ཞབ་རྟན་སོགས་ཕྱོགས་བསྡུས།

Previous Text Back to Volume PageLast text in volume.

Wylie title	zhab rtan sogs phyogs bsdus
Location	'jigs gling bka' 'bum Volume 8, Text 50, Pages 819-826 (Folios 1a1 to 4b5)
Author	འཇིགས་མེད་གླིང་པ་
Less details More details
Citation	'jigs med gling pa. Zhab rtan sogs phyogs bsdus. In Kun mkhyen rig 'dzin 'jigs med gling pa'i gsung 'bum, Vol. 8: 819-826. New Delhi: Shechen Publications, 2025.
Genre	Prayers for Long Life - zhabs brtan gsol 'debs - brtan bzhugs

[edit]

༄༅། །རིག་འཛིན་འཇིགས་མེད་གླིང་པའི་ཞབས་བརྟན་བཞུགས། །གཞི་དབྱིངས་ནམ་མཁའི་རྡོ་རྗེ་ཀུན་ཏུ་བཟང་། །གཞི་སྣང་ཡེ་ཤེས་སྙིང་པོ་དགའ་རབ་རྗེ། །རྣམ་འཕྲུལ་དུ་མར་ཤར་བའི་ངོ་བོ་ཉིད། །རིག་འཛིན་འཇིགས་མེད་གླིང་པ་ཞབས་བརྟན་ཤོག །སྙིགས་ལས་ཆེར་སྙིགས་ལྟ་བའི་སྙིགས་མ་ཡིས། །བྱང་ཆུབ་སེམས་གཉིས་གཞན་ཕན་ཉམས་པའི་ཚེ། །བསྡུ་བ་བཞི་དང་རིགས་ལྔའི་དམ་ཚིག་ལས། །རང་དོན་སེམས་པ་མེད་ཁྱོད་ཞབས་བརྟན་ཤོག །བདེན་པ་གཉིས་ཀྱི་བང་རིམ་ཐེག་དགུའི་རྩེ། །ཤིན་ཏུ་རྣལ་འབྱོར་འཆི་མེད་ཞི་བའི་གྲོང་། །རང་ཉིད་ཞུགས་ནས་གཞན་དག་སྨིན་གྲོལ་ལ། །འགོད་མཛད་རང་བྱུང་རྡོ་རྗེ་ཞབས་བརྟན་ཤོག །ལུང་གི་དཀྱིལ་འཁོར་རྟོགས་པའི་འོད་ཟེར་གྱི། །ཉིན་མོར་བྱེད་པ་རྒྱལ་བའི་བསྟན་ཡིན་ན། །ཀུན་འབྱུང་སྡུག་བསྔལ་མུན་འཐོར་འཁྱམས་པ་རྣམས། །ངེས་དོན་ལམ་ལ་བཀྲི་ཁྱོད་ཞབས་བརྟན་ཤོག །བཅོམ་ལྡན་འོད་སྲུངས་དྲུང་དུ་ཐུགས་བསྐྱེད་ནས། །ཤཱཀྱ་ཐུབ་པའི་སྤྱན་སྔར་འདུལ་བ་འཛིན། །གངས་རིའི་ཁྲོད་དུ་རྡོ་རྗེ་ཐེག་པའི་ལམ། །རྣམ་འཕྲུལ་དུ་མས་གསལ་ཁྱེད་ཞབས་བརྟན་ཤོག །དབང་བཅུའི་ཐོག་མ་དཔེ་བྱད་རིགས་ལྔའི་རྩེར། །མ་ཆགས་པདྨ་ཅན་གྱིས་དབུགས་དབྱུངས་པའི། །རྟེན་འབྲེལ་དུས་ལས་ཡོལ་མེད་འཚོ་གཞེས་ནས། །རྣམ་པ་རྒྱལ་བ་ཅན་དུ་འཚང་རྒྱ་བའི། །འདུས་པ་དང་པོའི་ལུང་བསྟན་ཐོབ་པར་ཤོག །ཅེས་པའང་གསང་སྔགས་ཐེག་མཆོག་གླིང་མཁན་རིན་པོ་ཆེས་དབུས་འདུས་ཚོགས་སྤྱི་ནས་དད་གུས་ཆེན་པོས་གསོལ་བ་བཏབ་པའི་ངོར་གནས་དེ་ཉིད་དུ་སྦྱར་བའོ།། ༈ །།རྩ་གསུམ་ཀུན་འདུས་པདྨ་འབྱུང་གནས་དང་། །བདེ་སྐྱོང་མཁའ་འགྲོའི་གསང་མཛོད་མཁར་ཆེན་བཟའ། །སྤྲུལ་པའི་རྗེ་འབངས་ཉེར་ལྔས་མཐུ་བྱིན་བསྐྱེད། །ཚེ་དབང་རིག་འཛིན་འཇའ་ལུས་དངོས་གྲུབ་སྩོལ། །ཐ་མལ་ལུས་ལ་ཡེ་ཤེས་སྙིང་པོ་ཅན། །ཀློང་ལྔ་མི་ཤིགས་དགོངས་པའི་གསང་མཛོད་བདག །པདྨས་རྗེས་བཟུང་སྦས་པའི་རྣལ་འབྱོར་པ། །མཁྱེན་བརྩེའི་འོད་ཟེར་བསྐལ་བརྒྱར་ཞབས་བརྟན་ཤོག །མཁའ་འགྲོའི་སུན་མ་ཡེ་ཤེས་དབྱིངས་སུ་བྱོལ། །བར་གཅོད་ཚེ་འཕྲང་ཀ་དག་ངང་དུ་བཟློག །རིག་པའི་རང་བཞིན་སྐྱེ་འཆི་བགྲེས་རྒུད་བྲལ། །གཞི་སྣང་ཡེ་ཤེས་ཆེན་པོར་རྟག་བརྟན་གསོལ། །རྨད་བྱུང་དད་པའི་དྲི་བཞོན་གྱིས་དྲངས་པའི། །གསོལ་འདེབས་ཉི་ཟླའི་སྣང་བྱེད་བསྐུལ་བ་ལས། །གང་སྐུ་ལྷུན་པོའི་སྤོ་མཆོག་ཆེས་གསལ་ཞིང་། །མི་ཤིགས་རྡོ་རྗེའི་ཁམས་སུ་བརྟན་པར་ཤོག །སོ་སྐྱེའི་སྤྱོད་ཡུལ་ལས་འདས་རྫོགས་པ་ཆེའི། །མངོན་སུམ་རིག་པའི་ཆོས་འཁོར་བསྐོར་ནས་ཀྱང་། །ཡིད་དཔྱོད་བརྟག་དཔྱད་སྒོམ་ལ་མི་རེ་བར། །སྣང་བཞིའི་སྦུབས་ནས་འགྲོ་ཀུན་འདྲེན་པར་ཤོག །ཅེས་རིང་འཚོའི་ཐབས་ཚུལ་དོན་དུ་གཉེར་བའི་གྲོང་ཚིག་དུམ་བཅད་འདི་ནི་དད་ལྡན་འགས་ནན་ཏན་ཆེན་པོས་བསྐུལ་བའི་ངོར་དཔལ་གྱི་བསམ་ཡས་མཆིམས་ཕུར་རིག་པ་འཛིན་པ་མཁྱེན་བརྩེའི་ལྷ་རང་ཉིད་ཀྱིས་སོ།། ༈ །།གཞོམ་བྲལ་རྡོ་རྗེའི་ངོ་བོ་རང་གི་སེམས། །སྐྱེ་འཆིའི་མིང་འདོགས་ཟད་པ་ཆོས་ཀྱི་དབྱིངས། །འཇའ་ལུས་འཕོ་འཇིག་བྲལ་བ་རྡོ་རྗེའི་སྐུ། །ཚེ་དབང་རིག་འཛིན་པདྨས་བྱིན་ཕོབ་ཅིག །བདེ་གཤེགས་སྙིང་པོའི་རང་བཞིན་བྱང་ཆུབ་སེམས། །གློ་བུར་སྒྲིབ་པས་ཀུན་ནས་དཀྲིས་བྱས་ཏེ། །སྲིད་མཚོར་བྱིང་བའི་འགྲོ་ཀུན་ཞི་བའི་གླིང་། །འཁྲིད་མཛད་རིག་འཛིན་བླ་མ་ཞབས་བརྟན་ཤོག །མཁྱེན་གཉིས་ནོར་བུའི་གླིང་དུ་གནས་བཅས་ནས། །བརྩེ་ཆེན་ཞགས་པས་འགྲོ་ལ་དམ་འཁྱུད་པའི། །འོད་ཟེར་ཕ་མཐའ་མི་མངོན་འཕྲོ་བའི་ཞལ། །ཉིན་མོའི་སྤུན་ཟླ་ཇི་བཞིན་རྟག་བརྟན་ཤོག །འགྲོ་ལ་ཕན་བདེའི་འབྱུང་གནས་རྒྱལ་བའི་བསྟན། །ལྔ་བརྒྱ་ཕྲག་བཅུའི་མུ་ཁྱུད་ལ་ཐུག་ཚེ། །ཐེག་པ་ཆེན་པོའི་སྡེ་སྣོད་གངས་རིའི་ཁྲོད། །འདྲེན་པའི་ཤིང་རྟ་ཆེན་པོ་ཞབས་བརྟན་ཤོག །ཁྱོད་ཐུགས་བྱམས་དང་སྙིང་རྗེའི་ནོར་བུའི་ཏོག །ཀུན་ལ་ཉེ་འཁོན་མེད་དུ་གསལ་ན་ཡང་། །གང་འདུལ་ཕྲིན་ལས་འཇུག་པ་ཉི་འོག་གི། །རྒྱལ་ཁམས་བསྟན་འགྲོའི་དཔྱིད་དུ་གསལ་བར་ཤོག །འཚོ་གཞེས་རྡོ་རྗེ་ལུས་ཀྱི་གཞལ་མེད་ཁང་། །གདན་གསུམ་ཡོངས་རྫོགས་དམ་པ་རིགས་བརྒྱའི་ལྷ། །དེ་སྙེད་བགྲང་བྱ་ལས་ཀྱང་ཆེས་ལྷག་པའི། །དགའ་སྟོན་མངོན་སུམ་མཐོང་བའི་བཀྲ་ཤིས་ཤོག། ༈ །།འཇིགས་ཚོགས་ལྟ་བའི་རི་དང་ཆོས་ཉིད་དོན། །རྟོག་དཔྱོད་ཡུལ་ལ་རྣམ་པར་རིག་པ་ཅན། །ཀུན་འབྱུང་དབུ་མར་འཁྲུལ་པའི་རྟག་ཆད་དགྲ། །དོན་དམ་རྫོགས་པ་ཆེན་པོར་ཞབས་བརྟན་གསོལ། །ཡོངས་གྲུབ་རང་བཞིན་ཤེས་པའི་མོས་གུས་ནི། །སྙིང་དབུས་དྲན་པ་ཉེར་གཞག་ལ་གོམས་པས། །ཕུང་པོ་ལྔ་དང་ཚོགས་བརྒྱད་ཉེར་ལེན་སེམས། །རྣམ་བྱང་མངོན་སུམ་རིག་པའི་དོན་རྟོགས་ཤོག །རྣམ་གྲངས་པའི་དོན་དམ་དང་། དེ་ལས་འགལ་བའི་ཤློ་ཀ་གཉིས་བསྣན་ཏེ། རིག་འཛིན་འཇིགས་མེད་གླིང་པས་སྡེ་སྣོད་མཁྱེན་པའི་དབང་པོ་མཚོ་སྣ་སྤྲུལ་སྐུ་རིན་པོ་ཆེའི་ཐུགས་རྒྱུད་དོན་གྱི་དབུ་མ་ཆེན་པོ་ལ་སྦྱར་བའི་ཚེ་དཔལ་ལྡན་པདྨ་འོད་གླིང་དུ་སྦྱར་བའོ།། ༈ །།རྒྱལ་བའི་བསྟན་ལ་སྟོན་པ་གཉིས་པ་བཞིན། །འཛམ་གླིང་མཛེས་པའི་རྒྱན་གྱི་དམ་པ་མཆོག །དཔལ་ལྡན་ནཱ་གཱ་རྫུ་ན་གངས་རིའི་ལྗོངས། །སླར་བྱོན་རཏྣ་ཤཱི་རྒྱལ་གྱུར་ཅིག །གང་གི་ཆོས་སྲིད་གདུགས་དཀར་ས་བླའི་དབྱིངས། །འདེགས་པའི་ཐུགས་བསྐྱེད་དམ་བཅའ་མི་ལྷོད་པ། །སྤྲུལ་པའི་སྐུ་མཆོག་ཡབ་སྲས་རྣམ་པ་ཟུང་། །གཞོམ་མེད་རྡོ་རྗེའི་ཁྲི་ལ་རྟག་བརྟན་གསོལ། །མཐུན་པའི་ཡུལ་དང་དམ་པའི་མཛའ་བཤེས་གཉེན། །ལེགས་པར་སྨོན་དང་བསོད་ནམས་དམ་པའི་བྱིན། །འཁོར་ལོ་ཆེན་པོ་བཞི་ཡི་ཤིང་རྟའི་སྟེགས། །རྣམ་འདྲེན་ཡབ་སྲས་བསྐལ་བརྒྱར་ཞབས་བརྟན་ཤོག །འཇིག་རྟེན་མགོན་པོའི་བསྟན༷་སྲིད་འཛིན༷་པ་ལ། །པདྨ༷་དཀར་པོའི་གེ་སར་བཞད་པ་ཡི། །རྒྱལ༷་མཚན༷་འཇིགས་མེད་ཕྲིན༷་ལས༷་རྣམ༷་རྒྱལ༷་སྡེ། །བསྐལ་པ་རྒྱ་མཚོའི་བར་དུ་ཞབས་བརྟན་ཤོག །མཁྱེན་རབ་ནམ་མཁའི་རྡོ་རྗེ་འཇམ༷་པའི་དབྱངས༷། །ཆོས༷་ཀྱི༷་རྒྱལ༷་མཚན༷་ཕྲིན༷་ལས༷་རྣམ༷་པར་རྒྱལ༷། །རིག༷་འཛིན༷་བཞི་ཡི་མཐུ༷་སྟོབས༷་གྲུབ་པའི་སྡེས། །རྒྱལ་བསྟན་ཉིན༷་མོར་བྱེད༷་པའི་འོད༷་ཟེར༷་བརྒྱར། །འབར་བཞིན་བསྐལ་པ་རྒྱ་མཚོར་འཚོ་གཞེས་ཤོག །རང་བཞིན་བསམ་མི་ཁྱབ་པ་ཆོས་ཀྱི་དབྱིངས། །དཀོན་མཆོག་གསུམ་གྱི་བདེན་པའི་བྱིན་རླབས་དང་། །སྨོན་པ་འགྲུབ་པའི་དྲང་སྲོང་བདེན་མཐུ་ཡི། །རྗེས་སུ་ཕྱོགས་པའི་བཀྲ་ཤིས་དགའ་སྟོན་སྩོལ། །ཞེས་པའང་བླ་དཔོན་གྱིས་ཞབས་འདེགས་ལ་ལེགས་སྨོན་གྲུབ་པ་མགྲོན་གཉེར་དཀོན་མཆོག་བློ་ལྡན་གྱིས་བསྐུལ་ངོར། རིག་འཛིན་འཇིགས་མེད་གླིང་པས་སོ།། ༈ །།རྒྱལ་སྲས་ཉིན་བྱེད་འོད་ཟེར་གྱི་ཞབས་བརྟན། རྒྱལ་བའི་རྣམ་སྤྲུལ་སྐྱེ་མེད་ཀློང་ལས་ཤར། །དམ་པའི་དེ་ཉིད་ཆོས་ཀྱི་བརྒྱུད་འཛིན་པ། །རྒྱལ་སྲས་ཉིན་བྱེད་འོད་ཟེར་སྤྲུལ་པའི་སྐུ། །བསྐལ་བརྒྱར་འཚོ་གཞེས་བསྟན་པ་དར་གྱུར་ཅིག །ཅེས་པའང་སློབ་བུ་འཇིགས་མེད་བློ་གསལ་འོད་ཟེར་གྱི་ངོར་མཚན་ཐོག་མར་གསོལ་བ་དང་ཆབ་གཅིག་རང་བྱུང་རྡོ་རྗེས་སོ།། ༈ །།མདོ་ཁམས་རྫོགས་ཆེན་པའི་སྐྱེ་ཕྲེང་གསོལ་འདེབས་བཞུགས། དུས་གསུམ་སྐྱེ་འགག་མེད་པའི་ཆོས་ཉིད་ཀྱང་། །སེམས་ཅན་ཁམས་ལ་གཟུགས་སྐུ་རྣམ་གཉིས་སུ། །སྣང་བའི་ངོ་མཚར་བདེ་གཤེགས་གཙུག་ཏོར་ཅན། །མཚན་གྱིས་ངན་སོང་གྲོལ་ལ་གསོལ་བ་འདེབས། །རྒྱུད་སྡེ་རྒྱ་མཚོའི་མངའ་བདག་ཀུ་ཀུ་རི། །འཕོ་ཆེན་རྡོ་རྗེའི་ས་བརྙེས་བི་མ་ལ། །སྤྲོས་བྲལ་ཕྱག་རྒྱ་ཆེན་པོ་ས་ར་ཧ། །བསྟན་པའི་ཆུ་འགོ་གསུམ་ལ་གསོལ་བ་འདེབས། །ལྷ་སྲིན་བྲན་ཁོལ་རླངས་པ་ཤྲཱི་སིང་། །འཁྲུལ་སྣང་བྲག་རི་བསྙིལ་བ་དཀོན་མཆོག་འབྱུང་། །རྒྱལ་བསྟན་ཉིན་མོར་བྱེད་པ་ཁྲི་རལ་ཞབས། །བསྟན་པའི་རྩ་ལག་གསུམ་ལ་གསོལ་བ་འདེབས། །གཏི་མུག་ལམ་སློང་གྲུབ་མཆོག་ཕག་ཚོང་བ། །མི་ལ་བཞད་པའི་སྲས་གྱུར་བྱང་ཆུབ་རྒྱལ། །དྲུག་པ་སེང་གེའི་སྒྱུ་འཕྲུལ་དུས་གསུམ་མཁྱེན། །གྲུབ་པ་མཆོག་བརྙེས་གསུམ་ལ་གསོལ་བ་འདེབས། །རྟོགས་པས་བདག་རྒྱུད་གྲོལ་བ་གླིང་རས་རྗེ། །བླ་མར་མོས་གུས་མཐར་ཕྱིན་སྟག་ལུང་བ། །བརྟུལ་ཞུགས་གྲུབ་པ་ཨོ་རྒྱན་རང་བྱུང་བ། །སྒྲུབ་བརྒྱུད་བསྟན་འཛིན་གསུམ་ལ་གསོལ་བ་འདེབས། །གཞི་གསུམ་རྩ་བ་བརྟན་པ་བློ་གྲོས་བཟང་། །རྙིང་བསྟན་མདོ་སྨད་སྤེལ་ལ་སྨོན་ལམ་གྱི། །མཐུ་གྲུབ་པདྨ༷འི་རིག༷་པ་འཛིན༷་པ་དང་། །འགྱུར་མེད་ཐེག་མཆོག་ཅེས་ལ་གསོལ་བ་འདེབས། །སྔ་འགྱུར་བསྟན་པའི་རྩ་བ་མདོ་སྒྱུ་སེམས། །ཡར་ཕུར་སངས་རྒྱས་མཉམ་པར་སྦྱོར་ལ་སོགས། །བཀའ་མའི་སྒྲུབ་ཆེན་ཕྲིན་ལས་སྲོལ་བཏོད་པའི། །ངེས་དོན་བསྟན་འཛིན་བཟང་པོར་གསོལ་བ་འདེབས། །ངེས་འབྱུང་རྒྱུད་བརླན་བྱང་ཆུབ་སེམས་གཉིས་ཀྱི། །ཤིང་རྟས་དྲངས་པའི་སྨིན་གྲོལ་ལམ་མཆོག་ལ། །རྟག་ཏུ་བསྟེན་གོམས་བགྱིས་པའི་དངོས་གྲུབ་ཀུན། །ཚེ་འདི་ཉིད་ལ་མཐོང་བར་བྱིན་གྱིས་རློབས། །ཞེས་པའང་དགེ་རྩེ་བླ་མ་འཇིགས་མེད་ངོ་མཚར་གྱི་ངོར་རིག་པ་འཛིན་པ་མཁྱེན་བརྩེའི་ལྷས་སོ།། ༈ །།ཇ་མཆོད་ནི། སངས་རྒྱས་མཉམ་སྦྱོར་ཚོགས་ཆེན་འདུས་པའི་སྡེ། །སྒྱུ་འཕྲུལ་ཞི་ཁྲོ་ཧེ་རུ་ཀ་གལ་པོ། །ཟླ་གསང་ཐིག་ལེ་རྟ་མཆོག་རོལ་པ་དང་། །རྡོ་རྗེ་ཕུར་པའི་དཀྱིལ་འཁོར་རྒྱ་མཚོ་ལ། །མཆོད་པ་འབུལ་ལོ་མཆོག་ཐུན་དངོས་གྲུབ་སྩོལ། །མཆོག་གསུམ་ངོ་བོ་དཔལ་མགོན་བླ་མ་དང་། །རྒྱུད་སྡེ་རྒྱ་མཚོ་གནས་སྲུང་མཁའ་འགྲོ་ལྷ། །མ་མགོན་གཟའ་རྡོར་ཚེ་རིང་མཆེད་ལྔ་ལ། །མཆོད་གསོལ་བསྟོད་དོ་བསམ་དོན་ལྷུན་གྲུབ་མཛོད།། །།དགེའོ།། དགེའོ།། དགེའོ།།