རིག་འཛིན་ཡུམ་ཀའི་མེ་མཆོད་ལས་བཞིའི་བང་མཛོདཿ

Previous Text Back to Volume Page Next Text

Wylie title	rig 'dzin yum ka'i me mchod las bzhi'i bang mdzod:
Location	'jigs gling bka' 'bum Volume 10, Text 24, Pages 307-314 (Folios 1a1 to 4b6)
Author	འཇིགས་མེད་གླིང་པ་
Less details More details
Tertön	འཇིགས་མེད་གླིང་པ་ ('jigs med gling pa)
Citation	'jigs med gling pa. Rig 'dzin yum ka'i me mchod las bzhi'i bang mdzod. In Kun mkhyen rig 'dzin 'jigs med gling pa'i gsung 'bum, Vol. 10: 307-314. New Delhi: Shechen Publications, 2025.
Genre	Fire Offerings - sbyin sreg
Cycle	ཡུམ་བཀའ་བདེ་ཆེན་རྒྱལ་མོ་ (yum bka' bde chen rgyal mo)
Parent Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)
Colophon	རྗེ་བཙུན་དཔལ་སྡིངས་པས་གསོལ་བ་ནན་གྱིས་བཏབ་པས་ལོ་ཕྱི་མ་ལ་རྒྱ་ཁྲོལཿ
Colophon	rje btsun dpal sdings pas gsol ba nan gyis btab pas lo phyi ma la rgya khrol:

[edit]

འུྃཿ རིག་འཛིན་ཡུམ་ཀའི་མེ་མཆོད་ལས་བཞིའི་བང་མཛོད་བཞུགསཿ

འུྃཿ རྡོ་རྗེ་དབྱིངས་ཀྱི་མཁའ་འགྲོ་ལ་ཕྱག་འཚལ་ལོཿ འདིར་ཚོགས་གཉིས་སྤེལ་བ་དང་ཉམས་ཆགས་དག་པར་བྱ་བ་གཙོར་གྱུར་ལ་ཕྲིན་ལས་གཞན་པའི་ཁ་སྒྱུར་ཀྱང་བགྱི་བར་རུང་བའི་མཁའ་འགྲོའི་མེ་མཆོད་བྱ་བར་འདོད་ནཿ དང་པོ་རྫས་གསག་པ་ནིཿ མར་ཁུཿ ཡམ་ཤིང་ཿ ཏིལ་དཀར་ནགཿ དཀར་གསུམ་མངར་གསུམ་དང་དྲི་བཟང་གིས་སྦགས་པའི་ཞོ་ཟནཿ སོ་བཿ འབྲསཿ ནསཿ གྲོཿ སྲན་མཿ ཡུངས་དཀརཿ ཀུ་ཤཿ དཱུར་ཝཿ ཤིང་ཏོགཿ དར་སྣཿ སྨན་སྣཿ རིན་པོ་ཆེའི་རིགས་དང་ཿ ཁྱད་པར་གྱི་རྫས་བ་དམར་ཟལ་རྙེད་ན་རབཿ མ་རྙེད་ན་བ་གླང་ཤ་་་་་ཨ་མྲྀ་ཏས་སྦགས་པ།་་་་གཞོན་ནུའི་ཿ ལས་མདོག་དང་མཐུན་པའི་མེ་དར་རྣམས་ཀྱང་གསོགཿ གཉིས་པ་ཐབ་བཅའ་བ་ནི་བདག་གི་རྣལ་འབྱོར་དང་ལྡན་པས་འཁྱིལ་པའི་སྔགས་ཀྱིས་བསང་ཆུ་བསྒྲུབཿ གང་དུ་བྱ་བའི་གཞི་མ་དུལ་བ་ཡིན་ན་ས་ཆོག་བྱཿ དེ་ནས་རླན་ཅན་གྱི་ས་སྟེགས་འཇམ་པོ་ལཿ རྡུལ་ཚོན་གྱི་རེ་ཁཱ་རིམ་པ་གསུམ་དུ་བསྐོར་བའི་དབུས་མ་མཐིང་ཁར་བྃཿ དེའི་ཕྱི་པད་འདབ་བཞི་ཕྱོགས་མདོག་ལ་འབུམ་ཕྲག་ཡངས་པའི་མཁའ་འགྲོའི་སྲོག་སྙིང་ཧ་རི་ནི་ས་བཀོདཿ ཕྱི་མ་རྡོ་ར་དང་འོད་ཕྲེང་ངོཿ དེའི་སྟེང་ལྷ་རྫས་ལ་རུང་བའི་བུད་ཤིང་བཟང་པོ་རན་པར་བརྩེགསཿ ཉེ་ལོགས་ཅི་བདེ་བར་མཆོད་གཏོར་བཟང་པོ་དང་ཚོགས་འཁོརཿ སྲེག་རྫས་རྣམས་ཀྱང་འདུ་བྱའོཿ གསུམ་པ་དངོས་གཞིའི་རིམ་པ་ནིཿ བསང་ཆུ་འཐོར་ཞིང་ཿ ཨ་མྲྀ་ཏས་བསངསཿ སྟོང་པའི་ངང་ལས་མཆོད་རྫས་དང་སྲེག་རྫས་རྣམས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་ལས་བྱུང་བའི་བདུད་རྩིའི་དངོས་པོ་ལས་ཐམས་ཅད་ལ་ཐོགས་པ་མེད་པར་བསྐུལ་ཞིང་ལྷ་ཚོགས་རྣམས་དགྱེས་པ་བསྐང་བའི་ནུས་ལྡན་དུ་གྱུརཿ ནང་མཆོད་འཐོར་ཞིང་ཿ ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་བདུན་བརྗོདཿ ལས་མཐུན་གྱི་མེ་སྤར་ལཿ ཨཱཿ ཆོས་རྣམས་རང་བཞིན་སྐྱེ་བ་མེདཿ ནམ་མཁའ་དབྱིངས་ཀྱི་དབང་ཕྱུག་མའིཿ ཀློང་ན་ལས་བཞི་རྫོགས་པའི་ཐབཿ སྤྱན་དང་མཱ་ཀཱིའི་མཁའ་དབྱིངས་སུཿ ཞལ་ཕྱག་སྤངས་པའི་མེ་ལྷ་ནིཿ ཡུམ་ཆེན་ན་བཟའ་དཀར་མོ་ཉིདཿ དམ་ཚིག་སྒྲོལ་མའི་བརྟུལ་ཞུགས་དང་ཿ མཉམ་སྦྱོར་བྱིན་ཟ་འབར་བའི་ཀློང་ཿ རྒྱུ་རྐྱེན་ལས་འདས་གཞལ་ཡས་ཁང་ཿ ཐིག་ལེ་ཉག་གཅིག་ཆོས་དབྱིངས་སྒོཿ བདེ་ཆེན་འབར་བའི་ཕོ་བྲང་དབུསཿ ཆུ་སྐྱེས་གེ་སར་བཞད་པའི་སྟེང་ཿ ཉི་མའི་གདན་ལ་མཁའ་འགྲོའི་གཙོཿ ཆོས་སྐུའི་ཀློང་ན་ཀུན་བཟང་མོཿ ལོངས་སྐུའི་ཞིང་ན་ཝཱ་རཱ་ཧཱིཿ སྤྲུལ་སྐུ་ཡེ་ཤེས་འཚོ་རྒྱལ་མཿ ཞལ་གཅིག་ཕྱག་གཉིས་སྐུ་མདོག་དམརཿ གཅེར་མོ་མཉམ་པའི་དོར་སྟབས་ཅནཿ ཤིན་ཏུ་ཆགས་དང་བཞད་པའི་ཞལཿ ཕྱག་གཡས་ཐོད་པའི་ཅང་ཏེའུཿ སྙན་གྱི་ཐད་ཀར་གཏོད་ཅིང་འཁྲོལཿ གཡོན་པ་གྲི་གུག་ཡུ་བ་ནིཿ དཀུ་ལ་བརྟེན་ནས་མཆོག་ཏུ་འགྱིང་ཿ བྷ་ག་རྒྱས་ཤིང་ནུ་མ་འབུརཿ རིན་པོ་ཆེ་དང་གཞོན་ནུའི་རྒྱནཿ པུཎྜ་རི་ཀའི་དོ་ཤལ་འཕྱང་ཿ རུས་པའི་རྒྱན་དྲུག་སྐུ་ལ་མཛེསཿ གནག་སྣུམ་དབུ་སྐྲའི་ལན་ཚར་ཅནཿ རིན་པོ་ཆེ་ཡི་རྩེ་བྲན་བརྗིདཿ དབུ་མའི་སྤྱན་ནི་དབྱིངས་ལ་གཟིགསཿ ལོངས་སྐུའི་སྤྱན་གྱིས་འགྲོ་བ་འདུལཿ སྤྲུལ་སྐུའི་སྤྱན་གྱིས་ཁམས་གསུམ་འགུགསཿ སྐུ་ལ་རྒྱུད་སྡེའི་དཀྱིལ་འཁོར་རྫོགསཿ འབུམ་ཕྲག་ཡངས་པའི་མཁའ་འགྲོས་བསྐོརཿ རིགས་བདག་པདྨ་ཐོད་ཕྲེང་རྩལཿ ཨཱ་ཙཱརྱ་གཞོན་དཀར་གསལ་འཛུམཿ ཧེ་རུ་ཀ་པ་ཅང་དྲིལ་འཁྲོལཿ དམ་ཚིག་ཡེ་ཤེས་གཉིས་སུ་མེདཿ བསྒོམས་པ་ཙམ་གྱིས་དངོས་གྲུབ་ཐོབཿ སྤྱན་འདྲེན་པ་ནིཿ ཧཱུྃཿ ཡུལ་གྱི་མིང་ནི་རྒྱ་གར་ཡུལཿ གནས་ཀྱི་མཆོག་གྱུར་ཨོ་རྒྱན་གནསཿ དྷཱུ་མ་ཐ་ལ་མཁའ་འགྲོའི་གྲོང་ཿ གླིང་གི་གླིང་མཆོག་རྔ་ཡབ་གླིང་ཿ དོན་ལ་འོག་མིན་བདེ་ཆེན་ཞིང་ཿ རྣམ་པ་མཁའ་སྤྱོད་སྤྲུལ་པའི་གནསཿ དགྱེས་ཤིང་བཞུགས་པའི་ཡུལ་ཀུན་ནསཿ ཆོས་སྐུ་ཡུམ་ཆེན་འཚོ་རྒྱལ་མཿ འབུམ་ཕྲག་མཁའ་འགྲོའི་འཁོར་དང་བཅསཿ བྱིན་གྱིས་བརླབ་ཕྱིར་གཤེགས་སུ་གསོལཿ གནས་མཆོག་འདི་རུ་བྱིན་ཕོབ་ལཿ སྒྲུབ་མཆོག་བདག་ལ་དབང་བཞི་བསྐུརཿ བགེགས་དང་ལོག་འདྲེན་བར་ཆད་སོལཿ མཆོག་དང་ཐུན་མོང་དངོས་གྲུབ་སྩོལཿ ཨོཾ་ཨཱཿཧཱུྃ་བཛྲ་ཛྙཱ་ན་ཌཱཀྐི་ནི་ཨེ་ཨ་ར་ལི་ཕེཾ་ཕེཾ་ཛཿཛཿ བཞུགས་གསོལ་ཕྱག་འཚལ་ནིཿ ཧོཿ གདོད་ནས་དམ་ཚིག་ཡེ་ཤེས་པཿ གཉིས་སུ་མེད་པ་རྡོ་རྗེའི་སྟནཿ མཁའ་འགྲོ་སེམས་ཀྱི་ཆོ་འཕྲུལ་དུཿ ལྷན་ཅིག་སྐྱེས་ལ་ཕྱག་འཚལ་ལོཿ ན་མོ་ན་མ་ཧཱུྃཿ མཆོད་པ་འབུལ་བ་ནིཿ ཧོཿ སྣང་ཞིང་སྲིད་པའི་ཆོས་སོ་ཅོགཿ འདོད་ཡོན་ལྔ་ཡི་རྒྱན་དུ་ཤརཿ སེམས་ཀྱི་ཡིད་བཞིན་གཏེར་ཆེན་པོཿ བླང་དོར་མེད་པའི་དགྱེས་མཆོད་འབུལཿ བཛྲ་ཛྙཱ་ན་ཌཱཀྐི་ནི་པུཥྤེ་ནས་ཤཔྟ་མ་ཧཱ་མུ་དྲ་རཀྟ་པཉྩ་བྷ་ལིང་ཏ་སརྦ་པཱུ་ཛ་ཨཱཿཧཱུྃཿ བསྟོད་པ་ནིཿ ཧཱུྃཿ རྒྱལ་བ་ཀུན་ཡུམ་རྡོ་རྗེ་རྣལ་འབྱོར་མཿ སྣ་ཚོགས་ཡུམ་གྱུར་ཤེས་རབ་ཕ་རོལ་ཕྱིནཿ དགྱེས་ཆགས་བཞད་པའི་རྣམ་འགྱུར་འཚོ་རྒྱལ་ཡུམཿ སངས་རྒྱས་པདྨའི་ལྕམ་ལ་ཕྱག་འཚལ་བསྟོདཿ མཐོང་བས་ཡིད་འཕྲོག་མཚན་དཔེའི་ལང་ཚོ་ཅནཿ ཐོས་པས་རྣམ་གྲོལ་འགག་མེད་བརྡ་ཡི་གསུང་ཿ དྲན་པས་བདེ་སྟོང་ཡེ་ཤེས་བསྐྱེད་པའི་ཐུགསཿ ཌཱཀྐིའི་གཙོ་མོ་མཁར་ཆེན་བཟའ་ལ་བསྟོདཿ བཅུ་དྲུག་དགའ་སྟེར་མཆོག་གི་ཕོ་ཉ་མོའིཿ གསལ་སྣང་སྒྱུ་མའི་ཏིང་འཛིན་དང་འགྲོགས་པསཿ ཕྱི་ནང་གཞན་གསུམ་རྩ་རླུང་ཐིག་ལེའི་ཁམསཿ ཀུན་ཏུ་བཟང་མོའི་ཀློང་དུ་དག་གྱུར་ཅིགཿ དགང་བླུགས་བཟུང་ལཿ ཧཱུྃཿ དགང་བླུགས་དཀྱིལ་འཁོར་མ་ལུས་པའིཿ ཞལ་གྱི་ངོ་བོར་རྣམ་དག་ཅིངཿ རྡོ་རྗེའི་ལྗགས་སྟེང་ཧཱུྃ་ཡིག་གིསཿ སྲེག་རྫས་བདུད་རྩིའི་རྒྱུན་དྲངས་ནསཿ ཐུགས་ཀའི་རྡོ་རྗེ་ཕག་མོ་མཉེསཿ ལས་མཐུན་འོད་ཟེར་འཕྲོས་པ་ཡིསཿ མཆོག་ཐུན་དངོས་གྲུབ་ཐོབ་པར་གྱུརཿ ཞེས་བརྗོད་ཅིང་བསམ་ལཿ ཨོཾ་པདྨོ་ཡོ་གི་ནི་ཛྙཱ་ན་ཝཱ་རཱ་ཧཱི་སརྦ་པཱ་པཾ་ཤཱནྟིཾ་ཀུ་རུ་སྭཱ་ཧཱཿ ཞེས་བདུན་གྱིས་ཕུལ་ལཿ རྣལ་འབྱོར་པ་བདག་དང་ཡོན་གྱི་བདག་པོ་ལ་ནད་གདོན་སྡིག་སྒྲིབ་འགལ་རྐྱེན་བར་གཅོད་ཉམས་ཆག་ཉེས་ལྟུང་མ་དང་མཁའ་འགྲོའི་བཀའ་ཆད་ཐམས་ཅད་ཤཱནྟིཾ་ཀུ་རུ་སྭཱ་ཧཱཿ ཞེས་འདོད་དོན་གསོལཿ རྫས་གཞན་རྣམས་ཀྱང་གཅིག་ཏུ་སྤམས་ཏེ་འབུལ་ཚུལ་དེ་དང་འདྲཿ ཞི་བྱེད་དམིགས་བསལ་ཡོད་ན་རྩ་སྔགས་ཤམ་བུ་སརྦ་པཱ་པཾ་གྱི་མལ་དུཿ དམ་ཚིག་ཉམས་ཆག་ཤཱནྟིཾ་ཀུ་རུ་སྭཱ་ཧཱཿ ཞེས་པ་ལྟ་བུའི་འབྱིན་འཇུག་བྱཿ དེ་བཞིན་དུ་རྒྱས་པ་ལཿ ཚེ་དང་བསོད་ནམས་པུཥྚིཾ་ཀུ་རུ་ཧོཿ དབང་ལཿ ཁམས་གསུམ་སྐྱེ་དགུའི་བླ་ཡིད་ཝཱ་ཤཾ་ཀུ་རུ་ཧོཿ མངོན་སྤྱོད་ལཿ དགྲ་བགེགས་འབྱུང་པོ་མཱ་ར་ཡ་ཕཊཿ ཅེས་བསྒྱུརཿ རྫས་ལ་མཚོན་ནཿ ཞི་བར་མར་ཁུ་དངཿ ཏིལ་དཀར་ནགཿ པད་ཁ་རྣམས་བུངས་བསྐྱེདཿ རྒྱས་པ་ལ་ཞོ་ཟན་དང་དཱུརྦཿ རིན་པོ་ཆེ་དང་ཤིང་ཏོག་རྣམསཿ དབང་ལ་རོ་མངར་ཞིང་སྣུམ་པའི་བཟའ་བཅའ་དངཿ མེ་ཏོག་དང་འབྲས་བུ་དམར་པོའི་རིགསཿ དགྲ་བགེགས་ཞི་བ་ལ་ཡུངས་དཀར་དང་གུ་གུལ་ཚ་བ་གསུམ་དང་ལན་ཚྭའི་ཁུ་བས་ཅུང་ཟད་སྦགས་པ་ཞི་བའི་མཐུ་དང་ལྡན་པའི་མངོན་སྤྱོད་དོཿ ཚུལ་དེ་བཞིན་དུ་མཆོད་རྫས་དང་སྲེག་རྫས་ཐབ་དཀྱིལ་ལ་སོགས་པའི་ཁ་དོག་ལས་མཐུན་དངཿ གཙོ་བོར་ཏིང་ངེ་འཛིན་གྱི་ལྡེ་ཁ་ནི་རྣོ་ལ་ངར་གྱིས་གདགས་པ་བཞིན་ནོཿ རྫས་རྣམས་རྫོགས་པ་དངཿ ཨོཾ་བཛྲ་ཝསྟྲ་ཡེ་སྭཱ་ཧཱཿ གོས་ཟུང་དངཿ བཛྲ་ཏཾ་བུ་ལ་ཡེ་སྭཱ་ཧཱཿ ཞེས་སོ་རྩི་དབུལཿ ཚོགས་ཀྱི་འཁོར་ལོས་མཆོདཿ དངོས་གྲུབ་བླང་བའི་རྗེས་ཐོག་ཏུ་བྱོན་སྐྱེམས་ཕུལ་ལཿ ཨོཾ་ཁྱེད་ཀྱིས་སེམས་ཅན་དོན་ཀུན་མཛདཿ སོགས་ཀྱི་མཐརཿ བཛྲ་མུཿས་ཡེ་ཤེས་པ་གཤེགསཿ དམ་ཚིག་པ་རང་ལ་འདྲེས་པར་བསམཿ དེ་ནས་བསྔོ་བ་ནིཿ མཁའ་འགྲོ་མ་ཡི་དཀྱིལ་འཁོར་དུཿ སྦྱིན་སྲེག་མཆོད་པ་འདི་ཕུལ་བསཿ དགེ་བའི་རྩ་བ་གང་ལགས་པཿ འགྲོ་ཀུན་སངས་རྒྱས་ཐོབ་ཕྱིར་བསྔོཿ ཞེས་ལན་གསུམ་དངཿ སྨོན་ལམ་ནིཿ ཧོཿ སྣང་སྲིད་ཐམས་ཅད་དག་པ་མཁའ་སྤྱོད་ཞིངཿ བདེ་ཆེན་འགྱུར་མེད་རྡོ་རྗེ་རྣལ་འབྱོར་མཿ རྣམ་ཀུན་མཆོག་ལྡན་དོན་གྱི་ཕག་མོ་དངཿ རང་ཞལ་མཇལ་ཏེ་མངོན་པར་བྱང་ཆུབ་ཤོགཿ ཤིས་པ་བརྗོད་པ་སྤྱི་དང་མཐུན་པར་བྱའོཿ མེ་ནི་དཀྱིལ་འཁོར་ལྷ་ཡི་ཞལཿ མངོན་སུམ་ཉིད་དུ་ལོངས་སྤྱོད་པསཿ བསོད་ནམས་ནང་ན་སྦྱིན་སྲེག་མཆོགཿ རྣོ་ལ་མྱུར་བའི་ལས་བརྩམས་ནཿ རྣལ་འབྱོར་ལྡན་པས་འདི་ལ་འབདཿ ས་མ་ཡཿ རྒྱ་རྒྱ་རྒྱཿ རྗེ་བཙུན་དཔལ་སྡིངས་པས་གསོལ་བ་ནན་གྱིས་བཏབ་པས་ལོ་ཕྱི་མ་ལ་རྒྱ་ཁྲོལཿ ཿ