JKW-KABUM-22-ZA-012-049

🚧 This website is under continued development. We appreciate your patience!

Previous Text Back to Volume PageNext Text

Wylie title	rig 'dzin 'jigs med gling pa la gsol 'debs rdo rje'i thol glu bde stong DA ki'i sgra dbyangs
Location	mkhyen brtse'i bka' 'bum Volume 22, sde tshan 12, Text 49, Pages 497-500 (Folios 77a5 to 78b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	འཇིགས་མེད་གླིང་པ་ ('jigs med gling pa)
Citation	'jam dbyangs mkhyen brtse'i dbang po. rig 'dzin 'jigs med gling pa la gsol 'debs rdo rje'i thol glu bde stong DA ki'i sgra dbyangs. In 'jam dbyangs mkhyen brtse'i dbang po'i bka' 'bum, Vol. 22: 497-500. Khams sde dge rdzong sar dgon: Rdzong sar blo gros phun tshogs, 2020.
Genre	Supplications - gsol 'debs  ·  Vajra Songs - rdo rje'i glu

1 Texts in this Section (sde tshan or chos tshan)

49 497-500	རིག་འཛིན་འཇིགས་མེད་གླིང་པ་ལ་གསོལ་འདེབས་རྡོ་རྗེའི་ཐོལ་གླུ་བདེ་སྟོང་ཌཱ་ཀིའི་སྒྲ་དབྱངས། rig 'dzin 'jigs med gling pa la gsol 'debs rdo rje'i thol glu bde stong DA ki'i sgra dbyangs Supplications - gsol 'debs   ·   Vajra Songs - rdo rje'i glu	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

རིག་འཛིན་འཇིགས་མེད་གླིང་པ་ལ་གསོལ་བ་འདེབས་པའི་རྡོ་རྗེའི་ཐོལ་གླུ་བདེ་སྟོང་ཌཱ་ཀིའི་སྒྲ་དབྱངས་ཞེས་བྱ་བ། ཨ་ཧོ། གདོད་ནས་འཇི༷གས་མེ༷ད་བདེ་ཆེན་ཆོས་སྐུ་ཡི་ཀློང་ནས། །ཁ་སྦྱོར་ཡན་ལག་བདུན་ལྡན་མཚན་དཔེ་རུ་བཞད་པས། །སྐལ་བཟང་འགྲོ་ཀུན་ཐར་པའི་གླི༷ང་མཆོག་ལ་སྦྱོར་བའི། །འོད་གསལ་རྫོགས་ཆེན་སྟོན་པ༷་སྙིང་དབུས་ནས་དྲན་བྱུང་། །དལ་འབྱོར་དོན་དང་ལྡན་པར་བྱིན་གྱིས་རང་རློབས་ཤིག །རྣམ་པ་ཀུན་བྲལ་ཟུང་འཇུག་ཆོས་དབྱིངས་ཀྱི་ཀློང་ནས། །རྣམ་བཅས་གདན་གསུམ་སྒྱུ་འཕྲུལ་དྲྭ་བ་རུ་སྟོན་པས། །རྣམ་མང་ཞི་དང་ཁྲོ་བོའི་ངོ་བོ་རུ་བཞུགས་པའི། །རྣམ་ཐར་ཡོངས་རྫོགས་གཟུགས་ཀྱི་འཁོར་ལོ་ལ་འདུད་དོ། །གཡོ་བྱེད་རླུང་གི་འཁོར་ལོ་ཡི་གེ་རུ་དེངས་པས། །གྲག་སྟོང་བརྗོད་པ་བྲལ་བའི་ཆོས་ཕུང་གི་ངོ་བོ། །རྣམ་ཀུན་མཆོག་ལྡན་ཀློང་ལྔའི་གསང་མཛོད་ནས་ཤར་བའི། །ལོངས་སྤྱོད་ཡོངས་རྫོགས་གསུང་གི་ངོ་བོ་ལ་འདུད་དོ། །ཨེ་ཝཾ་མཉམ་པར་ རོལ་པའི་བདེ་ཆེན་གྱི་ཀློང་ནས། །ཉོན་མོངས་བཅུ་དྲུག་དགའ་བའི་ཡེ་ཤེས་སུ་བཞད་པས། །རྟོག་བྲལ་འོད་གསལ་ཆོས་སྐུའི་རྒྱལ་ས་རུ་བཞུགས་པའི། །འགྱུར་མེད་གཉུག་མ་ཐུགས་ཀྱི་རྡོ་རྗེ་ལ་འདུད་དོ། །ངོ་བོ་མཚན་ཉིད་མེད་པས་རྟག་པ་ནི་མ་ཡིན། །རང་བཞིན་བསམ་གྱིས་མི་ཁྱབ་ཆད་མཐའ་དང་བྲལ་བའི། །ཟུང་འཇུག་བློ་ལ་མི་གནས་དོན་དམ་གྱི་བདེན་པ། །མཐའ་བྲལ་དབུ་མ་ཆེན་པོའི་ངོ་བོ་ལ་འདུད་དོ། །ཕྱི་ནང་གཞན་གསུམ་རྟོག་པའི་མཚན་མ་ཡི་ཆོས་ཀུན། །ལྷན་ཅིག་སྐྱེས་པའི་ཡེ་ཤེས་ཆེན་པོ་རུ་ཐིམ་པས། །གཟུང་འཛིན་རྣམ་སྤང་མི་ཕྱེད་འཕོ་མེད་ཀྱི་ཐིག་ལེ། །ཁྱབ་བདལ་ཕྱག་རྒྱ་ཆེན་པོའི་ངོ་བོ་ལ་འདུད་དོ། །ཀ་དག་གདོད་ནས་སྐྱེ་མེད་ཆོས་སྐུ་ཡི་སྦུབས་སུ། །ལྷུན་གྲུབ་རང་རྩལ་འགགས་མེད་སྣང་བཞི་ཡི་ངོ་བོ། །ཟུང་འཇུག་ཁྱད་ཆོས་དྲུག་ལྡན་དགོངས་པ་ལ་རོལ་པའི། །བློ་བྲལ་རྫོགས་པ་ཆེན་པོའི་ངོ་བོ་ལ་འདུད་དོ། །རྨད་བྱུང་མཁྱེན་པའི་ལང་ཚོའི་སྒྱུ་རྩལ་གྱིས་བརྒྱན་ཅིང་། །འཁོར་ལོ་གསུམ་ལྡན་གསེར་གྱི་དྲྭ་བ་ཡིས་གཡོགས་ཏེ། །བསྟན་དང་འགྲོ་བའི་ཁུར་ཆེན་ཐར་ལམ་དུ་འདེགས་པའི། །མཁས་གྲུབ་གཉིས་ལྡན་ས་སྲུང་དབང་པོ་ལ་འདུད་དོ། །གུས་པའི་ཡིད་ལས་སྐྱེས་པའི་རྡོ་རྗེ་ཡི་ཐོལ་གླུས། །དཔལ་ལྡན་བླ་མར་གསོལ་འདེབས་དུས་ཀུན་ཏུ་བསྒྱུར་བས། །སྐྱེ་བའི་ཕྲེང་བ་ཀུན་ཏུ་ཁྱོད་རྗེས་སུ་ཞུགས་ཤིང་། །གསང་སྔགས་སྙིང་པོའི་བསྟན་པ་འཛིན་པ་རུ་ཤོག་ཅིག །ཀུན་རྫོབ་གསལ་སྣང་གདན་གསུམ་ལྷ་སྐུ་རུ་བལྟ་ཞིང་། །དོན་དམ་ཞུ་བདེའི་སྟོང་ཉིད་མཚུངས་ལྡན་དུ་རོལ་བས། །བདེན་གཉིས་དབྱེར་མེད་གཟུགས་སྐུའི་ཕྲིན་ལས་ལ་རོལ་ཏེ། །ཚོགས་གཉིས་མྱུར་དུ་རྫོགས་པར་བྱིན་གྱིས་རང་རློབས་ཤིག །བདེ་དང་སྟོང་པ་གཉིས་མེད་དགའ་བཞི་ཡི་ཕོ་ཉས། །ལྷན་སྐྱེས་ཨ་ཝ་དྷཱུ་ཏིའི་མཁའ་དབྱིངས་ལ་རོལ་བས། །དོན་དམ་ཨེ་ཝཾ་མཉམ་སྦྱོར་རྣམ་ཀུན་གྱི་མཆོག་ལྡན། །འཕོ་མེད་ཟུང་འཇུག་ཕྱག་རྒྱར་ཐིམ་པ་རུ་ཤོག་ཅིག །དོན་དམ་བརྗོད་པའི་མཐའ་བྲལ་རང་རིག་གི་ཡེ་ཤེས། །ཡོངས་གྲུབ་བཅོས་བསྒྱུར་བྲལ་བའི་མཉམ་བཞག་ཏུ་གོམས་པས། །ཀུན་བརྟགས་འཁྲུལ་པའི་ཚོགས་ཀུན་རང་ངོ་རུ་དག་སྟེ། །གཞན་དབང་སྲིད་པའི་འཁྲུལ་འཁོར་འགག་པ་རུ་ཤོག་ཅིག །དེ་སྐད་གསོལ་བ་འདེབས་པའི་རྡོ་རྗེ་ཡི་ཐོལ་གླུ། །མགྲིན་པ་ལོངས་སྤྱོད་འཁོར་ལོའི་དཀོར་མཛོད་ནས་བླངས་པས། །རྟོག་འཛིན་འཁྲུལ་པར་སྤྱོད་པའི་འགྲོ་བ་དེ་མ་ལུས། །བདེ་གཤེགས་སྙིང་པོའི་ངོ་བོར་གྲོལ་བ་རུ་ཤོག་ཅིག། །། ༈

[edit]

rig 'dzin 'jigs med gling pa la gsol 'debs rdo rje'i thol glu bde stong DA ki'i sgra dbyangs/__ rig 'dzin 'jigs med gling pa la gsol ba 'debs pa'i rdo rje'i thol glu bde stong DA ki'i sgra dbyangs zhes bya ba/__a ho/__gdod nas 'jiXgs meXd bde chen chos sku yi klong nas/__/kha sbyor yan lag bdun ldan mtshan dpe ru bzhad pas/__/skal bzang 'gro kun thar pa'i gliXng mchog la sbyor ba'i/__/'od gsal rdzogs chen ston paX snying dbus nas dran byung /__/dal 'byor don dang ldan par byin gyis rang rlobs shig__/rnam pa kun bral zung 'jug chos dbyings kyi klong nas/__/rnam bcas gdan gsum sgyu 'phrul drwa ba ru ston pas/__/rnam mang zhi dang khro bo'i ngo bo ru bzhugs pa'i/__/rnam thar yongs rdzogs gzugs kyi 'khor lo la 'dud do/__/g.yo byed rlung gi 'khor lo yi ge ru dengs pas/__/grag stong brjod pa bral ba'i chos phung gi ngo bo/__/rnam kun mchog ldan klong lnga'i gsang mdzod nas shar ba'i/__/longs spyod yongs rdzogs gsung gi ngo bo la 'dud do/__/e waM mnyam par _rol pa'i bde chen gyi klong nas/__/nyon mongs bcu drug dga' ba'i ye shes su bzhad pas/__/rtog bral 'od gsal chos sku'i rgyal sa ru bzhugs pa'i/__/'gyur med gnyug ma thugs kyi rdo rje la 'dud do/__/ngo bo mtshan nyid med pas rtag pa ni ma yin/__/rang bzhin bsam gyis mi khyab chad mtha' dang bral ba'i/__/zung 'jug blo la mi gnas don dam gyi bden pa/__/mtha' bral dbu ma chen po'i ngo bo la 'dud do/__/phyi nang gzhan gsum rtog pa'i mtshan ma yi chos kun/__/lhan cig skyes pa'i ye shes chen po ru thim pas/__/gzung 'dzin rnam spang mi phyed 'pho med kyi thig le/__/khyab bdal phyag rgya chen po'i ngo bo la 'dud do/__/ka dag gdod nas skye med chos sku yi sbubs su/__/lhun grub rang rtsal 'gags med snang bzhi yi ngo bo/__/zung 'jug khyad chos drug ldan dgongs pa la rol pa'i/__/blo bral rdzogs pa chen po'i ngo bo la 'dud do/__/rmad byung mkhyen pa'i lang tsho'i sgyu rtsal gyis brgyan cing /__/'khor lo gsum ldan gser gyi drwa ba yis g.yogs te/__/bstan dang 'gro ba'i khur chen thar lam du 'degs pa'i/__/mkhas grub gnyis ldan sa srung dbang po la 'dud do/__/gus pa'i yid las skyes pa'i rdo rje yi thol glus/__/dpal ldan bla mar gsol 'debs dus kun tu bsgyur bas/__/skye ba'i phreng ba kun tu khyod rjes su zhugs shing /__/gsang sngags snying po'i bstan pa 'dzin pa ru shog cig__/kun rdzob gsal snang gdan gsum lha sku ru blta zhing /__/don dam zhu bde'i stong nyid mtshungs ldan du rol bas/__/bden gnyis dbyer med gzugs sku'i phrin las la rol te/__/tshogs gnyis myur du rdzogs par byin gyis rang rlobs shig__/bde dang stong pa gnyis med dga' bzhi yi pho nyas/__/lhan skyes a wa d+hU ti'i mkha' dbyings la rol bas/__/don dam e waM mnyam sbyor rnam kun gyi mchog ldan/__/'pho med zung 'jug phyag rgyar thim pa ru shog cig__/don dam brjod pa'i mtha' bral rang rig gi ye shes/__/yongs grub bcos bsgyur bral ba'i mnyam bzhag tu goms pas/__/kun brtags 'khrul pa'i tshogs kun rang ngo ru dag ste/__/gzhan dbang srid pa'i 'khrul 'khor 'gag pa ru shog cig__/de skad gsol ba 'debs pa'i rdo rje yi thol glu/__/mgrin pa longs spyod 'khor lo'i dkor mdzod nas blangs pas/__/rtog 'dzin 'khrul par spyod pa'i 'gro ba de ma lus/__/bde gshegs snying po'i ngo bor grol ba ru shog cig/__//__!_