JKW-KABAB-14-PHA-013

🚧 This website is under continued development. We appreciate your patience!

Previous Text Back to Volume PageNext Text

གྲུབ་ཐོབ་ཆེན་པོའི་ཐུགས་ཏིག་ལས། ཚེ་སྒྲུབ་འཆི་མེད་སྙིང་པོའི་མཚམས་སྦྱོར་བདུད་རྩིའི་སྙིང་པོ།

Wylie title	grub thob chen po'i thugs tig las tshe sgrub 'chi med snying po'i mtshams sbyor bdud rtsi'i snying po
Location	mkhyen brtse'i bka' babs Volume 14, Text 13, Pages 431-441 (Folios 1a to 6a6)
Author	འཇམ་མགོན་ཀོང་སྤྲུལ་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	'jam mgon kong sprul. grub thob chen po'i thugs tig las tshe sgrub 'chi med snying po'i mtshams sbyor bdud rtsi'i snying po. In Rdzong sar 'jam dbyangs mkhyen brtse'i dbang po'i bka' babs, Vol. 14: 431-441. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Longevity Empowerment - tshe dbang
Cycle	གྲུབ་ཐོབ་ཆེན་པོའི་ཐུགས་ཏིག་ (grub thob chen po'i thugs tig)
Deity	thang stong rgyal po
Karchag page	JKW-KABAB-Volume-14-PHA-Karchag
RTZ	In the Rinchen Terdzö: https://rtz.tsadra.org/index.php/Terdzo-DA-058
Colophon	།ཅེས་པའང་ཟབ་ཆོས་འདིའི་ཐོག་མའི་སྣོད་ལྡན་བློ་གྲོས་མཐའ་ཡས་པའི་སྡེས་ཁྱབ་བདག་ཀུན་མཁྱེན་བླ་མ་རིན་པོ་ཆེའི་གསང་བ་གསུམ་གྱི་སྣང་བས་བྱིན་གྱིས་བརླབས་པའི་གདན་ས་ཆེན་པོ་རྫོང་གསར་བཀྲ་ཤིས་ལྷ་རྩེའི་ཆོས་གྲར་སྤེལ་བ་དགེ་ལེགས་འཕེལ།།
	ces pa'ang zab chos 'di'i thog ma'i snod ldan blo gros mtha' yas pa'i sdes khyab bdag kun mkhyen bla ma rin po che'i gsang ba gsum gyi snang bas byin gyis brlabs pa'i gdan sa chen po rdzong gsar bkra shis lha rtse'i chos grar spel ba dge legs 'phel

Tibetan Text

Wylie

[edit]

༄༅། །གྲུབ་ཐོབ་ཆེན་པོའི་ཐུགས་ཏིག་ལས། ཚེ་སྒྲུབ་འཆི་མེད་སྙིང་པོའི་མཚམས་སྦྱོར་བདུད་རྩིའི་སྙིང་པོ་ཞེས་བྱ་བ་བཞུགས་སོ།

༄༅། འཆི་མེད་བདེ་ཆེན་རྡོ་རྗེའི་སྐུ། །དངོས་གྲུབ་འདོད་རྒུའི་ཆར་འབེབས་ལ། །གུས་པས་གསོལ་བཏབ་ཚེ་སྒྲུབ་ཀྱི། །སྨིན་བྱེད་མཚམས་སྦྱོར་ཁྱེར་བདེར་དགོད། འཆི་མེད་གྲུབ་པའི་དབང་ཕྱུག་ཆེན་པོའི་ཞལ་ལུང་གང་ཟག་ཕྲེང་བས་བར་མ་ཆད་པའི་ཟབ་གསང་དང་འབྲེལ་བར་འཆི་མེད་ཚེའི་དབང་བསྐུར་བསྒྲུབ་པ་ལ། སྟེགས་གཙང་མའི་དབུས་སུ་མཎྜལ་པདྨ་འདབ་བརྒྱད་དབུས་དང་ཕྱོགས་བཞིར་ཚོམ་བུས་སྤྲས་པའི་སྟེང་དུ་མཉྫི་ལ་བུམ་པ་བཅུད་ལྡན་མགུལ་ཆིངས་དཀར་པོ་ཁ་རྒྱན་དང་ལྡན་པ། གཡས་སུ་ཐོད་པ་མཚན་ལྡན་ཏུ་ཆང་རྒོད་མངར་གསུམ་སྦྱར་བས་བཀང་བ། གཡོན་ཏུ་རིན་པོ་ཆེའི་སྣོད་དུ་ཚེའི་རིལ་བུ། མདུན་དུ་ཤེལ་རྡོ་མེ་ལོང༌། རྒྱབ་ཏུ་ཚེ་མདའ་རྒྱན་ལྡན་རྣམས་བཀོད། ཕྱི་ནང་གི་མཆོད་གཏོར། ཚོགས་ཀྱི་ཡོ་བྱད་སོགས་ཕྲིན་ལས་ལ་ཉེ་བར་མཁོ་བ་རྣམས་ཀྱང་བཀོད་མཛེས་སུ་བཤམས་ཤིང་ཉེར་བསྡོག་བྱའོ། །དེ་ནས་ཐོག་མར་གསོལ་འདེབས་སྔོན་ཏུ་འགྲོ་བས་ཕྲིན་ལས་ཡེ་ཤེས་སྙིང་པོའི་སྐྱབས་སེམས་ནས་བསྟོད་པའི་བར་བདག་མདུན་ཆིག་རྫོགས་སུ་བཏང༌། བསྟོད་པའི་རྗེས་སུ་ཛབ྄་ཁང་ཕྱེས་ཏེ་ཚེ་སྒྲུབ་འཆི་མེད་སྙིང་པོ་ལྟར་དམིགས་གནད་དང་ལྡན་པས་རྩ་བསྙེན་དང་ཧྲཱིཿབཟླས་ཅི་འགྲུབ་བྱ། མཐར་ཚེ་བཅུད་བསྡུ་བའི་བཟླས་པའང་བརྒྱ་རྩ་ལས་མི་ཉུང་བ་བཟླས་ཏེ་ཚེ་འགུགས་བཏང༌། མཆོད་བསྟོད་དང་ཡིག་བརྒྱས་ནོངས་པ་བཤགས། ལས་བུམ་དུ་འཁྱིལ་བའི་བསྐྱེད་བཟླས་བྱ། ཚོགས་བྱིན་བརླབས་ལ་གཞུང་ལྟར་འབུལ། བདག་འཇུག་སྤྲོ་ན་དབང་ཆོག་ལྟར་བླང༌། མི་ལྕོགས་ན་ཏིང་ངེ་འཛིན་གྱི་དབང་བླང་བ་སོགས་སྤྱི་འགྲེ་བྱའོ། །དབང་དངོས་ལ་སློབ་མ་རྣམས་ལས་བུམ་གྱི་ཆུས་ཁྲུས་བྱ། བགེགས་གཏོར་བཏང་ལ་བཀའ་བསྒོ་ཞིང་མཚམས་བཅད། སྲུང་འཁོར་བསྒོམ། སེམས་བསྐྱེད་གསལ་བཏབ་ལ་སྤྱི་བཤད་ཅི་རིགས་དང་ཁྱད་པར། དེ་ལ་འདིར་སྐབས་སུ་བབས་པ། སངས་རྒྱས་ཚེ་དཔག་མེད་པ་དང་སློབ་དཔོན་ཆེན་པོ་པདྨ་འབྱུང་གནས་དབྱེར་མེད་པ་སྙིགས་དུས་གདུལ་བྱའི་མགོན་དུ་སྤྲུལ་པའི་སྐུར་བཞེངས་པ། གྲུབ་ཆེན་ཐང་སྟོང་རྒྱལ་པོ་ཞེས་འཇིག་རྟེན་གསུམ་ན་ཉི་ཟླ་ལྟར་གྲགས་ཤིང་གྲུབ་པའི་ཆོ་འཕྲུལ་ཆེན་པོ་ཛམ་བུ་གླིང་ཁྱབ་པར་བསྟན་པས་གཞན་གྱིས་མ་དུལ་བའི་གདུལ་དཀའི་མི་དང་མི་མ་ཡིན་རྣམས་འདུལ་བར་མཛད་པ། ཁྱད་པར་འཆི་མེད་ཚེ་ལ་དབང་བརྙེས་པའི་རིག་པ་འཛིན་པར་གྲུབ་པས་ལས་དག་པ་རྣམས་ཀྱི་སྣང་ངོར་ད་ལྟའང་མངོན་སུམ་དུ་བཞུགས་ནས་སྐལ་ལྡན་རྣམས་རྗེས་སུ་འཛིན་ཅིང་དངོས་གྲུབ་རྣམ་པ་གཉིས་སྩོལ་བར་མཛད་པ་དེ་ཉིད་ཀྱིས། འཇམ་མགོན་ཁྲི་ལྡེའི་རྣམ་རོལ་གངས་ཅན་མཁས་གྲུབ་ཡོངས་ཀྱི་འཁོར་ལོས་བསྒྱུར་བ་ཆེན་པོ་འོད་གསལ་སྤྲུལ་པའི་རྡོ་རྗེ་དགུང་གྲངས་བཅོ་ལྔ་པར་མངོན་སུམ་དུ་སྩལ་བ། གཞན་ལས་ཁྱད་པར་དུ་འཕགས་པའི་ཟབ་ཆོས་ཐུན་མོང་མ་ཡིན་པ་གྲུབ་ཐོབ་ཆེན་པོའི་ཐུགས་ཏིག་གི་ཆ་ལག་ཚེ་སྒྲུབ་འཆི་མེད་སྙིང་པོའི་སྨིན་བྱེད་བསྒྲུབ་པ་ལ་སོགས་ཀྱིས་མཚམས་སྦྱར་ནས་མཎྜལ་འབུལ་དུ་གཞུག །སློབ་དཔོན་དང་གྲུབ་ཐོབ་ཆེན་པོ་ཐ་དད་མེད་པ་ལ་དད་གུས་དྲག་པོས་གསོལ་བ་འདེབས་པ་འདིའི་རྗེས་ཟློས། རྡོ་རྗེ་སྙིང་པོའི་དཀྱིལ་འཁོར་ནས༔ སྐྱེ་འཆི་མེད་པའི་ཚེ་ཡི་དབང་༔ སྒོ་གསུམ་རྡོ་རྗེར་སྨིན་བྱའི་ཕྱིར༔ སྐལ་ལྡན་བདག་ལ་སྩལ་དུ་གསོལ༔ ལན་གསུམ། རྒྱུད་དག་པར་བྱ་བའི་སླད་དུ། བླ་མ་དང་རྗེ་གྲུབ་ཐོབ་ཆེན་པོ་ཐ་དད་མེད་པ་ལ་རྩ་གསུམ་ཆོས་སྲུང་རྒྱ་མཚོས་སྤྲིན་གཏིབས་པ་ལྟར་བསྐོར་ཏེ་བཞུགས་པའི་སྤྱན་སྔར། བདག་གཞན་ནམ་མཁའ་དང་མཉམ་པའི་སེམས་ཅན་ཐམས་ཅད་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་ཞིང་སྡིག་པ་མི་དགེ་བའི་ལས་མཐའ་དག་བཤགས་པ་དང༌། གཞན་དོན་སྨོན་པ་བྱང་ཆུབ་མཆོག་ཏུ་སེམས་བསྐྱེད་ཅིང་བྱང་ཆུབ་ཀྱི་སྤྱོད་པ་ལ་འཇུག་པའི་སྡོམ་པ་བླངས་ཏེ་གསང་བ་སྔགས་ཀྱི་སྤྱོད་པ་རླབས་པོ་ཆེ་སྤྱད་པར་དམ་བཅའ་བ་དང༌། དེ་ཐམས་ཅད་ཀྱང་འཁོར་གསུམ་སྤྲོས་པ་དང་བྲལ་བའི་དབྱིངས་སུ་ལ་བཟླ་བ་དོན་དམ་བྱང་ཆུབ་ཀྱི་སེམས་རྣམས་གསལ་ཐོབ་ལ་འདིའི་རྗེས་ཟློས། ཐུགས་རྗེའི་དབང་གིས་འགྲོ་དོན་མཛད༔ བླ་མ་རྣམས་ལ་སྐྱབས་སུ་མཆི༔ རང་ལས་ཡེ་ཤེས་ཤར་བའི་སྐུ༔ ཡི་དམ་ལྷ་ལ་སྐྱབས་སུ་མཆི༔ ལེགས་ཉེས་སྟངས་འཛིན་བར་ཆད་སེལ༔ མཁའ་འགྲོའི་ཚོགས་ལ་སྐྱབས་སུ་མཆི༔ སྔོན་ནས་བསགས་པའི་སྡིག་སྒྲིབ་བཤགས༔ འགྲོ་དོན་སངས་རྒྱས་ཐོབ་བྱ་སྙམ༔ སྨོན་པའི་བྱང་ཆུབ་སེམས་བསྐྱེད་ཅིང་༔ སེམས་ཅན་ཡོངས་སུ་སྨིན་བྱའི་ཕྱིར༔ གསང་སྔགས་སྤྱོད་པ་རླབས་ཆེན་སྤྱད༔ དོན་དམ་སྤྲོས་བྲལ་བྱང་ཆུབ་སེམས༔ རང་བྱུང་མཐའ་བྲལ་སྟོང་གསལ་བསྒོམ༔ ཞེས་ལན་གསུམ། དེ་དག་གིས་དབང་གི་སྔོན་དུ་འགྲོ་བ་རྣམས་གྲུབ་ནས། དབང་དངོས་ལ་ཐོག་མར་དབང་གི་གཞི་དགོད་པའི་སླད་དུ། ཡེ་ཤེས་པ་དབབ་པ་ཡིན་པས་ཁྱེད་རང་རྣམས་སྒོ་གསུམ་གྱི་གནད་ལེགས་པར་གཅུན་ལ་དམིགས་པ་འདི་ལྟར་དུ་སྒོམས་ཤིག །ཆོས་ཐམས་ཅད་འོད་གསལ་སྟོང་པ་ཉིད་ཀྱི་ངང་ལས། ཁྱེད་རང་རྣམས་གང་དུ་གནས་པའི་གོ་སར་པདྨ་ཉི་མ་ཟླ་བའི་གདན་གྱི་སྟེང་དུ། རང་གི་ཤེས་རིག་མ་བཅོས་པའི་རང་མདངས་གྲུབ་པའི་དབང་ཕྱུག་འཆི་མེད་ཐང་སྟོང་རྒྱལ་པོ་གཞོན་ཚུལ་དཀར་དམར་མདངས་ལྡན་མཚན་དཔེ་ཡོངས་རྫོགས་དབུ་སྐྲ་ཐོར་ཚུགས་སུ་བཅིངས་པ། ཕྱག་གཡས་རྡོ་རྗེ་དང་གཡོན་བདུད་རྩིས་བཀང་བའི་བྷནྡྷ་བསྣམས་ཤིང་ན་བཟའ་རས་དཀར་སླེ་བེར་གསོལ་བ། ཞབས་སྐྱིལ་ཀྲུང་གིས་བཞུགས་པའི་སྤྱི་བོར་ཆོས་སྐུ་སྣང་བ་མཐའ་ཡས། མགྲིན་པར་ལོངས་སྐུ་སྤྱན་རས་གཟིགས། ཐུགས་སྟོད་དུ་དབང་ཆེན་རྟ་མཆོག་རྒྱལ་པོ། །ཐུགས་ཀའི་དབུས་སུ་སློབ་དཔོན་པདྨ་འབྱུང་གནས་དཀར་དམར་མདངས་ལྡན་རྡོ་རྗེ་ཐོད་པ་ཚེ་བུམ་གྱིས་མཚན་པ་བསྣམས་ཤིང་རྒྱན་ཆས་ཡོངས་སུ་རྫོགས་པའི་ཐུགས་ཀར་འོད་ལྔའི་དྲྭ་བའི་ཀློང་དུ་ཉི་ཟླའི་གྭ་འུའི་དབུས་སུ་ཡི་གེ་ཧྲཱིཿདཀར་པོ་འོད་ཟེར་འབར་བ། མཐའ་བསྐོར་དུ་ཡེ་ཤེས་ཀྱི་མཁའ་འགྲོ་སྡེ་ལྔ། རིག་འཛིན་དཔའ་བོ་མཁའ་འགྲོའི་ཚོགས་དཔག་ཏུ་མེད་པས་བསྐོར་བའི་གཙོ་བོའི་གནས་གསུམ་དུ་འབྲུ་གསུམ་གསལ་བ་དང༌། སློབ་དཔོན་གྱི་ཐུགས་ཀ་ནས་ཀྱང་འོད་ཟེར་བསམ་གྱིས་མི་ཁྱབ་པ་ཕྱོགས་ཐམས་ཅད་དུ་འཕྲོས་པས། བླ་མ་སྐུ་གསུམ་གྱི་ཞིང་རབ་འབྱམས་རྒྱ་མཚོ་ན་བཞུགས་པའི་རྩ་གསུམ་རྒྱལ་བ་སྲས་དང་བཅས་པའི་ཐུགས་རྒྱུད་བསྐུལ། ཐམས་ཅད་ཀྱང་འཆི་མེད་གྲུབ་པའི་དབང་ཕྱུག་ཆེན་པོའི་གསང་བ་གསུམ་གྱི་ཕྱག་རྒྱ་ཡིག་འབྲུ་ཕྱག་མཚན་གྱི་རྣམ་པར་ཆར་བབས་པ་ལྟར་བྱོན་ནས་ཁྱེད་རང་རྣམས་ལ་ཐིམ་པས་རྒྱུད་བྱིན་གྱིས་བརླབས་པའི་མོས་པ་མཛོད་ཅིག །སྤོས་དུད་རོལ་མོ་དབྱངས་བཅས། ཨཿ འོད་གསལ་དབུ་མའི་ཕོ་བྲང་ནས༔ ཤེས་རིག་ཐང་སྟོང་རྒྱལ་པོ་ལ༔ ཤར་གྲོལ་དུས་མཉམ་འཁོར་གྱིས་བསྐོར༔ མཉམ་ཉིད་ངང་ནས་བྱིན་ཕོབ་ཅིག༔ ཨོཾ་ཨཱཿཧཱུྃ་གུ་རུ་ཛྙཱ་ན་བཛྲ་ས་མ་ཡ་ཨཱ་བེ་ཤ་ཡ་ཨ་ཨཱཿ ཅེས་བྱིན་རླབས་དབབ། ཡེ་ཤེས་པའི་བྱིན་རླབས་ཀྱི་རྒྱུན་མི་ཉམས་བརྟན་པར་གྱུར་པར་མོས། ཏིཥྛ་བཛྲ། ཞེས་རྒྱ་གྲམ་མགོར་བཞག །དེ་ནས་ཐོག་མར་ཚེ་བཅུད་འགུགས་པའི་སླད་དུ་དམིགས་པ་འདི་བཞིན་དུ་མཛོད། བདག་མདུན་འཆི་མེད་གྲུབ་པའི་དབང་ཕྱུག་གཙོ་དང་འཁོར་དུ་བཅས་པའི་སྐུ་ལས་ལྕགས་ཀྱུ་ལྟ་བུའི་འོད་ཟེར་དང་ཕོ་ཉ་མགྱོགས་མ་ཉི་ཟེར་གྱི་རྡུལ་ལྟ་བུ་སྟེང་འོག་ཕྱོགས་མཚམས་ཁྱབ་པར་འཕྲོས། རང་རང་གི་བླ་ཚེ་ཆད་ཉམས་ཡར་བ་ཐམས་ཅད་དང༌། འབྱུང་བ་བཞིའི་དྭངས་བཅུད། འཇིག་རྟེན་ན་མངོན་པར་མཐོ་བ་རྣམས་ཀྱི་ཚེ་བསོད་དཔལ་འབྱོར་དགེ་ལེགས་ཀྱི་ཡོན་ཏན། རྩ་གསུམ་རྒྱལ་བ་སྲས་དང་བཅས་པ་རྣམས་ཀྱི་གསང་བ་གསུམ་གྱི་བྱིན་རླབས། ཁྱད་པར་འཆི་མེད་ཚེ་དང་ཡེ་ཤེས་ཀྱི་དངོས་གྲུབ་མ་ལུས་པ་ཐམས་ཅད་ཁ་དོག་སྣ་ལྔ་པའི་འཇའ་འོད་ཐིག་ལེ་ཟེར་ཐག་ཡིག་འབྲུའི་རྣམ་པར་བསྡུས་ཏེ་རང་རང་གི་བ་སྤུའི་བུ་ག་ནས་སིབ་སིབ་བྱུང༌། སྙིང་གའི་ཚེ་རྟེན་ཧྲཱིཿཡིག་ལ་ཐིམ་པས་བཀྲག་མདངས་འོད་དུ་འབར། འཆི་བ་མེད་པ་ཚེའི་དངོས་གྲུབ་ཐོབ་པའི་མོས་པ་མཛོད། མདའ་དར་གཡབ་ལ། ཨཿ ཀ་དག་འགྱུར་མེད་ཕོ་བྲང་ནས༔ ཐོག་མའི་མགོན་པོའི་ཐུགས་དམ་བསྐུལ༔ གཞོན་ནུ་བུམ་སྐུའི་ཚེ་བཅུད་སྡུས༔ འཕོ་འགྱུར་མེད་པའི་དངོས་གྲུབ་སྩོལ༔ རང་ཤར་ལྷུན་གྲུབ་ཕོ་བྲང་ནས༔ ཚེ་བདག་རིགས་ལྔའི་ཐུགས་དམ་བསྐུལ༔ ཡེ་ཤེས་ལྔ་ཡི་ཚེ་བཅུད་སྡུས༔ བདེ་ཆེན་རྡོ་རྗེའི་དངོས་གྲུབ་སྩོལ༔ མ་ངེས་འགྲོ་འདུལ་ཕོ་བྲང་ནས༔ ཚེ་དབང་རིག་འཛིན་ཐུགས་དམ་བསྐུལ༔ སྲིད་དང་ཞི་བའི་ཚེ་བཅུད་སྡུས༔ སྐྱེ་འཆི་མེད་པའི་དངོས་གྲུབ་སྩོལ༔ སྐུ་གསུམ་ཀུན་འདུས་ཕོ་བྲང་ནས༔ ཐང་སྟོང་རྒྱལ་པོའི་ཐུགས་དམ་བསྐུལ༔ འོད་གསལ་ཆེན་པོའི་ཚེ་བཅུད་སྡུས༔ འཇའ་ལུས་རྡོ་རྗེའི་དངོས་གྲུབ་སྩོལ༔ རྣམ་ཀུན་མཆོག་ལྡན་ཕོ་བྲང་ནས༔ ཡེ་ཤེས་མཁའ་འགྲོའི་ཐུགས་དམ་བསྐུལ༔ བརྟན་གཡོ་འབྱུང་བཞིའི་ཚེ་བཅུད་སྡུས༔ སྒོ་གསུམ་དྭངས་མར་སྨིན་པར་མཛོད༔ གསང་ཆེན་རྡོ་རྗེའི་དཀྱིལ་འཁོར་འདིར༔ ཚེ་མདའ་འདི་ལ་ཚད་ཅིག་སྟོན༔ སྒྲུབ་རྫས་ཡེ་ཤེས་བདུད་རྩིར་སྒྱུར༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱཿཧཱུྃ་ཧྲཱིཿཧྲཱིཿབཛྲ་གུ་རུ་པདྨ་སིདྡྷི་པུཎྱེ་ཛྙཱ་ན་ཨཱ་ཡུར་སིདྡྷི་ཛཿ ཅེས་ཚེ་འགུགས་བྱ། སློབ་དཔོན་དང་མདུན་བསྐྱེད་དབྱེར་མ་མཆིས་པས་འཆི་མེད་ཚེའི་དབང་བཞི་རིམ་པར་བསྐུར་བའི་ཐོག་མར་བུམ་པའི་དབང་སྤྱི་བོར་བསྐུར་བས། གདོས་བཅས་རྩ་ཁམས་ཀྱི་སྒྲིབ་པ་བྲལ། འཕོ་འགྱུར་མེད་པ་རྡོ་རྗེ་ལྟ་བུའི་སྐུ་ཐོབ་པར་མོས་ཤིག །བུམ་པ་སྤྱི་བོར་བཞག་ལ། ཨཿ བློ་བྲལ་བུམ་པའི་དཀྱིལ་འཁོར་དུ༔ ཟུང་འཇུག་འཆི་མེད་མགོན་པོ་བཞུགས༔ སྐལ་ལྡན་ཁྱོད་ལ་དབང་བསྐུར་བས༔ འགྱུར་མེད་རྡོ་རྗེའི་ཚེ་ཐོབ་ཤོག༔ ཨོཾ་ཨཱཿཧཱུྃ་ཧྲཱིཿཧྲཱིཿབཛྲ་གུ་རུ་པདྨ་སིདྡྷི་པུཎྱེ་ཛྙཱ་ན་ཨཱ་ཡུར་སིདྡྷི་ཛཿ ཀ་ལ་ཤ་ཀཱ་ཡ་ཨ་བྷི་ཥིཉྩ་ཨོཾ༔ བུམ་ཆུ་སྦྱིན། སྐུ་སྐྱེ་འཆི་མེད་པ་རྡོ་རྗེ་ཚེའི་དབང་མཆོག་དམ་པ་ལྷ་དང་གཉིས་སུ་མེད་པ་ཐོབ་པར་གྱུར་ཅིག །བདུད་རྩིའི་དབང་མགྲིན་པར་བསྐུར་བས་སྲོག་རྩོལ་གྱི་བགྲོད་པ་དབུ་མའི་དབྱིངས་སུ་ཐིམ། གཞོམ་དུ་མེད་པ་རང་བྱུང་ནཱ་དའི་གསུང་ཐོབ་པར་མོས་ཤིག །བྷནྡྷའི་བདུད་རྩི་མགྲིན་པར་བཞག་ལ། ཨཿ དབྱིངས་རིག་དབྱེར་མེད་ཀ་པཱ་ལར༔ བདེ་ཆེན་ཡུམ་ལྔའི་བདུད་རྩི་བསྐྱིལ༔ སྐལ་ལྡན་ཁྱོད་ལ་སྦྱིན་པ་ཡིས༔ སྲོག་རྩོལ་དབུ་མར་ཐིམ་པར་ཤོག༔ མ་ཧཱ་སུ་ཁ་ཝཱ་ཀ་ཨ་བྷི་ཥིཉྩ་ཨཱ༔ བདུད་རྩི་སྦྱིན། གསུང་འགག་པ་མེད་པ་རྡོ་རྗེ་ཚེའི་དབང་མཆོག་དམ་པ་ལྷ་དང་གཉིས་སུ་མེད་པ་ཐོབ་པར་གྱུར་ཅིག༔ ཚེའི་རིལ་བུའི་དབང་སྙིང་གར་བསྐུར་བས་སྐྱེ་འཆིའི་འཛིན་རྟོག་ཀ་དག་གི་དབྱིངས་སུ་གྲོལ། རང་བཞིན་རྟག་པ་དམ་པ་རྡོ་རྗེའི་ཐུགས་ཐོབ་པར་མོས་ཤིག །ཚེ་རིལ་སྙིང་གར་བཞག་ལ། ཨཿ སྲིད་ཞིའི་དྭངས་མ་འདུས་པའི་བཅུད༔ སྣང་སྟོང་ཟུང་འཇུག་བདེ་བ་ཆེ༔ སྐལ་ལྡན་ཁྱོད་ལ་སྦྱིན་པ་ཡིས༔ སྐྱེ་འཆིའི་འཛིན་པ་རང་གྲོལ་ཤོག༔ ཛྙཱ་ན་བཛྲ་ཙིཏྟ་ཨ་བྷི་ཥིཉྩ་ཧཱུྃ། ཞེས་དང་ཚེ་རིལ་སྦྱིན། ཐུགས་གཡོ་བ་མེད་པ་རྡོ་རྗེ་ཚེའི་དབང་མཆོག་དམ་པ་ལྷ་དང་གཉིས་སུ་མེད་པ་ཐོབ་པར་གྱུར་ཅིག །ཤེལ་དང་མེ་ལོང་གི་བརྡས་མཚོན་ཏེ་གཞི་ཀ་དག་གི་དབྱིངས་ལས་ལམ་ལྷུན་གྲུབ་ཀྱི་སྣང་བ་ཅིར་ཡང་འཆར་བ་ཉིད་ཟུང་འཇུག་ཡེ་ཤེས་ཆེན་པོའི་ལམ་དུ་བྱས་པས་ཆོས་ཅན་སྤྲོས་པའི་མཚན་མ་ཆོས་ཉིད་འགྱུར་བ་མེད་པའི་ཀློང་དུ་ཐིམ་ནས་ནམ་ཡང་འཕོ་འགྱུར་དང་བྲལ་བ་འཆི་མེད་རྡོ་རྗེའི་སྐུ་བཙན་ས་ཟིན་པའི་དོན་རྟོགས་པར་གྱིས་ཤིག །ཤེལ་རྡོ་མེ་ལོང་བསྟན་ལ། ཨཿ ཀ་དག་གཞི་ཡི་ཡེ་ཤེས་ལ༔ ལྷུན་གྲུབ་ལམ་གྱི་སྣང་བ་ཤར༔ ཟུང་འཇུག་བློ་བྲལ་ཆེན་པོའི་ངང་༔ འཕོ་འགྱུར་མེད་པའི་དབང་ཐོབ་ཤོག༔ ཨ་ཨ་ཨ་ཛྙཱ་ན་ཨ་བྷི་ཥིཉྩ་ཨཿདབྱིངས་རིག་ཟུང་འཇུག་གཤིས་ལུགས་མ་བཅོས་གཉུག་མ་བློ་འདས་ཆེན་པོའི་ངང་དུ་མཉམ་པར་འཇོག་འཚལ། ཅེས་དར་གཅིག་བཞག །ཡོན་ཏན་དང་ཕྲིན་ལས་རྩོལ་མེད་ལྷུན་གྱིས་གྲུབ་པ་རྡོ་རྗེ་ཚེའི་དབང་མཆོག་དམ་པ་ལྷ་དང་གཉིས་སུ་མེད་པ་ཐོབ་པར་གྱུར་ཅིག །དེ་ལྟར་འཆི་མེད་དོན་གྱི་དབང་བཞི་བསྐུར་བས། སྒྲིབ་པ་བཞི་དག །ལམ་བཞི་བསྒོམ་པ་ལ་དབང༌། རྡོ་རྗེ་བཞི་ཡི་གོ་འཕང་ཐོབ་པའི་སྐལ་བ་ཅན་དུ་བྱས་པ་ཡིན་ནོ། །དེ་ཉིད་མི་ཉམས་ཤིང་བརྟན་པར་རྒྱས་འདེབས་པ་ལ། ལུས་ཀྱི་ནང་གང་བའི་ཚེའི་བཅུད་དང་དྭངས་མ་ཐམས་ཅད་འུབ་ཀྱིས་བསྡུས་ཏེ་སྙིང་གའི་ཉི་ཟླའི་གའུའི་ནང་དུ་ཞུགས། དྭངས་སྲོག་ཧྲཱིཿཡིག་ལ་ཐིམ་པས་བཀྲག་མདངས་འོད་དུ་འབར། སྐྱེ་འཆི་གཞོམ་གཞིག་དང་བྲལ་བ་རྡོ་རྗེ་ཚེའི་རིག་འཛིན་ཐོབ་པར་མོས་ལ་ཆོས་ཉིད་འཕོ་འགྱུར་མེད་པའི་ངང་དུ་མཉམ་བཞག་གི་ཕྱག་རྒྱའི་རྒྱས་ཐོབ་ཅིག །ཨཿ སྤྲོས་པས་སྣང་སྲིད་གང་བའི་ཚེ༔ བསྡུས་པས་ཐིག་ལེ་ཉག་གཅིག་ཀློང་༔ འཕོ་འགྱུར་མེད་པར་རྒྱས་གདབ་བོ༔ རྣམ་ཀུན་མཆོག་ལྡན་དབྱིངས་སུ་ཨཿ ཞེས་རྒྱས་གདབ་ལ་ཤིས་བརྗོད་རྒྱས་པར་སྤེལ་ཅིང་མེ་ཏོག་གི་ཆར་དབབ། དབང་གི་རྗེས་རིམ་དམ་ཚིག་བསྒྲག་བཟུང་སོགས་དང༌། ཚོགས་ལ་རོལ་པ་ཕྱིན་ཕྲིན་ལས་ཀྱི་རྗེས་ཀྱི་བྱ་བ་རྣམས་ཀྱང་དེ་ཉིད་ལས་འབྱུང་བ་ལྟར་བྱས་པས་གྲུབ་བོ། །ཚེ་དབང་གྲུབ་པའི་དབང་ཕྱུག་དང༌། །དབྱེར་མེད་རྡོ་རྗེའི་རིག་འཛིན་བརྙེས། །གང་འདུལ་ཕྲིན་ལས་མཐའ་ཡས་པས། །ཁམས་གསུམ་སྐྱེ་དགུ་དབུགས་འབྱིན་ཤོག །ཅེས་པའང་ཟབ་ཆོས་འདིའི་ཐོག་མའི་སྣོད་ལྡན་བློ་གྲོས་མཐའ་ཡས་པའི་སྡེས་ཁྱབ་བདག་ཀུན་མཁྱེན་བླ་མ་རིན་པོ་ཆེའི་གསང་བ་གསུམ་གྱི་སྣང་བས་བྱིན་གྱིས་བརླབས་པའི་གདན་ས་ཆེན་པོ་རྫོང་གསར་བཀྲ་ཤིས་ལྷ་རྩེའི་ཆོས་གྲར་སྤེལ་བ་དགེ་ལེགས་འཕེལ།།

[edit]

@#/__/grub thob chen po'i thugs tig las/__tshe sgrub 'chi med snying po'i mtshams sbyor bdud rtsi'i snying po zhes bya ba bzhugs so/__@#/__'chi med bde chen rdo rje'i sku/__/dngos grub 'dod rgu'i char 'bebs la/__/gus pas gsol btab tshe sgrub kyi/__/smin byed mtshams sbyor khyer bder dgod/__'chi med grub pa'i dbang phyug chen po'i zhal lung gang zag phreng bas bar ma chad pa'i zab gsang dang 'brel bar 'chi med tshe'i dbang bskur bsgrub pa la/__stegs gtsang ma'i dbus su maN+Dal pad+ma 'dab brgyad dbus dang phyogs bzhir tshom bus spras pa'i steng du many+dzi la bum pa bcud ldan mgul chings dkar po kha rgyan dang ldan pa/__g.yas su thod pa mtshan ldan tu chang rgod mngar gsum sbyar bas bkang ba/__g.yon tu rin po che'i snod du tshe'i ril bu/__mdun du shel rdo me long*/__rgyab tu tshe mda' rgyan ldan rnams bkod/__phyi nang gi mchod gtor/__tshogs kyi yo byad sogs phrin las la nye bar mkho ba rnams kyang bkod mdzes su bshams shing nyer bsdog bya'o/__/de nas thog mar gsol 'debs sngon tu 'gro bas phrin las ye shes snying po'i skyabs sems nas bstod pa'i bar bdag mdun chig rdzogs su btang*/__bstod pa'i rjes su dzaba? khang phyes te tshe sgrub 'chi med snying po ltar dmigs gnad dang ldan pas rtsa bsnyen dang hrIHbzlas ci 'grub bya/__mthar tshe bcud bsdu ba'i bzlas pa'ang brgya rtsa las mi nyung ba bzlas te tshe 'gugs btang*/__mchod bstod dang yig brgyas nongs pa bshags/__las bum du 'khyil ba'i bskyed bzlas bya/__tshogs byin brlabs la gzhung ltar 'bul/__bdag 'jug spro na dbang chog ltar blang*/__mi lcogs na ting nge 'dzin gyi dbang blang ba sogs spyi 'gre bya'o/__/dbang dngos la slob ma rnams las bum gyi chus khrus bya/__bgegs gtor btang la bka' bsgo zhing mtshams bcad/__srung 'khor bsgom/__sems bskyed gsal btab la spyi bshad ci rigs dang khyad par/__de la 'dir skabs su babs pa/__sangs rgyas tshe dpag med pa dang slob dpon chen po pad+ma 'byung gnas dbyer med pa snyigs dus gdul bya'i mgon du sprul pa'i skur bzhengs pa/__grub chen thang stong rgyal po zhes 'jig rten gsum na nyi zla ltar grags shing grub pa'i cho 'phrul chen po dzam bu gling khyab par bstan pas gzhan gyis ma dul ba'i gdul dka'i mi dang mi ma yin rnams 'dul bar mdzad pa/__khyad par 'chi med tshe la dbang brnyes pa'i rig pa 'dzin par grub pas las dag pa rnams kyi snang ngor da lta'ang mngon sum du bzhugs nas skal ldan rnams rjes su 'dzin cing dngos grub rnam pa gnyis stsol bar mdzad pa de nyid kyis/__'jam mgon khri lde'i rnam rol gangs can mkhas grub yongs kyi 'khor los bsgyur ba chen po 'od gsal sprul pa'i rdo rje dgung grangs bco lnga par mngon sum du stsal ba/__gzhan las khyad par du 'phags pa'i zab chos thun mong ma yin pa grub thob chen po'i thugs tig gi cha lag tshe sgrub 'chi med snying po'i smin byed bsgrub pa la sogs kyis mtshams sbyar nas maN+Dal 'bul du gzhug__/slob dpon dang grub thob chen po tha dad med pa la dad gus drag pos gsol ba 'debs pa 'di'i rjes zlos/__rdo rje snying po'i dkyil 'khor nas:__skye 'chi med pa'i tshe yi dbang :__sgo gsum rdo rjer smin bya'i phyir:__skal ldan bdag la stsal du gsol:__lan gsum/__rgyud dag par bya ba'i slad du/__bla ma dang rje grub thob chen po tha dad med pa la rtsa gsum chos srung rgya mtshos sprin gtibs pa ltar bskor te bzhugs pa'i spyan sngar/__bdag gzhan nam mkha' dang mnyam pa'i sems can thams cad byang chub ma thob kyi bar du skyabs su 'gro zhing sdig pa mi dge ba'i las mtha' dag bshags pa dang*/__gzhan don smon pa byang chub mchog tu sems bskyed cing byang chub kyi spyod pa la 'jug pa'i sdom pa blangs te gsang ba sngags kyi spyod pa rlabs po che spyad par dam bca' ba dang*/__de thams cad kyang 'khor gsum spros pa dang bral ba'i dbyings su la bzla ba don dam byang chub kyi sems rnams gsal thob la 'di'i rjes zlos/__thugs rje'i dbang gis 'gro don mdzad:__bla ma rnams la skyabs su mchi:__rang las ye shes shar ba'i sku:__yi dam lha la skyabs su mchi:__legs nyes stangs 'dzin bar chad sel:__mkha' 'gro'i tshogs la skyabs su mchi:__sngon nas bsags pa'i sdig sgrib bshags:__'gro don sangs rgyas thob bya snyam:__smon pa'i byang chub sems bskyed cing :__sems can yongs su smin bya'i phyir:__gsang sngags spyod pa rlabs chen spyad:__don dam spros bral byang chub sems:__rang byung mtha' bral stong gsal bsgom:__zhes lan gsum/__de dag gis dbang gi sngon du 'gro ba rnams grub nas/__dbang dngos la thog mar dbang gi gzhi dgod pa'i slad du/__ye shes pa dbab pa yin pas khyed rang rnams sgo gsum gyi gnad legs par gcun la dmigs pa 'di ltar du sgoms shig__/chos thams cad 'od gsal stong pa nyid kyi ngang las/__khyed rang rnams gang du gnas pa'i go sar pad+ma nyi ma zla ba'i gdan gyi steng du/__rang gi shes rig ma bcos pa'i rang mdangs grub pa'i dbang phyug 'chi med thang stong rgyal po gzhon tshul dkar dmar mdangs ldan mtshan dpe yongs rdzogs dbu skra thor tshugs su bcings pa/__phyag g.yas rdo rje dang g.yon bdud rtsis bkang ba'i b+han+d+ha bsnams shing na bza' ras dkar sle ber gsol ba/__zhabs skyil krung gis bzhugs pa'i spyi bor chos sku snang ba mtha' yas/__mgrin par longs sku spyan ras gzigs/__thugs stod du dbang chen rta mchog rgyal po/__/thugs ka'i dbus su slob dpon pad+ma 'byung gnas dkar dmar mdangs ldan rdo rje thod pa tshe bum gyis mtshan pa bsnams shing rgyan chas yongs su rdzogs pa'i thugs kar 'od lnga'i drwa ba'i klong du nyi zla'i gwa 'u'i dbus su yi ge hrIHdkar po 'od zer 'bar ba/__mtha' bskor du ye shes kyi mkha' 'gro sde lnga/__rig 'dzin dpa' bo mkha' 'gro'i tshogs dpag tu med pas bskor ba'i gtso bo'i gnas gsum du 'bru gsum gsal ba dang*/__slob dpon gyi thugs ka nas kyang 'od zer bsam gyis mi khyab pa phyogs thams cad du 'phros pas/__bla ma sku gsum gyi zhing rab 'byams rgya mtsho na bzhugs pa'i rtsa gsum rgyal ba sras dang bcas pa'i thugs rgyud bskul/__thams cad kyang 'chi med grub pa'i dbang phyug chen po'i gsang ba gsum gyi phyag rgya yig 'bru phyag mtshan gyi rnam par char babs pa ltar byon nas khyed rang rnams la thim pas rgyud byin gyis brlabs pa'i mos pa mdzod cig__/spos dud rol mo dbyangs bcas/__aH__'od gsal dbu ma'i pho brang nas:__shes rig thang stong rgyal po la:__shar grol dus mnyam 'khor gyis bskor:__mnyam nyid ngang nas byin phob cig:__oM AHhU~M gu ru dz+nyA na badz+ra sa ma ya A be sha ya a AH__ces byin rlabs dbab/__ye shes pa'i byin rlabs kyi rgyun mi nyams brtan par gyur par mos/__tiSh+Tha badz+ra/__zhes rgya gram mgor bzhag__/de nas thog mar tshe bcud 'gugs pa'i slad du dmigs pa 'di bzhin du mdzod/__bdag mdun 'chi med grub pa'i dbang phyug gtso dang 'khor du bcas pa'i sku las lcags kyu lta bu'i 'od zer dang pho nya mgyogs ma nyi zer gyi rdul lta bu steng 'og phyogs mtshams khyab par 'phros/__rang rang gi bla tshe chad nyams yar ba thams cad dang*/__'byung ba bzhi'i dwangs bcud/__'jig rten na mngon par mtho ba rnams kyi tshe bsod dpal 'byor dge legs kyi yon tan/__rtsa gsum rgyal ba sras dang bcas pa rnams kyi gsang ba gsum gyi byin rlabs/__khyad par 'chi med tshe dang ye shes kyi dngos grub ma lus pa thams cad kha dog sna lnga pa'i 'ja' 'od thig le zer thag yig 'bru'i rnam par bsdus te rang rang gi ba spu'i bu ga nas sib sib byung*/__snying ga'i tshe rten hrIHyig la thim pas bkrag mdangs 'od du 'bar/__'chi ba med pa tshe'i dngos grub thob pa'i mos pa mdzod/__mda' dar g.yab la/__aH__ka dag 'gyur med pho brang nas:__thog ma'i mgon po'i thugs dam bskul:__gzhon nu bum sku'i tshe bcud sdus:__'pho 'gyur med pa'i dngos grub stsol:__rang shar lhun grub pho brang nas:__tshe bdag rigs lnga'i thugs dam bskul:__ye shes lnga yi tshe bcud sdus:__bde chen rdo rje'i dngos grub stsol:__ma nges 'gro 'dul pho brang nas:__tshe dbang rig 'dzin thugs dam bskul:__srid dang zhi ba'i tshe bcud sdus:__skye 'chi med pa'i dngos grub stsol:__sku gsum kun 'dus pho brang nas:__thang stong rgyal po'i thugs dam bskul:__'od gsal chen po'i tshe bcud sdus:__'ja' lus rdo rje'i dngos grub stsol:__rnam kun mchog ldan pho brang nas:__ye shes mkha' 'gro'i thugs dam bskul:__brtan g.yo 'byung bzhi'i tshe bcud sdus:__sgo gsum dwangs mar smin par mdzod:__gsang chen rdo rje'i dkyil 'khor 'dir:__tshe mda' 'di la tshad cig ston:__sgrub rdzas ye shes bdud rtsir sgyur:__mchog dang thun mong dngos grub stsol:__oM AHhU~M hrIHhrIHbadz+ra gu ru pad+ma sid+d+hi puN+ye dz+nyA na A yur sid+d+hi dzaH__ces tshe 'gugs bya/__slob dpon dang mdun bskyed dbyer ma mchis pas 'chi med tshe'i dbang bzhi rim par bskur ba'i thog mar bum pa'i dbang spyi bor bskur bas/__gdos bcas rtsa khams kyi sgrib pa bral/__'pho 'gyur med pa rdo rje lta bu'i sku thob par mos shig__/bum pa spyi bor bzhag la/__aH__blo bral bum pa'i dkyil 'khor du:__zung 'jug 'chi med mgon po bzhugs:__skal ldan khyod la dbang bskur bas:__'gyur med rdo rje'i tshe thob shog:__oM AHhU~M hrIHhrIHbadz+ra gu ru pad+ma sid+d+hi puN+ye dz+nyA na A yur sid+d+hi dzaH__ka la sha kA ya a b+hi Shiny+tsa oM:__bum chu sbyin/__sku skye 'chi med pa rdo rje tshe'i dbang mchog dam pa lha dang gnyis su med pa thob par gyur cig__/bdud rtsi'i dbang mgrin par bskur bas srog rtsol gyi bgrod pa dbu ma'i dbyings su thim/__gzhom du med pa rang byung nA da'i gsung thob par mos shig__/b+han+d+ha'i bdud rtsi mgrin par bzhag la/__aH__dbyings rig dbyer med ka pA lar:__bde chen yum lnga'i bdud rtsi bskyil:__skal ldan khyod la sbyin pa yis:__srog rtsol dbu mar thim par shog:__ma hA su kha wA ka a b+hi Shiny+tsa A:__bdud rtsi sbyin/__gsung 'gag pa med pa rdo rje tshe'i dbang mchog dam pa lha dang gnyis su med pa thob par gyur cig:__tshe'i ril bu'i dbang snying gar bskur bas skye 'chi'i 'dzin rtog ka dag gi dbyings su grol/__rang bzhin rtag pa dam pa rdo rje'i thugs thob par mos shig__/tshe ril snying gar bzhag la/__aH__srid zhi'i dwangs ma 'dus pa'i bcud:__snang stong zung 'jug bde ba che:__skal ldan khyod la sbyin pa yis:__skye 'chi'i 'dzin pa rang grol shog:__dz+nyA na badz+ra tsit+ta a b+hi Shiny+tsa hU~M/__zhes dang tshe ril sbyin/__thugs g.yo ba med pa rdo rje tshe'i dbang mchog dam pa lha dang gnyis su med pa thob par gyur cig__/shel dang me long gi brdas mtshon te gzhi ka dag gi dbyings las lam lhun grub kyi snang ba cir yang 'char ba nyid zung 'jug ye shes chen po'i lam du byas pas chos can spros pa'i mtshan ma chos nyid 'gyur ba med pa'i klong du thim nas nam yang 'pho 'gyur dang bral ba 'chi med rdo rje'i sku btsan sa zin pa'i don rtogs par gyis shig__/shel rdo me long bstan la/__aH__ka dag gzhi yi ye shes la:__lhun grub lam gyi snang ba shar:__zung 'jug blo bral chen po'i ngang :__'pho 'gyur med pa'i dbang thob shog:__a a a dz+nyA na a b+hi Shiny+tsa aHdbyings rig zung 'jug gshis lugs ma bcos gnyug ma blo 'das chen po'i ngang du mnyam par 'jog 'tshal/__ces dar gcig bzhag__/yon tan dang phrin las rtsol med lhun gyis grub pa rdo rje tshe'i dbang mchog dam pa lha dang gnyis su med pa thob par gyur cig__/de ltar 'chi med don gyi dbang bzhi bskur bas/__sgrib pa bzhi dag__/lam bzhi bsgom pa la dbang*/__rdo rje bzhi yi go 'phang thob pa'i skal ba can du byas pa yin no/__/de nyid mi nyams shing brtan par rgyas 'debs pa la/__lus kyi nang gang ba'i tshe'i bcud dang dwangs ma thams cad 'ub kyis bsdus te snying ga'i nyi zla'i ga'u'i nang du zhugs/__dwangs srog hrIHyig la thim pas bkrag mdangs 'od du 'bar/__skye 'chi gzhom gzhig dang bral ba rdo rje tshe'i rig 'dzin thob par mos la chos nyid 'pho 'gyur med pa'i ngang du mnyam bzhag gi phyag rgya'i rgyas thob cig__/aH__spros pas snang srid gang ba'i tshe:__bsdus pas thig le nyag gcig klong :__'pho 'gyur med par rgyas gdab bo:__rnam kun mchog ldan dbyings su aH__zhes rgyas gdab la shis brjod rgyas par spel cing me tog gi char dbab/__dbang gi rjes rim dam tshig bsgrag bzung sogs dang*/__tshogs la rol pa phyin phrin las kyi rjes kyi bya ba rnams kyang de nyid las 'byung ba ltar byas pas grub bo/__/tshe dbang grub pa'i dbang phyug dang*/__/dbyer med rdo rje'i rig 'dzin brnyes/__/gang 'dul phrin las mtha' yas pas/__/khams gsum skye dgu dbugs 'byin shog__/ces pa'ang zab chos 'di'i thog ma'i snod ldan blo gros mtha' yas pa'i sdes khyab bdag kun mkhyen bla ma rin po che'i gsang ba gsum gyi snang bas byin gyis brlabs pa'i gdan sa chen po rdzong gsar bkra shis lha rtse'i chos grar spel ba dge legs 'phel//__