དྲི་བ་ལེ་ཚན་བརྒྱད་ཀྱི་བདག་ཉིད།

Previous Text Back to Volume Page Next Text

Wylie title	dri ba le tshan brgyad kyi bdag nyid
Location	dpal sprul bka' 'bum Volume 4, Text 13, Pages 351-354 (Folios 1a1 to 2b5)
Author	དཔལ་སྤྲུལ་རིན་པོ་ཆེ་
Less details More details
Citation	Dpal sprul rin po che. Dri ba le tshan brgyad kyi bdag nyid. In Dpal sprul 'jigs med chos kyi dbang po'i gsung 'bum, Vol. 4: 351-354. Kathmandu: Tsadra Foundation and Shechen Publications, 2026.
Genre	Replies to Questions - dris lan

[edit]

༄༅། །དྲི་བ་ལེ་ཚན་བརྒྱད་ཀྱི་བདག་ཉིད།

༄༅། །དང་པོ་སྤྱིར་ལྟ་བ་ལྟ་བ་ཞེས་ཐམས་ཅད་ཀྱིས་སྒྲོགས་པའི་ལྟ་བ་དེའི་མཚན་གཞིའི་ངོས་འཛིན་དེ་གང་ཡིན། ལྟ་བ་དེ་འཁོར་འདས་ཀྱི་གཏན་ལ་དབབ་བྱའི་ཡུལ་དེ་ཡིན་ནམ། འོན་ཏེ་གཏན་ལ་འབེབ་བྱེད་ཀྱི་ཐབས་ལུང་རིགས་མན་ངག་དེ་ཡིན་ནམ་ཡང་ན་དེ་རྟོགས་པའི་རྟོགས་པ་དེ་ཡིན་ནམ་ཅི། སྤྱིར་མདོ་སྔགས་གང་གི་ལུགས་ལ་ཡང་ལྟ་བ་དང་སྒོམ་པ་དེ་མཐུན་དགོས་སམ་མི་དགོས། ལྟ་སྒོམ་གཉིས་ཐ་དད་དུ་འབྱེད་པའི་ཁྱད་པར་དེ་གང་ཡིན། ཡང་གསང་སྔགས་གསར་མའི་རྒྱུད་སྡེ་རྣམས་ནས་ཕུང་ཁམས་ལྷར་གསུངས་པ་དེ་ཡིན་ལུགས་དེ་ལྟར་དུ་ཤེས་རབ་ཀྱིས་ཐག་གཅོད་པ་ཡིན་ནམ། དོན་ལ་དེ་ལྟར་མིན་པ་ཞིག་གནས་སྐབས་བསྒོམ་པས་གསལ་འདེབས་པ་ཡིན་ནམ། གཞི་འབྲས་ཀྱི་ལྟ་བ་སྦྱར་ནས་དག་བྱ་དག་བྱེད་ཀྱིས་བཤད་པ་ཙམ་ཡིན་ནམ། འདི་གསུམ་གང་ཡིན། འཇམ་དབྱངས་ས་སྐྱ་པ་རྗེས་འབྲངས་དང་བཅས་པ་རྣམས་ཀྱི་གསུང་ངག་རིན་པོ་འཆད་པའི་སྐབས་སུ་བུམ་དབང་གི་གྲུབ་མཐའ་འཁོར་འདས་དབྱེར་མེད་དུ་བཤད་པ་དེ་རྒྱུ་མཚན་ཉིད་ཀྱི་ཐེག་པའི་སྐབས་སུ་འཁོར་འདས་གཉིས་ཀ་སྟོང་ཉིད་སྤྲོས་བྲལ་དུ་མཉམ་པར་གསུང་བ་དེ་དང་གཅིག་ཡིན་ནམ། དེ་ལས་ཐ་དད་པའི་དབྱེར་མེད་ལུགས་གཞན་ཞིག་བཤད་རྒྱུ་ཡོད་དམ་གང་ཅི་ཡིན། ཡང་ལྟ་བ་ངོ་བོ་ཉིད་གསུམ་གསུངས་པའི་སྣང་ཕྱོགས་ཀྱི་ངོ་བོ་ཉིད་དེའི་མཚན་གཞི་གང་ལ་ངོས་འཛིན་པ་ཡིན། ཡང་དཔལ་མགོན་འཕགས་པ་ཀླུ་སྒྲུབ་ཞབས་ཀྱིས། དབུ་མ་རིག་པའི་ཚོགས་དྲུག་གསུངས་པའི་དོན། བསྒྲུབ་བྱ་བདེན་དངོས་དང་། བསྒྲུབ་བྱེད་རྟོག་གེའི་ཚིག་དོན་བཅུ་དྲུག་འགོག་པ་གཉིས་ཀྱི་དབང་དུ་མཛད་ཅེས་ཡོངས་ལ་གྲགས་ན་གཙོ་བོར་དབུ་མ་ཞིབ་མོ་རྣམ་འཐག་གི་དགག་བྱར་གྱུར་པའི་རྟོག་གེའི་ཚིག་དོན་བཅུ་དྲུག་པོ་དེ་གཞུང་གང་གི་ཆོས་སྐད་ཡིན། ཡང་སྤྱིར་ནང་པ་སངས་རྒྱས་པ་ལ་ཐེག་པ་གསུམ་དུ་ངེས་པའི་ཐེག་པ་གསུམ་པོ་དེ་སོ་སོར་ཐེག་པ་གསུམ་དུ་འཇོག་པའི་གནད་ཐུན་མོང་མ་ཡིན་པ་དེ་གང་ཅི་ཞིག་ཡིན། ཡང་སྤྱིར་ནང་པ་སངས་རྒྱས་པ་ཐམས་ཅད་རྒྱུ་འབྲས་ལ་བླང་དོར་བྱེད་པའི་སྤྱོད་པ་དེའི་སྔོན་དུ་རྒྱུ་འབྲས་བསླུ་མེད་ལ་ཡིད་ཆེས་པའི་ཡང་དག་པའི་ལྟ་བ་སྔོན་དུ་འགྲོ་དགོས་སམ་མི་དགོས། ཡང་རྒྱལ་སྲས་བྱང་ཆུབ་སེམས་དཔའ་རྣམས་ཀྱིས། ཇི་ལྟར་པདྨོ་ཆུས་མི་ཆགས་པ་བཞིན། །ཉི་ཟླ་ནམ་མཁར་ཐོག་པ་མེད་ལྟར་སྤྱད། །ཅེས་གསུངས་པ་ལྟར་འཁོར་བ་ན་གནས་ཀྱང་འཁོར་བའི་སྐྱོན་གྱིས་མ་གོས་པར་སྤྱོད་པ་དེ་ལྟར་སྤྱད་ནུས་པའི་གནད་ཐུན་མོང་མ་ཡིན་པ་དེ་གང་ཅི་ཞིག་ཡིན། དེ་ལྟར་དྲི་བ་ལེའུ་ཚན་བརྒྱད་ཀྱི་བདག་ཉིད་ཅན་འདི་ཕུལ་བ་བརྩེ་བས་བཞེས་ཏེ་ལུང་རིགས་ཚད་མ་ཡིད་རྟོན་པའི་བདག་ཉིད་ཅན་གྱིས་དོགས་གནས་ཀྱི་ཐེ་ཚོམ་བསལ་དུ་གསོལ། དགེའོ། །