ཕུར་པ་རྒྱུད་ལུགས་ལས་བྱུག་བདུག་བྲབ་གསུམ་གྱི་བསྒྲུབ་ཚུལ།

Previous Text Back to Volume Page Next Text

Wylie title	phur pa rgyud lugs las byug bdug brab gsum gyi bsgrub tshul
Location	'jigs gling bka' 'bum Volume 9, Text 17, Pages 445-456 (Folios 1a1 to 6b3)
Author	འཇིགས་མེད་གླིང་པ་
Less details More details
Citation	'jigs med gling pa. Phur pa rgyud lugs las byug bdug brab gsum gyi bsgrub tshul. In Kun mkhyen rig 'dzin 'jigs med gling pa'i gsung 'bum, Vol. 9: 445-456. New Delhi: Shechen Publications, 2025.
Genre	Ritual Substances - rdzas
Cycle	ཕུར་པ་རྒྱུད་ལུགས་ (phur pa rgyud lugs)
Deity	rdo rje phur pa

[edit]

༄༅། །ཕུར་པ་རྒྱུད་ལུགས་ལས་བྱུག་བདུག་བྲབ་གསུམ་གྱི་བསྒྲུབ་ཚུལ་བཞུགས། །

༄༅། །ཤྲཱི་བཛྲ་ཀུ་མཱ་ར། བྱུག་བདུག་བྲབ་གསུམ་གྱི་རྫས། བསྒྲུབ་ཚུལ་ལ་དོན་གསུམ་ལས། དང་པོ་ཉུང་དཀར་ལ་རྫས་བསགས་པ་དང་། སྒྲུབ་པ་དངོས་ལས། དང་པོ་ནི་གསང་དགོངས་ལས། ཉུང་དཀར་ནང་ནས་ཟུར་བཞི་པ། །ཕྲིན་ལས་རྣམ་བཞི་རྫོགས་པའི་རྟགས། །ཕོ་མོ་གཉིས་ཀྱི་ཐོད་པ་རུ། །གོ་རོ་ཙ་ཎ་མ་བྲལ་བ། །ཐབས་དང་ཤེས་རབ་ཁ་སྦྱར་བ། །བྷནྡྷའི་སྤྱི་བོ་བརྟོལ་བ་ནི། །དེ་ཡི་ནང་དུ་ས་བཞག་ལུད། །རོ་བསྲེགས་པ་ཡི་ཐལ་ཆེན་དང་། །ཉུང་དཀར་ས་བོན་གསུམ་དུ་གསལ། །ཞེས་པ་ལྟར་ཕོ་མོའི་ཐོད་པ་ཀླད་ཞག་དང་ལྡན་པ་ཁ་སྦྱར་གྱི་ཕོ་ཐོད་བརྟོལ་བའི་ནང་དུ་རོ་ཐལ་བསྲེས་པའི་ས་འཇམ་དང་། བླ་མ་ཡབ་ཡུམ་མམ་སྒྲུབ་པོའི་དྲི་ཆེ་ཆུང་། ཁྲག་ཆེན་བསྲེས་པའི་ལུད་རན་པར་བྱ་སྟེ། ཡབ་ཡུམ་དྲི་ཆེན་དུར་ཁྲོད་ས། །ཁྲག་ཆེན་ཆགས་པའི་ས་བོན་བསྲེས། །ཞེས་པས་སོ། །དེ་དར་མཐིང་ནག་གིས་བཀབ་ལ། ལམ་རྒྱ་གྲམ་མམ་ཤིང་གཅིག་དྲུང་ལ་སོགས་པར་མཎྜལ་གྲུ་བཞིའི་སྟེང་བཀོད་ལ། མཆོད་པའི་བྱེ་བྲག་ཀྱང་བཤམ་མོ། །གཉིས་པ་ནི། གསང་རྒྱུད་ལས། བྷནྡྷ་ཁང་པ་ས་བོན་ལྷ། །བསྐྱེད་དང་སྤྱན་དྲངས་རིམ་པས་མཆོད། །མཐེབ་མཛུབ་ཉི་ཟླའི་དཀྱིལ་འཁོར་བར། །ཁྲོ་བོ་སྔོ་ནག་མཚོན་ཆ་འཛིན། །ཐུགས་ལས་ཐོན་ཐིམ་སྐུར་བརླབས་ནས། །གསང་སྔགས་འདི་ཉིད་འབུམ་དུ་བཟླས། །ཞེས་པས། སྒྲུབ་ཐབས་བསྡུས་པས་བདག་མདུན་མཉམ་བསྒྲུབ་བྱས་ལ་མདུན་བསྐྱེད་དམིགས་རྣམས་ཕྱེད་པར་བྱ། བཟླ་བྱའི་སྔགས་ནི། ཨོཾ་བཛྲ་ཀཱི་ལི་ཀཱི་ལ་ཡ་ཧྲིལ་ཤག་ཛྭ་ལ་ནི་ཧཱུྃ་ཕཊ། ཅེས་ལས་རུང་འབུམ་ཕྲག་བཟླའོ། །དེ་ཡང་བསྙེན་པ་ཞག་བདུན་བཟླས་བརྗོད་བྱ། །བརྒྱ་མཚམས་སྟོང་མཚམས་མཆོད་པ་ཡི། །ཆུ་ལུད་དུ་ནི་བྲན་བཞིན་དབུལ། །ཏིང་འཛིན་སྔགས་དང་ཕྲིན་ལས་ཀྱིས། །ཁྱད་པར་མཆོད་པ་བདུད་རྩི་དང་། །ཕྱག་རྒྱའི་མཆོད་པ་གཞུང་བཞིན་བྱ། །འབྲས་བུ་མ་སྨིན་བར་དུ་དབུལ། །ཁྱད་པར་ཉུང་དཀར་སྦོམ་པོར་འགྱུར། །ཞེས་དང་། རྟགས་ནི་དུ་བ་རླངས་དང་མེ་འོད་དང་། །འགུལ་དང་ཁོལ་བ་ལ་སོགས་འབྱུང་། །ཞེས་སོ། །གལ་ཏེ་འབྲས་བུ་མ་སྨིན་བར་དུ་སྒྲུབ་ནུས་ན། ས་བོན་མྱུ་གུར་གྱུར་པ་དང་། །སྒྲུབ་པོའི་གཡས་སུ་ཉེ་བ་ཡི། །གནས་སུ་མཐོ་གསུམ་མཐུར་དུ་བརྐོ། །ས་ཡི་རོ་རྣམས་བསལ་བ་ཡི། །དཔྱིད་ཟླ་ར་བའི་ཉ་ལ་ནི། །བཟང་པོའི་མཚམས་སུ་བྷནྡྷ་སྦའོ། །ཟླ་བ་ངོ་དྲུག་བར་དུ་ནི། །གསལ་གདབ་བཟླས་བརྗོད་བར་མི་གཅད། །སྟོན་ཟླ་ཐ་ཆུང་ཉ་ལ་བརྔའོ། །རུལ་དང་བམ་སུམ་མ་ཤོར་བར། །ཉི་གྲིབ་མཚམས་སུ་ལེགས་བསྐམས་ནས། །གྲུབ་པའི་འབྲས་བུ་སྲན་མ་མ་ཤ་ཙམ། །དགུན་ཟླ་ར་བའི་ཉ་ལ་ཞལ་དྲོ་དངོས་གྲུབ་བླངས། །དེ་ཡིས་བདེ་གཤེགས་ཐུགས་བསྐུལ་ཞིང་། །སྡང་དགྲ་གནོད་བགེགས་རྡུལ་དུ་རློག །རྣལ་འབྱོར་ལུས་སམ་མགུལ་དུ་གདགས། །རྟག་ཏུ་ལུས་ལ་བཅིངས་པ་ལས། །གཡེལ་བར་བྱས་ན་མི་རུང་ངོ་། །ཞེས་པས་མྱུ་གུ་མ་ཐོན་བར་དུ་དཀྱིལ་འཁོར་དུ་བསྒྲུབས་ཤིང་། ཐོན་ནས་ལམ་རྒྱ་གྲམ་ལ་སོགས་པར་སའི་རོ་ལྔ་བསལ་ལ་ཆུ་ལུད་ཟན་ཞིང་། ཟླ་དུས་ཐེམ་པར་བསྒྲུབ་བོ། །ཕན་ཡོན་ནི། ཉུང་དཀར་རྒྱལ་པོའི་དྲག་རྫས་འདི། །གསང་སྔགས་བརྒྱའམ་སྟོང་དུ་ནི། །དམ་བཅའ་ལུས་ལ་བཅངས་གྱུར་ན། །ལས་དབང་དག་ཀྱང་བཟློག་འགྱུར་ཞིང་། །བར་ཆོད་ཀྱིས་ཀྱང་ཚུགས་མི་འགྱུར། །ཡིད་ལ་དྲན་པས་སྨོན་ལམ་བཙན། །རིག་འཛིན་བྱང་ཆུབ་ས་ནོན་ཅིང་། །གང་ལ་མངགས་པ་ནུས་མཐུར་འགྱུར། །ཞེས་སོ། །གཉིས་པ་གུ་གུལ་སྒྲུབ་ཚུལ་ལ་རྫས་བསག་པ་དང་། སྒྲུབ་པ་དངོས་ཀྱི་དང་པོ་ནི། གསང་རྒྱུད་ལས། གུ་གུལ་སྦྱར་བར་འདོད་པ་ཡིས། །དུར་ཁྲོད་ཆེན་པོ་རབ་དབེན་པར། །དཔྱིད་ཟླ་ར་བའི་ཉ་ལ་འཇུག །མཎྜལ་གྲུ་བཞི་གཅིག་བྱས་ཏེ། །བན་གླང་ཅན་གྱི་བྷནྡྷ་བཤམ། །རྭ་མིག་ཉ་འོག་སྐྲ་སྤུའི་གཞོབ། །ཁྱི་སྤྱང་ཕག་པའི་དྲི་ཆེན་དཀར། །སྒྱེའུ་སྣེའུ་འབྲས་བུ་ར་དུག་ལྕི་བ་དང་། །ཟི་ར་དྷ་དུ་ར་དང་ལྕེ་ཕོག་མུ་ཟི་ཁྲག་ཆེན་དང་། །འཁྲི་ཤིང་དྲི་ཡོད་པུཥྤེ་དང་། །དུག་གི་མེ་ཏོག་ཐང་ཆུ་དང་། །འུག་པའི་མིག་དང་ཁྲ་ཡི་ཀླད། །སྦྲང་རྩི་སྐྱེ་ཚེ་གཅན་གཟན་སྡེར་མོ་རྣམས། །ངེས་པར་བསགས་ཏེ་ཆ་བསྙམས་ལ། །ར་ཕོད་ལུད་ཕོད་བོང་རེང་བྱང་ཆུབ་སེམས་ཀྱིས་བྲན། །ཚོན་གྱི་སྐུད་པས་དམ་བཅིངས་ལ། །ཁ་རལ་མ་ཡི་ཞབས་མས་གྲིལ། །ཙནྡྷ་མེ་ལ་དྲོས་པར་བསྲོ། །མཎྜལ་དབུས་སུ་དེ་བཞག་ལ། །བ་སུ་ཏ་ཡི་གཟུངས་ཐག་གདགས། །ཞེས་པ་ལྟར་བྱ་ཞིང་། དེའི་ར་ཕོད་ལུང་ཕོད་བོང་རེང་གསུམ་གྱི་དྭངས་མས་བྲན་པ་ནི་ཞལ་ལས་ཤེས་པར་བྱ་ཞིང་ཁ་རལ་མ་ནི་བུད་མེད་ཁ་མང་པོའོ། །གཉིས་པ་ནི། བདག་གཙོ་ལྷ་མོ་བཻ་ཏ་ལི། །བསམ་གཏན་གསལ་བར་རབ་བཞུགས་ཏེ། །བཻ་ཏཱ་ནག་མོ་འཁོར་ལོ་ཅན། །ཏི་མ་ཧཱུྃ་དང་ལྡན་པ་ལ། །སྤྱན་དྲང་བསྟིམ་མཆོད་རིམ་པར་བྱ། །ཞེས་པས་བདག་བསྐྱེད་བསྡུས་པའི་གཞུང་བསྲངས་ལ། བཟླས་པ་ལ་བབ་པ་ན་གཙོ་བོའི་ཡུམ་ལས་འཁོར་ལོ་རྒྱས་འདེབས་མ་གཉིས་པ་འཁོར་ལོ་དང་ཁ་ཊྭཱཾ་བསྣམས་པ་ཞིག་ཆད་པ་གུ་གུལ་དང་གཉིས་སུ་མེད་པར་བསྒོམས་ལ་བཟླས་པ་བྱ་བ་དང་ལྷན་ཅིག །དེ་བཞིན་གཤེགས་པ་ཐམས་ཅད་ཀྱི་མཐུ་སྟོབས་དང་ནུས་མཐུ་འོད་ཟེར་གྱི་རྣམ་པར་སྤྱན་དྲངས་ནས་རྫས་ལ་བསྟིམ་པ་ཡིན་ཏེ། དེ་ཉིད་ལས། དེ་ནས་བསྙེན་པ་འདི་བཟླས་ཏེ། །མ་གྲུབ་བར་དུ་རྒྱུན་མི་གཅད། །ཨོཾ་བཛྲ་ཀཱི་ལི་ཀཱི་ལ་ཡ། དྷུ་པཱཾ་བཻ་ཏཱ་ལི་མ་ཀུ་ཏ་ལ་པྲ་ཏ་ལ་ཧཱུྃ་ཕཊ། དལ་མེད་རྒྱུན་དུ་བཟླས་པར་བྱ། །ཏིང་འཛིན་འདྲིས་ཤིང་འཕྲོ་འདུ་གསལ་བ་དང་། །འོད་དང་དྲི་དང་དུ་བ་འབྱུང་། །རྟགས་བྱུང་ནས་ནི་ངེས་བསམ་སྟེ། །ལྷ་ལ་མཆོད་དེ་ཐིག་ལེ་བྱ། །དེས་ནི་གཟི་བྱིན་འཐོབ་པར་བྱེད། །ལུས་ལ་བཅངས་ན་གདོན་བགེགས་འཇོམས། །དུད་བཏང་དགྲ་ལ་བདུག་གྱུར་ན། །ལྷ་དང་རྒྱབ་བརྟེན་འབྲལ་བར་འགྱུར། །རྟགས་དེ་མངོན་དུ་བྱུང་ནས་ནི། །རུལ་དང་སུངས་དང་མ་བམ་པར། །རིལ་བུ་བྱས་ཏེ་རྣལ་འབྱོར་བཅངས། །གུ་གུལ་སྦྱར་མའི་རྫས་སུ་གསུངས། །ཞེས་པས་གསལ་ལོ། །དེའི་བསྒྲུབ་ཚུལ་གཞན་ནི། གསང་དགོངས་ལས། སུན་ཏྲི་ཀ་ཡི་ཐང་ཆུ་དང་། །མི་ཁྱི་གཉིས་ཀྱི་དྲི་མ་དང་། །སྤྱང་ཀི་ལ་དུ་རྟ་ཕུར་མོ། །དམེ་བ་ལྔ་དང་ཟ་འོག་དང་། །འབོབ་མཚུངས་མི་གཙང་སྣ་ཚོགས་དག །འབྲོང་རུ་གཡས་ཀྱི་ནང་དུ་བྲུབ། །ལམ་པོ་ཆེ་ཡི་བཞི་མདོ་རུ། །སྦྲ་ནག་ཕུབ་ལ་ཞག་བདུན་དུ། །གསང་སྔགས་བཟླས་ལ་མཆོད་པ་དབུལ། །ཁྱད་པར་འཕགས་པའི་དྲི་འབྱུང་སྟེ། །ཁྲོ་བོ་རྣམས་ཀྱི་སྔོན་བྱུང་དྲན། །གྲུབ་རྫས་སེམས་བསྐྱེད་ཡིད་དྲན་གྱིས། །སྲས་མཆོག་ཁྲོ་བོ་གཟི་མདངས་བསྐྱེད། །བར་ཆད་རྐྱེན་དང་བྲལ་བར་འགྱུར། །རྣལ་འབྱོར་དམིགས་པ་འགྲུབ་པའི་རྫས། །ཞེས་སོ། །གསུམ་པ་རཀྟ་བསྒྲུབ་པ་ལ་གཉིས། རྫས་བསགས་དང་། སྒྲུབ་པའི་ཚུལ་ལོ། །དང་པོ་ནི། གསང་རྒྱུད་ལས། རཀྟ་སྒྲུབ་པར་འདོད་པ་ཡི། །ཆུ་གླིང་གནས་སུ་འདུག་ནས་ནི། །མཎྜལ་དམར་པོ་ཟླ་གམ་བྱའོ། །དགུན་ཟླ་ར་བའི་ཉ་ལ་འཇུག །པདྨ་ཅན་གྱི་བྷནྡྷ་རུ། །གཞིའི་རཀྟ་དང་། རིགས་ཀྱི་རཀྟ་དང་། སྒྲོལ་བའི་རཀྟ་དང་། མེ་ཏོག་གི་རཀྟ་དང་། རྩིའི་རཀྟ་དང་། རྡོའི་རཀྟ་དང་། འབྲུའི་རཀྟ་དང་། ཤིང་གི་རཀྟ་ལྔ་དང་། ཆུའི་རཀྟ་ལྔ་དང་། རཀྟ་སུམ་ཅུ་རྩ་དྲུག་སོགས། །དེ་ལ་སྦྱོར་བའི་རཀྟས་བྲན། །ལེ་བརྒན་དར་གྱིས་ཁ་བཀབ་ནས། །སེང་ལྡེང་མེ་ལ་དྲོད་བསྲོས་ནས། །མཎྜལ་དབུས་སུ་དེ་བཞིན་གནས། །ཞེས་དང་། །གསང་དགོངས་ལས། མཱུ་ལ་རཀྟ་རྩ་ཡི་ཁྲག །རྡོ་ཤིང་རྩི་ཤིང་དམར་པོ་བརྒྱ། །པདྨ་རཀྟ་ལྔ་བརྒྱ་དང་། །བསྒྲལ་བའི་མ་ཧཱ་རཀྟ་སྟོང་། །ན་ཆུང་མཚན་དང་ལྡན་པ་ཡི། །བྷནྡྷའི་ནང་དུ་རྫས་བླུགས་ལ། །མཚན་ལྡན་གཞོན་ནུའི་པདྨར་བཅས། །ཞེས་པ་ལས། སྤྱིར་འཁོར་བའི་རྒྱུ་ཆགས་སྡང་གཉིས་ལུགས་ལྡོག་ཏུ་དག་པའི་རྟེན་འབྲེལ་དུ་སྨན་རཀ་གི་མཆོད་པ་བསྟན་ལ། དེ་ལས་རཀྟའི་སྒྲ་དོན་ལ་ངོ་བོའི་སྐབས་སུ་ཆགས་པ་དང་། དངོས་པོའི་སྐབས་སུ་ཁྲག་ཆེན། ཁ་དོག་གི་སྐབས་སུ་དམར་པོ་ལ་འཇུག་པ་ལས། མ་རིག་པ་ནས་རྒ་ཤིའི་བར་གྱི་རྟེན་འབྲེལ་ལུགས་འབྱུང་དུ་རྫོགས་པའི་སྙིང་ཁྲག་དང་། སྲོག་པ་རྩའི་ཁྲག་ལ་མཱུ་ལ་རཀྟ་ཞེས་བརྗོད་དེ། ཆུ་དང་མ་འདྲེས་དྭངས་མའི་ཁྲག །ཅེས་སོ། །རིགས་ཀྱི་རཀྟ་ནི་དུང་ཅན་མ་ལ་སོགས་པའི་རྡུལ་གྱི་ཐོག་མ་སྟེ་པདྨ་རཀྟའོ། །བསྒྲལ་བའི་རཀྟ་ནི་ཞིང་བཅུ་བསྒྲལ་བའི་ཁྲག་གོ། །དེ་ལྟར་བཞི་པོ་རྩ་བར་བྱས་པའི་སྟེང་དུ། ཡན་ལག་རཀྟ་བརྟན་པའི་ཁྲག །ཅེས་པས། ལོང་རྩའི་ཁྲག་དང་། དེ་བཞིན་དུ་འཁོར་བ་རྒྱུའི་རཀྟ་ཁྲག་སྣ་ཚོགས་ཚད་དང་། སྲིད་པ་གཞིའི་རཀྟ་ལྟེ་བའི་ཁྲག་དང་། ཁྲག་ཐམས་ཅད་ཀྱི་ངོ་བོ་ཉིད་ཆུ་སྣ་དང་། སྣང་བ་བརྡའི་རཀྟ་ཁ་དོག་དམར་པོར་གྱུར་ཚད་དང་། ན་ཆུང་གི་པདྨའི་ཟེ་འབྲུ་རྣམས་ལ་སྔོན་ཧེ་རུ་ཀས་རཱུ་ཏྲ་བསྒྲལ་བའི་ཚེ་ཁྲག་གི་ཐིག་པ་ས་ལ་ལྟུང་བ་ལས་བྱུང་བའི་སྣོད་ཀྱི་རཀྟ་ལྔ་ཚན་ལྔའི་སྐྱོབས་སྦྱར་བའི་ཚུལ་ལ་རྡོའི་རཀྟ་ལྔ་ནི། མཚལ་དང་ལྡོང་རོས་བཙག་དང་ནི། །མདུང་རྩེ་སྦལ་རྒྱབ་རྣམ་པ་ལྔ། །ཞེས་སོ། །ཤིང་གི་རཀྟ་ལྔ་ནི། རྒྱ་སྐག་བཙོད་དང་སེང་ལྡེང་དང་། །བཙན་དུག་ཐར་ནུ་རྣམ་པ་ལྔ། །ཞེས་སོ། །རྩི་ལྔ་ནི། གླ་རྩི་གོ་ཆེ་བུ་རམ་དང་། །འབྲི་སྨུག་སྦྲང་རྩི་རྣམ་པ་ལྔ། །ཞེས་སོ། །འབྲུ་ལྔ་ནི། རྒུན་འབྲུམ་སྐྱེར་འབྲུ་སྐྱུ་རུ་ར། །ར་གག་དམར་པོ་ནས་ནག་ལྔ། །ཞེས་སོ། །མེ་ཏོག་ལྔ་ནི། ཨུག་ཆོས་ལུག་རུ་སྨུག་པོ་དང་། །སྲན་མ་རྒྱ་ལྕམ་རམ་བུ་ལྔ། །ཞེས་སོ། །དེ་ལྟར་སོ་ལྔ་པོ་བཏགས་ཏེ་ཁྲག་ཆེན་གྱིས་བྲུས་རིལ་བུར་དྲིལ་ཏེ་བུད་མེད་པདྨ་ཅན་གྱི་བྷནྡྷར་སྩལ་ལ། དར་དམར་གྱིས་ཁ་གཅད། སེང་ལྡེང་གི་མེ་ལ་རན་པར་བསྲོས་ཏེ། མཎྜལ་གྱི་དབུས་སུ་ཁྲིའི་སྟེང་བཞག་གོ། །གཉིས་པ་ནི། བདག་གསལ་ཆགས་པའི་དབང་ཅན་བསམ། །དགུག་བསྟིམ་མཉེས་མཆོད་བསྙེན་པ་བཟླས། །ཞེས་པས། བདག་མདུན་བསྒྲུབ་ཚུལ་སྔ་མ་བཞིན་ལ། སྔགས་ནི། ཨོཾ་བཛྲ་ཀཱི་ལི་ཀཱི་ལ་ཡ་མ་ཧཱ་རཀྟ་རཱ་ག་ས་མ་ཡཱ་བུ་བུ་སྭཱ་ཧཱ། ཞེས་པ་འབུམ་མམ་བྱེ་བ་བཟླས། །མངོན་དུ་ཁོལ་ལམ་རླངས་པ་འབྱུང་། །ལང་ན་ལུད་དམ་འཕགས་ན་ནི། །ལྷ་ལ་མཆོད་དེ་བདག་ཉིད་བཏུང་། །ཆགས་པ་བསྐྱེད་ཅིང་མདངས་ཀྱང་དམར། །ཁམས་གསུམ་མོ་ཡི་པདྨའི་མདངས། །ཆགས་བསྐྱེད་ནས་ནི་འབུལ་དུ་འོང་། །ཞེས་དང་། གསང་རྒྱུད་ལས། བསྙེན་པ་ཞག་བདུན་བར་དུ་ནི། །སྐྱེས་པ་དར་མའི་རྡོ་རྗེ་ཡིས། །དཀྲུག་ཅིང་གསང་སྔགས་རྒྱུན་དུ་བཟླས། །འབྲུ་བཅུད་བདུད་རྩིའི་མཆོད་པ་འབུལ། །རཀྟ་ཁོལ་མའི་རྟགས་དབྱུང་སྟེ། །རྣལ་འབྱོར་རྣམས་ལ་རྒྱན་བཏབ་ན། །དངོས་གྲུབ་མྱུར་དུ་ཐོབ་པར་འགྱུར། །ལྷ་སྲིན་རྣམས་ཀྱང་བྲན་དུ་ཁོལ། །མ་མོ་མཁའ་འགྲོ་དབང་དུ་སྡུད། །དངོས་གྲུབ་སྒྲུབ་ལ་བར་མི་གཅོད། །སྲས་མཆོག་རྣམས་ཀྱང་དེ་བཞིན་དུ། །ཐུགས་དམ་རྗེས་དྲན་གཟི་མདངས་བསྐྱེད། །གང་ལ་ནུས་མཐུ་མཐར་ཕྱིན་པའི། །དབང་དུ་བསྡུ་བའི་རྫས་དྲག་སྟེ། །གང་ལ་དམིགས་པ་འགྲུབ་པར་འགྱུར། །ཞེས་སོ། གལ་ཏེ་སོ་སོ་ནས་སྒྲུབ་པའི་སྤྲོས་པ་མ་ལྕོགས་ན་གསུམ་ཀའི་རྫས་ཚོགས་པར་བྱས་ལ་ཐོད་པ་གསུམ་དུ་བླུགས་ནས་ཅིག་ཅར་དུ་བསྒྲུབས་ཀྱང་རུང་སྟེ། རྡོ་རྗེ་ཁྲོས་པ་ལས། ཉུང་དཀར་གུ་གུལ་རཀྟ་གསུམ། །མཚན་མ་ངན་པའི་ཐོད་པ་རུ། །གསུམ་པོ་སོ་སོར་བླུག་བྱས་ལ། །ཚེར་མའི་ཤིང་གིས་ཁ་བཅད་ལ། །དཀར་ནག་སྦྲ་ནི་ཕུབ་བྱས་ལ། །ལམ་པོ་ཆེ་ཡི་རྒྱ་གྲམ་དུ། །མ་གྲུབ་བར་དུ་དེ་བཞིན་བྱ། །གཞན་ཡང་གྲུ་གསུམ་མཐིང་ནག་བསྒོམ། །ཨོཾ་བཛྲ་ཀཱི་ལི་ཀཱི་ལ་ཡ། ཧྲི་ལ་ཤག་ཛྭ་ལ་ནི་ཧཱུྃ་ཕཊ། དུ་བ་རླངས་དང་མེ་འོད་དང་། །འགུལ་དང་འཁོལ་བ་ལ་སོགས་འབྱུང་། །དེ་བཞིན་རྟགས་ལ་ཕེབས་པ་དང་། །ཉུང་དཀར་དབང་པོ་སྣ་ལྔར་བྲབ། །དྲི་ཆེན་དྲི་ཆུ་རྐྱེན་ལས་བསྐྱེད། །བདུད་ཀྱི་ཉི་མ་བཀྲ་མི་ཤིས། །ངན་པའི་དུས་སུ་འདི་དག་བསྒྲུབ། །ཅེས་པ་ལྟར་བྱའོ།། །།དགེའོ།།