རྗེ་བཙུན་རྣལ་འབྱོར་གྱི་དབང་ཕྱུག་བཞད་པ་རྡོ་རྗེ་ལ་གསོལ་བ་འདེབས་པའི་རྡོ་རྗེའི་ཐོལ་གླུ་སྤྲོས་བྲལ་བདུད་རྩིའི་སྒྲ་དབྱངས།

🚧 This website is under continued development. We appreciate your patience!

Previous Text Back to Volume PageNext Text

Wylie title	rje btsun rnal 'byor gyi dbang phyug bzhad pa rdo rje la gsol ba 'debs pa'i rdo rje'i thol glu spros bral bdud rtsi'i sgra dbyangs
Location	mkhyen brtse'i bka' 'bum Volume 22, sde tshan 12, Text 48, Pages 494-497 (Folios 75b6 to 77a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	མི་ལ་རས་པ་ (mi la ras pa)
Citation	'jam dbyangs mkhyen brtse'i dbang po. rje btsun rnal 'byor gyi dbang phyug bzhad pa rdo rje la gsol ba 'debs pa'i rdo rje'i thol glu spros bral bdud rtsi'i sgra dbyangs. In 'jam dbyangs mkhyen brtse'i dbang po'i bka' 'bum, Vol. 22: 494-497. Khams sde dge rdzong sar dgon: Rdzong sar blo gros phun tshogs, 2020.
Genre	Supplications - gsol 'debs  ·  Vajra Songs - rdo rje'i glu

1 Texts in this Section (sde tshan or chos tshan)

48 494-497	རྗེ་བཙུན་རྣལ་འབྱོར་གྱི་དབང་ཕྱུག་བཞད་པ་རྡོ་རྗེ་ལ་གསོལ་བ་འདེབས་པའི་རྡོ་རྗེའི་ཐོལ་གླུ་སྤྲོས་བྲལ་བདུད་རྩིའི་སྒྲ་དབྱངས། rje btsun rnal 'byor gyi dbang phyug bzhad pa rdo rje la gsol ba 'debs pa'i rdo rje'i thol glu spros bral bdud rtsi'i sgra dbyangs Supplications - gsol 'debs   ·   Vajra Songs - rdo rje'i glu	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

རྗེ་བཙུན་རྣལ་འབྱོར་གྱི་དབང་ཕྱུག་བཞད་པ་རྡོ་རྗེ་ལ་གསོལ་བ་འདེབས་པའི་རྡོ་རྗེའི་ཐོལ་གླུ་སྤྲོས་བྲལ་བདུད་རྩིའི་སྒྲ་དབྱངས་ཞེས་བྱ་བ། ཨ་ཧོ། །གདོད་ནས་སྤྲོས་པ་བྲལ་བའི་ཆོས་ཉིད་ཀྱི་ངང་ནས། །སྣ་ཚོགས་སྣང་བའི་སྒྱུ་འཕྲུལ་གཟུགས་སྐུ་རུ་སྟོན་པས། །ཟུང་འཇུག་བདེ་བ་ཆེན་པོའི་བདུད་རྩི་ཡིས་མྱོས་པའི། །དཔའ་བོ་ཌཱ་ཀིའི་ཕྱག་རྒྱ་མཛེས་པ་ལ་འདུད་དོ། །ཤིན་ཏུ་བརྒལ་བར་དཀའ་བའི་སྡུག་བསྔལ་གྱི་སྲིད་པར། །ངེས་འབྱུང་གཏིང་ནས་སྐྱེ་བའི་དྲི་བཞོན་གྱི་ཕོ་ཉས། །རྩེ་གཅིག་སྒྲུབ་པའི་སྣང་བྱེད་བར་མེད་དུ་བསྐུལ་བས། །ཉོན་མོངས་འཆིངས་བརྒྱའི་མུན་པ་བཅོམ་པ་ལ་འདུད་དོ། །ཐོབ་པར་དཀའ་བའི་སྙན་བརྒྱུད་བདུད་རྩི་ཡི་ཐིགས་པས། །རང་རྒྱུད་ཞིང་ས་གཤིན་པོར་བར་མེད་དུ་བྲན་ནས། །ཚེ་གཅིག་སྐུ་བཞིའི་འབྲས་བུའི་གོ་འཕང་ལ་གཤེགས་པའི། །ཧེ་རུ་ཀ་དཔལ་འཁོར་ལོའི་མགོན་པོ་ལ་འདུད་དོ། །ཡས་བབས་མས་བརྟན་དགའ་བཞི་བདེ་སྟོང་གི་བདུད་རྩིས། །རྩ་གསུམ་འཁོར་ལོའི་མདུད་པ་དབུ་མ་རུ་གྲོལ་བས། །ཟག་བཅས་གཟུགས་ཀྱི་འཁོར་ལོ་ས་བཅུ་རུ་སྨིན་པའི། །དཀྱིལ་འཁོར་ཀུན་གཙོ་རྣལ་འབྱོར་དབང་ཕྱུག་ལ་འདུད་དོ། །སྲོག་དང་རྩོལ་བའི་རྒྱུ་བ་དྷཱུ་ཏི་རུ་བཅིལ་ནས། །ཐབས་ཤེས་ཡི་གེའི་འཁོར་ལོ་མགྲིན་པ་རུ་སྨིན་ནས། །སྣང་གྲགས་རྡོ་རྗེའི་སྒྲ་དབྱངས་ཟད་མེད་དུ་བསྒྱུར་བའི། །ཆོས་ཕུང་བརྒྱད་ཁྲི་བཞི་སྟོང་ངོ་བོ་ལ་འདུད་དོ། །གཟུང་འཛིན་རྟོག་པའི་དྲི་བཞོན་གཉུག་མ་རུ་ཐིམ་པས། །མཁྱེན་དང་བརྩེ་བའི་ཉི་ཟླ་བློ་བྲལ་དུ་ཤར་ཏེ། །ཆོས་ཅན་སྤྲོས་པའི་དྲྭ་བ་ཆོས་ཉིད་དུ་ཐིམ་པའི། །ཀུན་ཁྱབ་ལྷན་སྐྱེས་ཕྱག་རྒྱ་ཆེན་པོ་ལ་འདུད་དོ། །བུམ་གསང་ཤེས་རབ་ཡེ་ཤེས་མཉམ་བཞག་གི་དམ་ཚིག །སྐུ་གསུང་ཐུགས་མཆོག་ལྷན་སྐྱེས་བདེ་ཆེན་དུ་བཅིངས་པས། །གནས་ཡུལ་དུར་ཁྲོད་དཔའ་བོ་ཌཱ་ཀི་ཡི་གྲོང་ཁྱེར། །སྤྲོ་དང་སྡུད་མཛད་བརྟུལ་ཞུགས་གྲུབ་བརྙེས་ལ་འདུད་དོ། །རླུང་སེམས་རྟོག་པའི་འཕྲོ་འདུ་ཡེ་ཤེས་སུ་རོལ་པས། །བཀོད་པ་ལུས་ཀྱི་རྫུ་འཕྲུལ་འགག་མེད་དུ་བསྒྱུར་ནས། །མཐོང་ཐོས་དྲན་རེག་འགྲོ་ཀུན་གཏན་བདེ་ལ་རེག་པའི། །གྲུབ་པའི་མཚན་མ་མངོན་དུ་བརྙེས་པ་ལ་འདུད་དོ། །ཕྱི་ལྟར་གང་སྣང་དེར་སྟོན་སྤྲུལ་པ་ཡི་དཀྱིལ་འཁོར། །ནང་ལྟར་ཁ་སྦྱོར་བདེ་ཆེན་ལོངས་སྤྱོད་ཀྱི་རྫོགས་སྐུ། །གསང་བ་ཟབ་ཞི་སྤྲོས་བྲལ་ཆོས་དབྱིངས་སུ་རོལ་པའི། །སྐུ་གསུམ་དབྱེར་མེད་རྣལ་འབྱོར་དབང་ཕྱུག་ལ་འདུད་དོ། །དངོས་ཡིད་ལས་བྱུང་ཤེས་རབ་ཌཱ་ཀི་ཡི་ཕོ་ཉས། །ཨ་ཧཾ་བདུད་རྩིའི་འབྲོས་འདེད་བར་མེད་དུ་སྦྱར་བས། །ཉོན་མོངས་རྟོག་ཚོགས་ཡང་དག་དབུ་མ་རུ་བཤད་པའི། །རྡོ་རྗེའི་རིག་འཛིན་བདེ་བའི་བདག་ཉིད་ལ་འདུད་དོ། །ཁྱོད་མཚན་ནོར་བུའི་དོ་ཤལ་རྣ་ལུང་དུ་དཔྱངས་པས། །ངན་སོང་འགྲོ་བར་སྤྱོད་པའི་དབུལ་བ་ཀུན་སེལ་ཏེ། །གཏན་བདེའི་འབྱོར་པའི་དཔལ་གྱིས་མངོན་པ་རུ་ཕྱུག་པའི། །ཐུགས་རྗེ་ཚད་མེད་སྤྲུལ་པའི་འཁོར་ལོ་ལ་འདུད་དོ། །མཉམ་གཞག་རང་དབང་བསྒྱུར་བ་རྩེ་གཅིག་གི་རྣལ་འབྱོར། །མཉམ་རྗེས་དབྱེར་མེད་སྤྲོས་བྲལ་ཆེན་པོ་རུ་དག་ཅིང་། །སྣང་སེམས་མི་ཕྱེད་ཆོས་ཉིད་རོ་གཅིག་གི་ཀློང་དུ། །སྒོམ་མེད་སྐུ་གསུམ་རང་རྩལ་རྫོགས་པ་རུ་ཤོག་ཅིག །སྣང་སྟོང་བརྗོད་པའི་མཐའ་བྲལ་རང་རིག་གི་ངོ་བོ། །རྟག་ཆད་མཚན་མ་ཉེར་ཞི་བློ་བྲལ་གྱི་སྦུབས་སུ། །ཡེངས་མེད་འཛིན་བྲལ་བདེ་ཆེན་འཁོར་ལོ་རུ་སྤྱོད་པའི། །ཕྱག་རྒྱ་ཆེན་པོ་མངོན་དུ་གྱུར་པ་རུ་ཤོག་ཅིག །རང་ལུས་རྡོ་རྗེ་ཕུང་པོ་གདན་གསུམ་དུ་དག་ཅིང་། །འགྲོ་འོང་རླུང་ཀུན་སྐྱེ་མེད་བཟླས་པ་རུ་རྫོགས་ཏེ། །གཉིས་སྣང་འོད་གསལ་སྤྲོས་བྲལ་ཆེན་པོ་རུ་སྨིན་པའི། །ཉམས་ལེན་མཐའ་རུ་ཕྱིན་པར་བྱིན་གྱིས་རང་རློབས་ཤིག །དེ་སྐད་དུས་ཀུན་རྗེ་བཙུན་ཆེན་པོ་ཡི་རྣམ་ཐར། །མཐོང་ཐོས་རྗེས་སུ་སྨོན་པའི་དྲན་འཛིན་ལས་སྐྱེས་པའི། །འགག་མེད་རྡོ་རྗེའི་ཐོལ་གླུ་བསྒྱུར་བ་ཡི་དགེ་བས། །འགྲོ་ཀུན་བློ་བྲལ་གཉུག་མ་མཐོང་བ་རུ་ཤོག་ཅིག། །། ༈

[edit]

mi la bzhad pa rdo rje la gsol 'debs rdo rje'i thol glu spros bral bdud rtsi'i sgra dbyangs/__ rje btsun rnal 'byor gyi dbang phyug bzhad pa rdo rje la gsol ba 'debs pa'i rdo rje'i thol glu spros bral bdud rtsi'i sgra dbyangs zhes bya ba/__a ho/__/gdod nas spros pa bral ba'i chos nyid kyi ngang nas/__/sna tshogs snang ba'i sgyu 'phrul gzugs sku ru ston pas/__/zung 'jug bde ba chen po'i bdud rtsi yis myos pa'i/__/dpa' bo DA ki'i phyag rgya mdzes pa la 'dud do/__/shin tu brgal bar dka' ba'i sdug bsngal gyi srid par/__/nges 'byung gting nas skye ba'i dri bzhon gyi pho nyas/__/rtse gcig sgrub pa'i snang byed bar med du bskul bas/__/nyon mongs 'chings brgya'i mun pa bcom pa la 'dud do/__/thob par dka' ba'i snyan brgyud bdud rtsi yi thigs pas/__/rang rgyud zhing sa gshin por bar med du bran nas/__/tshe gcig sku bzhi'i 'bras bu'i go 'phang la gshegs pa'i/__/he ru ka dpal 'khor lo'i mgon po la 'dud do/__/yas babs mas brtan dga' bzhi bde stong gi bdud rtsis/__/rtsa gsum 'khor lo'i mdud pa dbu ma ru grol bas/__/zag bcas gzugs kyi 'khor lo sa bcu ru smin pa'i/__/dkyil 'khor kun gtso rnal 'byor dbang phyug la 'dud do/__/srog dang rtsol ba'i rgyu ba d+hU ti ru bcil nas/__/thabs shes yi ge'i 'khor lo mgrin pa ru smin nas/__/snang grags rdo rje'i sgra dbyangs zad med du bsgyur ba'i/__/chos phung brgyad khri bzhi stong ngo bo la 'dud do/__/gzung 'dzin rtog pa'i dri bzhon gnyug ma ru thim pas/__/mkhyen dang brtse ba'i nyi zla blo bral du shar te/__/chos can spros pa'i drwa ba chos nyid du thim pa'i/__/kun khyab lhan skyes phyag rgya chen po la 'dud do/__/bum gsang shes rab ye shes mnyam bzhag gi dam tshig__/sku gsung thugs mchog lhan skyes bde chen du bcings pas/__/gnas yul dur khrod dpa' bo DA ki yi grong khyer/__/spro dang sdud mdzad brtul zhugs grub brnyes la 'dud do/__/rlung sems rtog pa'i 'phro 'du ye shes su rol pas/__/bkod pa lus kyi rdzu 'phrul 'gag med du bsgyur nas/__/mthong thos dran reg 'gro kun gtan bde la reg pa'i/__/grub pa'i mtshan ma mngon du brnyes pa la 'dud do/__/phyi ltar gang snang der ston sprul pa yi dkyil 'khor/__/nang ltar kha sbyor bde chen longs spyod kyi rdzogs sku/__/gsang ba zab zhi spros bral chos dbyings su rol pa'i/__/sku gsum dbyer med rnal 'byor dbang phyug la 'dud do/__/dngos yid las byung shes rab DA ki yi pho nyas/__/a haM bdud rtsi'i 'bros 'ded bar med du sbyar bas/__/nyon mongs rtog tshogs yang dag dbu ma ru bshad pa'i/__/rdo rje'i rig 'dzin bde ba'i bdag nyid la 'dud do/__/khyod mtshan nor bu'i do shal rna lung du dpyangs pas/__/ngan song 'gro bar spyod pa'i dbul ba kun sel te/__/gtan bde'i 'byor pa'i dpal gyis mngon pa ru phyug pa'i/__/thugs rje tshad med sprul pa'i 'khor lo la 'dud do/__/mnyam gzhag rang dbang bsgyur ba rtse gcig gi rnal 'byor/__/mnyam rjes dbyer med spros bral chen po ru dag cing /__/snang sems mi phyed chos nyid ro gcig gi klong du/__/sgom med sku gsum rang rtsal rdzogs pa ru shog cig__/snang stong brjod pa'i mtha' bral rang rig gi ngo bo/__/rtag chad mtshan ma nyer zhi blo bral gyi sbubs su/__/yengs med 'dzin bral bde chen 'khor lo ru spyod pa'i/__/phyag rgya chen po mngon du gyur pa ru shog cig__/rang lus rdo rje phung po gdan gsum du dag cing /__/'gro 'ong rlung kun skye med bzlas pa ru rdzogs te/__/gnyis snang 'od gsal spros bral chen po ru smin pa'i/__/nyams len mtha' ru phyin par byin gyis rang rlobs shig__/de skad dus kun rje btsun chen po yi rnam thar/__/mthong thos rjes su smon pa'i dran 'dzin las skyes pa'i/__/'gag med rdo rje'i thol glu bsgyur ba yi dge bas/__/'gro kun blo bral gnyug ma mthong ba ru shog cig/__//__!_