JKW-KABUM-15-BA-006-008

🚧 This website is under continued development. We appreciate your patience!

Previous Text Back to Volume PageNext Text

Wylie title	bla ma'i thugs sgrub bar chad kun sel gyi cha lag mi g.yo ba'i bskyed rdzogs kyi sngon 'gro'i rim pa
Location	mkhyen brtse'i bka' 'bum Volume 15, sde tshan 6, Text 8, Pages 170-173 (Folios 22b3 to 24a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	མཆོག་གྱུར་གླིང་པ་ (mchog gyur gling pa)
Citation	'jam dbyangs mkhyen brtse'i dbang po. bla ma'i thugs sgrub bar chad kun sel gyi cha lag mi g.yo ba'i bskyed rdzogs kyi sngon 'gro'i rim pa. In 'jam dbyangs mkhyen brtse'i dbang po'i bka' 'bum, Vol. 15: 170-173. Khams sde dge rdzong sar dgon: Rdzong sar blo gros phun tshogs, 2020.
Genre	Preliminary Practices - sngon 'gro  ·  Liturgy - ngag 'don
Cycle	མི་གཡོ་བ་བདུད་བཞི་ཟིལ་གནོན་ (mi g.yo ba bdud bzhi zil gnon)
Parent Cycle	བླ་མའི་ཐུགས་སྒྲུབ་བར་ཆད་ཀུན་ (bla ma'i thugs sgrub bar chad kun sel)
Deity	mi g.yo ba
Colophon	སྒྲོལ་མ་འཇིགས་པ་ཀུན་སེལ་གྱི་རྗེས་དྲན་ལྔའི་ཁྲིད་ཀྱི་སྔོན་འགྲོ་གཏེར་གཞུང་ལས་བྱུང་སྟེ་ཅུང་ཟད་ཁ་བསྒྱུར་ནས་བཀོད་པའོ། །མངྒ་ལཾ།
	sgrol ma 'jigs pa kun sel gyi rjes dran lnga'i khrid kyi sngon 'gro gter gzhung las byung ste cung zad kha bsgyur nas bkod pa'o/__/mang+ga laM/

1 Texts in this Section (sde tshan or chos tshan)

8 170-173	བླ་མའི་ཐུགས་སྒྲུབ་བར་ཆད་ཀུན་སེལ་གྱི་ཆ་ལག་མི་གཡོ་བའི་བསྐྱེད་རྫོགས་ཀྱི་སྔོན་འགྲོའི་རིམ་པ། bla ma'i thugs sgrub bar chad kun sel gyi cha lag mi g.yo ba'i bskyed rdzogs kyi sngon 'gro'i rim pa Preliminary Practices - sngon 'gro   ·   Liturgy - ngag 'don	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །བླ་མའི་ཐུགས་སྒྲུབ་བར་ཆད་ཀུན་སེལ་གྱི་ཆ་ལག་མི་གཡོ་བའི་བསྐྱེད་རྫོགས་ཀྱི་སྔོན་འགྲོའི་རིམ་པ་བཞུགས་སོ། །ན་མོ་གུ་རུ་ཙཎྜ་མ་ཧཱ་རོ་ཥ་ཎ་ཡ། །བླ་མའི་ཐུགས་སྒྲུབ་བར་ཆད་ཀུན་སེལ་གྱི་ཆ་ལག་མི་གཡོ་བ་བདུད་བཞི་ཟིལ་གནོན་གྱིས་བསྐྱེད་རྫོགས་ཟབ་མོ་ཐུན་མོང་མ་ཡིན་པའི་སྔོན་འགྲོའི་རིམ་པ་ནི་འདི་ཡིན་ཏེ། བར་ཆད་སྐྱོབ་པའི་སྐྱབས་ཀྱི་མཆོག༔ གསུམ་ལ་སྐྱབས་སུ་འགྲོ་བ་ནི༔ མདུན་མཁར་བླ་མ་མི་གཡོ་བར༔ སྐྱབས་གནས་རྒྱ་མཚོས་བསྐོར་བ་ཡི༔ ཚད་མེད་ཐུགས་རྗེའི་སྐྱབས་ཀྱི་འོག༔ བདག་དང་མཁའ་མཉམ་འགྲོ་བ་ཚུད༔ འཇིགས་པ་ཀུན་ལས་དབུགས་དབྱུང་བསམ༔ ན་མོ་བླ་མ་ཡི་དམ་མི་གཡོ་བ༔ མཆོག་གསུམ་རྒྱལ་བ་རྒྱ་མཚོ་ལ༔ བདག་སོགས་འགྲོ་ཀུན་བྱང་ཆུབ་བར༔ རྩེ་གཅིག་གུས་པས་སྐྱབས་སུ་མཆི༔ མཐར་ནི་སྐྱབས་ཡུལ་རང་ལ་བསྟིམ༔ བྱང་ཆུབ་སེམས་གཉིས་ལྡན་པ་ལ༔ བར་ཆད་ཀུན་གྱིས་ཉེ་མི་ནུས༔ དེ་ཕྱིར་སྐྱབས་ཡུལ་དབང་བྱས་ཏེ༔ སྨོན་དང་འཇུག་པའི་བྱང་སེམས་བསྐྱེད༔ ཧོཿ མ་གྱུར་སེམས་ཅན་ཐམས་ཅད་ཀུན༔ སངས་རྒྱས་གོ་འཕང་འཐོབ་བྱའི་ཕྱིར༔ ཉེས་སྤྱོད་ཀུན་སྡོམ་དགེ་ཆོས་སྡུད༔ གཞན་ཕན་བྱང་སེམས་རྟག་ཏུ་བསྐྱེད༔ ཐུན་མཐར་བདེ་སྡུག་གཏོང་ལེན་བསྒོམ༔ འཁོར་གསུམ་དམིགས་པ་བྲལ་བར་བཞག༔ སྡིག་ལྟུང་ལ་བརྟེན་བར་ཆད་འཇུག༔ དེ་ཕྱིར་དེ་ཉིད་སྦྱོང་བ་ནི༔ རང་ཉིད་ཐ་མལ་སྤྱི་བོ་རུ༔ པད་དཀར་ཟླ་བའི་གདན་གྱི་སྟེང་༔ བླ་མ་དོན་ཡོད་གྲུབ་པ་ལྗང་༔ རལ་གྲི་དང་ནི་དྲིལ་བུ་འཛིན༔ རང་འདྲའི་སྒྲོལ་མ་ཡུམ་དང་སྦྱོར༔ དར་དང་རིན་ཆེན་རུས་པས་བརྒྱན༔ མཚན་དཔེའི་གཟི་འབར་སྐྱིལ་སྐྲུང་བཞུགས༔ ཐུགས་ཀར་ཟླ་སྟེང་ཧཱ་ཡིག་མཐར༔ སྔགས་ཀྱི་ཕྲེང་བས་བསྐོར་བ་ལས༔ འོད་འཕྲོས་འཕགས་མཆོད་འགྲོ་སྒྲིབ་སྦྱང་༔ ཚུར་འདུས་བདུད་རྩིའི་རྒྱུན་བབས་པ༔ རང་གི་ཚངས་པའི་སྒོ་ནས་ཞུགས༔ ལུས་གང་ནད་གདོན་སྡིག་སྒྲིབ་དག༔ བདེ་ཆེན་ཡེ་ཤེས་སྐྱེས་པར་བསམ༔ ཨོཾ་ཨཱཿཧཱུྃ་མ་ཧཱ་གུ་རུ་ཧ་པྲ་ཛྙཱ་དྷྲྀཀ་ཏྃ་བཛྲ་ར་ཏཱི་སརྦ་པཱ་པཾ་ཨ་བ་ར་ཎ་བི་ཤོ་དྷ་ན་སྭཱ་ཧཱ༔ སྡིག་ལྟུང་འགྱོད་པས་བཤགས་ཤིང་བསྡམས༔ ཚོགས་རྟེན་འོད་ཞུ་རང་ལ་ཐིམ༔ སྐྱེ་མེད་གཉུག་མའི་ངང་དུ་བཞག༔ བླ་མའི་བྱིན་བརླབས་ཚོགས་རྫོགས་ན༔ བར་ཆད་ཐམས་ཅད་རང་སར་གྲོལ༔ དངོས་གྲུབ་མྱུར་དུ་ཐོབ་པར་འགྱུར༔ དེ་ཕྱིར་རྩེ་གཅིག་འདི་ལྟར་བསྒོམ༔ ཨ༔ རང་མདུན་ནམ་མཁར་འོད་ལྔའི་ཀློང་༔ པད་ཉི་འཆི་བདག་བདུད་ཀྱི་སྟེང་༔ བླ་མ་རྗེ་བཙུན་མི་གཡོ་བ༔ དཀར་གསལ་ཁྲོ་ཞིང་བརྗིད་པའི་ཉམས༔ དབུ་སྐྲ་དམར་སེར་གྱེན་དུ་བརྫེས༔ ཕྱག་གཡས་ཡེ་ཤེས་རལ་གྲི་འཕྱར༔ གཡོན་པས་རྡོ་རྗེའི་ཞགས་པ་བསྣམས༔ ཞབས་གཉིས་གཡས་བརྐྱང་དོར་སྟབས་ཀྱིས༔ ཡེ་ཤེས་མེ་དཔུང་དབུས་ན་རོལ༔ སྟག་ཤམ་རིན་ཆེན་སྦྲུལ་གྱིས་བརྒྱན༔ གནས་གསུམ་ཨོཾ་ཨཱཿཧཱུྃ་གིས་མཚན༔ དེ་བཞིན་གཤེགས་པ་ཐམས་ཅད་ཀྱི༔ རྡོ་རྗེ་གསུམ་དང་དབྱེར་མེད་པ༔ མཆོག་གསུམ་འདུས་པའི་ངོ་བོ་ཉིད༔ རྩ་གསུམ་རྒྱ་མཚོའི་སྤྲིན་ཕུང་འཕྲོ༔ རང་བཞིན་ཡོངས་གྲུབ་ངང་དུ་གསལ༔ ཨོཾ་ཨཱཿཧཱུྃ། ཁམས་གསུམ་སྣོད་བཅུད་དཔལ་འབྱོར་དང་༔ བདག་ལུས་ལོངས་སྤྱོད་དགེ་ཚོགས་ཀུན༔ ཐུགས་རྗེའི་བདག་ཉིད་རྣམས་ལ་འབུལ༔ བཞེས་ནས་བྱིན་གྱིས་བརླབ་ཏུ་གསོལ༔ ཨོཾ་སརྦ་ཏ་ཐཱ་ག་ཏ་རཏྣ་མཎྜལ་པཱུ་ཛ་ཧོ༔ ཀྱེ་ཀྱེ་བླ་མ་མི་གཡོ་བར༔ སྙིང་ནས་གུས་པས་གསོལ་བ་འདེབས༔ བྱིན་གྱིས་རློབས་ཤིག་བར་ཆད་སོལ༔ དབང་བཞི་སྐུར་ཅིག་དངོས་གྲུབ་སྩོལ། །ཨོཾ་ཨཱཿཧཱུྃ་མ་ཧཱ་གུ་རུ་ཙཎྜ་མ་ཧཱ་རོ་ཥ་ཎ་སྭཱ་ཧཱ༔ ཞེས་པས་གསོལ་བ་གདབ་དབང་བཞི་བླང་༔ རང་ལ་བསྟིམ་ནས་དབྱེར་མེད་དང་༔ འོད་གསལ་ཆོས་སྐུའི་རང་ཞལ་བལྟ༔ ཞེས་པ་སྟེ། སྒྲོལ་མ་འཇིགས་པ་ཀུན་སེལ་གྱི་རྗེས་དྲན་ལྔའི་ཁྲིད་ཀྱི་སྔོན་འགྲོ་གཏེར་གཞུང་ལས་བྱུང་སྟེ་ཅུང་ཟད་ཁ་བསྒྱུར་ནས་བཀོད་པའོ། །མངྒ་ལཾ། ། ༈

[edit]

bla ma'i thugs sgrub bar chad kun sel gyi cha lag mi g.yo ba'i bskyed rdzogs kyi sngon 'gro'i rim pa/ @#/_/bla ma'i thugs sgrub bar chad kun sel gyi cha lag mi g.yo ba'i bskyed rdzogs kyi sngon 'gro'i rim pa bzhugs so/__/na mo gu ru tsaN+Da ma hA ro Sha Na ya/__/bla ma'i thugs sgrub bar chad kun sel gyi cha lag mi g.yo ba bdud bzhi zil gnon gyis bskyed rdzogs zab mo thun mong ma yin pa'i sngon 'gro'i rim pa ni 'di yin te/__bar chad skyob pa'i skyabs kyi mchog:__gsum la skyabs su 'gro ba ni:__mdun mkhar bla ma mi g.yo bar:__skyabs gnas rgya mtshos bskor ba yi:__tshad med thugs rje'i skyabs kyi 'og:__bdag dang mkha' mnyam 'gro ba tshud:__'jigs pa kun las dbugs dbyung bsam:__na mo bla ma yi dam mi g.yo ba:__mchog gsum rgyal ba rgya mtsho la:__bdag sogs 'gro kun byang chub bar:__rtse gcig gus pas skyabs su mchi:__mthar ni skyabs yul rang la bstim:__byang chub sems gnyis ldan pa la:__bar chad kun gyis nye mi nus:__de phyir skyabs yul dbang byas te:__smon dang 'jug pa'i byang sems bskyed:__hoH__ma gyur sems can thams cad kun:__sangs rgyas go 'phang 'thob bya'i phyir:__nyes spyod kun sdom dge chos sdud:__gzhan phan byang sems rtag tu bskyed:__thun mthar bde sdug gtong len bsgom:__'khor gsum dmigs pa bral bar bzhag:__sdig ltung la brten bar chad 'jug:__de phyir de nyid sbyong ba ni:__rang nyid tha mal spyi bo ru:__pad dkar zla ba'i gdan gyi steng :__bla ma don yod grub pa ljang :__ral gri dang ni dril bu 'dzin:__rang 'dra'i sgrol ma yum dang sbyor:__dar dang rin chen rus pas brgyan:__mtshan dpe'i gzi 'bar skyil skrung bzhugs:__thugs kar zla steng hA yig mthar:__sngags kyi phreng bas bskor ba las:__'od 'phros 'phags mchod 'gro sgrib sbyang :__tshur 'dus bdud rtsi'i rgyun babs pa:__rang gi tshangs pa'i sgo nas zhugs:__lus gang nad gdon sdig sgrib dag:__bde chen ye shes skyes par bsam:__oM AHhU~M ma hA gu ru ha pra dz+nyA d+hr-ika ta~M badz+ra ra tI sarba pA paM a ba ra Na bi sho d+ha na swA hA:__sdig ltung 'gyod pas bshags shing bsdams:__tshogs rten 'od zhu rang la thim:__skye med gnyug ma'i ngang du bzhag:__bla ma'i byin brlabs tshogs rdzogs na:__bar chad thams cad rang sar grol:__dngos grub myur du thob par 'gyur:__de phyir rtse gcig 'di ltar bsgom:__a:__rang mdun nam mkhar 'od lnga'i klong :__pad nyi 'chi bdag bdud kyi steng :__bla ma rje btsun mi g.yo ba:__dkar gsal khro zhing brjid pa'i nyams:__dbu skra dmar ser gyen du brdzes:__phyag g.yas ye shes ral gri 'phyar:__g.yon pas rdo rje'i zhags pa bsnams:__zhabs gnyis g.yas brkyang dor stabs kyis:__ye shes me dpung dbus na rol:__stag sham rin chen sbrul gyis brgyan:__gnas gsum oM AHhU~M gis mtshan:__de bzhin gshegs pa thams cad kyi:__rdo rje gsum dang dbyer med pa:__mchog gsum 'dus pa'i ngo bo nyid:__rtsa gsum rgya mtsho'i sprin phung 'phro:__rang bzhin yongs grub ngang du gsal:__oM AHhU~M/__khams gsum snod bcud dpal 'byor dang :__bdag lus longs spyod dge tshogs kun:__thugs rje'i bdag nyid rnams la 'bul:__bzhes nas byin gyis brlab tu gsol:__oM sarba ta thA ga ta rat+na maN+Dal pU dza ho:__kye kye bla ma mi g.yo bar:__snying nas gus pas gsol ba 'debs:__byin gyis rlobs shig bar chad sol:__dbang bzhi skur cig dngos grub stsol/__/oM AHhU~M ma hA gu ru tsaN+Da ma hA ro Sha Na swA hA:__zhes pas gsol ba gdab dbang bzhi blang :__rang la bstim nas dbyer med dang :__'od gsal chos sku'i rang zhal blta:__zhes pa ste/__sgrol ma 'jigs pa kun sel gyi rjes dran lnga'i khrid kyi sngon 'gro gter gzhung las byung ste cung zad kha bsgyur nas bkod pa'o/__/mang+ga laM/___/__!_