DKR-KABUM-23-'A-009

🚧 This website is under continued development. We appreciate your patience!

Previous Text Back to Volume PageNext Text

Wylie title	'jam dpal khro chu dug gdong nag po'i yum chen dug gi thig ler gsol smon rdo rje dbyangs kyi rol mo
Location	dil mgo mkhyen brtse bka' 'bum Volume 23, Text 9, Pages 269-271 (Folios 1a1 to 2a6)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation	Khyentse, Dilgo. 'jam dpal khro chu dug gdong nag po'i yum chen dug gi thig ler gsol smon rdo rje dbyangs kyi rol mo. In Skyabs rje dil mgo mkhyen brtse rin po che'i bka' 'bum, Vol. 23: 269-271. Delhi: Shechen Publications, 1994.
Genre	Prayers - smon lam
Colophon	།ཅེས་པའང་ལྷག་པའི་ལྷ་མཆོག་འདི་ཉིད་ཀྱི་རྣལ་འབྱོར་ལ་གཞོལ་བའི་རྟོགས་ལྡན་ཕྲིན་ལས་བློ་གྲོས་ནས་རྟེན་བཅས་གསུང་བསྐུལ་བཞིན་བླ་མ་འཇམ་དཔལ་དབྱངས་ཀྱི་ཞབས་སེན་ཚངས་གནས་སུ་མཆོད་པའི་སྔགས་མིང་འཇམ་དཔལ་དགའ་བའི་བཤེས་གཉེན་གྱིས་བྲིས་ཏེ་གསོལ་སྨོན་དུ་བགྱིས་པ་སིདྡྷི་བི་ཛ་ཡནྟུ།།
	/ces pa'ang lhag pa'i lha mchog 'di nyid kyi rnal 'byor la gzhol ba'i rtogs ldan phrin las blo gros nas rten bcas gsung bskul bzhin bla ma 'jam dpal dbyangs kyi zhabs sen tshangs gnas su mchod pa'i sngags ming 'jam dpal dga' ba'i bshes gnyen gyis bris te gsol smon du bgyis pa sid+d+hi bi dza yan+tu//

Tibetan Text

Wylie

[edit]

༄༅། འཇམ་དཔལ་ཁྲོ་ཆུ་དུག་གདོང་ནག་པོའི་ཡུམ་ཆེན་དུག་གི་ཐིག་ལེར་གསོལ་སྨོན་རྡོ་རྗེ་དབྱངས་ཀྱི་རོལ་མོ་བཞུགས་སོ།། དྲི་མེད་ཆོས་དབྱིངས་ཤེས་རབ་ཕ་རོལ་ཕྱིན། །ཟབ་མོ་བརྒྱད་ལྡན་འཕགས་བཞི་འབྱུང་བའི་གནས། །རྣམ་ཐར་སྒོ་གསུམ་བདག་ཉིད་དབྱིངས་ཀྱི་ཡུམ། །ཁྲོ་རྒྱལ་དགྱེས་བསྐྱེད་དུག་གི་ཐིག་ལེར་གྲགས། །ཟག་མེད་མཆོག་གི་ཡོན་ཏན་འབྱུང་བའི་མཁྃའ། །འཁོར་འདས་སྒྱུ་འཕྲུལ་རྡོ་རྗེ་བཀོད་པའི་ཀློངྃ༌། །དངོས་མཚན་ཡིད་ཀྱི་ཡུལ་ལས་འདས་པའི་དབྱིངྃས། །ཆོས་ཀུན་བྱེད་པོ་མ་གཅིག་ཁྱོད་ལས་སུ། །མཐའ་བྲལ་དབུ་མ་ཆེན་པོའི་དེ་ཁོ་ནར། །ཆོས་ཀུན་ཨེ་ཝཾ་ཕྱག་རྒྱས་སྡོམ་པའི་མ། །ཀ་དག་རྣམ་པ་ཀུན་གྱི་མཆོག་ལྡན་པའི། །རྡོ་རྗེ་བཙུན་མོ་བདེ་ཆེན་དགྱེས་མར་བསྟོད། །ཟག་བཅས་ཟག་མེད་བདེ་བའི་འབྱུང་གནས་ནི། །མ་གཅིག་ཁྱོད་ལས་བྱུང་ཀྱང་ཁྱོད་ཀྱི་དབྱིངས། །སྲེད་ལེན་ལས་འདས་ཆགས་མེད་ནམ་མཁའི་དབུས། །རབ་ཏུ་ཞི་བའི་དབྱིངས་ལ་གཅིག་ཏུ་སིམ། །རྣམྃ་རོལྃ་སྣང་སྲིད་འཁོར་འདས་ཀུན་ཁྱབ་པའི། །རྣམ་པ་ཐམས་ཅད་བདག་ཉིད་ཤར་ན་ཡང༌། །རྣམ་མེད་ཆོས་དབྱིངས་ཆེན་པོའི་རང་བཞིན་ལས། །རྣམ་པ་ཀུན་ཏུ་མ་འདས་མཆོག་ཏུ་གྲུབ། །ངོྃ་བོྃ་ཟག་མེད་མཆོག་གི་བདེ་ཆེན་དཔྱིད། །འཕེལ་འགྲིབ་མེད་པའི་ཡེ་ཤེས་རོས་མྱོས་པས། །ཁྱོད་ནི་སྲིད་པའི་ཟུག་རྔུ་ཀུན་ཞི་བའི། །ལང་ཚོའི་རོལ་སྒེག་ནམ་ཡང་ཉམས་པ་མེད། །ཐུགས་རྗེའི་རོལ་རྩལ་ཤེས་རབ་དབྱིངས་ཀྱི་མཆོག །རྣོ་དང་མྱུར་དང་ཆོས་ཀུན་སྐྱེད་སྡུད་ཀྱི། །བྱེད་པོར་གྱུར་པས་རབ་འབྱམས་དངོས་གྲུབ་སྒོ། །ཐོགས་མེད་སྩོལ་བའི་ཕྲིནྃ་ལསྃ་རྩྃ་བྃར་གྲགས། །དཔལ་ཀུན་འབྱུང་གནས་མ་གཅིག་ཁྱོད་ཉིད་ལ། །བུ་ཡིས་འཕྲེང་བཞིན་དད་དང་མོས་པ་ཡིས། །ཇི་ལྟར་བསྐུལ་བཞིན་ཐུགས་བརྩེས་ཉེར་དགོངས་ལ། །དངོས་གྲུབ་དགའ་སྟོན་མཐའ་དག་བསྩལ་དུ་གསོལ། །སྣང་བ་ཐམས་ཅད་རིགས་ཀྱི་ཡུམ་ཆེན་ལྔ། སྲིད་པ་སྟོང་ཆེན་དབྱིངས་ཀྱི་ཌཱ་ཀིའི་སྲོག །བདེ་ཆེན་དགྱེས་མའི་གར་གྱིས་འགྲོ་བ་ཀུན། །རྣམ་གྲོལ་མཆོག་གི་གོ་སར་དབུགས་དབྱུང་སྩོལ། །རྡོ་རྗེ་བཞིའི་དབྱིངས་དབང་གིས་རྒྱུད་བཞི་སྨིན། །བསྐྱེད་རྫོགས་ལམ་གྱིས་རིག་འཛིན་ས་ལ་སྦྱོར། །ཟུང་འཇུག་རྡོ་རྗེའི་གྲོང་ཁྱེར་རྩེན་ནུས་པའི། །ཧེ་རུ་ཀ་དཔལ་རིགས་སུ་སྦྱོར་བར་མཛོད། །རྣམ་དཀར་དད་བརྩོན་ཤེས་རབ་གཟུངས་སྤོབས་རྒྱས། །ངེས་འབྱུང་སྙིང་རྗེས་ཐེག་མཆོག་ལམ་རྩ་བརྟན། །གཞན་ཕན་སྤྱོད་ལས་ནམ་ཡང་མི་འདའ་བའི། །འཇམ་དཔལ་རྡོ་རྗེའི་རྣམ་ཐར་གྲུབ་པར་མཛོད། །ཁྱད་པར་མཉམ་ཉིད་ལྟ་བའི་རྫོངྃ་ཟིན་ཏེ། །ཡིད་བྱེད་བྱིངས་རྒོད་འཕྲངྃ་ལས་བརྒལ་ནས་ཀྱང༌། །ཐབས་མཁས་སྙིང་རྗེས་ལམ་གྱི་སྲོགྃ་ཟིན་པས། །གདུལ་དཀའ་འདུལ་བའི་ནུས་མཐུའི་རྩལ་རྫོགས་ཤོག །ཡེ་ཤེས་རྡོ་རྗེའི་དབང་བསྐུར་ཅོད་པན་འཆང༌། །དུགྃ་ལྔའི་སྣང་སྤྱོད་བདེ་ཆེན་འབར་བའི་གདོངྃ༌། །ཁྲག་འཐུང་རྗེ་བཙན་དུས་དགྲའི་དབང་པོར་ཤར། །མི་བསྲུན་རྡོ་རྗེའི་མཚོན་གྱིས་འཇོམས་བྱེད་ཤོག །མདོར་ན་འདི་ནས་བྱང་ཆུབ་སྙིང་པོའི་བར། །གཉིས་མེད་ཡེ་ཤེས་ཚུལ་འཆང་མཉྫུ་ཤྲཱི། །སྟངས་དཔྱལ་དགྱེས་པས་རྟག་ཏུ་སྐྱོང་བ་ཡིས། །དོན་གཉིས་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་པའང་ལྷག་པའི་ལྷ་མཆོག་འདི་ཉིད་ཀྱི་རྣལ་འབྱོར་ལ་གཞོལ་བའི་རྟོགས་ལྡན་ཕྲིན་ལས་བློ་གྲོས་ནས་རྟེན་བཅས་གསུང་བསྐུལ་བཞིན་བླ་མ་འཇམ་དཔལ་དབྱངས་ཀྱི་ཞབས་སེན་ཚངས་གནས་སུ་མཆོད་པའི་སྔགས་མིང་འཇམ་དཔལ་དགའ་བའི་བཤེས་གཉེན་གྱིས་བྲིས་ཏེ་གསོལ་སྨོན་དུ་བགྱིས་པ་སིདྡྷི་བི་ཛ་ཡནྟུ།། །།

[edit]

@#/_'jam dpal khro chu dug gdong nag po'i yum chen dug gi thig ler gsol smon rdo rje dbyangs kyi rol mo bzhugs so/

@#/_dri med chos dbyings shes rab pha rol phyin/_/zab mo brgyad ldan 'phags bzhi 'byung ba'i gnas/_/rnam thar sgo gsum bdag nyid dbyings kyi yum/_/khro rgyal dgyes bskyed dug gi thig ler grags/_/zag med mchog gi yon tan 'byung ba'i mkha~M'/_/'khor 'das sgyu 'phrul rdo rje bkod pa'i klonga~M*/_/dngos mtshan yid kyi yul las 'das pa'i dbyinga~Ms/_/chos kun byed po ma gcig khyod las su/_/mtha' bral dbu ma chen po'i de kho nar/_/chos kun e waM phyag rgyas sdom pa'i ma/_/ka dag rnam pa kun gyi mchog ldan pa'i/_/rdo rje btsun mo bde chen dgyes mar bstod/_/zag bcas zag med bde ba'i 'byung gnas ni/_/ma gcig khyod las byung kyang khyod kyi dbyings/_/sred len las 'das chags med nam mkha'i dbus/_/rab tu zhi ba'i dbyings la gcig tu sim/_/rnama~M rola~M snang srid 'khor 'das kun khyab pa'i/_/rnam pa thams cad bdag nyid shar na yang*/_/rnam med chos dbyings chen po'i rang bzhin las/_/rnam pa kun tu ma 'das mchog tu grub/_/ngo~M bo~M zag med mchog gi bde chen dpyid/_/'phel 'grib med pa'i ye shes ros myos pas/_/khyod ni srid pa'i zug rngu kun zhi ba'i/_/lang tsho'i rol sgeg nam yang nyams pa med/_/thugs rje'i rol rtsal shes rab dbyings kyi mchog_/rno dang myur dang chos kun skyed sdud kyi/_/byed por gyur pas rab 'byams dngos grub sgo/_/thogs med stsol ba'i phrina~M lasa~M rtsa~M ba~Mr grags/_/dpal kun 'byung gnas ma gcig khyod nyid la/_/bu yis 'phreng bzhin dad dang mos pa yis/_/ji ltar bskul bzhin thugs brtses nyer dgongs la/_/dngos grub dga' ston mtha' dag bstsal du gsol/_/snang ba thams cad rigs kyi yum chen lnga/_srid pa stong chen dbyings kyi DA ki'i srog_/bde chen dgyes ma'i gar gyis 'gro ba kun/_/rnam grol mchog gi go sar dbugs dbyung stsol/_/rdo rje bzhi'i dbyings dbang gis rgyud bzhi smin/_/bskyed rdzogs lam gyis rig 'dzin sa la sbyor/_/zung 'jug rdo rje'i grong khyer rtsen nus pa'i/_/he ru ka dpal rigs su sbyor bar mdzod/_/rnam dkar dad brtson shes rab gzungs spobs rgyas/_/nges 'byung snying rjes theg mchog lam rtsa brtan/_/gzhan phan spyod las nam yang mi 'da' ba'i/_/'jam dpal rdo rje'i rnam thar grub par mdzod/_/khyad par mnyam nyid lta ba'i rdzonga~M zin te/_/yid byed byings rgod 'phranga~M las brgal nas kyang*/_/thabs mkhas snying rjes lam gyi sroga~M zin pas/_/gdul dka' 'dul ba'i nus mthu'i rtsal rdzogs shog_/ye shes rdo rje'i dbang bskur cod pan 'chang*/_/duga~M lnga'i snang spyod bde chen 'bar ba'i gdonga~M*/_/khrag 'thung rje btsan dus dgra'i dbang por shar/_/mi bsrun rdo rje'i mtshon gyis 'joms byed shog_/mdor na 'di nas byang chub snying po'i bar/_/gnyis med ye shes tshul 'chang many+dzu shrI/_/stangs dpyal dgyes pas rtag tu skyong ba yis/_/don gnyis lhun gyis grub pa'i bkra shis shog_/ces pa'ang lhag pa'i lha mchog 'di nyid kyi rnal 'byor la gzhol ba'i rtogs ldan phrin las blo gros nas rten bcas gsung bskul bzhin bla ma 'jam dpal dbyangs kyi zhabs sen tshangs gnas su mchod pa'i sngags ming 'jam dpal dga' ba'i bshes gnyen gyis bris te gsol smon du bgyis pa sid+d+hi bi dza yan+tu//_//