JKW-KABUM-10-THA-004-019

🚧 This website is under continued development. We appreciate your patience!

Previous Text Back to Volume PageNext Text

མཚན་ཡང་དག་པར་བརྗོད་པའི་འཇམ་དཔལ་གྱི་རྗེས་གནང་བྱ་ཚུལ་རིན་པོ་ཆེའི་རྣ་རྒྱན།

Wylie title	mtshan yang dag par brjod pa'i 'jam dpal gyi rjes gnang bya tshul rin po che'i rna rgyan
Location	mkhyen brtse'i bka' 'bum Volume 10, sde tshan 4, Text 19, Pages 297-307 (Folios 58a1 to 63a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. mtshan yang dag par brjod pa'i 'jam dpal gyi rjes gnang bya tshul rin po che'i rna rgyan. In 'jam dbyangs mkhyen brtse'i dbang po'i bka' 'bum, Vol. 10: 297-307. Khams sde dge rdzong sar dgon: Rdzong sar blo gros phun tshogs, 2020.
Genre	Permission to Invoke (anujñā) - rjes gnang
Deity	'jam dpal dbyangs
Colophon	།མཚན་ཡང་དག་པར་བརྗོད་པའི་འཇམ་དཔལ་གྱི་རྗེས་སུ་གནང་བ་འདི་ཉིད་ཉེ་བར་མཁོ་བའི་དབང་གིས་མང་དུ་ཐོས་པའི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས། ཐམས་ཅད་མཁྱེན་པ་དཀོན་མཆོག་ལྷུན་གྲུབ་ཀྱི་གསུང་རབ་ཇི་ལྟ་བ་བཞིན་ཤིན་ཏུ་གསལ་བར་བཀོད་པ་དགེ་ལེགས་སུ་གྱུར་ཅིག །སྒྲུབ་ཐབས་བརྒྱ་རྩ་ནས་འབྱུང་བའི་ལྷག་པའི་ལྷ་ཐམས་ཅད་ལ་རྗེས་གནང་གི་ཆིངས་འདི་ཉིད་སྦྱར་བར་བྱ་བ་ཡིན་ནོ།
	mtshan yang dag par brjod pa'i 'jam dpal gyi rjes su gnang ba 'di nyid nye bar mkho ba'i dbang gis mang du thos pa'i bya bral ba 'jam dbyangs mkhyen brtse'i dbang pos/__thams cad mkhyen pa dkon mchog lhun grub kyi gsung rab ji lta ba bzhin shin tu gsal bar bkod pa dge legs su gyur cig__/sgrub thabs brgya rtsa nas 'byung ba'i lhag pa'i lha thams cad la rjes gnang gi chings 'di nyid sbyar bar bya ba yin no

1 Texts in this Section (sde tshan or chos tshan)

19 297-307	མཚན་ཡང་དག་པར་བརྗོད་པའི་འཇམ་དཔལ་གྱི་རྗེས་གནང་བྱ་ཚུལ་རིན་པོ་ཆེའི་རྣ་རྒྱན། mtshan yang dag par brjod pa'i 'jam dpal gyi rjes gnang bya tshul rin po che'i rna rgyan Permission to Invoke (anujñā) - rjes gnang	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །མཚན་ཡང་དག་པར་བརྗོད་པའི་འཇམ་དཔལ་གྱི་རྗེས་གནང་བྱ་ཚུལ་རིན་པོ་ཆེའི་རྣ་རྒྱན་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། །ངག་གི་དབང་ཕྱུག་བླ་མ་ལ་བཏུད་ནས། །གང་དེའི་རྡོ་རྗེའི་མཚན་དོན་ཡང་དག་པར། །བརྗོད་པའི་རྒྱུད་ལས་ལེགས་གསུངས་འཇམ་དཔལ་གྱི། །རྗེས་གནང་རིན་ཆེན་མཛེས་པའི་རྣ་རྒྱན་སྤེལ། འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། གནས་དབེན་པར་སྟེགས་ཀྱི་དབུས་སུ་མཉྫིའི་ཁར་མཎྜ་ལར་དྲི་བཟང་གི་ཐིག་ལེ་བྱས་ཏེ་ཚོམ་བུ་གཅིག་བཀོད། མདུན་དུ་ཟླུམ་གཏོར་དཀར་པོ་གཅིག །བྱང་ཤར་ནས་བརྩམས་ཏེ་མཚམས་འཛིན་གྱི་མེ་ཏོག་དང་། ཆུ་གཉིས་སྔོན་འགྲོའི་ཉེར་སྤྱོད་རྣམས་བཀོད་མཛེས་སུ་བཤམ། སློབ་དཔོན་གྱི་མདུན་དུ་ཏིང་ཤག་དང་། མེ་ཏོག །ཉེ་ལོགས་སུ་ཅི་བདེ་བར་མཎྜལ་སོགས་འདུ་བྱའོ། །གཉིས་པ་དངོས་གཞི་ལ། བདག་བསྐྱེད་བསྒོམ་པ། མདུན་བསྐྱེད་བསྒྲུབ་པ། རྗེས་གནང་དངོས་སོ། དང་པོ་ནི། ཐོག་མར་མཆོད་པ་རྣམས། ཨོཾ་ཨ་མྲྀ་ཏེ་ཧཱུྃ་ཕ྄ཊ། ཅེས་པས་བསང་། ཨོཾ་སྭ་བྷཱ་ཝས་སྦྱང་། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་མཆོག ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར། ཨོཾ་བཛྲ་ཨརྒྷཾ་སྭཱ་ཧཱ། ཨོཾ་བཛྲ་པཱདྱཾ་སྭཱ་ཧཱ། ཨོཾ་བཛྲ་པུཥྤེ་སྭཱ་ཧཱ། ཞེས་སོགས་ནས། ཨོཾ་བཛྲ་ཤབྡ་སྭཱ་ཧཱ། ཨོཾ་བཛྲ་དྷརྨཱ་ར་ཎི་ཏ་སོགས་དང་སོ་སོའི་ཕྱག་རྒྱ་བྱ་ཞིང་། མཐར་རོལ་མོ་དཀྲོལ་ཏེ་བྱིན་དབབ། དེ་ནས་སྐྱབས་འགྲོ་ནས་བརྩམས་ཏེ་བཟླས་པའི་བར་ཞུ་ཆེན་པཎྜི་ཏས་མཛད་པའི་སྒྲུབ་ཐབས་ཀྱི་དཀྱུས་བཞིན་ནམ། སྒྲུབ་ཐབས་བརྒྱ་རྩའི་ཐུན་མོང་བའི་འགྲོས་སྦྱར་ཚུལ་ཡིག་ཆ་དེའི་གཤམ་ནས་འབྱུང་བ་བཞིན་ཉམས་སུ་བླངས་ལ་བཟླས་པ་བརྒྱ་རྩ་སོགས་ཅི་ནུས་ཀྱི་མཐར། བཅོམ་ལྡན་འདས་བདག་དང་སེམས་ཅན་ཐམས་ཅད་ལ་དངོས་གྲུབ་ཀྱི་སྐལ་བ་སྩལ་དུ་གསོལ། ཞེས་གསོལ་བ་བཏབ། རང་གི་སྙིང་ག་ནས་འོད་ཟེར་འཕྲོས་པས་གདན་འོད་ཟེར་གྱི་རྣམ་པར་གྱུར་ཏེ་རང་ལ་ཐིམ་པར་བསམ། གཉིས་པ་མདུན་བསྐྱེད་བསྒྲུབ་པ་ནི། ཚོམ་བུ་ལ་དམིགས་ཏེ། ཨ་མྲྀ་ཏེས་བསང་སྭཱ་བྷཱ་ཝས་སྦྱང་། སྟོང་པའི་ངང་ལས་ནམ་མཁའ་ཧཱུྃ་ཡིག་སོགས་ནས། མི་བསྐྱོད་པས་དབུར་བརྒྱན། ཞེས་པའི་བར་བདག་བསྐྱེད་བཞིན་ལ་བདག་ཉིད་ཅེས་པའི་ཚིག་དོར། བདག་ལ་མངོན་པར་དབང་བསྐུར་བ་ཞེས་པའི་ཚབ་ཏུ་འདི་ལ་ཞེས་པ་སྒྱུར། མཆོད་པ་བྱིན་རླབས་བྱས་ལ། ཨོཾ་ཨཱཪྻ་མཉྫུ་ཤྲཱི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ་ནས། ཤབྡའི་བར་གྱིས་མཆོད། དྷརྨཱ་ར་ཎི་ཏ་སོགས་ཀྱིས་རོལ་མོ་དབུལ། །གཞོན་ནུའི་སྐུ་ལུས་འཆང་བ་པོ། །ཡེ་ཤེས་སྒྲོན་མ་རབ་ཏུ་གསལ། །འཇིག་རྟེན་གསུམ་གྱི་མུན་སེལ་བ། །འཇམ་པའི་དབྱངས་ལ་ཕྱག་འཚལ་ལོ། །ཞེས་བསྟོད། གཏོར་མ་བསང་སྦྱང་། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ལན་གསུམ་གྱི་བྱིན་གྱིས་བརླབ། ནམ་མཁའ་མཛོད་ཀྱི་ཕྱག་རྒྱ་དང་བཅས། ཨོཾ་ཨཱརྱ་མཉྫུ་ཤྲཱི་ས་པ་རི་ཝཱ་ར་ཨོཾ་ཨ་ཀཱ་རོ་སོགས་ལན་གསུམ་གྱིས་ཕུལ། མཆོད་བསྟོད་བསྡུས་པ་བྱ། འདས་གཏོར་གྱི་ལྷག་མ་ཨོཾ་ཨཱཿཧཱུྃ་ལན་གསུམ་གྱི་བྱིན་གྱིས་བརླབས་ལ། གཡས་ལྕགས་ཀྱུའི་ཕྱག་རྒྱ་དང་། ཨོཾ་ལོ་ཀ་པཱ་ལ་ས་པ་རི་ཝཱ་ར་ཨཱ་ཀཪྵ་ཡ་ཛཿ ཞེས་པས་མགྲོན་བཀུག་ལ། སྔགས་དེ་ཉིད་ཀྱི་མཐར་ཨ་ཀཱ་རོ་བཏགས་པ་ལན་གསུམ་གྱིས་ཕུལ་ལ། །འཇིག་རྟེན་པ་ཡི་འབྱུང་པོ་རྣམས། །མཆོད་སྦྱིན་གཏོར་མ་འདི་སྣོམས་ལ། །ཆོས་དོན་བདེན་པ་ལ་གནས་ནས། །ཞི་ཞིང་དུལ་བའི་སེམས་སུ་མཛོད། །བདག་ཀྱང་བྱང་ཆུབ་མ་ཐོབ་པར། །གེགས་མེད་བར་ཆད་མེད་པ་དང་། །དམ་ཚིག་གནས་ལ་གནས་མཛོད་ལ། །བྱང་ཆུབ་ཐོབ་པའི་གྲོགས་ཀྱང་མཛོད། ཅེས་པས་ཕྲིན་ལས་གཞོལ། ལོ་ཀ་པཱ་ལ་ས་པ་རི་ཝཱ་ར་གཙྪ། ཞེས་པས་འཇིག་རྟེན་པའི་མགྲོན་གཤེགས་སུ་གསོལ་ལ། མདུན་བསྐྱེད་ཀྱི་ཐུགས་ཀར་ས་བོན་གྱི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་སྤྲོ་བསྡུས་སངས་རྒྱས་ཀྱི་མཛད་པ་བསྒྲུབ་པར་བསམས་ལ་བཟླས་པ་ཅི་རིགས་བྱ། གསུམ་པ་རྗེས་གནང་དངོས་ནི། སློབ་མ་རྣམས་ཁྲུས་དང་ཕྱག་བྱས་ལ། སྙིམས་པ་མེ་ཏོག་དང་བཅས་ཏེ་འཁོད་པ་ལ། སློབ་དཔོན་གྱིས་ཟང་ཟིང་མེད་པའི་བྱམས་པ་དང་། འཁོར་བ་ལས་སྒྲོལ་འདོད་ཀྱི་སྙིང་རྗེ་ཆེན་པོ་སྔོན་དུ་འགྲོ་བས། སེམས་ཅན་ཐམས་ཅད་ཀྱི་དོན་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་རྗེས་སུ་གནང་བ་ཟབ་མོ་གསན་ལ་དོན་ཉམས་སུ་བླང་བར་བགྱིའོ་སྙམ་པའི་བྱང་ཆུབ་ཀྱི་མཆོག་ཏུ་སེམས་བསྐྱེད་པ་གསལ་བཏབ་ནས་གསན་འཚལ། དེ་ལ་འཇུག་སྒོ་མང་དུ་ཡོད་པ་ལས་འདིར་རྒྱུད་སྡེ་རིན་པོ་ཆེ་རྣམས་ནས་ལྷའི་རྣལ་འབྱོར་བསམ་གྱིས་མི་ཁྱབ་པ་གསུངས་པ་རྣམས། འཕགས་ཡུལ་གྱི་སློབ་དཔོན་སོ་སོས་ཐུགས་ཉམས་སུ་བཞེས་ཤིང་སྒྲུབ་པའི་ཐབས་རྒྱས་བསྡུས་སྣ་ཚོགས་མཛད་པ་རྣམས་ཕྱོགས་གཅིག་ཏུ་བསྡུས་པའི་སྒྲུབ་པའི་ཐབས་ཀུན་ལས་བཏུས་པའམ། སྒྲུབ་ཐབས་བརྒྱ་རྩར་གྲགས་པའི་བསྟན་བཅོས་ཆེན་པོ་ནས་འབྱུང་བའི་མཚན་ཡང་དག་པར་བརྗོད་པའི་འཇམ་དཔལ་གྱི་རྗེས་སུ་གནང་བ་ཟབ་མོ་བསྒྲུབ་པ་ལ་སློབ་དཔོན་གྱིས་བགྱི་བར་འོས་པ་ཐམས་ཅད་ལེགས་པར་གྲུབ་ནས། ཁྱེད་རང་གི་ངོ་སྐལ་དུ་གྱུར་པ་ལ། མཎྜལ་འབུལ་བ། གསོལ་བ་འདེབས་པ། རྒྱུད་ཡོངས་སུ་དག་པར་བྱ་བ། ཐུན་མོང་མ་ཡིན་པའི་གསོལ་བ་གདབ་པ་རྣམས་སྔོན་དུ་འགྲོ་དགོས་པས། སློབ་དཔོན་ལ་ལྷག་པའི་ལྷ་དང་ཐ་མི་དད་སྙམ་པའི་མོས་གུས་དང་ལྡན་པས། རྗེས་གནང་ཟབ་མོ་ཞུ་བའི་ཡོན་དུ་མཎྜལ་ཕུལ། མེ་ཏོག་དང་བཅས་པས་ཐལ་མོ་སྦྱར་ནས་གསོལ་བ་འདེབས་པའི་རྗེས་ཟློས་ལན་གསུམ་མཛོད། །དུས་གསུམ་སངས་རྒྱས་ཐམས་ཅད་དང་། །ལྷག་པའི་ལྷ་ཡི་ངོ་བོ་ཉིད། །དཔལ་ལྡན་བླ་མའི་བཀའ་དྲིན་གྱིས། །བདག་ལ་རྗེས་གནང་སྩལ་དུ་གསོལ། ཞེས་གསོལ་བ་བཏབ་ནས། རྒྱུད་དག་པའི་སླད་དུ་མདུན་གྱི་ནམ་མཁར་བླ་མ་དང་གཉིས་སུ་མེད་པའི་རྗེ་བཙུན་འཇམ་པའི་དབྱངས་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་སྤྲིན་ཕུང་འཐིབས་པ་ལྟར་བཞུགས་པར་མོས་པ་བྱས་ཏེ། དེ་རྣམས་ཀྱི་སྤྱན་སྔར་བདག་གཞན་གྱི་ཚེ་ཐོག་མ་མེད་པ་ནས་བསགས་པའི་སྡིག་པ་བཤགས་པ་ལ་སོགས་པའི་ཡན་ལག་བདུན་པ་བགྱི་སྙམ་པས་འདིའི་རྗེས་ཟློས་ལན་གསུམ་མཛོད། དཀོན་མཆོག་གསུམ་ལ་སོགས་ནས། སངས་རྒྱས་འགྲུབ་པར་ཤོག་ཅེས་པས་རྒྱུད་དག་པར་བྱས་ནས། ཐུན་མོང་མ་ཡིན་པའི་གསོལ་བ་འདེབས་པའི་རྗེས་ཟློས་ལན་གསུམ་མཛོད། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་དམ་པས་བདག་ལ་རྗེ་བཙུན་འཇམ་པའི་དབྱངས་ཀྱི་སྐུ་གསུང་ཐུགས་ཀྱི་རྗེས་སུ་གནང་བ་སྩལ་དུ་གསོལ། ཞེས་གསོལ་བ་འདེབས་པ་རྣམས་རྗེས་གནང་གི་སྔོན་འགྲོ་ཡིན། དངོས་གཞི་ལ། ཐོག་མར་རྗེས་གནང་གི་གཞི་དགོད་པའི་སླད་དུ་སློབ་དཔོན་གྱིས། ཨོཾ་སྭ་བྷཱ་བ་སོགས་ནས་ཧྃ་ཞེས་བརྗོད་པས་ཁྱེད་རང་གི་ཕུང་པོ་ཁམས་དང་སྐྱེ་མཆེད་ཐམས་ཅད་མི་དམིགས་ཏེ་སྟོང་པར་གྱུར། སྟོང་པའི་ངང་ལས་ཧཱུྃ་ཡིག་ལས་བྱུང་བ་ལ་ཞེས་པ་ནས་སེམས་དཔའི་སྐྱིལ་ཀྲུང་གིས་བཞུགས་པ། ཞེས་པའི་བར་བདག་ཉིད་ཅེས་པའི་ཚབ་ཏུ་ཁྱེད་རང་ཞེས་སྦྱར་བ་མ་གཏོགས་བདག་བསྐྱེད་བཞིན་གསལ་བཏབ། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པ། མདུན་བསྐྱེད་དང་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀར་ཕོག་པས་དེ་ཐམས་ཅད་ཀྱི་ཐུགས་རྒྱུད་བསྐུལ་ཏེ། ཐུགས་ཀ་ནས་ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོ་ཡིན་པ་ལ་རྣམ་པ་རྗེ་བཙུན་འཇམ་པའི་དབྱངས་ཀྱི་སྐུ་ཚད་མེད་གྲངས་མེད། བསམ་གྱིས་མི་ཁྱབ་པ་སྤྱན་དྲངས་ཏེ་ཁྱེད་རང་གི་ལུས་ལ་ཐིམ་པས་རྒྱུད་བྱིན་གྱིས་བརླབ་པར་མོས་པ་མཛོད། ཅེས་པ་དང་རོལ་མོ་བྱ་ཞིང་། ཛཿཧཱུྃ་བྃ་ཧོཿ ཨོཾ་བཛྲ་ཨཱ་བེ་ཤ་ཡ་ཨཿཨཱཿཞེས་ཡང་ཡང་བརྗོད་པས་རྗེ་བཙུན་འཇམ་པའི་དབྱངས་ཀྱི་སྐུའི་བྱིན་རླབས་ཞུགས། ལུས་ཀྱི་སྒོ་ནས་བསགས་པའི་སྡིག་སྒྲིབ་ཐམས་ཅད་བྱང་ཞིང་དག་པར་བྱས། ལུས་རྗེ་བཙུན་འཇམ་པའི་དབྱངས་ཀྱི་སྐུ་དང་ནུས་པ་མཉམ་པར་བྱིན་གྱིས་བརླབས་སྙམ་དུ་མོས་པ་མཛོད། རྗེས་སུ་བཟླས་པའི་ལུང་གི་སླད་དུ་སློབ་དཔོན་གྱི་ཐུགས་ཀའི་ས་བོན་སྔགས་ཕྲེང་དང་བཅས་པ་ལས་སྔགས་ཕྲེང་གཉིས་པ་བྱུང་། སློབ་དཔོན་གྱི་ཞལ་ནས་ཐོན། །ཁྱེད་རང་གི་ཞལ་དུ་ཞུགས། ཐུགས་ཀའི་ས་བོན་གྱི་མཐར་འཁོད་པའི་མོས་པ་བྱས་ཏེ། མེ་ཏོག་དང་བཅས་པས་ཐལ་མོ་སྦྱར་ནས་འདིའི་རྗེས་ཟློས་མཛོད། ཅེས་དང་། སྔགས་ཀྱི་རྗེས་ཟློས་ལན་གསུམ་བྱར་གཞུག །དེ་ལྟར་ལན་གསུམ་བཟླས་པས་དང་པོས་རྒྱུད་བྱིན་གྱིས་བརླབས། གཉིས་པས་དབྱེར་མེད་དུ་བྱས། གསུམ་པས་བརྟན་པར་བྱས་པར་མོས་ཏེ། སློབ་དཔོན་ལ་མེ་ཏོག་གཏོར་ནས་འདིའི་རྗེས་ཟློས་མཛོད། །བཅོམ་ལྡན་བདག་གིས་བཟུང་ལགས་ཀྱི། །བཅོམ་ལྡན་བདག་ལ་བྱིན་གྱིས་རློབས། ལན་གསུམ། དེ་ལྟར་གསོལ་བ་བཏབ་ནས། སློབ་དཔོན་གྱིས་ཀྱང་མེ་ཏོག་གི་ཕྲེང་བ་སྔགས་སུ་བྱས་ཏེ་ཁྱེད་རང་གི་སྤྱི་བོར་བཞག་ཅིང་བྱིན་གྱིས་བརླབ་པར་མོས་པ་མཛོད། །བཅོམ་ལྡན་འདི་ལ་སྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་སྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། རྡོ་རྗེ་སློབ་མའི་རྒྱུད་ལ་བཅོམ་ལྡན་འདས་རྗེ་བཙུན་འཇམ་པའི་དབྱངས་ཀྱི་གསང་སྔགས་ཀྱི་བྱིན་རླབས་མ་ལུས་པ་འཇུག་པར་གྱུར་ཅིག་ཅེས་བརྗོད་ཅིང་མེ་ཏོག་གཏོར། དམ་བཅའ་བའི་ལུང་གི་སླད་དུ། དུས་ད་ནས་བཟུང་སྟེ་བྱང་ཆུབ་མ་ཐོབ་ཀྱི་བར་དུ་རྗེ་བཙུན་འཇམ་པའི་དབྱངས་ཡི་དམ་དུ་འཛིན་སྙམ་པས་འདིའི་རྗེས་ཟློས་མཛོད། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བས་དུས་ད་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། རྗེ་བཙུན་འཇམ་པའི་དབྱངས་ཡི་དམ་གྱི་ལྷར་བཟུང་བར་བགྱིའོ་ལན་གསུམ། དེ་ལྟར་བྱས་པས་རྗེ་བཙུན་འཇམ་པའི་དབྱངས་ཀྱི་གསུང་གི་བྱིན་རླབས་ཞུགས། ངག་གི་སྒོ་ནས་བསགས་པའི་སྡིག་སྒྲིབ་ཐམས་ཅད་བྱང་ཞིང་དག་པར་བྱས། ངག་རྗེ་བཙུན་འཇམ་པའི་དབྱངས་ཀྱི་གསུང་དང་ནུས་པ་མཉམ་པར་བྱིན་གྱིས་བརླབས་སྙམ་དུ་མོས་པ་མཛོད། བྱིན་གྱིས་བརླབ་པའི་ལུང་གི་སླད་དུ་དམིགས་པ་འདི་བཞིན་མཛོད། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པ་མདུན་བསྐྱེད་ཀྱི་ཐུགས་ཀར་ཕོག་པས་ཐུགས་རྒྱུད་བསྐུལ་ཏེ། ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོ་རྗེ་བཙུན་འཇམ་པའི་དབྱངས་ཀྱི་སྐུ་མཐེབ་སོར་གྱི་ཚད་ཙམ་པ་རེ་ཐུགས་ཀ་ནས་རྒྱང་གིས་བྱེ་ནས་བྱོན་པ་ཁྱེད་རང་གི་སྤྱི་བོ་ནས་ཐིམ་སྟེ་ཐུགས་ཀའི་ས་བོན་དང་དབྱེར་མེད་དུ་གྱུར་པ་མོས་པང་བྱས། དེའི་ངང་ནས་ལྷ་སྐུ་སྣང་ལ་རང་བཞིན་མེད་པ་མེ་ལོང་ནང་གི་གཟུགས་བརྙན་ལྟ་བུ་ལ་ཡིད་ཆེར་གྱིས་གཏད་པས་རང་ཉིད་ལྷ་སྐུ་གདན་དང་བཅས་པ་འོད་ཟེར་གྱི་རྣམ་པར་གྱུར་ཏེ་ཐུགས་ཀའི་ས་བོན་ལ་ཐིམ། ས་བོན་དེའང་ཇེ་ཆུང་ཇེ་ཕྲར་གྱུར་ཏེ་མཐར་ནམ་མཁའ་ལ་འཇའ་ཡལ་བ་ལྟར་གྱུར་པ་ལ་བརྟེན་ནས། གཟུང་འཛིན་གཉིས་སྣང་གིས་བསྡུས་པའི་ཆོས་ཐམས་ཅད་རང་བཞིན་གྱིས་མི་དམིགས་པའི་སྟོང་ཉིད་འོད་གསལ་སྤྲོས་པའི་མཐའ་ཐམས་ཅད་དང་བྲལ་བ་ནམ་མཁའ་ལྟ་བུ་རྒྱུད་ལ་སྐྱེས་པར་མོས་བ་བྱས་ཏེ་ཅུང་ཟད་ཅིག་མཉམ་པར་ཞོག་མཛོད། དེ་ལྟར་བྱས་པས་རྗེ་བཙུན་འཇམ་པའི་དབྱངས་ཀྱི་ཐུགས་བྱིན་རླབས་ཞུགས། སེམས་ཀྱི་སྒོ་ནས་བསགས་པའི་སྡིག་སྒྲིབ་ཐམས་ཅད་བྱང་ཞིང་དག་པར་བྱས། སེམས་རྗེ་བཙུན་འཇམ་པའི་དབྱངས་ཀྱི་ཐུགས་དང་ནུས་པ་མཉམ་པར་བྱིན་གྱིས་བརླབས་སྙམ་དུ་མོས་པ་མཛོད། དེས་རྗེས་གནང་གི་དངོས་གཞི་གྲུབ་ནས་དེ་དག་གི་གནས་སྐབས་སུ་ཐོབ་ཅིང་ཁས་བླངས་པའི་དམ་ཚིག་དང་སྡོམ་པ་ལ་བསྲུང་སྡོམ་བགྱི་སྙམ་པས་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་ལན་གསུམ། ཞེས་དམ་ཚིག་འཛིན་པར་ཁས་བླངས་ནས། རྗེས་སུ་གནང་བ་ཐོབ་པའི་གཏང་རག་ཏུ་མཎྜལ་འབུལ་བར་ཞུ། དེ་ལྟར་མཎྜལ་དུ་མ་ཟད་ལུས་ལོངས་སྤྱོད་རྣམས་ཀྱང་སློབ་དཔོན་ལ་འབུལ་ན་ཆ་ཤས་ནས་བཞེས་ལ་ལོངས་སྤྱད་དུ་གསོལ་སྙམ་པས་འདིའི་རྗེས་ཟློས་མཛོད། དེང་ནས་བརྩམས་ཏེ་སོགས་ལན་གསུམ། དེ་རྣམས་ཀྱིས་རྗེ་བཙུན་འཇམ་པའི་དབྱངས་ཀྱིས་མངོན་སུམ་དུ་རྗེས་སུ་བཟུང་བའི་གྲུབ་པའི་སློབ་དཔོན་ཆེན་པོ་ཛེ་ཏཱ་རི་ནས་ལེགས་པར་བརྒྱུད་ཅིང་། དཔལ་ལྡན་ས་སྐྱ་པ་ཡབ་སྲས་ལ་བཀའ་བབས་པའི་སྒྲུབ་ཐབས་བརྒྱ་རྩ་ནས་འབྱུང་བའི་མཚན་ཡང་དག་པར་བརྗོད་པའི་འཇམ་དཔལ་གྱི་རྗེས་སུ་གནང་བ་གསན་པ་ཡིན་པས་རང་གཞན་གྱི་དོན་རྒྱ་ཆེན་པོ་མཛད་པར་ཞུ། བསོད་ནམས་འདི་ཡིས་སོགས་ཀྱིས་དགེ་བ་བྱང་ཆུབ་ཏུ་བསྔོས་ལ་སློབ་མ་རྣམས་རང་གནས་སུ་བཏང་ངོ་། །གསུམ་པ་རྗེས་ནི། མཆོད་པ་རྣམས་ཁ་གསོས་ནས་བྱིན་གྱིས་བརླབ། གོང་ལྟར་མཆོད་བསྟོད་གསོལ་བ་བཏབ། །ཡི་གེ་བརྒྱ་པ་ལན་གསུམ་གྱི་མཐར། མ་འབྱོར་པ་དང་སོགས་ཀྱིས་ནོངས་པ་བཤགས། ཨོཾ་ཁྱེད་ཀྱིས་སེམས་ཅན་དོན་ཀུན་སོགས་ཀྱི་མཐར། བཛྲ་མུཿ ཞེས་མཐེབ་སྲིན་གྱིས་སེ་གོལ་དང་བཅས་ཚོམ་བུའི་ཡེ་ཤེས་པ་གཤེགས། དམ་ཚིག་པ་རང་ལ་གཉིས་སུ་མེད་པར་ཐིམ་པར་བསམ། །དགེ་བ་འདི་ཡིས་མྱུར་དུ་བདག །རྗེ་བཙུན་འཇམ་དབྱངས་འགྲུབ་གྱུར་ནས་སོགས་ཀྱིས་བསྔོ་སྨོན་དང་། །སྟོན་མཆོག་དམ་པ་སོགས་ཀྱིས་ཤིས་པ་བརྗོད་ཅིང་མེ་ཏོག་གི་ཆར་དབབ། ལས་ཀྱི་རྗེས་མི་མངོན་པར་བྱའོ། །དེ་ལྟར་འཇམ་དཔལ་སྒྱུ་འཕྲུལ་དྲྭ་བ་ཡི། །རྒྱུད་དོན་ཆུ་གཏེར་ལས་བྱུང་སྒྲུབ་ཐབས་ཀྱི། །རྗེས་གནང་ཆོ་ག་རིན་ཆེན་ཆུན་འཕྱང་འདིས། །བློ་གསལ་རྣ་ལུང་མཛེས་པའི་རྒྱན་གྱུར་ཅིག །མཚན་ཡང་དག་པར་བརྗོད་པའི་འཇམ་དཔལ་གྱི་རྗེས་སུ་གནང་བ་འདི་ཉིད་ཉེ་བར་མཁོ་བའི་དབང་གིས་མང་དུ་ཐོས་པའི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས། ཐམས་ཅད་མཁྱེན་པ་དཀོན་མཆོག་ལྷུན་གྲུབ་ཀྱི་གསུང་རབ་ཇི་ལྟ་བ་བཞིན་ཤིན་ཏུ་གསལ་བར་བཀོད་པ་དགེ་ལེགས་སུ་གྱུར་ཅིག །སྒྲུབ་ཐབས་བརྒྱ་རྩ་ནས་འབྱུང་བའི་ལྷག་པའི་ལྷ་ཐམས་ཅད་ལ་རྗེས་གནང་གི་ཆིངས་འདི་ཉིད་སྦྱར་བར་བྱ་བ་ཡིན་ནོ། ། ༈

[edit]

mtshan yang dag par brjod pa'i 'jam dpal gyi rjes gnang bya tshul rin po che'i rna rgyan/ @#/_/mtshan yang dag par brjod pa'i 'jam dpal gyi rjes gnang bya tshul rin po che'i rna rgyan zhes bya ba bzhugs so/__/oM swa sti sid+d+haM/__/ngag gi dbang phyug bla ma la btud nas/__/gang de'i rdo rje'i mtshan don yang dag par/__/brjod pa'i rgyud las legs gsungs 'jam dpal gyi/__/rjes gnang rin chen mdzes pa'i rna rgyan spel/__'di la gsum/__sbyor ba/__dngos gzhi/__rjes so/__/dang po ni/__gnas dben par stegs kyi dbus su many+dzi'i khar maN+Da lar dri bzang gi thig le byas te tshom bu gcig bkod/__mdun du zlum gtor dkar po gcig__/byang shar nas brtsams te mtshams 'dzin gyi me tog dang /__chu gnyis sngon 'gro'i nyer spyod rnams bkod mdzes su bsham/__slob dpon gyi mdun du ting shag dang /__me tog__/nye logs su ci bde bar maN+Dal sogs 'du bya'o/__/gnyis pa dngos gzhi la/__bdag bskyed bsgom pa/__mdun bskyed bsgrub pa/__rjes gnang dngos so/__dang po ni/__thog mar mchod pa rnams/__oM a mr-i te hU~M pha?T/__ces pas bsang /__oM swa b+hA was sbyang /__stong pa'i ngang las oM las byung ba'i rin po che las grub pa'i snod yangs shing rgya che ba'i nang du oM 'od du zhu ba las byung ba'i lha rdzas las grub pa'i mchod yon/__zhabs bsil/__me tog__/bdug spos/__mar me/__dri mchog__zhal zas/__rol mo rnams dwangs shing thogs pa med pa nam mkha'i mtha' klas par gyur/__oM badz+ra ar+g+haM swA hA/__oM badz+ra pAd+yaM swA hA/__oM badz+ra puSh+pe swA hA/__zhes sogs nas/__oM badz+ra shab+da swA hA/__oM badz+ra d+harmA ra Ni ta sogs dang so so'i phyag rgya bya zhing /__mthar rol mo dkrol te byin dbab/__de nas skyabs 'gro nas brtsams te bzlas pa'i bar zhu chen paN+Di tas mdzad pa'i sgrub thabs kyi dkyus bzhin nam/__sgrub thabs brgya rtsa'i thun mong ba'i 'gros sbyar tshul yig cha de'i gsham nas 'byung ba bzhin nyams su blangs la bzlas pa brgya rtsa sogs ci nus kyi mthar/__bcom ldan 'das bdag dang sems can thams cad la dngos grub kyi skal ba stsal du gsol/__zhes gsol ba btab/__rang gi snying ga nas 'od zer 'phros pas gdan 'od zer gyi rnam par gyur te rang la thim par bsam/__gnyis pa mdun bskyed bsgrub pa ni/__tshom bu la dmigs te/__a mr-i tes bsang swA b+hA was sbyang /__stong pa'i ngang las nam mkha' hU~M yig sogs nas/__mi bskyod pas dbur brgyan/__zhes pa'i bar bdag bskyed bzhin la bdag nyid ces pa'i tshig dor/__bdag la mngon par dbang bskur ba zhes pa'i tshab tu 'di la zhes pa sgyur/__mchod pa byin rlabs byas la/__oM AR+Ya many+dzu shrI sa pa ri wA ra ar+g+haM pra tIts+tsha swA hA nas/__shab+da'i bar gyis mchod/__d+harmA ra Ni ta sogs kyis rol mo dbul/__/gzhon nu'i sku lus 'chang ba po/__/ye shes sgron ma rab tu gsal/__/'jig rten gsum gyi mun sel ba/__/'jam pa'i dbyangs la phyag 'tshal lo/__/zhes bstod/__gtor ma bsang sbyang /__stong pa'i ngang las rin po che las grub pa'i snod yangs shing rgya che ba'i nang du gtor ma kha dog dri ro nus pa phun sum tshogs pa ye shes kyi bdud rtsi'i rgya mtsho chen por gyur/__oM AHhU~M lan gsum gyi byin gyis brlab/__nam mkha' mdzod kyi phyag rgya dang bcas/__oM Ar+ya many+dzu shrI sa pa ri wA ra oM a kA ro sogs lan gsum gyis phul/__mchod bstod bsdus pa bya/__'das gtor gyi lhag ma oM AHhU~M lan gsum gyi byin gyis brlabs la/__g.yas lcags kyu'i phyag rgya dang /__oM lo ka pA la sa pa ri wA ra A kaR+Sha ya dzaH__zhes pas mgron bkug la/__sngags de nyid kyi mthar a kA ro btags pa lan gsum gyis phul la/__/'jig rten pa yi 'byung po rnams/__/mchod sbyin gtor ma 'di snoms la/__/chos don bden pa la gnas nas/__/zhi zhing dul ba'i sems su mdzod/__/bdag kyang byang chub ma thob par/__/gegs med bar chad med pa dang /__/dam tshig gnas la gnas mdzod la/__/byang chub thob pa'i grogs kyang mdzod/__ces pas phrin las gzhol/__lo ka pA la sa pa ri wA ra gats+tsha/__zhes pas 'jig rten pa'i mgron gshegs su gsol la/__mdun bskyed kyi thugs kar sa bon gyi mthar sngags kyi phreng bas bskor ba las 'od zer spro bsdus sangs rgyas kyi mdzad pa bsgrub par bsams la bzlas pa ci rigs bya/__gsum pa rjes gnang dngos ni/__slob ma rnams khrus dang phyag byas la/__snyims pa me tog dang bcas te 'khod pa la/__slob dpon gyis zang zing med pa'i byams pa dang /__'khor ba las sgrol 'dod kyi snying rje chen po sngon du 'gro bas/__sems can thams cad kyi don du bla na med pa yang dag par rdzogs pa'i sangs rgyas kyi go 'phang thob par bya/__de'i ched du rjes su gnang ba zab mo gsan la don nyams su blang bar bgyi'o snyam pa'i byang chub kyi mchog tu sems bskyed pa gsal btab nas gsan 'tshal/__de la 'jug sgo mang du yod pa las 'dir rgyud sde rin po che rnams nas lha'i rnal 'byor bsam gyis mi khyab pa gsungs pa rnams/__'phags yul gyi slob dpon so sos thugs nyams su bzhes shing sgrub pa'i thabs rgyas bsdus sna tshogs mdzad pa rnams phyogs gcig tu bsdus pa'i sgrub pa'i thabs kun las btus pa'am/__sgrub thabs brgya rtsar grags pa'i bstan bcos chen po nas 'byung ba'i mtshan yang dag par brjod pa'i 'jam dpal gyi rjes su gnang ba zab mo bsgrub pa la slob dpon gyis bgyi bar 'os pa thams cad legs par grub nas/__khyed rang gi ngo skal du gyur pa la/__maN+Dal 'bul ba/__gsol ba 'debs pa/__rgyud yongs su dag par bya ba/__thun mong ma yin pa'i gsol ba gdab pa rnams sngon du 'gro dgos pas/__slob dpon la lhag pa'i lha dang tha mi dad snyam pa'i mos gus dang ldan pas/__rjes gnang zab mo zhu ba'i yon du maN+Dal phul/__me tog dang bcas pas thal mo sbyar nas gsol ba 'debs pa'i rjes zlos lan gsum mdzod/__/dus gsum sangs rgyas thams cad dang /__/lhag pa'i lha yi ngo bo nyid/__/dpal ldan bla ma'i bka' drin gyis/__/bdag la rjes gnang stsal du gsol/__zhes gsol ba btab nas/__rgyud dag pa'i slad du mdun gyi nam mkhar bla ma dang gnyis su med pa'i rje btsun 'jam pa'i dbyangs la sangs rgyas dang byang chub sems dpa'i tshogs kyis bskor ba sprin phung 'thibs pa ltar bzhugs par mos pa byas te/__de rnams kyi spyan sngar bdag gzhan gyi tshe thog ma med pa nas bsags pa'i sdig pa bshags pa la sogs pa'i yan lag bdun pa bgyi snyam pas 'di'i rjes zlos lan gsum mdzod/__dkon mchog gsum la sogs nas/__sangs rgyas 'grub par shog ces pas rgyud dag par byas nas/__thun mong ma yin pa'i gsol ba 'debs pa'i rjes zlos lan gsum mdzod/__dus gsum sangs rgyas thams cad kyi ngo bo bla ma dam pas bdag la rje btsun 'jam pa'i dbyangs kyi sku gsung thugs kyi rjes su gnang ba stsal du gsol/__zhes gsol ba 'debs pa rnams rjes gnang gi sngon 'gro yin/__dngos gzhi la/__thog mar rjes gnang gi gzhi dgod pa'i slad du slob dpon gyis/__oM swa b+hA ba sogs nas ha~M zhes brjod pas khyed rang gi phung po khams dang skye mched thams cad mi dmigs te stong par gyur/__stong pa'i ngang las hU~M yig las byung ba la zhes pa nas sems dpa'i skyil krung gis bzhugs pa/__zhes pa'i bar bdag nyid ces pa'i tshab tu khyed rang zhes sbyar ba ma gtogs bdag bskyed bzhin gsal btab/__slob dpon gyi thugs ka nas 'od zer 'phros pa/__mdun bskyed dang phyogs bcu'i sangs rgyas dang byang chub sems dpa' thams cad kyi thugs kar phog pas de thams cad kyi thugs rgyud bskul te/__thugs ka nas thugs gnyis su med pa'i ye shes kyi ngo bo yin pa la rnam pa rje btsun 'jam pa'i dbyangs kyi sku tshad med grangs med/__bsam gyis mi khyab pa spyan drangs te khyed rang gi lus la thim pas rgyud byin gyis brlab par mos pa mdzod/__ces pa dang rol mo bya zhing /__dzaHhU~M ba~M hoH__oM badz+ra A be sha ya aHAHzhes yang yang brjod pas rje btsun 'jam pa'i dbyangs kyi sku'i byin rlabs zhugs/__lus kyi sgo nas bsags pa'i sdig sgrib thams cad byang zhing dag par byas/__lus rje btsun 'jam pa'i dbyangs kyi sku dang nus pa mnyam par byin gyis brlabs snyam du mos pa mdzod/__rjes su bzlas pa'i lung gi slad du slob dpon gyi thugs ka'i sa bon sngags phreng dang bcas pa las sngags phreng gnyis pa byung /__slob dpon gyi zhal nas thon/__/khyed rang gi zhal du zhugs/__thugs ka'i sa bon gyi mthar 'khod pa'i mos pa byas te/__me tog dang bcas pas thal mo sbyar nas 'di'i rjes zlos mdzod/__ces dang /__sngags kyi rjes zlos lan gsum byar gzhug__/de ltar lan gsum bzlas pas dang pos rgyud byin gyis brlabs/__gnyis pas dbyer med du byas/__gsum pas brtan par byas par mos te/__slob dpon la me tog gtor nas 'di'i rjes zlos mdzod/__/bcom ldan bdag gis bzung lags kyi/__/bcom ldan bdag la byin gyis rlobs/__lan gsum/__de ltar gsol ba btab nas/__slob dpon gyis kyang me tog gi phreng ba sngags su byas te khyed rang gi spyi bor bzhag cing byin gyis brlab par mos pa mdzod/__/bcom ldan 'di la stsal lags kyis/__/'di la 'go bar mdzad du gsol/__/sngags kyi dngos grub stsal du gsol/__/brtul zhugs brtan par mdzad du gsol/__rdo rje slob ma'i rgyud la bcom ldan 'das rje btsun 'jam pa'i dbyangs kyi gsang sngags kyi byin rlabs ma lus pa 'jug par gyur cig ces brjod cing me tog gtor/__dam bca' ba'i lung gi slad du/__dus da nas bzung ste byang chub ma thob kyi bar du rje btsun 'jam pa'i dbyangs yi dam du 'dzin snyam pas 'di'i rjes zlos mdzod/__slob dpon dgongs su gsol/__bdag ming 'di zhes bgyi bas dus da nas bzung ste ji srid byang chub snying po la mchis kyi bar du/__rje btsun 'jam pa'i dbyangs yi dam gyi lhar bzung bar bgyi'o lan gsum/__de ltar byas pas rje btsun 'jam pa'i dbyangs kyi gsung gi byin rlabs zhugs/__ngag gi sgo nas bsags pa'i sdig sgrib thams cad byang zhing dag par byas/__ngag rje btsun 'jam pa'i dbyangs kyi gsung dang nus pa mnyam par byin gyis brlabs snyam du mos pa mdzod/__byin gyis brlab pa'i lung gi slad du dmigs pa 'di bzhin mdzod/__slob dpon gyi thugs ka nas 'od zer 'phros pa mdun bskyed kyi thugs kar phog pas thugs rgyud bskul te/__thugs gnyis su med pa'i ye shes kyi ngo bo rje btsun 'jam pa'i dbyangs kyi sku mtheb sor gyi tshad tsam pa re thugs ka nas rgyang gis bye nas byon pa khyed rang gi spyi bo nas thim ste thugs ka'i sa bon dang dbyer med du gyur pa mos pang byas/__de'i ngang nas lha sku snang la rang bzhin med pa me long nang gi gzugs brnyan lta bu la yid cher gyis gtad pas rang nyid lha sku gdan dang bcas pa 'od zer gyi rnam par gyur te thugs ka'i sa bon la thim/__sa bon de'ang je chung je phrar gyur te mthar nam mkha' la 'ja' yal ba ltar gyur pa la brten nas/__gzung 'dzin gnyis snang gis bsdus pa'i chos thams cad rang bzhin gyis mi dmigs pa'i stong nyid 'od gsal spros pa'i mtha' thams cad dang bral ba nam mkha' lta bu rgyud la skyes par mos ba byas te cung zad cig mnyam par zhog mdzod/__de ltar byas pas rje btsun 'jam pa'i dbyangs kyi thugs byin rlabs zhugs/__sems kyi sgo nas bsags pa'i sdig sgrib thams cad byang zhing dag par byas/__sems rje btsun 'jam pa'i dbyangs kyi thugs dang nus pa mnyam par byin gyis brlabs snyam du mos pa mdzod/__des rjes gnang gi dngos gzhi grub nas de dag gi gnas skabs su thob cing khas blangs pa'i dam tshig dang sdom pa la bsrung sdom bgyi snyam pas 'di'i rjes zlos mdzod/__gtso bos ji ltar sogs lan gsum/__zhes dam tshig 'dzin par khas blangs nas/__rjes su gnang ba thob pa'i gtang rag tu maN+Dal 'bul bar zhu/__de ltar maN+Dal du ma zad lus longs spyod rnams kyang slob dpon la 'bul na cha shas nas bzhes la longs spyad du gsol snyam pas 'di'i rjes zlos mdzod/__deng nas brtsams te sogs lan gsum/__de rnams kyis rje btsun 'jam pa'i dbyangs kyis mngon sum du rjes su bzung ba'i grub pa'i slob dpon chen po dze tA ri nas legs par brgyud cing /__dpal ldan sa skya pa yab sras la bka' babs pa'i sgrub thabs brgya rtsa nas 'byung ba'i mtshan yang dag par brjod pa'i 'jam dpal gyi rjes su gnang ba gsan pa yin pas rang gzhan gyi don rgya chen po mdzad par zhu/__bsod nams 'di yis sogs kyis dge ba byang chub tu bsngos la slob ma rnams rang gnas su btang ngo /__/gsum pa rjes ni/__mchod pa rnams kha gsos nas byin gyis brlab/__gong ltar mchod bstod gsol ba btab/__/yi ge brgya pa lan gsum gyi mthar/__ma 'byor pa dang sogs kyis nongs pa bshags/__oM khyed kyis sems can don kun sogs kyi mthar/__badz+ra muH__zhes mtheb srin gyis se gol dang bcas tshom bu'i ye shes pa gshegs/__dam tshig pa rang la gnyis su med par thim par bsam/__/dge ba 'di yis myur du bdag__/rje btsun 'jam dbyangs 'grub gyur nas sogs kyis bsngo smon dang /__/ston mchog dam pa sogs kyis shis pa brjod cing me tog gi char dbab/__las kyi rjes mi mngon par bya'o/__/de ltar 'jam dpal sgyu 'phrul drwa ba yi/__/rgyud don chu gter las byung sgrub thabs kyi/__/rjes gnang cho ga rin chen chun 'phyang 'dis/__/blo gsal rna lung mdzes pa'i rgyan gyur cig__/mtshan yang dag par brjod pa'i 'jam dpal gyi rjes su gnang ba 'di nyid nye bar mkho ba'i dbang gis mang du thos pa'i bya bral ba 'jam dbyangs mkhyen brtse'i dbang pos/__thams cad mkhyen pa dkon mchog lhun grub kyi gsung rab ji lta ba bzhin shin tu gsal bar bkod pa dge legs su gyur cig__/sgrub thabs brgya rtsa nas 'byung ba'i lhag pa'i lha thams cad la rjes gnang gi chings 'di nyid sbyar bar bya ba yin no/____/_!