JKW-KABUM-10-THA-004-017

🚧 This website is under continued development. We appreciate your patience!

Previous Text Back to Volume PageNext Text

Wylie title	rje btsun 'jam pa'i dbyangs kyi bstod sgrub zab mo nyams su len tshul 'jam mgon dgyes pa'i mchod sprin
Location	mkhyen brtse'i bka' 'bum Volume 10, sde tshan 4, Text 17, Pages 291-295 (Folios 55a4 to 57a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rje btsun 'jam pa'i dbyangs kyi bstod sgrub zab mo nyams su len tshul 'jam mgon dgyes pa'i mchod sprin. In 'jam dbyangs mkhyen brtse'i dbang po'i bka' 'bum, Vol. 10: 291-295. Khams sde dge rdzong sar dgon: Rdzong sar blo gros phun tshogs, 2020.
Genre	Activity Manual - las byang
Deity	'jam dpal dbyangs
Colophon	།ཞེས་པའང་མང་དུ་ཐོས་པའི་བཙུན་པ་འཇམ་དབྱངས་མཁྱེན་བརྩེའི་དབང་པོས་རང་གཞན་རྣམས་ལ་ཕན་པའི་བསམ་པས་ཡིག་རྙིང་མཐའ་དག་གི་དོན་གྱི་བཅུད་ཕྱུང་སྟེ་སྦྱར་བའི་ཡི་གེ་པ་ནི་ཆོས་རྗེ་བླ་མ་ཨཱ་ནནྡ་མཉྫུ་གྷོ་ཥས་མཛད་པ་སྟེ། འདིས་ཀྱང་འགྲོ་ཀུན་སོ་སོ་ཡང་དག་པར་རིག་པ་བཞིའི་ཡེ་ཤེས་ལ་དབང་འབྱོར་པའི་རྒྱུར་གྱུར་ཅིག།
	zhes pa'ang mang du thos pa'i btsun pa 'jam dbyangs mkhyen brtse'i dbang pos rang gzhan rnams la phan pa'i bsam pas yig rnying mtha' dag gi don gyi bcud phyung ste sbyar ba'i yi ge pa ni chos rje bla ma A nan+da many+dzu g+ho Shas mdzad pa ste/__'dis kyang 'gro kun so so yang dag par rig pa bzhi'i ye shes la dbang 'byor pa'i rgyur gyur cig

1 Texts in this Section (sde tshan or chos tshan)

17 291-295	རྗེ་བཙུན་འཇམ་པའི་དབྱངས་ཀྱི་བསྟོད་སྒྲུབ་ཟབ་མོ་ཉམས་སུ་ལེན་ཚུལ་འཇམ་མགོན་དགྱེས་པའི་མཆོད་སྤྲིན། rje btsun 'jam pa'i dbyangs kyi bstod sgrub zab mo nyams su len tshul 'jam mgon dgyes pa'i mchod sprin Activity Manual - las byang	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །རྗེ་བཙུན་འཇམ་པའི་དབྱངས་ཀྱི་བསྟོད་སྒྲུབ་ཟབ་མོ་ཉམས་སུ་ལེན་ཚུལ་འཇམ་མགོན་དགྱེས་པའི་མཆོད་སྤྲིན་ཞེས་བྱ་བ་བཞུགས་སོ། །ན་མོ་གུ་རུ་མཉྫུ་གྷོ་ཥཱ་ཡ། བློ་ལྡན་གང་ཞིག་མངོན་མཐོ་དང་ངེས་ལེགས་ཀྱི་ཡོན་ཏན་མཐའ་དག་གི་རྩ་བར་གྱུར་པ་དྲི་མ་མེད་པའི་ཤེས་རབ་ཕུན་སུམ་ཚོགས་པར་བྱ་བའི་སླད་དུ། གྲུབ་པའི་སློབ་དཔོན་རྡོ་རྗེ་མཚོན་ཆས་མཛད་པའི་དཔལ་ཡེ་ཤེས་ཡོན་ཏན་བཟང་པོའི་བསྟོད་པའི་སྒྲུབ་ཐབས་ཉམས་སུ་བླང་བར་འདོད་པས། སྔོན་དུ་བརྒྱུད་ལྡན་གྱི་བླ་མ་ལས་འདིའི་རིག་གཏད་ལེགས་པར་ནོས་ཏེ། ངེས་འབྱུང་དང་སྙིང་རྗེ་ཆེན་པོའི་བློ་ཤུགས་དྲག་ཏུ་བསྐྱེད་བཞིན་པའི་ངང་ཉམས་ལེན་གྱི་རིམ་པ་ལ་འཇུག་པར་བྱའོ། །དེ་ལའང་སྦྱོར་དངོས་རྗེས་གསུམ་ལས། དང་པོ་སྦྱོར་བ་སྐྱབས་སེམས་ནི། བདག་སོགས་འགྲོ་ཀུན་བྱང་ཆུབ་བར་དུ་བླ་མ་མཆོག་གསུམ་སྐྱབས་སུ་བསྙེན། །གཞན་དོན་རྫོགས་པའི་སངས་རྒྱས་ཐོབ་ཕྱིར་འཇམ་དཔལ་བསྟོད་སྒྲུབ་ཉམས་བླངས་མཐུས། །ཡིད་ཅན་བདེ་བ་རྒྱུར་བཅས་དང་ལྡན་སྡུག་བསྔལ་རྒྱུར་བཅས་ཀུན་དང་བྲལ། །སྡུག་བསྔལ་མེད་པའི་བདེ་དང་མི་འབྲལ་བཏང་སྙོམས་ངང་ལ་གནས་གྱུར་ཅིག །ལན་གསུམ། དངོས་གཞི་སྒོམ་བཟླས་ནི། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། །འདི་ལྟར་དངོས་ཀུན་བདག་དང་ཕུང་པོ་རྣམ་རིག་སྤྲོས་པ་ལས་འདས་ཀྱང་། །རྟེན་ཅིང་འབྲེལ་འབྱུང་སྣང་ཆ་འགག་མེད་སྒྱུ་མའི་ཚུལ་ལ་སྙོམས་འཇུག་བཞིན། །རང་གི་གནས་གསུམ་ཨོཾ་ཨཱཿཧཱུྃ་དང་སྙིང་དབུས་ཟླ་སྟེང་དྷཱིཿཡིག་ལས། །འཕྲོས་པའི་འོད་ཀྱིས་འཇམ་དཔལ་གཞོན་ནུ་ཡེ་ཤེས་སེམས་དཔའ་སྤྱན་དྲངས་ཏེ། །མདུན་གྱི་ནམ་མཁར་པད་ཟླའི་གདན་ལ་དགྱེས་པའི་ཚུལ་གྱིས་བཞུགས་པ་ནི། །གུར་གུམ་མདངས་ཅན་བརྒྱད་གཉིས་ལང་ཚོར་མཚན་དཔེའི་གཟི་བྱིན་མཆོག་ཏུ་འབར། །གནག་སྣུམ་དབུ་སྐྲ་ཟུར་ཕུད་ལྔ་ལྡན་སྙན་གོང་ཨུཏྤལ་ཆུན་པོས་མཛེས། །ཕྱག་གཡས་ཡེ་ཤེས་རལ་གྲི་འཕྱར་ཞིང་གཡོན་པས་ཤེར་ཕྱིན་གླེགས་བམ་བསྣམས། །སྣ་ཚོགས་དར་དང་རིན་ཆེན་རྒྱན་སྤྲས་ཞབས་གཉིས་རྡོ་རྗེའི་སྐྱིལ་ཀྲུང་བཞུགས། །གནས་གསུམ་འབྲུ་གསུམ་ཐུགས་དབུས་ཟླ་སྟེང་དྷཱི་ཡིག་དམར་སེར་འབར་བས་མཚན། །སླར་ཡང་འོད་འཕྲོས་དབང་ལྷ་སྤྱན་དྲངས་ཡེ་ཤེས་བདུད་རྩིའི་དབང་བསྐུར་བས། །སྐུ་གང་སྒྲིབ་དག་མི་བསྐྱོད་དབུར་བརྒྱན་གུས་པས་བསྟོད་ཅིང་གསོལ་བཏབ་མཐུས། །ཐུགས་སྲོག་ཉིད་ལས་བསྟོད་པའི་ཚིག་དང་སྔགས་ཀྱི་ཕྲེང་བ་བར་མེད་འཕྲོས། །ཉིན་མོར་བྱེད་པའི་འོད་ལྟར་གསལ་བ་བདག་གི་སྙིང་དབུས་ཐིམ་པའི་མོད། །མི་ཤེས་མུན་པ་མཐའ་དག་བསལ་ནས་མཁྱེན་བརྩེ་ནུས་པའི་སྣང་བ་ཡིས། །རིག་དང་བརྩེ་བའི་པདྨོ་རབ་རྒྱས་འཇམ་མགོན་གོ་འཕང་ཐོབ་པར་གྱུར། ཅེས་བརྗོད་ཅིང་བསམས་ལ། གང་གི་བློ་གྲོས་སྒྲིབ་གཉིས་སྤྲིན་བྲལ་ཉི་ལྟར་རྣམ་དག་རབ་གསལ་བས། །ཇི་སྙེད་དོན་ཀུན་ཇི་བཞིན་གཟིགས་ཕྱིར་ཉིད་ཀྱི་ཐུགས་ཀར་གླེགས་བམ་འཛིན། །གང་དག་སྲིད་པའི་བཙོན་རར་མ་རིག་མུན་འཐུམས་སྡུག་བསྔལ་གྱིས་གཟིར་བའི། །འགྲོ་ཚོགས་ཀུན་ལ་བུ་གཅིག་ལྟར་བརྩེ་ཡན་ལག་དྲུག་ཅུའི་དབྱངས་ལྡན་གསུང་། །འབྲུག་ལྟར་ཆེར་སྒྲོགས་ཉོན་མོངས་གཉིད་སློང་ལས་ཀྱི་ལྕགས་སྒྲོག་འགྲོལ་མཛད་ཅིང་། །མ་རིག་མུན་སེལ་སྡུག་བསྔལ་མྱུ་གུ་ཇི་སྙེད་གཅོད་མཛད་རལ་གྲི་བསྣམས། །གདོད་ནས་དག་ཅིང་ས་བཅུའི་མཐར་སོན་ཡོན་ཏན་ལུས་རྫོགས་རྒྱལ་སྲས་ཐུ་བོའི་སྐུ། །བཅུ་ཕྲག་བཅུ་དང་བཅུ་གཉིས་རྒྱན་སྤྲས་བདག་བློའི་མུན་སེལ་འཇམ་པའི་དབྱངས་ལ་འདུད། ལན་གསུམ། ཨོཾ་ཨ་ར་པ་ཙ་ན་དྷིཿ དཔེ་ལ་ལར་ཧཱུྃ་སྭཱ་ཧཱ་ཞེས་སྣང་ནའང་དཔེ་རྙིང་ཕལ་ཆེར་དུ་དཀྱུས་སུ་གཀོད་པ་བཞིན་ནོ། །ཉེར་གཅིག །སླར་ཡང་དེ་འདྲ་ཚར་གཉིས་ཏེ་བསྟོད་པ་དགུ་ཕྲུགས་སུ་བྱ་བའམ། བསྟོད་པ་བདུན་ནམ་ཉེར་གཅིག་སོགས་ཀྱི་མཐར་བཟླས་པ་ཅི་ནུས་སུ་བྱ་སྟེ། རྒྱུན་དུ་འདི་ཙམ་གྱིས་དོན་འགྲུབ་ལ་བསྟོད་སྒྲུབ་དམིགས་བསལ་བྱེད་ན་ཇི་སྐད་བཤད་པའི་རིམ་པས་བསྟོད་པ་ཁྲི་ཕྲག་བདུན་བཟླ་བར་ཕན་ཡོན་གྱི་མཆན་རྙིང་ལས་བཤད་ལ། སྔགས་འབུམ་ཕྲག་ལྔའམ་བདུན་བཟླའོ། །གསུམ་པ་རྗེས་ནི། བསྟོད་པ་ལན་གསུམ་གྱི་མཐར། །བརྩེ་ལྡན་སྨྲ་བའི་ཉི་མ་ཁྱོད་ཀྱི་མཁྱེན་རབ་ཐུགས་རྗེའི་འོད་ཟེར་གྱིས། །བདག་བློའི་ཉོན་མོངས་ཤེས་བྱ་སྙོམས་འཇུག་གཏི་མུག་མུན་པ་རབ་བསལ་ནས། །ལེགས་གསུང་བཀའ་དང་དགོངས་འགྲེལ་བསྟན་བཅོས་གཞུང་ལུགས་ཇི་བཞིན་རྟོགས་པ་ཡི། །བློ་གྲོས་སྤོབས་པའི་སྣང་བ་བསྐྱེད་ནས་ཀུན་མཁྱེན་ཐོབ་བར་མཛད་དུ་གསོལ། །ཞེས་འདོད་དོན་ལ་རྩེ་གཅིག་ཏུ་གསོལ་བ་བཏབ། མདུན་གྱི་ལྷ་རང་ལ་བསྟིམ་པའམ་མི་དམིགས་པར་བསམས་ནས་བདག་མེད་གཉིས་ཀྱི་ངེས་པས་དྲངས་པའི་ཞི་ལྷག་ཟུང་འཇུག་གི་ངང་དུ་ཇི་ཙམ་གནས་གྱི་བར་དུ་མཉམ་པར་བཞག །དེ་ལས་ལྡང་བ་ན། །དགེ་བ་འདི་ཡིས་ཚོགས་གཉིས་སྦྱོར་བས་བདག་མེད་དོན་ལ་གསལ་སྣང་ཐོབ། །དེ་མཐུས་སྤྲོས་བྲལ་འཇམ་དཔལ་ཡེ་ཤེས་འཕགས་བློས་མངོན་སུམ་ཉིད་དུ་མཐོང་། །ཀུན་བརྟག་ལྷན་སྐྱེས་ཉོན་མོངས་རྣམ་སྤངས་རྡོ་རྗེ་ལྟ་བུའི་ཏིང་འཛིན་གྱིས། །ཤེས་བྱའི་སྒྲིབ་པ་ཆ་བཅས་མཐར་བྱས་བདེ་གཤེགས་ཤེས་རབ་ཐོབ་པར་ཤོག །ཅེས་བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ལ་འཇུག །ཐུན་མཚམས་རྣམས་སུའང་སྟོང་ཉིད་སྙིང་རྗེའི་སྙིང་པོ་དང་མ་བྲལ་བའི་སྒོ་ནས་སྤྱོད་ལམ་ཐམས་ཅད་དོན་ཡོད་པར་བྱ་སྟེ། དེ་ལྟར་འབད་པས་རིང་པོར་མི་ཐོགས་པར་སྲིད་ཞིའི་མཐའ་ལས་འདས་པའི་འཇམ་དཔལ་ཡེ་ཤེས་སེམས་དཔའི་གོ་འཕང་ཐོབ་པར་འགྱུར་པ་ནི་ངེས་པའོ། །ཞེས་པའང་མང་དུ་ཐོས་པའི་བཙུན་པ་འཇམ་དབྱངས་མཁྱེན་བརྩེའི་དབང་པོས་རང་གཞན་རྣམས་ལ་ཕན་པའི་བསམ་པས་ཡིག་རྙིང་མཐའ་དག་གི་དོན་གྱི་བཅུད་ཕྱུང་སྟེ་སྦྱར་བའི་ཡི་གེ་པ་ནི་ཆོས་རྗེ་བླ་མ་ཨཱ་ནནྡ་མཉྫུ་གྷོ་ཥས་མཛད་པ་སྟེ། འདིས་ཀྱང་འགྲོ་ཀུན་སོ་སོ་ཡང་དག་པར་རིག་པ་བཞིའི་ཡེ་ཤེས་ལ་དབང་འབྱོར་པའི་རྒྱུར་གྱུར་ཅིག། །། ༈

[edit]

rje btsun 'jam pa'i dbyangs kyi bstod sgrub zab mo nyams su len tshul 'jam mgon dgyes pa'i mchod sprin/ @#/_/rje btsun 'jam pa'i dbyangs kyi bstod sgrub zab mo nyams su len tshul 'jam mgon dgyes pa'i mchod sprin zhes bya ba bzhugs so/__/na mo gu ru many+dzu g+ho ShA ya/__blo ldan gang zhig mngon mtho dang nges legs kyi yon tan mtha' dag gi rtsa bar gyur pa dri ma med pa'i shes rab phun sum tshogs par bya ba'i slad du/__grub pa'i slob dpon rdo rje mtshon chas mdzad pa'i dpal ye shes yon tan bzang po'i bstod pa'i sgrub thabs nyams su blang bar 'dod pas/__sngon du brgyud ldan gyi bla ma las 'di'i rig gtad legs par nos te/__nges 'byung dang snying rje chen po'i blo shugs drag tu bskyed bzhin pa'i ngang nyams len gyi rim pa la 'jug par bya'o/__/de la'ang sbyor dngos rjes gsum las/__dang po sbyor ba skyabs sems ni/__bdag sogs 'gro kun byang chub bar du bla ma mchog gsum skyabs su bsnyen/__/gzhan don rdzogs pa'i sangs rgyas thob phyir 'jam dpal bstod sgrub nyams blangs mthus/__/yid can bde ba rgyur bcas dang ldan sdug bsngal rgyur bcas kun dang bral/__/sdug bsngal med pa'i bde dang mi 'bral btang snyoms ngang la gnas gyur cig__/lan gsum/__dngos gzhi sgom bzlas ni/__oM swa b+hA ba shud+d+haHsarba d+harmAHswa b+hA ba shud+d+ho\u0f85haM/_/'di ltar dngos kun bdag dang phung po rnam rig spros pa las 'das kyang /__/rten cing 'brel 'byung snang cha 'gag med sgyu ma'i tshul la snyoms 'jug bzhin/__/rang gi gnas gsum oM AHhU~M dang snying dbus zla steng d+hIHyig las/__/'phros pa'i 'od kyis 'jam dpal gzhon nu ye shes sems dpa' spyan drangs te/__/mdun gyi nam mkhar pad zla'i gdan la dgyes pa'i tshul gyis bzhugs pa ni/__/gur gum mdangs can brgyad gnyis lang tshor mtshan dpe'i gzi byin mchog tu 'bar/__/gnag snum dbu skra zur phud lnga ldan snyan gong ut+pal chun pos mdzes/__/phyag g.yas ye shes ral gri 'phyar zhing g.yon pas sher phyin glegs bam bsnams/__/sna tshogs dar dang rin chen rgyan spras zhabs gnyis rdo rje'i skyil krung bzhugs/__/gnas gsum 'bru gsum thugs dbus zla steng d+hI yig dmar ser 'bar bas mtshan/__/slar yang 'od 'phros dbang lha spyan drangs ye shes bdud rtsi'i dbang bskur bas/__/sku gang sgrib dag mi bskyod dbur brgyan gus pas bstod cing gsol btab mthus/__/thugs srog nyid las bstod pa'i tshig dang sngags kyi phreng ba bar med 'phros/__/nyin mor byed pa'i 'od ltar gsal ba bdag gi snying dbus thim pa'i mod/__/mi shes mun pa mtha' dag bsal nas mkhyen brtse nus pa'i snang ba yis/__/rig dang brtse ba'i pad+mo rab rgyas 'jam mgon go 'phang thob par gyur/__ces brjod cing bsams la/__gang gi blo gros sgrib gnyis sprin bral nyi ltar rnam dag rab gsal bas/__/ji snyed don kun ji bzhin gzigs phyir nyid kyi thugs kar glegs bam 'dzin/__/gang dag srid pa'i btson rar ma rig mun 'thums sdug bsngal gyis gzir ba'i/__/'gro tshogs kun la bu gcig ltar brtse yan lag drug cu'i dbyangs ldan gsung /__/'brug ltar cher sgrogs nyon mongs gnyid slong las kyi lcags sgrog 'grol mdzad cing /__/ma rig mun sel sdug bsngal myu gu ji snyed gcod mdzad ral gri bsnams/__/gdod nas dag cing sa bcu'i mthar son yon tan lus rdzogs rgyal sras thu bo'i sku/__/bcu phrag bcu dang bcu gnyis rgyan spras bdag blo'i mun sel 'jam pa'i dbyangs la 'dud/__lan gsum/__oM a ra pa tsa na d+hiH_dpe la lar hU~M swA hA zhes snang na'ang dpe rnying phal cher du dkyus su gakod pa bzhin no/__/nyer gcig__/slar yang de 'dra tshar gnyis te bstod pa dgu phrugs su bya ba'am/__bstod pa bdun nam nyer gcig sogs kyi mthar bzlas pa ci nus su bya ste/__rgyun du 'di tsam gyis don 'grub la bstod sgrub dmigs bsal byed na ji skad bshad pa'i rim pas bstod pa khri phrag bdun bzla bar phan yon gyi mchan rnying las bshad la/__sngags 'bum phrag lnga'am bdun bzla'o/__/gsum pa rjes ni/__bstod pa lan gsum gyi mthar/__/brtse ldan smra ba'i nyi ma khyod kyi mkhyen rab thugs rje'i 'od zer gyis/__/bdag blo'i nyon mongs shes bya snyoms 'jug gti mug mun pa rab bsal nas/__/legs gsung bka' dang dgongs 'grel bstan bcos gzhung lugs ji bzhin rtogs pa yi/__/blo gros spobs pa'i snang ba bskyed nas kun mkhyen thob bar mdzad du gsol/__/zhes 'dod don la rtse gcig tu gsol ba btab/__mdun gyi lha rang la bstim pa'am mi dmigs par bsams nas bdag med gnyis kyi nges pas drangs pa'i zhi lhag zung 'jug gi ngang du ji tsam gnas gyi bar du mnyam par bzhag__/de las ldang ba na/__/dge ba 'di yis tshogs gnyis sbyor bas bdag med don la gsal snang thob/__/de mthus spros bral 'jam dpal ye shes 'phags blos mngon sum nyid du mthong /__/kun brtag lhan skyes nyon mongs rnam spangs rdo rje lta bu'i ting 'dzin gyis/__/shes bya'i sgrib pa cha bcas mthar byas bde gshegs shes rab thob par shog__/ces bsngo smon gyis mtshams sbyar te spyod lam la 'jug__/thun mtshams rnams su'ang stong nyid snying rje'i snying po dang ma bral ba'i sgo nas spyod lam thams cad don yod par bya ste/__de ltar 'bad pas ring por mi thogs par srid zhi'i mtha' las 'das pa'i 'jam dpal ye shes sems dpa'i go 'phang thob par 'gyur pa ni nges pa'o/__/zhes pa'ang mang du thos pa'i btsun pa 'jam dbyangs mkhyen brtse'i dbang pos rang gzhan rnams la phan pa'i bsam pas yig rnying mtha' dag gi don gyi bcud phyung ste sbyar ba'i yi ge pa ni chos rje bla ma A nan+da many+dzu g+ho Shas mdzad pa ste/__'dis kyang 'gro kun so so yang dag par rig pa bzhi'i ye shes la dbang 'byor pa'i rgyur gyur cig/____//_!_