DKR-KABUM-09-TA-015

🚧 This website is under continued development. We appreciate your patience!

Previous Text Back to Volume PageNext Text

Wylie title	rdo rje srin po khrag 'thung rak+sha thod phreng rtsal gyi rgyal dbyangs g.yul rgyal lha yi rnga chen zhes bya ba bi dza ha raM
Location	dil mgo mkhyen brtse bka' 'bum Volume 9, Text 15, Pages 71-72 (Folios 1a1 to 2b1)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	མཆོག་གྱུར་གླིང་པ་ (mchog gyur gling pa)
Citation	Khyentse, Dilgo. rdo rje srin po khrag 'thung rak+sha thod phreng rtsal gyi rgyal dbyangs g.yul rgyal lha yi rnga chen zhes bya ba bi dza ha raM. In Skyabs rje dil mgo mkhyen brtse rin po che'i bka' 'bum, Vol. 9: 71-72. Delhi: Shechen Publications, 1994.
Genre	Vajra Songs - rdo rje'i glu
Cycle	བླ་མའི་ཐུགས་སྒྲུབ་བར་ཆད་ཀུན་སེལ་ (bla ma'i thugs sgrub bar chad kun sel)
Deity	rig 'dzin rak+sha thod phreng
Colophon	།ཅེས་པའང་མེ་འབྲུག་ཆུ་སྟོད་ཟླ་བའི་སྟོང་གི་ཉི་མ་ལྷོ་འབྲུག་ཐིམ་ཡུལ་བཀྲ་ཆོས་རྫོང་དུ་གཏོར་ཟློག་སྐབས་པདྨ་གར་དབང་མདོ་སྔགས་གླིང་པས་སྤེལ་བ་དཀར་ཕྱོགས་རྣམ་པར་རྒྱལ་བའི་རྒྱལ་མཚན་དུ་གྱུར་ཅིག །ཛ་ཡནྟུ།།
	/ces pa'ang me 'brug chu stod zla ba'i stong gi nyi ma lho 'brug thim yul bkra chos rdzong du gtor zlog skabs pad+ma gar dbang mdo sngags gling pas spel ba dkar phyogs rnam par rgyal ba'i rgyal mtshan du gyur cig__/dza yan+tu//

Tibetan Text

Wylie

[edit]

༄༅། །རྡོ་རྗེ་སྲིན་པོ་ཁྲག་འཐུང་རཀྴ་ཐོད་ཕྲེང་རྩལ་གྱི་རྒྱལ་དབྱངས་གཡུལ་རྒྱལ་ལྷ་ཡི་རྔ་ཆེན་ཞེས་བྱ་བ་བི་ཛ་ཧ་རཾ། ཧཱུྃ་ཧྲཱིཿ འོད་གསལ་ཀུན་ཁྱབ་ཡེ་ཤེས་ཆོས་སྐུའི་དབྱིངས། །ཟག་མེད་རྣམ་བྱང་ཡོན་ཏན་བཀོད་མཛེས་པ། །སངས་རྒྱས་ཀུན་གྱི་སྤྲོས་བྲལ་ཐུགས་ཀྱི་གཟུགས། །རྒྱལ་ལོ་བདུད་འདུལ་ཕྲིན་ལས་རྒྱལ་གྱུར་ཅིག །བལྟར་མི་མངོན་པ་འོད་ཀྱི་གཙུག་ཏོར་ཚུལ། །ཡེ་ཤེས་ནོར་བུའི་གཟི་བྱིན་འབར་བའི་ཀློང༌། །བརྒྱུད་གསུམ་རིག་འཛིན་གྲུབ་ཐོབ་རྒྱ་མཚོའི་ཚོགས། །རྒྱལ་ལོ་སྲིད་ཞིའི་བླ་ན་རྒྱལ་གྱུར་ཅིག །རིམ་པ་བཅུ་གསུམ་ཆོས་ཀྱི་འཁོར་ལོ་རུ། །བདུད་འདུལ་ཤཱཀྱ་སེང་གེ་ཕྱོགས་དུས་ཀྱི། སངས་རྒྱས་བྱང་སེམས་བསམ་མི་ཁྱབ་པ་རྣམས། །རྒྱལ་ལོ་འཇིག་རྟེན་གསུམ་ན་རྒྱལ་གྱུར་ཅིག །དཔལ་གྱི་མགུལ་མཚོན་བྲེ་ཡི་དཀྱིལ་འཁོར་ཀློང༌། །སྒྱུ་འཕྲུལ་དྲ་བ་རྒྱུད་སྡེ་རྣམ་བཞིའི་ལྷ། །བསམ་ཡས་རྡོ་རྗེ་དབྱིངས་ཀྱི་ཡི་དམ་ལྷ། །རྒྱལ་ལོ་བདུད་བཞིའི་དཔུང་ལས་རྒྱལ་གྱུར་ཅིག །གཞོན་ནུ་བུམ་པ་སྐུ་ཡི་དབྱིངས་ཀྱི་སྲོག །སྤྱི་དཔལ་ཆེན་པོ་རཀྴ་ཐོད་ཕྲེང་རྩལ། །སངས་རྒྱས་འདུས་པའི་ཕྲིན་ལས་སྲིན་པོའི་རྒྱལ། །རྒྱལ་ལོ་ནག་ཕྱོགས་ཀུན་ལས་རྒྱལ་གྱུར་ཅིག །སྟོབས་བཅུའི་ཡེ་ཤེས་ཁྲོ་རྒྱལ་འབར་བའི་ཚུལ། །དབང་བཅུའི་ཕྲིན་ལས་མཁའ་ཁྱབ་འགྲོ་ལ་འཇུག །ཕྱིན་བཅུ་མཐར་ཕྱིན་ཁྲོ་རྒྱལ་ཆེན་པོ་བཅུ། །རྒྱལ་ལོ་གདོན་བཅུའི་དཔུང་ལས་རྒྱལ་གྱུར་ཅིག །ཁྲག་འཐུང་ཀུན་གྱི་མངོན་སྤྱོད་ཕོ་ཉ་བ། །དྲན་པ་ཙམ་གྱིས་བདུད་དགྲ་དམ་སྲིའི་དཔུང༌། །འགུགས་མཛད་ཁྲོ་བོ་ཆེན་པོ་འདོད་པའི་རྒྱལ། །རྒྱལ་ལོ་ཡིད་སྲུབ་དཔུང་ལས་རྒྱལ་གྱུར་ཅིག །རྒྱལ་ཀུན་ཡེ་ཤེས་རིགས་སྔགས་དམོད་པའི་གཟུགས། །དྲང་སྲོང་ཁྲོས་པ་མཐུ་སྟོབས་རྡོ་རྗེའི་མཚོན། །མཐར་བྱེད་དམོད་གྲུབ་ལོཀྟྲི་པཱ་ལ་ཆེ། །རྒྱལ་ལོ་བྱད་ཕུར་ཀུན་ལས་རྒྱལ་གྱུར་ཅིག །ཚད་མེད་ཕྲིན་ལས་རྣམ་བཞིའི་བང་རིམ་དུ། །ཚར་གཅོད་རྗེས་འཛིན་ཕྲིན་ལས་ཐོགས་པ་མེད། །བརྒྱུད་གསུམ་སྲུང་མ་དམ་ཅན་རྒྱ་མཚོའི་ཚོགས། །རྒྱལ་ལོ་ནག་ཕྱོགས་གཡུལ་ལས་རྒྱལ་གྱུར་ཅིག །སྣང་སྲིད་ཟིལ་གནོན་རིན་ཆེན་སེང་གེའི་ཁྲིར། །བཀའ་སྡོད་ལྷ་སྲིན་སྡེ་བརྒྱད་དཀར་ཕྱོགས་དཔུང༌། །རྒྱལ་བའི་བཀའ་དང་ཐ་ཚིག་ལ་གནས་ཀུན། །རྒྱལ་ལོ་ཕྲིན་ལས་ཐོགས་མེད་རྒྱལ་གྱུར་ཅིག །ངོ་བོ་ཆོས་ཉིད་གཅིག་ལས་གཞན་མིན་ཀྱང༌། །རྣམ་པ་དཀོན་མཆོག་རྩ་གསུམ་སྐུ་བཞིའི་བདག །དོན་གཉིས་ལྷུན་གྲུབ་བསྟན་འགྲོའི་ཕན་བདེའི་དཔལ། །རྒྱལ་ལོ་དགེ་ལེགས་རྣམ་པར་རྒྱལ་གྱུར་ཅིག །ཁྱེད་རྣམས་རྣམ་ཀུན་མཆོག་ལྡན་ཆོས་སྐུའི་དབྱིངས། །མི་འཇིགས་རྣམ་བཞི་དབང་དང་སྟོབས་བཅུའི་དཔལ། །མཁྱེན་བརྩེ་ནུས་པའི་བྱིན་རླབས་རྨད་བྱུང་བས། །རྒྱལ་ལོ་བདག་ཅག་ཕྲིན་ལས་རྒྱལ་གྱུར་ཅིག །ཕྱི་རོལ་ལོ་ཟླ་ཞག་དུས་ལ་འཆར་བའི། །བཅུ་གསུམ་བར་ཆོད་ཀེག་སྲི་སྡེ་དང་བཅས། །འཆོལ་བའི་ཁྲོ་རྒྱལ་འཁོར་བཅས་ནུས་སྟོབས་ཀྱིས། །རྒྱལ་ལོ་སྲི་ཀེག་ཀུན་ལས་རྒྱལ་གྱུར་ཅིག །ནང་དུ་རྡོ་རྗེ་ཕུང་པོའི་རྩ་ཐིག་རླུང༌། །འཕེལ་འགྲིབ་འཕོ་འགྱུར་ཉེར་ལེན་ལས་བྱུང་བའི། །ནད་མུག་མཚོན་རྒུད་སྐལ་པ་ངན་པ་ལས། །རྒྱལ་ལོ་ཚེ་བསོད་དཔལ་ཀུན་རྒྱལ་གྱུར་ཅིག །གསང་བ་གཟུང་འཛིན་ཀུན་རྟོག་འཁྲུལ་པ་ཡིས། །མེད་བཞིན་སྣང་བའི་ཀུན་འབྱུང་ལས་ཉོན་སྲི། ཡེ་ཤེས་རྡོ་རྗེའི་དབྱིངས་སུ་མཐར་བྱས་ཏེ། །རྒྱལ་ལོ་བདུད་བཞིའི་དཔུང་ལས་རྒྱལ་གྱུར་ཅིག །ཆོས་དབྱིངས་འགྱུར་མེད་བདེ་བ་ཆེན་པོའི་ཀློང༌། །བགེགས་དང་བར་ཆད་མི་མཐུན་མིང་ཡང་མེད། །རང་བྱུང་ཡེ་ཤེས་འཕེལ་འགྲིབ་བྲལ་བ་ཡིས། །རྒྱལ་ལོ་ཕྱོགས་དུས་ཀུན་ཏུ་རྒྱལ་གྱུར་ཅིག །ཅེས་པའང་མེ་འབྲུག་ཆུ་སྟོད་ཟླ་བའི་སྟོང་གི་ཉི་མ་ལྷོ་འབྲུག་ཐིམ་ཡུལ་བཀྲ་ཆོས་རྫོང་དུ་གཏོར་ཟློག་སྐབས་པདྨ་གར་དབང་མདོ་སྔགས་གླིང་པས་སྤེལ་བ་དཀར་ཕྱོགས་རྣམ་པར་རྒྱལ་བའི་རྒྱལ་མཚན་དུ་གྱུར་ཅིག །ཛ་ཡནྟུ།། །།

[edit]

@#/__/rdo rje srin po khrag 'thung rak+sha thod phreng rtsal gyi rgyal dbyangs g.yul rgyal lha yi rnga chen zhes bya ba bi dza ha raM/_hU~M hrIH_'od gsal kun khyab ye shes chos sku'i dbyings/_/zag med rnam byang yon tan bkod mdzes pa/_/sangs rgyas kun gyi spros bral thugs kyi gzugs/_/rgyal lo bdud 'dul phrin las rgyal gyur cig_/bltar mi mngon pa 'od kyi gtsug tor tshul/_/ye shes nor bu'i gzi byin 'bar ba'i klong*/_/brgyud gsum rig 'dzin grub thob rgya mtsho'i tshogs/_/rgyal lo srid zhi'i bla na rgyal gyur cig_/rim pa bcu gsum chos kyi 'khor lo ru/_/bdud 'dul shAkya seng ge phyogs dus kyi/_sangs rgyas byang sems bsam mi khyab pa rnams/_/rgyal lo 'jig rten gsum na rgyal gyur cig_/dpal gyi mgul mtshon bre yi dkyil 'khor klong*/_/sgyu 'phrul dra ba rgyud sde rnam bzhi'i lha/_/bsam yas rdo rje dbyings kyi yi dam lha/_/rgyal lo bdud bzhi'i dpung las rgyal gyur cig_/gzhon nu bum pa sku yi dbyings kyi srog_/spyi dpal chen po rak+sha thod phreng rtsal/_/sangs rgyas 'dus pa'i phrin las srin po'i rgyal/_/rgyal lo nag phyogs kun las rgyal gyur cig_/stobs bcu'i ye shes khro rgyal 'bar ba'i tshul/_/dbang bcu'i phrin las mkha' khyab 'gro la 'jug_/phyin bcu mthar phyin khro rgyal chen po bcu/_/rgyal lo gdon bcu'i dpung las rgyal gyur cig_/khrag 'thung kun gyi mngon spyod pho nya ba/_/dran pa tsam gyis bdud dgra dam sri'i dpung*/_/'gugs mdzad khro bo chen po 'dod pa'i rgyal/_/rgyal lo yid srub dpung las rgyal gyur cig_/rgyal kun ye shes rigs sngags dmod pa'i gzugs/_/drang srong khros pa mthu stobs rdo rje'i mtshon/_/mthar byed dmod grub lok+t+ri pA la che/_/rgyal lo byad phur kun las rgyal gyur cig_/tshad med phrin las rnam bzhi'i bang rim du/_/tshar gcod rjes 'dzin phrin las thogs pa med/_/brgyud gsum srung ma dam can rgya mtsho'i tshogs/_/rgyal lo nag phyogs g.yul las rgyal gyur cig_/snang srid zil gnon rin chen seng ge'i khrir/_/bka' sdod lha srin sde brgyad dkar phyogs dpung*/_/rgyal ba'i bka' dang tha tshig la gnas kun/_/rgyal lo phrin las thogs med rgyal gyur cig_/ngo bo chos nyid gcig las gzhan min kyang*/_/rnam pa dkon mchog rtsa gsum sku bzhi'i bdag_/don gnyis lhun grub bstan 'gro'i phan bde'i dpal/_/rgyal lo dge legs rnam par rgyal gyur cig_/khyed rnams rnam kun mchog ldan chos sku'i dbyings/_/mi 'jigs rnam bzhi dbang dang stobs bcu'i dpal/_/mkhyen brtse nus pa'i byin rlabs rmad byung bas/_/rgyal lo bdag cag phrin las rgyal gyur cig_/phyi rol lo zla zhag dus la 'char ba'i/_/bcu gsum bar chod keg sri sde dang bcas/_/'chol ba'i khro rgyal 'khor bcas nus stobs kyis/_/rgyal lo sri keg kun las rgyal gyur cig_/nang du rdo rje phung po'i rtsa thig rlung*/_/'phel 'grib 'pho 'gyur nyer len las byung ba'i/_/nad mug mtshon rgud skal pa ngan pa las/_/rgyal lo tshe bsod dpal kun rgyal gyur cig_/gsang ba gzung 'dzin kun rtog 'khrul pa yis/_/med bzhin snang ba'i kun 'byung las nyon sri/_ye shes rdo rje'i dbyings su mthar byas te/_/rgyal lo bdud bzhi'i dpung las rgyal gyur cig_/chos dbyings 'gyur med bde ba chen po'i klong*/_/bgegs dang bar chad mi mthun ming yang med/_/rang byung ye shes 'phel 'grib bral ba yis/_/rgyal lo phyogs dus kun tu rgyal gyur cig_/ces pa'ang me 'brug chu stod zla ba'i stong gi nyi ma lho 'brug thim yul bkra chos rdzong du gtor zlog skabs pad+ma gar dbang mdo sngags gling pas spel ba dkar phyogs rnam par rgyal ba'i rgyal mtshan du gyur cig__/dza yan+tu//_//