འཇིགས་བྱེད་ནག་པོ་སུམ་སྒྲིལ་གྱི་ལིང་ཁྲུས།

Previous Text Back to Volume Page Next Text

Wylie title	'jigs byed nag po sum sgril gyi ling khrus
Location	'jigs gling bka' 'bum Volume 8, Text 20, Pages 571-573 (Folios 1a1 to 2a6)
Author	འཇིགས་མེད་གླིང་པ་
Less details More details
Citation	'jigs med gling pa. 'jigs byed nag po sum sgril gyi ling khrus. In Kun mkhyen rig 'dzin 'jigs med gling pa'i gsung 'bum, Vol. 8: 571-573. New Delhi: Shechen Publications, 2025.
Genre	Cleansing Ritual - khrus chog
Deity	gshin rje nag po
Colophon	ཅེས་གསུངས་པ་ཡང་དམར་ཁྲིད་ཡིག་ཆུང་གི་དགོངས་དོན་མ་འཁྲུལ་བ་འདིའི་ཆ་ལག་ཏུ་ངག་བསྒྲིགས་བྱས་པ་ཡིན་ནོ།།
Colophon	ces gsungs pa yang dmar khrid yig chung gi dgongs don ma 'khrul ba 'di'i cha lag tu ngag bsgrigs byas pa yin no//

[edit]

༄༅། །འཇིགས་བྱེད་ནག་པོ་སུམ་སྒྲིལ་གྱི་ལིང་ཁྲུས། དེ་ནས་ལིང་ཁྲུས་བྱ་བ་ནི། རང་གི་མདུན་དུ་ཡོ་བྱད་རྣམས་འདུ་བྱས་ལ། དང་པོ་རང་སྒྲིབ་སྦྱོང་བ་ནི། རང་གི་སྤྱི་མགྲིན་སྙིང་ག་པད་ཟླའི་སྟེང༔ རྡོར་སེམས་དཀར་དམར་མཐིང་གསུམ་འོད་དུ་འབར༔ རྡོ་རྗེ་དྲིལ་འཛིན་རིན་ཆེན་རུས་པས་བརྒྱན༔ དར་ཟབ་ལོངས་སྤྱོད་རྫོགས་སྐུའི་ཆ་ལུགས་འཛིན༔ ཐུགས་ཀར་ཟླ་སྟེང་ཧཱུྃ་དཀར་ཡིག་བརྒྱས་བསྐོར༔ དེ་ལས་འོད་ཟེར་བདུད་རྩིའི་རྒྱུན་བབས་པས༔ སྒོ་གསུམ་ཉེས་ཚོགས་ཐམས་ཅད་སངས་ཀྱིས་དག༔ སླར་ཡང་འོད་འཕྲོས་འཕགས་པ་ཐམས་ཅད་མཆོད༔ ཚུར་འདུས་བདག་གི་དམ་ཚིག་ཉམས་ཆག་དང༔ བྱད་ཕུར་ངག་མནན་གཏད་ཁྲམ་ཕྲ་མེན་གྱི༔ ནུས་མཐུ་ཉེས་ཚོགས་མ་ལུས་རབ་བྱང་ནས༔ རང་ལུས་དྭངས་ཤེལ་དྲི་མེད་ལྟ་བུར་གྱུར༔ ཡི་གེ་བརྒྱ་པ་བཟླས་རྗེས། མགོན་པོ་བདག་གི་སྡིག་སྒྲིབ་མ་ལུས་པ༔ དག་པར་ཐུགས་རྗེ་བསྐུལ་བའི་གདུང་ཤུགས་ཀྱིས༔ གནས་གསུམ་ལྷ་རྣམས་འོད་དུ་ཞུ་བ་ཡིས༔ དབྱེར་མེད་ངོ་བོ་གཅིག་ཏུ་ས་མ་དྷིཿ ཞེས་བརྗོད། ལིངྒ་ལ་སྲིད་པའི་བྱེ་མའམ་ཞིང་ས་གཙང་མ་འཐོར་ཞིང་། ལཾ་ཧོ་ཤུདྡྷེ་ཤུདྡྷེ་སྭཱ་ཧཱ། ཞེས་དང་། ཆུ་མིག་ལྐུགས་པའམ་ཕུ་རྡུགས་ཀྱི་ཆུ་རོ་སྐྲའི་ཆུན་པོས་འཐོར་ཞིང་། བཾ་ཧོ་ཤུདྡྷེ་ཤུདྡྷེ་སྭཱ་ཧཱ། དེ་བཞིན་དུ་ལྷ་དབྱེའི་སྒྲོ་གཉིས་ཀྱིས་གཡབ་ཅིང་། ཡཾ་ཧོ་ཤུདྡྷེ་ཤུདྡྷེ་སྭཱ་ཧཱ། བྲ་ཤིང་གི་མེས་བསྐོར་ཞིང་། རཾ་ཧོ་ཤུདྡྷེ་ཤུདྡྷེ་སྭཱ་ཧཱ། ཞེས་ས་ལ་དྲི་མ་ཐིམ། ཆུས་བཀྲུ། རླུང་གིས་གཏོར། མེས་བསྲེག་པའི་དམིགས་པ་བྱ་ཞིང་བར་སྣང་ལ་གཡབ་ཅིང་། རྣལ་འབྱོར་པ་བདག་ཅག་ཡོན་མཆོད་ཀྱི་ལུས་ཀྱི་དྲི་མས་མ་གོས་སོ། །ངག་གི་དྲི་མས་མ་གོས་སོ། །ཡིད་ཀྱི་དྲི་མས་མ་གོས་སོ། །ལུས་ངག་ཡིད་གསུམ་གྱི་དྲི་མས་མགོས་སོ། །ཨེ་ཧེ་རཾ། ཨི་ན་རཾ། བི་ན་རཾ། ཤུདྡྷེ་ཤུདྡྷེ་ཨ་ཨ། ཞེས་ཨ་རྐྱང་ཉེར་གཅིག་དབུགས་ཐེངས་གཅིག་ལ་འདྲེན་ཞིང་གདོད་མའི་སྟོང་ཆེན་གྱི་ངང་དུ་ཀུན་རྫོབ་ཀྱི་དྲི་མ་ཐམས་ཅད་ཡེ་དག་ཡོངས་གྲོལ་དུ་སྦྱངས་ལ་དར་ཅིག་མཉམ་པར་གཞག་ལ། ཡང་ན་ལོང་སྐབས་ཀྱིས་གྲུབ་ན། ཟངས་གཞོང་ཆུ་གཙང་གིས་བཀང་ལ་མདུན་དུ་བཞག་ལ། བདག་ཉིད་འཇམ་དཔལ་གཤིན་རྗེར་གསལ་བ་ཡི། །མདུན་དུ་བདུད་རྩིའི་རང་བཞིན་ཉལ་འགྲོའི་དབུས། །པྃ་ལས་པདྨ་ཨ་ལས་ཟླ་བའི་སྟེང་། །བྃ་ལས་ཆུ་ཡི་ལྷ་མོ་སྐུ་མདོག་དཀར། །ཕྱག་གཡས་མཆོག་སྦྱིན་གཡོན་པ་པདྨ་དམར། །ཞབས་གཉིས་རྡོ་རྗེའི་སྐྱིལ་ཀྲུང་རིན་ཆེན་བརྒྱན། །ཐུགས་ལས་འོད་འཕྲོས་རང་འདྲའི་ཡེ་ཤེས་དྲངས། །ཛཿཧཱུྃ་བཾ་ཧོཿགཉིས་སུ་མེད་པར་གྱུར། །དེ་ནས་ལིངྒ་བཀྲུས་ལ།༢ དེའི་ཕྱག་གཡས་མཆོག་སྦྱིན་བྃ་ཡིག་ལས། །བདུད་རྩིའི་རྒྱུན་བབས་ལིངྒ་བཤལ་བ་ཡིས། །རྣལ་འབྱོར་བདག་ཅག་ཁ་རླངས་དྲ་དྲི་རྡུལ། །གཟས་པོའི་ཁ་རྗེ་བསོད་ནམས་ཚེ་དཔལ་འབྱོར། །མ་ལུས་ཆུ་ཡི་ནང་དུ་སིབ་ཀྱིས་ཐིམ། །སླར་ཡང་ཆུ་ཡི་ལྷ་མོ་འོད་དུ་ཞུ། །ཆུ་དང་དབྱེར་མེད་བདུད་རྩིའི་རང་བཞིན་གྱུར། །ཞེས་བརྗོད་ཅིང་བསམས་ལ། རང་གིས་ཧུབ་ཅིག་འཐུངས་པས་ཚེ་བསོད་བཀྲག་མདངས་རྒྱས་པར་བསམ་མོ། །ཆུ་ལྷག་གནས་ཁང་གི་ཕྱི་ནང་ཁྱབ་པར་གཏོར་བས་བཀྲ་ཤིས་བྱིན་ཆགས། འབག་བཙོག་ཐམས་ཅད་རང་བཞིན་གྱིས་དག་པར་འགྱུར། ཅེས་གསུངས་པ་ཡང་དམར་ཁྲིད་ཡིག་ཆུང་གི་དགོངས་དོན་མ་འཁྲུལ་བ་འདིའི་ཆ་ལག་ཏུ་ངག་བསྒྲིགས་བྱས་པ་ཡིན་ནོ།། །།