DKR-KABUM-13-PA-001

🚧 This website is under continued development. We appreciate your patience!

First text in volume. Back to Volume PageNext Text

Wylie title	'
Location	dil mgo mkhyen brtse bka' 'bum Volume 13, Text 1, Pages (Folios 1a to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Associated People	མཆོག་གྱུར་གླིང་པ་ (mchog gyur gling pa)
Citation	Khyentse, Dilgo. '. In Skyabs rje dil mgo mkhyen brtse rin po che'i bka' 'bum, Vol. 13: . Delhi: Shechen Publications, 1994.
Genre	Empowerment Ritual - dbang chog - dbang skur
Cycle	སྐུ་གསུམ་རིག་འདུས་ཟབ་ཏིག་ (sku gsum rigs 'dus zab tig)
Deity	pad+ma'i myu gu

Tibetan Text

Wylie

[edit]

༁ྃ༔ ༔སྐུ་གསུམ་རིགས་འདུས་ཟབ་ཏིག་ལས༔ དབང་ཆོག་བདེ་ཆེན་བུམ་བཟང་བཞུགས༔ ༁ྃ༔ སྐུ་གསུམ་རིགས་འདུས་བླ་མར་འདུད༔ སྔགས་ཀྱི་རྩ་བ་དབང་སྐུར་ཏེ༔ སྲོག་ནི་དམ་ཚིག་སྡོམ་པས་བཟུང༔ རིམ་གཉིས་ལམ་གྱིས་གསོས་བཏབ་པས༔ སྐུ་བཞིའི་འབྲས་བུ་མངོན་དུ་འགྱུར༔ ས་མ་ཡ༔ དེ་ལ་ཐོག་མར་རྩ་བའི་དབང༔ རྒྱས་པར་བསྐུར་བའི་རིམ་པ་ནི༔ དབེན་པའི་གནས་སུ་སྟེགས་བུའི་དབུས༔ དཀྱིལ་འཁོར་མཚན་ཉིད་རྫོགས་པ་དང༔ དབང་རྫས་མཆོད་ཚོགས་འདུ་བྱས་ལ༔ བདག་མདུན་དབྱེར་མེད་བསྐྱེད་ཅིང་བཟླ༔ ཚོགས་ཀྱི་འཁོར་ལོ་རྒྱས་པར་བསྐོར༔ སློབ་དཔོན་བདག་ཉིད་འཇུག་པ་དང༔ སློབ་མ་འཇུག་པར་གནང་བ་ནོད༔ སྣོད་ལྡན་ཁྲུས་བྱས་བགེགས་ཕྲལ་ལ༔ སྲུང་འཁོར་བསྒོམ་ཞིང་ངེས་ཤེས་བསྐྱེད༔ མཎྜལ་ཕུལ་ལ་ཆས་སུ་གཞུག༔ མེ་ཏོག་དང་བཅས་གསོལ་གསུམ་གདབ༔ ཧོ༔ རིགས་འདུས་བླ་མ་རྡོ་རྗེ་འཛིན་པ་དགོངས༔ བདག་ཅག་གསང་བ་མཆོག་གི་དཀྱིལ་འཁོར་དུ༔ སྨིན་གྲོལ་དབང་མཆོག་ཟབ་མོ་དོན་གཉེར་ན༔ ཐུགས་རྗེ་ཆེན་པོས་རྗེས་སུ་བཟུང་དུ་གསོལ༔ ཞེས་གསོལ་དེ་ལ་ལན་སྦྱིན་པ༔ ཧོ༔ བླ་མེད་གསང་བ་མཆོག་གི་དཀྱིལ་འཁོར་འདིར༔ ཞུགས་པ་ལེགས་ཀྱང་དམ་ཚིག་བསྲུང་དཀའ་བས༔ ཐུན་མོང་ཁྱད་པར་བསླབ་ལས་མི་འདའ་ན༔ ཡེ་ཤེས་མཆོག་གི་དབང་བསྐུར་སྦྱིན་པར་བྱ༔ སླར་ཡང་ནན་ཏན་གསོལ་བ་གདབ༔ བླ་མས་གནང་བའི་དམ་ཚིག་སྲོག་བཞིན་བསྲུང༔ མཐའ་ཡས་འགྲོ་བ་ཀུན་གྱི་དོན་བགྱིད་ཕྱིར༔ རིགས་འདུས་རྣལ་འབྱོར་རྩེ་གཅིག་བསྒྲུབ་ལགས་ན༔ ཐུགས་རྗེས་དགོངས་ཏེ་ངེས་པར་གནང་དུ་གསོལ༔ རྒྱུད་སྦྱང་སླད་དུ་འདི་ལྟར་གདམས༔ དེ་ལྟར་ཡིན་ན་རིགས་འདུས་བླ་མ་ཡི༔ དཀྱིལ་འཁོར་ཆེན་པོར་འཇུག་ཅིང་སྨིན་པར་བྱ༔ ངེས་འབྱུང་ལྷག་པའི་བསམ་པ་རྩེ་གཅིག་པས༔ རང་རྒྱུད་དག་པའི་ཐབས་ལ་འཇུག་པར་འཚལ༔ ཞེས་གདམས་སྐྱབས་སེམས་ཚོགས་བསག་བྱ༔ ཁྱད་པར་སྡོམ་པ་བཟུང་བ་ནི༔ ཧོཿ རིགས་འདུས་བླ་མའི་ལྷ་ཚོགས་དགོངས་སུ་གསོལ༔ བདག་གིས་དེང་བཟུང་བྱང་ཆུབ་སྙིང་པོའི་བར༔ མཁའ་མཉམ་འགྲོ་ཀུན་ཡོངས་སུ་སྒྲོལ་བའི་ཕྱིར༔ རྩ་གསུམ་རབ་འབྱམས་སྐྱབས་ཀྱི་མཆོག་ཏུ་བཟུང༔ ལུས་ངག་ཡིད་གསུམ་གཞན་གནོད་གཞིར་བཅས་སྤང༔ གཞན་ཕན་སྨོན་འཇུག་བྱང་ཆུབ་སེམས་གཉིས་བསྐྱེད༔ མཉམ་པ་ཆེན་པོའི་ཐབས་ཀྱིས་ལམ་བསྒྲུབ་པའི༔ སྤྱི་དང་ཁྱད་པར་ལྷག་པའི་དམ་ཚིག་རྣམས༔ སྲོག་གི་ཕྱིར་ཡང་མི་བཏང་བཟུང་ལགས་ན༔ རྡོ་རྗེ་རྒྱལ་པོས་བརྩེ་བས་ཉེར་དགོངས་ཏེ༔ བདག་རྒྱུད་ཡོངས་སུ་སྨིན་ཅིང་གྲོལ་མཛད་གསོལ༔ སྙིང་གར་བྱང་ཆུབ་སེམས་གཉིས་ཀྱི༔ ངོ་བོ་ཟླ་བ་རྡོ་རྗེ་བསྒོམ༔ ཨོཾ་སརྦ་ཡོ་ག་བོ་དྷི་ཙིཏྟ་ཨཿ ཞེས་པས་བསྐྱེད་ཅིང་བརྟན་པར་བྱ༔ བོ་དྷི་ཙིཏྟ་ས་མ་ཡ་སྟྭཾ༔ ཛཿཧཱུྃ་བྃ་ཧོཿ པྲ་བེ་ཤ་ཡ་ཕཊ྄༔ མཆན། པྲ་བེ་ཤ་ཡིས་སྒོ་ཕྱེ་ལ༔ ས་མ་ཡ་སྟྭྃ་གྱིས་ཤར་སྒོར་བཞག༔ ཚད་མེད་བཞི་ཡི་འཇུག་པས་གཞུག༔ སྐུ་གསུང་ཐུགས་ཀྱི་ཕྱག་ཀྱང་བྱ༔ སླར་ཡང་ཤར་སྒོར་འཁོད་པ་ལ༔ ཡེ་ཤེས་དབབ་པར་བྱ་བའི་སླད༔ སྦྱོར་བ་བདུད་རྩིའི་ཆུ་ནན་སྦྱིན༔ ཧཱུྃ༔ འདའ་དཀའ་རྡོ་རྗེ་དམ་ཚིག་བཅུད་རྩིའི་ཆུ༔ དམ་ཚིག་མ་བསྲུངས་སྲོག་གི་གཤེད་དུ་འབེབས༔ བསྲུངས་ན་ཡེ་ཤེས་དངོས་གྲུབ་ཚེ་འདིར་ཐོབ༔ དེ་བས་དམ་སྲུངས་བདུད་རྩིའི་ཆུ་འཐུངས་ཤིག༔ ས་མ་ཡ་ཨུ་ད་ཀ་བཛྲ་ཨ་མྲྀ་ཏ་ཧཱུྃ་ཧྲཱིཿཋ༔ དངོས་གཞིའི་ཆེད་དུ་གསོལ་བ་གདབ༔ ཧོཿ བདེ་གཤེགས་སྐུ་གསུམ་རིགས་འདུས་ལྷ་ཚོགས་ཀྱི༔ ཡེ་ཤེས་གཟི་བྱིན་དེང་འདིར་ཕབ་ནས་ཀྱང༔ བདག་གནས་རྣལ་འབྱོར་ལྷ་དང་ཆོས་ཉིད་ཀྱི༔ ཡེ་ཤེས་རོལ་པའི་གཟི་བྱིན་བསྐྱེད་དུ་གསོལ༔ ཞེས་གསོལ་སྒོ་གསུམ་གནད་གཅུན་ལ༔ གཞི་ལུས་བཛྲ་ཡོ་གི་ནཱི༔ སྐུ་གསུམ་རིགས་འདུས་ལྷར་བཅས་གསལ༔ སྙོམས་འཇུག་སྒྲ་དང་འོད་ཟེར་གྱིས༔ བསྐུལ་ཏེ་སློབ་དཔོན་ལྟ་དགོངས་བསྐྱེད༔ ཡེ་ཤེས་དབབ་ལ་ནན་ཏན་བྱ༔ མ་གྲུབ་སྤོགས་པའི་ཆོ་ག་ནི༔ སྙིང་གའི་པདྨ་སེམས་དཔའ་ལ༔ རྩེ་གཅིག་སེམས་བཟུང་མོས་གུས་ཀྱིས༔ སྐུ་ལས་བདེ་ཆེན་འོད་ཟེར་འཕྲོས༔ ལུས་གང་དྭངས་མ་སྙིང་དབུས་ཐིམ༔ བདེ་སྟོང་ཡེ་ཤེས་སྐྱེས་པར་བསམ༔ བརྗོད་མེད་ངང་བཞག་ཧཱུྃ་དབྱངས་བྱ༔ ཕེབས་ནས་ཏིཥྛ་བཛྲས་བརྟན༔ རིགས་ངེས་བྱ་ཕྱིར་མེ་ཏོག་དོར༔ ཧོཿ ཚེ་རབས་འབྲེལ་བའི་རིགས་འདུས་བླ་མ་ལྷར༔ རིན་ཆེན་མེ་ཏོག་ཕྲེང་བ་གུས་པས་འབུལ༔ ཐུགས་རྗེས་བཞེས་ཏེ་བྱང་ཆུབ་སྙིང་པོའི་བར༔ མི་འབྲལ་བྱིན་གྱིས་བརླབ་པར་མཛད་དུ་གསོལ༔ རཏྣ་པུཥྤེ་པྲ་ཏཱི་ཙྪ་ཧོཿ དབུས་མདུན་ཕྱོགས་བཞིར་བབས་པ་ན༔ རིགས་དྲུག་དབུས་རྡོ་རྗེ་སེམས་དཔའ་དེའི་མདུན་ཧེ་རུ་ཀ །ཤར་རྟག་པ། ལྷོ་ཉི་མ། ནུབ་གར་དབང༌། བྱང་རྟ་མཆོག་གོ རིགས་སུ་ངེས་བྱས་ལ༔ མིང་གདགས་ཅོད་པན་སྤྱི་བོར་འཆིང༔ ཧོཿ རྒྱལ་བ་རིགས་དྲུག་ཡེ་ཤེས་ཅིར་སྣང་ཡང༔ བླ་མ་སྐུ་གསུམ་དབྱེར་མེད་དབྱིངས་ལས་ཤར༔ རིགས་ཀྱི་ཅོད་པན་སྤྱི་བོར་བཅིངས་པ་ཡིས༔ དེངས་ནས་བཟུང་སྟེ་འབྲལ་མེད་བྱིན་གྱིས་རློབས༔ པུཥྤེ་སིདྡྷི་ཨ་བེ་ཤ་ཡ་སྟྭཾ༔ ཡེ་ཤེས་ཐུར་མས་མ་རིག་བསལ༔ ཧོཿ མ་རིག་ལིང་ཏོག་ཚོགས་བརྒྱད་ཀུན་གཞིར་བཅས༔ རིག་པ་ཡེ་ཤེས་གསེར་གྱི་ཐུར་མས་བསལ༔ རྣམ་པར་དག་པའི་གཟིགས་པ་ལ་བརྟེན་ནས༔ རིགས་འདུས་དོན་གྱི་ལྷ་ཚོགས་མངོན་གྱུར་ཤོག༔ ཛྙཱ་ན་ཙཀྵུ་པྲ་བེ་ཤ་ཡ་ཕཊ྄༔ མཐོང་བ་བསྟན་ཅིང་དེ་ཉིད་བརྗོད༔ དེ་ནས་དངོས་གཞིའི་དབང་བསྐུར་ལ༔ ཐོག་མར་བུམ་པའི་དབང་གི་སླད༔ མཎྜལ་དང་བཅས་གསོལ་བ་གདབ༔ ཧོཿ ཇི་ལྟར་གདོད་མའི་རྡོ་རྗེ་འཆང་ཆེན་པོས༔ རང་གི་སྲས་ལ་བྱང་ཆུབ་དབང་བསྐུར་ལྟར༔ དཀྱིལ་འཁོར་ཁྱབ་བདག་རྡོ་རྗེ་སློབ་དཔོན་གྱིས༔ བདག་ཀྱང་ཡོངས་སུ་སྨིན་ཅིང་གྲོལ་མཛད་གསོལ༔ སློབ་དཔོན་ཐུགས་ཀའི་འོད་ཟེར་གྱིས༔ དབང་ལྷ་སྤྱན་དྲངས་མཆོད་བསྟོད་གསོལ༔ སློབ་མ་བླ་མ་རྡོར་སེམས་བསྐྱེད༔ མི་བསྐྱོད་ཆུ་ཡི་དབང་བསྐུར་བྱ༔ ཧཱུྃ༔ བླ་མ་རྡོ་རྗེ་སེམས་དཔའི་ངོ་བོ་ཉིད༔ མི་བསྐྱོད་བདུད་རྩི་ཆུ་ཡི་དབང་བསྐུར་བས༔ རྣམ་ཤེས་གནས་འགྱུར་མེ་ལོང་ཡེ་ཤེས་སྐུ༔ རྡོ་རྗེ་རིགས་ཀྱི་དབང་མཆོག་ཐོབ་པར་ཤོག༔ ཨོཾ་བཛྲ་ཨ་བྷི་ཥིཉྩ་ཧཱུྃ༔ སློབ་མ་བླ་མ་ཉི་མར་བསྐྱེད༔ རིན་འབྱུང་དབུ་རྒྱན་དབང་བསྐུར་བྱ༔ ཏྲཱྃ༔ བླ་མ་རྡོ་རྗེ་ཉི་མའི་ངོ་བོ་ཉིད༔ རིན་ཆེན་འབྱུང་ལྡན་དབུ་རྒྱན་དབང་སྐུར་བས༔ ཚོར་བ་གནས་འགྱུར་མཉམ་ཉིད་ཡེ་ཤེས་སྐུ༔ རིན་ཆེན་རིགས་ཀྱི་དབང་ཆོག་ཐོབ་པར་ཤོག༔ ཨོཾ་རཏྣ་ཨ་བྷི་ཥིཉྩ་ཏྲཱྃ༔ སློབ་མ་བླ་མ་པདྨ་གར་དབང་བསྐྱེད༔ སྣང་མཐའ་རྡོ་རྗེའི་དབང་བསྐུར་བྱ༔ ཧྲཱིཿ བླ་མ་གར་དབང་ངོ་བོ་ཉིད༔ སྣང་བ་མཐའ་ཡས་རྡོ་རྗེའི་དབང་བསྐུར་བས༔ འདུ་ཤེས་གནས་འགྱུར་སོར་རྟོག་ཡེ་ཤེས་སྐུ༔ པདྨའི་རིགས་ཀྱི་དབང་མཆོག་ཐོབ་པར་ཤོག༔ ཨོཾ་པདྨ་ཨ་བྷི་ཥིཉྩ་ཧྲཱིཿ སློབ་མ་བླ་མ་རྟ་མཆོག་བསྐྱེད༔ དོན་འགྲུབ་དྲིལ་བུའི་དབང་བསྐུར་བྱ༔ ཧཱ༔ བླ་མ་རྟ་མཆོག་རོལ་པའི་ངོ་བོ་ཉིད༔ དོན་ཡོད་གྲུབ་པ་དྲིལ་བུའི་དབང་བསྐུར་བས༔ འདུ་བྱེད་གནས་འགྱུར་བྱ་གྲུབ་ཡེ་ཤེས་སྐུ༔ ལས་ཀྱི་རིགས་ཀྱི་དབང་མཆོག་ཐོབ་པར་ཤོག༔ ཨོཾ་ཀརྨ་ཨ་བྷི་ཥིཉྩ་ཧཱ༔ སློབ་མ་བླ་མ་རྟག་པར་བསྐྱེད༔ རྣམ་སྣང་མིང་གི་དབང་བསྐུར་བྱ༔ ཨོཾ༔ བླ་མ་རྒྱལ་བ་རྟག་པའི་ངོ་བོ་ཉིད༔ རྣམ་པར་སྣང་མཛད་མིང་གི་དབང་བསྐུར་བས༔ གཟུགས་ཕུང་གནས་འགྱུར་ཆོས་དབྱིངས་ཡེ་ཤེས་སྐུ༔ བདེ་གཤེགས་རིགས་ཀྱི་དབང་མཆོག་ཐོབ་པར་ཤོག༔ ཨོཾ་བུདྡྷ་ཨ་བྷི་ཥིཉྩ་ཨོཾ༔ དེ་ལྟར་སློབ་མའི་དབང་བསྐུར་ནས༔ རྡོ་རྗེ་སློབ་དཔོན་དབང་གི་སླད༔ སློབ་མ་བླ་མ་ཧེ་རུ་ཀར༔ བསྐྱེད་ལ་དམ་ཚིག་རྣམ་གསུམ་སྦྱིན༔ ཧཱུྃ༔ བླ་མ་ཧེ་རུ་ཀ་ཡི་ངོ་བོ་ཉིད༔ མི་ཕྱེད་དམ་ཚིག་གསུམ་གྱི་དབང་བསྐུར་བས༔ སྒོ་གསུམ་གནས་འགྱུར་འོད་གསལ་ཡེ་ཤེས་སྐུ༔ རིགས་ཀུན་ཁྱབ་བདག་ཆེན་པོའི་དབང་ཐོབ་ཤོག༔ ཨོཾ་ཤྲཱི་ཧེ་རུ་ཀ་བཛྲ་གཎྜེ་ཨ་བྷི་ཥིཉྩ་ཨ་ཨ༔ སོ་སོའི་མཐར་ནི་ཆུ་དབང་བསྐུར༔ རིགས་ཀྱི་བདག་པོས་སྤྱི་གཙུག་ཏུ་མི་བསྐྱོད། རྣ་ལྟག་གཡས་སུ་རིན་འབྱུང༌། ལྟག་པར་སྣང་མཐའ། གཡོན་དུ་དོན་གྲུབ། དཔྲལ་བར་རྣམ་སྣང༌། མི་བསྐྱོད་པའི་མདུན་དུ་རྡོར་སེམས།སྤྱི་བོར་བརྒྱན༔ མཆོད་དང་ཤིས་པས་མངའ་དབུལ་ཞིང༔ དག་ཐོབ་ཡོན་ཏན་བརྗོད་པར་བྱ༔ རྗེས་འབྲེལ་ནུས་པའི་དབང་བསྐུར་ལ༔ ལྷ་སྐུ་ཕྱག་རྒྱ་སྤྱི་བོར་བཞག༔ གཞི་ལུས་ལྷར་བཅས་བསྐྱེད་ལ་བསྟིམ༔ སྣང་སྟོང་ཡེ་ཤེས་འཆར་བར་བསམ༔ ཧྲཱིཿ རིགས་དང་དཀྱིལ་འཁོར་ཀུན་གྱི་ཁྱབ་བདག་ཆེ༔ པདྨ་ཀུན་ཏུ་འཆང་བའི་དབང་བསྐུར་བས༔ གཟུང་འཛིན་འཁྲུལ་པའི་སྣང་བ་ཇི་སྙེད་ཀུན༔ རིག་སྟོང་ཆོས་ཀྱི་སྐུ་རུ་དག་པར་ཤོག༔ ཨོཾ་ཨཱཿཧཱུྃ་མ་ཧཱ་གུ་རུ་པདྨ་དྷཱ་ར་སརྦ་སིདྡྷི་ཧཱུྃ༔ ཀཱ་ཡ་ཨ་བྷི་ཥིཉྩ་ཨོཾ༔ ཧྲཱིཿ གར་གྱི་དབང་ཕྱུག་སེམས་དཔའ་པདྨའི་སྤྱན༔ ཨོ་རྒྱན་ཚེ་དཔག་མེད་ཀྱི་དབང་བསྐུར་བས༔ ལས་རླུང་འཁྲུལ་པའི་སྣང་བ་ཇི་སྙེད་ཀུན༔ བདེ་སྟོང་ལོངས་སྤྱོད་རྫོགས་སྐུར་དག་པར་ཤོག༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཨཱ་ཡུ་ཥེ་སརྦ་སིདྡྷི་ཧཱུྃ༔ ཀཱ་ཡ་ཨ་བྷི་ཥིཉྩ་ཨོཾ༔ ཧྲཱིཿ མ་འགག་སྒྱུ་འཕྲུལ་དྲྭ་བའི་ཚུལ་འཆང་བ༔ འགྲོ་འདུལ་པདྨའི་མྱུ་གུའི་དབང་བསྐུར་བས༔ རྩ་ཁམས་འཁྲུལ་པའི་སྣང་བ་ཇི་སྙེད་ཀུན༔ གསལ་སྟོང་སྤྲུལ་པའི་སྐུ་རུ་དག་པར་ཤོག༔ ཨོཾ་ཨཱཿཧཱུྃ་བཛྲ་གུ་རུ་པདྨ་སཏྭ་སརྦ་སིདྡྷི་ཧཱུྃ༔ ཀཱ་ཡ་ཨ་བྷི་ཥིཉྩ་ཨོཾ༔ ཧྲཱིཿ སྐུ་གསུམ་རྒྱལ་བ་མ་ལུས་འབྱུང་བའི་གནས༔ མཁའ་སྤྱོད་ལྷན་ཅིག་སྐྱེས་མའི་དབང་བསྐུར་བས༔ སྒྲིབ་གཉིས་འཁྲུལ་པའི་སྣང་བ་ཇི་སྙེད་ཀུན༔ དབྱེར་མེད་བདེ་ཆེན་སྐུ་རུ་དག་པར་ཤོག༔ ཨོཾ་ཨཱཿཧཱུྃ་པདྨོ་ཡོ་གི་ནཱི་སརྦ་སིདྡྷི་ཧཱུྃ༔ ཀཱ་ཡ་ཨ་བྷི་ཥིཉྩ་ཨོཾ༔ ཧཱུྃ༔ སྐུ་དང་ཡེ་ཤེས་རྣམ་རོལ་ཅིར་ཡང་ཤར༔ ཞི་ཁྲོ་རིགས་འདུས་རྒྱལ་བའི་དབང་བསྐུར་བས༔ ཕུང་ཁམས་སྐྱེ་མཆེད་འཁྲུལ་སྣང་ཇི་སྙེད་ཀུན༔ རབ་འབྱམས་ལྷ་ཡི་འཁོར་ལོར་དག་པར་ཤོག༔ ཨོཾ་ཨཱཿཧཱུྃ་བཛྲ་གུ་རུ་གུ་ཧྱ་ཛྙཱ་ན་བོདྷི་ཙིཏྟ་མ་ཧཱ་སུ་ཁ་ཧཱུྃ་ཧཱུྃ༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཀཱ་ཡ་ཨ་བྷི་ཥིཉྩ་ཨོཾ༔ སོ་སོའི་སྔགས་ཀྱི་བཟླས་ལུང་སྦྱིན༔ གྲགས་སྟོང་ཡེ་ཤེས་འཆར་བར་བསམ༔ བརྟན་ཕྱིར་སྔགས་ཕྲེང་མགྲིན་པར་བཞག༔ ཨཱཿ འགྲོ་འོང་བརྟན་དང་གཡོ་བའི་སྒྲ་སྐད་ཀུན༔ རྡོ་རྗེའི་སྔགས་ཀྱི་ངོ་བོར་དབང་བསྐུར་བས༔ ཕྱི་ནང་རླུང་གི་རྒྱུ་བ་ཇི་སྙེད་ཀུན༔ གྲགས་སྟོང་ཡི་གེའི་སྤྲིན་དུ་རྫོགས་པར་ཤོག༔ ཨོཾ་མ་ཧཱ་གུ་རུ་སརྦ་ཏ་ཐཱ་ག་ཏ་ཝཱཀ་ཨ་བྷི་ཥིཉྩ་ཨཱཿ ལྷ་སྔགས་སེམས་ཉིད་དབྱེར་མེད་པ༔ འོད་གསལ་ཐུགས་སུ་ངོ་སྤྲད་ཅིང༔ མེ་ལོང་གསལ་བའི་བརྡས་མཚོན་ཏེ༔ ཧཱུྃ༔ ལྷ་དང་སྔགས་ཀུན་མེ་ལོང་གཟུགས་བརྙན་ལྟར༔ འོད་གསལ་གཉུག་མའི་ངོ་བོར་དབང་བསྐུར་བས༔ ཆོས་དང་ཆོས་ཅན་སྤྲོས་པ་ཇི་སྙེད་ཀུན༔ དབྱིངས་རིག་ཟུང་འཇུག་ཐུགས་སུ་སྨིན་པར་ཤོག༔ ཨོཾ་མ་ཧཱ་གུ་རུ་སརྦ་ཏ་ཐཱ་ག་ཏ་ཙིཏྟ་ཨ་བྷི་ཥིཉྩ་ཧཱུྃ༔ དེ་ལྟར་བུམ་དབང་བསྐུར་བ་ཡིས༔ སྣང་ཞེན་ལུས་ཀྱི་སྒྲིབ་པ་དག༔ བསྐྱེད་རིམ་ཕྲིན་ལས་སྒྲུབ་ལ་དབང༔ སྤྲུལ་པའི་སྐུ་རུ་སྨིན་པར་འགྱུར༔ ཟབ་དབང་གསུམ་གྱི་དང་པོ་ནི༔ བླ་མ་ཨོ་རྒྱན་ཚེ་དཔག་མེད༔ ཡབ་ཡུམ་མཉམ་སྦྱོར་བྱང་སེམས་སྦྱིན༔ ཨཱཿ སྣང་བའི་ངོ་བོ་པདྨ་ཚེ་དཔག་མེད༔ སྟོང་པའི་རང་བཞིན་འཆི་མེད་མནྡཱ་ར༔ མཉམ་སྦྱོར་ཐུགས་རྗེ་བྱང་སེམས་དབང་བསྐུར་བས༔ ལས་རླུང་དབུ་མའི་དབྱིངས་སུ་ཐིམ་པར་ཤོག༔ ཨོཾ་གུ་ཧྱ་ཨ་མྲྀ་ཏ་བོ་དྷི་ཙིཏྟ་ས་མ་ཡ་ཨཱ༔ གསང་དབང་ཐོབ་ནས་ངག་སྒྲིབ་དག༔ རླུང་དང་གཏུམ་མོ་བསྒོམ་ལ་དབང༔ ལོངས་སྤྱོད་རྫོགས་སྐུར་སྨིན་པར་འགྱུར༔ མཚན་ཉིད་ལྡན་པའི་རིགས་ཀྱི་ཡུམ༔ རྣལ་འབྱོར་མ་ཡི་ངོ་བོ་སྦྱིན༔ སློབ་མས་དབང་ཆེན་རྟ་མགྲིན་གྱི༔ ང་རྒྱལ་དང་བཅས་བདེ་བ་བསྒྲུབ༔ ཧཱུྃ༔ འདི་ནི་བདེ་ཆེན་ཡེ་ཤེས་འབྱུང་བའི་གནས༔ ལྷན་ཅིག་སྐྱེས་མ་པདྨའི་རིགས་ཀྱི་ལྕམ༔ དགའ་བཞིའི་ཐར་པ་བསྟེན་པའི་དབང་བསྐུར་བས༔ དཔེ་ཡི་ཡེ་ཤེས་རྒྱུད་ལ་འཆར་བར་ཤོག༔ ཨོཾ་གུ་ཧྱ་མུ་དྲ་པྲཛྙཱ་ཛྙཱ་ན་ཨ་བྷི་ཥིཉྩ་ཧཱུྃ་ཧཱུྃ༔ ཤེས་རབ་དབང་ཐོབ་ཡིད་སྒྲིབ་དག༔ ཕོ་ཉའི་མྱུར་ལམ་བསྒོམ་ལ་དབང༔ ཆོས་ཀྱི་སྐུ་རུ་སྨིན་པར་འགྱུར༔ བླ་མ་པདྨ་ཀུན་ཏུ་འཆང༔ དེ་ཡི་ཐུགས་ནས་གཉིས་པ་སྤྲོས༔ སློབ་མའི་སྙིང་གར་ཐིམ་པ་ཡིས༔ དོན་གྱི་ལྷན་སྐྱེས་མངོན་གྱུར་བསམ༔ ཧོཿ ཆོས་དབྱིངས་ངོ་བོ་བསམ་བརྗོད་སྤྲོས་ལས་འདས༔ ཡེ་ཤེས་རིག་པ་ཟང་ཐལ་རྗེན་པར་ཤར༔ དབྱིངས་རིག་ཟུང་འཇུག་པདྨ་ཀུན་ཏུ་འཆང༔ དོན་དམ་ལྷན་སྐྱེས་ཡེ་ཤེས་མངོན་གྱུར་ཤོག༔ ཨོཾ་མ་ཧཱ་གུ་རུ་ཛྙཱ་ན་ཀཱ་ཡ་ཨ་ཨ་ཨ༔ བཞི་པའི་དབང་ཐོབ་སྒྲིབ་ཀུན་དག༔ ཡེ་ཤེས་སྐུ་རུ་སྨིན་པར་འགྱུར༔ ས་མ་ཡ༔ དེ་ལྟར་སྨིན་པའི་དབང་བསྐུར་ནས༔ གྲོལ་ལམ་མཆོག་གི་བྱིན་རླབས་ནི༔ བླ་མས་ལྟ་དགོངས་གདིང་བསྐྱེད་ལ༔ བརྡ་ཡི་རྫས་ཀྱིས་མཚོན་ནས་ཀྱང༔ དམིགས་རིམ་ཟབ་མོ་ངོ་སྤྲོད་བྱ༔ མེ་ལོང་ལ་སྐུ་བརྙན་བསྟན་ལ་སྤྱི་བོར་བཞག ཨོཾ༔ སྐྱེ་ཤི་བར་དོའི་འཁྲུལ་སྣང་སྦྱོང་བའི་ཕྱིར༔ བསྐྱེད་རིམ་ལྷ་སྐུ་བསྒོམ་པའི་དབང་བསྐུར་བས༔ བརྟན་གཡོའི་དངོས་ཀུན་ལྷ་དང་སྔགས་སུ་ཤར༔ སྣང་སྟོང་ཟུང་འཇུག་ཡེ་ཤེས་མངོན་གྱུར་ཤོག༔ ཨོཾ་སརྦ་ཛྙཱ་ན་ཀཱ་ཡ་ཨ་བྷི་ཥིཉྩ་ཨོཾ༔ མར་མེ་བསྟན་ལ་སྙིང་གར་བཞག ཧཱུྃ༔ བསམ་གཏན་བར་དོའི་འཁྲུལ་སྣང་སྦྱོང་བའི་ཕྱིར༔ རྫོགས་རིམ་རང་གསལ་སྣང་བའི་དབང་བསྐུར་བས༔ དཔེ་དང་དོན་གྱི་ལྷན་སྐྱེས་རྒྱུད་ལ་ཤར༔ བདེ་སྟོང་ཟུང་འཇུག་ཡེ་ཤེས་མངོན་གྱུར་ཤོག༔ ཨོཾ་མ་ཧཱ་སུ་ཁ་ཛྙཱ་ན་ཨ་བྷི་ཥིཉྩ་ཧཱུྃ༔ ཐིག་ལེ་དམར་པོ་ཧྲཱིཿས་མཚན་བསྟན་ལ་མགྲིན་པར་བཞག ཧྲཱིཿ རྨི་ལམ་བར་དོའི་འཁྲུལ་སྣང་སྦྱོང་བའི་ཕྱིར༔ བདེ་གསལ་མི་རྟོག་ཐིག་ལེའི་དབང་བསྐུར་བས༔ ངོ་ཤེས་རྩལ་འབྱོངས་ཉམས་རྟོགས་ལྷུག་པར་ཤར༔ གསལ་སྟོང་ཟུང་འཇུག་ཡེ་ཤེས་མངོན་གྱུར་ཤོག༔ ཨོཾ་སརྦ་དྷརྨ་ཏཱ་བི་ཀལྤ་བུདྡྷ་ཨ་བྷི་ཥིཉྩ་ཧྲཱིཿ ཨ་ཡིག་སྤྱི་བོར་བཞག ཧཱ༔ འཆི་ཁ་བར་དོའི་འཁྲུལ་སྣང་སྦྱོང་བའི་ཕྱིར༔ རླུང་སེམས་གོང་དུ་འཕོ་བའི་དབང་བསྐུར་བས༔ སྐུ་གསུམ་དགོངས་པའི་དབྱིངས་སུ་རོ་གཅིག་ཤར༔ མྱོང་སྟོང་ཟུང་འཇུག་ཡེ་ཤེས་མངོན་གྱུར་ཤོག༔ ཨོཾ་ཨ་ཕཊ྄་ཨ་ཕཊ྄་ཨ་ཕཊ྄་ཨ་བྷི་ཥིཉྩ་ཧཱ༔ འཇའ་ཤེལ་ཕྱར། ཧཱུྃ༔ ཆོས་ཉིད་བར་དོའི་འཁྲུལ་སྣང་སྦྱོང་བའི་ཕྱིར༔ དབྱིངས་དང་རིག་པ་དབྱེར་མེད་དབང་བསྐུར་བས༔ ངོ་ཤེས་ཐག་ཆོད་བརྟན་པ་ཐོབ་པར་ཤར༔ རིག་སྟོང་ཟུང་འཇུག་ཡེ་ཤེས་མངོན་གྱུར་ཤོག༔ ཨོཾ་དྷརྨ་དྷཱ་ཏུ་ཛྙཱ་ན་ཨ་བྷི་ཥིཉྩ་ཧཱུྃ༔ སྐུ་སྔགས་ཕྱག་མཚན་རྣམས་བསྟན་ལ། ཏྲཱྃཿ སྲིད་པ་བར་དོའི་འཁྲུལ་སྣང་སྦྱོང་བའི་ཕྱིར༔ མ་འགག་ལྷ་སྔགས་ཆོས་སྐུའི་དབང་བསྐུར་བས༔ གཟུང་འཛིན་སྲེད་ལེན་དག་སྣང་རོལ་པར་ཤར༔ ཚོར་སྟོང་ཟུང་འཇུག་ཡེ་ཤེས་མངོན་གྱུར་ཤོག༔ ཨོཾ་སརྦ་དྷརྨ་ཛྙཱ་ན་ཨ་བྷི་ཥིཉྩ་ཏྲཱྃ༔ འདི་ནི་ཟབ་མོའི་ཁྲིད་རིམ་གྱི༔ སྙིང་པོ་བྱིན་རླབས་རིམ་པ་སྟེ༔ དབང་འདི་ལན་ཅིག་ཐོབ་པས་ཀྱང༔ བར་དོར་གྲོལ་བར་ཐེ་ཚོམ་མེད༔ ས་མ་ཡ༔ སྨིན་གྲོལ་ཟབ་མོའི་ལམ་བསྒོམ་པར༔ འགལ་རྐྱེན་བར་ཆད་སེལ་བའི་ཕྱིར༔ ཆོས་སྐྱོང་གཏོར་མའི་བཀའ་བསྒོ་ནི༔ བླ་མ་ཧེ་རུ་ཀ་དཔལ་དང༔ གཏོར་མ་ཆོས་སྐྱོང་འཁོར་བཅས་བསྐྱེད༔ སློབ་མ་གཉེན་པོ་སྟོབས་ཀྱི་ལྷར༔ གསལ་བའི་ལག་གཏད་ཐ་ཚིག་བསྐུལ༔ ཁྱད་པར་གཉེར་དུ་གཏད་པ་ནི༔ ཁྱད་པར་རྡོ་རྗེའི་སློབ་མ་འདི་ཉིད་དང༔ བྱང་ཆུབ་བར་དུ་ནམ་ཡང་མི་འབྲལ་བས༔ ཟབ་ལམ་སྒྲུབ་པའི་འགལ་རྐྱེན་ཞི་བ་དང༔ མཐུན་རྐྱེན་ཐམས་ཅད་ཡིད་བཞིན་སྒྲུབ་པར་མཛོད༔ དམ་བསྒྲག་དམ་བསྒྲག་པ་ནི། ཤཱ་ས་ནའི་མཐར། ས་མ་ཡ་སྨ་ར་ས་མ་ཡ་མ་ཏི་ཀྲ་མ་ཏི། ས་མ་ཡ་རཀྵནྟུ་ཞེས་བརྗོད། དམ་བསྲེ་བདུད་རྩི་སྦྱིན༔ དམ་བསྲེ་བ་ནི། སློབ་མར་བདུད་རྩི་བྱིན་པའི་ལྷག་མ་ཆོས་སྐྱོང་གི་གཏོར་མར་བྲན་ཅིང་སླར་ཡང་སློབ་མར་སྦྱིན། མཆན། འདིས་ནི་རིག་འཛིན་སྲུང་མ་རྣམས༔ ལུས་དང་གྲིབ་བཞིན་འགྲོགས་ནས་ཀྱང༔ ལམ་གྱི་བར་ཆད་ཀུན་སེལ་འགྱུར༔ ས་མ་ཡ༔ མཐུན་རྐྱེན་ཚེ་དཔལ་སྤེལ་པའི་ཕྱིར༔ བཀྲ་ཤིས་ཚེ་ཡི་དབང་བསྐུར་ནི༔ ཐོག་མར་ཚེ་བཅུད་འགུགས་པའི་ཕྱིར༔ ཚེ་མདའ་གཡབ་ཅིང་གདུང་ཤུགས་བསྐྱེད༔ ཧྲཱིཿ པདྨ་རྣམ་པར་རྒྱས་པའི་དཀྱིལ་འཁོར་ནས༔ བཅོམ་ལྡན་མགོན་པོ་ཨོ་རྒྱན་ཚེ་དཔག་མེད༔ སྤྲུལ་པའི་ཕོ་ཉ་མགྱོགས་མའི་ཚོགས་རྣམས་བཅས༔ ཐུགས་དམ་གནད་ནས་བསྐུལ་ལོ་གཟི་བྱིན་སྐྱེད༔ རྣལ་འབྱོར་བདག་ཅག་འཁོར་དང་བཅས་པ་ཡི༔ བླ་ཚེ་ཆད་ཉམས་ཡར་བ་རང་སོར་ཆུད༔ འབྱུང་ལྔའི་དྭངས་མ་ཡེ་ཤེས་འོད་ལྔར་སྡུས༔ སྲིད་ཞིའི་དྭངས་བཅུད་སྙིང་དབུས་ཐིག་ལེར་སྟིམས༔ མི་འགྱུར་འགག་མེད་མི་ཤིགས་རྡོ་རྗེའི་ཚེ༔ འཆི་མེད་རྟག་པ་དོན་གྱི་དངོས་གྲུབ་སྩོལ༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཨཱ་ཡུ་ཥེ་སརྦ་སིདྡྷི་ཧཱུྃ༔ ཞེས་བསྐུལ་ཚེ་འབྲང་སྤྱི་བོར་བཞག༔ ཨོཾ༔ སྙིང་པོའི་བུམ་པ་ཡེ་ཤེས་འོད་ལྔའི་དབུས༔ ཨོ་རྒྱན་ཚེ་དཔག་མེད་པའི་ལྷ་ཚོགས་བཞུགས༔ མི་འགྱུར་རྟག་པ་རྡོ་རྗེའི་ཚེ་དབང་བསྐུར༔ སྐྱེ་འཆི་བགྲེས་རྒུད་བྲལ་བའི་དངོས་གྲུབ་སྩོལ༔ ཀཱ་ཡ་ཨཱ་ཡུར་སིདྡྷི་ཨ་བྷི་ཥིཉྩ་ཨོཾ༔ ཚེ་ཆང་བདུད་རྩི་མགྲིན་པར་སྦྱིན༔ ཨཱཿ བདེ་ཆེན་བྱང་ཆུབ་སེམས་ཀྱི་བདུད་རྩི་ནི༔ རླུང་སེམས་དབུ་མར་འཆིང་བའི་བཅུད་དང་ལྡན༔ འགག་མེད་རྟག་པ་རྡོ་རྗེའི་ཚེ་དབང་བསྐུར༔ ཚངས་དབྱངས་རྒྱུན་ཆད་མེད་པའི་དངོས་གྲུབ་སྩོལ༔ ཝཱཀ྄་ཨཱ་ཡུར་སིདྡྷི་ཨ་བྷི་ཥིཉྩ་ཨཱཿ རིལ་བུ་སྙིང་དབུས་ཐིག་ལེར་བསྟིམ༔ ཧཱུྃ༔ འཕོ་མེད་དྭངས་མ་ལྔ་ལྡན་རིལ་བུའི་གཟུགས༔ སྙིང་དབུས་ཡེ་ཤེས་སེམས་དཔའི་ཚུལ་དུ་ཐིམ༔ མི་ཤིགས་རྟག་པ་རྡོ་རྗེའི་ཚེ་དབང་བསྐུར༔ འོད་གསལ་གཉུག་མ་དོན་གྱི་དངོས་གྲུབ་སྩོལ༔ ཙིཏྟ་ཨ་ཡུར་སིདྡྷི་ཨ་བྷི་ཥིཉྩ་ཧཱུྃ༔ ཚེ་བཅུད་རྒྱས་གདབ་བརྟན་པར་བྱ༔ ཨཿ སྤྲོས་པས་སྣང་སྲིད་ཁྱབ་པའི་ཚེ་དང་དཔལ༔ བསྡུས་པས་སྙིང་དབུས་མི་ཤིགས་ཐིག་ལེར་ཐིམ༔ བཅིངས་པས་འདུ་འབྲལ་མེད་པའི་ལུ་གུད་རྒྱུད༔ ཅིས་ཀྱང་མི་ཕྱེད་རྡོ་རྗེའི་སྲོག་འགྲུབ་ཤོག༔ བཛྲ་ཨཱ་ཡུ་ཥེ་རཀྵ་ཨ་ཨ༔ དབང་འདི་ལན་གཅིག་བསྐུར་བས་ཀྱང༔ དུས་མིན་འཆི་ལས་ངེས་པར་གྲོལ༔ མང་དུ་བསྐྱར་ན་ཚེ་འཕེལ་ཞིང༔ དཔལ་དང་འབྱོར་པ་རྒྱས་པར་འགྱུར༔ ས་མ་ཡ༔ དེ་ལྟར་རྩ་བའི་དབང་བསྐུར་བ༔ འཇུག་པ་དངོས་གཞི་མཐའ་རྒྱས་ཏེ༔ དང་པོའི་ལས་ཅན་ལྷག་གནས་སོགས༔ སྤྲོ་ན་སྤྱི་བཞིན་སྦྱར་བར་བྱ༔ ས་མ་ཡ༔ སྨིན་གྲོལ་བརྟན་པར་བྱ་བའི་ཕྱིར༔ བྱིན་རླབས་གཏོར་མའི་དབང་བསྐུར་ནི༔ དོན་དབང་སྙིང་པོ་བསྡུས་པ་སྟེ༔ མཎྜལ་གསོལ་གདབ་རྒྱུད་སྦྱངས་པའི༔ སློབ་མ་ལྷར་བསྐྱེད་ཡེ་ཤེས་དབབ༔ བརྟན་པར་བྱས་རྗེས་གཏོར་མ་ནི༔ རྟེན་དང་བརྟེན་པའི་དཀྱིལ་འཁོར་གསལ༔ གནས་གསུམ་རྡོ་རྗེའི་འབྲུ་གསུམ་ལས༔ དཀར་དམར་མཐིང་བའི་ཡིག་འབྲུ་དང༔ བདུད་རྩི་འོད་ཟེར་བཅས་པ་རྣམས༔ རིམ་དང་གཅིག་ཅར་སྤྲོས་ནས་ཀྱང༔ སློབ་མའི་གནས་གསུམ་ཞུགས་ཤིང་ཐིམ༔ དབང་བཞིའི་ཡེ་ཤེས་རྫོགས་པར་བསམ༔ གདུང་ཤུགས་དྲག་པོའི་ཐུགས་དམ་བསྐུལ༔ ཧྲཱིཿ སྐུ་གསུམ་རིགས་འདུས་སོགས་ནས། མཁའ་ཁྱབ་འགྲོ་ཀུན་སྨིན་ཅིང་གྲོལ་བར་མཛོད༔ མཆན། ཁྱད་པར་བྱིན་རླབས་ཚིག་འདི་གསོལ༔ ལུས་ངག་ཡིད་ལ་རྡོ་རྗེའི་དབང་བཞི་བསྐུར༔ རྩ་རླུང་ཐིག་ལེ་སེམས་ཀྱི་དྲི་མ་སྦྱོངས༔ སྣང་གྲགས་རྟོག་གསུམ་ལྷ་སྔགས་ཆོས་སྐུར་ཤར༔ སྐུ་བཞིའི་གོ་འཕང་འགྲུབ་པར་བྱིན་གྱིས་རློབས༔ ཀཱ་ཡ་ཝཱཀ྄་ཙིཏྟ་སརྦ་ཨ་བྷི་ཥིཉྩ་ཨོཾ་ཨཱཿཧཱུྃ་ཧྲཱིཿ གཏོར་མའི་ལྷ་བསྟིམ་དོན་ངོ་སྤྲད༔ རྗེས་འབྲེལ་བཟླས་པའི་ལུང་སྦྱིན་ཞིང༔ དབང་བཞི་སྟན་ཐོག་གཅིག་ཏུ་ཐོབ༔ ཉམས་རྟོགས་ཡེ་ཤེས་རྒྱས་པར་འགྱུར༔ ས་མ་ཡ༔ དེ་ལྟར་དབང་གིས་རྒྱུད་སྨིན་ཅིང༔ དམ་ཚིག་རྣམ་པར་དག་པ་ཡིས༔ རང་དང་གཞན་དོན་མཆོག་བསྒྲུབ་ཕྱིར༔ བསྙེན་སྒྲུབ་ཡན་ལག་བཞི་ལྡན་པའི༔ ལས་ཀྱི་རིམ་པ་བྱ་འདོད་ན༔ ཕུན་སུམ་ཚོགས་པ་ལྔ་ལྡན་པས༔ ས་གཞི་ཡོངས་སྦྱངས་མཚམས་སུ་བཅད༔ བསྙེན་པས་བསྐུལ་ཞིང་ཉེ་བསྙེན་བསྙེན་ཕྱིར༔ དཀྱིལ་འཁོར་པ་ལ་སྙན་གསན་དབབ༔ སྒྲུབ་པའི་རྫས་རྣམས་ཉེར་བསྡོགས་ཤིང༔ བུམ་པ་སློབ་མ་ལྷག་གནས་སོགས༔ བླ་མའི་སྒྲུབ་གཞུང་སྤྱི་ལྟར་སྦྱར༔ ཁྱད་པར་སྒྲུབ་རྟེན་དམ་རྫས་ནི༔ རིག་འཛིན་བླ་མའི་སྣང་བརྙན་སྐུ༔ བསྟན་པ་བུ་གཅིག་འཁོར་ལོ་གསུང༔ སྲོག་ཕུར་མཚན་ཉིད་ལྡན་པ་ཐུགས༔ ཡོན་ཏན་སེལ་མེད་ཨ་མྲྀ་ཏ༔ ཕྲིན་ལས་མྱོང་གྲོལ་རིལ་བུ་དང༔ རྡོར་དྲིལ་ཚེ་གལ་མ་དཱ་ན༔ དྲག་པོའི་ཕུར་བུ་ལ་སོགས་བཤམ༔ འདི་མན་ཆད་ཕབ་མ་གྲུབ་པ་ཡིན་འདྲ། དགེ་ལེགས་འཕེལ། མངྒ་ལཾ། དགེའོ།། །།

[edit]

\u0f01\u0f83:__:sku gsum rigs 'dus zab tig las:_dbang chog bde chen bum bzang bzhugs: \u0f01\u0f83:_sku gsum rigs 'dus bla mar 'dud:_sngags kyi rtsa ba dbang skur te:_srog ni dam tshig sdom pas bzung:_rim gnyis lam gyis gsos btab pas:_sku bzhi'i 'bras bu mngon du 'gyur:_sa ma ya:_de la thog mar rtsa ba'i dbang:_rgyas par bskur ba'i rim pa ni:_dben pa'i gnas su stegs bu'i dbus:_dkyil 'khor mtshan nyid rdzogs pa dang:_dbang rdzas mchod tshogs 'du byas la:_bdag mdun dbyer med bskyed cing bzla:_tshogs kyi 'khor lo rgyas par bskor:_slob dpon bdag nyid 'jug pa dang:_slob ma 'jug par gnang ba nod:_snod ldan khrus byas bgegs phral la:_srung 'khor bsgom zhing nges shes bskyed:_maN+Dal phul la chas su gzhug:_me tog dang bcas gsol gsum gdab:_ho:_rigs 'dus bla ma rdo rje 'dzin pa dgongs:_bdag cag gsang ba mchog gi dkyil 'khor du:_smin grol dbang mchog zab mo don gnyer na:_thugs rje chen pos rjes su bzung du gsol:_zhes gsol de la lan sbyin pa:_ho:_bla med gsang ba mchog gi dkyil 'khor 'dir:_zhugs pa legs kyang dam tshig bsrung dka' bas:_thun mong khyad par bslab las mi 'da' na:_ye shes mchog gi dbang bskur sbyin par bya:_slar yang nan tan gsol ba gdab:_bla mas gnang ba'i dam tshig srog bzhin bsrung:_mtha' yas 'gro ba kun gyi don bgyid phyir:_rigs 'dus rnal 'byor rtse gcig bsgrub lags na:_thugs rjes dgongs te nges par gnang du gsol:_rgyud sbyang slad du 'di ltar gdams:_de ltar yin na rigs 'dus bla ma yi:_dkyil 'khor chen por 'jug cing smin par bya:_nges 'byung lhag pa'i bsam pa rtse gcig pas:_rang rgyud dag pa'i thabs la 'jug par 'tshal:_zhes gdams skyabs sems tshogs bsag bya:_khyad par sdom pa bzung ba ni:_hoH_rigs 'dus bla ma'i lha tshogs dgongs su gsol:_bdag gis deng bzung byang chub snying po'i bar:_mkha' mnyam 'gro kun yongs su sgrol ba'i phyir:_rtsa gsum rab 'byams skyabs kyi mchog tu bzung:_lus ngag yid gsum gzhan gnod gzhir bcas spang:_gzhan phan smon 'jug byang chub sems gnyis bskyed:_mnyam pa chen po'i thabs kyis lam bsgrub pa'i:_spyi dang khyad par lhag pa'i dam tshig rnams:_srog gi phyir yang mi btang bzung lags na:_rdo rje rgyal pos brtse bas nyer dgongs te:_bdag rgyud yongs su smin cing grol mdzad gsol:_snying gar byang chub sems gnyis kyi:_ngo bo zla ba rdo rje bsgom:_oM sarba yo ga bo d+hi tsit+ta aH_zhes pas bskyed cing brtan par bya:_bo d+hi tsit+ta sa ma ya s+t+waM:_dzaHhU~M ba~M hoH_pra be sha ya phaTa?:_mchan/_pra be sha yis sgo phye la:_sa ma ya s+t+wa~M gyis shar sgor bzhag:_tshad med bzhi yi 'jug pas gzhug:_sku gsung thugs kyi phyag kyang bya:_slar yang shar sgor 'khod pa la:_ye shes dbab par bya ba'i slad:_sbyor ba bdud rtsi'i chu nan sbyin:_hU~M:_'da' dka' rdo rje dam tshig bcud rtsi'i chu:_dam tshig ma bsrungs srog gi gshed du 'bebs:_bsrungs na ye shes dngos grub tshe 'dir thob:_de bas dam srungs bdud rtsi'i chu 'thungs shig:_sa ma ya u da ka badz+ra a mr-i ta hU~M hrIHTha:_dngos gzhi'i ched du gsol ba gdab:_hoH_bde gshegs sku gsum rigs 'dus lha tshogs kyi:_ye shes gzi byin deng 'dir phab nas kyang:_bdag gnas rnal 'byor lha dang chos nyid kyi:_ye shes rol pa'i gzi byin bskyed du gsol:_zhes gsol sgo gsum gnad gcun la:_gzhi lus badz+ra yo gi nI:_sku gsum rigs 'dus lhar bcas gsal:_snyoms 'jug sgra dang 'od zer gyis:_bskul te slob dpon lta dgongs bskyed:_ye shes dbab la nan tan bya:_ma grub spogs pa'i cho ga ni:_snying ga'i pad+ma sems dpa' la:_rtse gcig sems bzung mos gus kyis:_sku las bde chen 'od zer 'phros:_lus gang dwangs ma snying dbus thim:_bde stong ye shes skyes par bsam:_brjod med ngang bzhag hU~M dbyangs bya:_phebs nas tiSh+Tha badz+ras brtan:_rigs nges bya phyir me tog dor:_hoH_tshe rabs 'brel ba'i rigs 'dus bla ma lhar:_rin chen me tog phreng ba gus pas 'bul:_thugs rjes bzhes te byang chub snying po'i bar:_mi 'bral byin gyis brlab par mdzad du gsol:_rat+na puSh+pe pra tI ts+tsha hoH_dbus mdun phyogs bzhir babs pa na:_rigs drug dbus rdo rje sems dpa' de'i mdun he ru ka_/shar rtag pa/_lho nyi ma/_nub gar dbang*/_byang rta mchog go_rigs su nges byas la:_ming gdags cod pan spyi bor 'ching:_hoH_rgyal ba rigs drug ye shes cir snang yang:_bla ma sku gsum dbyer med dbyings las shar:_rigs kyi cod pan spyi bor bcings pa yis:_dengs nas bzung ste 'bral med byin gyis rlobs:_puSh+pe sid+d+hi a be sha ya s+t+waM:_ye shes thur mas ma rig bsal:_hoH_ma rig ling tog tshogs brgyad kun gzhir bcas:_rig pa ye shes gser gyi thur mas bsal:_rnam par dag pa'i gzigs pa la brten nas:_rigs 'dus don gyi lha tshogs mngon gyur shog:_dz+nyA na tsak+Shu pra be sha ya phaTa?:_mthong ba bstan cing de nyid brjod:_de nas dngos gzhi'i dbang bskur la:_thog mar bum pa'i dbang gi slad:_maN+Dal dang bcas gsol ba gdab:_hoH_ji ltar gdod ma'i rdo rje 'chang chen pos:_rang gi sras la byang chub dbang bskur ltar:_dkyil 'khor khyab bdag rdo rje slob dpon gyis:_bdag kyang yongs su smin cing grol mdzad gsol:_slob dpon thugs ka'i 'od zer gyis:_dbang lha spyan drangs mchod bstod gsol:_slob ma bla ma rdor sems bskyed:_mi bskyod chu yi dbang bskur bya:_hU~M:_bla ma rdo rje sems dpa'i ngo bo nyid:_mi bskyod bdud rtsi chu yi dbang bskur bas:_rnam shes gnas 'gyur me long ye shes sku:_rdo rje rigs kyi dbang mchog thob par shog:_oM badz+ra a b+hi Shiny+tsa hU~M:_slob ma bla ma nyi mar bskyed:_rin 'byung dbu rgyan dbang bskur bya:_trA~M:_bla ma rdo rje nyi ma'i ngo bo nyid:_rin chen 'byung ldan dbu rgyan dbang skur bas:_tshor ba gnas 'gyur mnyam nyid ye shes sku:_rin chen rigs kyi dbang chog thob par shog:_oM rat+na a b+hi Shiny+tsa trA~M:_slob ma bla ma pad+ma gar dbang bskyed:_snang mtha' rdo rje'i dbang bskur bya:_hrIH_bla ma gar dbang ngo bo nyid:_snang ba mtha' yas rdo rje'i dbang bskur bas:_'du shes gnas 'gyur sor rtog ye shes sku:_pad+ma'i rigs kyi dbang mchog thob par shog:_oM pad+ma a b+hi Shiny+tsa hrIH_slob ma bla ma rta mchog bskyed:_don 'grub dril bu'i dbang bskur bya:_hA:_bla ma rta mchog rol pa'i ngo bo nyid:_don yod grub pa dril bu'i dbang bskur bas:_'du byed gnas 'gyur bya grub ye shes sku:_las kyi rigs kyi dbang mchog thob par shog:_oM karma a b+hi Shiny+tsa hA:_slob ma bla ma rtag par bskyed:_rnam snang ming gi dbang bskur bya:_oM:_bla ma rgyal ba rtag pa'i ngo bo nyid:_rnam par snang mdzad ming gi dbang bskur bas:_gzugs phung gnas 'gyur chos dbyings ye shes sku:_bde gshegs rigs kyi dbang mchog thob par shog:_oM bud+d+ha a b+hi Shiny+tsa oM:_de ltar slob ma'i dbang bskur nas:_rdo rje slob dpon dbang gi slad:_slob ma bla ma he ru kar:_bskyed la dam tshig rnam gsum sbyin:_hU~M:_bla ma he ru ka yi ngo bo nyid:_mi phyed dam tshig gsum gyi dbang bskur bas:_sgo gsum gnas 'gyur 'od gsal ye shes sku:_rigs kun khyab bdag chen po'i dbang thob shog:_oM shrI he ru ka badz+ra gaN+De a b+hi Shiny+tsa a a:_so so'i mthar ni chu dbang bskur:_rigs kyi bdag pos spyi gtsug tu mi bskyod/_rna ltag g.yas su rin 'byung*/_ltag par snang mtha'/_g.yon du don grub/_dpral bar rnam snang*/_mi bskyod pa'i mdun du rdor sems/spyi bor brgyan:_mchod dang shis pas mnga' dbul zhing:_dag thob yon tan brjod par bya:_rjes 'brel nus pa'i dbang bskur la:_lha sku phyag rgya spyi bor bzhag:_gzhi lus lhar bcas bskyed la bstim:_snang stong ye shes 'char bar bsam:_hrIH_rigs dang dkyil 'khor kun gyi khyab bdag che:_pad+ma kun tu 'chang ba'i dbang bskur bas:_gzung 'dzin 'khrul pa'i snang ba ji snyed kun:_rig stong chos kyi sku ru dag par shog:_oM AHhU~M ma hA gu ru pad+ma d+hA ra sarba sid+d+hi hU~M:_kA ya a b+hi Shiny+tsa oM:_hrIH_gar gyi dbang phyug sems dpa' pad+ma'i spyan:_o rgyan tshe dpag med kyi dbang bskur bas:_las rlung 'khrul pa'i snang ba ji snyed kun:_bde stong longs spyod rdzogs skur dag par shog:_oM AHhU~M badz+ra gu ru pad+ma A yu She sarba sid+d+hi hU~M:_kA ya a b+hi Shiny+tsa oM:_hrIH_ma 'gag sgyu 'phrul drwa ba'i tshul 'chang ba:_'gro 'dul pad+ma'i myu gu'i dbang bskur bas:_rtsa khams 'khrul pa'i snang ba ji snyed kun:_gsal stong sprul pa'i sku ru dag par shog:_oM AHhU~M badz+ra gu ru pad+ma satwa sarba sid+d+hi hU~M:_kA ya a b+hi Shiny+tsa oM:_hrIH_sku gsum rgyal ba ma lus 'byung ba'i gnas:_mkha' spyod lhan cig skyes ma'i dbang bskur bas:_sgrib gnyis 'khrul pa'i snang ba ji snyed kun:_dbyer med bde chen sku ru dag par shog:_oM AHhU~M pad+mo yo gi nI sarba sid+d+hi hU~M:_kA ya a b+hi Shiny+tsa oM:_hU~M:_sku dang ye shes rnam rol cir yang shar:_zhi khro rigs 'dus rgyal ba'i dbang bskur bas:_phung khams skye mched 'khrul snang ji snyed kun:_rab 'byams lha yi 'khor lor dag par shog:_oM AHhU~M badz+ra gu ru gu h+ya dz+nyA na bod+hi tsit+ta ma hA su kha hU~M hU~M:_oM ru lu ru lu hU~M b+h+yo hU~M:_kA ya a b+hi Shiny+tsa oM:_so so'i sngags kyi bzlas lung sbyin:_grags stong ye shes 'char bar bsam:_brtan phyir sngags phreng mgrin par bzhag:_AH_'gro 'ong brtan dang g.yo ba'i sgra skad kun:_rdo rje'i sngags kyi ngo bor dbang bskur bas:_phyi nang rlung gi rgyu ba ji snyed kun:_grags stong yi ge'i sprin du rdzogs par shog:_oM ma hA gu ru sarba ta thA ga ta wAka a b+hi Shiny+tsa AH_lha sngags sems nyid dbyer med pa:_'od gsal thugs su ngo sprad cing:_me long gsal ba'i brdas mtshon te:_hU~M:_lha dang sngags kun me long gzugs brnyan ltar:_'od gsal gnyug ma'i ngo bor dbang bskur bas:_chos dang chos can spros pa ji snyed kun:_dbyings rig zung 'jug thugs su smin par shog:_oM ma hA gu ru sarba ta thA ga ta tsit+ta a b+hi Shiny+tsa hU~M:_de ltar bum dbang bskur ba yis:_snang zhen lus kyi sgrib pa dag:_bskyed rim phrin las sgrub la dbang:_sprul pa'i sku ru smin par 'gyur:_zab dbang gsum gyi dang po ni:_bla ma o rgyan tshe dpag med:_yab yum mnyam sbyor byang sems sbyin:_AH_snang ba'i ngo bo pad+ma tshe dpag med:_stong pa'i rang bzhin 'chi med man+dA ra:_mnyam sbyor thugs rje byang sems dbang bskur bas:_las rlung dbu ma'i dbyings su thim par shog:_oM gu h+ya a mr-i ta bo d+hi tsit+ta sa ma ya A:_gsang dbang thob nas ngag sgrib dag:_rlung dang gtum mo bsgom la dbang:_longs spyod rdzogs skur smin par 'gyur:_mtshan nyid ldan pa'i rigs kyi yum:_rnal 'byor ma yi ngo bo sbyin:_slob mas dbang chen rta mgrin gyi:_nga rgyal dang bcas bde ba bsgrub:_hU~M:_'di ni bde chen ye shes 'byung ba'i gnas:_lhan cig skyes ma pad+ma'i rigs kyi lcam:_dga' bzhi'i thar pa bsten pa'i dbang bskur bas:_dpe yi ye shes rgyud la 'char bar shog:_oM gu h+ya mu dra pradz+nyA dz+nyA na a b+hi Shiny+tsa hU~M hU~M:_shes rab dbang thob yid sgrib dag:_pho nya'i myur lam bsgom la dbang:_chos kyi sku ru smin par 'gyur:_bla ma pad+ma kun tu 'chang:_de yi thugs nas gnyis pa spros:_slob ma'i snying gar thim pa yis:_don gyi lhan skyes mngon gyur bsam:_hoH_chos dbyings ngo bo bsam brjod spros las 'das:_ye shes rig pa zang thal rjen par shar:_dbyings rig zung 'jug pad+ma kun tu 'chang:_don dam lhan skyes ye shes mngon gyur shog:_oM ma hA gu ru dz+nyA na kA ya a a a:_bzhi pa'i dbang thob sgrib kun dag:_ye shes sku ru smin par 'gyur:_sa ma ya:_de ltar smin pa'i dbang bskur nas:_grol lam mchog gi byin rlabs ni:_bla mas lta dgongs gding bskyed la:_brda yi rdzas kyis mtshon nas kyang:_dmigs rim zab mo ngo sprod bya:_me long la sku brnyan bstan la spyi bor bzhag_oM:_skye shi bar do'i 'khrul snang sbyong ba'i phyir:_bskyed rim lha sku bsgom pa'i dbang bskur bas:_brtan g.yo'i dngos kun lha dang sngags su shar:_snang stong zung 'jug ye shes mngon gyur shog:_oM sarba dz+nyA na kA ya a b+hi Shiny+tsa oM:_mar me bstan la snying gar bzhag_hU~M:_bsam gtan bar do'i 'khrul snang sbyong ba'i phyir:_rdzogs rim rang gsal snang ba'i dbang bskur bas:_dpe dang don gyi lhan skyes rgyud la shar:_bde stong zung 'jug ye shes mngon gyur shog:_oM ma hA su kha dz+nyA na a b+hi Shiny+tsa hU~M:_thig le dmar po hrIHsa mtshan bstan la mgrin par bzhag_hrIH_rmi lam bar do'i 'khrul snang sbyong ba'i phyir:_bde gsal mi rtog thig le'i dbang bskur bas:_ngo shes rtsal 'byongs nyams rtogs lhug par shar:_gsal stong zung 'jug ye shes mngon gyur shog:_oM sarba d+harma tA bi kalpa bud+d+ha a b+hi Shiny+tsa hrIH_a yig spyi bor bzhag_hA:_'chi kha bar do'i 'khrul snang sbyong ba'i phyir:_rlung sems gong du 'pho ba'i dbang bskur bas:_sku gsum dgongs pa'i dbyings su ro gcig shar:_myong stong zung 'jug ye shes mngon gyur shog:_oM a phaTa? a phaTa? a phaTa? a b+hi Shiny+tsa hA:_'ja' shel phyar/_hU~M:_chos nyid bar do'i 'khrul snang sbyong ba'i phyir:_dbyings dang rig pa dbyer med dbang bskur bas:_ngo shes thag chod brtan pa thob par shar:_rig stong zung 'jug ye shes mngon gyur shog:_oM d+harma d+hA tu dz+nyA na a b+hi Shiny+tsa hU~M:_sku sngags phyag mtshan rnams bstan la/_trA~MH_srid pa bar do'i 'khrul snang sbyong ba'i phyir:_ma 'gag lha sngags chos sku'i dbang bskur bas:_gzung 'dzin sred len dag snang rol par shar:_tshor stong zung 'jug ye shes mngon gyur shog:_oM sarba d+harma dz+nyA na a b+hi Shiny+tsa trA~M:_'di ni zab mo'i khrid rim gyi:_snying po byin rlabs rim pa ste:_dbang 'di lan cig thob pas kyang:_bar dor grol bar the tshom med:_sa ma ya:_smin grol zab mo'i lam bsgom par:_'gal rkyen bar chad sel ba'i phyir:_chos skyong gtor ma'i bka' bsgo ni:_bla ma he ru ka dpal dang:_gtor ma chos skyong 'khor bcas bskyed:_slob ma gnyen po stobs kyi lhar:_gsal ba'i lag gtad tha tshig bskul:_khyad par gnyer du gtad pa ni:_khyad par rdo rje'i slob ma 'di nyid dang:_byang chub bar du nam yang mi 'bral bas:_zab lam sgrub pa'i 'gal rkyen zhi ba dang:_mthun rkyen thams cad yid bzhin sgrub par mdzod:_dam bsgrag dam bsgrag pa ni/_shA sa na'i mthar/_sa ma ya sma ra sa ma ya ma ti kra ma ti/_sa ma ya rak+Shan+tu zhes brjod/_dam bsre bdud rtsi sbyin:_dam bsre ba ni/_slob mar bdud rtsi byin pa'i lhag ma chos skyong gi gtor mar bran cing slar yang slob mar sbyin/_mchan/_'dis ni rig 'dzin srung ma rnams:_lus dang grib bzhin 'grogs nas kyang:_lam gyi bar chad kun sel 'gyur:_sa ma ya:_mthun rkyen tshe dpal spel pa'i phyir:_bkra shis tshe yi dbang bskur ni:_thog mar tshe bcud 'gugs pa'i phyir:_tshe mda' g.yab cing gdung shugs bskyed:_hrIH_pad+ma rnam par rgyas pa'i dkyil 'khor nas:_bcom ldan mgon po o rgyan tshe dpag med:_sprul pa'i pho nya mgyogs ma'i tshogs rnams bcas:_thugs dam gnad nas bskul lo gzi byin skyed:_rnal 'byor bdag cag 'khor dang bcas pa yi:_bla tshe chad nyams yar ba rang sor chud:_'byung lnga'i dwangs ma ye shes 'od lngar sdus:_srid zhi'i dwangs bcud snying dbus thig ler stims:_mi 'gyur 'gag med mi shigs rdo rje'i tshe:_'chi med rtag pa don gyi dngos grub stsol:_oM AHhU~M badz+ra gu ru pad+ma sid+d+hi A yu She sarba sid+d+hi hU~M:_zhes bskul tshe 'brang spyi bor bzhag:_oM:_snying po'i bum pa ye shes 'od lnga'i dbus:_o rgyan tshe dpag med pa'i lha tshogs bzhugs:_mi 'gyur rtag pa rdo rje'i tshe dbang bskur:_skye 'chi bgres rgud bral ba'i dngos grub stsol:_kA ya A yur sid+d+hi a b+hi Shiny+tsa oM:_tshe chang bdud rtsi mgrin par sbyin:_AH_bde chen byang chub sems kyi bdud rtsi ni:_rlung sems dbu mar 'ching ba'i bcud dang ldan:_'gag med rtag pa rdo rje'i tshe dbang bskur:_tshangs dbyangs rgyun chad med pa'i dngos grub stsol:_wAka? A yur sid+d+hi a b+hi Shiny+tsa AH_ril bu snying dbus thig ler bstim:_hU~M:_'pho med dwangs ma lnga ldan ril bu'i gzugs:_snying dbus ye shes sems dpa'i tshul du thim:_mi shigs rtag pa rdo rje'i tshe dbang bskur:_'od gsal gnyug ma don gyi dngos grub stsol:_tsit+ta a yur sid+d+hi a b+hi Shiny+tsa hU~M:_tshe bcud rgyas gdab brtan par bya:_aH_spros pas snang srid khyab pa'i tshe dang dpal:_bsdus pas snying dbus mi shigs thig ler thim:_bcings pas 'du 'bral med pa'i lu gud rgyud:_cis kyang mi phyed rdo rje'i srog 'grub shog:_badz+ra A yu She rak+Sha a a:_dbang 'di lan gcig bskur bas kyang:_dus min 'chi las nges par grol:_mang du bskyar na tshe 'phel zhing:_dpal dang 'byor pa rgyas par 'gyur:_sa ma ya:_de ltar rtsa ba'i dbang bskur ba:_'jug pa dngos gzhi mtha' rgyas te:_dang po'i las can lhag gnas sogs:_spro na spyi bzhin sbyar bar bya:_sa ma ya:_smin grol brtan par bya ba'i phyir:_byin rlabs gtor ma'i dbang bskur ni:_don dbang snying po bsdus pa ste:_maN+Dal gsol gdab rgyud sbyangs pa'i:_slob ma lhar bskyed ye shes dbab:_brtan par byas rjes gtor ma ni:_rten dang brten pa'i dkyil 'khor gsal:_gnas gsum rdo rje'i 'bru gsum las:_dkar dmar mthing ba'i yig 'bru dang:_bdud rtsi 'od zer bcas pa rnams:_rim dang gcig car spros nas kyang:_slob ma'i gnas gsum zhugs shing thim:_dbang bzhi'i ye shes rdzogs par bsam:_gdung shugs drag po'i thugs dam bskul:_hrIH_sku gsum rigs 'dus sogs nas/_mkha' khyab 'gro kun smin cing grol bar mdzod:_mchan/_khyad par byin rlabs tshig 'di gsol:_lus ngag yid la rdo rje'i dbang bzhi bskur:_rtsa rlung thig le sems kyi dri ma sbyongs:_snang grags rtog gsum lha sngags chos skur shar:_sku bzhi'i go 'phang 'grub par byin gyis rlobs:_kA ya wAka? tsit+ta sarba a b+hi Shiny+tsa oM AHhU~M hrIH_gtor ma'i lha bstim don ngo sprad:_rjes 'brel bzlas pa'i lung sbyin zhing:_dbang bzhi stan thog gcig tu thob:_nyams rtogs ye shes rgyas par 'gyur:_sa ma ya:_de ltar dbang gis rgyud smin cing:_dam tshig rnam par dag pa yis:_rang dang gzhan don mchog bsgrub phyir:_bsnyen sgrub yan lag bzhi ldan pa'i:_las kyi rim pa bya 'dod na:_phun sum tshogs pa lnga ldan pas:_sa gzhi yongs sbyangs mtshams su bcad:_bsnyen pas bskul zhing nye bsnyen bsnyen phyir:_dkyil 'khor pa la snyan gsan dbab:_sgrub pa'i rdzas rnams nyer bsdogs shing:_bum pa slob ma lhag gnas sogs:_bla ma'i sgrub gzhung spyi ltar sbyar:_khyad par sgrub rten dam rdzas ni:_rig 'dzin bla ma'i snang brnyan sku:_bstan pa bu gcig 'khor lo gsung:_srog phur mtshan nyid ldan pa thugs:_yon tan sel med a mr-i ta:_phrin las myong grol ril bu dang:_rdor dril tshe gal ma dA na:_drag po'i phur bu la sogs bsham:_'di man chad phab ma grub pa yin 'dra/_dge legs 'phel/_mang+ga laM/_dge'o//__//