JKW-KABAB-05-CA-030

🚧 This website is under continued development. We appreciate your patience!

Previous Text Back to Volume PageNext Text

དཔལ་བཀའ་འདུས་ཀྱི་བསྙེན་བསྒྲུབ་བྱ་ཚུལ་མདོར་བསྡུས་སྙིང་པོ་རིན་ཆེན་དོ་ཤལ།

Wylie title	dpal bka' 'dus kyi bsnyen bsgrub bya tshul mdor bsdus snying po rin chen do shal
Location	mkhyen brtse'i bka' babs Volume 5, Text 30, Pages 473-480 (Folios 1a to 4b5)
Author	[[ | ]]
Less details More details
Tertön	ཨོ་རྒྱན་གླིང་པ་, འཇམ་དབྱངས་མཁྱེན་བརྩེའི་དབང་པོ་ (o rgyan gling pa, 'jam dbyangs mkhyen brtse'i dbang po)
Citation	'jam dbyangs mkhyen brtse'i dbang po. dpal bka' 'dus kyi bsnyen bsgrub bya tshul mdor bsdus snying po rin chen do shal. In Rdzong sar 'jam dbyangs mkhyen brtse'i dbang po'i bka' babs, Vol. 5: 473-480. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Recitation Manual - bsnyen yig  ·  Revelations - gter ma
Cycle	དཔལ་བཀའ་འདུས་ཆོས་ཀྱི་རྒྱ་མཚོ་ (dpal bka' 'dus chos kyi rgya mtsho)
Karchag page	JKW-KABAB-Volume-05-CA-Karchag
RTZ	In the Rinchen Terdzö: https://rtz.tsadra.org/index.php/Terdzo-BA-028

Tibetan Text

Wylie

[edit]

༄༅། །དཔལ་བཀའ་འདུས་ཀྱི་བསྙེན་སྒྲུབ་བྱ་ཚུལ་མདོར་བསྡུས་སྙིང་པོ་རིན་ཆེན་དོ་ཤལ་ཅེས་བྱ་བ་བཞུགས་སོ།། ན་མོ་གུ་རུ་དྷེ་བ་དྷཱ་ཀི་ནཱི་ཡེ། དཔལ་བཀའ་འདུས་ཀྱི་བསྙེན་སྒྲུབ་བྱ་ཚུལ་ལ་གཉིས། རྩ་བའི་ལྷ་ཕྱག་རྒྱ་གཅིག་པ་ལ་བརྟེན་ནས་བསྙེན་པ་རྐྱང་པ་བྱ་བའི་ཚུལ་དང༌། དཀྱིལ་འཁོར་ཡོངས་རྫོགས་ལ་བརྟེན་ནས་བསྙེན་བསྒྲུབ་ལས་གསུམ་སྦྲེལ་མར་བྱ་བའི་ཚུལ་ལོ། །དང་པོ་ནི་གནས་དབེན་པར་སྟེགས་བུའི་དབུས་སུ་རོ་རས་ལ་ཧཱུྃ་མཐིང་ནག་ཁྲུ་གང་པ་བྲིས་པ་དང༌། ཕྱག་རྒྱ་གཅིག་པའི་ཐོད་སྐུ། དེའི་མདུན་དུ་སྨན་རག་གཏོར་མ་གསུམ་དང་ཉེར་སྤྱོད། གཡས་གཡོན་དུ་ཆོས་སྐྱོང་གི་གཏོར་འབུལ་དང་སྐྱེམས་ཕུད་ཙམ་བཤམ། རང་ཉིད་ཧེ་རུ་ཀར་གསལ་བས་གཞི་བགེགས་ཀྱི་གཏོར་མ་བཏང༌། རྒྱལ་ཆེན་ཐོ་འཛུགས་ཙམ་དང༌། སྲུང་འཁོར་ནན་ཏན་དུ་བསྒོམ། དེ་ནས་ཐུགས་ཁྲིད་ལྟར་སྔོན་འགྲོ་བླ་མའི་རྣལ་འབྱོར་ཡན་རྒྱས་བསྡུས་གང་རིགས་གྲུབ་རྗེས། བླ་མ་རང་ལ་བསྟིམས་མཐར་ཐུགས་ཡིད་བསྲེས་ཏེ་དེ་བཞིན་ཉིད་ཀྱི་ཏིང་ངེ་འཛིན་ལ་མཉམ་པར་འཇོག་པ་ཉམས་མ་སྐྱེས་ཀྱི་བར་རམ། ཞག་གསུམ་སོགས་བྱ། དེ་ནས་ཀུན་སྣང་གི་ཏིང་ངེ་འཛིན་སྙིང་རྗེ་སྒྱུ་མ་ལྟ་བུའི་རྩལ་སྦྱང་བ་ལ་ཞག་གསུམ་སོགས་ཅི་རིགས། དེ་ནས་རྒྱུའི་ཏིང་ངེ་འཛིན་མདུན་དུ་ཧཱུྃ་ཡིག་གསལ་གདབ། བྲིས་པའི་ཧཱུྃ་ལ་ཡིད་མིག་རླུང་གསུམ་གཏད། གསལ་སྣང་སྐྱེས་པ་ན་ཧཱུྃ་དང་དབྱེར་མེད་དུ་སེམས་བསྲེས་ཏེ་མཉམ་པར་བཞག་པ་ཞག་གསུམ་སོགས་ཅི་རིགས། དེ་ནས་ཕྱག་རྒྱ་གཅིག་པའི་བསྙེན་པ་དངོས་ལ། ཕྲིན་ལས་རིན་ཆེན་སྙིང་པོ་ལྟར་མཚམས་གཅོད་ནས་བྱིན་འབེབས་བར། དེ་ནས་ཐུགས་ཁྲིད་ལྟར་བདག་དང་དམ་ཚིག་གི་བྲིས་སྐུ་དབྱེར་མེད་པའི་ཚུལ་གྱིས་རྟེན་དང་བརྟེན་པར་བཅས་པའི་ཕྱག་རྒྱ་གཅིག་པའི་དཀྱིལ་འཁོར་གསལ་བཏབ་ནས་མདུན་གྱི་བྲིས་སྐུ་ལ་ཡིད་མིག་རླུང་གསུམ་གཏང༌། གསལ་སྣང་སྐྱེས་པ་ན་དེ་ལ་སེམས་འཛིན་པ་དང༌། ང་རྒྱལ་བརྟན། དག་པ་དྲན། དེ་ལྟ་བུའི་ཚུལ་གྱིས་གསལ་བརྟན་གྱི་ཉམས་སྐྱེ་བའམ། ཞག་ལྔ་བདུན་སོགས་ཅི་རིགས་པར་ཉམས་སུ་བླང༌། ཐུན་མཐར་བཟླས་པ་ཅུང་ཟད་ཀྱང་བྱ། ལྷ་དང་རང་སེམས་དབྱེར་མེད་ཀྱི་ངང་དུ་རྣལ་དབབ། རང་སེམས་ལྷ་སྐུར་ཤར་བའི་གསལ་སྣང་ལ་སེམས་གཏད་ཅིང་རླུང་བུམ་ཅན་བཟུང༌། ཐུན་བསྡུ་བ་ན་མཆོད་བསྟོད་མདོར་བསྡུས། ཧཱུྃ། བླ་མེད་མཆོག་གི་སོགས་སྔགས་བཅས། ཧཱུྃ། ཞི་ཁྲོའི་སྐུ་སོགས་ནས། དཔལ་ཆེན་ཧེ་རུ་ཀ་ལ་ཕྱག་འཚལ་བསྟོད༔ ཧེ་རུ་ཀའི་ཡིག་བརྒྱ་ལན་གསུམ། བཀའ་སྲུང་མཆོད་པ། སྤྲོ་ན་ཚོགས་མཆོད་ལྷག་མའི་བར་དང༌། སྲུང་མའི་གཏོར་འབུལ་བྱ། གང་ལྟར་ཡར་བསྡུ་ལྡང་བསྔོ་ཤིས་མཐར་དབྱུང༌། དེའང་བསྡུ་བའི་ཚིག །ཧཱུྃ་སརྦ་མཎྜ་ལ་ཧཱུྃ༔ སྣོད་བཅུད་གཞལ་ཡས་ཁང་དང་ལྷ་ལ་ཐིམ༔ ཁྲག་འཐུང་ཡབ་ཡུམ་མཁའ་ལ་སྤྲིན་དེངས་ལྟར༔ དམིགས་བསམ་བརྗོད་པ་བྲལ་བའི་ངང་དུ་ཐིམ༔ ཐུགས་དགོངས་མ་བཅོས་སྐྱེ་མེད་དབྱིངས་སུ་བཞག༔ ཨ་ཨཿ ཞེས་བསྒྱུར་བས་འཐུས། དེ་ནས་བསྙེན་བཟླས་གཙོ་བོར་བཏོན་སྐབས། སྤྱི་ཆིངས་གོང་ལྟར་ལ་ཐོག་མར་ལྷ་ལ་སེམས་ཅུང་ཟད་བཟུང༌། དེ་ནས་ཐུགས་ཀར་ཉི་དཀྱིལ་ལ་སྔགས་ཕྲེང་བཀོད་པ་ལ་སེམས་བཟུང༌། དེ་ནས་སྤྲོ་བསྡུའི་དམིགས་པ་བཅས་བཟླས་པ་ལ་འབད། རྣལ་དབབ་དང་རླུང་སྤྱོད་སོགས་ཀྱིས་མཐར་དབྱུང༌། དེ་ལྟ་བུའི་ཚུལ་གྱིས་བསྙེན་པ་རྒྱས་པ་ཞི་ཁྲོ་སྦྲེལ་བའི་སྔགས་འབུམ་ཕྲག་བཅོ་བརྒྱད་དམ། ལས་རུང་ཙམ་ལ་འབུམ་ཕྲག་བཞི་ལྷག་ཁ་སྐོང་དང་བཅས་པ་བཟླའོ། །བསྙེན་པ་གྲངས་ཐེམས་ནས་སྒྲུབ་པའི་མཚོན་བྱེད་ཙམ་སྤྲོ་ན། མདུན་དུ་དཀྱིལ་འཁོར་རས་བྲིས་སམ། མཎྜ་ལར་ཚོམ་བུ་ཉེར་གཅིག་བཀོད། ཕྲིན་ལས་རིན་ཆེན་སྙིང་པོའི་གཞུང་བསྲང༌། བཟླས་པའི་སྐབས་སུ་བབས་པ་ན། བྷྲཱུྃ་བི་ཤྭ་བི་ཤུདྡྷེའི་མཐར། ཞི་ཁྲོའི་སྤྱི་སྔགས་དང༌། ཕཊ་ཛཿཞེས་བཏགས་པས་ཛབ་ཁང་དབྱེ། ཧཱུྃ། བཅོམ་ལྡན་སྤྱི་དཔལ་སོགས་ཛབ་དགོངས་གསལ་བཏབ་ལ་གཙོ་འཁོར་གྱི་འགྲོས་དང་སྦྱར་ནས་བཟླས་པ་ཅི་ནུས་བྱ། ཐུན་མཐར་དབྱངས་གསལ་རྟེན་སྙིང་དང༌། སྟོང་ཚིགས་མཆོད་པ་ནས་ཚོགས་ལྷག་མའི་བར་གཞུང་ལྟར་དང༌། ནོངས་བཤགས་བསྡུ་ལྡང་བསྔོ་ཤིས་མཐར་དབྱུང༌། དེ་ལྟར་ཞག་བདུན་སོགས་བསྒྲུབས་མཐར་སང་དངོས་གྲུབ་ལེན་རྒྱུའི་དོ་ནུབ་མཆོད་གཏོར་ཁ་གསོ་དང༌། དངོས་གྲུབ་ཀྱི་རྫས་འདུ་བྱ། ཕྱི་ཐུན་དང་སྲོད་ཐུན་ལ་བཟླས་པ་ཅུང་ཟད་མཐར་དངོས་གྲུབ་རང་དང་རྫས་ལ་བསྡུ་བའི་དམིགས་པ་སྤྱི་ལྟར་དང༌། ཞི་ཁྲོ་སྤྱི་སྔགས་སྤྲེལ་བའི་མཐར་ཀཱ་ཡ་ཝཱ་ཀ་སོགས་དངོས་གྲུབ་བསྐུལ་བའི་སྔགས་བཏགས་པ་སྟོང་ཕྲག་ལས་མི་ཉུང་བར་བཟླ། སང་ནངས་པར་སྔ་བར་ལངས་ལ་ལས་བྱང་ཚོགས་སྐོང་ཡན་དཀྱུས་ལྟར་གྲུབ་རྗེས་སྐྱ་རེངས་ཤར་བ་དང་བསྟུན་ཐུགས་ཁྲིད་ལས་འབྱུང་བ་ལྟར་དངོས་གྲུབ་བསྐུལ། ཐོད་སྐུ་སྤྱི་བོར་བཞག །དངོས་གྲུབ་རྫས་དང་ཚོགས་ལ་ལོངས་སྤྱོད། ལྷག་མ་བཙོན་འཛིན་དུ་བྱས་པ་བཏང་བ་ནས་བཟུང་བསྡུ་ལྡང་བར་མཐར་དབྱུང༌། དེའང་གཏང་རག་གི་མཆོད་བསྟོད་ནོངས་བཤགས་རྗེས། མདུན་རྟེན་རས་བྲིས་དང༌། ཐོད་སྐུ་སོགས་ལ་བརྟན་བཞུགས། ཚོམ་བུ་ཡིན་ན་གཤེགས་གསོལ་སྤྱི་ལྟར་དང༌། མཚམས་ཐོའི་རྒྱལ་ཆེན་ལ་གཏང་རག །གཤེགས་གསོལ། ནང་དུ་ལོག་ནས་བསྔོ་སྨོན་བཀྲ་ཤིས་རྒྱས་པར་བྱས་པས་གྲུབ་བོ། །བསྙེན་པ་ཙམ་ལ་སྔགས་ཁ་སྐོང་དང་བཅས་པ་བཟླས་ཕྱིན་སྦྱིན་སྲེག་མ་གྲུབ་ཀྱང་འགལ་བ་ཆུང་མོད། བྱེད་པར་སྤྲོ་ན། དངོས་གྲུབ་ལེན་ཆོག་ཚར་རྗེས། ཕྲིན་ལས་རྒྱུན་གྱི་མེ་མཆོད་ལྟར་ཞི་བའི་ལས་རིམ་སྦྱར་ནས་གང་འགྲུབ་བྱ། གཉིས་པ་བསྙེན་སྒྲུབ་ལས་གསུམ་རྒྱས་པར་བྱེད་པའི་དབང་དུ་བཏང་ན། བསྙེན་པ་གོང་ལྟར་ལ། སྒྲུབ་པའི་མཚོན་བྱེད་མི་དགོས་པས་བསྙེན་པ་སྔ་དྲོ་གྲུབ་པའི་སྐབས་ཐོད་སྐུ་ལས་རྒྱུན་གྱི་དངོས་གྲུབ་བླང་བ་ཙམ་བྱ། བཀྲ་ཤིས་ཡན་གྲུབ་ནས་རྒྱལ་ཆེན་ཐོ་གསོས་དང༌། དམ་སྲི་མནན་པ་ནས་བཟུང་སྒྲུབ་ཆེན་ཁོག་ཕུབ་སྦྱར། དེའང་ཁོག་ཕུབ་ལས་ས་ཆོག་ནས་བརྩམས་ཏེ་གསུངས་པ། སའི་ཆོ་ག་དང༌། ཚོགས་བསག་བཤགས་སྐོང་སོགས་བསྙེན་པ་ལ་འཇུག་པའི་སྔོན་དུ་བྱ་དགོས། གཞན་སྒྲུབ་གྲོགས་མེད་ཚེ་མངའ་གསོལ་རྟགས་གདབ་སོགས་མི་དགོས་པ་གཞིར་བཅས་པས་འདོར་ལེན་ཤེས་པར་བྱ། ལྷ་སྟ་གོན་ནི་རས་བྲིས་ལའང་དཀྱིལ་འཁོར་བྲི་བའི་ཆེད་ཙམ་མ་ཡིན་པར་སྒྲུབ་པའི་ཆེད་དུའང་ཡིན་པས་གྲུབ་ན་ལེགས། མཇུག་ཏུ་གཞན་ལ་དབང་བསྐུར་བ་དང་བདག་འཇུག་སྦྲེལ་ན་བུམ་པ་སྟ་གོན་ཀྱང་གྲུབ་ན་ལེགས་ཤིང༌། གང་ལྟར་ཡང་སྟ་གོན་ཡན་གྲུབ་ནས་ཕྱི་ཐུན་ནམ་སྲོད་ཐུན་ནས་མགོ་བརྩམས་ཏེ། ལས་གཞུང་བསྲང༌། བཟླས་པ་ཅི་ནུས་དང་སྟོང་ཚིགས་མཆོད་པ་སོགས་གོང་གི་སྒྲུབ་པ་མཚོན་བྱེད་ཀྱི་སྐབས་སོར་བཞག་གིས་འཐུས། ཐུན་བཞི་ཀའམ་སྔ་ཐུན་དང༌། ཕྱི་ཐུན་གྱི་ཐུན་མཚམས་སུ་ཉུལ་ལེར་ཕུར་གདབ་དང༌། བྱིན་འབེབས་རེ་གྲུབ་ན་ལེགས། དེ་ལྟ་བུའི་ཚུལ་གྱིས་ཞི་སྔགས་དང༌། གཙོ་བོའི་སྔགས་འབུམ་ཕྲག་བཞི། འཁོར་རྣམས་ལ་ཁྲི་བཞི་རེ། སྤྱི་དྲིལ་ལ་འབུམ་ཕྲག་བཞི་བཟླས་པས་ལས་རུང་གི་སྒྲུབ་པ་འབྲིང་ཙམ་དུ་འགྱུར་སྙམ། གཞན་སྒྲུབ་པའི་རྗེས་ཀྱི་བྱ་བ་རྣམས་སྒྲུབ་ཆེན་ཁོག་དབུབས་ལྟར་མཐར་དབྱུང་དགོས་གཞིར་བཅས་དང༌། སྦྱིན་སྲེག་ཀྱང་ཞི་རྒྱས་གཉིས་ཀ་བྱུང་ན་ལེགས། ལས་སྦྱོར་ལ། ཐུན་མོང་དང་མཆོག་གི་ལས་སྦྱོར་གཉིས་ལས། སྒྲུབ་པ་དང་སྦྲེལ་ཏེ་བྱ་བའི་དབང་དུ་བྱས་ན་དངོས་གྲུབ་བླང་བ་གྲུབ་པའི་ཕྱི་ཉིན་ནས་གཞུང་ལྟར་ཚེ་སྒྲུབ་བདུན་ཕྲག་ཙམ་དང་བདུད་རྩི་ཆིག་སྒྲུབ་ཀྱི་ཚུལ་དུ་བདུན་ཕྲག་ཙམ་གྲུབ་ན་ཕུན་སུམ་ཚོགས་པར་འགྱུར། དྲག་པོའི་ལས་སྦྱོར་གདབ་ལས་དང༌། གཏོར་ཟློག་མཚོན་བྱེད་ཙམ་སྒྲུབ་པ་དེའི་ཁོང་དུ་བྱེད་ན་ཉིན་གསུམ་མམ་གཅིག་གིས་མཐའ་རྟེན་པར་བྱ། དེའང་བསྒྲལ་ལས་གཞུང་དུ་ས་བཅད་ཙམ་ལས་མེད་པས། ཅུང་ཟད་སྤྲོ་ན་གསེར་གཟུ་དཔང་གསུམ་སོགས་ཁ་བསྐང་དགོས་རིགས་གཤིན་རྗེ་དྲེགས་འཇོམས་སམ་རྩ་བའི་ཐུགས་སྒྲུབ་ལྟ་བུའི་ལས་རིམ་ལ་ཚིག་ཁ་བསྒྱུར་གང་དགོས་བྱས་པས་གྲུབ་བོ། །མངྒ་ལཾ།། །།

[edit]

@#/__/dpal bka' 'dus kyi bsnyen sgrub bya tshul mdor bsdus snying po rin chen do shal ces bya ba bzhugs so//_na mo gu ru d+he ba d+hA ki nI ye/__dpal bka' 'dus kyi bsnyen sgrub bya tshul la gnyis/__rtsa ba'i lha phyag rgya gcig pa la brten nas bsnyen pa rkyang pa bya ba'i tshul dang*/__dkyil 'khor yongs rdzogs la brten nas bsnyen bsgrub las gsum sbrel mar bya ba'i tshul lo/__/dang po ni gnas dben par stegs bu'i dbus su ro ras la hU~M mthing nag khru gang pa bris pa dang*/__phyag rgya gcig pa'i thod sku/__de'i mdun du sman rag gtor ma gsum dang nyer spyod/__g.yas g.yon du chos skyong gi gtor 'bul dang skyems phud tsam bsham/__rang nyid he ru kar gsal bas gzhi bgegs kyi gtor ma btang*/__rgyal chen tho 'dzugs tsam dang*/__srung 'khor nan tan du bsgom/__de nas thugs khrid ltar sngon 'gro bla ma'i rnal 'byor yan rgyas bsdus gang rigs grub rjes/__bla ma rang la bstims mthar thugs yid bsres te de bzhin nyid kyi ting nge 'dzin la mnyam par 'jog pa nyams ma skyes kyi bar ram/__zhag gsum sogs bya/__de nas kun snang gi ting nge 'dzin snying rje sgyu ma lta bu'i rtsal sbyang ba la zhag gsum sogs ci rigs/__de nas rgyu'i ting nge 'dzin mdun du hU~M yig gsal gdab/__bris pa'i hU~M la yid mig rlung gsum gtad/__gsal snang skyes pa na hU~M dang dbyer med du sems bsres te mnyam par bzhag pa zhag gsum sogs ci rigs/__de nas phyag rgya gcig pa'i bsnyen pa dngos la/__phrin las rin chen snying po ltar mtshams gcod nas byin 'bebs bar/__de nas thugs khrid ltar bdag dang dam tshig gi bris sku dbyer med pa'i tshul gyis rten dang brten par bcas pa'i phyag rgya gcig pa'i dkyil 'khor gsal btab nas mdun gyi bris sku la yid mig rlung gsum gtang*/__gsal snang skyes pa na de la sems 'dzin pa dang*/__nga rgyal brtan/__dag pa dran/__de lta bu'i tshul gyis gsal brtan gyi nyams skye ba'am/__zhag lnga bdun sogs ci rigs par nyams su blang*/__thun mthar bzlas pa cung zad kyang bya/__lha dang rang sems dbyer med kyi ngang du rnal dbab/__rang sems lha skur shar ba'i gsal snang la sems gtad cing rlung bum can bzung*/__thun bsdu ba na mchod bstod mdor bsdus/__hU~M/__bla med mchog gi sogs sngags bcas/__hU~M/__zhi khro'i sku sogs nas/__dpal chen he ru ka la phyag 'tshal bstod:__he ru ka'i yig brgya lan gsum/__bka' srung mchod pa/__spro na tshogs mchod lhag ma'i bar dang*/__srung ma'i gtor 'bul bya/__gang ltar yar bsdu ldang bsngo shis mthar dbyung*/__de'ang bsdu ba'i tshig__/hU~M sarba maN+Da la hU~M:__snod bcud gzhal yas khang dang lha la thim:__khrag 'thung yab yum mkha' la sprin dengs ltar:__dmigs bsam brjod pa bral ba'i ngang du thim:__thugs dgongs ma bcos skye med dbyings su bzhag:__a aH__zhes bsgyur bas 'thus/__de nas bsnyen bzlas gtso bor bton skabs/__spyi chings gong ltar la thog mar lha la sems cung zad bzung*/__de nas thugs kar nyi dkyil la sngags phreng bkod pa la sems bzung*/__de nas spro bsdu'i dmigs pa bcas bzlas pa la 'bad/__rnal dbab dang rlung spyod sogs kyis mthar dbyung*/__de lta bu'i tshul gyis bsnyen pa rgyas pa zhi khro sbrel ba'i sngags 'bum phrag bco brgyad dam/__las rung tsam la 'bum phrag bzhi lhag kha skong dang bcas pa bzla'o/__/bsnyen pa grangs thems nas sgrub pa'i mtshon byed tsam spro na/__mdun du dkyil 'khor ras bris sam/__maN+Da lar tshom bu nyer gcig bkod/__phrin las rin chen snying po'i gzhung bsrang*/__bzlas pa'i skabs su babs pa na/__b+h+rU~M bi shwa bi shud+d+he'i mthar/__zhi khro'i spyi sngags dang*/__phaT dzaHzhes btags pas dzab khang dbye/__hU~M/__bcom ldan spyi dpal sogs dzab dgongs gsal btab la gtso 'khor gyi 'gros dang sbyar nas bzlas pa ci nus bya/__thun mthar dbyangs gsal rten snying dang*/__stong tshigs mchod pa nas tshogs lhag ma'i bar gzhung ltar dang*/__nongs bshags bsdu ldang bsngo shis mthar dbyung*/__de ltar zhag bdun sogs bsgrubs mthar sang dngos grub len rgyu'i do nub mchod gtor kha gso dang*/__dngos grub kyi rdzas 'du bya/__phyi thun dang srod thun la bzlas pa cung zad mthar dngos grub rang dang rdzas la bsdu ba'i dmigs pa spyi ltar dang*/__zhi khro spyi sngags sprel ba'i mthar kA ya wA ka sogs dngos grub bskul ba'i sngags btags pa stong phrag las mi nyung bar bzla/__sang nangs par snga bar langs la las byang tshogs skong yan dkyus ltar grub rjes skya rengs shar ba dang bstun thugs khrid las 'byung ba ltar dngos grub bskul/__thod sku spyi bor bzhag__/dngos grub rdzas dang tshogs la longs spyod/__lhag ma btson 'dzin du byas pa btang ba nas bzung bsdu ldang bar mthar dbyung*/__de'ang gtang rag gi mchod bstod nongs bshags rjes/__mdun rten ras bris dang*/__thod sku sogs la brtan bzhugs/__tshom bu yin na gshegs gsol spyi ltar dang*/__mtshams tho'i rgyal chen la gtang rag__/gshegs gsol/__nang du log nas bsngo smon bkra shis rgyas par byas pas grub bo/__/bsnyen pa tsam la sngags kha skong dang bcas pa bzlas phyin sbyin sreg ma grub kyang 'gal ba chung mod/__byed par spro na/__dngos grub len chog tshar rjes/__phrin las rgyun gyi me mchod ltar zhi ba'i las rim sbyar nas gang 'grub bya/__gnyis pa bsnyen sgrub las gsum rgyas par byed pa'i dbang du btang na/__bsnyen pa gong ltar la/__sgrub pa'i mtshon byed mi dgos pas bsnyen pa snga dro grub pa'i skabs thod sku las rgyun gyi dngos grub blang ba tsam bya/__bkra shis yan grub nas rgyal chen tho gsos dang*/__dam sri mnan pa nas bzung sgrub chen khog phub sbyar/__de'ang khog phub las sa chog nas brtsams te gsungs pa/__sa'i cho ga dang*/__tshogs bsag bshags skong sogs bsnyen pa la 'jug pa'i sngon du bya dgos/__gzhan sgrub grogs med tshe mnga' gsol rtags gdab sogs mi dgos pa gzhir bcas pas 'dor len shes par bya/__lha sta gon ni ras bris la'ang dkyil 'khor bri ba'i ched tsam ma yin par sgrub pa'i ched du'ang yin pas grub na legs/__mjug tu gzhan la dbang bskur ba dang bdag 'jug sbrel na bum pa sta gon kyang grub na legs shing*/__gang ltar yang sta gon yan grub nas phyi thun nam srod thun nas mgo brtsams te/__las gzhung bsrang*/__bzlas pa ci nus dang stong tshigs mchod pa sogs gong gi sgrub pa mtshon byed kyi skabs sor bzhag gis 'thus/__thun bzhi ka'am snga thun dang*/__phyi thun gyi thun mtshams su nyul ler phur gdab dang*/__byin 'bebs re grub na legs/__de lta bu'i tshul gyis zhi sngags dang*/__gtso bo'i sngags 'bum phrag bzhi/__'khor rnams la khri bzhi re/__spyi dril la 'bum phrag bzhi bzlas pas las rung gi sgrub pa 'bring tsam du 'gyur snyam/__gzhan sgrub pa'i rjes kyi bya ba rnams sgrub chen khog dbubs ltar mthar dbyung dgos gzhir bcas dang*/__sbyin sreg kyang zhi rgyas gnyis ka byung na legs/__las sbyor la/__thun mong dang mchog gi las sbyor gnyis las/__sgrub pa dang sbrel te bya ba'i dbang du byas na dngos grub blang ba grub pa'i phyi nyin nas gzhung ltar tshe sgrub bdun phrag tsam dang bdud rtsi chig sgrub kyi tshul du bdun phrag tsam grub na phun sum tshogs par 'gyur/__drag po'i las sbyor gdab las dang*/__gtor zlog mtshon byed tsam sgrub pa de'i khong du byed na nyin gsum mam gcig gis mtha' rten par bya/__de'ang bsgral las gzhung du sa bcad tsam las med pas/__cung zad spro na gser gzu dpang gsum sogs kha bskang dgos rigs gshin rje dregs 'joms sam rtsa ba'i thugs sgrub lta bu'i las rim la tshig kha bsgyur gang dgos byas pas grub bo/__/mang+ga laM//__//