JKW-KABAB-19-DZA-001

🚧 This website is under continued development. We appreciate your patience!

First text in volume. Back to Volume PageNext Text

Wylie title	'jam dpal gshin rje'i thugs tig slob dpon 'jam dpal bshes gnyen gyi dgongs pa'o
Location	mkhyen brtse'i bka' babs Volume 19, Text 1, Pages 1-18 (Folios 1a to 9b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Associated People	འཇམ་དཔལ་བཤེས་གཉེན་ (Mañjuśrīmitra)
Citation	'jam dbyangs mkhyen brtse'i dbang po. 'jam dpal gshin rje'i thugs tig slob dpon 'jam dpal bshes gnyen gyi dgongs pa'o. In Rdzong sar 'jam dbyangs mkhyen brtse'i dbang po'i bka' babs, Vol. 19: 1-18. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Revelations - gter ma  ·  Root Treasure - gter gzhung
Cycle	འཇམ་དཔལ་གཤིན་རྗེའི་ཐུགས་ཏིག་ ('jam dpal gshin rje'i thugs tig)
Deity	'jam dpal gshin rje
Karchag page	JKW-KABAB-Volume-19-DZA-Karchag
RTZ	In the Rinchen Terdzö: https://rtz.tsadra.org/index.php/Terdzo-TSA-032
Colophon	ཞེས་པའང་སློབ་དཔོན་འཇམ་དཔལ་བཤེས་གཉེན་གྱིས་བྱིན་གྱིས་བརླབས་ཤིང༌། ལྷུན་གྲུབ་རིག་འཛིན་བློ་ལྡན་མཆོག་སྲེད་ཀྱིས་རྗེས་སུ་གདམས་པའི་སྙན་བརྒྱུད་འདི་ནི། གནུབས་ཀྱི་སྐྱེ་རྒྱུད་ཟུང་སོགས་སྐལ་བ་དང་ལྡན་པ་དག་ལ་ཕན་པའི་ཡིད་ཀྱིས་མཚོ་སྐྱེས་རྡོ་རྗེ་འཆང་དགྱེས་པའི་འབངས་པདྨ་འོད་གསལ་མདོ་སྔགས་གླིང་པས་སྐད་ཅིག་གིས་གཏན་ལ་ཕབ་པའོ།།
	zhes pa'ang slob dpon 'jam dpal bshes gnyen gyis byin gyis brlabs shing*/__lhun grub rig 'dzin blo ldan mchog sred kyis rjes su gdams pa'i snyan brgyud 'di ni/__gnubs kyi skye rgyud zung sogs skal ba dang ldan pa dag la phan pa'i yid kyis mtsho skyes rdo rje 'chang dgyes pa'i 'bangs pad+ma 'od gsal mdo sngags gling pas skad cig gis gtan la phab pa'o

Tibetan Text

Wylie

[edit]

༁ྃཿ འཇམ་དཔལ་གཤིན་རྗེའི་ཐུགས་ཏིག་བཞུགས༔

སློབ་དཔོན་འཇམ་དཔལ་བཤེས་གཉེན་གྱི་དགོངས་པའོ།།

༁ྃཿ འཇམ་དཔལ་གཤིན་རྗེ་གཤེད་ལ་ཕྱག་འཚལ་ལོ༔ གཟུང་འཛིན་དྲེགས་པའི་གཤིན་རྗེ་ཡི༔ གཤེད་པོ་སེམས་ཉིད་འོད་གསལ་བ༔ རོལ་པ་འགག་མེད་ལྷ་སྐུར་ཤར༔ དེ་ཉིད་སྒྲུབ་པའི་རྣལ་འབྱོར་ནི༔ ཨཿ རང་བཞིན་གདོད་ནས་མཉམ་པ་ཉིད༔ སྐྱེ་བ་མེད་པའི་ཡེ་ཤེས་ལས༔ སྐྱེ་བའི་གཟུགས་བརྙན་ཡི་གེ་ཨ༔ སྣོད་བཅུད་བརྟན་གཡོ་ཀུན་གྱི་སྲོག༔ ཆོ་འཕྲུལ་ཆེན་པོའི་རོལ་པ་ཡིས༔ མ་དག་སྣང་བ་དབྱིངས་སུ་ནུབ༔ ལྷུན་གྲུབ་ཡེ་ཤེས་གཞལ་མེད་ཁང་༔ རིན་ཆེན་དུར་ཁྲོད་རྒྱན་རྫོགས་དབུས༔ ཀླུ་འབུམ་གཉན་ཁྲི་ས་བདག་སྟོང་༔ ཕྱོགས་སྐྱོང་མ་ཧེ་ཉི་ཟླའི་གདན༔ དེ་སྟེང་སྟོང་ཉིད་ཕྱག་རྒྱ་ཆེ༔ འཁོར་འདས་ཟིལ་གནོན་ཧེ་རུ་ཀ༔ ཆོས་ཉིད་མི་འགྱུར་སྐུ་མདོག་མཐིང་༔ རྣམ་པར་ཐར་པ་གསུམ་གྱི་དབུ༔ གཡས་དཀར་ཀླུ་འབུམ་སྦྲུལ་དུ་འདྲེན༔ གཡོན་དམར་གཉན་ཁྲིའི་སྙིང་ནས་གསོལ༔ དབུས་མཐིང་དགྲ་བགེགས་ས་བདག་ཟ༔ རྒྱུ་དྲུག་འཁོར་བ་སྒྲོལ་བའི་ཕྱག༔ ཡེ་ཤེས་དྲུག་གི་ཕྱག་མཚན་ཅན༔ འཁོར་ལོ་རལ་གྲི་རྡོ་རྗེ་གཡས༔ བེ་ཅོན་གཏུན་ཤིང་སྡིགས་མཛུབ་གཡོན༔ རྫུ་འཕྲུལ་ཞབས་བཞི་དོར་སྟབས་ཀྱིས༔ དུག་གསུམ་དྲེགས་པའི་དཔྱི་ནས་བརྫིས༔ གླང་ཆེན་ཀོ་རློན་དུར་ཁྲོད་ཆས༔ སྦྲུལ་དང་རིན་ཆེན་ཙིཏྟས་བརྒྱན༔ དབུ་ལ་རིགས་ལྔ་ཁྲོ་བོའི་སྐུ༔ དྲེགས་པའི་སྙིང་དང་ནཱ་གའི་མགོ༔ དོ་ཤལ་ཁྲོ་བོའི་ཆས་ཀ་རྫོགས༔ དེ་བཞིན་ཉིད་དབྱིངས་ཁྲོས་པའི་སྐུ༔ ཡུམ་ནི་དམིགས་མེད་ཆོས་ཀྱི་དབྱིངས༔ མཐིང་ནག་སྙིང་སྟོབས་གྲི་ཐོད་འཁྱུད༔ རྒྱན་དང་སྤྲུལ་པའི་ལྷ་རྣམས་ཀུན༔ ཉི་མ་དང་ནི་འོད་ཟེར་བཞིན༔ མ་བསྐྱེད་རང་བྱུང་རོལ་པའི་རྩལ༔ འཁོར་འདས་ཡོངས་རྫོགས་ཆེན་པོར་གསལ༔ ས་མ་ཡ༔ ལྷ་སྐུའི་ཏིང་འཛིན་བརྟན་པ་ན༔ ཐུགས་ཀར་འཇམ་དཔལ་ཡེ་ཤེས་སེམས༔ དམར་སེར་རལ་གྲི་གླེགས་བམ་ཕྱག༔ དེ་ཡི་ཙིཏྟའི་གུར་ཁང་དབུས༔ ཉི་སྟེང་ཧཱུྃ་གི་ནཱ་ད་ལས༔ ཡི་གེ་དྲུག་པ་རྡོ་རྗེའི་སྒྲ༔ སྔགས་ཀྱི་གཟུགས་སུ་སྣང་བ་ལས༔ འོད་ཟེར་འཕྲོས་པས་འཕགས་པ་མཆོད༔ མཁྱེན་བརྩེ་ནུས་པའི་བྱིན་རླབས་བསྡུས༔ གསལ་ཞིང་འབར་བའི་འོད་ཟེར་གྱིས༔ སྒྲིབ་གཉིས་མུན་པ་སེལ་བར་བསམ༔ ཨོཾ་ཝཱ་གཱི་ཤྭ་རི་མཱུྃ༔ ཞི་བར་བསྙེན་པ་འབུམ་ཕྲག་དྲུག༔ བཟླས་ཏེ་ཁྲོ་བོར་སྒྲུབ་པ་ནི༔ ཧཱུྃ་མཐར་རྡོ་རྗེའི་སྔགས་ཕྲེང་ལས༔ སྐུ་དང་སྔགས་ཕྲེང་ཕྱག་མཚན་ཚོགས༔ འབར་བའི་འོད་ཟེར་དང་བཅས་འཕྲོས༔ སྣང་སྲིད་སྦྱངས་ཏེ་རང་ལ་བསྟིམ༔ ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ༔ ལྷ་སྔགས་ཐ་དད་མི་ཕྱེད་པ༔ འབུམ་ཕྲག་བཅུ་དྲུག་ལས་ཀུན་བྱེད༔ འཇམ་དཔལ་ཁྲོ་བོའི་ནུས་པ་རྫོགས༔ ས་མ་ཡ༔ དོན་གྱི་གཤེད་པོ་སྒྲུབ་པ་ནི༔ སེམས་ཀྱི་རང་བཞིན་འོད་གསལ་བ༔ ཐོག་མ་བར་དང་མཐར་མི་གནས༔ རྒྱུ་དང་རྐྱེན་དང་འབྲས་བུ་མེད༔ ཕྱག་རྒྱ་ཆེན་པོའི་ངང་དུ་བཞག༔ ལུས་གནད་བྱེད་བཅིངས་དབང་པོའི་མཆོག༔ དབྱིངས་སུ་གཟིར་པས་རྟགས་རྣམས་རྫོགས༔ འགྲོ་བའི་མར་མེ་ཡེ་ཤེས་སྒྲོན༔ དོན་གྱི་འཇམ་དཔལ་ཚེ་འདིར་འགྲུབ༔ ས་མ་ཡ༔ དབང་བསྐུར་བྱེད་ན་སྣོད་ལྡན་པའི༔ སློབ་མས་གསོལ་བ་འདི་ལྟར་གདབ༔ ཆོས་དབྱིངས་བདེ་བར་དགྱེས་རོལ་པའི༔ འཇམ་དཔལ་ཁྲག་འཐུང་དགོངས་སུ་གསོལ༔ ཧེ་རུ་ཀ་དཔལ་གྲོང་ཁྱེར་དུ༔ བདག་ཅག་འཇུག་ཅིང་སྨིན་པར་འཚལ༔ རྒྱུད་སྦྱངས་ལྷར་བསྐྱེད་ཡེ་ཤེས་དབབ༔ བརྟན་པར་བྱས་རྗེས་བུམ་དབང་ནི༔ ཨོཾ༔ ཡེ་ཤེས་དག་པ་བུམ་པའི་དབྱིངས༔ ཕྱག་རྒྱ་ཟིལ་གནོན་ཞུ་བའི་བཅུད༔ རིགས་ལྔ་འདུས་པའི་བདུད་རྩི་ཡིས༔ ཡེ་ཤེས་ལྔ་རུ་དབང་བསྐུར་རོ༔ སྔགས་མཐར༔ ཨོཾ་ཧཱུྃ་ཏྲཱྃ་ཧྲཱི༔ཨཱཿ ཀཱ་ལཱ་ཤ་ཨ་བྷི་ཥིཉྩ་ཨོཾ༔ སྐུ་དང་རྒྱན་ཆས་ཕྱག་མཚན་བསྟིམ༔ ཧཱུྃ༔ རང་བྱུང་ཐིག་ལེ་ཉག་གཅིག་ལས༔ འཁོར་འདས་ཟིལ་གནོན་ལྷ་སྐུར་ཤར༔ གཉིས་མེད་ཕྱག་རྒྱའི་དབང་བསྐུར་བས༔ སྣང་ཞེན་གཟུང་འཛིན་རང་གྲོལ་ཤོག༔ ཀཱ་ཡ་ཨ་བྷི་ཥིཉྩ་ཨོཾ༔ ཧཱུྃ༔ དཔལ་ཆེན་འབར་བ་དབང་གི་ཆས༔ དུར་ཁྲོད་ཆེན་པོའི་ལོངས་སྤྱོད་ཀྱིས༔ དྲེགས་པའི་སྟོབས་དང་སྲོག་འཕྲོག་པའི༔ རྗེ་བཙུན་མཆོག་ཏུ་མངའ་གསོལ་ལོ༔ ཤྲཱི་ཧེ་རུ་ཀ་ཨཱ་ལཾ་ཀ་ར་ཨ་བྷི་ཥིཉྩ་མི༔ ཧཱུྃ༔ སྲིད་པའི་དྲྭ་བ་འཇོམས་ཤིང་གཅོད༔ ཉོན་མོངས་བདུད་འདུལ་བདུད་དགྲ་གསོད༔ གཟུང་འཛིན་ཚར་གཅོད་གདུག་པ་ཅན༔ བསྡིགས་ཤིང་ཟིལ་གནོན་དབང་བསྐུར་རོ༔ ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཨ་བྷི་ཥིཉྩ་མི༔ བཟླས་པའི་ལུང་སྦྱིན་སྔགས་བྱང་གཏད༔ ཧཱུྃ༔ དཔལ་ཆེན་གསང་སྔགས་རྡོ་རྗེའི་སྒྲ༔ རྟག་ཏུ་ཆུ་བོའི་གཞུང་བཞིན་ཟློས༔ རབ་འབྱམས་ཕྲིན་ལས་འགྲུབ་པ་དང་༔ སྲོག་རྩོལ་དག་པའི་དབང་ཐོབ་ཤོག༔ ཝཱ་ཀ་ཨ་བྷི་ཥིཉྩ་ཨཱཿ དགོངས་པ་ངོ་སྤྲད་དོན་དབང་བསྐུར༔ ཧཱུྃ༔ ཨེ་ཉིད་སྟོང་པ་ཆོས་འབྱུང་ལས༔ མ་སྐྱེས་གནས་པ་དྲན་པར་བྱ༔ རྒྱུ་རྐྱེན་སྔགས་ལས་མ་བསྐྱེད་པར༔ དབྱིངས་རིག་ཟུང་འཇུག་རྟོགས་པར་འགྱུར༔ ཨ་ཨ་ཨ་ཙིཏྟ་ཨ་བྷི་ཥིཉྩ་ཧཱུྃ༔ རྡོ་རྗེའི་སྡིགས་མཛུབ་སྙིང་གར་གཏད༔ ཡེ་ཤེས་སེམས་དཔའ་སྙིང་དབུས་བསྟིམ༔ དྷཱིཿ སངས་རྒྱས་ཀུན་གྱི་ཡེ་ཤེས་སྐུ༔ འཇམ་དཔལ་ངག་གི་དབང་ཕྱུག་ནི༔ རྟག་ཏུ་སྙིང་ལ་ཡང་དག་གནས༔ བྱིན་རླབས་མཆོག་གིས་དབང་བསྐུར་རོ༔ ཨོཾ་ཝ་གི་ཤྭ་རི་མཱུྃ༔ ཛྙཱ་ན་ས་ཏྭ་ཨ་བྷི་ཥིཉྩ་མི༔ ཡོན་ཏན་ཡོངས་རྫོགས་བམ་ཆེན་ནི༔ ལྷར་གསལ་སློབ་མའི་གཙུག་ཏུ་བཞག༔ ཧོཿ དཔའ་བརྟུལ་སྔགས་ཀྱིས་བྱིན་བསྐྱེད་པའི༔ བམ་ཆེན་རྨེ་བའི་དོན་དང་སྦྱོར༔ རྡོ་རྗེ་འཛིན་པའི་དབང་ཐོབ་ནས༔ ཡེ་ཤེས་ཡོན་ཏན་ཡོངས་རྫོགས་ཤོག༔ མ་ཧཱ་མཱཾ་ས་གུ་ཎ་སིདྡྷི་ཨ་བྷི་ཥིཉྩ་ཧོཿ ལྷ་བསྟིམ་དངོས་གྲུབ་དམ་རྫས་སྦྱིན༔ ཕྲིན་ལས་མཆོད་རྟེན་སྤྱི་བོར་བཞག༔ ཧཱུྃ༔ སྲུང་དང་བཤིག་དང་བསད་པ་དང་༔ ཀློག་དང་མནན་དང་དཀྲུགས་པ་སོགས༔ རབ་འབྱམས་ཕྲིན་ལས་དབང་བསྒྱུར་བའི༔ ཡོངས་རྫོགས་མཆོད་རྟེན་དབང་བསྐུར་རོ༔ སརྦ་ཀརྨ་ཨ་བྷི་ཥིཉྩ་ཧཱུྃ༔ བྱང་ཆུབ་སེམས་ཀྱི་བདུད་རྩི་སྦྱིན༔ ཨཱཿ སྦྱོར་བ་དག་པའི་བྱང་ཆུབ་སེམས༔ མཚན་ལྡན་ཕྱག་རྒྱའི་པདྨོར་བསྐྱིལ༔ དཀར་དམར་ལྷག་པའི་དམ་ཚིག་རྫས༔ དཔའ་བོ་ཆེན་པོས་མཉམ་པར་རོལ༔ བྷོ་དྷི་ཙིཏྟ་གུ་ཧྱ་ཨ་བྷི་ཥིཉྩ་ཧོཿ མཚན་ལྡན་གཟུངས་མ་བྱིན་བརླབས་སྦྱིན༔ ཧཱུྃ༔ བཀྲ་ཤིས་པདྨའི་མཚན་ལྡན་གསང་བའི་ཡུམ༔ སངས་རྒྱས་ཀུན་གྱི་འབྱུང་གནས་ཆེ༔ འདིར་ཞུགས་འདིར་ལྟོས་འདི་དོན་སྤྱོད༔ ལྷན་ཅིག་སྐྱེས་དགའི་དབང་ཐོབ་ཤོག༔ ཀརྨ་མུ་དྲ་མ་ཧཱ་སུ་ཁ་ཨ་བྷི་ཥིཉྩ་ཧཱུྃ༔ མེ་ལོང་འཇའ་ཤེལ་བརྡས་མཚོན་ཏེ༔ དབྱིངས་རིག་འཇམ་དཔལ་དོན་ངོ་སྤྲད༔ ཧོཿ ཀ་ནས་དག་པའི་དགོངས་པ་ལས༔ ལྷུན་གྲུབ་ཡེ་ཤེས་སྣང་བ་ཤར༔ ཟུང་འཇུག་ཟིལ་གནོན་ཕྱག་རྒྱ་ཆེ༔ རང་བྱུང་དོན་གྱི་དབང་ཐོབ་ཤོག༔ ཛྙཱ་ན་དྷཱ་ཏུ་ཨ་བྷི་ཥིཉྩ་ཨ་ཨ་ཨ༔ དྲེགས་པའི་དམར་གཏོར་ལག་ཏུ་གཏད༔ ཡ་བྷྱོ༔ ཆགས་སྡང་དབང་གིས་དྲེགས་པ་ནི༔ མ་མོ་གཤིན་རྗེའི་ཚོགས་ཡིན་ཏེ༔ དབང་སྡུད་བྲན་དུ་བཀོལ་ནས་ཀྱང་༔ ཕྲིན་ལས་རབ་འབྱམས་སྒྲུབ་པར་གྱིས༔ ཡ་བྷྱོཿཨ་བྷི་ཥིཉྩ་ཧཱུྃ༔ བཀྲ་ཤིས་ཚེ་གལ་མཐུན་བསྡེབས་སྦྱིན༔ བྷྲཱུྃཿ སྙིང་པོའི་སྲོག་དང་བྱང་ཆུབ་སེམས༔ མི་འགྱུར་ཐིག་ལེ་གཅིག་ཏུ་འཁྱིལ༔ རྡོ་རྗེ་ཚེ་ཡི་དབང་བསྐུར་བས༔ འཆི་མེད་རྟག་པའི་དབང་ཐོབ་ཤོག༔ ཨཱ་ཡུརྫྙཱ་ན་ཨ་བྷི་ཥིཉྩ་བྷྲཱུྃ༔ བཀྲ་ཤིས་བརྗོད་ཅིང་མེ་ཏོག་འཐོར༔ དམ་ཚིག་ཁས་བླང་གཏང་རག་དབུལ༔ ཕྱག་རྒྱ་ཟིལ་གནོན་ཡོངས་རྫོགས་ཀྱི༔ སྨིན་བྱེད་དབང་གི་སྙིང་པོའོ༔ ས་མ་ཡ༔ སྲུང་དང་བཟློག་པའི་ཕྲིན་ལས་ནི༔ རྒྱ་ཤོག་གཙང་མར་རྒྱ་སྣག་གིས༔ འཁོར་ལོ་རྩིབས་བརྒྱད་མུ་ཁྱུད་བཅས༔ ལྟེ་བར་ཨེ་མཐར་སྤེལ་ཚིག་དང་༔ རྩིབས་བརྒྱད་རྩ་བའི་གསང་སྔགས་བཀོད༔ མུ་ཁྱུད་དབྱངས་གསལ་འདོད་གསོལ་དང་༔ རྟེན་སྙིང་རྡོ་ར་མེ་རིས་བསྐོར༔ གི་བྃ་ཤུ་དག་གུ་གུལ་བྱུག༔ རབ་ཏུ་གནས་ཤིང་ལུས་ལ་འཆང་༔ པུ་རི་དཀར་པོའི་ཀློང་སྒྲོམ་དུ༔ ཕྱག་རྒྱ་ཟིལ་གནོན་ལྷ་སྐུར་བསྒོམ༔ ཕྱི་རོལ་འཁོར་ལོ་དྲུག་གིས་གཏམས༔ མི་ཕྱེད་རྡོ་རྗེའི་རང་བཞིན་བསམ༔ བཛྲ་ཀཱ་ཝཱ་ཙིཛྙཱ་ན་ཙ་ཀྲ་རཀྵ་རཀྵ་བྷྲཱུྃ༔ བཟླས་ཤིང་ལྟ་བའི་གདིང་བསྐྱེད་ལ༔ སྲིད་གསུམ་འཁྲུགས་ཀྱང་ཡ་མི་ང་༔ ཕྱིར་ཟློག་འཁོར་ལོ་འཆང་བའམ༔ དམར་གཏོར་དགྲ་བགེགས་འགུག་ཅིང་བསྟིམ༔ ཐོད་རྔ་བརྡུང་ཞིང་ཕྲིན་ལས་བཅོལ༔ ཧཱུྃ་བྷྱོ༔ བདེ་གཤེགས་མཐུ་སྟོབས་འདུས་པའི་དཔལ༔ འཁོར་འདས་ཟིལ་གནོན་ཧེ་རུ་ཀ༔ ཡབ་ཡུམ་སྤྲུལ་པ་ཡང་འཁོར་བཅས༔ དབྱིངས་ལས་ཡེ་ཤེས་སྐུ་རུ་བཞེངས༔ དགྲ་བགེགས་ཤ་ཁྲག་གཏོར་མ་བཞེས༔ མངོན་སྤྱོད་དམོད་པའི་དུས་ལ་བབ༔ རྣལ་འབྱོར་བདག་ཅག་འཁོར་བཅས་ཀྱི༔ དུག་གསུམ་རྒྱུ་འབྲས་ལས་བྱུང་བའི༔ ནད་རིགས་བཞི་བརྒྱ་རྩ་བཞི་ཟློག༔ མ་རིག་རྣམ་རྟོག་ལས་བྱུང་བའི༔ གདོན་བགེགས་སྟོང་ཕྲག་བརྒྱད་ཅུ་ཟློག༔ ཀུན་བརྟགས་འཁྲུལ་པ་ལས་བྱུང་བའི༔ ལྟས་ངན་བརྒྱད་ཅུ་རྩ་གཅིག་ཟློག༔ གཞན་དབང་འཕོ་འགྱུར་ལས་བྱུང་བའི༔ དུས་མིན་འཆི་བ་བཅོ་བརྒྱད་ཟློག༔ ཕྱི་ནང་བདེན་ཞེན་ལས་བྱུང་བའི༔ འབྱུང་བཞི་ཕྱི་ཡི་གཡོ་འཁྲུག་ཟློག༔ རྩ་རླུང་ཐིག་ལེ་ལས་བྱུང་བའི༔ རྣལ་འབྱོར་ནང་གི་བར་ཆད་ཟློག༔ ང་བདག་འགོང་པོ་ལས་བྱུང་བའི༔ གཟུང་འཛིན་གསང་བའི་སུན་མ་ཟློག༔ འདོད་ཆགས་སྲེད་ཞེན་ལས་བྱུང་བའི༔ སྣོད་བཅུད་དབུལ་ཞིང་ཕོངས་པ་ཟློག༔ ཞེ་སྡང་གདུག་སེམས་ལས་བྱུང་བའི༔ བྱད་ཕུར་རྦོད་གཏོང་མཚན་འཁྲུགས་ཟློག༔ གཏི་མུག་རྨོངས་པ་ལས་བྱུང་བའི༔ དམ་སྲི་ཀླ་ཀློའི་འཚེ་བ་ཟློག༔ ང་རྒྱལ་ཁེངས་སེམས་ལས་བྱུང་བའི༔ དྲེགས་པ་སྡེ་བརྒྱད་ཆོ་འཕྲུལ་ཟློག༔ ཕྲག་དོག་གདུག་རྩུབ་ལས་བྱུང་བའི༔ འཇིགས་ཆེན་བརྒྱད་དང་བཅུ་དྲུག་ཟློག༔ ཟློག་གོ་མི་མཐུན་རྣམ་རྟོག་ཚོགས༔ གཞི་དབྱིངས་ཀ་དག་ཀློང་དུ་ཟློག༔ བསྒྱུར་རོ་ལྟས་ངན་སེམས་བྱུང་ཀུན༔ གཞི་སྣང་ལྷུན་གྲུབ་ཆེན་པོར་སྒྱུར༔ ཐམས་ཅད་འོད་གསལ་གཉུག་མའི་དབྱིངས༔ འཁྲུལ་པ་དག་པའི་ཕྲིན་ལས་མཛོད༔ སརྦ་ས་མ་ཡ་བྷྱོ་བྷྱོ་ཟློག་ཟློག༔ ཅེས་བརྗོད་ཐལ་མོ་དུལ་མོ་བརྡབ༔ གཏོར་མ་གནོད་པའི་ཕྱོགས་སུ་འཕང་༔ འགལ་རྐྱེན་སྤྲིན་ལྟར་གཏིབས་པ་ཡང་༔ སྐད་ཅིག་ཉིད་ལ་བཟློག་པར་འགྱུར༔ ས་མ་ཡ༔ སྡིག་སྒྲིབ་བར་ཆད་ཞི་འདོད་ན༔ རིན་ཆེན་སྣ་ཚོགས་ཕྱེ་མ་ལ༔ པུ་རི་དཀར་པོ་མཚན་རྫོགས་བཞེངས༔ ནང་དུ་འཇམ་དཔལ་ཞི་ཁྲོའི་སྔགས༔ ཨ་ནྲྀ་སུ་ཏྲི་པྲེ་དུ་སརྦ་པཱ་པཾ་ཀླེ་ཤ་དུཿཁ་ཤཱིནྟཾ་ཀུ་རུ་སྭཱ་ཧཱ༔ སརྦ་བིགྷྣཱན་ཤ་ཏྲཱུན་ཨ་པ་ཀ་ར་ཤཱནྟིཾ་ཀུ་རུ་སྭཱ་ཧཱ༔ ཞེས་གདགས་བྲིས་པ་བདུད་རྩིས་བྱུག༔ བཟང་པོའི་ཤིང་ལ་དྲིལ་ཏེ་གཞུག༔ དེ་ཉིད་དཀྱིལ་འཁོར་དབུས་སུ་བཞག༔ འཇམ་དཔལ་ཞི་ཁྲོའི་སྐུ་རུ་བསྐྱེད༔ ཐུགས་ཀའི་ཧཱུྃ་ལས་ཨེ་ཆད་དེ༔ དེ་ལས་འབར་བའི་མེ་འོད་དཀར༔ མཁའ་ཁྱབ་སྤྲོས་ཏེ་རང་གཞན་གྱི༔ སྣ་བུག་ནས་ཞུགས་ལུས་ཀུན་གང་༔ རིགས་དྲུག་བག་ཆགས་སྡིག་སྒྲིབ་དང་༔ གདོན་བགེགས་བར་ཆད་ཀུན་བསྲེགས་ནས༔ བྱིན་རླབས་གཟི་བྱིན་ལྡན་པར་བསྒོམ༔ ཁྲུས་བྱས་མི་གཙང་ལུས་ལས་དོན༔ ནམ་མཁར་འཕུར་སོགས་རྨི་ལམ་ལྟས༔ བྱུང་ན་ཞི་བའི་མཚན་མར་ཤེས༔ དེ་ཐོབ་ལས་ཀུན་འགྲུབ་པར་བཤད༔ ས་མ་ཡ༔ ཚེ་དང་བསོད་ནམས་རྒྱས་འདོད་ན༔ སྙིང་པོ་ལྔ་དང་རིན་ཆེན་ལྔ༔ ཨ་མྲྀ་ཏ་ཡིས་སྦྲུས་བྱས་ལ༔ འབྲང་རྒྱས་སྔགས་ཀྱི་སྲོག་ལྡན་བཞེངས༔ དཀྱིལ་འཁོར་དབུས་སུ་བཞག་ནས་ཀྱང་༔ བདག་མདུན་ལྷར་གསལ་ཐུགས་སྲོག་ལས༔ ཉི་མ་འཆར་ཀའི་མདངས་འོད་འཕྲོས༔ སྤྲུལ་པའི་ཕོ་ཉ་སྟོང་གསུམ་གང་༔ རི་རབ་འགུལ་ཞིང་རྒྱ་མཚོ་འཁྱོམ༔ དྲེགས་པ་དབང་སྡུད་ཟིལ་གྱིས་མནན༔ བླ་ཚེ་བརྐུས་ཉམས་ཡར་བ་བཀུག༔ སྲིད་ཞིའི་དྭངས་བཅུད་མེར་མེར་བསྡུས༔ སྙིང་པོ་ཐུགས་ཀྱི་ཐིག་ལེར་ཐིམ༔ འཆི་མེད་རྡོ་རྗེའི་སྲོག་འགྲུབ་བསམ༔ མི་འགྱུར་རྩ་བའི་སྙིང་པོའི་ཤམ༔ ཨཱ་ཡུརྫྙཱ་ན་པུཎྱེ་སིདྡྷི་པུཥྟིཾ་ཀུ་རུ་ཨོཾ༔ ཞེས་བཟླས་སྐབས་སུ་ཕོ་ཉ་བཏང་༔ ཨེཿ ང་ནི་རང་བྱུང་ཡེ་ཤེས་དབྱིངས༔ ཕྱག་རྒྱ་མ་བཙལ་ལྷུན་གྱིས་གྲུབ༔ ཆེ་བ་ཀུན་གྱི་རྒྱལ་པོ་སྟེ༔ འཁོར་འདས་ཐམས་ཅད་ཟིལ་གྱིས་གནོན༔ འཇམ་དཔལ་ཁྲག་འཐུང་སྟོབས་པོ་ཆེའི༔ རྡོ་རྗེའི་བཀའ་ནན་མཁའ་དང་མཉམ༔ སངས་རྒྱས་བྱང་ཆུབ་སེམས་དཔའ་དང་༔ ཡི་དམ་ཞི་ཁྲོ་མཁའ་འགྲོའི་ཚོགས༔ འཇིག་རྟེན་དྲེགས་པ་ཐམས་ཅད་ཀུན༔ ང་ཡི་དབྱིངས་ལས་གཡོས་པ་མེད༔ ས་ཆུ་མེ་རླུང་ནམ་མཁའི་ཁམས༔ དྭངས་མ་ལྔ་འདུས་བདག་ལ་རྫོགས༔ རོལ་པ་ཆེན་པོའི་ཆོ་འཕྲུལ་གྱི༔ འཁོར་འདས་ཐམས་ཅད་ལས་ལ་བཞེངས༔ འབྱུང་པོས་བརྐུས་པའི་བླ་ཚེ་འཕྲོག༔ རང་བཞིན་ཡར་བ་ཐམས་ཅད་སྡུས༔ ཚེ་ཡི་རྫིང་བུ་ཉམས་པ་གསོས༔ བསོད་ནམས་ཉི་ཟླ་འགྲིབ་པ་སྐྱེད༔ ཡེ་ཤེས་རིག་རྩལ་གོང་དུ་སྤོར༔ མི་འགྱུར་མི་ཤིགས་རྟག་པའི་ཚེ༔ འགྲིབ་མེད་བསོད་ནམས་གཡུང་དྲུང་འཁྱིལ༔ སྙིང་ག་དཔལ་གྱི་བེའུའི་དབྱིངས༔ དབྱེར་མེད་རྡོ་རྗེའི་དངོས་གྲུབ་སྩོལ༔ ཞེས་དང་སྔགས་བརྗོད་ཏིང་འཛིན་སྤོར༔ ཤིན་ཏུ་ཟབ་པའི་ཚེ་སྒྲུབ་སྟེ༔ བསོད་ནམས་དཔལ་ཀུན་བསྐྱེད་པའོ༔ ས་མ་ཡ༔ རྒྱལ་བློན་རིག་མ་ཁྱེའུ་དང་༔ ནོར་དང་འབྲུ་དང་ཟས་གོས་སོགས༔ དབང་སྡུད་ཕྲིན་ལས་བརྩམ་པ་ནི༔ རིན་ཆེན་ཐོད་པ་མཚན་ལྡན་ནང་༔ རཏྣ་འབྲུ་སྨན་སྤོས་ཕྱེས་གཏམས༔ དམར་པོའི་གཞི་ལ་བྱང་སེམས་གཉིས༔ མཉམ་པར་བྱས་ཏེ་འཕྲུལ་འཁོར་བྲི༔ པདྨའི་ལྟེ་བར་ཨེ་དམར་པོའི༔ ཐ་མར་སྙིང་པོ་སྔགས་འདི་སྦྱར༔ ཆེ་གེ་མོ་དམ་དམ༔ ཏ་ར་ཏ་ར༔ བ་ཤ་ནཾ༔ བ་ཤ་ནཾ༔ སྡུས་སྡུས༔ བཱ་ཤཾ་ཀུ་རུ་ཧོ༔ འདབ་མ་ལའང་དེ་བཞིན་ཏེ༔ མུ་ཁྱུད་དབྱངས་གསལ་རྟེན་སྙིང་དང་༔ རཏྣ་ཀ་པཱ་ལ་བཱ་ཤཾ་སིདྡྷི་ཀུ་རུ་ཧོཿ དེ་ནི་ཟིལ་གནོན་ཁྲོ་བོ་བསྐྱེད༔ རྗེས་ཆགས་རོལ་པའི་འོད་ཟེར་ནི༔ རབ་དམར་ཉི་མ་འཆར་ཁའི་མདངས༔ སྣོད་བཅུད་ཀུན་ལ་ཁྱབ་ཅིང་ཞུགས༔ ཁྱད་པར་དམིགས་པའི་ཡུལ་ཀུན་དཀྲིགས༔ རང་དབང་མེད་པར་བསྐུལ་བྱས་ཏེ༔ དྲེགས་པའི་ཚོགས་ཀྱིས་དབང་མེད་བཀུག༔ བརྟན་པ་བྲལ་ཏེ་འདུད་པར་བསམ༔ གོང་གི་སྔགས་བཟླས་ཏིང་འཛིན་གསལ༔ ལས་མཐའ་དབང་གི་སྲེག་བླུགས་བྱ༔ དབང་སྡུད་ལས་ཀྱི་སྦྱོར་བའོ༔ ས་མ་ཡ༔ བསྒྲལ་ཞིང་བཅུ་དང་ཉམས་པ་བདུན༔ བསད་དང་བསྲེག་དང་མནན་པ་སྟེ༔ དུར་ཁྲོད་འཇིགས་པའི་ས་གཞི་ལ༔ ཕུང་པོ་རོ་སོལ་བྲུབ་ཁུང་བྱ༔ གྲི་ཁྲག་བྱུགས་ཤིང་རྩང་གིས་བསྐོར༔ དུར་ཁྲོད་རས་སམ་དུག་ཤོག་ལ༔ དམེ་ཁྲག་ཚ་བ་དུག་སྣས་བྱུགས༔ དེ་དང་རྡོ་སོལ་སྣག་ཚ་ཡིས༔ བསད་པའི་འཁོར་ལོ་རྒྱ་གྲམ་དབུས༔ གྲུ་གསུམ་ཕྱི་རོལ་མཚོན་འཁོར་བསྐོར༔ ཨེ་ལ་མི་འགྱུར་རྩ་བའི་སྔགས༔ རྭ་མཚམས་ཨེ་ཡ་བྷྱོ་ཡིག་ཕྲེང་༔ འཁོར་ལོར་ལས་སྔགས་སྤུ་གྲི་ནི༔ དམོད་པའི་ཚིག་དང་ལྡན་པར་བྱ༔ སྲིད་པ་རུ་སྦལ་ལྟོ་བར་གཏམས༔ ཐོད་ངན་ནང་གཞུག་དེ་ཡི་འོག༔ ཟག་རྫས་དུག་ཁྲག་ཚ་བ་ལས༔ ལིངྒ་བྲིའམ་འབུར་དུ་གཏོད༔ བྱད་ཐག་དཀྲི་ཞིང་ཐུན་རྫས་གསར༔ རྒྱུད་ལས་གསུངས་པ་བཞིན་དུ་བསྐུལ༔ དམིགས་བྱ་དགུག་བསྟིམ་སྔགས་འདི་བཟླ༔ ཆེ་གེ་མོ་གྲྀཧྞ་གྲྀཧྞ་བྷནྡྷ་བྷནྡྷ༔ ཨཱ་ཀརྵ་ཡ༔ ཨཱ་ཀརྵ་ཡ༔ ནཱ་ཤ་ཡ༔ ནཱ་ཤ་ཡ༔ ཧ་ར་ཧ་ར༔ མོ་ཧ་ཡ་མོ་ཧ་ཡ༔ ཛཿཧཱུྃ་བྃ་ཧོ༔ ཁུག་པའི་རྟགས་བྱུང་ཐུན་གྱིས་གཟིར༔ ཨེཿ ཁྲོ་རྒྱལ་འདུས་པ་ཡུངས་ཀར་ཐོག༔ མ་མོ་ཁྲག་གི་རྦ་རླབས་འཁྲུགས༔ ཀླུ་བདུད་དུག་གི་ཁ་ཆུ་འབེབས༔ ཐིབས་གནོན་གདུག་པ་རྡོ་རྗེའི་མཚེ༔ གཟའ་རྒོད་མིག་དམར་གཟེར་མདའ་འཕེན༔ གཤིན་རྗེ་སྲོག་གཅོད་ཟངས་ལྕགས་ཆར༔ མཚོན་ཆ་སྣ་ཚོགས་རྡོ་ཡི་ཐུན༔ འབེབས་པ་ཟིལ་གནོན་སྤྲུལ་པས་འབེབས༔ འབེན་ནི་དགྲ་དང་བགེགས་ལ་བཅས༔ ཉམས་པའི་ལུས་སེམས་རྡུལ་དུ་རློག༔ རྩ་བའི་སྔགས་དང་མཚོན་ཆས་གཟིར༔ ཨེ་མྱགས་ཡ་རྔུབས་མུག་ཤ་ཀ་ཀ་དུན༔ དགྲ་བོའི་སྲོག་ལ་བྲེང་ཧུར་ཐུམ་ཛ་རྩ་ཁྲག་སྙིང་ཐུམ་རིལ་རཾ་ཤག་རྦད༔ སྲོག་ཐུམ་རིལ་ཛ་རྩ་ཁྲག་ཧུར་རཾ༔ སྙིང་ཐུན་རྦད་སྲོག་ལ་མཱ་ར་ཡ་བྷྱོ༔ ཉམས་པ་ཁ་སྦྱོར་བྱེ་བའི་རྟགས༔ བྱུང་བ་རལ་གྲིས་རཱུ་པ་གཏུབས༔ ཨེ༔ འཇམ་དཔལ་ཁྲོས་པ་ཟིལ་གནོན་མཚོན༔ ཤེས་རབ་རལ་གྲི་རྣོན་པོ་ཡིས༔ དགྲ་བགེགས་གཟུགས་བརྙན་དུམ་བུར་གཏུབས༔ ཚེ་དང་བསོད་ནམས་རང་ལ་འདུས༔ རྣམ་ཤེས་དམིགས་མེད་ཆོས་དབྱིངས་ཐིམ༔ ཤ་ཁྲག་ཁྲོ་བོ་རྔམས་པའི་ཚོགས༔ དགྱེས་པ་ཆེན་པོའི་ཞལ་དུ་བསྟབས༔ མངོན་སྤྱོད་ཕྲིན་ལས་མཐར་ཕྱིན་མཛོད༔ ཨེ་ཧུར་ཐུམ་ཁཌྒ་ཏཱིཀྵྞ་ཧྲི་དིར་མཱ་ར་ཡ་ཁ་ཁ་ཁཱ་ཧི་ཁཱ་ཧི༔ དྲག་པོའི་ཞལ་བསྟབ་ཟློག་ཕྲིན་གསོལ༔ ཆ་གཅིག་མཛེ་ཐོད་ནང་དུ་བཅུག༔ ཀླུ་བདུད་གདུག་པའི་གྲེ་བར་གཏད༔ ཆ་གཅིག་དུག་ཤིང་མེ་སྦར་ལ༔ རྔམས་ཁྲོས་འཁྱིལ་པ་བསྐྱེད་ཅིང་བསྲེག༔ ཐལ་བ་རྒྱ་གྲམ་ལམ་འོག་མནན༔ རྡོ་རྗེའི་བྲོ་བརྡུང་ཕྱིར་མི་ལྡོག༔ སྲིད་གསུམ་དགྲ་བགེགས་བརླག་པའི་ཐབས༔ འབུམ་ཕྲག་ཀུན་གྱི་སྙིང་པོའོ༔ ས་མ་ཡ༔ མཆོག་གི་ཡེ་ཤེས་ལམ་བྱེད་པ༔ འཇམ་དཔལ་དོན་གྱི་སྙིང་པོ་ནི༔ ངེས་འབྱུང་དྲག་པོས་རང་རྒྱུད་སྦྱངས༔ སྐྱབས་སེམས་བླ་མའི་བྱིན་རླབས་དབབ༔ སྣོད་དུ་གྱུར་ནས་རྣལ་འབྱོར་ནི༔ འཁོར་ལོ་རྣམ་པ་བཞི་ཡིན་ཏེ༔ རང་བཞིན་འོད་གསལ་བྱང་ཆུབ་སེམས༔ སྟོང་ཉིད་འཇམ་པ་གསལ་བའི་དཔལ༔ ཟུང་འཇུག་ཡེ་ཤེས་སེམ་དཔའ་ནི༔ གནས་པའི་འཁོར་ལོ་གཞི་ཡི་རྒྱུད༔ འགྲོ་བ་ཀུན་ལ་ཁྱབ་པར་བཞུགས༔ དེ་ཉིད་མ་རྟོགས་གཟུང་འཛིན་གྱི༔ སྲིད་པའི་འཁོར་ལོ་སྣ་ཚོགས་པ༔ རྩ་དང་རླུང་དང་བྱང་ཆུབ་སེམས༔ ཀུན་གཞི་ཡེ་ཤེས་ཅིར་ཡང་སྣང་༔ འདུལ་ཐབས་སྤྲུལ་པའི་འཁོར་ལོ་ནི༔ སྣང་བ་སྦྱོང་བྱེད་དབྱིབས་ཀྱི་ལམ༔ ཟིལ་གནོན་ཁྲག་འཐུང་ཕྱག་རྒྱར་བསྒོམ༔ སྟོང་ཉིད་མ་སྐྱེས་རང་བཞིན་ལ༔ ཨེ་ཡིག་ལྷུན་གྲུབ་གཟུགས་སྐུར་བཞེངས༔ རྣམ་ཐར་དབུ་ལ་ཕར་ཕྱིན་ཕྱག༔ ཚད་མེད་ཞབས་ལྡན་འབྱུང་བ་ལྔ༔ འདུས་པའི་ཡེ་ཤེས་ཆེན་པོ་ཡིས༔ འཁོར་འདས་ཐམས་ཅད་ཁྱབ་ཅིང་གནོན༔ གཞི་ལམ་འབྲས་གསུམ་རང་ལ་རྫོགས༔ དག་པ་དྲན་པ་གནད་ཀྱི་གཟེར༔ ཡུལ་གསུམ་གསལ་བར་གྱུར་པ་དང་༔ ཞེན་པ་སྦྱོང་བྱེད་སྔགས་ཀྱི་ཐབས༔ རླུང་ལམ་རྡོ་རྗེའི་བཟླས་པས་སྦྱང་༔ ཁ་སྦྱོར་བུམ་པ་སྲོག་རྩོལ་བཙུད༔ དེ་ལས་གཏུམ་མོའི་མེ་སྦར་བས༔ ཡེ་ཤེས་ལས་དང་འཇིག་རྟེན་གྱི༔ གཤིན་རྗེས་རྩ་འཁོར་ཐམས་ཅད་ཁྱབ༔ བདེ་བ་གསོལ་བའི་བདུད་རྩི་ཡིས༔ གསོལ་བཏབ་ཀ་དག་ངང་དུ་བཞག༔ སྣང་ཞེན་ལས་སུ་རུང་བ་ན༔ བུ་མོ་ཨུཏྤལ་མིག་ཡངས་ལ༔ བརྟག་ཅིང་བཙལ་ལ་གསང་རྩ་སྤྲད༔ ཀཱ་ཀཱ་མུ་ཁའི་རེག་བྱ་ཡིས༔ ཉོན་མོངས་འཆིང་བ་གཅོད་པར་བྱ༔ དེ་ཚེ་བདེ་བའི་ངོ་བོ་ཉིད༔ ཐིག་ལེ་གཅིག་ཏུ་འདུས་པར་བལྟ༔ བསམ་གྱིས་མི་ཁྱབ་དགོངས་པའི་གདིང་༔ མི་གཡོ་མཉམ་པ་ཉིད་དུ་བཞག༔ འཁོར་བ་རྣམ་པར་རྟོག་པ་སྟེ༔ མྱང་འདས་ངོ་བོ་སྟོང་པ་ཉིད༔ ཕྱག་རྒྱ་ཆེན་པོ་མ་བཅོས་པ༔ དེ་ཡིས་གཟུང་འཛིན་ཟིལ་གྱིས་གནོན༔ འཇམ་དཔལ་ཞེས་ནི་དེ་ལ་བྱ༔ གསང་བའི་ལམ་ནས་ཡེ་ཤེས་གདངས༔ ནམ་མཁར་ཤར་བ་བཞིན་དུ་བྱས༔ དབྱིངས་རིག་ཐིག་ལེར་འཛུད་པ་ཡིས༔ སྣང་བ་མཆེད་ཅིང་གོང་དུ་འཕེལ༔ ཐམས་ཅད་འཇམ་དཔལ་སྐུ་རུ་ཤར༔ ཁམས་གསུམ་ཐམས་ཅད་དེ་ཡིས་གང་༔ སྲིད་གསུམ་གཡོ་བ་སྡུད་ཅིང་ཟད༔ སླར་ཡང་ཡེ་ཤེས་རང་སྣང་བས༔ འཕོ་བའི་བག་ཆགས་རྒྱུ་དང་བཅས༔ ཡོངས་སུ་གཅོད་ཅིང་སེམས་ཅན་དོན༔ ལྷུན་གྲུབ་རྒྱུན་མི་ཆད་པའི་ཕྱིར༔ འཁོར་ལོ་མི་ཟད་རྒྱན་དུ་རྫོགས༔ མཐར་ཐུག་འབྲས་བུ་ཆེན་པོའོ༔ ས་མ་ཡ༔ ལས་ཀྱི་སྦྱོར་སྡེ་སྣ་ཚོགས་ནི༔ བུམ་པ་ཆུ་སྣ་དགུ་ཡིས་དགང་༔ བདག་ཉིད་ཟིལ་གནོན་ཐུགས་ཀ་ནས༔ འོད་འཕྲོས་བུམ་པའི་དངོས་འཛིན་སྦྱངས༔ སྣོད་ནི་གཞལ་ཡས་བྱང་སེམས་བཅུད༔ སྙིང་པོ་འཇམ་དཔལ་ལྷ་སྔགས་གསལ༔ ཡེ་ཤེས་བདུད་རྩིའི་རྒྱུན་གྱིས་བཀང་༔ སྔགས་བཟླས་འོད་ཞུ་འཐོར་འཐུང་དང་༔ ཉེ་རེག་བྱས་པས་ནད་གདོན་དང་༔ ཁྱད་པར་ཀླུ་ཡི་དུག་ཀུན་ཞི༔ ལས་མཐུན་ཤིང་ལ་མེ་སྦར་ཏེ༔ ལྷ་བསྐྱེད་བདུད་རྩིའི་བསྲེག་རྫས་འབུལ༔ ཡང་ན་ཤ་ཁྲག་རུས་པར་དམིགས༔ ཞི་རྒྱས་དབང་དྲག་ལས་ཀུན་བྱེད༔ ཡུལ་ཁམས་ཕུང་བའི་དམ་སྲིའི་སྡེ༔ རང་རང་སྲོག་གི་ཐོད་པར་གྲུབ༔ སྟོབས་ཆེན་ཡོངས་རྫོགས་མཆོད་རྟེན་འོག༔ མནན་ཅིང་གཟིར་བས་ཕྱིས་མི་ལྡང་༔ འཇམ་དཔལ་གྲུབ་པའི་རྩ་མཆོག་ལས༔ རྡོ་རྗེ་ཚེ་ཡི་སྔགས་ཀྱིས་བཏབ༔ ར་མོ་ཤག་གི་ཁུ་བས་དབུལ༔ ཚེ་དང་ལུས་ཀྱི་བཅུད་ལེན་འགྲུབ༔ ས་མ་ཡ༔ དང་པོ་རང་བྱུང་སྔགས་ཀྱི་རྒྱུད༔ ཟླ་གསང་བྱེ་བ་འབུམ་ཕྲག་ལས༔ སྙིང་པོའི་སྙིང་པོ་མདོ་ཙམ་ཞིག༔ འཇམ་དཔལ་བཟང་པོས་གནད་བསྡུས་ཏེ༔ བརྟུལ་ཞུགས་སྤྱོད་པའི་དབང་པོར་གཏད༔ བདག་ཉིད་བློ་ལྡན་མཆོག་སྲེད་ཀྱིས༔ འགའ་ཞིག་ས་ཡི་བཅུད་དུ་གཏམས༔ ལ་ལ་ཀློང་ལྔའི་སྒྲོམ་བུར་བསྩལ༔ སྙན་བརྒྱུད་འདི་ནི་སྐལ་ལྡན་ལ༔ དགོངས་པ་བྱིན་རླབས་ཚུལ་དུ་བཤད༔ ས་མ་ཡ༔ རྒྱ་རྒྱ་རྒྱ༔ གུ་ཧྱ༔ མ་འོངས་འདི་སྤྱོད་ལས་ཅན་ནི༔ གནུབས་ཀྱི་དགེ་སློང་རིགས་སྔགས་འཆང་༔ བོད་ཁམས་མཐའ་དང་དབུས་སུ་འབྱུང་༔ ཐེ་ཚོམ་མེད་པར་ཉམས་བླངས་ན༔ བདུན་གསུམ་མི་མཐུན་ཀེཀ་ལས་གྲོལ༔ དམ་སྲི་རྐུན་པོའི་བར་ཆད་ཞི༔ བརྒྱུད་འཛིན་འཕེལ་ཞིང་བཀྲ་ཤིས་ཐོབ༔ གཞན་ཡང་གྲགས་པ་མཆོག་དང་དབྱངས༔ མཐུ་ཆེན་བསྟན་པ་སྤེལ་ལ་དགའ༔ དེ་དང་དེ་ལ་སོགས་པ་ཡི༔ ལས་ཅན་མང་ཞིག་ཚུལ་འདི་ལ༔ བརྟེན་ནས་ནུས་པའི་གདིང་ཐོབ་སྟེ༔ བསྟན་པ་སྲུང་ཞིང་རང་རྒྱུད་གྲོལ༔ གདུལ་བྱ་ཡོངས་སུ་སྨིན་པར་འགྱུར༔ ས་མ་ཡ༔ རྒྱ་རྒྱ་རྒྱ༔ གུ་ཧྱ༔ བཛྲ་མནྟྲ་གརྦྷ་ཨ་ཏི་གུ་ཧྱ་ས་མ་ཡ༔ ཞེས་པའང་སློབ་དཔོན་འཇམ་དཔལ་བཤེས་གཉེན་གྱིས་བྱིན་གྱིས་བརླབས་ཤིང༌། ལྷུན་གྲུབ་རིག་འཛིན་བློ་ལྡན་མཆོག་སྲེད་ཀྱིས་རྗེས་སུ་གདམས་པའི་སྙན་བརྒྱུད་འདི་ནི། གནུབས་ཀྱི་སྐྱེ་རྒྱུད་ཟུང་སོགས་སྐལ་བ་དང་ལྡན་པ་དག་ལ་ཕན་པའི་ཡིད་ཀྱིས་མཚོ་སྐྱེས་རྡོ་རྗེ་འཆང་དགྱེས་པའི་འབངས་པདྨ་འོད་གསལ་མདོ་སྔགས་གླིང་པས་སྐད་ཅིག་གིས་གཏན་ལ་ཕབ་པའོ།། །།

[edit]

\u0f01\u0f83\u0f7f__'jam dpal gshin rje'i thugs tig bzhugs:________slob dpon 'jam dpal bshes gnyen gyi dgongs pa'o//\u0f01\u0f83\u0f7f__'jam dpal gshin rje gshed la phyag 'tshal lo:__gzung 'dzin dregs pa'i gshin rje yi:__gshed po sems nyid 'od gsal ba:__rol pa 'gag med lha skur shar:__de nyid sgrub pa'i rnal 'byor ni:__aH__rang bzhin gdod nas mnyam pa nyid:__skye ba med pa'i ye shes las:__skye ba'i gzugs brnyan yi ge a:__snod bcud brtan g.yo kun gyi srog:__cho 'phrul chen po'i rol pa yis:__ma dag snang ba dbyings su nub:__lhun grub ye shes gzhal med khang :__rin chen dur khrod rgyan rdzogs dbus:__klu 'bum gnyan khri sa bdag stong :__phyogs skyong ma he nyi zla'i gdan:__de steng stong nyid phyag rgya che:__'khor 'das zil gnon he ru ka:__chos nyid mi 'gyur sku mdog mthing :__rnam par thar pa gsum gyi dbu:__g.yas dkar klu 'bum sbrul du 'dren:__g.yon dmar gnyan khri'i snying nas gsol:__dbus mthing dgra bgegs sa bdag za:__rgyu drug 'khor ba sgrol ba'i phyag:__ye shes drug gi phyag mtshan can:__'khor lo ral gri rdo rje g.yas:__be con gtun shing sdigs mdzub g.yon:__rdzu 'phrul zhabs bzhi dor stabs kyis:__dug gsum dregs pa'i dpyi nas brdzis:__glang chen ko rlon dur khrod chas:__sbrul dang rin chen tsit+tas brgyan:__dbu la rigs lnga khro bo'i sku:__dregs pa'i snying dang nA ga'i mgo:__do shal khro bo'i chas ka rdzogs:__de bzhin nyid dbyings khros pa'i sku:__yum ni dmigs med chos kyi dbyings:__mthing nag snying stobs gri thod 'khyud:__rgyan dang sprul pa'i lha rnams kun:__nyi ma dang ni 'od zer bzhin:__ma bskyed rang byung rol pa'i rtsal:__'khor 'das yongs rdzogs chen por gsal:__sa ma ya:__lha sku'i ting 'dzin brtan pa na:__thugs kar 'jam dpal ye shes sems:__dmar ser ral gri glegs bam phyag:__de yi tsit+ta'i gur khang dbus:__nyi steng hU~M gi nA da las:__yi ge drug pa rdo rje'i sgra:__sngags kyi gzugs su snang ba las:__'od zer 'phros pas 'phags pa mchod:__mkhyen brtse nus pa'i byin rlabs bsdus:__gsal zhing 'bar ba'i 'od zer gyis:__sgrib gnyis mun pa sel bar bsam:__oM wA gI shwa ri mU~M:__zhi bar bsnyen pa 'bum phrag drug:__bzlas te khro bor sgrub pa ni:__hU~M mthar rdo rje'i sngags phreng las:__sku dang sngags phreng phyag mtshan tshogs:__'bar ba'i 'od zer dang bcas 'phros:__snang srid sbyangs te rang la bstim:__e ka he dun ya ma snying khrag ra ma tsa ya:__lha sngags tha dad mi phyed pa:__'bum phrag bcu drug las kun byed:__'jam dpal khro bo'i nus pa rdzogs:__sa ma ya:__don gyi gshed po sgrub pa ni:__sems kyi rang bzhin 'od gsal ba:__thog ma bar dang mthar mi gnas:__rgyu dang rkyen dang 'bras bu med:__phyag rgya chen po'i ngang du bzhag:__lus gnad byed bcings dbang po'i mchog:__dbyings su gzir pas rtags rnams rdzogs:__'gro ba'i mar me ye shes sgron:__don gyi 'jam dpal tshe 'dir 'grub:__sa ma ya:__dbang bskur byed na snod ldan pa'i:__slob mas gsol ba 'di ltar gdab:__chos dbyings bde bar dgyes rol pa'i:__'jam dpal khrag 'thung dgongs su gsol:__he ru ka dpal grong khyer du:__bdag cag 'jug cing smin par 'tshal:__rgyud sbyangs lhar bskyed ye shes dbab:__brtan par byas rjes bum dbang ni:__oM:__ye shes dag pa bum pa'i dbyings:__phyag rgya zil gnon zhu ba'i bcud:__rigs lnga 'dus pa'i bdud rtsi yis:__ye shes lnga ru dbang bskur ro:__sngags mthar:__oM hU~M trA~M hrI:AH__kA lA sha a b+hi Shiny+tsa oM:__sku dang rgyan chas phyag mtshan bstim:__hU~M:__rang byung thig le nyag gcig las:__'khor 'das zil gnon lha skur shar:__gnyis med phyag rgya'i dbang bskur bas:__snang zhen gzung 'dzin rang grol shog:__kA ya a b+hi Shiny+tsa oM:__hU~M:__dpal chen 'bar ba dbang gi chas:__dur khrod chen po'i longs spyod kyis:__dregs pa'i stobs dang srog 'phrog pa'i:__rje btsun mchog tu mnga' gsol lo:__shrI he ru ka A laM ka ra a b+hi Shiny+tsa mi:__hU~M:__srid pa'i drwa ba 'joms shing gcod:__nyon mongs bdud 'dul bdud dgra gsod:__gzung 'dzin tshar gcod gdug pa can:__bsdigs shing zil gnon dbang bskur ro:__hU~M hU~M hU~M hU~M hU~M hU~M a b+hi Shiny+tsa mi:__bzlas pa'i lung sbyin sngags byang gtad:__hU~M:__dpal chen gsang sngags rdo rje'i sgra:__rtag tu chu bo'i gzhung bzhin zlos:__rab 'byams phrin las 'grub pa dang :__srog rtsol dag pa'i dbang thob shog:__wA ka a b+hi Shiny+tsa AH__dgongs pa ngo sprad don dbang bskur:__hU~M:__e nyid stong pa chos 'byung las:__ma skyes gnas pa dran par bya:__rgyu rkyen sngags las ma bskyed par:__dbyings rig zung 'jug rtogs par 'gyur:__a a a tsit+ta a b+hi Shiny+tsa hU~M:__rdo rje'i sdigs mdzub snying gar gtad:__ye shes sems dpa' snying dbus bstim:__d+hIH__sangs rgyas kun gyi ye shes sku:__'jam dpal ngag gi dbang phyug ni:__rtag tu snying la yang dag gnas:__byin rlabs mchog gis dbang bskur ro:__oM wa gi shwa ri mU~M:__dz+nyA na sa twa a b+hi Shiny+tsa mi:__yon tan yongs rdzogs bam chen ni:__lhar gsal slob ma'i gtsug tu bzhag:__hoH__dpa' brtul sngags kyis byin bskyed pa'i:__bam chen rme ba'i don dang sbyor:__rdo rje 'dzin pa'i dbang thob nas:__ye shes yon tan yongs rdzogs shog:__ma hA mAM sa gu Na sid+d+hi a b+hi Shiny+tsa hoH__lha bstim dngos grub dam rdzas sbyin:__phrin las mchod rten spyi bor bzhag:__hU~M:__srung dang bshig dang bsad pa dang :__klog dang mnan dang dkrugs pa sogs:__rab 'byams phrin las dbang bsgyur ba'i:__yongs rdzogs mchod rten dbang bskur ro:__sarba karma a b+hi Shiny+tsa hU~M:__byang chub sems kyi bdud rtsi sbyin:__AH__sbyor ba dag pa'i byang chub sems:__mtshan ldan phyag rgya'i pad+mor bskyil:__dkar dmar lhag pa'i dam tshig rdzas:__dpa' bo chen pos mnyam par rol:__b+ho d+hi tsit+ta gu h+ya a b+hi Shiny+tsa hoH__mtshan ldan gzungs ma byin brlabs sbyin:__hU~M:__bkra shis pad+ma'i mtshan ldan gsang ba'i yum:__sangs rgyas kun gyi 'byung gnas che:__'dir zhugs 'dir ltos 'di don spyod:__lhan cig skyes dga'i dbang thob shog:__karma mu dra ma hA su kha a b+hi Shiny+tsa hU~M:__me long 'ja' shel brdas mtshon te:__dbyings rig 'jam dpal don ngo sprad:__hoH__ka nas dag pa'i dgongs pa las:__lhun grub ye shes snang ba shar:__zung 'jug zil gnon phyag rgya che:__rang byung don gyi dbang thob shog:__dz+nyA na d+hA tu a b+hi Shiny+tsa a a a:__dregs pa'i dmar gtor lag tu gtad:__ya b+h+yo:__chags sdang dbang gis dregs pa ni:__ma mo gshin rje'i tshogs yin te:__dbang sdud bran du bkol nas kyang :__phrin las rab 'byams sgrub par gyis:__ya b+h+yoHa b+hi Shiny+tsa hU~M:__bkra shis tshe gal mthun bsdebs sbyin:__b+h+rU~MH__snying po'i srog dang byang chub sems:__mi 'gyur thig le gcig tu 'khyil:__rdo rje tshe yi dbang bskur bas:__'chi med rtag pa'i dbang thob shog:__A yur+dz+nyA na a b+hi Shiny+tsa b+h+rU~M:__bkra shis brjod cing me tog 'thor:__dam tshig khas blang gtang rag dbul:__phyag rgya zil gnon yongs rdzogs kyi:__smin byed dbang gi snying po'o:__sa ma ya:___srung dang bzlog pa'i phrin las ni:__rgya shog gtsang mar rgya snag gis:__'khor lo rtsibs brgyad mu khyud bcas:__lte bar e mthar spel tshig dang :__rtsibs brgyad rtsa ba'i gsang sngags bkod:__mu khyud dbyangs gsal 'dod gsol dang :__rten snying rdo ra me ris bskor:__gi ba~M shu dag gu gul byug:__rab tu gnas shing lus la 'chang :__pu ri dkar po'i klong sgrom du:__phyag rgya zil gnon lha skur bsgom:__phyi rol 'khor lo drug gis gtams:__mi phyed rdo rje'i rang bzhin bsam:__badz+ra kA wA tsidz+nyA na tsa kra rak+Sha rak+Sha b+h+rU~M:__bzlas shing lta ba'i gding bskyed la:__srid gsum 'khrugs kyang ya mi nga :__phyir zlog 'khor lo 'chang ba'am:__dmar gtor dgra bgegs 'gug cing bstim:__thod rnga brdung zhing phrin las bcol:__hU~M b+h+yo:__bde gshegs mthu stobs 'dus pa'i dpal:__'khor 'das zil gnon he ru ka:__yab yum sprul pa yang 'khor bcas:__dbyings las ye shes sku ru bzhengs:__dgra bgegs sha khrag gtor ma bzhes:__mngon spyod dmod pa'i dus la bab:__rnal 'byor bdag cag 'khor bcas kyi:__dug gsum rgyu 'bras las byung ba'i:__nad rigs bzhi brgya rtsa bzhi zlog:__ma rig rnam rtog las byung ba'i:__gdon bgegs stong phrag brgyad cu zlog:__kun brtags 'khrul pa las byung ba'i:__ltas ngan brgyad cu rtsa gcig zlog:__gzhan dbang 'pho 'gyur las byung ba'i:__dus min 'chi ba bco brgyad zlog:__phyi nang bden zhen las byung ba'i:__'byung bzhi phyi yi g.yo 'khrug zlog:__rtsa rlung thig le las byung ba'i:__rnal 'byor nang gi bar chad zlog:__nga bdag 'gong po las byung ba'i:__gzung 'dzin gsang ba'i sun ma zlog:__'dod chags sred zhen las byung ba'i:__snod bcud dbul zhing phongs pa zlog:__zhe sdang gdug sems las byung ba'i:__byad phur rbod gtong mtshan 'khrugs zlog:__gti mug rmongs pa las byung ba'i:__dam sri kla klo'i 'tshe ba zlog:__nga rgyal khengs sems las byung ba'i:__dregs pa sde brgyad cho 'phrul zlog:__phrag dog gdug rtsub las byung ba'i:__'jigs chen brgyad dang bcu drug zlog:__zlog go mi mthun rnam rtog tshogs:__gzhi dbyings ka dag klong du zlog:__bsgyur ro ltas ngan sems byung kun:__gzhi snang lhun grub chen por sgyur:__thams cad 'od gsal gnyug ma'i dbyings:__'khrul pa dag pa'i phrin las mdzod:__sarba sa ma ya b+h+yo b+h+yo zlog zlog:__ces brjod thal mo dul mo brdab:__gtor ma gnod pa'i phyogs su 'phang :__'gal rkyen sprin ltar gtibs pa yang :__skad cig nyid la bzlog par 'gyur:__sa ma ya:__sdig sgrib bar chad zhi 'dod na:__rin chen sna tshogs phye ma la:__pu ri dkar po mtshan rdzogs bzhengs:__nang du 'jam dpal zhi khro'i sngags:__a nr-i su tri pre du sarba pA paM kle sha duHkha shIn+taM ku ru swA hA:__sarba big+h+nAn sha trUn a pa ka ra shAn+tiM ku ru swA hA:__zhes gdags bris pa bdud rtsis byug:__bzang po'i shing la dril te gzhug:__de nyid dkyil 'khor dbus su bzhag:__'jam dpal zhi khro'i sku ru bskyed:__thugs ka'i hU~M las e chad de:__de las 'bar ba'i me 'od dkar:__mkha' khyab spros te rang gzhan gyi:__sna bug nas zhugs lus kun gang :__rigs drug bag chags sdig sgrib dang :__gdon bgegs bar chad kun bsregs nas:__byin rlabs gzi byin ldan par bsgom:__khrus byas mi gtsang lus las don:__nam mkhar 'phur sogs rmi lam ltas:__byung na zhi ba'i mtshan mar shes:__de thob las kun 'grub par bshad:__sa ma ya:__tshe dang bsod nams rgyas 'dod na:__snying po lnga dang rin chen lnga:__a mr-i ta yis sbrus byas la:__'brang rgyas sngags kyi srog ldan bzhengs:__dkyil 'khor dbus su bzhag nas kyang :__bdag mdun lhar gsal thugs srog las:__nyi ma 'char ka'i mdangs 'od 'phros:__sprul pa'i pho nya stong gsum gang :__ri rab 'gul zhing rgya mtsho 'khyom:__dregs pa dbang sdud zil gyis mnan:__bla tshe brkus nyams yar ba bkug:__srid zhi'i dwangs bcud mer mer bsdus:__snying po thugs kyi thig ler thim:__'chi med rdo rje'i srog 'grub bsam:__mi 'gyur rtsa ba'i snying po'i sham:__A yur+dz+nyA na puN+ye sid+d+hi puSh+tiM ku ru oM:__zhes bzlas skabs su pho nya btang :__eH__nga ni rang byung ye shes dbyings:__phyag rgya ma btsal lhun gyis grub:__che ba kun gyi rgyal po ste:__'khor 'das thams cad zil gyis gnon:__'jam dpal khrag 'thung stobs po che'i:__rdo rje'i bka' nan mkha' dang mnyam:__sangs rgyas byang chub sems dpa' dang :__yi dam zhi khro mkha' 'gro'i tshogs:__'jig rten dregs pa thams cad kun:__nga yi dbyings las g.yos pa med:__sa chu me rlung nam mkha'i khams:__dwangs ma lnga 'dus bdag la rdzogs:__rol pa chen po'i cho 'phrul gyi:__'khor 'das thams cad las la bzhengs:__'byung pos brkus pa'i bla tshe 'phrog:__rang bzhin yar ba thams cad sdus:__tshe yi rdzing bu nyams pa gsos:__bsod nams nyi zla 'grib pa skyed:__ye shes rig rtsal gong du spor:__mi 'gyur mi shigs rtag pa'i tshe:__'grib med bsod nams g.yung drung 'khyil:__snying ga dpal gyi be'u'i dbyings:__dbyer med rdo rje'i dngos grub stsol:__zhes dang sngags brjod ting 'dzin spor:__shin tu zab pa'i tshe sgrub ste:__bsod nams dpal kun bskyed pa'o:__sa ma ya:__rgyal blon rig ma khye'u dang :__nor dang 'bru dang zas gos sogs:__dbang sdud phrin las brtsam pa ni:__rin chen thod pa mtshan ldan nang :__rat+na 'bru sman spos phyes gtams:__dmar po'i gzhi la byang sems gnyis:__mnyam par byas te 'phrul 'khor bri:__pad+ma'i lte bar e dmar po'i:__tha mar snying po sngags 'di sbyar:__che ge mo dam dam:__ta ra ta ra:__ba sha naM:__ba sha naM:__sdus sdus:__bA shaM ku ru ho:__'dab ma la'ang de bzhin te:__mu khyud dbyangs gsal rten snying dang :__rat+na ka pA la bA shaM sid+d+hi ku ru hoH__de ni zil gnon khro bo bskyed:__rjes chags rol pa'i 'od zer ni:__rab dmar nyi ma 'char kha'i mdangs:__snod bcud kun la khyab cing zhugs:__khyad par dmigs pa'i yul kun dkrigs:__rang dbang med par bskul byas te:__dregs pa'i tshogs kyis dbang med bkug:__brtan pa bral te 'dud par bsam:__gong gi sngags bzlas ting 'dzin gsal:__las mtha' dbang gi sreg blugs bya:__dbang sdud las kyi sbyor ba'o:__sa ma ya:__bsgral zhing bcu dang nyams pa bdun:__bsad dang bsreg dang mnan pa ste:__dur khrod 'jigs pa'i sa gzhi la:__phung po ro sol brub khung bya:__gri khrag byugs shing rtsang gis bskor:__dur khrod ras sam dug shog la:__dme khrag tsha ba dug snas byugs:__de dang rdo sol snag tsha yis:__bsad pa'i 'khor lo rgya gram dbus:__gru gsum phyi rol mtshon 'khor bskor:__e la mi 'gyur rtsa ba'i sngags:__rwa mtshams e ya b+h+yo yig phreng :__'khor lor las sngags spu gri ni:__dmod pa'i tshig dang ldan par bya:__srid pa ru sbal lto bar gtams:__thod ngan nang gzhug de yi 'og:__zag rdzas dug khrag tsha ba las:__ling+ga bri'am 'bur du gtod:__byad thag dkri zhing thun rdzas gsar:__rgyud las gsungs pa bzhin du bskul:__dmigs bya dgug bstim sngags 'di bzla:__che ge mo gr-ih+Na gr-ih+Na b+han+d+ha b+han+d+ha:__A kar+Sha ya:__A kar+Sha ya:__nA sha ya:__nA sha ya:__ha ra ha ra:__mo ha ya mo ha ya:__dzaHhU~M ba~M ho:__khug pa'i rtags byung thun gyis gzir:__eH__khro rgyal 'dus pa yungs kar thog:__ma mo khrag gi rba rlabs 'khrugs:__klu bdud dug gi kha chu 'bebs:__thibs gnon gdug pa rdo rje'i mtshe:__gza' rgod mig dmar gzer mda' 'phen:__gshin rje srog gcod zangs lcags char:__mtshon cha sna tshogs rdo yi thun:__'bebs pa zil gnon sprul pas 'bebs:__'ben ni dgra dang bgegs la bcas:__nyams pa'i lus sems rdul du rlog:__rtsa ba'i sngags dang mtshon chas gzir:__e myags ya rngubs mug sha ka ka dun:__dgra bo'i srog la breng hur thum dza rtsa khrag snying thum ril raM shag rbad:__srog thum ril dza rtsa khrag hur raM:__snying thun rbad srog la mA ra ya b+h+yo:__nyams pa kha sbyor bye ba'i rtags:__byung ba ral gris rU pa gtubs:__e:__'jam dpal khros pa zil gnon mtshon:__shes rab ral gri rnon po yis:__dgra bgegs gzugs brnyan dum bur gtubs:__tshe dang bsod nams rang la 'dus:__rnam shes dmigs med chos dbyings thim:__sha khrag khro bo rngams pa'i tshogs:__dgyes pa chen po'i zhal du bstabs:__mngon spyod phrin las mthar phyin mdzod:__e hur thum khaD+ga tIk+Sh+Na hri dir mA ra ya kha kha khA hi khA hi:__drag po'i zhal bstab zlog phrin gsol:__cha gcig mdze thod nang du bcug:__klu bdud gdug pa'i gre bar gtad:__cha gcig dug shing me sbar la:__rngams khros 'khyil pa bskyed cing bsreg:__thal ba rgya gram lam 'og mnan:__rdo rje'i bro brdung phyir mi ldog:__srid gsum dgra bgegs brlag pa'i thabs:__'bum phrag kun gyi snying po'o:__sa ma ya:__mchog gi ye shes lam byed pa:__'jam dpal don gyi snying po ni:__nges 'byung drag pos rang rgyud sbyangs:__skyabs sems bla ma'i byin rlabs dbab:__snod du gyur nas rnal 'byor ni:__'khor lo rnam pa bzhi yin te:__rang bzhin 'od gsal byang chub sems:__stong nyid 'jam pa gsal ba'i dpal:__zung 'jug ye shes sem dpa' ni:__gnas pa'i 'khor lo gzhi yi rgyud:__'gro ba kun la khyab par bzhugs:__de nyid ma rtogs gzung 'dzin gyi:__srid pa'i 'khor lo sna tshogs pa:__rtsa dang rlung dang byang chub sems:__kun gzhi ye shes cir yang snang :__'dul thabs sprul pa'i 'khor lo ni:__snang ba sbyong byed dbyibs kyi lam:__zil gnon khrag 'thung phyag rgyar bsgom:__stong nyid ma skyes rang bzhin la:__e yig lhun grub gzugs skur bzhengs:__rnam thar dbu la phar phyin phyag:__tshad med zhabs ldan 'byung ba lnga:__'dus pa'i ye shes chen po yis:__'khor 'das thams cad khyab cing gnon:__gzhi lam 'bras gsum rang la rdzogs:__dag pa dran pa gnad kyi gzer:__yul gsum gsal bar gyur pa dang :__zhen pa sbyong byed sngags kyi thabs:__rlung lam rdo rje'i bzlas pas sbyang :__kha sbyor bum pa srog rtsol btsud:__de las gtum mo'i me sbar bas:__ye shes las dang 'jig rten gyi:__gshin rjes rtsa 'khor thams cad khyab:__bde ba gsol ba'i bdud rtsi yis:__gsol btab ka dag ngang du bzhag:__snang zhen las su rung ba na:__bu mo ut+pal mig yangs la:__brtag cing btsal la gsang rtsa sprad:__kA kA mu kha'i reg bya yis:__nyon mongs 'ching ba gcod par bya:__de tshe bde ba'i ngo bo nyid:__thig le gcig tu 'dus par blta:__bsam gyis mi khyab dgongs pa'i gding :__mi g.yo mnyam pa nyid du bzhag:__'khor ba rnam par rtog pa ste:__myang 'das ngo bo stong pa nyid:__phyag rgya chen po ma bcos pa:__de yis gzung 'dzin zil gyis gnon:__'jam dpal zhes ni de la bya:__gsang ba'i lam nas ye shes gdangs:__nam mkhar shar ba bzhin du byas:__dbyings rig thig ler 'dzud pa yis:__snang ba mched cing gong du 'phel:__thams cad 'jam dpal sku ru shar:__khams gsum thams cad de yis gang :__srid gsum g.yo ba sdud cing zad:__slar yang ye shes rang snang bas:__'pho ba'i bag chags rgyu dang bcas:__yongs su gcod cing sems can don:__lhun grub rgyun mi chad pa'i phyir:__'khor lo mi zad rgyan du rdzogs:__mthar thug 'bras bu chen po'o:__sa ma ya:__las kyi sbyor sde sna tshogs ni:__bum pa chu sna dgu yis dgang :__bdag nyid zil gnon thugs ka nas:__'od 'phros bum pa'i dngos 'dzin sbyangs:__snod ni gzhal yas byang sems bcud:__snying po 'jam dpal lha sngags gsal:__ye shes bdud rtsi'i rgyun gyis bkang :__sngags bzlas 'od zhu 'thor 'thung dang :__nye reg byas pas nad gdon dang :__khyad par klu yi dug kun zhi:__las mthun shing la me sbar te:__lha bskyed bdud rtsi'i bsreg rdzas 'bul:__yang na sha khrag rus par dmigs:__zhi rgyas dbang drag las kun byed:__yul khams phung ba'i dam sri'i sde:__rang rang srog gi thod par grub:__stobs chen yongs rdzogs mchod rten 'og:__mnan cing gzir bas phyis mi ldang :__'jam dpal grub pa'i rtsa mchog las:__rdo rje tshe yi sngags kyis btab:__ra mo shag gi khu bas dbul:__tshe dang lus kyi bcud len 'grub:__sa ma ya:__dang po rang byung sngags kyi rgyud:__zla gsang bye ba 'bum phrag las:__snying po'i snying po mdo tsam zhig:__'jam dpal bzang pos gnad bsdus te:__brtul zhugs spyod pa'i dbang por gtad:__bdag nyid blo ldan mchog sred kyis:__'ga' zhig sa yi bcud du gtams:__la la klong lnga'i sgrom bur bstsal:__snyan brgyud 'di ni skal ldan la:__dgongs pa byin rlabs tshul du bshad:__sa ma ya:__rgya rgya rgya:__gu h+ya:__ma 'ongs 'di spyod las can ni:__gnubs kyi dge slong rigs sngags 'chang :__bod khams mtha' dang dbus su 'byung :__the tshom med par nyams blangs na:__bdun gsum mi mthun keka las grol:__dam sri rkun po'i bar chad zhi:__brgyud 'dzin 'phel zhing bkra shis thob:__gzhan yang grags pa mchog dang dbyangs:__mthu chen bstan pa spel la dga':__de dang de la sogs pa yi:__las can mang zhig tshul 'di la:__brten nas nus pa'i gding thob ste:__bstan pa srung zhing rang rgyud grol:__gdul bya yongs su smin par 'gyur:__sa ma ya:__rgya rgya rgya:__gu h+ya:__badz+ra man+t+ra gar+b+ha a ti gu h+ya sa ma ya:__zhes pa'ang slob dpon 'jam dpal bshes gnyen gyis byin gyis brlabs shing*/__lhun grub rig 'dzin blo ldan mchog sred kyis rjes su gdams pa'i snyan brgyud 'di ni/__gnubs kyi skye rgyud zung sogs skal ba dang ldan pa dag la phan pa'i yid kyis mtsho skyes rdo rje 'chang dgyes pa'i 'bangs pad+ma 'od gsal mdo sngags gling pas skad cig gis gtan la phab pa'o//___//