JKW-KABUM-14-PHA-003

🚧 This website is under continued development. We appreciate your patience!

Previous Section Back to Volume PageNext Section

Wylie title
Location	mkhyen brtse'i bka' 'bum Volume 14, sde tshan 3, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	ཀརྨ་གླིང་པ་ (karma gling pa)
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 14: 1-. Khams sde dge rdzong sar dgon: Rdzong sar blo gros phun tshogs, 2020.
Genre
Cycle	ཟབ་ཆོས་ཞི་ཁྲོ་དགོངས་པ་རང་གྲོལ་ (zab chos zhi khro dgongs pa rang grol)
Deity	zhi khro

1 Texts in this Section (sde tshan or chos tshan)

109-110	ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ སྐུ་གསུམ་བླ་མའི་གསོལ་འདེབས་དུག་གསུམ་མ་སྤངས་རང་གྲོལ། zab chos zhi khro dgongs pa rang grol las: sku gsum bla ma'i gsol 'debs dug gsum ma spangs rang grol Revelations - gter ma   ·   Supplemental Instructions - zur 'debs - zur rgyan	Text page View PDF
	[[|ཀརྨ་གླིང་པ་ ()]]

Tibetan Text

Wylie

[edit]

༄༅། །ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ སྐུ་གསུམ་བླ་མའི་གསོལ་འདེབས་དུག་གསུམ་མ་སྤངས་རང་གྲོལ་བཞུགས་སོ༔

རྣམ་དག་ཆོས་དབྱིངས་ཁྱབ་གདལ་ཕོ་བྲང་ནས༔ སྐྱེ་མེད་སྤྲོས་བྲལ་ཆོས་སྐུའི་བླ་མ་ལ༔ བདག་ཉིད་མོས་གུས་གདུང་བས་གསོལ་བ་འདེབས༔ མ་རིག་གཏི་མུག་མ་སྤངས་རང་གྲོལ་ནས༔ རང་བྱུང་ཡེ་ཤེས་མ་བཅོས་ལྷུན་གྲུབ་ཏུ༔ ཆོས་སྐུའི་བྱིན་རླབས་ཀ་དག་རང་དབང་ཞུ༔ གསལ་དག་ཡེ་ཤེས་བདེ་ཆེན་ཕོ་བྲང་དུ༔ མ་འགགས་བདེ་ཆེན་ལོངས་སྐུའི་བླ་མ་ལ༔ བདག་ཉིད་མོས་གུས་གདུང་བས་གསོལ་བ་འདེབས༔ འདོད་ཆགས་ཞེན་པ་མ་སྤངས་རང་གྲོལ་ནས༔ རང་རིག་ཡེ་ཤེས་བདེ་ཆེན་རང་གྲོལ་དུ༔ ལོངས་སྐུའི་བྱིན་རླབས་ལྷུན་གྲུབ་རང་དབང་ཞུ༔ སྐྱོན་མེད་རྣམ་དག་པདྨའི་ཕོ་བྲང་དུ༔ ངེས་མེད་རང་ཤར་སྤྲུལ་སྐུའི་བླ་མ་ལ༔ བདག་ཉིད་མོས་གུས་གདུང་བས་གསོལ་བ་འདེབས༔ ལོག་རྟོག་ཞེ་སྡང་མ་སྤངས་རང་གྲོལ་ནས༔ རང་སྣང་ཡེ་ཤེས་རང་རིག་རང་གསལ་དུ༔ སྤྲུལ་སྐུའི་བྱིན་རླབས་རང་གྲོལ་དབང་བསྐུར་ཞུ༔ ཡང་དག་འོད་གསལ་རང་རིག་ཕོ་བྲང་དུ༔ ཕྱོགས་མེད་བདེ་ཆེན་སྐུ་གསུམ་བླ་མ་ལ༔ བདག་ཉིད་མོས་གུས་གདུང་བས་གསོལ་བ་འདེབས༔ ཐ་དད་གཟུང་འཛིན་མ་སྤངས་རང་གྲོལ་ནས༔ རང་བྱུང་ཡེ་ཤེས་སྐུ་གསུམ་ལྷུན་གྲུབ་ཏུ༔ བདེ་ཆེན་སྐུ་གསུམ་བྱིན་རླབས་དབང་བསྐུར་ཞུ༔ རང་སེམས་མཐའ་བྲལ་ཆོས་སྐུ་མ་རྟོགས་པར༔ གཏི་མུག་རྨོངས་པས་འཁོར་བར་འཁྱམས་པ་ཡི༔ སྡུག་བསྔལ་སེམས་ཅན་འདི་རྣམས་སྙིང་རེ་རྗེ༔ དེ་རྣམས་ཐམས་ཅད་ཆོས་སྐུ་འཐོབ་པར་ཤོག༔ རང་རིག་བདེ་ཆེན་ལོངས་སྐུ་མ་རྟོགས་པར༔ འདོད་ཆགས་སྲེད་ལས་འཁོར་བར་འཁྱམས་པ་ཡི༔ འདོད་ལོག་སེམས་ཅན་འདི་རྣམས་སྙིང་རེ་རྗེ༔ དེ་རྣམས་ཐམས་ཅད་ལོངས་སྐུ་འཐོབ་པར་ཤོག༔ རང་སེམས་ཤར་གྲོལ་སྤྲུལ་སྐུ་མ་རྟོགས་པར༔ སྣང་སེམས་གཉིས་སྣང་འཁོར་བར་འཁྱམས་པ་ཡི༔ ལོག་རྟོག་སེམས་ཅན་འདི་རྣམས་སྙིང་རེ་རྗེ༔ དེ་རྣམས་ཐམས་ཅད་སྤྲུལ་སྐུ་འཐོབ་པར་ཤོག༔ རང་སེམས་སྐུ་གསུམ་དབྱེར་མེད་མ་རྟོགས་པར༔ དེར་འཛིན་ཉོན་མོངས་ཤེས་བྱའི་སྒྲིབ་པ་རྣམས༔ སངས་རྒྱས་མ་ཐོབ་འགྲོ་ཀུན་སྙིང་རེ་རྗེ༔ དེ་རྣམས་ཐམས་ཅད་སྐུ་གསུམ་འཐོབ་པར་ཤོག༔ ཟབ་ཆོས་ཞི་ཁྲོ་དགོངས་པ་རང་གྲོལ་གྱི་སྐུ་གསུམ་བླ་མའི་རྣལ་འབྱོར་གྱི་གསོལ་འདེབས་དུག་གསུམ་མ་སྤངས་རང་གྲོལ་ཞེས་བྱ་བ༔ ཨོ་རྒྱན་གྱི་མཁན་པོ་པདྨ་འབྱུང་གནས་ཀྱིས་སྦྱར་བ༔ ཇི་སྲིད་འཁོར་བའི་འཇིག་རྟེན་མ་སྟོངས་བར༔ དེ་སྲིད་དམ་ཆོས་འདི་ཡང་མ་རྫོགས་ཤོག༔ ས་མ་ཡ༔ རྒྱ་རྒྱ་རྒྱ༔ དགེའོ། །

[edit]

@#/_/zab chos zhi khro dgongs pa rang grol las:_sku gsum bla ma'i gsol 'debs dug gsum ma spangs rang grol bzhugs so: rnam dag chos dbyings khyab gdal pho brang nas:__skye med spros bral chos sku'i bla ma la:__bdag nyid mos gus gdung bas gsol ba 'debs:__ma rig gti mug ma spangs rang grol nas:__rang byung ye shes ma bcos lhun grub tu:__chos sku'i byin rlabs ka dag rang dbang zhu:__gsal dag ye shes bde chen pho brang du:__ma 'gags bde chen longs sku'i bla ma la:__bdag nyid mos gus gdung bas gsol ba 'debs:__'dod chags zhen pa ma spangs rang grol nas:__rang rig ye shes bde chen rang grol du:__longs sku'i byin rlabs lhun grub rang dbang zhu:__skyon med rnam dag pad+ma'i pho brang du:__nges med rang shar sprul sku'i bla ma la:__bdag nyid mos gus gdung bas gsol ba 'debs:__log rtog zhe sdang ma spangs rang grol nas:__rang snang ye shes rang rig rang gsal du:__sprul sku'i byin rlabs rang grol dbang bskur zhu:__yang dag 'od gsal rang rig pho brang du:__phyogs med bde chen sku gsum bla ma la:__bdag nyid mos gus gdung bas gsol ba 'debs:__tha dad gzung 'dzin ma spangs rang grol nas:__rang byung ye shes sku gsum lhun grub tu:__bde chen sku gsum byin rlabs dbang bskur zhu:__rang sems mtha' bral chos sku ma rtogs par:__gti mug rmongs pas 'khor bar 'khyams pa yi:__sdug bsngal sems can 'di rnams snying re rje:__de rnams thams cad chos sku 'thob par shog:__rang rig bde chen longs sku ma rtogs par:__'dod chags sred las 'khor bar 'khyams pa yi:__'dod log sems can 'di rnams snying re rje:__de rnams thams cad longs sku 'thob par shog:__rang sems shar grol sprul sku ma rtogs par:__snang sems gnyis snang 'khor bar 'khyams pa yi:__log rtog sems can 'di rnams snying re rje:__de rnams thams cad sprul sku 'thob par shog:__rang sems sku gsum dbyer med ma rtogs par:__der 'dzin nyon mongs shes bya'i sgrib pa rnams:__sangs rgyas ma thob 'gro kun snying re rje:__de rnams thams cad sku gsum 'thob par shog:__zab chos zhi khro dgongs pa rang grol gyi sku gsum bla ma'i rnal 'byor gyi gsol 'debs dug gsum ma spangs rang grol zhes bya ba:__o rgyan gyi mkhan po pad+ma 'byung gnas kyis sbyar ba:__ji srid 'khor ba'i 'jig rten ma stongs bar:__de srid dam chos 'di yang ma rdzogs shog:__sa ma ya:__rgya rgya rgya:__dge'o/_/