JKW-KABAB-08-NYA-005

🚧 This website is under continued development. We appreciate your patience!

Previous Text Back to Volume PageNext Text

Wylie title	bla ma bstan gnyis skor gsum gyi zab tig spros med bsnyen pa'i nyams len gsal bar byed pa ye shes me long
Location	mkhyen brtse'i bka' babs Volume 8, Text 5, Pages 133-149 (Folios 1a to 18a3)
Author	འཇམ་མགོན་ཀོང་སྤྲུལ་
Less details More details
Tertön	རྒྱ་ལོ་ཙཱ་བ་རྡོ་རྗེ་བཟང་པོ་, འཇམ་དབྱངས་མཁྱེན་བརྩེའི་དབང་པོ་ (rgya lo tsA ba rdo rje bzang po, 'jam dbyangs mkhyen brtse'i dbang po)
Citation	'jam mgon kong sprul. bla ma bstan gnyis skor gsum gyi zab tig spros med bsnyen pa'i nyams len gsal bar byed pa ye shes me long. In Rdzong sar 'jam dbyangs mkhyen brtse'i dbang po'i bka' babs, Vol. 8: 133-149. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Recitation Manual - bsnyen yig
Cycle	བླ་མ་བསྟན་གཉིས་སྐོར་གསུམ་ (bla ma bstan gnyis skor gsum)
Karchag page	JKW-KABAB-Volume-08-NYA-Karchag
RTZ	In the Rinchen Terdzö: https://rtz.tsadra.org/index.php/Terdzo-CHA-013
Colophon	།ཅེས་པའང་ཆོས་མཛད་སྒྲུབ་ལ་གཞོལ་བ་ཀརྨ་ཚུལ་ཁྲིམས་དཔལ་སྒྲོན་ནས་རྗེ་བླ་མའི་བཀའ་གནང་བ་ལྟར་རྟེན་དང་བཅས་ནན་ཏན་ཆེན་པོས་བསྐུལ་བའི་ངོར་ཟབ་ཆོས་འདི་ཉིད་ཀྱི་ཐོག་མའི་སྣོད་ལྡན་པདྨ་གར་དབང་བློ་གྲོས་མཐའ་ཡས་ཀྱིས་དཔལ་སྤུངས་ཡང་ཁྲོད་ཙཱ་འདྲ་རིན་ཆེན་བྲག་གི་སྒྲུབ་གནས་སུ་བགྱིས་པ་དགེ་ལེགས་འཕེལ།།
	ces pa'ang chos mdzad sgrub la gzhol ba karma tshul khrims dpal sgron nas rje bla ma'i bka' gnang ba ltar rten dang bcas nan tan chen pos bskul ba'i ngor zab chos 'di nyid kyi thog ma'i snod ldan pad+ma gar dbang blo gros mtha' yas kyis dpal spungs yang khrod tsA 'dra rin chen brag gi sgrub gnas su bgyis pa dge legs 'phel/

Tibetan Text

Wylie

[edit]

༄༅། །བླ་མ་བསྟན་གཉིས་སྐོར་གསུམ་གྱི་ཟབ་ཏིག་སྤྲོས་མེད་བསྙེན་པའི་ཉམས་ལེན་གསལ་བར་བྱེད་པ་ཡེ་ཤེས་མེ་ལོང་ཞེས་བྱ་བཞུགས་སོ།།ན་མོ་གུུ་ར་ཝེ། དང་པོའི་མགོན་པོ་པདྨ་ཀུན་ཏུ་འཆང༌། །སྒྱུ་འཕྲུལ་རྡོ་རྗེའི་གར་རོལ་དྲིན་ཅན་རྗེ། །དད་བརྒྱའི་སྙིང་གི་པདྨོར་བཀོད་ནས་འདིར། །ཟབ་ཏིག་སྤྲོས་མེད་བསྙེན་ཚུལ་མདོ་ཙམ་དབྱེ། དེའང་རྒྱལ་སྲ་ལྷ་རྗེ་ཉིད་གཏེར་སྟོན་རྐྱང་པའི་སྐྱེ་བ་བཅུ་གསུམ་དུ་བཞེས་པའི་གཉིས་པ་རྒྱ་ལོ་ ཙཱ་བ་རྡོ་རྗེ་བཟང་པོའི་ཡང་གཏེར་རྗེ་བླ་མ་རིན་པོ་ཆེར་བཀའ་བབས་པ། བླ་མའི་སྒྲུབ་ཐབས་བྱེ་བ་ཕྲག་བརྒྱའི་ཕུལ་དུ་གྱུར་པ་བླ་མ་བསྟན་གཉིས་སྐོར་གསུམ་གྱི་སྙིང་པོ་ཟབ་ཏིག་མཐོང་བ་རང་གྲོལ་གྱི་གཞུང་གི་ཉམས་ལེན་ལ་སྤྱིར་བསྐྱེད་རིམ་ཆོས་ཀྱི་ཕྱག་རྒྱ། གཏུམ་མོ་དམ་ཚིག་གི་ཕྱག་རྒྱ། གཞན་ལུས་ལས་ཀྱི་ཕྱག་རྒྱ། དོན་དམ་ཡེ་ཤེས་ཀྱི་ཕྱག་རྒྱ་ཆེན་པོ་བཞི། དེ་རེ་རེ་ལ་རྣལ་འབྱོར་གྱི་རིམ་པ་བཞི་བཞིར་དབྱེ་བའི་དང་པོས་ཉམས་ལེན་གྱི་གཞི་བཟུང༌། གཉིས་པས་ལམ་གྱི་རྐྱེན་སྦྱར། གསུམ་པ་དང་བཞི་པས་དཔེ་དོན་གྱི་ཡེ་ཤེས་བསྐྱེད་ནས་འབྲས་བུ་མཆོག་ལ་སྦྱོར་བའི་གོ་རིམ་ཅན་ཏུ་བཞུགས་པ་ལས། འདིར་དང་པོ་ཆོས་རྒྱ་བསྐྱེད་པའི་རིམ་པ་ཉམས་སུ་ལེན་པ་ལ་རྒྱུད་དང་རྐྱེན་དང་ཐབས་དང་མཐར་ཕྱིན་པའི་རྣལ་འབྱོར་བཞིར་བསྟན་པ་ལས། གང་ཟག་དབང་གིས་རྒྱུད་སྨིན་ཅིང་དམ་ཚིག་ཚུལ་བཞིན་དུ་སྲུང་བའི་སྒྲུབ་པ་པོས་ཐབས་ཀྱི་རྣལ་འབྱོར་བསྙེན་སྒྲུབ་ཡན་ལག་བཞི་ལ་རིམ་པར་འཇུག་དགོས་པའི་ཐོག་མར། སྤྲོས་མེད་ལུས་དཀྱིལ་ལ་བརྟེན་ནས་ཏིང་ངེ་འཛིན་ལ་བརྟེན་པ་ཐོབ་པར་བྱེད་པ་བསྙེན་པ། དེ་ནས་རྟེན་དང་བརྟེན་པའི་དཀྱིལ་འཁོར་ཡོངས་རྫོགས་བདག་མདུན་དབྱེར་མེད་དུ་བསྐྱེད་པ་ཉེ་བསྙེན། སྤྲོས་བཅས་ཀྱི་བཀོད་པ་བཅས་བདག་མདུན་སོ་སོར་དབྱེ་བའི་སྒྲུབ་པ། གྲུབ་རྟགས་བྱུང་ནས་རང་དོན་དངོས་གྲུབ་བླང་ཞིང་གཞན་དོན་དབང་བསྐུར་སོགས་ལ་འཇུག་པ་སྒྲུབ་པ་ཆེན་པོ་རྣམས་རིམ་བཞིན་བྱས་ནས་མཆོག་དངོས་སྒྲུབ་པར་གསུངས་པ་ལས། དང་པོ་གལ་ཆེ་བ་སྤྲོས་མེད་ལུས་དཀྱིལ་ལ་བརྟེན་པའི་བསྙེན་པ་ཉིད་ཡིན་པས་འདི་ཉིད་ཉམས་སུ་ལེན་པ་ལ། ཡར་ངོ་ཚེས་བཅུ་ལྟ་བུའི་དུས་བཟང་ལ་དབུ་བཙུགས། བྱིན་ཆགས་པའི་དབེན་གནས་སུ་སྒྲུབ་ཁང་ཕྱགས་དར་དང་སྤོས་ཆུས་བྲན། འབྱོར་ན་སྐུ་བརྙན་སོགས་རྟེན་བཀྲམ་པའི་མདུན་ཏུ་སྟེགས་བུའི་སྟེང་བླ་མའི་གཏོར་མ་རྒྱན་ལྡན་བཟའ་བཅའ་སྣ་ཚོགས་པའི་གཡས་གཡོན་ཏུ་སྨན་རག །མདུན་དུ་ཉེར་སྤྱོད་ཕྲེང་ཚར་དུ་བཤམ། སྔོན་གཏོར་དཀར་བགེགས། ཚོགས་ཀྱི་ཡོ་བྱད་སོགས་ཉེ་བར་བསྡོགས། མཚམས་ཀྱི་སྤང་བླང་སྤྱི་ལྟར་ཤེས་པར་བྱས་ལ་བསྙེན་པའི་སྐབས་འདིར་ཧ་ཅང་དམ་པོ་མི་དགོས་ཀྱང་ཏིང་ངེ་འཛིན་བརྟེན་པའི་ཆེད་དུ་རྣམ་གཡེངས་མི་འབྱུང་བའི་བཅད་མཚམས་དམ་པ་ལེགས། ཕྱི་ཐུན་ནས་དབུ་བཟུང་སྟན་བདེ་བ་ལ་འཁོད་ནས་ཚིག་བདུན་དང་བླ་མ་སྐུ་གསུམ་སོགས་བརྒྱུད་པའི་གསོལ་འདེབས་སྔོན་ཏུ་འགྲོ་བས་དཀར་ཕྱོགས་སྐྱོང་བ་ལ་དཀར་གཏོར་བསྔཽ། སྒྲུབ་པ་མཐར་ཕྱིན་པའི་སྡོང་གྲོགས་མཛད་པའི་ཕྲིན་ལས་བཅོལ། ལས་བྱང་ཟུར་ཕྱུང་ལྟར་སྐྱབས་འགྲོ་སེམས་བསྐྱེད་ལན་གསུམ་རྒྱུད་དང་འདྲེས་ངེས་བྱ། རང་ཉིད་སྐད་ཅིག་གིས་ལས་ཀྱི་ཧེ་རུ་ཀར་བསྐྱེད་ནས་བགེགས་ལ་གཏོར་མ་སྦྱིན། དཀར་བགེགས་གཉིས་ཐུན་དང་པོ་དེ་ཀ་ལ་མ་གཏོགས་རྗེས་ནས་མི་དགོས། རང་བྱུང་ཧེ་རུ་ཀའི་ང་རྒྱལ་གྱིས་བགེགས་བསྐྲད་ཅིང་མཚོན་ཆ་ལྔ་དང་མེ་ཕུང་ཁྲོ་ཚོགས་ཀྱི་སྲུང་འཁོར་བརྟན་པོར་བསྒོམ། ཡེ་ཤེས་ཀྱི་བྱིན་ཆེན་དབབ་ལ་བདག་གནས་ལྷ་སྔགས་ཡེ་ཤེས་ཀྱི་རྣམ་རོལ་དང་མཆོད་རྫས་འདོད་དགུ་ནམ་མཁའ་མཛོད་ཀྱི་སྤྲིན་ཆེན་པོར་བྱིན་གྱིས་བརླབ། དམ་ཚིག་གི་དཀྱིལ་འཁོར་བསྐྱེད་ཅིང་གནས་གསུམ་བྱིན་བརླབ། ཡེ་ཤེས་ཀྱི་འཁོར་ལོ་སྤྱན་དྲངས་ནས་གཉིས་མེད་དུ་བསྟིམ། དབང་ལྷ་རིགས་ལྔ་སྤྱན་དྲངས་པ་རྣམས་ཀྱིས་དབང་བསྐུར་ཞིང་རྒྱས་གདབ། རང་ལས་སྤྲུལ་པའི་ལྷ་མོ་གྲངས་མེད་པས་ཕྱག་འཚལ་ཞིང་ཕྱི་ཉེར་སྤྱོད་བཞི་དང་ཀུན་བཟང་མཆོད་སྤྲིན། ནང་སྒེག་མོ་སོགས་དང་ཕྱག་རྒྱ་གར་མཆོད། གསང་བ་རིག་མའི་བདེ་བ་དང་ལྷག་པ་ཏིང་འཛིན་མཆོད་པ། ཁྱད་པར་རྨད་བྱུང་སྨན་རཀ་གཏོར་མ་རྣམས་ཀྱིས་མཆོད་ཅིང་རྡོ་རྗེའི་གླུས་བསྟོད་པར་བསམས་ནས་མཆོད་ལྷ་རང་ལ་བསྡུ། འཛབ་ཀྱི་དགོངས་པ་དང་ལྡན་པས་རྩ་བའི་སྙིང་པོ་འབྲུ་བཅུ་གཉིས་པ་ལ་ཐུན་བཟུང༌། ཐུན་མཐར་ཁ་སྐོང་སྤྱི་ལྟར་དང་མཆོད་བསྟོད་འབུལ། དག་པ་དྲན་ཅིང་ང་རྒྱལ་བཟུང༌། ཆོས་སྲུང་གཏོར་འབུལ་རྒྱས་བསྡུས་གང་ལྕོགས་བྱ། ཚོགས་མཆོད་ལྷག་མའི་བར་བཏང༌། དངོས་གྲུབ་ལེན་ཆོག་བསྙེན་པ་གྲོལ་དུས་བར་མི་དགོས་པས་ནོངས་བཤགས་དང་ཚོགས་མགྲོན་བརྟན་བཞུགས་མཐར། བསྐྱེད་པའི་ལྷ་འོད་གསལ་དུ་བསྡུ་ཞིང་སླར་ཟུང་འཇུག་གི་སྐུར་ལྡང༌། བསྔོ་སྨོན་ཤིས་བརྗོད་བཅས་མཐར་དབྱུང༌། ཕྱིར་ཉིན་ཐོར་ཐུན་ནས་བརྩམ་འདོན་བྱ་སྔ་མ་ལྟར་ལ། ཐུན་མཐར་དག་དྲན་རྗེས་འོད་གསལ་འཇུག་ལྡང་དང་བསྔོ་སྨོན་ཤིས་བརྗོད་བར་བཏང་ལུགས་ཐུན་བཞི་ཀར་དེས་འགྲེ། དགོངས་ཐུན་ལ་ཆོས་སྲུང་གཏོར་འབུལ་རེ་བྱ། ཚོགས་མཆོད་རྒྱུན་ཏུ་འགྲུབ་དཀའ་ཡང་ཚེས་བཅུ་སོགས་དུས་བཟང་ལ་ངེས་པར་བྱ་དགོས་སོ། །དེ་ལ་གལ་ཆེ་བ་སྒོམ་དོན་ཅུང་ཟད་སྨོས་ན། སྔོན་རྗེས་ཕལ་ཆེར་མ་ཧཱ་ཡོ་ག་སྤྱི་དང་འདྲ། དངོས་གཞི་ལ་བསྐྱེད་བཟླས་དག་པ་དྲན་པ་གསུམ་ལས། དང་པོ་དམ་ཚིག་གི་དཀྱིལ་འཁོར་བསྐྱེད་པ་ནི། ཆོས་ཐམས་ཅད་གདོད་ནས་རང་བཞིན་གྱིས་རྣམ་པར་དག་པའི་སྟོང་པ་ཉིད་ཀྱི་དོན་དྲན་པ་དེ་བཞིན་ཉིད། དེ་ལྟར་མ་རྟོགས་པའི་སེམས་ཅན་ལ་དམིགས་མེད་སྙིང་རྗེ་མཁའ་ཁྱབ་ཏུ་སྒོམ་པ་ཀུན་ཏུ་སྣང༌། སྟོང་ཉིད་སྙིང་རྗེ་ཟུང་དུ་འཇུག་པའི་རང་རྩལ་ཧཱུྃ་ཡིག་མཐིང་ནག་འོད་འབར་བསྒོམ་པ་རྒྱུའི་ཏིང་ངེ་འཛིན་ཏེ་དེ་གསུམ་གྱིས་ཁོག་དབུབ། ཧཱུྃ་ལས་འཕྲོས་པའི་འོད་ཟེར་གྱི་སྣོད་བཅུད་གཟུང་འཛིན་གྱི་དངོས་པོ་ཐམས་ཅད་སྟོང་ཉིད་དུ་སྦྱང༌། དེའི་ངང་ལས་ཕྱི་སྣོད་ནང་བཅུད་ཐམས་ཅད་འོག་མིན་གསང་བ་མཆོག་གི་ཞིང་ཁམས་སུ་དག་པ་ལ་རྡོ་རྗེའི་སྲུང་འཁོར་མེ་རི་བཅས་བརྟན་ཅིང་བརྗིད་ཆགས་པའི་ནང་གི་ཕྱོགས་མཚམས་བརྒྱད་དུ་དུར་ཁྲོད་བརྒྱད་ཀྱིས་བཀོད་པ་ཡོངས་སུ་རྫོགས་པའི་དབུས་སུ། ལུས་དཀྱིལ་གཞལ་ཡས་ཁང་ལ་བཤད་ཚུལ་འདྲ་མིན་མང་ཡང་རྙིང་ལུགས་སོགས་ལ་རང་ལུས་འདི་ཀ་རང་བྱུང་ལྷུན་གྲུབ་ཀྱི་གཞལ་ཡས་ཁང་དུ་བསྒོམ་པ་ཡིན་ཀྱང་སྐབས་འདིར་སྟབས་མི་བདེ་ན་ངོ་བོ་རང་ལུས་ཉིད་རྣམ་པ་གཞལ་ཡས་ཁང་མཚན་ཉིད་ཡོངས་སུ་རྫོགས་པར་གསལ་བའི་ལྟེ་བར་པདྨ་ཉི་མ་ཟླ་བའི་གདན་ལ་རྒྱུའི་ཧཱུྃ་ཡིག་ཡོངས་སུ་གྱུར་པ་ལས་དཀྱིལ་འཁོར་ཀུན་གྱི་ཁྱབ་བདག་ཆོས་སྐུ་པདྨ་ཀུན་ཏུ་འཆང་ཡབ་ཡུམ་གཉིས་གསལ་བར་བསྐྱེད། དེའི་སྐུ་ལུས་ཀྱི་ནང་དུ་རྩ་བའི་གཙོ་མོ་གསུམ། དེ་ལས་གྱེས་པའི་འཁོར་ལོ་ལྡ་རྣམས་སྤྱི་ལྟར་གསལ་བཏབ་པའི་སྤྱི་བོ་བདེ་ཆེན་གྱི་འཁོར་ལོའི་དབུས་སུ་བུདྡྷ་ཐོད་ཕྲེང་ཡབ་ཡུམ། མགྲིན་པ་ལོངས་སྤྱོད་ཀྱི་འཁོར་ལོའི་དབུས་སུ་པདྨ་ཐོད་ཕྲེང་ཡབ་ཡུམ། སྙིང་ག་ཆོས་ཀྱི་འཁོར་ལོའི་དབུས་སུ་བཛྲ་ཐོད་ཕྲེང་ཡབ་ཡུམ། ལྟེ་བ་སྤྲུལ་པའི་འཁོར་ལོའི་དབུས་སུ་རཏྣ་ཐོད་ཕྲེང་ཡབ་ཡུམ། གསང་གནས་བདེ་སྤྱོད་ཀྱི་འཁོར་ལོའི་དབུས་སུ་ཀརྨ་ཐོད་ཕྲེང་ཡབ་ཡུམ་བཅས་ལོངས་སྐུ་ཐོད་ཕྲེང་རིགས་ལྔ་བསྐྱེད། རྣམ་ཤེས་རྒྱུ་བའི་དབང་པོ་ལ་སྤྲུལ་སྐུ་གུ་རུ་མཚན་བརྒྱད་ནི། མིག་གཡས་ལ་རྡོ་རྗེ་གྲོ་ལོད་དང་ཕྲ་མེན་མཁའ་འགྲོ། མིག་གཡོན་ལ་པདྨ་སྃ་བྷ་དང་སུ་ཁ་དྷ་རི། རྣ་བ་གཡས་པར་སེང་གེ་སྒྲ་སྒྲོག་དང་མཁའ་འགྲོ་བདུད་འདུལ་མ། གཡོན་པར་ཤཱཀྱ་སེང་གེ་དང་ཞི་བ་འཚོ། སྣ་གཡས་པར་ཉི་མ་འོད་ཟེར་དང་བདག་མེད་རྣལ་འབྱོར་མ། གཡོན་པར་པདྨ་འབྱུང་གནས་དང་མཚོ་གླིང་མཁའ་འགྲོ་མ། ལྕེའི་གཡས་ཕྱོགས་སུ་པདྨ་རྒྱལ་པོ་དང་འོད་འཆང་མ། གཡོན་ཕྱོགས་སུ་བློ་ལྡན་མཆོག་སྲེད་དང་བདེ་བའི་རྣལ་འབྱོར་མ་བཅས་གསལ་གདབ། འཁོར་ལོ་ལྔའི་ཕྱོགས་མཚམས་བརྒྱད་དང་སྟེང་འོག་གཉིས་བཅས་བཅུ་ལ་ཐུབ་པའི་དབང་པོ་རེ་རེ་དང་དེ་མདུན་གུ་རུ་པདྨ་རེ་རེ། ཕྱོགས་མཚམས་རྣམས་ཞལ་ནང་གཟིགས། སྟེང་འོག་གཉིས་ཐོད་ཕྲེང་རིགས་ལྔའི་སྟེང་དང་འོག་ཏུ་ཞལ་མདུན་བསྟན་གྱིས་བཞུགས་པ་སྟེ། དེའང་སྤྱི་བོའི་འཁོར་ལོ་ལ་སྐུའི་རིགས། མགྲིན་པར་གསུང་གི་རིགས། ཐུགས་ཀར་ཐུགས་ཀྱི་རིགས། ལྟེ་བར་ཡོན་ཏན་གྱི་རིགས། གསང་གནས་སུ་ཕྲིན་ལས་ཀྱི་རིགས་ཀྱི་ཐུབ་པ་དང་གུ་རུ་བརྒྱ་རྩ་རྣམས་བསྒོམ། སྦྱི་བོར་ལྷའི་གུ་རུ། ལྟག་པར་ལྷ་མིན་གུ་རུ། སྙིང་གར་མིའི་གུ་རུ། ལྟེ་བར་བྱོལ་སོང་གུ་རུ། གསང་བར་ཡི་དྭགས་གུ་རུ། རྐང་མཐིལ་དུ་དམྱལ་བའི་གུ་རུ་བཅས་འགྲོ་འདུལ་གུ་རུ་དྲུག་དང༌། ལག་གཡས་ཀྱི་ཚིགས་མཚམས་སུ་ཁྲོ་ཆེན་རྣམ་པར་རྒྱལ་བ་ཡབ་ཡུམ། གཡོན་པར་གཤིན་རྗེ་གཤེད་ཡབ་ཡུམ། རྐང་གཡོན་རྟ་མགྲིན་ཡབ་ཡུམ། གཡས་པར་བདུད་རྩི་འཁྱིལ་པ་ཡབ་ཡུམ་རྣམས་བསྒོམ། འདི་རྣམས་ཀྱི་སྐུ་མདོག་ཕྱག་མཚན་རྒྱན་ཆ་ལུགས་རྣམ་འགྱུར་རྣམས་ཕྲིན་ལས་རྒྱས་པའི་ནང་ནས་འབྱུང་བ་ལྟར་ལ་གདན་པད་ཟླ་ཙམ་ལས་ཁྲི་མི་དགོས། འདིར་ལས་དང་པོ་པས་ཕྱི་ནང་གི་ལྷ་ཐམས་ཅད་དུས་གཅིག་ཏུ་གསལ་འདེབས་མི་ནུས་པ་ཐོག་མར་གཙོ་བོ་ཆོས་སྐུ་ཡབ་ཡུམ་དང་ཐུགས་ཀའི་རྡོ་རྗེ་ཐོད་ཕྲེང་ལ་དམིགས་པ་རྩེ་གཅིག་ཏུ་གཏད། གཞན་རྣམས་མོས་བསྐྱེད་ཙམ་བྱ། དེ་ལ་གསལ་སྣང་ཅུང་ཟད་ཐོབ་པ་ན་གནས་བཞིའི་ཐོད་ཕྲེང་རིགས་བཞི་དང༌། གུ་རུ་མཚན་བརྒྱད་སོགས་རིམ་པར་གསལ་འདེབས་ཤིང་སོ་སོ་ལ་ཏིང་ངེ་འཛིན་བརྟན་པར་བྱ་བ་གལ་ཆེ། མགྲོན་ཐབས་ཀྱི་ལྷ་སྟེང་གི་ཆར་བླ་མ་རིག་འཛིན། བར་དུ་ཡི་དམ་ཞི་ཁྲོ་འོག་ཕྱོགས་སུ་དཔའ་བོ་མཁའ་འགྲོ་ཆོས་སྐྱོང་སྲུང་མ་རྣམས་སྤྲིན་གཏིབས་པ་ལྟར་བཞུགས་པའི་མོས་པ་བྱ། གནས་གསུམ་བྱིན་རླབས་ཕྱི་ནང་གི་ལྷ་ཐམས་ཅད་ལ་བྱེད་པར་གསུངས་ཀྱང་གསལ་མ་ཐེབས་ན་གཙོ་བོ་ཁོ་ན་ལ་གསལ་ཐེབས་ངེས་དང་གཞན་རྣམས་མོས་པ་ཙམ་བྱའོ། །གཉིས་པ་བཟླས་པའི་དམིགས་པ་ནི། རང་ཉིད་པདྨ་ཀུན་ཏུ་འཆང་ཆེན་པོའི་ཐུགས་ཀར་རྡོ་རྗེ་ཐོད་ཕྲེང་ཡབ་ཡུམ་བཅས་གསལ་བའི་ཐུགས་ཀར་ཉི་ཟླའི་གྭའུ་ཁ་སྦྱོར་གྱི་དབུས་སུ་ཧཱུྃ་ཡིག་མཐིང་གསལ་འོད་འབར་བའི་མཐའ་བསྐོར་དུ་བཛྲ་གུ་རུའི་སྔགས་ཕྲེང་བཻ་ཌཱུརྻ་ལྟ་བུའི་མདོག་ཅན་འོད་ལྔ་འཚེར་བས་གཡས་བསྐོར་དུ་འཁོད་པ་ལས་སྔགས་ཀྱི་རང་སྒྲ་དིར་དིར་ཡོད་པར་བསམས་ལ་རླུང་ཡིད་སེམས་དང་རིག་པ་གཅིག་ཏུ་དྲིལ་ཏེ་རྩེ་གཅིག་ཏུ་སེམས་བཟུང་ལ་བཟླས་པ་བྱས་པས་ཀ་དག་མི་གཡོ་ལྷུན་གྲུབ་ཁྱབ་བདལ་ཆེན་པོའི་དགོངས་པས་བྱིན་གྱིས་བརླབས་པར་བསམ་པ་ནི་བསྙེན་པའི་བསྙེན་པའོ། །ཐོད་ཕྲེང་རིགས་ལྔའི་ཐུགས་ཀར་སྤྱི་བོ་ནས་རིམ་བཞིན་ཨོཾ་ཨཱཿཧཱུྃ་ཊཱྃ་ཧྲཱིཿལྔ་པོ་རང་མདོག་ཏུ་གསལ། ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་ལུ་གུ་བརྒྱུད་དུ་བྱུང་མགྲིན་པའི་ལྷ་དང་སྤྱི་བོའི་ལྷའི་སྦྱོར་མཚམས་ནས་ཐུགས་ཀར་བརྒྱུད། ཞལ་ནས་ཐོན་ཏེ་མར་བྱུང༌། གསང་གནས་དང་ལྟེ་བའི་ལྷའི་གསང་བ་དང་ཐུགས་ཀར་བརྒྱུད། སྙིང་གའི་ལྷའི་ཐུགས་ཀར་ཐིམ་པ་འགལ་མེ་ལྟར་བར་མ་ཆད་དུ་འཁོར་བས་བདེ་སྟོང་གི་ཉམས་འབར། ཕུང་པོ་ལྔ་འབྱུང་བ་ལྔ་ཉོན་མོངས་པ་ལྔའི་རྟོག་སྒྲིབ་སྦྱང༌། སྐུ་ལྔས་བྱིན་གྱིས་བརླབས། རིགས་ལྔའི་དངོས་གྲུབ་ཐོབ། ཡེ་ཤེས་ལྔའི་དགོངས་པ་མངོན་ཏུ་གྱུར་པར་བསམས་ལ་བཟླ་བ་ནི་བསྙེན་པའི་ཉེ་བསྙེན་ནོ། །སྤྲུལ་པའི་གུ་རུ་མཚན་བརྒྱད་ཀྱི་ཐུགས་ཀར་ཉི་ཟླ་ཁ་སྦྱོར་གྱི་ལྟེ་བར་རང་མདོག་ཧྲཱི༔རེ་རེས་མཚན་པ། ཐུགས་སྲོག་སྔགས་ཕྲེང་དང་བཅས་པ་ལས་འོད་ཟེར་འཕྲོས་དེ་དག་ལ་ཕོག་པས་ཐུགས་དམ་གྱི་རྒྱུད་བསྐུལ། སོ་སོའི་ཐུགས་ལས་རིགས་དང་མཐུན་པའི་འོད་ཟེར་བསམ་གྱིས་མི་ཁྱབ་པ་འཕྲོས་པས་འཁོར་འདས་གཉིས་ཀྱི་བརྟན་གཡོ་སྣོད་བཅུད་ཐམས་ཅད་ལ་ཕོག་པས་སོ་སོའི་མཛད་ཕྲིན་ལྷུན་གྱིས་གྲུབ་པར་བསམ་པ་སྟེ། དེའང་རྒྱས་པར་གྲུབ་ན་པད་འབྱུང་འོད་ཟེར་མཐིང་གས་བདེ་སྟོང་གི་ཉམས་རྩལ་འབར། མཆོག་སྲེད་འོད་ཟེར་དཀར་པོས་མཁྱེན་གཉིས་ཀྱི་སྣང་བ་རྒྱས། པད་རྒྱལ་འོད་ཟེར་དམར་པོས་ཁམས་གསུམ་དབང་དུ་བསྡུས། ཤཱཀ་སེང་འོད་ཟེར་སེར་པོས་བདུད་བཞིའི་དཔུང་ཚོགས་བཅོམ། ཉི་ཟེར་འོད་དམར་སེར་གྱིས་འགྲོ་ཀུན་སྨིན་གྲོལ་ལ་བཀོད། པད་སཾ་འོད་དཀར་སེར་གྱིས་ཡེ་ཤེས་དང་ཡོན་ཏན་སྤེལ། སེང་སྒྲོག་འོད་ཟེར་མཐིང་ནག་གིས་བདུད་དང་མུ་སྟེགས་བཅོམ། གྲོ་ལོད་འོད་ཟེར་དམར་ནག་གིས་འབྱུང་པོ་དམ་སྲི་མ་རུངས་པ་གདུག་པ་ཅན་རྣམས་བཏུལ་བར་བསམས་ལ་བཟླ་བ་ནི་བསྙེན་པའི་སྒྲུབ་པའོ། །སླར་ཡང་ཐུགས་ཀ་ནས་འོད་ཟེར་འཕྲོས། བདེ་གཤེགས་ཐུབ་དབང་རྣམས་དང་རིག་འཛིན་རྣམས་ལ་ཕོག་པས་ཐམས་ཅད་ཀྱང་ཡེ་ཤེས་ཀྱི་གཟི་བྱིན་འབར། སྐུ་དང་སྔགས་ཕྲེང་ཕྱག་མཚན་འོད་ཟེར་གྱི་ཚོགས་འཇིག་རྟེན་གྱི་ཁམས་ཁྱབ་པར་འཕྲོས་ནས་སངས་རྒྱས་ཀྱི་མཛད་པ་བསྒྲུབ། སྣོད་ཀྱི་དྲི་མ་སྦྱངས་ནས་འོག་མིན་དག་པའི་ཞིང་དུ་བསྒྱུར། བཅུད་ཀྱི་སེམས་ཅན་རྣམས་ཀྱི་སྒྲིབ་གཉིས་བག་ཆགས་དང་བཅས་པ་དག་ནས་གཟུགས་སྣང་ལྷ། སྒྲ་གྲགས་སྔགས། རྟོག་ཚོགས་འོད་གསལ་ཡེ་ཤེས་དག་པ་རབ་འབྱམས་ཀྱི་འཁོར་ལོ་བསྒྱུར་བར་དམིགས་ལ་བཟླ་བ་དང༌། ཡང་ཐུགས་ཀའི་འོད་ཀྱིས་གུ་རུ་དྲུག་བསྐུལ། དེ་རྣམས་ལས་རང་མདོག་འོད་ཟེར་འཕྲོས་པས་ཁམས་གསུམ་རིགས་དྲུག་གི་སེམས་ཅན་ཀུན་ལ་ཕོག །རྒྱུ་ཉོན་མོངས་པ་དྲུག་དང་འབྲས་བུ་སོ་སོའི་སྡུག་བསྔལ་སྦྱང༌། ཡེ་ཤེས་དྲུག་གིས་བྱིན་གྱིས་བརླབས་པས་སྣོད་བཅུད་གུ་རུ་རིགས་དྲུག་གི་སྐུ་དང་ཞིང་ཁམས་སུ་དག །འཁོར་བ་དོང་ནས་སྤྲུགས་པར་བསམས་ལ་བཟླ། ཡང་ཐུགས་ཀའི་འོད་ཟེར་ཁྲོ་ཆེན་བཞི་ལ་ཕོག་པས་ཐུགས་རྒྱུད་བསྐུལ། དེ་རྣམས་ལས་འོད་ཟེར་དཀར་སེར་དམར་མཐིང་ཕྱོགས་བཅུ་ཁྱབ་པར་འཕྲོས། ཞི་རྒྱས་དབང་དྲག་གི་ཕྲིན་ལས་རྣམ་བཞི་ཐོགས་མེད་དུ་བསྒྲུབ། འོད་ཟེར་ཚུལ་འདུས་རང་ལ་ཐིམ་པས་ནུས་པའི་སྟོབས་རྩལ་རྒྱས། ལས་བཞི་ཕྲིན་ལས་ལྷུན་གྱིས་གྲུབ་པར་བསམས་ལ་བཟླ་བ་རྣམས་ནི་བསྙེན་པའི་སྒྲུབ་པ་ཆེན་པོའོ། །དེ་ལྟར་བསྙེན་པ་ཁོ་ན་ལ་བསྙེན་སྒྲུབ་ཡན་ལག་བཞིར་དབྱེ་བའི་ཏིང་ངེ་འཛིན་གྱི་རིམ་པ་འདི་རྣམས་ཉེ་བསྙེན་སོགས་ལའང་ཤེས་པར་བྱ་ཞིང༌། སྐབས་འདིར་བསྙེན་པའི་ཞག་གྲངས་ཇི་ཙམ་བྱེད་པ་ལ་ཆ་བཞིར་བསྒོས་པའི་དང་པོ་ལ་བསྙེན་པ། གཉིས་པ་ལ་ཉེ་བསྙེན་སོགས་ཀྱི་དམིགས་པ་གཙོར་བཏོན། འབྱོངས་ནས་ཐུན་རེ་རེ་བཞིན་དམིགས་པ་རྫོགས་པར་བྱའོ། །གསུམ་པ་དག་དྲན་གཙོ་བོར་སྨོས་པའི་ཁོངས་སུ་བསྐྱེད་རིམ་སྤྱི་ལ་མེད་དུ་མི་རུང་བའི་དམིགས་པའི་གནད་གསུམ་བསྟན་པ་ལ། དང་པོ་རྣམ་པ་གསལ་བ་ན་ལྷའི་སྐུ་སྣང་ལ་རང་བཞིན་མེད་པ་ལ་ཡིད་མིག་རླུང་གསུམ་གཅིག་དྲིལ་གྱིས་སེམས་རྩེ་གཅིག་ཏུ་གཏད། དེའང་ཐོག་མར་གཞི་ལུས་ཀྱི་ལྷའི་ཆ་ཤས་གང་གསལ་བ་ལ་སེམས་བཟུང་སྟེ་གསལ་སྣང་འདོན། དེ་ལ་གོམས་ནས་རིམ་པར་སྐུ་ཡོངས་རྫོགས། ནང་རྩ་འཁོར་དེར་བཞུགས་པའི་ལྷ་རེ་རེ་བཞིན་སྐུ་མདོག་ཕྱག་མཚན་རྒྱན་ཆ་ལུགས་རྣམས་གསལ་བཏབ་ཅིང་སེམས་བཟུང༌། དེ་དག་ཀྱང་སྣང་ལ་དངོས་པོར་མ་གྲུབ་པར་མེ་ལོང་གི་གཟུགས་བརྙན། གར་ཡང་ཁྱབ་པ་ཆུ་ཟླ། ཁ་དོག་མ་འདྲེས་པ་འཇའ་ཚོན་རྣམས་ཀྱི་དཔེས་མཚོན་ཏེ་ཨ་འཐས་སུ་མ་སོང་བ་བྱ། བྱིངས་ན་རིགས་པ་གཟེངས་བསྟོད་ཅིང་ལྷ་སྔགས་བསྒྲིམ། རྒོད་ན་ལྷོད་ཀྱིས་ཀློད་ལ་མ་ཡེངས་ཙམ་དུ་བཞག་པས་ཆུ་དྭངས་པ་ལ་གཟུགས་བརྙན་ཤར་བ་བཞིན་རང་སེམས་ལྷ་སྐུར་ལམ་མེར་ཤར་བ་ན་དེ་ཉིད་དོན་དམ་རང་བྱུང་གི་ལྷར་ཤེས་པས་ཡུན་ཐུང་གྲངས་མང་དུ་མཉམ་པར་བཞག་སྟེ་གསལ་སྣང་ཚད་དུ་ཕྱིན་པར་བྱའོ། །གཉིས་པ་ང་རྒྱལ་བརྟན་པ་ནི། ལྷ་སྣང་གསལ་རུང་མི་གསལ་རུང་རང་ཐ་མལ་དུ་འཛིན་པའི་བློ་སྤངས་ཏེ་གདོད་མའི་མགོན་པོ་པདྨ་ཀུན་ཏུ་འཆང་ཡེ་ནས་ཡིན་པ་ལ་ཡིན་པར་ཤེས་པའི་ང་རྒྱལ་བརྟན་པོ་ཐུན་དང་ཐུན་མཚམས་ཀུན་ཏུ་མ་བྲལ་བ་བྱ། གསུམ་པ་རྣམ་དག་དྲན་པ་ནི། །གཞི་ལ་ཆོས་ཉིད་དོན་དམ་པའི་ཡོན་ཏན་རང་ཆས་སུ་བཞུགས་པ་ཐམས་ཅད་ལམ་གྱི་སྐབས་འདིར་ཀུན་རྫོབ་ཀྱི་བརྡ་དང༌། རྟགས་སུ་སྣང་བ་ལ་བླཽ་སྦྱངས་བས་འབྲས་བུ་བདེན་གཉིས་ཟུང་དུ་འཇུག་པའི་སྐུ་དང་ཡེ་ཤེས་མངོན་ཏུ་འགྱུར་བར་ཤེས་པ་ལ་རྩ་བའི་དོན་ཚང་ཡང༌། སོ་སོའི་དག་པ་དང་སྦྱར་ན་གཞི་དུས་ཀྱི་འཛིན་པའི་ཡིད་ཤེས་ལམ་གྱི་སྐབས་པདྨ་ཀུན་ཏུ་འཆང་གི་རྣམ་པར་ཤར་བ་འབྲས་དུས་སུ་རང་བྱུང་ཀ་དག་འོད་གསལ་གྱི་ཡེ་ཤེས་ཡིན་པ་ཤེས་པར་བྱས་ནས། དེས་མཚོན་ཏེ་གཟུང་བའི་ཆོས་ཁམས་ཡུམ་ཀུན་ཏུ་བཟང་མོ། གཟུགས་ཕུང་བུདྡྷ་ཆོས་དབྱིངས། འདུ་ཤེས་པདྨ་སོར་རྟོག །རྣམ་ཤེས་བཛྲ་མེ་ལོང༌། ཚོར་བ་རཏྣ་མཉམ་ཉིད། འདུ་བྱེད་ཀརྨ་བྱ་གྲུབ། འབྱུང་བའི་ཁམས་ལྔ་ཡུམ་ལྔ། རྣམ་ཤེས་ཚོགས་བརྒྱད་གུ་རུ་མཚན་བརྒྱད། ཡུལ་གྱི་རྟོག་པ་བརྒྱད་ཡུམ་བརྒྱད། དུས་གསུམ་གྱི་རྟོག་པ་ཐུབ་པ་དང་གུ་རུ་བརྒྱ་རྩ། ཉོན་མོངས་པ་དྲུག་གུ་རུ་རིགས་དྲུག །ལུས་ཀྱི་ཆོས་བཞི་ཁྲོ་ཆེན་བཞི། རྟག་ཆད་བདག་མཚན་ཏུ་ལྟ་བ་ཁྲཽ་མོ་བཞིར་ཤར་བ་ཐམས་ཅད་ཀྱང་དབྱེར་མེད་པའི་ཡེ་ཤེས་ཀྱི་རང་བཞིན་ཏུ་གདོད་ནས་རྣམ་པར་དག་པ་སྤྱིར་དྲན་པར་བྱ་བ་དང༌། བྱེ་བྲག་ཏུ་ཞལ་གཅིག་ཐིག་ལེ་ཉག་གཅིག །ཕྱག་གཉིས་དབྱིངས་དང་ཡེ་ཤེས། ཞབས་གཉིས་ཐབས་དང་ཤེས་རབ་སོགས་སྐུ་ཕྱག་མཚན་རྒྱན་ཆ་རྣམས་རེ་རེའི་དག་པ་དྲན་པའང་སྤྱི་ལྟར་ཤེས་ན་མཆོག་ཏུ་འགྱུར་རོ། །དེ་ལྟར་གསལ་བརྟན་དག་གསུམ་དང་ལྡན་པའི་ཏིང་ངེ་འཛིན་ལ་རྩེ་གཅིག་ཏུ་མཉམ་པར་བཞག་པས་ཐོག་མར་སེམས་གནས་སུ་མི་འདོད་པར་རྟོག་པ་ལང་ལང་འཕྲོ་བ་གཡོ་བའི་ཉམས། དེ་ལ་མ་ཡེངས་པའི་དྲན་པ་དྲག་ཏུ་བསྟེན་པས་སེམས་ཅུང་ཟད་རེ་ཟིན་པ་ཐོབ་པའི་ཉམས། དེའི་རྒྱུན་བསྐྱངས་པས་གསལ་སྣང་ལ་སེམས་ཡུན་རིང་གནས་པ་གོམས་པའི་ཉམས། མཐར་ཉིན་མཚན་འདྲེས་པའི་གསལ་སྣང་ཤར་བ་བརྟན་པའི་ཉམས། །མཐར་རླུང་སེམས་དབྱེར་མེད་པའི་ལྷ་སྐུ་རང་ཤར་དུ་འབྱུང་བ་མཐར་ཕྱིན་པའི་ཉམས་ཏེ་རྣམ་པར་སྨིན་པའི་རིག་འཛིན་ལ་སྦྱོར་བ་ཡིན་ནོ། །ཉེ་བསྙེན་སོགས་ཕྱི་དཀྱིལ་ལ་བརྟེན་པ་རྣམས་གཙོ་འཁོར་ཐམས་ཅད་ཀྱི་ཐུགས་ཀར་ས་བོན་དང་སྔགས་ཕྲེང་བཀོད་ཅིང་སོ་སོའི་སྙིང་པོ་བཟླ་དགོས་པའི་ཁྱད་པར་ལས་སྤྲོ་བསྡུའི་དམིགས་པ་འདིར་བཤད་པ་ལས་གཞན་ཏུ་མ་མཆིས། ཚེ་སྒྲུབ་ཕྲིན་ལས་ཀྱི་ཡན་ལག་ཡིན་པས་བསྙེན་པ་གྲུབ་ནས་ལུས་དཀྱིལ་ལའང་སྦྱར་ཆོག་པས་དེའི་འདོན་འགྲིགས་དང་དམིགས་པ་ལས་བྱང་ཟུར་བཀོལ་ལྟར་བྱས་པས་ཆོག་ཅིང་བསྙེན་ཚད་ནི་འབུམ་ཕྲག་གསུངས། ཕྱི་དཀྱིལ་ལ་སྦྱོར་བའི་ཚེ་ཚེ་འབྲང་དང་ཚེ་རིལ་ཆང་ཡང་བཤམ་དགོས་སོ། །བསྙེན་པ་གྲུབ་ནས་ཁ་སྐོང་ཞི་བའི་སྦྱིན་སྲེག་བསྙེན་པའི་བཅུ་ཆ་གྲུབ་ན་ཤིན་ཏུ་གལ་ཆེ་ལ་དེ་ལྟར་མི་འགྲུབ་ན་ཞར་བྱུང་ཁ་སྐོང་དང་རྒྱུན་གྱི་ཚོགས་གསོག་པ་གལ་ཆེ་བའི་མེ་མཆོད་བསྡུས་པ་ནི། རང་གི་མདུན་ཏུ་ཕྱེ་མར་འབྲུ་སྨན་དྲི་སྤོས་གང་འབྱོར་བསྲེས་པ་དང༌། མེ་སྣོད་དུ་བཟང་ཤིང་ལ་མེ་སྦར་བ་བཞག །ཡེ་ཤེས་ཀྱི་མེ་འབར་བའི་ཀློང་དུ་བླ་མ་སྐུ་གསུམ་བདེ་གཤེགས་འདུས་པའི་དཀྱིལ་འཁོར་གྱི་ལྷ་ཚོགས་རྣམས་སྐད་ཅིག་གིས་གསལ་བར་གྱུར། ཅེས་བསམས་ལ། ཨོཾ་ཨཱཿཧཱུྃ་བཛྲ་མ་ཧཱ་གུ་རུ་སརྦ་སིདྡྷི་ཨ་མྲྀ་ཏ་པཱུ་ཛ་ཧོཿ སརྦ་ཀརྨ་ཀུ་རུ་ཧོཿ ཞེས་བརྒྱ་རྩ་སོགས་བརྗོད་ལ་རྫས་འབུལ། ཕྲིན་ལས་བཅོལ་བ་ནི། ཧཱུྃ་ཧྲཱིཿ ཡེ་ཤེས་མེ་དང་དབྱེར་མེད་རིག་པའི་ལྷ༔ ཟག་མེད་བདུད་རྩིའི་མཆོད་པ་འདི་བཞེས་ལ༔ རྣལ་འབྱོར་ལམ་གྱི་བར་ཆད་ཞི་བ་དང་༔ དངོས་གྲུབ་རྣམ་གཉིས་འབྲས་བུ་མྱུར་དུ་སྩོལཿ སརྦ་སིདྡྷི་ཕ་ལ་ཧཱུྃཿ ཞེས་བརྗོད་ལ་དམིགས་མེད་ངང་དུ་བཞག །འདི་ཉིད་རྒྱུན་དུ་གྲུབ་ན་སྡིག་སྒྲིབ་བར་ཆད་ཐམས་ཅད་ཞི་ཞིང་གང་འདོད་ཀྱི་ཕྲིན་ལས་ཐོགས་མེད་དུ་འགྲུབ་པ་སོགས་ཕན་ཡོན་ཆེན་པོ་དང་ལྡན་པར་གསུངས་སོ། །བླ་མ་སྐུ་གསུམ་བསྟན་པ་གཉིས་ལྡན་གྱི། །སྨིན་གྲོལ་ཆུ་རྒྱུན་ཞིང་ཀུན་ཁྱབ་ཅིང་རྟག །འགྲོ་ཀུན་ཡེ་ཤེས་བླ་མའི་ས་མཆོག་ཏུ། །ཕྱམ་གཅིག་བྱང་ཆུབ་འཁོར་བ་དོང་སྤྲུགས་ཤོག །ཅེས་པའང་ཆོས་མཛད་སྒྲུབ་ལ་གཞོལ་བ་ཀརྨ་ཚུལ་ཁྲིམས་དཔལ་སྒྲོན་ནས་རྗེ་བླ་མའི་བཀའ་གནང་བ་ལྟར་རྟེན་དང་བཅས་ནན་ཏན་ཆེན་པོས་བསྐུལ་བའི་ངོར་ཟབ་ཆོས་འདི་ཉིད་ཀྱི་ཐོག་མའི་སྣོད་ལྡན་པདྨ་གར་དབང་བློ་གྲོས་མཐའ་ཡས་ཀྱིས་དཔལ་སྤུངས་ཡང་ཁྲོད་ཙཱ་འདྲ་རིན་ཆེན་བྲག་གི་སྒྲུབ་གནས་སུ་བགྱིས་པ་དགེ་ལེགས་འཕེལ།། །།

[edit]

@#/__/bla ma bstan gnyis skor gsum gyi zab tig spros med bsnyen pa'i nyams len gsal bar byed pa ye shes me long zhes bya bzhugs so//na mo gu+u ra we/__dang po'i mgon po pad+ma kun tu 'chang*/__/sgyu 'phrul rdo rje'i gar rol drin can rje/__/dad brgya'i snying gi pad+mor bkod nas 'dir/__/zab tig spros med bsnyen tshul mdo tsam dbye/__de'ang rgyal sra lha rje nyid gter ston rkyang pa'i skye ba bcu gsum du bzhes pa'i gnyis pa rgya lo _tsA ba rdo rje bzang po'i yang gter rje bla ma rin po cher bka' babs pa/__bla ma'i sgrub thabs bye ba phrag brgya'i phul du gyur pa bla ma bstan gnyis skor gsum gyi snying po zab tig mthong ba rang grol gyi gzhung gi nyams len la spyir bskyed rim chos kyi phyag rgya/__gtum mo dam tshig gi phyag rgya/__gzhan lus las kyi phyag rgya/__don dam ye shes kyi phyag rgya chen po bzhi/__de re re la rnal 'byor gyi rim pa bzhi bzhir dbye ba'i dang pos nyams len gyi gzhi bzung*/__gnyis pas lam gyi rkyen sbyar/__gsum pa dang bzhi pas dpe don gyi ye shes bskyed nas 'bras bu mchog la sbyor ba'i go rim can tu bzhugs pa las/__'dir dang po chos rgya bskyed pa'i rim pa nyams su len pa la rgyud dang rkyen dang thabs dang mthar phyin pa'i rnal 'byor bzhir bstan pa las/__gang zag dbang gis rgyud smin cing dam tshig tshul bzhin du srung ba'i sgrub pa pos thabs kyi rnal 'byor bsnyen sgrub yan lag bzhi la rim par 'jug dgos pa'i thog mar/__spros med lus dkyil la brten nas ting nge 'dzin la brten pa thob par byed pa bsnyen pa/__de nas rten dang brten pa'i dkyil 'khor yongs rdzogs bdag mdun dbyer med du bskyed pa nye bsnyen/__spros bcas kyi bkod pa bcas bdag mdun so sor dbye ba'i sgrub pa/__grub rtags byung nas rang don dngos grub blang zhing gzhan don dbang bskur sogs la 'jug pa sgrub pa chen po rnams rim bzhin byas nas mchog dngos sgrub par gsungs pa las/___dang po gal che ba spros med lus dkyil la brten pa'i bsnyen pa nyid yin pas 'di nyid nyams su len pa la/__yar ngo tshes bcu lta bu'i dus bzang la dbu btsugs/__byin chags pa'i dben gnas su sgrub khang phyags dar dang spos chus bran/__'byor na sku brnyan sogs rten bkram pa'i mdun tu stegs bu'i steng bla ma'i gtor ma rgyan ldan bza' bca' sna tshogs pa'i g.yas g.yon tu sman rag__/mdun du nyer spyod phreng tshar du bsham/__sngon gtor dkar bgegs/__tshogs kyi yo byad sogs nye bar bsdogs/__mtshams kyi spang blang spyi ltar shes par byas la bsnyen pa'i skabs 'dir ha cang dam po mi dgos kyang ting nge 'dzin brten pa'i ched du rnam g.yengs mi 'byung ba'i bcad mtshams dam pa legs/__phyi thun nas dbu bzung stan bde ba la 'khod nas tshig bdun dang bla ma sku gsum sogs brgyud pa'i gsol 'debs sngon tu 'gro bas dkar phyogs skyong ba la dkar gtor bsngau/___sgrub pa mthar phyin pa'i sdong grogs mdzad pa'i phrin las bcol/__las byang zur phyung ltar skyabs 'gro sems bskyed lan gsum rgyud dang 'dres nges bya/__rang nyid skad cig gis las kyi he ru kar bskyed nas bgegs la gtor ma sbyin/__dkar bgegs gnyis thun dang po de ka la ma gtogs rjes nas mi dgos/__rang byung he ru ka'i nga rgyal gyis bgegs bskrad cing mtshon cha lnga dang me phung khro tshogs kyi srung 'khor brtan por bsgom/__ye shes kyi byin chen dbab la bdag gnas lha sngags ye shes kyi rnam rol dang mchod rdzas 'dod dgu nam mkha' mdzod kyi sprin chen por byin gyis brlab/__dam tshig gi dkyil 'khor bskyed cing gnas gsum byin brlab/__ye shes kyi 'khor lo spyan drangs nas gnyis med du bstim/__dbang lha rigs lnga spyan drangs pa rnams kyis dbang bskur zhing rgyas gdab/__rang las sprul pa'i lha mo grangs med pas phyag 'tshal zhing phyi nyer spyod bzhi dang kun bzang mchod sprin/__nang sgeg mo sogs dang phyag rgya gar mchod/__gsang ba rig ma'i bde ba dang lhag pa ting 'dzin mchod pa/__khyad par rmad byung sman raka gtor ma rnams kyis mchod cing rdo rje'i glus bstod par bsams nas mchod lha rang la bsdu/__'dzab kyi dgongs pa dang ldan pas rtsa ba'i snying po 'bru bcu gnyis pa la thun bzung*/__thun mthar kha skong spyi ltar dang mchod bstod 'bul/__dag pa dran cing nga rgyal bzung*/__chos srung gtor 'bul rgyas bsdus gang lcogs bya/__tshogs mchod lhag ma'i bar btang*/__dngos grub len chog bsnyen pa grol dus bar mi dgos pas nongs bshags dang tshogs mgron brtan bzhugs mthar/__bskyed pa'i lha 'od gsal du bsdu zhing slar zung 'jug gi skur ldang*/__bsngo smon shis brjod bcas mthar dbyung*/__phyir nyin thor thun nas brtsam 'don bya snga ma ltar la/__thun mthar dag dran rjes 'od gsal 'jug ldang dang bsngo smon shis brjod bar btang lugs thun bzhi kar des 'gre/__dgongs thun la chos srung gtor 'bul re bya/__tshogs mchod rgyun tu 'grub dka' yang tshes bcu sogs dus bzang la nges par bya dgos so/__/de la gal che ba sgom don cung zad smos na/__sngon rjes phal cher ma hA yo ga spyi dang 'dra/__dngos gzhi la bskyed bzlas dag pa dran pa gsum las/__dang po dam tshig gi dkyil 'khor bskyed pa ni/__chos thams cad gdod nas rang bzhin gyis rnam par dag pa'i stong pa nyid kyi don dran pa de bzhin nyid/__de ltar ma rtogs pa'i sems can la dmigs med snying rje mkha' khyab tu sgom pa kun tu snang*/__stong nyid snying rje zung du 'jug pa'i rang rtsal hU~M yig mthing nag 'od 'bar bsgom pa rgyu'i ting nge 'dzin te de gsum gyis khog dbub/__hU~M las 'phros pa'i 'od zer gyi snod bcud gzung 'dzin gyi dngos po thams cad stong nyid du sbyang*/__de'i ngang las phyi snod nang bcud thams cad 'og min gsang ba mchog gi zhing khams su dag pa la rdo rje'i srung 'khor me ri bcas brtan cing brjid chags pa'i nang gi phyogs mtshams brgyad du dur khrod brgyad kyis bkod pa yongs su rdzogs pa'i dbus su/__lus dkyil gzhal yas khang la bshad tshul 'dra min mang yang rnying lugs sogs la rang lus 'di ka rang byung lhun grub kyi gzhal yas khang du bsgom pa yin kyang skabs 'dir stabs mi bde na ngo bo rang lus nyid rnam pa gzhal yas khang mtshan nyid yongs su rdzogs par gsal ba'i lte bar pad+ma nyi ma zla ba'i gdan la rgyu'i hU~M yig yongs su gyur pa las dkyil 'khor kun gyi khyab bdag chos sku pad+ma kun tu 'chang yab yum gnyis gsal bar bskyed/__de'i sku lus kyi nang du rtsa ba'i gtso mo gsum/__de las gyes pa'i 'khor lo lda rnams spyi ltar gsal btab pa'i spyi bo bde chen gyi 'khor lo'i dbus su bud+d+ha thod phreng yab yum/__mgrin pa longs spyod kyi 'khor lo'i dbus su pad+ma thod phreng yab yum/__snying ga chos kyi 'khor lo'i dbus su badz+ra thod phreng yab yum/__lte ba sprul pa'i 'khor lo'i dbus su rat+na thod phreng yab yum/__gsang gnas bde spyod kyi 'khor lo'i dbus su karma thod phreng yab yum bcas longs sku thod phreng rigs lnga bskyed/__rnam shes rgyu ba'i dbang po la sprul sku gu ru mtshan brgyad ni/__mig g.yas la rdo rje gro lod dang phra men mkha' 'gro/__mig g.yon la pad+ma sa~M b+ha dang su kha d+ha ri/__rna ba g.yas par seng ge sgra sgrog dang mkha' 'gro bdud 'dul ma/__g.yon par shAkya seng ge dang zhi ba 'tsho/__sna g.yas par nyi ma 'od zer dang bdag med rnal 'byor ma/__g.yon par pad+ma 'byung gnas dang mtsho gling mkha' 'gro ma/__lce'i g.yas phyogs su pad+ma rgyal po dang 'od 'chang ma/__g.yon phyogs su blo ldan mchog sred dang bde ba'i rnal 'byor ma bcas gsal gdab/__'khor lo lnga'i phyogs mtshams brgyad dang steng 'og gnyis bcas bcu la thub pa'i dbang po re re dang de mdun gu ru pad+ma re re/__phyogs mtshams rnams zhal nang gzigs/__steng 'og gnyis thod phreng rigs lnga'i steng dang 'og tu zhal mdun bstan gyis bzhugs pa ste/__de'ang spyi bo'i 'khor lo la sku'i rigs/__mgrin par gsung gi rigs/__thugs kar thugs kyi rigs/__lte bar yon tan gyi rigs/__gsang gnas su phrin las kyi rigs kyi thub pa dang gu ru brgya rtsa rnams bsgom/__sbyi bor lha'i gu ru/__ltag par lha min gu ru/__snying gar mi'i gu ru/__lte bar byol song gu ru/__gsang bar yi dwags gu ru/__rkang mthil du dmyal ba'i gu ru bcas 'gro 'dul gu ru drug dang*/__lag g.yas kyi tshigs mtshams su khro chen rnam par rgyal ba yab yum/__g.yon par gshin rje gshed yab yum/__rkang g.yon rta mgrin yab yum/__g.yas par bdud rtsi 'khyil pa yab yum rnams bsgom/__'di rnams kyi sku mdog phyag mtshan rgyan cha lugs rnam 'gyur rnams phrin las rgyas pa'i nang nas 'byung ba ltar la gdan pad zla tsam las khri mi dgos/__'dir las dang po pas phyi nang gi lha thams cad dus gcig tu gsal 'debs mi nus pa thog mar gtso bo chos sku yab yum dang thugs ka'i rdo rje thod phreng la dmigs pa rtse gcig tu gtad/__gzhan rnams mos bskyed tsam bya/__de la gsal snang cung zad thob pa na gnas bzhi'i thod phreng rigs bzhi dang*/__gu ru mtshan brgyad sogs rim par gsal 'debs shing so so la ting nge 'dzin brtan par bya ba gal che/__mgron thabs kyi lha steng gi char bla ma rig 'dzin/__bar du yi dam zhi khro 'og phyogs su dpa' bo mkha' 'gro chos skyong srung ma rnams sprin gtibs pa ltar bzhugs pa'i mos pa bya/__gnas gsum byin rlabs phyi nang gi lha thams cad la byed par gsungs kyang gsal ma thebs na gtso bo kho na la gsal thebs nges dang gzhan rnams mos pa tsam bya'o/__/gnyis pa bzlas pa'i dmigs pa ni/__rang nyid pad+ma kun tu 'chang chen po'i thugs kar rdo rje thod phreng yab yum bcas gsal ba'i thugs kar nyi zla'i gwa'u kha sbyor gyi dbus su hU~M yig mthing gsal 'od 'bar ba'i mtha' bskor du badz+ra gu ru'i sngags phreng bai DUr+Ya lta bu'i mdog can 'od lnga 'tsher bas g.yas bskor du 'khod pa las sngags kyi rang sgra dir dir yod par bsams la rlung yid sems dang rig pa gcig tu dril te rtse gcig tu sems bzung la bzlas pa byas pas ka dag mi g.yo lhun grub khyab bdal chen po'i dgongs pas byin gyis brlabs par bsam pa ni bsnyen pa'i bsnyen pa'o/__/thod phreng rigs lnga'i thugs kar spyi bo nas rim bzhin oM AHhU~M TA~M hrIHlnga po rang mdog tu gsal/__thugs ka'i sngags phreng las sngags phreng gnyis pa lu gu brgyud du byung mgrin pa'i lha dang spyi bo'i lha'i sbyor mtshams nas thugs kar brgyud/__zhal nas thon te mar byung*/__gsang gnas dang lte ba'i lha'i gsang ba dang thugs kar brgyud/__snying ga'i lha'i thugs kar thim pa 'gal me ltar bar ma chad du 'khor bas bde stong gi nyams 'bar/__phung po lnga 'byung ba lnga nyon mongs pa lnga'i rtog sgrib sbyang*/__sku lngas byin gyis brlabs/__rigs lnga'i dngos grub thob/__ye shes lnga'i dgongs pa mngon tu gyur par bsams la bzla ba ni bsnyen pa'i nye bsnyen no/__/sprul pa'i gu ru mtshan brgyad kyi thugs kar nyi zla kha sbyor gyi lte bar rang mdog hrI:re res mtshan pa/__thugs srog sngags phreng dang bcas pa las 'od zer 'phros de dag la phog pas thugs dam gyi rgyud bskul/__so so'i thugs las rigs dang mthun pa'i 'od zer bsam gyis mi khyab pa 'phros pas 'khor 'das gnyis kyi brtan g.yo snod bcud thams cad la phog pas so so'i mdzad phrin lhun gyis grub par bsam pa ste/__de'ang rgyas par grub na pad 'byung 'od zer mthing gas bde stong gi nyams rtsal 'bar/__mchog sred 'od zer dkar pos mkhyen gnyis kyi snang ba rgyas/__pad rgyal 'od zer dmar pos khams gsum dbang du bsdus/__shAka seng 'od zer ser pos bdud bzhi'i dpung tshogs bcom/__nyi zer 'od dmar ser gyis 'gro kun smin grol la bkod/__pad saM 'od dkar ser gyis ye shes dang yon tan spel/__seng sgrog 'od zer mthing nag gis bdud dang mu stegs bcom/__gro lod 'od zer dmar nag gis 'byung po dam sri ma rungs pa gdug pa can rnams btul bar bsams la bzla ba ni bsnyen pa'i sgrub pa'o/__/slar yang thugs ka nas 'od zer 'phros/__bde gshegs thub dbang rnams dang rig 'dzin rnams la phog pas thams cad kyang ye shes kyi gzi byin 'bar/__sku dang sngags phreng phyag mtshan 'od zer gyi tshogs 'jig rten gyi khams khyab par 'phros nas sangs rgyas kyi mdzad pa bsgrub/__snod kyi dri ma sbyangs nas 'og min dag pa'i zhing du bsgyur/__bcud kyi sems can rnams kyi sgrib gnyis bag chags dang bcas pa dag nas gzugs snang lha/__sgra grags sngags/__rtog tshogs 'od gsal ye shes dag pa rab 'byams kyi 'khor lo bsgyur bar dmigs la bzla ba dang*/__yang thugs ka'i 'od kyis gu ru drug bskul/__de rnams las rang mdog 'od zer 'phros pas khams gsum rigs drug gi sems can kun la phog__/rgyu nyon mongs pa drug dang 'bras bu so so'i sdug bsngal sbyang*/__ye shes drug gis byin gyis brlabs pas snod bcud gu ru rigs drug gi sku dang zhing khams su dag__/'khor ba dong nas sprugs par bsams la bzla/__yang thugs ka'i 'od zer khro chen bzhi la phog pas thugs rgyud bskul/__de rnams las 'od zer dkar ser dmar mthing phyogs bcu khyab par 'phros/__zhi rgyas dbang drag gi phrin las rnam bzhi thogs med du bsgrub/__'od zer tshul 'dus rang la thim pas nus pa'i stobs rtsal rgyas/__las bzhi phrin las lhun gyis grub par bsams la bzla ba rnams ni bsnyen pa'i sgrub pa chen po'o/__/de ltar bsnyen pa kho na la bsnyen sgrub yan lag bzhir dbye ba'i ting nge 'dzin gyi rim pa 'di rnams nye bsnyen sogs la'ang shes par bya zhing*/__skabs 'dir bsnyen pa'i zhag grangs ji tsam byed pa la cha bzhir bsgos pa'i dang po la bsnyen pa/__gnyis pa la nye bsnyen sogs kyi dmigs pa gtsor bton/__'byongs nas thun re re bzhin dmigs pa rdzogs par bya'o/__/gsum pa dag dran gtso bor smos pa'i khongs su bskyed rim spyi la med du mi rung ba'i dmigs pa'i gnad gsum bstan pa la/__dang po rnam pa gsal ba na lha'i sku snang la rang bzhin med pa la yid mig rlung gsum gcig dril gyis sems rtse gcig tu gtad/__de'ang thog mar gzhi lus kyi lha'i cha shas gang gsal ba la sems bzung ste gsal snang 'don/__de la goms nas rim par sku yongs rdzogs/__nang rtsa 'khor der bzhugs pa'i lha re re bzhin sku mdog phyag mtshan rgyan cha lugs rnams gsal btab cing sems bzung*/__de dag kyang snang la dngos por ma grub par me long gi gzugs brnyan/__gar yang khyab pa chu zla/__kha dog ma 'dres pa 'ja' tshon rnams kyi dpes mtshon te a 'thas su ma song ba bya/__byings na rigs pa gzengs bstod cing lha sngags bsgrim/__rgod na lhod kyis klod la ma yengs tsam du bzhag pas chu dwangs pa la gzugs brnyan shar ba bzhin rang sems lha skur lam mer shar ba na de nyid don dam rang byung gi lhar shes pas yun thung grangs mang du mnyam par bzhag ste gsal snang tshad du phyin par bya'o/__/gnyis pa nga rgyal brtan pa ni/__lha snang gsal rung mi gsal rung rang tha mal du 'dzin pa'i blo spangs te gdod ma'i mgon po pad+ma kun tu 'chang ye nas yin pa la yin par shes pa'i nga rgyal brtan po thun dang thun mtshams kun tu ma bral ba bya/__gsum pa rnam dag dran pa ni/__/gzhi la chos nyid don dam pa'i yon tan rang chas su bzhugs pa thams cad lam gyi skabs 'dir kun rdzob kyi brda dang*/__rtags su snang ba la blau sbyangs bas 'bras bu bden gnyis zung du 'jug pa'i sku dang ye shes mngon tu 'gyur bar shes pa la rtsa ba'i don tshang yang*/__so so'i dag pa dang sbyar na gzhi dus kyi 'dzin pa'i yid shes lam gyi skabs pad+ma kun tu 'chang gi rnam par shar ba 'bras dus su rang byung ka dag 'od gsal gyi ye shes yin pa shes par byas nas/__des mtshon te gzung ba'i chos khams yum kun tu bzang mo/__gzugs phung bud+d+ha chos dbyings/__'du shes pad+ma sor rtog__/rnam shes badz+ra me long*/__tshor ba rat+na mnyam nyid/__'du byed karma bya grub/__'byung ba'i khams lnga yum lnga/__rnam shes tshogs brgyad gu ru mtshan brgyad/__yul gyi rtog pa brgyad yum brgyad/__dus gsum gyi rtog pa thub pa dang gu ru brgya rtsa/__nyon mongs pa drug gu ru rigs drug__/lus kyi chos bzhi khro chen bzhi/__rtag chad bdag mtshan tu lta ba khrau mo bzhir shar ba thams cad kyang dbyer med pa'i ye shes kyi rang bzhin tu gdod nas rnam par dag pa spyir dran par bya ba dang*/___bye brag tu zhal gcig thig le nyag gcig__/phyag gnyis dbyings dang ye shes/__zhabs gnyis thabs dang shes rab sogs sku phyag mtshan rgyan cha rnams re re'i dag pa dran pa'ang spyi ltar shes na mchog tu 'gyur ro/__/de ltar gsal brtan dag gsum dang ldan pa'i ting nge 'dzin la rtse gcig tu mnyam par bzhag pas thog mar sems gnas su mi 'dod par rtog pa lang lang 'phro ba g.yo ba'i nyams/__de la ma yengs pa'i dran pa drag tu bsten pas sems cung zad re zin pa thob pa'i nyams/__de'i rgyun bskyangs pas gsal snang la sems yun ring gnas pa goms pa'i nyams/__mthar nyin mtshan 'dres pa'i gsal snang shar ba brtan pa'i nyams/__/mthar rlung sems dbyer med pa'i lha sku rang shar du 'byung ba mthar phyin pa'i nyams te rnam par smin pa'i rig 'dzin la sbyor ba yin no/__/nye bsnyen sogs phyi dkyil la brten pa rnams gtso 'khor thams cad kyi thugs kar sa bon dang sngags phreng bkod cing so so'i snying po bzla dgos pa'i khyad par las spro bsdu'i dmigs pa 'dir bshad pa las gzhan tu ma mchis/__tshe sgrub phrin las kyi yan lag yin pas bsnyen pa grub nas lus dkyil la'ang sbyar chog pas de'i 'don 'grigs dang dmigs pa las byang zur bkol ltar byas pas chog cing bsnyen tshad ni 'bum phrag gsungs/__phyi dkyil la sbyor ba'i tshe tshe 'brang dang tshe ril chang yang bsham dgos so/__/bsnyen pa grub nas kha skong zhi ba'i sbyin sreg bsnyen pa'i bcu cha grub na shin tu gal che la de ltar mi 'grub na zhar byung kha skong dang rgyun gyi tshogs gsog pa gal che ba'i me mchod bsdus pa ni/__rang gi mdun tu phye mar 'bru sman dri spos gang 'byor bsres pa dang*/__me snod du bzang shing la me sbar ba bzhag__/ye shes kyi me 'bar ba'i klong du bla ma sku gsum bde gshegs 'dus pa'i dkyil 'khor gyi lha tshogs rnams skad cig gis gsal bar gyur/__ces bsams la/__oM AHhU~M badz+ra ma hA gu ru sarba sid+d+hi a mr-i ta pU dza hoH__sarba karma ku ru hoH__zhes brgya rtsa sogs brjod la rdzas 'bul/__phrin las bcol ba ni/__hU~M hrIH__ye shes me dang dbyer med rig pa'i lha:__zag med bdud rtsi'i mchod pa 'di bzhes la:__rnal 'byor lam gyi bar chad zhi ba dang :__dngos grub rnam gnyis 'bras bu myur du stsolaH__sarba sid+d+hi pha la hU~MH__zhes brjod la dmigs med ngang du bzhag__/'di nyid rgyun du grub na sdig sgrib bar chad thams cad zhi zhing gang 'dod kyi phrin las thogs med du 'grub pa sogs phan yon chen po dang ldan par gsungs so/__/bla ma sku gsum bstan pa gnyis ldan gyi/__/smin grol chu rgyun zhing kun khyab cing rtag__/'gro kun ye shes bla ma'i sa mchog tu/__/phyam gcig byang chub 'khor ba dong sprugs shog__/ces pa'ang chos mdzad sgrub la gzhol ba karma tshul khrims dpal sgron nas rje bla ma'i bka' gnang ba ltar rten dang bcas nan tan chen pos bskul ba'i ngor zab chos 'di nyid kyi thog ma'i snod ldan pad+ma gar dbang blo gros mtha' yas kyis dpal spungs yang khrod tsA 'dra rin chen brag gi sgrub gnas su bgyis pa dge legs 'phel//__//__