JKW-KABUM-13-PA-002

🚧 This website is under continued development. We appreciate your patience!

Previous Section Back to Volume PageNext Section

ཚེ་དཔག་མེད་དྭང་མ་བཅུད་འདྲེན་གྱི་ཕྲིན་ལས་ཁྲིགས་སུ་བསྡེབས་པ་འཆི་མེད་འདོད་འཇོ།

Wylie title	tshe dpag med dwang ma bcud 'dren gyi phrin las khrigs su bsdebs pa 'chi med 'dod 'jo
Location	mkhyen brtse'i bka' 'bum Volume 13, sde tshan 2, Pages 3-22 (Folios 1a to 10b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	ངག་དབང་བློ་བཟང་རྒྱ་མཚོ་ (Dalai Lama, 5th)
Citation	'jam dbyangs mkhyen brtse'i dbang po. tshe dpag med dwang ma bcud 'dren gyi phrin las khrigs su bsdebs pa 'chi med 'dod 'jo. In 'jam dbyangs mkhyen brtse'i dbang po'i bka' 'bum, Vol. 13: 3-22. Khams sde dge rdzong sar dgon: Rdzong sar blo gros phun tshogs, 2020.
Genre	Activity Manual - las byang  ·  Longevity Rituals - tshe sgrub
Cycle	ཚེ་དཔག་མེད་དྭངས་མ་བཅུད་འདྲེན་ (tshe dpag med dwangs ma bcud 'dren)
Parent Cycle	དག་སྣང་རྒྱ་ཅན་ (dag snang rgya can)
Deity	tshe dpag med
Colophon	བྷྲཱུྃ་མཚན་རྡོ་རྗེའི་རྭ་གདེངས་ཐོག་མདའི་རྒྱ་ཅན་ལས་བྱུང་བའི་ཚེ་དཔག་མེད་དྭང་མ་བཅུད་འདྲེན་གྱི་ཕྲིན་ལས་ཁྲིགས་སུ་བསྡེབས་པ་འདིའང་། དག་སྣང་རྩ་བའི་གཞུང་དང་ལྗགས་བསྒྲིགས་ལ་རིགས་མཐུན་རྡོ་རྗེའི་གསུང་གིས་མཚམས་སྦྱར་ཏེ་བཀླགས་པས་གྲུབ་པར་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོ་རྡོ་རྗེ་གཟི་བརྗིད་ཀྱིས་བྲིས་པ་དགེ་ལེགས་སུ་གྱུར་ཅིག
	b+h+rU~M mtshan rdo rje'i rwa gdengs thog mda'i rgya can las byung ba'i tshe dpag med dwang ma bcud 'dren gyi phrin las khrigs su bsdebs pa 'di'ang /__dag snang rtsa ba'i gzhung dang ljags bsgrigs la rigs mthun rdo rje'i gsung gis mtshams sbyar te bklags pas grub par mtsho skyes bla ma dgyes pa'i 'bangs mkhyen brtse'i dbang po rdo rje gzi brjid kyis bris pa dge legs su gyur cig

1 Texts in this Section (sde tshan or chos tshan)

3-22	ཚེ་དཔག་མེད་དྭང་མ་བཅུད་འདྲེན་གྱི་ཕྲིན་ལས་ཁྲིགས་སུ་བསྡེབས་པ་འཆི་མེད་འདོད་འཇོ། tshe dpag med dwang ma bcud 'dren gyi phrin las khrigs su bsdebs pa 'chi med 'dod 'jo Activity Manual - las byang   ·   Longevity Rituals - tshe sgrub	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །ཨམཱ ར ཀཱ མ དྷེ ནུ ནཱ མཱ ཡུ ར པ རི མཱ ཎཾ མ ཎྜ སུ རོ ནྣཱ ཡ སྱ ཀ རྨ ལེ ཁ བི ཧ ར ཏི སྨ ། །

༄༅། །ཚེ་དཔག་མེད་དྭང་མ་བཅུད་འདྲེན་གྱི་ཕྲིན་ལས་ཁྲིགས་སུ་བསྡེབས་པ་འཆི་མེད་འདོད་འཇོ་ཞེས་བྱ་བ་བཞུགས་སོ།།

ཨོཾ་སྭ་སྟི་སིདྡྷིར་སྟུ། ཚེ་དང་ཡེ་ཤེས་དཔག་མེད་དྭང་མའི་བཅུད། །སྲོག་གི་ཟུངས་སུ་འདྲེན་མཛད་བླ་མ་ལྷར། །བཏུད་ནས་དེ་ཡི་ཕྲིན་ལས་ཆོ་ག་ནི། །འཆི་མེད་འདོད་པ་འཇོ་བའི་དཔྱིད་དུ་བསྐྲུན། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ལ་གཉིས། ཆོ་གར་མ་གཏོགས་པའི་སྦྱོར་བ་དར། ཆོ་གར་གཏོགས་པའི་སྦྱོར་བའོ། །དང་པོ་ནི། གནས་དབེན་ཞིང་ཉམས་དགའ་བ། བཀྲ་ཤིས་ཤིང་དགེ་མཚན་དང་ལྡན་པར་སྟེགས་བུའི་དབུས་སུ་པདྨ་འདབ་བརྒྱད་ཕྱོགས་བཞི་དམར། མེ་རླུང་སེར། དབང་ལྡན་སྔོ། ལྟེ་བ་དང་བདེན་བྲལ་ལྗང་གུར་བྱས་པའི་སྟེང་དུ་མཉྫིའི་ཁར་བུམ་པ་བུམ་རྫས་ཉེར་ལྔ་དང་། ཆོས་སྨན་ཚེ་རྫས་སོགས་ཀྱི་བཅུད་དང་ལྡན་པའི་ཁ་རྒྱན་གཙོ་བོའི་སྐུ་ཙག་གིས་མཚན་པ། མདུན་གྱི་གཡས་སུ་གཞུང་ལས། བཟང་དྲུག་འབྲས་གསུམ་རྟག་ཏུ་ངུ་། ཅོང་ཞི་བྲག་ཞུན་སྦྱར་བ་ཡི། །རིལ་བུ་ཁ་དོག་སྣ་ལྔར་བསྒྱུར། །སོ་སོར་བསྐྱེད་བསྟིམས་སྔགས་བཟླས་ནས། །ཟོས་ན་ཚེ་ཡི་བཅུད་ལེན་འགྱུར། །ཅེས་གསུངས་པའི་ཚེ་རྫས་བཅུད་ལེན་གྱི་རིལ་བུ་དང་། དེའི་གཡོན་དུ་ཀ་པཱ་ལར་ཚེའི་བདུད་རྩི། དེ་དག་གི་མདུན་དུ་གཏོར་ཟླུམ་དམར་པོ་པད་འདབ་ཅན་གསུམ་དང་། སྨན་རཀ །ཉེར་སྤྱོད་སོགས་བཀོད་པས་མཛེས་པར་བཤམ་པ་སྟེ། བསྙེན་སྒྲུབ་སོགས་ཀྱི་སྐབས་སུ་འདི་ཙམ་གྱིས་འཐུས། དབང་གི་སྐབས་དབང་རྫས་རྣམས་གོ་རིམ་དབང་ཆོག་ལས་འབྱུང་བ་ལྟར་བཤམ། རང་གི་མདུན་དུ་ནང་མཆོད། རྡོ་རྗེ། དྲིལ་བུ། ཌ་མ་རུ། ལས་བུམ། ཚེ་མདའ། མེ་ཏོག་གི་སྣོད། ཉེ་ལོགས་གང་བདེར་བརྟན་མའི་གཏོར་མ་དང་། སྔོན་གཏོར། ཚོགས་ཀྱི་དམ་རྫས་སོགས་དགོས་པའི་ཡོ་བྱད་ཐམས་ཅད་འདུ་བྱའོ། །གཉིས་པ་ལ། སྐྱབས་སེམས་བགེགས་བསྐྲད་སྲུང་འཁོར་བསྒོམ། །བྱིན་དབབ་མཆོད་པ་བྱིན་གྱིས་བརླབ། །ཅེས་དྲུག་ལས་དང་པོ་ནི། བླ་མ་དང་མགོན་པོ་ཚེ་དཔག་མེད་པའི་དཀྱིལ་འཁོར་མཁའ་ཁྱབ་ཏུ་སད་པ་རྩ་གསུམ་རྒྱ་མཚོའི་སྤྲིན་ཕུང་འཕྲོ་བར་བསམས་ལ། ཧཱུྃ། རང་བྱུང་ལྷུན་གྱིས་གྲུབ་པའི་སྐུ། །འོད་གསལ་ཆེན་པོའི་དགོངས་པ་ཅན། །ཐུགས་རྗེའི་དབང་གིས་འགྲོ་དོན་མཛད། །བླ་མ་རྣམས་ལ་སྐྱབས་སུ་མཆི། །རང་ལས་ཡེ་ཤེས་ཤར་བའི་སྐུ། །མི་འབྲལ་རྩེ་གཅིག་དགོངས་པ་ཅན། །བྱིན་གྱིས་རློབ་ཅིང་བར་ཆད་སེལ། །ཡི་དམ་ལྷ་ལ་སྐྱབས་སུ་མཆི། །དམ་ཚིག་རྣམ་པར་དག་པའི་སྐུ། །བརྩེ་གདུང་བྱམས་པའི་དགོངས་པ་ཅན། །ལེགས་ཉེས་སྟངས་འཛིན་དངོས་གྲུབ་སྟེར། །མཁའ་འགྲོའི་ཚོགས་ལ་སྐྱབས་སུ་མཆི། ཞེས་ལན་གྲངས་ཅི་ནུས་དང་། གཉིས་པ་ནི། རྒྱུན་བཤགས་སྔོན་དུ་འགྲོ་བས་སྨོན་པ་དང་འཇུག་པའི་སེམས་བསྐྱེད་ཅིང་གསང་སྔགས་ཕྱི་སྤྱོད་པས་བསླབ་པ་དང་། དོན་དམ་བྱང་ཆུབ་ཀྱི་སེམས་ཀྱང་བསྒོམ་པའི་སྟོབས་ཀྱིས་བསྐྱེད་པར་བགྱིའོ་སྙམ་དུ་ལྷག་པའི་བསམ་པ་རྩེ་གཅིག་པས། སྔོན་ནས་བསགས་པའི་སྡིག་སྒྲིབ་བཤགས། །འགྲོ་དོན་སངས་རྒྱས་ཐོབ་བྱའི་ཕྱིར། །སྨོན་པའི་བྱང་ཆུབ་སེམས་བསྐྱེད་དོ། །སེམས་ཅན་ཡོངས་སུ་སྨིན་བྱའི་ཕྱིར། །གསང་སྔགས་སྤྱོད་པ་རླབས་ཆེན་སྤྱད། །དོན་དམ་སྤྲོས་བྲལ་བྱང་ཆུབ་སེམས། །རང་བྱུང་མཐའ་བྲལ་སྟོང་གསལ་བསྒོམ། །ལན་གསུམ་གྱི་མཐར། ཛཿཧཱུྃ་བྃ་ཧོཿ ཚོགས་ཞིང་རྣམས་རང་ལ་ཐིམ་པར་བསམ། གསུམ་པ་ལ། ཐོག་མར་མཚམས་ལྷ་བསྐྱེད་པ་ནི། ཧྲཱིཿ རང་སེམས་སྐད་ཅིག་ཧྲཱིཿཡིག་ཡོངས་གྱུར་ལས། །ཁྲོ་རྒྱལ་རྟ་མགྲིན་ཞལ་གཅིག་ཕྱག་གཉིས་པ། །བེ་ཅོན་སྡིགས་མཛུབ་རྩེ་ལས་མེ་ཕུང་འབར། །དུར་ཁྲོད་ཆས་རྫོགས་རྟ་སྐད་ཕྱོགས་བཅུར་སྒྲོགས། །ཨོཾ་བཛྲ་ཀྲོ་དྷ་ཧ་ཡ་གྲི་ཝ་ཧུ་ལུ་ཧུ་ལུ་ཧཱུྃ་ཕཊ། །ཅེས་ང་རྒྱལ་བཟུང་ལ། གཏོར་མ་རྃ་ཡྃ་ཁྃ་གིས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཟབ་ཅིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར་པར་བསམས་ལ། ཨོཾ་ཨཱཿཧཱུྃ་ཧོཿ ལན་གསུམ་གྱིས་བརླབ། ཨོཾ་སརྦ་བྷཱུ་ཏ་ཨཱ་ཀཪྵཱ་ཡ་ཛཿས་མགྲོན་དགུག །ཨོཾ་སརྦ་བིགྷཱན་ན་མསྶརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཏཏྑཾ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་གྲྀཧྣེ་དཾ་བ་ལྱཱ་དི་སྭཱ་ཧཱ། ལན་གསུམ་གྱིས་བསྔོས་ལ། ཧཱུྃ། འཆི་མེད་སྒྲུབ་པའི་དཀྱིལ་འཁོར་འདིར། །འདུ་བའི་ལྷ་ནི་མ་གཏོགས་པ། །ཚེ་སྲོག་འཕྲོག་པའི་གདོན་བགེགས་སོགས། །མི་དང་མི་མིན་འབྱུང་པོའི་ཚོགས། །མཆོད་སྦྱིན་གཏོར་མས་ཚིམ་བྱོས་ལ། །འདི་རུ་མ་འདུག་གཞན་དུ་དེངས། །ཅི་སྟེ་མི་འགྲོ་འདུག་གྱུར་ན། །རྟ་མཆོག་རྒྱལ་པོའི་ཐུགས་ཀ་ནས། །སྤྲུལ་པའི་ཁྲོ་མཚོན་མེ་ཕུང་གིས། །ཐལ་བའི་རྡུལ་དུ་བརླག་པར་འགྱུར། །ཨོཾ་བཛྲ་ཀྲོ་དྷ་ཧ་ཡ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ། གནོད་བྱེད་འབྱུང་པོ་ཨུཙཊྚཱ་ཡ་ཕཊ། ཅེས་བཀའ་བསྒོས་ཤིང་དྲག་སྔགས་དང་བཅས་གུ་གུལ་འདུག །ཡུངས་ཀར་བྲབ། རོལ་མོའི་ཚམ་རྔམས་ཀྱིས་གཏོར་མ་ཕྱིར་དོར། །བཞི་པ་ནི། རང་གི་ཐུགས་ཀ་ནས་སྤྲོས་པའི་ཁྲོ་མཚོན་མེ་ཕུང་གིས་བགེགས་རྣམས་བསྐྲད། སླར་འདུས་པ་ལས་མཚོན་ཆའི་འཁོར་ལོ་ཡངས་ཤིང་རྒྱ་ཆེ་བའི་ཕྱི་རོལ་ཏུ་རྡོ་རྗེའི་སྲུང་འཁོར་མེ་འབར་བ་དང་བཅས་པས་མཚམས་བཅིངས་པར་བསམས་ལ། ཧྲཱིཿ དབང་གི་རྟ་སྐད་རབ་འཚེར་ཞིང་། །འཁོར་ལོ་རྡོ་རྗེ་མེ་ཕུང་གིས། །སྟེང་འོག་ཕྱོགས་མཚམས་མེད་པར་གཏམས། །སྲུང་པའི་གུར་ཁང་ཆེན་པོར་གྱུར། །ཨོཾ་བཛྲ་ཙཀྲ་ཛྭ་ལ་རྃ་ཧཱུྃ་བྷྲཱུྃ་ཧཱུྃ། ལྔ་པ་ནི། རང་གི་སྙིང་ག་ནས་ལྕགས་ཀྱུ་ལྟ་བུའི་འོད་ཟེར་འཕྲོས་པས་ཡེ་ཤེས་ཀྱི་འཁོར་ལོ་མཁའ་ཁྱབ་ཏུ་སྤྱན་དྲངས་ཏེ་བདག་གནས་ཡོ་བྱད་རྣམས་ལ་ཐིམ་པས་བྱིན་རླབས་ཀྱི་གཟི་བྱིན་འབར་བར་བསམས་ལ། སྤོས་རོལ་དང་དབྱངས་ཀྱི་འགྱུར་བ་སྙན་པོ་དང་བཅས། ཧྲཱིཿ ཆོས་དབྱིངས་རྣམ་དག་ཕོ་བྲང་ནས། །ཚེ་དཔག་མེད་མགོན་ལྷ་ཚོགས་རྣམས། །གནས་མཆོག་འདིར་གཤེགས་དབང་ཆེན་སྐུར། །བྱིན་ཕོབ་དངོས་གྲུབ་མ་ལུས་སྩོལ། །ཨོཾ་བཛྲ་གུ་རུ་པདྨ་སིདྡྷི་ཨཱ་ཡུརྫྙཱ་ན་ས་མ་ཡ་ཨཱ་བེ་ཤ་ཡ་ཨ་ཨཱཿ དྲུག་པ་ནི། ཧྲཱིཿ འཆི་མེད་རིག་འཛིན་དཀྱིལ་འཁོར་སྒྲུབ་པའི་རྫས། །ཕྱི་ནང་གསང་བའི་རང་བྱུང་མཆོད་པ་རྣམས། །མ་དག་ལོག་འཁྲུལ་ཉེས་པའི་ཚོགས་རྣམས་ཀུན། །ཡེ་ཤེས་འབྲུ་གསུམ་སྦྱང་ཞིང་བྱིན་གྱིས་བརླབ། །རྃ་ཡྃ་ཁྃ། ཨོཾ་ཨཱཿཧཱུྃ། མ་ཧཱ་པཉྩ་ཨ་མྀ་ཏ་ཧཱུྃ་ཧྲཱིཿཋཱ། མ་ཧཱ་བ་ལིཾ་ཏ་ཨཱཿཧཱུྃ། མ་ཧཱ་རཀྟ་ཨཱཿཧཱུྃ། ཨོཾ་བཛྲ་ཨརྒྷཾ་ནས་ཤཔྡ་ཨཱཿཧཱུྃ་གི་བར་གྱིས་ཚེ་རྫས་དང་། སྨན་གཏོར་རཀྟ་ཉེར་སྤྱོད་དང་བཅས་པ་འཆི་མེད་བདེ་བ་ཆེན་པོའི་ཡེ་ཤེས་རྣམ་པ་ཐམས་ཅད་པར་འཆར་བའི་རང་བཞིན་དུ་བྱིན་གྱིས་བརླབ་བོ། །གཉིས་པ་དངོས་གཞི་ལ། ལྷ་བསྐྱེད་སྤྱན་དྲང་བཞུགས་སུ་གསོལ། །མཆོད་ཅིང་ཛཔ྄་བཟླ་ཚེ་འགུགས་བསྐུལ། །ཅེས་དྲུག་ལས་དང་པོ་ནི། བདག་མདུན་བུམ་གསུམ་འཇུག་པ་གཅིག་པའི་ཚུལ་གྱིས་འོད་གསལ་སྟོང་ཉིད་ཀྱི་ངང་ལས་རང་བྱུང་རིག་པ་ལྷའི་སྐུར་ལྡང་བ་ནི། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཉཾ། འཛིན་མེད་སྟོང་པའི་དབྱིངས་ཉིད་ལས། །ཆུ་ལས་ཆུ་ལྦུར་བརྡོལ་བ་བཞིན། །པདྨའི་སྡོང་པོ་རྒྱས་པའི་སྟེང་། །ཟླ་བའི་དཀྱིལ་འཁོར་ཉ་གང་བར། །རང་བྱུང་པདྨ་ཚེ་དཔག་མེད། །དཀར་པོ་མཚན་དང་དཔེ་བྱད་ལྡན། །ཕྱག་གཡས་གསེར་གྱི་རྡོ་རྗེ་དང་། །གཡོན་པ་འཆི་མེད་ཚེའི་བུམ་པ། །འཛིན་པས་ཡུམ་གྱི་མགུལ་ནས་འཁྱུད། །པང་དུ་ཡེ་ཤེས་མཁའ་འགྲོའི་གཙོ། །མནྡཱ་ར་བ་གོས་དཀར་མོ། །དམར་མོ་བཅུ་དྲུག་ལོན་པའི་ཚུལ། །ནུ་མ་འབུར་ཞིང་བྷ་ག་རྒྱས། །གཡས་གཡོན་པདྨ་བདུད་རྩི་ཡིས། །གང་བའི་ཐོད་འཛིན་ཡབ་ལ་འཁྲིལ། །ཡབ་ཡུམ་གཉིས་ཀའང་ལོངས་སྐུའི་ཆས། །དར་དང་རིན་ཆེན་རུས་པས་སྤྲས། །འཇའ་ཚོན་སྣ་ལྔའི་གུར་ཁྱིམ་དབུས། །རྡོ་རྗེ་པདྨའི་སྐྱིལ་ཀྲུང་བཞུགས། །རྩ་གསུམ་འཁོར་ལོ་ལྔ་ལྡན་པའི། །སྤྱི་བོ་བདེ་ཆེན་འཁོར་ལོའི་དབུས། །རིག་འཛིན་བུདྡྷ་ཐོད་ཕྲེང་རྩལ། །དཀར་པོ་ཞལ་གཅིག་ཕྱག་གཉིས་པ། །གསང་གོས་སྣམ་སྦྱར་མཉེན་ཞུ་གསོལ། །འཁོར་ལོ་བུམ་འཛིན་ཡུམ་ལ་འཁྲིལ། །མནྡཱ་ར་བ་སངས་རྒྱས་སྤྱན། །འཁོར་ལོ་ཐོད་པ་འཛིན་པས་འཁྱུད། །མགྲིན་པ་ལོངས་སྤྱོད་འཁོར་ལོའི་དབུས། །རིག་འཛིན་པདྨ་ཐོད་ཕྲེང་རྩལ། །དམར་པོ་ཞལ་གཅིག་ཕྱག་གཉིས་པ། །གསང་གོས་སྣམ་སྦྱར་མཉེན་ཞུ་གསོལ། །པདྨ་བུམ་འཛིན་ཡུམ་ལ་འཁྲིལ། །ཤཱཀྱ་དེ་ཝཱི་གོས་དཀར་མོ། །པདྨ་ཐོད་འཛིན་ཡབ་ལ་འཁྱུད། །སྙིང་ག་ཆོས་ཀྱི་འཁོར་ལོའི་དབུས། །རིག་འཛིན་བཛྲ་ཐོད་ཕྲེང་རྩལ། །སྔོན་པོ་ཞལ་གཅིག་ཕྱག་གཉིས་པ། །གསང་གོས་སྣམ་སྦྱར་མཉེན་ཞུ་གསོལ། །རྡོ་རྗེ་བུམ་འཛིན་ཡུམ་ལ་འཁྱུད། །ཡེ་ཤེས་མཚོ་རྒྱལ་མཱ་མ་ཀཱི། །རྡོ་རྗེ་ཐོད་པ་འཛིན་པས་འཁྱུད། །ལྟེ་བ་སྤྲུལ་པའི་འཁོར་ལོའི་དབུས། །རིག་འཛིན་རཏྣ་ཐོད་ཕྲེང་རྩལ། །སེར་པོ་ཞལ་གཅིག་ཕྱག་གཉིས་པ། །གསང་གོས་སྣམ་སྦྱར་མཉེན་ཞུ་གསོལ། །རིན་ཆེན་བུམ་འཛིན་ཡུམ་ལ་འཁྲིལ། །ཀ་ལ་སིདྡྷི་རིན་ཆེན་སྒྲོལ། །རིན་ཆེན་ཐོད་པ་འཛིན་པས་འཁྱུད། །གསང་གནས་བདེ་སྐྱོང་འཁོར་ལོའི་དབུས། །རིག་འཛིན་ཀརྨ ་ཐོད་ཕྲེང་རྩལ། །ལྗང་གུ་ཞལ་གཅིག་ཕྱག་གཉིས་པ། །གསང་གོས་སྣམ་སྦྱར་མཉེན་ཞུ་གསོལ། །རྒྱ་གྲམ་བུམ་འཛིན་ཡུམ་ལ་འཁྲིལ། །བཀྲ་ཤིས་ཁྱེ་འདྲེན་དམ་ཚིག་སྒྲོལ། །རྒྱ་གྲམ་ཐོད་པ་འཛིན་པས་འཁྱུད། །ཡུམ་རྣམས་གཅེར་མོ་སྐྲ་གྲོལ་བ། །རུས་པའི་རྒྱན་དང་ལང་ཚོས་སྤྲས། །མཛེས་སྡུག་བདེ་བ་སྐྱེད་པའི་ཉམས། །ཡབ་ཡུམ་རྡོ་རྗེ་པདྨ་ཡི། །སྐྱིལ་ཀྲུང་འཇའ་འོད་ཀློང་ན་བཞུགས། །ཞེས་དམ་ཚིག་གི་འཁོར་ལོ་གསལ་གདབ། །གཉིས་པ་ནི། ཧྲཱིཿ རང་བཞིན་རྣམ་དག་ཞིང་ཁམས་ནས། །པདྨ་ཐོད་ཕྲེང་ཚེ་དབང་རྩལ། །རིགས་ལྔ་ཡབ་ཡུམ་འཁོར་དང་བཅས། །གནས་འདིར་སྤྱན་འདྲེན་གཤེགས་སུ་གསོལ། །ཨོཾ་བཛྲ་གུ་རུ་པདྨ་ཨཱ་ཡུརྫྙཱ་ན་ས་པ་རི་ཝཱ་ར་བཛྲ་ས་མ་ཡ་ཛཿཛཿཧཱུྃ་བྃ་ཧོཿ ཞེས་པས་ཡེ་ཤེས་པའི་འཁོར་ལོ་ནམ་མཁའ་གང་བར་སྤྱན་དྲངས་ཏེ་དམ་ཚིག་གི་ཕྱག་རྒྱར་དགུག་གཞུག་བཅིང་ཞིང་དགྱེས་པ་བསྐྱེད། །གསུམ་པ་ནི། ཧྲཱིཿ ལྷུན་གྲུབ་བདེ་ཆེན་གཞལ་ཡས་འདིར། །དབྱིངས་ཀྱི་ཐིག་ལེ་འོད་ཕུང་འཁྱིལ། །རིག་པ་རང་ཤར་ཚེ་ཡི་ལྷ། །མཉམ་ཉིད་དབྱིངས་སུ་བརྟན་པར་བཞུགས། །ཨོཾ་བཛྲ་ས་མ་ཡ་ཏིཥྛནྟུ། བཞི་པ་ལ་ལྔ་ལས། དང་པོ་ཕྱག་གི་མཆོད་པ་ནི། ཧྲཱིཿ རང་རིག་ཚེ་ཡི་ལྷ་ཚོགས་ལ། །སྣང་སྟོང་སྐྱེ་འགག་མེད་པའི་དབྱིངས། །བཟང་ངན་གཉིས་འཛིན་བྲལ་བ་ཡི། །མཉམ་ཉིད་ངང་དུ་ཕྱག་འཚལ་ལོ། །ན་མོ་པུ་རུ་ཤ་ཡ་ཧོཿ །གཉིས་པ་ཕྱི་མཆོད་ནི། ཧྲཱིཿ རིག་གདངས་ཚེ་ཡི་ལྷ་ཚོགས་ལ། །མཆོད་པའི་བྱེ་བྲག་འབུལ་བ་ནི། །ལྷ་རྫས་མཆོད་ཡོན་ཞབས་བསིལ་དང་། །མེ་ཏོག་བདུག་སྤོས་མར་མེ་དྲི། །ཞལ་ཟས་སྒྲ་སྙན་ལྷ་མོ་རྣམས། །སོ་སོའི་ཁ་དོག་ཕྱག་རྒྱར་བསྒྱུར། །རབ་འབྱམས་ནམ་མཁའི་ཁམས་བཀང་ནས། །རྒྱལ་བའི་དཀྱིལ་འཁོར་མཆོད་པར་བྱ། །ཨོཾ་བཛྲ་གུ་རུ་པདྨ་ཨཱ་ཡུརྫྙཱ་ན་ས་པ་རི་ཝཱ་ར་བཛྲ་ཨརྒྷཾ་ནས། ཤཔྡ་པྲ་ཏཱི་ཙྪ་སྭཱ་ཧཱ། གསུམ་པ་ནང་བདུད་རྩི་གཙོ་བོར་གྱུར་པའི་སྨན་གཏོར་རཀྟའི་མཆོད་པ་ནི། ཧྲཱིཿ ཚེ་དཔག་མེད་མགོན་ལྷ་ཚོགས་ལ། །རྩ་བརྒྱད་བདུད་རྩིའི་མཆོད་པ་དང་། །དམ་རྫས་གཏོར་མའི་མཆོད་པ་དང་། །བདེ་ཆེན་རཀྟའི་མཆོད་པ་རྣམས། །དོན་དམ་དབྱིངས་ཀྱི་མཆོད་པར་འབུལ། །མཐུན་འཇུག་མཆོག་གི་མཆོད་པར་བཞེས། །ཨོཾ་བཛྲ་གུ་རུ་པདྨ་ཨཱ་ཡུརྫྙཱ་ནཱ་མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་བ་ལིཾ་ཏ་ཁཱ་ཧི། མ་ཧཱ་རཀྟ་ཁཱ་ཧི། ཞེས་སྤྱིར་ཕུལ་ནས། སྤྲོ་ན། སྣང་མཐའ་འཆི་མེད་མགོན་པོ་པདྨ་འབྱུང་། །ཡེ་ཤེས་མཚོ་རྒྱལ་རྡོ་རྗེ་ཐོགས་མེད་རྩལ། །སྨིན་གྲོལ་མཆོག་སྩོལ་རྩ་བརྒྱུད་བླ་མ་ལ། །སྨན་མཆོད་འབུལ་ལོ་ཚེ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། དཀྱིལ་འཁོར་གཙོ་མཆོག་པདྨ་ཚེ་དཔག་མེད། །རིགས་ལྔ་ཐོད་ཕྲེང་ཡབ་ཡུམ་སྤྲུལ་པའི་གར། །ཡི་དམ་མཁའ་འགྲོ་ཆོས་སྲུང་གཏེར་བདག་ལ། །སྨན་མཆོད་འབུལ་ལོ་ཚེ་དབང་དངོས་གྲུབ་སྩོལ། །མ་ཧཱ་པཉྩ་མྲྀ་ཏ་ཁ་རཾ་ཁཱ་ཧི། ཞེས་བླ་མ་དང་ལྷག་པའི་ལྷའི་འཁོར་ལོ་ལ་འབུལ་ཞིང་། བཛྲ་ཨ་མྲྀ་ཏ་སྭ་དཾ་ཀུ་རུ་ཥྭ་མེ་ཞེས་རྡོ་རྗེ་ལྕེའི་དམ་ཚིག་གིས་མྱངས་པ་ལ་དངོས་གྲུབ་ཐོབ་པར་བསམ། བཞི་པ་གསང་བ་བདེ་ཆེན་གྱི་མཆོད་པ་ནི། ཧྲཱིཿ ཚེ་དཔག་མེད་མགོན་ལྷ་ཚོགས་ལ། །སྣང་སྟོང་བདེ་ཆེན་ཡབ་ཡུམ་མཁར། །དགའ་བཞིའི་ཡེ་ཤེས་ཐིག་ལེར་འཁྱིལ། །ཟུང་འཇུག་བདེ་ཆེན་མཆོད་པར་བཞེས། །ཨོཾ་བོ་དྷི་ཙིཏྟ་པཱུ་ཛ་ཧོཿ ཞེས་ཡབ་ཡུམ་སྙོམས་འཇུག་གི་བདེ་བ་ཆེན་པོས་ཐུགས་རྒྱུད་ཡོངས་སུ་གང་བར་གྱུར་པར་བསམ་མོ། །ལྔ་པ་བསྟོད་པའི་མཆོད་པ་ནི། ཧྲཱིཿ དྲན་པ་ཙམ་གྱིས་འཆི་བདག་བདུད། །མཐར་མཛད་པད་འབྱུང་ཚེ་དཔག་མེད། །ཨེ་ཝཾ་ཟུང་འཇུག་ལྷ་ཚོགས་ལ། །ལུས་ངག་ཡིད་གསུམ་གུས་ཕྱག་འཚལ། །དྲུག་པ་ལ་གཉིས། སྤྱི་དང་། བྱེ་བྲག་གོ །དང་པོ་ནི། ཐུགས་ཀར་ཟླ་བའི་སྟེང་དུ་མི་འགྱུར་བའི་ཐུགས་སྲོག་ཧྲཱིཿཡིག་དཀར་པོའི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས། འབྱུང་བ་བཞིའི་དྭང་བཅུད། རང་དང་བསྒྲུབ་བྱའི་བླ་ཚེ་ཆད་ཉམས་ཡར་བ། འཁོར་འདས་ཀྱི་ཚེ་བསོད་དཔལ་འབྱོར་ཡེ་ཤེས་ཡོན་ཏན་ཐམས་ཅད་འོད་ཟེར་ཁ་དོག་སྣ་ལྔའི་རྣམ་པར་སྤྱན་དྲངས། ལུས་དཀྱིལ་གྱི་ལྷ་ཡབ་ཡུམ་རྣམས་ཀྱི་དབུ་གཙུག་ནས་ཞུགས། སྦྱོར་མཚམས་ནས་བྱང་ཆུབ་སེམས་ཀྱི་རྣམ་པར་བབས་པས་རྩ་འཁོར་ཐམས་ཅད་ཁེངས་ཏེ་ཚེ་ཡར་བ་ཁུག །ཉམས་པ་སོས། གནས་པ་གོང་ནས་གོང་དུ་འཕེལ་ཞིང་རྒྱས་པས་འཆི་མེད་ཚེའི་རིག་འཛིན་ཐོབ་པར་གྱུར་པའི་མོས་པས། ཨོཾ་བཛྲ་གུ་རུ་པདྨ་ཨཱ་ཡུརྫྙཱ་ན་སརྦ་སིདྡྷི་ནྲྀ་བྷྲཱུྃ་ཧཱུྃ་ཛཿ བཛྲ་ཨཱ་ཡུ་ཥེ་སྭཱ་ཧཱ། ཞེས་གཙོ་བོར་བཟླ། གཉིས་པ་ལ་གཉིས། རིགས་སོ་སོའི་བཟླས་པས་ཚེ་འགུགས་ཞིང་གསོ་བ་དང་། ལས་སྣ་ཚོགས་ཀྱི་ཁ་བསྒྱུར་རོ་། །དང་པོ་ནི། གནས་ལྔའི་ཐོད་ཕྲེང་རིགས་ལྔའི་ཐུགས་ཀར་ཟླ་བའི་སྟེང་དུ་ཨོཾ་ཨཱཿཧཱུྃ་སྭཱ་ཧཱ་དཀར་དམར་མཐིང་སེར་ལྗང་གུའི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས། འབྱུང་བ་ཆེན་པོ་ས་དང་། མེ་དང་། ཆུའི་བཅུད་དང་། རང་གི་བླ་ཚེ་ཆད་ཉམས་ཡར་བ་དང་། འཁོར་འདས་ཀྱི་དྭང་མ། རླུང་གི་བཅུད་རྣམས་འོད་ཟེར་དཀར་དམར་མཐིང་སེར་ལྗང་གུའི་རྣམ་པར་སྤྱན་དྲངས། ཡབ་ཡུམ་སོ་སོའི་དབུ་གཙུག་ནས་ཞུགས། སྦྱོར་མཚམས་ནས་བྱང་ཆུབ་སེམས་ཀྱི་བདུད་རྩིའི་རྣམ་པར་བབས་པས་རྩ་གསུམ་འཁོར་ལོ་ལྔ་དང་བཅས་པ་ལྟེམ་གྱིས་ཁེངས་ཏེ་ཚེ་ཡར་བ་ཁུག །ཉམས་པ་སོས། གནས་པ་གོང་ནས་གོང་དུ་འཕེལ་ཞིང་རྒྱས་པས་འཆི་མེད་ཚེའི་རིག་འཛིན་ཐོབ་པར་གྱུར་པའི་མོས་པས། ལྷ་སོ་སོར་རིམ་བཞིན་དུ་གསོལ་བ་གདབ་ཅིང་། དམིགས་པའི་བྱེ་བྲག་ལ་སེམས་འཛིན་པས། །ཨོཾ་བཻ་རོ་ཙ་ན་ཨ་པ་རི་མི་ཏ་ཨཱ་ཡུརྫྙཱ་ན་སིདྡྷི་ཕ་ལ་ཧཱུྃ། ༡༠༠༠ དེ་བཞིན་དུ་ཨོཾ་བཻ་རོ་ཙ་ནའི་མལ་དུ། ཨཱཿཔདྨ་དྷཱ་ར། ཧཱུྃ་ཨཀྵོ་བྷྱཿ སྭཱ་རཏྣ་སམྦྷ་བ། ཧཱ་ཨ་མོ་གྷ་སིདྡྷ། ཞེས་སྦྱར་བའི་བཟླས་པ་ཅི་ལྟར་རིགས་པ་བྱའོ། །གསུམ་པ་ནི། གཞུང་རྩ་བ་ལས། ཁྱད་པར་སྤྱི་བོའི་ཡབ་ཡུམ་ལས། །འོད་དཀར་འཕྲོས་པས་དུས་མིན་ཚེའི། །བར་གཅོད་ཐམས་ཅད་སངས་ཀྱིས་དག །མགྲིན་པའི་འོད་དམར་ལྕགས་ཀྱུ་ཡིས། །ཚེ་ཡི་དངོས་གྲུབ་ཐམས་ཅད་བཀུག །སྙིང་གའི་འོད་སྔོན་འཕྲོས་པ་ཡིས། །སྟོང་སངས་མཁའ་དབྱིངས་ཚེ་སྲོག་སྦ། །ལྟེ་བའི་སེར་པོས་ལུས་ཁེངས་པས། །བསོད་ནམས་རྣམ་ཐོས་བུ་ལྟར་རྒྱས། །གསང་བའི་ལྗང་གུས་ཁྱབ་པ་ཡིས། །ཕྲིན་ལས་མ་ལུས་གྲུབ་པར་གྱུར། །ཅེས་བརྗོད་ཅིང་བསམས་ལ་བྱེ་བྲག་སོ་སོའི་བཟླས་པ་ཅུང་ཟད་བྱའོ། །འདི་རྣམས་ཀྱི་དམིགས་པའི་བྱེ་བྲག་ཞིབ་པར་ཁྲིད་དང་། བསྙེན་པའི་ཡི་གེ་ལས་ཤེས་ཤིང་སྤྱིར་བཏང་རྩ་བའི་དམིགས་བཟླས་ཁོ་ནས་ཀྱང་དོན་གྲུབ་པ་ཡིན་ནོ། །ཐུན་ལས་ལྡང་བར་བརྩམ་པ་ན། དབྱངས་གསལ་རྟེན་སྙིང་ཡིག་བརྒྱ་བརྗོད་པས་སྔགས་ཀྱི་ལྷག་ཆད་ཁ་བསྐང་ཞིང་ནུས་པ་སྤེལ། ཡེ་ཤེས་ལྷ་ཚོགས་སྤྱན་འདྲེན་གཤེགས། །ཕྱི་ནང་གསང་བའི་མཆོད་པ་འབུལ། །སྐུ་གསུང་ཐུགས་ཡོན་ཕྲིན་ལས་བསྟོད། །བག་མེད་འགལ་འཁྲུལ་ཉམས་ཆག་བཤགས། །མ་ཧཱ་ཨ་མྲྀ་ཏ་རཀྟ་བ་ལིཾ་ཏ་ཁཱ་ཧི། ཞེས་སྟོང་ཚིགས་ཀྱི་མཆོད་བསྟོད་ཀྱང་བྱའོ། །དབང་དོན་སོགས་ཀྱི་ཚེ་བུམ་བཟླས་དམིགས་བསལ་བྱེད་ན། བུམ་པ་རང་བྱུང་གི་གཞལ་ཡས་ཁང་ཆེན་པོའི་སྟོད་ཀྱི་ཆར་པདྨ་ཚེ་དཔག་མེད་ལུས་དཀྱིལ་གྱི་ལྷ་དང་བཅས་པ་ལྷག་པར་གསལ་བར་མོས་ཏེ། གཟུངས་ཐག་ནས་འཇུས་ཏེ། བདག་སྲོག་སྔགས་ཀྱི་འོད་ཟེར་གཟུངས་ཐག་ལ། །འཁྲིལ་ཏེ་བུམ་པའི་ལྷ་ཚོགས་ཐུགས་རྒྱུད་བསྐུལ། །དེ་དག་སྐུ་ལས་བྱང་སེམས་བདུད་རྩིའི་རྒྱུན། །བབས་པས་བུམ་ཆུར་གཉིས་མེད་རོ་གཅིག་གྱུར། །ཅེས་དང་། སྔར་གྱི་རྩ་བའི་བཟླས་དམིགས་བུམ་པའི་ལྷ་ལ་སྦྱར་བའི་འོད་ཟེར་སྤྲོ་བསྡུས་བདུད་རྩི་འབེབས་པའི་དམིགས་པ་དང་བཅས་པས་རྩ་སྔགས་ཅི་ནུས་སུ་བཟླ། ལས་ཐམས་ཅད་པའི་བུམ་པར་རྟ་མགྲིན་དམར་པོ་བེ་ཅོན་དང་སྡིགས་མཛུབ་མཛད་པ་ཁྲོ་བོའི་རྒྱན་དང་ཉམས་འགྱུར་ཡོངས་སུ་རྫོགས་པའི་ཐུགས་ཀར་ཉི་མ་ལ་གནས་པའི་ཧྲཱིཿདམར་པོའི་མཐར་སྔགས་ཀྱི་ཕྲེང་བས་བསྐོར་བ་ལས་བདུད་རྩིའི་རྒྱུན་བབས་པས་བུམ་པ་གང་བར་གྱུར་པའི་མོས་པས། ཨོཾ་བཛྲ་ཀྲོ་དྷ་ཧ་ཡ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ྄། ཅེས་ཅི་རིགས་པ་བཟླས་མཐར། ཨོཾ་ཨཱཿཧཱུྃ་གིས་མཆོད་ཡོན་ཕུལ། ཧཱུྃ་ཞེས་བརྗོད་པས། རྣམ་རྒྱལ་བུམ་པའི་ལྷ་རྣམས་འོད་དུ་ཞུ་ནས་བྱང་ཆུབ་སེམས་ཀྱི་བདུད་རྩིས་བུམ་པ་གང་བར་བསམ། ལས་བུམ་གྱི་ལྷ་ལ། ལས་ཀྱི་ལྷས་དཀྱིལ་འཁོར་གྱི་བྱ་བ་མཐར་མ་ཕྱིན་པའི་བར་བགེགས་ཟློག་པའི་ཕྲིན་ལས་མཛོད་ཅིག་ཅེས་གསོལ་ལ། ཧཱུྃ་ཞེས་བརྗོད་པས། ལྷ་འོད་དུ་ཞུ་བའི་དབང་དྲག་གི་རང་བཞིན་གྱི་ཆུའི་རྡུལ་ཕྲ་རབ་ཏུ་གྱུར་པར་བསམ་མོ། །དྲུག་པ་ནི། གནས་ལྔའི་ལྷའི་ཐུགས་ཀ་ནས་འབྱུང་བ་ལྔའི་ལྷ་མོ་གཡས་མདའ་དར་དང་། གཡོན་ལྕགས་ཀྱུ། ཞགས་པ། ལྕགས་སྒྲོག །དྲིལ་བུ་ཐོགས་པ་དཔག་ཏུ་མེད་པ་སྤྲོས། འཁོར་འདས་ཀྱི་ཚེ་བཅུད་ཐམས་ཅད་སླར་ཡང་བསྡུས། བདག་དང་སྒྲུབ་པའི་རྫས་ལ་ཐིམ་པས་འཆི་མེད་ཚེའི་དངོས་གྲུབ་ཐོབ་པར་བསམས་ལ་མདའ་དར་གཡོབ་ཅིང་། ཧྲཱིཿ བཅོམ་ལྡན་མགོན་པོ་ཡེ་ཤེས་ཚེ་དཔག་མེད། །འབྱུང་བ་ལྔ་ལ་དབང་བསྒྱུར་ལྷ་མོའི་ཚོགས། །རྣལ་འབྱོར་བདག་གི་ཚེ་དང་གཡང་སྤེལ་ཅིག །སྟེང་འོག་ཕྱོགས་བཅུ་སྣོད་ཀྱི་འཇིག་རྟེན་ལ། །འབྲོས་དང་འཁྱམས་དང་ཡར་བའི་ཚེ་ཁུག་ཅིག །སྟོང་ཕྲག་བརྒྱད་ཅུ་བགེགས་ཀྱི་ཚོགས་རྣམས་ཀྱིས། །བརྐུས་དང་ཕྲོག་དང་བཞོམས་པའི་ཚེ་ཁུག་ཅིག །འབྱུང་བ་དགྲ་གཤེད་འཁྲུགས་པའི་ལས་སྦྱོར་གྱིས། །ཉམས་དང་ཟད་དང་འཐོར་བའི་ཚེ་གསོས་ཤིག །ཡིད་ཀྱིས་དངས་དང་ཧད་ཀྱིས་བརྒྱལ་བ་དང་། །ཧུད་ཀྱིས་འདྲོགས་པའི་ཚེ་དང་གཡང་སྤེལ་ཅིག །ཚེ་ཁུག་གཡང་སྐྱོབས་དངོས་གྲུབ་བདག་ལ་སྩོལ། །འབྱུང་ལྔ་འོད་ལྔ་འབར་བའི་ཚེ་བཅུད་སྡུས། །འཆི་མེད་ཚེ་ཡི་དངོས་གྲུབ་བདག་ལ་སྩོལ། །ཨཱ་ཡུརྫྙཱ་ན་བིནྡུ་བྷྲཱུྃ། རྣ྄ི་བྷྲཱུྃ་བཛྲ་ཨཱ་ཡུཥེ། ཨཱ་ཡུརྫྙཱ་ན་སིདྡྷི་ཨཱ་བྷྲཱུྃ་ཞེས་བརྗོད། བར་འདིར་བཀའ་གཏེར་སྲུང་མ་སྤྱི་དང་། ཁྱད་པར་གཏེར་སྲུང་བརྟན་མ་བཅུ་གཉིས་ཀྱི་གཏོར་བསྔོ་རྒྱས་བསྡུས་གང་རིགས་བྱ། །གསུམ་པ་རྗེས་ལ། ཚོགས་མཆོད་བརྟན་བསྐྱང་དངོས་གྲུབ་གསོལ། །ཉེར་བསྡུ་བསྔོ་སྨོན་ཤིས་པ་བརྗོད། །ཅེས་དྲུག་ལས་དང་པོ་ནི། དམ་རྫས་སུ་འོས་པའི་ཡོ་བྱད་རྣམས་བཤམས་པ་བསང་ཆུས་བྲན། ཨོཾ་སརྦ་དྲ་བྱཾ་སྃ་ཤོ་དྷ་ནི་ཧཱུྃ་ཕཊ་ཀྱིས་བསང་། རྃ་ཡྃ་ཁྃ་གིས་སྦྱང་། སྟོང་པའི་ངང་ལས་ཚོགས་གཞོང་བྷཉྫ་འབར་བར་ཚོགས་རྫས་ཡེ་ཤེས་ཀྱི་བདུད་རྩི་འདོད་ཡོན་གྱི་སྤྲིན་ཕུང་འཕྲོ་བར་གྱུར་པར་བསམས་ལ། ཨོཾ་ཨཱཿཧཱུྃ་ཧྲཱིཿཞེས་པས་བྱིན་གྱིས་བརླབ། ཚོགས་ཞིང་སྤྱན་འདྲེན་པ་ནི། ཧྲཱིཿ རང་བཞིན་རྣམ་དག་གཞལ་ཡས་ནས། །བཅོམ་ལྡན་མགོན་པོ་ཚེ་དཔག་མེད། །རིགས་ལྔ་ཡབ་ཡུམ་འཁོར་དང་བཅས། །ཚོགས་ལ་སྤྱན་འདྲེན་གཤེགས་སུ་གསོལ། །ཨོཾ་བཛྲ་གུ་རུ་པདྨ་ཨཱ་ཡུརྫྙཱ་ན་ས་པ་རི་ཝཱ་ར་ས་མཱ་ཛཿ ཚོགས་ཕུད་རིམ་པ་གསུམ་དུ་སྤྲོས། དང་པོ་མཆོད་པ་ནི། གཟུགས་སྒྲ་དྲི་རོ་རེག་བྱ་ཆོས། །ཀུན་ཏུ་བཟང་པོའི་མཆོད་པའི་སྤྲིན། །ནམ་མཁའ་མཛོད་ཀྱི་སྒོ་ཕྱེ་སྟེ། །འབུལ་གྱིས་བཞེས་ལ་དངོས་གྲུབ་སྩོལ། །ཨོཾ་བཛྲ་གུ་རུ་པདྨ་ཨཱ་ཡུརྫྙཱ་ན་ག་ཎ་ཙཀྲ་པཱུ་ཛ་ཁཱ་ཧི། བར་པ་བཤགས་པ་ནི། མ་རིག་ལས་དང་ཉོན་མོངས་ཀྱིས། །རྩ་བ་ཡན་ལག་དམ་ཚིག་གི །ནོངས་པར་གྱུར་པའི་ཉེས་པ་ཀུན། །གནོང་འགྱོད་སེམས་ཀྱིས་མཐོལ་ཞིང་བཤགས། །ཞེས་དང་། ཨོཾ་པདྨ་སཏྭ་ས་མ་ཡ་སོགས་སྣང་བ་མཐའ་ཡས་ཀྱི་ཡི་གེ་བརྒྱ་པ་བཟླ། ཐ་མ་བསྒྲལ་བ་ནི། ཨེ་ནྲྀ་ཏྲི་ཛཿ ཞེས་པས་རྟེན་དང་དམིགས་བྱ་བསྐྱེད་བསྟིམ་སྔོན་དུ་འགྲོ་བས། ཕུར་པ་ཐོགས་ལ། སྐུ་སྟོད་དབང་ཆེན་ཁྲོས་པའི་གཟུགས། །སྐུ་སྨད་གནམ་ལྕགས་ཕུར་པའི་དཔལ། །དགྲ་བགེགས་ལོག་འདྲེན་དམ་སྲི་ཡི། །སྙིང་ལ་བཏབ་བོ་མཱ་ར་ཡ། །ཤ་ཁྲག་རུས་པ་རྡུལ་དུ་རློག །ཨོཾ་བཛྲ་ཀྲོ་དྷ་ཧ་ཡ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ། གནོད་བྱེད་དགྲ་བགེགས་ཤ་ཏྲཱུཾ་མཱ་ར་ཡ་རྦད། ཅེས་ཕུར་བུ་བཏབ་པས་ཚེ་བསོད་རང་ལ་བསྟིམ། རྣམ་ཤེས་ཆོས་དབྱིངས་སུ་སྤར། ཕུང་ཁམས་བདུད་རྩིའི་སྤྲིན་གྱིས་ལྷ་ཚོགས་རྣམས་མཉེས་པར་བསམས་ལ་སྨན་རག་སྦྲན་ཅིང་། ཨོཾ་བཛྲ་གུ་རུ་པདྨ་ཨཱ་ཡརྫྙཱ་ན་ས་པ་རི་ཝཱ་ར་མ་ཧཱ་མཱཾ་ས་རཀྟ་ཀེཾ་ནི་རི་ཏི་ཁཱ་ཧི། །ཞེས་བསྟབས་མཐར་རང་ཉིད་ཚེ་དཔག་མེད་ལུས་དཀྱིལ་གྱི་ལྷ་དང་བཅས་པར་གསལ་བས་ཚོགས་རྫས་ཀྱི་བདུད་རྩི་ལ་ལོངས་སྤྱད་ཅིང་། འཆི་མེད་ཚེ་ཡི་དཀྱིལ་འཁོར་དུ། །ཚོགས་ཀྱི་མཆོད་པ་ཕུལ་བ་ཡིས། །བདག་གཞན་འགྲོ་བ་མ་ལུས་པ། །དཀྱིལ་འཁོར་གཅིག་ཏུ་འགྲུབ་པར་ཤོག །ཅེས་སྨོན་ལམ་གདབ། ལྷག་མ་བདུད་རྩིས་བསང་། པཉྩ་ཨ་མྲྀ་ཏ་ཧཱུྃ་ཧ་ཧོ་ཧྲཱིཿ ལྷག་མའི་དམ་ཚིག་འདོད་ཡོན་གྱི་ཕུང་པོ་ཟད་མི་ཤེས་པ་ནམ་མཁའ་གང་བར་གྱུར་པར་བསམ། ཨེ་ཨཱ་ར་ལླི་ཧྲཱིཾ་ཧྲཱིཾ་ཕེཾ་ཕེཾ་ཞེས་པས་ལྷག་མའི་དམ་ཚིག་ལ་གནས་པ་རྣམས་སྤྲིན་གཏིབས་པ་བཞིན་བྱོན་པར་བསམས་ལ། ཧྲཱིཿ ཚེ་དཔག་མེད་མགོན་བཀའ་འཁོར་ན། །དམ་པའི་ཆོས་ཀྱི་སྲུང་མ་རྣམས། །ལྷ་ཆེན་བརྒྱད་དང་ཀླུ་ཆེན་བརྒྱད། །གཟའ་ཆེན་བརྒྱད་དང་གནོད་སྦྱིན་བརྒྱད། །རྒྱལ་ཆེན་བཞི་དང་ཕྱོགས་སྐྱོང་བཅུ། །རྒྱུ་སྐར་ཉི་ཤུ་རྩ་བརྒྱད་དང་། །ཧ་རི་ཀ་དང་པཉྩི་ཀ །འཕྲོག་མ་མ་བུར་བཅས་པ་དང་། །དཔལ་ལྡན་མགོན་པོ་ལྕམ་དྲལ་དང་། །ལྷ་དང་ལྷ་མིན་མིའམ་ཅི། །དྲི་ཟ་གནོད་སྦྱིན་འབྱུང་པོ་དང་། །ལྷ་སྲིན་སྡེ་བརྒྱད་ཐམས་ཅད་ལ། །མཆོད་སྦྱིན་གཏོར་མ་འདི་བསྔོས་པས། །ཅི་འདོད་ཕུན་སུམ་ཚོགས་པར་ཤོག །ཅི་ལྟར་ནུས་པའི་ཕྲིན་ལས་མཛོད། །བ་ལིཾ་ཏ་པཱུ་ཛ་ཧོཿ ཞེས་བསྔོའོ། །གཉིས་པ་ནི། བརྟན་པའི་གཏོར་མ་ཨོཾ་ཨཱཿཧཱུྃ་གིས་བརླབས་ལ། ཧཱུྃ། ཨ་སུ་ར་ཡི་བྲག་ཕུག་ཏུ། །ཨོ་རྒྱན་པདྨ་འབྱུང་གནས་ཀྱི། །སྤྱན་སྔར་ཁས་བླངས་དམ་བཅས་པའི། །བོད་ཡུལ་བརྟན་པ་བཅུ་གཉིས་ངང་། །ཕྱི་གཏོར་དབང་བར་ཁས་བླངས་རྣམས། །མཆོད་སྦྱིན་གཏོར་མ་འདི་ལོངས་ལ། །བདུད་དཔུང་ཐུལ་ལ་ཞིང་བཅུ་སྒྲོལ། །དལ་ཁ་ཆིངས་ལ་འབྲུ་བཅུད་སྤེལ། །དམག་དཔུང་ཆོམས་ལ་མཚོན་རྩེ་རྟུལ། །བཅོལ་པའི་དམ་ཚིག་དྲན་པར་མཛོད། །གསུམ་པ་ནི། བསྙེན་སྒྲུབ་སོགས་ཀྱི་སྐབས་དབང་དང་དངོས་གྲུབ་རྒྱས་པར་བླང་བ་ནི་བསྙེན་ཡིག་ཏུ་ཤེས། རྒྱུན་གྱི་དངོས་གྲུབ་མདོར་བསྡུས་ཏེ་བླང་བར་མོས་ན། དཀྱིལ་འཁོར་གྱི་ལྷ་ཚོགས་རྣམས་ཀྱི་གནས་གསུམ་ནས་འོད་ཟེར་དཀར་དམར་མཐིང་གསུམ་འཕྲོས་རང་གི་གནས་གསུམ་དུ་ཐིམ་པས་དབང་དང་བྱིན་རླབས་དངོས་གྲུབ་མ་ལུས་པ་ཐོབ་པར་བསམ་ལ། ཧྲཱིཿ སྐྱེ་མེད་ཆོས་དབྱིངས་ཕོ་བྲང་ནས། །ཐུགས་རྗེ་འགག་མེད་ཚེ་ཡི་ལྷ། །མཉམ་ཉིད་དབྱིངས་ནས་སྐུར་བཞེངས་ལ། །སྐུ་གསུམ་ཡོངས་རྫོགས་དངོས་གྲུབ་སྩོལ། །ཨོཾ་བཛྲ་གུ་རུ་པདྨ་ཨཱ་ཡུརྫྙཱ་ན་སརྦ་སིདྡྷི་ནྲྀ་བྷྲཱུྃ་ཛཿ བཛྲ་ཨཱ་ཡུ་ཥེ་སྭཱ་ཧཱ། ཨོཾ་ཨཱཿཧཱུྃ་མ་ཧཱ་སིདྡྷི་ཧཱུྃ། ཞེས་བརྗོད། གཏོང་རག་གི་མཆོད་པ་ཞལ་བསོལ་ལ། ཨོཾ་བཛྲ་གུ་རུ་པདྨ་ཨཱ་ཡུརྫྙཱ་ན་ས་པ་རི་ཝཱ་ར་ཨརྒྷཾ་ནས། ཤཔྡ་པྲ་ཏིཙྪ་སྭཱ་ཧཱ། མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་བ་ལིཾ་ཏ་ཁཱ་ཧི། །མ་ཧཱ་རཀྟ་ཁཱ་ཧི། ཞེས་པས་མཆོད། ཧྲཱིཿ དྲན་པ་ཙམ་གྱིས་འཆི་བདག་བདུད། །མཐར་མཛད་པད་འབྱུང་ཚེ་དཔག་མེད། །ཨེ་ཝྃ་ཟུང་འཇུག་ལྷ་ཚོགས་ལ། །ལུས་ངག་ཡིད་གསུམ་གུས་ཕྱག་འཚལ། །ཞེས་པས་བསྟོད། ཡིག་བརྒྱ། དབྱངས་གསལ། རྟེན་འབྲེལ་སྙིང་པོ་བཟླ་ཞིང་ལྷག་ཆད་ཁ་བསྐང་། ཐལ་མོ་སྦྱར་ཏེ། མ་རྙེད་ཡོངས་སུ་མ་ཚང་དང་། །གང་ཡང་ནུས་པ་མ་མཆིས་པས། །འདིར་ནི་བགྱི་བ་གང་ནོངས་པ། །དེ་ཀུན་ཁྱོད་ཀྱིས་བཟོད་མཛད་རིག །ཞེས་ནོངས་པ་བཤགས། །བཞི་པ་ནི། མདུན་བསྐྱེད་ཀྱི་རྟེན་ཡོད་ན། འདིར་ནི་རྟེན་དང་ལྷན་ཅིག་ཏུ། །འཁོར་བ་སྲིད་དུ་བཞུགས་ནས་ཀྱང་། །ནད་མེད་ཚེ་དང་དབང་ཕྱུག་དང་། །མཆོག་རྣམས་ལེགས་པར་སྩལ་དུ་གསོལ། །ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱས་བརྟན་བཞུགས་བྱ། མེད་ན། ཨོཾ། ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །བཛྲ་མུཿ རང་བཞིན་ཡེ་ཤེས་ཀྱི་འཁོར་ལོ་དབྱིངས་སུ་གཤེགས་པར་བསམ། ཏིང་ངེ་འཛིན་དམ་ཚིག་གི་དཀྱིལ་འཁོར། ཧྲཱིཿ སྣོད་བཅུད་ཐམས་ཅད་འོད་ཞུ་རང་ལ་ཐིམ། །རང་ཉིད་ལུས་དཀྱིལ་ལྷ་དང་བཅས་པ་ཀུན། །མི་དམིགས་འོད་གསལ་སྟོང་པའི་ངང་ཉིད་ལས། །སླར་ཡང་འཇའ་ཚོན་བཞིན་ཏུ་གསལ་བར་གྱུར། །ཅེས་བརྗོད་ཅིང་བསམ། ལྔ་པ་ནི། དགེ་བ་འདི་ཡིས་བདག་སོགས་འགྲོ་བ་ཀུན། །འཆི་བདག་ལ་སོགས་བདུད་བཞི་རྣམ་བཅོམ་སྟེ། །སྐྱེ་རྒ་ན་འཆིའི་མཚོ་ཆེན་ལས་བརྒལ་བའི། །མགོན་པོ་ཚེ་མཐའ་ཡས་པ་ཐོབ་པར་ཤོག །དྲུག་པ་ནི། ཆོས་སྐུ་སྣང་མཐའ་ལོངས་སྐུ་ཚེ་དཔག་མེད། །སྤྲུལ་པའི་སྐུ་མཆོག་པདྨ་ཐོད་ཕྲེང་སྟེ། །སྐུ་གསུམ་དབྱེར་མེད་ཚེ་ཡི་ལྷ་ཚོགས་ཀྱི། །བཀྲ་ཤིས་ཕྱོགས་དུས་ཀུན་ཏུ་ཁྱབ་པར་ཤོག །འཆི་མེད་ཚེ་ཡི་དཔལ་ལ་ལོངས་སྤྱོད་ཅིང་། རིག་པའི་བློ་དང་རྣམ་དཔྱོད་ཤེས་རབ་དང་། །སྲིད་དང་ཞི་བའི་དཔལ་འབྱོར་གང་ལགས་པ། །དེ་ཀུན་ལྷུན་གྱིས་གྲུབ་པའི་བཀྲ་ཤིས་ཤོག །ལུས་ནི་སྣང་སྟོང་དབྱེར་མེད་ལྷ་ཡི་སྐུ། །ངག་ནི་གྲགས་སྟོང་འགག་མེད་ཚངས་པའི་གསུང་། །ཡིད་ནི་བདེ་སྟོང་འགྱུར་མེད་རྡོ་རྗེའི་ཐུགས། །ལེགས་ཤར་དོན་གཉིས་ལྷུན་གྲུབ་བཀྲ་ཤིས་ཤོག །ཅེས་སོགས་བཀྲ་ཤིས་ཀྱི་དབྱངས་སྙན་པོ་བརྗོད་ཅིང་མེ་ཏོག་གི་ཆར་སིལ་མར་བསྙིལ་བས་དགེ་ལེགས་སུ་བྱའོ། །ཚེ་དཔག་མེད་མགོན་སྲིད་ཞིའི་དྭང་མ་ཀུན། །བཅུད་དུ་འདྲེན་པའི་ཕྲིན་ལས་རྨད་བྱུང་འདིས། །བསྟན་འཛིན་ཞབས་བརྟན་བཤད་སྒྲུབ་བསྟན་པ་དར། །འགྲོ་རྣམས་འཆི་མེད་དབང་པོ་མྱུར་འགྲུབ་ཤོག །ཅེས་ཀུན་མཁྱེན་རྒྱལ་བའི་དབང་པོ་རྡོ་རྗེ་ཐོགས་མེད་རྩལ་གྱི་དག་པ་ཡེ་ཤེས་ཆེན་པོའི་གཟིགས་ངོར་སྣང་བའི་ཡང་གསང་རྒྱ་ཅན་གྱི་ཆོས་སྡེ་ཉི་ཤུ་རྩ་ལྔའི་ནང་ཚན། བྷྲཱུྃ་མཚན་རྡོ་རྗེའི་རྭ་གདེངས་ཐོག་མདའི་རྒྱ་ཅན་ལས་བྱུང་བའི་ཚེ་དཔག་མེད་དྭང་མ་བཅུད་འདྲེན་གྱི་ཕྲིན་ལས་ཁྲིགས་སུ་བསྡེབས་པ་འདིའང་། དག་སྣང་རྩ་བའི་གཞུང་དང་ལྗགས་བསྒྲིགས་ལ་རིགས་མཐུན་རྡོ་རྗེའི་གསུང་གིས་མཚམས་སྦྱར་ཏེ་བཀླགས་པས་གྲུབ་པར་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོ་རྡོ་རྗེ་གཟི་བརྗིད་ཀྱིས་བྲིས་པ་དགེ་ལེགས་སུ་གྱུར་ཅིག །

[edit]

tshe dpag med dwang ma bcud 'dren gyi phrin las khrigs su bsdebs pa 'chi med 'dod 'jo/__ @#/__/amA_ra_kA_ma_d+he_nu_nA_mA_yu_ra_pa_ri_mA_NaM_ma_N+Da_su_ro_n+nA_ya_s+ya_ka_rma_le_kha_bi_ha_ra_ti_sma_/_/ @#/_/tshe dpag med dwang ma bcud 'dren gyi phrin las khrigs su bsdebs pa 'chi med 'dod 'jo zhes bya ba bzhugs so// oM swa sti sid+d+hir stu/__tshe dang ye shes dpag med dwang ma'i bcud/__/srog gi zungs su 'dren mdzad bla ma lhar/__/btud nas de yi phrin las cho ga ni/__/'chi med 'dod pa 'jo ba'i dpyid du bskrun/__/'di la gsum/__sbyor ba/__dngos gzhi/__rjes so/__/dang po la gnyis/__cho gar ma gtogs pa'i sbyor ba dar/__cho gar gtogs pa'i sbyor ba'o/__/dang po ni/__gnas dben zhing nyams dga' ba/__bkra shis shing dge mtshan dang ldan par stegs bu'i dbus su pad+ma 'dab brgyad phyogs bzhi dmar/__me rlung ser/__dbang ldan sngo/__lte ba dang bden bral ljang gur byas pa'i steng du many+dzi'i khar bum pa bum rdzas nyer lnga dang /__chos sman tshe rdzas sogs kyi bcud dang ldan pa'i kha rgyan gtso bo'i sku tsag gis mtshan pa/__mdun gyi g.yas su gzhung las/__bzang drug 'bras gsum rtag tu ngu /__cong zhi brag zhun sbyar ba yi/__/ril bu kha dog sna lngar bsgyur/__/so sor bskyed bstims sngags bzlas nas/__/zos na tshe yi bcud len 'gyur/__/ces gsungs pa'i tshe rdzas bcud len gyi ril bu dang /__de'i g.yon du ka pA lar tshe'i bdud rtsi/__de dag gi mdun du gtor zlum dmar po pad 'dab can gsum dang /__sman raka__/nyer spyod sogs bkod pas mdzes par bsham pa ste/__bsnyen sgrub sogs kyi skabs su 'di tsam gyis 'thus/__dbang gi skabs dbang rdzas rnams go rim dbang chog las 'byung ba ltar bsham/__rang gi mdun du nang mchod/__rdo rje/__dril bu/__Da ma ru/__las bum/__tshe mda'/__me tog gi snod/__nye logs gang bder brtan ma'i gtor ma dang /__sngon gtor/__tshogs kyi dam rdzas sogs dgos pa'i yo byad thams cad 'du bya'o/__/gnyis pa la/__skyabs sems bgegs bskrad srung 'khor bsgom/__/byin dbab mchod pa byin gyis brlab/__/ces drug las dang po ni/__bla ma dang mgon po tshe dpag med pa'i dkyil 'khor mkha' khyab tu sad pa rtsa gsum rgya mtsho'i sprin phung 'phro bar bsams la/__hU~M/__rang byung lhun gyis grub pa'i sku/__/'od gsal chen po'i dgongs pa can/__/thugs rje'i dbang gis 'gro don mdzad/__/bla ma rnams la skyabs su mchi/__/rang las ye shes shar ba'i sku/__/mi 'bral rtse gcig dgongs pa can/__/byin gyis rlob cing bar chad sel/__/yi dam lha la skyabs su mchi/__/dam tshig rnam par dag pa'i sku/__/brtse gdung byams pa'i dgongs pa can/__/legs nyes stangs 'dzin dngos grub ster/__/mkha' 'gro'i tshogs la skyabs su mchi/__zhes lan grangs ci nus dang /__gnyis pa ni/__rgyun bshags sngon du 'gro bas smon pa dang 'jug pa'i sems bskyed cing gsang sngags phyi spyod pas bslab pa dang /__don dam byang chub kyi sems kyang bsgom pa'i stobs kyis bskyed par bgyi'o snyam du lhag pa'i bsam pa rtse gcig pas/__sngon nas bsags pa'i sdig sgrib bshags/__/'gro don sangs rgyas thob bya'i phyir/__/smon pa'i byang chub sems bskyed do/__/sems can yongs su smin bya'i phyir/__/gsang sngags spyod pa rlabs chen spyad/__/don dam spros bral byang chub sems/__/rang byung mtha' bral stong gsal bsgom/__/lan gsum gyi mthar/__dzaHhU~M ba~M hoH__tshogs zhing rnams rang la thim par bsam/__gsum pa la/__thog mar mtshams lha bskyed pa ni/__hrIH__rang sems skad cig hrIHyig yongs gyur las/__/khro rgyal rta mgrin zhal gcig phyag gnyis pa/__/be con sdigs mdzub rtse las me phung 'bar/__/dur khrod chas rdzogs rta skad phyogs bcur sgrogs/__/oM badz+ra kro d+ha ha ya gri wa hu lu hu lu hU~M phaT/__/ces nga rgyal bzung la/__gtor ma ra~M ya~M kha~M gis bsang /__swa b+hA was sbyang /__stong pa'i ngang las b+h+rU~M las rin po che'i snod zab cing rgya che ba'i nang du gtor ma kha dog dri ro nus pa phun sum tshogs pa bdud rtsi'i rgya mtsho chen por gyur par bsams la/__oM AHhU~M hoH__lan gsum gyis brlab/__oM sarba b+hU ta A kaR+ShA ya dzaHsa mgron dgug__/oM sarba big+hAn na mas+sarba ta thA ga te b+h+yo bi shwa mu khe b+h+yaHsarba tat+khaM ut+ga te s+pha ra Na hi maM ga ga na khaM gr-ih+ne daM ba l+yA di swA hA/__lan gsum gyis bsngos la/__hU~M/__'chi med sgrub pa'i dkyil 'khor 'dir/__/'du ba'i lha ni ma gtogs pa/__/tshe srog 'phrog pa'i gdon bgegs sogs/__/mi dang mi min 'byung po'i tshogs/__/mchod sbyin gtor mas tshim byos la/__/'di ru ma 'dug gzhan du dengs/__/ci ste mi 'gro 'dug gyur na/__/rta mchog rgyal po'i thugs ka nas/__/sprul pa'i khro mtshon me phung gis/__/thal ba'i rdul du brlag par 'gyur/__/oM badz+ra kro d+ha ha ya grI wa hu lu hu lu hU~M phaT/__gnod byed 'byung po utsaT+TA ya phaT/__ces bka' bsgos shing drag sngags dang bcas gu gul 'dug__/yungs kar brab/__rol mo'i tsham rngams kyis gtor ma phyir dor/__/bzhi pa ni/__rang gi thugs ka nas spros pa'i khro mtshon me phung gis bgegs rnams bskrad/__slar 'dus pa las mtshon cha'i 'khor lo yangs shing rgya che ba'i phyi rol tu rdo rje'i srung 'khor me 'bar ba dang bcas pas mtshams bcings par bsams la/__hrIH__dbang gi rta skad rab 'tsher zhing /__/'khor lo rdo rje me phung gis/__/steng 'og phyogs mtshams med par gtams/__/srung pa'i gur khang chen por gyur/__/oM badz+ra tsakra dz+wa la ra~M hU~M b+h+rU~M hU~M/__lnga pa ni/__rang gi snying ga nas lcags kyu lta bu'i 'od zer 'phros pas ye shes kyi 'khor lo mkha' khyab tu spyan drangs te bdag gnas yo byad rnams la thim pas byin rlabs kyi gzi byin 'bar bar bsams la/__spos rol dang dbyangs kyi 'gyur ba snyan po dang bcas/__hrIH__chos dbyings rnam dag pho brang nas/__/tshe dpag med mgon lha tshogs rnams/__/gnas mchog 'dir gshegs dbang chen skur/__/byin phob dngos grub ma lus stsol/__/oM badz+ra gu ru pad+ma sid+d+hi A yur+dz+nyA na sa ma ya A be sha ya a AH__drug pa ni/__hrIH__'chi med rig 'dzin dkyil 'khor sgrub pa'i rdzas/__/phyi nang gsang ba'i rang byung mchod pa rnams/__/ma dag log 'khrul nyes pa'i tshogs rnams kun/__/ye shes 'bru gsum sbyang zhing byin gyis brlab/__/ra~M ya~M kha~M/__oM AHhU~M/__ma hA pany+tsa a m-i ta hU~M hrIHThA/__ma hA ba liM ta AHhU~M/__ma hA rak+ta AHhU~M/__oM badz+ra ar+g+haM nas shap+da AHhU~M gi bar gyis tshe rdzas dang /__sman gtor rak+ta nyer spyod dang bcas pa 'chi med bde ba chen po'i ye shes rnam pa thams cad par 'char ba'i rang bzhin du byin gyis brlab bo/__/gnyis pa dngos gzhi la/__lha bskyed spyan drang bzhugs su gsol/__/mchod cing dzapa? bzla tshe 'gugs bskul/__/ces drug las dang po ni/__bdag mdun bum gsum 'jug pa gcig pa'i tshul gyis 'od gsal stong nyid kyi ngang las rang byung rig pa lha'i skur ldang ba ni/__oM swa b+hA wa shud+d+haHsarba d+harmAHswa b+hA wa shud+d+ho\u0f85nyaM/__'dzin med stong pa'i dbyings nyid las/__/chu las chu lbur brdol ba bzhin/__/pad+ma'i sdong po rgyas pa'i steng /__/zla ba'i dkyil 'khor nya gang bar/__/rang byung pad+ma tshe dpag med/__/dkar po mtshan dang dpe byad ldan/__/phyag g.yas gser gyi rdo rje dang /__/g.yon pa 'chi med tshe'i bum pa/__/'dzin pas yum gyi mgul nas 'khyud/__/pang du ye shes mkha' 'gro'i gtso/__/man+dA ra ba gos dkar mo/__/dmar mo bcu drug lon pa'i tshul/__/nu ma 'bur zhing b+ha ga rgyas/__/g.yas g.yon pad+ma bdud rtsi yis/__/gang ba'i thod 'dzin yab la 'khril/__/yab yum gnyis ka'ang longs sku'i chas/__/dar dang rin chen rus pas spras/__/'ja' tshon sna lnga'i gur khyim dbus/__/rdo rje pad+ma'i skyil krung bzhugs/__/rtsa gsum 'khor lo lnga ldan pa'i/__/spyi bo bde chen 'khor lo'i dbus/__/rig 'dzin bud+d+ha thod phreng rtsal/__/dkar po zhal gcig phyag gnyis pa/__/gsang gos snam sbyar mnyen zhu gsol/__/'khor lo bum 'dzin yum la 'khril/__/man+dA ra ba sangs rgyas spyan/__/'khor lo thod pa 'dzin pas 'khyud/__/mgrin pa longs spyod 'khor lo'i dbus/__/rig 'dzin pad+ma thod phreng rtsal/__/dmar po zhal gcig phyag gnyis pa/__/gsang gos snam sbyar mnyen zhu gsol/__/pad+ma bum 'dzin yum la 'khril/__/shAkya de wI gos dkar mo/__/pad+ma thod 'dzin yab la 'khyud/__/snying ga chos kyi 'khor lo'i dbus/__/rig 'dzin badz+ra thod phreng rtsal/__/sngon po zhal gcig phyag gnyis pa/__/gsang gos snam sbyar mnyen zhu gsol/__/rdo rje bum 'dzin yum la 'khyud/__/ye shes mtsho rgyal mA ma kI/__/rdo rje thod pa 'dzin pas 'khyud/__/lte ba sprul pa'i 'khor lo'i dbus/__/rig 'dzin rat+na thod phreng rtsal/__/ser po zhal gcig phyag gnyis pa/__/gsang gos snam sbyar mnyen zhu gsol/__/rin chen bum 'dzin yum la 'khril/__/ka la sid+d+hi rin chen sgrol/__/rin chen thod pa 'dzin pas 'khyud/__/gsang gnas bde skyong 'khor lo'i dbus/__/rig 'dzin karma_ thod phreng rtsal/__/ljang gu zhal gcig phyag gnyis pa/__/gsang gos snam sbyar mnyen zhu gsol/__/rgya gram bum 'dzin yum la 'khril/__/bkra shis khye 'dren dam tshig sgrol/__/rgya gram thod pa 'dzin pas 'khyud/__/yum rnams gcer mo skra grol ba/__/rus pa'i rgyan dang lang tshos spras/__/mdzes sdug bde ba skyed pa'i nyams/__/yab yum rdo rje pad+ma yi/__/skyil krung 'ja' 'od klong na bzhugs/__/zhes dam tshig gi 'khor lo gsal gdab/__/gnyis pa ni/__hrIH__rang bzhin rnam dag zhing khams nas/__/pad+ma thod phreng tshe dbang rtsal/__/rigs lnga yab yum 'khor dang bcas/__/gnas 'dir spyan 'dren gshegs su gsol/__/oM badz+ra gu ru pad+ma A yur+dz+nyA na sa pa ri wA ra badz+ra sa ma ya dzaHdzaHhU~M ba~M hoH__zhes pas ye shes pa'i 'khor lo nam mkha' gang bar spyan drangs te dam tshig gi phyag rgyar dgug gzhug bcing zhing dgyes pa bskyed/__/gsum pa ni/__hrIH__lhun grub bde chen gzhal yas 'dir/__/dbyings kyi thig le 'od phung 'khyil/__/rig pa rang shar tshe yi lha/__/mnyam nyid dbyings su brtan par bzhugs/__/oM badz+ra sa ma ya tiSh+Than+tu/__bzhi pa la lnga las/__dang po phyag gi mchod pa ni/__hrIH__rang rig tshe yi lha tshogs la/__/snang stong skye 'gag med pa'i dbyings/__/bzang ngan gnyis 'dzin bral ba yi/__/mnyam nyid ngang du phyag 'tshal lo/__/na mo pu ru sha ya hoH__/gnyis pa phyi mchod ni/__hrIH__rig gdangs tshe yi lha tshogs la/__/mchod pa'i bye brag 'bul ba ni/__/lha rdzas mchod yon zhabs bsil dang /__/me tog bdug spos mar me dri/__/zhal zas sgra snyan lha mo rnams/__/so so'i kha dog phyag rgyar bsgyur/__/rab 'byams nam mkha'i khams bkang nas/__/rgyal ba'i dkyil 'khor mchod par bya/__/oM badz+ra gu ru pad+ma A yur+dz+nyA na sa pa ri wA ra badz+ra ar+g+haM nas/__shap+da pra tI ts+tsha swA hA/__gsum pa nang bdud rtsi gtso bor gyur pa'i sman gtor rak+ta'i mchod pa ni/__hrIH__tshe dpag med mgon lha tshogs la/__/rtsa brgyad bdud rtsi'i mchod pa dang /__/dam rdzas gtor ma'i mchod pa dang /__/bde chen rak+ta'i mchod pa rnams/__/don dam dbyings kyi mchod par 'bul/__/mthun 'jug mchog gi mchod par bzhes/__/oM badz+ra gu ru pad+ma A yur+dz+nyA nA ma hA pany+tsa a mr-i ta khA hi/__ma hA ba liM ta khA hi/__ma hA rak+ta khA hi/__zhes spyir phul nas/__spro na/__snang mtha' 'chi med mgon po pad+ma 'byung /__/ye shes mtsho rgyal rdo rje thogs med rtsal/__/smin grol mchog stsol rtsa brgyud bla ma la/__/sman mchod 'bul lo tshe dbang dngos grub stsol/__/ma hA pany+tsa a mr-i ta kha raM khA hi/__dkyil 'khor gtso mchog pad+ma tshe dpag med/__/rigs lnga thod phreng yab yum sprul pa'i gar/__/yi dam mkha' 'gro chos srung gter bdag la/__/sman mchod 'bul lo tshe dbang dngos grub stsol/__/ma hA pany+tsa mr-i ta kha raM khA hi/__zhes bla ma dang lhag pa'i lha'i 'khor lo la 'bul zhing /__badz+ra a mr-i ta swa daM ku ru Sh+wa me zhes rdo rje lce'i dam tshig gis myangs pa la dngos grub thob par bsam/__bzhi pa gsang ba bde chen gyi mchod pa ni/__hrIH__tshe dpag med mgon lha tshogs la/__/snang stong bde chen yab yum mkhar/__/dga' bzhi'i ye shes thig ler 'khyil/__/zung 'jug bde chen mchod par bzhes/__/oM bo d+hi tsit+ta pU dza hoH__zhes yab yum snyoms 'jug gi bde ba chen pos thugs rgyud yongs su gang bar gyur par bsam mo/__/lnga pa bstod pa'i mchod pa ni/__hrIH__dran pa tsam gyis 'chi bdag bdud/__/mthar mdzad pad 'byung tshe dpag med/__/e waM zung 'jug lha tshogs la/__/lus ngag yid gsum gus phyag 'tshal/__/drug pa la gnyis/__spyi dang /__bye brag go__/dang po ni/__thugs kar zla ba'i steng du mi 'gyur ba'i thugs srog hrIHyig dkar po'i mthar sngags kyi phreng bas bskor ba las 'od zer 'phros/__'byung ba bzhi'i dwang bcud/__rang dang bsgrub bya'i bla tshe chad nyams yar ba/__'khor 'das kyi tshe bsod dpal 'byor ye shes yon tan thams cad 'od zer kha dog sna lnga'i rnam par spyan drangs/__lus dkyil gyi lha yab yum rnams kyi dbu gtsug nas zhugs/__sbyor mtshams nas byang chub sems kyi rnam par babs pas rtsa 'khor thams cad khengs te tshe yar ba khug__/nyams pa sos/__gnas pa gong nas gong du 'phel zhing rgyas pas 'chi med tshe'i rig 'dzin thob par gyur pa'i mos pas/__oM badz+ra gu ru pad+ma A yur+dz+nyA na sarba sid+d+hi nr-i b+h+rU~M hU~M dzaH__badz+ra A yu She swA hA/__zhes gtso bor bzla/__gnyis pa la gnyis/__rigs so so'i bzlas pas tshe 'gugs zhing gso ba dang /__las sna tshogs kyi kha bsgyur ro /__/dang po ni/__gnas lnga'i thod phreng rigs lnga'i thugs kar zla ba'i steng du oM AHhU~M swA hA dkar dmar mthing ser ljang gu'i mthar sngags kyi phreng bas bskor ba las 'od zer 'phros/__'byung ba chen po sa dang /__me dang /__chu'i bcud dang /__rang gi bla tshe chad nyams yar ba dang /__'khor 'das kyi dwang ma/__rlung gi bcud rnams 'od zer dkar dmar mthing ser ljang gu'i rnam par spyan drangs/__yab yum so so'i dbu gtsug nas zhugs/__sbyor mtshams nas byang chub sems kyi bdud rtsi'i rnam par babs pas rtsa gsum 'khor lo lnga dang bcas pa ltem gyis khengs te tshe yar ba khug__/nyams pa sos/__gnas pa gong nas gong du 'phel zhing rgyas pas 'chi med tshe'i rig 'dzin thob par gyur pa'i mos pas/__lha so sor rim bzhin du gsol ba gdab cing /__dmigs pa'i bye brag la sems 'dzin pas/__/oM bai ro tsa na a pa ri mi ta A yur+dz+nyA na sid+d+hi pha la hU~M/_1000_de bzhin du oM bai ro tsa na'i mal du/__AHpad+ma d+hA ra/__hU~M ak+Sho b+h+yaH__swA rat+na sam+b+ha ba/__hA a mo g+ha sid+d+ha/__zhes sbyar ba'i bzlas pa ci ltar rigs pa bya'o/__/gsum pa ni/__gzhung rtsa ba las/__khyad par spyi bo'i yab yum las/__/'od dkar 'phros pas dus min tshe'i/__/bar gcod thams cad sangs kyis dag__/mgrin pa'i 'od dmar lcags kyu yis/__/tshe yi dngos grub thams cad bkug__/snying ga'i 'od sngon 'phros pa yis/__/stong sangs mkha' dbyings tshe srog sba/__/lte ba'i ser pos lus khengs pas/__/bsod nams rnam thos bu ltar rgyas/__/gsang ba'i ljang gus khyab pa yis/__/phrin las ma lus grub par gyur/__/ces brjod cing bsams la bye brag so so'i bzlas pa cung zad bya'o/__/'di rnams kyi dmigs pa'i bye brag zhib par khrid dang /__bsnyen pa'i yi ge las shes shing spyir btang rtsa ba'i dmigs bzlas kho nas kyang don grub pa yin no/__/thun las ldang bar brtsam pa na/__dbyangs gsal rten snying yig brgya brjod pas sngags kyi lhag chad kha bskang zhing nus pa spel/__ye shes lha tshogs spyan 'dren gshegs/__/phyi nang gsang ba'i mchod pa 'bul/__/sku gsung thugs yon phrin las bstod/__/bag med 'gal 'khrul nyams chag bshags/__/ma hA a mr-i ta rak+ta ba liM ta khA hi/__zhes stong tshigs kyi mchod bstod kyang bya'o/__/dbang don sogs kyi tshe bum bzlas dmigs bsal byed na/__bum pa rang byung gi gzhal yas khang chen po'i stod kyi char pad+ma tshe dpag med lus dkyil gyi lha dang bcas pa lhag par gsal bar mos te/__gzungs thag nas 'jus te/__bdag srog sngags kyi 'od zer gzungs thag la/__/'khril te bum pa'i lha tshogs thugs rgyud bskul/__/de dag sku las byang sems bdud rtsi'i rgyun/__/babs pas bum chur gnyis med ro gcig gyur/__/ces dang /__sngar gyi rtsa ba'i bzlas dmigs bum pa'i lha la sbyar ba'i 'od zer spro bsdus bdud rtsi 'bebs pa'i dmigs pa dang bcas pas rtsa sngags ci nus su bzla/__las thams cad pa'i bum par rta mgrin dmar po be con dang sdigs mdzub mdzad pa khro bo'i rgyan dang nyams 'gyur yongs su rdzogs pa'i thugs kar nyi ma la gnas pa'i hrIHdmar po'i mthar sngags kyi phreng bas bskor ba las bdud rtsi'i rgyun babs pas bum pa gang bar gyur pa'i mos pas/__oM badz+ra kro d+ha ha ya grI wa hu lu hu lu hU~M phaTa?/__ces ci rigs pa bzlas mthar/__oM AHhU~M gis mchod yon phul/__hU~M zhes brjod pas/__rnam rgyal bum pa'i lha rnams 'od du zhu nas byang chub sems kyi bdud rtsis bum pa gang bar bsam/__las bum gyi lha la/__las kyi lhas dkyil 'khor gyi bya ba mthar ma phyin pa'i bar bgegs zlog pa'i phrin las mdzod cig ces gsol la/__hU~M zhes brjod pas/__lha 'od du zhu ba'i dbang drag gi rang bzhin gyi chu'i rdul phra rab tu gyur par bsam mo/__/drug pa ni/__gnas lnga'i lha'i thugs ka nas 'byung ba lnga'i lha mo g.yas mda' dar dang /__g.yon lcags kyu/__zhags pa/__lcags sgrog__/dril bu thogs pa dpag tu med pa spros/__'khor 'das kyi tshe bcud thams cad slar yang bsdus/__bdag dang sgrub pa'i rdzas la thim pas 'chi med tshe'i dngos grub thob par bsams la mda' dar g.yob cing /__hrIH__bcom ldan mgon po ye shes tshe dpag med/__/'byung ba lnga la dbang bsgyur lha mo'i tshogs/__/rnal 'byor bdag gi tshe dang g.yang spel cig__/steng 'og phyogs bcu snod kyi 'jig rten la/__/'bros dang 'khyams dang yar ba'i tshe khug cig__/stong phrag brgyad cu bgegs kyi tshogs rnams kyis/__/brkus dang phrog dang bzhoms pa'i tshe khug cig__/'byung ba dgra gshed 'khrugs pa'i las sbyor gyis/__/nyams dang zad dang 'thor ba'i tshe gsos shig__/yid kyis dngas dang had kyis brgyal ba dang /__/hud kyis 'drogs pa'i tshe dang g.yang spel cig__/tshe khug g.yang skyobs dngos grub bdag la stsol/__/'byung lnga 'od lnga 'bar ba'i tshe bcud sdus/__/'chi med tshe yi dngos grub bdag la stsol/__/A yur+dz+nyA na bin+du b+h+rU~M/__rni? b+h+rU~M badz+ra A yuShe/__A yur+dz+nyA na sid+d+hi A b+h+rU~M zhes brjod/__bar 'dir bka' gter srung ma spyi dang /__khyad par gter srung brtan ma bcu gnyis kyi gtor bsngo rgyas bsdus gang rigs bya/__/gsum pa rjes la/__tshogs mchod brtan bskyang dngos grub gsol/_/nyer bsdu bsngo smon shis pa brjod/__/ces drug las dang po ni/__dam rdzas su 'os pa'i yo byad rnams bshams pa bsang chus bran/__oM sarba dra byaM sa~M sho d+ha ni hU~M phaT kyis bsang /__ra~M ya~M kha~M gis sbyang /__stong pa'i ngang las tshogs gzhong b+hany+dza 'bar bar tshogs rdzas ye shes kyi bdud rtsi 'dod yon gyi sprin phung 'phro bar gyur par bsams la/__oM AHhU~M hrIHzhes pas byin gyis brlab/__tshogs zhing spyan 'dren pa ni/__hrIH__rang bzhin rnam dag gzhal yas nas/__/bcom ldan mgon po tshe dpag med/__/rigs lnga yab yum 'khor dang bcas/__/tshogs la spyan 'dren gshegs su gsol/__/oM badz+ra gu ru pad+ma A yur+dz+nyA na sa pa ri wA ra sa mA dzaH__tshogs phud rim pa gsum du spros/__dang po mchod pa ni/__gzugs sgra dri ro reg bya chos/__/kun tu bzang po'i mchod pa'i sprin/__/nam mkha' mdzod kyi sgo phye ste/__/'bul gyis bzhes la dngos grub stsol/__/oM badz+ra gu ru pad+ma A yur+dz+nyA na ga Na tsakra pU dza khA hi/__bar pa bshags pa ni/__ma rig las dang nyon mongs kyis/__/rtsa ba yan lag dam tshig gi__/nongs par gyur pa'i nyes pa kun/__/gnong 'gyod sems kyis mthol zhing bshags/__/zhes dang /__oM pad+ma satwa sa ma ya sogs snang ba mtha' yas kyi yi ge brgya pa bzla/__tha ma bsgral ba ni/__e nr-i tri dzaH__zhes pas rten dang dmigs bya bskyed bstim sngon du 'gro bas/__phur pa thogs la/__sku stod dbang chen khros pa'i gzugs/__/sku smad gnam lcags phur pa'i dpal/__/dgra bgegs log 'dren dam sri yi/__/snying la btab bo mA ra ya/__/sha khrag rus pa rdul du rlog__/oM badz+ra kro d+ha ha ya grI wa hu lu hu lu hU~M phaT/__gnod byed dgra bgegs sha trUM mA ra ya rbad/__ces phur bu btab pas tshe bsod rang la bstim/__rnam shes chos dbyings su spar/__phung khams bdud rtsi'i sprin gyis lha tshogs rnams mnyes par bsams la sman rag sbran cing /__oM badz+ra gu ru pad+ma A yar+dz+nyA na sa pa ri wA ra ma hA mAM sa rak+ta keM ni ri ti khA hi/__/zhes bstabs mthar rang nyid tshe dpag med lus dkyil gyi lha dang bcas par gsal bas tshogs rdzas kyi bdud rtsi la longs spyad cing /__'chi med tshe yi dkyil 'khor du/__/tshogs kyi mchod pa phul ba yis/__/bdag gzhan 'gro ba ma lus pa/__/dkyil 'khor gcig tu 'grub par shog__/ces smon lam gdab/__lhag ma bdud rtsis bsang /__pany+tsa a mr-i ta hU~M ha ho hrIH__lhag ma'i dam tshig 'dod yon gyi phung po zad mi shes pa nam mkha' gang bar gyur par bsam/__e A ra l+li hrIM hrIM pheM pheM zhes pas lhag ma'i dam tshig la gnas pa rnams sprin gtibs pa bzhin byon par bsams la/__hrIH__tshe dpag med mgon bka' 'khor na/__/dam pa'i chos kyi srung ma rnams/__/lha chen brgyad dang klu chen brgyad/__/gza' chen brgyad dang gnod sbyin brgyad/__/rgyal chen bzhi dang phyogs skyong bcu/__/rgyu skar nyi shu rtsa brgyad dang /__/ha ri ka dang pany+tsi ka__/'phrog ma ma bur bcas pa dang /__/dpal ldan mgon po lcam dral dang /__/lha dang lha min mi'am ci/__/dri za gnod sbyin 'byung po dang /__/lha srin sde brgyad thams cad la/__/mchod sbyin gtor ma 'di bsngos pas/__/ci 'dod phun sum tshogs par shog__/ci ltar nus pa'i phrin las mdzod/__/ba liM ta pU dza hoH__zhes bsngo'o/__/gnyis pa ni/__brtan pa'i gtor ma oM AHhU~M gis brlabs la/__hU~M/__a su ra yi brag phug tu/__/o rgyan pad+ma 'byung gnas kyi/__/spyan sngar khas blangs dam bcas pa'i/__/bod yul brtan pa bcu gnyis ngang /__/phyi gtor dbang bar khas blangs rnams/__/mchod sbyin gtor ma 'di longs la/__/bdud dpung thul la zhing bcu sgrol/__/dal kha chings la 'bru bcud spel/__/dmag dpung choms la mtshon rtse rtul/__/bcol pa'i dam tshig dran par mdzod/__/gsum pa ni/__bsnyen sgrub sogs kyi skabs dbang dang dngos grub rgyas par blang ba ni bsnyen yig tu shes/__rgyun gyi dngos grub mdor bsdus te blang bar mos na/__dkyil 'khor gyi lha tshogs rnams kyi gnas gsum nas 'od zer dkar dmar mthing gsum 'phros rang gi gnas gsum du thim pas dbang dang byin rlabs dngos grub ma lus pa thob par bsam la/__hrIH__skye med chos dbyings pho brang nas/__/thugs rje 'gag med tshe yi lha/__/mnyam nyid dbyings nas skur bzhengs la/__/sku gsum yongs rdzogs dngos grub stsol/__/oM badz+ra gu ru pad+ma A yur+dz+nyA na sarba sid+d+hi nr-i b+h+rU~M dzaH__badz+ra A yu She swA hA/__oM AHhU~M ma hA sid+d+hi hU~M/__zhes brjod/__gtong rag gi mchod pa zhal bsol la/__oM badz+ra gu ru pad+ma A yur+dz+nyA na sa pa ri wA ra ar+g+haM nas/__shap+da pra tits+tsha swA hA/__ma hA pany+tsa a mr-i ta khA hi/__ma hA ba liM ta khA hi/__/ma hA rak+ta khA hi/__zhes pas mchod/__hrIH__dran pa tsam gyis 'chi bdag bdud/__/mthar mdzad pad 'byung tshe dpag med/__/e wa~M zung 'jug lha tshogs la/__/lus ngag yid gsum gus phyag 'tshal/__/zhes pas bstod/__yig brgya/__dbyangs gsal/__rten 'brel snying po bzla zhing lhag chad kha bskang /__thal mo sbyar te/__ma rnyed yongs su ma tshang dang /__/gang yang nus pa ma mchis pas/__/'dir ni bgyi ba gang nongs pa/__/de kun khyod kyis bzod mdzad rig_/zhes nongs pa bshags/__/bzhi pa ni/__mdun bskyed kyi rten yod na/__'dir ni rten dang lhan cig tu/__/'khor ba srid du bzhugs nas kyang /__/nad med tshe dang dbang phyug dang /__/mchog rnams legs par stsal du gsol/__/oM su pra tiSh+Tha badz+rA ya swA hAs brtan bzhugs bya/__med na/__oM/__khyed kyis sems can don kun mdzad/__/rjes su mthun pa'i dngos grub stsol/__/sangs rgyas yul du gshegs nas kyang /__/slar yang 'byon par mdzad du gsol/__/badz+ra muH__rang bzhin ye shes kyi 'khor lo dbyings su gshegs par bsam/__ting nge 'dzin dam tshig gi dkyil 'khor/__hrIH__snod bcud thams cad 'od zhu rang la thim/__/rang nyid lus dkyil lha dang bcas pa kun/__/mi dmigs 'od gsal stong pa'i ngang nyid las/__/slar yang 'ja' tshon bzhin tu gsal bar gyur/__/ces brjod cing bsam/__lnga pa ni/__dge ba 'di yis bdag sogs 'gro ba kun/___/'chi bdag la sogs bdud bzhi rnam bcom ste/__/skye rga na 'chi'i mtsho chen las brgal ba'i/__/mgon po tshe mtha' yas pa thob par shog__/drug pa ni/__chos sku snang mtha' longs sku tshe dpag med/__/sprul pa'i sku mchog pad+ma thod phreng ste/__/sku gsum dbyer med tshe yi lha tshogs kyi/__/bkra shis phyogs dus kun tu khyab par shog__/'chi med tshe yi dpal la longs spyod cing /__rig pa'i blo dang rnam dpyod shes rab dang /__/srid dang zhi ba'i dpal 'byor gang lags pa/__/de kun lhun gyis grub pa'i bkra shis shog__/lus ni snang stong dbyer med lha yi sku/__/ngag ni grags stong 'gag med tshangs pa'i gsung /__/yid ni bde stong 'gyur med rdo rje'i thugs/__/legs shar don gnyis lhun grub bkra shis shog__/ces sogs bkra shis kyi dbyangs snyan po brjod cing me tog gi char sil mar bsnyil bas dge legs su bya'o/__/tshe dpag med mgon srid zhi'i dwang ma kun/__/bcud du 'dren pa'i phrin las rmad byung 'dis/__/bstan 'dzin zhabs brtan bshad sgrub bstan pa dar/__/'gro rnams 'chi med dbang po myur 'grub shog__/ces kun mkhyen rgyal ba'i dbang po rdo rje thogs med rtsal gyi dag pa ye shes chen po'i gzigs ngor snang ba'i yang gsang rgya can gyi chos sde nyi shu rtsa lnga'i nang tshan/__b+h+rU~M mtshan rdo rje'i rwa gdengs thog mda'i rgya can las byung ba'i tshe dpag med dwang ma bcud 'dren gyi phrin las khrigs su bsdebs pa 'di'ang /__dag snang rtsa ba'i gzhung dang ljags bsgrigs la rigs mthun rdo rje'i gsung gis mtshams sbyar te bklags pas grub par mtsho skyes bla ma dgyes pa'i 'bangs mkhyen brtse'i dbang po rdo rje gzi brjid kyis bris pa dge legs su gyur cig__/