bsnyen pa bya:__stong rdzogs tshe yi bsnyen pa ni:__oM AHhU~M trA~M hrIHb+h+rU~M badz+ra A yu she AH__sid+d+hi sid+d+hi hU~M:__zhes ni brjod pa'i 'phro 'du yis:__thugs ka'i sngags phreng 'phros 'dus pas:__bum pa'i lha tshogs rnams la thim:__bum pa'i lha las 'od 'phros pas:__lha dang drang srong rnams la phog:__mchod mnyes byas nas tshe lha'i bcud:__dngos grub tshul du bdag dang ni:__bum pa'i lha yi thugs kar thim:__rigs lnga bde bar gshegs pa yi:__thugs nas 'od kyi bcud blangs nas:__tshe yi bum pa'i nang du thim:__yang ni sngags kyi spro bsdu yis:__bum pa'i lha yi thugs ka nas:__bdag dang bsgrub bya'i thugs kar thim:__'chi med tshe yi dngos grub bsdus:__rgyas btab snying gi nang na gnas:__ha ya grI bas sgo bsrungs bsam:__de nas tshe yi lha tshogs bskul:__stong gsum lo ka'i khams kun nas:__tshe nyams pa dang tshe zad pa:__lha srin lag tu tshe shor ba:__'phrog dang bkug nas bdag la bstims:__de nas yum lngas bstims la sba:__de nas tshe yi dbang bskur la:__bkra shis brjod de dbang bskur la:__tshe yi 'brang rgyas tshe ril dang :__tshe chang la sogs dngos grub blang :__tshe yi dngos grub thob par 'gyur:__bdag 'dra pad+ma 'byung gnas kyis:__'chi med tshe yi dngos grub thob:__tshe sgrub chen po 'di brtsams pas:__'gro kun tshe ring grub thob shog:__thugs rje chen po'i tshe sgrub chen mo rdzogs so:__gter rgya:__sbas rgya:__gtad rgya:__rgya rgya rgya:__:[ ¿ ]thugs rje chen po la na mo:__thugs rje chen po'i rin po che'i tshe sgrub 'di la don rnam pa dgu ste:__dkyil 'khor bri ba dang :__rdzas bsham pa dang :__tshe'i ting nge 'dzin dang :__sngags kyi spro bsdu bya ba dang :__lha tshogs bskul tshe dgug pa dang :__tshe dbang bskur ba dang :__tshe bstim zhing brtan pa dang :__bkra shis brjod pa dang :__smon lam gdab pa'o:__dang po da la bri ba ni:__tshe sgrub gzhung 'dzugs na:__thugs rje chen po 'gro ba 'dul ba'i da la bzhengs:__glo bur du tshe chog byed na/__maN+Dal steng du nas brdal:__pad+ma 'dab ma drug pa byas la:__de'i dbus su tshe bcas la bzhag go:__gnyis pa rdzas bsham pa ni:__tshe chog gzhan don byed na:__zangs la sogs pa rin po che'i bum pa'am rdza'am shing gi bum pa la bya'o:__ma gas ma chag pa la:__dag par bkrus la:__mgul chings legs par bcing bar bya'o:__nang ltar tshe'i sgrub pa byed na:__tshe bum thod pa mtshan dang ldan pa la bya'o:__bum pa'i nang du tshe chang zh-im la ma nyams pa ma 'bags pa gtsang mas dgang ngo :__phyi'i tshe chog la:__ka ra bu ram sbrang rtsi:__lan tshwa mar rnams blug:__nang gi tshe sgrub byed na bdud rtsi sman sgrub sman blug:__bla g.yu kha dog legs pa dang :__tshe rten gser gyi sbrang bu gzhug:__tshe'i 'brang rgyas nas dang 'bras dang gro'i phye ma:__sga dang go snyod lan tshwa sbrang rtsi bu ram dang ka ra btab la mar khus sbrus la tshe'i 'brang rgyas bcas la:__tshe bum kha bcad:__rta mgrin dang bdud rtsi 'khyil ba'i sngags kyis bgegs bskrad:__gu gul gyi dud pas bdug:__oM badz+ra ma hA kro ta ha ya g+h+rI ba hu lu hu lu hU~M phaT:__ces tshe srog la bar du gcod pa'i bgegs bskrad do:__tshe bum dkyil 'khor dbus su bzhag go:__gsum pa tshe sgrub pa'i ting nge 'dzin:__thugs rje chen po'i phrin las gzhung bsrangs la:__dam tshig gi dkyil 'khor bskyed:__ye shes 'di la spyan drangs:__mchod bstod la sogs pa tshang bar bya'o:__de nas tshe bum gyi nang du b+h+rU~M las gzhal yas khang bsgom:__pad+ma 'dab bzhi pa khyams dang bcas pa'i dkyil 'khor bsgom mo:__dbus su tshe dpag med sku mdog dmar po zhal gcig phyag gnyis pa:__phyag gnyis yum la 'khyud nas tshe'i bum pa 'dzin pa:__yum mA ma kI sku mdog dmar po tshe'i bum pa bsnams nas yab la 'khyud pa:__yab yum mnyam pa'i skyil krung du bzhugs nas:__snyoms 'jug mdzad pas byang chub sems dkar dmar tshe bum gzhal yas khang du khengs par bsgom mo:__phyogs bzhi'i pad+ma 'dab ma bzhi la:__shar du rdo rje sems dpa' yab yum mthing :__lhor rin chen 'byung ldan yab yum ser:__nub tu thugs rje chen po yab yum dmar:__byang du don yod grub pa yab yum ljang :__g.yas rdo rje dang :__rin po che dang :__pad+ma dang :__rgya gram dang :__so so'i rigs kyi phyag mtshan la:__g.yon thams cad tshe'i bum pa 'dzin pa:__yab yum mnyam pa'i skyil krung du bzhugs nas:__snyoms 'jug mdzad nas byang sems tshe'i bdud rtsir 'khyil bar bsam mo:__'khor tshe'i lha mo brgyad kyis tshe 'gugs shing :__bgegs kyi lag nas tshe 'phrog par bsgoms la:__tshe bum gyi dal lha tshogs su gsal bar bsgom mo:__bzhi pa tshe sgrub pa'i sngags kyis spro bsdu bya ba ni:__tshe'i bum pa'i mgul nas shing bal gsum sgril byas pa'i:__gzungs thag gtsang ma dris bsangs ba btags la:__sgrub pa po'i srin lag la btags:__thugs rje chen po'i dkyil 'khor lha tshogs gsal btabs:__oM AHhU~M hrIH__oM ma Ni pad+me hU~M:__zhes bzlas pa stong thon pa dang :__dkyil 'khor gyi lha tshogs la mchod bstod bya:__de ni bsnyen pa'o:__de nas tshe sgrub ni:__oM AHhU~M trA~M hr-IHhA:__b+h+rU~M badz+ra A yu She sid+d+hi sid+d+hi hU~M:__zhes bzlas pas/__bdag thugs rje chen po'i thugs ka'i sngags phreng gi 'od zer bum pa'i lha tshogs la 'phros:__bum pa'i lha tshogs kyi thugs ka nas sngags kyi 'od zer khams gsum du 'phros te:__'dod khams gzugs khams gzugs med khams kyi lha la sogs pa'i tshe dang bkrag bsdus drang srong tshe'i rig 'dzin thob pa rnams la 'od zer gyis mchod:__tshe dang dngos grub bcud bsdus la tshe bum du bstim mo:__yang 'od zer 'og min gyi gnas su 'phros pas:__rigs lnga yab yum gyi thugs kar bstim:__sku gsung thugs mnyes pa'i mchod pa phul bas:__thugs ka'i ye shes kyi bcud blangs nas:__tshe'i bum pa rigs lnga'i thugs kar thim par bsam mo:__yang sngags 'di bzlas so:__A+oM brU~M dz+nyA na badz+ra A yu she hU~M dzaH__zhes bzlas pas:__bum pa'i lha'i thugs ka nas bdag dang yon bdag rnams kyi thugs kar thim pas:__'chi ba med pa tshe'i dngos grub thob:__bdag gzhan gyi snying gi nang na tshe srog gi snying po nr-i ljang khu gcig yod pa la thim nas tshe srog bkrag dang mdangs rgyas te rgyas btab nas tshe srog sbas pa la:__dpal rta mgrin sku tshon gang ba gcig gis:__tsit+ta'i sgo bsrungs nas bgegs kyi tshe srog la bar du mi gcod par bsam mo:__lnga pa tshe'i lha tshogs bskul ba ni:__hU~M:__bcom ldan mgon po tshe dpag med:__sku mdog dmar la 'od zer 'phro:__phyag na tshe yi bum pa bsnams:__yum ni mA ma kI dang sbyor:__de'i yang gsang thugs kyi ga'u:__snying po thugs kyi AHyuH'di:__gnas par gyur pa'i 'gro drug la:__mgon po tshe bzhag gnas yin pas:__gang gi tshe de gnas par mdzod:__A+oM brUM badz+ra A yu she AH__shar gyi phyogs nas tshe dpag med:__rdo rje sems dpa' tshe yi bdag:__phyag na shel gyi bum pa bsnams:__'du 'bral med pa'i tshe khug la:__'gyur ba med pa'i tshe stsol cig:__hU~M brUM sid+d+hi badz+ra A yu she hU~M dzaH__lho yi phyogs nas tshe dpag med:__rin chen 'byung ldan tshe yi bdag:__phyag na gser gyi bum pa bsnams:__lhun gyis grub pa'i tshe khug la:__'dod pa yid bzhin tshe stsol cig:__swA brUM sid+d+hi rat+na A yu she hU~M dzaH__nub kyi phyogs nas tshe dpag med:__'jig rten mgon po tshe yi bdag:__phyag na zangs kyi bum pa bsnams:__rnam dag bdud rtsi'i tshe khug la:__'phel 'grib med pa'i tshe stsol cig:__hrIHbrU~M sid+d+hi pad+ma A yu she hU~M dzaH__byang gi phyogs nas tshe dpag med:__don yod grub pa tshe yi bdag:__phyag na g.yu yi bum pa bsnams:__'pho 'gyur med pa'i tshe khug la:__skye 'chi med pa'i tshe stsol cig:__hAHbrU~M sid+d+hi karma A yu she hU~M dzaH__de nas rigs kyi yum bzhis tshe bstim zhing sba ba ni:__shar gyi phyogs nas tshe 'dzin ma:__rdo rje'i yum ste kun tu bzang :__rin chen shel gyi bum pa bsnams:__tshe dang bdud rtsis bkang nas ni:__rdo rje 'bar bas rgyas thob la:__tshe 'di bcol lo srog 'di sdoms:__hU~M AHyuHnr-i dzaH__lho yi phyogs nas tshe 'dzin ma:__rin chen yum ste gos dkar mo:__rin chen gser gyi bum pa bsnams:__tshe dang bdud rtsis bkang nas ni:__rin chen 'bar bas rgyas thob la:__tshe 'di bcol lo srog 'di sdoms:__trA~M A yuHnr-i dzaH__nub kyi phyogs nas tshe 'dzin ma:__pad+ma yum ste khro gnyer ma:__pad+ma rA ga'i bum pa bsnams:__tshe dang=__pad+ma 'bar=__tshe 'di=__hrIHA yuHnr-i dzaH__byang gi phyogs nas tshe=__las kyi yum ste dam tshig sgrol:__phyag na g.yu yi bum pa bsnams:__tshe dang bdud rtsis bkang nas ni:__rgya gram 'bar bas rgyas thob la:__tshe 'di bcol lo srog 'di sdoms:__hA A yuHnr-i dza:__ces pas yum bzhis tshe gnas su bstims nas rgyas btab par bsgom mo:__de nas tshe'i pho nya lha mo brgyad kyis tshe dgug pa:__shar phyogs gangs ri dkar po'i gzhal yas nas:__dkar mo mgyogs ma tshe yi bum pa 'dzin:__thugs kyi sprul pa lha mo dkar mo 'bum:__rgyal po brgya byin lag nas tshe khug cig:__nr-i brUM dzaHdzaH__lho phyogs baiDUr+ya yi zhing khams nas:__sngon mo mgyogs ma tshe yi=__thugs kyi sprul pa lha mo sngon mo 'bum:__gshin rje 'chi bdag lag nas tshe khug cig:__nr-i brUM dzaHdzaH__nub phyogs pad+ma rA ga'i gzhal yas nas:__dmar mo mgyogs ma tshe yi bum pa 'dzin:__thugs kyi sprul pa dmar mo 'bum dang bcas:__sa bdag klu gnyan lag nas tshe=__nr-i brUM dzaHdzaH__byang phyogs in+d+ra nI la'i gzhal yas=__ser ljang mgyogs ma tshe yi=__thugs kyi sprul pa ser ljang 'bum dang bcas=__bdud dang gnod sbyin lag nas tshe khug cig:__nr-i brUM dzaHdzaH__yang phyag rgya bzhi'i lha mos tshe dgug pa/__khams gsum gnas nas tshe 'gug ma:__lha mo rdo rje lcags kyu dkar:__phyag na lcags kyu ga'u bsnams:__drongs shig drongs shig tshe drongs shig:__badz+ra aM g+hu sha nr-i brUM dzaHdzaH__dus gsum gnas nas tshe 'gugs ma:__lha mo rdo rje zhags pa ser:__phyag na zhags pa gwa'u bsnams:__drongs shig drongs shig=__badz+ra pA sha hU~M nr-i brUM dzaHdzaH__srid gsum gnas nas=__lha mo rdo rje lcags sgrog dmar:__phyag na lcags sgrog gwa'u bsnams:__drongs shig=__badz+ra s+pho Ta baM nr-i brUM dzaHdzaH__mchod bstod gnas nas=__lha mo rdo rje dril 'khrol sngo:__phyag na dril bu ga'u bsnams:__drongs shig drongs=__badz+ra g+han+d+he ho nr-i brUM dzaHdzaH__mgyogs ma rnams kyis tshe drongs la:__lha mo bzhi yis tshe stims la:__'chi med rdo rjes rgyas thob cig:__byin chen rnams kyis byin phob la:__dbang chen rnams kyis dbang skur cig:__A yu she dz+nyA na dzaHdzaH__zhes bskul bas:__lha mo brgyad kyis tshe drangs te:__tshe bstims nas:__'chi ba med pa'i tshe dang ldan par bsam mo:__drug pa tshe dbang bskur ba ni:__tshe bum btegs te sgrub pa po rnams kyi spyi bor bzhag la/__bcom ldan mgon po tshe dpag med:__tshe dpag med la phyag 'tshal bstod:__sku gsung thugs ldan mkha' dang mnyam:__tshe dpag med la phyag 'tshal bstod:__tshe yi dbang mchog bskur du gsol:__oM bud+d+ha ka la sha a b+hi Shiny+tsa oM:__hU~M badz+ra ka la sha a b+hi Shiny+tsa hU~M:__trA~M rat+na ka la sha a b+hi Shiny+tsa trA~M:__AM pad+ma ka la sha a b+hi Shiny+tsa AH__hA karma ka la sha a b+hi Shiny+tsa hA:__tshe'i dbang bskur bas:__bcom ldan 'das tshe dpag tu med pa'i sku tshe dang longs spyod dang ldan pa'i tshe'i dbang dang dngos grub thob par gyur cig:__ces dbang bskur ro:__bdun pa tshe bstim zhing brtan par bya ba ni:__bcom ldan mgon po tshe dpag med:__oM sku yi sku ste sku la thim:__phung po lnga la rab tu thim:__AHgsung gi gsung ste gsung la thim:__ljags kyi dbang po mchog la thim:__hU~M:__thugs kyi thugs te thugs la thim:__thugs kyi snying po tshe la thim:__zhes lus ngag yid gsum la bstims nas brtan par bsam mo:__brgyad pa bkra shis brjod cing dngos grub blangs:__bcom ldan mgon po tshe dpag med:__'chi ba med pa rdo rje'i tshe:__spros pas khams gsum bkrag dang ldan:__bsdus pas lus la gzi mdangs 'bar:__bcings pas rdo rje lu gu rgyud:__brtan pas mi 'gyur rdo rje 'dra:__bdag cag skal ldan mched lcam la:__'chi med tshe yi dngos grub stsol:__nyin mtshan gnyis kyi bkra shis pa:__nyi zla bzhin du rgyun chad med:__lo brgya 'tsho ba'i bkra shis pa:__longs spyod ldan zhing phun sum tshogs:__ston brgya mthong ba'i bkra shis pa:__chos dang 'phrad nas sangs rgyas shog:__dgu pa smon lam gdab pa/__tshe zan ye shes gsal bar gyur:__tshe chang bdud rtsi byang sems gyur:__tshe mar gsal stong thugs su gyur:__sku gsum klong yangs tshe ru gyur:__skye 'chi med pa'i tshe thob shog:__'gyur ba med pa'i sku thob shog:__ces brjod la:__tshe'i 'brang rgyas dang tshe ril dngos grub yin pas:__tshe bum gyi lha rnams 'od du zhu ba bstims la rol lo:__slob dpon pad+ma 'byung gnas kyis mdzad pa'i:__thugs rje chen po'i tshe sgrub chen mo rdzogs so:__gter rgya:__sbas rgya:__gtad rgya:__o rgyan pad+ma/__mkha' 'gro mtsho rgyal/___khri srong lde'u btsan/__mnga' bdag chen po/__'gro ba'i mgon po/__sras blo ldan/__mnga' bdag bdud 'dul/__mdo sde seng ge__/mnga' bdag pad+ma dngos grub/__de la bdag chos seng gis zhus pa lags so/__/rdo rje lta bu'i tshe thob shog__/lho brag lcags phur du bdag chos seng gis smyu gu phog tshad byas nas bris//___