JKW-KABUM-14-PHA-008

🚧 This website is under continued development. We appreciate your patience!

Previous Section Back to Volume PageNext Section

Wylie title	zhi khro dgongs pa rang grol gyi phyag bshags skong chog mdor bsdus 'khor 'das rang grol
Location	mkhyen brtse'i bka' 'bum Volume 14, sde tshan 8, Pages 125-132 (Folios 1a to 4b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	ཀརྨ་གླིང་པ་ (karma gling pa)
Citation	'jam dbyangs mkhyen brtse'i dbang po. zhi khro dgongs pa rang grol gyi phyag bshags skong chog mdor bsdus 'khor 'das rang grol. In 'jam dbyangs mkhyen brtse'i dbang po'i bka' 'bum, Vol. 14: 125-132. Khams sde dge rdzong sar dgon: Rdzong sar blo gros phun tshogs, 2020.
Genre	Confessions - bshags pa  ·  Mending Rituals - bskang chog
Cycle	ཟབ་ཆོས་ཞི་ཁྲོ་དགོངས་པ་རང་གྲོལ་ (zab chos zhi khro dgongs pa rang grol)
Deity	zhi khro
Colophon	ཞེས་པའང་མཉྫུ་གྷོཥས་སོ། །མངྒ་ལཾ།།
	zhes pa'ang many+dzu g+hoShas so/__/mang+ga laM//

1 Texts in this Section (sde tshan or chos tshan)

125-132	ཞི་ཁྲོ་དགོངས་པ་རང་གྲོལ་གྱི་ཕྱག་བཤགས་སྐོང་ཆོག་མདོར་བསྡུས་འཁོར་འདས་རང་གྲོལ། zhi khro dgongs pa rang grol gyi phyag bshags skong chog mdor bsdus 'khor 'das rang grol Confessions - bshags pa   ·   Mending Rituals - bskang chog	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །ཞི་ཁྲོ་དགོངས་པ་རང་གྲོལ་གྱི་ཕྱག་བཤགས་སྐོང་ཆོག་མདོར་བསྡུས་འཁོར་འདས་རང་གྲོལ་ཞེས་བྱ་བ་བཞུགས་སོ། །

ན་མོ། །ཡིད་ཆོས་རྣམ་དག་ཀུན་བཟང་ཡབ་ཡུམ་ཆེ། །ཕུང་པོ་འབྱུང་བ་གནས་དག་རིགས་ལྔ་ཡུམ། །ཚོགས་ཡུལ་རྣམ་དག་སེམས་དཔའ་ལྕམ་དྲལ་དང་། །ཉོན་མོངས་དྲུག་དག་བཅོམ་ལྡན་ཐུབ་པ་དྲུག །རྟག་མཚན་བདག་མཚན་སྐྱེ་བཞི་གནས་དག་པ། སྤྲུལ་པའི་སྒོ་བ་མཐར་བྱེད་ཡབ་ཡུམ་བརྒྱད། །ཞི་བ་དབྱིངས་ཀྱི་དཀྱིལ་འཁོར་ལྷ་ཚོགས་ལ། །མི་ཕྱེད་གུས་པ་ཆེན་པོས་ཕྱག་འཚལ་ལོ། །མ་རིག་ཉོན་མོངས་གནས་གྱུར་ཆེ་མཆོག་གཙོ། །དུག་ལྔའི་རྟོག་པ་རང་གྲོལ་ཁྲག་འཐུང་ཡབ། །འབྱུང་བའི་མཚན་མ་གནས་གྱུར་དབྱིངས་ཕྱུག་ཡུམ། །ཚོགས་བརྒྱད་ཡུལ་བརྒྱད་གནས་ཡུལ་མ་མོ་དང་། །སྐྱེ་གནས་བཞི་དག་ནང་གི་སྒོ་མ་བཞི། །རྟོག་ཚོགས་གནས་གྱུར་ཕྱི་ཡི་དབང་ཕྱུག་མ། །རིག་རྩལ་རོལ་པ་ཁྲོ་བོའི་དཀྱིལ་འཁོར་ལ། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །ཨོཾ་ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི། །ཟླ་རྒྱས་བཞིན་ཏུ་སྤྲོས་པ་མི་མངའ་ཡང་། །ཐུགས་རྗེ་ཉི་གསལ་འོད་བཞིན་སྙོམས་མཛད་དེ། །འདིར་གཤེགས་བདག་ལ་དགོངས་ཤིང་བཞུགས་སུ་གསོལ། །བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེ་སྤྲུལ་པའི་སྐུ། །ཞི་ཁྲོ་སྐུ་གསུམ་ལྷ་ལ་ཕྱག་འཚལ་ལོ། །དངོས་སུ་འབྱོར་དང་ཡིད་ཀྱི་རྣམ་སྤྲུལ་ཏེ། །ཀུན་ཏུ་བཟང་པོ་བླ་མེད་མཆོད་སྤྲིན་གྱིས། །མཁའ་དབྱིངས་རྣམ་དག་རྒྱ་ཆེར་ཡོངས་བཀོད་དེ། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །རྩ་གསུམ་ཞི་ཁྲོ་རབ་འབྱམས་དགོངས་སུ་གསོལ། །ཐུགས་རྗེའི་གདུང་འཚོབ་རྣལ་འབྱོར་བདག་ཅག་གིས། །སྤྱི་དང་ཁྱད་པར་ལྷག་པའི་དམ་ཚིག་ལ། །ཉམས་ཆག་འགལ་འཁྲུལ་གྱུར་པ་མཐོལ་ཞིང་བཤགས། །སྣོད་བཅུད་ཕུང་པོ་ཁམས་དང་སྐྱེ་མཆེད་རྣམས། །གདོད་ནས་ཡེ་ཤེས་ཀློང་དུ་རོ་གཅིག་ཀྱང་། །དེ་ལྟར་མ་རྟོགས་གཉིས་འཛིན་འཁྲུལ་པ་ཀུན། །ཞི་བ་དབྱིངས་ཀྱི་ལྷ་ལ་བཟོད་པར་གསོལ། །མ་རིག་ཉོན་མོངས་རྟོག་ཚོགས་ཇི་སྙེད་རྣམས། །རང་གསལ་རིག་པའི་ཀློང་ལས་གཞལ་མེད་ཀྱང་། །གཉིས་སྣང་དག་གི་ལོག་པར་དཔྱད་པ་རྣམས། །འབར་བ་ཁྲོ་བོའི་ཚོགས་ལ་མཐོལ་ལོ་བཤགས། །བདག་དང་བདག་གིར་འཛིན་པའི་གཞན་དབང་གིས། །ཐོག་མེད་དུས་ནས་འཁོར་བའི་རྒྱ་མཚོར་བྱིངས། །ཉོན་མོངས་ལས་ཀྱིས་སྡིག་ལྟུང་གང་བསགས་པ། །གནོད་འགྱོད་སྨྲེ་སྔགས་དྲག་པོས་བཤགས་པར་བགྱི། །གདོད་ནས་རིག་སྟོང་ལྷུན་རྫོགས་ཀུན་ཏུ་བཟང་། །གཉིས་སྣང་སྤྲོས་པའི་མཚན་མ་ལས་འདས་ཀྱང་། །མ་རིག་འཁྲུལ་པས་ལོག་པར་བལྟས་པ་ཀུན། །གཉིས་མེད་ཆོས་ཉིད་མཉམ་པའི་ཀློང་དུ་བཤགས། །མདོར་ན་རྩ་བ་སྐུ་གསུང་ཐུགས་མཆོག་དང་། །ཡན་ལག་དམ་ཚིག་ཉམས་ཆག་ཅི་མཆིས་པ། །སྙིང་ནས་འགྱོད་པས་བཤགས་ཤིང་བསྡམ་བགྱིད་ན། །ཚངས་པར་མཛད་ནས་དངོས་གྲུབ་སྩལ་དུ་གསོལ། །ཡི་གེ་བརྒྱ་པ་བརྗོད། ཧཱུྃ། །རབ་འབྱམས་ཞིང་གི་ལྷ་རྫས་ཉེར་སྤྱོད་ཚོགས། །རྒྱུ་རྐྱེན་རྣམ་དག་བླ་མེད་མཆོད་སྤྲིན་འདིས། །ཞི་ཁྲོ་རབ་འབྱམས་རྒྱལ་བའི་ཐུགས་དམ་བསྐང་། །སྐོངས་གྱུར་དབང་དང་དངོས་གྲུབ་སྩལ་དུ་གསོལ། ཧཱུྃ། །སྣོད་བཅུད་ཀུན་གཞི་ཆོས་ཉིད་བྷནྡྷ་རུ། །རང་རྩལ་ཡེ་ཤེས་རོལ་པའི་བདུད་རྩིར་བསྐྱིལ། །སྐུ་གསུམ་ཞི་ཁྲོ་རབ་འབྱམས་ཐུགས་དམ་བསྐང་། །སྐོངས་གྱུར་དབང་དང་དངོས་གྲུབ་སྩལ་དུ་གསོལ། ཧཱུྃ། །རྩ་གསུམ་འཁོར་ལོ་ལྔ་ལྡན་བྷནྡྷ་རུ། །བདེ་ཆེན་ཡེ་ཤེས་དྭང་མའི་རཀྟས་གཏམས། །རབ་འབྱམས་ཞི་ཁྲོའི་ལྷ་ཚོགས་ཐུགས་དམ་བསྐང་། །སྐོངས་གྱུར་དབང་དང་དངོས་གྲུབ་སྩལ་དུ་གསོལ། ཧཱུྃ། །རང་བྱུང་རྡོ་རྗེ་ལུས་ཀྱི་བྷནྡྷ་རུ། །ཤ་ཁྲག་དྲོད་དབུག་བཀྲག་མདངས་གཏོར་མ་བཤམ། །སྒྱུ་འཕྲུལ་རོལ་པ་རྒྱལ་བའི་ཐུགས་དམ་བསྐང་། །སྐོངས་གྱུར་དབང་དང་དངོས་གྲུབ་སྩལ་དུ་གསོལ། ཧཱུྃ། །རྩ་རླུང་ཐིག་ལེ་སེམས་ཀྱི་ཀོང་བུ་རུ། །ཡེ་ཤེས་སྒྲིབ་མེད་འོད་གསལ་སྒྲོན་མེ་སྤར། །དཀྱིལ་འཁོར་ལྷ་ཚོགས་རབ་འབྱམས་ཐུགས་དམ་བསྐང་། །སྐོངས་གྱུར་དབང་དང་དངོས་གྲུབ་སྩལ་དུ་གསོལ། །ཉམས་ཆག་སྐོངས་ཤིང་རྟོག་སྒྲིབ་དབྱིངས་སུ་བྱང་། །ལས་ངན་སྡིག་སྒྲིབ་མ་སྤངས་རང་སར་དག །ཁམས་གསུམ་འཁོར་བ་ཆོས་ཉིད་ཀློང་དུ་སྟོང་། །སྐུ་གསུམ་འབྲས་བུ་ཚེ་འདིར་ཐོབ་པར་ཤོག །ཨོཾ་ཨཱཿཧཱུྃ། །དུར་ཁྲོད་གསང་བ་མཆོག་གི་དཀྱིལ་འཁོར་དུ། །རྡོ་རྗེ་སློབ་དཔོན་གཉེན་གྱིས་དབུ་བཟུང་ནས། །ཚོམ་བུ་གཅིག་ཏུ་འདུས་པའི་མཆེད་དང་ལྕམ། །མི་འབྲལ་འཐོགས་པའི་ཏིང་འཛིན་རྩེ་གཅིག་གིས། །ནམ་ཞིག་བྱང་ཆུབ་ལྷུམས་སུ་ཞུགས་པའི་ཚེ། །ཡེ་ཤེས་སྒྲོན་མེའི་སྣང་བ་རབ་འབར་བས། །གཉིས་འཛིན་འཁྲུལ་པའི་མུན་པ་དབྱིངས་སུ་སངས། །ས་ལམ་ཡོངས་རྫོགས་འགྲོ་དོན་མཐར་ཕྱིན་ཤོག ཧཱུྃ། །ཡིད་ཆོས་ཕུང་པོ་འབྱུང་བ་གནས་དག་པ། །ཀུན་བཟང་རིགས་ལྔ་ཡབ་ཡུམ་ཐུགས་དམ་བསྐང་། །ཚོགས་བརྒྱད་ཡུལ་བརྒྱད་གཟུང་འཛིན་གནས་དག་པ། །བྱང་ཆུབ་ལྕམ་དྲལ་ཚོགས་ཀྱི༴ །ལུས་ཀྱི་ཆོས་བཞི་ལྟ་བ་གནས་དག་པ། མཐར་བྱེད་ཁྲོ་བོ་ཡབ་ཡུམ༴ །ཉོན་མོངས་རྟོག་ཚོགས་མ་སྤངས་རང་སར་དག །འགྲོ་འདུལ་ཐུབ་པ་དྲུག་གི༴ །ཞི་བ་དབྱིངས་ཀྱི་དཀྱིལ་འཁོར་ལྷ་ཚོགས་རྣམས། །བསྐང་ངོ་མཆོད་དོ་ཉམས་ཆག་རྟོག་སྒྲིབ་དག །ཁམས་གསུམ་འགྲོ་ཀུན་སྐུ་གསུམ་དབྱིངས་སུ་སྒྲོལ། །དབང་དང་བྱིན་རླབས་མཆོག་ཐུན་དངོས་གྲུབ་སྩལ། ཧཱུྃ། །ཡིད་ཆོས་གཟུང་འཛིན་ཉོན་མོངས་གནས་གྱུར་པའི། །དཔལ་ཆེན་ཆེ་མཆོག་ཡབ་ཡུམ་ཐུགས་དམ་བསྐང་། །ཕུང་པོ་དུག་ལྔའི་རྟོག་པ་གནས་གྱུར་པའི། །ཁྲག་འཐུང་གཙོ་བོ་དགུ་ཡི་ཐུགས་དམ་བསྐང་། །འབྱུང་ཆེན་སྐྱེ་གནས་རྣམ་བཞི་གནས་གྱུར་པའི། །ཁྲོ་མོ་དབྱིངས་ཕྱུག་དགུ་ཡི༴ །ཚོགས་བརྒྱད་ཡུལ་བརྒྱད་རྟོག་པ་གནས་གྱུར་པའི། །མ་མོ་ཕྲ་མེན་ཚོགས་ཀྱི༴ །སྟོང་ཁམས་རིགས་དྲུག་གནས་ནས་སྤོར་བའི་ཕྱིར། །སྤོར་བྱེད་ཆེན་མོ་བརྒྱད་ཀྱི༴ །ཞི་རྒྱས་དབང་དྲག་ལས་རྣམས་མཛད་པའི་ཕྱིར། །དབང་ཕྱུག་ཆེན་མོ་ཉེར་བརྒྱད༴ །སྲིད་པ་ཕུར་བུའི་ཡེ་ཤེས་གྲུབ་པའི་ཕྱིར། །རྡོ་རྗེ་གཞོན་ནུ་ཡབ་ཡུམ་སྲས་མཆོག་དང་། །ཁྲོ་བཅུ་ཕྲ་མེན་བཀའ་ཉན་ཕོ་ཉར་བཅས། །དམ་ཅན་རྒྱ་མཚོ་ཡོངས་ཀྱི་ཐུགས་དམ་བསྐང་། །རིག་རྩལ་རོལ་པ་ཁྲོ་བོའི་ལྷ་ཚོགས་རྣམས། །བསྐང་ངོ་མཆོད་དོ་ཉམས་ཆག་རྟོག་སྒྲིབ་དག །ཁམས་གསུམ་འགྲོ་ཀུན་སྐུ་གསུམ་དབྱིངས་སུ་སྒྲོལ། དབང་དང་བྱིན་བརླབ་མཆོག་ཐུན་དངོས་གྲུབ་སྩོལ། ཧཱུྃ། །དངོས་པོ་ཆོས་ཉིད་སྣང་བ་ཡེ་ཤེས་དབྱིངས། །གསལ་བ་ཤེས་རབ་སྡུག་བསྔལ་ཀ་དག་ཀློང་། །ལྷག་པའི་བདེན་གཉིས་དབྱེར་མེད་ཆེན་པོའི་ངང་། །ཞི་ཁྲོ་རབ་འབྱམས་རྒྱལ་བའི་ཐུགས་དམ་བསྐང་། །ཡེ་སྦྱོར་ཡེ་སྒྲོལ་དོན་གྱི་དགྱེས་མཆོད་བཞེས། །དམ་ཚིག་ཉམས་ཆག་འགལ་འཁྲུལ་ཉེས་ལྟུང་ཀུན། །ཀུན་བཟང་ཡངས་པ་ཆེན་པོའི་ཀློང་དུ་བསྐང་། །བདེ་ཆེན་ཆོས་ཉིད་དབྱིངས་སུ་དག་གྱུར་ཅིག །ས་མ་ཡ་ཨ་ཨ་ཨཿ ཞེས་པའང་མཉྫུ་གྷོཥས་སོ། །མངྒ་ལཾ།། །།

[edit]

zhi khro dgongs pa rang grol gyi phyag bshags skong chog mdor bsdus 'khor 'das rang grol/ @#/_/zhi khro dgongs pa rang grol gyi phyag bshags skong chog mdor bsdus 'khor 'das rang grol zhes bya ba bzhugs so/_/ na mo/__/yid chos rnam dag kun bzang yab yum che/__/phung po 'byung ba gnas dag rigs lnga yum/__/tshogs yul rnam dag sems dpa' lcam dral dang /__/nyon mongs drug dag bcom ldan thub pa drug__/rtag mtshan bdag mtshan skye bzhi gnas dag pa/__sprul pa'i sgo ba mthar byed yab yum brgyad/__/zhi ba dbyings kyi dkyil 'khor lha tshogs la/__/mi phyed gus pa chen pos phyag 'tshal lo/__/ma rig nyon mongs gnas gyur che mchog gtso/__/dug lnga'i rtog pa rang grol khrag 'thung yab/__/'byung ba'i mtshan ma gnas gyur dbyings phyug yum/__/tshogs brgyad yul brgyad gnas yul ma mo dang /__/skye gnas bzhi dag nang gi sgo ma bzhi/__/rtog tshogs gnas gyur phyi yi dbang phyug ma/__/rig rtsal rol pa khro bo'i dkyil 'khor la/__/sgo gsum gus pa chen pos phyag 'tshal lo/__/oM ye shes sku mchog rang bzhin dkyil 'khor ni/__/zla rgyas bzhin tu spros pa mi mnga' yang /__/thugs rje nyi gsal 'od bzhin snyoms mdzad de/__/'dir gshegs bdag la dgongs shing bzhugs su gsol/__/brjod med shes rab mi g.yo chos kyi sku/__/bde chen longs spyod rdzogs sku rigs lnga'i gtso/__/thugs rje thabs mkhas rgya che sprul pa'i sku/__/zhi khro sku gsum lha la phyag 'tshal lo/__/dngos su 'byor dang yid kyi rnam sprul te/__/kun tu bzang po bla med mchod sprin gyis/__/mkha' dbyings rnam dag rgya cher yongs bkod de/__/phyi nang gsang ba'i mchod pa rgya mtshos mchod/__/rtsa gsum zhi khro rab 'byams dgongs su gsol/__/thugs rje'i gdung 'tshob rnal 'byor bdag cag gis/__/spyi dang khyad par lhag pa'i dam tshig la/__/nyams chag 'gal 'khrul gyur pa mthol zhing bshags/__/snod bcud phung po khams dang skye mched rnams/__/gdod nas ye shes klong du ro gcig kyang /__/de ltar ma rtogs gnyis 'dzin 'khrul pa kun/__/zhi ba dbyings kyi lha la bzod par gsol/__/ma rig nyon mongs rtog tshogs ji snyed rnams/__/rang gsal rig pa'i klong las gzhal med kyang /__/gnyis snang dag gi log par dpyad pa rnams/__/'bar ba khro bo'i tshogs la mthol lo bshags/__/bdag dang bdag gir 'dzin pa'i gzhan dbang gis/__/thog med dus nas 'khor ba'i rgya mtshor byings/__/nyon mongs las kyis sdig ltung gang bsags pa/__/gnod 'gyod smre sngags drag pos bshags par bgyi/__/gdod nas rig stong lhun rdzogs kun tu bzang /__/gnyis snang spros pa'i mtshan ma las 'das kyang /__/ma rig 'khrul pas log par bltas pa kun/__/gnyis med chos nyid mnyam pa'i klong du bshags/__/mdor na rtsa ba sku gsung thugs mchog dang /__/yan lag dam tshig nyams chag ci mchis pa/__/snying nas 'gyod pas bshags shing bsdam bgyid na/__/tshangs par mdzad nas dngos grub stsal du gsol/__/yi ge brgya pa brjod/__hU~M/__/rab 'byams zhing gi lha rdzas nyer spyod tshogs/__/rgyu rkyen rnam dag bla med mchod sprin 'dis/__/zhi khro rab 'byams rgyal ba'i thugs dam bskang /__/skongs gyur dbang dang dngos grub stsal du gsol/__hU~M/__/snod bcud kun gzhi chos nyid b+han+d+ha ru/__/rang rtsal ye shes rol pa'i bdud rtsir bskyil/__/sku gsum zhi khro rab 'byams thugs dam bskang /__/skongs gyur dbang dang dngos grub stsal du gsol/__hU~M/__/rtsa gsum 'khor lo lnga ldan b+han+d+ha ru/__/bde chen ye shes dwang ma'i rak+tas gtams/__/rab 'byams zhi khro'i lha tshogs thugs dam bskang /__/skongs gyur dbang dang dngos grub stsal du gsol/__hU~M/__/rang byung rdo rje lus kyi b+han+d+ha ru/__/sha khrag drod dbug bkrag mdangs gtor ma bsham/__/sgyu 'phrul rol pa rgyal ba'i thugs dam bskang /__/skongs gyur dbang dang dngos grub stsal du gsol/__hU~M/__/rtsa rlung thig le sems kyi kong bu ru/__/ye shes sgrib med 'od gsal sgron me spar/__/dkyil 'khor lha tshogs rab 'byams thugs dam bskang /__/skongs gyur dbang dang dngos grub stsal du gsol/__/nyams chag skongs shing rtog sgrib dbyings su byang /__/las ngan sdig sgrib ma spangs rang sar dag__/khams gsum 'khor ba chos nyid klong du stong /__/sku gsum 'bras bu tshe 'dir thob par shog__/oM AHhU~M/__/dur khrod gsang ba mchog gi dkyil 'khor du/__/rdo rje slob dpon gnyen gyis dbu bzung nas/__/tshom bu gcig tu 'dus pa'i mched dang lcam/__/mi 'bral 'thogs pa'i ting 'dzin rtse gcig gis/__/nam zhig byang chub lhums su zhugs pa'i tshe/__/ye shes sgron me'i snang ba rab 'bar bas/__/gnyis 'dzin 'khrul pa'i mun pa dbyings su sangs/__/sa lam yongs rdzogs 'gro don mthar phyin shog__hU~M/__/yid chos phung po 'byung ba gnas dag pa/__/kun bzang rigs lnga yab yum thugs dam bskang /__/tshogs brgyad yul brgyad gzung 'dzin gnas dag pa/__/byang chub lcam dral tshogs kyi=__/lus kyi chos bzhi lta ba gnas dag pa/__mthar byed khro bo yab yum=__/nyon mongs rtog tshogs ma spangs rang sar dag__/'gro 'dul thub pa drug gi=__/zhi ba dbyings kyi dkyil 'khor lha tshogs rnams/__/bskang ngo mchod do nyams chag rtog sgrib dag__/khams gsum 'gro kun sku gsum dbyings su sgrol/__/dbang dang byin rlabs mchog thun dngos grub stsal/__hU~M/__/yid chos gzung 'dzin nyon mongs gnas gyur pa'i/__/dpal chen che mchog yab yum thugs dam bskang /__/phung po dug lnga'i rtog pa gnas gyur pa'i/__/khrag 'thung gtso bo dgu yi thugs dam bskang /__/'byung chen skye gnas rnam bzhi gnas gyur pa'i/__/khro mo dbyings phyug dgu yi=__/tshogs brgyad yul brgyad rtog pa gnas gyur pa'i/__/ma mo phra men tshogs kyi=__/stong khams rigs drug gnas nas spor ba'i phyir/__/spor byed chen mo brgyad kyi=__/zhi rgyas dbang drag las rnams mdzad pa'i phyir/__/dbang phyug chen mo nyer brgyad=__/srid pa phur bu'i ye shes grub pa'i phyir/__/rdo rje gzhon nu yab yum sras mchog dang /__/khro bcu phra men bka' nyan pho nyar bcas/__/dam can rgya mtsho yongs kyi thugs dam bskang /__/rig rtsal rol pa khro bo'i lha tshogs rnams/__/bskang ngo mchod do nyams chag rtog sgrib dag__/khams gsum 'gro kun sku gsum dbyings su sgrol/__dbang dang byin brlab mchog thun dngos grub stsol/__hU~M/__/dngos po chos nyid snang ba ye shes dbyings/__/gsal ba shes rab sdug bsngal ka dag klong /__/lhag pa'i bden gnyis dbyer med chen po'i ngang /__/zhi khro rab 'byams rgyal ba'i thugs dam bskang /__/ye sbyor ye sgrol don gyi dgyes mchod bzhes/__/dam tshig nyams chag 'gal 'khrul nyes ltung kun/__/kun bzang yangs pa chen po'i klong du bskang /__/bde chen chos nyid dbyings su dag gyur cig__/sa ma ya a a aH__zhes pa'ang many+dzu g+hoShas so/__/mang+ga laM//__//