རྡོ་རྗེ་ཕུར་པ་རྒྱུད་ལུགས་ཀྱི་དྲག་པོའི་སྦྱིན་བསྲེག་རྟ་གདོང་བརྔམས་ཞུགས།

Previous Text Back to Volume PageNext Text

Wylie title	rdo rje phur pa rgyud lugs kyi drag po'i sbyin bsreg rta gdong brngams zhugs
Location	'jigs gling bka' 'bum Volume 9, Text 25, Pages 607-634 (Folios 1a1 to 14b2)
Author	འཇིགས་མེད་གླིང་པ་
Less details More details
Citation	'jigs med gling pa. Rdo rje phur pa rgyud lugs kyi drag po'i sbyin bsreg rta gdong brngams zhugs. In Kun mkhyen rig 'dzin 'jigs med gling pa'i gsung 'bum, Vol. 9: 607-634. New Delhi: Shechen Publications, 2025.
Genre	Fire Offerings - sbyin sreg
Cycle	ཕུར་པ་རྒྱུད་ལུགས་ (phur pa rgyud lugs)
Deity	rdo rje phur pa
Colophon	།རྡོ་རྗེ་ཕུར་པའི་རྒྱུད་སྡེ་རྒྱ་མཚོ་དང་། སྔོན་གྱི་ཕུར་པ་མཁན་པོ་རྣམས་ཀྱི་གཞུང་ལ་ལེགས་པར་དཔྱད་ནས་དཔལ་ལྡན་པདྨ་འོད་གླིང་དུ་བཀོད་པའོ།། །།དགེའོ།།
	rdo rje phur pa'i rgyud sde rgya mtsho dang /_sngon gyi phur pa mkhan po rnams kyi gzhung la legs par dpyad nas dpal ldan pad+ma 'od gling du bkod pa'o//_//dge'o//

Tibetan Text

[edit]

༄༅། །རྡོ་རྗེ་ཕུར་པ་རྒྱུད་ལུགས་ཀྱི་དྲག་པོའི་སྦྱིན་བསྲེག་རྟ་གདོང་བརྔམས་ཞུགས་ཞེས་བྱ་བ་བཞུགས། །

༄༅། །ཤྲཱི་བཛྲ་ཀུ་མཱ་ར་ནཱ་མ། ད་ནི་བསད་པའི་ལས་ཀྱི་མཐའ་བསྡུད་དྲག་པོའི་སྦྱིན་བསྲེག་གི་རིམ་པ་ལ་སྦྱོར་དངོས་རྗེས་གསུམ་ལས། དང་པོ་ནི། རྡོ་རྗེ་བཀོད་པ་ལས། དེ་ནས་དཀྱིལ་འཁོར་བྱ་བ་ནི། །གྲུ་གསུམ་ཆ་ནི་མཉམ་པ་ལ། །དབུས་སུ་གྲུ་གསུམ་ཁྲུ་གང་བརྐོ། །ཁ་ཁྱེར་གསུམ་རྩེ་སོར་བཞིའི་ཚད། །མུ་ཁྱུད་ཟླུམ་པོ་སོར་གསུམ་པ། །གྲུ་ཆད་བཞི་ཡི་རྣམ་པར་བརྒྱན། །ཕྱི་རིམ་འཁོར་ལོ་རྩིབས་བརྒྱད་པ། །བར་ཁྱམས་དང་ནི་སྒོ་བཞིར་བཅས། །ཕྱི་རིམ་མཐིང་ནག་མེ་རིས་བསྐོར། །ཞེས་དཀྱིལ་འཁོར་དང་འབྲེལ་བའི་དབང་དུ་བྱས་ནས་བཤད་ཅིང་། དེ་ལ་ནི་དབུས་ཀྱི་ཆར་བུད་ཤིང་ཁྲུ་གང་བ་ཟུར་གསུམ་དུ་བརྩིགས་ནས་དེའི་ནང་དུ་ཐལ་ཆེན་དང་། རོ་སོལ་དང་། མ་ཧེའི་རུས་པ་དང་། ཤི་སྐྲ་སོགས་འཇུག་པར་བཤད་པ་ཡིན་ནོ། །སྤྱིར་སྦྱིན་བསྲེག་ལ་སྒོ་རྫོགས་སྤང་བའི་མཐའ་མ་མཆིས་ཀྱང་བསྲེག་རྐྱང་དཀྱིལ་འཁོར་དང་མ་འབྲེལ་བའི་རིགས་ལ་རྡོ་རྗེ་ཁྲོས་པ་ལས། གནག་ཅིང་རྩུབ་པ་དྲག་པོའི་ཐབ། །རིམ་པ་གསུམ་ལྡན་ཞལ་གྱི་དབྱིབས། །ཞེས་པ་དང་མཐུན་པར་ཕུར་པའི་རྒྱུད་སྡེ་གཞན་པ་ནས། ས་གཞི་ཁ་དོག་ནག་པོ་ལ། །གྲུ་གསུམ་ཁྲུ་གང་ཐུར་དུ་བརྐོ། །ཞེས་དང་། དེ་ལ་ཁ་ཁྱེར་གསུམ་དང་ལྡན། །ཐབས་དང་རྒྱར་ཡང་མཉམ་པ་ལ། །ཧོམ་ཁུང་སོར་ནི་བཞི་པར་བྱ། །དང་པོ་ལའང་ཐོད་པ་གསུམ། །བར་པ་དག་ལ་མཚོན་ཆ་ལྔ། །ཐ་མར་རྩང་དམར་དག་གིས་བསྐོར། །ཞེས་པས། མངོན་སྤྱོད་ཀྱི་ལས་ལ་འབྲས་བུ་འབྱིན་པའི་སར། ས་ཡི་ཆོ་ག་ལེགས་པར་བྱ་ཞིང་། གཞི་བདག་ལ་གཏོར་མ་བསྔོས་ཏེ་བདེན་ཚིག་གིས་བཀྲོལ། རྒྱལ་པོའི་ཆད་པ་དང་གཡུལ་གྱིས་ཕམ་པའི་ས་ལ་སྟེགས་བུ་གྲུ་གསུམ་པའི་རྩེ་མོ་ལྷོར་བལྟས་པ་བྱས་ལ་ཁྲག་དང་ཨ་མྲྀ་ཏས་ཆག་ཆག་གདབ་པའི་དབུས་སུ་རྒྱར་ཁྲུ་གང་། བྲབས་སུ་ཁྲུ་གང་ངམ་ཕྱེད་ཆ་ཐུར་དུ་བྲུས་པ་ལ། རོ་སོལ་དང་། ཐལ་ཆེན་དང་། དུག་ཁྲག་སྣ་ཚོགས་པས་བྱུག །ཁ་ཁྱེར་སོར་བཞི་ཕྱིར་བསྐྱེད་པ་ལ་ཐོད་པ་ཚར་གསུམ་བྲི། དེ་ནས་སོར་བཞི་གྱེན་དུ་སློང་བ་ལ་ཁྲག་སྣ་ཚོགས་བྱུག །དེ་ནས་སྟེང་གི་ཆ་སོར་བཞི་ལ་མདུང་དང་། རལ་གྲི། དགྲ་སྟྭ། མདའ། གཞུ་རྣམས་བྲི། དེའི་ཕྱི་ལྷ་གྲངས་དང་མཉམ་པའི་རྩང་དམར་གྱིས་བསྐོར། ཐབ་ཁུང་གི་དབུས་སུ་གཙོ་བོ་ཡབ་ཡུམ་གྱི་ཕྱག་མཚན་རྡོ་རྗེ་དང་ཐོད་པ་སྟེང་འོག་ཏུ་བྲི། གདུག་པ་ཅན་གྱི་ཤིང་རྣམས་ལ། །དྲག་པོའི་སྔགས་ཀྱིས་བཏབ་ནས་ཀྱང་། །དབུས་ཀྱི་གྲུ་གསུམ་ནང་དུ་གཞུག །དམར་གཏོར་དང་ནི་ཉུང་དཀར་དང་། །ལྕགས་ཕྱེ་དང་ནི་རྡོ་ཕྱེ་དང་། །དུག་གཏོར་ལ་སོགས་འགྲམ་དུ་བཞག །གཟུགས་དང་མིང་རུས་ལ་སོགས་པ། །རལ་གྲིས་དུམ་བུར་གཏུབས་ནས་ནི། །བྷནྡྷའི་ནང་དུ་གཞག་པར་བྱ། །སྐྱེར་ཚེར་དང་ནི་མར་ཁུ་དང་། །རོ་ཤུན་རས་ཀྱི་དེ་དག་བྱ། །ཞེས་དང་། ཤ་ཁྲག་རུས་པ་གུ་གུལ་ནག །དུག་ཁྲག་སྙིང་སྣ་ཚོགས་ཚད་རྣམས། །ཟའོ་མར་ཁུ་སྐྱེ་ཚེ་མར། །བོང་བུ་རྔ་མོའི་སྦངས་དང་ནི། །བྱ་རོག་འུག་པའི་ཤ་དང་བཅས། །རྔ་མོང་མ་ཧེ་གླང་གི་ཤ། །ཆང་དང་མི་ཤ་ཉ་ཡི་ཤ །སྦལ་པ་ལྕོང་མོ་སྦྲུལ་གྱི་ཤ །བསྲེགས་པས་ལས་རྣམས་ཐམས་ཅད་འགྲུབ། །ཅེས་པ་རྣམས་ལས་གང་འགྲུབ་ཚོགས་པར་བྱ། ཚེར་མ་ཅན་དང་། དུག་ཤིང་། ཆུ་ཤིང་། སྦྱང་ཤིང་ལ་སོགས་རེག་བྱ་རྩུབ་ལ་ཁ་དོག་ནག་པའི་བུད་ཤིང་ཟུར་གསུམ་པས་ཐབ་ཀྱི་ནང་དུ་ཟུར་གསུམ་དུ་གཅེར། གོང་དུ་ངན་སྔགས་ཉེ་བར་བསྙེན་པའི་ལིང་རོའི་སུམ་ཆ་བཞག་པ་ཡང་ཐབ་ནང་དུ་བཅུག །ཐོད་ངན་གྱི་སྣོད་དུ་དམར་གྱི་ཨརྒྷཾ། དུག་སྣ་ཚོགས་པའི་མེ་ཏོག །ཤ་ཆེན་གྱི་བསུར་དུད། ཞུན་ཆེན་གྱི་མར་མེ། ཙིཏྟའི་དཔལ་བཤོས། དུག་གཏོར། སྨན་རག་ལ་སོགས་པའི་མཆོད་རྫས་བཤམ། རབས་ཆད་ཀྱི་ཐོད་པར་གོང་གི་བསྲེག་རྫས་རྣམས་དང་། དུམ་བུ་དྲུག་པའི་སྣོད་དུ་ལིངྒ་ཆུང་བ་མིང་རུས་ཅན་བརྒྱ་རྩ་བརྒྱད། མཆོག་ཆེན་གྱི་རྐང་བའི་དགང་བླུགས། ཞིང་ཕོ་མོ་ལས་བྱུང་བའི་སྤུད་པའམ། རོ་རས་ཀྱི་རླུང་གཡབ་ཀྱང་བསག་གོ །གཉིས་པ་ནི་རྒྱུད་ལས། ཡང་ན་དཀྱིལ་འཁོར་ཆེན་པོ་དང་། །འབྲེལ་བ་ཉིད་དུ་བྱ་བ་ཡི། །དཀྱིལ་འཁོར་རྣམ་གསུམ་རྫོགས་པ་དང་། །གང་ལ་དམིགས་པའི་ལིངྒ་ལ། །དགུག་གཞུག་ལས་རྣམས་ཤེས་པར་བྱ། །གཅད་དང་གཏུབ་དང་བཏབ་པ་རྣམས། །རྡོ་རྗེ་སྡེར་མོ་ལ་སོགས་བྱ། །དེ་ནས་མེ་ལྷ་སྤྱན་ཡང་དྲང་། །ཞེས་པས། དང་པོ་ལྷ་བསྙེན་གཞུང་བསྲང་བཟླས་པའི་བར་དུ་བྱས་ལ། ཚོགས་ཀྱི་མཆོད་པ་བྱ། ཚོགས་ཐ་མའི་མལ་དུག་དབལ་ས་ནི། སྤྲོ་ན་གསེར་སྐྱེམས་གཟུ་དཔང་གཏང་། དེ་ནས། ཧཱུཾ། དམ་ཚིག་ཆེན་པོའི་དུས་ལ་བབ། །སྤྲུལ་པ་ཆེན་པོའི་དུས་ལ་བབ། །ཕྱག་བརྙན་ཆེན་པོའི་དུས་ལ་བབ། །ཤྭ་ན་མུ་ཁའི་དུས་ལ་བབ། །ས་བདག་ཆེན་མོའི་དུས་ལ་བབ། །བདག་ཉིད་ཆེན་མོའི་དུས་ལ་བབ། །ཁྱེད་ཀྱི་དམ་ཚིག་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །ཧཱུྃ། དངོས་གྲུབ་བར་ཆད་བྱེད་པའི་བགེགས། །གདུབ་ཅིང་སྡང་སེམས་ལྡན་པ་རྣམས། །ཟུང་ཤིག་ཆིངས་ཤིག་རྣམ་པར་ཆིངས། །གཏོགས་ཤིག་སྲོག་དང་བྲལ་བར་གྱིས། །རིངས་པར་ཁུག་ལ་སྨྲར་ཆུག་ཅིག །ཕོབ་ཅིག་རྣམ་པར་གཟིར་བར་གྱིས། །ལུས་ངག་རྡུལ་ཕྲན་བཞིན་དུ་ལྷོགས། །ང་ཡི་དབང་དུ་གྱུར་ནས་ཀྱང་། །བསྒོ་བའི་བཀའ་རྣམས་ཉན་པར་བྱོས། །ཨཱོཾ་བཛྲ་ཀཱི་ལི་ཀཱི་ལ་ཡ་ཛཿཧཱུཾ་བཾ་ཧོཿ ཆེ་གེ་མོ་ཧ་ས་ཡ་ར་ཧྲི་ཧ་ན་ཨ་བེ་ཤ་ཡ་ཨ་བེ་ཤ་ཡ། ཤི་ཏྲི་ཨ་ན་ཡཱ། ཤི་ཀྲི་ཨ་ན་ཡ། ཛྭ་ལ་པ་ཡ་ཛྭ་ལ་པ་ཡ། ཏ་ཐཱ་ཡ་ཏ་ཐཱ་ཡ། བྷནྡྷ་ཡ་བྷནྡྷ་ཡ་སརྦ་བིག་ནན་བཾ་ཧཱུཾ་ཕཊཿ ཚེེ་ལུང་ཁྲུས་ལུང་གི་དགོངས་པས། ཧཱུཾ། སྙིང་རྗེས་བསྒྲལ་བའི་དམ་ཚིག་ནི། །གསད་ཅིང་མནན་པ་མ་ཡིན་ཏེ། །ཕུང་པོ་རྡོ་རྗེས་གཏམས་བྱས་ནས། །རྣམ་པར་ཤེས་པ་རྡོ་རྗེར་སྒོམ། །ཨཱོཾ་ལཾ་ཧཱུཾ་ལཾ། སྟྭཾ་བྷ་ནན། མོ་ཧ་གྷ་ཡ་བྷ་ག་ཝ་ན། ཤི་ཀྲི་བི་ཀྲི། ཤྲཱི་བཛྲ་ཧཱུཾ་ཀཱ་ར་ཧཱུཾ་ཕཊ། ཧཱུཾ་བདག་ཅག་རྣལ་འབྱོར་སྒྲུབ་པ་པོས། །བྱང་ཆུབ་མཆོག་ཏུ་སེམས་བསྐྱེད་ཅིང་། །དུས་གསུམ་རྒྱལ་བའི་གདུང་གསོབ་པའི། །རིག་འཛིན་བདག་ཅག་རྣམས་ལ་ནི། །གནོད་ཅིང་གདུག་པའི་དགྲ་དང་བགེགས། །བདུད་དང་བར་དུ་གཅོད་པ་དང་། །དངོས་གྲུབ་འཕྲོག་ཅིང་འཚེ་བ་རྣམས། །ཁྲོ་བོ་ཆེན་པོའི་བྱིན་རླབས་ཀྱིས། །ཡུད་ཙམ་གྱིས་ནི་འདིར་ཁུག་ལ། །མངོན་སྤྱོད་ཚུལ་བཞིན་བསྒྲལ་བ་དང་། །ལུས་ངག་རྡུལ་དུ་བཤིག་ནས་ཀྱང་། །སྡུག་བསྔལ་ཉམས་སུ་མྱོང་བར་མཛོད། །ཁྲོ་བཅུའི་བསྒྲལ་དམིགས་དང་ལྡན་པས། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུཾ་བཾ་ཧོཿ ཧ་ན་ཧ་ན་ཧཱུཾ་ཕཊ། ད་ཧ་ད་ཧ་ཧཱུཾ་ཕཊ། པ་ཙ་པ་ཙ་ཧཱུཾ་ཕཊ། མ་ཐ་མ་ཐ་ཧཱུཾ་ཕཊ། ཛྭ་ལ་ཛྭ་ལ་ཧཱུཾ་ཕཊ། སུ་རུ་སུ་རུ་ཧཱུཾ་ཕཊ། མུ་རུ་མུ་རུ་ཧཱུཾ་ཕཊ། ཀ་ཏང་ཀ་ཏེ་ཡ་ཧཱུཾ་ཕཊ། ཛ་ཡེ་བི་ཛ་ཡེ་ཧཱུཾ་ཕཊ། ཨ་ཙི་ཏ་ཨ་པ་ར་ཙི་ཏ་མ་ར་ས་ནི་པྲ་མརྟ་ནི་ཡེ་སརྦ་བིག་ནན་བཾ་ཧཱུཾ་ཕཊ། ཁྲོ་མོ་བཅུ་ཡི་བསྒྲལ་དམིགས་ཀྱིས། ཧཱུཾ། གདུག་ཅིང་སྡང་སེམས་ལྡན་པ་རྣམས། །ལྷའམ་གནོད་སྦྱིན་བདུད་ཀྱང་རུང་། །ང་ལ་བར་ཆད་བྱེད་པ་རྣམས། །མཐུ་དང་རྫུ་འཕྲུལ་མེད་པར་མཛོད། །ཨོཾ་བཛྲ་ཀཱི་ལི་ཀཱི་ལ་ཡ་ཛ་ཧཱུཾ་བཾ་ཧོཿ པ་ར་བིག་ཏན་ཧཱུཾ་ཕཊ། ཚིནྡྷ་ཚིནྡྷ་ཧཱུཾ་ཕཊ། བིནྡྷ་བིནྡྷ་ཧཱུཾ་ཕཊ། གྷྲི་ཧ་ན་གྷྲི་ཧ་ན་ཧཱུཾ་ཕཊ། ཧ་ན་ཧ་ན་ཧཱུཾ་ཕཊ། བྷནྡྷ་བྷནྡྷ་ཧཱུཾ་ཕཊ། སརྦ་ཨ་ན་ཡ་ཧཱུཾ་ཕཊ། ཏ་ཐཱ་ཡ་ཏ་ཐཱ་ཡ་སརྦ་བིག་ནན་བཾ་ཧཱུཾ་ཕཊ། སྒོ་མ་བཞིའི། ཧཱུཾ། བྲན་དང་བཀའ་ཉན་ཕོ་ཉའི་ཚོགས། །ཁྱེད་ཀྱི་དམ་ཚིག་དུས་ལ་བབ། །སྔོན་ཆད་ཇི་ལྟར་དམ་བཅས་པའི། །མངོན་སྤྱོད་ཕྲིན་ལས་མྱུར་དུ་མཛོད། །གསད་གྲིས་ཉ་བོ་གཏུབ་ཅིང་། ཨཱོཾ་བཛྲ་ཀཱི་ལི་ཀཱི་ལ་ཡ་ཛཿཧཱུཾ་བཾ་ཧོཿ མ་ཐ་མ་ཐ་བཛྲ། ཛྭ་ལ་ཛྭ་ལ་བཛྲ། སུ་རུ་སུ་རུ་བཛྲ། མུ་རུ་མུ་རུ་བཛྲ། སརྦ་བི་ག་ནན་བཾ་ཧཱུྃ་ཕཊ། ཐུན་དབབ་པ་ནི། ཧཱུཾ། རྡོ་རྗེ་གསང་བའི་བཀའ་ལས་ནི། །སྡིག་ཅན་གང་ཞིག་འདའ་བྱེད་པ། །སྟོབས་ཆེན་ཁྲོ་བོ་ཆེན་པོ་ཡིས། །ཀླད་པ་ཚལ་པ་བརྒྱ་རུ་ཁོས། །ཉོན་ཅིག་བགེགས་དང་ལོག་འདྲེན་ཚོགས། །ང་ཡི་བཀའ་ལ་འདའ་མ་བྱེད། །ཨཱོཾ་བཛྲ་ཀཱི་ལི་ཀཱི་ལ་ཡ་ཛཿཧཱུཾ་བཾ་ཧོཿ ཀ་ཏང་ཀ་ཏེ། ཛ་ཡེ་ཏ་བི་ཛ་ཡེ་ཏེ། ས་ཙི་ཏེ། ཨ་པ་ར་ཙི་ཏེ། མ་ར་སྱེ་ན་པྲ་མརྟ་ནི་ཡེ་ཧཱུཾ་མ་མ་པཱ་ཤཾ་ཀུ་རུ་མ་ཏཾ་ཉ་ཀ་ར་ཨི་ནན་དྷ་ཏི་མ་མ་ཀརྨཱ་ཐཱི་ཀྲཾ་ཀ་ཏེ་ཡ་སརྦ་བིག་ནན་བཾ་ཧཱུཾ་ཕཊ། གཏུན་བུ་བརྡུང་བ་ནི། ཧཱུཾ། རྡུངས་ཤིག་རྡོ་རྗེ་འབར་བའི་གཏུན། །བཀའ་ལས་འདའ་བྱེད་སྡིག་ཅན་རྣམས། །རྡོ་རྗེ་མེ་དབལ་སྙིང་བསྲེགས་ནས། །ལུས་ངག་རྡུལ་ཕྲན་བཞིན་དུ་ལྷོགས། །ཁྲོ་མོ་འབར་བའི་གཏུན་ཁུང་དུ། །རྡོ་རྗེ་ཐོ་བས་བརྡུངས་བྱས་ནས། །ལྷ་ཡང་རུང་སྟེ་བརླག་པར་འགྱུར། །ཁ་ཐམ་ཁ་ཐམ་ཞེས་ཉི་ཤུ་རྩ་གཅིག་བརྗོད། ཞལ་དུ་བསྟབ་པ་ནི། ཧཱུཾ། བདག་ཉིད་ཆེན་པོའི་དུས་ལ་བབ། །ཁྱེད་ཀྱི་དམ་ཚིག་དུས་ལ་བབ། །ང་ཡི་དབང་དུ་གྱུར་ནས་ཀྱང་། །བསྒོ་བའི་བཀའ་ནི་ཉན་པར་བྱོས། །ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། ཨཱོཾ་བཛྲ་ཀཱི་ལི་ཀཱི་ལ་ཡ་བཛྲ་ཡཀྴ་ཀྲོ་དྷ་ཁཱ་ཧི་ཧ་ཧ་ཧ། ཞེས་བརྗོད་ལ། ལིངྒ་རྣམས་བསྲེག་རྫས་ཀྱི་གཙོ་བོར་བཞག་གོ །དེ་ནས་རྣལ་འབྱོར་པ་རྣམས་ཁྲོས་པའི་སེམས་ཀྱི་ཁ་ལྷོ་ཕྱོགས་གདོང་ལ་ཐལ་ཆེན་བྱུགས། སྟན་ནག་པོའི་སྟེང་མངོན་སྤྱོད་ཀྱི་ཆས་སུ་ཞུགས་ལ། གདོལ་ཤན་ནམ། དུར་ཁྲོད་ལས་བྱུང་བའི་མི་རོ་སྐྲ་དང་བཅས་པའི་དཔལ་འབར་གྱིས་སྦར་ཞིང་། རླུང་གཡོབ་དང་བཅས། ཛཿཧཱུཾ་བཾ་ཧོཿ ཨོཾ་ཨགྣེ་ཛ་ལ་རཾ། ཞེས་བརྗོད་པས་རཾ་དམར་ནག་གཅིག་ཏུ་གྱུར། དེ་ཡོངས་སུ་གྱུར་པ་ལས། ཧཱུཾ། གྲུ་གསུམ་མེ་ཡི་དཀྱིལ་འཁོར་ན། །དྲང་སྲོང་ཆེན་པོ་མེ་ཡི་ལྷ། །ཆིབས་སུ་ར་སྐྱེས་ཁམ་པ་ཆིབས། །སྐུ་ལ་མེ་ཡི་སློག་པ་གསོལ། །ཞལ་གསུམ་ཕྱག་དྲུག་ཁྲོ་ཚུལ་སྟོན། །སྐུ་མདོག་འདོད་དགུར་བསྒྱུར་མཛད་ཅིང་། །ཕྱག་དྲུག་མཛེས་པའི་མཚོན་ཆ་ནི། །གྷནྡྷེ་མེ་ཐབ་བགྲང་ཕྲེང་དང་། །སྤྱི་བླུགས་སྐྱབས་སྦྱིན་ཕུར་བུ་བསྣམས། །རྡོ་རྗེ་ཕུར་པའི་ཞབས་དང་ལྡན། །དུས་གསུམ་རྒྱལ་བའི་སྐུ་བརྙེས་པ། །གདུག་བྱེད་དྲག་པོ་མེ་ཡི་ལྷ། །གདུག་པའི་ཚོགས་ཀུན་བསྲེག་པར་བྱེད། །གང་ཡིན་ཞིང་བཅུ་འཚིག་པར་མཛོད། ཧཱུཾ། ཕྱོགས་སྐྱོང་རྒྱལ་པོ་མེ་ཡི་ལྷ། །སྟེང་ཕྱོགས་འབར་བ་མེ་ཡི་ལྷ། །ཕྱག་གཡས་མདའ་གཞུ་རང་འགེངས་བསྣམས། །གཡོན་པ་མེ་ཡི་ཕུང་པོར་འབར། །དཀར་བའི་ཞལ་ནི་གཏིང་ནས་མཐིང་། །བུས་ཤིག་བུས་ཤིག་མེ་བུས་ཤིག །རྒྱ་མཚོའི་གཏིང་ནས་མེ་ལོང་ལ། །རི་རབ་རྩེ་ནས་མེ་བུས་ཤིག །ཉམས་པ་གང་ཡིན་འཚིག་པར་མཛོད། །འབྱུང་པོ་གང་ཡིན་འཚིག་པར་མཛོད། །ཧཱུཾ། ཕྱོགས་སྐྱོང་རྒྱལ་པོ་མེ་ཡི་ལྷ། །ཤར་ཕྱོགས་འབར་བ་མེ་ཡི་ལྷ། །ཕྱག་གཡས་འཁོར་ལོ་དཀར་པོ་བསྣམས། །གཡོན་པ་མེ་ཡི་ཕུང་པོ་བསྣམས། །སྐུ་མདོག་དཀར་པོ་ཤིན་ཏུ་གསལ། །བུས་ཤིག་བུས་ཤིག་མེ་བུས་ཤིག །རྒྱ་མཚོའི་གཏིང་ནས་མེ་ལོང་ལ། །རི་རབ་རྩེ་ནས་མེ་བུས་ཤིག །ཉམས་པ་གང་ཡིན་འཚིག་པར་མཛོད། །འབྱུང་པོ་གང་ཡིན་འཚིག་པར་མཛོད། །ཧཱུཾ། ཕྱོགས་སྐྱོང་རྒྱལ་པོ་མེ་ཡི་ལྷ། །ཤར་ལྷོ་འབར་བ་མེ་ཡི་ལྷ། །ཕྱག་གཡས་དགྲ་སྟྭ་རབ་ཏུ་འདེབས། །གཡོན་པ་མེ་ཡི་ཕུང་པོ་བསྣམས། །དམར་སྔོན་སྐུ་མདོག་རབ་ཏུ་གསལ། །བུས་ཤིག་བུས་ཤིག་མེ་བུས་ཤིག །རྒྱ་མཚོའི་གཏིང་ནས་མེ་ལོང་ལ། །རི་རབ་རྩེ་ནས་མེ་བུས་ཤིག །ཉམས་པ་གང་ཡིན་འཚིག་པར་མཛོད། །འབྱུང་པོ་གང་ཡིན་འཚིག་པར་མཛོད། །ཧཱུྃ། ཕྱོགས་སྐྱོང་རྒྱལ་པོ་མེ་ཡི་ལྷ། །ལྷོ་ཕྱོགས་འབར་བ་མེ་ཡི་ལྷ། །ཕྱག་གཡས་དགྲ་སྟྭ་རབ་ཏུ་འདེབས། །གཡོན་པ་མེ་ཡི་ཕུང་པོ་བསྣམས། །སྐུ་མདོག་སྔོན་མོ་ཤིན་ཏུ་གསལ། །བུས་ཤིག་བུས་ཤིག་མེ་བུས་ཤིག །རྒྱ་མཚོའི་གཏིང་ནས་མེ་ལོང་ལ། །རི་རབ་རྩེ་ནས་མེ་བུས་ཤིག །ཉམས་པ་གང་ཡིན་འཚིག་པར་མཛོད། །འབྱུང་པོ་གང་ཡིན་འཚིག་པར་མཛོད། །ཧཱུྃ། ཕྱོགས་སྐྱོང་རྒྱལ་པོ་མེ་ཡི་ལྷ། །ལྷོ་ནུབ་འབར་བ་མེ་ཡི་ལྷ། །ཕྱག་གཡས་རལ་གྲི་རབ་ཏུ་འདེབས། །གཡོན་པ་མེ་ཡི་ཕུང་པོ་བསྣམས། །ལྗང་སྔོན་སྐུ་མདོག་རབ་ཏུ་གསལ། །བུས་ཤིག་བུས་ཤིག་མེ་བུས་ཤིག །རྒྱ་མཚོའི་གཏིང་ནས་མེ་ལོང་ལ། །རི་རབ་རྩེ་ནས་མེ་བུས་ཤིག །ཉམས་པ་གང་ཡིན་འཚིག་པར་མཛོད། །འབྱུང་པོ་གང་ཡིན་འཚིག་པར་མཛོད། །ཧཱུྃ། ཕྱོགས་སྐྱོང་རྒྱལ་པོ་མེ་ཡི་ལྷ། །ནུབ་ཕྱོགས་འབར་བ་མེ་ཡི་ལྷ། །གཡས་པས་སྤུ་གྲིའི་རབ་ཏུ་གཅོད། །གཡོན་པ་མེ་ཡི་ཕུང་པོ་བསྣམས། །སྐུ་མདོག་དམར་པོ་རབ་ཏུ་གསལ། །བུས་ཤིག་བུས་ཤིག་མེ་བུས་ཤིག །རྒྱ་མཚོའི་གཏིང་ནས་མེ་ལོང་ལ། །རི་རབ་རྩེ་ནས་མེ་བུས་ཤིག །ཉམས་པ་གང་ཡིན་འཚིག་པར་མཛོད། །འབྱུང་པོ་གང་ཡིན་འཚིག་པར་མཛོད། །ཧཱུྃ། ཕྱོགས་སྐྱོང་རྒྱལ་པོ་མེ་ཡི་ལྷ། །ནུབ་བྱང་འབར་བ་མེ་ཡི་ལྷ། །ཕྱག་གཡས་རྡུལ་གཡབ་བ་དན་བསྣམས། །གཡོན་པ་མེ་ཡི་ཕུང་པོ་བསྣམས། །སྐུ་མདོག་དམར་སྐྱ་ཤིན་ཏུ་གསལ། །བུས་ཤིག་བུས་ཤིག་མེ་བུས་ཤིག །རྒྱ་མཚོའི་གཏིང་ནས་མེ་ལོང་ལ། །རི་རབ་རྩེ་ནས་མེ་བུས་ཤིག །ཉམས་པ་གང་ཡིན་འཚིག་པར་མཛོད། །འབྱུང་པོ་གང་ཡིན་འཚིག་པར་མཛོད། །ཧཱུྃ། ཕྱོགས་སྐྱོང་རྒྱལ་པོ་མེ་ཡི་ལྷ། །བྱང་ཕྱོགས་འབར་བ་མེ་ཡི་ལྷ། །ཕྱག་གཡས་རྒྱ་གྲམ་རབ་ཏུ་འཛིན། །གཡོན་པ་མེ་ཡི་ཕུང་པོ་བསྣམས། །ལྗང་ནག་ཤིན་ཏུ་གསལ་བའི་སྐུ། །བུས་ཤིག་བུས་ཤིག་མེ་བུས་ཤིག །རྒྱ་མཚོའི་གཏིང་ནས་མེ་ལོང་ལ། །རི་རབ་རྩེ་ནས་མེ་བུས་ཤིག །ཉམས་པ་གང་ཡིན་འཚིག་པར་མཛོད། །འབྱུང་པོ་གང་ཡིན་འཚིག་པར་མཛོད། །ཧཱུྃ། ཕྱོགས་སྐྱོང་རྒྱལ་པོ་མེ་ཡི་ལྷ། །བྱང་ཤར་འབར་བ་མེ་ཡི་ལྷ། །གཡས་པ་ཁ་ཊྭཱཾ་རྩེ་གསུམ་བསྣམས། །གཡོན་པ་མེ་ཡི་ཕུང་པོ་བསྣམས། །ལྗང་སེར་ཤིན་ཏུ་གསལ་བའི་སྐུ། །བུས་ཤིག་བུས་ཤིག་མེ་བུས་ཤིག །རྒྱ་མཚོའི་གཏིང་ནས་མེ་ལོང་ལ། །རི་རབ་རྩེ་ནས་མེ་བུས་ཤིག །ཉམས་པ་གང་ཡིན་འཚིག་པར་མཛོད། །འབྱུང་པོ་གང་ཡིན་འཚིག་པར་མཛོད། ཧཱུྃ། ཕྱོགས་སྐྱོང་རྒྱལ་པོ་མེ་ཡི་ལྷ། །འོག་ཕྱོགས་འབར་བ་མེ་ཡི་ལྷ། །ཕྱག་གཡས་ཐོ་བ་གཏུན་ཤིང་བསྣམས། །གཡོན་པ་མེ་ཡི་ཕུང་པོ་བསྣམས། །དུད་ཁ་ཤིན་ཏུ་གསལ་བའི་སྐུ། །བུས་ཤིག་བུས་ཤིག་མེ་བུས་ཤིག །རྒྱ་མཚོའི་གཏིང་ནས་མེ་ལོང་ལ། །རི་རབ་རྩེ་ནས་མེ་བུས་ཤིག །ཉམས་པ་གང་ཡིན་འཚིག་པར་མཛོད། །འབྱུང་པོ་གང་ཡིན་འཚིག་པར་མཛོད། །ཞེས་པས་གསལ་གདབ་པ་ནི། སྦྱིན་བསྲེག་གི་ལས་ལ་དབང་བའི་དོན་དུ་མེ་ལྷ་ལྷར་ཤེས་པའི་དགོངས་པ་སྟེ། རྒྱུད་ལས། རྣམ་གསུམ་མཆོད་པ་ལྷ་ལ་འབུལ། །མཉེས་པ་ལྷ་ཡིས་དངོས་གྲུབ་སྟེར། །ལྷ་ཡང་དྲག་པོ་མེ་ཡི་ཆས། །རབ་ཏུ་འབར་བའི་ནང་ན་བཞུགས། །ཞེས་པའི་དོན་ནོ། །དེ་ནས་སྤྱན་དྲང་བ་ནི། ཧཱུྃ། དད་པ་དང་ནི་དམ་ཚིག་གིས། །ཚུར་གཤེགས་མེ་ཡི་རྒྱལ་པོ་ཆེ། །བསྲེག་བླུགས་ཞལ་ཟས་བཞེས་སུ་གསོལ། །འབར་བའི་གདན་ལ་བཞུགས་ནས་ཀྱང་། །ལས་རྣམས་འགྲུབ་པར་མཛད་པ་དང་། །དངོས་གྲུབ་ཚུལ་བཞིན་སྩལ་དུ་གསོལ། །ཨགྣ་ཡེ་རཱ་ཛ་ས་མ་ཡ་ཛཿ ཞེས་དང་། ཛཿཧཱུྃ་བཾ་ཧོཿས་བསྟིམ། ཨོཾ་བཛྲ་ཨཉྫ་ལ་ནཱཾ་ཨཱ་ཧཱུྃ་གིས་ཞབས་བསིལ་དབུལ། དེ་ནས་སྣུམ་ཆེན་གྱི་དགང་བླུགས་གསུམ་དབུལ་ཞིང་། ཨོཾ་ཨགྣ་ཡེ་ཧ་བྱ་ཀ་བྱ། བྷ་ཧ་མ་ན་ཡེ་ཆེ་གེ་མོ་མཱ་ར་ཡ་ཕཊ། ཅེས་དང་། བསྲེག་རྫས་རྣམས། ཨགྣ་ཡེ་ཛྭ་ལ་རཾ་ཆེ་གེ་མོ་མཱ་ར་ཡ་ཕཊ། ཅེས་རིམ་པ་བཞིན་དུ་དབུལ་རྗེས་སྣུམ་ཆེན་གྱི་དགང་བླུགས་གསུམ་ཕུལ་རྗེས་བསྟོད་པ་ནི། ཧཱུྃ། ཚངས་པ་འཇིག་རྟེན་མགོན་གྱི་སྲས། །དྲང་སྲོང་ཆེན་པོའི་ཆ་བྱད་ཅན། །ཚངས་པའི་སྐུད་པས་རབ་དགེ་བ། །རིན་ཆེན་རུས་པའི་རྒྱན་གྱིས་མཛེས། །ཞལ་གསུམ་ཕྱག་དྲུག་ཁྲོ་ཚུལ་སྟོན། །སྐུ་མདོག་འདོད་དགུར་བསྒྱུར་མཛད་ཅིང་། །ཕྱག་དྲུག་མཛེས་པའི་མཚོན་ཆ་ནི། །གྷུནྡྷེ་མེ་ཐབ་བགྲང་ཕྲེང་དང་། །སྤྱི་བླུགས་སྐྱབས་སྦྱིན་ཕུར་བུ་བསྣམས། །རྒྱུད་དྲུག་རྩད་ནས་གཅོད་ལ་བསྟོད། །རྡོ་རྗེ་ཕུར་པའི་ཞབས་དང་ལྡན། །ཆུ་སྐྱེས་ཉི་མའི་སྟེང་ན་བཞུགས། །དག་བྱེད་ར་ཡི་སྟན་ལ་འདུག །བདུད་རྣམས་འདུལ་ལ་བདག་བསྟོད་དོ། །ཞེས་དང་། དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱི་སྡོང་གྲོགས་མཛོད། །དུས་མིན་འཆི་དང་ནད་རྣམས་དང་། །གདོན་དང་དགྲ་བོ་བརླག་པར་མཛོད། །ཅེས་ཕྲིན་ལས་བཅོལ། དེ་ནས་ལས་ཀྱི་དངོས་གྲུབ་ཐོབ་པའི་ཕྱིར། མེ་ལྷ་ཉིད་ཡེ་ཤེས་ལྷའི་ཕོ་བྲང་དུ་ཤེས་པར་བྱས་ནས་མངོན་སྤྱོད་ཀྱི་ལས་སྒྲུབ་པ་ནི། ལས་ཆུས་བསང་ཞིང་། མེ་ལྷའི་ལྟོ་བ་ཡངས་ཤིང་རྒྱ་ཆེའི་དབུས། །རཀྟའི་རྒྱ་མཚོ་ཆེན་པོ་འཁྱིལ་བའི་ཀློང་། །ཞེས་པ་ནས། ཕྱག་རྒྱ་ཆེན་པོར་བདག་སྦྱོར་ཅིག །ཞེས་པའི་བར་ཞི་བའི་སྦྱིན་བསྲེག་ལྟར་དང་། དེ་ནས་བསྲེག་རྫས་དབུལ་བ་ནི། ཁྲག་འཐུང་གི་ལྷ་ཚོགས་རྣམས་ཞལ་ཧོམ་ཁུང་ལྟ་བུར་གདངས་པའི་ནང་དུ་གནོད་བྱེད་དགྲ་བགེགས་ཀྱི་ངོ་བོ་བསྲེག་བླུགས་ཀྱི་རྣམ་པར་ཕུལ་བས་དགྱེས་པའི་གད་མོས་སྲིད་གསུམ་ཐམས་ཅད་ཀྱང་གཡོ་ཞིང་འདར་བར་གྱུར། སྣུམ་ཆེན་གྱིས་དགང་བླུགས་དབུལ་ཞིང་། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོ་སརྦ་བིག་ནན་བཾ་ཧཱུྃ་ཕཊ། ལན་བདུན་མཐར། སརྦ་ཤ་ཏྲཱུཾ་ཆེ་གེ་མོ་ཨ་མུ་ཀ་བཛྲ་རཱུ་པ་མཱ་ར་ཡ་ཕཊ། ལན་གསུམ་གྱིས་བསྐོར་ནས་དབུལ། དེ་ནས་བསྲེག་རྫས་དབུལ་བ་ནི། ཧཱུྃ། འབྱུང་པོའི་ཤ་ནི་ཟན་བས་ཞིམ། །གཏི་མུག་མཆོད་པ་བླ་ན་མེད། །བླ་མེད་མཆོད་པ་འདི་འབུལ་གྱིས། །སྐུ་ཡི་དངོས་གྲུབ་སྩལ་དུ་གསོལ། །འབྱུང་པོའི་ཁྲག་ནི་ཆང་བས་ཞིམ། །འདོད་ཆགས་མཆོད་པ་བླ་ན་མེད། །བླ་མེད་མཆོད་པ་འདི་འབུལ་གྱིས། །གསུང་གི་དངོས་གྲུབ་སྩལ་དུ་གསོལ། །འབྱུང་པོའི་བརླ་རྐང་མར་བས་ཞིམ། །ཞེ་སྡང་མཆོད་པ་བླ་ན་མེད། །བླ་མེད་མཆོད་པ་འདི་འབུལ་གྱིས། །ཐུགས་ཀྱི་དངོས་གྲུབ་སྩལ་དུ་གསོལ། །དུག་གསུམ་མཆོད་པ་བླ་ན་མེད། །སྦྱིན་སྲེག་མཆོད་པ་འདི་འབུལ་གྱིས། །སྐུ་གསུང་ཐུགས་ཀྱི་དངོས་གྲུབ་སྩོལ། །ཧཱུྃ། མེ་ཡི་རྒྱལ་པོ་ཁྲོ་བོའི་སྐུ། །འུར་འུར་ཆེམ་ཆེམ་འབར་བའི་འོད། །ཁམས་གསུམ་འཁོར་བ་གཞོམ་པ་དང་། །ཉོན་མོངས་ལོག་ལྟ་བསྲེག་པའི་ཕྱིར། །ཡེ་ཤེས་མེ་ཆེན་འབར་བ་ཡིས། །འཁོར་བའི་བག་ཆགས་བསྲེག་པ་དང་། །དངོས་གྲུབ་འཚེ་བའི་གདུག་པ་ཅན། །ཁྲོ་རྒྱལ་འབར་བའི་མེ་ལ་བསྲེག །ཅེས་བརྗོད་ལ། སྣུམ་ཆེན་རེ་དང་། ཡམ་ཤིང་དང་། ལིངྒ་དང་། བསྲེག་རྫས་རྣམས། ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་མོ་ཛྭ་ལ་རཾ་མཱ་ར་ཡ་སརྦ་བིག་ནན་བཾ་ཧཱུྃ་ཧཱུྃ་ཕཊ། ཅེས་པའི་སྔགས་རེ་དང་བསྟུན་རྗེས། ཕྲིན་བཅོལ་ནི། ཧཱུྃ། སངས་རྒྱས་བསྟན་པ་བཤིག་པ་དང་། །དཀོན་མཆོག་སྐུ་དགྲ་དབེན་རྩ་འཇོམས། །ཆོས་ཁྲིམས་འདྲལ་དང་སློབ་དཔོན་དགྲ། །རྣལ་འབྱོར་འཇོམས་པ་ལ་སོགས་པ། །གསད་དང་དབབ་དང་ནད་ངན་གྱིས། །ཇི་ནས་བརླག་པར་ཁྱེད་ཀྱིས་གྱིས། །ཞེས་བརྗོད། དེ་བཞིན་དུ། རྫས་སྣ་བཞི་པོའི་མཐར། ཧཱུྃ། སངས་རྒྱས་བསྟན་པ་བཤིག་པ་དང་། །ཞེས་པས་ནས། ཇི་ནས་བརླག་པར་ཁྱེད་ཀྱིས་བགྱིས། །ཞེས་པའི་བར་ཚར་ཉི་ཤུ་དང་། དེ་ནས་ཁྲོ་བཅུ་སྤྲུལ་པ་དང་བཅས་པ་ལ་འབུལ་བ་ནི། ཧཱུྃ། སྟེང་ནས་རང་བྱུང་གྲུབ་པའི་ལྷ། །ཁྲོ་བོ་ཆེན་པོ་ཧཱུྃ་མཛད་དང་། །ཡུམ་ཆེན་རྡོ་རྗེ་སྒྲ་འབྱིན་མ། །སྤྲུལ་པ་ཕག་དང་སྨིག་བུའི་མགོ །ཡང་སྤྲུལ་དམ་ཅན་ཚོགས་བཅས་ལ། །དམ་རྫས་བདུད་རྩིའི་མཆོད་པ་འབུལ། །ཕྲིན་ལས་དྲག་པོས་གདུལ་ཕྱིར་དུ། །བསྲེག་རྫས་མཆོད་པ་བཞེས་སུ་གསོལ། །ཨོཾ་བཛྲ་ཀྲོ་ཏ་ཧཱུྃ་ཀཱ་ར་ཧཱུྃ་གརྫ་གརྫ་ཧཱུྃ་ཕཊ། ཨགྣེ་ཡེ་ཆེ་གེ་མོ་ཛྭ་ལ་རཾ། ཚར་རེ་དང་རྫས་སྣ་བཞི་སྤེལ་བ་ལན་ལྔ་འབུལ། དམོད་བཅོལ་ནི། ཧཱུྃ། གདུག་ཅིང་སྡང་སེམས་ལྡན་པ་རྣམས། །ལྷའམ་གནོད་སྦྱིན་བདུད་ཀྱང་རུང་། །ང་ལ་བར་ཆད་བྱེད་པ་རྣམས། །མཐུ་དང་རྫུ་འཕྲུལ་མེད་པར་གྱིས། །མངོན་སྤྱོད་དྲག་པོས་མྱུར་དུ་སྒྲོལ། །ཧཱུྃ། ཤར་ནས་རང་བྱུང་གྲུབ་པའི་ལྷ། །ཁྲོ་བོ་རྡོ་རྗེ་རྣམ་པར་རྒྱལ། །ཡུམ་ཆེན་རྡོ་རྗེ་སྙེམས་མ་དང་། །སྤྲུལ་པ་སྟག་དང་བྱ་རྒོད་མགོ །ཡང་སྤྲུལ་དམ་ཅན་ཚོགས་བཅས་ལ། །དམ་རྫས་བདུད་རྩིའི་མཆོད་པ་འབུལ། །ཕྲིན་ལས་དྲག་པོས་གདུལ་ཕྱིར་དུ། །བསྲེག་རྫས་མཆོད་པ་བཞེས་སུ་གསོལ། །ཨོཾ་བཛྲ་ཀྲོ་ཏ་བི་ཛ་ཡ་ཧཱུྃ་ཧ་ན་ཧ་ན་ཧཱུྃ་ཕཊ། ཨགྣ་ཡེ་ཆེ་གེ་མོ་མཱ་ར་ཡ་ཕཊ། ཅེས་གོང་བཞིན་རྫས་སྣ་བཞི་པོ་ལན་ལྔའི་མཐར། དམོད་བཅོལ་ནི། ཧཱུྃ། གདུག་ཅིང་སྡང་སེམས་ལྡན་པ་རྣམས། །ལྷའམ་གནོད་སྦྱིན་བདུད་ཀྱང་རུང་། །ང་ལ་བར་ཆད་བྱེད་པ་རྣམས། །མཐུ་དང་རྫུ་འཕྲུལ་མེད་པར་གྱིས། །མངོན་སྤྱོད་དྲག་པོས་མྱུར་དུ་སྒྲོལ། །ཧཱུྃ། ལྷོ་ནས་རང་བྱུང་གྲུབ་པའི་ལྷ། །ཁྲོ་བོའི་རྒྱལ་པོ་གཤིན་རྗེའི་གཤེད། །ཡུམ་ཆེན་རྡོ་རྗེ་དུར་ཁྲོད་དང་། །སྤྲུལ་པ་དྲེད་དང་བྱི་ལའི་མགོ །ཡང་སྤྲུལ་དམ་ཅན་ཚོགས་བཅས་ལ། །དམ་རྫས་བདུད་རྩིའི་མཆོད་པ་འབུལ། །ཕྲིན་ལས་དྲག་པོས་གདུལ་ཕྱིར་དུ། །བསྲེག་རྫས་མཆོད་པ་བཞེས་སུ་གསོལ། །ཨོཾ་བཛྲ་ཀྲོ་ཏ་ཡ་མཱནྟ་ཀ་ཧཱུྃ་པ་ཙ་པ་ཙ་ཧཱུྃ་ཕཊ། ཨགྣ་ཡེ་ཆེ་གེ་མོ་མཱ་ར་ཡ་ཧཱུྃ་ཕཊ། ཚར་རེ་དང་རྫས་སྣ་བཞི་སྤེལ་བ་ལན་ལྔ་འབུལ། དམོད་བཅོལ་ནི། ཧཱུྃ། གདུག་ཅིང་སྡང་སེམས་ལྡན་པ་རྣམས། །ལྷའམ་གནོད་སྦྱིན་བདུད་ཀྱང་རུང་། །ང་ལ་བར་ཆད་བྱེད་པ་རྣམས། །མཐུ་དང་རྫུ་འཕྲུལ་མེད་པར་གྱིས། །མངོན་སྤྱོད་དྲག་པོས་མྱུར་དུ་སྒྲོལ། །ཧཱུྃ། ནུབ་ནས་རང་བྱུང་གྲུབ་པའི་ལྷ། །ཁྲོ་བོའི་རྒྱལ་པོ་རྟ་མགྲིན་དབང་། །ཡུམ་ཆེན་རྡོ་རྗེ་གཏུམ་མོ་དང་། །སྤྲུལ་པ་བྱི་ལ་པུ་ཤུད་མགོ །ཡང་སྤྲུལ་དམ་ཅན་ཚོགས་བཅས་ལ། །དམ་རྫས་བདུད་རྩིའི་མཆོད་པ་འབུལ། །ཕྲིན་ལས་དྲག་པོས་གདུལ་ཕྱིར་དུ། །བསྲེག་རྫས་མཆོད་པ་བཞེས་སུ་གསོལ། །ཨོཾ་བཛྲ་ཀྲོ་ཏ་ཧྱ་གྷྲཱི་ཝ་ཧྲཱིཿཧུ་ལུ་ཧུ་ལུ་ཧཱུྃ་ཕཊ། ཨགྣ་ཡེ་ཆེ་གེ་མོ་མཱ་ར་ཡ་ཧཱུྃ་ཕཊ། ཚར་དེ་དང་རྫས་སྣ་བཞི་སྤེལ་བ་ལན་ལྔ་འབུལ། དམོད་བཅོལ་ནི། ཧཱུྃ། གདུག་ཅིང་སྡང་སེམས་ལྡན་པ་རྣམས། །ལྷའམ་གནོད་སྦྱིན་བདུད་ཀྱང་རུང་། །ང་ལ་བར་ཆད་བྱེད་པ་རྣམས། །མཐུ་དང་རྫུ་འཕྲུལ་མེད་པར་གྱིས། །མངོན་སྤྱོད་དྲག་པོས་མྱུར་དུ་སྒྲོལ། །ཧཱུྃ། བྱང་ནས་རང་བྱུང་གྲུབ་པའི་ལྷ། །ཁྲོ་བོ་ཆེན་པོ་བདུད་རྩི་འཁྱིལ། །ཡུམ་ཆེན་རྡོ་རྗེ་རླུང་འབྱིན་མ། །སྤྲུལ་པ་སེང་གེ་ཕ་ཝང་མགོ །ཡང་སྤྲུལ་དམ་ཅན་ཚོགས་བཅས་ལ། །དམ་རྫས་བདུད་རྩིའི་མཆོད་པ་འབུལ། །ཕྲིན་ལས་དྲག་པོས་གདུལ་ཕྱིར་དུ། །བསྲེག་རྫས་མཆོད་པ་བཞེས་སུ་གསོལ། །ཨོཾ་བཛྲ་ཀྲོ་ཏ་ཨ་མྲྀ་ཏ་ཀུཎྜ་ལི་ཧཱུྃ་ཚིནྡྷ་ཚིནྡྷ་ཧཱུྃ་ཕཊ། ཨགྣ་ཡེ་ཆེ་གེ་མོ་མཱ་ར་ཡ་ཧཱུྃ་ཕཊ། ཚར་རེ་དང་རྫས་སྣ་བཞི་སྤེལ་བ་ལན་ལྔ་འབུལ། དམོད་བཅོལ་ནི། ཧཱུྃ། གདུག་ཅིང་སྡང་སེམས་ལྡན་པ་རྣམས། །ལྷའམ་གནོད་སྦྱིན་བདུད་ཀྱང་རུང་། །ང་ལ་བར་ཆད་བྱེད་པ་རྣམས། །མཐུ་དང་རྫུ་འཕྲུལ་མེད་པར་གྱིས། །མངོན་སྤྱོད་དྲག་པོས་མྱུར་དུ་སྒྲོལ། ཧཱུྃ། ཤར་ལྷོ་རང་བྱུང་གྲུབ་པའི་ལྷ། །ཁྲོ་བོ་ཆེན་པོ་དབྱུག་སྔོན་ཅན། །ཡུམ་ཆེན་རྡོ་རྗེ་སྡེར་མོ་དང་། །སྤྲུལ་པ་གཡག་དང་བྱ་རོག་མགོ །ཡང་སྤྲུལ་དམ་ཅན་ཚོགས་བཅས་ལ། །དམ་རྫས་བདུད་རྩིའི་མཆོད་པ་འབུལ། །ཕྲིན་ལས་དྲག་པོས་གདུལ་ཕྱིར་དུ། །བསྲེག་རྫས་མཆོད་པ་བཞེས་སུ་གསོལ། །ཨོཾ་བཛྲ་ཀྲོ་ཏ་ནཱི་ལ་དཎྜ་ཧཱུྃ་ད་ཧ་ད་ཧ་ཧཱུྃ་ཕཊ། ཨགྣ་ཡེ་ཆེ་གེ་མོ་མཱ་ར་ཡ་ཧཱུྃ་ཕཊ། ཚར་རེ་དང་རྫས་སྣ་བཞི་སྤེལ་བ་ལན་སྔ་འབུལ། དམོད་བཅོལ་ནི། ཧཱུྃ། གདུག་ཅིང་སྡང་སེམས་ལྡན་པ་རྣམས། །ལྷའམ་གནོད་སྦྱིན་བདུད་ཀྱང་རུང་། །ང་ལ་བར་ཆད་བྱེད་པ་རྣམས། །མཐུ་དང་རྫུ་འཕྲུལ་མེད་པར་གྱིས། །མངོན་སྤྱོད་དྲག་པོས་མྱུར་དུ་སྒྲོལ། །ཧཱུྃ། ལྷོ་ནུབ་རང་བྱུང་གྲུབ་པའི་ལྷ། །ཁྲོ་བོ་ཆེན་པོ་མི་གཡོ་མགོན། །ཡུམ་ཆེན་རྡོ་རྗེ་གཏུན་ཁུང་དང་། །སྤྲུལ་པ་གཟིག་དང་ཁྭ་ཏའི་མགོ །ཡང་སྤྲུལ་དམ་ཅན་ཚོགས་བཅས་ལ། །དམ་རྫས་བདུད་རྩིའི་མཆོད་པ་འབུལ། །ཕྲིན་ལས་དྲག་པོས་གདུལ་ཕྱིར་དུ། །བསྲེག་རྫས་མཆོད་པ་བཞེས་སུ་གསོལ། །ཨོཾ་བཛྲ་ཀྲོ་ཏ་ཨཱརྱ་ཨ་ཙ་ལ་ཧཱུྃ་བྷནྡྷ་བྷནྡྷ་ཧཱུྃ་ཕཊ། ཨགྣ་ཡེ་ཆེ་གེ་མོ་མཱ་ར་ཡ་ཧཱུྃ་ཕཊ། ཚར་རེ་དང་རྫས་སྣ་བཞི་སྤེལ་བ་ལན་ལྔ་འབུལ། དམོད་བཅོལ་ནི། ཧཱུྃ། གདུག་ཅིང་སྡང་སེམས་ལྡན་པ་རྣམས། །ལྷའམ་གནོད་སྦྱིན་བདུད་ཀྱང་རུང་། །ང་ལ་བར་ཆད་བྱེད་པ་རྣམས། །མཐུ་དང་རྫུ་འཕྲུལ་མེད་པར་གྱིས། །མངོན་སྤྱོད་དྲག་པོས་མྱུར་དུ་སྒྲོལ། །ཧཱུྃ། ནུབ་བྱང་རང་བྱུང་གྲུབ་པའི་ལྷ། །ཁྲོ་བོ་ཆེན་པོ་གཞན་ལས་རྒྱལ། །ཡུམ་ཆེན་རྡོ་རྗེ་མདའ་སྙེམས་མ། །སྤྲུལ་པ་སྤྱང་ཀི་ཁྲ་ཡི་མགོ །ཡང་སྤྲུལ་དམ་ཅན་ཚོགས་བཅས་ལ། །དམ་རྫས་བདུད་རྩིའི་མཆོད་པ་འབུལ། །ཕྲིན་ལས་དྲག་པོས་གདུལ་ཕྱིར་དུ། །བསྲེག་རྫས་མཆོད་པ་བཞེས་སུ་གསོལ། །ཨོཾ་བཛྲ་ཀྲོ་ཏ་ཨ་པ་ར་ཙི་ཏ་ཧཱུྃ་ཏིཥྛ་ཏིཥྛ་ཧཱུྃ་ཕཊ། ཨགྣ་ཡེ་ཆེ་གེ་མོ་མཱ་ར་ཡ་ཧཱུྃ་ཕཊ། ཚར་རེ་དང་རྫས་སྣ་བཞི་སྤེལ་བ་ལན་ལྔ་འབུལ། དམོད་བཅོལ་ནི། ཧཱུྃ། གདུག་ཅིང་སྡང་སེམས་ལྡན་པ་རྣམས། །ལྷའམ་གནོད་སྦྱིན་བདུད་ཀྱང་རུང་། །ང་ལ་བར་ཆད་བྱེད་པ་རྣམས། །མཐུ་དང་རྫུ་འཕྲུལ་མེད་པར་གྱིས། །མངོན་སྤྱོད་དྲག་པོས་མྱུར་དུ་སྒྲོལ། །ཧཱུྃ། བྱང་ཤར་རང་བྱུང་གྲུབ་པའི་ལྷ། །ཁྲོ་བོ་ཁམས་གསུམ་རྣམ་པར་རྒྱལ། །ཡུམ་ཆེན་རྡོ་རྗེ་གསོད་མ་དང་། །སྤྲུལ་པ་དོམ་དང་སྲེ་མོའི་མགོ །ཡང་སྤྲུལ་དམ་ཅན་ཚོགས་བཅས་ལ། །དམ་རྫས་བདུད་རྩིའི་མཆོད་པ་འབུལ། །ཕྲིན་ལས་དྲག་པོས་གདུལ་ཕྱིར་དུ། །བསྲེག་རྫས་མཆོད་པ་བཞེས་སུ་གསོལ། །ཨོཾ་བཛྲ་ཀྲོ་ཏ་ཏྲཻ་ལོ་ཀྱ་བི་ཛ་ཡ་ཧཱུྃ་བིནྡྷ་བིནྡྷ་ཧཱུྃ་ཕཊ། ཨགྣ་ཡེ་ཆེ་གེ་མོ་མཱ་ར་ཡ་ཧཱུྃ་ཕཊ། ཚར་རེ་དང་རྫས་སྣ་བཞི་སྤེལ་བ་ལན་ལྔ་འབུལ། དམོད་བཅོལ་ནི། ཧཱུྃ། གདུག་ཅིང་སྡང་སེམས་ལྡན་པ་རྣམས། །ལྷའམ་གནོད་སྦྱིན་བདུད་ཀྱང་རུང་། །ང་ལ་བར་ཆད་བྱེད་པ་རྣམས། །མཐུ་དང་རྫུ་འཕྲུལ་མེད་པར་གྱིས། །མངོན་སྤྱོད་དྲག་པོས་མྱུར་དུ་སྒྲོལ། །ཧཱུྃ། འོག་ནས་རང་བྱུང་གྲུབ་པའི་ལྷ། །ཁྲོ་བོ་ཆེན་པོ་སྟོབས་པོ་ཆེ། །ཡུམ་ཆེན་རྡོ་རྗེ་བསྐྱོད་མ་དང་། །སྤྲུལ་པ་དྲེད་དང་བྱེ་བའི་མགོ །ཡང་སྤྲུལ་དམ་ཅན་ཚོགས་བཅས་ལ། །དམ་རྫས་བདུད་རྩིའི་མཆོད་པ་འབུལ། །ཕྲིན་ལས་དྲག་པོས་གདུལ་ཕྱིར་དུ། །བསྲེག་རྫས་མཆོད་པ་བཞེས་སུ་གསོལ། །ཨོཾ་བཛྲ་ཀྲོ་དྷ་མ་ཧཱ་བ་ལ་ཧཱུྃ་སྥོ་ཊ་སྥོ་ཊ་ཧཱུྃ་ཕཊ། ཨགྣ་ཡེ་ཆེ་གེ་མོ་མཱ་ར་ཡ་ཧཱུྃ་ཕཊ། ཚར་རེ་དང་རྫས་སྣ་བཞི་སྤེལ་བ་ལན་ལྔ་འབུལ། དམོད་བཅོལ་ནི། ཧཱུྃ། གདུག་ཅིང་སྡང་སེམས་ལྡན་པ་རྣམས། །ལྷའམ་གནོད་སྦྱིན་བདུད་ཀྱང་རུང་། །ང་ལ་བར་ཆད་བྱེད་པ་རྣམས། །མཐུ་དང་རྫུ་འཕྲུལ་མེད་པར་གྱིས། །མངོན་སྤྱོད་དྲག་པོས་མྱུར་དུ་སྒྲོལ། །ཧཱུྃ། ཤར་ལྷོ་ནུབ་བྱང་སྒོ་བཞི་ནས། །པུ་ཤུད་མགོ་ཅན་ལ་སོགས་པ། །ཕྲིན་ལས་ཤུགས་ཀྱིས་གྲུབ་པའི་ལྷ། །ཡེ་ཤེས་སྒོ་མ་ཆེན་མོ་བཞི། །གྲུ་གསུམ་མཐིང་ནག་དཀྱིལ་འཁོར་དུ། །དམ་རྫས་བདུད་རྩིའི་མཆོད་པ་འབུལ། །ཕྲིན་ལས་དྲག་པོས་གདུལ་ཕྱིར་དུ། །བསྲེག་རྫས་མཆོད་པ་བཞེས་སུ་གསོལ། །ཨོཾ་བཛྲ་ཀཱི་ལི་ཀཱི་ལ་ཡ་བིད་ཡ་བིད་ཡ་ཧཱུྃ་ཕཊ། ཨོཾ་བཛྲ་ཀཱི་ལི་ཀཱི་ལ་ཡ་ན་མཿས་མནྟ་ཧྲི་ད་ཧྲི་ད་ཧཱུྃ་ཕཊ། ཨོཾ་བཛྲ་ཀཱི་ལི་ཀཱི་ལ་ཡ་སུ་རུ་སུ་རུ་པྲ་སུ་རུ་པྲ་སུ་རུ་ཧཱུྃ་ཕཊ། ཨོཾ་བཛྲ་ཀཱི་ལི་ཀཱི་ལ་ཡ་མཱ་ར་ཡ་མཱ་ར་ཡ་ཧཱུྃ་ཕཊ། ཨགྣ་ཡེ་ཆེ་གེ་མོ་ཛྭ་ལ་རཾ་མཱ་ར་ཡ་ཧཱུྃ་ཕཊ། ཅེས་ལན་བཞི་འབུལ་རྗེས། དམོད་བཅོལ་ནི། ཧཱུྃ། གདུག་ཅིང་སྡང་སེམས་ལྡན་པ་རྣམས། །ལྷའམ་གནོད་སྦྱིན་བདུད་ཀྱང་རུང་། །ང་ལ་བར་ཆད་བྱེད་པ་རྣམས། །མཐུ་དང་རྫུ་འཕྲུལ་མེད་པར་གྱིས། །མངོན་སྤྱོད་དྲག་པོས་མྱུར་དུ་སྒྲོལ། །སླར་ཡང་འདོད་པའི་ཕྲིན་ལས་བསྒྲུབ་པའི་ཕྱིར་མེ་ལྷ་ཕྱག་ཚང་པར་ཤེས་ནས། མཆོད་པ་ནི། མེ་ལྷའི་རྣམ་པ་དེ་ཉིད་ལོགས་སུ་ཕྱེ་ནས་བསྲེག་རྫས་འབུལ་བའི་ལས་མཛད་པར་བསམས་ལ། བུད་ཤིང་བསྣན། བསང་ཆུ་གཏོར། སྣུམ་ཆེན་གྱི་དགང་བླུགས་གསུམ་དབུལ་བ་དང་ཆབས་གཅིག །ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿཨགྣ་ཡེ་པཱུ་ཛ་ཁཱ་ཧི་སརྦ་བིག་ནན་བཾ་ཧཱུྃ་ཕཊ། ཅེས་གསུམ་གྱིས་མེ་ལྷ་གཟི་མདངས་བསྐྱེད། སྔར་བཞིན་བསྲེག་རྫས་བཞི་པོ། ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིག་ནན་བཾ་ཧཱུྃ་ཕཊ། ཨགྣ་ཡེ་དགྲ་བགེགས་འབྱུང་པོ་མཱ་ར་ཡ་ཧཱུྃ་ཕཊ། ཅེས་ཚར་ཉི་ཤུ་ཐམ་པས་འབུལ་རྗེས། ཧཱུྃ། སངས་རྒྱས་བསྟན་པ་བཤིག་པ་དང་། །དཀོན་མཆོག་སྐུ་དགྲ་དབེན་རྩ་འཇོམས། །ཆོས་ཁྲིམས་འདྲལ་དང་སློབ་དཔོན་དགྲ། །རྣལ་འབྱོར་འཇོམས་པ་ལ་སོགས་པ། །གསད་དང་མནན་དང་ནད་ངན་གྱིས། །ཇི་ནས་བརླག་པར་ཁྱེད་ཀྱིས་གྱིས། །ཞེས་འདོད་དོན་གསོལ། དེ་བཞིན་དུ་ཁྲོ་བཅུ་སོ་སོར་དང་། སྒོ་མ་བཞི་པོ་ལ་ལན་རེ་ཕུལ་མཐར། ཧཱུྃ་གདུག་ཅིང་སྡང་སེམས་ལྡན་པ་རྣམས། །ལྷའམ་གནོད་སྦྱིན་བདུད་ཀྱང་རུང་། །ང་ལ་བར་ཆད་བྱེད་པ་རྣམས། །མཐུ་དང་རྫུ་འཕྲུལ་མེད་པར་གྱིས། །མངོན་སྤྱོད་དྲག་པོས་མྱུར་དུ་སྒྲོལ། །དམོད་བཅོལ་བྱ། དེས་རཱུ་པ་བརྒྱ་རྩ་བརྒྱད་རྫོགས་པར་འགྱུར་ལ། དེ་ཡང་རྫས་མང་ཞིང་རཱུ་པ་ཉུང་བ་དང་། རཱུ་པ་མང་ཞིང་རྫས་ཉུང་བ་དང་། མེ་ལྷག་ཅིང་རྫས་ཟད་པ་དང་། བསྲེག་རྫས་ལྷག་ཅིང་མེ་ཟད་པ་དང་བཞི་པོ་ནི་མངོན་སྤྱོད་ཀྱི་ལས་འདིའི་བར་གཅོད་ཀྱི་རྒྱུ་ཡིན་པས། ཐམས་ཅད་མཉམ་རྫོགས་ཡོང་བར་བྱའོ། །དེ་ནས་སྨན་གཏོར་རཀྟ་སོགས་འབུལ་བ་ནི། ཧཱུྃ། སངས་རྒྱས་ཀུན་དང་མཉམ་སྦྱོར་ཞིང་། །རང་བྱུང་གདོད་ནས་རྣམ་པར་དག །རྩ་བརྒྱད་ཡན་ལག་སྟོང་སྦྱར་སྨན། །རིགས་ལྔ་དམ་ཚིག་ལྔ་ཡི་དངོས། །སྒྲོན་མ་ལྔ་དང་བདུད་རྩི་ལྔ། །རྒྱུད་ལྔ་དུག་ལྔ་འཇོམས་པའི་བདུད། །ཡེ་ཤེས་ལྔ་པོ་གྲུབ་པའི་རྩི། །འཆི་བ་མེད་པའི་དམ་རྫས་ཆེ། །དཀྱིལ་འཁོར་ལྷ་ཚོགས་རྣམས་ལ་འབུལ། །ཨཱོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། གཏོར་མ་ནི། ཧཱུྃ། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་འཁོར་བཅས་སྤྱན་དྲངས་ཏེ། །དུར་ཁྲོད་མཆོག་གི་གནས་འདི་རུ། །ཞིང་ཆེན་གསར་རྙིང་ཏི་རར་བཅས། །དམར་གྱི་ཨརྒྷཾ་རྒྱ་མཚོར་བསྐྱིལ། །མཁའ་འགྲོ་འབར་བའི་ཚོགས་ལ་འབུལ། །མ་ལུས་གཤེགས་ནས་བསྣམ་དུ་གསོལ། །མ་ཧཱ་བ་ལིངྟ་ཁཱ་ཧི། རཀྟ་ཚར་གསུམ་ནི་ཕུར་དང་རཀྟ་བསྲེས་ལ་དང་པོ་བཀའ་བསྒོ་བའི་ཕྱིར་ཕུལ། ཧཱུྃ། དངོས་གྲུབ་བར་ཆད་བྱེད་པའི་བགེགས། །གདུག་ཅིང་སྡང་སེམས་ལྡན་པ་རྣམས། །ཟུང་ཞིག་རྒྱོབ་ཅིག་རྣམ་པར་ཆིངས། །གཏོགས་ཤིག་གྲོགས་དང་བྲལ་བར་གྱིས། །རེངས་པར་ཁུག་ལ་སྨྲར་ཆུག་ཅིག །ཕོབ་ཅིག་རྣམ་པར་གཟིར་བར་གྱིས། །ང་ཡི་དབང་དུ་གྱུར་ནས་ཀྱང་། །བསྒོ་བའི་བཀའ་ལ་ཉན་པར་བྱོས། །མ་ཧཱ་རཀྟ་ཁཱ་ཧི། གཉིས་པ་དམ་ཅན་གནད་དུ་དབབ་པའི་ཕྱིར་འབུལ་བ་ནི། ཧཱུྃ། བྲན་དང་བཀའ་ཉན་ཕོ་ཉའི་ཚོགས། །ཁྱེད་ཀྱི་དམ་ཚིག་དུས་ལ་བབ། །སྔོན་ཆད་ཇི་བཞིན་བཅས་པ་ཡིས། །མངོན་སྤྱོད་ཕྲིན་ལས་མྱུར་དུ་མཛོད། །མ་ཧཱ་རཀྟ་ཁཱ་ཧི། གསུམ་པ་མཐུ་དང་རྫུ་འཕྲུལ་འཕྲོག་པའི་ཕྱིར་འབུལ་བ་ནི། ཧཱུྃ། དངོས་གྲུབ་བར་ཆད་བྱེད་པའི་བགེགས། །གདུག་ཅིང་སྡང་སེམས་ལྡན་པ་རྣམས། །ལྷའམ་འོན་ཏེ་བདུད་ཀྱང་རུང་། །ང་ལ་བར་ཆད་བྱེད་པ་རྣམས། །མཐུ་དང་རྫུ་འཕྲུལ་མེད་པར་ཤོག །མ་ཧཱ་རཀྟ་ཁཱ་ཧི། གཏུན་དུ་བརྡུང་བ་ནི། ཧཱུྃ། རྡུངས་ཤིག་རྡོ་རྗེ་འབར་བའི་གཏུན། །བཀའ་ལས་འདའ་བྱེད་སྡིག་ཅན་རྣམས། །རྡོ་རྗེ་མེ་དབལ་སྙིང་བསྲེག་ནས། །ལུས་ངག་རྡུལ་ཕྲན་བཞིན་དུ་རློགས། །ཁྲོ་མོ་འབར་བའི་གཏུན་ཁུང་དུ། །རྡོ་རྗེ་ཐོ་བས་བརྡུང་བྱས་ནས། །ལྷ་ཡང་རུང་སྟེ་བསྒྲལ་བར་གྱིས། །ཁ་ཐཾ་ཁ་ཐཾ་ཁ་ཐཾ། ཁཱ་ཧི་ཁཱ་ཧི་ཁཱ་ཧི། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། ཧ་ཧ་ཧ། ཧཱུྃ། སྣང་སྲིད་ཐམས་ཅད་ཕུར་པའི་རང་བཞིན་ལ། །ཁམས་གསུམ་འཁོར་བ་མིང་ཡང་མི་གྲག་ཀྱང་། །རྒྱལ་བའི་རྫུ་འཕྲུལ་ཆེན་པོ་བསྟན་པའི་ཕྱིར། །རྡོ་རྗེ་མངོན་སྤྱོད་ཕྲིན་ལས་མཛད་ལ་བསྟོད། །ཅེས་བསྟོད་ནས་བདག་ཉིད་གསོ་བའི་ཕྱིར་བསྐྱེད་རིམ་གསལ་ལ་ཀཱི་ལ་ཡ་བརྒྱ་རྩ་བརྒྱད་བཟླ། གཏང་རག་གི་དོན་དུ་ཚོགས་ཀྱི་མཆོད་པ་དབུལ། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་བ། །དེ་ཀུན་མགོན་པོས་བཟོད་པར་གསོལ། །ཡིག་བརྒྱས་བཤགས། རྩ་སྔགས་ཀྱིས་དགང་བླུགས་གསུམ་ཕུལ་ལ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་སུ་གསོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །བཛྲ་མུཿ ཡེ་ཤེས་པ་རྣམས་ཐུགས་ཀར་བསྡུ། ཨོཾ་ཨགྣ་ཡེ་སྭཱ་ཧཱ་ས་མེ་ལྷ་ལ་དགང་བླུགས་ཀྱི་གཏང་རག་དང་། མཆོད་སྦྱིན་གཏོར་མ་འདི་བཞེས་ལ། །སོགས་ཀྱིས་གཏོར་མ་དབུལ་ཞིང་ཕྲིན་ལས་བཅོལ། བཛྲ་མུཿ མེ་ལྷ་རང་གནས་སུ་གཤེགས། དུག་ཁྲག་གི་ཆུས་མེ་ཅིག་ཅར་དུ་གཞིལ་ལ་ཐལ་བ་ལ་ཟོར་དང་གནན་པའི་ལས་བྱའོ། །ཕན་ཡོན་ནི་རྩ་རྒྱུད་ལས། མངོན་སྤྱོད་ཕྲིན་ལས་ཉེར་བསྡུ་བ། །མཐིང་ནག་གྲུ་གསུམ་དཀྱིལ་འཁོར་དུ། །སྦྱིན་བསྲེག་དྲག་པོའི་ལས་བསྟན་པ། །རྫོགས་པའི་དུས་དེ་ཉིད་ལ་ཡང་། །གནོད་པའི་དགྲ་བགེགས་མེད་བྱས་ནས། །ཡེ་ཤེས་ལྷུན་གྲུབ་ཉིད་དུའོ། །ཞེས་སོ། །རྡོ་རྗེ་ཕུར་པའི་རྒྱུད་སྡེ་རྒྱ་མཚོ་དང་། སྔོན་གྱི་ཕུར་པ་མཁན་པོ་རྣམས་ཀྱི་གཞུང་ལ་ལེགས་པར་དཔྱད་ནས་དཔལ་ལྡན་པདྨ་འོད་གླིང་དུ་བཀོད་པའོ།། །།དགེའོ།། །།