བྲམ་ཟེ་ཕུར་བུའི་ལུགས་ཀྱི་དབྱངས་ཅན་མ་སྒྲུབ་ཐབས་ཀུན་མཁྱེན་ལམ་སྲོལ།

Previous Text Back to Volume Page Next Text

Wylie title	bram ze phur bu'i lugs kyi dbyangs can ma sgrub thabs kun mkhyen lam srol
Location	'jigs gling bka' 'bum Volume 8, Text 11, Pages 263-269 (Folios 1a1 to 4a4)
Author	འཇིགས་མེད་གླིང་པ་
Less details More details
Citation	'jigs med gling pa. Bram ze phur bu'i lugs kyi dbyangs can ma sgrub thabs kun mkhyen lam srol. In Kun mkhyen rig 'dzin 'jigs med gling pa'i gsung 'bum, Vol. 8: 263-269. New Delhi: Shechen Publications, 2025.
Genre	Sadhanas - Evocation Ritual - sgrub thabs
Deity	dbyangs can ma
Colophon	ཞེས་པའང་འབྲོང་རྩེ་སྲས་ཀྱི་ཞལ་འདོན་དུ་རིག་འཛིན་འཇིགས་མེད་གླིང་པས་གཟིམ་ཆུང་ལྷ་རྒྱལ་རྩེར་བཀོད་པའོ།། །།དགེའོ། །དགེའོ། །དགེའོ།།
Colophon	zhes pa'ang 'brong rtse sras kyi zhal 'don du rig 'dzin 'jigs med gling pas gzim chung lha rgyal rtser bkod pa'o//__//dge'o/_/dge'o/_/dge'o//

[edit]

༄༅། །བྲམ་ཟེ་ཕུར་བུའི་ལུགས་ཀྱི་དབྱངས་ཅན་མ་སྒྲུབ་ཐབས་ཀུན་མཁྱེན་ལམ་སྲོལ་བཞུགས།

༄༅། །ན་མཿསྭ་ར་སྭསྟི། འདིར་ལྷ་མོ་དབྱངས་ཅན་མའི་རྒྱུན་བསྙེན་བྱ་བར་འདོད་པས། སྔ་ཐུན་གྱི་ཆར་ཤ་ཆང་། སྒོག་ཙོང་སོགས་དྲི་ང་བའི་ཟས་སྤངས་ལ། སྐྱབས་སེམས་སྔོན་དུ་འགྲོ་བས། སྭ་བྷཱ་ཝས་སྦྱངས། སྣོད་བཅུད་རྣམ་དག་བདེ་ཆེན་ཞིང་། །འོད་སྣང་ལས་གྲུབ་རི་དབང་དང་། །ནགས་ཚལ་སྨན་ལྗོངས་ཉམས་དགའ་བ། །ལྷ་དང་དྲང་སྲོང་གྲུབ་པས་བརྟེན། །དབུས་ན་འོ་མའི་རྒྱ་མཚོའི་ནང་། །པཾ་ལས་པད་དཀར་འདབ་སྟོང་སྟེང་། །ཨ་ལས་ཟླ་གདན་ཧྲིཾ་མཚན་པའི། །ས་བོན་ཡོངས་གྱུར་དབྱངས་ཅན་མ། །བཅུ་དྲུག་ལང་ཚོ་སྟོན་ཟླའི་མདོག །ཞི་འཛུམ་བལྟ་ན་སྡུག་པའི་ཞལ། །དབུ་སྐྲ་ལི་བ་ལྟག་པར་བཅིངས། །ལྷག་མ་ཐུར་གྲོལ་རིན་ཆེན་བརྒྱན། །པད་དཀར་ཕྲེང་བས་ཐོད་བཅིངས་པའི། །དབུ་གཙུག་ཟླ་བ་ཕྱེད་པས་མཚན། །དར་དཀར་སྟོད་གཡོགས་སྨད་དཀྲིས་ནི། །དབང་པོའི་མཚོན་ཆ་ལྟ་བུར་བཀྲ། །ནོར་བུའི་རྒྱན་ཕྲེང་གཡེར་ཁས་མཚན། །ཙོག་པུ་མནོལ་བའི་འདུག་སྟངས་པང་། །བཻ་ཌཱུརྱ་ཡི་ཏམྦུ་ར། །འཛིན་ལས་ཆོས་ཀྱི་སྒྲ་དབྱངས་སྒྲོག །ཟླ་བའི་རྒྱབ་ཡོལ་ལ་བརྟེན་པའི། །ཙིཏྟ་ཨུཏྤལ་གྱེན་བསྟན་ལྟའི། །དབུས་ན་ཟླ་སྟེང་ཨོཾ་དཀར་པོ། །དེ་ཡི་ནཱ་དའི་བཞོན་པ་དང་། །ལྷན་ཅིག་འོད་ཟེར་དཀར་པོའི་ཕྲེང་། །སྣ་བུག་གཡས་ནས་ཐོན་གྱུར་ཏེ། །རྒྱ་གར་ལྷོ་ཕྱོགས་རྒྱ་མཚོའི་འགྲམ། །རིག་པ་འཛིན་པའི་དགའ་ཚལ་ན། །སྒྲ་དབྱངས་ལྷ་མོ་བཞུགས་པ་ཡི། །ཤངས་བུག་གཡོན་ཞུགས་ཐུགས་ཀ་ནས། །ཡེ་ཤེས་སེམས་དཔའི་རང་བཞིན་ནི། །འཁོར་ལོའི་རྣམ་པ་ཤངས་གཡས་ཐོན། །སྤྱན་དྲངས་མདུན་གྱི་མཁར་བཞུགས་བསམ། ཨོཾ་པྲི་ཏི་དེ་ཝཱི་དཱི་བྱ་པུཥྤེ་ཧཱུྃ། དེ་བཞིན་དུ་སྦྱར་བས། དྷཱུ་པེ། གནྡྷེ། ནཻ་ཝི་ཏེ། ཨཱ་ལོ་ཀེ། པི་ལེ་བ་ཧི་ཧཱུྃ། ཞེས་པས་མཆོད། ཨོཾ་པྲི་ཏི་དེ་ཝཱི་མེ་ཧྲཱིཿཥྚི་ཏིཥྛ་ཧྲཱིཿ། ཞེས་ཤུབ་བུར་བརྗོད་ཅིང་སྣ་བུག་གཡོན་ནས་དབུགས་རྔུབ་པ་དང་ཆབ་ཅིག་ཏུ་འཁོར་ལོ་འོད་ཀྱི་རང་བཞིན་དུ་གྱུར་པ་སྙིང་ཁའི་ཨོཾ་དང་འདྲེས། ཨོཾ་ཡོངས་སུ་གྱུར་པ་སླར་ཡང་ཡེ་ཤེས་སེམས་དཔའི་ངོ་བོ་འཁོར་ལོ་པད་འདབ་བརྒྱད་པ་དཀར་ལ་འཚེར་བར་གྱུར་པའི་ལྟེ་བར་ཟླ་གདན་ལ་ཏིང་འཛིན་སེམས་དཔའ་ཧྲིཾ་དང་། འདབ་མ་བརྒྱད་ལ་མདུན་ནས་གཡས་བསྐོར་དུ་དབྱངས་ཡིག་གཉིས་གཉིས་གནས་པ་སྣང་གསལ་ལྟར་འབར་བའི་འོད་ཀྱིས་སྐུའི་དབྱིངས་ཐམས་ཅད་ཁྱབ། རྨོངས་པའི་མུན་པ་ཅིག་ཅར་དུ་བཅོམ། ཆགས་ཐོགས་མེད་པའི་བློ་གྲོས་ཀྱི་སྣང་བ་རྒྱས་པར་གྱུར། ཅེས་བརྗོད་ལ་བཟླས་དམིགས་ནི། ཏིང་འཛིན་སེམས་དཔའི་ཧྲིཾ་ལས་མར་མེ་གཅིག་ལས་གཉིས་མཆེད་ལྟར་ཧྲིཾ་ཡིག་ལུ་གུ་རྒྱུད་དུ་འབྲེལ་བ་ཞལ་ནས་ཐོན། དེའི་འོད་ཟེར་གྱི་སྣང་བས་རྒྱལ་བ་སྲས་དང་བཅས་པའི་སྤངས་རྟོགས་ཀྱི་ཡོན་ཏན་དང་མཁྱེན་བརྩེ་ནུས་གསུམ། ལྷ་དང་དྲང་སྲོང་རིག་འཛིན་གྲུབ་པ་མཆོག་རྣམས་ཀྱི་ཚེ་དང་བསོད་ནམས་མངའ་དབང་ལོངས་སྤྱོད་ཐམས་ཅད། ཉི་ཟླ་ལ་སོགས་པའི་བརྟན་གཡོའི་དྭངས་བཅུད་ཐམས་ཅད་བསྡུས་ཏེ་ཐུགས་སྲོག་ལ་ཐིམ། སྔགས་ཕྲེང་རྣམས་ཀྱང་ལྟེ་བ་ནས་ཞུགས་འཁོར་ལོའི་དབུས་ཀྱི་ལྟེ་བའི་ཧྲཱིཾཿལ་ཐིམ་པས་བློ་གྲོས་ཀྱི་སྣང་བ་དང་སྲིད་ཞིའི་ཡོན་ཏན་ཐམས་ཅད་རྒྱས་པར་བསམས། སྔགས་ཕྲེང་དལ་བུས་འཁོར་བ་ལ་རིག་པ་གཏད་དེ། ཡི་གེ་འབྲུ་གཅིག་པ་འབུམ་ཕྲག་གཅིག་དང་ཉི་ཁྲི་ལྔ་སྟོང་བཟླ་བ་གྲངས་ཀྱི་བསྙེན་ཚད་དང་། དེ་བཞི་འགྱུར་བཟླ་བ་ནི་དུས་བསྙེན་ནོ། །རྒྱུན་བསྙེན་ལ་བཟླས་པ་ཅི་ནུས་བྱ། ཐུན་མཚམས་སུ་མཆོད་བསྟོད་གཏོར་འབུལ་ནི། མཆོད་པ་རྣམས་འབྲུ་གསུམ་ལན་བདུན་གྱིས་བྱིན་གྱིས་བརླབས་ལ། ཨོཾ་སྭ་ར་སྭ་སྟི་ས་པ་རི་ཝཱ་ར་རཱུ་པ། ཤབྟ། གནྡྷེ། རཱ་ས། པརྴེ། དྷརྨ་དྷཱརྟུ་པྲ་ཏཱིཙྪ་ཨཱཿཧཱུྃ། བསྟོད་པ་ནི། མཆོག་དགའི་རང་བཞིན་ལྷ་མོ་ནི། །ཡོན་ཏན་རྒྱ་མཚོའི་གླིང་ན་བཞུགས། །རྒྱལ་བ་སྲས་བཅས་ཀུན་གྱི་ཡུམ། །དབྱངས་ཅན་མ་ལ་ཕྱག་འཚལ་བསྟོད། །ཁྱོད་ཞལ་མཛེས་པ་ཟླ་བས་མི་མཚུངས་སྤྱན་གྱི་གེ་སར་འཛུམ་པའི་ཕྱིར། །མཆུ་སྒྲོས་དམར་བ་བིམ་པས་ཅི་ཞིག་ཚེམས་ཀྱི་ག་པུར་བལྟ་ན་སྡུག །ངེས་པ་དྲུག་ལྡན་ཧྲིཾཿགྱི་ང་རོ་ཏམྦུ་ར་དང་གཉིས་མེད་གསུང་། །ཟབ་ཞི་སྤྲོས་བྲལ་རྣམ་པ་ཀུན་གྱི་མཆོག་ལྡན་ཐུགས་ལ་རྟག་ཏུ་འདུད། །གཏོར་མ་འབྲུ་གསུམ་ལན་བདུན་གྱིས་བརླབས་ལ། བདུད་རྩིའི་རང་བཞིན་དུ་གྱུར་པ་ཚོགས་ཞིང་གི་ལྗགས་རྡོ་རྗེའི་སྦུ་གུ་ཅན་གྱིས་བཞེས་པར་བསམས་ལ། ཨོཾ་སྭ་ར་སྭ་སྟི་ས་པ་རི་ཝཱ་རེ་བྷྱཿ ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱི་མཐར། མཆོད་སྦྱིན་གཏོར་མ་འདི་བཞེས་ལ་སོགས་བྱ། དེ་ནས་ནོར་འགྲིབ་པ་སྤང་བའི་ཕྱིར། ནོར་རྒྱུན་མ་ལ་གཏོར་མ་གཅིག་བཤམས་ཏེ། གོང་ལྟར་བརླབས། ཨོཾ་བཱ་སུ་དྷ་ར་ས་མ་ཡ་ཛཿ། ཞེས་སྤྱན་དྲངས། ཨོཾ་བཱ་སུ་དྷ་ར་ས་པ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་གྱིས་ཕུལ་ལ། བདག་ནི་མཚོ་བྱུང་བསྒྲུབ་པ་ལ། །ནོར་སྟེར་ལྷ་མོ་མཆོག་ཁྱོད་ཀྱིས། །ཕྲག་པ་ཡངས་པར་མཛད་ནས་ཀྱང་། །ཟས་ནོར་འཕེལ་བའི་དངོས་གྲུབ་སྩོལ། །ཞེས་དང་། ཤེས་རབ་ཀྱི་གྲོགས་མཛད་པའི་ཕྱིར་འཇམ་དབྱངས་ལའང་། ཨོཾ་ཝཱ་ཀྱཻ་དཾ་ན་མ་ས་མ་ཡ་ཛཿས་སྤྱན་དྲངས། ཨོཾ་ཝཱ་ཀྱཻ་དཾ་ས་པ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་དེ་བཞིན་དུ་གེགས་བསྲུང་བ་དང་བློ་མཐུ་བསྐྱེད་པའི་ཕྱིར་མི་གཡོ་བ་ལ་དམིགས་ཏེ། ཨ་ཀཱ་རོ་མུ་ཁཾ་ལན་གསུམ་གྱིས་གཏོར་མ་འབུལ་ལ། རྣོ་ལ་མྱུར་བའི་ཤེས་རབ་ཀྱང་། །སོ་སོ་ཡང་དག་རིག་པ་བཞིར། །སྤོབས་པའི་གཏེར་གྲོལ་ཐབས་ཀྱི་ལྷས། །ཡིད་ལ་འཁྱུད་པའི་དངོས་གྲུབ་སྩོལ། །འབྱུང་པོ་སྤྱི་ལ་དམིགས་ནས་ཨ་ཀཱ་རོ་ལན་གསུམ་གྱི་མཐར། རྣམ་དག་ཆོས་དབྱིངས་ཞི་བ་ལས། །ཐུགས་རྗེ་ཆེན་པོའི་སྤྲུལ་པ་བྱུང་། །ཐབས་ཆེན་ཟླ་གསང་ཐིག་ལེ་ལས། །ཡ་གམ་ཅན་རྣམས་འདུ་བར་མཛོད། །འདུ་རྫས་རྣམ་དག་འདི་བཞེས་ལ། །བཅོལ་བའི་ཕྲིན་ལས་འགྲུབ་པར་མཛོད། །མགྲོན་རྣམས་བཛྲ་མུས་གཤེགས། དེ་ནས་ཐུན་བསྡུ་བ་ནི། སྣང་ཆ་རྟེན་དང་བརྟེན་པར་བཅས། །འོད་ཞུ་ཐུགས་ཀའི་འཁོར་ལོར་བསྟིམ། །འཁོར་ལོ་དབྱངས་ཅན་ཐུགས་ཀར་གཤེགས། །ཐུགས་སྲོག་བདེ་གཤེགས་སྙིང་པོ་དང་། །རོ་གཅིག་ཆོས་ཀྱི་དབྱིངས་སུ་ཨཱཿ ལས་སྦྱོར་དམིགས་བསལ་རྣམས་ནི་ཀུན་མཁྱེན་བསམ་ཡས་པའི་ཡིག་ཆ་ལས་ཤེས་པར་བྱའོ། །ཞེས་པའང་འབྲོང་རྩེ་སྲས་ཀྱི་ཞལ་འདོན་དུ་རིག་འཛིན་འཇིགས་མེད་གླིང་པས་གཟིམ་ཆུང་ལྷ་རྒྱལ་རྩེར་བཀོད་པའོ།། །།དགེའོ། །དགེའོ། །དགེའོ།། །།