གཏེར་ཆེན་མཆོག་གྱུར་གླིང་པའི་སྐྱེས་རབས་གསོལ་འདེབས་མུ་ཏིག་དམར་པོའི་ཕྲེང་བའི་ཟིན་ཐུན་བཻ་ཌཱུརྻའི་་མདོ་འཛིན།

🚧 This website is under continued development. We appreciate your patience!

Previous Section Back to Volume PageNext Section

Wylie title	gter chen mchog gyur gling pa'i skyes rabs gsol 'debs mu tig dmar po'i phreng ba'i zin thun bai DUr+Ya'i mdo 'dzin
Location	mkhyen brtse'i bka' 'bum Volume 24, sde tshan 7, Pages 243-255 (Folios 1a to 7a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	མཆོག་གྱུར་གླིང་པ་ (mchog gyur gling pa)
Citation	'jam dbyangs mkhyen brtse'i dbang po. gter chen mchog gyur gling pa'i skyes rabs gsol 'debs mu tig dmar po'i phreng ba'i zin thun bai DUr+Ya'i mdo 'dzin. In 'jam dbyangs mkhyen brtse'i dbang po'i bka' 'bum, Vol. 24: 243-255. Khams sde dge rdzong sar dgon: Rdzong sar blo gros phun tshogs, 2020.
Genre	Past Life Narratives - skye rabs - 'khrungs rabs  ·  Supplications - gsol 'debs

Tibetan Text

Wylie

[edit]

༄༅། །གཏེར་ཆེན་མཆོག་གྱུར་གླིང་པའི་སྐྱེས་རབས་གསོལ་འདེབས་མུ་ཏིག་དམར་པོའི་ཕྲེང་བའི་ཟིན་ཐུན་བཻ་ཌཱུརྻའི་མདོ་འཛིན་ཅེས་བྱ་བ་བཞུགས་སོ། །ཨོཾ་སྭསྟི། གཏེར་ཆེན་ཆོས་ཀྱི་རྒྱལ་པོ་ཨོ་རྒྱན་མཆོག་གྱུར་བདེ་ཆེན་གླིང་པའི་སྐྱེས་རབས་ཀྱི་གསོལ་འདེབས་མུ་ཏིག་དམར་པོའི་ཕྲེང་བ་འདིའི་དོན་ཅུང་ཟད་འཆད་པ་ལ་གསུམ། ཀླད་ཀྱི་དོན། གཞུང་གི་དོན། མཇུག་གི་དོན་ནོ། །དང་པོ་ལ་གཉིས། མཚན་བསྟན་པས། རྡོ་རྗེ་གསུམ་གྱི་ཡི་གེས་ཐོག་དྲངས་པའོ། །དང་པོ་ནི། རྗེ་རིག་པ་འཛིན་པ་སོགས་ཏེ་གོ་སླའོ། གཉིས་པ་ནི། ཨོཾ་ཨཱཿཧཱུྃ་ཞེས་པ་སྟེ་གཞི་ངོ་བོ་རང་བཞིན་ཐུགས་རྗེ་གསུམ། ལམ་རྡོ་རྗེ་གསུམ་གྱི་རྣལ་འབྱོར། འབྲས་བུ་སྐུ་གསུམ་གྱི་དོན་མཚོན་པས་ན་གཞི་ལམ་འབྲས་བུའི་གསང་བ་དང་རྗེས་སུ་འབྲེལ་བའི་རྣམ་པར་ཐར་པ་དང་། སྐྱེས་པ་རབས་ཀྱི་སྒྱུ་འཕྲུལ་མཐའ་ཡས་པ་མཚོན་པ་ཡིན་ནོ། །གཉིས་པ་གཞུང་གི་དོན་ལ་གསུམ། མདོར་བསྟན། རྒྱས་བཤད། སྐབས་བསྡུ་བའོ། །དང་པོ་ནི། ཆོས་དབྱིངས་གདོད་མའི་སོགས་ཏེ། ངོ་བོ་ཆོས་སྐུ། རང་བཞིན་ལོངས་སྐུ། རང་རྩལ་སྤྲུལ་པའི་སྐུའི་རྣམ་འཕྲུལ་སྣ་ཚོགས་པར་ཤར་བའི་ཚུལ་མདོར་བསྟན་པ་སྟེ་ཇི་སྐད་དུ། ཆོས་ཀྱི་སྐུ་ལས་མ་གཡོས་བཞིན། །ལོངས་སྤྱོད་རྫོགས་པ་ཆེན་པོར་སྣང་། །དེ་ལས་འགྲོ་འདུལ་སྤྲུལ་པའི་སྐུ། །གདུལ་བྱའི་སྣང་ངོར་ཅིར་ཡང་སྟོན། །ཞེས་སོ། །གཉིས་པ་ལ་གཉིས། སྐྱེས་རབས་ཀྱི་རྩ་བ་ལུང་ལས་གསུངས་པས། ཁ་སྐོང་དག་པའི་གཟིགས་སྣང་ལྟར་བཤད་པའོ། །དང་པོ་ནི། རྗེ་ཉིད་ཀྱི་སྐུའི་གོང་མ་སྤྲུལ་པའི་གཏེར་སྟོན་ཆེན་པོ་རིག་འཛིན་སངས་རྒྱས་གླིང་པའི་ཡང་སྲིད་ཞིག་པོ་གླིང་པ་གར་གྱི་དབང་ཕྱུག་གི་གཏེར་ལུང་ལྟར་བཀོད་པ། སྔོན་ཚེ་མཆོད་རྟེན་སོགས་ཏེ་དེ་ཉིད་ཀྱི་གཏེར་བྱོན་ཐུགས་རྗེ་ཆེན་པོ་འཁོར་བ་ལས་སྒྲོལ་གྱི་ལོ་རྒྱུས་གསལ་བའི་སྒྲོན་མེ་ལས། སྐྱེ་རྒྱུད་མདོ་ཙམ་ལ་ལ་བཤད་པ་ནི༔ སྔོན་ཚེ་འདས་དུས་བསྐལ་པའི་ཡེ་ཐོག་ལ༔ བོ་དྷི་ས་ཏྭ་མངའ་བདག་རྒྱལ་པོ་དང་༔ བདག་འདྲ་པདྨ་འབྱུང་གནས་རྣམ་པ་གསུམ༔ མོན་ཕྲུག་སྤུན་གསུམ་དག་ཏུ་སྐྱེས་པའི་ཚེ༔ མཆོད་རྟེན་བྱ་རུང་ཁ་ཤོར་སྤྱན་སྔ་རུ༔ མ་འོངས་དུས་ཚིགས་སྨོན་ལམ་བཏབ་པའི་དུས༔ སྟེང་ནས་བྱ་ནག་མཆོད་རྟེན་བར་མཆུར་བབས༔ དེ་ལ་མངའ་བདག་རྒྱལ་པོས་སྨོན་ལམ་བཏབ༔ མཁའ་ནས་ལྷག་པའི་བྱ་ནག་འདི་ཉིད་ཀྱང་༔ མ་འོངས་དུས་དེར་བདག་གི་བུར་སྐྱེས་ནས༔ རིགས་དང་ཆོ་འབྲང་མཐོང་བར་ཤོག་ཅེས་བཏབ༔ སླར་ཡང་བདག་གི་སྨོན་ལམ་བཏབ་པ་ནི༔ སྲས་དེ་ཐེག་པ་ཆེན་པོའི་སྒོར་ཞུགས་ནས༔ བདག་གི་ཟབ་དོན་སྙིང་པོའི་བརྒྱུད་འཛིན་ཅིང་༔ འགྲོ་དོན་སྐྱོ་དུབ་མེད་པར་ཤོག་ཅེས་བཏབ༔ བོ་དྷི་ས་ཏྭས་དེ་བཞིན་འགྱུར་ཅེས་པའི༔ མཐུན་གྱུར་ནན་ཏན་སྨོན་ལམ་ཐ་ཚིག་བརྗོད༔ དེ་ཡང་སྨོན་ལམ་མཐུ་ལ་བརྟེན་ནས་ནི༔ བྱ་དེ་སྐྱེ་བ་དེ་ཡི་གོང་རོལ་དུ༔ རྡོ་རྗེ་གདན་གྱི་གཙུག་ལག་ཁང་དྲུང་དུ༔ གནས་བརྟན་དྷརྨ་པ་ཏྲ་ཞེས་བྱའི་བུ༔ ཀཱིརྟི་ཛྙཱ་ན་ཞེས་བྱར་སྐྱེས་ནས་ཀྱང་༔ རྩེད་མོའི་རྣམ་པས་མེ་ཏོག་ཅོད་པན་གཅིག༔ རྒྱལ་བའི་སྐུ་རྟེན་སྤྱན་སྔར་བཞག་པ་ལས༔ གཙུག་ལག་ཁང་གི་མཆོད་པའི་རྫས་སུ་གྱུར༔ དེ་ལ་བརྟེན་ནས་ཐར་པའི་ས་བོན་ཐེབས༔ དེ་ནས་རིམ་བཞིན་ད་ལྟའི་བར་དག་ཏུ༔ སྐྱེ་བརྒྱུད་ཀུན་ལ་ཐར་ལམ་འབྲེལ་བ་བཞག༔ ཀཱིརྟི་ཛྙཱ་ནར་སྐྱེས་པའི་འོག་རོལ་དུ༔ དགའ་ལྡན་གནས་སུ་དམ་པ་ཏོག་དཀར་དྲུང་༔ ལྷ་བུ་དྲི་མེད་གྲགས་པར་གྱུར་པ་ཡིན༔ དེ་ནས་ཐུབ་པའི་དྲུང་དུ་དགྲ་བཅོམ་པ༔ མ་འགགས་པར་གྱུར་བདེན་པ་མཐོང་ན་ཡང་༔ རྒྱུ་འབྲས་ཡིད་ཆེས་བླང་དོར་བྱ་བའི་ཕྱིར༔ དེ་ནས་ཚེ་འཕོས་རྒྱ་གར་ཡུལ་དབུས་ཀྱི༔ མ་གུ་ཏ་ཡི་སྦྱིན་བདག་བཟང་པོར་སྐྱེས༔ དེ་འཕོས་གཙུག་ལག་འཛིན་གྱི་བྲམ་ཟེར་སྐྱེས༔ དེ་འཕོས་ཤིང་རྟའི་ཚལ་གྱི་རི་དྭགས་སུ༔ སྐྱེས་ནས་སྙིང་རྗེའི་ཤུགས་དང་ལྡན་པར་གྱུར༔ དེ་ནས་ཤནྟི་ཀ་ཡི་གྲོང་ཁྱེར་གྱི༔ དབུལ་པོའི་བུ་མོ་ཆུ་སྦྱིན་བྱེད་པར་གྱུར༔ དེ་འཕོས་རྩ་མཆོག་ཚོང་དཔོན་འཕན་བཟང་གྱུར༔ དེ་ཡང་གྲོགས་དང་བཅས་པས་ཚོགས་སྤེལ་མཐུས༔ གྲོང་ཁྱེར་སྤོས་ལྡན་མ་ཧེར་སྐྱེས་ནས་ཀྱང་༔ བཞོས་པའི་འོ་མས་དགྲ་བཅོམ་རྣམས་ལ་མཆོད༔ དེ་ནས་འཕོས་ཏེ་བྷེ་ཏའི་གྲོང་ཁྱེར་དུ༔ ཁྱིམ་བདག་ལེགས་སྐྱེས་བཟང་པོར་གྱུར་ནས་ཀྱང་༔ ཀུན་ལ་མཆོད་སྦྱིན་བསྙེན་བཀུར་བྱེད་པར་འགྱུར༔ དེ་འཕོས་སྤོས་ངད་ལྡན་པའི་གྲོང་ཁྱེར་གྱི༔ འཕན་པོའི་བུར་གྱུར་བཟང་པོའི་ལས་དང་ལྡན༔ དེ་ནས་བརྒྱུད་མར་བསོད་ནམས་སྤེལ་བའི་ཕྱིར༔ མ་ངེས་རིགས་པ་ཀུན་དང་ལྡན་པ་སྟེ༔ རྒྱ་ནག་འཕན་བཟང་རིགས་བྱེད་མཁན་པོ་དང་༔ བྷོ་ཊ་ས་ཡི་ཚོང་དཔོན་ཡངས་ཅན་གྱི༔ སྒྲ་འབྱིན་རྒྱལ་པོར་དེ་ཉིད་མཆོད་སྦྱིན་བྱེད༔ དེ་ནས་གུ་གེའི་ཚོས་མཁན་སྒྲ་བསྒྱུར་མཁན༔ བལ་པོ་ཨི་ཏང་རིག་བྱེད་མཁན་དུ་གྱུར༔ ཚ་བ་དམར་ཤོད་ཕྱུག་པོའི་བུ་དང་ནི༔ ལྕང་ར་སྨུག་པོའི་སྦྱིན་བདག་བཟང་པོ་དང་༔ རྒྱ་ནག་རྒྱལ་པོའི་བླ་མཆོད་དགེ་བར་ལྡན༔ དེ་སོགས་སྐྱེ་མང་བཟང་ངན་ལས་ལ་སྤྱད༔ མདོར་ན་རྒྱ་གར་ཤར་ནུབ་བལ་ཡུལ་དང་༔ འཛམ་གླིང་ཡུལ་གྱི་ཕྱོགས་མཚམས་མང་པོ་དང་༔ དེ་ལ་སོགས་པའི་རིགས་དྲུག་གནས་རྣམས་སུ༔ སྐྱེ་ལུས་མང་བླངས་ཚེ་རབས་ལས་སྒྲིབ་སྦྱངས༔ ཚོགས་སྤེལ་ཐ་མ་བྷེ་ཏའི་རྒྱལ་པོའི་སྲས༔ འོད་ཟེར་མཐའ་ཡས་ཞེས་བྱར་གྱུར་པའི་ཚེ༔ འཕགས་པས་ལུང་བསྟན་བདག་དང་དཔོན་སློབ་གྱུར༔ དབང་བསྐུར་སྨོན་ལམ་བཏབ་ནས་དབང་རྟགས་བཞག༔ གསང་མཚན་པདྨ་གར་གྱི་དབང་ཕྱུག་ཞེས༔ སྤྱན་རས་གཟིགས་དབང་དགོངས་པས་སྐྱོབ་པར་མཛད༔ སྐྱེ་བརྒྱུད་འགར་ཡང་ཆོས་ལ་ལས་འཕྲོ་བཞག༔ ཁྱད་པར་ཐུགས་རྗེ་ཆེན་པོའི་སྤྲུལ་པ་མཆོག༔ སྲོང་བཙན་སྒོམ་པོའི་ཐུགས་སྲས་བློན་པོ་ཆེ༔ ཡུལ་བཟུང་མགར་ཞེས་བོད་ཀྱི་ཆོས་སྲིད་བསྐྱངས༔ ལེགས་པའི་ཡོན་ཏན་བྱས་པ་ལག་རིས་ཅན༔ དེ་ནས་ཚེ་འཕོས་ཨེན་རྩེའི་རྒྱལ་པོའི་བུ༔ འགྲོ་བ་བཟང་པོ་ཞེས་བྱའི་བློ་སྟོབས་ཅན༔ དེ་ནས་ཚེ་འཕོས་དེང་སང་མངའ་བདག་སྲས༔ ཡབ་ཀྱིས་མཚན་གསོལ་མུ་རུབ་བཙན་པོ་ཞེས༔ ཡུམ་གྱིས་མཚན་གསོལ་ལྷ་སྲས་དམ་འཛིན་གྲགས༔ མཆེད་ཀྱིས་མཚན་གསོལ་སྤུར་བོ་བྱ་ཐུལ་མགོ༔ འབངས་ཀྱིས་མཚན་གསོལ་ལྷ་སྲས་དགེ་མགོན་དཀར༔ བདག་གིས་མཚན་གསོལ་དགེ་བསྙེན་སེང་གེ་བཟང་༔ དགོངས་འདུས་མཚན་གསོལ་རོལ་པ་ཡེ་ཤེས་རྩལ༔ ཞི་ཁྲོ་ཡོངས་རྫོགས་དཀྱིལ་འཁོར་གསང་བའི་མཚན༔ དབང་ཆེན་བུདྡྷ་ཧེ་རུ་ཀ་ཞེས་གྲགས༔ འཁོར་བ་ལས་སྒྲོལ་རྩ་གསུམ་དཀྱིལ་འཁོར་དུ༔ དབང་བསྐུར་གསང་མཚན་པདྨ་དོན་ཡོད་རྩལ༔ དཀྱིལ་འཁོར་དབུས་བཞག་བཀྲ་ཤིས་སྨོན་ལམ་བཏབ༔ སྟོན་པ་རྡོ་རྗེ་རྒྱལ་པོར་མངའ་གསོལ་ཞིང་༔ སྔགས་འཆང་ཧཱུྃ་གི་སྲས་མོ་འབུམ་ལྕམ་ཁྱོད༔ ཚེ་རབས་ལས་བཟང་རིག་འཛིན་སྲས་མོར་འཁྲུངས༔ ཆོས་ལ་སྲི་ཞུ་ཆེ་ཞིང་གདུངས་སེམས་ལྡན༔ ལས་སྨོན་མཐུ་ཡིས་སྐྱེ་བརྒྱུད་མང་པོའི་བར༔ ལྷ་མི་ལ་སོགས་གང་དང་གང་སྐྱེས་ཀྱང་༔ ལྷ་སྲས་ཉིད་ཀྱི་མཐུན་གྲོགས་འབྲེལ་བར་ལྡན༔ ནམ་ཞིག་རིག་འཛིན་ཞིང་དུ་བགྲོད་ཚེ་ཡང་༔ ཚོམ་བུ་གཅིག་གི་ངང་དུ་གཉིས་མེད་འགྱུར༔ ༈ འདི་ནས་ཚེ་འཕོས་ཨོ་རྒྱན་ཟངས་གླིང་དུ༔ དཀྱིལ་འཁོར་དྲུང་འཁོད་བཀོས་འདེབས་རྒྱལ་པོར་མངག༔ སྤྲུལ་པའི་རང་སྣང་བསྐལ་པར་བསྡད་སྙམ་བྱེད༔ དེ་ནས་འགྲོ་བའི་དོན་ཕྱིར་སྤྲུལ་པ་འབྱུང་༔ ཨ་སུ་ར་ཡི་བྲག་ཕུག་ཛོ་ཀིར་གནས༔ དངོས་ལུང་ལྷ་ལུང་དཔལ་གྱི་རྡོ་རྗེར་གྲགས༔ བསྟན་པའི་སླད་དུ་སྡིག་སྤྱོད་རྒྱལ་པོ་བཀུམ༔ དེ་ལྟར་གསུམ་ནི་བསྟན་པའི་སྲོག་ཕུར་ཏེ༔ བོད་ཀྱི་རྒྱལ་ཁམས་དག་ཏུ་དགོངས་པར་འགྱུར༔ དེ་ནས་གཙང་དུ་ཟུར་རིགས་ཛྙཱ་ནའི་མིང་༔ སྔགས་ཀྱི་དགོངས་པའི་དོན་རྣམས་གསལ་བར་བྱེད༔ དེ་འདས་པུ་རང་ལྷ་བཙུན་དད་པ་ཅན༔ ཤཱཀྱའི་བསྟན་ལ་རབ་བྱུང་འདུལ་བ་འཛིན༔ དེ་ནས་ཚེ་འཕོས་མང་ཡུལ་འཕགས་པའི་དྲུང་༔ སྦས་ཚུལ་རྣལ་འབྱོར་ཞིག་པོའི་སྤྱོད་སྐྱོང་འབྱུང་༔ དེ་ནས་རིམ་པར་སྐྱེ་དང་འཕོ་འཇུག་རྣམས༔ གཙང་གི་རིན་ཆེན་བྲག་གི་ནུབ་ཕྱོགས་སུ༔ དཔལ་བཙུན་ཞེས་བྱའི་ཁྱིམ་བདག་གཙུག་ལག་འཛིན༔ དེ་འདས་ས་སྐྱ་ཞེས་བྱའི་གཙུག་ལག་འཛིན༔ དེ་ནས་ཁ་རག་ཕུག་པའི་ཤར་ཕྱོགས་སུ༔ སྔགས་འཆང་སིདྷ་ཕ་ལ་ཞེས་བྱ་འབྱུང་༔ དེ་ནས་ཚེ་འཕོས་བསམ་ཡས་ནུབ་ཕྱོགས་སུ༔ ཤཱཀྱའི་ཞིང་ཁམས་སྙེ་མ་མདའ་ཞེས་པར༔ གསང་སྔགས་བདག་པོ་སྐྲ་ཡི་ཟླ་བ་ཅན༔ དྲོད་ཀྱི་གདོང་ཅན་རྒྱལ་མོ་སོ་རྩི་ཞེས༔ ང་ཡི་རྗེས་བཟུང་ཟབ་པའི་གཏེར་སྒོ་འབྱེད༔ དེ་ནས་རྟ་ནག་ཟམ་ཁའི་སྨྱོན་ཞིག་ཞེས༔ དེ་ནས་འཕོས་ནས་བཟད་ཞེས་བྱ་བ་རུ༔ སྔགས་འཆང་ཤཱཀྱ་ཡེ་ཤེས་ཞེས་བྱར་གྲགས༔ དེ་ནས་ལྷོ་ཕྱོགས་དམྱལ་ཞེས་བྱ་བའི་སར༔ བསྟན་འཛིན་སྐྱེས་བུ་གཞོན་ནུའི་མིང་ཅན་འབྱུང་༔ དེ་འདས་གཡོར་པོ་གྲ་ཞེས་བྱ་བའི་སར༔ རྣལ་འབྱོར་སྔགས་འཆང་འཕགས་པའི་མིང་ཅན་འབྱུང་༔ དེ་འདས་གྲ་མདའི་གནས་བརྟན་བསྟན་པ་འཛིན༔ དེ་ནས་ཚེ་འཕོས་བསམ་ཡས་གཙུག་ལག་འཛིན༔ མི་དཔོན་ཆས་འཛིན་རླབས་ཆེན་སྤྱོད་པ་སྐྱོང་༔ གྲགས་པའི་མིང་ཅན་གསང་སྔགས་སྤྱོད་པ་འབྱུང་༔ དེ་འདས་ར་སའི་གཙུག་ལག་འཛིན་བྱེད་པ༔ སྦས་པའི་ཚུལ་ཅན་སྔགས་འཆང་རྡོ་རྗེ་ཞེས༔ བསྟན་པའི་དགྲ་གཟུགས་ཉམས་པ་བསོད་བྱེད་འབྱུང་༔ དེ་འོག་ཙཱ་རིའི་གནས་ཀྱི་བྱང་ཕྱོགས་སུ༔ བཤེས་གཉེན་དམ་པ་དཀོན་མཆོག་མིང་ཅན་འབྱུང་༔ དེ་འོག་ལྷོ་མོན་མཚམས་ཀྱི་བསྟན་པ་འཛིན༔ ཞི་བའི་མིང་ཅན་སྣ་ཚོགས་སྤྱོད་པ་ཡིས༔ འགྲོ་བའི་དོན་བརྩོན་བསྟན་པའི་གསལ་བྱེད་འབྱུང་༔ དེ་ནས་ཚེ་འཕོས་པོ་བོ་ཞེས་པའི་སར༔ མདུང་ཆུའི་གཙུག་ལག་སོ་བའི་སྔགས་འཆང་འབྱུང་༔ དེ་འདས་དེ་ཉིད་བཤེས་གཉེན་གྲུབ་ཐོབ་གྲགས༔ དེ་ནས་བསམ་ཡས་མཐིལ་འདིར་སྡེ་སྐྱོང་ས༔ གཏེར་སྟོན་ལྷ་བཙུན་སྔོན་མོ་ཞེས་བྱར་སྐྱེས༔ རྣམ་སྣང་རྒྱབ་ནས་བཀའ་གཏེར་རབ་འབྱམས་ཀྱི༔ སྡེ་སྣོད་འབྱེད་ཅིང་བསྟན་པ་སྐྱོང་བར་བྱེད༔ དེ་ནས་ཚེ་འདས་རིན་དཔུངས་ཞེས་པ་ཡི༔ གཙུག་ལག་ཁང་བསྟན་བསྟན་པ་འཇུག་བྱེད་པའི༔ སྤྱན་རས་གཟིགས་ཀྱི་རྣལ་འབྱོར་པ་ཞེས་སམ༔ རིན་པོ་ཆེ་ཡི་མིང་འཛིན་བཤེས་གཉེན་འབྱུང་༔ མཐའ་མིའི་འགྲོ་རྣམས་བདེ་ལ་བཀོད་པར་བྱེད༔ དེ་ནས་མཁའ་སྤྱོད་ཙཱ་རིའི་གནས་འདབས་སུ༔ རྣལ་འབྱོར་ཞིག་པོ་རྒྱལ་བའི་མིང་ཅན་གྱིས༔ ཉོ་རོའི་བྲག་ལ་གྲུབ་རྟགས་སྟོན་པ་འབྱུང་༔ དེ་ལ་སོགས་པའི་སྐྱེ་བརྒྱུད་མང་ཞིག་ལེན༔ འགྲོ་བ་འགའ་ལ་ཕན་པ་རྒྱ་ཆེར་སྒྲུབ༔ ལ་ལར་མི་དཔོན་སྐྱེ་བོའི་རིགས་དང་ནི༔ མོ་བཙུན་གཟུགས་ཀྱིས་འགྲོ་ལ་ཕན་པ་འབྱུང་༔ རེ་རེའི་སྟོབས་ཅན་དུད་འགྲོའི་ལུས་སྤྲུལ་ཅན༔ འགྲོ་ལ་ཕན་པ་རྒྱ་ཆེར་སྒྲུབ་པའང་འབྱུང་༔ དེ་རྫོགས་མ་འོངས་དུས་ཀྱི་སྙིགས་མ་ལ༔ དུད་འགྲོའི་སྐྱེས་མཐའ་སྤྲེའུ་གཅོད་པར་བྱེད༔ དེ་ཡང་བསམ་ཡས་བྱང་ཤར་དབུས་རིའི་སྟེང་༔ ཕྱིང་ཕུ་གཡུ་ལུང་ཞེས་བྱའི་ལྷ་སྲིན་འདུལ༔ སྨོན་ལམ་ཐ་ཚིག་དམ་ལ་འདོགས་པར་བྱེད༔ དེ་ནས་སྨོན་ལམ་དུས་བབས་ལས་སད་དེ༔ གཡུ་ལུང་མ་ཧེའི་རྭ་འདྲའི་ཡུལ་ལྗོངས་མདར༔ རི་སྣ་མཐུར་རྒྱུག་བྲག་དམར་ངོས་བཟང་ཞོལ༔ གད་པ་ནག་པོ་རུས་སྦལ་ཉལ་འདྲའི་སྟེང་༔ ཕ་ཝོང་ཐག་ཐུག་ཕྱུག་ལྷས་ལྟ་བུའི་དབུས༔ སྔགས་ཀྱི་རྣལ་འབྱོར་སྦས་པའི་ཚུལ་འཛིན་པ༔ སྨྱོན་པའི་མིང་ཅན་རིགས་སུ་སྐྱེ་བར་འགྱུར༔ རིག་འཛིན་ཞེས་བྱ་སྙིང་སྨེ་དམར་པོས་སྤྲས༔ སྦས་ཚུལ་ཉེར་ལྔ་འབྲུག་ལོ་རང་སྐེག་སྟེང་༔ དགོངས་འདུས་གཏེར་འདོན་ཉམས་ལེན་གཞན་སྣང་གྲོལ༔ དེ་ནས་གཙང་སྟོད་མྱང་ཞེས་བྱ་བར་སྐྱེ༔ གྲགས་པ་རྒྱལ་པོ་འབུམ་མོ་ལྕམ་ཞེས་པའི༔ ཕ་མ་གཉིས་ལ་གྲགས་པ་དབང་ཕྱུག་ཞེས༔ མཆེད་གསུམ་བར་ཚིགས་ལུག་གི་ལོ་པ་གཅིག༔ སྙིང་གར་སྨེ་བ་ཌཱ་ཀིའི་སྤྱན་འབྲས་གསལ༔ མངལ་གྱི་དྲི་མ་ལོ་དགུས་དག་ནས་ཀྱང་༔ ལས་སད་སྐྱེས་བུ་བསྟན་པའི་སྒོར་ཞུགས་ནས༔ བཅུ་གསུམ་རང་སྐག་སྟེང་དུ་ལས་ཀྱི་འཕྲོ༔ གཏེར་ལ་མངའ་སྤྱོད་སྔགས་ཀྱི་རྣལ་འབྱོར་པ༔ ལོངས་སྤྱོད་རྫོགས་དང་དེ་ཡི་འཁོར་གྱིས་བསྐོར༔ བརྒྱུད་འཛིན་སྐྱེས་བུ་སྔགས་འཆང་རྒྱུན་མི་ཆད༔ དེ་ནས་གཙང་ངམ་ལྷོ་ཡི་ཕྱོགས་ཉིད་དུ༔ མི་དཔོན་སྦས་ཚུལ་བསྟན་ནས་པདྨ་ངའི༔ ཟབ་ཆོས་ཉམས་བླངས་ཐབས་ཀྱིས་འགྲོ་བ་འདུལ༔ དེ་རྗེས་བསྐལ་པ་རྩུབ་འགྱུར་དུས་ཀྱི་ཚེ༔ དེ་དུས་ལྷ་སྲས་དམ་འཛིན་ཁྱོད་ཉིད་ཀྱང་༔ བདག་གི་ཐུགས་སྲས་སྨོན་ལམ་མཐུ་བཙན་པས༔ རྩུབ་འགྱུར་དུས་སུ་ཁྱོད་ཀྱིས་འདུལ་བར་འགྱུར༔ སྣང་རྩེ་སྐྱོ་ཡི་ལྷ་ཁང་ཉེ་བའི་ས༔ ང་ཡི་གསུང་སྤྲུལ་ཞིག་པོ་གླིང་པ་ཞེས༔ གསང་གཏེར་འདི་འཕྲད་ཌཱ་ཀིའི་ལས་བྱེད་འགྱུར༔ ཞེས་རྒྱ་ཆེར་གསུངས་པ་ལྟར་ཤེས་པར་བྱའོ། །གཉིས་པ་ནི། དག་པའི་སྣང་ངོར་སོགས་ཏེ། གཏེར་ཆེན་ཉིད་དང་། གསོལ་འདེབས་མཛད་པ་པོ་ཟུང་གི་དག་པའི་གཟིགས་སྣང་དངོས་ཉམས་མནལ་ལམ་དུ་ཤར་བ་སོགས་སྒོ་བསྟུན་ནས་གསུངས་པའོ། །གསུམ་པ་སྐབས་བསྡུ་བ་ལ་གསུམ། སྐུ་ཚེ་འདི་ཉིད་ཀྱི་དོན་གྱི་རྣམ་པར་ཐར་པ་ལ་གསོལ་བ་འདེབས་པ་དང་། སྐུ་སྐྱེ་བ་ཕྱི་མ་ཕྲིན་ལས་རྒྱུན་མི་འཆད་པའི་ཚུལ་ལ་གསོལ་བ་འདེབས་པ། མངོན་པར་འདོད་པའི་དོན་ལ་སྨོན་པས་མཐའ་བརྒྱན་པའོ། །དང་པོ་ལ་དྲུག །བཀའ་གཏེར་བསྟན་པའི་བདག་པོར་གྱུར་པ་དང་། མཁྱེན་བརྩེ་ནུས་གསུམ་གྱི་རྣམ་ཐར་རྨད་དུ་བྱུང་བ་དང་། འཁོར་འདས་ཐམས་ཅད་ཀྱི་ཁྱབ་བདག་ཏུ་བཞུགས་པ་དང་། དཀྱིལ་འཁོར་ཐམས་ཅད་ཀྱི་སྤྲུལ་གཞིར་སྣང་བ་དང་། ཟབ་གསང་ཆོས་ཀྱི་འཁོར་ལོས་སྒྱུར་བ་དང་། རྡོ་རྗེ་ཐེག་པའི་བརྟུལ་ཞུགས་གྲུབ་པའི་ཚུལ་ལས་བརྩམས་ཏེ་གསོལ་བ་འདེབས་པ་རྣམས་རིམ་པར། ཁྱད་པར་སོགས་དང་། རྒྱལ་སྲས་སོགས་དང་། འཕོ་མེད་སོགས་དང་། བླ་མ་སོགས་དང་། ཀུན་བཟང་སོགས་དང་། གང་གི་སོགས་ཀྱིས་བསྟན་ཏོ། །གཉིས་པ་ནི། རྒྱལ་དང་དེ་སྲས་སོགས་སོ། ། གསུམ་པ་ནི། གང་གི་སོགས་སོ། །གསུམ་པ་མཇུག་གི་དོན་ནི། ཅེས་པ་འདིའང་སོགས་ཏེ། གང་གི་ཆེད་དུ་ཇི་ལྟར་བརྩམས་པ་དང་། ཞར་བྱུང་དོགས་པ་ཁོངས་ནས་བསུས་ཏེ་བསལ་བ་དང་། གང་གིས་རྩོམ་པ་པོ་དང་། གང་དུ་བརྩམ་པའི་གནས་དང་། ཤིས་བརྗོད་སྨོན་ལམ་གྱིས་མཇུག་བསྡུ་བ་དང་བཅས་པ་སྟེ་གོ་སླའོ།། །།སརྦ་དཱ་མངྒ་ལཾ་བྷ་བ་ཏུ།།

[edit]

gter chen mchog gyur gling pa'i skyes rabs gsol 'debs mu tig dmar po'i phreng ba'i zin thun bai DUR+Ya'i mdo 'dzin/ @#/__/gter chen mchog gyur gling pa'i skyes rabs gsol 'debs mu tig dmar po'i phreng ba'i zin thun bai DUR+Ya'i mdo 'dzin ces bya ba bzhugs so/__/oM swasti/__gter chen chos kyi rgyal po o rgyan mchog gyur bde chen gling pa'i skyes rabs kyi gsol 'debs mu tig dmar po'i phreng ba 'di'i don cung zad 'chad pa la gsum/__klad kyi don/__gzhung gi don/__mjug gi don no/__/dang po la gnyis/__mtshan bstan pas/__rdo rje gsum gyi yi ges thog drangs pa'o/__/dang po ni/__rje rig pa 'dzin pa sogs te go sla'o/__gnyis pa ni/__oM AHhU~M zhes pa ste gzhi ngo bo rang bzhin thugs rje gsum/__lam rdo rje gsum gyi rnal 'byor/__'bras bu sku gsum gyi don mtshon pas na gzhi lam 'bras bu'i gsang ba dang rjes su 'brel ba'i rnam par thar pa dang /__skyes pa rabs kyi sgyu 'phrul mtha' yas pa mtshon pa yin no/__/gnyis pa gzhung gi don la gsum/__mdor bstan/__rgyas bshad/__skabs bsdu ba'o/__/dang po ni/__chos dbyings gdod ma'i sogs te/__ngo bo chos sku/__rang bzhin longs sku/__rang rtsal sprul pa'i sku'i rnam 'phrul sna tshogs par shar ba'i tshul mdor bstan pa ste ji skad du/__chos kyi sku las ma g.yos bzhin/__/longs spyod rdzogs pa chen por snang /__/de las 'gro 'dul sprul pa'i sku/__/gdul bya'i snang ngor cir yang ston/__/zhes so/__/gnyis pa la gnyis/__skyes rabs kyi rtsa ba lung las gsungs pas/__kha skong dag pa'i gzigs snang ltar bshad pa'o/__/dang po ni/__rje nyid kyi sku'i gong ma sprul pa'i gter ston chen po rig 'dzin sangs rgyas gling pa'i yang srid zhig po gling pa gar gyi dbang phyug gi gter lung ltar bkod pa/__sngon tshe mchod rten sogs te de nyid kyi gter byon thugs rje chen po 'khor ba las sgrol gyi lo rgyus gsal ba'i sgron me las/__skye rgyud mdo tsam la la bshad pa ni:__sngon tshe 'das dus bskal pa'i ye thog la:__bo d+hi sa twa mnga' bdag rgyal po dang :__bdag 'dra pad+ma 'byung gnas rnam pa gsum:__mon phrug spun gsum dag tu skyes pa'i tshe:__mchod rten bya rung kha shor spyan snga ru:__ma 'ongs dus tshigs smon lam btab pa'i dus:__steng nas bya nag mchod rten bar mchur babs:__de la mnga' bdag rgyal pos smon lam btab:__mkha' nas lhag pa'i bya nag 'di nyid kyang :__ma 'ongs dus der bdag gi bur skyes nas:__rigs dang cho 'brang mthong bar shog ces btab:__slar yang bdag gi smon lam btab pa ni:__sras de theg pa chen po'i sgor zhugs nas:__bdag gi zab don snying po'i brgyud 'dzin cing :__'gro don skyo dub med par shog ces btab:__bo d+hi sa twas de bzhin 'gyur ces pa'i:__mthun gyur nan tan smon lam tha tshig brjod:__de yang smon lam mthu la brten nas ni:__bya de skye ba de yi gong rol du:__rdo rje gdan gyi gtsug lag khang drung du:__gnas brtan d+harma pa tra zhes bya'i bu:__kIrti dz+nyA na zhes byar skyes nas kyang :__rtsed mo'i rnam pas me tog cod pan gcig:__rgyal ba'i sku rten spyan sngar bzhag pa las:__gtsug lag khang gi mchod pa'i rdzas su gyur:__de la brten nas thar pa'i sa bon thebs:__de nas rim bzhin da lta'i bar dag tu:__skye brgyud kun la thar lam 'brel ba bzhag:__kIrti dz+nyA nar skyes pa'i 'og rol du:__dga' ldan gnas su dam pa tog dkar drung :__lha bu dri med grags par gyur pa yin:__de nas thub pa'i drung du dgra bcom pa:__ma 'gags par gyur bden pa mthong na yang :__rgyu 'bras yid ches blang dor bya ba'i phyir:__de nas tshe 'phos rgya gar yul dbus kyi:__ma gu ta yi sbyin bdag bzang por skyes:__de 'phos gtsug lag 'dzin gyi bram zer skyes:__de 'phos shing rta'i tshal gyi ri dwags su:__skyes nas snying rje'i shugs dang ldan par gyur:__de nas shan+ti ka yi grong khyer gyi:__dbul po'i bu mo chu sbyin byed par gyur:__de 'phos rtsa mchog tshong dpon 'phan bzang gyur:__de yang grogs dang bcas pas tshogs spel mthus:__grong khyer spos ldan ma her skyes nas kyang :__bzhos pa'i 'o mas dgra bcom rnams la mchod:__de nas 'phos te b+he ta'i grong khyer du:__khyim bdag legs skyes bzang por gyur nas kyang :__kun la mchod sbyin bsnyen bkur byed par 'gyur:__de 'phos spos ngad ldan pa'i grong khyer gyi:__'phan po'i bur gyur bzang po'i las dang ldan:__de nas brgyud mar bsod nams spel ba'i phyir:__ma nges rigs pa kun dang ldan pa ste:__rgya nag 'phan bzang rigs byed mkhan po dang :__b+ho Ta sa yi tshong dpon yangs can gyi:__sgra 'byin rgyal por de nyid mchod sbyin byed:__de nas gu ge'i tshos mkhan sgra bsgyur mkhan:__bal po i tang rig byed mkhan du gyur:__tsha ba dmar shod phyug po'i bu dang ni:__lcang ra smug po'i sbyin bdag bzang po dang :__rgya nag rgyal po'i bla mchod dge bar ldan:__de sogs skye mang bzang ngan las la spyad:__mdor na rgya gar shar nub bal yul dang :__'dzam gling yul gyi phyogs mtshams mang po dang :__de la sogs pa'i rigs drug gnas rnams su:__skye lus mang blangs tshe rabs las sgrib sbyangs:__tshogs spel tha ma b+he ta'i rgyal po'i sras:__'od zer mtha' yas zhes byar gyur pa'i tshe:__'phags pas lung bstan bdag dang dpon slob gyur:__dbang bskur smon lam btab nas dbang rtags bzhag:__gsang mtshan pad+ma gar gyi dbang phyug zhes:__spyan ras gzigs dbang dgongs pas skyob par mdzad:__skye brgyud 'gar yang chos la las 'phro bzhag:__khyad par thugs rje chen po'i sprul pa mchog:__srong btsan sgom po'i thugs sras blon po che:__yul bzung mgar zhes bod kyi chos srid bskyangs:__legs pa'i yon tan byas pa lag ris can:__de nas tshe 'phos en rtse'i rgyal po'i bu:__'gro ba bzang po zhes bya'i blo stobs can:__de nas tshe 'phos deng sang mnga' bdag sras:__yab kyis mtshan gsol mu rub btsan po zhes:__yum gyis mtshan gsol lha sras dam 'dzin grags:__mched kyis mtshan gsol spur bo bya thul mgo:__'bangs kyis mtshan gsol lha sras dge mgon dkar:__bdag gis mtshan gsol dge bsnyen seng ge bzang :__dgongs 'dus mtshan gsol rol pa ye shes rtsal:__zhi khro yongs rdzogs dkyil 'khor gsang ba'i mtshan:__dbang chen bud+d+ha he ru ka zhes grags:__'khor ba las sgrol rtsa gsum dkyil 'khor du:__dbang bskur gsang mtshan pad+ma don yod rtsal:__dkyil 'khor dbus bzhag bkra shis smon lam btab:__ston pa rdo rje rgyal por mnga' gsol zhing :__sngags 'chang hU~M gi sras mo 'bum lcam khyod:__tshe rabs las bzang rig 'dzin sras mor 'khrungs:__chos la sri zhu che zhing gdungs sems ldan:__las smon mthu yis skye brgyud mang po'i bar:__lha mi la sogs gang dang gang skyes kyang :__lha sras nyid kyi mthun grogs 'brel bar ldan:__nam zhig rig 'dzin zhing du bgrod tshe yang :__tshom bu gcig gi ngang du gnyis med 'gyur:__!__'di nas tshe 'phos o rgyan zangs gling du:__dkyil 'khor drung 'khod bkos 'debs rgyal por mngag:__sprul pa'i rang snang bskal par bsdad snyam byed:__de nas 'gro ba'i don phyir sprul pa 'byung :__a su ra yi brag phug dzo kir gnas:__dngos lung lha lung dpal gyi rdo rjer grags:__bstan pa'i slad du sdig spyod rgyal po bkum:__de ltar gsum ni bstan pa'i srog phur te:__bod kyi rgyal khams dag tu dgongs par 'gyur:__de nas gtsang du zur rigs dz+nyA na'i ming :__sngags kyi dgongs pa'i don rnams gsal bar byed:__de 'das pu rang lha btsun dad pa can:__shAkya'i bstan la rab byung 'dul ba 'dzin:__de nas tshe 'phos mang yul 'phags pa'i drung :__sbas tshul rnal 'byor zhig po'i spyod skyong 'byung :__de nas rim par skye dang 'pho 'jug rnams:__gtsang gi rin chen brag gi nub phyogs su:__dpal btsun zhes bya'i khyim bdag gtsug lag 'dzin:__de 'das sa skya zhes bya'i gtsug lag 'dzin:__de nas kha rag phug pa'i shar phyogs su:__sngags 'chang sid+ha pha la zhes bya 'byung :__de nas tshe 'phos bsam yas nub phyogs su:__shAkya'i zhing khams snye ma mda' zhes par:__gsang sngags bdag po skra yi zla ba can:__drod kyi gdong can rgyal mo so rtsi zhes:__nga yi rjes bzung zab pa'i gter sgo 'byed:__de nas rta nag zam kha'i smyon zhig zhes:__de nas 'phos nas bzad zhes bya ba ru:__sngags 'chang shAkya ye shes zhes byar grags:__de nas lho phyogs dmyal zhes bya ba'i sar:__bstan 'dzin skyes bu gzhon nu'i ming can 'byung :__de 'das g.yor po gra zhes bya ba'i sar:__rnal 'byor sngags 'chang 'phags pa'i ming can 'byung :__de 'das gra mda'i gnas brtan bstan pa 'dzin:__de nas tshe 'phos bsam yas gtsug lag 'dzin:__mi dpon chas 'dzin rlabs chen spyod pa skyong :__grags pa'i ming can gsang sngags spyod pa 'byung :__de 'das ra sa'i gtsug lag 'dzin byed pa:__sbas pa'i tshul can sngags 'chang rdo rje zhes:__bstan pa'i dgra gzugs nyams pa bsod byed 'byung :__de 'og tsA ri'i gnas kyi byang phyogs su:__bshes gnyen dam pa dkon mchog ming can 'byung :__de 'og lho mon mtshams kyi bstan pa 'dzin:__zhi ba'i ming can sna tshogs spyod pa yis:__'gro ba'i don brtson bstan pa'i gsal byed 'byung :__de nas tshe 'phos po bo zhes pa'i sar:__mdung chu'i gtsug lag so ba'i sngags 'chang 'byung :__de 'das de nyid bshes gnyen grub thob grags:__de nas bsam yas mthil 'dir sde skyong sa:__gter ston lha btsun sngon mo zhes byar skyes:__rnam snang rgyab nas bka' gter rab 'byams kyi:__sde snod 'byed cing bstan pa skyong bar byed:__de nas tshe 'das rin dpungs zhes pa yi:__gtsug lag khang bstan bstan pa 'jug byed pa'i:__spyan ras gzigs kyi rnal 'byor pa zhes sam:__rin po che yi ming 'dzin bshes gnyen 'byung :__mtha' mi'i 'gro rnams bde la bkod par byed:__de nas mkha' spyod tsA ri'i gnas 'dabs su:__rnal 'byor zhig po rgyal ba'i ming can gyis:__nyo ro'i brag la grub rtags ston pa 'byung :__de la sogs pa'i skye brgyud mang zhig len:__'gro ba 'ga' la phan pa rgya cher sgrub:__la lar mi dpon skye bo'i rigs dang ni:__mo btsun gzugs kyis 'gro la phan pa 'byung :__re re'i stobs can dud 'gro'i lus sprul can:__'gro la phan pa rgya cher sgrub pa'ang 'byung :__de rdzogs ma 'ongs dus kyi snyigs ma la:__dud 'gro'i skyes mtha' spre'u gcod par byed:__de yang bsam yas byang shar dbus ri'i steng :__phying phu g.yu lung zhes bya'i lha srin 'dul:__smon lam tha tshig dam la 'dogs par byed:__de nas smon lam dus babs las sad de:__g.yu lung ma he'i rwa 'dra'i yul ljongs mdar:__ri sna mthur rgyug brag dmar ngos bzang zhol:__gad pa nag po rus sbal nyal 'dra'i steng :__pha wong thag thug phyug lhas lta bu'i dbus:__sngags kyi rnal 'byor sbas pa'i tshul 'dzin pa:__smyon pa'i ming can rigs su skye bar 'gyur:__rig 'dzin zhes bya snying sme dmar pos spras:__sbas tshul nyer lnga 'brug lo rang skeg steng :__dgongs 'dus gter 'don nyams len gzhan snang grol:__de nas gtsang stod myang zhes bya bar skye:__grags pa rgyal po 'bum mo lcam zhes pa'i:__pha ma gnyis la grags pa dbang phyug zhes:__mched gsum bar tshigs lug gi lo pa gcig:__snying gar sme ba DA ki'i spyan 'bras gsal:__mngal gyi dri ma lo dgus dag nas kyang :__las sad skyes bu bstan pa'i sgor zhugs nas:__bcu gsum rang skag steng du las kyi 'phro:__gter la mnga' spyod sngags kyi rnal 'byor pa:__longs spyod rdzogs dang de yi 'khor gyis bskor:__brgyud 'dzin skyes bu sngags 'chang rgyun mi chad:__de nas gtsang ngam lho yi phyogs nyid du:__mi dpon sbas tshul bstan nas pad+ma nga'i:__zab chos nyams blangs thabs kyis 'gro ba 'dul:__de rjes bskal pa rtsub 'gyur dus kyi tshe:__de dus lha sras dam 'dzin khyod nyid kyang :__bdag gi thugs sras smon lam mthu btsan pas:__rtsub 'gyur dus su khyod kyis 'dul bar 'gyur:__snang rtse skyo yi lha khang nye ba'i sa:__nga yi gsung sprul zhig po gling pa zhes:__gsang gter 'di 'phrad DA ki'i las byed 'gyur:__zhes rgya cher gsungs pa ltar shes par bya'o/__/gnyis pa ni/__dag pa'i snang ngor sogs te/__gter chen nyid dang /__gsol 'debs mdzad pa po zung gi dag pa'i gzigs snang dngos nyams mnal lam du shar ba sogs sgo bstun nas gsungs pa'o/__/gsum pa skabs bsdu ba la gsum/__sku tshe 'di nyid kyi don gyi rnam par thar pa la gsol ba 'debs pa dang /__sku skye ba phyi ma phrin las rgyun mi 'chad pa'i tshul la gsol ba 'debs pa/__mngon par 'dod pa'i don la smon pas mtha' brgyan pa'o/__/dang po la drug__/bka' gter bstan pa'i bdag por gyur pa dang /__mkhyen brtse nus gsum gyi rnam thar rmad du byung ba dang /__'khor 'das thams cad kyi khyab bdag tu bzhugs pa dang /__dkyil 'khor thams cad kyi sprul gzhir snang ba dang /__zab gsang chos kyi 'khor los sgyur ba dang /__rdo rje theg pa'i brtul zhugs grub pa'i tshul las brtsams te gsol ba 'debs pa rnams rim par/__khyad par sogs dang /__rgyal sras sogs dang /__'pho med sogs dang /__bla ma sogs dang /__kun bzang sogs dang /__gang gi sogs kyis bstan to/__/gnyis pa ni/__rgyal dang de sras sogs so/_/_gsum pa ni/__gang gi sogs so/__/gsum pa mjug gi don ni/__ces pa 'di'ang sogs te/__gang gi ched du ji ltar brtsams pa dang /__zhar byung dogs pa khongs nas bsus te bsal ba dang /__gang gis rtsom pa po dang /__gang du brtsam pa'i gnas dang /__shis brjod smon lam gyis mjug bsdu ba dang bcas pa ste go sla'o//__//sarba dA mang+ga laM b+ha ba tu//