ཐེག་པ་རིམ་དགུའི་རྣམ་བཞག་གི་ས་བཅད།

Previous Text Back to Volume Page Next Text

Wylie title	theg pa rim dgu'i rnam bzhag gi sa bcad
Location	dpal sprul bka' 'bum Volume 4, Text 2, Pages 13-49 (Folios 1a1 to 19a6)
Author	དཔལ་སྤྲུལ་རིན་པོ་ཆེ་
Less details More details
Citation	Dpal sprul rin po che. Theg pa rim dgu'i rnam bzhag gi sa bcad. In Dpal sprul 'jigs med chos kyi dbang po'i gsung 'bum, Vol. 4: 13-49. Kathmandu: Tsadra Foundation and Shechen Publications, 2026.
Genre	Detailed Classification - rnam bzhag · Outlines - sa bcad · Stages of the Vehicles - theg rim

[edit]

༄༅། །ཐེག་པ་རིམ་དགུའི་རྣམ་བཞག་གི་ས་བཅད་བཞུགས་སོ། །

༄༅། །རྗེ་བཙུན་འཇམ་དཔལ་དབྱངས་ལ་ཕྱག་འཚལ་ལོ། །འདིར་སྡོམ་གསུམ་རྣམ་པར་ངེས་པའི་བསྟན་བཅོས་ཀྱི་ལེའུ་ཐོག་མར་ཤེས་ཐོབ་ཀྱིས་དམིགས་པར་བྱ་བའི་ཡུལ་སྦྱང་གཞི་ཁམས་དང་བྲལ་འབྲས་མཐར་ཐུག་གི་འབྲས་བུ་ངོས་བཟུང་བའི་སྐབས་སུ་གྲུབ་མཐའི་དབང་གིས་འདོད་ཚུལ་མི་འདྲ་བ་གསུམ་དང་། རྣམ་གྲོལ་གྱི་ལམ་ཐམས་ཅད་ཐེག་དགུར་འདུ་ཚུལ་བཤད་སྐབས་སུ་ཉན་ཐོས་ལ་སོགས་པའི་ཐེག་པ་དགུ་པོའི་རྣམ་བཞག་རྣམས་འགྲེལ་བས་བསྡུས་ཏེ་བསྟན་པ་ཉིད་ཅུང་ཟད་བཀྲལ་ཏེ་བཤད་ན། རྫོགས་པ་ཆེན་པོ་ཞེས་པ་ནི། རང་གི་ད་ལྟའི་རིག་པ་སྐད་ཅིག་མ་འདི་ཉིད་ཀྱི་ཀློང་དུ་རང་སྣང་གིས་བསྡུས་པའི་ཆོས་ཐམས་ཅད་མ་བཙལ་ཡེ་རྫོགས་ཀྱི་ཚུལ་དུ་ཡོད་པས་རྫོགས་པ། དེ་ལྟ་བུའི་སེམས་ཉིད་དེ་ཡང་གནས་ལུགས་རང་གི་ངོ་བོ་ལ་སྒྲིབ་པས་གོས་མ་མྱོང་བས་ངོ་བོ་ཡེ་དག་ཡིན་པས་སྤང་བ་ཕུན་སུམ་ཚོགས་པ་དང་། སེམས་ཉིད་དེ་ཡང་ངོ་བོ་སྟོང་བའི་ཆ་ནས་འགགས་པ་ལ་སོགས་པའི་སྤྲོས་མཐའ་བརྒྱད་ལ་མི་གནས་པའི་ཕྱིར་ཁས་ལེན་ཐམས་ཅད་དང་བྲལ་ཡང་རང་བཞིན་གསལ་བའི་ཆ་ནས་སྟོབས་བཅུ་མི་འཇིགས་པ་བཞི་སོགས་རྒྱལ་བའི་ཡོན་ཏན་ཐམས་ཅད་ངོ་བོ་ཉིད་དུ་ལྷུན་གྱིས་གྲུབ་པའི་ཕྱིར་རྟོགས་པ་ཕུན་སུམ་ཚོགས་པ་དང་། དེ་གཉིས་ཀྱང་ཕྱོགས་སུ་མ་ལྷུང་བ་ལྟ་བུ་ཡིན་ཏེ། ངོ་བོ་སྟོང་དུས་ཉིད་ནས་རང་བཞིན་མ་འགགས་པའི་ཕྱིར་ལྷུན་གྲུབ་རྟེན་འབྱུང་གི་རྣམ་པ་སྣ་ཚོགས་ཤར་ཡང་དེ་ལྟ་བུ་ཤར་དུས་ཉིད་ནས་ངོ་བོ་སྟོང་ཉིད་ཀ་དག་སྤྲོས་བྲལ་གང་དུའང་མ་གཡོས། མ་འཕོས་པའི་ཕྱིར་ཀ་དག་ལྷུན་གྲུབ་ཟུང་དུ་འཇུག་པའི་རིག་པ་སྐུ་གསུམ་རང་ཆས་འདི་ལ་ལས་བཞི་ལྷུན་གྱིས་གྲུབ་པའི་ཕྱིར་ཕྲིན་ལས་ཕུན་སུམ་ཚོགས་པ་སྟེ། དེ་ལྟར་སྤང་རྟོགས་ཕྲིན་ལས་གསུམ་གྱི་བདག་ཉིད་ཡིན་པས་ན་ཆེན་པོ་ཞེས་བྱའོ། །ཡེ་ཤེས་ལ། ངོ་བོ་སྟོང་པ་རང་བཞིན་གསལ་བ་ཐུགས་རྗེ་ཀུན་ཁྱབ་སྟེ། གཞི་གནས་ཀྱི་ཡེ་ཤེས་གསུམ་དང་། ཆོས་ཀྱི་དབྱིངས་ཀྱི་ཡེ་ཤེས་སོགས་མཚན་ཉིད་འཛིན་པའི་ཡེ་ཤེས་ལྔ་དང་། ཇི་ལྟར་ཇི་སྙེད་མཁྱེན་པ་སྟེ་ཡུལ་ལ་འཇུག་པའི་ཡེ་ཤེས་གཉིས་ཏེ། ཡེ་ཤེས་དེ་དག་གི་སྤྱི་གཟུགས་སེམས་ཉིད་ངོ་བོ་ནི་རང་བྱུང་རིག་པའི་ཡེ་ཤེས་ཡིན་པའི་ཕྱིར་ན་དེ་ཉིད་ལ་ཡེ་ཤེས་སྤྱི་གཟུགས་ཞེས་སྨོས་པ་ཡིན་ནོ། །ཚིག་རྐང་དེ་ཉིད་ཀྱིས་གཞི་རྒྱུད་བསྟན་པ་ཡིན་པས། དེ་ཉིད་ལ་ངོས་འཛིན་ཚུལ་གྲུབ་མཐའི་བྱེ་བྲག་གིས་འདོད་པ་མི་འདྲ་བ་ཡོད་དེ། འདི་ལྟར་བསྟན་བཅོས་བྱེ་བྲག་བཤད་པའི་རྗེས་སུ་སྨྲ་བས་ནི། སྲིད་པ་མིག་ལ་སོགས་དབང་པོ་ལྔ་དང་། སྲིད་པའི་ཡོ་བྱད་གཟུགས་སོགས་ཡུལ་ལྔ་ལ་མི་ཆགས་པའི་སེམས་བྱུང་ཆོག་ཤེས་གསུམ་ལྡན་ཏེ། དེ་ཡང་ཆོས་གོས་ངན་ངོན་ཙམ་གྱིས། གནས་མལ་ངན་ངོན། འཚོ་བ་ངན་ངོན་ཙམ་གྱིས་ཆོག་ཤེས་པའི་གང་ཟག་དེ་ཉིད་མ་ཆགས་འཕགས་པའི་རིགས་སུ་འདོད་དོ། །བསྟན་བཅོས་ལ་ཚད་མར་མི་བྱེད་པ་མདོ་སྡེའི་རྗེས་སུ་འབྲང་བས་ནི། སེམས་ཅན་ཀུན་གྱི་སེམས་ཀྱི་ས་བོན་ནི་ཟག་མེད་ཀྱི་ཡེ་ཤེས་ཞེས་སངས་རྒྱས་ཉིད་ཀྱི་རིགས་བསྐྱེད་ན་འབྱུང་རུང་གི་ནུས་པ་ཅན་དུ་འདོད་དོ། །ཕྱི་དོན་གྱི་ཆོས་ཐམས་ཅད་ནང་སེམས་ཙམ་དུ་འདོད་པ་དག་གིས་ནི། ཐོག་མ་མེད་པ་ནས་སེམས་ཅན་གྱི་སེམས་རྒྱུད་ལ་བསྐྱེད་མི་དགོས་པར་སངས་རྒྱས་ཀྱི་རིགས་ཀྱི་ནུས་པ་ཆོས་ཉིད་ཀྱིས་ཐོབ་པ་སྟེ། དོན་ལ་གཟུང་འཛིན་གཉིས་སྟོང་གི་ཤེས་པ་རང་རིག་རང་གསལ་ཞེས་པ་ཀུན་གཞིའི་རྣམ་ཤེས་ལ་འདོད་དོ། །དེ་གསུམ་གྱིས་བདེ་གཤེགས་སྙིང་པོ་འདུས་བྱས་སུ་འདོད་པའི་ཕྱིར་དངོས་པོར་སྨྲ་བའི་གྲུབ་མཐའ་ཞེས་གྲུབ་མཐའ་མཚན་ཉིད་པ་མ་ཡིན་ནོ། །ལྟ་བ་རྟག་ཆད་ཀྱི་མཐའ་ལ་མི་གནས་པའི་དབུ་མ་པ་ནི། སེམས་ཉིད་དྲི་མ་དྭངས་པའི་དེ་བཞིན་ཉིད་བདེ་གཤེགས་སྙིང་པོ་སངས་རྒྱས་ཀྱི་རིགས་སུ་འདོད་པའི་ཕྱིར་གྲུབ་མཐའ་མཚན་ཉིད་པ་ཡིན་ནོ། །ཐེག་ཆེན་དབུ་མའི་ལྟ་བ་དེ་ལས་རབ་ཏུ་བྱེ་བས་གསང་སྔགས་རྒྱུད་སྡེ་དྲུག་གིས་ཀྱང་གཞི་རྒྱུད་སངས་རྒྱས་ཀྱི་རིགས་དེ་ལ་མིང་གི་བཏགས་ཚུལ་མི་འདྲ་བ་དུ་མ་ཡོད་དེ། འདི་ལྟར་བྱ་བའི་རྒྱུད་ཀྱིས་ནི། བདག་གི་དེ་ཁོ་ན་ཉིད་དང་། སྤྱོད་རྒྱུད་དང་རྣལ་འབྱོར་རྒྱུད་ཀྱིས་ནི། དོན་དམ་མཚན་མ་མེད་པའི་བྱིན་བརླབས་ཀྱིས་ཀུན་རྫོབ་རྡོ་རྗེ་དབྱིངས་ཀྱི་ལྷར་ལྟ་བ་འདོད། མ་ཧཱ་ཡོ་གས་ནི། བདེན་པ་དབྱེར་མེད་ལྷག་པའི་ཆོས་སྐུ་ཆེན་པོ་ཞེས་བཏགས། ཨ་ནུ་ཡོ་གས་ནི། དེ་ལ་དབྱིངས་དང་ཡེ་ཤེས་གཉིས་སུ་མེད་པའི་སྲས་རྩ་བ་བྱང་ཆུབ་སེམས་ཀྱི་དཀྱིལ་འཁོར་ཞེས་བཏགས། རྫོགས་པ་ཆེན་པོ་ཨ་ཏི་ཡོ་གས་ནི། ངོ་བོ་རང་བཞིན་ཐུགས་རྗེའི་བདག་ཉིད་རིག་པ་སྐུ་གསུམ་རང་ཆས་དེ་ལ་ཀ་དག་དང་ལྷུན་གྲུབ་ཟུང་འཇུག་ཅེས་འདོད་པ་ཡིན་ནོ། །འདིར་གཞི་བདེ་གཤེགས་སྙིང་པོ་འབྲས་བུ་ཉེར་ལེན་གྱི་རྒྱུ་དང་། ལམ་སྡོམ་པ་གསུམ་གྱི་ཉམས་ལེན་ལྷན་ཅིག་བྱེད་པའི་རྐྱེན་ཏེ། དེ་གཉིས་ཀྱི་འབྲས་བུ་མི་སློབ་ཟུང་འཇུག་གི་ངོ་བོ་སངས་རྒྱས་རྡོ་རྗེ་འཆང་ཆེན་པོ་བྲལ་འབྲས་ཀྱི་ཚུལ་དུ་ཐོབ་པ་ཡིན་ནོ།། ༈ ཡང་རྣམ་གྲོལ་གྱི་ལམ་ཐམས་ཅད་ཐེག་དགུར་བསྡུ་བའི་སྐབས་སུ་སྤྱིར་ཐེག་པ་ཞེས་པ་ཡཱ་ནའི་སྒྲ་ལས་བཞོན་པ་ལ་འཇུག་སྟེ། དེ་ཡང་ས་དང་ལམ་གོང་ནས་གོང་དུ་འདེགས་པར་བྱེད་པ་སྟེ། སྡུད་པ་ལས། ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་དེ། །དགའ་སྐྱིད་བདེ་བ་མངོན་པར་འཐོབ་བྱེད་ཐེག་པའི་མཆོག །དེ་གང་ཞོན་ནས་སེམས་ཅན་ཐམས་ཅད་མྱ་ངན་བཟླ། །ཞེས་སོ། །དེ་ལ་དབྱེ་བསྡུའི་རྣམ་པ་མང་དུ་ཡོད་ཀྱང་འདིར་སྔ་འགྱུར་རྙིང་མའི་རང་ལུགས་ལྟར་ན། དྲི་མེད་བཤགས་རྒྱུད་ལས། མཚན་ཉིད་སྡེ་སྣོད་གསུམ་ལ་ཐེག་པ་གསུམ། །ཕྱི་པ་ཐུབ་པའི་རྒྱུད་ལ་ཀྲི་ཡོག་གསུམ། །ནང་པ་ཐབས་ཀྱི་རྒྱུད་ལ་ཡོ་ག་གསུམ། །ཐེག་པ་རིམ་པ་དགུ་ཡི་དམ་ཚིག་རྣམས། །ཞེས་དང་། སྤྱི་མདོ་ལས། དོན་དམ་ངེས་པའི་ཐེག་པ་ནི། །གསུམ་དུ་ངེས་པར་བསྟན་པ་ཡིན། །ཀུན་འབྱུང་འདྲེན་དང་དཀའ་ཐུབ་རིགས། །དབང་བསྒྱུར་ཐབས་ཀྱི་ཐེག་པའོ། །ཞེས་གསུངས་པ་ལྟར། ཀུན་འབྱུང་འདྲེན་པའི་ཐེག་པ་གསུམ། དཀའ་ཐུབ་རིག་བྱེད་ཀྱི་ཐེག་པ་གསུམ། དབང་བསྒྱུར་ཐབས་ཀྱི་ཐེག་པ་གསུམ་སྟེ་དགུ་སོ་སོར་ས་བཅད་ཀྱི་ཆིངས་གསུམ་རེས་བསྡུས་ཏེ། གཞི་ལྟ་བས་གཏན་ལ་འབེབས་ཚུལ་དང་གཅིག །ལམ་བསྒོམ་པས་ཉམས་སུ་ལེན་ཚུལ་དང་གཉིས། དེའི་འབྲས་བུ་ཇི་ལྟར་ཐོབ་ཚུལ་དང་གསུམ། དེ་ལ་དང་པོ་ཀུན་འབྱུང་འདྲེན་པའི་ཐེག་པའམ་རྒྱུ་མཚན་ཉིད་ཀྱི་ཐེག་པ་ལ་གསུམ་ལས། དང་པོ་ཉན་ཐོས་ཀྱི་ཐེག་པས་གཞི་ལྟ་བས་གཏན་ལ་འབེབས་ཚུལ་ནི། སྤྱིར་ཤེས་བྱའི་ཆོས་ཐམས་ཅད་ཕུང་པོ་ལྔ་ལྟ་བུ་ཞིག་ལ་བསྡུས་ཏེ། དེ་ཉིད་ཀྱི་སྟེང་ནས་གང་ཟག་དང་ཆོས་ཀྱི་བདག་བཙལ་བར་བྱ་སྟེ། དེ་ཡང་གང་ཟག་གི་བདག་ནི་ཕུང་པོ་ལྔ་ཚོགས་ཀྱི་རྒྱུད་ལ་དམིགས་ནས་བདག་གམ་ངར་འཛིན་པ་སྟེ། དེ་ཉིད་ཤེས་རབ་ཀྱིས་བརྟགས་ནས་ཕུང་པོ་ལྔ་དང་གཅིག་གམ་ཐ་དད་པའི་བདག་མེད་པར་རིག་པས་གང་ཟག་གི་བདག་མེད་རྟོགས། ཆོས་ཀྱི་བདག་མེད་རྟོགས་ཚུལ་ནི། ཕུང་པོ་ལྔ་པོ་དེ་ཡང་བེམ་ཤེས་གཉིས་སུ་འདུས་པས་བེམ་པོས་བསྡུས་པའི་ཆོས་ཐམས་ཅད་དེ་དང་དེར་རང་བཞིན་གྱིས་གྲུབ་པར་འདོད་པ་གཟུང་བ་ཆོས་ཀྱི་བདག་དང་། ཤེས་པས་བསྡུས་པའི་ཆོས་རྣམས་རང་བཞིན་གྱིས་གྲུབ་པར་འཛིན་པ་ཆོས་ཀྱི་བདག་སྟེ། བདག་གཉིས་པོ་དེ་ཉིད་སོ་སོར་རྟོག་པའི་ཤེས་རབ་ཀྱིས་བརྟགས་ཤིང་དཔྱད་པའི་ཚེ་བེམ་པོའི་ཆོས་ལ་རྡུལ་ཕྲན་ཆ་མེད་ཙམ་ལས་རང་བཞིན་མེད་པར་རྟོགས་པ་དང་། ཤེས་པའི་ཆོས་ལ་སྐྱེས་བུ་སྟོབས་དང་ལྡན་པའི་སེ་གོལ་ཞིག་གཏོགས་པའི་ཡུན་ཆ་དྲུག་ཅུར་བགོས་པའི་ཆ་གཅིག་གི་ཚེ་དུས་མཐའི་སྐད་ཅིག་མ་ཙམ་ལས་རང་བཞིན་མེད་པར་རྟོགས་པ་ནི་ཉན་ཐོས་ཀྱི་ལྟ་བ་གཏན་ལ་འབེབས་ཚུལ་ཡིན་ནོ། །ལམ་བསྒོམ་པས་ཉམས་སུ་ལེན་ཚུལ་ལ། ཀུན་སློང་། འཇུག་སྒོ། ཞུགས་ནས་ཇི་ལྟར་སྒོམ་པའི་རིམ་པ་དང་གསུམ་ལས། དང་པོ་ཀུན་སློང་ནི། འཁོར་བ་མཐའ་དག་སྡུག་བསྔལ་གྱི་རང་བཞིན་དུ་ཤེས་ནས། དེ་ལས་རང་གཅིག་པུ་ཐར་འདོད་ངེས་འབྱུང་གི་བསམ་པ་སྐྱེས་བུ་འབྲིང་གི་ལམ་ཡིན་ནོ། །གཉིས་པ་འཇུག་སྒོ་ནི། ཀུན་སློང་དེ་དང་ལྡན་པར་སོ་སོར་ཐར་པ་རིགས་བདུན་ནམ་བརྒྱད་པོ་གང་རུང་གི་སྡོམ་པས་རང་རྒྱུད་ལེགས་པར་བསྡམ་པ་ཡིན་ནོ། །གསུམ་པ་ཞུགས་ནས་ཇི་ལྟར་སྒོམ་པའི་རིམ་པ་ནི། བསམ་གཏན་སྒོམ་པའི་མཐུན་རྐྱེན་རྣམས་ཚང་བར་བྱེད། འཇོག་པ་ལ་སོགས་སེམས་གནས་དགུའི་སྤོང་འགལ་མཐུན་སྒྲུབ་ཀྱི་ཞི་གནས་རྩེ་གཅིག་སྒོམ་པ་དེ་ལ་ནི་ཞི་གནས་ཀྱི་གསོ་སྦྱོང་ཟེར་རོ། །བདེན་བཞི་རྣམ་པ་བཅུ་དྲུག་གིས་ལྷག་མཐོང་རྣམ་པར་མི་རྟོག་པའི་ཤེས་རབ་སྐྱེད་དེ་ཞི་ལྷག་གཉིས་སྒོམ་པ་ཡིན་ནོ། །དེའི་འབྲས་བུ་ཇི་ལྟར་ཐོབ་ཚུལ་ནི། དེ་ལྟར་ལམ་ཞི་ལྷག་གཉིས་བསྒོམ་པས་ཁམས་གསུམ་གྱི་ཉོན་མོངས་པ་མཐའ་དག་སྤང་རིམ་དང་བསྟུན་ཏེ་འབྲས་བུ་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ། ཕྱིར་མི་འོང་བ། དགྲ་བཅོམ་པ་སྟེ་སྐྱེས་བུ་ཟུང་བཞི་པོ་གང་རུང་ཐོབ་པ་ཡིན་ནོ། །གཉིས་པ་རང་རྒྱལ་གྱི་ཐེག་པས་གཞི་ལྟ་བ་གཏན་ལ་འབེབས་ཚུལ་ནི། སྔར་གྱི་ཉན་ཐོས་ཀྱི་ལྟ་བ་དེ་ལ་གཞིར་བྱས་ནས། གཟུང་ཡུལ་རྡུལ་ཕྲན་ཆ་མེད་ཤར་ལྷོ་ནུབ་བྱང་གི་ཕྱོགས་ཆ་གཞལ་ཏེ་རང་བཞིན་མེད་པར་གཏན་ལ་ཕབ་སྟེ་ཤེས་པ་སྐད་ཅིག་ལ། དོན་དམ་དུ་འདོད་པ་ཡིན་ནོ། །ལམ་བསྒོམ་པས་ཉམས་སུ་ལེན་ཚུལ་ལ། ཀུན་སློང་དང་འཇུག་སྒོ་སོགས་ཉན་ཐོས་དང་འདྲ་བ་ལས། རང་རྒྱལ་གྱི་ཐུན་མོང་མ་ཡིན་པའི་ལམ་རྟེན་འབྲེལ་ཡན་ལག་བཅུ་གཉིས་ལུགས་ལྡོག་ཏུ་བསྒོམས་ནས་སྲིད་པའི་རྩ་བ་མ་རིག་པ་ཉིད་བདག་མེད་རྟོགས་པའི་ཤེས་རབ་ཀྱིས་སྤངས་ནས། འབྲས་བུ་རང་རྒྱལ་དགྲ་བཅོམ་བསེ་རུའམ་ནེ་ཙོ་ལྟ་བུ་ཐོབ་པ་ཡིན་ནོ། །དེ་གཉིས་གྲུབ་མཐའི་དབང་དུ་བྱས་ན་ཉན་ཐོས་ཀྱི་ཐེག་པ་དེ་ལ་ནང་གསེས་སུ་བྱེ་བྲག་སྨྲ་བ་དང་། མདོ་སྡེ་པ་གཉིས་སུ་ཕྱེ་བ་ཡིན་གྱི་རང་རྒྱལ་གྱི་ཐེག་པ་དང་མདོ་སྡེ་པའི་གྲུབ་མཐའ་གཉིས་ཕྱོགས་མཚུངས་ཙམ་ལས་གཅིག་ནི་མ་ཡིན་ནོ། །དེ་ཡང་ཉན་ཐོས་དབང་རྣོན་མདོ་སྡེ་པའི་གྲུབ་མཐའ་འཛིན་པ་དེ་ལ་ལུང་གི་རྗེས་འབྲང་དང་། རིག་པའི་རྗེས་འབྲང་གཉིས་ཡོད་པ་ལས། རིག་པའི་རྗེས་འབྲང་བ་ཁ་ཅིག་གིས་སངས་རྒྱས་ཀྱི་བསྟན་པའི་སྒོར་ཞུགས་ནས། ལྷག་པ་ཚུལ་ཁྲིམས་ཀྱི་བསླབ་པས་རྒྱུད་ལེགས་པར་བསྡམས་ཀྱང་། གཞན་དག་ལ་ཆོས་སྟོན་པ་སོགས་ཀྱིས་བྲེལ་ཏེ་ཞི་ལྷག་གི་རྣལ་འབྱོར་ཇི་བཞིན་པར་སྒོམ་མ་ནུས་པས། འབྲས་བུ་བཞི་པོ་གང་ཡང་མ་ཐོབ་པས་སྐྱེ་བ་ཕྱི་མར་སངས་རྒྱས་དང་ཆོས་ཀྱི་སྒྲོན་མས་སྟོང་བའི་མུན་བསྐལ་གྱི་འཇིག་རྟེན་དུ་སྐྱེས་ནས་ལམ་རྟེན་འབྲེལ་ཟབ་མོའི་ལྟ་བ་བསྒོམ་པས་འབྲས་བུ་རང་རྒྱལ་དགྲ་བཅོམ་པ་ཐོབ་སྟེ་གཞན་ལ་སྒྲ་མེད་པར་ལུས་ཀྱི་རྣམ་རིག་གིས་ཆོས་སྟོན་པར་སྨོན་ལམ་བཏབ་སྟེ་གཤེགས་པ་རྣམས་ཡིན་ནོ། །འོ་ན་རང་རྒྱལ་ཞེས་པ་སངས་རྒྱས་མ་བྱོན་པའི་མུན་བསྐལ་མ་གཏོགས་སྒྲོན་མའི་བསྐལ་བ་ལ་མི་འབྱུང་ན་ད་ལྟ་སངས་རྒྱས་ཀྱི་བསྟན་པ་འདིར་རང་རྒྱལ་གྱི་ཐེག་པ་བསྟན་པས་ཅི་བྱ་ཞེ་ན། བྱང་ཆུབ་སེམས་དཔའ་རྣམས་ཀྱི་ལམ་ཤེས་ཀྱི་རྣམ་པ་ཡོངས་སུ་རྟོགས་པ་ལ་སོགས་པའི་ཕྱིར་སྨྲས་པ་ཡིན་ནོ། །གསུམ་པ་བྱང་ཆུབ་སེམས་དཔའི་ཐེག་པ་ལ་དབྱེ་ན་སེམས་ཙམ་དང་དབུ་མ་པ་གཉིས་ལས། དང་པོ་སེམས་ཙམ་པས་གཞི་ལྟ་བ་གཏན་ལ་འབེབས་ཚུལ་ནི། མདོ་སྡེ་པས་ཤེས་པ་སྐད་ཅིག་མ་དོན་དམ་དུ་འདོད་པ་དུས་ཀྱི་ཆས་གཞལ་ནས་རང་བཞིན་མེད་པར་གཏན་ལ་འབེབས་ཤིང་། དེར་མ་ཟད་ཀྱི་ཕྱི་དོན་ཕྱི་རོལ་ཏུ་ཡོད་པར་ཁས་མི་ལེན་ཞིང་ནང་སེམས་ཙམ་དུ་འདོད་པ་སྟེ། དེ་ཡང་གཟུང་འཛིན་གཉིས་སྟོང་གི་ཤེས་པ་རང་རིག་རང་གསལ་ཀུན་གཞིའི་རྣམ་ཤེས་ལ་འདོད་དོ། །གཞན་འཇུག་སྒོ་ལ་སོགས་པ་ཕལ་ཆེར་དབུ་མ་པ་དང་མཐུན་པས་འདིར་མ་སྨྲས་སོ། །གཉིས་པ་དབུ་མ་པ་ལྟར་ན། གཞི་ལྟ་བས་གཏན་ལ་འབེབས་ཚུལ་ནི། རྩ་ཤེས་ལས། རྟེན་ཅིང་འབྲེལ་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་ཉིད་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །ཞེས་པས། ཀུན་རྫོབ་སྣང་བའི་ཆོས་སོ་ཅོག་ཐམས་ཅད་སྣང་བ་ཙམ་ཉིད་ནས་རང་བཞིན་མ་གྲུབ་པའི་ཕྱིར་རྟེན་འབྲེལ་དུ་རྟོགས་ཤིང་། རྟེན་འབྲེལ་སྣང་བའི་ཆོས་ཐམས་ཅད་ནང་སེམས་སུ་ཡང་མ་གྲུབ་ཅིང་། སེམས་ལས་གཞན་ཕྱི་རོལ་ཏུ་ཡང་རང་བཞིན་གྱིས་གྲུབ་པའི་དངོས་པོ་རྡུལ་ཕྲ་རབ་ཙམ་ཡང་མེད་པའི་སྟོང་ཉིད་སྤྲོས་པའི་མཐའ་བརྒྱད་དང་བྲལ་བ་སྟེ། བདེན་པ་དབྱེར་མེད་པའི་སྟོང་ཉིད་ཁས་ལེན་ཐམས་ཅད་དང་བྲལ་བར་གཏན་ལ་འབེབས་པ་ཡིན་ནོ། །ལམ་སྒོམ་པས་ཉམས་སུ་ལེན་ཚུལ་ལ། ཀུན་སློང་ནི་མ་རྒན་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ལ་འགོད་འདོད་ཀྱི་བསམ་པས། འཇུག་སྒོ་ནི་ཟབ་མོ་ལྟ་བའི་ལུགས་སྲོལ་དང་། རྒྱ་ཆེན་སྤྱོད་པའི་ལུགས་སྲོལ་གཉིས་གང་རུང་གི་ཆོ་ག་ལ་བརྟེན་ནས་སྨོན་འཇུག་བྱང་ཆུབ་སེམས་ཀྱི་སྡོམ་པས་རྒྱུད་བསྡམས་ནས། བླང་བྱའི་བསླབ་བྱ་ཚད་མེད་པ་བཞི་དང་ཕ་རོལ་ཏུ་ཕྱིན་པ་དྲུག་ལ་ཚུལ་བཞིན་དུ་སློབ་པ་ཡིན་ནོ། །ཞུགས་ནས་ལམ་སྒོམ་པས་ཉམས་སུ་ལེན་ཚུལ་ནི། སློབ་པའི་ལམ་བཞི་རྒྱུ་ལམ་བདེན་བྱང་ཆོས་སོ་བདུན་རིམ་པར་བསྒོམས་པས་འཕགས་ལམ་རྣམས་བསྒྲོད་དེ། དེའི་འབྲས་བུ་མཐར་ཐུག་མི་སློབ་པའི་སངས་རྒྱས་ཀྱི་ས་ཇི་ལྟར་ཐོབ་ཚུལ་ནི། མི་སློབ་པའི་ཡེ་ཤེས་ཆོས་སྐུའི་ཡོན་ཏན་ཟག་མེད་ཀྱི་ཆོས་སྡེ་ཚན་ཉེར་གཅིག་དང་། ལོངས་སྐུའི་ཡོན་ཏན་མཚན་དང་དཔེ་བྱད། སྤྲུལ་སྐུའི་ཕྲིན་ལས་ཉེར་བདུན་བཅས་བསྟན་བཅོས་མངོན་པར་རྟོགས་པའི་རྒྱན་ལས་ཇི་སྐད་བཤད་པ་བཞིན་ཐོབ་པ་ཡིན་ནོ། །དཔེ་རྒྱུ་མཚན་ཉིད་ཀྱི་ཐེག་པ་གསུམ་སོང་ནས།། ༈ གཉིས་པ་དཀའ་ཐུབ་རིག་བྱེད་ཀྱི་ཐེག་པའམ་སྔགས་ཕྱི་རྒྱུད་གསུམ་ལས། དང་པོ་བྱ་རྒྱུད་ཀྱི་ཐེག་པས་གཞི་ལྟ་བས་གཏན་ལ་འབེབས་ཚུལ་ནི། གོང་དུ་བཤད་པའི་ཟབ་མོ་དབུ་མའི་ལྟ་བ་དེ་གཞིར་བཞག་ལ་ཁྱད་པར་ནི་རང་སེམས་ཉིད་སྟོང་གསལ་གྱི་ཡེ་ཤེས་ཡོད་མེད་སྣང་སྟོང་གི་མཐའ་བཞི་དང་བྲལ་བའི་ཆོས་ཉིད་དུ་རྟོགས་པའི་ཀུན་རྫོབ་ཡོངས་སུ་དག་པའི་ལྷའི་མཚན་ཉིད་དུ་ལྟ་བ་མ་གཏོགས་མ་དག་པའི་དངོས་པོ་ཉིད་ཀྱི་རང་བཞིན་ཡེ་ནས་དག་པའི་ལྷ་ཡིན་པར་མི་བལྟའོ། །གཉིས་པ་ལམ་སྒོམ་པས་ཉམས་སུ་ལེན་ཚུལ་ལ། ཀུན་སློང་ནི། སྔགས་ཕྱི་པ་གསུམ་ཀས་རང་གཞན་གཉིས་ཀའི་ཕན་བདེ་རིམ་པར་མི་ཚེ་བདུན་དང་ལྔ་དང་གསུམ་ནས་ཐོབ་པར་འདོད་པའོ། །འཇུག་སྒོ་ནི། དབང་གསུམ་གྱི་ཆུའི་དབང་དང་རིགས་གང་ཡིན་གྱི་དམ་ཚིག་ཕྱག་རྒྱའི་ཅོད་པཎ་གྱི་དབང་མཐའ་རྟེན་དང་བཅས་པར་བསྐུར་བའོ། །དེ་ལྟར་ཞུགས་ནས་ལམ་སྒོམ་ཚུལ་ལ། སྤྱིར་བྱ་རྒྱུད་ཙམ་པོ་བ་རྣམས་སུ་ནི་བདག་ཉིད་ལྷར་བསྐྱེད་པ་མེད་ལ། ཁྱད་པར་བ་རྣམས་སུ་བདག་ཉིད་ལྷར་བསྐྱེད་པར་བཤད་པས། དེ་ཇི་ལྟར་བསྒོམ་པའི་ཚུལ་ལ་དེ་ཁོ་ན་ཉིད་བཞི་ལས། དང་པོ་བདག་གི་དེ་ཁོ་ན་ཉིད་ནི། གོང་དུ་གཞི་ལྟ་བས་གཏན་ལ་འབེབས་ཚུལ་གྱི་སྐབས་སུ་བཤད་ཟིན་པའོ། །གཉིས་པ་ལྷའི་དེ་ཁོ་ན་ཉིད་ནི། སངས་རྒྱས་གསང་བས། སྟོང་པ་ཡི་གེ་སྒྲ་གཟུགས་དང་། །ཕྱག་རྒྱ་མཚན་མ་ལྷ་དྲུག་གོ །ཞེས་གསུངས་པའི་དང་པོ་སྟོང་པའི་ལྷ་ནི། རྒྱུད་འདིའི་ལྟ་བ་སྟེ་བདག་གི་དེ་ཁོ་ན་ཉིད་མཐའ་བཞི་དང་བྲལ་བའོ། །གཉིས་པ་ཡི་གེའི་ལྷ་ནི་སྟོང་ཉིད་དེ་ཀུན་རྫོབ་ཟླ་དཀྱིལ་གྱི་རྣམ་པར་བསྒྱུར་ནས་བསྒོམ་པའོ། །གསུམ་པ་སྒྲའི་ལྷ་ནི་ཟླ་དཀྱིལ་དེའི་སྟེང་དུ་བཟླ་བྱའི་སྔགས་གཟུངས་རང་སྒྲ་སྒྲོགས་པ་དགོད་པའོ། །བཞི་པ་གཟུགས་ཀྱི་ལྷ་ནི་ཟླ་དཀྱིལ་སྔགས་ཕྲེང་དང་བཅས་པ་ལས་འོད་ཟེར་སྤྲོ་བསྡུས་སངས་རྒྱས་ཀྱི་མཛད་པ་བསྒྲུབས་ཏེ་ཟླ་བ་སྔགས་དང་བཅས་པ་ཡོངས་སུ་གྱུར་པ་ལས་རིགས་གསུམ་གྱི་ལྷ་དེ་དང་དེའི་གཟུགས་སུ་བསྒོམ་པའོ། །ལྔ་པ་ཕྱག་རྒྱའི་ལྷ་ནི་དེ་ལ་རིགས་གང་ཡིན་གྱི་ལྷ་དེའི་དམ་རྒྱས་འདེབས་པའོ། །དྲུག་པ་མཚན་མའི་ལྷ་ནི་སྤྱོད་ལམ་ཀུན་ཏུ་ལྷ་དེའི་མཚན་མ་མི་འབྲལ་བའོ། །དེ་ནས་རང་གི་མདུན་དུ་ཡང་དག་སྨོན་ལམ་གྱི་སྟོབས་ལས་བྱུང་བའི་ཡང་དག་པའི་ཞིང་ཁམས་ཕོ་བྲང་གདན་དང་བཅས་པ་གསལ་བཏབ་པའི་ནང་དུ་ཡེ་ཤེས་ཀྱི་ལྷ་སྤྱན་དྲངས་པ་བདག་ཉིད་ལྷར་བསྐྱེད་པ་ལ་མི་བསྟིམ་ཞིང་དབྱིངས་ནས་སྤྱན་དྲངས་བ་དེ་ཕོ་བྲང་དུ་བཞུགས་པ་ཙམ་མ་གཏོགས་མདུན་དུ་བསྐྱེད་པའི་ཆོ་ག་མེད་དོ། །བཟླས་བརྗོད་ཀྱི་དེ་ཁོ་ན་ཉིད་ནི། བསམ་གཏན་ཕྱི་མ་ལས། སྒྲ་དང་སེམས་དང་གཞི་ལ་གཞོལ། །ཞེས་པས། གཞི་ནི། བདག་མདུན་ལྷར་གསལ་བ། སེམས་ནི་དེ་དག་གི་ཐུགས་ཀར་ཟླ་དཀྱིལ་བསམ་པ། སྒྲ་ནི་དེའི་སྟེང་དུ་སྔགས་ཕྲེང་རང་སྒྲ་སྒྲོགས་པར་བསམ་ནས་བཟླས་པ་ཚུལ་བཞིན་དུ་བྱའོ། །བསམ་གཏན་གྱི་དེ་ཁོ་ན་ཉིད་ནི། བསམ་གཏན་ཕྱི་མ་ལས། གསང་སྔགས་མེར་གནས་དངོས་གྲུབ་སྟེར། །སྒྲར་གནས་རྣལ་འབྱོར་སྟེར་བར་དྲན། །སྒྲ་མཐས་ཐར་བ་སྟེར་བར་བྱེད། །ཅེས་པས། མེར་གནས་ནི་རང་ཉིད་ལྷར་གསལ་པའི་སྙིང་ཁར་མེ་འབར་བའི་ནང་དུ་ཟླ་བ་ལ་སྔགས་ཕྲེང་བཀོད་ནས་བསྒོམས་པ་ནི། ལས་བཞི་འགྲུབ་པའི་གཞིའོ། །སྒྲར་གནས་ནི། དེ་ལས་སྔགས་ཀྱི་ཡི་གེ་རྣམས་རང་སྒྲ་སྒྲོགས་པར་བསམ་པས། རྣལ་འབྱོར་ཞེས་པ་ཞི་གནས་སྐྱེ་བར་བྱེད་དོ། །དེ་ལྟར་ནང་གི་སྒོམ་པ་དང་ཕྱིའི་སྤྱོད་པ་ཁྲུས་དང་གཙང་སྦྲ་ལ་གཙོ་བོར་སྤྱོད་པས། འབྲས་བུ་ནི། གནས་སྐབས་སུ་འདོད་པའི་རིག་འཛིན་འགྲུབ་ཅིང་། མཐར་ཐུག་རྟེན་དེ་ལ་སྔགས་ཀྱི་ཕྱིན་དྲུག་སྤྱད་པས། སྐུའི་རིགས་རྣམ་པར་སྣང་མཛད། གསུང་གི་རིགས་འོད་དཔག་མེད། ཐུགས་ཀྱི་རིགས་རྡོ་རྗེ་མི་བསྐྱོད་པ་རིགས་གསུམ་རྡོ་རྗེ་འཛིན་པའི་རིག་འཛིན་གྲུབ་ནས་མི་ཚེ་བདུན་ན་ཐོབ་པར་འདོད་དེ། ཧེ་རུ་ཀ་གལ་པོ་ལས། མི་ཚེ་བདུན་ནས་སངས་རྒྱས་པ། །རིག་གསུམ་མགོན་པོས་འགྲོ་བ་འདུལ། །ཞེས་སོ། །གཉིས་པ་སྤྱོད་རྒྱུད་ཀྱི་ཐེག་པས་གཞི་ལྟ་བ་གཏན་ལ་འབབས་ཚུལ་ནི། རྣལ་འབྱོར་རྒྱུད་དང་ཕྱིའི་སྤྱོད་པ་ཁྲུས་སོགས་གཙང་སྦྲ་ལ་གནས་པ་བྱ་རྒྱུད་དང་མཐུན་པའི་ཕྱིར་གཉིས་ཀའི་རྒྱུད་ཅེས་བྱ་སྟེ། ལྟ་རིམ་ལས། གཉིས་ཀའི་རྒྱུད་ཀྱི་འདོད་པ་ནི། །ལྟ་སྤྱོད་གོང་འོག་རྗེས་སུ་འགྲོ། །ཞེས་སོ། །ལམ་སྒོམ་པས་ཉམས་སུ་ལེན་ཚུལ་ལ། འཇུག་སྒོ་ནི། སྔར་གྱི་ཆུ་དང་ཅོད་པཎ་གྱི་སྟེང་དུ་རྡོ་རྗེ་དྲིལ་བུ་མིང་དབང་རྗེས་གནང་དང་བཅས་ཏེ་བསྐུར་བའོ། །དེ་ལྟར་ཞུགས་ནས་ལམ་བསྒོམ་པས་ཉམས་སུ་ལེན་ཚུལ། ནང་འཇུག་ལ་མཚན་བཅས་དང་མཚན་མེད་ཀྱི་རྣལ་འབྱོར་གཉིས་ལས། དང་པོ་མཚན་བཅས་རྣལ་འབྱོར་སྒོམ་པའི་རིམ་པ་ལ། ཕྱི་ནང་གི་ཡན་ལག་བཞི་པ་གཉིས་སུ་ཡོད་ཀྱང་འདིར་རེ་ཞིག་ཕྱིའི་ཡན་ལག་བཞི་ལྟར་བཤད་ན། རྣམ་སྣང་མངོན་བྱང་ལས། ཡི་གེ་དང་ནི་ཡི་གེ་སྦྱར། །དེ་བཞིན་གཞི་ལ་གཞི་གྱུར་ཉིད། །ཤིན་ཏུ་བསྡོམས་པའི་ཡིད་ལས་ནི། །བཟླས་བརྗོད་འབུམ་ཕྲག་གཅིག་བྱའོ། །ཞེས་པ་ལྟར་བདག་གནས་བསྲུང་བ་སོགས་སྔོན་དུ་འགྲོ་བས་གཞིའི་ཡན་ལག་དང་པོ་བདག་ཉིད་བསྐྱེད་པའི་སྔོན་དུ་འགྲོ་བའི་ཡི་གེ་དོན་དམ་བྱང་ཆུབ་ཀྱི་སེམས་སྟོང་ཉིད་ཀྱི་སྣང་ཆ་ཀུན་རྫོབ་ཟླ་དཀྱིལ་གྱི་རྣམ་པར་བསྒོམ་པ་དང་། ཡི་གེ་གཉིས་པ་ཟླ་བའི་སྟེང་དུ་བཟླ་བྱའི་སྔགས་རང་སྒྲ་སྒྲོགས་པར་བསྒོམ། དེ་ཐམས་ཅད་ཡོངས་སུ་གྱུར་པ་ལས་གཞིའི་ཡན་ལག་དང་པོ་བདག་ཉིད་རྣམ་པར་སྣང་མཛད་ཆེན་པོ་ལ་སོགས་པའི་ལྷར་བསྐྱེད། སྔགས་དང་ཕྱག་རྒྱས་བྱིན་གྱིས་རླབས། དེ་ནས་གཞི་གཉིས་པ་རང་གི་མདུན་དུ་རང་འདྲ་བའི་དེ་བཞིན་གཤེགས་པ་བསྒོམ་ལ་ཐུགས་ཀར་ཟླ་དཀྱིལ་ལ་བཟླ་བྱའི་སྔགས་ཕྲེང་བཀོད་ནས་བཟླས་པ་ཚུལ་བཞིན་དུ་བྱེད་པ་ཏེ་དེ་ལྟར་ཡན་ལག་བཞི་ལ་གཞོལ་བ་ཡིན་ནོ། །གཉིས་པ་མཚན་མེད་ཀྱི་རྣལ་འབྱོར་ནི། ཕུང་སོགས་ཆོས་ཐམས་ཅད་རྣམ་པར་དཔྱད་དེ་འཇུག་གནས་ལྡང་གསུམ་གྱི་ཁྱད་པར་དུ་བྱས་པའི་དོན་དམ་བྱང་ཆུབ་ཀྱི་སེམས་བསྒོམས་པར་བྱའོ། །གཉིས་པ་སྦྱོར་བའི་སྤྱོད་པ་ལ་ཕྱི་ནང་གཉིས་ལས། དང་པོ་ཕྱིའི་ཡན་ལག་བཞི་ལ་གཞོལ་བའི་བཟླས་བརྗོད་བྱ་ཚུལ་ནི། གོང་ལྟར་བདག་མདུན་ལྷར་བསྐྱེད་པ་གཞིའི་ཡན་ལག་དང་པོ་དང་། གཉིས་པ་མདུན་བསྐྱེད་ཡེ་ཤེས་པའི་ཐུགས་ཀར་ཟླ་དཀྱིལ་བསྒོམ་པ་བྱང་ཆུབ་སེམས་ཀྱི་ཡན་ལག །དེ་ལ་སྔགས་ཕྲེང་བཀོད་པ་སྒྲའི་ཡན་ལག་སྟེ་བཞི་དང་ལྡན་ཏེ་མཚན་དུས་གྲངས་ཀྱི་བསྙེན་པ་བྱའོ། །གཉིས་པ་ནང་གི་ཡན་ལག་བཞི་ནི། རང་ཉིད་ལྷར་གསལ་བའི་ཐུགས་ཀར་ཟླ་བ་ཁོང་སྟོང་གི་ནང་དུ་ཡེ་ཤེས་སེམས་དཔའ་བསྒོམ་པ་ནི་གཞིའི་ཡན་ལག་དང་པོའོ། །གཉིས་པ་དེའི་ཐུགས་ཀར་ཟླ་དཀྱིལ་སྔགས་ཕྲེང་བཀོད་དེ་བཟླས་པ་བྱེད་དོ། །གསུམ་པ་གྲུབ་པའི་སྤྱོད་པ་དེའི་འབྲས་བུ་ཇི་ལྟར་ཐོབ་ཚུལ་ནི། གནས་སྐབས་ཐུན་མོང་གི་དངོས་གྲུབ་དང་། མཐར་ཐུག་མི་ཚེ་ལྔ་ན་རིགས་གསུམ་དང་དེའི་སྟེང་དུ་རིན་པོ་ཆེའི་རིགས་བསྣན་པའི་རིགས་བཞི་རྡོ་རྗེ་འཛིན་པའི་གོ་འཕང་མངོན་དུ་བྱེད་པ་ཡིན་ནོ། །གལ་པོ་ལས། རིགས་བཞི་རྡོ་རྗེ་འཆང་བར་གནས། །ཞེས་དང་། །ཀུན་བྱེད་ལས། གཉིས་སུ་མེད་ལ་མི་ཚེ་ལྔར་སྒྲིབ་གྲོལ། །ཞེས་སོ།། ༈ གསུམ་པ་རྣལ་འབྱོར་རྒྱུད་ཀྱི་ཐེག་པས་གཞི་ལྟ་བ་གཏན་ལ་འབེབས་ཚུལ་ནི། དོན་དམ་པར་ཆོས་ཐམས་ཅད་སྤྲོས་པའི་མཚན་མ་མེད་པའི་ཆོས་ཉིད་རྟོགས་པའི་ཡེ་ཤེས་ཀྱི་བྱིན་རླབས་ཀུན་རྫོབ་རྡོ་རྗེ་དབྱིངས་ཀྱི་ལྷར་བལྟ་བ་ཡིན་ནོ། །ལམ་བསྒོམ་པ་ཉམས་སུ་ལེན་ཚུལ་ལ། འཇུག་སྒོ་ནི་ཆུ་དབང་སོགས་སློབ་མའི་དབང་ལྔ་དང་། ཕྱིར་མི་ལྡོག་པའི་དམ་ཚིག་གསུམ་བཟུང་བ་སོགས་སློབ་དཔོན་གྱི་དབང་དྲུག་སྟེ་བཅུ་གཅིག་གོ །དེ་ལྟར་ཞུགས་ནས་ལམ་གྱི་སྒོམ་རིམ་ལ། ཐབས་ཤེས་ཀྱི་རྣལ་འབྱོར་གཉིས་ལས། དང་པོ་ཐབས་ཀྱི་རྣལ་འབྱོར་ལ། མངོན་བྱང་ལྔ་དང་ཆོ་འཕྲུལ་བཞི་སྟེ་གཉིས་ལས། དང་པོ་མངོན་བྱང་ལྔ་ནི། ཧེ་རུ་ཀ་གལ་པོ་ལས། མི་རྟོག་ཟླ་བ་རྡོ་རྗེ་གཟུགས། །སྤྲོ་བསྡུ་སྒོམ་པས་སྐུ་རུ་གསལ། །ཞེས་པ་ལྟར་དང་པོ་ཆོས་ཐམས་ཅད་རྣམ་པར་མི་རྟོག་པའི་སྟོང་ཉིད་བསྒོམ་པ་དང་། སྟོང་ཉིད་ཀྱི་སྣང་ཆ་ཟླ་བ་ཚེས་གཅིག་ལྟ་བུ་དང་ཉ་བ་ལྟ་བུ་བསྒོམ་པ་དང་། དེའི་སྟེང་དུ་རྡོ་རྗེ་རྩེ་ལྔ་པའི་ཕྱག་མཚན་བསྒོམ། དེ་ལས་འོད་ཟེར་སྤྲོ་བསྡུ་བྱས་ཡོངས་སུ་གྱུར་པ་ལས་བདག་ཉིད་མི་བསྐྱོད་པ་ལ་སོགས་བསྒོམ་བྱའི་ལྷ་གང་ཡིན་གྱི་སྐུར་གྱུར་པ་སྟེ། གལ་པོའི་མཆན་འགྲེལ་ལས། སྒོམ་པ་ནི་མངོན་བྱང་ལྔ་དང་ཆོ་འཕྲུལ་བཞི་བསྒོམ་པའོ། །དང་པོ་རྣམ་པར་མི་རྟོག་པ་བསྒོམ་པ་ནི། གཟུགས་སྐུ་མངོན་པར་བྱང་ཆུབ་པའོ། །ཟླ་བ་ཚེས་གཅིག་པ་ལྟ་བུའི་རང་སེམས་རིག་པ་མངོན་པར་བྱང་ཆུབ་པ་དང་། ཟླ་བ་ཉ་བ་ལྟ་བུ་སེམས་བསྐྱེད་མངོན་པར་བྱང་ཆུབ་པ་གཉིས་ནི་ཟླ་བ་ལ་མངོན་པར་བྱང་ཆུབ་པའོ། །ཟླ་བའི་སྟེང་དུ་རྡོ་རྗེ་རྩེ་ལྔ་པ་བསྒོམ་པ་ནི་ཆོས་སྐུ་ལ་མངོན་པར་བྱང་ཆུབ་པའོ། །འོད་ཟེར་སྤྲོ་བསྡུས་སྒྲིབ་སྦྱོང་དངོས་གྲུབ་བསྐུལ་བ་ནི་བསྟན་པར་བྱ་བའི་མངོན་བྱང་ངོ་། །དེ་ལྟར་སྐུར་གྱུར་པ་ནི་ཕྱག་རྒྱ་ལ་མངོན་པར་བྱང་ཆུབ་པའོ། །ཞེས་དང་། གཉིས་པ་ཆོ་འཕྲུལ་བཞི་ནི། གལ་པོ་ལས། ཏིང་འཛིན་བྱིན་བརླབས་དབང་བསྐུར་མཆོད། །ཅེས་པ་ལྟར་ཏིང་ངེ་འཛིན་གྱི་ཆོ་འཕྲུལ་ནི། དབུས་སུ་རྣམ་པར་སྣང་མཛད། ཤར་དུ་མི་བསྐྱོད་པ། ལྷོ་རིན་འབྱུང་། ནུབ་ཏུ་སྣང་མཐའ། བྱང་དུ་དོན་གྲུབ་རང་རང་གི་རིགས་ཀྱི་སེམས་དཔའ་བཞི་བཞིས་བསྐོར་བར་བསྒོམ་པའོ། །བྱིན་གྱིས་རླབས་པའི་ཆོ་འཕྲུལ་ནི། བསྒོམ་པའི་ལྷ་དེ་དག་རང་རང་གི་རིགས་ཀྱིས་བྱིན་གྱིས་བརླབས་པའོ། །དབང་བསྐུར་བའི་ཆོ་འཕྲུལ་ནི། རང་རིགས་ཀྱི་དབང་གང་ཡིན་གྱི་སྐུ་དང་ཡེ་ཤེས་གཟུངས་དང་ཏིང་ངེ་འཛིན་དང་ལྡན་པར་དབང་བསྐུར་བའོ། །མཆོད་པའི་ཆོ་འཕྲུལ་ནི། དེ་དག་ལ་ཕྱག་དང་མཆོད་པ་བསྟོད་པ་བྱ་བ་རྣམས་སོ། །དེ་ལྟར་བདག་ལྷར་བསྐྱེད་པ་ལ་ཡེ་ཤེས་པ་དགུག་ཅིང་མཆོད་བསྟོད་བཟླས་པ་སོགས་ཀྱི་མཐར་ཡེ་ཤེས་པ་གཤེགས་སུ་གསོལ་བའི་ཐབས་ཀྱི་རྣལ་འབྱོར་ཞེས་བྱའོ། །ལར་རྣལ་འབྱོར་རྒྱུད་ཀྱི་སྐབས་འདིར་བྱ་སྤྱོད་ལྟར་ལྷ་ཡེ་ཤེས་པ་བདག་ལ་མི་བསྟིམ་པར་མདུན་དུ་བཞུགས་སུ་གསོལ་བ་ལྟ་བུ་མ་ཡིན་ཏེ། རྡོ་རྗེ་འབྱུང་བ་ལས། གཉིས་སུ་མེད་པའི་ཆོས་དབྱིངས་དང་། །བླ་མེད་དངོས་གྲུབ་དམ་པ་བླངས། །ཞེས་སོ། །གཉིས་པ་ཤེས་རབ་ཀྱི་རྣལ་འབྱོར་ནི། དོན་དམ་མཚན་མ་མེད་པའི་ཡེ་ཤེས་དང་། ཀུན་རྫོབ་རྡོ་རྗེ་དབྱིངས་ཀྱི་ལྷ་སྣང་གཉིས་ཀ་གཉིས་སུ་མེད་པའི་ཡེ་ཤེས་ཀྱི་ངང་ལ་མཉམ་པར་འཇོག་པ་ཡིན་ནོ། །དེ་ཉིད་ཀྱི་འབྲས་བུ་ཇི་ལྟར་ཐོབ་ཚུལ་ནི། འཇིག་རྟེན་པའི་དངོས་གྲུབ་མཁའ་ལ་སྤྱོད་པའི་རིག་འཛིན་དང་། འཇིག་རྟེན་ལས་འདས་པའི་དངོས་གྲུབ་མི་ཚེ་གསུམ་ན་སྔར་གྱི་རིགས་བཞིའི་སྟེང་དུ་དོན་འགྲུབ་ཕྲིན་ལས་ཀྱི་རིགས་བསྣན་པས་རིགས་ལྔ་སྟུག་པོ་བཀོད་པར་འཚང་རྒྱ་བར་འདོད་དེ། ཀུན་བྱེད་ལས། ཡོ་ག་སྟུག་པོ་བཀོད་འདོད་པས། །མི་ཚེ་གསུམ་ན་གྲོལ་བར་འདོད། །ཞེས་གསུངས་སོ། །དེ་ཡང་སྔགས་ཕྱི་པ་གསུམ་གྱི་སྐབས་འདིར་བསྒོམ་བྱ་དང་། ཐོབ་བྱའི་ལྷ་རིགས་གསུམ་ལ་སོགས་པར་གསུངས་པ་ནི། རིགས་ཐམས་ཅད་དེ་དག་ཏུ་བསྡུས་པའི་དབང་དུ་བྱས་པ་མ་གཏོགས་པའི་ལྷ་གཞན་ཡོད་པར་མི་བལྟའོ། །མ་ཟད་དེ་དག་གི་བསྒོམ་བྱ་ལ་སྔགས་ནང་པ་ལྟར་བསྐྱེད་རྫོགས་ཀྱི་ཐ་སྙད་མེད་དོ། །དེའི་དོད་དུ་མཚན་བཅས་དང་མཚན་མེད་ཟེར་བའམ། ཡང་ན་བྱ་སྤྱོད་གཉིས་སུ་མཚན་བཅས་མཚན་མེད་དང་། རྣལ་འབྱོར་རྒྱུད་དུ་ཐབས་དང་ཤེས་རབ་ཀྱི་རྣལ་འབྱོར་ཞེས་ལོ་ཆེན་རིན་པོ་ཆེས་བཞེད་དོ། །དེས་དཀའ་ཐུབ་རིག་བྱེད་ཀྱི་ཐེག་པ་གསུམ་བཤད་ཟིན་ཏོ།། ༈ གསུམ་པ་དབང་བསྒྱུར་ཐབས་ཀྱི་ཐེག་པ་ལས། སྔགས་ནང་པ་གསུམ་བཤད་པ་ལ་གསུམ། དང་པོ་སྐུའི་རྒྱུད་མ་ཧཱ་ཡོ་གའི་ཐེག་པས་གཞི་ལྟ་བ་གཏན་ལ་འབེབས་ཚུལ་ནི། ཇི་སྐད་དུ་སློབ་དཔོན་སངས་རྒྱས་གསང་བས། གཞི་དང་གཏན་ཚིག་གྲུབ་པའི་དོན། །ཞེས་གསུངས་པ་ལྟར། གཞལ་བྱའི་གཞི་དང་། འཇལ་བྱེད་ཀྱི་གཏན་ཚིག་དང་། གྲུབ་པའི་མཐའ་སྟེ་གསུམ་པ་ལས། དང་པོ་ནི། འཁོར་འདས་གཉིས་སུ་ཞེན་པའི་བློ་སྒྲོ་བཏགས་ཀྱི་ཞེན་སྣང་དང་བཅས་པ་འདི་ཉིད་གཞལ་བྱ་ཡིན་ཏེ། ལམ་རྣམ་བཀོད་ལས། བརྟགས་པའི་སྤྱོད་ཡུལ་གཉིས་ལ་གཞལ། །ཞེས་དང་། ལམ་རིམ་ལས། འཁོར་འདས་དངོས་པོའི་ཞེན་སྣང་བརྟགས། །ཞེས་སོ། །གཉིས་པ་འཇལ་བྱེད་ཀྱི་གཏན་ཚིག་ལ་རྣམ་པ་མང་དུ་ཡོད་ཀྱང་འདིར་རྟོགས་པ་བཞིའི་གཏན་ཚིག་ལ་བརྟེན་ནས་གནས་ལུགས་ཇི་ལྟར་གཏན་ལ་འབེབས་ཚུལ་ནི། རིམ་པ་ལྟར་འཁོར་འདས་གཤིས་སུ་གཅིག་པའི་གཏན་ཚིག་ལ་བརྟེན་ནས་ཆོས་ཐམས་ཅད་རང་བཞིན་སྐྱེ་མེད་དུ་གཏན་ལ་ཕབ། ཡིག་འབྲུའི་ཚུལ་གྱིས་གཏན་ཚིག་ལ་བརྟེན་ནས་རོལ་པ་འགགས་མེད་དུ་གཏན་ལ་ཕབ། བྱིན་གྱིས་རླབས་པའི་གཏན་ཚིག་ལ་བརྟེན་ནས་ངོ་བོ་དབྱེར་མེད་དུ་གཏན་ལ་ཕབ། མངོན་སུམ་པའི་གཏན་ཚིག་ལ་བརྟེན་ནས་མཚན་ཉིད་བློ་བྲལ་དུ་གཏན་ལ་ཕབ་ཅིང་། དེ་ཡང་གཏན་ཚིག་སྔ་མ་སྔ་མས་གཏན་ལ་ཕབ་ཟིན་པ་དེ་ཕྱི་མ་ཕྱི་མས་གཞལ་བྱར་བྱེད་དགོས་པ་ཡིན་གསུངས། གསུམ་པ་གྲུབ་མཐའ་ནི། དེ་ལྟར་གཞལ་བྱ་ཞེན་བློ་དང་བཅས་པ་འཇལ་བྱེད་གཏན་ཚིག་བཞིས་གཞལ་བས་ཆོས་ཐམས་ཅད་གནས་ལུགས་རང་གི་སེམས་ཉིད་བདེ་གཤེགས་སྙིང་པོ་ཉིད་ལྷག་པའི་ཀུན་རྫོབ་བདེན་པ་དང་ལྷག་པའི་དོན་དམ་བདེན་པ་སྟེ་ལྷག་པའི་བདེན་པ་དབྱེར་མེད་བློས་སྤྱོད་ཡུལ་དང་བྲལ་བའི་བདག་ཉིད་དུ་གཏན་ལ་ཕེབས་པ་ལ་གྲུབ་མཐའ་ཞེས་བྱའོ། །དེ་ལ་མདོ་སྔགས་ཀྱི་ལྟ་བ་ལ་ཁྱད་པར་མི་འབྱེད་པ་གསར་མའི་ལུགས་ཡིན་ལ། སྔ་འགྱུར་རྙིང་མའི་རང་ལུགས་ལ་ནི་མདོ་སྔགས་ཀྱི་ལྟ་བ་ལ་ཁྱད་པར་འབྱེད་པ་ཡིན་ཏེ། འདི་ལྟར་ལྟ་བའི་རྣམ་གྲངས་ལ། ཆོས་ཅན་ལྟ་བའི་ལྟ་བ། ཆོས་ཉིད་ལྟ་བའི་ལྟ་བ། རང་རིག་ལྟ་བའི་ལྟ་བ་སྟེ་གསུམ་དུ་ཡོད་པ་ལས། ཆོས་ཉིད་ལྟ་བའི་ངོས་ནས་མདོ་སྔགས་ཀྱི་ལྟ་བ་ལ་ཁྱད་པར་མེད་དེ། སྔགས་ཀྱི་ལྟ་བ་ཡང་ངོ་བོ་སྟོང་བའི་ཆ་ནས་སྤྲོས་པའི་མཚན་མ་ཐམས་ཅད་དང་བྲལ་བའི་སྟོང་ཉིད་དམིགས་བསམ་བརྗོད་པ་ལས་འདས་པའི་ཕྱིར། རྩ་རྒྱུད་ལས། གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ཞེས་སོ། །རྒྱུ་མཚན་དེ་ལྟ་བུ་ལ་དགོངས་ནས། ས་སྐྱ་པཎྜི་ཏས་ཀྱང་། ཕ་རོལ་ཕྱིན་པའི་སྤྲོས་བྲལ་ལས། །ལྷག་པའི་ལྟ་བ་ཡོད་གྱུར་ན། །ལྟ་དེ་སྤྲོས་པ་ཅན་དུ་འགྱུར། །ཞེས་གསུངས་སོ། །ཆོས་ཅན་ཀུན་རྫོབ་ལྟ་བའི་ངོས་ནས་མདོ་སྔགས་ཀྱི་ལྟ་བ་ལ་ཁྱད་པར་ཡོད་པར་ཡིན་ཏེ། རྒྱུ་མཚན་ཉིད་ཀྱི་ཐེག་པའི་བླ་མེད་ཟབ་མོ་དབུ་མའི་ཐེག་པ་ལས་ཀུན་རྫོབ་རྟེན་འབྱུང་དུ་སྣང་བའི་ཆོས་འདི་དག་སྒྱུ་མ་དང་རྨི་ལམ་གྱི་སྣང་བ་ལྟར་རང་བཞིན་བདེན་པར་མ་གྲུབ་པ་ཙམ་དུ་བལྟ་བ་ལས། དག་པ་ལྷའི་དཀྱིལ་འཁོར་ཆེན་པོར་ལྟ་བར་མ་བཤད་ཀྱང་ཐབས་ཀྱི་ཐེག་པ་ཆེན་པོའི་སྔགས་བླ་མེད་ཀྱི་སྐབས་འདི་རུ་ནི། སྣོད་བཅུད་ཀྱིས་བསྡུས་པའི་ཆོས་འདི་དག་རང་བཞིན་ལྷ་དང་ལྷ་མོའི་ཚུལ་དུ་རང་ཆས་བཞུགས་པར་བལྟ་སྟེ། གསང་སྙིང་ལས། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲོལ། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ས་ཆུ་སྤྱན་དང་མ་མཱ་ཀི། །མེ་རླུང་གོས་དཀར་དམ་ཚིག་སྒྲོལ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཞིང་། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །ཞེས་དང་། བརྟགས་གཉིས་ལས། སེམས་ཅན་རྣམས་ནི་སངས་རྒྱས་ཏེ། །འོན་ཀྱང་གློ་བུར་དྲི་མས་བསྒྲིབས། །དེ་བསལ་ན་ནི་སངས་རྒྱས་དངོས། །ཞེས་དང་། རྨད་བྱུང་རྒྱལ་པོའི་རྒྱུད་ལས། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་པ་ལ། །ཡིན་པར་ཤེས་པའི་བདག་ཉིད་དུ། །བྱང་ཆུབ་མཆོག་ཏུ་སེམས་བསྐྱེད་དོ། །ཞེས་སོ། །དེ་ལྟར་རྟེན་ཆོས་ཀུན་རྫོབ་ཀྱི་ངོས་ནས་སྔགས་ཀྱི་ལྟ་བ་མདོ་ལས་འཕགས་པའི་རྒྱུ་མཚན་གྱིས། དེ་ཉིད་ཀྱི་སྣང་གཞི་སྟོང་ཉིད་ཀྱང་སྤྲོས་བྲལ་ཡིན་པ་འདྲ་ཡང་། འདིར་དོན་དམ་དཀོར་བདུན་ངོ་བོ་ཉིད་ལྷུན་གྱིས་གྲུབ་པའི་རྣམ་ཀུན་མཆོག་ལྡན་གྱི་སྟོང་ཉིད་ལ་འདོད་པ་ཡིན་ཏེ། ལམ་རིམ་ལས། བླ་མེད་ཐེག་པའི་ནང་ནས་ནི། །དོན་དམ་དུ་ནི་དབྱེར་མེད་ལ། །ཀུན་རྫོབ་ཏུ་ནི་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ལྟ་སྤྱོད་ཆེན་པོ་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུ་ཡང་དབྱེར་མེད་ལ། །ལྟ་བ་མཐོ་དམན་དེ་ཙམ་མོ། །ཞེས་གསུངས་སོ། །གཉིས་པ་ལམ་བསྒོམ་པས་ཉམས་སུ་ལེན་ཚུལ་ལ། ཀུན་སློང་ནི་སྔགས་ནང་པ་གསུམ་མཚུངས་པར་ཚེ་ལུས་འདི་ཉིད་ལ། རང་གཞན་གྱི་ཕན་བདེ་རླབས་པོ་ཆེ་སྒྲུབ་པའི་ཕྱིར་འབྲས་བུ་རྡོ་རྗེ་འཆང་གི་གོ་འཕང་ཐོབ་པར་འདོད་པའོ། །འཇུག་སྒོ་ནི། རྒྱུད་ཕྱི་མ་ལས། སློབ་དཔོན་གསང་བ་ཤེས་རབ་དབང་། །དེ་མ་ཐག་པ་བཞི་པ་སྟེ། །ཞེས་གསུངས་པ་ལྟར། བུམ་སོགས་དབང་བཞི་དང་། ཡང་ན་བུམ་དབང་ལ་ཕན་ནུས་གཉིས་སུ་ཕྱེ་བས་ལྔར་འགྱུར་བའོ། །དེ་ཡང་ཕྱི་ཕན་པའི་དབང་བཅུ། ནང་ནུས་པའི་དབང་ལྔ། གསང་བ་ཟབ་མོའི་དབང་གསུམ་སྟེ། དེ་དག་ལེགས་པར་ཐོབ་པས་རང་རྒྱུད་སྨིན་པར་བྱེད་པ་ཡིན་ནོ། །དེ་ལྟར་ཞུགས་ནས་ལམ་གྱི་རིམ་པ་ཉམས་སུ་ལེན་ཚུལ་ལ། རྒྱལ་པོ་ཨིནྡྲ་བྷུ་ཏིས་རིམ་གཉིས་ལས། སངས་རྒྱས་རྣམས་ཀྱི་ཆོས་བསྟན་པ། །རིམ་པ་གཉིས་ལ་ཡང་དག་གནས། །བསྐྱེད་པ་ཡི་ནི་རིམ་པ་དང་། །རྫོགས་པ་ཡི་ནི་རིམ་པའོ། །ཞེས་གསུངས་པ་ལྟར། ཀུན་བཏགས་བསྐྱེད་པའི་རིམ་པའི་རྣལ་འབྱོར་དང་། ཡོངས་གྲུབ་རྫོགས་པའི་རིམ་པའི་རྣལ་འབྱོར་ཏེ་ལམ་རིམ་པ་གཉིས་སུ་ཡོད་པ་ལས། དང་པོ་བསྐྱེད་པ་ནི་སྐྱེ་བའི་བག་ཆགས་དག་བྱེད་ཐ་མལ་སྣང་ཞེན་མཚན་རྟོག་ལྷའི་རང་བཞིན་དུ་འགོག་པའི་ཐབས་ཏེ། ཡོན་ཏན་མཛོད་ལས། བསྐྱེད་རིམ་གྱིས་ནི་སྣང་བའི་བདེན་ཞེན་འགོག །ཅེས་གསུངས་སོ། །སྐྱེ་བ་དེ་ཡང་ཡ་ཀི་སྲིད་རྩེ་ནས་མ་ཀི་མནར་མེད་ཀྱི་བར་ན་གནས་པའི་འགྲོ་བ་འདི་དག་སྐྱེ་གནས་རྣམ་པ་བཞི་གང་རུང་གིས་བསྡུས་པའི་ཕྱིར། དེ་སྦྱོང་བྱེད་ཀྱི་བསྐྱེད་རིམ་ཡང་བཞིར་གསུངས་ཏེ། ཇི་སྐད་དུ། དཔལ་སྒྱུ་འཕྲུལ་དྲྭ་བ་ལས། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའང་དེ་བཞིན་རྣམ་པ་བཞི། །སྤྲོས་བཅས་སྤྲོས་དང་སྤྲོས་པ་མེད། །ཤིན་ཏུ་སྤྲོས་པ་མེད་བཞིའོ། །ཞེས་གསུངས་པ་ལྟར། བཞི་ལས། དང་པོ། ལས་དང་པོ་པའི་གང་ཟག་དབང་པོ་ཐ་མའི་བསྒོམ་བྱ་སྒོང་སྐྱེས་ཀྱི་བག་ཆགས་དག་བྱེད་སྤྲོས་ཅན་ནམ་རྒྱས་པ་ཆེན་པོའི་བསྐྱེད་རིམ་ནི། རྒྱུའི་ཧེ་རུ་ཀ་ལས། འབྲས་བུའི་རྡོ་རྗེ་འཛིན་པའི་རྣམ་པར་བཞེངས་པ་བདག་སྲས་གཞན་སྲས་ཀྱི་སྒོ་ནས་བསྐྱེད་པ་སྟེ། སྒྲུབ་སྡེ་བཀའ་བརྒྱད་བདེར་འདུས་ལྟ་བུ་དང་། རྒྱུད་སྡེ་ལྟར་ན་སྒྱུ་འཕྲུལ་ཁྲོ་བོ་ལྟ་བུ་ཡིན། དེ་ཡང་སྔ་མས་བདག་སྲས་ཡན་ལག་ལྔ་དང་། གཞན་སྲས་ཡན་ལག་བརྒྱད་ཀྱི་སྒོ་ནས་བསྐྱེད་པ་དང་། ཕྱི་མ་ལྟར་ན་སྔ་ཕྱི་གཉིས་ཀ་བསྐྱེད་བྱེད་རྡོ་རྗེའི་ཆོ་ག་གསུམ་ཡིན་ནོ། །ཅུང་ཟད་བརྟན་པ་ཐོབ་པའི་གང་ཟག་དང་། དབང་པོ་འབྲིང་གིས་མངལ་སྐྱེས་ཀྱི་བག་ཆགས་དག་བྱེད་སྤྲོས་པའམ་རྒྱས་པའི་བསྐྱེད་རིམ་ལས། ཕ་རྒྱུད་ལྟར་རྡོ་རྗེའི་ཆོ་ག་གསུམ་གྱིས་བསྐྱེད་པ་དང་། མ་རྒྱུད་ལྟར་མངོན་བྱང་བཞིའམ་ལྔའི་སྒོ་ནས་བསྐྱེད་པ་སྟེ། དེ་དག་གི་གཙོ་བོ་མ་ཧཱ་ཡོ་གའི་སྒོམ་ཚུལ་གྱི་བསྐྱེད་རིམ་སྟེ། ཀུན་མཁྱེན་ཆེན་པོའི་དགོངས་པ་དེ་ལ་ལྷ་སྐུ་ཞལ་ཕྱག་དང་བཅས་སྤྲུལ་པའི་བསྐྱེད་རིམ་ཞེས་བསྐྱེད་རིམ་མཚན་ཉིད་པ་ཡིན་ནོ། །བརྟན་པ་ཐོབ་པའི་གང་ཟག་དང་དབང་པོ་རབ་ཀྱི་བསྒོམ་བྱ་དྲོད་གཤེར་སྐྱེས་ཀྱི་བག་ཆགས་དག་བྱེད་ཨ་ནུའི་སྒོམ་ཚུལ། སྤྲོས་མེད་འབྲིང་གི་བསྐྱེད་རིམ་སྙིང་པོའམ་བསྐྱེད་སྔགས་བརྗོད་པ་ཙམ་གྱིས་རྟེན་དང་བརྟེན་པའི་དཀྱིལ་འཁོར་མ་ལུས་པ་བསྐྱེད་པ་དེ་ལ། ཡུལ་སྣང་བདེན་མེད་དུ་ཤེས་པ་སྒྱུ་མའི་བསྐྱེད་རིམ་ཞེས་བྱའོ། །ཏིང་ངེ་འཛིན་ཤིན་ཏུ་གོམས་པའི་གང་ཟག་དང་དབང་པོ་ཡང་རབས་ཀྱིས་བསྒོམ་བྱ། བརྫུས་སྐྱེས་ཀྱི་བག་ཆགས་དག་པར་བྱེད་པ་ལ། ཨ་ཏིའི་བསྒོམ་ཚུལ་བསྐྱེད་རིམ་ཤིན་ཏུ་སྤྲོས་མེད་དམ་བསྡུས་པའི་བསྐྱེད་རིམ་སྐད་ཅིག་དྲན་རྫོགས་སུ་བསྒོམ་པ་དེ་ལ་ལྷུན་གྲུབ་སྣང་སྟོང་དུ་ཤར་བ་ཟབ་མོའི་བསྐྱེད་རིམ། ཞེས་བྱའོ། །དེ་ཡང་སེམས་ཉིད་ངལ་བསོ་ལས། དེ་ལྟར་བསྒོམ་ཚུལ་རྣམ་པ་བཞི་པོ་སོང་ནས་དཀྲོལ་བསྐྱེད་བྱ། ཞེས་སོ། །དེ་དག་ཇི་ལྟར་ཉམས་སུ་ལེན་ཚུལ་ལ། སྔ་འགྱུར་རྙིང་མའི་རིང་ལུགས་ལྟར་ན་རྒྱུ་མཚན་ཉིད་ཀྱི་ཐེག་པ་ལམ་རིམ་གྱིས་སྔོན་འགྲོའི་རྐང་ཚུགས་པར་བྱས་ཏེ། རྒྱུའི་དབང་ཟབ་མོས་རང་རྒྱུད་ལེགས་པར་སྨིན་ཞིང་། དེ་དང་འབྲེལ་བར་ཀུན་གཞིའི་རྒྱུ་རྒྱུད་ཇི་ལྟ་བར་རྟོགས་པའི་ལྟ་བ་འཁོར་འདས་དབྱེར་མེད་དུ་རྟོགས་ཤིང་གཞི་དམ་ཚིག་རྣམ་པར་དག་པ་ལ་གནས་པའི་གང་ཟག་གིས་ཏིང་ངེ་འཛིན་རྣམ་པ་གསུམ་གྱིས་བསྐྱེད་རིམ་གྱིས་ཁོག་ཕུབ། ཇི་ལྟར་བསྐྱེད་པའི་ངོ་བོར་དག་རྫོགས་སྨིན་གསུམ་ཚངས་པར་བྱ། དེ་ལྟར་བསྐྱེད་ཟིན་པ་དེའང་སྲོག་སྡོམ་གཟེར་བཞིའི་མན་ངག་གིས་རྒྱས་ཐེབ་པ་ཞིག་ནི་བསྐྱེད་རིམ་གྱི་གནད་གལ་པོ་ཆེ་ཡིན་ནོ། །དེ་ལ་ཡང་ལམ་ངེས་རྫོགས་སུ་བྱ་བ་དང་། མོས་སྒོམ་དུ་བྱ་བ་སྟེ་གཉིས་སུ་ཡོད་པ་ལས། ངེས་པར་ཚེ་འདིར་གསང་ཆེན་རྡོ་རྗེ་ཐེག་པའི་ལམ་ནས་དངོས་གྲུབ་རྣམ་གཉིས་དོན་དུ་གཉེར་བ་ཞིག་ཡིན་ན་ནི། ལམ་ངེས་རྫོགས་སུ་བསྒོམ་པ་ལ་ནན་ཏན་དུ་བརྩོན་དགོས་པའི་ཕྱིར་དེ་དག་གི་རྣམ་བཞག་རྒྱས་པར་རྟོགས་འདོད་ན་དཔལ་ལྡན་སྒྱུ་འཕྲུལ་དྲྭ་བ་དང་བསྐྱེད་རིམ་འོག་མིན་བསྒྲོད་པའི་ཐེམ་སྐས་སོགས་ལ་ཡི་དམ་དུ་བྱའོ། །གཉིས་པ་རྫོགས་རིམ་ནི། འཆི་བའི་རིམ་པའི་བག་ཆགས་དག་བྱེད་དང་། གྱ་ནོམ་ལྷར་ཞེན་གྱི་མཚན་རྟོག་གཉིས་སུ་མེད་པའི་ཡེ་ཤེས་སུ་སྡོམ་པ་སྟེ། ཇི་སྐད་དུ། རྫོགས་རིམ་གྱིས་ནི་སྒྱུ་མའི་ཞེན་འཛིན་སྤོངས། །ཞེས་སོ། །དེ་ལ་དབྱེ་ན་མཚན་བཅས་དང་མཚན་མེད་ཀྱི་རྫོགས་རིམ་གཉིས་ལས། དང་པོ་ལའང་དབེན་གསུམ་སོགས་ཕ་རྒྱུད་ཀྱི་རིམ་ལྔ་དང་། གཏུམ་མོ་སོགས་མ་རྒྱུད་ཀྱི་ཆོས་དྲུག་སོར་སྡུད་སོགས་གཉིས་མེད་རྒྱུད་ཀྱི་སྦྱོར་དྲུག་སོགས་རྣམ་བཞག་མང་དུ་ཡོད་ཀྱང་དོན་ལ་བསྐྱེད་རིམ་ལ་བརྟན་པ་ཐོབ་ནས་རྡོ་རྗེའི་ལུས་ལ་གནད་དུ་བསྣུན་ཏེ་རྩ་ཐིག་རླུང་གསུམ་ལས་སུ་རུང་བ་ལ་བརྟེན་ནས་སྟོང་བཞིས་དྲངས་པའི་འོད་གསལ་དང་། དགའ་བཞིས་དྲངས་པའི་ལྷན་སྐྱེས་ཡེ་ཤེས་གང་རུང་མངོན་སུམ་དུ་རྟོགས་པ་ནི་རྫོགས་རིམ་གྱི་མཐིལ་ཡིན་ནོ། །གསུམ་པ་དེའི་འབྲས་བུ་ནི། ཐུན་མོང་གྲུབ་པ་བརྒྱད་སོགས་དང་། མཆོག་གི་དངོས་གྲུབ་གནས་སྐབས་ལམ་གྱུར་གྱི་འབྲས་བུ་རིག་འཛིན་བཞི་དང་། མཐར་ཐུག་ལམ་མཐར་ཕྱིན་པའི་འབྲས་བུ་ཟུང་འཇུག་རྡོ་རྗེ་འཆང་གི་གོ་འཕང་སྐུ་ལྔ་ལ་སོགས་པའི་འབྲས་ཆོས་ཉེར་ལྔའི་བདག་ཉིད་ལ་དབང་བསྒྱུར་ཏེ་འཁོར་བ་ཇི་སྲིད་ཀྱི་བར་དུ་འགྲོ་བའི་དོན་རྟག་ཁྱབ་ལྷུན་གྲུབ་ཆེན་པོར་མཛད་པ་ཡིན་ནོ།། ༈ གཉིས་པ་གསུང་རྒྱུད་ལུང་ཨ་ནུ་ཡོ་གས་གཞི་ལྟ་བས་གཏན་ལ་འབེབས་ཚུལ་ནི། དགོངས་འདུས་ལས། ཐམས་ཅད་བདག་ཉིད་རོ་གཅིག་པས། །ཡེ་ནས་སངས་རྒྱས་བདེ་ཆེན་ཉིད། །སྐྱེ་འགག་མེད་པའི་སྙིང་པོ་ཡིས། །བྱ་བྱེད་མེད་པའི་དཀྱིལ་འཁོར་གསུམ། །ཡེ་ནས་གྲུབ་ཟིན་ལྷུན་གྱིས་གྲུབ། །ཅེས་པའི་སྤྱི་དོན་གསལ་སྒྲོན་ལས། དེ་ཡང་དཀྱིལ་འཁོར་རྣམ་པ་གསུམ་གང་ཞེ་ན། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་སེམས་ཀྱི་རོལ་རྩལ་དུ་འདུས་ཤིང་། སེམས་སྐྱེ་མེད་སྤྲོས་པ་དང་བྲལ་བ་ནི་ཀུན་ཏུ་བཟང་མོའི་མཁའ་ཀློང་རྣམ་པར་དག་པ་ཡེ་ཇི་བཞིན་པའི་དཀྱིལ་འཁོར་དང་། དེ་ཉིད་ཐམས་ཅད་དུ་མ་འགག་པའི་རང་སྣང་རིས་མེད་ཀུན་ཁྱབ་དུ་ཤར་བ་ནི་ཀུན་ཏུ་བཟང་པོ་རང་བྱུང་ཡེ་ཤེས་ལྷུན་གྱིས་གྲུབ་པའི་དཀྱིལ་འཁོར་ཡིན་ལ། དེ་གཉིས་ཀྱང་ངོ་བོ་ཐ་མི་དད་པ་ཟུང་འཇུག་ཏུ་གནས་པ་ནི། དབྱིངས་དང་ཡེ་ཤེས་གཉིས་སུ་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར་ཞེས་སོ། །དེ་ལྟར་ཆོས་ཐམས་ཅད་ཀྱི་གཤིས་ལུགས་དཀྱིལ་འཁོར་གསུམ་དུ་གནས་པ་ཉིད་རྟོག་དཔྱོད་ཀྱི་རྗེས་སུ་འཇུག་པའི་ལྟ་བས་གཏན་ལ་ཕེབ་པ་དེ་ཡང་ཆོས་ཅན་ཤེས་བྱའི་དོན་ལ་ཤེས་བྱེད་རིག་པའི་གཏན་ཚིག་རྣམས་ཀྱིས་སོ་སོར་བརྟགས་པས་ཆོས་ཐམས་ཅད་ཀྱི་གནས་ལུགས་དཀྱིལ་འཁོར་གསུམ་ཇི་ལྟ་བར་གཏན་ལ་ཕེབས་སྟེ་རྟོགས་པར་བྱ་བ་ཡིན་ནོ།། ༈ གཉིས་པ་ལམ་བསྒོམ་པས་ཉམས་སུ་ལེན་ཚུལ་ལ། འཇུག་སྒོ་ནི། ཀུན་འདུས་ལས། ཕྱིའི་དབང་དང་ནང་གི་དབང་། །སྒྲུབ་པའི་དབང་དང་གསང་བའི་དབང་། །བཅུ་དང་བཅུ་གཅིག་བཅུ་གསུམ་དང་། །རྣམ་པ་གཉིས་ཀྱིས་རྫོགས་པར་འགྱུར། །ཞེས་པས་ཕྱི་དབང་རྒྱུད་ཀྱི་ཆུ་བོ་ལ་དབང་བཅུ་དང་། ནང་དབང་འབྱུང་བའི་ཆུ་བོ་ལ་བཅུ་གཅིག །སྒྲུབ་པའི་དབང་གྲགས་པའི་ཆུ་བོ་ལ་བཅུ་གསུམ། གསང་དབང་རྫོགས་པའི་ཆུ་བོ་ལ་གཉིས་ཏེ་དབང་མཆོག་སུམ་ཅུ་རྩ་དྲུག་བསྐུར་ཏེ་རྒྱུད་སྨིན་པར་བྱེད་པའོ། །གཉིས་པ་ལམ་གྱི་རིམ་པ་ཉམས་སུ་ལེན་ཚུལ་ལ། དོན་གྱི་རྗེས་སུ་འཇུག་པ་རྣམ་པར་མི་རྟོག་པའི་ཏིང་ངེ་འཛིན་ནི། ཆོས་ཉིད་སྙིང་པོ་ཇི་བཞིན་པའི་ངང་ལ་མཉམ་པར་འཇོག་པ་ཡིན་ནོ། །ཡི་གེའི་རྗེས་སུ་འཇུག་པ་མཚན་བཅས་ལྷའི་ཏིང་འཛིན་སྒོམ་པ་ནི། གོང་ལྟར་བསྐྱེད་སྔགས་བརྗོད་པ་ཙམ་གྱིས་རྟེན་དང་བརྟེན་པའི་འཁོར་ལོར་སྒོམ་པ་སྟེ་ཚོགས་ཆེན་འདུས་པ་ལྟ་བུའོ། །དེ་དག་ཀྱང་འགྲེལ་པ་ལུང་བསྟན་མ་ལས། དེར་ནི་འཇུག་པ་རྣམ་གསུམ་སྟེ། །རྟོག་དཔྱོད་དོན་དང་ཡིག་རྗེས་འཇུག །ཅེས་སོ། །རྫོགས་རིམ་སྟེང་འོག་གི་སྒོ་ལ་བརྟེན་ནས་བདེ་སྟོང་གི་ཡེ་ཤེས་བསྐྱེད་པ་སྟེ་ལམ་རིམ་པ་གཉིས་བསྒོམ་པས་ས་དང་པོ་འགྱུར་བ་མ་ངེས་པའི་ས་དང་། གཉིས་པ་བརྟེན་པ་གཞི་ལ་མ་ངེས་པའི་ས་དང་། གསུམ་པ་གལ་ཆེན་སྦྱོང་བ་མ་ངེས་པའི་ས་དང་། བཞི་པ་བསླབ་པ་རྒྱུན་གྱི་ས་དང་། ལྔ་པ་བསོད་ནམས་ཀྱི་རྟེན་ལ་མ་ངེས་པའི་ས་དང་། དྲུག་པ་བརྟེན་པའི་ཁྱད་པར་དུ་འགྲོ་བ་ལ་མ་ངེས་པའི་ས་དང་། བདུན་པ་དམིགས་པའི་འབྲས་བུ་སྐྱེ་བ་ལ་མ་ངེས་པའི་ས་དང་། བརྒྱད་པ་གནས་པ་མི་འགྱུར་བ་ལ་མ་ངེས་པའི་ས་དང་། དགུ་པ་བརྡལ་བ་ཆོས་ཉིད་ལ་མ་ངེས་པའི་ས་དང་། བཅུ་པ་རྫོགས་པ་ཅིར་ཆིབས་ཀྱི་ས་སྟེ་བཅུ་ལས། དང་པོ་གཉིས་ཚོགས་ལམ་འདུན་པ་སེམས་པའི་རྣལ་འབྱོར་གྱིས་བསྡུས། གསུམ་པ་བཞི་པ་ལྔ་པ་གསུམ་སྦྱོར་ལམ་རིགས་ཆེན་འབྱིན་པའི་རྣལ་འབྱོར་གྱིས་བསྡུས། དྲུག་པ་མཐོང་ལམ་དབུགས་ཆེན་འབྱིན་པའི་རྣལ་འབྱོར་གྱིས་བསྡུས། བདུན་པ་སྒོམ་ལམ་ལུང་ཆེན་ཐོབ་པའི་རྣལ་འབྱོར་གྱིས་བསྡུས། བརྒྱད་པ་དགུ་པ་བཅུ་པ་གསུམ་མཐར་ལམ་རྩལ་ཆེན་རྫོགས་པའི་རྣལ་འབྱོར་གྱིས་བསྡུས་པའི་སློབ་ལམ་རྣམས་མཐར་ཕྱིན་ཏོ། །གསུམ་པ་འབྲས་བུ་ཐོབ་ཚུལ་ནི། མི་སློབ་པའི་ལམ་འབྲས་བུ་ཀུན་ཏུ་བཟང་པོའི་གོ་འཕང་ཐོབ་པ་ཡིན་ནོ། །དེ་ཡང་ས་བཅུ་པོ་དེ་དག་འདུན་པ་སྐྱེ་བ་ལ་སོགས་པའི་སྐབས་བཅུར་སྤངས་བྱ་རྐྱེན་གྱུར་ལས་ཀྱི་བག་ཆགས་ཕྲ་རགས་ལ་སོགས་པ་བཅུ་པོ་འདི། གཉེན་པོ་གཡོ་བ་བྱང་ཆུབ་ཀྱི་སེམས་སོགས་བཅུ་པོས་སྤོངས་པའི་དཔེ་སྐར་མ་རབ་རིབ་ལ་སོགས་པ་བཅུ་དང་སྦྱོར་ཚུལ་ཡོད་པས་དེ་དག་གི་རྣམ་བཞག་ལྗོན་ཤིང་གི་རྣམ་བཞག་གི་ལེའུ་དང་། རྩ་རྒྱུད་ཀུན་འདུས་ཀྱི་ལེའུ་གཉིས་པ་ལ་སོགས་པས་ཤེས་པར་བྱའོ།། ༈ གསུམ་པ་བསྐྱེད་རྫོགས་གཉིས་སུ་མེད་པའི་ཡེ་ཤེས་གཙོ་བོར་སྟོན་པ་ཐུགས་རྒྱུད་རྫོགས་པ་ཆེན་པོ་ཨ་ཏི་ཡོ་གས་གཞི་ལྟ་བས་གཏན་ལ་འབེབས་ཚུལ་ནི། གང་དུ་བཤད་པའི་ཀུན་གཞི་རྒྱུ་རྒྱུད་ངོ་འཕྲོད་པའི་ལྟ་བ་དེ་གཞིར་བཞག་ལ། ཁྱད་པར་གྱི་ཆོས་ནི། ཨ་ནུ་མན་ཆད་ཀྱི་ཐེག་པ་བརྒྱད་པོས་སེམས་ལམ་དུ་བྱེད་པ་ཡིན་ལ། རྫོགས་ཆེན་གྱི་སྐབས་འདིར་ནི་སེམས་རིག་པ་གཉིས་ཀྱི་ཤན་འབྱེད་དེ་སེམས་ལས་འདས་པའི་རིག་པ་སྐད་ཅིག་མ་འདི་ཀའི་ངོ་བོ་སྟོང་པ་ཆོས་སྐུ། གསལ་བ་ལོངས་སྐུ། ཐུགས་རྗེ་ཀུན་ཁྱབ་རིག་པ་སྤྲུལ་སྐུ་གསུམ་གྱི་རང་ཞལ་ཡོན་ཏན་མཛོད་ཀྱི་ལེའུ་བཅུ་གཉིས་པར་གསུངས་པ་བཞིན། མཆན། ལ་གཉིས་སུ་མེད་པར་བལྟ་བ་ཡིན་ནོ། །དེ་ཡང་རིག་འཛིན་འཇིགས་མེད་གླིང་པས། གང་དག་སེམས་ལས་འདས་པའི་རིག་པ་ནི། །རང་བཞིན་རྫོགས་པ་ཆེན་པོའི་ཁྱད་ཆོས་ཡིན། །ཞེས་སོ། །གཉིས་པ་ལམ་སྒོམ་པ་ཉམས་སུ་ལེན་ཚུལ་ལ། འཇུག་སྒོ་ནི། དབང་བཞི་པ་རྩལ་དུ་བཏོན་ཏེ་རིག་པའི་རྩལ་དབང་བཞི་སྟེ། རྫོགས་པར་རང་བྱུང་ལས། སྤྲོས་བཅས་སྤྲོས་པ་མེད་པ་དང་། །ཤིན་དུ་སྤྲོས་མེད་རབ་སྤྲོས་མེད། །དབང་ནི་རྣམ་པ་བཞི་ཡིས་ཀྱང་། །སྐལ་བར་ལྡན་པ་སྨིན་པར་བྱས། །ཞེས་སོ། །ཞུགས་ནས་ལམ་གྱི་རིམ་པ་ཉམས་སུ་ལེན་ཚུལ་ལ། ལེ་ལོ་ཅན་འབད་མེད་དུ་གྲོལ་བ་ཀ་དག་ཁྲེགས་ཆོད་ཀྱི་ལམ་དང་། བརྩོན་འགྲུས་ཅན་འབད་བཅས་སུ་གྲོལ་བ་ལྷུན་གྲུབ་ཐོད་རྒལ་གྱི་ལམ་ཏེ་གཉིས་ལ་གོམས་པར་བྱ་བ་ཡིན་ནོ། །གསུམ་པ་དེའི་འབྲས་བུ་ཇི་ལྟར་ཐོབ་ཚུལ་ནི། གང་ཟག་དབང་པོ་ཡང་རབ་དང་བརྩོན་འགྲུས་མཆོག་ཏུ་གྱུར་པ་ཡིན་ན། ལུས་ཁམས་སྐྱེ་གནས་ཀྱི་ཟག་པ་ཐམས་ཅད་ཟད་དེ་ལུས་མ་བོར་བར་སངས་རྒྱས་ཏེ་འཕོ་མེད་རྡོ་རྗེའི་སྐུ་འགྲུབ་པ་སྟེ་ཨོ་རྒྱན་སངས་རྒྱས་གཉིས་པ་ལྟ་བུ་ཡིན་ནོ། །དེ་ཙམ་མ་བྱུང་ཡང་མེ་དཔུང་དང་མཁའ་འགྲོའི་འཆི་ལུགས་སོགས་ཀྱིས་ལུས་འོད་ལུས་སུ་དེངས་པ་སོགས་གང་ལྟར་ཡང་ཟུང་འཇུག་རྡོ་རྗེ་འཆང་གི་གོ་འཕང་ལ་དབང་བསྒྱུར་པ་ཡིན་ནོ། །དེ་ལྟར་ཐེག་དགུའི་རྣམ་བཞག་གི་ས་བཅད་འཇོག་ཚུལ་འདི་ནི་འགྲེལ་པ་རང་གི་བབ་དང་བསྟུན་པ་ཙམ་ལས་དངོས་གནས་ནི་མ་ཡིན་ནོ། །དེས་ན་བཀའ་བརྒྱད་བདེར་འདུས་ཀྱི་ས་བཅད་ཙམ་གྱི་ཆིངས་ལས་ཇི་ལྟར་གསུངས་པ་ལྟར་ཐེག་དགུའི་འཇུག་སྒོ་ལྟ་བ་ལ་སོགས་པའི་ས་བཅད་ཀྱི་ཆིངས་སུ་གསུངས་པ་གསང་བདག་ཞལ་ལུང་གི་སྔོན་འགྲོ་སྤྱིའི་རྣམ་བཞག་འཆད་པའི་སྐབས་སུ་ཇི་ལྟར་བྱུང་བ་བཞིན་དུ་ཤེས་པར་བྱ་བ་ཤིན་ཏུ་ལེགས་སོ། །དགེའོ། །དགེའོ།། །།