JKW-KABUM-07-JA-007

🚧 This website is under continued development. We appreciate your patience!

Previous Section Back to Volume PageNext Section

Wylie title	bde mchog snyan brgyud kyi yum bka' lhan cig skyes ma'i nyams len shin tu bsdus pa bdud rtsi'i snying po
Location	mkhyen brtse'i bka' 'bum Volume 7, sde tshan 7, Pages 111-129 (Folios 1a to 10a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bde mchog snyan brgyud kyi yum bka' lhan cig skyes ma'i nyams len shin tu bsdus pa bdud rtsi'i snying po. In 'jam dbyangs mkhyen brtse'i dbang po'i bka' 'bum, Vol. 7: 111-129. Khams sde dge rdzong sar dgon: Rdzong sar blo gros phun tshogs, 2020.
Genre	Activity Manual - las byang  ·  Sadhanas - Evocation Ritual - sgrub thabs  ·  Self-Initiation - bdag 'jug
Cycle	བདེ་མཆོག་མཁའ་འགྲོ་སྙན་བརྒྱུད་ (bde mchog mkha' 'gro snyan brgyud)
Deity	rdo rje rnal 'byor ma
Colophon	Author colophon page 127: །ཞེས་པའང་བྱ་བྲལ་བ་མཉྫུ་གྷོ་ཥས་ལམ་འདི་ལ་མཁས་ཤིང་དངོས་གྲུབ་བརྙེས་པའི་དམ་པ་སྔ་མ་རྣམས་ཀྱི་གསུང་གི་རྗེས་སུ་འབྲངས་ཏེ་མདོར་བསྡུས་སྙིང་པོར་དྲིལ་བའི་ཚུལ་གྱིས་སྦྱར་བའི་དགེ་བས་འགྲོ་ཀུན་མཁའ་སྤྱོད་རྡོ་རྗེ་བཙུན་མོས་མངོན་སུམ་དུ་རྗེས་སུ་བཟུང་བའི་རྒྱུར་གྱུར་ཅིག
	Author colophon page 127: zhes pa'ang bya bral ba many+dzu g+ho Shas lam 'di la mkhas shing dngos grub brnyes pa'i dam pa snga ma rnams kyi gsung gi rjes su 'brangs te mdor bsdus snying por dril ba'i tshul gyis sbyar ba'i dge bas 'gro kun mkha' spyod rdo rje btsun mos mngon sum du rjes su bzung ba'i rgyur gyur cig

1 Texts in this Section (sde tshan or chos tshan)

111-129	བདེ་མཆོག་སྙན་བརྒྱུད་ཀྱི་ཡུམ་བཀའ་ལྷན་ཅིག་སྐྱེས་མའི་ཉམས་ལེན་ཤིན་ཏུ་བསྡུས་པ་བདུད་རྩིའི་སྙིང་པོ། bde mchog snyan brgyud kyi yum bka' lhan cig skyes ma'i nyams len shin tu bsdus pa bdud rtsi'i snying po Activity Manual - las byang   ·   Sadhanas - Evocation Ritual - sgrub thabs   ·   Self-Initiation - bdag 'jug	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །བདེ་མཆོག་སྙན་བརྒྱུད་ཀྱི་ཡུམ་བཀའ་ལྷན་ཅིག་སྐྱེས་མའི་ཉམས་ལེན་ཤིན་ཏུ་བསྡུས་པ་བདུད་རྩིའི་སྙིང་པོ་ཞེས་བྱ་བ་བཞུགས་སོ།། །།

ན་མོ་གུ་རུ་བཛྲ་ཡོ་གི་ནཱི་ཡེ། འདིར་ཤིན་ཏུ་བསྡུས་པའི་ཚུལ་གྱིས་རྡོ་རྗེ་རྣལ་འབྱོར་མ་བསྒོམ་པར་འདོད་ན། སྔོན་དངོས་རྗེས་གསུམ་ལས། དང་པོ་ནི། ངེས་འབྱུང་དང་སྙིང་རྗེ་ཆེན་པོ་སྔོན་དུ་འགྲོ་བས་སྐྱབས་ཡུལ་གསལ་བཏབ་སྟེ། བདག་སོགས་འགྲོ་ཀུན་བྱང་ཆུབ་བར། །སྐྱབས་གནས་རྣམས་ལ་སྐྱབས་སུ་མཆི། །གཞན་དོན་སངས་རྒྱས་ཐོབ་བྱའི་ཕྱིར། །ཟབ་མོའི་རྣལ་འབྱོར་བསྒོམ་པར་བགྱི། །ཞེས་སྐྱབས་སེམས་ལན་གསུམ་དང་། སེམས་ཅན་ཐམས་ཅད་བདེ་བ་སོགས་ཀྱིས་ཚད་མེད་བཞི་བསྒོམ། སྐྱབས་ཡུལ་རྣམས་རང་ལ་ཐིམ་པར་བསམ། སྤྲོ་ན་རྡོར་སེམས་སྒོམ་བཟླས་ནི། རང་གི་སྤྱི་བོར་པད་ཟླའི་སྟེང་། ཧཱུྃ་ལས་རྡོ་རྗེ་ཧཱུྃ་གིས་མཚན། །འོད་ཟེར་སྤྲོ་བསྡུས་ཡོངས་གྱུར་ལས། །རྡོ་རྗེ་སེམས་དཔའ་ཟླ་བའི་མདོག །རྡོ་རྗེ་དྲིལ་འཛིན་སྙེམ་མ་དཀར། །གྲི་གུག་ཐོད་པ་བསྣམས་པས་འཁྱུད། །དར་དང་རུས་པའི་རྒྱན་གྱིས་སྤྲས། །གནས་གསུམ་འབྲུ་གསུམ་འོད་ཟེར་གྱིས། །ཡེ་ཤེས་སྤྱན་དྲངས་གཉིས་མེད་ཐིམ། །བདག་དང་མཁའ་མཉམ་སེམས་ཅན་གྱི། །སྡིག་སྒྲིབ་དག་པར་མཛད་དུ་གསོལ། །ཞེས་པས་གསོལ་བཏབ་སྦྱོར་མཚམས་དང་། །སྐུ་ལས་བདུད་རྩིའི་རྒྱུན་བབས་པས། ཚངས་བུག་ནས་ཞུགས་ལུས་ཀུན་གང་། །ནད་གདོན་སྡིག་སྒྲིབ་ཀུན་སྦྱངས་གྱུར། །ཡི་གེ་བརྒྱ་པ་དང་། ཨོཾ་བཛྲ་ས་ཏྭ་ཧཱུྃ། ཞེས་ཅི་ནུས་བཟླས། རྡོར་སེམས་འོད་ཞུ་རང་ལ་ཐིམ། བླ་མའི་རྣལ་འབྱོར་ནི། རང་ཉིད་སྐད་ཅིག་དྲན་རྫོགས་སུ། །རྣལ་འབྱོར་མ་དཔལ་གསལ་བ་ཡི། །མདུན་གྱི་ནམ་མཁའ་སེང་ཁྲི་དང་། །པདྨ་ཉི་ཟླའི་གདན་གྱི་སྟེང་། །ཧཱུྃ་ལས་བླ་མ་རྡོ་རྗེ་འཆང་། །མཐིང་གསལ་དར་དང་རུས་པས་བརྒྱན། །ཞི་འཛུམ་ཡིད་འོང་མཚན་དཔེས་མཛེས། །རྡོ་རྗེ་དྲིལ་འཛིན་ཡུམ་དང་འཁྲིལ། །སྤྱི་མགྲིན་སྙིང་གར་ཨོཾ་ཨཱཿཧཱུྃ། །དེ་ལས་འོད་འཕྲོས་མཆོད་འོས་ཀུན། །སྤྱན་དྲངས་གཉིས་སུ་མེད་པར་གྱུར། །སྐྱབས་གནས་ཀུན་འདུས་བླ་མ་ལ། །གུས་པས་ཕྱག་འཚལ་མཆོད་པ་འབུལ། །སྡིག་སྒྲིབ་ཉེས་ལྟུང་མཐོལ་ཞིང་བཤགས། །དུས་གསུམ་དགེ་ལ་རྗེས་ཡི་རངས། །ཆོས་འཁོར་བསྐོར་བཞིན་བཞུགས་གསོལ་འདེབས། །དགེ་ཚོགས་བྱང་ཆུབ་སྙིང་པོར་བསྔོ། །འགྲོ་ཀུན་སངས་རྒྱས་མྱུར་ཐོབ་ཤོག །མཎྜལ་རྒྱས་བསྡུས་གང་ཤེས་འབུལ། །རྡོ་རྗེ་སློབ་དཔོན་དགོངས་སུ་གསོལ། །བདག་གིས་དེང་ནས་བྱང་ཆུབ་བར། །ཐུན་མོང་མཆོག་གི་སྡོམ་པ་རྣམས། །བསམ་སྦྱོར་བརྟན་པོས་བཟུང་ཞིང་བསྲུང་། །ཞེས་ལན་གསུམ་གྱིས་སྡོམ་པ་བཟུང་། །སྤྲོ་ན་བརྒྱུད་འདེབས་རྒྱས་པའམ། རྡོ་རྗེ་འཆང་ཆེན་རྡོ་རྗེ་རྣལ་འབྱོར་མ། །ཏཻ་ལོ་ནཱ་རོ་མར་པ་མི་ལ་དང་། །འཇའ་ལུས་མངོན་གྱུར་རྗེ་བཙུན་རས་ཆུང་སོགས། །རྩ་བརྒྱུད་དཔལ་ལྡན་བླ་མའི་ཚོགས་རྣམས་ལ། །མི་ཕྱེད་སྙིང་ནས་གུས་པས་གསོལ་བ་འདེབས། །སྨིན་བྱེད་དབང་ཐོབ་དམ་ཚིག་རྣམ་པར་དག །ངེས་འབྱུང་སྙིང་རྗེ་རིམ་གཉིས་རྣལ་འབྱོར་གྱིས། །ཟུང་འཇུག་གོ་འཕང་ཐོབ་པར་བྱིན་གྱིས་རློབས། །ཞེས་དང་། ཁྱད་པར། མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་རིན་པོ་ཆེ་ལ་གསོལ་བ་འདེབས་སོ། །ཆོས་རྗེ་སངས་རྒྱས་བཀའ་དྲིན་ཅན་ལ༴ བླ་མ་ངོ་བོ་ཉིད་ཀྱི་སྐུ་ལ༴ བླ་མ་ཀུན་ཁྱབ་ཆོས་ཀྱི་སྐུ་ལ༴ བླ་མ་ལོངས་སྤྱོད་རྫོགས་པའི་སྐུ་ལ༴ བླ་མ་ཐུགས་རྗེ་སྤྲུལ་པའི་སྐུ་ལ་གསོལ་བ་འདེབས། ཞེས་གསོལ་བ་ཕུར་ཚུགས་སུ་བཏབ་མཐར། དཔལ་ལྡན་བླ་མ་རིན་པོ་ཆེས། །སྐུ་གསུང་ཐུགས་ལས་བྱུང་བ་ཡིས། །དབང་བཞི་བསྐུར་བར་མཛད་དུ་གསོལ། །སྨིན་ཅིང་གྲོལ་བར་བྱིན་གྱིས་རློབས། །ཞེས་གསོལ་བ་བཏབ་པས། བླ་མ་ཡབ་ཡུམ་འོད་དུ་ཞུ་ནས་རང་ལ་ཐིམ། རང་གི་སྒོ་གསུམ་དང་བླ་མའི་གསང་གསུམ་དབྱེར་མེད་དུ་གྱུར། དབང་བཞི་ཐོབ། སྒྲིབ་བཞི་དག །སྐུ་བཞིའི་གོ་འཕང་འགྲུབ་པའི་སྐལ་པ་ཅན་དུ་བྱས་པར་བསམས་ལ་སེམས་འཛིན་མེད་དུ་བཞག །གཉིས་པ་དངོས་གཞི་ལ་གསུམ་ལས། དང་པོ་སྤྲུལ་སྐུ་ལམ་བྱེད་ཀྱི་རྣལ་འབྱོར་ནི། ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཏྨཱ་ཀོ྅་ཧཾ། སྟོང་ཉིད་ནམ་མཁའི་ཀློང་དཀྱིལ་ན། །ཆོས་ཀྱི་འབྱུང་གནས་ཁ་སྦྱོར་ནང་། །རྡོ་རྗེ་སྲུང་བའི་གུར་ཁང་དབུས། །པདྨ་འདབ་བརྒྱད་ཉི་མ་དང་། །འཇིགས་བྱེད་དུས་མཚན་གདན་གྱི་སྟེང་། །རང་ཉིད་སྐད་ཅིག་དྲན་རྫོགས་སུ། །རྗེ་བཙུན་རྡོ་རྗེ་རྣལ་འབྱོར་མ། །དམར་མོ་ཞལ་གཅིག་ཕྱག་གཉིས་མ། །གཟུགས་དང་ལང་ཚོ་དར་ལ་བབས། །བྷ་ག་ནུ་རྒྱས་སྐེད་པ་ཕྲ། །ཕྱག་གཡས་གྲི་གུག་ཐུར་དུ་བཟུང་། །བགེགས་དང་ལོག་འདྲེན་རྣམས་ལ་བསྡིག །གཡོན་པ་ཐོད་ཁྲག་གཏོད་འཛིན་པའི། །གྲུ་མོར་བཅོམ་ལྡན་ཧེ་རུ་ཀ །མཚོན་པའི་ཁ་ཊྭཱཾ་འཆང་བ་ལ། །མཛེས་ལ་ཡངས་པའི་སྤྱན་གསུམ་པོ། །དགྱེས་པའི་རྣམ་འགྱུར་ཟུར་གྱིས་གཟིགས། །ཁྲོ་ལ་འཛུམ་སྒེག་ལྡན་པའི་ཞལ། །མཆེ་བ་ཅུང་ཟད་གཙིགས་པའི་ཚུལ། །དབུ་སྐྲ་སིལ་བུའི་སྟོད་ཆ་རྣམས། །གྱེན་དུ་བརྗེས་པའི་ཐོར་ཚུགས་རྩེར། །འཁོར་ལོ་མེ་ཏོག་ཕྲེང་བས་མཚན། །ལྷག་མ་ཐུར་དུ་གྲོལ་བ་ཡིས། །སྐུ་སྐེད་ནོན་ཞིང་འཁྱིལ་པས་མཛེས། །ཐོད་སྐམ་ལྔ་ཡི་དབུ་རྒྱན་དང་། །ཁྲག་འཛག་ལྔ་བཅུའི་དོ་ཤལ་ཅན། །སྣང་ལ་རང་བཞིན་མེད་པའི་སྐུ། །གཅེར་བུ་རུས་པའི་རྒྱན་གྱིས་མཛེས། །ཞབས་གཉིས་གཡས་བརྐྱང་གཡོན་བསྐུམ་པའི། །རོལ་སྟབས་འགྱིང་བག་ཚུལ་གྱིས་ནི། །ཡེ་ཤེས་མེ་དཔུང་དབུས་ན་བཞུགས། ཞེས་དམ་ཡེ་དབྱེར་མེད་དུ་གསལ་བཏབ་ཅིང་སེམས་བཟུང་ངོ་། །གཉིས་པ་ལོངས་སྐུ་ལམ་བྱེད་ཀྱི་རྣལ་འབྱོར་ལ། །ཐུན་མོང་བཟླས་པ་བྱ་བ་ནི། །ཐུགས་ཀར་ཉི་སྟེང་བྃ་ཡིག་མཐར། །སྔགས་ཕྲེང་དམར་པོ་གཡོན་དུ་འཁོར། འོད་འཕྲོས་འཕགས་མཆོད་སྣོད་བཅུད་སྦྱངས། །ཚུར་འདུས་རང་ལ་གཉིས་མེད་ཐིམ། །ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་བརྞྞཱ་ནཱི་ཡེ་ཧཱུྃ་ཧཱུྃ་ཕཊ། ཞེས་སྙིང་པོ་དང་། ཨོཾ་བཛྲ་བཻ་རོ་ཙ་ནཱི་ཡེ་ཧཱུྃ་ཧཱུྃ་ཕཊ། ཞེས་ཉེ་སྙིང་ཅི་ནུས་བཟླས། བསྙེན་པ་བྱེད་ན་ཐུན་བཞིའི་རིམ་པས་ཉེ་སྙིང་སུམ་འབུམ་བཞི་ཁྲི་དང་། སྙིང་པོ་བཞི་ཁྲི་བཟླའོ། །ཁྱད་པར་ཐུན་མཐར་སྔགས་ཕྲེང་སོགས་མི་དམིགས་པའི་ངང་། ལུས་གནད་དང་རླུང་རོ་བསལ་ལ། རང་ལུས་སྟོང་སོང་ངེ་སོང་བའི་དབུས་སུ་རྩ་གསུམ་གྱི་མདོར་ཉི་གདན་ལ་རྩ་བའི་བླ་མ་གྲུབ་ཐོབ་ཀྱི་ཆ་ལུགས་མེའི་རང་བཞིན་ཅན་དུ་གསལ་བཏབ་ལ། འཇམ་རླུང་སྦྱོར་བ་བཞི་ལྡན་གྱིས་བསྐུལ་བས། སྐུ་ལས་འབར་བའི་མེས་རྩ་གསུམ་དང་ལུས་ཀྱི་ནང་ནས་བཟུང་། མཐར་སྣོད་བཅུད་མེར་འབར་བ་ལ་དམིགས་པ་གཏད་དེ་རླུང་དང་གཏུམ་མོ་ཟུང་འབྲེལ་དུ་བརྐྱང་། གཞན་ཡང་ཐིག་ལེའི་འབར་འཛག་སོགས་ཇི་ལྟར་རིགས་པ་བསྒོམ་མོ། །གསུམ་པ་ཆོས་སྐུ་ལམ་བྱེད་ཀྱི་རྣལ་འབྱོར་ནི། བཅོམ་ལྡན་འདས་མས་བདག་དང་སེམས་ཅན་ཐམས་ཅད་ཀྱི་རྒྱུད་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ། རང་ཉིད་ལྷ་སྐུ་གདན་དང་བཅས་པ་འོད་ཟེར་འཇའ་ཚོན་གྱི་རྣམ་པར་གྱུར་ཏེ་ཐུགས་ཀའི་ས་བོན་ལ་ཐིམ། དེ་ཡང་མི་དམིགས་པ་འོད་གསལ་སྟོང་པ་ཉིད་ཀྱི་ངང་དུ་གྱུར་པར་བསམས་ལ། དུས་གསུམ་གྱི་སྤྲོས་པ་བཅད་ནས་ཡིད་ལ་མི་བྱེད་པ་གནས་ལུགས་ཕྱག་རྒྱ་ཆེན་པོའི་ངང་དུ་མ་བཅོས་པར་བཞག་གོ། །གསུམ་པ་རྗེས་ནི། ཐུན་དེ་ལས་ལྡང་བར་འདོད་ན། སླར་ཡང་རང་སྐད་ཅིག་གིས་རྗེ་བཙུན་རྡོ་རྗེ་རྣལ་འབྱོར་མའི་སྐུར་གསལ་བས་བསྔོ་སྨོན་བྱ། སྤྱོད་ལམ་ལ་འཇུག་པའི་ཚེ། ཅིར་སྣང་ཐམས་ཅད་ལྷ་སྔགས་ཆོས་སྐུའི་ཡེ་ཤེས་སྒྱུ་མ་ལྟ་བུར་ལམ་དུ་ཁྱེར་ལ། བཟའ་བཏུང་གོས་རྒྱན་སོགས་འདོད་ཡོན་རྣམས་ལ་ལྷས་མཆོད་པའི་ཚུལ་གྱིས་ལོངས་སྤྱད། གཏོར་མ་འབུལ་ན། ནང་མཆོད་ལྟར་བྱིན་གྱིས་བརླབས་ལ། རང་གི་ཐུགས་ནས་འོད་འཕྲོས་པས། །རྗེ་བཙུན་རྡོ་རྗེ་རྣལ་འབྱོར་མ། །མཆོད་འོས་རྒྱ་མཚོའི་འཁོར་དང་བཅས། །མདུན་གྱི་ནམ་མཁར་ས་མཱ་ཛཿ པདྨ་ཀ་མ་ལ་ཡེ་སྟྭཱཾ། ཉེ་སྙིང་གི་མཐར། ས་པ་རི་ཝཱ་ར་ན་མསྶརྦ། སོགས་ནམ་མཁའ་མཛོད་ཀྱི་སྔགས་རྒྱས་གཏོར་མ། ཨོཾ་བཛྲ་ཡོ་གི་ནཱི་ས་པ་རི་ཝཱ་ར་ཨརྒྷཾ་སོགས་ཀྱིས་ཕྱི་མཆོད། ཨོཾ་ཨཱཿཧཱུྃ་གིས་ནང་མཆོད་རྣམས་ཕུལ། དཔལ་ལྡན་རྡོ་རྗེ་མཁའ་འགྲོ་མ། །སོགས་ཀྱིས་བསྟོད། མཆོད་སྦྱིན་གཏོར་མ་འདི་བཞེས་ལ། །སོགས་ཀྱིས་འདོད་དོན་གསོལ། རྟེན་ཡོད་ན་བརྟན་བཞུགས་དང་། མེད་ན། བཛྲ་མུཿས་གཤེགས་སུ་གསོལ། ཉལ་བའི་ཚེ་ཆོས་སྐུའི་རྣལ་འབྱོར་རམ། སྙིང་དབུས་བླ་མའི་སྐུ་གསལ་སྣང་དང་བཅས་པ་ལ་སེམས་གཏད་དེ་གཉིད་ཀྱི་འོད་གསལ་ལ་༣འཇུག །ཡང་ན་མགྲིན་པར་པདྨ་དམར་པོ་འདབ་མ་བརྒྱད་པའི་ཟེའུ་འབྲུར་བླ་མ་ཡི་དམ་ཐམས་ཅད་འདུས་པའི་ངོ་བོར་ཨྃ་ཡིག་དམར་པོ་རང་སྒྲ་སྒྲོག་པ་ལ་སེམས་བཟུང་ནས་འདུན་པ་དང་བཅས་ཏེ་གཉིད་ལོག་པས་རྨི་ལམ་༤ཟིན་པར་འགྱུར་རོ། །ནང་པར་སྐད་ཅིག་གིས་ལྷའི་སྐུར་ལྡང་། འཕོ་བའི་རྣལ་༥འབྱོར་ནི། སྤྱི་བོར་བླ་མ་རྣལ་འབྱོར་མ་གྲི་ཐོད་ཐུགས་ཀར་བསྣོལ་བ། ཞབས་རྡོ་རྗེའི་སྐྱིལ་ཀྲུང་དུ་བཞུགས་པ། རང་གི་ལུས་ཀྱི་དབུས་སུ་རྩ་དབུ་མ། མར་སྣ་ལྟེ་འོག་ཏུ་ཁ་ཟུམ་པ། ཡར་སྣ་རྣལ་འབྱོར་མའི་གསང་གནས་ཀྱི་དབུ་མའི་ནང་དུ་ཟུག་ཅིང་ཀྵ་ཡིག་ནག་པོས་བཀག་པ། བླ་མའི་ཐུགས་ཀར་བྃ་ཡིག་དམར་པོ། །རང་གི་སྙིང་གར་རླུང་སེམས་ཧཱུྃ་སྔོན་པོ་རྣམས་གསལ་བཏབ་ནས། བླ་མ་རྗེ་བཙུན་རྡོ་རྗེ་རྣལ་འབྱོར་མར། །སྙིང་ནས་གདུང་ཤུགས་དྲག་པོས་གསོལ་བ་འདེབས། །ཟབ་ལམ་འཕོ་བའི་རྣལ་འབྱོར་ལ་བརྟེན་ནས། །འཇའ་ལུས་མཁའ་སྤྱོད་འགྲུབ་པར་བྱིན་གྱིས་རློབས། །ཞེས་གསོལ་བ་བཏབ་ནས། རླུང་ཕྱིར་འགྲོ་བའི་ཚེ་སྤྱི་བོའི་ཀྵ་ཡིག་བསལ། ནང་དུ་འཇུག་པ་ན་བླ་མའི་ཐུགས་ཀ་ནས་འོད་ཟེར་འཕྲོས། སྙིང་གའི་ཧཱུྃ་ལ་ཐིམ། ཡིད་ཀྱི་ཧིཀ་བརྗོད་ཅིང་རླུང་ཕྱིར་འཕུལ་བས་ཧཱུྃ་ཡིག་དབུ་མའི་ལམ་བརྒྱུད་དེ་བླ་མའི་ཐུགས་ཀའི་བྃ་ལ་རེག །ཀ་བརྗོད་ཅིང་རླུང་ནང་དུ་རྔུབས་པས་མར་བབས་པར་བསམ། མཐར་བླ་མ་རྣལ་འབྱོར་མ་འཆི་མེད་བདུད་རྩིའི་རྣམ་པར་ཞུ་ནས་རང་ལ་ཐིམ། ཚངས་བུག་ཀྵ་ཡིག་གིས་བཀག་པར་མོས་ཏེ་རླུང་བུམ་པ་ཅན་བཟུང་། འཆི་བའི་ཚེ་གཞན་སྔར་བཞིན་ལ། མར་འབེབས་པའི་དམིགས་པ་མི་བྱེད་པར་བྃ་ཡིག་དང་དབྱེར་མེད་དུ་བསྲེས་ནས་འཇོག །གལ་ཏེ་འཕོ་བ་མ་ཐེབ་ན། བར་དོའི་རྣལ་འབྱོར་ནི་ད་ལྟར་ནས་སྤྱོད་ཡུལ་ཐམས་ཅད་བར་དོའི་སྣང་ཆར་དྲན་པས་ཆགས་སྡང་རྨོངས་གསུམ་གྱི་རྟོག་པ་བཙན་ཐབས་སུ་སྤང་ལ་སྣང་གྲགས་རིག་གསུམ་ལྷ་སྔགས་ཡེ་ཤེས་ཆེན་པོའི་རོལ་པས་ལམ་དུ་ཁྱེར་རོ། །ཞར་བྱུང་ཚེས་བཅུའི་མཆོད་པ་མདོར་བསྡུས་པའི་ཚུལ་ནི། སྦྱོར་བ་བདག་འཇུག་སོགས་དང་འབྲེལ་ན་སྐུ་གསུང་ཐུགས་ཀྱི་དཀྱིལ་འཁོར་གསུམ་བཤམས་ཤིང་། མ་འབྲེལ་ན་སྐུ་རྟེན་ནམ་མཉྫའི་ཁར་མཎྜལ་ཆོས་འབྱུང་གི་དབུས་སུ་མེ་ཏོག་དམར་པོའི་ཚོམ་བུ་གཅིག་བཀོད། ཚོགས་དང་མཆོད་པའི་ཡོ་བྱད་ཇི་ལྟར་འབྱོར་པ་འདུ་བྱ། རང་སྐད་ཅིག་གིས་རྡོ་རྗེ་རྣལ་འབྱོར་མའི་སྐུར་གྱུར་པར་བསམ་ལ། སྔོན་གཏོར། ཨོཾ་ཁཎྜ་རོ་ཧི་ཧཱུྃ་ཧཱུྃ་ཕཊ། ཀྱིས་བསང་། སྭ་བྷཱ་བས་སྦྱངས། སྟོང་པའི་ངང་ལས་རིན་པོ་ཆེའི་སྣོད་དུ་གཏོར་མ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ཧ་ཧོཿཧྲཱིཿ ལན་གསུམ་གྱིས་བརླབས། ཨོཾ་ལོ་ཀ་པཱ་ལ་མ་ཧཱ་བྷུ་ཏ་ས་པ་རི་ཝཱ་ར་ཨ་ཀཪྵཱ་ཡ་ཛཿས་མགྲོན་དགུག །ཨ་ཀཱ་རོ་བཏགས་པ་ལན་གསུམ་གྱིས་གཏོར་མ་བསྔོས། །དཀར་ཕྱོགས་སྐྱོང་བའི་འབྱུང་པོའི་ཚོགས། །མཆོད་སྦྱིན་གཏོར་མ་འདི་བཞེས་ལ། །འགལ་རྐྱེན་སྤོངས་ལ་མཐུན་རྐྱེན་སྒྲུབས། །ནག་ཕྱོགས་བགེགས་རིགས་ཕྱིར་དེངས་ཤིག །སུམ་བྷའི་སྔགས་ཀྱིས་བགེགས་བསྐྲད། ནང་མཆོད་བསང་སྦྱང་། སྟོང་པའི་ངང་ལས་རླུང་མེ་དང་། །ཐོད་པའི་སྒྱེད་པུ་གསུམ་གྱི་སྟེང་། །ཕྱི་སྣོད་བདེ་ཆེན་ཀ་པཱ་ལར། །ནང་བཅུད་ཤ་ལྔ་བདུད་རྩི་ལྔ། །རྡོ་རྗེ་གསུམ་མཚོན་ཁ་ཊྭཱྃ་བཅས། །བསྐོལ་ཞིང་འོད་དུ་ཞུ་བ་ལས། །དམ་ཚིག་ཡེ་ཤེས་དབྱེར་མེད་པའི། །བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ་གྱིས་བརླབས། གནས་དང་ཡོ་བྱད་རྣམས་བསང་སྦྱང་། སྟོང་པའི་ངང་ལས་གནས་ཡུལ་ཀུན། །འོག་མའི་མཁའ་སྤྱོད་རྡོ་རྗེའི་ཞིང་། །དེ་དབུས་ལྷ་རྫས་ལས་གྲུབ་པའི། །མཆོད་སྤྲིན་ནམ་མཁའ་མཉམ་པར་གྱུར། །ཨོཾ་བཛྲ་ཨརྒྷཾ་ཨཱཿཧཱུྃ། པུཥྤེ། ནས། ཤཔྡའི་བར་དང་། དྷརྨཱ་ར་ཎི་ཏས་བྱིན་བརླབས། སྐྱབས་སེམས་ནས་བླ་མའི་རྣལ་འབྱོར་བར་སྔར་བཞིན་དང་། དངོས་གཞི་ལ། བདག་བསྐྱེད་གོང་དུ་བཤད་པ་བཞིན་གྱི་རྗེས། བདག་འཇུག་སོགས་ཀྱི་ཚེ་རྣམ་བུམ་དུ་རྣལ་འབྱོར་མ་དང་། ལས་བུམ་དུ་ཁཎྜ་རོ་ཧི་བསྐྱེད་བཟླས་བྱ་བ་ནི། ཁཎྜ་རོ་ཧིས་བསང་། སྭཱ་བྷཱ་ཝས་སྦྱང་། སྟོང་པའི་ངང་ལས་པད་ཟླའི་སྟེང་། །བྷྲཱུྃ་ལས་རིན་ཆེན་བུམ་པ་ཟུང་། །མཚན་ཉིད་ཐམས་ཅད་རབ་རྫོགས་ཤིང་། །ཆུ་དང་བཅུད་ཀྱིས་ཡོངས་གང་བའི། །རྣམ་པར་རྒྱལ་བའི་བུམ་པའི་དབུས། །པདྨ་འདབ་བརྒྱད་ཉི་མ་དང་། །འཇིགས་བྱེད་དུས་མཚན་གདན་གྱི་སྟེང་། །བྃ་ལས་སྐད་ཅིག་དྲན་རྫོགས་སུ། །རྗེ་བཙུན་རྡོ་རྗེ་རྣལ་འབྱོར་མ། །སོགས་ནས། ཡེ་ཤེས་མེ་དཔུང་དབུས་ན་བཞུགས། །ལས་བུམ་དབུས་སུ་པད་ཉིའི་སྟེང་། །ཁཎྜ་རོ་ཧི་སྐུ་མདོག་དམར། །གྲི་ཐོད་འཛིན་ཅིང་ཁ་ཊྭཱཾ་འཁྱུད། །རུས་པའི་རྒྱན་ལྡན་གར་སྟབས་ཀྱིས། །རྟོག་མེད་རོ་ཡི་སྙིང་གར་བརྫིས། །བུམ་ལྷ་ཟུང་གི་གནས་རྣམས་སུ། །ལྟེ་བར་ཨོཾ་བྃ་ཕག་མོ་དམར། །སོགས་ནས། ཨོཾ་དཀར་ཨཱཿདམར་ཧཱུྃ་མཐིང་མཚན། བར་དང་། བདག་དང་བུམ་ལྷའི་ཐུགས་ཀ་ནས། སོགས་ནས་སྐུ་གང་སྒྲིབ་དག་རིགས་ཀྱི་བདག །ཞེས་པའི་བར་འོག་ནས་འབྱུང་བ་ལྟར་ལ། །རྣམ་སྣང་རིན་ལས་བུམ་ཀྱི་ལྷ་ལ་འབྱུང་དབུར་བརྒྱན་གྱུར། །ཅེས་བརྗོད། ཨོཾ་བཛྲ་ཡོ་གི་ནཱི་ཁཎྜ་རོ་ཧི་ས་པ་རི་ཝཱ་ར་ཨརྒྷཾ་སོགས་ཀྱིས་ཕྱི་མཆོད་དང་། ཨོཾ་ཨཱཿཧཱུྃ་གིས་ནང་མཆོད་འབུལ། དཔལ་ལྡན་རྡོ་རྗེ་མཁའ་འགྲོ་མ། །སོགས་ཀྱིས་བསྟོད། གཟུངས་ཐག་ནས་བཟུང་སྟེ། བདག་གི་ཞལ་ནས་སྔགས་ཀྱི་ཕྲེང་། །གཟུང་ཐག་ལ་བརྟེན་བུམ་ནང་སོང་། །སྐུ་ལས་བདུད་རྩིའི་རྒྱུན་བབས་པས། བུམ་པ་ཡོངས་སུ་གང་བར་གྱུར། །རྣམ་རྒྱལ་བུམ་པར་སྙིང་པོ་ཅི་ནུས་དང་། །ལས་བུམ་ལ་ཁཎྜ་རོ་ཧི་བཟླས་མཐར་མཆོད་བསྟོད་དང་། །བུམ་ལྷའི་ཡེ་ཤེས་པ་རང་གི་ཐུགས་ཀར་ཐིམ། ཛཿཧཱུྃ་བྃ་ཧོཿ ཨོཾ་ཨཱཿཧཱུྃ་གིས་དུང་ཆོས་ཀྱི་ཆུ་མཆོད་ཡོན་དུ་ཕུལ་ལ། དམ་ཚིག་པ་འོད་དུ་ཞུ་བ་ལས་བུམ་པའི་ཆུ་ནུས་པ་དང་ལྡན་པར་བསམ་མོ། །དེ་ནས་མདུན་རྟེན་བསང་སྦྱང་། སྟོང་ཉིད་ནམ་མཁའི་ཀློང་དཀྱིལ་ན། །ཆོས་ཀྱི་འབྱུང་གནས་ཁ་སྦྱོར་ནང་། །རྡོ་རྗེ་སྲུང་བའི་གུར་ཁང་དབུས། །པདྨ་འདབ་བརྒྱད་ཉི་མ་དང་། །འཇིགས་བྱེད་དུས་མཚན་གདན་གྱི་སྟེང་། །བྃ་ལས་སྐད་ཅིག་དྲན་རྫོགས་སུ། །རྗེ་བཙུན་རྡོ་རྗེ་རྣལ་འབྱོར་མ། སོགས་ནས། ཡེ་ཤེས་མེ་དཔུང་དབུས་ན་བཞུགས། །ལྟེ་བར་ཨོཾ་བྃ་ཕག་མོ་དམར། །སྙིང་གར་ཧྃ་ཡྃ་གཤིན་རྗེ་མ། །སྔོན་མོ་མགྲིན་པར་ཧྲཱིཾ་མཾ་ལས། །རྨོངས་བྱེད་དཀར་མོ་དཔྲལ་བ་རུ། །ཧྲཱིཾ་ཧྲཱིཾ་བསྐྱེད་བྱེད་མ་སེར་མོ། །སྤྱི་གཙུག་ཧཱུྃ་ཧཱུྃ་སྐྲག་བྱེད་ལྗང་། །ཡན་ལག་ཀུན་ལ་ཕ྄ཊ་ཕ྄ཊ་ལས། །དུད་ཁའི་མདོག་ཅན་ཙཎྜིཀ །ཀུན་ཀྱང་ཞལ་གཅིག་ཕྱག་གཉིས་མ། །གར་སྟབས་གྲི་ཐོད་ཁ་ཊྭཱཾ་འཛིན། །པད་ཉི་བྃ་རོའི་གདན་ལ་རོལ། །གནས་གསུམ་རྡོ་རྗེ་གསུམ་གྱི་དངོས། །ཨོཾ་དཀར་ཨཱཿདམར་ཧཱུྃ་མཐིང་མཚན། །དེ་ལས་འོད་འཕྲོས་སྣོད་བཅུད་ཀུན། །འཁོར་ལོ་སྡོམ་པའི་དཀྱིལ་འཁོར་གྱུར། །སླར་ཡང་བདག་མདུན་ཐུགས་ཀ་ནས། །འཕྲོས་པའི་འོད་ཀྱིས་ཡེ་ཤེས་པ། །སྤྱན་དྲངས་གཉིས་སུ་མེད་པར་ཐིམ། ཨོཾ་གུ་རུ་ཤྲཱི་བཛྲ་ཡོ་གི་ནཱི་ས་པ་རི་ཝཱ་ར་བཛྲ་ས་མཱ་ཛཿས་སྤྱན་དྲངས། ཛཿཧཱུྃ་བྃ་ཧོཿས་བསྟིམ། སླར་ཡང་དབང་ལྷ་སྤྱན་དྲངས་ནས། །ཡེ་ཤེས་བདུད་རྩིས་དབང་བསྐུར་བས། །སྐུ་གང་སྒྲིབ་དག་རིགས་ཀྱི་བདག །རྣམ་པར་སྣང་མཛད་དབུར་བརྒྱན་གྱུར། །མདུན་བསྐྱེད་ཐུགས་ཀར་ཉི་སྟེང་བྃ། །མཐར་སྐོར་སྔགས་ཕྲེང་གཡོན་དུ་འཁོར། །འོད་འཕྲོས་འཕགས་མཆོད་འགྲོ་སྒྲིབ་སྦྱངས། །ཚུལ་འདུས་དངོས་གྲུབ་རྣམ་གཉིས་ཐོབ། །བཟླས་པ་ཅི་ནུས་རྗེས་སུ། རབ་འབྱམས་རྒྱ་མཚོ་དཔག་མེད་ན། །མཆོད་རྫས་ཇི་སྙེད་ཡོད་པ་དང་། །བདག་གི་གུས་པས་བཤམས་པ་འདི། །བླ་མ་རྡོ་རྗེ་རྣལ་འབྱོར་མ། །འཁོར་དང་བཅས་ལ་བདག་འབུལ་ན། །ཐུགས་རྗེའི་མངའ་བ་ཁྱེད་རྣམས་ཀྱིས། །ཅི་བདེ་བར་ནི་བཞེས་ནས་ཀྱང་། །སེམས་ཅན་དོན་ཀུན་མཛད་དུ་གསོལ། ཨོཾ་གུ་རུ་ཤྲཱི་བཛྲ་ཡོ་གི་ནཱི་ས་པ་རི་ཝཱ་ར་ཨརྒྷཾ་པྲ་ཏི་ཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། དེ་བཞིན་དུ། པུཥྤེ། སོགས་སྦྱར་བས་ཉེར་སྤྱོད། ཨོཾ་ཨཱཿརཱུ་པ་བཛྲཱི་ཧཱུྃ། ནས། སྤཪྴེའི་བར་སྦྱར་བས་འདོད་ཡོན། ཨོཾ་ཨཱཿཧཱུྃ་གིས་ནང་མཆོད་རྣམས་འབུལ། དཔལ་ལྡན་རྡོ་རྗེ་མཁའ་འགྲོ་མ། །མཁའ་འགྲོ་མ་ཡི་འཁོར་ལོས་སྒྱུར། །ཡེ་ཤེས་ལྔ་ལྡན་སྐུ་གསུམ་བརྙེས། །འགྲོ་བ་སྐྱོབ་ལ་ཕྱག་འཚལ་བསྟོད། །ཇི་སྙེད་རྡོ་རྗེ་མཁའ་འགྲོ་མ། །ཀུན་ཏུ་རྟོག་པའི་འཆིང་གཅོད་ཅིང་། །འཇིག་རྟེན་བྱ་བ་རབ་འཇུག་མ། །དེ་སྙེད་རྣམས་ལ་ཕྱག་འཚལ་བསྟོད། །ཅེས་བསྟོད། བཅོམ་ལྡན་འདས་མས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཅེས་གསོལ་བ་གདབ། བདག་འཇུག་སོགས་བླངས་ན་འདིར་བྱ། །རྗེས་སུ་གཏོར་མ་ནང་མཆོད་ལྟར་བརླབས་ལ་འབུལ། ཚོགས་རྫས་ནང་མཆོད་ལྟར་བྱིན་གྱིས་བརླབས་ནས། ཕྱོགས་བཅུའི་ཞིང་ཁམས་རབ་འབྱམས་ནས། །རྩ་བརྒྱུད་བླ་མ་ཡི་དམ་ལྷ། །དཔའ་བོ་དང་ནི་རྣལ་འབྱོར་མ། །ཆོས་སྐྱོང་སྲུང་མ་རྒྱ་མཚོར་བཅས། །ཚོགས་ཀྱི་མཆོད་པར་སྤྱན་འདྲེན་ན། །འོད་གསལ་ཆོས་སྐུའི་ངང་ཉིད་ལས། །ཟུང་འཇུག་གཟུགས་སྐུའི་རྣམ་འཕྲུལ་གྱིས། །ཐུགས་རྗེའི་དབང་གིས་གཤེགས་སུ་གསོལ། །ཨོཾ་གུ་རུ་མཎྜལ་དེ་བ་ཌཱ་ཀ་ཌཱ་ཀི་ནཱི་དྷརྨ་པཱ་ལ་ས་པ་རི་ཝཱ་ར་བཛྲ་ས་མཱ་ཛཿས་ཚོགས་ཞིང་མགྲོན་སྤྱན་དྲངས། ཛཿཧཱུྃ་བྃ་ཧོཿས་བསྟིམ། པདྨ་ཀ་མ་ལ་ཡེ་སྟྭཾ། གྱིས་གདན་འབུལ། སྤྲོ་ན། བླ་མ་ཡི་དམ་ལྷ་ཚོགས་ལ། །གུས་པས་ཕྱག་འཚལ་སོགས་ཡན་ལག་བདུན་པ་བྱ། རྡོ་རྗེའི་གླུ་བླངས། གོང་ལྟར་ཡང་ཚོགས་ཕུད་ཆ་གཉིས་སུ་བསྡུས་ཏེ། ཕུད་དང་པོ་དཀྱིལ་འཁོར་གྱི་མདུན་ནམ་གཏོར་མ་ལ་བྲན། སྨན་ཕུད་འཐོར་བ་དང་བཅས། ཨོཾ་ཨཱཿཧཱུྃ། དམན་པའི་ཡུལ་ལས་རབ་འདས་ཤིང་། །རྒྱལ་བ་ཀུན་གྱི་དམ་ཚིག་མཆོག །དངོས་གྲུབ་ཀུན་གྱི་གཞིར་གྱུར་པ། །བདུད་རྩི་མཆོག་གིས་མཆོད་པར་བགྱི། །ཞེས་དང་། ཨོཾ་གུ་རུ་མཎྜལ་དེ་བ་ཌཱ་ཀ་ཌཱ་ཀི་ནཱི་དྷརྨ་པཱ་ལ་ས་པ་རི་ཝཱ་ར་ག་ཎ་ཙཀྲ་པཱུ་ཛ་ཁ་ཁ་ཁཱ་ཧི་ཁཱ་ཧི། ལན་གསུམ་མམ་བདུན་གྱིས་ཕུལ། དེ་ནས་རང་གི་ཕུང་ཁམས་སྐྱེ་མཆེད་ལྷར་གསལ་བ་མཆོད་པའི་མོས་པས་དམ་ཚིག་གི་རྫས་ཞེན་པ་མེད་པར་ལོངས་སྤྱད་པའི་མཐར་ཕུད་ཆ་གཉིས་པ་དང་། ལྷག་མ་བསྡུས་ཏེ་བྱ་ཁྱུང་གི་ཕྱག་རྒྱ་དང་བཅས་མ་དཱ་ནས་ཁ་ཕྲུ་བཏབ་ལ། ཨོཾ་ཨཱཿཧཱུྃ་ཧ་ཧོ་ཧྲཱིཿས་བརླབས། ཨོཾ་ཨུཥྩི་ཊ་བ་ལིངྟ་བྷཀྵ་སི་སྭཱ་ཧཱས་བསྔོས། ལྷག་ལ་དབང་བའི་འབྱུང་པོའི་ཚོགས། །ཡེ་ཤེས་དམ་ཚིག་འཇིག་རྟེན་གྱི། །དཔའ་བོ་མཁའ་འགྲོ་མ་ལུས་ཀུན། །མཆོད་སྦྱིན་གཏོར་མ་འདི་བཞེས་ལ། །སོགས་ཀྱི་ཕྲིན་ལས་བཅོལ། མདུན་བསྐྱེད་ལ་སྔགས་ཙམ་གྱིས་མཆོད་ཅིང་བསྟོད། ཡི་གེ་བརྒྱ་པའི་མཐར། མ་འབྱོར་པ་དང་། སོགས་ཀྱིས་ནོངས་པ་བཟོད་པར་གསོལ། རྟེན་ཡོད་ན་བརྟན་བཞུགས་དང་། མེད་ན། མདུན་བསྐྱེད་ཀྱི་རྣལ་འབྱོར་མ་ཛཿཧཱུྃ་བྃ་ཧོཿ རང་ལ་གཉིས་སུ་མེད་པར་ཐིམ། རང་ཉིད་ལྷ་སྐུ་གདན་དང་བཅས། སོགས་འོད་གསལ་དུ་བསྡུས་ནས་ཐུན་མཚམས་ཀྱི་ལྷ་སྐུར་ལྡང་། དགེ་བ་འདི་ཡིས་མྱུར་དུ་བདག །རྣལ་འབྱོར་མ་དཔལ་འགྲུབ་གྱུར་ནས། །སོགས་དང་། འཆི་ཚེ་མགོན་དང་དཔའ་བོ་མ་ཚོགས་ཀྱིས། །མེ་ཏོག་གདུགས་དང་རྒྱ་མཚན་ཐོགས་ནས་སུ། །རོལ་མོ་གླུ་དབྱངས་སིལ་སྙན་སོགས་མཆོད་པས། །མཁའ་ལ་སྤྱོད་པའི་གནས་སུ་འཁྲིད་པར་ཤོག །ལྷ་མོ་ཚད་མ་དམ་ཚིག་ཚད་མ་དང་། །དེས་གསུང་ཚིག་ཀྱང་མཆོག་ཏུ་ཚད་མ་སྟེ། །བདེན་པ་དེས་ཀྱང་ལྷ་མོ་དེ་རྣམས་ཀྱིས། །བདག་ལ་རྗེས་སུ་འཛིན་པའི་རྒྱུར་གྱུར་ཅིག །ཅེས་སོགས་བསྔོ་སྨོན་བྱ། །རྡོ་རྗེ་འཆང་ཆེན་ཏེ་ལོ་ནཱ་རོ་དང་། །མར་པ་ལོ་ཙྭ་མི་ལ་ཡབ་སྲས་སོགས། །བཀའ་བརྒྱུད་བླ་མ་དམ་པའི་ཚོགས་རྣམས་ཀྱི། །བྱིན་རླབས་སྙིང་ལ་འཇུག་པའི་བཀྲ་ཤིས་ཤོག །ཤིན་ཏུ་ཞི་བ་ཆོས་སྐུའི་ངང་ཉིད་ལས། །བདེ་ཆེན་ལོངས་སྤྱོད་རྫོགས་པའི་རྣམ་རོལ་ཅན། །དཔལ་ལྡན་བདེ་མཆོག་འཁོར་ལོ་ཡབ་ཡུམ་གྱིས། །མངོན་སུམ་རྗེས་སུ་འཛིན་པའི་བཀྲ་ཤིས་ཤོག །གནས་ཡུལ་དུར་ཁྲོད་ཀུན་ན་ལེགས་བཞུགས་པའི། །དཔའ་བོ་མཁའ་འགྲོས་བུ་བཞིན་བསྐྱང་བ་དང་། །ཆོས་སྐྱོང་སྲུང་མས་བར་ཆད་ཀུན་བསལ་ནས། །དོན་གཉིས་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་སོགས་བཀྲ་ཤིས་པའི་ཚིགས་སུ་བཅད་པ་བརྗོད་ཅིང་མེ་ཏོག་གི་ཆར་སིལ་མ་དགྲམ་པར་བྱའོ། །ཞེས་པའང་བྱ་བྲལ་བ་མཉྫུ་གྷོ་ཥས་ལམ་འདི་ལ་མཁས་ཤིང་དངོས་གྲུབ་བརྙེས་པའི་དམ་པ་སྔ་མ་རྣམས་ཀྱི་གསུང་གི་རྗེས་སུ་འབྲངས་ཏེ་མདོར་བསྡུས་སྙིང་པོར་དྲིལ་བའི་ཚུལ་གྱིས་སྦྱར་བའི་དགེ་བས་འགྲོ་ཀུན་མཁའ་སྤྱོད་རྡོ་རྗེ་བཙུན་མོས་མངོན་སུམ་དུ་རྗེས་སུ་བཟུང་བའི་རྒྱུར་གྱུར་ཅིག ། ༈ འདིའི་བདག་འཇུག་སོགས་ཀྱི་སྐབས་དཀྱིལ་འཁོར་གྱི་བཤམས་ཚུལ་ནི། སྟེགས་བུའི་དབུས་སུ་རྡུལ་ཚོན་ནམ་རས་བྲིས་གང་རུང་གིས་སྐུ་ཚོམ་བུའི་དཀྱིལ་འཁོར་རྡོ་ར་མེ་རིས་བསྐོར་བའི་ཆོས་འབྱུང་གི་ནང་དུ། པདྨ་འདབ་མ་བཞི་པའི་མཐའ་དུར་ཁྲོད་ཀྱིས་བསྐོར་བའི་པདྨའི་ལྟེ་བར་ཚོམ་བུ་དམར་པོའམ། བྃ་ཡིག་དམར་པོ་འགོད། དེའི་དབུས་སུ་བར་བདུད་རྩིའི་དཀྱིལ་འཁོར་མཉྫིའི་ཁར་ཐོད་པ་མཚན་ལྡན་དུ་ནང་མཆོད་བདུད་རྩི་རིལ་བུ་དང་སྦྱར་བ་བླུགས། དེའི་ཁང་སྟེང་སིན་དྷུ་རའི་དཀྱིལ་འཁོར་མཎྜ་ལར་བདུད་རྩིས་ཅུང་ཟད་བརླན་པས་སིནྡྷུ་ར་ཁོད་སྙོམ་པོར་དགྲམ་ལ་པདྨ་འདབ་བརྒྱད་ཀྱི་དབུས་སུ་བྃ་ཡིག་གིས་མཚན་པ་བྲི། མདུན་བསྐྱེད་སྒྲུབ་མཆོད་ཀྱི་སྐབས། ཐོག་མར་ཐོད་པའི་ནང་དུ་རྗེ་བཙུན་རྡོ་རྗེ་རྣལ་འབྱོར་མ་ལྷན་ཅིག་སྐྱེས་མ་སྐད་ཅིག་གིས་གསལ་ལ་མཆོད་བསྟོད་ཕུལ། བཟླས་པ་ཅུང་ཟད་བྱ། ཛཿཧཱུྃ་བྃ་ཧོ། ཡེ་ཤེས་པ་རང་ལ་ཐིམ། དམ་ཚིག་པའི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་བདུད་རྩིར་ཞུ་བར་བསམས་ལ། ཨོཾ་ཨཱཿཧཱུྃ་ཞེས་བརྗོད། དེ་ནས་འོག་ཚོམ་བུའི་དཀྱིལ་འཁོར་གྱི་སྤྲུལ་སྐུ་དང་། བར་བདུད་རྩིའི་དཀྱིལ་འཁོར་གྱིས་ལོངས་སྐུ་མཚོན་པའི་དོན་དྲན་པས། སྟེང་ཆོས་སྐུ་མཚོན་པའི་སིནྡྷུ་རའི་དཀྱིལ་འཁོར་བསང་སྦྱང་ སོགས་མདུན་བསྐྱེད་དཀྱུས་བཞིན་བྱ། བདག་འཇུག་རྒྱས་པར་མ་ནུས་ན་མདུན་བསྐྱེད་ཀྱི་གནས་གསུམ་དུ་ཨོཾ་ཨཱཿཧཱུྃ་བཀོད་ནས་ཏིང་ངེ་འཛིན་གྱི་དབང་བླ་མའི་རྣལ་འབྱོར་གྱི་སྐབས་ལྟར་ལེན་པའང་ཕྱག་ལེན་དུ་མཛད། རྗེས་ཆོག་དཀྱིལ་འཁོར་བསྡུ་རིམ་ཚེ། འོག་སྤྲུལ་སྐུའི་དཀྱིལ་འཁོར་འོད་དུ་ཞུ་ནས་བར་ལོངས་སྐུའི་དཀྱིལ་འཁོར་དང་། དེ་ཆོས་སྐུའི་དཀྱིལ་འཁོར་ལ་ཐིམ། དེ་ཉིད་རྟེན་དང་བརྟེན་པར་བཅས་པ་རང་ལ་ཐིམ་པར་བསམས་ལ། དབུས་ཀྱི་བྃ་ནས་མཐེབ་སྲིན་གྱིས་བླངས་ལ་དཔྲལ་བར་ཐིག་ལེ་བྱའོ།། །།མངྒ་ལཾ།།

[edit]

bde mchog snyan brgyud kyi yum bka' lhan cig skyes ma'i nyams len shin tu bsdus pa bdud rtsi'i snying po/ @#/__/bde mchog snyan brgyud kyi yum bka' lhan cig skyes ma'i nyams len shin tu bsdus pa bdud rtsi'i snying po zhes bya ba bzhugs so//__// na mo gu ru badz+ra yo gi nI ye/__'dir shin tu bsdus pa'i tshul gyis rdo rje rnal 'byor ma bsgom par 'dod na/__sngon dngos rjes gsum las/__dang po ni/__nges 'byung dang snying rje chen po sngon du 'gro bas skyabs yul gsal btab ste/__bdag sogs 'gro kun byang chub bar/__/skyabs gnas rnams la skyabs su mchi/__/gzhan don sangs rgyas thob bya'i phyir/__/zab mo'i rnal 'byor bsgom par bgyi/__/zhes skyabs sems lan gsum dang /__sems can thams cad bde ba sogs kyis tshad med bzhi bsgom/__skyabs yul rnams rang la thim par bsam/__spro na rdor sems sgom bzlas ni/__rang gi spyi bor pad zla'i steng /__hU~M las rdo rje hU~M gis mtshan/__/'od zer spro bsdus yongs gyur las/__/rdo rje sems dpa' zla ba'i mdog__/rdo rje dril 'dzin snyem ma dkar/__/gri gug thod pa bsnams pas 'khyud/__/dar dang rus pa'i rgyan gyis spras/__/gnas gsum 'bru gsum 'od zer gyis/__/ye shes spyan drangs gnyis med thim/__/bdag dang mkha' mnyam sems can gyi/__/sdig sgrib dag par mdzad du gsol/__/zhes pas gsol btab sbyor mtshams dang /__/sku las bdud rtsi'i rgyun babs pas/__tshangs bug nas zhugs lus kun gang /__/nad gdon sdig sgrib kun sbyangs gyur/__/yi ge brgya pa dang /__oM badz+ra sa twa hU~M/__zhes ci nus bzlas/__rdor sems 'od zhu rang la thim/__bla ma'i rnal 'byor ni/__rang nyid skad cig dran rdzogs su/__/rnal 'byor ma dpal gsal ba yi/__/mdun gyi nam mkha' seng khri dang /__/pad+ma nyi zla'i gdan gyi steng /__/hU~M las bla ma rdo rje 'chang /__/mthing gsal dar dang rus pas brgyan/__/zhi 'dzum yid 'ong mtshan dpes mdzes/__/rdo rje dril 'dzin yum dang 'khril/__/spyi mgrin snying gar oM AHhU~M/__/de las 'od 'phros mchod 'os kun/__/spyan drangs gnyis su med par gyur/__/skyabs gnas kun 'dus bla ma la/__/gus pas phyag 'tshal mchod pa 'bul/__/sdig sgrib nyes ltung mthol zhing bshags/__/dus gsum dge la rjes yi rangs/__/chos 'khor bskor bzhin bzhugs gsol 'debs/__/dge tshogs byang chub snying por bsngo/__/'gro kun sangs rgyas myur thob shog__/maN+Dal rgyas bsdus gang shes 'bul/__/rdo rje slob dpon dgongs su gsol/__/bdag gis deng nas byang chub bar/__/thun mong mchog gi sdom pa rnams/__/bsam sbyor brtan pos bzung zhing bsrung /__/zhes lan gsum gyis sdom pa bzung /__/spro na brgyud 'debs rgyas pa'am/__rdo rje 'chang chen rdo rje rnal 'byor ma/__/tai lo nA ro mar pa mi la dang /__/'ja' lus mngon gyur rje btsun ras chung sogs/__/rtsa brgyud dpal ldan bla ma'i tshogs rnams la/__/mi phyed snying nas gus pas gsol ba 'debs/__/smin byed dbang thob dam tshig rnam par dag__/nges 'byung snying rje rim gnyis rnal 'byor gyis/__/zung 'jug go 'phang thob par byin gyis rlobs/__/zhes dang /__khyad par/__ma nam mkha' dang mnyam pa'i sems can thams cad bla ma sangs rgyas rin po che la gsol ba 'debs so/__/chos rje sangs rgyas bka' drin can la=__bla ma ngo bo nyid kyi sku la=__bla ma kun khyab chos kyi sku la=__bla ma longs spyod rdzogs pa'i sku la=__bla ma thugs rje sprul pa'i sku la gsol ba 'debs/__zhes gsol ba phur tshugs su btab mthar/__dpal ldan bla ma rin po ches/__/sku gsung thugs las byung ba yis/__/dbang bzhi bskur bar mdzad du gsol/__/smin cing grol bar byin gyis rlobs/__/zhes gsol ba btab pas/__bla ma yab yum 'od du zhu nas rang la thim/__rang gi sgo gsum dang bla ma'i gsang gsum dbyer med du gyur/__dbang bzhi thob/__sgrib bzhi dag__/sku bzhi'i go 'phang 'grub pa'i skal pa can du byas par bsams la sems 'dzin med du bzhag__/gnyis pa dngos gzhi la gsum las/__dang po sprul sku lam byed kyi rnal 'byor ni/__oM ma hA shU n+ya tA dz+nyA na badz+ra swa b+hA ba at+mA ko\u0f85 haM/__stong nyid nam mkha'i klong dkyil na/__/chos kyi 'byung gnas kha sbyor nang /__/rdo rje srung ba'i gur khang dbus/__/pad+ma 'dab brgyad nyi ma dang /__/'jigs byed dus mtshan gdan gyi steng /__/rang nyid skad cig dran rdzogs su/_/rje btsun rdo rje rnal 'byor ma/__/dmar mo zhal gcig phyag gnyis ma/__/gzugs dang lang tsho dar la babs/__/b+ha ga nu rgyas sked pa phra/__/phyag g.yas gri gug thur du bzung /__/bgegs dang log 'dren rnams la bsdig__/g.yon pa thod khrag gtod 'dzin pa'i/__/gru mor bcom ldan he ru ka__/mtshon pa'i kha T+wAM 'chang ba la/__/mdzes la yangs pa'i spyan gsum po/__/dgyes pa'i rnam 'gyur zur gyis gzigs/__/khro la 'dzum sgeg ldan pa'i zhal/__/mche ba cung zad gtsigs pa'i tshul/__/dbu skra sil bu'i stod cha rnams/__/gyen du brjes pa'i thor tshugs rtser/__/'khor lo me tog phreng bas mtshan/__/lhag ma thur du grol ba yis/__/sku sked non zhing 'khyil pas mdzes/__/thod skam lnga yi dbu rgyan dang /__/khrag 'dzag lnga bcu'i do shal can/__/snang la rang bzhin med pa'i sku/__/gcer bu rus pa'i rgyan gyis mdzes/__/zhabs gnyis g.yas brkyang g.yon bskum pa'i/__/rol stabs 'gying bag tshul gyis ni/__/ye shes me dpung dbus na bzhugs/__zhes dam ye dbyer med du gsal btab cing sems bzung ngo /__/gnyis pa longs sku lam byed kyi rnal 'byor la/__/thun mong bzlas pa bya ba ni/__/thugs kar nyi steng ba~M yig mthar/__/sngags phreng dmar po g.yon du 'khor/__'od 'phros 'phags mchod snod bcud sbyangs/__/tshur 'dus rang la gnyis med thim/__/oM sarba bud+d+ha DA ki nI ye badz+ra bar+N+NA nI ye hU~M hU~M phaT/__zhes snying po dang /__oM badz+ra bai ro tsa nI ye hU~M hU~M phaT/__zhes nye snying ci nus bzlas/__bsnyen pa byed na thun bzhi'i rim pas nye snying sum 'bum bzhi khri dang /__snying po bzhi khri bzla'o/__/khyad par thun mthar sngags phreng sogs mi dmigs pa'i ngang /__lus gnad dang rlung ro bsal la/__rang lus stong song nge song ba'i dbus su rtsa gsum gyi mdor nyi gdan la rtsa ba'i bla ma grub thob kyi cha lugs me'i rang bzhin can du gsal btab la/__'jam rlung sbyor ba bzhi ldan gyis bskul bas/__sku las 'bar ba'i mes rtsa gsum dang lus kyi nang nas bzung /_mthar snod bcud mer 'bar ba la dmigs pa gtad de rlung dang gtum mo zung 'brel du brkyang /__gzhan yang thig le'i 'bar 'dzag sogs ji ltar rigs pa bsgom mo/__/gsum pa chos sku lam byed kyi rnal 'byor ni/__bcom ldan 'das mas bdag dang sems can thams cad kyi rgyud byin gyis brlab tu gsol/__zhes gsol ba btab/__rang nyid lha sku gdan dang bcas pa 'od zer 'ja' tshon gyi rnam par gyur te thugs ka'i sa bon la thim/__de yang mi dmigs pa 'od gsal stong pa nyid kyi ngang du gyur par bsams la/_dus gsum gyi spros pa bcad nas yid la mi byed pa gnas lugs phyag rgya chen po'i ngang du ma bcos par bzhag go/__/gsum pa rjes ni/__thun de las ldang bar 'dod na/__slar yang rang skad cig gis rje btsun rdo rje rnal 'byor ma'i skur gsal bas bsngo smon bya/__spyod lam la 'jug pa'i tshe/__cir snang thams cad lha sngags chos sku'i ye shes sgyu ma lta bur lam du khyer la/__bza' btung gos rgyan sogs 'dod yon rnams la lhas mchod pa'i tshul gyis longs spyad/__gtor ma 'bul na/__nang mchod ltar byin gyis brlabs la/__rang gi thugs nas 'od 'phros pas/__/rje btsun rdo rje rnal 'byor ma/__/mchod 'os rgya mtsho'i 'khor dang bcas/__/mdun gyi nam mkhar sa mA dzaH__pad+ma ka ma la ye s+t+wAM/__nye snying gi mthar/__sa pa ri wA ra na mas+sarba/__sogs nam mkha' mdzod kyi sngags rgyas gtor ma/__oM badz+ra yo gi nI sa pa ri wA ra ar+g+haM sogs kyis phyi mchod/__oM AHhU~M gis nang mchod rnams phul/__dpal ldan rdo rje mkha' 'gro ma/__/sogs kyis bstod/__mchod sbyin gtor ma 'di bzhes la/__/sogs kyis 'dod don gsol/__rten yod na brtan bzhugs dang /__med na/__badz+ra muHsa gshegs su gsol/__nyal ba'i tshe chos sku'i rnal 'byor ram/__snying dbus bla ma'i sku gsal snang dang bcas pa la sems gtad de gnyid kyi 'od gsal la 3'jug__/yang na mgrin par pad+ma dmar po 'dab ma brgyad pa'i ze'u 'brur bla ma yi dam thams cad 'dus pa'i ngo bor a~M yig dmar po rang sgra sgrog pa la sems bzung nas 'dun pa dang bcas te gnyid log pas rmi lam 4zin par 'gyur ro/__/nang par skad cig gis lha'i skur ldang /__'pho ba'i rnal 5'byor ni/__spyi bor bla ma rnal 'byor ma gri thod thugs kar bsnol ba/__zhabs rdo rje'i skyil krung du bzhugs pa/__rang gi lus kyi dbus su rtsa dbu ma/__mar sna lte 'og tu kha zum pa/__yar sna rnal 'byor ma'i gsang gnas kyi dbu ma'i nang du zug cing k+Sha yig nag pos bkag pa/__bla ma'i thugs kar ba~M yig dmar po/__/rang gi snying gar rlung sems hU~M sngon po rnams gsal btab nas/__bla ma rje btsun rdo rje rnal 'byor mar/__/snying nas gdung shugs drag pos gsol ba 'debs/__/zab lam 'pho ba'i rnal 'byor la brten nas/__/'ja' lus mkha' spyod 'grub par byin gyis rlobs/__/zhes gsol ba btab nas/__rlung phyir 'gro ba'i tshe spyi bo'i k+Sha yig bsal/__nang du 'jug pa na bla ma'i thugs ka nas 'od zer 'phros/__snying ga'i hU~M la thim/__yid kyi hika brjod cing rlung phyir 'phul bas hU~M yig dbu ma'i lam brgyud de bla ma'i thugs ka'i ba~M la reg__/ka brjod cing rlung nang du rngubs pas mar babs par bsam/__mthar bla ma rnal 'byor ma 'chi med bdud rtsi'i rnam par zhu nas rang la thim/__tshangs bug k+Sha yig gis bkag par mos te rlung bum pa can bzung /__'chi ba'i tshe gzhan sngar bzhin la/__mar 'bebs pa'i dmigs pa mi byed par ba~M yig dang dbyer med du bsres nas 'jog__/gal te 'pho ba ma theb na/__bar do'i rnal 'byor ni da ltar nas spyod yul thams cad bar do'i snang char dran pas chags sdang rmongs gsum gyi rtog pa btsan thabs su spang la snang grags rig gsum lha sngags ye shes chen po'i rol pas lam du khyer ro/__/zhar byung tshes bcu'i mchod pa mdor bsdus pa'i tshul ni/__sbyor ba bdag 'jug sogs dang 'brel na sku gsung thugs kyi dkyil 'khor gsum bshams shing /__ma 'brel na sku rten nam many+dza'i khar maN+Dal chos 'byung gi dbus su me tog dmar po'i tshom bu gcig bkod/__tshogs dang mchod pa'i yo byad ji ltar 'byor pa 'du bya/__rang skad cig gis rdo rje rnal 'byor ma'i skur gyur par bsam la/__sngon gtor/__oM khaN+Da ro hi hU~M hU~M phaT/__kyis bsang /__swa b+hA bas sbyangs/__stong pa'i ngang las rin po che'i snod du gtor ma bdud rtsi'i rgya mtsho chen por gyur/__oM AHhU~M ha hoHhrIH__lan gsum gyis brlabs/__oM lo ka pA la ma hA b+hu ta sa pa ri wA ra a kaR+ShA ya dzaHsa mgron dgug__/a kA ro btags pa lan gsum gyis gtor ma bsngos/_/dkar phyogs skyong ba'i 'byung po'i tshogs/__/mchod sbyin gtor ma 'di bzhes la/_/'gal rkyen spongs la mthun rkyen sgrubs/__/nag phyogs bgegs rigs phyir dengs shig__/sum b+ha'i sngags kyis bgegs bskrad/__nang mchod bsang sbyang /__stong pa'i ngang las rlung me dang /__/thod pa'i sgyed pu gsum gyi steng /__/phyi snod bde chen ka pA lar/__/nang bcud sha lnga bdud rtsi lnga/__/rdo rje gsum mtshon kha T+wA~M bcas/__/bskol zhing 'od du zhu ba las/__/dam tshig ye shes dbyer med pa'i/__/bdud rtsi'i rgya mtsho chen por gyur/__oM AHhU~M ha ho hrIH__lan gsum gyis brlabs/___gnas dang yo byad rnams bsang sbyang /__stong pa'i ngang las gnas yul kun/__/'og ma'i mkha' spyod rdo rje'i zhing /__/de dbus lha rdzas las grub pa'i/__/mchod sprin nam mkha' mnyam par gyur/__/oM badz+ra ar+g+haM AHhU~M/__puSh+pe/__nas/__shap+da'i bar dang /__d+harmA ra Ni tas byin brlabs/__skyabs sems nas bla ma'i rnal 'byor bar sngar bzhin dang /__dngos gzhi la/__bdag bskyed gong du bshad pa bzhin gyi rjes/__bdag 'jug sogs kyi tshe rnam bum du rnal 'byor ma dang /__las bum du khaN+Da ro hi bskyed bzlas bya ba ni/__khaN+Da ro his bsang /__swA b+hA was sbyang /__stong pa'i ngang las pad zla'i steng /__/b+h+rU~M las rin chen bum pa zung /__/mtshan nyid thams cad rab rdzogs shing /__/chu dang bcud kyis yongs gang ba'i/__/rnam par rgyal ba'i bum pa'i dbus/__/pad+ma 'dab brgyad nyi ma dang /__/'jigs byed dus mtshan gdan gyi steng /__/ba~M las skad cig dran rdzogs su/__/rje btsun rdo rje rnal 'byor ma/__/sogs nas/__ye shes me dpung dbus na bzhugs/__/las bum dbus su pad nyi'i steng /__/khaN+Da ro hi sku mdog dmar/__/gri thod 'dzin cing kha T+wAM 'khyud/__/rus pa'i rgyan ldan gar stabs kyis/__/rtog med ro yi snying gar brdzis/__/bum lha zung gi gnas rnams su/__/lte bar oM ba~M phag mo dmar/__/sogs nas/__oM dkar AHdmar hU~M mthing mtshan/__bar dang /__bdag dang bum lha'i thugs ka nas/__sogs nas sku gang sgrib dag rigs kyi bdag__/zhes pa'i bar 'og nas 'byung ba ltar la/__/rnam snang rin las bum kyi lha la 'byung dbur brgyan gyur/__/ces brjod/__oM badz+ra yo gi nI khaN+Da ro hi sa pa ri wA ra ar+g+haM sogs kyis phyi mchod dang /__oM AHhU~M gis nang mchod 'bul/__dpal ldan rdo rje mkha' 'gro ma/__/sogs kyis bstod/__gzungs thag nas bzung ste/__bdag gi zhal nas sngags kyi phreng /__/gzung thag la brten bum nang song /__/sku las bdud rtsi'i rgyun babs pas/__bum pa yongs su gang bar gyur/__/rnam rgyal bum par snying po ci nus dang /__/las bum la khaN+Da ro hi bzlas mthar mchod bstod dang /__/bum lha'i ye shes pa rang gi thugs kar thim/__dzaHhU~M ba~M hoH__oM AHhU~M gis dung chos kyi chu mchod yon du phul la/__dam tshig pa 'od du zhu ba las bum pa'i chu nus pa dang ldan par bsam mo/__/de nas mdun rten bsang sbyang /__stong nyid nam mkha'i klong dkyil na/__/chos kyi 'byung gnas kha sbyor nang /__/rdo rje srung ba'i gur khang dbus/__/pad+ma 'dab brgyad nyi ma dang /__/'jigs byed dus mtshan gdan gyi steng /__/ba~M las skad cig dran rdzogs su/__/rje btsun rdo rje rnal 'byor ma/__sogs nas/__ye shes me dpung dbus na bzhugs/__/lte bar oM ba~M phag mo dmar/__/snying gar ha~M ya~M gshin rje ma/__/sngon mo mgrin par hrIM maM las/__/rmongs byed dkar mo dpral ba ru/__/hrIM hrIM bskyed byed ma ser mo/__/spyi gtsug hU~M hU~M skrag byed ljang /__/yan lag kun la pha?T pha?T las/__/dud kha'i mdog can tsaN+Dika__/kun kyang zhal gcig phyag gnyis ma/__/gar stabs gri thod kha T+wAM 'dzin/__/pad nyi ba~M ro'i gdan la rol/__/gnas gsum rdo rje gsum gyi dngos/__/oM dkar AHdmar hU~M mthing mtshan/__/de las 'od 'phros snod bcud kun/__/'khor lo sdom pa'i dkyil 'khor gyur/__/slar yang bdag mdun thugs ka nas/__/'phros pa'i 'od kyis ye shes pa/__/spyan drangs gnyis su med par thim/__oM gu ru shrI badz+ra yo gi nI sa pa ri wA ra badz+ra sa mA dzaHsa spyan drangs/__dzaHhU~M ba~M hoHsa bstim/__slar yang dbang lha spyan drangs nas/__/ye shes bdud rtsis dbang bskur bas/__/sku gang sgrib dag rigs kyi bdag__/rnam par snang mdzad dbur brgyan gyur/__/mdun bskyed thugs kar nyi steng ba~M/__/mthar skor sngags phreng g.yon du 'khor/__/'od 'phros 'phags mchod 'gro sgrib sbyangs/__/tshul 'dus dngos grub rnam gnyis thob/__/bzlas pa ci nus rjes su/__rab 'byams rgya mtsho dpag med na/__/mchod rdzas ji snyed yod pa dang /__/bdag gi gus pas bshams pa 'di/__/bla ma rdo rje rnal 'byor ma/__/'khor dang bcas la bdag 'bul na/__/thugs rje'i mnga' ba khyed rnams kyis/__/ci bde bar ni bzhes nas kyang /__/sems can don kun mdzad du gsol/__oM gu ru shrI badz+ra yo gi nI sa pa ri wA ra ar+g+haM pra ti ts+tsha pU dza me g+ha sa mu dra s+pha ra Na sa ma ye AHhU~M/__de bzhin du/__puSh+pe/__sogs sbyar bas nyer spyod/__oM AHrU pa badz+rI hU~M/__nas/__spaR+she'i bar sbyar bas 'dod yon/__oM AHhU~M gis nang mchod rnams 'bul/__dpal ldan rdo rje mkha' 'gro ma/__/mkha' 'gro ma yi 'khor los sgyur/__/ye shes lnga ldan sku gsum brnyes/__/'gro ba skyob la phyag 'tshal bstod/__/ji snyed rdo rje mkha' 'gro ma/__/kun tu rtog pa'i 'ching gcod cing /__/'jig rten bya ba rab 'jug ma/__/de snyed rnams la phyag 'tshal bstod/__/ces bstod/__bcom ldan 'das mas bdag dang sems can thams cad la mchog dang thun mong gi dngos grub ma lus pa stsal du gsol/__ces gsol ba gdab/__bdag 'jug sogs blangs na 'dir bya/__/rjes su gtor ma nang mchod ltar brlabs la 'bul/__tshogs rdzas nang mchod ltar byin gyis brlabs nas/__phyogs bcu'i zhing khams rab 'byams nas/__/rtsa brgyud bla ma yi dam lha/__/dpa' bo dang ni rnal 'byor ma/__/chos skyong srung ma rgya mtshor bcas/__/tshogs kyi mchod par spyan 'dren na/__/'od gsal chos sku'i ngang nyid las/__/zung 'jug gzugs sku'i rnam 'phrul gyis/__/thugs rje'i dbang gis gshegs su gsol/__/oM gu ru maN+Dal de ba DA ka DA ki nI d+harma pA la sa pa ri wA ra badz+ra sa mA dzaHsa tshogs zhing mgron spyan drangs/__dzaHhU~M ba~M hoHsa bstim/__pad+ma ka ma la ye s+t+waM/__gyis gdan 'bul/__spro na/__bla ma yi dam lha tshogs la/__/gus pas phyag 'tshal sogs yan lag bdun pa bya/__rdo rje'i glu blangs/__gong ltar yang tshogs phud cha gnyis su bsdus te/__phud dang po dkyil 'khor gyi mdun nam gtor ma la bran/__sman phud 'thor ba dang bcas/__oM AHhU~M/__dman pa'i yul las rab 'das shing /__/rgyal ba kun gyi dam tshig mchog__/dngos grub kun gyi gzhir gyur pa/__/bdud rtsi mchog gis mchod par bgyi/__/zhes dang /__oM gu ru maN+Dal de ba DA ka DA ki nI d+harma pA la sa pa ri wA ra ga Na tsakra pU dza kha kha khA hi khA hi/__lan gsum mam bdun gyis phul/__de nas rang gi phung khams skye mched lhar gsal ba mchod pa'i mos pas dam tshig gi rdzas zhen pa med par longs spyad pa'i mthar phud cha gnyis pa dang /__lhag ma bsdus te bya khyung gi phyag rgya dang bcas ma dA nas kha phru btab la/__oM AHhU~M ha ho hrIHsa brlabs/__oM uSh+tsi Ta ba ling+ta b+hak+Sha si swA hAs bsngos/__lhag la dbang ba'i 'byung po'i tshogs/__/ye shes dam tshig 'jig rten gyi/__/dpa' bo mkha' 'gro ma lus kun/__/mchod sbyin gtor ma 'di bzhes la/__/sogs kyi phrin las bcol/__mdun bskyed la sngags tsam gyis mchod cing bstod/__yi ge brgya pa'i mthar/__ma 'byor pa dang /__sogs kyis nongs pa bzod par gsol/__rten yod na brtan bzhugs dang /__med na/__mdun bskyed kyi rnal 'byor ma dzaHhU~M ba~M hoH__rang la gnyis su med par thim/__rang nyid lha sku gdan dang bcas/__sogs 'od gsal du bsdus nas thun mtshams kyi lha skur ldang /__dge ba 'di yis myur du bdag__/rnal 'byor ma dpal 'grub gyur nas/__/sogs dang /__'chi tshe mgon dang dpa' bo ma tshogs kyis/__/me tog gdugs dang rgya mtshan thogs nas su/__/rol mo glu dbyangs sil snyan sogs mchod pas/__/mkha' la spyod pa'i gnas su 'khrid par shog__/lha mo tshad ma dam tshig tshad ma dang /__/des gsung tshig kyang mchog tu tshad ma ste/__/bden pa des kyang lha mo de rnams kyis/__/bdag la rjes su 'dzin pa'i rgyur gyur cig__/ces sogs bsngo smon bya/__/rdo rje 'chang chen te lo nA ro dang /__/mar pa lo tswa mi la yab sras sogs/__/bka' brgyud bla ma dam pa'i tshogs rnams kyi/__/byin rlabs snying la 'jug pa'i bkra shis shog__/shin tu zhi ba chos sku'i ngang nyid las/__/bde chen longs spyod rdzogs pa'i rnam rol can/__/dpal ldan bde mchog 'khor lo yab yum gyis/__/mngon sum rjes su 'dzin pa'i bkra shis shog__/gnas yul dur khrod kun na legs bzhugs pa'i/__/dpa' bo mkha' 'gros bu bzhin bskyang ba dang /__/chos skyong srung mas bar chad kun bsal nas/__/don gnyis lhun gyis grub pa'i bkra shis shog__/ces sogs bkra shis pa'i tshigs su bcad pa brjod cing me tog gi char sil ma dgram par bya'o/__/zhes pa'ang bya bral ba many+dzu g+ho Shas lam 'di la mkhas shing dngos grub brnyes pa'i dam pa snga ma rnams kyi gsung gi rjes su 'brangs te mdor bsdus snying por dril ba'i tshul gyis sbyar ba'i dge bas 'gro kun mkha' spyod rdo rje btsun mos mngon sum du rjes su bzung ba'i rgyur gyur cig__/_!_ 'di'i bdag 'jug sogs kyi skabs dkyil 'khor gyi bshams tshul ni/__stegs bu'i dbus su rdul tshon nam ras bris gang rung gis sku tshom bu'i dkyil 'khor rdo ra me ris bskor ba'i chos 'byung gi nang du/__pad+ma 'dab ma bzhi pa'i mtha' dur khrod kyis bskor ba'i pad+ma'i lte bar tshom bu dmar po'am/__ba~M yig dmar po 'god/__de'i dbus su bar bdud rtsi'i dkyil 'khor many+dzi'i khar thod pa mtshan ldan du nang mchod bdud rtsi ril bu dang sbyar ba blugs/__de'i khang steng sin d+hu ra'i dkyil 'khor maN+Da lar bdud rtsis cung zad brlan pas sin+d+hu ra khod snyom por dgram la pad+ma 'dab brgyad kyi dbus su ba~M yig gis mtshan pa bri/__mdun bskyed sgrub mchod kyi skabs/__thog mar thod pa'i nang du rje btsun rdo rje rnal 'byor ma lhan cig skyes ma skad cig gis gsal la mchod bstod phul/__bzlas pa cung zad bya/__dzaHhU~M ba~M ho/__ye shes pa rang la thim/__dam tshig pa'i thugs ka'i hU~M las 'od zer 'phros pas bdud rtsir zhu bar bsams la/__oM AHhU~M zhes brjod/__de nas 'og tshom bu'i dkyil 'khor gyi sprul sku dang /__bar bdud rtsi'i dkyil 'khor gyis longs sku mtshon pa'i don dran pas/__steng chos sku mtshon pa'i sin+d+hu ra'i dkyil 'khor bsang sbyang _sogs mdun bskyed dkyus bzhin bya/__bdag 'jug rgyas par ma nus na mdun bskyed kyi gnas gsum du oM AHhU~M bkod nas ting nge 'dzin gyi dbang bla ma'i rnal 'byor gyi skabs ltar len pa'ang phyag len du mdzad/__rjes chog dkyil 'khor bsdu rim tshe/__'og sprul sku'i dkyil 'khor 'od du zhu nas bar longs sku'i dkyil 'khor dang /__de chos sku'i dkyil 'khor la thim/__de nyid rten dang brten par bcas pa rang la thim par bsams la/__dbus kyi ba~M nas mtheb srin gyis blangs la dpral bar thig le bya'o//__//mang+ga laM//