གསོལ་འདེབས་ལེ་ཚན་བཞི།

Previous Text Back to Volume Page Next Text

Wylie title	gsol 'debs le tshan bzhi
Location	'jigs gling bka' 'bum Volume 8, Text 49, Pages 815-817 (Folios 1a1 to 2a5)
Author	འཇིགས་མེད་གླིང་པ་
Less details More details
Citation	'jigs med gling pa. Gsol 'debs le tshan bzhi. In Kun mkhyen rig 'dzin 'jigs med gling pa'i gsung 'bum, Vol. 8: 815-817. New Delhi: Shechen Publications, 2025.
Genre	Supplications - gsol 'debs

[edit]

༄༅། །རང་སེམས་བདེ་གཤེགས་སྙིང་པོ་ཡི། །ངོ་བོ་སྒྲིབ་བྲལ་དུ་སྟོན་མཛད་པའི། །གནས་ལུགས་རྫོགས་པ་ཆེན་པོའི་ཞལ། །རང་བྱུང་རྡོ་རྗེར་གསོལ་བ་འདེབས། །གཟུགས་སྐུའི་ཉིན་བྱེད་འཇིག་རྟེན་འདིའི། །སྒྲོན་མེ་གཅིག་པོ་ལོ་བརྒྱའི་བར། །འཚོ་ཞིང་གཞེས་ནས་བདག་སོགས་ཀུན། །འདི་ཕྱི་བར་དོ་ཐམས་ཅད་དུ། །འབྲལ་མེད་རྗེས་སུ་འཛིན་པར་ཤོག །ཅེས་པའང་དགེ་སློང་དཔལ་འབྱོར་གྱི་ངོར་རྫོགས་ཆེན་པ་རང་བྱུང་རྡོ་རྗེའམ་འཇིགས་མེད་གླིང་པས་སྨྲས་པའོ།། ༈ །།རྒྱལ་བ་འོད་མཚན་སྟོང་འབར་ནི། །སིན་དྷུའི་དྭངས་མཚོར་སྤྲུལ་པའི་སྐུ། །ཨོ་རྒྱན་སངས་རྒྱས་གཉིས་པ་དང་། །དབྱེར་མེད་དྲིན་ཅན་བླ་མ་མཁྱེན། །དལ་བ་བརྒྱད་ཀྱི་རྟེན་ཐོབ་ཀྱང་། །འབྱོར་པ་བཅུ་ཡིས་འདུ་འབྲལ་བྱས། །འཆི་བ་ནམ་ཡོང་མེད་བཞིན་དུ། །འདི་སྣང་ཞེན་པས་བཅིངས་ལ་གཟིགས། །ཆོས་བཞིན་བསྒྲུབ་པའི་རྒྱུ་ཚོགས་ཀྱང་། །རྣམ་གཡེང་འདུ་འཛིའི་ཞགས་པས་བཅིངས། །ཆོས་བརྒྱད་ཆོས་སུ་སྒོམ་པ་བདག །དབེན་པའི་གནས་སུ་ཆོས་སྤྱོད་འཕེལ། །རྟག་ཏུ་ངེས་འབྱུང་གིས་བསྐུལ་ནས། །དལ་རྟེན་དོན་ཡོད་བྱེད་པར་ཤོག །བདག་ཉིད་འཆི་བར་གྱུར་བའི་ཚེ། །དགོན་གནས་ཉེ་འབྲེལ་ལྟ་ཅི་སྨོས། །གཅེས་པར་བཟུང་བའི་ལུས་འདི་ཡང་། །དུར་ཁྲོད་འཇིགས་པར་འདོར་དགོས་ན། །ད་ལྟ་ཉིད་ནས་ཞེན་ཆགས་ཀྱི། །འཁྲི་བ་བཙན་ཐབས་ཆོད་གྱུར་ཏེ། །རི་ཁྲོད་ནགས་ཁྲོད་བས་མཐའ་རུ། །རང་སེམས་བཙན་ས་ཟིན་པར་ཤོག །སེམས་ཀྱི་གནས་ལུགས་རྟོགས་པ་ལ། །བླ་མའི་བྱིན་རླབས་ཞུགས་པ་དགོས། །རྟག་ཏུ་འགྲོ་ལ་སྙིང་རྗེ་དང་། །མོས་གུས་རྒྱུན་ཆད་མེད་པར་ཤོག །ལམ་བདེན་རྒྱ་མཚོའི་སྙིང་པོ་ནི། །རྣམ་ཀུན་རྒྱུད་ལ་གོམས་བྱས་པས། །འགྲོ་འོང་རྟག་ཆད་ཡོད་མེད་ལས། །འདས་པའི་བདེན་པ་མཐོང་བར་ཤོག །མདོར་ན་འདི་ཕྱི་བར་དོ་ཀུན། །སྐྱིད་སྡུག་ལེགས་ཉེས་ཅི་བྱུང་ཡང་། །རེ་ས་བླ་མ་ལས་མེད་པས། །དོན་གཉིས་ལྷུན་གྱིས་གྲུབ་པར་ཤོག །རབ་བྱུང་དབུ་མཛད་བསམ་གཏན་པའི་ངོར། རིག་འཛིན་འཇིགས་མེད་གླིང་པས་སོ།། ༈ །།བདེ་གཤེགས་སྙིང་པོའི་ཆོས་ཉིད་ནི། །རང་བཞིན་རྫོགས་པ་ཆེན་པོའི་ཞལ། །ཚོགས་བརྒྱད་གློ་བུར་དྲི་མའི་དངོས། །བསལ་མཛད་རིག་འཛིན་འཇིགས་མེད་གླིང་། །དེ་ཕྱིར་སྙིང་གི་ཟེའུ་འབྲུ་རུ། །དྲན་པའི་ངོ་བོར་བླ་མ་བཞུགས། །ཉིན་མཚན་སྐད་ཅིག་ཐང་ཅིག་ཀྱང་། །བརྗེད་པ་མེད་པར་གསོལ་བ་འདེབས། །བསྐལ་པ་རྒྱ་མཚོར་ཞབས་བརྟན་ཅིང་། །མོས་གུས་གོམས་པའི་རྒྱུ་འབྲས་ཀྱིས། །འདི་ཕྱི་བར་དོ་ཐམས་ཅད་དུ། །བླ་མའི་སྣང་བ་མི་འབྲལ་བ། །བར་གཅོད་རྐྱེན་གྱིས་མི་བརྫི་ཞིང་། །བློ་འདས་དྲན་པའི་ངོ་བོ་རུ། །ས་ལམ་ཡོན་ཏན་ཡོངས་རྫོགས་ནས། །ཐུགས་ཡིད་གཅིག་ཏུ་འདྲེས་པར་ཤོག །ཅེས་པའང་བསམ་གླིང་སློབ་དཔོན་དཔོན་སློབ་གསུམ་གྱི་ངོར་སྨྲས་པའོ།། ༈ །།རང་སེམས་ཆོས་སྐུར་ངོ་སྤྲོད་པའི། །དྲིན་ཆེན་གྱི་བླ་མ་འཇིགས་མེད་གླིང་། །བསྟན་པ་རྒྱ་མཚོའི་རྩ་ལག་ཏུ། །ཞབས་པད་བརྟན་པར་གསོལ་བ་འདེབས། །འདི་ཕྱི་བར་དོ་ཐམས་ཅད་དུ། །བླ་མའི་ཐུགས་རྗེས་སྐྱོང་བ་དང་། །སྡིག་སྒྲིབ་ནད་གདོན་ཉེར་འཚེ་ཀུན། །ཞི་ནས་དབེན་པའི་རི་ངོགས་སུ། །ཆོས་བཞིན་སྤྱོད་པའི་རང་དབང་ནི། །མྱུར་དུ་ཐོབ་པར་བྱིན་གྱིས་རློབས། །ཞེས་པའང་རང་བྱུང་རྡོ་རྗེས་སོ།། །།