ཀློང་ཆེན་སྙིང་གི་ཐིག་ལེ་ལསཿ བཀའ་སྲུང་མ་མགོན་ལྕམ་དྲལཿ

Previous Text Back to Volume Page Next Text

Wylie title	klong chen snying gi thig le las: bka' srung ma mgon lcam dral:
Location	'jigs gling bka' 'bum Volume 11, Text 34, Pages 535-558 (Folios 1a1 to 12b1)
Author	འཇིགས་མེད་གླིང་པ་
Less details More details
Tertön	འཇིགས་མེད་གླིང་པ་ ('jigs med gling pa)
Citation	'jigs med gling pa. Klong chen snying gi thig le las bka' srung ma mgon lcam dral. In Kun mkhyen rig 'dzin 'jigs med gling pa'i gsung 'bum, Vol. 11: 535-558. New Delhi: Shechen Publications, 2025.
Genre	Protector Rituals - gsol mchod · Torma-offering Rituals - gtor chog
Cycle	བཀའ་སྲུང་མ་མགོན་ལྕམ་དྲལ་ (bka' srung ma mgon lcam dral)
Parent Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)
Deity	bka' srung

[edit]

འུཾཿ ཀློང་ཆེན་སྙིང་གི་ཐིག་ལེ་ལསཿ བཀའ་སྲུང་མ་མགོན་ལྕམ་དྲལ་བཞུགསཿ

འུཾཿ དཔལ་ཆེན་ཁྲག་འཐུང་སྐུ་ལ་འདུདཿ བླ་རྫོགས་ཐུགས་གསུམ་ཡོངས་རྫོགས་ཀྱིཿ ཐུན་མོང་མ་ཡིན་བཀའ་སྲུང་ཆེཿ ལྕམ་དྲལ་གསུམ་གྱི་ཕྲིན་ལས་བསྟནཿ བྲག་དམར་མཚོ་གླིང་དུར་ཁྲོད་དངཿ སྒྲུབ་གནས་བྱིན་ཆེན་ལ་སོགས་པརཿ རང་རང་མཐུན་རྫས་མཆོད་གཏོར་བཤམཿ ལྟ་བ་གྱབ་ཀྱི་ངར་ལྡན་པསཿ རང་ཉིད་དཔལ་ཆེན་པོར་གསལ་བའི་ཐུགས་ཀ་ནས་འོད་ཟེར་འཕྲོསཿ རཾ་ཡཾ་ཁཾ་དུ་གྱུར་པ་མཆོད་རྫས་དང་གཏོར་མ་ལ་ཕོགཿ རཾ་ལས་མེས་མ་དག་པ་ཐམས་ཅད་བསྲེགསཿ ཁཾ་ལས་ཆུ་བྱུང་བས་སྦྱངསཿ ཡཾ་ལས་རླུང་བྱུང་བས་གཏོར་ཏེ་སྟོང་པའི་ངང་ལསཿ ཀཾ་ལས་མི་མགོའི་སྒྱེད་པོ་གསུམ་གྱི་སྟེང་དུཿ ཐོད་པ་ཕྱི་དཀར་ལ་ནང་དམར་བ་སྟོང་གསུམ་ཙམ་གྱི་ནང་དུ་གཏོར་མ་སོ་སོར་ཨོཾ་ཨཱཿཧཱུྃ་ལས་ཤ་ལྔ་དང་བདུད་རྩི་ལྔའི་རང་བཞིན་རི་རབ་དང་རྒྱ་མཚོ་མཉམ་པས་ཁེངསཿ ཡཾ་ལས་རླུང་གཡོསཿ རཾ་ལས་མེ་འབར་བས་ཐོད་པའི་བདུད་རྩི་ཁོལཿ ཟླ་བའི་ཁ་ཆོད་རྡོ་རྗེ་རྩེ་ལྔ་པས་བརྒྱན་པའི་ལྟེ་བ་ལཿ ཨོཾ་ཨཱཿཧཱུྃ་གིས་མཚན་པ་ལས་འོད་འཕྲོསཿ ཕྱོགས་བཅུའི་སངས་རྒྱས་ཐམས་ཅད་ཀྱི་ཡེ་ཤེས་ཀྱི་བདུད་རྩི་སྤྱན་དྲངསཿ ཐོད་པའི་བདུད་རྩི་ལ་ཐིམ་པས་ཡེ་ཤེས་ཀྱི་བདུད་རྩི་འདོད་དགུ་ཐམས་ཅད་འབྱུང་བའི་རང་བཞིན་དུ་གྱུརཿ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཿ ལན་གསུམཿ མ་ཧཱ་བ་ལིཾ་ཏ་ཧཱུྃ་ཧྲཱིཿཋཿ ལན་གསུམཿ མ་ཧཱ་རཀྟ་ཧཱུྃ་ཧྲཱིཿཋཿ ལན་གསུམཿ རང་གི་མདུན་དུ་སྣང་སྲིད་ཐམས་ཅད་སྲིད་པ་མ་མོའི་དཀྱིལ་འཁོར་ཁྲག་ཞག་གི་དབའ་ཀློང་རབ་ཏུ་འཁྲུགས་པའི་ཀློང་བྷནྡྷ་འབར་བའི་གཞལ་ཡས་ཁངཿ ཕྱོགས་མཚམས་སྐྱོང་བ་བཅུའི་མགོ་བོས་ཕྱོགས་ཕྱོགས་ཀྱི་རྩིག་པ་བྱས་པ་ལ་གནམ་ལྕགས་ཀྱི་གཟེར་བཏབ་ཅིང་ལྷ་ཆེན་པོ་བརྒྱད་ཀྱི་ཀ་བ་ལ་ཀླུ་ཆེན་པོ་བརྒྱད་གདུང་དུ་བྲེས་པཿ གཟའ་ཆེན་པོ་བརྒྱད་ཀྱི་ཕྱམ་དངཿ རྒྱུ་སྐར་གྱི་དྲལ་ཟེབཿ རུ་ཏྲའི་ཐོག་དང་ཆུ་སྲིན་གྱི་རྟ་བབསཿ ཆོས་འཁོར་སྨུག་ནག་གདུགས་ཕུབ་པའི་གཡས་གཡོན་ནས་ཆུ་སྲིན་གྱི་ཕྲུ་གུ་བལྟ་བཿ སྟག་དོམ་སེང་གེ་ལ་སོགས་པ་གཅན་གཟན་གདུག་པ་ཅན་གྱི་མགོ་བོས་ཁ་བད་བྱས་ཤིངཿ ཞེ་སྡང་སྦྲུལ་གྱི་ཆུན་པོ་ལ་ཐོད་པ་ཚལ་བུར་བརྒྱུས་པའི་དྲ་བ་དང་དྲ་ཕྱེད་དཔྱངས་པཿ འདོད་སྣམ་ལ་མཆོད་པའི་ལྷ་མོ་རྣམས་གར་བྱེད་ཅིངཿ བྱང་ཤར་ནས་རིམ་པའི་ཟུར་བཞིར་རྡོ་རྗེ་དངཿ གནམ་ལྕགས་དངཿ དར་ཟབ་དངཿ ཁྲག་གི་རྒྱལ་མཚན་ཆེན་པོ་བཞི་གནས་པའོཿ ཕོ་བྲང་ཆེན་པོ་དེའི་ཕྱི་རིམ་ཐོད་པ་ལྕགས་ཀྱི་གྲོང་ཁྱེར་ལ་གཤིན་རྗེ་དངཿ བདུད་དངཿ སྲིན་པོའི་ཚོགས་གནས་ཤིང་མཐའ་ལྕགས་རི་ནག་པོས་བསྐོར་བའི་ནང་ཁོངས་སུ་དུར་ཁྲོད་ཆེན་པོ་བརྒྱད་ལ་རོ་རྣམ་པ་སྣ་ཚོགས་བམ་པ་དངཿ རུལ་བ་དངཿ མྱགས་པ་དངཿ སྟག་དང་གཟིག་དང་དོམ་དྲེད་ལ་སོགས་པའི་གཅན་གཟན་དང་དུར་བྱ་ཀངྐ་དངཿ བཞད་ལ་སོགས་པའི་ཤ་ཟན་མང་པོས་གང་བཿ དུར་ཤིང་དངཿ བརྩུབས་ཤིང་དངཿ ཚེར་མ་ཅན་གྱི་ནགས་འདབས་ལ་གནོད་སྦྱིན་དངཿ ཤ་ཟ་དངཿ རོ་ལངས་དངཿ ཕྲ་མེན་དངཿ མ་མོ་མཁའ་འགྲོའི་ཚོགས་དཔག་ཏུ་མེད་པ་མདོར་ན་དུར་ཁྲོད་ཀྱི་ཆོས་མ་ཚང་བ་མེད་པས་འཇིགས་པར་བྱས་པའི་མཐའ་མེ་དཔུང་དང་རྡོ་རྗེའི་ར་བས་རྒྱ་ཡོངས་སུ་མ་ཆད་པ་དེའི་ལྟོ་བ་ཕྲིན་ལས་རྣམ་པ་བཞི་ལྷུན་གྱིས་གྲུབ་པའི་གནསཿ ཐོད་མཁར་གྲུ་གསུམ་རྒྱ་ཁྱོན་ཆོས་ཀྱི་དབྱིངས་དང་མཉམ་པའི་དབུས་སུ་སྣ་ཚོགས་རོའི་གདན་ལཿ དཔལ་སྔགས་ཀྱི་བདག་མོ་ནག་མོ་ཁྲོས་མའི་རྒྱལ་མོཿ ཀུན་ཏུ་བཟང་མོའི་སྤྲུལ་པཿ འཁོར་འདས་ཐམས་ཅད་ཀྱི་བདག་ཉིད་ཆེན་མོ་ལ་ཉིད་ལས་མི་གཞན་པའི་འཁོར་དཀར་མོའི་ཚོགས་དངཿ སེར་མོའི་ཚོགས་དངཿ དམར་མོའི་ཚོགས་དངཿ མཐིང་ནག་ལ་སོགས་པ་གྲངས་དང་མཐས་མི་གཏུགས་པཿ ལ་ལ་མཛེས་པའི་ཆ་བྱད་ཅནཿ ལ་ལ་ཁྲོ་ཞིང་གཏུམ་པཿ ལ་ལ་ཆགས་ཤིང་བཞད་པ་ལ་སོགསཿ མདོར་ན་ཡེ་ཤེས་དང་ལས་ལ་གྲུབ་པའི་མ་མོ་མཁའ་འགྲོའི་ཚོགས་རྣམ་འགྱུར་དང་མིང་གིས་ཐ་དད་དུ་གྲུབ་པའི་རིགས་ཐམས་ཅད་དངཿ འཁོར་ལོ་རྒྱས་འདེབས་མའི་སྐུའི་སྤྲུལ་པ་དམ་ཅན་མ་མོ་བཅུ་གཉིསཿ གསུང་སྤྲུལ་མཁའ་འགྲོ་ཆེན་མོ་ལྔཿ ཕྲིན་ལས་ཀྱི་སྤྲུལ་པ་བསྟན་མ་བཅུ་གཉིས་གཡས་སུ་སྦྱོར་བའི་གིང་ཆེནཿ དཔལ་ལྡན་ཡེ་ཤེས་མགོན་པོ་སྤྲུལ་པའི་མགོན་པོ་སྡེ་ལྔཿ དཔལ་མགོན་བདུན་ཅུའི་ཚོགས་སྤྲུལ་པ་ཡང་འཁོར་དང་བཅས་པཿ གཡོན་དུ་སྒྲོལ་བའི་གིང་ཆེན་སྐྱེས་མཆོག་རྡོ་རྗེ་ལེགས་པ་ཐེའུ་བྲང་སྟོང་སྡེ་དང་བཅས་པཿ རྒྱབ་ཏུ་གསང་བའི་སྒྲོལ་གིང་གཟའ་བདུད་སྲོག་གི་སྤུ་གྲི་གཟའ་བརྒྱད་གདོང་མོ་བཞི་དང་བཅས་པཿ མདུན་དུ་སྦས་པའི་དཀོར་སྲུང་དུར་ཁྲོད་ལྷ་མོ་གཙུག་ལག་ཁང་དང་དགོན་གནས་རྣམས་ཀྱི་དཀོར་ཆ་སྲུང་ཞིང་ནོར་ལ་ཀླུཿ རྫས་ལ་གནོད་སྦྱིནཿ ཟས་ལ་འདྲེ་མོར་རྫུ་ཞིང་ངན་པའི་ངན་ནེ་མ་དམར་མོ་དར་ནག་གི་གོ་ཟུ་ཅན་གཡས་ལྕགས་ཀྱུ་དངཿ གཡོན་མེ་ལོང་བསྣམས་པཿ མིང་སྲིང་བརྒྱད་དང་བཅས་པ་མདོར་ན་སྲིད་པ་མ་མོའི་དཀྱིལ་འཁོར་དུ་དམ་ཚིག་དང་ཐུགས་རྗེས་འཁོད་པའི་སྔགས་སྲུང་དྲེགས་པའི་ཚོགས་དང་བཅས་པ་རང་བཞིན་གར་བཞུགས་ཀྱི་གནས་ནས་སྤྱན་དྲངས་པར་གྱུརཿ སྲོག་སྔགས་བཟླ་ཞིང་དབྱངས་རོལ་དང་བཅས་སྤྱན་དྲངསཿ བྷྱོཿ ཁྲག་མཚོ་ལྕགས་ཀྱི་ར་བ་ཅནཿ དུར་ཁྲོད་རོལ་པའི་གཞལ་ཡས་ཁངཿ ཐོད་མཁར་གྲུ་གསུམ་རོ་གདན་དབུསཿ ཁྲོས་མ་ནག་མོ་འབར་བའི་གདོངཿ ཨེ་ཀ་ཙ་ཊི་རལ་གཅིག་མཿ སྤྱན་གཅིག་དུས་གསུམ་ཀུན་ལ་གཟིགསཿ ཚེམས་གཅིག་དགྲ་བོའི་སྲོག་ལ་རྔམསཿ མཐིང་ནག་གཡུ་ཡི་རལ་པ་ཅནཿ གཡས་ན་དགྲ་སྙིང་དྲོན་མོ་འཆངཿ གཡོན་པས་གཡུ་སྤྱང་ཁྲ་ཐབས་འགྱེདཿ ཞབས་གཉིས་གྱད་ཀྱི་དོར་སྟབས་ཅནཿ སྐུ་ཡི་སྤྲུལ་པ་བལ་མོ་འབུམཿ གསུང་སྤྲུལ་མ་སྲིང་མཁའ་འགྲོ་འགྱེདཿ ཐུགས་སྤྲུལ་མོན་མོ་ནག་མོ་དངཿ ཡོན་ཏན་ཕྲིན་ལས་བསམ་མི་ཁྱབཿ འཁོར་དང་བཅས་པ་གཤེགས་སུ་གསོལཿ གཡས་སུ་སྤྲུལ་པ་བལ་མོ་འབུམཿ གསུང་སྤྲུལ་མ་སྲིང་མཁའ་འགྲོ་འགྱེདཿ ཐུགས་སྤྲུལ་མོན་མོ་ནག་མོ་དངཿ གཡས་སུ་སྦྱོར་བའི་གིང་ཆེན་ནིཿ ལྷ་ཆེན་དཔལ་འབར་མ་ནིང་ནགཿ རབ་ཏུ་ཁྲོས་པ་སྲིན་པོའི་གདོངཿ སྤྱན་གསུམ་ཐོད་སྐམ་དབུ་རྒྱན་ཅནཿ སྦྲུལ་ནག་གསོན་མའི་རལ་པ་འཕྱོཿ གཡས་གཡོན་རུ་མཚོན་སྙིང་ཞགས་འཕྱརཿ སྐུ་ཡི་མགོན་པོ་སྟག་ཞོན་དངཿ གསུང་གི་མགོན་པོ་བིང་དམར་པོཿ ཐུགས་ཀྱི་མགོན་པོ་གྲི་གུག་ཅནཿ ཡོན་ཏན་མགོན་པོ་ལེགས་ལྡན་ནགཿ ཕྲིན་ལས་མགོན་པོ་ཏྲག་ཤད་དངཿ ལྷ་ཀླུ་གཟའ་སྐར་ཕྱོགས་སྐྱོང་བཅུཿ འཇིགས་བྱེད་དགུ་དང་རྒྱལ་ཆེན་བཞིཿ དཔལ་མགོན་བདུན་ཅུ་ཡང་འཁོར་བཅསཿ འོག་མིན་གནས་དང་བསིལ་བ་ཚལཿ རི་རབ་ཟོམ་དང་གོ་ལའི་ངོསཿ རང་བཞིན་གནས་ནས་གཤེགས་སུ་གསོལཿ གཡོན་དུ་སྒྲོལ་བའི་གིང་ཆེན་ནིཿ སྐྱེས་མཆོག་བཛྲ་ཐིག་ལེ་རྩལཿ སྐུ་མདོག་མེ་ཡི་ཕུང་པོ་འདྲཿ དར་དཀར་རལ་གུ་སྟག་ཤམ་ཅནཿ གཡས་གཡོན་རྡོ་རྗེ་དགྲ་སྙིང་བསྣམསཿ ཆིབས་སུ་སེང་གེ་དཀར་མོ་བཅིབསཿ མཆེད་འཁོར་སུམ་བརྒྱ་དྲུག་ཅུ་དངཿ ཐེའུ་བྲང་མོན་པ་སྟོང་སྡེའི་ཚོགསཿ ལྷ་སྲིན་སྡེ་བརྒྱད་འཁོར་དང་བཅསཿ སྲིན་ཡུལ་ལངྐ་པུ་རི་དངཿ དབུ་རུ་ཞྭ་ཡི་ལྷ་ཁང་སོགསཿ དབེན་གནས་གཉེན་པོ་གར་བཞུགས་ནསཿ སྐད་ཅིག་ཡུད་ལ་གཤེགས་སུ་གསོལཿ ཏྲག་རཀྴ་ཨེ་ཀ་ཙ་ཏི་མ་མ་བྷྱོཿ མ་ཧཱ་ཀཱ་ལ་ཤཱ་ས་ན་ཛཿ ཏྲི་བཛྲ་ས་དྷུ་ས་མ་ཡ་ཛཿ ཞེས་རོལ་མོའི་སྒྲ་དང་གསུར་ཆེན་གྱི་དུད་པས་སྤྱན་དྲངསཿ བཞུགས་གསོལ་ནིཿ བྷྱོཿ ལྕམ་མོ་ཆེན་མོ་བཞུགས་སུ་གསོལཿ དྲལ་པོ་ཆེན་པོ་བཞུགས་སུ་གསོལཿ སྦྱོར་སྒྲོལ་གིང་ཆེན་བཞུགས་སུ་གསོལཿ འཁོར་དང་བཅས་པ་ཏིཥྛ་ལྷནཿ དེ་ནས་མཆོད་པ་འཕུལ་བ་ནིཿ བྷྱོཿ ཏིང་འཛིན་སྤྲུལ་པའི་གནས་མཆོག་འདིརཿ ཐུགས་དམ་སྐོང་བའི་དམ་རྫས་ནིཿ དངོས་སུ་བཤམས་དང་ཡིད་ལས་བྱུངཿ བྱང་ཆུབ་སེམས་དང་ཨ་མྲྀ་ཏཿ མྱོས་བྱེད་དབའ་ཀློང་འཁྲུགས་པ་དངཿ སྲོག་ཆགས་མདངས་ཀྱིས་ཐུགས་དམ་བསྐངཿ སྣ་ཚོགས་ཤ་དང་སྙིང་གི་ཁྲགཿ དཀར་གསུམ་མངར་གསུམ་རོ་དྲུག་ཟསཿ ཉེར་སྤྱོད་བྷ་ལིང་གཏོར་མ་དངཿ སྤྱན་གཟིགས་མཆོད་པས་ཐུགས་དམ་བསྐངཿ སྒྲུབ་རྫས་སྦ་དཀར་ཚིགས་གསུམ་དངཿ དུག་ཁྲག་སྦྱར་བ་གནད་ཀྱི་རྒྱུཿ གསོན་ཁྲག་རླངས་པ་ཕྱུར་བ་ཡིསཿ འདོད་ཆགས་ཅན་གྱི་ཐུགས་དམ་བསྐངཿ ཤེས་རབ་མཚལ་དང་སྤྱི་བླུགས་ཞྭཿ ཤ་ཁྲག་སྙིང་སྣ་རུ་མཚོན་དངཿ རྨ་བྱའི་རྒྱལ་མཚན་ཙིཏྟའི་ཏོགཿ ལེ་བརྒན་དར་དང་མཐིང་ནག་གུརཿ སྣེལ་མོའི་མགོ་དང་གཡང་གཞི་སྙིངཿ ནལ་བུའི་ཤ་ཁྲག་ལུག་ནག་གསོབཿ རྐང་གླིང་ཐོད་རྔ་ལྟག་སྤྲོད་སོགསཿ རྟེན་རྫས་རྣམས་ཀྱིས་ཐུགས་དམ་བསྐངཿ བྱ་ནག་ལུག་ནག་ཁྱི་ནག་འབྲིཿ མི་ཁྱི་རྟ་ཡི་བམ་ཆེན་དངཿ མདོས་དང་འབྲས་བུ་སྣ་ཚོགས་པཿ བསྐང་རྫས་རྣམས་ཀྱིས་ཐུགས་དམ་བསྐངཿ རྟ་དང་གཡག་ནག་གྲི་སྙིང་གིསཿ དཔལ་ལྡན་མགོན་པོའི་ཐུགས་དམ་བསྐངཿ ར་ཡི་ཤ་ཁྲག་གསུར་ཆེན་གྱིསཿ སྐྱེས་བུ་ཆེན་པོའི་ཐུགས་དམ་བསྐངཿ ཤ་ཁྲག་སྙིང་སྣ་ར་མཆིན་གྱིསཿ གཟའ་བདུད་འཁོར་བཅས་ཐུགས་དམ་བསྐངཿ དཀར་མངར་འོ་ཆོལ་རྟ་བོང་ཤསཿ དུར་ཁྲོད་བདག་མོའི་ཐུགས་དམ་བསྐངཿ མདོར་ན་སྣང་སྲིད་སྣོད་བཅུད་ཀུནཿ དབང་པོ་དྲུག་གི་སྤྱོད་ཡུལ་དུཿ རང་རང་མཐུན་པའི་དམ་རྫས་ཀྱིསཿ སྤྲུལ་འཁོར་ཡོངས་རྫོགས་ཐུགས་དམ་བསྐངཿ ཁྱད་པར་དུས་ཀྱི་ཐ་མ་ལཿ སྲིད་པའི་བདེ་སྡུག་མ་མོས་བྱེདཿ འབྱུང་བ་ལྔ་ཡང་ཡུམ་ལྔའི་ཀློངཿ དེ་ཕྱིར་སྲིད་པ་མ་མོར་གྲགསཿ དབྱིངས་ལ་རྣམ་རྟོག་མི་མངའ་ཡངཿ རྩལ་ལས་སྤྲུལ་པར་ཤར་བའི་ཚེཿ ལེགས་ཉེས་སྟངས་འཛིན་མ་མོ་ནིཿ ཀོ་ལོང་རུ་ང་གདུག་རྩུབ་ཆེཿ རྣལ་འབྱོར་ཐབས་ལ་མི་མཁས་ཤིངཿ འཇིག་རྟེན་རྨོངས་པའི་དབང་གྱུར་པསཿ ལྷ་མོའི་དམ་ཚིག་གང་དང་གངཿ དེ་ཀུན་དང་དུ་མ་བླངས་ཤིངཿ དཀར་དམར་ཐབ་དང་གཞོབ་ལ་སོགསཿ ཐུགས་དང་འགལ་བའི་ལས་བགྱིས་པཿ ཁྱོད་ལ་མཐོལ་ལོ་བཟོད་པར་བཞེསཿ དབྱིངས་ནས་བཀའ་ཆད་མ་བཏང་ཅིགཿ ཤོ་དང་རྡེའུ་མ་འགྲེམས་ཤིགཿ ཁྲམ་དང་དལ་ཁ་མ་སྟོན་ཅིགཿ ཚོན་གྲུ་ནད་རྐྱལ་མ་བརྡེག་ཅིགཿ གོད་ཁ་གནས་འགྱུར་མ་བཏང་ཅིགཿ ཐུགས་དམ་གཉན་པོ་བསྐངས་གྱུར་ནསཿ ཞི་རྒྱས་གཉིས་ཀྱིས་གསོ་བ་དངཿ དབང་དྲག་རོལ་པའི་མངོན་སྤྱོད་ཀྱིཿ ལས་བཞིའི་དངོས་གྲུབ་བདག་ལ་སྩོལཿ དོ་གལ་ཆེ་ན་ཕུད་སྐོང་བྱ་སྟེཿ ཕུད་ཉུང་ངུ་ཙམ་ལ་བྱར་མི་རུང་ངོཿ ཧོཿ འོག་མིན་བདེ་བ་ཆེན་པོའི་ཞིང་ནཿ ཀུན་ཏུ་བཟང་མོ་དབྱིངས་ཀྱི་ཡུམ་ཆེནཿ ཉི་ཤུ་རྩ་བཞི་སྤྲུལ་པའི་ཡུལ་ནཿ མ་མོ་མཁའ་འགྲོ་ཀུན་གྱི་རྗེ་མོཿ དཔལ་སྔགས་ཀྱི་བདག་མོ་ནག་མོ་ཁྲོས་མ་ལ་གསོལ་ལོཿ ཨེ་ཀ་ཙ་ཊི་སྤུན་དྲུག་ལ་གསོལ་ལོཿ དེའི་བྲན་མོ་བཅུ་བཞི་ལ་གསོལ་ལོཿ གཡོག་མོ་ལྔ་བཅུ་རྩ་བརྒྱད་ལ་གསོལ་ལོཿ ཡང་གཡོག་འབུམ་ཁྲི་འབུམ་སྟོང་ལ་གསོལ་ལོཿ ནམ་གྲུ་རེ་མ་ཏི་ལ་གསོལ་ལོཿ འདོད་པ་ཁམས་ཀྱི་དབང་ཕྱུག་མ་ལ་གསོལ་ལོཿ ཤྭ་ན་མ་བཞི་ལ་གསོལ་ལོཿ ས་བདག་མ་བཞི་ལ་གསོལ་ལོཿ བདག་ཉིད་མ་བཞི་ལ་གསོལ་ལོཿ དུར་ཁྲོད་བདག་མོ་ལྕམ་དྲལ་ལ་གསོལ་ལོཿ དབང་གི་ལྷ་མོ་ཙནྟྲི་ཀ་ལ་གསོལ་ལོཿ ཤན་པ་ནག་མོ་སྲོག་སྒྲུབ་མ་ལ་གསོལ་ལོཿ ལྷ་མོ་དུད་སོལ་མ་ལ་གསོལ་ལོཿ རྡོ་རྗེ་དྲག་མོ་རྒྱལ་ལ་གསོལ་ལོཿ མ་སྲིང་བསྟན་མ་བཅུ་གཉིས་ལ་སོགས་སྤྲུལ་པ་ཡང་སྤྲུལ་ཉིང་སྤྲུལ་རྣམས་ལ་གསོལ་ལོཿ འབུལ་ལོཿ མཆོད་དོཿ གསང་སྔགས་ཀྱི་བསྟན་པ་སྲུངས་ཤིགཿ རྣལ་འབྱོར་པའི་མགོན་སྐྱབས་མཛོད་ཅིགཿ བསྟན་འཛིན་གྱི་སྐྱེས་བུ་སྤེལ་ཅིགཿ དགྲ་བྱུང་ན་སྙིང་ཐོན་ཅིགཿ གེགས་བྱུང་ན་མགོ་བོ་ཁོས་ཤིགཿ དུག་བྱུང་ན་བྱ་ཐོང་ཞིགཿ བྱད་བྱུང་ན་རང་གཤེད་དུ་ཕོབ་ཅིགཿ རྐྱེན་ངན་དང་བར་ཆད་སོལཿ བསམ་དོན་གྱི་རེ་བ་གང་ཡིན་པ་སྐད་ཅིག་ཉིད་ལ་གྲུབ་པར་མཛོད་ཅིགཿ ཧོཿ རྟོགས་པས་བདག་བསྒྲལ་ཀུན་ཏུ་བཟང་པོཿ དུག་གསུམ་རུ་ཏྲའི་གཤེད་དུ་ཁྲོས་པ་ལྷ་ཆེན་དཔལ་འབར་མ་ནིང་ནག་པོ་ལ་གསོལ་ལོཿ སྟག་ཞོན་སྐུའི་མགོན་པོ་ལ་གསོལ་ལོཿ བིང་དམར་གསུང་གི་མགོན་པོ་ལ་གསོལ་ལོཿ གྲི་གུག་ཐུགས་ཀྱི་མགོན་པོ་ལ་གསོལ་ལོཿ ལེགས་ལྡན་ཡོན་ཏན་གྱི་མགོན་པོ་ལ་གསོལ་ལོཿ ཏྲག་ཤད་ཕྲིན་ལས་ཀྱི་མགོན་པོ་ལ་གསོལ་ལོཿ འབུལ་ལོཿ མཆོད་དོཿ གསང་སྔགས་ཀྱི་བསྟན་པ་སྲུངས་ཤིགཿ རྣལ་འབྱོར་པའི་མགོན་སྐྱབས་མཛོད་ཅིགཿ བསྟན་འཛིན་གྱི་སྐྱེས་བུ་སྤེལ་ཅིགཿ དགྲ་བྱུང་ན་སྙིང་ཐོན་ཅིགཿ གེགས་བྱུང་ན་མགོ་བོ་ཁོས་ཤིགཿ དུག་བྱུང་ན་བྱ་ཐོང་ཞིགཿ བྱད་བྱུང་ན་རང་གཤེད་དུ་ཕོབ་ཅིགཿ རྐྱེན་ངན་དང་བར་ཆད་སོལཿ བསམ་དོན་གྱི་རེ་བ་གང་ཡིན་པ་སྐད་ཅིག་ཉིད་ལ་འགྲུབ་པར་མཛོད་ཅིགཿ ཧོཿ གཙང་རིས་ལྷ་ཡི་མགོན་པོ་དབང་པོ་དང་ཚངས་པ་ལ་གསོལ་ལོཿ དབང་ཕྱུག་དང་ཁྱབ་འཇུག་ལ་གསོལ་ལོཿ གདོང་དྲུག་དང་འདོད་དབང་ལ་གསོལ་ལོཿ ཚོགས་བདག་དང་བྷྲིཾ་གི་ལ་གསོལ་ལོཿ ཀླུའི་མགོན་པོ་མཐའ་ཡས་དང་འཇོག་པོ་ལ་གསོལ་ལོཿ དུང་སྐྱོང་དང་སྟོབས་རྒྱུ་ལ་གསོལ་ལོཿ པདྨ་དང་པདྨ་ཆེན་པོ་ལ་གསོལ་ལོཿ རིགས་ལྡན་དང་ནོར་རྒྱས་ལ་གསོལ་ལོཿ དྲང་སྲོང་གི་མགོན་པོ་ཉི་མ་དང་ཟླ་བ་ལ་གསོལ་ལོཿ མིག་དམར་དང་ལྷག་པ་ལ་གསོལ་ལོཿ ཕུར་བུ་དང་པ་སངས་ལ་གསོལ་ལོཿ སྤེན་པ་དང་སྒྲ་གཅན་ལ་གསོལ་ལོཿ ཁྱད་པར་དུ་ཡང་ཁྱབ་འཇུག་ཆེན་པོཿ བི་ནུ་རཱ་ཙཿ རཱ་ཧུ་ལཿ བི་ཊི་པ་ཏྲཿ ལྗང་སྔོན་དྲག་པོཿ དུ་བ་མཇུག་རིངཿ བདུད་པོ་རོག་ཏིཿ བི་ན་ཡ་ཀ་ལ་སོགས་ཏེ་ཐོག་སེར་དང་ལྟས་ངན་གྱི་བདག་པོ་སྤྲུལ་པའི་གཟའ་བརྒྱད་གདོང་མོ་བཞི་དང་བཅས་པ་ལ་གསོལ་ལོཿ འབུལ་ལོཿ མཆོད་དོཿ གསང་སྔགས་ཀྱི་བསྟན་པ་སྲུངས་ཤིགཿ རྣལ་འབྱོར་པའི་མགོན་སྐྱབས་མཛོད་ཅིགཿ བསྟན་འཛིན་གྱི་སྐྱེས་བུ་སྤེལ་ཅིགཿ དགྲ་བྱུང་ན་སྙིང་ཐོན་ཅིགཿ གེགས་བྱུང་ན་མགོ་བོ་ཁོས་ཤིགཿ དུག་བྱུང་ན་བྱ་ཐོང་ཞིགཿ བྱད་བྱུང་ན་རང་གཤེད་དུ་ཕོབ་ཅིགཿ རྐྱེན་ངན་དང་བར་ཆད་སོལཿ བསམ་དོན་གྱི་རེ་བ་གང་ཡིན་པ་སྐད་ཅིག་ཉིད་ལ་གྲུབ་པར་མཛོད་ཅིགཿ ཧོཿ རྒྱུ་སྐར་གྱི་མགོན་པོ་སྨིན་དྲུག་དང་སྣར་མ་ལ་གསོལ་ལོཿ མགོ་དང་ལག་པ་ལ་གསོལ་ལོཿ ནབས་སོ་དང་རྒྱལ་ལ་གསོལ་ལོཿ སྐག་དང་རྟ་པ་ལ་གསོལ་ལོཿ བྲེ་དང་དབོ་ལ་གསོལ་ལོཿ མེ་བཞི་དང་ནག་པ་ལ་གསོལ་ལོཿ ས་རི་དང་ས་ག་ལ་གསོལ་ལོཿ ལྷ་མཚམས་དང་སྣྲོན་ལ་གསོལ་ལོཿ སྣྲུབས་དང་ཆུ་སྟོད་ལ་གསོལ་ལོཿ ཆུ་སྨད་དང་གྲོ་བཞིན་ལ་གསོལ་ལོཿ བྱི་བཞིན་དང་མོན་གྲེ་ལ་གསོལ་ལོཿ མོན་གྲུ་དང་ཁྲུམས་སྟོད་ལ་གསོལ་ལོཿ ཁྲུམས་སྨད་དང་ནམ་གྲུ་ལ་གསོལ་ལོཿ ཐ་སྐར་དང་བྲ་ཉེ་ལ་གསོལ་ལོཿ འབུལ་ལོཿ མཆོད་དོཿ གསང་སྔགས་ཀྱི་བསྟན་པ་སྲུངས་ཤིགཿ རྣལ་འབྱོར་པའི་མགོན་སྐྱབས་མཛོད་ཅིགཿ བསྟན་འཛིན་གྱི་སྐྱེས་བུ་སྤེལ་ཅིགཿ དགྲ་བྱུང་ན་སྙིང་ཐོན་ཅིགཿ གེགས་བྱུང་ན་མགོ་བོ་ཁོས་ཤིགཿ དུག་བྱུང་ན་བྱ་ཐོང་ཞིགཿ བྱད་བྱུང་ན་རང་གཤེད་དུ་ཕོབ་ཅིགཿ རྐྱེན་ངན་དང་བར་ཆད་སོལཿ བསམ་དོན་གྱི་རེ་བ་གང་ཡིན་པ་སྐད་ཅིག་ཉིད་ལ་གྲུབ་པར་མཛོད་ཅིགཿ ཧོཿ ཕྱོགས་མཚམས་སྐྱོང་བའི་མགོན་པོ་དབང་པོ་དང་མེ་ལྷ་ལ་གསོལ་ལོཿ གཤིན་རྗེ་དང་སྲིན་པོ་ལ་གསོལ་ལོཿ ཆུ་ལྷ་དང་རླུང་ལྷ་ལ་གསོལ་ལོཿ གནོད་སྦྱིན་དང་དབང་ལྡན་ལ་གསོལ་ལོཿ ཚངས་པ་དང་གཟའ་སྐར་ལ་གསོལ་ལོཿ སའི་ལྷ་མོ་དང་ས་འཛིན་ལག་པ་ཆེན་པོ་ལ་གསོལ་ལོཿ ཁྱད་པར་དུ་ཡང་འཇིག་རྟེན་སྐྱོང་བའི་མགོན་པོ་ཆེན་པོ་ཡུལ་འཁོར་སྲུང་ལ་གསོལ་ལོཿ འཕགས་སྐྱེས་པོ་ལ་གསོལ་ལོཿ མིག་མི་བཟང་ལ་གསོལ་ལོཿ རྣམ་ཐོས་སྲས་ལ་གསོལ་ལོཿ གཞན་ཡང་འཇིགས་བྱེད་ཆེན་པོ་དགུ་ལ་སོགས་ཏེ་དམ་ཚིག་ཤེས་པ་དང་དཀར་ཕྱོགས་སྐྱོང་བའི་ཚོགས་ཐམས་ཅད་ལ་གསོལ་ལོཿ འབུལ་ལོཿ མཆོད་དོཿ གསང་སྔགས་ཀྱི་བསྟན་པ་སྲུངས་ཤིགཿ རྣལ་འབྱོར་པའི་མགོན་སྐྱབས་མཛོད་ཅིགཿ བསྟན་འཛིན་གྱི་སྐྱེས་བུ་སྤེལ་ཅིགཿ དགྲ་བྱུང་ན་སྙིང་ཐོན་ཅིགཿ གེགས་བྱུང་ན་མགོ་བོ་ཁོས་ཤིགཿ དུག་བྱུང་ན་བྱ་ཐོང་ཞིགཿ བྱད་བྱུང་ན་རང་གཤེད་དུ་ཕོབ་ཅིགཿ རྐྱེན་ངན་དང་བར་ཆད་སོལཿ བསམ་དོན་གྱི་རེ་བ་གང་ཡིན་པ་སྐད་ཅིག་ཉིད་ལ་གྲུབ་པར་མཛོད་ཅིགཿ ཧོཿ རྡོ་རྗེ་འཛིན་པའི་བཀའ་ཉན་ཆེན་པོ་སྒྲོལ་གིང་རྡོ་རྗེ་ལེགས་པ་ལ་གསོལ་ལོཿ རྣལ་འབྱོར་ཡོངས་ཀྱི་སྲུང་མ་ཆེན་པོ་ལ་གསོལ་ལོཿ དཔའ་བོ་ཡོངས་ཀྱི་དགྲ་ལྷ་ཆེན་པོ་ལ་གསོལ་ལོཿ ཚོང་པ་ཡོངས་ཀྱི་དེད་དཔོན་ཆེན་པོ་ལ་གསོལ་ལོཿ བརྟེན་ན་སྙིང་ཉེ་བ་ལ་གསོལ་ལོཿ རྦད་ན་མཐུ་ཆེ་བ་ལ་གསོལ་ལོཿ བསྐུལ་ན་ལས་མྱུར་བ་ལ་གསོལ་ལོཿ སྤྲུལ་འཁོར་དང་བཀའ་ཉན་ཕུད་དང་གཏོར་མ་ལ་གདུང་བ་ཐམས་ཅད་ལ་གསོལ་ལོཿ འབུལ་ལོཿ མཆོད་དོཿ གསང་སྔགས་ཀྱི་བསྟན་པ་སྲུངས་ཤིགཿ རྣལ་འབྱོར་པའི་མགོན་སྐྱབས་མཛོད་ཅིགཿ བསྟན་འཛིན་གྱི་སྐྱེས་བུ་སྤེལ་ཅིགཿ དགྲ་བྱུང་ན་སྙིང་ཐོན་ཅིགཿ གེགས་བྱུང་ན་མགོ་བོ་ཁོས་ཤིགཿ དུག་བྱུང་ན་བྱ་ཐོང་ཞིགཿ བྱད་བྱུང་ན་རང་གཤེད་དུ་ཕོབ་ཅིགཿ རྐྱེན་ངན་དང་བར་ཆད་སོལཿ བསམ་དོན་གྱི་རེ་བ་གང་ཡིན་པ་སྐད་ཅིག་ཉིད་ལ་གྲུབ་པར་མཛོད་ཅིགཿ དེ་ལྟར་སྲིད་པ་མ་མོའི་དཀྱིལ་འཁོར་དུ་ཡེ་ཤེས་དང་ལས་ལ་གྲུབ་པའི་སྲུང་མ་ཐུགས་དམ་ཅནཿ གཙང་རིས་ཀྱི་མགོན་པོ་བདུན་ཅུ་རྩ་ལྔ་དང་བཅས་པ་ཁྱེད་རྣམས་སྟོན་པའི་ཞལ་མཐོངཿ བསྟན་པ་དང་དམ་ཚིག་ལ་གུསཿ མཐུ་དང་རྫུ་འཕྲུལ་གྱི་བདག་པོ་སྲིད་ཞིའི་ཁམས་ན་ཆེ་བཙན་འགྲན་ཟླ་དང་བྲལ་བཿ མངའ་འོག་དང་སྡེ་རིས་སུ་མ་འདུས་པ་གང་ཡང་མེད་པསཿ སངས་རྒྱས་ཀྱི་བསྟན་པ་སྲུངསཿ དཀོན་མཆོག་གི་དབུ་འཕང་བསྟོདཿ རྣལ་འབྱོར་པ་བདག་ཅག་ལ་སྡང་བའི་སེམས་དང་ལྡན་པཿ གདུག་པའི་སེམས་དང་ལྡན་པཿ དྲག་ཤུལ་གྱི་སེམས་དང་ལྡན་པཿ སྦྱོར་བ་རྩུབ་མོ་ལ་མོས་པའི་འབྱུང་པོ་མི་དང་མི་མ་ཡིན་པ་དེ་དག་ཐམས་ཅད་ཞི་བའི་ཕྲིན་ལས་ཀྱིས་དུལ་བར་མཛོད་ཅིགཿ རྒྱས་པའི་ཕྲིན་ལས་ཀྱིས་སྤ་བཀོངས་ཤིགཿ དབང་གི་ཕྲིན་ལས་ཀྱིས་སྣང་བ་སྒྱུར་ཅིགཿ དྲག་པོའི་ཕྲིན་ལས་ཀྱིས་ཚར་ཆོད་ཅིགཿ བདག་དང་འཇིག་རྟེན་ཐམས་ཅད་ལ་ལེགས་པའི་ཡོན་ཏན་གོང་ནས་གོང་དུ་འཕེལ་བའི་ཕྲིན་ལས་མཛོད་ཅིགཿ ཅེས་ཕུད་གཏོར་རོལ་མོ་སྒྲོགས་གླུ་གར་གྱི་མཆོད་པས་ཀྱང་མཉེས་པར་བྱའོཿ དེ་ནས་བསྟོད་པ་ནིཿ བྷྱོཿ དཔལ་ལྡན་རང་བྱུང་རྒྱལ་མོ་ནིཿ མ་མོ་ཡོངས་ཀྱི་སྤྲུལ་གཞི་ཡིནཿ ལྷ་ཡི་ཡུལ་ན་མདངས་ལྡན་མཿ མེ་ཏོག་མནྡཱ་ར་ལ་བསྟོདཿ ཁྲག་འཐུང་དབང་ཐོབ་དཔལ་ལྡན་ཟུངསཿ གཤིན་རྗེའི་ཡུལ་ན་རལ་གཅིག་མཿ མེ་བཟའ་བྲག་གྱོན་ཀླུ་ཡི་མཚནཿ ནག་མོ་ཁྲག་འཛག་མ་ལ་བསྟོདཿ མ་ནི་སྙིང་པོ་བྱང་ཆུབ་སེམསཿ མོ་ནི་རང་བྱུང་ཡེ་ཤེས་ཕྱིརཿ གང་ནས་བོས་ཀྱང་ཁྱོད་ཀྱི་མཚནཿ འདོད་ཁམས་བདག་མོ་ཁྱོད་ལ་བསྟོདཿ བདག་ལྟའི་རུ་ཏྲ་བསྒྲལ་བ་ལསཿ བྱང་ཆུབ་སེམས་ཀྱི་མགོན་པོ་བྱུངཿ ཐེག་དགུ་རྫོགས་པའི་དར་ནག་གིཿ འཇོལ་བེར་དགུ་བརྩེགས་མནབས་ལ་བསྟོདཿ གཟུང་འཛིན་རུ་ཏྲ་ཞབས་ཀྱིས་བརྫིསཿ སྙིང་ཕྲེང་མི་མགོའི་དོ་ཤལ་འཕྱངཿ བིང་ཆེན་སྐེད་བཙུགས་དམག་གསུམ་འགྱེདཿ བདུད་དང་སྲིན་པོ་འདུལ་ལ་བསྟོདཿ གིང་ཆེན་རྡོ་རྗེ་ལེགས་པ་སྐྱོངཿ འཛམ་བུ་གླིང་གི་མངའ་བདག་པོཿ རྣམ་འགྱུར་སྤྲུལ་པ་ཅིར་ཡང་སྟོནཿ རྫུ་འཕྲུལ་བདག་པོ་ཁྱོད་ལ་བསྟོདཿ རེས་འགའ་མགར་ནག་ཁྲོས་པའི་གདོངཿ ཐན་དང་ལྟས་ངན་ཡོངས་ཀྱི་བདགཿ རེས་འགའ་གནོད་སྦྱིན་ནོར་ལྷའི་ཚུལཿ དངོས་གྲུབ་བདག་པོ་ཁྱོད་ལ་བསྟོདཿ ཁྱད་པར་གཙུག་ལག་ཁང་སྲུང་ཞིངཿ དམ་ཉམས་སྲོག་ལ་ཧུར་ཐུམ་དངཿ གྲི་རྒོད་འབེབས་པའི་དྲག་ཤུལ་ཅནཿ གསང་བའི་སྒྲོལ་གིང་གཉིས་ལ་བསྟོདཿ མདོར་ན་མ་མགོན་ལྕམ་དྲལ་གྱིཿ བཀའ་དང་འཁོར་ན་གནས་པ་ཡིཿ ལེགས་ཉེས་སྟངས་འཛིན་འཇིག་རྟེན་གྱིཿ བདག་པོ་ཀུན་ལ་རབ་ཏུ་བསྟོདཿ ཕྲིན་ལས་བཅོལ་བ་ནིཿ བྷྱོཿ སུམ་ཅུ་རྩ་གསུམ་ལྷ་ཡུལ་ནསཿ སྐྱེ་རྒྱུད་བདག་པོ་ཡབ་ཡུམ་གཉིསཿ མ་མཇལ་ཡིད་ཀྱིས་སྦྱོར་བ་ལསཿ དཔྲལ་བར་ལྕགས་ཀྱི་རྨེན་པ་ཤརཿ ཡུམ་གྱིས་དམོད་པ་སྟོབས་བཙན་པསཿ ནག་མོ་ཁྲོས་མ་རལ་གཅིག་མཿ བཅུ་བདུན་རྒྱུད་ཀྱི་བཀའ་སྲུང་དུཿ གསང་བའི་བདག་པོས་དབང་ཡང་བསྐུརཿ བདག་མེད་ཀུན་ཏུ་བཟང་མོའི་ཀློངཿ བདག་ལྟའི་རུ་ཏྲ་སངས་རྒྱས་པའིཿ དཔལ་ལྡན་མ་མགོན་ལྕམ་དྲལ་ལཿ དམ་ཚིག་ཕྲིན་ལས་གཉེར་དུ་གཏོདཿ སངས་རྒྱས་བསྟན་པ་ཁྱོད་ཀྱིས་སྲུངསཿ དཀོན་མཆོག་དབུ་འཕང་ཁྱོད་ཀྱིས་བསྟོདཿ བསྟན་འཛིན་སྐྱེས་བུའི་སྐུ་ཚེ་སྲིངསཿ སྙིང་ཏིག་གཉན་པོའི་བྱ་ར་མཛོདཿ འཇིག་རྟེན་ཁམས་སུ་ནད་མཚོན་དངཿ མུ་གེའི་བསྐལ་པ་ངན་པ་ཆོདཿ འགོང་པོ་སྤུན་དགུ་སྡེ་རིས་ཀྱིཿ དཔུང་དང་རྒྱ་འདྲེའི་ལམ་སྲང་སྲུངསཿ རྣལ་འབྱོར་བདག་ཅག་འཁོར་བཅས་ཀྱིཿ ནད་གདོན་བར་གཅོད་ཀུན་སོལ་ལཿ ཚེ་དཔལ་ལོངས་སྤྱོད་དབང་ཐང་ཀུནཿ ཡར་ངོའི་ཟླ་བ་ལྟ་བུར་མཛོདཿ དཀོར་ཁང་འདི་རུ་རྟག་བཞུགས་ལཿ སྐུ་གསུང་ཐུགས་ཀྱི་རྟེན་རྣམས་དངཿ དཀོར་ཆ་ལོངས་སྤྱོད་བཅས་པ་ལཿ བླ་རྡོ་ཆོས་ལ་མེལ་ཚེ་གྱིསཿ སྒྲུབ་པ་མཆོག་ལ་གུས་པ་དངཿ དམ་པ་ཆོས་ཀྱི་བརྒྱུད་འཛིན་ཅིངཿ སེམས་ཅན་ཡོངས་ལ་ཕན་བརྩོན་པའིཿ སློབ་མའི་འདུ་བ་རྒྱས་པར་མཛོདཿ དུས་གསུམ་ཀུན་ན་གདུག་པ་དངཿ སྡང་བའི་སེམས་ལྡན་དགྲ་དང་བགེགསཿ གང་ཡིན་ཁྱེད་ཀྱི་ཟས་སྐལ་དུཿ གཏད་དོ་མངོན་སྤྱོད་ཕྲིན་ལས་མཛོདཿ ཆོས་སྲིད་བསྟན་པའི་ཕྲིན་ལས་རྣམསཿ སྡེ་བཞིའི་དཔལ་གྱིས་མངོན་མཐོ་ཞིངཿ གློ་བུར་ལས་བཅོལ་བ་ལིང་ཀུནཿ བཞེས་ལ་བསམ་དོན་ལྷུན་གྲུབ་མཛོདཿ ཅེས་བརྗོད་ཕུད་གཏོར་གཙང་སར་གཤེགསཿ ལས་དམིགས་བསལ་ཡོད་ན་བསྐུལ་བྱ་བ་ནིཿ དམར་གཏོར་དོན་སྙིང་དང་བསད་ཁྲག་གིས་བརྒྱན་པར་དམིགས་བྱ་དགུག་འདྲེན་དྲག་པོ་བགྱིས་ལཿ མ་མ་ཏྲག་རཀྴ་ཨེ་ཀ་ཙ་ཊི་ཨི་དཾ་བྷ་ལིངྟ་པཱུ་ཙ་ཧོཿ ཁ་རཾ་ཁཱ་ཧིཿ ཨོཾ་མ་ཧཱ་ཀཱ་ལ་ཤཱ་ས་ན་ཏྲི་ལིང་གིང་ཀ་ར་ཨི་དཾ་བྷ་ལིངྟ་པཱུ་ཙ་ཧོཿ ཁ་རཾ་ཁཱ་ཧིཿ ཏྲི་བཛྲ་ས་དྷུ་ས་མ་ཡ་ཨི་དཾ་བྷ་ལིངྟ་པཱུ་ཙ་ཧོཿ ཁ་རཾ་ཁཱ་ཧིཿ ཞེས་འཁོར་རྣམས་སྡེ་བརྒྱད་དུ་བསྡུས་ཏེཿ ཨ་ཡ་མ་དུ་རུ་ཙ་ཤ་ན་ཀིངྐ་ར་ས་མ་ཡ་བྷ་ལིངྟ་བྷུཉྩ་ཧོཿ ཞེས་ཟས་སྐལ་དུ་བསྔོཿ བྷྱོཿ ཀཱི་ལ་ཡ་ཡི་ཡུམ་གཅིག་ཁྲོས་མ་ནགཿ ཁུ་འཕང་ཐོག་སེར་བདག་པོ་མགར་བ་ནགཿ གེ་སར་དམག་གི་དགྲ་ལྷ་སྲོག་བདུད་ནགཿ ངོ་ནག་ཁྲོས་པའི་ལས་ལ་ད་བཞེངས་ཤིགཿ ཅི་ནས་དཀོན་མཆོག་དབུ་འཕང་སྨད་པའི་དགྲཿ ཆུ་འཁྱགས་སེར་བས་ལོ་ཏོག་བཅོམ་པ་བཞིནཿ ཇེ་ཞིག་མ་ཡིན་སྐད་ཅིག་ཡུད་ཙམ་ལཿ ཉོ་ཚང་བགྱིས་པའི་ཟས་བཞིན་རྡུལ་དུ་རློགསཿ ཏི་ལ་མཁའ་འགྲོའི་སྙིང་ཏིག་གཤེ་བྱེད་ཅིངཿ ཐུ་མ་རལ་གྱི་བརླང་སྤྱོད་རྩུབ་མོ་ཡིསཿ དེ་ལ་དེར་བསྙད་དོ་བརྡོ་ཕོད་འཛུགས་པའིཿ ནོ་བི་ཀ་ཡི་དགྲ་འདི་མྱུར་དུ་སྒྲོལཿ པ་ཝང་ལྟ་བུར་སྙན་པའི་ཚེས་ཀྱི་སྒྲསཿ ཕུ་མདལ་ཉེ་འཁོན་མེད་པར་བསྐྱངས་བྱས་ཀྱངཿ བེའུ་ཞོ་ཡིས་ངོམས་ལྟར་ཁྲེལ་སྤངས་པཿ མོ་རྒྱུད་སྔགས་ཀྱི་བདག་མོས་རྔམ་ཟས་གྱིསཿ ཙིཏྟ་སྙིང་གི་ཟུངས་ཁྲག་མཁའ་འགྲོའི་ཆོསཿ ཚུ་རོལ་འདུད་པའི་ཟོལ་གྱིས་བླངས་པའི་མཐརཿ ཛ་ལང་སྤྱོད་པས་དམ་ཚིག་ཁྱད་གསོད་པའིཿ ཝ་སྐྱེས་ལྟ་བུའི་དམ་ལོག་ད་ལྟ་སྒྲོལཿ ཞི་བ་བྱང་སེམས་སྒོམ་པའི་ཐུགས་རྒྱུད་བྱིངསཿ ཟེ་ཀ་བྱ་ཡིས་འབོར་བ་ལྟར་དཀྲུགས་ནསཿ འུ་ཅག་བདེན་པར་སྨྲ་བའི་གཡོ་སྒྱུ་ཅནཿ ཡོ་ལངས་ཐན་ལྟས་འཁྲུགས་པས་སྤ་བཀོངས་ཤིགཿ རི་རྒྱལ་ལྷུན་པོ་ལྟ་བུར་སྒྲུབ་ཚུགས་བཟུངཿ ལུ་མའི་ཆུ་རྒྱུན་བཞིན་ཏུ་བྱང་སེམས་བསྐྱེདཿ ཤི་བ་སྲོག་ལ་བབ་ཀྱང་ཁྱོད་བསྟེན་ནཿ ས་གཞི་ལྟ་བུར་གཡོ་འགུལ་མི་མཛད་དམཿ ཧ་ཅང་དམ་ཚིག་རལ་བའི་དགྲ་བོ་འདིཿ ཨ་ལ་ཧ་ལའི་གད་རྒྱངས་སྒྲོགས་བཞིན་དུཿ ལོ་ཟླ་ཞག་ཏུ་མ་འགྱངས་མི་བསྒྲལ་ནཿ ཁྱོད་ལ་མཐུ་སྟོབས་ཡོད་པ་རྫུན་དུ་ཟདཿ གྲུ་གསུམ་མཐིང་ནག་འབར་བའི་ཀློང་དཀྱིལ་ནསཿ འདོད་པ་ཁམས་ཀྱི་དབང་ཕྱུག་རྨོངས་བྱེད་མཿ ཨེ་ཀ་ཛ་ཊི་ནག་མོ་ཁྲོས་མའི་གདོངཿ དབུ་དགུ་ཟངས་ཁ་ལྕགས་ཀྱི་མཆུ་སྡེར་ཅནཿ མིག་ནས་ཁྲག་རིམས་སྣ་ནས་མཛེ་ནད་གཏོངཿ སྐུ་ལས་འབྲུམ་ནད་ཁོང་ནས་ཤ་ཡ་འབརཿ ལྕགས་ཀྱུ་རྩེ་དགུས་དགྲ་བོའི་སྙིང་ཕྱུང་ལཿ ལྕགས་སྤྱང་མང་པོ་དམ་ཉམས་ཤ་ལ་ཁྱེཿ སྲོག་བདག་བདུད་ཀྱི་མགོན་པོ་བྱ་རོག་གདོངཿ རྟ་ནག་སྟེང་ན་སྟག་རལ་གཟིག་ཤུབས་འཕྱངཿ ལྕགས་མདའ་ནག་པོ་དགྲ་བོའི་སྙིང་ལ་གཟིརཿ དམག་དཔོན་སྡེ་ལྔ་དམ་ཉམས་དགྲ་ལ་འཕྱོཿ ས་འོག་ས་སྟེང་ས་བླའི་འཇིག་རྟེན་ཀུནཿ དཔལ་མགོན་བདུན་ཅུ་སྤྲུལ་པའི་དམག་གིས་ཁོངསཿ སྟག་གཟིག་དོམ་དྲེད་མང་པོ་ང་ར་རཿ གཡག་ནག་ཁྱི་ནག་མང་པོ་འདུ་རུ་རུཿ འདབ་ཆགས་ཁྲ་ཐབས་མང་པོ་ཞ་ལ་ལཿ སྒྲོལ་གིང་མགར་བ་ནག་པོ་དགྲ་ལ་བྷྱོཿ གཡས་པའི་ཐོ་བས་དགྲ་བོའི་ཀླད་ནས་རྡུངསཿ གཡོན་པའི་སྦུད་པས་ཡུལ་ཁམས་རླུང་ལ་སྐུརཿ ལྕགས་སྤྱང་མགོ་དགུས་སྟེང་ནས་ལྟས་ངན་ཐོངསཿ སུམ་བརྒྱ་དྲུག་ཅུའི་དམག་སྣ་དགྲ་ཡུལ་དྲོངསཿ ཐེ་བྲང་མོན་པ་སྟོང་སྡེ་ལས་ལ་ཆོསཿ ཐོག་སེར་དྲག་པོ་དགྲ་བོའི་ཡུལ་དུ་ཐོངསཿ འདབ་ཆགས་ཤ་ཟན་མང་པོ་བླ་ལ་ཁྱེཿ སྤྱང་ནག་འོ་དོད་འབོད་པས་ལྷ་ལྔ་དཀྲོགསཿ ལྷ་སྲིན་སྡེ་བརྒྱད་དམག་ཚོགས་དགྲ་ལ་དྲོངསཿ དོ་ནུབ་ནམ་གྱི་ཕར་ཕྱེད་ཚུར་ཕྱེད་ལཿ བསད་རྟགས་དོན་སྙིང་དམར་པོ་ཁྱེར་ལ་ཤོགཿ བསོད་ནམས་རླུང་རྟའི་དཔལ་ལ་སྙད་མ་འདོགསཿ ཚེ་དང་ལས་ཀྱི་མཐུ་ལ་སྐྱབས་མ་བཅོལཿ མངོན་སྤྱོད་དྲག་པོའི་ཕྲིན་ལས་དུས་ལ་བབཿ ཏྲག་རཀྴ་མུན་ཏྲ་ཨེ་ཀ་ཙ་ཏི་སྙིང་ཁ་རག་སྲོག་རྩ་ལ་རྦདཿ ཙིཏྟ་ལོང་རཀྴ་ཐུན་བྷྱོཿ ཞེས་གཏོར་མ་དགྲ་ཕྱོགས་སུ་འཕངས་ཤིང་བསྲུང་འཁོར་བསྒོམཿ འདི་ནི་ཤིན་ཏུ་གཉན་པས་གར་ཐོད་ཐོད་དུ་མི་བྱ་ཞིང་འབོད་རྦད་བསད་པའི་ལས་དངོས་བསྟན་ལ་སྦྱོར་ན་གནད་ཡིག་ལ་བརྟེན་པ་གཅེས་སོཿ འདི་ནི་ནང་གི་བཀའ་སྲུང་སྟེཿ སྔོན་ཆད་རྒྱུད་དུ་གནས་པ་ལསཿ གབ་པ་མངོན་དུ་ཕྱུང་བ་མེདཿ གནད་ཡིག་གཅིག་དང་བཀའ་སྲུང་རྒྱུདཿ མ་བུ་ཟུང་དུ་འབྲེལ་བ་ནཿ སྲིད་པ་དཀྲུགས་པ་པདྨས་ཤེསཿ དེ་ཕྱིར་ལྕགས་སྡེ་སོ་སོར་རྒྱཿ སྙིང་ཐིག་འདྲ་མིན་སྤྱོད་པའི་ཚེཿ རང་བྱུང་སྤྲུལ་པའི་རྡོ་རྗེ་དང་ཿ འཕྲད་ནས་བསྟན་པ་བསྲུང་བར་ཤོགཿ དགེའོཿ