མཁའ་འགྲོ་བདེ་ཆེན་རྒྱལ་མོ་ལསཿ སྐུ་གསུམ་བདུད་རྩིའི་བཅུད་ལེནཿ

Previous Text Back to Volume Page Next Text

Wylie title	mkha' 'gro bde chen rgyal mo las: sku gsum bdud rtsi'i bcud len:
Location	'jigs gling bka' 'bum Volume 10, Text 25, Pages 315-318 (Folios 1a1 to 2b1)
Author	འཇིགས་མེད་གླིང་པ་
Less details More details
Tertön	འཇིགས་མེད་གླིང་པ་ ('jigs med gling pa)
Citation	'jigs med gling pa. Mkha' 'gro bde chen rgyal mo las sku gsum bdud rtsi'i bcud len. In Kun mkhyen rig 'dzin 'jigs med gling pa'i gsung 'bum, Vol. 10: 315-318. New Delhi: Shechen Publications, 2025.
Genre	Rasayana - bcud len
Cycle	ཡུམ་བཀའ་བདེ་ཆེན་རྒྱལ་མོ་ (yum bka' bde chen rgyal mo)
Parent Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)

[edit]

༼ཡ༽ མཁའ་འགྲོ་བདེ་ཆེན་རྒྱལ་མོ་ལསཿ སྐུ་གསུམ་བདུད་རྩིའི་བཅུད་ལེན་བཞུགསཿ མཁའ་འགྲོ་མ་ལ་ཕྱག་འཚལ་ལོཿ རླུང་ཟས་སྟོབས་ཀྱི་བཅུད་ལེན་ནིཿ བགེགས་འདུལ་ཁྲོ་བོའི་རྒྱལ་པོར་སྒོམཿ ཁུ་ཚུར་གདེངས་ཤིང་ཧཱུྃ་གླུ་ལེནཿ ལག་པ་གཡས་གཡོན་གར་སྟབས་བསྒྱུརཿ དབང་པོའི་སྒོ་རྣམས་ཧཱུྃ་གིས་བཀགཿ བགེགས་ཀྱང་སྟོང་པ་ཉིད་དུ་བསམཿ དེ་ནས་བླ་མའི་རྣལ་འབྱོར་སྒོམཿ མོས་གུས་དྲག་པོས་གསོལ་བ་གདབཿ རྐང་པ་རྡོ་རྗེའི་འདུག་སྟངས་ལཿ ལག་པ་སྟ་ཟུར་གཡས་གཡོན་བཞགཿ སྣ་བུག་གཉིས་ནས་དྲག་རླུང་དངཿ ཁོང་འདར་ཐོན་པའི་ཧ་གསུམ་འབུདཿ ངལ་བསོ་ཤེས་པ་དལ་བ་དངཿ ཧུབ་སྒྲ་གསུམ་གྱིས་བསྟུད་མ་རུཿ བྱ་ལམ་བཟའ་ཞིང་བུམ་ཅན་བཟུངཿ ཧ་ཅང་མི་བསྡམ་ནམ་མཁའི་བཅུདཿ ཁོང་དུ་འུབ་ཀྱིས་དྲངས་པར་བསམཿ མི་ཐུབ་སྣ་བུག་གཉིས་ཀ་ནསཿ དྲག་འབུད་མ་ཡིན་དལ་བུས་བཏངཿ རེས་འགའ་པུས་བྲང་སྦྱར་བྱས་ལཿ ལག་པ་གཉིས་ཀྱིས་ཨོལ་ཀོ་བརྟེནཿ འཇམ་རླུང་ངང་ནས་དབྱིངས་རིག་བསྲེཿ རྟགས་དང་ཡོན་ཏན་བསམ་མི་ཁྱབཿ རགས་པའི་ཟས་ཀྱི་ཞེན་པ་ཆོདཿ འབྱུང་བའི་སྙིགས་མ་ཤུགས་ལ་དེངསཿ སེམས་དང་རིག་པ་དྭངས་སྙིགས་ཕྱེདཿ གཉིད་ཀྱང་འོད་གསལ་ཆེན་པོར་འཆརཿ ཡེ་ཤེས་ཆེན་པོའི་བཅུད་ལེན་ཡིནཿ ས་མ་ཡཿ ལོངས་སྤྱོད་རྫོགས་སྐུ་རྡོ་རྗེ་སེམསཿ རྡོ་ཆེན་ཅོང་ཞིའི་བཅུད་ལེན་ནིཿ ཆེ་ཆུང་ནས་ཕྱེད་ཙམ་དུ་བརྡུངསཿ ཚགས་ཀྱིས་བཙགས་ལ་སྙོམས་པར་བྱཿ ཆུ་ཡིས་ལེགས་བཀྲུ་རྡོ་ཕྱེ་དངཿ ཐལ་དྲི་སྤུ་ཙམ་མ་འདྲེས་གཅེསཿ འབྲི་ཡི་འོ་མ་མར་གསར་དངཿ ཀར་བུར་སྦྲང་རྩི་སྦྱངས་པའི་ནངཿ བཏབ་ནས་མ་ཚིག་ལེགས་པར་སྐོལཿ ཁུ་བ་རང་སིམ་འགྲོ་བར་བྱཿ གཡའ་མེད་སྣོད་བླུགས་མ་ཧུམས་གཅེསཿ དགོང་དང་ཐོ་རེངས་ཉིན་གུང་གསུམཿ ཐུར་མགོ་རེ་རེ་ཇ་ཡིས་ཕུལཿ འདུ་བའི་ནད་སེལ་སྒྲིབ་པ་བྱངཿ ཉམས་དང་རྟོགས་པ་ཤུགས་ལ་འཕེལཿ དཔའ་བོ་མཁའ་འགྲོ་དབང་དུ་འདུཿ གནད་དུ་སོང་ན་འབྱུང་བའི་ཁམསཿ ཉམས་བརྟས་བཀྲག་དང་གཟི་མདངས་འབརཿ སྟོབས་རྩལ་གླང་པོ་ཆེ་དང་མཉམཿ མི་མ་ཡིན་དང་བརྡ་འཕྲོད་ཅིངཿ མངོན་ཤེས་རྫུ་འཕྲུལ་ཐོགས་པ་མེདཿ ས་དང་ལམ་གྱི་ཡོན་ཏན་རྫོགསཿ ས་མ་ཡཿ སྤྲུལ་སྐུ་འབྲུ་ཆེན་བཅུད་ལེན་ནིཿ ནས་ཆེན་སྦུན་པ་མེད་པ་དེཿ རྡུལ་དྲི་བཀྲུས་ལ་ལེགས་པར་ཟུསཿ རྫ་ནང་བླུགས་ལ་ཆང་ལྟར་བཙོཿ སྐྱ་བས་དཀྲུགས་ཤིང་འབྲགས་མི་གཞུགཿ རྒྱུན་དུ་རླངས་པ་མ་ཤོར་གཅེསཿ ཆུ་ཐག་ཆོད་ནས་གཞོང་པའམཿ སྤུ་རྡུལ་མེད་པའི་སྣོད་དུ་སྐམཿ ཉིན་རེ་ནས་ཕུལ་རེ་ཡི་ཚདཿ མར་ཚིལ་ལན་ཚྭའི་རྡོར་དང་བཅསཿ འབྲུ་ཐུག་ཉིད་དུ་འཚོ་ཤེས་སྤྱོདཿ སྲིན་བུ་འཆི་བར་མི་འགྱུར་ཞིངཿ དཀོར་དང་ལོག་འཚོའི་ཉེས་པ་དགཿ བྱ་བ་བཏང་བའི་རྣལ་འབྱོར་ལཿ ཟས་ཀྱིས་འཕོངས་པ་འབྱུང་མི་སྲིདཿ དེ་ལྟར་བཅུད་ལེན་རྣམ་པ་གསུམཿ བཟའ་དུས་ཡི་གེ་འབྲུ་གསུམ་དུཿ བསྒོམས་པས་བདུད་རྩིའི་ནུས་པ་འབྱིནཿ ས་མ་ཡཿ དེ་ལྟར་སྐུ་གསུམ་བཅུད་ལེན་ནིཿ ཁམས་དང་དབང་པོའི་ཁྱད་པར་གྱིསཿ སོ་སོ་ཉམས་སུ་བླང་ནུས་མོདཿ མོས་པས་སྤྱོད་པའི་གང་ཟག་ཕལཿ རིམ་བཞིན་ཆོས་ལོངས་སྤྲུལ་སྐུའི་ཚུལཿ ཉི་མ་རེ་མོས་ཉམས་བླངས་པསཿ ལུས་སྟོབས་རྒུད་པར་མི་འགྱུར་ཞིངཿ ཡུན་དུ་བསྲིང་བའི་མཐུ་ཆེ་བསཿ ཟླ་བ་རེ་ལ་བདུན་ཕྲག་རེཿ རྟག་པ་རྒྱུན་གྱི་ཉམས་ལེན་འབདཿ རྗེས་ལ་ཟོས་ལོག་མི་འབྱུང་ཕྱིརཿ རགས་པའི་ཟས་ལ་རིམ་གྱིས་བསླབཿ བྱང་ཆུབ་བསྒྲུབ་པའི་ཆ་རྐྱེན་ཏེཿ སྒྲུབ་པ་པོ་ཡི་དཔལ་དུ་ཤོགཿ ས་མ་ཡཿ རྒྱ་རྒྱ་རྒྱཿ ཿ