JKW-KABUM-13-PA-009

🚧 This website is under continued development. We appreciate your patience!

Previous Section Back to Volume PageNext Section

Wylie title	tshe dpag med rigs lnga 'chi med mchog sbyin gyi sgrub thabs dbang chog dang bcas pa 'chi med grub pa'i zhal lung
Location	mkhyen brtse'i bka' 'bum Volume 13, sde tshan 9, Pages 95-128 (Folios 1a to 16b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	ངག་དབང་བློ་བཟང་རྒྱ་མཚོ་ (Dalai Lama, 5th)
Citation	'jam dbyangs mkhyen brtse'i dbang po. tshe dpag med rigs lnga 'chi med mchog sbyin gyi sgrub thabs dbang chog dang bcas pa 'chi med grub pa'i zhal lung. In 'jam dbyangs mkhyen brtse'i dbang po'i bka' 'bum, Vol. 13: 95-128. Khams sde dge rdzong sar dgon: Rdzong sar blo gros phun tshogs, 2020.
Genre	Longevity Rituals - tshe sgrub  ·  Sadhanas - Evocation Ritual - sgrub thabs  ·  Empowerment Ritual - dbang chog - dbang skur
Cycle	ཚེ་དཔག་མེད་རིགས་ལྔ་འཆི་མེད་མཆོག་སྦྱིན་ (tshe dpag med rigs lnga 'chi med mchog sbyin)
Parent Cycle	དག་སྣང་རྒྱ་ཅན་ (dag snang rgya can)
Deity	tshe dpag med
Colophon	།ཚེ་དཔག་མེད་འཆི་མེད་དཔལ་སྟེར་དང་འབྲེལ་བའི་རིགས་ལྔ་འཆི་མེད་མཆོག་སྦྱིན་གྱི་སྒྲུབ་ཐབས་དབང་ཆོག་དང་བཅས་པ་འདིའང་རིག་འཛིན་གྱི་བཙུན་པ་མཉྫུ་གྷོ་ཥས་སྦྱར་བའོ།། །།སརྦ་དཱ་མངྒ་ལཾ་བྷ་བ་ཏུ།།
	tshe dpag med 'chi med dpal ster dang 'brel ba'i rigs lnga 'chi med mchog sbyin gyi sgrub thabs dbang chog dang bcas pa 'di'ang rig 'dzin gyi btsun pa many+dzu g+ho Shas sbyar ba'o//__//sarba dA mang+ga laM b+ha ba tu/

1 Texts in this Section (sde tshan or chos tshan)

95-128	ཚེ་དཔག་མེད་རིགས་ལྔ་འཆི་མེད་མཆོག་སྦྱིན་གྱི་སྒྲུབ་ཐབས་དབང་ཆོག་དང་བཅས་པ་འཆི་མེད་གྲུབ་པའི་ཞལ་ལུང་། tshe dpag med rigs lnga 'chi med mchog sbyin gyi sgrub thabs dbang chog dang bcas pa 'chi med grub pa'i zhal lung Longevity Rituals - tshe sgrub   ·   Sadhanas - Evocation Ritual - sgrub thabs   ·   Empowerment Ritual - dbang chog - dbang skur	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །ཨམཱ ར སིདྡྷ སྱཱ ག མ ནཱ མཱ པ རི མི ཏཱ ཡུཿ པཉྩ ཀུ ལཱ མྲྀ ཏ པ རཱ མ དཱན སྱ ས སཱ དྷ ཀཱ བྷི ཥིཉྩ བི དྷྱ སྟི། །

༄༅། །ཚེ་དཔག་མེད་རིགས་ལྔ་འཆི་མེད་མཆོག་སྦྱིན་གྱི་སྒྲུབ་ཐབས་དབང་ཆོག་དང་བཅས་པ་འཆི་མེད་གྲུབ་པའི་ཞལ་ལུང་ཞེས་བྱ་བ་བཞུགས་སོ།

།ཨོཾ་སྭ་སྟི། བླ་མ་སྐུ་གསུམ་ཚེ་ལྷ་དང་། །དབྱེར་མེད་གྲུབ་དབང་ཐང་སྟོང་བར། །བཏུད་ནས་རྡོ་རྗེའི་སྲོག་སྒྲུབ་ཕྱིར། །འཆི་མེད་གྲུབ་པའི་ཞལ་ལུང་དབྱེ། །འདི་ལ་གསུམ། སྦྱོར་བ་ཡོ་བྱད་ཀྱི་བཤོམ། དངོས་གཞི་སྒྲུབ་པའི་ཐབས། སྨིན་བྱེད་དབང་གི་ཆོ་གའོ། །དང་པོ་ནི། གནས་དབེན་པར་རྡུལ་ཚོན་ནམ་རས་བྲིས་ཀྱི་དཀྱིལ་འཁོར་འདུ་བྱ་བའམ། མ་གྲུབ་ན་ལྷ་གྲངས་དང་མཉམ་པའི་ཚོམ་བུ་ཙམ་ལ་བརྟེན་པས་རུང་ཞིང་གང་ལྟར་ཡང་ཕྱི་ནང་གི་མཆོད་པ་དང་། ཚོགས་ཀྱི་ཡོ་བྱད་སོགས་བཀོད་པས་མཛེས་པར་བཤམ་མོ། །གཉིས་པ་དངོས་གཞི་སྒྲུབ་པའི་ཐབས་ལའང་གསུམ་ལས། དང་པོ་སྔོན་འགྲོ་ལའང་། ཐོག་མར་སྐྱབས་ཡུལ་རྣམས་མདུན་གྱི་ནམ་མཁར་མངོན་སུམ་ལྟ་བུར་བཞུགས་པར་མོས་ཏེ་སྐྱབས་སུ་འགྲོ་བ་ནི། བདག་སོགས་མཁའ་མཉམ་སེམས་ཅན་མ་ལུས་པ། །རྩ་བ་གསུམ་གྱི་དཀྱིལ་འཁོར་ལྷ་ཚོགས་ལ། །རང་རིག་དཔལ་ལྡན་རྡོ་རྗེ་སེམས་དཔའི་ཞལ། །རང་ངོ་མ་འཕྲོད་དེ་སྲིད་སྐྱབས་སུ་མཆི། །སེམས་བསྐྱེད་པ་ནི། རང་ལ་གདོད་ནས་ཡོད་པའི་རྫོགས་སངས་རྒྱས། །ཅེར་མཐོང་ངོ་སྤྲད་འགྲོ་ཀུན་གྲོལ་བའི་ཆེད། །བདག་གིས་བླ་ན་མེད་པའི་རྣལ་འབྱོར་མཆོག །ཉམས་བླངས་གཞན་དོན་བྱེད་པར་སེམས་བསྐྱེད་དོ། །ཚོགས་བསག་པ་ནི། བླ་མ་ཡི་དམ་མཁའ་འགྲོ་གཤེགས། །ཉི་ཟླ་པདྨའི་གདན་ལ་བཞུགས། །ལུས་ངག་ཡིད་གསུམ་གུས་ཕྱག་འཚལ། །ཕྱི་ནང་གསང་བའི་མཆོད་པ་འབུལ། །ཉམས་ཆག་སྡིག་སྒྲིབ་ཐམས་ཅད་བཤགས། །གསང་སྔགས་བསྒྲུབས་ལ་རྗེས་ཡི་རངས། །སྨིན་གྲོལ་གསང་སྔགས་ཆོས་འཁོར་བསྐོར། །མྱ་ངན་མི་འདའ་གསོལ་བ་འདེབས། །སྙིང་པོ་སེམས་ཅན་དོན་དུ་བསྔོ། །ཡང་དག་རྡོ་རྗེའི་དོན་རྟོགས་ཤོག །བགེགས་བསྐྲད་ནི། ཧྲཱིཿ རང་སེམས་སྐད་ཅིག་ཧྲཱིཿཡིག་ཡོངས་གྱུར་ལས། །ཁྲོ་རྒྱལ་རྟ་མགྲིན་ཞལ་གཅིག་ཕྱག་གཉིས་པ། །བེ་ཅོན་སྡིགས་མཛུབ་རྩེ་ལས་མེ་དཔུང་འབར། །དུར་ཁྲོད་ཆས་རྫོགས་རྟ་སྐད་ཕྱོགས་བཅུར་སྒྲོགས། །ཨོཾ་བཛྲ་ཀྲོ་དྷ་ཧ་ཡ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ། གཏོར་མ། རྃ་ཡྃ་ཁྃ་གིས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་བྷཱུྃ་ལས་རིན་པོ་ཆེའི་སྣོད་ཟབ་ཅིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། ལན་གསུམ་གྱིས་བརླབ། ཨོཾ་སརྦ་བིགྷྣཱན་ན་མ་སརྦ་ཏ་ཐཱ་ག་ཏེ་བྷྱོ་བི་ཤྭ་སོགས་ལན་གསུམ་གྱིས་བསྔོས་ལ། ཧཱུྃ། ཡང་དག་གསང་བའི་དཀྱིལ་འཁོར་འདིར། །འདུ་བའི་ལྷ་རྣམས་མ་གཏོགས་པ། །མི་དང་མི་མིན་འབྱུང་པོའི་ཚོགས། །འདི་རུ་མ་འདུག་གཞན་དུ་དེངས། །ཅི་སྟེ་མི་འགྲོ་འདུག་གྱུར་ན། །རྟ་མཆོག་རྒྱལ་པོས་རྡུལ་དུ་རློག །ཨོཾ་བཛྲ་ཀྲོ་དྷ་ཧ་ཡ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ། གནོད་བྱེད་འབྱུང་པོ་ཨུ་ཙ་ཏ་ཡ་ཕཊ། སྲུང་འཁོར་ནི། ཧཱུྃ། དབང་གི་རྟ་སྐད་རབ་འཚེར་ཞིང་། །འཁོར་ལོ་རྡོ་རྗེ་མེ་དཔུང་གིས། །སྟེང་འོག་ཕྱོགས་མཚམས་མེད་གཏམས་པའི། །སྲུང་བའི་གུར་ཁང་ཆེན་པོར་གྱུར། །ཨོཾ་བཛྲ་ཙཀྲ་ཛྭ་ལ་རཾ་རཾ་ཧཱུྃ་བྷྲཱུྃ་ཧཱུྃ། བརྡ་སྐོང་བྱེ་བ་ནི། བྷྲཱུྃ་པྲ་བེ་ཤ་ཡ་ཕཊ། བརྡ་ཕྱག་འཚལ་བ་ནི། ཨ་ལ་ལ་ཧོ་ན་མ། །དམ་བཅའ་བ་ནི། ཨོཾ་བཛྲ་ས་མ་ཡ་སྟཾ། བྱིན་འབེབས་པ་ནི། ཧྲཱིཿ ཆོས་དབྱིངས་རྣམ་དག་དཀྱིལ་འཁོར་ནས། །རང་བྱུང་ཚེ་ཡི་ལྷ་ཚོགས་རྣམས། །འགྲོ་བའི་དོན་དུ་སྐུར་བཞེངས་ལ། །དབང་སྐུར་བྱིན་ཕོབ་དངོས་གྲུབ་སྩོལ། །ཨོཾ་ཨ་པ་རི་མི་ཏ་ཨཱ་ཡུརྫྙཱ་ན་བཛྲ་ས་མ་ཡ་ཨཱ་བེ་ཤ་ཡ་ཨ་ཨཱཿ མཆོད་རྫས་བྱིན་གྱིས་བརླབ་པ་ནི། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། རཾ་ཡཾ་ཁཾ། ཧྲཱིཿ འཆི་མེད་རིག་འཛིན་དཀྱིལ་འཁོར་སྒྲུབ་པའི་རྫས། །ཕྱི་ནང་གསང་བའི་རང་བྱུང་མཆོད་པ་རྣམས། །མ་དག་ལོག་འཁྲུལ་ཉེས་པའི་ཚོགས་རྣམས་ཀུན། །ཡེ་ཤེས་འབྲུ་གསུམ་སྦྱངས་ཤིང་བྱིན་གྱིས་བརླབས། །ཨོཾ་ཨཱཿཧཱུྃ། །ཨོཾ་བཛྲ་པུཥྤེ། དྷཱུ་པེ། ཨཱ་ལོ་ཀེ གནྡྷེ། ནཻ་ཝི་དྱ། ཤཔྡ་པཱུ་ཛ་ཧོཿ ཨོཾ་ཨཱཿཧཱུྃ་མཧཱ་པཉྩ་པཱུ་ཛ་ཧོཿ ཨོཾ་ཨཱཿཧཱུྃ་བོ་དྷི་ཙིཏྟ་ག་ཎ་གུ་ཧྱ་མ་ཧཱ་པཱུ་ཛ་ཧོཿ ཨོཾ་ཨཱཿཧཱུྃ་མ་ཧཱ་སརྦ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཧཱུྃ་ཧྲཱིཋཱཿ གཉིས་པ་དངོས་གཞི་ལ། ཏིང་ངེ་འཛིན་གསུམ་གྱིས་ཁོག་ཕུབ་ནས་རྟེན་དང་བརྟེན་པའི་དཀྱིལ་འཁོར་བསྐྱེད་པ་ནི། ཨོཾ། སྟོང་ཉིད་སྙིང་རྗེ་དབྱེར་མེད་རང་རིག་ཨཾ། །དེ་ལས་འོད་ཟེར་ཐིག་འཕྲོས་འབྱུང་ལྔའི་སྟེང་། །བྷྲཱུྃ་ལས་བདེ་ཆེན་ལྷུན་གྲུབ་གཞལ་ཡས་ཁང་། །གྲུ་བཞི་སྒོ་བཞི་རྟ་བབས་བཞི་དང་ལྡན། །རྩིག་པ་ལྔ་ལྡན་ཕ་གུ་པ་དྲར་བཅས། །དྲ་ཕྱེད་ཤར་བུ་མདའ་ཡབ་ཕིབས་ཏོག་མཛེས། །རྡོ་རྗེའི་རྭ་གུར་ཡེ་ཤེས་མེ་འོད་འཕྲོ། །ཕྱི་རོལ་དུར་ཁྲོད་བརྒྱད་ཀྱིས་ཡོངས་སུ་བསྐོར། །དེ་དབུས་པད་འདབ་བཞི་ཡི་ལྟེ་བ་དང་། །འདབ་མར་ཟླ་བའི་དཀྱིལ་འཁོར་ཉ་གང་སྟེང་། །དབུས་སུ་རྨ་བྱ་ཤར་ནས་གཡས་སྐོར་དུ། །གླང་ཆེན་ཤང་ཤང་སེངྒེ་མཁའ་ལྡིང་གིས། །བཏེགས་པའི་རིན་ཆེན་ཁྲི་སྟེང་པད་ཉི་ཟླའི། །དབུས་མའི་གདན་སྟེང་རྒྱུ་ཡི་ཨྃ་དམར་པོ། །ཡོངས་གྱུར་སྣང་བ་མཐའ་ཡས་ཚེ་དཔག་མེད། །ཞལ་གཅིག་ཕྱག་གཉིས་ལོངས་སྤྱོད་རྫོགས་པའི་སྐུ། །གཡས་པ་པདྨ་གཡོན་པ་ཚེ་བུམ་བསྣམས། །ཡུམ་ཆེན་གོས་དཀར་ཚེ་མདའ་བུམ་འཛིན་འཁྱུད། །ཡབ་ཡུམ་སྙོམས་པར་ཞུགས་པའི་སྦྱོར་མཚམས་ནས། །བྷྲཱུྃ་སྭཱ་ཧཱུྃ་ཧཱ་ཕྱོགས་བཞིར་བབས་པ་ལས། །སྣང་མཛད་ཚེ་དཔག་དཀར་པོ་གཡས་འཁོར་ལོ། །རིན་འབྱུང་ཚེ་དཔག་སེར་པོ་གཡས་རིན་ཆེན། །མི་བསྐྱོད་ཚེ་དཔག་སྔོན་པོ་གཡས་རྡོ་རྗེ། །དོན་གྲུབ་ཚེ་དཔག་ལྗང་གུ་གཡས་རྒྱ་གྲམ། །བཞི་ཀའང་གཡོན་པ་ཚེ་ཡི་བུམ་པ་འཛིན། །སྤྱན་མ་རིན་ཆེན་སྒྲོལ་མ་མཱ་མ་ཀཱི། །དམ་ཚིག་སྒྲོལ་མ་དཀར་སེར་སྔོ་ལྗང་ཅན། །ཚེ་མདའ་བུམ་པ་འཛིན་པས་ཡབ་ལ་འཁྱུད། །ཡབ་རྣམས་མཐོན་མཐིང་ཐོར་ཚུགས་ཡུམ་རྣམས་གྲོལ། །བཞིན་འཛུམ་ཆགས་དང་རྒྱས་པའི་ཉམས་ཀྱིས་མཛེས། །རིན་ཆེན་རྒྱན་སྤྲས་དར་གྱི་ན་བཟའ་གསོལ། །ཡབ་རྣམས་རྡོར་སྐྱིལ་ཡུམ་རྣམས་པད་སྐྱིལ་བཞུགས། །སྒོ་བཞིར་ཛཿཧཱུྃ་བྃ་ཧོཿསྒོ་མ་བཞི། །དཀར་སེར་དམར་ལྗང་གཡས་པ་ཚེ་མདའ་གཡོབ། །གཡོན་པ་ལྕགས་ཀྱུ་ཞགས་པ་ལྕགས་སྒྲོག་དྲིལ། །དར་དང་རིན་ཆེན་རྒྱན་ལྡན་གར་གྱིས་བཞེངས། །སྤྱན་འདྲེན་ནི། ཧྲཱིཿ སྔོན་གྱི་བསྐལ་པའི་ཐོག་མ་ལ། །འགྲོ་དྲུག་སྡུག་བསྔལ་ཐུགས་རྗེས་གཟིགས། །སྨོན་ལམ་སྟོབས་བསྐྱེད་འགྲོ་དོན་མཛད། །བཅོམ་ལྡན་མགོན་པོ་ཚེ་དཔག་མེད། །གནས་མཆོག་འདི་རུ་གཤེགས་སུ་གསོལ། །སེམས་ཅན་འཛིན་པས་བཅིངས་པ་རྣམས། །ལམ་གྱི་བར་ཆད་སེལ་བའི་ཕྱིར། །འགུགས་འདྲེན་འཆིངས་སྡོམ་དགྱེས་མཛད་མ། །སྒོ་སྲུང་ལྷ་མོ་ཆེན་མོ་བཞི། །གནས་འདིར་སྤྱན་འདྲེན་གཤེགས་སུ་གསོལ། །ཨོཾ་ཨ་པ་རི་མི་ཏ་ཨཱ་ཡུརྫྙཱ་ན་ས་མ་ཡ་ཛཿཛཿ བཞུགས་སུ་གསོལ་བ་ནི། ཧྲཱིཿ ཆོས་དབྱིངས་ལྷུན་གྲུབ་བདེ་ཆེན་གཞལ་ཡས་འདིར། །དབྱིངས་ཀྱི་ཐིག་ལེ་འོད་ཕུང་འཁྱིལ་བའི་དབུས། །རིག་པ་རང་ཤར་ཚེ་དཔག་མེད་མགོན་སྐུ། །མཉམ་ཉིད་དོན་གྱི་དབྱིངས་སུ་བརྟན་པར་བཞུགས། །ཨོཾ་བཛྲ་ས་མ་ཡ་ཏིཥྛནྟུ། ཕྱག་འཚལ་བ་ནི། ཧྲཱིཿ བཅོམ་ལྡན་ཚེ་དཔག་མེད་མགོན་ལྷ་ཚོགས་ལ། །སྣང་སྟོང་སྐྱེ་འགགས་མེད་པའི་དབྱིངས་ཉིད་དུ། །བཟང་ངན་གཉིས་འཛིན་ཡེ་ནས་བྲལ་བ་ཡི། །མཉམ་ཉིད་དོན་གྱི་ངང་དུ་ཕྱག་འཚལ་ལོ། །ན་མོ་པུ་རུ་ཤ་ཡ་ཧོཿ མཆོད་པ་འབུལ་བ་ནི། ཧྲཱིཿ རིག་མདངས་ཚེ་ཡི་ལྷ་ཚོགས་ལ། །མཆོད་པའི་བྱེ་བྲག་འབུལ་བ་ནི། །མེ་ཏོག་བདུག་སྤོས་མར་མེ་དྲི། །ཞལ་ཟས་སྒྲ་སྙན་ལྷ་མོ་རྣམས། །སོ་སོའི་ཁ་དོག་ཕྱག་རྒྱ་སྒྱུར། །རབ་འབྱམས་ནམ་མཁའི་ཁམས་བཀང་ནས། །རྒྱལ་བའི་དཀྱིལ་འཁོར་མཆོད་པར་བྱ། །ཨོཾ་ཨཱཿཧཱུྃ་བཛྲ་པུཥྤེ་ནས་ཤཔྡ་པཱུ་ཛ་ཧོཿ ཧྲཱིཿ རིག་མདངས་ཚེ་ཡི་ལྷ་ཚོགས་ལ། །རང་བྱུང་བདུད་རྩི་རྣམ་ལྔ་དང་། །ཤ་ལྔ་དམ་ཚིག་མཆོག་གི་རྫས། །ནང་གི་བདག་ཉིད་དག་པར་བཞེས། །མ་ཧཱ་ཨ་མྲྀ་ཏ་མཾ་ས་པཉྩ་པཱུ་ཛ་ཧོཿ ཧྲཱིཿ ཚེ་དཔག་མེད་མགོན་ལྷ་ཚོགས་ལ། །སྣང་སྟོང་བདེ་ཆེན་ཡབ་ཡུམ་མཁར། །དགའ་བཞི་ཡེ་ཤེས་ཐིག་ལེར་འཁྱིལ། །ཟུང་འཇུག་བདེ་ཆེན་མཆོད་པར་བཞེས། །ཨོཾ་བོ་དྷི་ཙིཏྟ་པཱུ་ཛ་ཧོཿ ཧྲཱིཿ ཚེ་དཔག་མེད་མགོན་ལྷ་ཚོགས་ལ། །རྩ་བརྒྱད་བདུད་རྩིའི་མཆོད་པ་དང་། །བདེ་ཆེན་རཀྟའི་མཆོད་པ་དང་། །དམ་རྫས་གཏོར་མའི་མཆོད་པ་རྣམས། །དོན་དམ་དབྱིངས་ཀྱི་མཆོད་པར་འབུལ། །མཐུན་འཇུག་མཆོག་གི་མཆོད་པར་བཞེས། །ཨོཾ་མ་ཧཱ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཁ་རཾ་ཁཱ་ཧི། །བསྟོད་པ་ནི། ཧྲཱིཿ དང་པོ་བྱང་ཆུབ་མཆོག་ཏུ་ཐུགས་བསྐྱེད་ནས། །སྨོན་ལམ་སྟོབས་ཀྱིས་འགྲོ་བའི་དོན་མཛད་པའི། །མཐོང་ཐོས་དྲན་པས་སྡུག་བསྔལ་ཀུན་ལས་གྲོལ། །རིགས་ལྔ་ཚེ་དཔག་མེད་ལ་ཕྱག་འཚལ་བསྟོད། །བྱམས་དང་སྙིང་རྗེ་དགའ་བ་བཏང་སྙོམས་ཀྱི། །ཚད་མེད་བཞི་ཡིས་འགྲོ་བའི་དོན་མཛད་པ། །སེམས་ཅན་ལས་དང་མཐུན་པའི་ལམ་སྣ་འདྲེན། །སྒོ་སྐྱོང་ལྷ་མོ་བཞི་ལ་ཕྱག་འཚལ་བསྟོད། །ཛབ་བཟླ་བ་ནི། ཧྲཱིཿ རང་བྱུང་རྣམ་དག་གཞལ་ཡས་འདིར། །བཅོམ་ལྡན་ཚེ་དཔག་མེད་མགོན་ལྷ། །སྣ་ཚོགས་སྐུ་དང་ཆ་ལུགས་ལ། །ཐུགས་སྲོག་ཛབ་ཀྱི་རང་སྒྲ་སྒྲོགས། །མི་འགྱུར་ཐུགས་ལས་འོད་ཟེར་འཕྲོས། །ཕར་འཕྲོས་སེམས་ཅན་དོན་རྣམས་རྫོགས། །ཚུར་འདུས་དངོས་གྲུབ་བཅུད་དུ་བསྡུ། །རྟག་མཐོང་བར་དུ་རྒྱུན་མི་བཅད། །ཨོཾ་ཨཱཿཧཱུྃ་ཧྲཱིཿཧྲཱིཿབཛྲ་གུ་རུ་པདྨ་སིདྡྷི་པུ་ཎྱེ་ཛྙཱ་ན་ཨཱ་ཡུར་སིདྡྷི་ཛཿ ཞེས་ཅི་ནུས་བཟླ། །གསུམ་པ་རྗེས་ཀྱི་རིམ་པ་ལ། ཚོགས་མཆོད་བྱ་བ་ནི། མངོན་པར་བཤམས་པའི་ཡོ་བྱད་རྣམས་ལ་བསང་ཆུ་འཐོར་ཞིང་། ཨོཾ་སརྦ་དྲ་བྱཾ་སཾ་ཤོ་དྷ་ནི་ཧཱུྃ་ཕཊ། རཾ་ཡཾ་ཁཾ། །ཚོགས་རྫས་ཀྱི་དངོས་འཛིན་ཐམས་ཅད་ཡེ་ཤེས་ཀྱི་མེ་རླུང་ཆུས་སྦྱངས་ཏེ་སྟོང་པའི་ངང་ལས་ཚོགས་གཞོང་བྷཉྫ་འབར་བར་ཚོགས་རྫས་ཡེ་ཤེས་ཀྱི་བདུད་རྩི་འདོད་ཡོན་གྱི་སྤྲིན་འཕྲོ་བར་གྱུར། ཨོཾ་ཨཱཿཧཱུྃ་ཧྲཱིཿ ལན་གསུམ་གྱིས་བརླབས་ཏེ། ཚོགས་ཞིང་སྤྱན་འདྲེན་པ་ནི། ཧྲཱིཿ རང་བཞིན་རྣམ་དག་གཞལ་ཡས་ནས། །བཅོམ་ལྡན་མགོན་པོ་ཚེ་དཔག་མེད། །རིགས་ལྔ་སྒོ་བ་བཞི་ཡི་ལྷ། །ཚོགས་ལ་སྤྱན་འདྲེན་གཤེགས་སུ་གསོལ། །ཕུད་ཆ་གསུམ་དུ་སྤྲོས་ཏེ་དང་པོ་མཆོད་པ་ནི། གཟུགས་སྒྲ་དྲི་རོ་རེག་བྱ་ཆོས། །ཀུན་ཏུ་བཟང་པོའི་མཆོད་པའི་སྤྲིན། །ནམ་མཁའ་མཛད་ཀྱི་སྒོ་ཕྱེས་ཏེ། །འབུལ་གྱིས་བཞེས་ལ་དངོས་གྲུབ་སྩོལ། །ཨོཾ་ཨ་པ་རི་མི་ཏ་ཨཱ་ཡུརྫྙཱ་ན་གྷ་ཎ་ཙ་ཀྲ་སརྦ་པཱུ་ཛ་ཁཱ་ཧིཿ བར་པ་བཤགས་པ་ནི། མ་རིག་ལས་དང་ཉོན་མོངས་ཀྱིས། །རྩ་བ་ཡན་ལག་དམ་ཚིག་གི །ནོངས་པར་གྱུར་པའི་ཉེས་པ་ཀུན། །གནོང་འགྱོད་སེམས་ཀྱིས་མཐོལ་ཞིང་བཤགས། །ཡི་གེ་བརྒྱ་བ་བརྗོད། ཐ་མ་བསྒྲལ་བ་ནི། ཨེ་ནྲྀ་ཏྲི་ཛཿ སྐུ་སྟོད་དབང་ཆེན་ཁྲོས་པའི་གཟུགས། །སྐུ་སྨད་གནམ་ལྕགས་ཕུར་བུའི་དབལ། །དགྲ་བགེགས་ལོག་འདྲེན་དམ་སྲི་ཡི། །སྙིང་ལ་བཏབ་བོ་མཱ་ར་ཡ། །ཤ་ཁྲག་རུས་པ་རྡུལ་དུ་རློག །ཨོཾ་བཛྲ་ཀྲོ་དྷ་ཧ་ཡ་གྲཱི་ཝ་གནོད་བྱེད་དགྲ་བགེགས་ཤ་ཏྲཱུན་མཱ་ར་ཡ་རྦད། ཅེས་བསྒྲལ། ཨོཾ་ཨ་པ་རི་མི་ཏ་ཨཱ་ཡུརྫྙཱ་ན་མ་ཧཱ་མཾ་ས་རཀྟ་ཀེཾ་ནི་རི་ཏི་ཁཱ་ཧི། ཞེས་འབུལ། དེ་ནས་རྣལ་འབྱོར་པ་རྣམས་ཀྱིས་ཚོགས་ཀྱི་དམ་རྫས་ནང་གི་སྦྱིན་སྲེག་གི་ཚུལ་དུ་ཚིམ་པར་རོལ་མཐར་སྨོན་ལམ་གདབ། ལྷག་མ་རྣམས་བསྡུས་ཏེ་གཙང་ལྷག་དང་བཅས་པ་བདུད་རྩིས་བྲན། ཨོཾ་ཨཱཿཧཱུྃ། ལྷག་མའི་དམ་ཚིག་འདོད་ཡོན་གྱི་ཕུང་པོ་ཟད་མི་ཤེས་པ་ནམ་མཁའ་གང་བར་གྱུར། ཅེས་པས་བྱིན་གྱིས་བརླབས་ཏེ་བསྔོ་བ་ནི། ཧྲཱིཿ ཚེ་དཔག་མེད་མགོན་བཀའ་འཁོར་ན། །དམ་པའི་ཆོས་ཀྱི་སྲུང་མ་ནི། །ལྷ་ཆེན་བརྒྱད་དང་ཀླུ་ཆེན་བརྒྱད། །གཟའ་ཆེན་བརྒྱད་དང་གནོད་སྦྱིན་བརྒྱད། །རྒྱལ་ཆེན་བཞི་དང་ཕྱོགས་སྐྱོང་བཅུ། །རྒྱུ་སྐར་ཉི་ཤུ་རྩ་བརྒྱད་དང་། །ཧ་རི་ཀ་དང་པཉྩི་ཀ །འཕྲོག་མ་མ་བུར་བཅས་པ་དང་། །དཔལ་ལྡན་མགོན་པོ་ལྕམ་དྲལ་དང་། །ལྷ་དང་ལྷ་མིན་མིའམ་ཅི། །དྲི་ཟ་གནོད་སྦྱིན་འབྱུང་པོ་དང་། །ལྷ་སྲིན་སྡེ་བརྒྱད་ཐམས་ཅད་ལ། །མཆོད་སྦྱིན་གཏོར་མ་འདི་བསྔོས་པས། །ཅི་འདོད་ཕུན་སུམ་ཚོགས་པར་ཤོག །ཇི་ལྟར་ནུས་པའི་ཕྲིན་ལས་མཛོད། །བ་ལིཾ་ཏ་པཱུ་ཛ་ཧོཿ བརྟན་མ་སྐྱོང་བ་ནི། ཧཱུྃ། ཨ་སུ་ར་ཡི་བྲག་ཕུག་ཏུ། །སློབ་དཔོན་པདྨ་འབྱུང་གནས་ཀྱི། །སྤྱན་སྔར་ཁས་བླངས་དམ་བཅས་པའི། །བོད་ཡུལ་བརྟན་མ་བཅུ་གཉིས་དང་། །ཕྱི་གཏོར་དབང་བར་ཁས་བླངས་རྣམས། །མཆོད་སྦྱིན་གཏོར་མ་འདི་ལོངས་ལ། །བདུད་དཔུང་ཐུལ་ལ་ཞིང་བཅུ་སྒྲོལ། །དལ་ཁ་ཆིངས་ལ་འབྲུ་ཕྱུགས་སྤེལ། །དམག་དཔུང་ཆོམས་ལ་མཚོན་ཆ་རྟུལ། །བཅོལ་བའི་དམ་ཚིག་དྲན་པར་མཛོད། །སྒྲུབ་པ་སོགས་ཀྱི་སྐབས་སུ་དངོས་གྲུབ་བླང་བ་ནི། ཧྲཱིཿ སྐྱེ་མེད་ཆོས་དབྱིངས་ཕོ་བྲང་ནས། །ཐུགས་རྗེ་འགགས་མེད་ཚེ་ཡི་ལྷ། །མཉམ་ཉིད་དབྱིངས་ནས་སྐུར་བཞེངས་ལ། །སྐུ་གསུམ་ཡོངས་རྫོགས་དངོས་གྲུབ་སྩོལ། །རྩ་སྔགས་མཐར་ཨོཾ་ཨཱཿཧཱུྃ་མ་ཧཱ་སིདྡྷི་ཧཱུྃ། གཏོང་རག་གི་མཆོད་པ་ཁ་གསོས་ལ། ཨོཾ་ཨ་པ་རི་མི་ཏ་ཨཱ་ཡུརྫྙཱ་ན་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །སོགས་ཀྱིས་བསྟོད། མ་རྙེད་ཡོངས་སུ་མ་ཚང་དང་། །སོགས་ཀྱི་མཐར་ཡི་གེ་བརྒྱ་པ་ལན་གསུམ་གྱིས་ནོངས་པ་བཤགས། རྟེན་ཡོད་ན་བརྟན་བཞུགས་དང་། མེད་ན་གཤེགས་གསོལ་བྱ་ཞིང་། བདག་ཉིད་དམ་ཚིག་པའི་འཁོར་ལོ་བསྡུ་བ་ནི། ཧྲཱིཿ སྣོད་བཅུད་མ་ལུས་གཞལ་ཡས་ཁང་ལ་ཐིམ། །དེ་ཉིད་འཁོར་དང་འཁོར་ཡང་གཙོ་ལ་ཐིམ། །གཙོ་བོ་མི་དམིགས་སྟོང་པའི་ངང་ཉིད་ལས། །སླར་ཡང་འཇའ་ཚོན་བཞིན་དུ་གསལ་བར་གྱུར། །སྨོན་ལམ་ནི། དགེ་བ་འདི་ཡིས་མཁའ་མཉམ་འགྲོ་ཀུན་གྱི། །སྒྲིབ་གཉིས་དེ་འབྲས་མ་ལུས་ཀུན་བྱང་ནས། །ཚེ་དཔག་མེད་མགོན་གོ་འཕང་མངོན་གྱུར་ཏེ། །རང་གཞན་དོན་གཉིས་མ་ལུས་འགྲུབ་པར་ཤོག །བཀྲ་ཤིས་ནི། །ཆོས་སྐུ་སྣང་མཐའ་ལོངས་སྐུ་ཚེ་དཔག་མེད། །སྤྲུལ་པའི་སྐུ་མཆོག་པད་འབྱུང་ཐང་སྟོང་པ། །སྐུ་གསུམ་དབྱེར་མེད་དཀྱིལ་འཁོར་ལྷ་ཚོགས་ཀྱི། །བཀྲ་ཤིས་ཕྱོགས་དུས་ཀུན་ཏུ་ཁྱབ་པར་ཤོག །ཅེས་སོགས་ཤིས་པ་བརྗོད་པའི་དབྱངས་སྙན་མངོན་པར་བསྒྲགས་ཤིང་མེ་ཏོག་གི་ཆར་སིལ་མས་ཕྱོགས་དུས་ཀུན་ཏུ་ཁྱབ་པར་བྱའོ། །གསུམ་པ་སྨིན་བྱེད་དབང་གི་ཆོ་ག་ལ། ཐོག་མར་སྦྱོར་བ་ཡོ་བྱད་བཤམ་པའི་སྐབས། དཀྱིལ་འཁོར་གྱི་དབུས་སུ་ལྡིང་ཁྲིའི་ཁར་རྣམ་བུམ་གྱི་མདུན་དུ་ལྷ་ཙཀ ཤར་དུ་དབུ་རྒྱན། ལྷོར་རྡོ་རྗེ། ནུབ་ཏུ་དྲིལ་བུ། བྱང་དུ་རྡོར་དྲིལ་བསྣོལ་མ། གཡས་གཡོན་དུ་གསང་རྫས་དང་རིག་ཙཀ །ཉེ་ལོགས་ཅི་བདེ་བར་མཎྜལ། མིག་དར། མེ་ཏོག །རྡོར་དྲིལ། །གླེགས་བམ། དུང་། སློབ་དཔོན་གྱི་མདུན་དུ་ལས་བུམ་སོགས་འོག་ཏུ་ཉེར་མཁོའི་རིགས་ཐམས་ཅད་འདུ་བྱས་ཏེ། དངོས་གཞི་སྒྲུབ་མཆོད་སྐྱབས་སེམས་ནས་བཟླས་པའི་བར་བདག་མདུན་དབྱེར་མེད་ཀྱི་ཚུལ་དུ་ལས་གཞུང་བསྲངས་ཏེ་བཟླས་པ་ཅི་རིགས་པ་བྱ། རྣམ་བུམ་ལ་དམིགས་བསལ་གྱི་བཟླས་པ་བྱེད་ན། གཟུངས་ཐག་ནས་འཇུས་ཏེ། བདག་སྲོག་སྔགས་ཀྱི་འོད་ཟེར་གཟུངས་ཐག་ལ། །འཁྲིལ་ཏེ་བུམ་པའི་ལྷ་ཚོགས་ཐུགས་རྒྱུད་བསྐུལ། །དེ་དག་སྐུ་ལས་བྱང་སེམས་བདུད་རྩིའི་རྒྱུན། །བབས་པས་བུམ་ཆུར་གཉིས་མེད་རོ་གཅིག་གྱུར། །ཅེས་པའི་དམིགས་གནད་དང་སྦྱར་ཏེ་བཟླས་པ་ཇི་ལྟར་རིགས་པ་དང་། ལས་བུམ་དུ་སྐད་ཅིག་གིས་ཁྲོ་བོ་རྟ་མགྲིན་དམར་ནག་ཞལ་གཅིག་ཕྱག་གཉིས་པ་གཡས་བེ་ཅོན་དང་གཡོན་པདྨ་འཛིན་པར་གསལ་བའི་སྐུ་ལས་རྡོ་རྗེ་བདུད་རྩིའི་རྒྱུན་དཔག་ཏུ་མེད་པ་བབས་པས་བུམ་པ་གང་བར་གྱུར། ཨོཾ་བཛྲ་ཀྲོ་དྷ་ཧ་ཡ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ། ཅེས་ཅི་ནུས་བཟླས་མཐར། མཆོད་བསྟོད་དང་ཡི་གེ་བརྒྱ་པ་ལན་གསུམ། ཨོཾ་ཨཱཿཧཱུྃ་གིས་མཆོད་ཡོན་ཕུལ། ཧཱུྃ་ཞེས་བརྗོད་པས་རྣམ་རྒྱལ་གྱི་ལྷ་རྣམས་འོད་དུ་ཞུ་བའི་འཆི་མེད་བྱང་ཆུབ་སེམས་ཀྱི་བདུད་རྩིས་བུམ་པ་གང་བར་མོས། ལས་བུམ་གྱི་ལྷ་ལ། དཀྱིལ་འཁོར་གྱི་བྱ་བ་མཐར་མ་ཕྱིན་པར་བགེགས་ཟློག་པའི་ཕྲིན་ལས་མཛོད་ཅིག །ཅེས་གསོལ་ཏེ། ཧཱུྃ་ཞེས་བརྗོད་པས་ལྷ་འོད་དུ་ཞུ་བའི་དབང་དྲག་གི་རང་བཞིན་གྱི་ཆུའི་རྡུལ་ཕྲ་རབ་ཏུ་གྱུར་པར་བསམ། ཚོགས་ཀྱི་མཆོད་པ་ནི་སྐབས་འདིའམ་དབང་གི་མཐའ་གང་འོས་སུ་བྱ་ཞིང་། སྐབས་འདིར་བྱེད་ན་བསྒྲལ་མཆོད་ཡན་གྲུབ་པར་བྱའོ། །དེ་ནས་དབང་གི་བྱ་བ་དངོས་ལ་གཉིས་ལས། དང་པོ་བདག་འཇུག་ནི། རྒྱས་པར་སློབ་མ་ལ་ཇི་ལྟར་བྱ་བ་བཞིན་དབང་རྫོགས་པར་བླང་བའམ། བསྡུ་ན་རིག་པའི་མེ་ཏོག་དོར་བ་ཙམ་གྱིས་བདག་ཉིད་ནུས་ལྡན་དུ་བྱ། གཉིས་པ་སློབ་མ་རྗེས་སུ་བཟུང་བ་ལ། དཀྱིལ་འཁོར་དུ་འཇུག་པ་དང་། ཞུགས་ནས་མངོན་པར་དབང་བསྐུར་བ་གཉིས་ཀྱི་དང་པོ་ལ། སློབ་མ་རྣམས་ཡོལ་བའམ་སྒོའི་ཕྱི་རོལ་དུ་ལས་བུམ་གྱི་ཆུས་ཁྲུས་བྱ་ཞིང་། མེ་ཏོག་དང་བཅས་པས་ཐལ་མོ་སྦྱར་ཏེ། ཀྱཻ། ཁྲོ་རྒྱལ་དབང་ཆེན་ཧེ་རུ་ཀ །སྣ་ཚོགས་ཁྲོ་བོའི་ཚྭ་ཚྭ་འཕྲོ། །གཏུམ་ཆེན་གིང་གི་ཕོ་ཉར་བཅས། །མ་རིག་སྒོ་ཕྱེ་བདག་སོགས་རྣམས། །སྲིད་པའི་མཚོ་ལས་བསྒྲལ་བའི་ཕྱིར། །ཁྱེད་ཀྱིས་ནང་དུ་གཏོང་བར་གསོལ། །ཞེས་ལན་གསུམ་གྱིས་གསོལ་བ་གདབ། སློབ་དཔོན་གྱིས་ལན་དུ། བདུད་དང་མུ་སྟེགས་ཐེག་དམན་སོགས། །སྣོད་མིན་ལྷ་དང་ཕྱག་རྒྱ་རྫས། གསང་སྤྱོད་ལྟ་བར་མི་རུང་བ། །ཡིན་ན་མ་འདུག་ཕྱིར་དེངས་ཤིག །ཅེས་དྲིས་པའི་ལན་དུ། བདག་ཅག་སྙིང་རྗེ་ཆེན་པོའི་མཐུས། །འགྲོ་རྣམས་བསྒྲལ་འདོད་བསམ་པ་ཡིས། །ཐེག་མཆོག་སྨིན་གྲོལ་དོན་གཉེར་ན། །དེ་དོན་བདག་ལ་གནང་བར་མཛོད། །ཅེས་ལན་གསུམ། བགེགས་གཏོར་བཏང་བ་ལས་བྱང་གི་སྔོན་འགྲོའི་སྐབས་ལྟར་བྱས་ལ་གུ་གུལ་གྱིས་བདུག །ཡུངས་ཀར་གྱིས་བྲབས་ཏེ་སློབ་མ་རྣམས་ནང་དུ་གཞུག །སྲུང་འཁོར་བསྒོམ་པ་རྣམས་སྔོན་དུ་འགྲོ་བས། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་མཐར་ཐུག་རྫོགས་པའི་སངས་རྒྱས་ཚེ་དཔག་མེད་ཀྱི་གོ་འཕང་ཐོབ་པ་དང་། གནས་སྐབས་འཆི་མེད་ཚེའི་དངོས་གྲུབ་བསྒྲུབ་པའི་ཕྱིར་བཅོམ་ལྡན་འདས་མགོན་པོ་ཚེ་མཐའ་ཡས་པའི་དབང་བསྐུར་ཟབ་མོ་གསན་སྙམ་པའི་ཐུགས་བསྐྱེད་དང་། ཆོས་ཉན་པའི་ཀུན་སྤྱོད་ཐམས་ཅད་ཀྱང་ཚུལ་བཞིན་དུ་གསལ་བཏབ་ནས་གསན་འཚལ། དེ་ལ་ཡང་དག་པར་རྫོགས་པའི་སངས་རྒྱས་རྣམས་ཀྱིས་གསང་སྔགས་རྡོ་རྗེ་ཐེག་པའི་རྒྱུད་སྡེ་རིན་པོ་ཆེ་རྣམས་ནས་ཚེ་སྒྲུབ་པའི་ཐབས་ཚུལ་བསམ་གྱིས་མི་ཁྱབ་པ་ཞིག་གསུངས་པ་ལས་མཆོག་ཏུ་གྱུར་པ་ནི་མགོན་པོ་ཚེ་དང་ཡེ་ཤེས་དཔག་ཏུ་མེད་པ་ཉིད་ཡིན་ལ། དེ་ལའང་ཟབ་མོའི་བཀའ་སྲོལ་ཇི་སྙེད་ཅིག་མཆིས་པ་ལས། འདིར་ནི་འཆི་མེད་གྲུབ་པའི་དབང་ཕྱུག་ཐང་སྟོང་རྒྱལ་པོ་ཞེས་མཚན་ཉི་ཟླ་ལྟར་ཡོངས་སུ་གྲགས་པ་དེ་ཉིད་གདུལ་བྱ་དག་པའི་སྣང་ངོར་ཨོ་རྒྱན་གྱི་སློབ་དཔོན་མཚོ་སྐྱེས་རྡོ་རྗེ་དང་དབྱེར་མ་མཆིས་ཀྱང་། ཐུན་མོང་བ་རྣམས་དྲང་པའི་སླད་ལྷོ་ནུབ་རྔ་ཡབ་པདྨ་འོད་ཀྱི་ཕོ་བྲང་དུ་སྐུ་དངོས་སུ་བྱོན་ནས་ཨོ་རྒྱན་ཆེན་པོ་ལས་ཟབ་རྒྱས་ཀྱི་གདམས་པ་མཐའ་ཡས་པ་དང་། ཁྱད་པར་ཚེ་སྒྲུབ་ཟབ་མོ་འདི་ཉིད་གསན། བསམ་ཡས་མཆིམས་ཕུ་ནས་ཟབ་གཏེར་ཀྱང་བཞེས་པའི་བཀའ་གཏེར་ཟུང་དུ་འབྲེལ་བའི་གདམས་པ་ཟབ་མོ་ལ་བརྟེན་ནས་གྲུབ་ཆེན་ཉིད་ཀྱིས་དགུང་ལོ་བརྒྱ་དང་ཉེར་ལྔ་ཙམ་བཞུགས་ཏེ་སྐུ་ཚེ་དང་ཕྲིན་ལས་མཐར་ཕྱིན་བའི་རྟེན་འབྲེལ་གྱིས་རྗེས་འཇུག་ཀྱང་སྐུ་ཚེའི་དངོས་གྲུབ་བརྙེས་པ་དུ་མ་བྱུང་བས་མཚོན་བྱིན་རླབས་ཀྱི་ཚན་ཁ་གཞན་ལས་ཆེས་ཁྱད་པར་དུ་གྱུར་པ་ཚེ་སྒྲུབ་འཆི་མེད་དཔལ་སྟེར་དུ་གྲགས་པ་འདི་ལའང་རིང་བརྒྱུད། ཉེ་བརྒྱུད་གཉིས་དང་། ཕྱི་མ་ལའང་བཀའ་བབས་ཐ་དད་པ་འགའ་ཞིག་མཆིས་པ་ལས། ད་ལམ་འདིར་སྐབས་སུ་བབ་པ་ནི། ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱི་འབྲས་བུ་མཐར་ཕྱིན་པའི་ཕྲིན་ལས་ཀྱི་རྣམ་པར་འཕྲུལ་པ། གངས་ཅན་མཁས་གྲུབ་རྒྱ་མཚོའི་གཙུག་རྒྱན། ཀུན་མཁྱེན་རྒྱལ་བའི་དབང་པོ་རྡོ་རྗེ་ཐོགས་མེད་རྩལ་ཞེས་མཚན་གྱི་གྲགས་དཀར་སྲིད་ཞིའི་བླ་ན་མངོན་པར་མཐོ་བ་གང་དེའི་དག་པ་ཡེ་ཤེས་ཀྱི་གཟིགས་ངོར་ཤར་བའི་ཡང་གསང་རྒྱ་ཅན་གྱི་ཆོས་སྡེ་ཉི་ཤུ་རྩ་ལྔའི་ནང་ཚན། རྟ་མགྲིན་པདྨས་མཚན་པའི་བུམ་པའི་རྒྱ་ཅན་ལས་ཚེ་དཔག་མེད་རིགས་ལྔ་འཆི་མེད་མཆོག་སྦྱིན་གྱི་དཀྱིལ་འཁོར་དུ་དབང་བསྐུར་བ་ཡིན་ཏེ། དེའང་ཀུན་མཁྱེན་བླ་མ་ཉིད་ས་ཕག་ཧོར་ཟླ་བཞི་པའི་ནང་གྲུ་འཛིན་གཉིས་པའི་གཞལ་མེད་ཁང་ཆེན་པོར་བོད་ཁམས་བདེ་ཐབས་ཀྱི་ཆེད་དུ་ཟབ་མོའི་རྣལ་འབྱོར་ལ་གཞོལ་བའི་ཚེ་སྦྱིར་དག་པའི་གཟིགས་སྣང་མཐའ་ཡས་པ་དང་། བྱེ་བྲག་ཏུ་ཟླ་བ་དེའི་ཚེས་བཅུ་བཞི་ལ་ཚེ་སྒྲུབ་འཆི་མེད་དཔལ་སྟེར་གྱི་ཉམས་བཞེས་གནང་སྐབས་རྗེ་གྲུབ་ཐོབ་ཆེན་པོའི་ཡེ་ཤེས་ཀྱི་སྐུས་བྱིན་གྱིས་བརླབས་ཤིང་དབང་བསྐུར་བ་དང་ལུང་བསྟན་མང་དུ་སྩལ། ཁྱད་པར་ལོ་དེའི་ཧོར་ཟླ་དགུ་པའི་ཚེས་བརྒྱད་ནས་བཟུང་གྲུབ་པའི་དབང་ཕྱུག་ཐང་སྟོང་རྒྱལ་པོའི་ཕྱག་གི་ཛྷཻ་ཀྵིཾ་ལས་གྲུབ་པའི་བུམ་པ་ལ་བརྟེན་ནས་འཆི་མེད་དཔལ་སྟེར་གྱི་སྒྲུབ་པ་བདུན་ཕྲག་གཅིག་ཏུ་གནང་བས་རྗེ་གྲུབ་ཐོབ་ཆེན་པོ་ཉིད་མངོན་སུམ་དུ་མདུན་གྱི་ནམ་མཁར་བྱོན། བཅོམ་ལྡན་འདས་ཚེ་དཔག་ཏུ་མེད་པ་ལྷ་དགུའི་དཀྱིལ་འཁོར་སྐད་ཅིག་གིས་སྤྲུལ་ཏེ་དབང་ཡོངས་སུ་རྫོགས་པར་བསྐུར་བ་ལྟར་ཀུན་མཁྱེན་ཆེན་པོ་ཉིད་ཀྱིས་ཀྱང་རིག་འཛིན་སྤྲུལ་པའི་སྐུ་པདྨ་ཕྲིན་ལས་དང་རྩོད་བྲལ་དུས་བབ་ཀྱི་གཏེར་སྟོན་རིག་འཛིན་གཏེར་བདག་གླིང་པ་སོགས་སྐལ་ལྡན་ཆོས་བདག་རྣམས་ལ་རིམ་པར་སྤེལ་བ་ནས་བཟུང་བདག་ཅག་གི་དཔལ་ལྡན་བླ་མ་དམ་པའི་བར་དུ་བརྒྱུད་པ་བར་མ་ཆད་པ་ལས་བྱོན་པའི་གདམས་པ་ཟབ་མོ་འདི་ཉིད་ཀྱི་སྒོ་ནས་སློབ་མ་རྗེས་སུ་བཟུང་བ་ལ། སློབ་དཔོན་གྱི་བྱ་བ་རྣམས་གྲུབ་ནས། ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལའང་དཀྱིལ་འཁོར་དུ་འཇུག་པ་དང་། ཞུགས་ནས་མངོན་པར་དབང་བསྐུར་བ་གཉིས་སུ་ཡོད་པ་ལས། དང་པོ་དཀྱིལ་འཁོར་དུ་འཇུག་པའི་ཆོས་རྣམས་ཞུ་བའི་ཡོན་དུ་མཎྜལ་ཕུལ། མེ་ཏོག་དང་བཅས་པས་ཐལ་མོ་སྦྱར་ཏེ་མི་ཕྱེད་དད་པའི་གདུང་ཤུགས་དྲག་པོས་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། རྒྱལ་བ་ཀུན་གྱི་གསུང་གི་ལྷ། །ཚེ་དཔག་མེད་མགོན་དཀྱིལ་འཁོར་དུ། །བདག་སོགས་སྣོད་ལྡན་ལེགས་དྲངས་ནས། །སྨིན་ཅིང་གྲོལ་བར་མཛད་དུ་གསོལ། །དེ་ནས་རྒྱུད་ཡོངས་སུ་སྦྱང་བའི་ཕྱིར། མདུན་གྱི་ནམ་མཁར་སྐྱབས་ཡུལ་རྣམས་མངོན་སུམ་ལྟ་བུར་བཞུགས་པའི་སྤྱན་སྔར་སྐྱབས་འགྲོ་སེམས་བསྐྱེད་ཚོགས་བསགས་པ་རྣམས་ཚིག་ཕྱིར་སེམས་གཞོལ་བས་འདི་རྣམས་ཀྱི་རྗེས་ཟློས་མཛོད། བདག་སོགས་མཁའ་མཉམ་སེམས་ཅན་མ་ལུས་པ། །སོགས་ལས་བྱང་ལྟར་རེ་རེ་ནས་ལན་གསུམ་རེ་བརྗོད་དུ་གཞུག །རིགས་ལྔའི་སྡོམ་པ་བཟུང་བའི་སླད་དུ་དམིགས་པ་འདི་བཞིན་དུ་མཛོད། མདུན་གྱི་ནམ་མཁའི་གནས་སུ་བཅོམ་ལྡན་འདས་མགོན་པོ་ཚེ་དང་ཡེ་ཤེས་དཔག་ཏུ་མེད་པ་རིགས་ལྔ་འཆི་མེད་མཆོག་སྦྱིན་གྱི་དཀྱིལ་འཁོར་འཁོར་ལོའི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་སྤྲིན་ཕུང་གཏིབས་པ་ལྟར་བཞུགས་པའི་སྤྱན་སྔར་དུས་འདི་ནས་བཟུང་སྟེ་བྱང་ཆུབ་སྙིང་པོའི་བར་དུ་རིགས་ལྔའི་སྡོམ་པས་བསྡུས་པའི་རིག་འཛིན་སྔགས་ཀྱི་སྡོམ་པ་རྣམས་བཟུང་བར་བགྱིའོ་སྙམ་པས་འདིའི་རྗེས་ཟློས་མཛོད། ཧོཿ ཕྱོགས་བཅུ་དུས་བཞིའི་རྒྱལ་བ་སྲས་བཅས་རྣམས། །རང་བྱུང་དཀྱིལ་འཁོར་ཆེན་པོར་ལྷུན་རྫོགས་པའི། །རིགས་འདུས་ཚེ་དཔག་མེད་ཀྱི་ལྷ་ཚོགས་རྣམས། །བདག་ལ་བརྩེ་བས་གསན་ཅིང་དགོངས་སུ་གསོལ། །བདག་ཅག་དུས་འདི་ནས་བཟུང་བྱང་ཆུབ་བར། །བླ་མེད་དཀོན་མཆོག་གསུམ་ལ་སྐྱབས་མཆི་ཞིང་། །བྱང་ཆུབ་སེམས་མཆོག་མི་ཉམས་བཟུང་བར་བགྱི། །རྡོ་རྗེ་སྙིང་པོ་རྩ་བ་རིགས་ལྔ་པོའི། །དམ་ཚིག་མ་ལུས་བདག་གིས་བཟུང་བར་བགྱི། །ལྷུན་གྲུབ་དེ་བཞིན་རིགས་ཀྱི་དམ་ཚིག་ཏུ། །སྐྱབས་གསུམ་ཁྲིམས་གསུམ་མ་ལུས་བཟུང་བར་བགྱི། །མི་འགྱུར་རྡོ་རྗེའི་རིགས་ཀྱི་དམ་ཚིག་ཏུ། །ཕྱག་རྒྱ་རྣམ་གསུམ་མི་འབྲལ་བཟུང་བར་བགྱི། །འདོད་འབྱུང་རིན་ཆེན་རིགས་ཀྱི་དམ་ཚིག་ཏུ། །སྦྱིན་པ་རྣམ་བཞིའི་ལས་ལ་བརྩོན་པར་བྱ། །སྐྱོན་བྲལ་པདྨའི་རིགས་ཀྱི་དམ་ཚིག་ཏུ། །དམ་ཆོས་མ་ལུས་ཡོངས་སུ་བཟུང་བར་བྱ། །སྣ་ཚོགས་ལས་ཀྱི་རིགས་ཀྱི་དམ་ཚིག་ཏུ། །སྡོམ་ལྡན་མཆོད་པའི་ལས་ལ་བརྩོན་པར་བྱ། །ཁྱད་པར་ལྷ་སྔགས་བདེ་ཆེན་རྡོ་རྗེ་གསུམ། །བདག་གི་སྒོ་གསུམ་མཉམ་སྦྱོར་བསྒྲུབ་པ་དང་། །ཤེས་དང་མི་སྤང་དང་དུ་བླང་བ་དང་། །བསྒྲུབ་དང་སྤྱད་པར་བྱ་བ་ལྔ་ལྔ་སྟེ། །ཉི་ཤུ་རྩ་བརྒྱད་རྩ་བ་ཡན་ལག་བཅས། །གསང་སྔགས་རྡོ་རྗེ་སྙིང་པོའི་སྡོམ་པ་ཀུན། བདག་གིས་མ་ལུས་ཡོངས་སུ་བཟུང་བར་བྱ། །དེ་ཡིས་འགྲོ་ཀུན་སྲིད་མཚོ་ལས་བསྒྲལ་ཏེ། །བླ་མེད་རྡོ་རྗེ་འཆང་གི་ས་ཐོབ་ཤོག །ཅེས་ལན་གསུམ་བརྗོད། དེ་ནས་སྔོན་ཆད་བཅོམ་ལྡན་འདས་ཚེ་དཔག་མེད་རིགས་ལྔའི་དཀྱིལ་འཁོར་མ་མཇལ་བའི་བརྡར་མིག་དར་དམར་པོ་རེ་བཅིངས་པའི་མོས་པ་མཛོད། ཨོཾ་ཙཀྵུ་བྷནྡྷ་ཝཱ་ར་མ་ན་ཡེ་ཧཱུྃ། དཀྱིལ་འཁོར་པ་དང་མཇལ་བའི་ཚེ་ཕྱག་རྟེན་གྱི་སླད་དུ་མེ་ཏོག་གི་ཕྲེང་བ་ཁ་དོག་ལྔ་པ་རེ་ཡང་བྱིན་པའི་མོས་པ་མཛོད། ཨོཾ་པུཥྤེ་སིདྡྷི་ཧཱུྃ། གཞི་ལུས་བྱིན་གྱིས་བརླབ་པའི་སླད་དུ་དམིགས་པ་འདི་བཞིན་དུ་མཛོད། །ཁྱེད་རང་རྣམས་སྐད་ཅིག་གིས་བཅོམ་ལྡན་འདས་མགོན་པོ་ཚེ་དང་ཡེ་ཤེས་དཔག་ཏུ་མེད་པའི་སྐུར་ལམ་གྱིས་གསལ་བའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པར་གྱུར། ཨོཾ་ཨ་པ་རི་མི་ཏ་ཨཱ་ཡུརྫྙཱ་ན་ས་པ་རི་ཝཱ་ར་ཨརྒྷཾ་ནས་ཤབྡའི་བར་གྱིས་མཆོད། དཀྱིལ་འཁོར་གྱི་ཕྱོགས་བཞི་ནས་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཕྲིན་ལས་བཞི་ཡི་ལས་མཛད་པའི། །དཀར་སེར་དམར་ལྗང་སྒོ་མ་བཞི། །དཀྱིལ་འཁོར་གསང་བའི་སྒོ་ཕྱེ་ལ། །བདག་སོགས་ནང་དུ་གཏོང་བར་གསོལ། །སློབ་དཔོན་གཙོ་བོའི་རྣམ་པའི་ཕྱག་གི་རྡོ་རྗེ་ལ་འཇུས་ཏེ་དཀྱིལ་འཁོར་གྱི་ནང་དུ་ཁྲིད་པའི་མོས་པ་དང་བཅས་ཏེ་ཡོལ་བ་ཡོད་ན་བསལ། ཕྱག་འཚལ་བ་འདིའི་རྗེས་ཟློས་མཛོད། རང་སེམས་དོན་གྱི་ཚེ་དཔག་མེད། །གདོད་ནས་ལྷུན་གྱིས་གྲུབ་པའི་གཟུགས། །མངོན་སུམ་ལོགས་སུ་གསལ་མཐོང་བར། །གཉིས་མེད་དོན་གྱི་ཕྱག་འཚལ་ལོ། །ན་མོ་པུ་རུ་ཤ་ཡ་ཧོཿ དེས་ཕྱི་ལྟར་འཇུག་པ་སོང་ནས། ནང་འཇུག་གི་སྔོན་འགྲོ་དམ་ལ་བཞག་པ་ལ་གསུམ་ལས། ཕན་ཡོན་དང་ཉེས་དམིགས་གཉིས་ཀའི་སྒོ་ནས་དམ་ལ་བཞག་པ་ནི། སློབ་དཔོན་གཙོ་བོར་གསལ་བའི་ཕྱག་གི་རྡོ་རྗེ་མགོ་བོར་བཞག་སྟེ། ཧོ༔ ཤིན་ཏུ་གཉན་པའི་དཀྱིལ་འཁོར་འདིར། །ཁྱོད་ཀྱི་དངོས་གྲུབ་མྱུར་ཐོབ་པར། །གེགས་བྱེད་གསང་བ་གཞན་དག་ལ། །སྨྲས་ན་དམ་ཚིག་ཉམས་པར་འགྱུར། །ཨོཾ་བཛྲ་ས་མ་ཡ་ཧཱུྃ། མནའ་ཆུ་སྦྱིན་པའི་སྒོ་ནས་དམ་ལ་བཞག་པ་ནི། རྡོ་རྗེའི་དམ་ཚིག་ཉེར་བསྲུངས་ན། །དངོས་གྲུབ་མ་ལུས་མྱུར་དུ་ཐོབ། །འདས་ན་དཔག་མེད་དུཿཁའི་རྒྱུ། །དེ་ཕྱིར་དམ་སྲུངས་འདི་འཐུང་ཞིང་། །ཨོཾ་བཛྲ་ཨུ་ད་ཀ་ཋཱ་ཋཱ་ཋཱ། ཞེས་མནའ་ཆུ་སྦྱིན། །བླ་མའི་བཀའ་གཉན་པའི་སྒོ་ནས་དམ་ལ་བཞག་པ་ནི་འདི་ལ་གསན་པས་ཁྱབ་སྟེ། ཧོཿ ཁྱོད་ཀྱི་ཚེ་དཔག་མེད་མགོན་དེ། །དེང་ནས་བརྩམས་ཏེ་ང་ཡིན་པས། །ང་ཡི་བསྒོ་བ་ལས་འདས་ན། །མནར་མེད་དམྱལ་བར་ལྟུང་ཏ་རེ། །ཨོཾ་བཛྲ་ས་མ་ཡ་ཧཱུྃ། ནང་འཇུག་གི་དངོས་གཞི་ཡེ་ཤེས་དབབ་པའི་དོན་དུ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཧོ་རྡོ་རྗེ་འཛིན་པ་དགོངས་སུ་གསོལ། །ཚེ་དཔག་མེད་མགོན་ལྷ་ཚོགས་ཀྱི། །སྐུ་གསུང་ཐུགས་ཀྱི་བྱིན་རླབས་རྣམས། །དུས་འདིར་བདག་ལ་དབབ་ཏུ་གསོལ། །སླར་ཡང་ཁྱེད་རང་རྣམས་དཀྱིལ་འཁོར་གྱི་གཙོ་བོ་བཅོམ་ལྡན་འདས་མགོན་པོ་ཚེ་དང་ཡེ་ཤེས་དཔག་ཏུ་མེད་པ་སྐུ་མདོག་དམར་པོ་ཞལ་གཅིག་ཕྱག་གཉིས་པ་ལོངས་སྤྱོད་རྫོགས་སྐུའི་ཆ་ལུགས་ཅན་ཡུམ་གོས་དཀར་མོ་དང་མཉམ་པར་སྦྱོར་བའི་སྐུར་ལམ་གྱིས་གསལ་འདེབས་པར་ཞུ། །བླ་མའི་སྐུ་ལས་འོད་ཟེར་འཕྲོས། མདུན་བསྐྱེད་ཀྱི་ཐུགས་ཀར་ཕོག །གཉིས་ཀའི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་པས་བདེ་བ་ཅན་སོགས་དག་པའི་ཞིང་རབ་འབྱམས་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བཅོམ་ལྡན་འདས་མགོན་པོ་ཚེ་དཔག་མེད་ཀྱི་རྣམ་བར་བྱོན་ཏེ་ཁྱེད་རང་རྣམས་ཀྱི་དབུ་གཙུག་ནས་སིབ་སིབ་ཐིམ་པའི་མོས་པ་མཛོད། ཧྲཱིཿ ཆོས་དབྱིངས་རྣམ་དག་དཀྱིལ་འཁོར་ནས། །རང་བྱུང་ཚེ་ཡི་ལྷ་ཚོགས་རྣམས། །འགྲོ་བའི་དོན་དུ་སྐུར་བཞེངས་ལ། །དབང་སྐུར་བྱིན་ཕོབ་དངོས་གྲུབ་སྩོལ། །ཨོཾ་ཨ་པ་རི་མི་ཏ་ཨཱ་ཡུརྫྙཱ་ན་བཛྲ་ས་མ་ཡ་ཨཱ་བེ་ཤ་ཡ་ཨ་ཨཱཿ ཞེས་བྱིན་དབབ། སྤྱི་བོར་རྡོ་རྗེ་རྒྱ་གྲམ་དུ་བཞག་སྟེ། དེ་ལྟར་བྱིན་ཕབ་པའི་ཡེ་ཤེས་པ་རྣམས་བརྟན་པར་བྱས་པའི་མོས་པ་མཛོད། ཨོཾ་བཛྲ་ཏིཥྛནྟུས་བརྟན་པར་བྱ། དེ་ནས་དངོས་གྲུབ་ཀྱི་ལྟས་བརྟག་པའི་ཕྱིར་ཁྱེད་རང་རྣམས་མིག་རས་དང་བཅས་དཀྱིལ་འཁོར་གྱི་བར་སྣང་ལ་གཟིགས་ཏེ་ཁ་དོག་གང་མཐོང་བ་དེ་ངེད་ལ་སྨྲོས་ཤིག །ཅེས་མཐོང་བ་དྲི། དེའང་དཀར་སེར་དམར་མཐིང་ལྗང་གུ་རྣམས་མཐོང་ན་རིམ་བཞིན་ཞི་རྒྱས་དབང་དྲག་ལས་སྣ་ཚོགས་འགྲུབ་པར་འགྱུར་བ་ཡིན་ནོ། །དེ་ནས་སྔར་བྱིན་པའི་མེ་ཏོག་གི་ཅོད་པན་དེ་ཉིད་དཀྱིལ་འཁོར་དུ་དོར་བ་དང་བཅས་ཏེ་འདིའི་རྗེས་ཟློས་མཛོད། ཧོཿ ཚེ་དཔག་མེད་མགོན་དཀྱིལ་འཁོར་དུ། །རིན་ཐང་མེད་པའི་མེ་ཏོག་འབུལ། །རིགས་ཀྱི་ལས་འཕྲོ་གང་སད་པའི། །ཡི་དམ་ལྷ་ལ་འབབས་པར་ཤོག །ཨོཾ་བཛྲ་པུཥྤེ་པཱུ་ཛ་ཧོཿ སླར་ཡང་མེ་ཏོག་གང་ལ་ཕོག་པའི་ལྷག་པའི་ལྷས་མེ་ཏོག་གི་ཕྲེང་བ་ཁྱེད་རང་རྣམས་ཀྱི་སྤྱི་བོར་བཅིངས་ཏེ་དབང་བསྐུར་བའི་མོས་པ་མཛོད། ཧཱུྃ། མཐུ་སྟོབས་དབང་ཕྱུག་ཚེ་དཔག་མེད། །ཁྱོད་ཀྱིས་རྡོ་རྗེའི་སློབ་མ་འདི། །བླ་ན་མེད་པའི་བྱང་ཆུབ་མཆོག །མ་ཐོབ་དེ་སྲིད་རྗེས་ཟུངས་ཤིག །པུཥྤེ་མུ་ཀུ་ཊ་ཨ་བྷི་ཥིཉྩ་ཧཱུྃ། ཞེས་མེ་ཏོག་ཕྲེང་བས་དབང་བསྐུར། ཧོཿ ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་རབ་རིབ་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ཙཀྵུ་པྲ་བེ་ཤ་ཡ་ཕཊ། མ་རིག་པའི་ལིང་ཏོག་དང་མིག་རས་ལྷན་ཅིག་ཏུ་བསལ་བས་བཅོམ་ལྡན་འདས་ཚེ་དཔག་མེད་ལྷ་དགུའི་རྟེན་དང་བརྟེན་པའི་དཀྱིལ་འཁོར་པ་རྣམས་མངོན་སུམ་བཞིན་དུ་གཟིགས་པའི་མོས་པ་མཛོད། དེས་དཀྱིལ་འཁོར་དུ་འཇུག་པའི་ཆོས་རྣམས་སོང་ནས། ཞུགས་ནས་མངོན་པར་དབང་བསྐུར་བ་ལའང་། སྒྱུ་འཕྲུལ་དྲྭ་བའི་རྒྱུད་ལས་བུམ་པ་གསང་བ་ཤེས་རབ་དང་། །དེ་མ་ཐག་པ་བཞི་པ་སྟེ། །ཞེས་པ་ལྟར་བཞི་ཡོད་པ་ལས། དང་པོ་བུམ་དབང་ལའང་གཉིས་ཀྱི། དང་པོ་ཐུན་མོང་རིག་པའི་དབང་ལྔ་ཞུ་བའི་ཡོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཧོཿ རྡོ་རྗེ་འཛིན་པ་དགོངས་སུ་གསོལ། །ཚེ་དཔག་མེད་མགོན་ལྷ་ཚོགས་ཀྱི། །རིག་པའི་དབང་ལྔ་མ་ལུས་རྣམས། །དུས་འདིར་བདག་ལ་དབབ་ཏུ་གསོལ། །ལས་བུམ་གྱི་ཆུས་བགེགས་བསང་། ཨོཾ་བཛྲ་ཨ་མྲྀ་ཏས་བསང་། ཨོཾ་སྭ་བྷཱ་ཝས་སྦྱང་། སློབ་མ་དང་རྣམ་རྒྱལ་བུམ་པ་སྟོང་པ་ཉིད་དུ་གྱུར། སྟོང་པའི་ངང་ལས་གཉིས་ཀའང་པདྨ་ཉི་ཟླའི་གདན་ལ་ཧཱུྃ་སྔོན་པོ་ལས་མི་བསྐྱོད་ཚེ་དཔག་མེད་སྐུ་མདོག་སྔོན་པོ་ཞལ་གཅིག་ཕྱག་གཉིས་ལོངས་སྤྱོད་རྫོགས་སྐུའི་ཆ་བྱད ་ཅན་ཕྱག་གཡས་རྡོ་རྗེ་དང་གཡོན་བུམ་པ་བསྣམས་པ། ཡུམ་མཱ་མ་ཀཱི་སྐུ་མདོག་སྔོན་མོ་ཚེ་མདའ་བུམ་པ་འཛིན་པ་དང་སྙོམས་པར་ཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཐུགས་ཀའི་ཧཱུྃ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་པ་ཨོཾ་བཛྲ་ས་མཱ་ཛཿ ཛཿཧཱུྃ་བཾ་ཧོཿ ཨོཾ་བཛྲ་ཨ་པ་རི་མི་ཏ་ཨཱ་ཡུརྫྙཱ་ན་ས་པ་རི་ཝཱ་ར་ཨརྒྷཾ་ནས། ཤབྡའི་བར་གྱིས་མཆོད། མི་བསྐྱོད་ཚེ་དཔག་མེད་ཡབ་ཡུམ་སྙོམས་པར་ཞུགས། ཞུ་བ་ལས་བྱུང་པའི་དབང་རྫས་བུམ་ཆུར་གྱུར་པས་སྤྱི་བོ་ནས་དབང་བསྐུར་བའི་མོས་པ་མཛོད། མི་བསྐྱོད་ཚེ་དཔག་མེད་མགོན་གྱི། །གསང་བ་གསུམ་ལས་བྱུང་བ་ཡི། །བུམ་པའི་དབང་བསྐུར་ཆེན་པོ་འདི། །སྐལ་ལྡན་བུ་ལ་སྦྱིན་པར་བྱ། །ཨོཾ་བཛྲ་ཨ་པ་རི་མི་ཏ་ཨཱ་ཡུརྫྙཱ་ན་བཛྲ་ཀ་ལ་ཤ་ཨ་བྷི་ཥིཉྩ་མཾ། ཞེས་མི་བསྐྱོད་པ་བུམ་པའི་ཆུས་དབང་བསྐུར་བས་ཞེ་སྡང་དག་སྟེ་རྣམ་ཤེས་གནས་གྱུར། མི་བསྐྱོད་ཚེ་དཔག་མེད་གྱི་ངོ་བོར་གྱུར་པའི་མོས་པ་མཛོད། དབུ་རྒྱན་བསང་སྦྱང་། སྟོང་པའི་ངང་ལས་སློབ་མ་དང་དབུ་རྒྱན་སྭཱ་ལས་རིན་འབྱུང་ཚེ་དཔག་མེད་སྐུ་མདོག་སེར་པོ་ཞལ་གཅིག་ཕྱག་གཉིས་ལོངས་སྤྱོད་རྫོགས་སྐུའི་ཆ་བྱད་ཅན་ཕྱག་གཡས་རིན་པོ་ཆེ་དང་གཡོན་ཚེ་བུམ་འཛིན་པ། ཡུམ་རིན་ཆེན་སྒྲོལ་མ་སྐུ་མདོག་སེར་མོ་ཚེ་མདའ་བུམ་པ་འཛིན་པ་དང་སྙོམས་པར་ཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཐུགས་ཀའི་ཧཱུྃ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་པ་ཨོཾ་བཛྲ་ས་མཱ་ཛཿས་སྤྱན་དྲང་ཞིང་བསྟིམ། ཨོཾ་རཏྣ་ཨ་པ་རི་མི་ཏ་ཨཱ་ཡུརྫྙཱ་ན་ས་པ་རི་ཝཱ་ར་ཨརྒྷཾ་ནས། ཤབྡའི་བར་གྱིས་མཆོད། རིན་འབྱུང་ཚེ་དཔག་མེད་ཡབ་ཡུམ་སྙོམས་པར་ཞུགས། ཞུ་བ་ལས་བྱུང་བའི་དབང་རྫས་ཅོད་པན་དུ་གྱུར་པ་སྤྱི་བོར་བཅིངས་ཏེ་དབང་བསྐུར་བའི་མོས་པ་མཛོད། རིན་འབྱུང་ཚེ་དཔག་མེད་མགོན་གྱི། །གསང་བ་གསུམ་ལས་བྱུང་བ་ཡི། །ཅོད་པན་དབང་བསྐུར་ཆེན་པོ་འདི། །སྐལ་ལྡན་བུ་ལ་སྦྱིན་པར་བྱ། །ཨོཾ་རཏྣ་ཨ་པ་རི་མི་ཏ་ཨཱ་ཡུརྫྙཱ་ན་རཏྣ་མུ་ཀུ་ཊ་ཨ་བྷི་ཥིཉྩ་མཾ། ཞེས་རིན་ཆེན་འབྱུང་ལྡན་ཅོད་པན་གྱི་དབང་བསྐུར་བས་སེར་སྣ་དག་སྟེ་ཚོར་བ་གནས་གྱུར། རིན་འབྱུང་ཚེ་དཔག་མེད་ཀྱི་ངོ་བོར་གྱུར་པའི་མོས་པ་མཛོད། རྡོ་རྗེ་བསང་སྦྱང་། སྟོང་པའི་ངང་ལས་སློབ་མ་དང་རྡོ་རྗེ་ཨོཾ་ལས་སྣང་མཐའ་ཚེ་དཔག་མེད་སྐུ་མདོག་དམར་པོ་ཞལ་གཅིག་ཕྱག་གཉིས་ལོངས་སྤྱོད་རྫོགས་སྐུའི་ཆ་བྱད་ཅན། གཡས་པདྨ་དང་གཡོན་ཚེ་བུམ་འཛིན་པ། ཡུམ་གོས་དཀར་མོ་དམར་མོ་ཚེ་མདའ་བུམ་པ་འཛིན་པ་དང་སྙོམས་པར་ཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཐུགས་ཀའི་ཧཱུྃ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་པ་ཨོཾ་བཛྲ་ས་མཱ་ཛཿས་སྤྱན་དྲང་ཞིང་བསྟིམས་ལ་མཆོད། སྣང་མཐའ་ཚེ་དཔག་མེད་ཡབ་ཡུམ་སྙོམས་པར་ཞུགས། ཞུ་བ་ལས་བྱུང་བའི་དབང་རྫས་རྡོ་རྗེར་གྱུར་པ་ལག་གཡས་སུ་བྱིན་ཏེ་དབང་བསྐུར་བའི་མོས་པ་མཛོད། སྣང་མཐའ་ཚེ་དཔག་མེད་མགོན་གྱི། །གསང་བ་གསུམ་ལས་བྱུང་བ་ཡི། །རྡོ་རྗེའི་དབང་བསྐུར་ཆེན་པོ་འདི། །སྐལ་ལྡན་བུ་ལ་སྦྱིན་པར་བྱ། །ཨོཾ་པདྨ་ཨ་པ་རི་མི་ཏ་ཨཱ་ཡུརྫྙཱ་ན་མ་ཧཱ་བཛྲ་ཨ་བྷི་ཥིཉྩ་མཾ། ཞེས་འོད་དཔག་མེད་རྡོ་རྗེའི་དབང་བསྐུར་བས་འདོད་ཆགས་དག་སྟེ་འདུ་ཤེས་གནས་གྱུར། སྣང་མཐའ་ཚེ་དཔག་མེད་ཀྱི་ངོ་བོར་གྱུར་པའི་མོས་པ་མཛོད། དྲིལ་བུ་བསང་སྦྱང་། སྟོང་པའི་ངང་ལས་སློབ་མ་དང་དྲིལ་བུ་ཧཱ་ལས་དོན་གྲུབ་ཚེ་དཔག་མེད་སྐུ་མདོག་ལྗང་གུ་ཞལ་གཅིག་ཕྱག་གཉིས་ལོངས་སྤྱོད་རྫོགས་སྐུའི་ཆ་ལུགས་ཅན་གཡས་རྒྱ་གྲམ་དང་གཡོན་བུམ་པ་འཛིན་པ། ཡུམ་དམ་ཚིག་སྒྲོལ་མ་སྐུ་མདོག་ལྗང་གུ་གཡས་ཚེ་མདའ་དང་གཡོན་བུམ་པ་འཛིན་པ་དང་སྙོམས་པར་ཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཐུགས་ཀའི་ཧཱུྃ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་པ་ཨོཾ་བཛྲ་ས་མཱ་ཛཿས་སྤྱན་དྲང་ཞིང་བསྟིམས་ལ་མཆོད། དོན་གྲུབ་ཚེ་དཔག་མེད་ཡབ་ཡུམ་སྙོམས་པར་ཞུགས། ཞུ་བ་ལས་བྱུང་བའི་དབང་རྫས་དྲིལ་བུར་གྱུར་པ་ལག་གཡོན་དུ་བྱིན་ཏེ་དབང་བསྐུར་བའི་མོས་པ་མཛོད། དོན་གྲུབ་ཚེ་དཔག་མེད་མགོན་གྱི། །གསང་བ་གསུམ་ལས་བྱུང་བ་ཡི། །དྲིལ་བུའི་དབང་བསྐུར་ཆེན་པོ་འདི། །སྐལ་ལྡན་བུ་ལ་སྦྱིན་པར་བྱ། །ཨོཾ་ཀརྨ་ཨ་པ་རི་མི་ཏ་ཨཱ་ཡུརྫྙཱ་ན་དྷརྨཱ་གཎྜེ་ཨ་བྷི་ཥིཉྩ་མཾ། ཞེས་དོན་ཡོད་གྲུབ་པ་དྲིལ་བུའི་དབང་བསྐུར་བས་ཕྲག་དོག་དག་སྟེ་འདུ་བྱེད་གནས་གྱུར། དོན་གྲུབ་ཚེ་དཔག་མེད་ཀྱི་ངོ་བོར་གྱུར་པའི་མོས་པ་མཛོད། རྡོར་དྲིལ་བསང་སྦྱང་། སྟོང་པའི་ངང་ལས་སློབ་མ་དང་རྡོར་དྲིལ་བྷྲཱུྃ་ལས་རྣམ་སྣང་ཚེ་དཔག་མེད་སྐུ་མདོག་དཀར་པོ་ཞལ་གཅིག་ཕྱག་གཉིས་པ་ལོངས་སྤྱོད་རྫོགས་སྐུའི་ཆ་བྱད་ཅན་ཕྱག་གཡས་འཁོར་ལོ་དང་གཡོན་བུམ་པ་འཛིན་པ། ཡུམ་སངས་རྒྱས་སྤྱན་མ་སྐུ་མདོག་དཀར་མོ་གཡས་ཚེ་མདའ་དང་གཡོན་བུམ་པ་འཛིན་པ་དང་སྙོམས་པར་ཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཐུགས་ཀའི་ཧཱུྃ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་པ་ཨོཾ་བཛྲ་ས་མཱ་ཛཿས་སྤྱན་དྲང་ཞིང་བསྟིམས་ལ་མཆོད། རྣམ་སྣང་ཚེ་དཔག་མེད་ཡབ་ཡུམ་སྙོམས་པར་ཞུགས། ཞུ་བ་ལས་བྱུང་བའི་དབང་རྫས་རྡོར་དྲིལ་དུ་གྱུར་པ་ལྷན་ཅིག་ཏུ་སྤྱི་བོར་དཀྲོལ་ཞིང་རྡོ་རྗེའི་མིང་བཏགས་ཏེ་དབང་བསྐུར་བའི་མོས་པ་མཛོད། རྣམ་སྣང་ཚེ་དཔག་མེད་མགོན་གྱི། །གསང་བ་གསུམ་ལས་བྱུང་བ་ཡི། །མིག་གི་དབང་བསྐུར་ཆེན་པོ་འདི། །སྐལ་ལྡན་བུ་ལ་སྦྱིན་པར་བྱ། །ཨོཾ་བུདྡྷ་ཨ་པ་རི་མི་ཏ་ཨཱ་ཡུརྫྙཱ་ན་བཛྲ་ནཱ་མ་ཨ་བྷི་ཥིཉྩ་མཾ། ཞེས་མིང་གི་དབང་བསྐུར་བས་གཏི་མུག་དག་སྟེ་གཟུགས་ཕུང་གནས་གྱུར། རྣམ་སྣང་ཚེ་དཔག་མེད་ཀྱི་ངོ་བོར་གྱུར་པའི་མོས་པ་མཛོད། དེ་ནས་ཐུན་མོང་མ་ཡིན་པ་རྡོ་རྗེ་སློབ་དཔོན་གྱི་དབང་གི་དོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཧོཿ ཕྱིར་མི་ལྡོག་པ་སློབ་དཔོན་གྱི། །དབང་བསྐུར་དམ་པ་སྩལ་དུ་གསོལ། དཀྱིལ་འཁོར་གྱི་ཤར་སྒོར་སེང་གེས་བཏེགས་པའི་ཁྲིའི་སྟེང་དུ་ཁྱེད་རང་རྣམས་སྐད་ཅིག་གིས་བཅོམ་ལྡན་འདས་མགོན་པོ་ཚེ་དང་ཡེ་ཤེས་དཔག་ཏུ་མེད་པའི་སྐུར་ལམ་གྱིས་གསལ་འདེབས་པར་ཞུ། རྡོ་དྲིལ། གླེགས་བམ། དུང་། འཁོར་ལོ་རྣམས་གཏད་དེ། ཧོཿ རིགས་རྣམས་ཀུན་གྱི་བདག་ཉིད་ཆེ། །རྡོ་རྗེ་སློབ་དཔོན་དབང་བསྐུར་བས། །སྨིན་གྲོལ་རྒྱུད་དང་མན་ངག་རྣམས། །འཆད་ཉན་བསྒོམ་པའི་དབང་ཐོབ་ཤོག །དེ་ནས་མཐའ་རྟེན་རིགས་ལྔ་ཀའི་ཕྱག་གི་བུམ་པའི་ཆུས་དབང་བསྐུར་བར་མོས་ལ། རིགས་ལྔ་ཚེ་དཔག་མེད་པ་ཡི། །གསང་བ་གསུམ་ལས་བྱུང་བ་ཡི། །བུམ་པའི་དབང་བསྐུར་ཆེན་པོ་འདི། །སྐལ་ལྡན་བུ་ལ་སྦྱིན་པར་བྱ། །ཨོཾ་ཨ་པ་རི་མི་ཏ་ཨཱ་ཡུརྫྙཱ་ན་ཀ་ལ་ཤ་ཨ་བྷི་ཥིཉྩ་མཾ། ཨོཾ་ཨ་པ་རི་མི་ཏ་ཨཱ་ཡུརྫྙཱ་ན་ས་པ་རི་ཝཱ་ར་ཨརྒྷཾ་ནས། ཤབྡའི་བར་གྱིས་མཆོད། བགེགས་རིགས་སྟོང་ཕྲག་བརྒྱད་ཅུ་ཞི་བ་དང་། །ཞེས་པའི་ཤློ་ཀ་གཅིག་གིས་ཤིས་པ་བརྗོད། རྗེས་འབྲེལ་དུ་ནང་ཡེ་ཤེས་ལྷའི་དབང་བསྐུར་བ་ནི། དཀྱིལ་འཁོར་པ་རྣམས་ཀྱི་ཐུགས་ཀ་ནས་རང་འདྲ་བའི་སྐུ་གཉིས་པ་རེ་བྱུང་སྟེ་ཁྱེད་རང་རྣམས་ཀྱི་གནས་སོ་སོར་ཐིམ་པས་ལྷ་སོ་སོའི་བྱིན་རླབས་དང་ནུས་མཐུ་མ་ལུས་པ་རྒྱུད་ལ་ཞུགས་པའི་མོས་པ་མཛོད། ཅེས་བརྡ་སྦྱར་ལ་གཙོ་བོའི་སྐུ་སྙིང་གར་བཞག་སྟེ། སྣང་མཐའ་ཚེ་དཔག་མེད་པ་ཡིས། །སྐལ་ལྡན་འདི་ལ་དབང་བསྐུར་བས། །འདུ་ཤེས་ཕུང་པོ་གནས་གྱུར་ནས། །སོར་རྟོག་ཡེ་ཤེས་ཐོབ་པར་ཤོག །པདྨ་ཨ་པ་རི་མི་ཏ་ཨ་ཡུརྫྙཱ་ན་ཨ་བྷི་ཥིཉྩ་མཾ། སྣང་མཛད་ཚེ་དཔག་མེད་ཀྱི་སྐུ་སྤྱི་བོར་བཞག་སྟེ། ཧྲཱིཿ བུདྡྷ་ཚེ་དཔག་མེད་པ་ཡིས། །སྐལ་ལྡན་འདི་ལ་དབང་བསྐུར་བས། །གཟུགས་ཀྱི་ཕུང་པོ་གནས་གྱུར་ནས། །མེ་ལོང་ཡེ་ཤེས་ཐོབ་པར་ཤོག །བུདྡྷ་ཨ་པ་རི་མི་ཏ་ཨཱ་ཡུརྫྙཱ་ན་ཨ་བྷི་ཥིཉྩ་མཾ། རིན་འབྱུང་ཚེ་དཔག་མེད་ཀྱི་སྐུ་ལྟེ་བར་བཞག་སྟེ། ཧྲཱིཿ རཏྣ་ཚེ་དཔག་མེད་མགོན་གྱིས། །སྐལ་ལྡན་འདི་ལ་དབང་བསྐུར་བས། །ཚོར་བའི་ཕུང་པོ་གནས་གྱུར་ནས། །མཉམ་ཉིད་ཡེ་ཤེས་ཐོབ་པར་ཤོག །རཏྣ་ཨ་པ་རི་མི་ཏ་ཨཱ་ཡུརྫྙཱ་ན་ཨ་བྷི་ཥིཉྩ་མཾ། མི་བསྐྱོད་ཚེ་དཔག་མེད་ཀྱི་སྐུ་མགྲིན་པར་བཞག་སྟེ། ཧྲཱིཿ མི་བསྐྱོད་ཚེ་དཔག་མེད་མགོན་གྱིས། །སྐལ་ལྡན་འདི་ལ་དབང་བསྐུར་བས། །རྣམ་ཤེས་ཕུང་པོ་གནས་གྱུར་ནས། །ཆོས་དབྱིངས་ཡེ་ཤེས་ཐོབ་པར་ཤོག །བཛྲ་ཨ་པ་རི་མི་ཏ་ཨཱ་ཡུརྫྙཱ་ན་ཨ་བྷི་ཥིཉྩ་མཾ། དོན་གྲུབ་ཚེ་དཔག་མེད་ཀྱི་སྐུ་གསང་གནས་སུ་བཞག་སྟེ། ཧྲཱིཿ ཀརྨ་ཚེ་དཔག་མེད་མགོན་གྱིས། །སྐལ་ལྡན་འདི་ལ་དབང་བསྐུར་བས། །འདུ་བྱེད་ཕུང་པོ་གནས་གྱུར་ནས། །བྱ་གྲུབ་ཡེ་ཤེས་ཐོབ་པར་ཤོག །ཀརྨ་ཨ་པ་རི་མི་ཏ་ཨཱ་ཡུརྫྙཱ་ན་ཨ་བྷི་ཥིཉྩ་མཾ། ཤར་སྒོ་མ་ལག་གཡས་སུ་བཞག་སྟེ། ཧྲཱིཿ ལྷ་མོ་ལྕགས་ཀྱུ་མ་ཡི་དབང་། །སྐལ་ལྡན་འདི་ལ་དབང་བསྐུར་བས། །ཞི་བའི་ཕྲིན་ལས་མཐར་ཕྱིན་ནས། །བྱམས་པ་ཆེན་པོའི་དབང་ཐོབ་ཤོག །ཨོཾ་བཛྲ་ཨངྐུ་ཤ་ཨ་བྷི་ཥིཉྩ་མཾ། ལྷོ་སྒོ་མ་ལག་གཡོན་དུ་བཞག་སྟེ། ཧྲཱིཿ ལྷ་མོ་ཞགས་པ་མ་ཡི་དབང་། །སྐལ་ལྡན་འདི་ལ་དབང་བསྐུར་བས། །རྒྱས་པའི་ཕྲིན་ལས་མཐར་ཕྱིན་ནས། །སྙིང་རྗེ་ཆེན་པོའི་དབང་ཐོབ་ཤོག །ཨོཾ་བཛྲ་པཱ་ཤ་ཨ་བྷི་ཥིཉྩ་མཾ། ནུབ་སྒོ་མ་པུས་མོ་གཡས་སུ་བཞག་སྟེ། ཧྲཱིཿ ལྷ་མོ་ལྕགས་སྒྲོག་མ་ཡི་དབང་། སྐལ་ལྡན་འདི་ལ་དབང་བསྐུར་བས། །དབང་གི་ཕྲིན་ལས་མཐར་ཕྱིན་ནས། །དགའ་བ་ཆེན་པོའི་དབང་ཐོབ་ཤོག །ཨོཾ་བཛྲ་སྥོ་ཊ་ཨ་བྷི་ཥིཉྩ་མཾ། བྱང་སྒོ་མ་པུས་མོ་གཡོན་དུ་བཞག་སྟེ། ཧྲཱིཿ ལྷ་མོ་དྲིལ་བུ་མ་ཡི་དབང་། །སྐལ་ལྡན་འདི་ལ་དབང་བསྐུར་བས། །དྲག་པོའི་ཕྲིན་ལས་མཐར་ཕྱིན་ནས། །བཏང་སྙོམས་ཆེན་པོའི་དབང་ཐོབ་ཤོག །ཨོཾ་བཛྲ་གཎྜེ་ཨ་བྷི་ཥིཉྩ་མཾ། དེས་བུམ་པའི་དབང་ཐོབ། ལུས་ཀྱི་དྲི་མ་དག ལམ་བསྐྱེད་རིམ་སྒོམ་པ་ལ་དབང་། འབྲས་བུ་སྤྲུལ་སྐུ་ཐོབ་པའི་སྐལ་བ་ཅན་དུ་བྱས་པའི་མོས་པ་མཛོད། གཉིས་པ་གསང་དབང་གི་དོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཀྱེ། དགའ་ཆེན་བདག་ཉིད་སློབ་དཔོན་ཆེ། །བྱང་ཆུབ་སེམས་ཀྱི་ཆུ་རྒྱུན་གྱིས། །བདག་ལུས་རྩ་ཁམས་ཀུན་ཁྱབ་ནས། །གཏུམ་མོའི་ཡེ་ཤེས་བསྐྱེད་དུ་གསོལ། །ཨོཾ་ཨཱཿཧཱུྃ་གིས་མིག་དར་རྣམས་ཀྱང་འཆིང་བར་ཞུ། དེ་ནས་བླ་མ་ཚེ་དཔག་མེད་རིགས་ལྔ་རིགས་ཀྱི་ཡུམ་ལྔར་སྙོམས་པར་ཞུགས་པའི་བྱང་ཆུབ་ཀྱི་སེམས་ཐོད་པའི་རྫས་དང་དབྱེར་མེད་དུ་བསྲེས་ཏེ། ཁྱེད་རང་རྣམས་ཀྱི་ལྕེ་ཐོག་ཏུ་བཞག་པའི་མོས་པ་མཛོད། ཧྲཱིཿ དཀར་དམར་བྱང་ཆུབ་སེམས་ཀྱི་རྒྱུན། །སྐལ་ལྡན་བུ་ལ་བྱིན་པ་ཡིས། །རྩ་ཁམས་བདེ་བས་ཡོངས་ཁྱབ་པའི། །གསང་བའི་དབང་མཆོག་ཐོབ་པར་ཤོག །ཨོཾ་ཨ་པ་རི་མི་ཏ་ཨཱ་ཡུརྫྙཱ་ན་ཨ་མྲྀ་ཏ་གུ་ཧྱ་ཨ་བྷི་ཥིཉྩ་མཾ། ཞེས་བརྗོད། དེ་ལྟར་ལུས་ཐམས་ཅད་རྩས་ཁྱབ། དེ་ལ་བྱང་ཆུབ་ཀྱི་སེམས་ཀྱིས་ཁྱབ། དེ་ལ་བདེ་བས་ཁྱབ་པས་བདེ་སྟོང་གི་ཡེ་ཤེས་ནི་གསང་བའི་དབང་གི་ངོ་བོའོ། །དབང་དེ་ཐོབ་པའི་བརྡར་མིག་དར་རྣམས་ཀྱང་འགྲོལ་བར་ཞུ། དེས་གསང་བའི་དབང་ཐོབ། ངག་གི་དྲི་མ་དག །ལམ་རྩ་རླུང་སྒོམ་པ་ལ་དབང་། འབྲས་བུ་ལོངས་སྐུ་ཐོབ་པའི་སྐལ་བ་ཅན་དུ་བྱས་པའི་མོས་པ་མཛོད། གསུམ་པ་ཤེས་རབ་ཡེ་ཤེས་ཀྱི་དབང་གི་དོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཧཱུྃ། མཚན་ལྡན་ཡིད་འོང་གཟུངས་མ་ལ། །བསྟེན་ནས་བཅུ་དྲུག་དགའ་བ་བཞི། །ཤེས་རབ་ཡེ་ཤེས་བདེ་ཆེན་གྱི། །དབང་བསྐུར་དམ་པ་སྩལ་དུ་གསོལ། །ཨོཾ་ཨཱཿཧཱུྃ་གིས་མིག་དར་རྣམས་ཀྱང་འཆིང་བར་ཞུ། རིགས་བཟང་བཅུ་དྲུག་ན་ཚོད་ཅན། །མཐོང་བས་བདེ་བ་སྟེར་བ་འདི། །བུ་ཁྱོད་ཀྱིས་བསྟེན་གཉིས་འཛིན་གྱི། །རྟོག་བྲལ་ལྷན་སྐྱེས་བདེ་ཆེན་མྱོང་། །ཨོཾ་པྲཛྙཱ་ཛྙཱ་ན་ཀརྨ་མུ་དྲ་ཨ་བྷི་ཥིཉྩ་མཾ། ཞེས་རིག་མ་གཏད། སློབ་མ་སྣང་མཐའ་ཚེ་དཔག་མེད་མགོན་དང་། རིག་མ་གོས་དཀར་མོར་གསལ་བའི་མཁའ་གསང་བྱིན་གྱིས་བརླབས། སྙོམས་པར་ཞུགས་པས་དགའ་བ་བཞི་ལུགས་འབྱུང་ལུགས་ལྡོག་གི་བདེ་བ་ཆེན་པོར་ཤེས་པ་ནི་ཤེས་རབ་ཡེ་ཤེས་ཀྱི་དབང་གི་ངོ་བོའོ། །དབང་དེ་ཐོབ་པའི་བརྡར་མིག་དར་རྣམས་ཀྱང་འགྲོལ་བར་ཞུ། དེས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་དག ལམ་ཐིག་ལེ་སྒོམ་པ་ལ་དབང་། འབྲས་བུ་ཆོས་སྐུ་ཐོབ་པའི་སྐལ་བ་ཅན་དུ་བྱས་པའི་མོས་པ་མཛོད། དབང་བཞི་པའི་དོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཀྱེ་མ་རྡོ་རྗེ་སློབ་དཔོན་གྱིས། །གདོད་ནས་རང་བྱུང་བདེ་བ་ཆེའི། །ཡེ་ཤེས་ཅེར་མཐོང་རིག་པའི་རྩལ། །བཞི་པའི་དབང་བསྐུར་གནང་དུ་གསོལ། །ཞེས་པས་གསོལ་བ་བཏབ་ནས་སྔར་དབང་གསུམ་པའི་དུས་ཀྱི་ཉམས་མྱོང་གིས་རྟེན་བྱས་ཏེ། དེ་ལས་སྐྱེས་པའི་བརྟེན་པ་དབང་བཞི་པའི་ཡེ་ཤེས་ཚིག་ཙམ་གྱི་སྒོ་ནས་ངོ་སྤྲད་པ་ནི་འདི་ལ་གསན་པས་ཁྱབ་སྟེ། ཧཱུྃ། ལུགས་འབྱུང་ལུགས་ལྡོག་བདེ་བའི་གཤིས། །བརྗོད་བྲལ་སྟོང་གསལ་ཡེ་ཤེས་ལྔའི། །ཀློང་དུ་འགྱུར་མེད་ཀུན་ཏུ་བཟང་། །ཀུན་ཁྱབ་རང་ངོ་འཕྲོད་པར་ཤོག །ཨོཾ་ཛྙཱ་ན་ཀཱ་ཡ་ཨ་བྷི་ཥིཉྩ་མཾ། རང་རིག་ཀུན་ཏུ་བཟང་པོ་གཤིས་གང་དུའང་མ་གྲུབ་པ། གདངས་བདེ་ཆེན་དུ་མ་འགགས་པ། རྩལ་སྣ་ཚོགས་སུ་སྣང་བ། བསྒོམ་བྱ་སྒོམ་བྱེད་ཐམས་ཅད་ལས་འདས་པའི་གསལ་རིག་རྗེན་ནེ་བ་སྤྲོས་པ་ཐམས་ཅད་དང་བྲལ་བ་ནི་བཞི་པའི་དབང་གི་ངོ་བོ་སྟེ། དེའི་ངང་དུ་ཅུང་ཟད་རེ་མཉམ་པར་འཇོག་པར་ཞུ། དེས་དབང་བཞི་པ་ཐོབ། ཡེ་ཤེས་ཀྱི་དྲི་མ་སྦྱངས། ལམ་རྫོགས་པ་ཆེན་པོ་སྒོམ་པ་ལ་དབང་། འབྲས་བུ་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་པའི་མོས་པ་མཛོད། དེ་ལྟར་ན་དེ་རྣམས་ཀྱིས་དབང་ཡོངས་སུ་རྫོགས་པར་ཐོབ་པས་དམ་ཚིག་དང་སྡོམ་པ་བསྲུང་སྙམ་པའི་ཡིད་ཀྱིས་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་ལན་གསུམ། གཏོང་རག་གི་སླད་དུ་མཎྜལ་ཕུལ། ལུས་ལོངས་སྤྱོད་འབུལ་སྙམ་པས་འདིའི་རྗེས་ཟློས་མཛོད། དེང་ནས་བརྩམས་ཏེ་སོགས་གསུམ། དེ་རྣམས་ཀྱི་སྒོ་ནས་བཅོམ་ལྡན་འདས་ཚེ་དཔག་མེད་རིགས་ལྔ་འཆི་མེད་མཆོག་སྦྱིན་ལྷ་དགུའི་དཀྱིལ་འཁོར་དུ་མངོན་པར་དབང་བསྐུར་བ་ཟབ་མོ་ལེགས་པར་ཕུལ་གྲུབ་པ་ལགས་པས་རང་གཞན་གྱི་དོན་རྒྱ་ཆེན་པོ་མཛད་པ་དང་། དགེ་བའི་རྩ་བ་བྱང་ཆུབ་སྙིང་པོར་ཡོངས་སུ་བསྔོ་བ་འདི་ལྷན་ཅིག་ཏུ་གནང་བར་ཞུ། བསོད་ནམས་འདི་ཡིས་སོགས་བརྗོད་ལ་སློབ་མ་རྣམས་རང་གནས་སུ་བཏང་། གོང་དུ་ཚོགས་མཆོད་གྲུབ་ན་སྐབས་འདིར་ཚོགས་ལ་རོལ་ཞིང་ལྷག་མ་བསྔོ་བ་སོགས་རྗེས་ཆོག་རྣམས་བྱ། མ་གྲུབ་ན་ཚོགས་བྱིན་རླབས་ནས་བརྩམས་ཏེ་ཤིས་བརྗོད་ཀྱི་བར་དཀྱུས་བཞིན་དུ་བྱའོ། །འཆི༷་མེ༷ད་གྲུབ༷་དབང་ཐང་སྟོང་པའི། །ཞལ༷་ལུང༷་བདུད་རྩིའི་སྙིང་པོ་འདིས། །འགྲོ་ཀུན་ཚེ་དང་ཡེ་ཤེས་ཀྱི། །པདྨོ་མཆོག་ཏུ་རྒྱས་གྱུར་ཅིག །ཚེ་དཔག་མེད་འཆི་མེད་དཔལ་སྟེར་དང་འབྲེལ་བའི་རིགས་ལྔ་འཆི་མེད་མཆོག་སྦྱིན་གྱི་སྒྲུབ་ཐབས་དབང་ཆོག་དང་བཅས་པ་འདིའང་རིག་འཛིན་གྱི་བཙུན་པ་མཉྫུ་གྷོ་ཥས་སྦྱར་བའོ།། །།སརྦ་དཱ་མངྒ་ལཾ་བྷ་བ་ཏུ།། །།

[edit]

tshe dpag med rigs lnga 'chi med mchog sbyin gyi sgrub thabs dbang chog dang bcas pa 'chi med grub pa'i zhal lung / @#/__/amA_ra_sid+d+ha_s+yA_ga_ma_nA_mA_pa_ri_mi_tA_yuH__pany+tsa_ku_lA_mr-i_ta_pa_rA_ma_dAn_s+ya_sa_sA_d+ha_kA_b+hi_Shiny+tsa_bi_d+h+ya_sti/_/_ @#/__/tshe dpag med rigs lnga 'chi med mchog sbyin gyi sgrub thabs dbang chog dang bcas pa 'chi med grub pa'i zhal lung zhes bya ba bzhugs so/__/ oM swa sti/__bla ma sku gsum tshe lha dang /__/dbyer med grub dbang thang stong bar/__/btud nas rdo rje'i srog sgrub phyir/__/'chi med grub pa'i zhal lung dbye/__/'di la gsum/__sbyor ba yo byad kyi bshom/__dngos gzhi sgrub pa'i thabs/__smin byed dbang gi cho ga'o/__/dang po ni/__gnas dben par rdul tshon nam ras bris kyi dkyil 'khor 'du bya ba'am/__ma grub na lha grangs dang mnyam pa'i tshom bu tsam la brten pas rung zhing gang ltar yang phyi nang gi mchod pa dang /__tshogs kyi yo byad sogs bkod pas mdzes par bsham mo/__/gnyis pa dngos gzhi sgrub pa'i thabs la'ang gsum las/__dang po sngon 'gro la'ang /__thog mar skyabs yul rnams mdun gyi nam mkhar mngon sum lta bur bzhugs par mos te skyabs su 'gro ba ni/__bdag sogs mkha' mnyam sems can ma lus pa/__/rtsa ba gsum gyi dkyil 'khor lha tshogs la/__/rang rig dpal ldan rdo rje sems dpa'i zhal/__/rang ngo ma 'phrod de srid skyabs su mchi/___/sems bskyed pa ni/__rang la gdod nas yod pa'i rdzogs sangs rgyas/__/cer mthong ngo sprad 'gro kun grol ba'i ched/__/bdag gis bla na med pa'i rnal 'byor mchog__/nyams blangs gzhan don byed par sems bskyed do/__/tshogs bsag pa ni/__bla ma yi dam mkha' 'gro gshegs/__/nyi zla pad+ma'i gdan la bzhugs/__/lus ngag yid gsum gus phyag 'tshal/__/phyi nang gsang ba'i mchod pa 'bul/__/nyams chag sdig sgrib thams cad bshags/__/gsang sngags bsgrubs la rjes yi rangs/__/smin grol gsang sngags chos 'khor bskor/__/mya ngan mi 'da' gsol ba 'debs/__/snying po sems can don du bsngo/__/yang dag rdo rje'i don rtogs shog__/bgegs bskrad ni/__hrIH__rang sems skad cig hrIHyig yongs gyur las/__/khro rgyal rta mgrin zhal gcig phyag gnyis pa/__/be con sdigs mdzub rtse las me dpung 'bar/__/dur khrod chas rdzogs rta skad phyogs bcur sgrogs/__/oM badz+ra kro d+ha ha ya grI wa hu lu hu lu hU~M phaT/__gtor ma/__ra~M ya~M kha~M gis bsang /__swa b+hA was sbyang /__stong pa'i ngang las b+hU~M las rin po che'i snod zab cing rgya che ba'i nang du gtor ma kha dog dri ro nus pa phun sum tshogs pa bdud rtsi'i rgya mtsho chen por gyur/__oM AHhU~M/__lan gsum gyis brlab/__oM sarba big+h+nAn na ma sarba ta thA ga te b+h+yo bi shwa sogs lan gsum gyis bsngos la/__hU~M/__yang dag gsang ba'i dkyil 'khor 'dir/__/'du ba'i lha rnams ma gtogs pa/__/mi dang mi min 'byung po'i tshogs/__/'di ru ma 'dug gzhan du dengs/__/ci ste mi 'gro 'dug gyur na/__/rta mchog rgyal pos rdul du rlog__/oM badz+ra kro d+ha ha ya grI wa hu lu hu lu hU~M phaT/__gnod byed 'byung po u tsa ta ya phaT/__srung 'khor ni/__hU~M/__dbang gi rta skad rab 'tsher zhing /__/'khor lo rdo rje me dpung gis/__/steng 'og phyogs mtshams med gtams pa'i/__/srung ba'i gur khang chen por gyur/__/oM badz+ra tsakra dz+wa la raM raM hU~M b+h+rU~M hU~M/__brda skong bye ba ni/__b+h+rU~M pra be sha ya phaT/__brda phyag 'tshal ba ni/__a la la ho na ma/__/dam bca' ba ni/__oM badz+ra sa ma ya staM/__byin 'bebs pa ni/__hrIH__chos dbyings rnam dag dkyil 'khor nas/__/rang byung tshe yi lha tshogs rnams/__/'gro ba'i don du skur bzhengs la/__/dbang skur byin phob dngos grub stsol/__/oM a pa ri mi ta A yur+dz+nyA na badz+ra sa ma ya A be sha ya a AH__mchod rdzas byin gyis brlab pa ni/__oM swa b+hA wa shud+d+haHsarba d+harmAHswa b+hA wa shud+d+ho\u0f85haM/__raM yaM khaM/__hrIH__'chi med rig 'dzin dkyil 'khor sgrub pa'i rdzas/__/phyi nang gsang ba'i rang byung mchod pa rnams/__/ma dag log 'khrul nyes pa'i tshogs rnams kun/__/ye shes 'bru gsum sbyangs shing byin gyis brlabs/__/oM AHhU~M/__/oM badz+ra puSh+pe/__d+hU pe/__A lo ke__gan+d+he/__nai wi d+ya/__shap+da pU dza hoH__oM AHhU~M mahA pany+tsa pU dza hoH__oM AHhU~M bo d+hi tsit+ta ga Na gu h+ya ma hA pU dza hoH__oM AHhU~M ma hA sarba pany+tsa a mr-i ta rak+ta ba liM ta hU~M hrIThAH__gnyis pa dngos gzhi la/__ting nge 'dzin gsum gyis khog phub nas rten dang brten pa'i dkyil 'khor bskyed pa ni/__oM/__stong nyid snying rje dbyer med rang rig aM/__/de las 'od zer thig 'phros 'byung lnga'i steng /__/b+h+rU~M las bde chen lhun grub gzhal yas khang /__/gru bzhi sgo bzhi rta babs bzhi dang ldan/__/rtsig pa lnga ldan pha gu pa drar bcas/__/dra phyed shar bu mda' yab phibs tog mdzes/__/rdo rje'i rwa gur ye shes me 'od 'phro/__/phyi rol dur khrod brgyad kyis yongs su bskor/__/de dbus pad 'dab bzhi yi lte ba dang /__/'dab mar zla ba'i dkyil 'khor nya gang steng /__/dbus su rma bya shar nas g.yas skor du/__/glang chen shang shang seng+ge mkha' lding gis/__/btegs pa'i rin chen khri steng pad nyi zla'i/__/dbus ma'i gdan steng rgyu yi a~M dmar po/__/yongs gyur snang ba mtha' yas tshe dpag med/__/zhal gcig phyag gnyis longs spyod rdzogs pa'i sku/__/g.yas pa pad+ma g.yon pa tshe bum bsnams/__/yum chen gos dkar tshe mda' bum 'dzin 'khyud/__/yab yum snyoms par zhugs pa'i sbyor mtshams nas/__/b+h+rU~M swA hU~M hA phyogs bzhir babs pa las/__/snang mdzad tshe dpag dkar po g.yas 'khor lo/__/rin 'byung tshe dpag ser po g.yas rin chen/__/mi bskyod tshe dpag sngon po g.yas rdo rje/__/don grub tshe dpag ljang gu g.yas rgya gram/__/bzhi ka'ang g.yon pa tshe yi bum pa 'dzin/__/spyan ma rin chen sgrol ma mA ma kI/__/dam tshig sgrol ma dkar ser sngo ljang can/__/tshe mda' bum pa 'dzin pas yab la 'khyud/__/yab rnams mthon mthing thor tshugs yum rnams grol/__/bzhin 'dzum chags dang rgyas pa'i nyams kyis mdzes/__/rin chen rgyan spras dar gyi na bza' gsol/__/yab rnams rdor skyil yum rnams pad skyil bzhugs/__/sgo bzhir dzaHhU~M ba~M hoHsgo ma bzhi/__/dkar ser dmar ljang g.yas pa tshe mda' g.yob/__/g.yon pa lcags kyu zhags pa lcags sgrog dril/__/dar dang rin chen rgyan ldan gar gyis bzhengs/__/spyan 'dren ni/__hrIH__sngon gyi bskal pa'i thog ma la/__/'gro drug sdug bsngal thugs rjes gzigs/__/smon lam stobs bskyed 'gro don mdzad/__/bcom ldan mgon po tshe dpag med/__/gnas mchog 'di ru gshegs su gsol/__/sems can 'dzin pas bcings pa rnams/__/lam gyi bar chad sel ba'i phyir/__/'gugs 'dren 'chings sdom dgyes mdzad ma/__/sgo srung lha mo chen mo bzhi/__/gnas 'dir spyan 'dren gshegs su gsol/__/oM a pa ri mi ta A yur+dz+nyA na sa ma ya dzaHdzaH__bzhugs su gsol ba ni/__hrIH__chos dbyings lhun grub bde chen gzhal yas 'dir/__/dbyings kyi thig le 'od phung 'khyil ba'i dbus/__/rig pa rang shar tshe dpag med mgon sku/__/mnyam nyid don gyi dbyings su brtan par bzhugs/__/oM badz+ra sa ma ya tiSh+Than+tu/__phyag 'tshal ba ni/__hrIH__bcom ldan tshe dpag med mgon lha tshogs la/__/snang stong skye 'gags med pa'i dbyings nyid du/__/bzang ngan gnyis 'dzin ye nas bral ba yi/__/mnyam nyid don gyi ngang du phyag 'tshal lo/__/na mo pu ru sha ya hoH__mchod pa 'bul ba ni/__hrIH__rig mdangs tshe yi lha tshogs la/__/mchod pa'i bye brag 'bul ba ni/__/me tog bdug spos mar me dri/__/zhal zas sgra snyan lha mo rnams/__/so so'i kha dog phyag rgya sgyur/__/rab 'byams nam mkha'i khams bkang nas/__/rgyal ba'i dkyil 'khor mchod par bya/__/oM AHhU~M badz+ra puSh+pe nas shap+da pU dza hoH__hrIH__rig mdangs tshe yi lha tshogs la/__/rang byung bdud rtsi rnam lnga dang /__/sha lnga dam tshig mchog gi rdzas/__/nang gi bdag nyid dag par bzhes/__/ma hA a mr-i ta maM sa pany+tsa pU dza hoH__hrIH__tshe dpag med mgon lha tshogs la/__/snang stong bde chen yab yum mkhar/__/dga' bzhi ye shes thig ler 'khyil/__/zung 'jug bde chen mchod par bzhes/__/oM bo d+hi tsit+ta pU dza hoH__hrIH__tshe dpag med mgon lha tshogs la/__/rtsa brgyad bdud rtsi'i mchod pa dang /__/bde chen rak+ta'i mchod pa dang /__/dam rdzas gtor ma'i mchod pa rnams/__/don dam dbyings kyi mchod par 'bul/__/mthun 'jug mchog gi mchod par bzhes/__/oM ma hA pany+tsa a mr-i ta rak+ta ba liM ta kha raM khA hi/__/bstod pa ni/__hrIH__dang po byang chub mchog tu thugs bskyed nas/__/smon lam stobs kyis 'gro ba'i don mdzad pa'i/__/mthong thos dran pas sdug bsngal kun las grol/__/rigs lnga tshe dpag med la phyag 'tshal bstod/__/byams dang snying rje dga' ba btang snyoms kyi/__/tshad med bzhi yis 'gro ba'i don mdzad pa/__/sems can las dang mthun pa'i lam sna 'dren/__/sgo skyong lha mo bzhi la phyag 'tshal bstod/__/dzab bzla ba ni/__hrIH__rang byung rnam dag gzhal yas 'dir/__/bcom ldan tshe dpag med mgon lha/__/sna tshogs sku dang cha lugs la/__/thugs srog dzab kyi rang sgra sgrogs/__/mi 'gyur thugs las 'od zer 'phros/__/phar 'phros sems can don rnams rdzogs/__/tshur 'dus dngos grub bcud du bsdu/__/rtag mthong bar du rgyun mi bcad/__/oM AHhU~M hrIHhrIHbadz+ra gu ru pad+ma sid+d+hi pu N+ye dz+nyA na A yur sid+d+hi dzaH__zhes ci nus bzla/__/gsum pa rjes kyi rim pa la/__tshogs mchod bya ba ni/__mngon par bshams pa'i yo byad rnams la bsang chu 'thor zhing /__oM sarba dra byaM saM sho d+ha ni hU~M phaT/__raM yaM khaM/__/tshogs rdzas kyi dngos 'dzin thams cad ye shes kyi me rlung chus sbyangs te stong pa'i ngang las tshogs gzhong b+hany+dza 'bar bar tshogs rdzas ye shes kyi bdud rtsi 'dod yon gyi sprin 'phro bar gyur/__oM AHhU~M hrIH__lan gsum gyis brlabs te/__tshogs zhing spyan 'dren pa ni/__hrIH__rang bzhin rnam dag gzhal yas nas/__/bcom ldan mgon po tshe dpag med/__/rigs lnga sgo ba bzhi yi lha/__/tshogs la spyan 'dren gshegs su gsol/__/phud cha gsum du spros te dang po mchod pa ni/__gzugs sgra dri ro reg bya chos/__/kun tu bzang po'i mchod pa'i sprin/__/nam mkha' mdzad kyi sgo phyes te/__/'bul gyis bzhes la dngos grub stsol/__/oM a pa ri mi ta A yur+dz+nyA na g+ha Na tsa kra sarba pU dza khA hiH__bar pa bshags pa ni/__ma rig las dang nyon mongs kyis/__/rtsa ba yan lag dam tshig gi__/nongs par gyur pa'i nyes pa kun/__/gnong 'gyod sems kyis mthol zhing bshags/__/yi ge brgya ba brjod/__tha ma bsgral ba ni/__e nr-i tri dzaH__sku stod dbang chen khros pa'i gzugs/__/sku smad gnam lcags phur bu'i dbal/__/dgra bgegs log 'dren dam sri yi/__/snying la btab bo mA ra ya/__/sha khrag rus pa rdul du rlog__/oM badz+ra kro d+ha ha ya grI wa gnod byed dgra bgegs sha trUn mA ra ya rbad/__ces bsgral/__oM a pa ri mi ta A yur+dz+nyA na ma hA maM sa rak+ta keM ni ri ti khA hi/__zhes 'bul/__de nas rnal 'byor pa rnams kyis tshogs kyi dam rdzas nang gi sbyin sreg gi tshul du tshim par rol mthar smon lam gdab/__lhag ma rnams bsdus te gtsang lhag dang bcas pa bdud rtsis bran/__oM AHhU~M/__lhag ma'i dam tshig 'dod yon gyi phung po zad mi shes pa nam mkha' gang bar gyur/__ces pas byin gyis brlabs te bsngo ba ni/__hrIH__tshe dpag med mgon bka' 'khor na/__/dam pa'i chos kyi srung ma ni/__/lha chen brgyad dang klu chen brgyad/__/gza' chen brgyad dang gnod sbyin brgyad/__/rgyal chen bzhi dang phyogs skyong bcu/__/rgyu skar nyi shu rtsa brgyad dang /__/ha ri ka dang pany+tsi ka__/'phrog ma ma bur bcas pa dang /__/dpal ldan mgon po lcam dral dang /__/lha dang lha min mi'am ci/__/dri za gnod sbyin 'byung po dang /__/lha srin sde brgyad thams cad la/__/mchod sbyin gtor ma 'di bsngos pas/__/ci 'dod phun sum tshogs par shog__/ji ltar nus pa'i phrin las mdzod/__/ba liM ta pU dza hoH__brtan ma skyong ba ni/__hU~M/__a su ra yi brag phug tu/__/slob dpon pad+ma 'byung gnas kyi/__/spyan sngar khas blangs dam bcas pa'i/__/bod yul brtan ma bcu gnyis dang /__/phyi gtor dbang bar khas blangs rnams/__/mchod sbyin gtor ma 'di longs la/__/bdud dpung thul la zhing bcu sgrol/__/dal kha chings la 'bru phyugs spel/__/dmag dpung choms la mtshon cha rtul/__/bcol ba'i dam tshig dran par mdzod/__/sgrub pa sogs kyi skabs su dngos grub blang ba ni/__hrIH__skye med chos dbyings pho brang nas/__/thugs rje 'gags med tshe yi lha/__/mnyam nyid dbyings nas skur bzhengs la/__/sku gsum yongs rdzogs dngos grub stsol/__/rtsa sngags mthar oM AHhU~M ma hA sid+d+hi hU~M/__gtong rag gi mchod pa kha gsos la/__oM a pa ri mi ta A yur+dz+nyA na sa pa ri wA ra ar+g+haM sogs kyis mchod/__dang por byang chub mchog tu thugs bskyed nas/__/sogs kyis bstod/__ma rnyed yongs su ma tshang dang /__/sogs kyi mthar yi ge brgya pa lan gsum gyis nongs pa bshags/__rten yod na brtan bzhugs dang /__med na gshegs gsol bya zhing /__bdag nyid dam tshig pa'i 'khor lo bsdu ba ni/__hrIH__snod bcud ma lus gzhal yas khang la thim/__/de nyid 'khor dang 'khor yang gtso la thim/__/gtso bo mi dmigs stong pa'i ngang nyid las/__/slar yang 'ja' tshon bzhin du gsal bar gyur/__/smon lam ni/__dge ba 'di yis mkha' mnyam 'gro kun gyi/__/sgrib gnyis de 'bras ma lus kun byang nas/__/tshe dpag med mgon go 'phang mngon gyur te/__/rang gzhan don gnyis ma lus 'grub par shog__/bkra shis ni/__/chos sku snang mtha' longs sku tshe dpag med/__/sprul pa'i sku mchog pad 'byung thang stong pa/__/sku gsum dbyer med dkyil 'khor lha tshogs kyi/__/bkra shis phyogs dus kun tu khyab par shog__/ces sogs shis pa brjod pa'i dbyangs snyan mngon par bsgrags shing me tog gi char sil mas phyogs dus kun tu khyab par bya'o/__/gsum pa smin byed dbang gi cho ga la/__thog mar sbyor ba yo byad bsham pa'i skabs/__dkyil 'khor gyi dbus su lding khri'i khar rnam bum gyi mdun du lha tsaka__shar du dbu rgyan/__lhor rdo rje/__nub tu dril bu/__byang du rdor dril bsnol ma/__g.yas g.yon du gsang rdzas dang rig tsaka__/nye logs ci bde bar maN+Dal/__mig dar/__me tog__/rdor dril/__/glegs bam/__dung /__slob dpon gyi mdun du las bum sogs 'og tu nyer mkho'i rigs thams cad 'du byas te/__dngos gzhi sgrub mchod skyabs sems nas bzlas pa'i bar bdag mdun dbyer med kyi tshul du las gzhung bsrangs te bzlas pa ci rigs pa bya/__rnam bum la dmigs bsal gyi bzlas pa byed na/__gzungs thag nas 'jus te/__bdag srog sngags kyi 'od zer gzungs thag la/__/'khril te bum pa'i lha tshogs thugs rgyud bskul/__/de dag sku las byang sems bdud rtsi'i rgyun/__/babs pas bum chur gnyis med ro gcig gyur/__/ces pa'i dmigs gnad dang sbyar te bzlas pa ji ltar rigs pa dang /__las bum du skad cig gis khro bo rta mgrin dmar nag zhal gcig phyag gnyis pa g.yas be con dang g.yon pad+ma 'dzin par gsal ba'i sku las rdo rje bdud rtsi'i rgyun dpag tu med pa babs pas bum pa gang bar gyur/__oM badz+ra kro d+ha ha ya grI wa hu lu hu lu hU~M phaT/__ces ci nus bzlas mthar/__mchod bstod dang yi ge brgya pa lan gsum/__oM AHhU~M gis mchod yon phul/__hU~M zhes brjod pas rnam rgyal gyi lha rnams 'od du zhu ba'i 'chi med byang chub sems kyi bdud rtsis bum pa gang bar mos/__las bum gyi lha la/__dkyil 'khor gyi bya ba mthar ma phyin par bgegs zlog pa'i phrin las mdzod cig__/ces gsol te/__hU~M zhes brjod pas lha 'od du zhu ba'i dbang drag gi rang bzhin gyi chu'i rdul phra rab tu gyur par bsam/__tshogs kyi mchod pa ni skabs 'di'am dbang gi mtha' gang 'os su bya zhing /__skabs 'dir byed na bsgral mchod yan grub par bya'o/__/de nas dbang gi bya ba dngos la gnyis las/__dang po bdag 'jug ni/__rgyas par slob ma la ji ltar bya ba bzhin dbang rdzogs par blang ba'am/__bsdu na rig pa'i me tog dor ba tsam gyis bdag nyid nus ldan du bya/__gnyis pa slob ma rjes su bzung ba la/__dkyil 'khor du 'jug pa dang /__zhugs nas mngon par dbang bskur ba gnyis kyi dang po la/__slob ma rnams yol ba'am sgo'i phyi rol du las bum gyi chus khrus bya zhing /__me tog dang bcas pas thal mo sbyar te/__kyai/__khro rgyal dbang chen he ru ka__/sna tshogs khro bo'i tshwa tshwa 'phro/__/gtum chen ging gi pho nyar bcas/__/ma rig sgo phye bdag sogs rnams/__/srid pa'i mtsho las bsgral ba'i phyir/__/khyed kyis nang du gtong bar gsol/__/zhes lan gsum gyis gsol ba gdab/__slob dpon gyis lan du/__bdud dang mu stegs theg dman sogs/__/snod min lha dang phyag rgya rdzas/__gsang spyod lta bar mi rung ba/__/yin na ma 'dug phyir dengs shig__/ces dris pa'i lan du/__bdag cag snying rje chen po'i mthus/__/'gro rnams bsgral 'dod bsam pa yis/__/theg mchog smin grol don gnyer na/__/de don bdag la gnang bar mdzod/__/ces lan gsum/__bgegs gtor btang ba las byang gi sngon 'gro'i skabs ltar byas la gu gul gyis bdug__/yungs kar gyis brabs te slob ma rnams nang du gzhug__/srung 'khor bsgom pa rnams sngon du 'gro bas/__'o nam mkha' dang mnyam pa'i sems can thams cad kyi don du mthar thug rdzogs pa'i sangs rgyas tshe dpag med kyi go 'phang thob pa dang /__gnas skabs 'chi med tshe'i dngos grub bsgrub pa'i phyir bcom ldan 'das mgon po tshe mtha' yas pa'i dbang bskur zab mo gsan snyam pa'i thugs bskyed dang /__chos nyan pa'i kun spyod thams cad kyang tshul bzhin du gsal btab nas gsan 'tshal/__de la yang dag par rdzogs pa'i sangs rgyas rnams kyis gsang sngags rdo rje theg pa'i rgyud sde rin po che rnams nas tshe sgrub pa'i thabs tshul bsam gyis mi khyab pa zhig gsungs pa las mchog tu gyur pa ni mgon po tshe dang ye shes dpag tu med pa nyid yin la/__de la'ang zab mo'i bka' srol ji snyed cig mchis pa las/__'dir ni 'chi med grub pa'i dbang phyug thang stong rgyal po zhes mtshan nyi zla ltar yongs su grags pa de nyid gdul bya dag pa'i snang ngor o rgyan gyi slob dpon mtsho skyes rdo rje dang dbyer ma mchis kyang /__thun mong ba rnams drang pa'i slad lho nub rnga yab pad+ma 'od kyi pho brang du sku dngos su byon nas o rgyan chen po las zab rgyas kyi gdams pa mtha' yas pa dang /__khyad par tshe sgrub zab mo 'di nyid gsan/__bsam yas mchims phu nas zab gter kyang bzhes pa'i bka' gter zung du 'brel ba'i gdams pa zab mo la brten nas grub chen nyid kyis dgung lo brgya dang nyer lnga tsam bzhugs te sku tshe dang phrin las mthar phyin ba'i rten 'brel gyis rjes 'jug kyang sku tshe'i dngos grub brnyes pa du ma byung bas mtshon byin rlabs kyi tshan kha gzhan las ches khyad par du gyur pa tshe sgrub 'chi med dpal ster du grags pa 'di la'ang ring brgyud/__nye brgyud gnyis dang /__phyi ma la'ang bka' babs tha dad pa 'ga' zhig mchis pa las/__da lam 'dir skabs su bab pa ni/__chos kyi rgyal po khri srong lde'u btsan gyi 'bras bu mthar phyin pa'i phrin las kyi rnam par 'phrul pa/__gangs can mkhas grub rgya mtsho'i gtsug rgyan/__kun mkhyen rgyal ba'i dbang po rdo rje thogs med rtsal zhes mtshan gyi grags dkar srid zhi'i bla na mngon par mtho ba gang de'i dag pa ye shes kyi gzigs ngor shar ba'i yang gsang rgya can gyi chos sde nyi shu rtsa lnga'i nang tshan/__rta mgrin pad+mas mtshan pa'i bum pa'i rgya can las tshe dpag med rigs lnga 'chi med mchog sbyin gyi dkyil 'khor du dbang bskur ba yin te/__de'ang kun mkhyen bla ma nyid sa phag hor zla bzhi pa'i nang gru 'dzin gnyis pa'i gzhal med khang chen por bod khams bde thabs kyi ched du zab mo'i rnal 'byor la gzhol ba'i tshe sbyir dag pa'i gzigs snang mtha' yas pa dang /__bye brag tu zla ba de'i tshes bcu bzhi la tshe sgrub 'chi med dpal ster gyi nyams bzhes gnang skabs rje grub thob chen po'i ye shes kyi skus byin gyis brlabs shing dbang bskur ba dang lung bstan mang du stsal/__khyad par lo de'i hor zla dgu pa'i tshes brgyad nas bzung grub pa'i dbang phyug thang stong rgyal po'i phyag gi dz+hai k+ShiM las grub pa'i bum pa la brten nas 'chi med dpal ster gyi sgrub pa bdun phrag gcig tu gnang bas rje grub thob chen po nyid mngon sum du mdun gyi nam mkhar byon/__bcom ldan 'das tshe dpag tu med pa lha dgu'i dkyil 'khor skad cig gis sprul te dbang yongs su rdzogs par bskur ba ltar kun mkhyen chen po nyid kyis kyang rig 'dzin sprul pa'i sku pad+ma phrin las dang rtsod bral dus bab kyi gter ston rig 'dzin gter bdag gling pa sogs skal ldan chos bdag rnams la rim par spel ba nas bzung bdag cag gi dpal ldan bla ma dam pa'i bar du brgyud pa bar ma chad pa las byon pa'i gdams pa zab mo 'di nyid kyi sgo nas slob ma rjes su bzung ba la/__slob dpon gyi bya ba rnams grub nas/__khyed rang rnams kyi ngo skal du gyur pa la'ang dkyil 'khor du 'jug pa dang /__zhugs nas mngon par dbang bskur ba gnyis su yod pa las/__dang po dkyil 'khor du 'jug pa'i chos rnams zhu ba'i yon du maN+Dal phul/__me tog dang bcas pas thal mo sbyar te mi phyed dad pa'i gdung shugs drag pos gsol ba 'debs pa 'di'i rjes zlos lan gsum mdzod/__rgyal ba kun gyi gsung gi lha/__/tshe dpag med mgon dkyil 'khor du/__/bdag sogs snod ldan legs drangs nas/__/smin cing grol bar mdzad du gsol/__/de nas rgyud yongs su sbyang ba'i phyir/__mdun gyi nam mkhar skyabs yul rnams mngon sum lta bur bzhugs pa'i spyan sngar skyabs 'gro sems bskyed tshogs bsags pa rnams tshig phyir sems gzhol bas 'di rnams kyi rjes zlos mdzod/__bdag sogs mkha' mnyam sems can ma lus pa/__/sogs las byang ltar re re nas lan gsum re brjod du gzhug__/rigs lnga'i sdom pa bzung ba'i slad du dmigs pa 'di bzhin du mdzod/__mdun gyi nam mkha'i gnas su bcom ldan 'das mgon po tshe dang ye shes dpag tu med pa rigs lnga 'chi med mchog sbyin gyi dkyil 'khor 'khor lo'i lha tshogs sangs rgyas dang byang chub sems dpa' dpa' bo mkha' 'gro chos skyong srung ma'i tshogs dang bcas pa sprin phung gtibs pa ltar bzhugs pa'i spyan sngar dus 'di nas bzung ste byang chub snying po'i bar du rigs lnga'i sdom pas bsdus pa'i rig 'dzin sngags kyi sdom pa rnams bzung bar bgyi'o snyam pas 'di'i rjes zlos mdzod/__hoH__phyogs bcu dus bzhi'i rgyal ba sras bcas rnams/__/rang byung dkyil 'khor chen por lhun rdzogs pa'i/__/rigs 'dus tshe dpag med kyi lha tshogs rnams/__/bdag la brtse bas gsan cing dgongs su gsol/__/bdag cag dus 'di nas bzung byang chub bar/__/bla med dkon mchog gsum la skyabs mchi zhing /__/byang chub sems mchog mi nyams bzung bar bgyi/__/rdo rje snying po rtsa ba rigs lnga po'i/__/dam tshig ma lus bdag gis bzung bar bgyi/__/lhun grub de bzhin rigs kyi dam tshig tu/__/skyabs gsum khrims gsum ma lus bzung bar bgyi/__/mi 'gyur rdo rje'i rigs kyi dam tshig tu/__/phyag rgya rnam gsum mi 'bral bzung bar bgyi/__/'dod 'byung rin chen rigs kyi dam tshig tu/__/sbyin pa rnam bzhi'i las la brtson par bya/__/skyon bral pad+ma'i rigs kyi dam tshig tu/__/dam chos ma lus yongs su bzung bar bya/__/sna tshogs las kyi rigs kyi dam tshig tu/__/sdom ldan mchod pa'i las la brtson par bya/__/khyad par lha sngags bde chen rdo rje gsum/__/bdag gi sgo gsum mnyam sbyor bsgrub pa dang /__/shes dang mi spang dang du blang ba dang /__/bsgrub dang spyad par bya ba lnga lnga ste/__/nyi shu rtsa brgyad rtsa ba yan lag bcas/__/gsang sngags rdo rje snying po'i sdom pa kun/__bdag gis ma lus yongs su bzung bar bya/__/de yis 'gro kun srid mtsho las bsgral te/__/bla med rdo rje 'chang gi sa thob shog__/ces lan gsum brjod/__de nas sngon chad bcom ldan 'das tshe dpag med rigs lnga'i dkyil 'khor ma mjal ba'i brdar mig dar dmar po re bcings pa'i mos pa mdzod/__oM tsak+Shu b+han+d+ha wA ra ma na ye hU~M/__dkyil 'khor pa dang mjal ba'i tshe phyag rten gyi slad du me tog gi phreng ba kha dog lnga pa re yang byin pa'i mos pa mdzod/__oM puSh+pe sid+d+hi hU~M/__gzhi lus byin gyis brlab pa'i slad du dmigs pa 'di bzhin du mdzod/__/khyed rang rnams skad cig gis bcom ldan 'das mgon po tshe dang ye shes dpag tu med pa'i skur lam gyis gsal ba'i spyi bor oM/__mgrin par AH__thugs kar hU~M gis mtshan par gyur/__oM a pa ri mi ta A yur+dz+nyA na sa pa ri wA ra ar+g+haM nas shab+da'i bar gyis mchod/__dkyil 'khor gyi phyogs bzhi nas gsol ba 'debs pa 'di'i rjes zlos lan gsum mdzod/__phrin las bzhi yi las mdzad pa'i/__/dkar ser dmar ljang sgo ma bzhi/__/dkyil 'khor gsang ba'i sgo phye la/__/bdag sogs nang du gtong bar gsol/__/slob dpon gtso bo'i rnam pa'i phyag gi rdo rje la 'jus te dkyil 'khor gyi nang du khrid pa'i mos pa dang bcas te yol ba yod na bsal/__phyag 'tshal ba 'di'i rjes zlos mdzod/__rang sems don gyi tshe dpag med/__/gdod nas lhun gyis grub pa'i gzugs/__/mngon sum logs su gsal mthong bar/__/gnyis med don gyi phyag 'tshal lo/__/na mo pu ru sha ya hoH__des phyi ltar 'jug pa song nas/__nang 'jug gi sngon 'gro dam la bzhag pa la gsum las/__phan yon dang nyes dmigs gnyis ka'i sgo nas dam la bzhag pa ni/__slob dpon gtso bor gsal ba'i phyag gi rdo rje mgo bor bzhag ste/__ho:__shin tu gnyan pa'i dkyil 'khor 'dir/__/khyod kyi dngos grub myur thob par/__/gegs byed gsang ba gzhan dag la/__/smras na dam tshig nyams par 'gyur/__/oM badz+ra sa ma ya hU~M/__mna' chu sbyin pa'i sgo nas dam la bzhag pa ni/__rdo rje'i dam tshig nyer bsrungs na/__/dngos grub ma lus myur du thob/__/'das na dpag med duHkha'i rgyu/__/de phyir dam srungs 'di 'thung zhing /__/oM badz+ra u da ka ThA ThA ThA/__zhes mna' chu sbyin/__/bla ma'i bka' gnyan pa'i sgo nas dam la bzhag pa ni 'di la gsan pas khyab ste/__hoH__khyod kyi tshe dpag med mgon de/__/deng nas brtsams te nga yin pas/__/nga yi bsgo ba las 'das na/__/mnar med dmyal bar ltung ta re/__/oM badz+ra sa ma ya hU~M/__nang 'jug gi dngos gzhi ye shes dbab pa'i don du gsol ba 'debs pa 'di'i rjes zlos lan gsum mdzod/__ho rdo rje 'dzin pa dgongs su gsol/__/tshe dpag med mgon lha tshogs kyi/__/sku gsung thugs kyi byin rlabs rnams/__/dus 'dir bdag la dbab tu gsol/__/slar yang khyed rang rnams dkyil 'khor gyi gtso bo bcom ldan 'das mgon po tshe dang ye shes dpag tu med pa sku mdog dmar po zhal gcig phyag gnyis pa longs spyod rdzogs sku'i cha lugs can yum gos dkar mo dang mnyam par sbyor ba'i skur lam gyis gsal 'debs par zhu/__/bla ma'i sku las 'od zer 'phros/__mdun bskyed kyi thugs kar phog__/gnyis ka'i thugs ka nas 'od zer dpag tu med pa 'phros pas bde ba can sogs dag pa'i zhing rab 'byams nas sangs rgyas dang byang chub sems dpa' thams cad bcom ldan 'das mgon po tshe dpag med kyi rnam bar byon te khyed rang rnams kyi dbu gtsug nas sib sib thim pa'i mos pa mdzod/__hrIH__chos dbyings rnam dag dkyil 'khor nas/__/rang byung tshe yi lha tshogs rnams/__/'gro ba'i don du skur bzhengs la/__/dbang skur byin phob dngos grub stsol/__/oM a pa ri mi ta A yur+dz+nyA na badz+ra sa ma ya A be sha ya a AH__zhes byin dbab/__spyi bor rdo rje rgya gram du bzhag ste/__de ltar byin phab pa'i ye shes pa rnams brtan par byas pa'i mos pa mdzod/__oM badz+ra tiSh+Than+tus brtan par bya/__de nas dngos grub kyi ltas brtag pa'i phyir khyed rang rnams mig ras dang bcas dkyil 'khor gyi bar snang la gzigs te kha dog gang mthong ba de nged la smros shig__/ces mthong ba dri/__de'ang dkar ser dmar mthing ljang gu rnams mthong na rim bzhin zhi rgyas dbang drag las sna tshogs 'grub par 'gyur ba yin no/__/de nas sngar byin pa'i me tog gi cod pan de nyid dkyil 'khor du dor ba dang bcas te 'di'i rjes zlos mdzod/__hoH__tshe dpag med mgon dkyil 'khor du/__/rin thang med pa'i me tog 'bul/__/rigs kyi las 'phro gang sad pa'i/__/yi dam lha la 'babs par shog__/oM badz+ra puSh+pe pU dza hoH__slar yang me tog gang la phog pa'i lhag pa'i lhas me tog gi phreng ba khyed rang rnams kyi spyi bor bcings te dbang bskur ba'i mos pa mdzod/__hU~M/__mthu stobs dbang phyug tshe dpag med/__/khyod kyis rdo rje'i slob ma 'di/__/bla na med pa'i byang chub mchog__/ma thob de srid rjes zungs shig__/puSh+pe mu ku Ta a b+hi Shiny+tsa hU~M/__zhes me tog phreng bas dbang bskur/__hoH__ji ltar mig mkhan rgyal po yis/__/'jig rten rab rib bsal ba ltar/__/bu khyod kyis ni mi shes pa'i/__/rab rib rgyal ba rnams kyis bsal/__/oM badz+ra tsak+Shu pra be sha ya phaT/__ma rig pa'i ling tog dang mig ras lhan cig tu bsal bas bcom ldan 'das tshe dpag med lha dgu'i rten dang brten pa'i dkyil 'khor pa rnams mngon sum bzhin du gzigs pa'i mos pa mdzod/__des dkyil 'khor du 'jug pa'i chos rnams song nas/__zhugs nas mngon par dbang bskur ba la'ang /__sgyu 'phrul drwa ba'i rgyud las bum pa gsang ba shes rab dang /__/de ma thag pa bzhi pa ste/__/zhes pa ltar bzhi yod pa las/__dang po bum dbang la'ang gnyis kyi/__dang po thun mong rig pa'i dbang lnga zhu ba'i yon du maN+Dal phul/__gsol ba 'debs pa 'di'i rjes zlos lan gsum mdzod/__hoH__rdo rje 'dzin pa dgongs su gsol/__/tshe dpag med mgon lha tshogs kyi/__/rig pa'i dbang lnga ma lus rnams/__/dus 'dir bdag la dbab tu gsol/__/las bum gyi chus bgegs bsang /__oM badz+ra a mr-i tas bsang /__oM swa b+hA was sbyang /__slob ma dang rnam rgyal bum pa stong pa nyid du gyur/__stong pa'i ngang las gnyis ka'ang pad+ma nyi zla'i gdan la hU~M sngon po las mi bskyod tshe dpag med sku mdog sngon po zhal gcig phyag gnyis longs spyod rdzogs sku'i cha byad_ can phyag g.yas rdo rje dang g.yon bum pa bsnams pa/__yum mA ma kI sku mdog sngon mo tshe mda' bum pa 'dzin pa dang snyoms par zhugs pa'i spyi bor oM/__mgrin par AH__thugs kar hU~M/__thugs ka'i hU~M las 'od zer 'phros pas bsgoms pa dang 'dra ba'i ye shes pa oM badz+ra sa mA dzaH__dzaHhU~M baM hoH__oM badz+ra a pa ri mi ta A yur+dz+nyA na sa pa ri wA ra ar+g+haM nas/__shab+da'i bar gyis mchod/__mi bskyod tshe dpag med yab yum snyoms par zhugs/__zhu ba las byung pa'i dbang rdzas bum chur gyur pas spyi bo nas dbang bskur ba'i mos pa mdzod/__mi bskyod tshe dpag med mgon gyi/__/gsang ba gsum las byung ba yi/__/bum pa'i dbang bskur chen po 'di/__/skal ldan bu la sbyin par bya/__/oM badz+ra a pa ri mi ta A yur+dz+nyA na badz+ra ka la sha a b+hi Shiny+tsa maM/__zhes mi bskyod pa bum pa'i chus dbang bskur bas zhe sdang dag ste rnam shes gnas gyur/__mi bskyod tshe dpag med gyi ngo bor gyur pa'i mos pa mdzod/__dbu rgyan bsang sbyang /__stong pa'i ngang las slob ma dang dbu rgyan swA las rin 'byung tshe dpag med sku mdog ser po zhal gcig phyag gnyis longs spyod rdzogs sku'i cha byad can phyag g.yas rin po che dang g.yon tshe bum 'dzin pa/__yum rin chen sgrol ma sku mdog ser mo tshe mda' bum pa 'dzin pa dang snyoms par zhugs pa'i spyi bor oM/__mgrin par AH__thugs kar hU~M/__thugs ka'i hU~M las 'od zer 'phros pas bsgoms pa dang 'dra ba'i ye shes pa oM badz+ra sa mA dzaHsa spyan drang zhing bstim/__oM rat+na a pa ri mi ta A yur+dz+nyA na sa pa ri wA ra ar+g+haM nas/__shab+da'i bar gyis mchod/__rin 'byung tshe dpag med yab yum snyoms par zhugs/__zhu ba las byung ba'i dbang rdzas cod pan du gyur pa spyi bor bcings te dbang bskur ba'i mos pa mdzod/__rin 'byung tshe dpag med mgon gyi/__/gsang ba gsum las byung ba yi/__/cod pan dbang bskur chen po 'di/__/skal ldan bu la sbyin par bya/__/oM rat+na a pa ri mi ta A yur+dz+nyA na rat+na mu ku Ta a b+hi Shiny+tsa maM/__zhes rin chen 'byung ldan cod pan gyi dbang bskur bas ser sna dag ste tshor ba gnas gyur/__rin 'byung tshe dpag med kyi ngo bor gyur pa'i mos pa mdzod/__rdo rje bsang sbyang /__stong pa'i ngang las slob ma dang rdo rje oM las snang mtha' tshe dpag med sku mdog dmar po zhal gcig phyag gnyis longs spyod rdzogs sku'i cha byad can/__g.yas pad+ma dang g.yon tshe bum 'dzin pa/__yum gos dkar mo dmar mo tshe mda' bum pa 'dzin pa dang snyoms par zhugs pa'i spyi bor oM/__mgrin par AH__thugs kar hU~M/__thugs ka'i hU~M las 'od zer 'phros pas bsgoms pa dang 'dra ba'i ye shes pa oM badz+ra sa mA dzaHsa spyan drang zhing bstims la mchod/__snang mtha' tshe dpag med yab yum snyoms par zhugs/__zhu ba las byung ba'i dbang rdzas rdo rjer gyur pa lag g.yas su byin te dbang bskur ba'i mos pa mdzod/__snang mtha' tshe dpag med mgon gyi/__/gsang ba gsum las byung ba yi/__/rdo rje'i dbang bskur chen po 'di/__/skal ldan bu la sbyin par bya/__/oM pad+ma a pa ri mi ta A yur+dz+nyA na ma hA badz+ra a b+hi Shiny+tsa maM/__zhes 'od dpag med rdo rje'i dbang bskur bas 'dod chags dag ste 'du shes gnas gyur/__snang mtha' tshe dpag med kyi ngo bor gyur pa'i mos pa mdzod/__dril bu bsang sbyang /__stong pa'i ngang las slob ma dang dril bu hA las don grub tshe dpag med sku mdog ljang gu zhal gcig phyag gnyis longs spyod rdzogs sku'i cha lugs can g.yas rgya gram dang g.yon bum pa 'dzin pa/__yum dam tshig sgrol ma sku mdog ljang gu g.yas tshe mda' dang g.yon bum pa 'dzin pa dang snyoms par zhugs pa'i spyi bor oM/__mgrin par AH__thugs kar hU~M/__thugs ka'i hU~M las 'od zer 'phros pas bsgoms pa dang 'dra ba'i ye shes pa oM badz+ra sa mA dzaHsa spyan drang zhing bstims la mchod/__don grub tshe dpag med yab yum snyoms par zhugs/__zhu ba las byung ba'i dbang rdzas dril bur gyur pa lag g.yon du byin te dbang bskur ba'i mos pa mdzod/__don grub tshe dpag med mgon gyi/__/gsang ba gsum las byung ba yi/__/dril bu'i dbang bskur chen po 'di/__/skal ldan bu la sbyin par bya/__/oM karma a pa ri mi ta A yur+dz+nyA na d+harmA gaN+De a b+hi Shiny+tsa maM/__zhes don yod grub pa dril bu'i dbang bskur bas phrag dog dag ste 'du byed gnas gyur/__don grub tshe dpag med kyi ngo bor gyur pa'i mos pa mdzod/__rdor dril bsang sbyang /__stong pa'i ngang las slob ma dang rdor dril b+h+rU~M las rnam snang tshe dpag med sku mdog dkar po zhal gcig phyag gnyis pa longs spyod rdzogs sku'i cha byad can phyag g.yas 'khor lo dang g.yon bum pa 'dzin pa/__yum sangs rgyas spyan ma sku mdog dkar mo g.yas tshe mda' dang g.yon bum pa 'dzin pa dang snyoms par zhugs pa'i spyi bor oM/__mgrin par AH__thugs kar hU~M/__thugs ka'i hU~M las 'od zer 'phros pas bsgoms pa dang 'dra ba'i ye shes pa oM badz+ra sa mA dzaHsa spyan drang zhing bstims la mchod/__rnam snang tshe dpag med yab yum snyoms par zhugs/__zhu ba las byung ba'i dbang rdzas rdor dril du gyur pa lhan cig tu spyi bor dkrol zhing rdo rje'i ming btags te dbang bskur ba'i mos pa mdzod/__rnam snang tshe dpag med mgon gyi/__/gsang ba gsum las byung ba yi/__/mig gi dbang bskur chen po 'di/__/skal ldan bu la sbyin par bya/__/oM bud+d+ha a pa ri mi ta A yur+dz+nyA na badz+ra nA ma a b+hi Shiny+tsa maM/__zhes ming gi dbang bskur bas gti mug dag ste gzugs phung gnas gyur/__rnam snang tshe dpag med kyi ngo bor gyur pa'i mos pa mdzod/__de nas thun mong ma yin pa rdo rje slob dpon gyi dbang gi don du maN+Dal phul/__gsol ba 'debs pa 'di'i rjes zlos lan gsum mdzod/__hoH__phyir mi ldog pa slob dpon gyi/__/dbang bskur dam pa stsal du gsol/__dkyil 'khor gyi shar sgor seng ges btegs pa'i khri'i steng du khyed rang rnams skad cig gis bcom ldan 'das mgon po tshe dang ye shes dpag tu med pa'i skur lam gyis gsal 'debs par zhu/__rdo dril/__glegs bam/__dung /__'khor lo rnams gtad de/__hoH__rigs rnams kun gyi bdag nyid che/__/rdo rje slob dpon dbang bskur bas/__/smin grol rgyud dang man ngag rnams/__/'chad nyan bsgom pa'i dbang thob shog__/de nas mtha' rten rigs lnga ka'i phyag gi bum pa'i chus dbang bskur bar mos la/__rigs lnga tshe dpag med pa yi/__/gsang ba gsum las byung ba yi/__/bum pa'i dbang bskur chen po 'di/__/skal ldan bu la sbyin par bya/__/oM a pa ri mi ta A yur+dz+nyA na ka la sha a b+hi Shiny+tsa maM/__oM a pa ri mi ta A yur+dz+nyA na sa pa ri wA ra ar+g+haM nas/__shab+da'i bar gyis mchod/__bgegs rigs stong phrag brgyad cu zhi ba dang /__/zhes pa'i sh+lo ka gcig gis shis pa brjod/__rjes 'brel du nang ye shes lha'i dbang bskur ba ni/__dkyil 'khor pa rnams kyi thugs ka nas rang 'dra ba'i sku gnyis pa re byung ste khyed rang rnams kyi gnas so sor thim pas lha so so'i byin rlabs dang nus mthu ma lus pa rgyud la zhugs pa'i mos pa mdzod/__ces brda sbyar la gtso bo'i sku snying gar bzhag ste/__snang mtha' tshe dpag med pa yis/__/skal ldan 'di la dbang bskur bas/__/'du shes phung po gnas gyur nas/__/sor rtog ye shes thob par shog__/pad+ma a pa ri mi ta a yur+dz+nyA na a b+hi Shiny+tsa maM/__snang mdzad tshe dpag med kyi sku spyi bor bzhag ste/__hrIH__bud+d+ha tshe dpag med pa yis/__/skal ldan 'di la dbang bskur bas/__/gzugs kyi phung po gnas gyur nas/__/me long ye shes thob par shog__/bud+d+ha a pa ri mi ta A yur+dz+nyA na a b+hi Shiny+tsa maM/__rin 'byung tshe dpag med kyi sku lte bar bzhag ste/__hrIH__rat+na tshe dpag med mgon gyis/__/skal ldan 'di la dbang bskur bas/__/tshor ba'i phung po gnas gyur nas/__/mnyam nyid ye shes thob par shog__/rat+na a pa ri mi ta A yur+dz+nyA na a b+hi Shiny+tsa maM/__mi bskyod tshe dpag med kyi sku mgrin par bzhag ste/__hrIH__mi bskyod tshe dpag med mgon gyis/__/skal ldan 'di la dbang bskur bas/__/rnam shes phung po gnas gyur nas/__/chos dbyings ye shes thob par shog__/badz+ra a pa ri mi ta A yur+dz+nyA na a b+hi Shiny+tsa maM/__don grub tshe dpag med kyi sku gsang gnas su bzhag ste/__hrIH__karma tshe dpag med mgon gyis/__/skal ldan 'di la dbang bskur bas/__/'du byed phung po gnas gyur nas/__/bya grub ye shes thob par shog__/karma a pa ri mi ta A yur+dz+nyA na a b+hi Shiny+tsa maM/__shar sgo ma lag g.yas su bzhag ste/__hrIH__lha mo lcags kyu ma yi dbang /__/skal ldan 'di la dbang bskur bas/__/zhi ba'i phrin las mthar phyin nas/__/byams pa chen po'i dbang thob shog__/oM badz+ra ang+ku sha a b+hi Shiny+tsa maM/__lho sgo ma lag g.yon du bzhag ste/__hrIH__lha mo zhags pa ma yi dbang /__/skal ldan 'di la dbang bskur bas/__/rgyas pa'i phrin las mthar phyin nas/__/snying rje chen po'i dbang thob shog__/oM badz+ra pA sha a b+hi Shiny+tsa maM/__nub sgo ma pus mo g.yas su bzhag ste/__hrIH__lha mo lcags sgrog ma yi dbang /__skal ldan 'di la dbang bskur bas/__/dbang gi phrin las mthar phyin nas/__/dga' ba chen po'i dbang thob shog__/oM badz+ra s+pho Ta a b+hi Shiny+tsa maM/__byang sgo ma pus mo g.yon du bzhag ste/__hrIH__lha mo dril bu ma yi dbang /__/skal ldan 'di la dbang bskur bas/__/drag po'i phrin las mthar phyin nas/__/btang snyoms chen po'i dbang thob shog__/oM badz+ra gaN+De a b+hi Shiny+tsa maM/__des bum pa'i dbang thob/__lus kyi dri ma dag__lam bskyed rim sgom pa la dbang /__'bras bu sprul sku thob pa'i skal ba can du byas pa'i mos pa mdzod/__gnyis pa gsang dbang gi don du maN+Dal phul/__gsol ba 'debs pa 'di'i rjes zlos lan gsum mdzod/__kye/__dga' chen bdag nyid slob dpon che/__/byang chub sems kyi chu rgyun gyis/__/bdag lus rtsa khams kun khyab nas/__/gtum mo'i ye shes bskyed du gsol/__/oM AHhU~M gis mig dar rnams kyang 'ching bar zhu/__de nas bla ma tshe dpag med rigs lnga rigs kyi yum lngar snyoms par zhugs pa'i byang chub kyi sems thod pa'i rdzas dang dbyer med du bsres te/__khyed rang rnams kyi lce thog tu bzhag pa'i mos pa mdzod/__hrIH__dkar dmar byang chub sems kyi rgyun/__/skal ldan bu la byin pa yis/__/rtsa khams bde bas yongs khyab pa'i/__/gsang ba'i dbang mchog thob par shog__/oM a pa ri mi ta A yur+dz+nyA na a mr-i ta gu h+ya a b+hi Shiny+tsa maM/__zhes brjod/__de ltar lus thams cad rtsas khyab/__de la byang chub kyi sems kyis khyab/__de la bde bas khyab pas bde stong gi ye shes ni gsang ba'i dbang gi ngo bo'o/__/dbang de thob pa'i brdar mig dar rnams kyang 'grol bar zhu/__des gsang ba'i dbang thob/__ngag gi dri ma dag__/lam rtsa rlung sgom pa la dbang /__'bras bu longs sku thob pa'i skal ba can du byas pa'i mos pa mdzod/__gsum pa shes rab ye shes kyi dbang gi don du maN+Dal phul/__gsol ba 'debs pa 'di'i rjes zlos lan gsum mdzod/__hU~M/__mtshan ldan yid 'ong gzungs ma la/__/bsten nas bcu drug dga' ba bzhi/__/shes rab ye shes bde chen gyi/__/dbang bskur dam pa stsal du gsol/__/oM AHhU~M gis mig dar rnams kyang 'ching bar zhu/__rigs bzang bcu drug na tshod can/__/mthong bas bde ba ster ba 'di/__/bu khyod kyis bsten gnyis 'dzin gyi/__/rtog bral lhan skyes bde chen myong /__/oM pradz+nyA dz+nyA na karma mu dra a b+hi Shiny+tsa maM/__zhes rig ma gtad/__slob ma snang mtha' tshe dpag med mgon dang /__rig ma gos dkar mor gsal ba'i mkha' gsang byin gyis brlabs/__snyoms par zhugs pas dga' ba bzhi lugs 'byung lugs ldog gi bde ba chen por shes pa ni shes rab ye shes kyi dbang gi ngo bo'o/__/dbang de thob pa'i brdar mig dar rnams kyang 'grol bar zhu/__des shes rab ye shes kyi dbang thob/__yid kyi dri ma dag__lam thig le sgom pa la dbang /__'bras bu chos sku thob pa'i skal ba can du byas pa'i mos pa mdzod/__dbang bzhi pa'i don du maN+Dal phul/__gsol ba 'debs pa 'di'i rjes zlos lan gsum mdzod/__kye ma rdo rje slob dpon gyis/__/gdod nas rang byung bde ba che'i/__/ye shes cer mthong rig pa'i rtsal/__/bzhi pa'i dbang bskur gnang du gsol/__/zhes pas gsol ba btab nas sngar dbang gsum pa'i dus kyi nyams myong gis rten byas te/__de las skyes pa'i brten pa dbang bzhi pa'i ye shes tshig tsam gyi sgo nas ngo sprad pa ni 'di la gsan pas khyab ste/__hU~M/__lugs 'byung lugs ldog bde ba'i gshis/__/brjod bral stong gsal ye shes lnga'i/__/klong du 'gyur med kun tu bzang /__/kun khyab rang ngo 'phrod par shog__/oM dz+nyA na kA ya a b+hi Shiny+tsa maM/__rang rig kun tu bzang po gshis gang du'ang ma grub pa/__gdangs bde chen du ma 'gags pa/__rtsal sna tshogs su snang ba/__bsgom bya sgom byed thams cad las 'das pa'i gsal rig rjen ne ba spros pa thams cad dang bral ba ni bzhi pa'i dbang gi ngo bo ste/__de'i ngang du cung zad re mnyam par 'jog par zhu/__des dbang bzhi pa thob/__ye shes kyi dri ma sbyangs/__lam rdzogs pa chen po sgom pa la dbang /__'bras bu ngo bo nyid sku thob pa'i skal ba can du byas pa'i mos pa mdzod/__de ltar na de rnams kyis dbang yongs su rdzogs par thob pas dam tshig dang sdom pa bsrung snyam pa'i yid kyis 'di'i rjes zlos mdzod/__gtso bos ji ltar sogs lan gsum/__gtong rag gi slad du maN+Dal phul/__lus longs spyod 'bul snyam pas 'di'i rjes zlos mdzod/__deng nas brtsams te sogs gsum/__de rnams kyi sgo nas bcom ldan 'das tshe dpag med rigs lnga 'chi med mchog sbyin lha dgu'i dkyil 'khor du mngon par dbang bskur ba zab mo legs par phul grub pa lags pas rang gzhan gyi don rgya chen po mdzad pa dang /__dge ba'i rtsa ba byang chub snying por yongs su bsngo ba 'di lhan cig tu gnang bar zhu/__bsod nams 'di yis sogs brjod la slob ma rnams rang gnas su btang /__gong du tshogs mchod grub na skabs 'dir tshogs la rol zhing lhag ma bsngo ba sogs rjes chog rnams bya/__ma grub na tshogs byin rlabs nas brtsams te shis brjod kyi bar dkyus bzhin du bya'o/__/'chiX meXd grubaX dbang thang stong pa'i/__/zhalaX lungaX bdud rtsi'i snying po 'dis/__/'gro kun tshe dang ye shes kyi/__/pad+mo mchog tu rgyas gyur cig__/tshe dpag med 'chi med dpal ster dang 'brel ba'i rigs lnga 'chi med mchog sbyin gyi sgrub thabs dbang chog dang bcas pa 'di'ang rig 'dzin gyi btsun pa many+dzu g+ho Shas sbyar ba'o//__//sarba dA mang+ga laM b+ha ba tu//__//