སྡོམ་གསུམ་རྣམ་ངེས་ལས་བྱང་སེམས་ལེའུའི་ཉེས་སྤྱོད་སྡོམ་པའི་ཚུལ་ཁྲིམས་ཡན་གྱི་འབྲུ་འགྲེལ།

🚧 This website is under continued development. We appreciate your patience!

Previous Text Back to Volume Page Next Text

Wylie title	sdom gsum rnam nges las byang sems le'u'i nyes spyod sdom pa'i tshul khrims yan gyi 'bru 'grel
Location	dpal sprul bka' 'bum Volume 4, Text 3, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Commentary Syllable-by-syllable - 'bru 'grel

[edit]

༄༅། །སྡོམ་གསུམ་རྣམ་ངེས་ལས་བྱང་སེམས་ལེའུའི་ཉེས་སྤྱོད་སྡོམ་པའི་ཚུལ་ཁྲིམས་ཡན་གྱི་འབྲུ་འགྲེལ་བཞུགས།

གསུམ་པ་བྱང་ཆུབ་སེམས་དཔའི་སྡེ་སྣོད་ཀྱི་བསྟན་བཅོས་འདི་ལ། དང་པོ་ཁོག་དབུབ་གླེང་གཞི་བཤད་པ། སྡོམ་པ་མ་ཐོབ་པ་ཐོབ་པར་བྱེད་པ་དང་། ཐོབ་པ་མི་ཉམས་པར་བསྲུང་པའི་ཚུལ་དང་། ཉམས་ན་ཕྱིར་བཅོས་པའི་ཐབས་གསུམ་མོ། །གླེང་གཞི་ལ་ཡང་། སྟོན་པ་སངས་རྒྱས་ཀྱིས་གསུངས་ཚུལ་དང་། རྗེས་འཇུག་གིས་སྤེལ་ཚུལ་དང་། སྡོམ་པའི་ངོ་བོ་དང་། དབྱེ་བ་སྟེ་བཞིའོ། །དང་པོ་ནི། བསྐལ་བཟང་འགྲོ་བའི་སོགས་རྐང་པ་གསུམ་གྱི་དོན་ནི། བསྐལ་བཟང་ཞེས་པ་གནས་དང་དུས་ཀྱི་བསྐལ་པ་སོགས་ཡོད་ཀྱང་འདིར་དུས་ཀྱི་བསྐལ་པ་སྣོད་བཅུད་ཀྱི་ཆགས་གནས་འཇིག་སྟོང་བཞིའི་རེ་རེ་ལ་བར་གྱི་བསྐལ་པ་ཉི་ཤུ་སྟེ་བར་བསྐལ་བརྒྱད་ཅུ་ལ་བསྐལ་ཆེན་གཅིག་སྟེ། བསྐལ་ཆེན་ལ་སྒྲོན་བསྐལ་དང་མུན་བསྐལ་གཉིས་སུ་ཡོད་པ་ལས། སྔོན་གཙང་མ་རིས་ཀྱི་ལྷ་རྣམས་ཀྱིས་བལྟས་པས་སྟོང་གསུམ་འདི་ཡང་སྟོང་སྟེ་ཆུ་ཆེན་པོ་གཅིག་གི་འཁོར་ཡུག་ཏུ་གྱུར་ཚེ་མེ་ཏོག་སྟོང་སྐྱེས་པ་མཐོང་བས་ན་དེའི་ཚེ་ལྷ་རྣམས་ཀྱི་བསྐལ་པ་བཟང་པོའོ་ཞེས་བཏགས་སོ། །འགྲོ་བ་ནི་རིགས་དྲུག་གི་སེམས་ཅན་ནོ། །འདྲེན་པ་ནི། དེ་དག་སོ་སོའི་སྡུག་བསྔལ་ལས་འདྲེན་པས་ན་འདྲེན་པ། ཐུབ་པ་ནི་སོ་སོའི་སྐྱེ་བོས་ལུས་ངག་གི་མི་དགེ་བ་རྣམས་ཤུགས་ཀྱི་ཐུབ་པའི་གོ་ཆ་ལ་བསྟེན། སངས་རྒྱས་ཀྱི་སྐུ་གསུང་ཐུགས་ཀྱི་ཉེས་སྤྱོད་ལས་བསྲུང་མི་དགོས་ཤིང་ཐུབ་པའོ། །ཆེན་པོ་ནི་ཕྱི་རོལ་ལྷའི་དྲང་སྲོང་ཐུབ་པ་ལྟ་བུ་ལས་ཆེས་ལྷག་པས་ན་ཆེན་པོ་དེ་ཉིད་ཡིན་ཞེས་སྟོན་པ་ཕུན་སུམ་ཚོགས་པའོ། །དེས་བཀའ་དང་པོ་བདེན་བཞིའི་ཆོས་ཀྱི་འཁོར་ལོ་བསྐོར་ནས། བར་པ་མཚན་ཉིད་མེད་པའི་ཆོས་འཁོར་ནི། བྱ་རྒོད་ཕུང་པོ་དང་ཡངས་པ་ཅན་སུམ་ཅུ་རྩ་གསུམ་སོགས་ཀྱི་གནས་ཕུན་སུམ་ཚོགས་པ་བསྟན། དེ་ཡང་འཁོར་ལྷ་ཀླུ་དྲི་ཟ་མི་སོགས་བྱང་ཆུབ་སེམས་དཔའི་རིགས་ཅན་གྱི་འཁོར་མ་ངེས་པ་རྣམས་ཀྱི་འཁོར་ཕུན་སུམ་ཚོགས་པ་བསྟན། ཤིན་ཏུ་རྒྱས་པའི་སྡེ་སྣོད་ཅེས་པ་ནི། ཟབ་པ་རྒྱ་ཆེ་བ་བཀའ་བར་པ་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རང་བཞིན་མ་གྲུབ་པ་སྟོང་ཉིད་དུ་གཏན་ལ་ཕབ་པ་དང་། བཀའ་ཐ་མ་ཆོས་ཐམས་ཅད་ཀུན་བཏགས་གཞན་དབང་ཡོངས་གྲུབ་གསུམ་གྱི་སྒོ་ནས་གཏན་ལ་ཕབ་པའོ། །དཔག་ཡས་ནི། སོ་སྐྱེས་རྣམས་ཀྱི་བློས་དཔག་ཡུལ་ལས་འདས་པའོ། །དཔེར་ན་བརྒྱ་བྱིན་ལྷའི་གླང་པོ་རབ་བསྟན་གྱིས་ཁུར་བར་འོས་པའི་སྣག་ཚ་རེ་ལ་ཆོས་ཀྱི་ཕུང་པོ་རེ་རེ་བྲིས་པ་དེ་འདྲའི་ཆོས་ཕུང་བརྒྱད་ཁྲི་བཞི་སྟོང་སོགས་གསུངས་པའོ། ། གཉིས་པ་ནི། འཇམ་དབྱངས་བཀའ་བསྡུས་སོགས་རྐང་པ་ལྔའི་དོན་ནི། སངས་རྒྱས་ཐུབ་པ་ཆེན་པོའི་གསུང་རབ་ཀྱི་ཆོས་ཐམས་ཅད་རྒྱལ་སྲས་འཕགས་པ་འཇམ་དཔལ་གྱིས་ཐུགས་ཀྱི་གོང་བུར་བཟུང་སྟེ། དེ་ཡང་མཐོང་ལམ་རབ་དགའི་ས་ལ་གནས་པ་མགོན་པོ་ཀླུ་སྒྲུབ་ཀྱིས་གསུངས་པའི་དབུ་མ་རིགས་ཚོགས་དྲུག་སོགས་ཀྱི་སྒོ་ནས་གཏན་ལ་ཕབ་པའོ། །དེ་དག་རྒྱལ་སྲས་ཞི་བ་ལྷ་དང་། སློབ་དཔོན་ལེགས་ལྡན་འབྱེད་སངས་རྒྱས་བསྐྱངས་སོགས་ཀྱིས་རབ་ཏུ་སྤེལ་བ་ནི་ཟབ་མོ་ལྟ་བའི་ལུགས་སོ། །བྱང་ཆུབ་སེམས་དཔའ་བྱམས་པས་བཀའ་ཡི་བསྡུ་བ་མཛད་དེ་དགའ་ལྡན་དུ་བྱམས་པའི་ཆོས་སྡེ་ལྔ་སོགས་ཀྱི་སྒོ་ནས་གསུངས་པ་དེ་དག་ཐོག་མེད་དང་དབྱིག་གཉེན་སྐུ་མཆེད་སོགས་ཀྱིས་བཀྲལ་ཏེ་འཛམ་བུ་གླིང་དུ་དར་རྒྱས་སུ་མཛད། དེ་ཡང་ལྷ་ཅིག་དཱི་བཾ་ཀ་རའི་བཀའ་དྲིན་གྱི་སྤེལ་བ་ནི་རྒྱ་ཆེན་སྤྱོད་པའི་སྲོལ་ཡིན་ནོ། ། རྒྱལ་བའི་དབང་པོ་འཆི་མེད་མཚོ་སྐྱེས་རྡོ་རྗེ་པདྨ་འབྱུང་གནས་ཆེན་པོའི་རིང་ལུགས་ཀྱང་སློབ་དཔོན་ཀླུ་སྒྲུབ་དང་མཐུན་ནོ། །གསུམ་པ་ནི། ངོ་བོ་བྱམས་དང་སྙིང་རྗེས་སོགས་རྐང་པ་གསུམ་གྱི་དོན་ནི། དེ་ཡང་བྱང་ཆུབ་ཀྱི་སེམས་རིན་པོ་ཆེ་བླ་ན་མེད་པ་འདི་དག་བསྐྱེད་པའི་སྡོམ་པའི་ངོ་བོ་ནི། སེམས་ཅན་ཐམས་ཅད་བདེ་བ་དང་ལྡན་འདོད་པའི་བྱམས་པ། སྡུག་བསྔལ་དང་བྲལ་འདོད་ཀྱི་སྙིང་རྗེ་ནི་བྱང་སྡོམ་གྱི་རྟེན་མེད་དུ་མི་རུང་བ་ཡིན་པས་སྡོམ་པའི་ངོ་བོ་བྱམས་དང་སྙིང་རྗེས་རྒྱུད་རབ་ཏུ་རླན་པར་བྱས་ནས། ཐེག་པ་ཆེ་ཆུང་སེམས་བསྐྱེད་ཀྱི་ཁྱད་པར་གྱིས་དབྱེ་བས་ན། འདིར་སྙིང་རྗེས་ཞི་བའི་ལམ་ལ་མི་གནས་པར་མཁའ་ཁྱབ་ཀྱི་སེམས་ཅན་ཐམས་ཅད་ཀྱི་དོན་དུ་བདག་གིས་ཕ་རོལ་དུ་ཕྱིན་པ་དྲུག་ལ་སོགས་པ་སྤྱོད་དོ་སྙམ་པ་ནི་སྙིང་རྗེས་གཞན་དོན་ལ་དམིགས་པའོ། །ཤེས་རབ་ཀྱིས་སྲིད་པ་མཐོ་དམན་གྱི་ཟག་བཅས་འཁོར་བའི་བདེ་བ་ཐམས་ཅད་སྤང་ནས་ཡང་དག་རྫོགས་པའི་སངས་རྒྱས་ཀྱི་གོ་འཕང་བླ་ན་མེད་པ་ཟག་མེད་ཀྱི་བདེ་བ་དམ་པ་ནི་མཁའ་ཁྱབ་ཀྱི་འགྲོ་བ་རྣམས་ཀྱིས་ཐོབ་པར་བྱ་སྙམ་པ་ནི་ཤེས་རབ་ཀྱི་རྫོགས་བྱང་ལ་དམིགས་པའོ། །དེ་ལྟར་གོང་གི་སྲིད་ཞིའི་བདེ་བའི་བློ་གཉིས་དང་བྲལ་བའི་སྒོ་ནས་སྒོ་གསུམ་གྱི་མི་དགེ་བ་བཅུ་སོགས་སྤོང་བར་བྱ་བ་ནི་བྱང་སྡོམ་གྱི་ངོ་བོའོ། །བཞི་པ་ནི། དབྱེ་བ་ཀླུ་སྒྲུབ་ཐོགས་མེད་སོགས་རྐང་པ་བཅུ་གཅིག་གི་དོན་ནི། བྱེ་བྲག་ཏུ་དབྱེ་ན། ཟབ་མོ་ལྟ་བ་དང་རྒྱ་ཆེན་སྤྱོད་པ་གཉིས་རེ་རེ་ལ་ཡང་སེམས་བསྐྱེད་ཚུལ་གཅིག་ནས་དྲུག་གི་བར་གཉིས་ཀར་འདོད་དོ། །དང་པོ་མཐའ་གཉིས་དང་བྲལ་ བའི་སྟོང་ཉིད་སྙིང་རྗེའི་སྙིང་པོ་ཅན་དུ་འདུ་བ་ལ་ལྟོས་ནས་སེམས་བསྐྱེད་པ་གཅིག་གོ ། གཉིས་པ་ངོ་བོའི་སྒོ་ནས་དབྱེ་ན། བསོད་ནམས་དང་ཡེ་ཤེས་ཀྱི་ཚོགས་གཉིས་རགས་པ་བརྡའི་ཆོ་གར་བརྟེན་པ་ཀུན་རྫོབ་སེམས་བསྐྱེད། མཐོང་ལམ་ཕྲ་བ་ཆོས་ཉིད་དོན་དམ་སེམས་བསྐྱེད་གཉིས་སོ། །གསུམ་པ་གྲོགས་ཀྱི་སྒོ་ནས་དབྱེ་ན་ལྷག་པ་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་ཀྱི་བསླབ་པ་གསུམ་མོ། །བཞི་པ་གནས་སྐབས་ཀྱི་སྒོ་ནས་དབྱེ་ན། ཚོགས་སྦྱོར་གཉིས་སུ་མོས་པ་ལམ་བྱེད་ཀྱི་སེམས་བསྐྱེད། མ་དག་ས་བདུན་གྱི་ཉོན་སྒྲིབ་དག་པ་ལྷག་བསམ་རྣམ་དག་གི་སེམས་བསྐྱེད། དག་པ་ས་གསུམ་ན་རང་ཤུགས་ཀྱི་སེམས་བསྐྱེད་རབ་ཏུ་རྒྱས་པ་རྣམ་པར་སྨིན་པའི་སེམས་བསྐྱེད་། མི་སློབ་པའི་སར་སངས་རྒྱས་ཀྱི་ཐུགས་བསྐྱེད་སྒྲིབ་པ་ཀུན་དང་བྲལ་བའི་སེམས་བསྐྱེད་དང་བཞིའོ། །ལྔ་ནི་ལམ་ལྔ་ནི་གནས་སྐབས་ལ་ལྟོས་ཏེ་སེམས་བསྐྱེད་པ་དང་། དྲུག་ནི་གྲོགས་ལ་ལྟོས་ནས་སེམས་བསྐྱེད་དང་དྲུག་གོ །དེ་ལ་ཚོགས་ལམ་ན་ལས་དང་པོ་པའི་སེམས་བསྐྱེད། སྦྱོར་ལམ་ན་ཡོངས་སུ་སྦྱང་བ་བྱས་པའི། མཐོང་ལམ་ན་ཆོས་མཐོང་བའི། བསྒོམ་ལམ་ན་སྒྲིབ་པ་དང་བྲལ་བའི། སངས་རྒྱས་ཀྱི་ས་ན་བསམ་གྱིས་མི་ཁྱབ་པའི་སེམས་བསྐྱེད་དང་ལྔའོ། །བྱང་ཆུབ་ཀྱི་སེམས་རིན་པོ་ཆེ་བསྐྱེད་པ་ལ་ངོ་བོ་ཐ་དད་དུ་བགྲང་དུ་མེད་མོད་ཀྱང་གྲོགས་སོགས་ཀྱི་སྒོ་ནས་རྣམ་པ་ཉེར་གཉིས་སུ་དབྱེ་སྟེ། དེ་ཡང་ས་གསེར་ཟླ་བ་མེ་སོགས། འདིར་ཡུམ་རྒྱས་འབྲིང་བསྡུས་གསུམ་གྱི་དགོངས་དོན་སྦས་པ་མངོན་དུ་ཕྱུང་བ་མངོན་རྟོགས་རྒྱན་གྱི་རྗེས་སུ་འབྲང་སྟེ་འཆད་པ་ལ། ས་གསེར་ཟླ་བ་སོགས་ཉེར་གཉིས་ནི། ས་མཚམས་ཀྱིས་དབྱེ་ས་བཅུའི་བར་དུའོ། །ཞེས་པའི་དོན་ནི། དེ་དག་ཐམས་ཅད་རེ་རེ་ལ་ཡང་དཔེ་དང་། གྲོགས་དང་། ཆོས་མཐུན་གསུམ་གྱི་སྒོ་ནས་བཀྲལ་བ་ནི། དེ་ཡང་བྱང་ཆུབ་སེམས་དཔའ་ཚོགས་ལམ་གྱི་དུས་ན་རང་གཞན་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་མངོན་དུ་བྱེད་པ་ལ་འདུན་པ་ས་ལྟ་བུ། གཞན་དོན་དུ་བསམ་པ་འགྱུར་བ་མེད་པ་གསེར་ལྟ་བུ། ལྷག་པའི་བསམ་པ་རྣམ་པར་དག་པ་ཟླ་བ་ཚེས་པ་ལྟ་བའི་ཡོན་ཏན་གོང་དུ་འཕེལ་བ་གསུམ་མོ། ། སྦྱོར་ལམ་གྱི་དུས་ན་གཞན་གྱི་དོན་དུ་ཕ་རོལ་ཏུ་ཕྱིན་པ་དྲུག་ལ་སྦྱོར་བ་བརྩམས་པས་བྱང་ཆུབ་ཕྱོགས་ཀྱི་མི་མཐུན་པའི་ཕྱོགས་འཇོམས་པ་མེ་ལྟ་བུ། མཐོང་ལམ་གྱི་དུས་ན་ཆོས་ཉིད་རྣམ་པར་མི་རྟོག་པའི་ཡེ་ཤེས་མངོན་དུ་གྱུར་ཏེ་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་ནས་སེར་སྣའི་སྒྲིབ་པ་དང་རྣམ་པར་བྲལ་བ་གཏོང་བ་དང་ཆེན་པོར་གཏོང་བ་དང་ཤིན་ཏུ་གཏོང་བ་ལ་དབང་འབྱོར་ཏེ་སྦྱིན་པ་མི་ཟད་གཏེར་ལྟ་བུའོ། །སྒོམ་ལམ་ས་དགུ་ལས་སྒོམ་ལམ་ཆུང་ངུའི་ཆུང་ངུ་ས་གཉིས་པ་དྲི་མ་མེད་པའི་སྐབས་སུ་ཡོན་ཏན་གྱི་འབྱུང་གནས་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་ཏེ་དཔེར་ན་རིན་པོ་ཆེ་ལ་དགོས་འདོད་ཐམས་ཅད་འབྱུང་བ་ལྟ་བུའོ། །ཆུང་ངུའི་འབྲིང་པོ་ས་གསུམ་པ་འོད་བྱེད་པའི་དུས་ན་མི་མཐུན་པའི་ཕྱོགས་ཀྱིས་མི་འཁྲུགས་པའི་བཟོད་པའི་ཕུང་པོ་རྫོགས་ཏེ་རྒྱ་མཚོ་ལྟ་བུའོ། །ཆུང་ངུའི་ཆེན་པོ་ས་བཞི་པ་འོད་འཕྲོ་བའི་དུས་ན་གཞན་དོན་དུ་འཇུག་པའི་བརྩོན་འགྲུས་ཀྱི་ཕུང་པོ་ཡོངས་སུ་རྫོགས་ཏེ་ཤིན་ཏུ་བྱ་དཀའ་དང་དུ་ལེན་པ་ལ་ཐོགས་པ་མེད་པའི་བརྩོན་འགྲུས་རྡོ་རྗེ་ལྟ་བུའོ། །སྒོམ་ལམ་འབྲིང་པོའི་ཆུང་ངུའི་དུས་ས་ལྔ་པ་སྦྱངས་དཀའ་བའི་སྐབས་སུ་མཚན་མའི་རྣམ་རྟོག་གིས་མི་གཡོ་བས་བསམ་གཏན་གྱི་ཕུང་པོ་ཡོངས་སུ་རྫོགས་ཏེ་རང་དོན་དུ་ཏིང་ངེ་འཛིན་ལས་གཡོ་བ་མེད་བཞིན་དུ་གཞན་དོན་རླབས་པོ་ཆེ་བྱེད་པ་ལ་སྐྱོ་ངལ་མེད་པ་རི་བོ་ལྟ་བུའོ། ། འབྲིང་པོའི་འབྲིང་པོའི་སྐབས་ས་དྲུག་པ་མངོན་དུ་གྱུར་པ་ཐོབ་པའི་དུས་ནི་གང་ལ་ཡང་མ་རྨོངས་པ་ཤེས་རབ་ཀྱི་ཕུང་པོ་ཡོངས་སུ་རྫོགས་ཏེ་རྣམ་པར་མི་རྟོག་བཞིན་དུ་སེམས་ཅན་གྱི་ཁམས་སུ་ཉོན་མོངས་པའི་ནད་ཐམས་ཅད་ཞི་བར་བྱེད་པའི་སྨན་གྱི་སྡོང་པོ་ནི་རྟོག་པ་མེད་བཞིན་དུ་ལུས་ཅན་གྱི་ནད་འཇོམས་པས་དཔེར་ན་ཤེས་རབ་སྨན་ལྟ་བུའོ། །འབྲིང་པོའི་ཆེན་པོའི་སྐབས་ས་བདུན་པ་རིང་དུ་སོང་བ་ཐོབ་པའི་དུས་ན་སེམས་ཅན་ཐམས་ཅད་གང་ལ་གང་འདུལ་དུ་བྱེད་པ་ལ་མ་རྨོངས་པས་ཐབས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ་ཐབས་མཁས་པ་ནི་དགེ་བའི་བཤེས་གཉེན་ལྟ་བུའོ། །འདི་མན་ཆད་ནི་སྒོ་ལྔའི་རྣམ་ཤེས་བྱ་བ་གྲུབ་པའི་ཡེ་ཤེས་སུ་མ་གྱུར་པས་ན་གཞན་ངོའི་མ་དག་པ་སྣང་བ་དང་ལྡན་པས་ན་མ་དག་ས་བདུན་ནོ། །འདི་ཡན་ཆད་དག་པ་ས་གསུམ་ལས་སྒོམ་ལམ་ཆེན་པོའི་ཆུང་ངུའི་སྐབས་སུ་ས་བརྒྱད་པ་མི་གཡོ་བའི་དུས་ན་སྨོན་ལམ་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ་གཞན་དོན་འབད་མེད་དུ་དགོས་འདོད་ཐམས་ཅད་འབྱུང་བ་བཞིན་དུ་སྨོན་ལམ་འགྲུབ་པས་ན་ཡིད་བཞིན་ནོར་བུ་ལྟ་བུའོ། །ཆེན་པོའི་འབྲིང་པོའི་སྐབས་ས་དགུ་པ་ལེགས་པའི་བློ་གྲོས་ཀྱི་དུས་ན་སྟོབས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ་སྟོབས་སུ་གྱུར་པ་གདུལ་བྱའི་འགྲོ་བ་རྣམས་ཀྱི་རྒྱུད་སྨིན་པར་བྱེད་པ་ནི་ཉི་མས་ལོ་ཏོག་ལྟ་བུའོ། །ཆེན་པོའི་ཆེན་པོའི་སྐབས་ས་བཅུ་པ་ཆོས་ཀྱི་སྤྲིན་ཐོབ་པའི་དུས་ན་ཡེ་ཤེས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ་གདུལ་བྱའི་འགྲོ་ཀུན་སྨིན་བྱེད་ཀྱི་གླུ་དབྱངས་ཀྱིས་གང་ལ་གང་འཚམས་སུ་ཆོས་ཡིད་དུ་འོང་བ་སྟོན་པས་ན་གླུ་ལྟ་བུའོ། །འདི་ས་བཅུའི་རྒྱུན་མཐའི་བྱང་ཆུབ་སེམས་དཔའི་ས་ཡིན་པས་དགའ་ལྡན་གྱི་གནས་སོགས་སུ་ཆོས་སྟོན་པ་དང་གདུལ་བྱའི་ཞིང་དུ་སངས་རྒྱས་ཀྱི་མཛད་པ་བཅུ་གཉིས་ཀྱི་སྒོ་ནས་གདུལ་བྱ་འདྲེན་ཀྱང་། མཉམ་གཞག་ངོས་ན་རྫོགས་པའི་སངས་རྒྱས་རྣམས་དང་མི་འདྲ་སྟེ་ཤེས་སྒྲིབ་ཕྲ་མོ་བག་ལ་ཉལ་ཡོད་པ་དེ་གཉེན་པོ་རྡོ་རྗེ་ལྟ་བུའི་ཏིང་ངེ་འཛིན་གྱིས་བཅོམ་ནས་སྐད་ཅིག་གཉིས་པར་མངོན་པར་སངས་རྒྱས་སོ། །བརྒྱ་བྱིན་ལྷའི་གླང་པོ་རབ་བརྟན་གྱི་དཔེ་སོགས། སྒོམ་ལམ་ཆེན་པོ་གསུམ་ལ་ཐུན་མོང་དུ་རྫུ་འཕྲུལ་དང་། ལྷའི་མིག་དང་། རྣ་བ་དང་། གཞན་སེམས་ཤེས་པ་དང་། སྔོན་གནས་རྗེས་སུ་དྲན་པ་དང་ལྔ་ལ་དབང་འབྱོར་ཏེ་གདུལ་བྱའི་འགྲོ་བ་རྣམས་གང་ལ་གང་དགོས་སུ་འདྲེན་པ་རང་དབང་བསྒྱུར་བ་རྒྱལ་པོ་ཆེན་པོ་ལྟ་བུ་དང་། ཚོགས་གཉིས་ཀྱི་ཡོན་ཏན་རབ་ཏུ་རྒྱས་པ་དགོས་འདོད་ཀུན་འབྱུང་ཞིང་འདོད་དགུར་སྒྲུབ་པ་རྒྱལ་པོའི་མཛོད་ལྟ་བུ། བྱང་ཆུབ་སེམས་དཔའ་རྣམས་ཀྱི་སློབ་པའི་ལམ་བྱང་ཕྱོགས་སོ་བདུན་ནི་དུས་གསུམ་གྱི་རྒྱལ་བ་སྲས་བཅས་ཐམས་ཅད་གཤེགས་ཤིང་རྗེས་སུ་གཤེགས་པའི་ལམ་ཡང་དག་པ་ཡིན་པས་ན་ལམ་པོ་ཆེ་ལྟ་བུ། སེམས་ཅན་ཐམས་ཅད་རྣམ་པ་ཐམས་ཅད་མཁྱེན་པའི་གོ་འཕང་ལ་བགྲོད་ནུས་པ་སྲིད་ཞིའི་མཐའ་གཉིས་དང་བྲལ་བ་ཞི་ལྷག་བཞོན་པ་བཟང་པོ་ལྟ་བུ། དེ་ཡང་ཆོས་ཐམས་ཅད་ཀྱི་ཚིག་དོན་མི་བརྗེད་པའི་གཟུང་ཐོབ་པ་དང་། གཞན་ལ་འཆད་པའི་བློ་ཐོགས་མེད་དུ་སྤོབས་པ་རྒྱས་པ་ལ་མི་ཟད་པར་དབང་འབྱོར་བ་དཔེར་ན་མཚོ་ཆེན་པོ་ལ་ཆུ་ཕྲན་འདུ་བ་མི་ཚུད་པ་དང་གཞན་གང་དུའང་ཕྲི་བ་མེད་པས་ན་བཀོད་མའི་ཆུ་ལྟ་བུའོ། །ཡང་ས་བཅུའི་རྒྱུན་མཐའ་ཆོས་སྤྲིན་གྱི་ངོ་སྐལ་དུ་ཡང་གདུལ་བྱའི་འགྲོ་བ་འདྲེན་པའི་རྟོག་པ་མེད་བཞིན་དུ་བྲག་ཆ་ལྟ་བུའི་དམ་པའི་ཆོས་ཀྱི་དགའ་སྟོན་གྱི་གདུལ་བྱ་སྨིན་པར་མཛད་པ་ནི་སྒྲ་སྙན་ལྟ་བུའོ། །རྣམ་པ་ཐམས་ཅད་མཁྱེན་པའི་གོ་འཕང་ལ་འགོད་བར་བྱེད་པ་བགྲོད་པ་གཅིག་པུའི་ལམ་རང་གི་ངང་གིས་འབྱུང་སྟེ་རྩོལ་སྒྲུབ་མི་དགོས་པ་རྒྱ་མཚོ་ཆེན་པོར་ཆུ་ཕྲན་འབབས་པ་ལྟ་བུའོ། །རང་དོན་ཆོས་སྐུའི་དགོངས་པ་མངོན་དུ་མཛད་དེ་གདུལ་བྱའི་འགྲོ་བ་ལ་དམ་པའི་ཆོས་ཀྱི་ཆར་འབེབས་པས་ན་སྤྲིན་ལྟ་བུའོ། །དེ་ལྟར་གྲོགས་སོགས་ལ་བརྟེན་ནས་བྱང་ཆུབ་ཀྱི་སེམས་རིན་པོ་ཆེ་བསྐྱེད་ཚུལ་རྣམ་པ་ཉེར་གཉིས་པོ་རེ་རེ་ལའང་སྨོན་འཇུག་གཉིས་རེ་འདུ་བ་ཀུན་མཁྱེན་ཀློང་ཆེན་པས་བཞད་དོ། །དེ་ཐམས་ཅད་བསྡུ་ན་ཡང་སྨོན་འཇུག་གཉིས་དེར་འདུ་སྟེ། བསམ་པ་སྨོན་པ་རྣམ་པར་དག་པ་དང་། འཇུག་པ་སྦྱོར་བ་ཕ་རོལ་དུ་ཕྱིན་པ་དྲུག་སོགས་རྩོམ་པའོ། ། གཉིས་པ་མདོ་སྡེ་རྒྱན་གྱི་རྗེས་སུ་འབྲང་སྟེ་རྒྱལ་སྲས་ཐོག་མེད་ཀྱིས་བཞེད་པ་ལྟར་ན། མི་ཟད་པ་བརྒྱད་ཅུའོ། །དང་པོ། དེ་ཡང་ས་གསེར་ཟླ་བ་མེ་སོགས་ཀྱི་དོན་ནི། བྱང་ཆུབ་སེམས་དཔའ་རྣམས་ནི། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་འདོད་ཀྱི་སེམས་བསྐྱེད་ཀྱི་འདུན་པ་མི་ཟད་པ་ས་ལྟ་བུ། བསམ་པ་མི་ཟད་པ་གསེར་ལྟ་བུ། ལྷག་བསམ་མི་ཟད་པ་ཟླ་བ་ལྟ་བུ་སྟེ་ཚོགས་ལམ་མོ། །སྦྱོར་བ་ཕ་རོལ་ཏུ་ཕྱིན་པ་དྲུག་མི་ཟད་པ་མེ་ལྟ་བུ་སྦྱོར་ལམ་མོ། །མི་ཟད་པའི་སྦྱིན་པ་གཏེར་ལྟ་བུའོ། །མི་ཟད་པའི་ཚུལ་ཁྲིམས་རིན་ཆེན་འབྱུང་གནས་ལྟ་བུའོ། །མི་ཟད་པའི་བཟོད་པ་མཚོ་ལྟ་བུའོ། །བྱང་ཆུབ་ཀྱི་སེམས་མི་ཟད་པའི་བརྩོན་འགྲུས་རྡོ་རྗེ་ལྟ་བུའོ། །བསམ་གཏན་རི་ལྟ་བུའོ། །ཤེས་རབ་སྨན་ལྟ་བུའོ། ། བྱམས་པ་སྙིང་རྗེ་དགའ་བ་བཏང་སྙོམས་ཏེ་ཚད་མེད་བཞི་བཤེས་གཉེན་ལྟ་བུའོ། །བསྡུ་དངོས་བཞི་མི་ཟད་པ་ཡིད་བཞིན་ནོར་བུ་ལྟ་བུའོ། །མངོན་ཤེས་དྲུག་མི་ཟད་པ་ཉི་མ་ལྟ་བུའོ། ། ཆོས་དང་དོན་དང་ངེས་ཚིག་སྤོབས་པ་ཏེ་སོ་སོ་ཡང་དག་མི་ཟད་པ་གླུ་ལྟ་བུའོ། །གང་ཟག་ལ་མི་རྟོན་ཆོས་ལ་རྟོན་པ། །ཀུན་རྫོབ་ལ་མི་རྟོན་དོན་དམ་ལ་རྟོན་པ། །རྣམ་ཤེས་ལ་མི་རྟོན་ཡེ་ཤེས་ལ་རྟོན་པ། །དྲང་དོན་ལ་མི་རྟོན་ངེས་དོན་ལ་རྟོན་པ་སྟེ་རྟོན་པ་བཞི་མི་ཟད་པ་རྒྱལ་པོ་ལྟ་བུ། ཚོགས་གཉིས་མི་ཟད་པ་མཛོད་ལྟ་བུ། བྱང་ཕྱོགས་མི་ཟད་པ་ལམ་པོ་ཆེ་ལྟ་བུ། ཞི་ལྷག་མི་ཟད་པ་བཞོན་པ་ལྟ་བུ། གཟུང་སྤོབས་མི་ཟད་པ་ཆུ་བོ་ལྟ་བུ། ཆོས་ཀྱི་སྡོམ་ལྟ་བ་བཀའ་རྟགས་ཀྱི་ཕྱག་རྒྱ་བཞི་ནི། འདུས་བྱས་ཐམས་ཅད་མི་རྟག་པ། ཟག་པ་དང་བཅས་པ་སྡུག་བསྔལ་བ། ཆོས་ཐམས་ཅད་སྟོང་ཞིང་བདག་མེད་པ། མྱ་ངན་ལས་འདས་པ་ཞི་བ་སྟེ་སྒྲ་སྙན་ལྟ་བུ། བགྲོད་ལམ་མི་ཟད་པ་ཆུ་བོ་ལྟ་བུ། བྱང་སེམས་ཐབས་ལ་མཁས་པ་རྣམས་ཀྱིས་ཆོས་སྐུའི་ངང་དུ་གཡོ་མེད་དུ་དགའ་ལྡན་སོགས་སུ་ཆོས་གསུངས་པ་མི་ཟད་པ་སྤྲིན་ལྟ་བུ་སྟེ། བློ་གྲོས་མི་ཟད་པའི་མདོ་ལས་གསུངས་པ། མི་ཟད་པ་བརྒྱད་ཅུའོ། །གཉིས་པ་མ་ཐོབ་པ་ཐོབ་པར་བྱེད་པ་ལ་གསུམ་ལས། དང་པོ་བྱང་ཆུབ་སེམས་དཔའི་སྡོམ་པ་ལེན་པའི་ཡུལ། ལེན་པ་པོའི་སློབ་མའི་མཚན་ཉིད། ཇི་ལྟར་བླང་བའི་ཚུལ་དང་གསུམ་ལས། དང་པོ་ནི། དང་པོ་སྡོམ་པ་མ་ཐོབ་པ་སོགས་རྐང་པ་གསུམ་གྱིས་བསྟན། ཡུལ་དགེ་བའི་བཤེས་གཉེན་བྱང་ཆུབ་སེམས་ཀྱིས་ཐུགས་རྒྱུད་སྨིན་པར་བྱེད་པ་སྨྲ་མཁས་དང་ལྡན་པ་ཚུལ་ཁྲིམས་ཀྱིས་རྒྱུད་དུལ་བ། ཞི་གནས་ཀྱིས་ཐུགས་ཞི་བ། ཤེས་རབ་ཀྱིས་ཆོས་ཐམས་ཅད་ཀྱི་གནས་ལུགས་རྟོགས་པས་ཉེ་བར་ཞི་བ་སྟེ་བླ་མའི་མཚན་ཉིད་དང་། གང་ཟག་ཐེག་པ་ཆེན་པོའི་རིགས་དང་སྣོད་དུ་གྱུར་པའི་གུས་ལྡན་གྱི་སློབ་མ་བཟང་པོ་སྟེ་གཉིས་སོ། །དེ་ཡང་ཐོག་མར་བྱང་ཆུབ་སེམས་དཔའི་སྡོམ་པ་ལེན་ཚུལ་ལ་ཡང་གདམས་ངག་ཁྱད་པར་ཅན་སོགས་བཞི་སྟེ་དང་པོ་ཁམས་གསུམ་འཁོར་བའི་གནས་ཀྱི་སྡུག་བསྔལ་ཐམས་ཅད་མཐོང་སྟེ་མྱང་འདས་བྱང་ཆུབ་ཀྱི་སྙིང་པོ་ཐོབ་པར་འདོད་པའི་ཕྱིར། ཁམས་གསུམ་གྱི་སྲིད་པའི་གནས་ཐམས་ཅད་སྡུག་བསྔལ་གྱི་ཕུང་པོ་ཆེན་པོར་མཐོང་སྟེ་སྐྱོ་བ་རབ་ཏུ་སྐྱེས་ནས་ངེས་འབྱུང་སྐྱེ་བ་དང་། རང་གིས་ང་དེ་ལྟ་བུའི་སྡུག་བསྔལ་ཉམས་སུ་མྱོང་དགོས་པས་དོགས་ཏེ་ཐར་པ་བསྒྲུབ་པ་མ་ཡིན་པར། སྡུག་བསྔལ་ལ་སྤྱོད་པའི་འགྲོ་བ་དེ་དག་རང་གི་ཕ་མར་གྱུར་པའི་དྲིན་མི་གཟོ་བར་རང་ཉིད་གཅིག་པུ་ཞི་བདེར་འདོད་པ་ནི་ཤིན་ཏུ་བླུན་ཞིང་དེ་ལས་མ་རབ་མེད་པས་ན་ནམ་མཁའི་གར་ཁྱབ་ཀྱི་འགྲོ་བ་རྣམས་བློས་མི་འདོར་བ་དང་། སྲིད་ཞི་གཉིས་ཀྱི་མཐའ་སྤང་བ་བྱང་ཆུབ་ཀྱི་ལམ་རིན་པོ་ཆེ་ནི་དུས་གསུམ་གྱི་རྒྱལ་བ་སྲས་དང་བཅས་པའི་སློབ་པའི་ལམ་མཆོག་ཏུ་གྱུར་པ་འདི་ཉིད་ཀྱི་ཡོན་ཏན་ནི་ས་བཅུའི་བྱང་སེམས་ཀྱིས་བསྐལ་པར་བགྲང་ཡང་གཞལ་བར་མི་ནུས་པའི་ཡོན་ཏན་ཤེས་པའོ། །རྟེན་ཁྱད་པར་ཅན་སངས་རྒྱས་སྐུ་བཞི་ཡེ་ཤེས་ལྔའི་བདག་ཉིད་དང་། ལུང་དང་རྟོགས་པའི་ཆོས་གཉིས་དང་། ས་བཅུའི་བདག་ཉིད་ཀྱི་བྱང་ཆུབ་སེམས་དཔའི་དགེ་འདུན་ཏེ་མཆོག་གསུམ་ལ་བརྟེན་ནས་སྐྱེས་བུ་ཆེན་པོའི་བློས་ཇི་སྲིད་བྱང་ཆུབ་སྙིང་པོར་མཆིས་ཀྱི་བར་དུ་སྐྱབས་སུ་འགྲོ་བ་དང་། ཡུལ་ཁྱད་པར་ཅན་དགེ་བའི་བཤེས་གཉེན་ལ་མཎྜལ་འབུལ་བ། ཐབས་ཁྱད་པར་ཅན་ཡན་ལག་བདུན་གྱི་ཚོགས་བསགས་སྟེ་སྦྱོར་བ་སྔོན་འགྲོའི་གདམས་ངག་བཞིའོ། །གཉིས་པ་དངོས་གཞི་ལ་ཡང་སྡོམ་པ་ལེན་ཚུལ། ཡན་ལག་བདུན་མཐར་སོགས་ཀྱི་དོན་ནི་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ཐོབ་ན་ཅི་མ་རུང་སྙམ་པའི་བློ་རབ་ཏུ་སྦྱང་སྟེ། ཚད་མེད་བཞི་སོགས་ཐབས་དུ་མའི་སྒོ་ནས་བྱང་ཆུབ་ཀྱི་སེམས་རིན་པོ་ཆེ་ངང་གིས་མ་སྐྱེས་བར་དུ་འབད་པར་བྱའོ། །ལེན་ཚུལ་ནི་ཀླུ་སྒྲུབ་ལུགས་ཀྱི་སྨོན་འཇུག་སྟབས་གཅིག་ཏུ་བཞད་པ་ལ། ཐོག་མར་རགས་པ་བརྡའི་ཆོ་གར་བརྟེན་ནས་ཀུན་རྫོབ་སེམས་བསྐྱེད་དམ་སྡོམ་ཆོག་དངོས་ནི། ཇི་ལྟར་སྔོན་གྱི་བདེ་གཤེགས་སོགས་ཤཱོ་ལོ་ཀ་གཅིག་གིས་སྨོན་འཇུག་གི་སྡོམ་པ་བླང་བ་ལྟར། བདག་ཀྱང་འགྲོ་ལ་ཕན་དོན་དུ་སོགས་ཀྱིས་སྨོན་འཇུག་གི་སྡོམ་པ་ལེན། དེ་ཡང་སྡོམ་པ་ཐོབ་མཚམས་ནི་ལན་གསུམ་གྱི་ཐ་མའོ། །ཇི་ལྟར་སྔོན་གྱི་བདེ་བར་གཤེགས་པ་དེ་རྣམས་ཀྱིས་སྨོན་པ་བྱང་ཆུབ་ཀྱི་ཐུགས་རིན་པོ་ཆེ་རྣམས་ནི་ཡང་དག་པར་བསྐྱེད་པ་དང་། འཇུག་པ་བྱང་ཆུབ་སེམས་དཔའི་ལམ་གྱི་བསླབ་པ་ལ། རིམ་པ་བཞིན་དུ་བསླབ་པར་མཛད་པ་དེ་ལྟར། བདག་གིས་ཀྱང་འགྲོ་བ་སེམས་ཅན་ཐམས་ཅད་ལ་ཕན་པར་འདོད་པ། །དོན་དུ་གཉེར་བ་ཡིན་པའི་ཕྱིར། སྨོན་པ་བྱང་ཆུབ་ཀྱི་སེམས་རིན་པོ་ཆེ་ནི་བསྐྱེད་ཅིང་། འཇུག་པ་བྱང་ཆུབ་སེམས་དཔའི་བསླབ་པ་དེ་རྣམས་ལ་རིམ་པ་བཞིན་དུ་ངེས་པར་ཡང་དག་པར་བསླབ་པར་བགྱིའོ། ། ༈ གསུམ་པ་མཇུག་རང་གཞན་དགའ་བ་བསྒོམ་པ་ནི། དེང་དུས་བདག་ཚེ་འབྲས་བུ་ཡོད་སོགས་ཀྱིས་རང་དགའ་བ་བསྒོམ་པ་ནི། དེང་དུས་ནས་བདག་གི་ཚེ་འཁོར་བ་ཐོག་མ་མེད་པ་ནས་ད་ལྟའི་བར་དུ་བྱང་ཆུབ་ཀྱི་སེམས་རིན་པོ་ཆེ་བསྐྱེད་པའི་སྣོད་དུ་མ་གྱུར་ཏེ་ལུས་དེ་ཉིད་ལ་འབྲས་བུ་མེད་ཀྱང་། ད་ལྟའི་དུས་ན་བྱང་ཆུབ་ཀྱི་སེམས་རིན་པོ་ཆེ་འདི་རྙེད་པས་འབྲས་བུ་ཡོད་དོ། །བདག་དེ་རིང་སངས་རྒྱས་རྣམས་ཀྱི་སྲས་སུ་གྱུར། བྱང་ཆུབ་སེམས་དཔའི་སྤུན་ཟླར་གྱུར། ཉན་ཐོས་རྣམས་ཀྱི་བླ་མར་གྱུར་པ་དེ་ཡང་འགྲོ་བ་ལྷ་དང་ཀླུ་དང་གནོད་སྦྱིན་སྟོབས་པོ་ཆེ་རྣམས་ཀྱི་ཕྱག་བྱ་བའི་འོས་སུ་གྱུར་ཏེ་རྒྱལ་བའི་སྲས་ཀྱི་མིང་གི་ཅོད་པཎ་གདགས་འོས་སུ་གྱུར་ཏོ། །གཉིས་པ་གཞན་དགའ་བ་སྒོམ་པ་ནི། བདག་གི་དེ་རིང་སོགས་ད་ནི་བདག་གི་འགྲོ་བ་སེམས་ཅན་ཐམས་ཅད་རྣམ་མཁྱེན་བླ་ན་མེད་པ་རྫོགས་པའི་སངས་རྒྱས་ཀྱི་གོ་འཕང་ལ་འགོད་དོ་ཞེས་དམ་བཅས་ཏེ་ཕྱོགས་བཅུའི་རྒྱལ་སྲས་ཐམས་ཅད་དཔང་པོར་བཞག་ནས་མཁའ་ཁྱབ་ཀྱི་འགྲོ་བ་ཐམས་ཅད་གནས་སྐབས་དང་མཐར་ཐུག་གི་བདེ་བ་དམ་པ་བྱིན་པའི་མགྲོན་དུ་འབོད་པ་ཡིན་པས་དགའ་བ་སྒོམས་ཤིག་ཅེས་པའོ། ། ༈ བྱང་ཆུབ་ཀྱི་སེམས་རིན་པོ་ཆེ་འདི་ཉིད་ཀྱི་ཕན་ཡོན་ནི་གཞན་ལས་ཁྱད་པར་འཕགས་ཏེ། དེ་ཡང་གང་ཟག་ཅིག་ངེས་པར་ངན་སོང་དུ་སྐྱེ་བ་གདོན་མི་ཟ་བ་ཞིག་གི་བྱང་ཆུབ་ཀྱི་སེམས་རིན་པོ་ཆེ་འདི་བསྐྱེད་པའི་འབྲས་བུ་ངན་འགྲོར་སྐྱེ་བའི་རྒྱུ་ཟིལ་གྱིས་གནོན་པ་ནི་ཉི་མའི་འོད་ཀྱིས་སྐར་མ་མི་སྣང་བ་ལྟ་བུ། མ་ངེས་པའི་སྡིག་པ་དྲུང་ནས་འབྱིན་པ་ལ་ཡང་དུས་མཐའི་མེས་བསྲེགས་པ་བཞིན་འཇོམས་པའོ། །དེ་ཡང་བྱང་ཆུབ་སེམས་སྐྱེས་གྱུར་ན་སྐད་ཅིག་གིས། དེ་བཞིན་དུ་བྱང་སེམས་ཀྱི་མི་མཐུན་ཕྱོགས་ཁོང་ཁྲོ་སྟེ་སྡིག་པ་སྟོབས་ཆེ་བས་སྤོང་བར་བྱའོ། །དེ་ལྟར་བྱང་སེམས་ཀྱིས་མ་ཟིན་པའི་དགེ་བའི་རྩ་བ་ནི་ཆུ་ཤིང་གི་སྡོང་པོ་ལྟ་བུའོ། །སེམས་བསྐྱེད་ཀྱིས་ཟིན་པའི་དགེ་བའི་རྩ་བ་ནི་ཟད་པ་མེད་པར་འབྲས་བུ་འབྱིན་ནོ། །ཁྱད་པར་ནི། སྨོན་པ་སེམས་བསྐྱེད་ཀྱི་ཕར་ཕྱིན་དྲུག་སོགས་སློབ་པ་ལ་གནས་སྐབས་དང་མཐར་ཐུག་གི་འབྲས་བུ་མི་ཟད་པ་བཟའ་ཤིང་གི་སྡོང་པོ་ལྟ་བུའོ། །འཇུག་སེམས་ཀྱིས་ཟིན་པའི་གང་ཟག་གི་བསོད་ནམས། རྒྱུན་ཆགས་པས་ལམ་ཕར་ཕྱིན་སོགས་མ་བསླབ་ཀྱང་འགྲོ་འཆགས་ཉལ་འདུག་གཉིད་ཀྱི་ལོག་པ་སོགས་ཀྱི་དུས་ན་ཡང་བསོད་ནམས་ཀྱི་ཚོགས་གོང་ནས་གོང་དུ་འཕེལ་བར་བྱེད་པའོ། །དེ་ཡང་བྱང་ཆུབ་སེམས་དཔའ་ལ་སྲས་ཟེར་བ་ནི་རྫོགས་པའི་སངས་རྒྱས་ཀྱི་གདུང་འཚོ་བ་དང་། དམ་པའི་ཆོས་ཀྱི་མཛོད་འཛིན་པ། གདུལ་བྱའི་ལྷག་མའི་འགྲོ་བ་རྣམས་སྐྱོང་ནུས་པས་སོ། །གཉིས་པ་ཐོག་མེད་ཀྱི་བཞེད་པ་ནི། སྨོན་སེམས་ལེན་ལ་སོགས་ཀྱི་དོན་ནི། སྨོན་སེམས་ཀྱི་སྡོམ་པ་ལེན་པ་ལ། ཐོག་མར་སོ་ཐར་མི་དགོས་ཀྱང་སྨོན་པ་སེམས་བསྐྱེད་ཀྱི་སྡོམ་པ་བླངས་ཏེ་བྱང་ཆུབ་ཀྱི་ལམ་ལ་བློ་རབ་ཏུ་སྦྱངས་ཏེ་གོམས་པར་བྱས་ནས། འཇུག་པ་སེམས་བསྐྱེད་ཀྱི་སྔོན་དུ་སོ་ཐར་རིགས་བདུན་གང་རུང་སྔོན་དུ་སོང་སྟེ། འཇུག་སེམས་ལེན་པ་དེ་ཡང་། བྱང་ཆུབ་ཀྱི་སྣོད་དུ་གྱུར་ཏམ་མ་གྱུར་ཞེས་བར་ཆད་རྣམས་དྲི་བར་བྱས་ལ་བསླབ་པ་རྣམས་ཁས་ལེན་སོགས་ཀྱི་སྒོ་ནས་སྨོན་འཇུག་སོ་སོར་ལེན་ནོ། །བླ་མ་དགེ་བའི་བཤེས་གཉེན་གྱི་དྲུང་མིན་ཡང་རྒྱལ་བའི་རྟེན་གྱི་དྲུང་དུ་སྡོམ་པ་ལེན་པ་ཀླུ་ཐོག་གཉིས་ཀའི་སྲོལ་མཐུན་ནོ། །ཐོབ་མཚམས་གོང་ལྟར་རོ། ། གཉིས་པ་དོན་དམ་སེམས་བསྐྱེད་ནི། མཐོང་ལམ་རྣམ་པར་མི་རྟོག་པའི་ཡེ་ཤེས་ཡིན་ནོ། ། ཚོགས་སྦྱོར་གཉིས་ཀྱི་དུས་ན་དོན་དམ་སེམས་བསྐྱེད་དངོས་གནས་པ་མེད་དེ། དེ་ཡང་མདོ་ལམ་དུ། སྤང་སྐོང་ཕྱག་རྒྱ་ལས། བླ་ན་མེད་པའི་དོན་དམ་པའི་སེམས་བསྐྱེད་དོ་ཞེས་ཟེར་ན། དེ་ནི་དམ་བཅའ་ལྟ་བུའོ། །སྔགས་ལམ་དུ་ཡང་ཆོ་གར་བརྟེན་པ་དོན་དམ་སེམས་བསྐྱེད་ལེན་པ་ཡོད་དོ་ཞེ་ན། དེ་ནི་དོན་དམ་པའི་སེམས་བསྐྱེད་མ་ཡིན་ཏེ་མཐར་ཐུག་དོན་དམ་པའི་སེམས་བསྐྱེད་སྐྱེ་བའི་རྟེན་འབྲེལ་བསྒྲིགས་པ་ཡིན་ནོ། །མདོར་ན་ཀུན་རྫོབ་སེམས་བསྐྱེད་ནི་ཆོ་ག་ལ་བརྟེན་པའོ། །དོན་དམ་སེམས་བསྐྱེད་ནི་སྒོམ་སྟོབས་ལས་སྐྱེ་བའོ། །བར་དུ་སྡོམ་པ་མི་ཉམས་པ་བསྲུང་བའི་ཚུལ་ལ། དེ་ཡང་ཐོབ་པ་ཙམ་གྱིས་མི་ཆོག་ཉམས་སུ་ལེན་པའི་བསླབ་བྱ་སྙིང་པོའོ། །དེ་ཡང་བྱང་ཆུབ་སེམས་ཀྱི་མི་མཐུན་པའི་ཕྱོགས་རྩ་ལྟུང་བཅོ་བརྒྱད་དང་ཉེས་བྱས་བརྒྱད་ཅུ་སྟེ་སྡེ་གཉིས་སོ། །དེ་ལ་ཟབ་མོ་ལྟ་རྒྱུད་དམ་རྒྱ་ཆེན་སྤྱོད་རྒྱུད་ཀྱི་སྲོལ་གཉིས་ལས། འདིར་ཟབ་མོ་ལྟ་རྒྱུད་དུ་ནམ་མཁའི་སྙིང་པོའི་མདོའི་རྗེས་སུ་འབྲང་སྟེ་ཀླུ་སྒྲུབ་རྒྱལ་སྲས་ཞི་བ་ལྷ་རྗེས་འབྲང་དང་བཅས་པའི་ཕྱག་བཞེས་ལྟར་ན། རྩ་ལྟུང་བཅོ་བརྒྱད་ནི། བར་དུ་མི་ཉམས་བསྲུང་བའི་སོགས་ཤོ་ལོ་ཀ་ལྔ་དང་ཚིག་རྐང་གཅིག་གིས་སྟོན་ཏེ། ཐོག་མར་བྱང་ཆུབ་སེམས་དཔའི་ཚུལ་ཁྲིམས་རྣམ་པ་གསུམ་སྟེ། ཉེས་སྡོམ་ཆོས་སྡུད་སེམས་ཅན་དོན་བྱེད་དོ། །ངོ་བོ་ཚུལ་ཁྲིམས་གཅིག །ལྡོག་ཆའི་གསུམ་གྱི་ཐ་སྙད་དབྱེ། སེམས་ཅན་གྱི་དོན་དུ་རང་རྒྱུད་ལ་བཅས་ལྟུང་དང་ཉེས་ལྟུང་གཉིས་སྡོམ་སྟེ་དགེ་བ་ཐམས་ཅད་རང་རྒྱུད་ལ་སྡུད་པ་སྟེ་གསུམ་ཀར་ཚང་བའོ། །དབྱེ་ན་ཉེས་སྤྱོད་སྡོམ་པ་ལ། རྒྱལ་བློན་ཕལ་གསུམ་ལས་རྫས་བཅུ་བཞིའོ། །དཀོན་མཆོག་དཀོར་འཕྲོག་པ་ཆོས་སྤོང་བ། ཚུལ་ཁྲིམས་དང་ལྡན་པ་དང་འཆལ་བའི་དགེ་སློང་ལ་ཁྲིམས་ཆད་དང་བསླབ་འབེབས་མཚམས་མེད་དང་ལོག་ལྟ་སྟེ་རྒྱལ་པོའི་ལྔ། དཀོར་འཕྲོག་སོགས་བཞི་དང་ཁྱིམ་གཅིག་པ་གྲོང་དང་། མི་རིགས་བཞི་ཡོད་པ་ལྗོང་དང་། བཟོ་སྣ་བཅོ་བརྒྱད་དང་ལྡན་པ་གྲོང་ཁྱེར་དང་། ཚོང་སྣ་འགའ་འདུ་བ་གྲོང་རྡལ་དང་། ཙམ་པ་ཀ་ལྟ་བུའི་ཡུལ་ཆེན་པོ་ཡུལ་འཁོར་ཏེ་དེ་དག་ལ་དམག་དཔོན་བྱེད་ནས་འཇོམས་པ་གསོད་པ་ཁང་ཁྱིམ་གཏོར་བ་༡རྣམས་བློན་པོའི་ལྔ། བློ་མ་སྦྱང་བ་ལ་སྟོང་ཉིད་བསྟན་པས་ཐེ་ཚོམ་བྱས་ཏེ་ཉན་རང་གི་སར་སྨོན་པ། གང་ཟག་རྫོགས་བྱང་བསྐྱེད་པའི་བློ་ཐེག་དམན་དུ་འཇུག་པར་བྱེད་པ་༢། སོ་ཐར་གྱི་ཐེག་པ་སྤངས་ཏེ་ཐེག་ཆེན་སློབ་པ་༣། ཉན་རང་གི་ཐེག་པས་དུག་གསུམ་མི་ཟློག་པར་འཛིན་ཞིང་བཤད་པ་༤། ཕྲག་དོག་གིས་རང་བསྟོད་གཞན་སྨོད་བྱེད་པ་༥། ཟང་ཟིང་རྙེད་པ་དང་མལ་སྟན་གྱི་བཀུར་སྟིའི་ཆེད་དུ་རང་ཉིད་ཡོན་ཏན་དང་ལྡན་ནོ་ཞེས་མིའི་ཆོས་བླ་མའི་རྫུན་གྱི་བདག་འཚོང་བ་དང་༦། ཡུལ་གྱི་རྒྱལ་པོ་ལྟ་བུ་ལ་ཆོས་འདིར་ཞུགས་པའི་དགེ་སློང་གཉིས་ལ་ཕྲ་མ་བཏབ་སྟེ་འགྲས་པ་བྱས། དགེ་སློང་དེ་ལ་ཁྱོད་ཀྱི་རྒྱལ་པོ་དེ་ལ་སུག་འབུལ་མ་བྱིན་ན་ཁྱོད་གསོད་དོ་ཞེས་སྨྲས་ཤིང་དེས་དཀོན་མཆོག་གི་དཀོར་ལྟ་བུ་ཞིག་བརྐུས་ཏེ་དེ་ལ་བྱིན་པ་དང་༧། སྤོང་བ་བསམ་གཏན་ལ་ཞུགས་པའི་ཡོ་བྱད་རྣམས། ཀློག་པ་ཐོས་བསམ་པ་རྣམས་ལ་བྱིན་པ་དང་། བསམ་གཏན་པའི་ཏིང་ངེ་འཛིན་ལ་བར་ཆད་བྱེད་པའི་ཁྲིམས་ངན་པ་བཅས་༨པ་སོགས་ཏེ་རྩ་ལྟུང་བརྒྱད་པོ་ལས་དང་པོ་བའམ་ཕལ་བ་ལ་ངེས་སོ། །དེ་དག་རྒྱལ་པོ་ལྟ་བུ་ལ་རང་དང་ཉེ་བའི་དབང་དུ་བྱས་པ་ཙམ་མ་གཏོགས་རྒྱལ་བློན་དམངས་ཕལ་སོགས་ཀུན་ལ་རྩ་ལྟུང་དེ་དག་འབྱུང་ངེས་པས་ཀུན་གྱིས་དེ་ལྟར་བསླབ་བྱ་ལ་བསྔོ་བགྲང་བྱ་དགོས་སོ། །ཡང་སྨོན་འཇུག་གི་སེམས་བློས་བཏང་སྟེ་ཉན་རང་གི་བསམ་པ་སྐྱེས་ན་རྩ་ལྟུང་གཉིས་ཏེ། དེ་ཡང་རྒྱལ་སྲས་བྱང་ཆུབ་སེམས་དཔའི་ལམ་ལ་སློབ་པར་དམ་བཅའ་བའི་སྐབས་རྒྱལ་བ་སྲས་བཅས་དཔང་པོར་བཞག །ནམ་མཁས་གར་ཁྱབ་ཀྱི་འགྲོ་བ་རྣམས་གནས་སྐབས་དང་མཐར་ཐུག་གི་བདེ་བ་དམ་པ་སྦྱིན་པར་ཁས་བླང་བས་དམ་བཅའ་ཉམས་པའི་རྩ་ལྟུང་ཤིན་ཏུ་ལྕི་བ། གསང་ཆེན་ཐབས་མཁས་ཀྱི་མདོ་ལྟར་དང་། དོན་དུ་ནི་ཕྱིན་དྲུག་སོགས་གང་ལ་ཡང་མི་སློབ་ན་ཡང་བསླབ་པ་སྤོང་བའི་རྩ་ལྟུང་འབྱུང་བ་དཀོན་མཆོག་བརྩེགས་པ་ལས་བཤད་པའོ། །ཀུན་བསྡོམ་པས་རྩ་ལྟུང་ཉི་ཤུའོ། །ཉེས་བྱས་ཀྱི་སྡེ་ལ། ཡན་ལག་གི་ཉེས་བྱས་བརྒྱད་ཅུ་སྟེ་བསླབ་བཏུས་ལས། བདེ་སྡུག་ཡལ་བར་འདོར་བ་ཉེར་བཞི། བསྒྲུབ་པ་ཡལ་བར་འདོར་བ་བཅུ་དྲུག ། དེ་གཉིས་ལས་དབྱེ་བའི་བརྒྱད་ཅུའོ། །གཉིས་པ་རྒྱ་ཆེན་སྤྱོད་རྒྱུད་རྒྱལ་སྲས་ཐོགས་མེད་ཀྱི་ལུགས་ལ་སྨོན་པའི་བསླབ་བྱ་དང་། འཇུག་པའི་བསླབ་བྱ་གཉིས་སོ། །དང་པོ་སྨོན་པའི་བསླབ་བྱ་ལ་ལྔ་སྟེ། སྨོན་སེམས་མི་འཆོར་བའི་ཆེད་དུ་སེམས་ཅན་བློས་མི་གཏོང་བ། བྱང་སེམས་མི་ཉམས་པའི་ཆེད་དུ་ཕན་ཡོན་དྲན་པ། བྱང་ཆུབ་སེམས་ཀྱི་སྟོབས་བསྐྱེད་པ་ཚོགས་གཉིས་གསོག་པ། བྱང་ཆུབ་ཀྱི་སེམས་བསྐྱེད་ཕྱིར་རྒྱུད་སྦྱང་བ་དང་། བྱང་སེམས་མི་བརྗེད་པ་དཀར་ནག་གི་ཆོས་བརྒྱད་ལ་བླང་དོར་བྱེད་པ་སྟེ་ལྔའོ། །དེ་ལ་དང་པོ་སེམས་ཅན་བློས་མི་གཏོང་བ་ནི། གང་ཟག་གཅིག་ལྟ་བུ་ལ་ཁྱོད་ལ་ངས་ཕན་མི་བཏགས། གནོད་པ་ལས་མི་སྐྱབས་ཞེས་བློས་བཏང་ན་ནམ་མཁས་ཁྱབ་པའི་འགྲོ་བ་ཐམས་ཅད་བློས་འདོར་བ་དང་ཁྱད་པར་མེད་ལ་སྨོན་པ་སེམས་བསྐྱེད་ཀྱི་སྡོམ་པ་རྩ་བ་ནས་ཆད་དོ། །ཤིང་ཁྲེས་ཀྱི་ཆུན་པོའི་ཆིངས་མདུད་གྲོལ་བ་བཞིན་ནོ། །དེའི་ཕྱིར་ན་སེམས་ཅན་བློས་མི་གཏོང་བར་གནོད་ལན་དུ་ཕན་པ་བསྒྲུབ་པ་ལ་འབད་དོ། །གཉིས་པ་བྱང་ཆུབ་སེམས་ཀྱི་ཕན་ཡོན་དྲན་པ་ལ། ཕྱོགས་བཅུའི་འཇིག་རྟེན་གྱི་ཁམས་མུ་མེད་པ་ན་བཞུགས་པའི་སངས་རྒྱས་ཐམས་ཅད་དང་ས་ཆེན་པོ་ལ་གནས་པའི་བྱང་ཆུབ་སེམས་དཔའ་དེ་དག་ཐམས་ཅད་བྱང་ཆུབ་ཀྱི་སེམས་རིན་པོ་ཆེ་བསྐྱེད་པ་ཉག་གཅིག་མ་གཏོགས་པའི་ལམ་མེད་དོ། །དེའི་ཕྱིར་ན་བྱང་ཆུབ་སེམས་བསྐྱེད་པའི་ཡོན་ཏན་ནི། བྱང་ཆུབ་སེམས་དཔའ་བྱམས་པས་གཞོན་ནུ་ནོར་བཟང་ལ་དཔེ་ཉིས་བརྒྱ་དང་ལྔ་བཅུས་བསྟན་པ་ལྟར་རོ། །གསུམ་པ་ཚོགས་བསགས་པ་ལ་གཉིས་ཏེ། དམིགས་བཅས་བསོད་ནམས་ཀྱི་ཚོགས་དང་དམིགས་མེད་ཡེ་ཤེས་ཀྱི་ཚོགས་གཉིས་སོ། །དམིགས་བཅས་བསོད་ནམས་ཀྱི་ཚོགས་དཔེར་ན་སྦྱིན་པ་ལྟ་བུ་ལ། གང་སྦྱིན་པ་པོས་ཆེ་ཕྲ་ཇི་སྙེད་སྦྱིན་ཡང་བྱང་ཆུབ་སེམས་ཀྱིས་ཟིན་བཞིན་པ་ན་བསོད་ནམས་ཀྱི་ཚོགས་སོ། །དེ་ཐམས་ཅད་དམིགས་པ་མེད་པའི་ཤེས་རབ་ཀྱིས་ཟིན་པས་ཡེ་ཤེས་ཀྱི་ཚོགས་རྫོགས་པའོ། །སེམས་བསྐྱེད་ཀྱིས་ཟིན་པའི་ཚོགས་གཉིས་ཀྱི་ཕན་ཡོན་ནི། གསང་ཆེན་ཐབས་ལ་མཁས་པའི་མདོ་སོགས་ལས་ཤེས་སོ། །བཞི་པ་བྱང་ཆུབ་སེམས་ཀྱིས་རྒྱུད་སྦྱངས་པ་ལ་གསུམ་སྟེ། བྱང་ཆུབ་ཀྱི་སེམས་བསྐྱེད་པའི་རྒྱུ་ལ་བསླབ་པ་དང་། བྱང་ཆུབ་ཀྱི་སེམས་དངོས་ལ་བསླབ་པ་དང་། མཇུག་བྱང་ཆུབ་ཀྱི་སེམས་འཕེལ་བ་བདག་གཞན་བརྗེ་བ་བསླབ་པ་སྟེ་གསུམ། དང་པོ་རྒྱུ་ལ་བསླབ་པ་ནི། བྱམས་པ་དང་སྙིང་རྗེ་ལ་ཡང་། སེམས་ཅན་ལ་དམིགས་པ་དང་། ཆོས་ལ་དམིགས་པ་དང་། དམིགས་པ་མེད་པའི་སྙིང་རྗེ་སྟེ་གསུམ་ཚང་དགོས། ཐོག་མར་ལས་དང་པོ་བ་སྔོན་ནས་བློ་མ་སྦྱངས་པས་ན་འགྲོ་བ་རིས་མེད་ལ་བྱམས་སྙིང་རྗེ་སྐྱེ་དཀའ་བས། དང་པོ་རང་དགའ་བའི་ཕའམ་མ་མཛའ་བཤེས་ལྟ་བུ། དེ་ནས་བར་པའི་སེམས་ཅན། ཐ་མ་རང་ལ་གནོད་པར་བྱེད་པའི་དགྲ་ལ་སོགས་ལ་རིམ་བཞིན་བློ་སྦྱངས་ཏེ་གོམས་སུ་འཇུག་ནས་དེ་དག་ཐམས་ཅད་བདེ་བ་དང་ལྡན། སྡུག་བསྔལ་དང་བྲལ་ན་ཅི་མ་རུང་སྙམ་པའི་བློ་ངམ་ངམ་ཤུགས་ཀྱིས་སྐྱེས་མིག་མཆི་མ་མ་འཁྲུག་བར་དུ་སྒོམ་པ་དེ་ཉིད་ཀྱི་ངང་དུ་ཏིང་ངེ་འཛིན་ལ་རྒྱུན་བསྐྱང་། དེ་རྣམ་པར་མི་རྟོག་པ་ནི་བྱམས་པའི་ཏིང་ངེ་འཛིན་དང་། བྱམས་པའི་ཏིང་ངེ་འཛིན་གྱི་ཡོན་ཏན་ནི། རྒྱལ་པོ་བྱམས་པའི་སྟོབས་ལྟ་བུའི་གཏམ་སོགས། རྗེས་ཐོབ་ཀྱི་དུས་ན་བདེ་སྡུག་གཏོང་ལེན་གྱི་སེམས་བསྐྱེད་སོགས་ལ་བསླབ་པར་བྱས་ལ་དགེ་བ་རྫོགས་བྱང་དུ་བསྔོ། གཉིས་པ་བྱང་ཆུབ་ཀྱི་སེམས་དངོས་ལ་བསླབ་པ་ནི། ཉིན་ལན་གསུམ་མཚན་ལན་གསུམ་དུ་བྱང་ཆུབ་སེམས་དཔའི་རྩ་ལྟུང་ལ་བསྔོ་བགྲང་བྱས་ཏེ་རྩ་ལྟུང་བྱུང་བ་རྣམས་བཤགས་ཏེ། སྔོན་འགྲོ་སྐྱབས་སུ་འགྲོ་བ་དང་མཎྜལ་ཡན་ལག་བདུན་པ་སོགས་གྲུབ་རྗེས་བྱང་སྡོམ་ལེན། རང་གཞན་དགའ་བ་བསྒོམ་ལ་བསྔོ་སྨོན་བྱ། གཉིད་འགྱོད་རྟོག་དཔྱོད་བཞི་ཡང་བྱང་ཆུབ་སེམས་དཔའི་ལམ་ལ་བློ་བཅོས། གསུམ་པ་མཇུག་ཏུ་སེམས་བསྐྱེད་འཕེལ་བའི་ཕྱིར་བདེ་སྡུག་གཏོང་ལེན་སོགས་ལ་འབད་དོ། །ལྔ་པ་བྱང་སེམས་མི་བརྗེད་པའི་རྒྱུ་ལ་ཡང་། བྱང་ཆུབ་ཀྱི་སེམས་རིན་པོ་ཆེ་སྐྱེ་བ་ནས་སྐྱེ་བ་གཞན་དུ་བརྗེད་པ་ནག་པོའི་ཆོས་བཞི་ཡིན་པས་དེ་ལས་ལྡོག་སྟེ་སྐྱེ་བ་ཐམས་ཅད་དུ་བྱང་ཆུབ་ཀྱི་སེམས་མི་བརྗེད་པའི་རྒྱུ་དཀར་པོའི་ཆོས་བཞི་བརྟེན་པར་བྱའོ། །མཆོད་པར་འོས་པའི་བླ་མ་དང་བྱང་སེམས་རྫུན་གྱིས་བསླུ་བ་༡། བྱང་ཆུབ་ཀྱི་ལམ་ལ་བགྲོད་པའི་གང་ཟག་འགྱོད་པ་མེད་པའི་གནས་ལ་མི་སྙན་པའི་འགྱོད་པ་བསྐྱེད་པ་༢། འགྲོ་བའི་དོན་ལ་བརྩོན་པའི་བྱང་ཆུབ་སེམས་དཔའ་རྣམས་ལ་སྐུར་འདེབས་བྱེད་པ་༣། སེམས་ཅན་ཕ་རོལ་པོ་གཞན་རྣམས་མགོ་གཡོག་ལྟ་བུའི་གཡོ་དང་སྒྱུ་མའི་གནོད་པར་བྱེད་པ་༤སྤོངས་ཏེ། དེ་ལས་ལྡོག་པའི་དཀར་པོའི་ཆོས་བཞིར་འབད་པས་བྱང་ཆུབ་ཀྱི་སེམས་མི་བརྗེད་པ་སྟེ་སྨོན་པའི་བསླབ་བྱའོ། །གཉིས་པ་འཇུག་པའི་བསླབ་བྱ་ལ་གཉིས་ཏེ། རྩ་ལྟུང་བཞི་ཉེས་བྱས་ཞེ་དྲུག་གོ །དང་པོ་ནི། རང་ཉིད་རྙེད་བཀུར་གྱི་བསམ་པས་ལྷག་པར་བློ་ཞེན་ཏེ་བདག་རང་བསྟོད་གཞན་སྨོད་པའི་རྩ་བའི་ལྟུང་༡བའོ། །སེར་སྣས་བསླངས་ཏེ་སྦྱིན་ཡུལ་རྣམས་ལ་ཟང་ཟིང་ནོར་སོགས་མི་སྟེར་བ་དང་ཆོས་ཀྱི་སྦྱིན་ཡུལ་ལ་ཆོས་མི་སྟོན་༢པའོ། །ཞེ་སྡང་གིས་བསླངས་བའི་ཁྲོ་བས་གཞན་ལ་འཚེ་སྟེ་རྡེག་སྤྱོད་སོགས་དང་། ཁྲོ་བའི་ཡུལ་ཕ་རོལ་པོས་ཤད་ཀྱིས་སྦྱངས་ཏེ་ཁྱོད་ལ་འདི་ལྟ་བུའི་ཉེས་པ་བདག་གིས་བྱས་ཀྱང་ཁྱོད་ལ་མ་གནོད་ལྟ་བུའི་ཚིག་སྨྲས་ཀྱང་དེ་ལ་ཁྲོ་བ་མི་ཟློག་པར་སླར་ཡང་ཁྲོ་བ་དང་༣གཉིས་སོ། །ཐེག་ཆེན་གྱི་ཆོས་ལ་གཞན་གྱིས་གཏི་མུག་གི་དབང་གི་བྱ་བའི་གཡམ་ལ་བཞག་ནས་ཆོས་སྤོང་བ་དང་། རང་ཉིད་ཀྱི་རྒྱུད་ཀྱི་མི་དགེ་བའི་ཆ་ཐམས་ཅད་སྦས་ཏེ་དེ་ཉིད་འདྲ་སྣང་གི་ཆོས་ལྟར་བློས་མོས་པས་བཅོས་ཏེ་ཆོས་ལོག་སྟོན་པ་༤དང་བཞི། དེ་ཐམས་ཅད་ཀུན་སློང་ལ་ལྟོས་ནས་བཞི་སྟེ། བྱ་བའི་ངོས་ནས་བརྒྱད་དུ་བརྩི་བའོ། །དེ་ལ་འདིར་གོང་གི་རྩ་ལྟུང་བཅོ་བརྒྱད་བཞག་པ་ཀླུ་སྒྲུབ་ལུགས་ལ། བྱང་ཆུབ་བཟང་པོའི་རྩ་ལྟུང་བཅོ་བརྒྱད་མེད་དེ་བཏགས་པ་ཙམ་མོ། །སློབ་དཔོན་ཨ་བྷྱ་ཀ་རས་རྩ་ལྟུང་བཅོ་བརྒྱད་དང་། བཞི་པོ་ཀུན་རྩ་ལྟུང་དངོས་གནས་པར་བཞེད། རྒྱལ་སྲས་ཞི་བ་ལྷས་རྩ་ལྟུང་གཉིས་པོ་ཀུན་བསྲུང་དགོས་པར་བཞེད་ལ། སྔར་ཀླུ་སྒྲུབ་ལུགས་ཀྱི་རྩ་ལྟུང་ཉི་ཤུའི་ཁར་སེར་སྣས་ཟང་ཟིང་མི་སྟེར་བ་དང་། ཁྲོ་བས་ཤད་སྦྱང་མི་ལེན་པ་དམ་ཆོས་འདྲ་སྣང་གིས་སྟོན་པ་ཆོས་ལྟར་བཅོས་པ་སྟེ་གསུམ་བསྣན་པའི་ཉེར་གསུམ་དུ་འདོད་དོ། །སྔ་འགྱུར་རང་ལུགས་ཀྱང་ཕྱི་མ་ལྟར་བཞེད་པ་ཡིན། དེ་དག་གི་འཇུག་པའི་བསླབ་བྱ་རྩ་ལྟུང་བཞིའོ། །ཡན་ལག་གི་ཉེས་བྱས་ཕྲ་བ་ཞེ་དྲུག་ནི་སྡོམ་པ་ཉི་ཤུ་པ་སོགས་ལས་ཤེས། བཀྲ་ཤིས།