DKR-KABUM-13-PA-015

🚧 This website is under continued development. We appreciate your patience!

Previous Text Back to Volume PageNext Text

Wylie title	ye shes DA ki mtsho rgyal gyi gsang ba la bstod pa'i rdo rje'i glu'i 'grel pa gzhom med rdo rje sgra yi gling bu
Location	dil mgo mkhyen brtse bka' 'bum Volume 13, Text 15, Pages 187-193 (Folios 1a to 7a3)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Associated People	ཡེ་ཤེས་མཚོ་རྒྱལ་ (ye shes mtsho rgyal)
Citation	Khyentse, Dilgo. Ye shes DA ki mtsho rgyal gyi gsang ba la bstod pa'i rdo rje'i glu'i 'grel pa gzhom med rdo rje sgra yi gling bu. In Skyabs rje dil mgo mkhyen brtse rin po che'i bka' 'bum, Vol. 13: 187-193. Delhi: Shechen Publications, 1994.
Genre	Commentaries - 'grel pa  ·  Vajra Songs - rdo rje'i glu  ·  Verses of Praise - bstod pa
Colophon	།ཅེས་པའང་མཆོག་གི་རྡོ་རྗེའི་ས་བརྙེས་པའི་རིག་འཛིན་གྱི་ཁྱུ་མཆོག་དུ་མས་རྗེས་སུ་བཟུང་ཞིང༌། རྡོ་རྗེ་ཐེག་པའི་རྒྱུད་སྡེ་རྒྱ་མཚོའི་སྨིན་གྲོལ་ཟབ་རྒྱས་ལ་སྤྱོད་པའི་སྐལ་པ་མི་དམན་པ། རྡོ་རྗེ་ཐེག་པའི་རྣལ་འབྱོར་ཙམ་པོ་བའི་གཟུགས་བརྙན། འོད་གསལ་རྡོ་རྗེ་ཐུགས་མཆོག་རྩལ་ཞེས་རྡོ་རྗེའི་མིང་གི་དབང་བསྐུར་ཐོབ་པའི་མངྒ་ལས། རྡོ་རྗེའི་གནས་མཆོག་ཉེ་བའི་ཚནྡྷོ་ཧ་བྱ་རུང་ཁ་ཤོར་དུ་གསང་ཆེན་རྡོ་རྗེའི་ཆོས་ཀྱི་ཏམྦུ་ར་སྒྲོགས་པའི་ཚེ་རྟེན་འབྲེལ་ལེགས་ཚོགས་དུ་མས་བསྐུལ་ཏེ་བྲིས་པ་འབྲེལ་ཚད་རྡོ་རྗེ་བདེ་བ་ཆེན་པོའི་ས་ལ་སྦྱོར་བའི་ཕོ་ཉ་རུ་གྱུར་ཅིག།
	/ces pa'ang mchog gi rdo rje'i sa brnyes pa'i rig 'dzin gyi khyu mchog du mas rjes su bzung zhing*/_rdo rje theg pa'i rgyud sde rgya mtsho'i smin grol zab rgyas la spyod pa'i skal pa mi dman pa/_rdo rje theg pa'i rnal 'byor tsam po ba'i gzugs brnyan/_'od gsal rdo rje thugs mchog rtsal zhes rdo rje'i ming gi dbang bskur thob pa'i mang+ga las/_rdo rje'i gnas mchog nye ba'i tshan+d+ho ha bya rung kha shor du gsang chen rdo rje'i chos kyi tam+bu ra sgrogs pa'i tshe rten 'brel legs tshogs du mas bskul te bris pa 'brel tshad rdo rje bde ba chen po'i sa la sbyor ba'i pho nya ru gyur cig/

Tibetan Text

Wylie

[edit]

༄༅། །ཡེ་ཤེས་ཌཱ་ཀི་མཚོ་རྒྱལ་གྱི་གསང་བ་ལ་བསྟོད་པའི་རྡོ་རྗེའི་གླུའི་འགྲེལ་པ་གཞོམ་མེད་རྡོ་རྗེ་སྒྲ་ཡི་གླིང་བུ་ཞེས་བྱ་བ་བཞུགས་སོ།།

༄༅། །ན་མོ། གུ་རུ་ཛྙཱ་ན་དྷཱ་ཀི་ནི་ཡེ། །ནམ་མཁའི་རྣལ་འབྱོར་ཆེན་པོ་གཉུག་མའི་དབྱིངས། །འཁོར་འདས་བདེ་ཆེན་འཆར་བའི་ཌཱ་ཀི་ནི། །དབྱེར་མེད་འཁོར་ལོའི་དབང་ཕྱུག་ལ་བཏུད་ནས། །ཟབ་དོན་ཇི་ལྟར་དཔོག་བཞིན་ཆ་ཙམ་བརྗོད། །དེ་ཡང་མཐོང་བའི་ཆོས་ལ་རྡོ་རྗེ་བདེ་བ་ཆེན་པོའི་ས་བརྙེས་པའི་སློབ་དཔོན་ཆེན་པོ་ཀུན་མཁྱེན་བླ་མ་མཉྫུའི་མཚན་གྱི་ལོངས་སྤྱོད་འཁོར་ལོས་རྡོ་རྗེ་གླུའི་དཀོར་མཛོད་ལས་བྱུང་བའི་ཡེ་ཤེས་མཁའ་འགྲོའི་གསང་བ་རྗེས་སུ་མཚོན་པ་བསྟོད་པའི་གླུའི་ཟབ་དོན་འཆད་པ་ལ་གསུམ། བཤད་བྱའི་གླུ་ཡི་མཚན་གྱིས་མདོར་བསྟན། བསྟོད་པ་རྡོ་རྗེའི་གླུ་དངོས་རྒྱས་པར་བཤད་པ། དེ་ཉིད་ཇི་ལྟར་མཛད་པའི་ཚུལ་གྱིས་མཇུག་བསྡུ་བའོ། །དང་པོ་ནི། བསྟོད་བྱ་ཡུལ། ༈ ཡེ་ཤེས་ཌཱ་ཀི་ནི་ལ། བསྟོད་བྱེད་ཚིག་རྡོ་རྗེའི། རྩ་སྔགས་དང་སྦྱར་བའི་སྒོ་ནས། བསྟོད་དོན་རྡོ་རྗེའི་ཐེག་པའི་ཁྱད་ཆོས་ནང་གི་ས་ལམ་གྱི་བགྲོད་པ་མཐར་ཕྱིན་ཚུལ་གྱིས་བསྟོད་པས་ཟབ་དོན་མངོན་སུམ་དུ་རྟོགས་པའི་རིག་རྩལ་ཡེ་ཤེས་རླུང་གིས་བསྐུལ་ཏེ། ཆེད་དུ་རྩོལ་སྒྲུབ་མ་དགོས་པ་ཐོལ་བྱུང་དུ། རང་བྱུང་ཐུགས་ལས་བརྡོལ་བའི་རྡོ་རྗེའི་གླུ་རྡོ་རྗེ་ཐེག་པ་ནང་ཐབས་གྲོལ་ཟབ་མོའི་སྒོ་ནས་ཕྱི་མཚན་ཉིད་ཐེག་པ་དང་སྒོ་བསྟུན་པའི་ཕ་རོལ་ཕྱིན་པ་དྲུག་ཡོངས་སུ་རྫོགས་པས་བསྐལ་པ་གྲངས་མེད་གསུམ་ལ་སོགས་པའི་རྫོགས་སྨིན་སྦྱངས་གསུམ་མཐར་ཕྱིན་ཏེ་མི་སློབ་པའི་ལམ་མངོན་དུ་གྱུར་པས་རང་གཞན་དོན་གཉིས་མཐར་སོན་པའི་དཔལ་མོ། རྡོ་རྗེའི་བླ་མ་མ་ཧཱ་གུ་རུའི་གསང་འཛིན་བཀའ་ཡི་གཟུང་མ་ཡེ་ཤེས་མཚོ་རྒྱལ་གྱི་མི་ཟད་རྒྱན་གྱི་འཁོར་ལོའི་གསང་གསུམ་མཆོག་བདེའི་ཡོངས་སུ་གང་བས་དགྱེས་ཏེ་བཞད་པའི་ཚུལ་དེ་གང་གིས་ཐོས་ཀྱང༌། ཡིད་ལ་བདེ་བ་ཆེན་པོའི་སིམ་པ་སྟེར་བ་དབྱངས་སྙན་ཞེས་བྱ་བ་བཞུགས་སོ། །གཉིས་པ་རྒྱས་པར་བཤད་པ་ལ། རྡོ་རྗེའི་གླུ་འདྲེན་པའི་རྒྱུ་བདེ་སྟོང་གི་ཏིང་ངེ་འཛིན་མདོར་བསྟན། ཟབ་དོན་ཕར་ཕྱིན་དྲུག་གི་རྟོགས་པ་རྒྱས་པར་བཤད་པས་བསྟོད་པ་གཉིས་ལས། དང་པོ། ཨ་ཞེས་ཆོས་དབྱིངས་རྡོ་རྗེ་བཙུན་མོའི་ཤེས་རབ་སྟོང་ཆ་དང༌། དེ་མངོན་དུ་བྱེད་པ་ལ་ཐབས་བདེ་བ་ཆེན་པོའི་ཧེ་རུ་ཀ་དང་མཉམ་པར་སྦྱོར་བའི་སྒྱུ་རྩལ་ལས། འབྲས་བུའི་ཆོས་ཀུན་བདེ་སྟོང་གཉིས་སུ་མི་ཕྱེད་འཕོ་མེད་རྡོ་རྗེའི་དབྱིངས་སུ་དག་པའི་ཡེ་ཤེས་ཀྱི་རོལ་པར་སྡོམ་པའི་དོན་ལ་མཉམ་པར་བཞག་པས་ཐུགས་རབ་ཏུ་ངོམ་པའམ། ཚིམ་པའི་ཚུལ་གྱི་ཧོཿཞེས་རྡོ་རྗེའི་གླུའི་སྣ་འདྲེན་པ་སྟེ། འདི་ལའང་ཞིབ་ཏུ་བཤད་ན་མཐའ་དྲུག་ཚུལ་བཞིའི་བཤད་ཚུལ་ཟབ་རྒྱས་སུ་ཡོད་ལ། དོན་དུ་རྡོ་རྗེའི་ཐོལ་གླུ་འདིའི་མདོར་བསྟན་པའོ། །གཉིས་པ་ལ། ཐོག་མར་མཚོན་བྱེད་དཔེ་ཡི་ཡེ་ཤེས་ཡས་བབས་རྒྱུ་ཡི་དགའ་བཞིའི་སྦྱིན་པའི་ཕ་རོལ་དུ་ཕྱིན་མ་ཡོན་ཏན་རིན་ཆེན་མཁའ་འགྲོ་ལ་བསྟོད་པ། མས་བརྟན་འབྲས་བུའི་དགའ་བཞིའི་ཚུལ་ཁྲིམས་ཀྱི་ཕ་རོལ་དུ་ཕྱིན་མ་གསུང་པདྨ་མཁའ་འགྲོ་ལ་བསྟོད་པ། ཟུང་འཇུག་བདེ་སྟོང་ཁ་སྦྱོར་གྱིས་བཟོད་པའི་ཕ་རོལ་དུ་ཕྱིན་པ་ཐུགས་རྡོ་རྗེ་མཁའ་འགྲོ་ལ་བསྟོད་པ། མཚོན་བྱ་དོན་གྱི་ཡེ་ཤེས་བརྩོན་འགྲུས་ཀྱི་ཕ་རོལ་དུ་ཕྱིན་པ་ཕྲིན་ལས་ལས་ཀྱི་མཁའ་འགྲོ་ལ་བསྟོད་པ། ངེས་དོན་གཉིས་སུ་མེད་པའི་དེ་ཉིད་དང་མཉམ་རྫོགས་བྲལ་བ་བསམ་གཏན་གྱི་ཕ་རོལ་དུ་ཕྱིན་པ་སྐུ་བདེ་གཤེགས་མཁའ་འགྲོ་ལ་བསྟོད་པ། མཐར་ཐུག་ཤེས་རབ་ཀྱི་ཕ་རོལ་དུ་ཕྱིན་པ་དྲུག་པའི་རིགས་བརྒྱའི་ཁྱབ་བདག་ལ་བསྟོད་པ། དབྱེར་མེད་སྐུ་བཞིའི་བདག་ཉིད་འབྲས་བུའི་ཡེ་ཤེས་མཁའ་འགྲོ་ལ་བསྟོད་པ་དང་དྲུག་གོ །དང་པོ་ནི། ཨོཾ་ཞེས་བཀྲ་ཤིས་པའི་སྔགས་དང་འབྲེལ་བའི་ཡེ་ཤེས་ལྔ་མཚོན་གྱི་ངོ་བོའམ་བདག་ཉིད་དུ་སོན་པས་གྲུབ་པའི་བདག་ཉིད་ཀྱི་ཐ་སྙད་མཚན་མའི་བློ་རྟོག་ལས་འདས་པའི་སོ་སོར་རང་རིག་པའི་ཡེ་ཤེས་ཀྱི་རང་གདངས་མདོ་རྒྱུད་ཐམས་ཅད་ཀྱི་ཟབ་དོན་མངོན་དུ་བྱ་བའི་ཉམས་འགྱུར་རམ་ཉམས་མྱོང་རྒྱུད་ལ་འདྲེན་པའི་ཐབས་ཟབ་མོ་ཡིད་དཔྱོད་ཀྱི་བློ་དང་གྲུབ་མཐའི་གཞལ་བའི་ཕྲ་རབ་རྡུལ་དང་བྲལ་བས་ན་དངོས་མཚན་ལས་འདས་པའི་རྟོགས་རྒྱུད་དོན་ལ་མངོན་སུམ་དུ་འདྲེན་པའི་བྱེད་ལས་ཆོས་དབྱིངས་རྣམ་ཐར་སྒོ་གསུམ་གྱི་ངོ་བོར་རྣམ་པ་ཡུམ་རྡོ་རྗེ་ཕག་མོ་མཚོན་བྱེད་གཏུམ་མོ་ཡེ་ཤེས་ཀྱི་མེ་ལྕེས་འཁོར་ལོ་བཞིར་འབར་བའི་རེག་བྱ། ཧཾ་ཡིག་ངོ་བོ་མཆོག་ཏུ་མི་འགྱུར་བའི་བདེ་བ་ཆེན་པོའི་རྟེན་རྣམ་པ་ཡབ་ཧེ་རུ་ཀ་མཚོན་བྱེད་བདེ་ཆེན་འཁོར་ལོའི་བདུད་རྩི་དྭངས་མ་ཞུ་བའི་རྒྱུན་ཡས་བབས་དགའ་བཞིའི་ཉམས་འགྱུར་གྱིས་སྲིད་པ་སུམ་ཅུ་རྩ་གཉིས་ཀྱི་སྡུག་བསྔལ་གྱི་ཟུང་རྔུ་དྲུང་ནས་ཕྱུང་སྟེ་འཕོ་མེད་བདེ་བ་མཆོག་གི་དགའ་སྟོན་ལ་ལོངས་སྤྱོད་ཀྱི་འབུམ་ཕྲག་ཡངས་པའི་མཁའ་འགྲོ་ཚོགས་ཀྱི་རྗེ་མོ་ནི། བདེ་སྟོང་མཉམ་སྦྱོར་ཆེན་པོ་སྦས་དོན་ནང་གི་ཕག་མོ་ཙཎྜ་ལིས་བྱེད་པས་སྒོ་གསུམ་རྡོ་རྗེའི་གྲོང་ཁྱེར་ཐམས་ཅད་ཀུན་ཏུ་སིམ་པས་སྐྱེ་འཆི་ཟག་བཅས་ཀྱི་རྒྱུ་འབྲས་ལས་བྱུང་བའི་ཕོངས་རྒུད་ཐམས་ཅད་རྒྱུན་བཅད་ལ། མཉམ་ཉིད་ཡེ་ཤེས་སྦྱིན་པའི་ཕ་རོལ་དུ་ཕྱིན་མ་སྨིན་འབྲས་མཐར་ཐུག་ཟག་མེད་ཀྱི་ཡོན་ཏན་རིན་ཆེན་མཁའ་འགྲོ་སེར་མོ་དོན་འགྲུབ་ཏུ་ཤར་བ་ལ་འདུད་དོ། །གཉིས་པ་ནི། དབྱིངས་ཕྱུག་ཁ་ཁ་མུ་ཁའི་རེག་བྱ་དང་ལྡན་པའི་ཕྱག་རྒྱ་མའི་པདྨོར་རེག་པ་ཙམ་གྱིས་བདེ་ཆེན་རབ་ཏུ་རྒྱས་པའི་དཔལ་ཡོན་ཅན། རི་རབ་སུམ་ཅུ་རྩ་གཉིས་ཀྱི་རྡུལ་དང་མཉམ་པའི་ཌཱ་ཀིའི་གསང་བའི་ག་ཎ་ཙཀྲ་ལ་རོལ་པའི་མཐུས་ལྷན་སྐྱེས་ཀྱི་ཡེ་ཤེས་ནམ་མཁའི་གཟུགས་ཅན་བདེ་བླག་ཏུ་རྒྱུད་ལ་འཆར་བའི་མཆོག་ཏུ་སིམ་བྱེད་སྦྲང་རྩི་ལྟ་བུའི་དཀར་དམར་འདྲེས་པའི་དྭངས་མ་གྱེན་དུ་འདྲེན་ཏེ་ལུགས་ལྡོག་བདེ་བའི་ཉམས་འགྱུར་འབུམ་ཕྲག་གིས་མྱོས་པའི་ཐིག་རླུང་སེམས་ཀྱི་དྭངས་མའི་བུང་བ་མས་བརྟན་གྱི་དགའ་བའི་བཅུ་དྲུག་གི་ཧཾ་ཡིག་ཟླ་བ་བདུད་རྩི་སྤྱི་བོའི་ཐིག་ལེའི་དྭངས་མ་རྒྱས་ཤིང་བརྟན་པའི་བཅུད་ལེན་དུ་སིམ་སྟེ་འཐུང་བ་ལྟར་འགྱུར་བས། འཁོར་འདས་ཀྱི་རྣམ་པ་ཀུན་ལ་བདེ་ཆེན་དེས་ཁྱབ་ཀྱང༌། གང་གི་ཕྱོགས་སུ་མ་ལྷུང་བའི་ངོ་བོ་མཆོག་ཏུ་མི་འགྱུར་རྟག་བརྟན་རྡོ་རྗེ་སེམས་དཔའ་སྐུ་གསུང་ཐུགས་ཀྱི་དབྱིངས་སུ་འཁྲུལ་པ་མི་གཡོ་བའི་ངལ་འཚོ་ལ་སྦྱོར་བའི་ལས་ཉོན་གྱི་ཟག་པའི་དྲི་མ་མེད་ཅིང་སྣང་སྤྱོད་རྡོ་རྗེ་བདེ་བ་ཆེན་པོའི་དགའ་བ་ལས་ནམ་ཡང་ཉམས་པ་མེད་པ་འཕགས་པའི་ས་བརྙེས་པའི་ཟག་མེད་ཀྱི་ཚུལ་ཁྲིམས་ཕ་རོལ་ཕྱིན་མ་སྲིད་པའི་ཟུག་རྔུ་འབྱིན་པའི་གཉེན་པོ་ཟླ་མེད་གསུང་རྡོ་རྗེའི་བདག་ཉིད་སོར་རྟོག་ཡེ་ཤེས་པདྨ་མཁའ་འགྲོ་དམར་མོ་སྒྲ་སྒྲོགས་མ་ལ་འདུད་དོ། །གསུམ་པ་ནི། རྣམ་ཀུན་མཆོག་ལྡན་སྟོང་ཉིད་ཤེས་རབ་ཀྱི་ཕ་རོལ་དུ་ཕྱིན་མ་ཆོས་སྐུའི་དགོངས་པ་ལ་དབང་འབྱོར་བ་ཡོ་གི་ནི་སྟེ་རྣལ་འབྱོར་མ་ཁྱེད་ཐབས་མཆོག་བདེ་བ་ཆེན་པོ་ཁྱབ་བདག་པདྨ་སཾ་བྷ་ཝ་སྤྱི་དཔལ་ཧེ་རུ་ཀ་དང་གཉིས་མེད་རྟག་ཏུ་མཉམ་པར་སྦྱོར་བའི་རྡོ་རྗེ་དང་པདྨའི་འདུ་འཕྲོད་ཀྱི་བདེ་བ་ཆེན་པོའི་མཆོག་ཏུ་མི་འགྱུར་བ་ཡི་རེག་བྱས། གསང་གསུམ་མི་ཕྱེད་རྡོ་རྗེའི་དབྱིངས་སུ་སིམ་སྟེ་འདྲེས་པ་ཡུལ་ཅན་ཤེས་པ་དང་ཤེས་བྱ་ཡུལ་དུ་སྣང་བའི་གཟུང་འཛིན་གཉིས་མེད་རོ་གཅིག་རྡོ་རྗེའི་བརྟུལ་ཞུགས་ཆེན་པོས་མཐར་སོན་པས་མཁའ་སྤྱོད་དྷཱུ་མ་ཐ་ལ་བདེ་སྟོང་འདུ་འབྲལ་མེད་པའི་དེ་ཉིད་ཀྱི་ཡེ་ཤེས་སྨྲ་བསམ་བརྗོད་པ་དང་བྲལ་བ། གཏན་ཚིགས་དང་རྗེས་དཔག་ལ་མ་ལྟོས་པ་མངོན་སུམ་དུ་ཉམས་སུ་མྱངས་ཏེ་བདེ་མྱུར་གྱིས་ཐུགས་རྒྱུད་ལ་ཐབས་ཟབ་མོའི་ཉེ་རྒྱུའི་སྤྱོད་པས་དྲངས་བས། སྣོད་བཅུད་འཁོར་འདས་ཀྱི་ཆོས་ནམ་མཁའི་མཐས་ཁྱབ་པ་ཐ་མལ་འཁྲུལ་ཤེས་ལས་འདས་པའི་རྡོ་རྗེ་དག་པ་ཆེན་པོ་སྐུ་དང་ཡེ་ཤེས་ཀྱི་ཆོ་རིགས་ཤིན་ཏུ་གཙང་བའི་བཙུན་པའི་བཟང་མོའི་རྟེན་དང་བརྟེན་པའི་འབུམ་ཕྲག་ཡངས་པའི་མཁའ་འགྲོའི་གཟུགས་ཀྱི་དཀྱིལ་འཁོར་ཆེན་པོའི་སྣང་སྟོང་སྒྱུ་མ་ལྟ་བུའི་གཟུགས་བརྙན་དུ་ཤར་བའི་སྟོང་བཞིའི་དབྱིངས་སུ་ཟབ་མོ་བདེན་མེད་དུ་སྒྱུ་མ་ལྟ་བུའི་སྣང་བ་དགྲ་གཉེན་སྤང་བླང་དུ་འཛིན་པའི་ཡུལ་གཏད་མེད་ཆོས་སྐུའི་ཟབ་མོ་སྟོང་ཉིད་ཀྱི་རྒྱས་ཐེབ་པ་སྟེ། དོན་དམ་མི་སྐྱེ་བའི་ཆོས་ལ་གདེང་ཐོབ་སྟེ། མེ་ལོང་ཡེ་ཤེས་བཟོད་པའི་ཕ་རོལ་ཕྱིན་མ་རྡོ་རྗེ་མཁའ་འགྲོ་ཞི་བྱེད་དཀར་མོ་ལ་འདུད་དོ། །བཞི་པ་ནི། ངོ་བོ་ཛྙཱ་ན་ཏེ་ཡེ་ཤེས་གཅིག་པུའི་མཁའ་ཀློང་ལས་མ་འདས་པར་རྣམ་པ་འཁོར་འདས་བརྟན་གཡོ་རྒྱུ་དང་མི་རྒྱུ་སྟེ། ནུས་པ་ཐོབ་པའི་རྣལ་འབྱོར་པ་ཐམས་ཅད་དུའམ་སྣ་ཚོགས་པའི་གཟུགས་སུ་ཅིར་ཡང་འཆར་བས། མཚན་གྱི་མངོན་བརྗོད་ལའང་སྣ་ཚོགས་གཟུགས་ཅན་དུ་གྲགས་པས་རྡོ་རྗེ་ཐེག་པའི་རྒྱུད་སྡེ་བྱུང་བའི་ཞིང་འཛམ་གླིང་གི་གནས་ཡུལ་དུར་ཁྲོད་ཀུན་ཏུ་ལྷ་སྔགས་ཏིང་འཛིན་གྱིས་རྡོ་རྗེ་ཐེག་པའི་ལྟ་སྒོམ་སྤྱོད་པའི་སྐལ་ལྡན་རྣལ་འབྱོར་རྣམས་ལ་དངོས་གྲུབ་སྟེར་བའི་རིགས་ཅན་དུ་རྟག་པར་བཞུགས་པ་དང༌། སྔགས་ཀྱི་རིམ་གཉིས་མཐར་ཕྱིན་དང་ཆོས་ཉིད་རྣམ་ཐར་སྒོ་གསུམ་གྱི་དོན་མངོན་སུམ་རྟོགས་པས་མཆོག་གི་དངོས་གྲུབ་ཉམས་འོག་ཏུ་ཆུད་པའི་ལྷན་སྐྱེས་ཏེ་དོན་དུ་རྡོ་རྗེ་ཐེག་པའི་འདུ་བར་འོས་ཞིང་ས་ལམ་གྱི་བོགས་འབྱིན་ནུས་པའི་དཔལ་མོ་འབུམ་ཕྲག་གི་དབུས་ན། རྣལ་འབྱོར་བའི་ལྟ་སྒོམ་སྤྱོད་པའི་གདེང་ཚད་དང་བསྟུན་པའི་ཞི་རྒྱས་དབང་དྲག་མཆོག་གི་དངོས་གྲུབ་ཐོབ་པའི་གཙོ་འཁོར་དག་མ་དག་མཆོག་ཕལ་གང་འདུལ་རྒྱུན་གྱིས་ཕྱོགས་དུས་ཀུན་ཏུ་མུ་མཐའ་མེད་པའི་ཆོས་ཀྱི་དབྱིངས་དང་མཉམ་པར་ཞིང་དང་སྐུའི་བཀོད་པ་སྣང་བ་རྒྱུན་གྱི་རྟག་པའི་བདག་ཉིད་ཅན་ཏེ་ཚུལ་ཇི་ལྟར་སྟོན་ཀྱང་རང་གི་ཆོས་ཉིད་བདེ་སྟོང་གི་ཡེ་ཤེས་ལས་ནམ་ཡང་ཉམས་པ་མེད་པ་བདེ་ནས་བདེ་བར་བགྲོད་པའི་དགའ་སྟོན་ལ་རོལ་པ་ནམ་མཁའ་ཇི་སྲིད་བར་དུ་རྟག་ཁྱབ་ལྷུན་གྲུབ་ཏུ་ཕན་བདེ་མཐའ་ཡས་པའི་གཞན་དོན་དུས་ལས་མི་གཡོ་བའི་བྱ་གྲུབ་ཡེ་ཤེས་ཉམས་སྣང་མཐར་ཕྱིན་གྱི་རྣམ་རོལ་བརྩོན་འགྲུས་ཕ་རོལ་ཕྱིན་མ་ལ་འདུད་དོ། །ལྔ་པ་ནི། གཙང་དམེ་གཉིས་འཛིན་བྲལ་བའི་ཕག་བཞིན་འཁོར་འདས་ཀྱི་ཆོས་ཐམས་ཅད་གཉིས་མེད་མཉམ་པ་ཉིད་དུ་རྟོགས་པའི་དོན་གྱི་ཝ་ར་ཧཱི་ཞེས་ལྟེ་བར་གཏུམ་མོ་ཡེ་ཤེས་ཀྱི་མེ་འབར་བའི་བདེ་དྲོད་གཡོ་བྱེད་ཡེ་ཤེས་ཀྱི་རླུང་འཁོར་ལོ་བཞིར་ཡས་བརྟན་དུ་གཡོ་བའམ་འབར་བས་སྤྱི་བོའི་ཧཾ་ཡིག་ཟླ་བ་ཞུན་མའི་བདུད་རྩི་སྙིང་ཁུ་ཞུ་བ་ཡས་ནས་མར་བབས་ཏེ་ཁམས་དཀར་དམར་འདྲེས་པའི་བདེ་སྟོང་གཉིས་སུ་མེད་པའི་སྐུ་རྡོ་རྗེ་དྭངས་མའི་བཅུད་ལྷན་སྐྱེས་ཀྱི་ཡེ་ཤེས་རླུང་གིས་དྲངས་པའི་ཕྱིར། མགྲིན་པ་ལོངས་སྤྱོད་འཁོར་ལོར་ཕོག་པས་ཟབ་རྒྱས་ཆོས་ཀྱི་མཛོད་བརྡོལ་ཞིང༌། རླུང་ཐིག་སེམས་གསུམ་སྙིང་དབུས་མི་ཤིགས་པའི་ཐིག་ལེར་ཞུགས་གནས་ཐིམ་གསུམ་མཐར་ཕྱིན་པའི་འཕོ་མེད་ཀྱི་བདེ་ཆེན་རབ་ཏུ་མི་གཡོ་བར་བརྟན་པའི་ངང་དུ་མཉམ་པར་བཞག་པ་ཡི་བྱེད་ལས་ཀྱིས་ཆགས་སྡང་རྨོངས་གསུམ་ལས་བྱུང་བའི་རང་བཞིན་བརྒྱད་ཅུའི་འཁྲུལ་པ་རྟོག་ཚོགས་བདེ་གསལ་མི་རྟོག་པའི་ཡེ་ཤེས་ཆེན་པོའི་རླུང་སེམས་ཐམས་ཅད་སྣང་མཆེད་ཐོབ་པ་རྫོགས་པ་དབུ་མའི་དབྱིངས་སུ་ཐིམ་པས་ཐུགས་རྡོ་རྗེ་སྟེ། རྣམ་པ་གསུམ་དུ་དབྱེ་ཡང་དོན་ལ་དུ་མ་རོ་གཅིག་གི་སྙིང་དབུས་སུ་མི་ཤིགས་པའི་དབྱིངས་ངེས་དོན་གྱི་དྷཱུ་ཏིའི་ཆོས་དབྱིངས་རྣམ་ཐར་སྒོ་གསུམ་གྱི་གནས་ལུགས་དོན་གྱི་ཌཱ་ཀིའི་བདེ་བ་ཆེན་པོའི་སྐུ་གསུང་ཐུགས་ཀྱི་ཕྱག་རྒྱ་བཞི་རུ་སྲོག་ཏུ་བསྡམས་པས། ལུས་སྣང་བ་འདོད་ཁམས། ངག་ཕྱེད་སྣང་གཟུགས་ཁམས། ཡིད་མི་སྣང་གཟུགས་མེད་ཁམས་ཏེ་ཁམས་གསུམ་གཟུང་འཛིན་གྱི་འཁྲུལ་པའི་གྲོང་ཁྱེར་དབྱིངས་སུ་སྟོང་ནས་ཆོས་སྐུ་མཐའ་དབུས་བྲལ་བ་བསམ་མི་ཁྱབ་པའི་མཁའ་དབྱིངས་སུ་བཙན་ས་ཟིན་ཏེ་ཐིམ་པ་ལ་མཉམ་རྗེས་རེས་འཇོག་ལས་འདས་པའི་ཡེ་ཤེས་ཀྱི་དབྱིངས་སུ་སངས་རྒྱས་པ་བདེ་གཤེགས་སྙིང་པོའི་ཡིན་ལུགས་སྒྲ་ཇི་བཞིན་པ་མངོན་དུ་གྱུར་ཏེ་འོད་གསལ་ཆོས་དབྱིངས་ཡེ་ཤེས་བསམ་གཏན་ཕ་རོལ་ཕྱིན་མ་དོན་གྱི་ཡེ་ཤེས་རྡོ་རྗེ་ནམ་མཁའི་དཀྱིལ་དུ་བདེ་བ་གཤེགས་མཁའ་འགྲོ་རྡོ་རྗེ་ཕག་མོ་ལ་འདུད་དོ། །དྲུག་པ་ནི། ཧཱུྃ་ཡིག་བདེ་བ་ཆེན་པོའི་ཡེ་ཤེས་གཅིག་ལ་ལྡོག་ཆས་དབྱེ་བས། ཆོས་དབྱིངས། མེ་ལོང༌། མཉམ་ཉིད། སོར་རྟོག །བྱ་གྲུབ་ཀྱི་ཡེ་ཤེས་རྣམ་པ་ལྔ་དང་ལྡན་པ་དོན་ལ་སྐྱེ་འགག་གནས་གསུམ་གྱིས་གཞོམ་གཞིག་མེད་ཀྱི་སྤྲོས་པས་མཚན་མས་ནམ་ཡང་མི་ཤིགས་པའི་ཐིག་ལེ་ནི་འཕོ་འཛག་ཉོན་ཤེས་ཀྱི་སྒྲིབ་གཉིས་ཆ་བཅས་སྤངས་པ། བྲལ་འབྲས་མཐར་ཐུག་ཆོས་ཉིད་དེ་བཞིན་ཉིད་ཀྱི་གཤིས་ལུགས་སངས་རྒྱས་འཕགས་པའི་མཉམ་བཞག་གི་གཟིགས་པའི་ཟབ་གསལ་གཉིས་སུ་མེད་པའི་ཆོས་ཀྱི་དབྱིངས་དང༌། ཐ་མི་དད་པས། ངོ་བོ་དག་པ་གཉིས་དང་ལྡན་པའི་ཆོས་ཉིད་ལ་མཚན་རྟོག་གི་གཉིས་ཆོས་སུ་ནམ་ཡང་སོ་སོར་དབྱེར་མི་ཕྱེད་པ་འབྲས་བུ་སངས་རྒྱས་སྐུ་གསུམ་གྱི་ཟག་མེད་ཡོན་ཏན་རྒྱ་མཚོའི་མཐར་སོན་པའི་རང་བཞིན་ཚོགས་གཉིས་ཟུང་འཇུག་གི་འབྲས་བུའི་རྟོགས་བྱ་མཐར་ཐུག་ཁྱབ་བྱ་ཡེ་ཤེས་ལྔ་ལ་ཁྱབ་བྱེད་རང་བྱུང་གི་ཡེ་ཤེས། དྲུག་པའི་རིགས་ཀྱི་འཁོར་ལོའི་བསྒྱུར་བ་ཡུམ་ཆེན་མོ། ཤེས་རབ་ཕ་རོལ་ཕྱིན་མ་ལ་འདུད་དོ། །བདུན་པ་ནི། མདོར་ན་གཞི་ལམ་འབྲས་བུའི་ཆོས་ཐམས་ཅད་སྣང་སྟོང་ཟུང་འཇུག་མཐའ་ལས་འདས་པ་རྟོགས་པ་ལ་ངོ་མཚར་བའི་ཕྱིར། ཨ་ཧོ། ཞེས་མདོར་བསྟན་ནས་གཞི་གདོད་ནས་བསལ་བཞག་བྲལ་བའི་དབྱིངས་ངོ་བོ་ལ་ཀ་དག་འཕགས་བཞིའི་འབྱུང་གནས་རྒྱལ་བའི་ཡུམ་ཆེན་པོ་ཤེས་རབ་ཕ་རོལ་དུ་ཕྱིན་མ་འབྲས་བུ་ཌཱ་ཀི་མའི་མཁྱེན་ཆ་འགག་པ་མེད་པའི་འོད་གསལ་ཡེ་ཤེས་ཀྱི་རང་གདངས་སྐུ་དང་ཡེ་ཤེས་འདུ་འབྲལ་མེད་པའི་གཞི་ལྷུན་གྲུབ། ལམ་གྱི་བཞུགས་ཚུལ་དང་མཐུན་པ་ཁྲེགས་ཆོད་དང༌། ཐོད་རྒལ་གྱི་ལམ་རྣལ་འབྱོར་དུ་བྱས་པའི་རང་འབྲས་ཆོས་ཉིད་མངོན་སུམ། ཉམས་གོང་འཕེལ། རིག་པ་ཚད་ཕེབས། ཆོས་ཉིད་ཟད་པའི་ལམ་སྣང་བ་རྣམ་བཞིའི་རྣལ་འབྱོར་མཐའ་རུ་ཕྱིན་ནས་ཟག་པ་རང་ཟད། འབྱུང་བ་རང་དེངས། དྲན་པ་རང་གྲོལ་བའི་མི་སློབ་འབྲས་བུའི་གོ་འཕང་མངོན་དུ་གྱུར་ཏེ་སྐྱེ་ཞིང་བགྲེས་རྒུད་དང་བྲལ་བའི་སྒྲིབ་བྲལ་རྡོ་རྗེའི་ལང་ཚོ་དར་ལ་བབ་པའི་འཇོ་སྒེག་དང་སྦྲགས་ནས་འབྲས་བུ་སྲིད་པ་ཇི་སྲིད་བར་ཟངས་མདོག་དཔལ་གྱི་རི་བོར་ད་ལྟའང་བཞུགས་པའི་འཕོ་ཆེན་འཇའ་ལུས་རྡོ་རྗེའི་མཁའ་ཁྱབ་འགྲོ་བའི་དོན་མཛད་པ་སྟེ། སྣང་ཚུལ་སྒྲིབ་པ་དག་མ་དག་གི་གཞི་ལམ་འབྲས་བུ་གསུམ་དུ་དབྱེ་ཡང༌། གནས་ཚུལ་ཐིག་ལེ་ཉག་གཅིག་གི་ཆོས་ཉིད་གཅིག་ལ་ནམ་ཡང་ཐ་དད་དུ་དབྱེར་མེད་པ་དོན་དམ་གྱི་ཕག་མོའི་རང་ཞལ་མངོན་དུ་གྱུར་ཏེ་སྐྱེ་འཆི་བར་དོར་འཁྲུལ་པའི་ཀུན་བརྟགས་ཀྱི་གཞན་དབང་དུ་མ་གྱུར་པ་མི་སློབ་ཟུང་འཇུག་གི་གོ་འཕང་མཆོག་གི་དངོས་གྲུབ་མངོན་དུ་གྱུར་པས་ཐུན་མོང་གི་དངོས་གྲུབ་ཤུགས་འབྱུང་དུ་རྫོགས་པ། ཚེ་འདིར་མཁའ་སྤྱོད་གསང་འཛིན་ཌཱ་ཀི་རྒྱ་མཚོའི་གསང་བ་མི་ཟད་རྒྱན་གྱི་འཁོར་ལོ་དང་རྣམ་དབྱེར་མེད་པའི་གོ་འཕང་མཆོག་རྟེན་ཐོག་འདིར་འགྲུབ་པའི་དབང་དང་སྟོབས་བཅུའི་རིག་པའི་རྩལ་དབང་ཐོབ་པས་སེམས་ཅན་སངས་རྒྱས་སུ་སྐད་ཅིག་གིས་དབང་བསྒྱུར་ཏེ་རྟོགས་གྲོལ་དུས་མཉམ་དུ་འབྱུང་བའི་དངོས་གྲུབ་ཞིག་ཞུའོ། །གསུམ་པ་ཇི་ལྟར་མཛད་ཚུལ་ནི། ཞེས་པའང་དུས་ནམ་མཛད་ན་ཕྱི་ནང་གི་གནས་ཡུལ་དུ་དཔའ་བོ་ཌཱ་ཀི་འདུ་བ། དམར་ཕྱོགས་མཁའ་འགྲོ་འདུ་བའི་དུས་ཀྱི་མཆོད་པ་ཞིག་དང༌། རྗེས་སུ་འབྲེལ་བར་མཛད་པ་པོ་ཀུན་མཁྱེན་བླ་མ་ཡབ་སྲས་དང་གཉིས་མེད་གཉིས་སུ་སྣང་བས་རྒྱལ་བ་དགྱེས་པའི་མཛད་པས་བསྟན་འགྲོ་ལ་ཕན་བདེ་སྤེལ་བའི་འབངས་མཁྱེན་བརྩེའི་ལྷས་དབུ་ནས་ཞབས་སུ་བསྡུས་པའི་དོན། གནས་སྐབས་དེར་རྒྱལ་ཡུམ་ཡེ་ཤེས་མཁའ་འགྲོའི་རྡོ་རྗེ་ནང་གི་སྤང་རྟོགས་གཟིགས་པའི་ངོ་མཚར་གྱི་གསང་བ་ཟབ་ཅིང་རྒྱ་ཆེ་བ་ཇི་ལྟར་བརྙེས་པའི་ས་ལ་རང་ཉིད་ཀྱང་གཤེགས་པས་བསྟོད་བྱ་སྟོད་བྱེད་དབྱེར་མེད་དུ་གྱུར་བས་གང་ཤར་གྱི་རྟོག་པ་དད་ཅན་གྱི་གདུལ་བྱ་ལ་སྟོན་པའི་ཕྱིར་སྒྲ་ཚིག་ཡི་གེའི་གཟུགས་སུ་འདུ་བྱས་པ་དགོས་པ་སྟེ། ལེགས་མཛད་རྨད་དུ་བྱུང་བ་འདིས་ཀྱང་རྒྱུ་དང་མི་རྒྱུའི་དངོས་ཀུན་གཉིས་མེད་བདེ་བ་ཆེན་པོའི་ཡེ་ཤེས་སུ་འཆར་བའི་ལྷན་ཅིག་བྱེད་པའི་རྐྱེན་དུ་གྱུར་ཅིག །ཅེས་རྡོ་རྗེའི་བདེན་ཚིག་གི་རྒྱས་བཏབ་པའོ། །ཟབ་རྒྱས་གསང་བ་ཟབ་མོའི་རྡོ་རྗེའི་གནད། །རྗེས་མཚན་བཛྲ་གཱི་རྟིའི་དགོངས་པའི་བཅུད། །སྐལ་བཟང་བུང་བས་འཐུང་བའི་སྦྲང་རྩི་འདིས། །རྡོ་རྗེ་གསང་བའི་སྤྱོད་པ་མཐར་ཕྱིན་ཤོག །ཅེས་པའང་མཆོག་གི་རྡོ་རྗེའི་ས་བརྙེས་པའི་རིག་འཛིན་གྱི་ཁྱུ་མཆོག་དུ་མས་རྗེས་སུ་བཟུང་ཞིང༌། རྡོ་རྗེ་ཐེག་པའི་རྒྱུད་སྡེ་རྒྱ་མཚོའི་སྨིན་གྲོལ་ཟབ་རྒྱས་ལ་སྤྱོད་པའི་སྐལ་པ་མི་དམན་པ། རྡོ་རྗེ་ཐེག་པའི་རྣལ་འབྱོར་ཙམ་པོ་བའི་གཟུགས་བརྙན། འོད་གསལ་རྡོ་རྗེ་ཐུགས་མཆོག་རྩལ་ཞེས་རྡོ་རྗེའི་མིང་གི་དབང་བསྐུར་ཐོབ་པའི་མངྒ་ལས། རྡོ་རྗེའི་གནས་མཆོག་ཉེ་བའི་ཚནྡྷོ་ཧ་བྱ་རུང་ཁ་ཤོར་དུ་གསང་ཆེན་རྡོ་རྗེའི་ཆོས་ཀྱི་ཏམྦུ་ར་སྒྲོགས་པའི་ཚེ་རྟེན་འབྲེལ་ལེགས་ཚོགས་དུ་མས་བསྐུལ་ཏེ་བྲིས་པ་འབྲེལ་ཚད་རྡོ་རྗེ་བདེ་བ་ཆེན་པོའི་ས་ལ་སྦྱོར་བའི་ཕོ་ཉ་རུ་གྱུར་ཅིག། །། །།

[edit]

@#/_/ye shes DA ki mtsho rgyal gyi gsang ba la bstod pa'i rdo rje'i glu'i 'grel pa gzhom med rdo rje sgra yi gling bu zhes bya ba bzhugs so// @#/__/na mo/_gu ru dz+nyA na d+hA ki ni ye/_/nam mkha'i rnal 'byor chen po gnyug ma'i dbyings/_/'khor 'das bde chen 'char ba'i DA ki ni/_/dbyer med 'khor lo'i dbang phyug la btud nas/_/zab don ji ltar dpog bzhin cha tsam brjod/_/de yang mthong ba'i chos la rdo rje bde ba chen po'i sa brnyes pa'i slob dpon chen po kun mkhyen bla ma many+dzu'i mtshan gyi longs spyod 'khor los rdo rje glu'i dkor mdzod las byung ba'i ye shes mkha' 'gro'i gsang ba rjes su mtshon pa bstod pa'i glu'i zab don 'chad pa la gsum/_bshad bya'i glu yi mtshan gyis mdor bstan/_bstod pa rdo rje'i glu dngos rgyas par bshad pa/_de nyid ji ltar mdzad pa'i tshul gyis mjug bsdu ba'o/__/dang po ni/_bstod bya yul/_!_ye shes DA ki ni la/_bstod byed tshig rdo rje'i/_rtsa sngags dang sbyar ba'i sgo nas/_bstod don rdo rje'i theg pa'i khyad chos nang gi sa lam gyi bgrod pa mthar phyin tshul gyis bstod pas zab don mngon sum du rtogs pa'i rig rtsal ye shes rlung gis bskul te/_ched du rtsol sgrub ma dgos pa thol byung du/_rang byung thugs las brdol ba'i rdo rje'i glu rdo rje theg pa nang thabs grol zab mo'i sgo nas phyi mtshan nyid theg pa dang sgo bstun pa'i pha rol phyin pa drug yongs su rdzogs pas bskal pa grangs med gsum la sogs pa'i rdzogs smin sbyangs gsum mthar phyin te mi slob pa'i lam mngon du gyur pas rang gzhan don gnyis mthar son pa'i dpal mo/_rdo rje'i bla ma ma hA gu ru'i gsang 'dzin bka' yi gzung ma ye shes mtsho rgyal gyi mi zad rgyan gyi 'khor lo'i gsang gsum mchog bde'i yongs su gang bas dgyes te bzhad pa'i tshul de gang gis thos kyang*/_yid la bde ba chen po'i sim pa ster ba dbyangs snyan zhes bya ba bzhugs so/__/gnyis pa rgyas par bshad pa la/_rdo rje'i glu 'dren pa'i rgyu bde stong gi ting nge 'dzin mdor bstan/_zab don phar phyin drug gi rtogs pa rgyas par bshad pas bstod pa gnyis las/_dang po/_a zhes chos dbyings rdo rje btsun mo'i shes rab stong cha dang*/_de mngon du byed pa la thabs bde ba chen po'i he ru ka dang mnyam par sbyor ba'i sgyu rtsal las/_'bras bu'i chos kun bde stong gnyis su mi phyed 'pho med rdo rje'i dbyings su dag pa'i ye shes kyi rol par sdom pa'i don la mnyam par bzhag pas thugs rab tu ngom pa'am/_tshim pa'i tshul gyi hoHzhes rdo rje'i glu'i sna 'dren pa ste/_'di la'ang zhib tu bshad na mtha' drug tshul bzhi'i bshad tshul zab rgyas su yod la/_don du rdo rje'i thol glu 'di'i mdor bstan pa'o/__/gnyis pa la/_thog mar mtshon byed dpe yi ye shes yas babs rgyu yi dga' bzhi'i sbyin pa'i pha rol du phyin ma yon tan rin chen mkha' 'gro la bstod pa/_mas brtan 'bras bu'i dga' bzhi'i tshul khrims kyi pha rol du phyin ma gsung pad+ma mkha' 'gro la bstod pa/_zung 'jug bde stong kha sbyor gyis bzod pa'i pha rol du phyin pa thugs rdo rje mkha' 'gro la bstod pa/_mtshon bya don gyi ye shes brtson 'grus kyi pha rol du phyin pa phrin las las kyi mkha' 'gro la bstod pa/_nges don gnyis su med pa'i de nyid dang mnyam rdzogs bral ba bsam gtan gyi pha rol du phyin pa sku bde gshegs mkha' 'gro la bstod pa/_mthar thug shes rab kyi pha rol du phyin pa drug pa'i rigs brgya'i khyab bdag la bstod pa/_dbyer med sku bzhi'i bdag nyid 'bras bu'i ye shes mkha' 'gro la bstod pa dang drug go_/dang po ni/_oM zhes bkra shis pa'i sngags dang 'brel ba'i ye shes lnga mtshon gyi ngo bo'am bdag nyid du son pas grub pa'i bdag nyid kyi tha snyad mtshan ma'i blo rtog las 'das pa'i so sor rang rig pa'i ye shes kyi rang gdangs mdo rgyud thams cad kyi zab don mngon du bya ba'i nyams 'gyur ram nyams myong rgyud la 'dren pa'i thabs zab mo yid dpyod kyi blo dang grub mtha'i gzhal ba'i phra rab rdul dang bral bas na dngos mtshan las 'das pa'i rtogs rgyud don la mngon sum du 'dren pa'i byed las chos dbyings rnam thar sgo gsum gyi ngo bor rnam pa yum rdo rje phag mo mtshon byed gtum mo ye shes kyi me lces 'khor lo bzhir 'bar ba'i reg bya/_haM yig ngo bo mchog tu mi 'gyur ba'i bde ba chen po'i rten rnam pa yab he ru ka mtshon byed bde chen 'khor lo'i bdud rtsi dwangs ma zhu ba'i rgyun yas babs dga' bzhi'i nyams 'gyur gyis srid pa sum cu rtsa gnyis kyi sdug bsngal gyi zung rngu drung nas phyung ste 'pho med bde ba mchog gi dga' ston la longs spyod kyi 'bum phrag yangs pa'i mkha' 'gro tshogs kyi rje mo ni/_bde stong mnyam sbyor chen po sbas don nang gi phag mo tsaN+Da lis byed pas sgo gsum rdo rje'i grong khyer thams cad kun tu sim pas skye 'chi zag bcas kyi rgyu 'bras las byung ba'i phongs rgud thams cad rgyun bcad la/_mnyam nyid ye shes sbyin pa'i pha rol du phyin ma smin 'bras mthar thug zag med kyi yon tan rin chen mkha' 'gro ser mo don 'grub tu shar ba la 'dud do/__/gnyis pa ni/_dbyings phyug kha kha mu kha'i reg bya dang ldan pa'i phyag rgya ma'i pad+mor reg pa tsam gyis bde chen rab tu rgyas pa'i dpal yon can/_ri rab sum cu rtsa gnyis kyi rdul dang mnyam pa'i DA ki'i gsang ba'i ga Na tsakra la rol pa'i mthus lhan skyes kyi ye shes nam mkha'i gzugs can bde blag tu rgyud la 'char ba'i mchog tu sim byed sbrang rtsi lta bu'i dkar dmar 'dres pa'i dwangs ma gyen du 'dren te lugs ldog bde ba'i nyams 'gyur 'bum phrag gis myos pa'i thig rlung sems kyi dwangs ma'i bung ba mas brtan gyi dga' ba'i bcu drug gi haM yig zla ba bdud rtsi spyi bo'i thig le'i dwangs ma rgyas shing brtan pa'i bcud len du sim ste 'thung ba ltar 'gyur bas/_'khor 'das kyi rnam pa kun la bde chen des khyab kyang*/_gang gi phyogs su ma lhung ba'i ngo bo mchog tu mi 'gyur rtag brtan rdo rje sems dpa' sku gsung thugs kyi dbyings su 'khrul pa mi g.yo ba'i ngal 'tsho la sbyor ba'i las nyon gyi zag pa'i dri ma med cing snang spyod rdo rje bde ba chen po'i dga' ba las nam yang nyams pa med pa 'phags pa'i sa brnyes pa'i zag med kyi tshul khrims pha rol phyin ma srid pa'i zug rngu 'byin pa'i gnyen po zla med gsung rdo rje'i bdag nyid sor rtog ye shes pad+ma mkha' 'gro dmar mo sgra sgrogs ma la 'dud do/__/gsum pa ni/_rnam kun mchog ldan stong nyid shes rab kyi pha rol du phyin ma chos sku'i dgongs pa la dbang 'byor ba yo gi ni ste rnal 'byor ma khyed thabs mchog bde ba chen po khyab bdag pad+ma saM b+ha wa spyi dpal he ru ka dang gnyis med rtag tu mnyam par sbyor ba'i rdo rje dang pad+ma'i 'du 'phrod kyi bde ba chen po'i mchog tu mi 'gyur ba yi reg byas/_gsang gsum mi phyed rdo rje'i dbyings su sim ste 'dres pa yul can shes pa dang shes bya yul du snang ba'i gzung 'dzin gnyis med ro gcig rdo rje'i brtul zhugs chen pos mthar son pas mkha' spyod d+hU ma tha la bde stong 'du 'bral med pa'i de nyid kyi ye shes smra bsam brjod pa dang bral ba/_gtan tshigs dang rjes dpag la ma ltos pa mngon sum du nyams su myangs te bde myur gyis thugs rgyud la thabs zab mo'i nye rgyu'i spyod pas drangs bas/_snod bcud 'khor 'das kyi chos nam mkha'i mthas khyab pa tha mal 'khrul shes las 'das pa'i rdo rje dag pa chen po sku dang ye shes kyi cho rigs shin tu gtsang ba'i btsun pa'i bzang mo'i rten dang brten pa'i 'bum phrag yangs pa'i mkha' 'gro'i gzugs kyi dkyil 'khor chen po'i snang stong sgyu ma lta bu'i gzugs brnyan du shar ba'i stong bzhi'i dbyings su zab mo bden med du sgyu ma lta bu'i snang ba dgra gnyen spang blang du 'dzin pa'i yul gtad med chos sku'i zab mo stong nyid kyi rgyas theb pa ste/_don dam mi skye ba'i chos la gdeng thob ste/_me long ye shes bzod pa'i pha rol phyin ma rdo rje mkha' 'gro zhi byed dkar mo la 'dud do/__/bzhi pa ni/_ngo bo dz+nyA na te ye shes gcig pu'i mkha' klong las ma 'das par rnam pa 'khor 'das brtan g.yo rgyu dang mi rgyu ste/_nus pa thob pa'i rnal 'byor pa thams cad du'am sna tshogs pa'i gzugs su cir yang 'char bas/_mtshan gyi mngon brjod la'ang sna tshogs gzugs can du grags pas rdo rje theg pa'i rgyud sde byung ba'i zhing 'dzam gling gi gnas yul dur khrod kun tu lha sngags ting 'dzin gyis rdo rje theg pa'i lta sgom spyod pa'i skal ldan rnal 'byor rnams la dngos grub ster ba'i rigs can du rtag par bzhugs pa dang*/_sngags kyi rim gnyis mthar phyin dang chos nyid rnam thar sgo gsum gyi don mngon sum rtogs pas mchog gi dngos grub nyams 'og tu chud pa'i lhan skyes te don du rdo rje theg pa'i 'du bar 'os zhing sa lam gyi bogs 'byin nus pa'i dpal mo 'bum phrag gi dbus na/_rnal 'byor ba'i lta sgom spyod pa'i gdeng tshad dang bstun pa'i zhi rgyas dbang drag mchog gi dngos grub thob pa'i gtso 'khor dag ma dag mchog phal gang 'dul rgyun gyis phyogs dus kun tu mu mtha' med pa'i chos kyi dbyings dang mnyam par zhing dang sku'i bkod pa snang ba rgyun gyi rtag pa'i bdag nyid can te tshul ji ltar ston kyang rang gi chos nyid bde stong gi ye shes las nam yang nyams pa med pa bde nas bde bar bgrod pa'i dga' ston la rol pa nam mkha' ji srid bar du rtag khyab lhun grub tu phan bde mtha' yas pa'i gzhan don dus las mi g.yo ba'i bya grub ye shes nyams snang mthar phyin gyi rnam rol brtson 'grus pha rol phyin ma la 'dud do/__/lnga pa ni/_gtsang dme gnyis 'dzin bral ba'i phag bzhin 'khor 'das kyi chos thams cad gnyis med mnyam pa nyid du rtogs pa'i don gyi wa ra hI zhes lte bar gtum mo ye shes kyi me 'bar ba'i bde drod g.yo byed ye shes kyi rlung 'khor lo bzhir yas brtan du g.yo ba'am 'bar bas spyi bo'i haM yig zla ba zhun ma'i bdud rtsi snying khu zhu ba yas nas mar babs te khams dkar dmar 'dres pa'i bde stong gnyis su med pa'i sku rdo rje dwangs ma'i bcud lhan skyes kyi ye shes rlung gis drangs pa'i phyir/_mgrin pa longs spyod 'khor lor phog pas zab rgyas chos kyi mdzod brdol zhing*/_rlung thig sems gsum snying dbus mi shigs pa'i thig ler zhugs gnas thim gsum mthar phyin pa'i 'pho med kyi bde chen rab tu mi g.yo bar brtan pa'i ngang du mnyam par bzhag pa yi byed las kyis chags sdang rmongs gsum las byung ba'i rang bzhin brgyad cu'i 'khrul pa rtog tshogs bde gsal mi rtog pa'i ye shes chen po'i rlung sems thams cad snang mched thob pa rdzogs pa dbu ma'i dbyings su thim pas thugs rdo rje ste/_rnam pa gsum du dbye yang don la du ma ro gcig gi snying dbus su mi shigs pa'i dbyings nges don gyi d+hU ti'i chos dbyings rnam thar sgo gsum gyi gnas lugs don gyi DA ki'i bde ba chen po'i sku gsung thugs kyi phyag rgya bzhi ru srog tu bsdams pas/_lus snang ba 'dod khams/_ngag phyed snang gzugs khams/_yid mi snang gzugs med khams te khams gsum gzung 'dzin gyi 'khrul pa'i grong khyer dbyings su stong nas chos sku mtha' dbus bral ba bsam mi khyab pa'i mkha' dbyings su btsan sa zin te thim pa la mnyam rjes res 'jog las 'das pa'i ye shes kyi dbyings su sangs rgyas pa bde gshegs snying po'i yin lugs sgra ji bzhin pa mngon du gyur te 'od gsal chos dbyings ye shes bsam gtan pha rol phyin ma don gyi ye shes rdo rje nam mkha'i dkyil du bde ba gshegs mkha' 'gro rdo rje phag mo la 'dud do/__/drug pa ni/_hU~M yig bde ba chen po'i ye shes gcig la ldog chas dbye bas/_chos dbyings/_me long*/_mnyam nyid/_sor rtog_/bya grub kyi ye shes rnam pa lnga dang ldan pa don la skye 'gag gnas gsum gyis gzhom gzhig med kyi spros pas mtshan mas nam yang mi shigs pa'i thig le ni 'pho 'dzag nyon shes kyi sgrib gnyis cha bcas spangs pa/_bral 'bras mthar thug chos nyid de bzhin nyid kyi gshis lugs sangs rgyas 'phags pa'i mnyam bzhag gi gzigs pa'i zab gsal gnyis su med pa'i chos kyi dbyings dang*/_tha mi dad pas/_ngo bo dag pa gnyis dang ldan pa'i chos nyid la mtshan rtog gi gnyis chos su nam yang so sor dbyer mi phyed pa 'bras bu sangs rgyas sku gsum gyi zag med yon tan rgya mtsho'i mthar son pa'i rang bzhin tshogs gnyis zung 'jug gi 'bras bu'i rtogs bya mthar thug khyab bya ye shes lnga la khyab byed rang byung gi ye shes/_drug pa'i rigs kyi 'khor lo'i bsgyur ba yum chen mo/_shes rab pha rol phyin ma la 'dud do/__/bdun pa ni/_mdor na gzhi lam 'bras bu'i chos thams cad snang stong zung 'jug mtha' las 'das pa rtogs pa la ngo mtshar ba'i phyir/_a ho/_zhes mdor bstan nas gzhi gdod nas bsal bzhag bral ba'i dbyings ngo bo la ka dag 'phags bzhi'i 'byung gnas rgyal ba'i yum chen po shes rab pha rol du phyin ma 'bras bu DA ki ma'i mkhyen cha 'gag pa med pa'i 'od gsal ye shes kyi rang gdangs sku dang ye shes 'du 'bral med pa'i gzhi lhun grub/_lam gyi bzhugs tshul dang mthun pa khregs chod dang*/_thod rgal gyi lam rnal 'byor du byas pa'i rang 'bras chos nyid mngon sum/_nyams gong 'phel/_rig pa tshad phebs/_chos nyid zad pa'i lam snang ba rnam bzhi'i rnal 'byor mtha' ru phyin nas zag pa rang zad/_'byung ba rang dengs/_dran pa rang grol ba'i mi slob 'bras bu'i go 'phang mngon du gyur te skye zhing bgres rgud dang bral ba'i sgrib bral rdo rje'i lang tsho dar la bab pa'i 'jo sgeg dang sbrags nas 'bras bu srid pa ji srid bar zangs mdog dpal gyi ri bor da lta'ang bzhugs pa'i 'pho chen 'ja' lus rdo rje'i mkha' khyab 'gro ba'i don mdzad pa ste/_snang tshul sgrib pa dag ma dag gi gzhi lam 'bras bu gsum du dbye yang*/_gnas tshul thig le nyag gcig gi chos nyid gcig la nam yang tha dad du dbyer med pa don dam gyi phag mo'i rang zhal mngon du gyur te skye 'chi bar dor 'khrul pa'i kun brtags kyi gzhan dbang du ma gyur pa mi slob zung 'jug gi go 'phang mchog gi dngos grub mngon du gyur pas thun mong gi dngos grub shugs 'byung du rdzogs pa/_tshe 'dir mkha' spyod gsang 'dzin DA ki rgya mtsho'i gsang ba mi zad rgyan gyi 'khor lo dang rnam dbyer med pa'i go 'phang mchog rten thog 'dir 'grub pa'i dbang dang stobs bcu'i rig pa'i rtsal dbang thob pas sems can sangs rgyas su skad cig gis dbang bsgyur te rtogs grol dus mnyam du 'byung ba'i dngos grub zhig zhu'o/__/gsum pa ji ltar mdzad tshul ni/_zhes pa'ang dus nam mdzad na phyi nang gi gnas yul du dpa' bo DA ki 'du ba/_dmar phyogs mkha' 'gro 'du ba'i dus kyi mchod pa zhig dang*/_rjes su 'brel bar mdzad pa po kun mkhyen bla ma yab sras dang gnyis med gnyis su snang bas rgyal ba dgyes pa'i mdzad pas bstan 'gro la phan bde spel ba'i 'bangs mkhyen brtse'i lhas dbu nas zhabs su bsdus pa'i don/_gnas skabs der rgyal yum ye shes mkha' 'gro'i rdo rje nang gi spang rtogs gzigs pa'i ngo mtshar gyi gsang ba zab cing rgya che ba ji ltar brnyes pa'i sa la rang nyid kyang gshegs pas bstod bya stod byed dbyer med du gyur bas gang shar gyi rtog pa dad can gyi gdul bya la ston pa'i phyir sgra tshig yi ge'i gzugs su 'du byas pa dgos pa ste/_legs mdzad rmad du byung ba 'dis kyang rgyu dang mi rgyu'i dngos kun gnyis med bde ba chen po'i ye shes su 'char ba'i lhan cig byed pa'i rkyen du gyur cig_/ces rdo rje'i bden tshig gi rgyas btab pa'o/__/zab rgyas gsang ba zab mo'i rdo rje'i gnad/_/rjes mtshan badz+ra gI rti'i dgongs pa'i bcud/_/skal bzang bung bas 'thung ba'i sbrang rtsi 'dis/_/rdo rje gsang ba'i spyod pa mthar phyin shog__/ces pa'ang mchog gi rdo rje'i sa brnyes pa'i rig 'dzin gyi khyu mchog du mas rjes su bzung zhing*/_rdo rje theg pa'i rgyud sde rgya mtsho'i smin grol zab rgyas la spyod pa'i skal pa mi dman pa/_rdo rje theg pa'i rnal 'byor tsam po ba'i gzugs brnyan/_'od gsal rdo rje thugs mchog rtsal zhes rdo rje'i ming gi dbang bskur thob pa'i mang+ga las/_rdo rje'i gnas mchog nye ba'i tshan+d+ho ha bya rung kha shor du gsang chen rdo rje'i chos kyi tam+bu ra sgrogs pa'i tshe rten 'brel legs tshogs du mas bskul te bris pa 'brel tshad rdo rje bde ba chen po'i sa la sbyor ba'i pho nya ru gyur cig/__//__//