ཕུར་པ་རྒྱུད་ལུགས་ལས། སྤྲོས་མེད་རྒྱུན་གྱི་རྣལ་འབྱོར།

Previous Text Back to Volume Page Next Text

Wylie title	phur pa rgyud lugs las/ spros med rgyun gyi rnal 'byor/
Location	'jigs gling bka' 'bum Volume 9, Text 16, Pages 441-444 (Folios 1a1 to 2b1)
Author	འཇིགས་མེད་གླིང་པ་
Less details More details
Citation	'jigs med gling pa. Phur pa rgyud lugs las spros med rgyun gyi rnal 'byor. In Kun mkhyen rig 'dzin 'jigs med gling pa'i gsung 'bum, Vol. 9: 441-444. New Delhi: Shechen Publications, 2025.
Genre	Daily Practice - rgyun khyer
Cycle	ཕུར་པ་རྒྱུད་ལུགས་ (phur pa rgyud lugs)
Deity	rdo rje phur pa
Colophon	།འདི་ནི་རྒྱུན་གྱི་རྣལ་འབྱོར་ཡིན། །འདི་ཡར་རྒྱུད་ལས་བཏུས་པའོ།།
Colophon	'di ni rgyun gyi rnal 'byor yin/_/'di yar rgyud las btus pa'o//

[edit]

༼མ༽ ཕུར་པ་རྒྱུད་ལུགས་ལས། སྤྲོས་མེད་རྒྱུན་གྱི་རྣལ་འབྱོར་བཞུགས། ༈ གདན་གསུམ་ལུས་ཀྱི་ཕུར་བུ་ལ་ཕྱག་འཚལ་ལོ། །ལུང་ཨ་ནུ་ཡོ་ག་དང་མཐུན་པར་ལུས་དཀྱིལ་ལ་བརྟེན་ནས་ཕུར་པ་བསྒྲུབ་པ་ནི། སྐྱབས་སེམས་སྔོན་དུ་བྱས་ལ། ཧཱུྃ། སེམས་དང་ཡིད་དང་རྣམ་ཤེས་ཉིད། །དེ་ཉིད་ལས་ནི་འཁྲུལ་ནས་བཏབ། །རྣམ་རྟོག་བག་ཆག་བསྲེག་པའི་ཕྱིར། །བདག་གི་ལུས་ནི་གཞལ་ཡས་ཁང་། །ཧཱུྃ། རང་ལུས་འདོམ་གང་གྲུ་བཞི་ནི། །དུར་ཁྲོད་གཞལ་ཡས་ཁང་དུ་བསམ། །གྲུ་བཞི་པ་ལ་ཁ་དོག་ལྔ། །དྲི་མ་ནག་པོ་བཻ་ཌཱུར་སྔོ། །རྩ་ཆེན་ལྗང་གུ་མར་གད་མདོག །ཁྲག་ནི་པདྨ་རཱ་ག་དམར། །ཚིལ་བུ་སེར་པོ་གསེར་ལྟར་སྣང་། །རུས་པ་དཀར་པོ་ཤེལ་དངུལ་མདོག །ལྔ་ཡི་རྩིག་པ་རབ་ཏུ་མཛེས། །སྒལ་ཚིགས་གདུང་གི་རང་བཞིན་ལ། །རྐང་བརྒྱད་ཀ་བ་བརྒྱད་ཡིན་ནོ། །ཐུར་མ་ལྕམ་ལ་རྩིབ་མ་དྲལ། །རྩ་ཡི་དྲྭ་བས་རབ་འབྲེལ་ཞིང་། །མགོ་བོའི་ཚངས་སྒོ་ཤེལ་ལྟར་དཀར། །མིག་གཡས་ལྷོ་སྒོ་གསེར་ལྟར་སེར། །མིག་གཡོན་བྱང་སྒོ་མར་གད་ལྗང་། །ནུབ་ཀྱི་ཆུ་སྒོ་པད་ལྟར་དམར། །འོག་གི་སྤུ་ནག་སྨིན་མ་དང་། །སྐྲ་རྣམས་སྒོ་ཡི་རྒྱན་ཡིན་ནོ། །རྐང་ལག་སེན་མོའི་ཕྲེང་བ་རྣམས། །མུ་ཏིག་དྲྭ་བ་ཕྱེད་པས་མཛེས། །ཚིགས་མདུད་རིན་ཆེན་ཕ་གུ་ལ། །པགས་པ་འདོད་ཡོན་ལྷ་མོས་མཛེས། །དུང་ཁྲོད་གཞལ་ཡས་མཛེས་པ་དེར། །ཀུན་གཞིའི་རྣམ་ཤེས་གནས་གྱུར་པ། །དཔལ་ཆེན་རྡོ་རྗེ་གཞོན་ནུ་ནི། །སྒེག་པ་དཔའ་བ་འཇིགས་སུ་རུང་། །དགོད་དང་གཤེ་དང་འཇིགས་པ་དང་། །སྙིང་རྗེ་བརྔམ་དང་ཞི་བ་སྟེ། །ཞལ་དང་ཕྱག་མཚན་ཅིར་ཡང་སྟོན། །ཡིད་ཀྱི་རྣམ་ཤེས་གནས་གྱུར་པ། །འཁོར་ལོ་རྒྱས་འདེབས་ཡུམ་དང་འཁྲིལ། །སྒོ་ལྔའི་རྣམ་ཤེས་གནས་གྱུར་པ། །སྲས་མཆོག་རིགས་ལྔ་ཡུམ་དང་བཅས། །གཟུགས་ཀྱི་ཕུང་པོ་རྣམ་པར་རྒྱལ། །ཚོར་བ་གཤིན་རྗེ་གཤེད་པོ་ཉིད། །འདུ་ཤེས་ཧྱ་གྲཱི་ཝའོ། །འདུ་བྱེད་བདུད་རྩི་འཁྱིལ་བ་སྟེ། །རྣམ་ཤེས་ཁྲོ་རྒྱལ་ཧཱུྃ་ཀཱ་ར། །ས་ནི་དབྱུག་པ་སྔོན་པོ་སྟེ། །ཆུ་ནི་མི་གཡོ་མགོན་པོ་ལ། །མེ་ནི་གཞན་གྱིས་མི་ཐུབ་པ། །རླུང་ནི་ཁམས་གསུམ་རྣམ་རྒྱལ་ཏེ། །ནམ་མཁའ་ཁྲོ་རྒྱལ་སྟོབས་པོ་ཆེ། །སྐྱེ་མཆེད་ཡུམ་བཅུའི་ངོ་བོ་སྟེ། །རྣམ་པར་རྟོག་པ་ཕྲ་ཕྱག་ལ། །ཉོན་མོངས་སྒོ་མ་བཞི་ཉིད་དོ། །ཧཱུྃ། རྡོ་རྗེ་གཞོན་ནུའི་རིག་འཛིན་རྣམས། །སྲིད་པ་རྡོ་རྗེར་གྲུབ་མཛོད་ཅིག །སྲིད་པ་རྡོ་རྗེར་ཕུར་པའི་ལྷ། །ཡེ་ཤེས་ཁྲོ་བོ་གྲུབ་པར་མཛོད། །བསྐྱེད་དུ་མེད་དེ་ཡེ་ནས་ཡིན། །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིག་ནན་བཾ་ཧཱུྃ་ཕཊ། ཅེས་དང་། ཚེ་སྒྲུབ་བྱེད་ན། ཨཱ་ཡུ་རྫྙཱ་ན་ཙིཏྟ་བྷྲཱུྃ། གདགས། གསོལ་བའི་ཟས་ནི་ཅི་ཡང་རུང་། །དང་པོར་རཾ་ཡཾ་ཁཾ་གིས་སྦྱངས། །ཨ་དཀར་འོད་དང་བཅས་པ་ལས། །གཡས་ཕྱོགས་འཁྱིལ་ཞིང་འཁོར་བར་བསམ། །འོད་ཟེར་དོན་གཉིས་བྱང་ཆུབ་སེམས། །ཡེ་ཤེས་བདུད་རྩིར་གཉིས་མེད་བསྟིམ། །ཨ་མྲྀ་ཏ་ཡིས་གསང་སྔགས་ཀྱིས། །འོད་ཞུ་བདུད་རྩི་ཆེན་པོར་གྱུར། །ཨོཾ་ས་མ་ཡ་ཨ་མྲྀ་ཏ་ཨོཾ་ཨཱཿཧཱུྃ་སྭཱ་ཧཱ། ལག་པ་ཡེ་ཤེས་ཧོམ་གཟར་གྱིས། །ཁ་ནི་ཧོམ་ཁུང་གཞལ་ཡས་སུ། །དབྱིངས་དང་ཡེ་ཤེས་མཆོད་པར་འབུལ། །མཉམ་པའི་སྒྲུབ་རྫས་ཡོངས་སུ་དག །བདག་དང་མཉམ་པའི་ཚོགས་ལ་འབུལ། །ལོངས་སྤྱོད་ལྔ་ལྡན་བདུད་རྩི་མཆོག །གཉིས་མེད་ཡོངས་སུ་དག་པར་བསྔོ། །གཉིས་སུ་མེད་པའི་མཆོད་པ་ཡིན། །སྐུ་གསུང་ཐུགས་སུ་རྣམ་པར་དག །དམན་པའི་ཟས་ལ་བཟའ་མི་བྱ། །བཏུང་བ་ཏྲཱཾ་ལས་མ་ཀིར་བསམ། །སྦོམ་པོ་དབང་མོ་བབས་ཤེས་ཀྱིས། །བླངས་ལ་ཨོཾ་ཨཱཿཧཱུྃ་གིས་མཆོད། །དེ་བཞིན་གོས་དང་རྒྱན་གནས་ཁང་། །དབང་པོ་ལྔ་ཡི་ལོངས་སྤྱོད་ཀུན། །ཐ་མལ་སྣང་བས་མ་ཡིན་པར། །འདོད་ཡོན་སྒྱུ་མ་ལྟ་བུ་རུ། །དམིགས་ནས་ཡོངས་གྲུབ་དཀྱིལ་འཁོར་མཆོད། །བསོད་ནམས་ཡེ་ཤེས་ཚོགས་རྫོགས་འགྱུར། །འདི་ནི་རྒྱུན་གྱི་རྣལ་འབྱོར་ཡིན། །འདི་ཡར་རྒྱུད་ལས་བཏུས་པའོ།། །།