དཔལ་ཆེན་བཀའ་འདུས་རྒྱ་མཚོ་ལསཿ ཕུར་པ་བདུད་དཔུང་ཟིལ་གནོན་བཞུགསཿ

Previous Text Back to Volume Page Next Text

Wylie title	dpal chen bka' 'dus rgya mtsho las: phur pa bdud dpung zil gnon:
Location	'jigs gling bka' 'bum Volume 10, Text 56, Pages 663-679 (Folios 1a1 to 9a5)
Author	འཇིགས་མེད་གླིང་པ་
Less details More details
Tertön	འཇིགས་མེད་གླིང་པ་ ('jigs med gling pa)
Citation	'jigs med gling pa. Dpal chen bka' 'dus rgya mtsho las phur pa bdud dpung zil gnon. In Kun mkhyen rig 'dzin 'jigs med gling pa'i gsung 'bum, Vol. 10: 663-679. New Delhi: Shechen Publications, 2025.
Genre	Activity Manual - las byang
Cycle	རིག་འཛིན་ཐུགས་སྒྲུབ་དཔལ་ཆེན་འདུས་པ་ (rig 'dzin thugs sgrub dpal chen 'dus pa)
Parent Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)
Deity	rdo rje phur pa

[edit]

འུྃཿ དཔལ་ཆེན་བཀའ་འདུས་རྒྱ་མཚོ་ལསཿ ཕུར་པ་བདུད་དཔུང་ཟིལ་གནོན་བཞུགསཿ ཿ

༄༅། །ཕྲིན་ལས་ཕུར་པའི་ལྷ་ལ་འདུདཿ ཡིད་དང་ཆོས་ཀྱི་རྟོག་ཚོགས་ཀུནཿ བྱ་བ་ནན་ཏན་ཡེ་ཤེས་དབྱིངསཿ སྦྱོང་བྱེད་བཛྲ་ཀུ་མཱ་རཿ རྡོ་རྗེ་ཁྲོས་པའི་སྒོས་སྒྲུབ་བསྟནཿ ས་མ་ཡཿ དཀྱིལ་འཁོར་ཡོངས་རྫོགས་བདག་ཉིད་ཅནཿ བསྙེན་ཕུར་དམ་ཚིག་ཆེན་པོའི་རྟེནཿ བསྒྲུབ་དུས་དཀྱིལ་འཁོར་གཞུང་བཞིན་ལཿ ལྷ་གྲངས་མཉམ་པའི་ཕུར་པས་བརྒྱནཿ རྒྱན་བཀོད་མཆོད་གཏོར་བཟང་དུ་བཤམཿ སྔོན་འགྲོ་དཔལ་ཆེན་གཞུང་ལྟར་ལཿ ཏིང་འཛིན་གསུམ་ལ་ཁྱད་ཆོས་ལྡནཿ རྡོ་རྗེ་དེ་བཞིན་ཉིད་ཀྱི་དབྱིངསཿ སྙིང་རྗེའི་འགལ་ཟླ་ལ་ཁྲོས་པསཿ ཀུན་སྣང་བྱང་ཆུབ་སེམས་སུ་ཤརཿ མཚོན་ཆེན་ཐུགས་ཀྱི་རྡོ་རྗེ་ནིཿ ཡིག་འབྲུས་མཚན་པ་རྒྱུ་ཡིན་ནོཿ ཧཱུྃཿ རྡོ་རྗེ་ཁྲོས་པས་ཞེ་སྡང་གཅོདཿ ཐུགས་ནི་ཡང་དག་རྡོ་རྗེ་ཉིདཿ སྟོང་པ་ཉིད་ཀྱི་ཡེ་ཤེས་ཏེཿ རྣམ་པར་མི་རྟོག་རྟོག་ལས་འདསཿ སྙིང་རྗེས་བསྒྲལ་བའི་དམ་ཚིག་ནིཿ གསད་ཅིང་གནན་པ་མ་ཡིན་ཏེཿ ཕུང་པོ་རྡོ་རྗེས་གཏམས་བྱས་ནསཿ རྣམ་པར་ཤེས་པ་རྡོ་རྗེར་སྒོམཿ མཚོན་ཆེན་སྔོན་པོ་འབར་བ་ནིཿ ནམ་མཁའི་དཀྱིལ་ནས་ཐིགས་པ་ཤརཿ སྲོག་གི་གོ་རུ་ཤར་བ་དངཿ སྙིང་གི་གོ་རུ་བསྒོམ་པར་བྱཿ རྒྱུ་ལས་འབྱུང་བའི་ས་བོན་ཆདཿ ཨེ་ཡཾ་ར་སུཾ་ཀེཾ་རཾ་བྷྲཱུྃཿ ཨེ་ལས་ནམ་མཁའ་ཡཾ་ལས་གཡོ་བྱེད་རླུངཿ ར་ལས་རཀྟ་སུཾ་ལས་ཞིང་ཆེན་གཞིཿ སོགས་གཞུང་ལྟར་ལཿ འོག་མིན་གསང་ཆེན་རོལ་པའི་ཕོ་བྲང་ཆེཿ རབ་འཇིགས་གནམ་ལྕགས་ཙཀྲ་རྩིབས་བཅུའི་དབུསཿ བདེ་ཆེན་ཀུན་ཏུ་བཟང་མོའི་ཨེ་ཀློང་དབྱིངསཿ རྣམ་ཐར་གསུམ་ལྡན་རྡོ་རྗེ་བཙུན་མོ་མཁརཿ མ་ཆགས་པདྨ་ཐབས་ཤེས་ཉི་ཟླའི་སྟེངཿ རུ་ཏྲ་ཕོ་མོ་བདུད་བཞི་བྱི་ཆིངས་བསྣོལཿ པཾ་པདྨ་མཎྜ་ལཿ མ་སཱུརྱ་མཎྜ་ལཿ ཨ་ཙནྡྲ་མཎྜ་ལཿ ཛཿཧཱུྃ་བཾ་ཧོཿཏི་ར་བཾཿ ཨོཾ་བཛྲ་ས་ཏྭ་ཧཱུྃཿ རྡོ་རྗེ་ཧཱུྃ་ཡིག་ཡོངས་གྱུར་ལསཿ རྡོ་རྗེ་སེམས་དཔའ་ཡབ་ཡུམ་ནིཿ མཚན་དང་དཔེ་བྱད་ཡང་དག་རྫོགསཿ ཀུནྡ་ལྟ་བུར་དཀར་བའི་མདོགཿ རིགས་ལྔ་ཁྲག་འཐུང་ཡབ་ཡུམ་བཅུཿ འདུས་པ་རྡོ་རྗེ་གཞོན་ནུའི་སྐུཿ ཨོཾ་བཛྲ་ཀཱི་ལི་ཀཱི་ལ་ཡ་དིཔྟ་ཙཀྲ་ཧ་ན་ཧ་ན་རུ་ལུ་རུ་ལུ་ཧཱུྃ་བྷྱོ་ཧཱུྃཿ ཞེ་སྡང་ཁྲག་འཐུང་རྒྱལ་པོ་དངཿ བདེ་བར་སྦྱོར་དང་སྒྲོལ་བའི་ཡུམཿ ཁྲོ་ཞིང་རྔམ་པའི་ཚུལ་བསྐྱེད་པསཿ གདུག་པ་མ་ལུས་སྒྲོལ་བར་བྱེདཿ ཨ་དང་ཧཱུྃ་གིས་རང་བཞིན་སྦྱརཿ ཡུམ་གྱིས་ཡབ་ཀྱི་ལྕེ་གཞིབས་ནསཿ ཡུམ་གྱིས་ཐུགས་ཀར་ཨུཏྤལ་གཏདཿ ཞུ་བ་གླུས་བསྐུལ་གདུང་བའི་སྒྲསཿ ཧཱུྃ་རྡོ་རྗེ་གཞོན་ནུའི་རིག་འཛིན་རྣམསཿ སྲིད་པ་རྡོ་རྗེར་བསྒྲུབ་མཛོད་ཅིགཿ སྲིད་པ་རྡོ་རྗེ་ཕུར་པའི་ལྷཿ ཡེ་ཤེས་ཁྲོ་བོ་གྲུབ་པར་མཛོདཿ སྤ་ར་ཎ་ཕཊ་བརྗོད་པསཿ རྒྱལ་བ་མཆོད་ཅིང་གཞན་དོན་བྱསཿ སཾ་ཧ་ར་ཎ་ཧཱུྃ་བརྗོད་པསཿ ཕྱོགས་བཅུའི་དེ་བཞིན་གཤེགས་པ་རྣམསཿ ཡབ་ཡུམ་སྦྱོར་བའི་མཁའ་རུ་ཞུགསཿ དགྱེས་ཆགས་ངང་ལ་འོད་དུ་ཞུཿ གོང་བུའི་བདག་ཉིད་ཧཱུྃ་དུ་གྱུརཿ ཡོངས་གྱུར་འབྲས་བུའི་ཧེ་རུ་ཀཿ དཔལ་ཆེན་རྡོ་རྗེ་གཞོན་ནུ་ནིཿ སྙིང་རྗེ་རྔམ་ཞིའི་ངང་ཉིད་ལསཿ སྒེག་དཔའ་འཇིགས་སུ་རུང་བའི་སྐུཿ རྫུ་འཕྲུལ་ཞབས་བཞི་དོར་སྟབས་བགྲདཿ རྣམ་པར་ཐར་པའི་དབུ་གསུམ་གྱིསཿ སྐྲག་མཛད་བཞད་གཤེ་ཁྲོ་བོའི་ཞལཿ གཡས་དཀར་གཡོན་དམར་དབུས་མཐིང་ནགཿ སྤྱན་དམར་སྨིན་མ་སྨ་ར་སེརཿ ཁྲོ་གཉེར་ཆུ་ཡི་རླབས་བཞིན་འཁྲུགསཿ ཕྱག་དྲུག་གཡས་ཀྱི་དང་པོ་ཡིསཿ གསེར་གྱི་རྡོ་རྗེ་རྩེ་དགུ་དངཿ བར་པ་རྡོ་རྗེ་རྩེ་ལྔ་བསྣམསཿ གཡོན་གྱི་དང་པོ་མེ་དཔུང་དངཿ བར་མ་ཁ་ཊྭཱཾ་རྩེ་གསུམ་འཛིནཿ མཐའ་གཉིས་རི་རབ་ཕུར་པ་འདྲིལཿ མཐིང་ནག་སྐུ་ལ་དུར་ཁྲོད་ཆསཿ རིགས་ལྔ་ཐོད་པ་ལྔ་ཡིས་བརྒྱནཿ འཁོར་ལོ་རྒྱས་འདེབས་བདེ་བའི་ཡུམཿ ཞལ་གཅིག་ཕྱག་གཉིས་ཐོད་སྦྲུལ་བརྒྱནཿ དྲིལ་བུ་ཐོད་ཁྲག་འཛིན་པས་འཁྱུདཿ ཨེ་ཀ་ཙ་ཏི་སྒྲོལ་བའི་ཡུམཿ གྲི་གུག་ཐོད་ཁྲག་ཁམས་གསུམ་སྒྲོལཿ རེས་འགའ་ཁ་ཊྭཱཾ་རྩེ་གསུམ་བསྣམསཿ གཡེར་ཀ་དྲིལ་བུ་ཉིད་ལས་ཀྱངཿ རྟོག་མེད་ཆོས་ཀྱི་སྒྲ་འབྱིན་ཅིངཿ མ་མོ་དྲུག་ཅུ་ཕོ་ཉར་འགྱེདཿ ཧཱུྃ་ལས་རྡོ་རྗེར་ཟླ་དཀྱིལ་ཨོཾཿ པཾ་ལས་པད་འདབ་ཉི་མར་མཱུཾཿ ས་མ་ཡ་ཧོཿ ས་མ་ཡ་སྟྭཾཿ རཱ་ག་ཡཱ་ཧོཿ རཱ་ག་ཡཱ་མིཿ བརྡ་དང་བརྡ་ལན་གྱིས་བསྐུལ་ནསཿ ཛཿཧཱུྃ་བཾ་ཧོའི་ཕྱག་རྒྱ་བཞིསཿ སྟོང་པ་ཤིན་ཏུ་ཡོད་མེད་ལསཿ ཆགས་པ་ལྕགས་ཀྱུ་རོལ་པ་ཞགསཿ ཙུམྦ་སྒྲོག་ལ་སྒྲ་གྲགས་དྲིལཿ གཉིས་མེད་བྱང་ཆུབ་སེམས་ཀྱི་སྤྲིནཿ དང་པོར་བབས་པ་ཡུམ་གྱི་མཁའཿ གཞལ་མེད་ཁང་བྱུང་གཉིས་པ་གདནཿ གསུམ་པ་ས་བོན་ཉིད་དུ་རྫོགསཿ ཧཱུྃཿ སངས་རྒྱས་ཀུན་གྱི་ཡེ་ཤེས་སྐུཿ ངང་ཉིད་རྡོ་རྗེ་ཆོས་དབྱིངས་ལསཿ འབར་བའི་ཁྲོ་བོ་མི་བཟད་པའིཿ སྐུ་ཡི་དབྱིག་ཏུ་སྲས་སྐྱེད་ཅིགཿ ཨོཾ་བུདྡྷ་བཛྲ་རཏྣ་པདྨ་ཀརྨཱ་ཀཱི་ལ་ཡ་སརྦ་བིག་ནན་བཾ་ཧཱུྃ་ཕཊཿ སྲས་མཆོག་ཀཱི་ལ་རིགས་ལྔ་ནིཿ སྟོང་ཉིད་དབྱིངས་ལས་ལོངས་སྐུར་ཤརཿ སྤྲུལ་པ་རྫས་ཀྱི་དཀྱིལ་འཁོར་དུཿ ཡུམ་གྱིས་བྷ་གར་ལྷུན་གྱིས་གྲུབཿ བཛྲ་ས་མཱ་ཛཿས་དྲངས་ནསཿ རིགས་ལྔ་སྟང་དཔྱལ་བཅུའི་རང་བཞིནཿ ཐབས་ཀྱི་ཐལ་མོའི་བར་དུ་བྱོནཿ བདེ་བའི་རླབས་ཀྱིས་དབང་རྣམས་རྫོགསཿ དབང་རྟགས་རིགས་ལྔས་དབུ་ལ་བརྒྱནཿ སྟོད་ནི་གཙོ་བོ་ཡབ་འདྲ་ལཿ སྨད་ནི་ཆུ་སྲིན་ཕུར་བུ་དབལཿ ལྕགས་བསྲེགས་འབར་བ་མེ་སྟག་འཕྲོཿ རྒྱ་མདུད་ནང་ནས་སྔགས་སྒྲ་སྒྲོགསཿ ཆུ་སྲིན་ཁ་ནས་མེ་ལྕེ་དངཿ སྡིག་སྦྲུལ་སྦལ་ལྕོང་ཆོ་འཕྲུལ་འགྱེདཿ སྟོང་གསུམ་གདུག་པའི་ཀླུ་རྣམས་འདུལཿ ཐུགས་ཀར་དཀྱིལ་འཁོར་ཡོངས་རྫོགས་དངཿ དབུ་ལ་རིགས་ལྔའི་ཁྲག་འཐུང་རྫོགསཿ དགྲ་སྟ་གཡས་ལ་རང་རྟགས་གཡོནཿ བར་པ་ཁ་ཊྭཱཾ་གཏུན་ཤིང་དངཿ ཐ་མ་རི་རབ་ཕུར་བུ་འདྲིལཿ རྒྱུད་ལྔ་ཡེ་ཤེས་ལྔ་རུ་སྒྲོལཿ དུག་ལྔ་རྩད་ནས་གཅོད་པར་བྱེདཿ སངས་རྒྱས་འདུས་པ་ཐམས་ཅད་ཀྱིཿ སྐུ་གསུང་ཐུགས་སུ་བྱིན་གྱིས་རློབསཿ ཨོཾ་བུདྡྷ་ཀཱི་ལི་ཀཱི་ལ་ཡ་ཀཱ་ཡ་བཛྲ་ནནཿ ཛྭ་ལ་ཛ་ལ་པྲ་་་་་ཛྲ་ལཿ སྥུ་ཊ་སྥུ་ཊ་སརྦ་ན་ས་པ་ན་ཡེ་ཧཱུྃ་ཕཊཿ ཨོཾ་པདྨ་ཀཱི་ལི་ཀཱི་ལ་ཡ་ཝཀྐ་བཛྲ་ནནཿ སརྦ་དུཥྚཾ་ཧྲི་ཤྭ་དྷ་ཡ་ཧཱུྃ་ཕཊཿ ཨོཾ་བཛྲ་ཀཱི་ལི་ཀཱི་ལ་ཡ་ཙིཏྟ་བཛྲ་ནནཿ ཚིནྡྷ་ཚིནྡྷ་ཧཱུྃ་ཕཊཿ ཅེས་བྱིན་གྱིས་བརླབས་ནས་བྱུག་བདུག་བྲབ་གསུམ་གྱིས་གཟི་བྱིན་བསྐྱེད་པ་ནིཿ ཨོཾ་བཛྲ་ཀཱི་ལི་ཀཱི་ལ་ཡ་མ་ཧཱ་རཀྟ་ཛྭ་ལ་ནི་ཧཱུྃ་ཕཊཿ ལུས་ཀྱི་བཀྲག་དང་ལྡན་པ་དངཿ བ་སྤུའི་བུ་ག་རྡོ་རྗེས་གཏམསཿ མ་གུ་ཏ་ལ་པྲ་ཏ་ལ་ཧཱུྃ་ཕཊཿ བུདྡྷ་ཐམས་ཅད་འདུས་པའི་སྐུརཿ ཁྲོ་བོ་དུ་མས་བྱིན་གྱིས་རློབསཿ བི་ཏ་ལཱི་མཎྜ་ལ་རཀྵ་རཀྵ་ཧཱུྃ་ཕཊཿ ལུས་ཀྱི་བ་སྤུའི་བུ་ག་ཀུནཿ ཁྲོ་ཆུང་ཉིད་ཀྱིས་རབ་ཏུ་གཏམསཿ ཁམས་གསུམ་གདུག་པ་བསྒྲལ་བའི་ཕྱིརཿ གདུལ་བྱའི་གདན་ལ་བཞུགས་སུ་གསོལཿ ས་མ་ཡ་ཏིཥྛཿ ཞེས་ཕུར་པ་རྫས་ཀྱི་དཀྱིལ་འཁོར་དང་དབྱེར་མེད་དུ་བསམ་མོཿ དེ་ནས་ཕྱོགས་བཅུ་ཁྲོ་བོའི་དཀྱིལ་འཁོར་བསྐྱེད་པ་ནིཿ གཙོ་བོ་ཡབ་ཡུམ་ཐུགས་ཀ་ནསཿ ལྕགས་ཀྱུ་ལྟ་བུའི་འོད་ཟེར་གྱིསཿ ཕྱོགས་སྐྱོང་བཀུག་ནས་སྟན་དུ་བཏིངཿ སྦྱོར་བའི་ལམ་ནས་སྒོ་ང་བཅུཿ ཕྱུངས་ཧེ་སྔགས་ཀྱི་སྒྲ་གདངས་ལསཿ ཁྲོ་བཅུ་ཁྲ་ཐབས་སོ་སོར་གྱུརཿ ཨོཾ་བཛྲ་ཀྲོ་ཏ་ཧཱུྃ་ཀཱ་ར་ཧཱུྃཿ གརྫ་ཧཱུྃ་ཕཊཿ གརྫ་ཧཱུྃ་ཕཊཿ སྟེང་ཕྱོགས་ཉི་ཟླའི་གདན་སྟེང་དུཿ ཁྲོ་བོ་རྡོ་རྗེ་ཧཱུྃ་མཛད་ནིཿ ཞལ་གཅིག་ཕྱག་གཉིས་མདའ་གཞུ་འགེངསཿ ཡུམ་ཆེན་རྡོ་རྗེ་སྒྲ་འབྱིན་མཿ སྤྲུལ་པ་ཕག་དང་རྨིག་པུའི་མགོཿ ཨོཾ་བཛྲ་ཀྲོ་ཏ་བཱི་ཛ་ཡ་ཧཱུྃཿ ཧ་ན་ཧཱུྃ་ཕཊཿ ཧ་ན་ཧཱུྃ་ཕཊཿ ཤར་ཕྱོགས་དྲི་ཟའི་གདན་སྟེང་དུཿ ཁྲོ་བོ་རྡོ་རྗེ་རྣམ་པར་རྒྱལཿ ཕྱག་ན་རྩེ་གསུམ་འཁོར་ལོ་བསྣམསཿ ཡུམ་ཆེན་རྡོ་རྗེ་སྙེམས་མ་དངཿ སྤྲུལ་པ་སྟག་དང་བྱ་རྒོད་མགོཿ ཨོཾ་བཛྲ་ཀྲོ་ཏ་ནཱི་ལ་དཎྜ་ཧཱུྃཿ ད་ཧ་ཧཱུྃ་ཕཊཿ ད་ཧ་ཧཱུྃ་ཕཊཿ ཤར་ལྷོ་མེ་ལྷའི་གདན་སྟེང་དུཿ ནི་ལ་དནྜ་དབྱུག་པ་སྔོཿ ཡུམ་ཆེན་རྡོ་རྗེ་སྡེར་མོ་དངཿ སྤྲུལ་པ་གཡག་དང་བྱ་རོག་མགོཿ ཨོཾ་བཛྲ་ཀྲོ་ཏ་ཡ་མཱནྟ་ཀ་ཧཱུྃཿ པ་ཙ་ཧཱུྃ་ཕཊཿ པ་ཙ་ཧཱུྃ་ཕཊཿ ལྷོ་ཕྱོགས་གཤིན་རྗེའི་གདན་སྟེང་དུཿ ཁྲོ་བོ་རྡོ་རྗེ་གཤིན་རྗེའི་གཤེདཿ ཕྱག་ན་ཐོད་དབྱུག་དགྲ་སྟ་བསྣམསཿ ཡུམ་ཆེན་དུར་ཁྲོད་བདག་མོ་དངཿ སྤྲུལ་པ་ཤ་བ་འུག་པའི་མགོཿ ཨོཾ་བཛྲ་ཀྲོ་ཏ་ཨཱརྱ་ཨ་ཙ་ལ་ཧཱུྃཿ བྷནྡྷ་ཧཱུྃ་ཕཊཿ བྷནྡྷ་ཧཱུྃ་ཕཊཿ ལྷོ་ནུབ་སྲིན་པོའི་གདན་སྟེང་དུཿ ཁྲོ་བོ་མི་གཡོ་མགོན་པོ་ནིཿ ཕྱག་ན་རལ་གྲི་ཞགས་པ་བསྣམསཿ ཡུམ་ཆེན་རྡོ་རྗེ་གཏུན་ཁུང་མཿ སྤྲུལ་པ་གཟིག་དང་ཁྭ་ཏའི་མགོཿ ཨོཾ་བཛྲ་ཀྲོ་ཏ་ཧྱ་གྷྲི་ཝ་ཧྲཱིཿ ཧུ་ལུ་ཧཱུྃ་ཕཊཿ ཧུ་ལུ་ཧཱུྃ་ཕཊཿ ནུབ་ཕྱོགས་ཀླུ་དབང་གདན་སྟེང་དུཿ ཁྲོ་བོ་ཆེན་པོ་རྟ་མགྲིན་རྒྱལཿ ཕྱག་ན་ཞགས་པ་སྤུ་གྲི་བསྣམསཿ ཡུམ་ཆེན་རྡོ་རྗེ་གཏུམ་མོ་དངཿ སྤྲུལ་པ་བྱི་ལ་པུ་ཤུད་མགོཿ ཨོཾ་བཛྲ་ཀྲོ་ཏ་ཨ་པ་ར་ཙིཏྟ་ཧཱུྃཿ ཏིཥྛ་ཧཱུྃ་ཕཊཿ ཏིཥྛ་ཧཱུྃ་ཕཊཿ ནུབ་བྱང་རླུང་ལྷའི་གདན་སྟེང་དུཿ ཁྲོ་བོ་ཆེན་པོ་གཞན་ལས་རྒྱལཿ ཕྱག་ན་མདའ་དང་རྔ་ཡབ་བསྣམསཿ ཡུམ་ཆེན་རྡོ་རྗེ་མདའ་སྙེམས་མཿ སྤྲུལ་པ་སྤྱང་ཀི་ཁྲ་ཡི་མགོཿ ཨོཾ་བཛྲ་ཀྲོ་ཏ་ཨ་མྲྀ་ཏ་ཀུནྜ་ལཱི་ཧཱུྃཿ ཚིནྡྷ་ཧཱུྃ་ཕཊཿ ཚིནྡྷ་ཧཱུྃ་ཕཊཿ བྱང་ཕྱོགས་གནོད་སྦྱིན་གདན་སྟེང་དུཿ ཁྲོ་བོ་རྡོ་རྗེ་བདུད་རྩི་འཁྱིལཿ ཕྱག་ན་དབྱུག་ཏོ་རྒྱ་གྲམ་བསྣམསཿ ཡུམ་ཆེན་རྡོ་རྗེ་རླུང་འབྱིན་དངཿ སྤྲུལ་པ་སེང་གེ་ཕ་ལྤང་མགོཿ ཨོཾ་བཛྲ་ཀྲོ་ཏ་ཏྲཻ་ལོ་ཀྱ་བི་ཛ་ཡ་ཧཱུྃཿ བིནྡྷ་ཧཱུྃ་ཕཊཿ བིནྡྷ་ཧཱུྃ་ཕཊཿ བྱང་ཤར་འབྱུང་པོའི་གདན་སྟེང་དུཿ ཁྲོ་བོ་རྡོ་རྗེ་ཁམས་གསུམ་རྒྱལཿ ཕྱག་ན་ལྕགས་ཀྱུ་རིན་ཆེན་བསྣམསཿ ཡུམ་ཆེན་རྡོ་རྗེ་གསོད་མ་དངཿ སྤྲུལ་པ་དོམ་དང་སྲེ་མོང་མགོཿ ཨོཾ་བཛྲ་ཀྲོ་ཏ་མ་ཧཱ་པཱ་ལ་ཧཱུྃཿ སྥོ་ཊ་ཧཱུྃ་ཕཊཿ སྥོ་ཊ་ཧཱུྃ་ཕཊཿ འོག་ཕྱོགས་ས་བདག་གདན་སྟེང་དུཿ ཁྲོ་བོ་རྡོ་རྗེ་སྟོབས་པོ་ཆེཿ ཕྱག་ན་རྡོ་རྗེ་ཐོང་གཤོལ་བསྣམསཿ ཡུམ་ཆེན་རྡོ་རྗེ་བསྐྱོད་མ་དངཿ སྤྲུལ་པ་དྲེད་དང་བྱི་བའི་མགོཿ ཡུམ་རྣམས་གཡས་པ་དྲིལ་བུ་དངཿ གཡོན་པ་དུང་ཆེན་སྟོབ་ཅིང་འཁྱུདཿ ཀུན་ཀྱང་རྡོ་རྗེའི་གཤོག་པ་གདེངསཿ དུར་ཁྲོད་ཆས་ཀྱིས་རབ་ཏུ་བརྗིདཿ མཆེ་བ་ཅན་དང་གཤོག་པ་ཅནཿ ཕྲ་མེན་མགོ་བརྙན་ཉི་ཤུ་ནིཿ རྩིབས་མཆན་རྣམས་ལ་གཉིས་གཉིས་གནསཿ སྦྲུལ་དང་ཐོད་པས་རབ་ཏུ་བརྒྱནཿ ཕུར་པ་ལྕགས་ཀྱུ་ཕྱག་ན་བསྣམསཿ སྐྲ་བརྫེས་སྤྱན་དམར་མཆེ་བ་གཙིགསཿ ལྷ་ཚོགས་ཀུན་ཀྱང་སྐུ་མདོག་ནགཿ དུས་མཐའི་འོད་ཟེར་འབར་བ་འཁྲུགསཿ དེ་ནས་སྒོ་མ་བཞི་བསྐྱེད་པ་ནིཿ ཨོཾ་བཛྲ་ཀཱི་ལི་ཀཱི་ལ་ཡ་བི་ད་ཡ་བདི་བདི་ཧཱུྃ་ཕཊཿ ཨོཾ་བཛྲ་ཀཱི་ལི་ཀཱི་ལ་ཡ་ན་མཿས་མནྟ་ཧྲིཾ་ཧྲིཾ་ཧཱུྃ་ཕཊཿ ཨོཾ་བཛྲ་ཀཱི་ལི་ཀཱི་ལ་ཡ་པྲ་སུ་རུ་པྲ་སུ་རུ་ཧཱུྃ་ཕཊཿ ཨོཾ་བཛྲ་ཀཱི་ལི་ཀཱི་ལ་ཡ་མཱ་ར་ཡ་མཱ་ར་ཡ་ཧཱུྃ་ཕཊཿ ཉི་ཟླ་ཡི་གེ་བཞི་ཉིད་ལསཿ དྲོད་གཤེར་ལས་སྐྱེས་སྒོ་མ་བཞིཿ ཤར་ཕྱོགས་དྲི་ཟའི་གདན་སྟེང་དུཿ སྐྱ་གའི་མགོ་ཅན་ལྕགས་ཀྱུ་མཿ ལྷོ་ཕྱོགས་གྲུལ་བུམ་གདན་སྟེང་དུཿ པུ་ཤུད་མགོ་ཅན་ཞགས་པ་མཿ ནུབ་ཕྱོགས་ཆུ་བདག་གདན་སྟེང་དུཿ སྲིན་བྱའི་མགོ་ཅན་ལྕགས་སྒྲོག་མཿ བྱང་ཕྱོགས་གནོད་སྦྱིན་གདན་སྟེང་དུཿ ཁྲ་ཡི་མགོ་ཅན་དྲིལ་བུ་མཿ དཀར་སེར་དམར་ལྗང་ཐོད་སྦྲུལ་བརྒྱནཿ ཕྱག་གཡོན་ཕུར་པ་བགེགས་ལ་གཟིརཿ མེ་དཔུང་དབུས་ན་ཀུན་ཀྱང་རྔམཿ དྲག་པོའི་ཚུལ་གྱིས་ཞེ་སྡང་འཇོམསཿ མུ་རན་ལ་ནི་ཕུར་སྲུང་སྟེཿ ཨེ་ཡཾ་མ་ཡ་བཞི་པོ་ལསཿ ཤྭ་ན་མུ་ཁ་བཞི་པོ་གསལཿ ཛཿཡིག་བཞི་ལས་ས་བདག་བཞིཿ བྷྱོ་ཡིག་བཞི་ལས་བདག་ཉིད་བཞིཿ མཐུ་དང་རྫུ་འཕྲུལ་གློག་ལས་མྱུརཿ བསྟན་པ་སྲུང་ཞིང་ཉམས་པ་བདུནཿ ཞེ་ལ་བརྣག་པའི་སྟོབས་ཀྱིས་སྒྲོལཿ གནས་གསུམ་བྱིན་བརླབ་ནིཿ སྙིང་ག་མགྲིན་པ་སྤྱི་བོ་རུཿ ཟླ་བའི་དཀྱིལ་འཁོར་བསམས་ནས་ནིཿ རྡོ་རྗེ་པདྨ་འཁོར་ལོ་དགཿ ཧཱུྃ་ཨཱཿཨོཾ་གྱིས་མཚན་པ་ལསཿ ཐུགས་གསུང་སྐུ་ཡི་རྡོ་རྗེར་སྒོམཿ རྡོ་རྗེའི་ཕྱག་རྒྱ་གནས་གསུམ་དུ་བཞག་ལཿ ཨོཾ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾཿ དེ་བཞིན་དུ་ཝཱཀྐ་དངཿ ཀཱ་ཡ། སྦྱརཿ དབང་བསྐུར་བ་ནིཿ སྙིང་ཁར་བྷྲཱུྃ་ལས་རིན་པོ་ཆེའི་གཞལ་མེད་ཁང་སྒོ་གཅིག་པའི་ནང་དུ་ཡེ་ཤེས་སེམས་དཔའ་རྡོ་རྗེ་མི་བསྐྱོད་པ་ཚོན་གང་བ་གསལ་བའི་སྒོ་སྲུང་རྟ་མགྲིན་ཡབ་ཡུམ་དུ་གསལ་ལཿ ཡེ་ཤེས་སེམས་དཔའི་འོད་ཀྱིས་དབང་ལྷ་སྤྱན་དྲངས་པར་བསམས་ལཿ ཧཱུཾ་ཐབས་ཀྱི་སྤྱོད་པས་གཞན་དོན་དུཿ བྱམས་དང་སྙིང་རྗེས་གང་འདུལ་བཿ སངས་རྒྱས་ཕྲིན་ལས་རྫོགས་མཛད་པའིཿ དབང་དང་བྱིན་རླབས་བདག་སྩོལ་ཅིགཿ རིགས་ལྔའི་དབང་རྒྱ་གནས་སོ་སོར་བཞག་ལཿ ཨོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾཿ དེ་བཞིན་དུ་ཤཱུ་ནྱ་ཏའི་མལ་དུ། ཨ་དརྴཿ ས་མ་ཏཿ པྲ་ཏྱ་བེཀྵ་ནཿ ཀྲྀ་ཏ་ཨ་ནུ་ཥྛ་བཅུགཿ དེ་ནས་ཁམས་གསུམ་གྱི་སྲོག་ལ་དབང་བསྐུར་བ་ནིཿ ཧཱུྃ་ཧཱུྃ་ཧཱུྃཿ འགྲོ་དྲུག་ཉོན་མོངས་བཅངས་པ་རྣམསཿ ཧཱུྃ་གིས་དུག་ཆེན་རབ་སྦྱངས་ཏེཿ ཨ་ནྲི་སུ་ཏྲི་པྲེ་དུར་གྱུརཿ རཾ་ཡཾ་ཁཾ་ལས་མེ་རླུང་ཆུསཿ འགྲོ་བ་རབ་སྦྱངས་ཧཱུྃ་དུ་གྱུརཿ ཁམས་གསུམ་ཐམས་ཅད་རྡོ་རྗེ་སེམསཿ ཏིལ་གྱི་གོང་བུ་ལྟ་བུས་གངཿ རྟ་མགྲིན་རྒྱལ་པོ་ཡེ་ཤེས་ལཿ བསྟིམས་པས་བྱང་ཆུབ་སེམས་རྒྱས་གྱུརཿ ཡབ་ཡུམ་གཉིས་མེད་སྦྱོར་བའི་སྒྲསཿ ཡེ་ཤེས་ཁྲོ་བོ་སྤྱན་དྲང་ངོཿ དེ་ནས་སྤྱན་འདྲེན་པ་ནིཿ ཧཱུྃཿ སྲིད་པ་ཕུར་བུར་སྒྲུབ་པ་དངཿ དབང་དང་དངོས་གྲུབ་སྩོལ་བའི་ཕྱིརཿ ཡེ་ཤེས་ཁྲོ་བོ་གཤེགས་སུ་གསོལཿ ཁྲོ་བོ་ཆེན་པོ་གཤེགས་ནས་ཀྱངཿ རྟགས་དང་མཚན་མ་སྟོན་པ་དངཿ རྡོ་རྗེ་ཕུར་པའི་དངོས་གྲུབ་སྩོལཿ ཐུགས་རྗེའི་ལྕགས་ཀྱུས་རྒྱུད་བསྐུལ་ཞིངཿ བྱམས་པའི་ཞགས་པས་སྤྱན་འདྲེན་ནོཿ ལྕགས་སྒྲོག་བཀའ་ཡི་ཕོ་ཉས་བཏབཿ བདེ་གཤེགས་དྲིལ་བུས་དགྱེས་པ་བསྐྱེདཿ ཨེ་ཧྱེ་ཧི་མ་ཧཱ་ཀཱ་རུ་ཎི་ཀ་དྲྀ་ཤྱ་ཧོཿ བཞུགས་གསོལ་ནིཿ ཧཱུྃཿ ཐུགས་མཆོག་གསལ་བའི་བྱིན་རླབས་ལསཿ ཞེ་སྡང་གནས་སུ་འཇོམས་པ་དངཿ མེ་ལོང་ཡེ་ཤེས་ཐོབ་བྱའི་ཕྱིརཿ དཀྱིལ་འཁོར་དབུས་སུ་བཞུགས་སུ་གསོལཿ དཀྱིལ་འཁོར་དབུས་སུ་བཞུགས་ནས་ཀྱངཿ ཉོན་མོངས་མུན་པ་བསལ་དུ་གསོལཿ ས་མ་ཡ་ཏིཥྛ་ལྷནཿ ཕྱག་འཚལ་བ་ནིཿ ཧཱུྃཿ ཡང་དག་དོན་དུ་སྐུ་ནི་ཅིར་སྣང་ཡངཿ བདུད་དང་སྲིན་པོའི་ང་རྒྱལ་མ་ཡིན་ཏེཿ འདུལ་བའི་དབང་གིས་རབ་རྔམ་མཆེ་བ་གཙིགསཿ ཧཱུྃ་དང་ཕཊ་ཀྱི་སྒྲས་ནི་ཀུན་ཀྱང་བཀངཿ ཉོན་མོངས་གདུག་པ་འདུལ་བའི་ཐུགས་རྗེ་ཡིསཿ བྱིན་རླབས་སྟེར་བའི་ལྷ་ལ་ཕྱག་འཚལ་ལོཿ ཨ་ཏི་པཱུ་ཧོཿ པྲ་ཏཱི་ཙྪ་ཧོཿ མཆོད་པ་ནི་སྤྲོ་ནཿ སྒེག་དཔའ་འཇིགས་རུང་སྐུ་ཡི་གརཿ ཞེས་གར་དགུའི་མཆོད་པ་ནས་སྦྱོར་སྒྲོལ་གྱི་མཆོད་པའི་བར་ཐམས་ཅད་རྫོགས་པར་བྱ་ཞིངཿ བསྡུ་ན་དེའི་ཚབ་ཏུཿ ཧཱུྃཿ བླ་མེད་མཆོག་གི་མཆོད་པ་དམ་པ་ནིཿ ཡེ་ཤེས་ལྔ་ཡི་འོད་ཟེར་རྣམ་པར་འཕྲོཿ འདོད་པའི་ཡོན་ཏན་ལྔ་ཡིས་རབ་བརྒྱན་ཏེཿ དམ་ཚིག་བཞིན་ལས་ཅི་བདེར་བཞེས་སུ་གསོལཿ ཨོཾ་ཤྲཱི་བཛྲ་ཀུ་མཱ་ར་ས་པ་རི་ཝཱ་ར་ཨརྒྷཾ་ནསཿ ཤཔྡའི་བར་དངཿ སརྦ་པཉྩ་རཀྟ་བྷ་ལིངྟ་ཁཱ་ཧིཿ རྒྱས་བསྡུས་ཇི་ལྟར་ཡང་ཕུར་པའི་སྒོས་ཆོས་རཀྟ་ཚར་གསུམ་ནིཿ ཕུད་དང་རཀྟ་བསྲེསཿ དང་པོ་ཕོ་ཉ་ལ་བཀའ་བསྒོས་ཏེ་མངོན་སྤྱོད་ཀྱི་ཚུལ་དུ་ཕུལ་ནསཿ ཧཱུྃ་དངོས་གྲུབ་བར་གཅོད་བྱེད་པའི་བགེགསཿ གདུག་ཅིང་སྡང་སེམས་ལྡན་པ་རྣམསཿ ཟུང་ཞིག་རྒྱོབ་ཅིག་རྣམ་པར་ཆིངསཿ རྟོགས་ཤིག་གྲོགས་དང་བྲལ་བར་གྱིསཿ རིངས་པར་ཁུག་ལ་སྨར་ཆུག་ཅིག །ཕོབ་ཅིག་རྣམ་པར་གཟིར་བར་གྱིསཿ ང་ཡི་དབང་དུ་གྱུར་ནས་ཀྱངཿ བསྒོ་བའི་བཀའ་ནི་ཉན་པར་གྱིསཿ མཧཱ་རཀྟ་ཁཱ་ཏིཿ གཉིས་པ་དམ་ཅན་ལ་ཐ་ཚིག་བསྒྲག་པའི་ཕྱིར་ཕུལ་ནསཿ ཧཱུྃཿ བྲན་དང་བཀའ་ཉན་ཕོ་ཉའི་ཚོགསཿ ཁྱོད་ཀྱི་དམ་ཚིག་དུས་ལ་བབཿ སྔོན་ཆད་ཇི་ལྟར་དམ་བཅས་པའིཿ མངོན་སྤྱོད་ཕྲིན་ལས་མྱུར་དུ་མཛོདཿ མ་ཧཱ་རཀྟ་ཁཱ་ཧིཿ གསུམ་པ་གནོད་བྱེད་ཀྱི་མཐུ་དང་རྫུ་འཕྲུལ་འཕྲོག་ཕྱིར་ཕུལ་ནསཿ ཧཱུྃཿ དངོས་གྲུབ་བར་ཆད་བྱེད་པའི་བགེགསཿ གདུག་ཅིང་སྡང་སེམས་ལྡན་པ་རྣམསཿ ལྷའམ་འོན་ཏེ་བདུད་ཀྱང་རུངཿ ང་ལ་བར་ཆད་བྱེད་པ་རྣམསཿ མཐུ་དང་རྫུ་འཕྲུལ་མེད་པར་མཛོདཿ མ་ཧཱ་རཀྟ་ཁཱ་ཧིཿ བསྟོད་པ་ནིཿ ཧཱུྃཿ སྒེག་པ་དཔའ་བ་འཇིགས་སུ་རུང་བ་དངཿ དགོད་དང་གཤེ་དང་འཇིགས་པར་སྟོན་པ་དངཿ སྙིང་རྗེ་རྔམ་ཞི་རྡོ་རྗེ་གཞོན་ནུའི་སྐུཿ ཞེ་སྡང་འཇོམས་པའི་ལྷ་ལ་ཕྱག་འཚལ་བསྟོདཿ ཡབ་ཀྱི་ཐུགས་དམ་དགྱེས་པ་སྐོང་བའི་ཡུམཿ འཁོར་ལོ་རྒྱས་འདེབས་འདོད་ཆགས་འཇོམས་མ་དངཿ ཨེ་ཀ་ཙ་ཏི་ཞེ་སྡང་འཇོམས་མཛད་མཿ འདོད་ཆགས་ཚུལ་གྱིས་འདོད་ཆགས་འཇོམས་ལ་བསྟོདཿ ཡེ་ཤེས་ལྔ་ལྡན་ཕུར་བུས་དུག་ལྔ་འཇོམསཿ ཕྲིན་ལས་ལྔ་ཡིས་དྲེགས་པ་སྒྲོལ་བ་ལཿ ཐོགས་པ་མེད་པའི་ལས་མཛད་འདུས་པ་ལྔཿ སྲས་མཆོག་རིགས་ལྔའི་སྐུ་ལ་ཕྱག་འཚལ་བསྟོདཿ ཡེ་ཤེས་རོལ་པའི་སྟོབས་བཅུས་མི་དགེ་འཇོམསཿ སྐུ་གསུང་ཐུགས་ཀྱིས་གདུག་པ་སྒྲོལ་བར་མཛདཿ ཡང་དག་དོན་གྱིས་ལོག་འདྲེན་འཇོམས་མཛད་པཿ ཁྲོ་བོ་ཡབ་ཡུམ་བཅུ་ལ་ཕྱག་འཚལ་བསྟོདཿ བྱང་ཆུབ་བདེ་ལ་རོལ་པའི་ཕོ་ཉ་མོཿ གདུལ་བྱའི་དོན་ལ་ཁྲ་ཐབས་གཟུགས་འཛིན་ཅིངཿ དྲེགས་པའི་ཚོགས་རྣམས་མ་ལུས་འདུལ་མཛད་པཿ ཕྲ་མེན་ཕོ་ཉའི་ཚོགས་ལ་ཕྱག་འཚལ་བསྟོདཿ འཛབ་དགོངས་ནིཿ སྒྲུབ་པ་དང་སྒྲུབ་ཆེན་སོགས་ལཿ བྷྲཱུྃ་བི་ཤྭ་བི་ཤུདྡྷེ་ཕཊཿཛཿས་འཛབ་ཁང་དབྱེ་ནས་བདག་མདུན་གྱི་རྣམ་པར་གསལ་བ་ཀུན་ལ་འགྲེ་ཞིང་བསྙེན་པ་ནིཿ ཧཱུྃཿ ཐུགས་ཀ་དཔལ་གྱི་བེའུའི་དཀྱིལ་འཁོར་ནསཿ སྒོ་གཅིག་རིན་ཆེན་གཞལ་ཡས་ཁངཿ བདེ་སྟོང་དབྱེར་མེད་ངང་ཉིད་ལསཿ ཆོས་ཀྱི་སྐུ་ལས་ལོངས་སྐུར་ཤརཿ པདྨ་ཟླ་བའི་གདན་ལ་བཞུགསཿ སྐྱོན་གྱིས་མ་གོས་གཏི་མུག་སེལཿ ཡབ་ཡུམ་གཉིས་མེད་ཟག་མེད་སྐུཿ སྐུ་མདོག་དཀར་གསལ་རྣམ་དག་དབྱིངསཿ རྡོ་རྗེ་དྲིལ་བུ་ཕྱག་ན་བསྣམསཿ ཤེས་རབ་བྱང་ཆུབ་སེམས་དང་ལྡནཿ རྟོག་མེད་མི་འགྱུར་སྐྱིལ་ཀྲུང་བཞུགསཿ མཁའ་དབྱིངས་བདེ་ཆེན་སྐུ་ལ་བསྟོདཿ ཨོཾ་ནི་དཔལ་ཆེན་ཡབ་ཡིན་ཏེཿ བཛྲ་ཤེས་རབ་ཡུམ་ཡིན་ནོཿ ཀཱི་ནི་ཡེ་ཤེས་ཁྲོ་བོ་ལཿ ལི་ནི་དབྱིངས་ཀྱི་ཁྲོ་མོ་ཡུམཿ ཀཱི་ནི་ཐབས་ཀྱི་མཆེ་བ་ཅནཿ ལ་ནི་ཤེས་རབ་གཤོག་པ་ཅནཿ ཡ་ནི་སྲས་མཆོག་ཕུར་པ་སྟེཿ ཧཱུྃ་ནི་ཕྱག་བརྙན་སྒོ་མ་བཞིཿ སརྦ་ཐམས་ཅད་འདུས་པ་སྟེཿ བིག་ནི་དགྲ་དང་བགེགས་ཡིན་ཏེཿ ནན་ནི་དགྲ་དང་བགེགས་མནན་ནོཿ བྃ་ནི་དབང་དུ་སྡུད་པ་སྟེཿ ཧཱུྃ་ནི་རླག་པར་བྱེད་པའོཿ ཕཊཿཀྱིས་སྒྲོལ་བའི་ཕྲིན་ལས་མཛདཿ ཅེས་སོཿ ས་ཡ་ཐ་མ་བྱེ་བ་འབྲིངཿ སྨིན་པར་འདོད་ལ་གྲངས་ངེས་མེདཿ འདི་ལ་ཡི་དམ་བྱེད་པ་རྣམསཿ བར་ཆད་བདུད་ཀྱིས་མི་ཚུགས་ཤིངཿ ཕྲིན་ལས་ཀུན་ལ་མངའ་བརྙེས་འགྱུརཿ རྗེས་ལ་ཚོགས་ཀྱི་མཆོད་པ་སོགསཿ ལས་གཞུང་བཞིན་དུ་ཤེས་པར་བྱཿ རྒྱུད་སྡེ་རྒྱ་མཚོའི་དོན་གྱི་དབྱིངསཿ དགོངས་བརྡ་སྙན་བརྒྱུད་ཤོག་སེར་ལཿ གཅུས་དཀྲུགས་གབ་པའི་གནད་བསལ་བཿ པདྨའི་རིང་ལུགས་དམ་པའོཿ ས་མ་ཡཿ རྒྱ་རྒྱ་རྒྱཿ