JKW-KABUM-24-YA-006

Previous Section Back to Volume PageNext Section

རྗེ་བཙུན་རིག་བྱེད་དབང་མོའི་སྒྲུབ་ཐབས་ཡིད་འཕྲོག་པདྨ་རཱ་གའི་ཕྲེང་བ།

Wylie title	rje btsun rig byed dbang mo'i sgrub thabs yid 'phrog pad+ma rA ga'i phreng ba
Location	mkhyen brtse'i bka' 'bum Volume 24, sde tshan 6, Pages 231-241 (Folios 1a to 6a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rje btsun rig byed dbang mo'i sgrub thabs yid 'phrog pad+ma rA ga'i phreng ba. In 'jam dbyangs mkhyen brtse'i dbang po'i bka' 'bum, Vol. 24: 231-241. Khams sde dge rdzong sar dgon: Rdzong sar blo gros phun tshogs, 2020.
Genre	Sadhanas - Evocation Ritual - sgrub thabs
Deity	rigs byed ma
Colophon	།ཞེས་རྗེ་བཙུན་རིག་བྱེད་དབང་མོའི་སྒྲུབས་ཐབས་ཡིད་འཕྲོག་པདྨ་རཱ་གའི་ཕྲེང་བ་འདི་ཉིད་གཞུང་གཞན་དག་ལས་ཉེ་བར་བསྡུས་ཏེ་གཞོན་ནུ་ཨ་བྷ་ཡས་རང་ལོ་བཅུ་བཞི་པར་སྦྱར་བ་ཀུན་ཏུ་ཤིས་པར་གྱུར་ཅིག།
	zhes rje btsun rig byed dbang mo'i sgrubs thabs yid 'phrog pad+ma rA ga'i phreng ba 'di nyid gzhung gzhan dag las nye bar bsdus te gzhon nu a b+ha yas rang lo bcu bzhi par sbyar ba kun tu shis par gyur cig

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། །རྗེ་བཙུན་རིག་བྱེད་དབང་མོའི་སྒྲུབ་ཐབས་ཡིད་འཕྲོག་པདྨ་རཱ་གའི་ཕྲེང་བ་བཞུགས་སོ།།

ན་མ་ཀུ་རུ་ཀུལླེ་ཡེ། ཀུན་ནས་སྒེག་པའི་ལང་ཚོ་ནི། །རྗེས་ཆགས་པདྨ་རཱ་གའི་མདངས། །དྲན་པས་ཡིད་ཀྱི་དཔལ་སྟེར་བ། །ཀུ་རུ་ཀུལླེ་ལ་བཏུད་ནས། །དེ་ཉིད་ཉེ་བར་སྒྲུབ་པའི་ཐབས། །འཆིངས་བྱེད་ཞགས་པ་འདི་སྤྲོས་པས། །སྐྱེ་དགུའི་ཡིད་དབང་འཕྲོག་བགྱིད་ནས། །ཐར་པ་མཆོག་གི་དཔལ་ལ་སྦྱོར། །དེ་ཡང་འདིར་ཉམས་སུ་ལེན་པར་འདོད་པའི་རྣལ་འབྱོར་པས་སྔོན་དུ་དབང་བསྐུར་བ་ཐོབ་ཅིང་དམ་ཚིག་ལ་གནས་པས། སྟན་བདེ་བ་ལ་སྡོད་དེ། སྐྱབས་སེམས་དང་ཚོགས་བསགས་ཐུན་མོང་བ་གང་ཡང་རུང་བའི་རྗེས། ཨོཾ་ཤུནྱ་ཏ་ཛྙཱ་ན་བཛྲ་སྭཱ་བྷ་ཝ་ཨདྨ་ཀོ྅ཧཾ། གཟུང་འཛིན་གཉིས་སྣང་གིས་བསྡུས་པའི་ཆོས་ཐམས་ཅད་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་པྃ་ལས་པདྨ་དང་རྃ་ལས་བྱུང་བའི་ཉི་མའི་དཀྱིལ་འཁོར་ཕྱི་རོལ་དུར་ཁྲོད་བརྒྱད་དང་བཅས་པ་གསལ་བའི་དབུས་སུ་སྙིང་རྗེ་ཆེན་པོས་རྗེས་སུ་ཆགས་པའི་ངོ་བོ་ཡི་གེ་ཧྲཱིཿདམར་པོ་ལས་འོད་ཟེར་དཔག་ཏུ་མེད་པ་འཕྲོས་པས་འཕགས་པ་མཆོད། སེམས་ཅན་ཐམས་ཅད་ཀྱི་དོན་བྱས། སྲིད་དང་ཞི་བའི་དཔལ་འབྱོར་མཐའ་དག་འོད་ཟེར་དམར་པོའི་རྣམ་པར་བསྡུས་ཏེ་ཐིམ་པ་དེ་ཡོངས་སུ་གྱུར་པ་ལས་རང་ཉིད་རྗེ་བཙུན་མ་ཀུ་རུ་ཀུལླེ་སྐུ་མདོག་པདྨ་རཱ་གའི་ལྷུན་པོ་ལ་ཉི་མ་འབུམ་གྱིས་འཁྱུད་པའི་འོད་ཟེར་དང་ལྡན་པ། བརྒྱད་གཉིས་ལོན་པའི་ལང་ཚོས་སྒེག་ཅིང་། དབུ་སྐྲ་དམར་སེར་གྱེན་དུ་བརྫེས་པ་ལ་རིགས་ལྔ་ཡབ་ཡུམ་མཉམ་པར་སྦྱོར་བའི་རང་བཞིན་ཐོད་པ་ལྔས་མཚན་པ། ཞལ་གྱི་དཀྱིལ་འཁོར་མཚམས་སྤྲིན་གཞོན་ནུ་ལྟར་གསལ་ཅིང་ཅུང་ཟད་གནག་པའི་ཉམས་དང་བཅས་པའི་མཆུ་སྒྲོས་བིམ་པ་ལྟར་དམར་ལ། ཚེམ་དཀར་ཀུནྡཱའི་ཕྲེང་བ་ལྟ་བུར་བཅིང་པའི་བར་དུ་རོ་འཛིན་གྱི་བུང་བ་གཡོ་བ། དམར་ལ་ཟླུམ་པའི་སྤྱན་གསུམ་གཡོན་དུ་གཡོ་ཞིང་། ཁྲོ་བ་དང་ཆགས་པ་སྒེག་པའི་ཉམས་ཅན། ཕ་རོལ་ཏུ་ཕྱིན་པ་དྲུག་གི་རང་བཞིན་མཚོན་པའི་རུས་པའི་རྒྱན་དང་། དར་དང་རིན་པོ་ཆེའི་རྒྱན་གྱིས་བརྒྱན་པ། ཆུ་སྐྱེས་གསར་པའི་ཕྲེང་བས་མཛེས་པར་བྱས་པའི་ཕྱག་གི་དཀྱིལ་འཁོར་དང་པོ་གཉིས་ན་བདེ་སྟོང་གི་མདའ་གཞུ་སྙན་གྱི་ཐད་སོར་འགེངས་ཤིང་། འོག་མ་གཉིས་ཀྱིས་ཞགས་པ་དང་ལྕགས་ཀྱུ་བསྣམས་པ། ཀུན་ཀྱང་ཨུཏྤལ་དམར་པོ་གཞོན་ནུ་ཁ་བྱེ་མ་ཐག་པ་ལོ་འདབ་དང་བཅས་པ་ལས་གྲུབ་ཅིང་། ཞབས་གཉིས་བརྐྱང་བསྐུམ་དང་བཅས་པའི་གར་གྱིས་ཉི་མ་ལ་གནས་པའི་བམ་རོའི་སྙིང་ཁར་བརྫིས་པར་གསལ་བའི་སྤྱི་བོར་ཨོཾ་དཀར་པོ། མགྲིན་པར་ཨཱ་དམར་པོ། ཐུགས་ཀར་ཧཱུྃ་སྔོན་པོ། ཐུགས་ཀའི་སྨད་དུ་ཧྲཱིཿཡིག་བྱེ་རུའི་མདོག་དང་ལྡན་པ་ལས་འོད་ཟེར་བསམ་གྱིས་མི་ཁྱབ་པ་འཕྲོས་པས་དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་རྗེ་བཙུན་མ་རིག་བྱེད་ཌཱཀྐིའི་རྣམ་པར་བཛྲ་ས་མཱ་ཛཿ རྡོ་རྗེ་དྲིལ་བུ་འཛིན་པས། ཧྲཱིཿ འོག་མིན་ཞིང་དང་ཉི་ཤུ་རྩ་བཞིའི་ཡུལ། །དུར་ཁྲོད་བརྒྱད་སོགས་སྤྲུལ་པའི་དཀྱིལ་འཁོར་ནས། །ཡིད་འཕྲོག་ཀུན་ཏུ་སྒེག་པའི་ཌཱཀྐི་ནི། །རྗེས་སུ་ཆགས་པའི་ཚུལ་གྱིས་གནས་འདིར་གཤེགས། ཨེ་ཧྱེ་ཧི་བཛྲ་ས་མ་ཡ་ཛཿ ཛཿཧཱུྃ་བྃ་ཧོཿ དབང་བསྐུར་བ་ནི། སླར་ཡང་དབང་གི་ལྷ་རིགས་ལྔ་འཁོར་དང་བཅས་པ་སྤྱན་དྲངས། བདུད་རྩི་ཆུའི་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་སྤྱི་བོར་བརྟན་པ་ལས་སངས་རྒྱས་སྣང་བ་མཐའ་ཡས་ཀྱིས་དབུ་བརྒྱན་པར་གྱུར། ཐུན་མོང་ཕྱི་ཡི་མཆོད་པ་ནི། ཧྲཱིཿ ཡན་ལག་བརྒྱད་ལྡན་ཀུན་ཏུ་དྭངས་པའི་མཚོ། །ཆུ་སྐྱེས་ལོ་འདབ་གཡོ་བའི་གཞོན་ནུ་དང་། །ཙནྡན་དྲི་མཆོག་འཐུལ་བའི་བདུག་སྤོས་སྤྲིན། །ཉི་ཟླའི་སྒྲོན་མེ་ཟིལ་གནོན་མར་མེའི་ཕྲེང་། །གུར་གུམ་སར་པས་བགོས་པའི་རྫིང་བུ་དང་། །རོ་མཆོག་བརྒྱ་ལྡན་མཛེས་པའི་ལྷ་ཡི་བཤོས། །སྙན་ཅིང་འཇེབ་པའི་རོལ་མོའི་ཚོགས་རྣམས་ཀྱིས། །རྗེ་བཙུན་ཌཱཀྐིར་རྟག་ཏུ་མཆོད་པར་བགྱི། །ཨོཾ་ཀུ་རུ་ཀུལླེ་ས་པ་རི་ཝཱ་ར་ཨརྒྷཾ་སོགས་ཀྱི་མཆོད་ལ་རོལ་མོ་བྱ། ཁྱད་པར་གྱི་མཆོད་པ་ནི། ཤ་ལྔ་བདུད་རྩི་ལྔ་དངོས་སུ་འབྱོར་རམ། མ་དཱ་ནས་ཀྱང་རུང་སྟེ། མཐེབ་སྲིན་སྦྱར་བས་མཆོད་ལ། ཨོཾ་ཧཱུྃ་ཏྲྃ་ཧྲཱིཿཨཱཿ རིགས་ལྔ་ཡབ་ཡུམ་མཉམ་སྦྱོར་བདེ་བའི་སྤྲིན། །ཟུང་འཇུག་ཡེ་ཤེས་བདུད་རྩིར་བསྐྱིལ་བ་ལས། །ཟག་མེད་བདེ་བ་མཆོག་སྟེར་རླབས་ཕྲེང་ཅན། །དབང་མཛད་ཌཱཀྐི་འཁོར་དང་བཅས་ལ་འབུལ། །ཧཱུྃ་ཡིག་རྡུལ་གྱི་ཐིག་ལེ་ཉེར་བསྐྱོད་པའི། །རོ་འཛིན་ཀུནྡཱའི་འཇོ་སྒེག་གཡོ་བ་དེར། །རྡོ་རྗེ་འོད་ཀྱི་སྦུ་གུ་ཀེ་ས་རས། །རྗེས་སུ་ཆགས་པའི་སྟོབས་ཀྱིས་རོལ་པར་མཛོད། །བསྟོད་པ་ནི་རྡོ་རྗེ་དྲིལ་བུ་འཛིན་པས། ཁྱོད་སྐུར་རབ་དམར་པདྨ་རཱ་གའི་མདོག །ཁྲོ་ཆགས་སྒེག་ལྡན་འབར་བའི་སྤྱན་གསུམ་གཡོ། །ཞལ་གཅིག་ཕྱག་བཞི་དམར་སེར་རལ་པས་མཛེས། །མཐོང་བས་ཡིད་ཀྱི་བརྟན་པ་འཕྲོག་ལ་འདུད། །གང་གསུང་སྒྲ་ཚིག་རྣམ་སྤངས་དབུ་མའི་མཁར། །གསང་སྔགས་འབྲུ་བརྒྱད་འབར་བའི་ཉིན་མོར་བྱེད། །རྗེས་ཆགས་འོད་དམར་ཞགས་པ་རིང་སྤྲོ་བས། །བརྟན་གཡོའི་ཨུཏྤལ་གཞོན་ནུ་འགུགས་ལ་འདུད། ཁྱོད་ཐུགས་གཟོད་ནས་སྤྲོས་བྲལ་ཆོས་སྐུའི་ཀློང་། །ལྷན་སྐྱེས་བདེ་བ་མཆོག་གི་རྒྱས་བཏབ་པས། །ཟག་བྲལ་ཁ་སྦྱོར་ཡན་ལག་བདུན་གྱི་གར། །རྣམ་པ་ཀུན་གྱི་མཆོག་དང་ལྡན་ལ་འདུད། །ཁྱོད་ལ་རྟག་ཏུ་གུས་པས་ཉེར་བསྟོད་པས། །རིགས་གཟུགས་འབྱོར་བའི་ཡོན་ཏན་ཕུན་སུམ་ཚོགས། །སྲིད་ཞིའི་ལེགས་ཚོགས་ཐུགས་རྗེའི་མཆིལ་པ་ཡིས། །མྱུར་དུ་སྡུད་པའི་དགེ་མཚན་མཆོག་སྦྱིན་མཛོད། བཟླས་པ་བྱ་བ་ནི། ཐུགས་ཀར་ཨུཏྤལ་དམར་པོ་འདབ་མ་བརྒྱད་པའི་སྟེང་དུ་ཉི་མ་ལ་གནས་པའི་ཧྲཱིཿཡིག་མཐར། ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། ཞེས་ཉི་མ་དང་མར་མེའི་འོད་ལྟར་གནས་པ་ལ་སེམས་གཏད་དེ་བཟླའོ། །ལས་ལ་སྦྱོར་བ་ནི། སྙིང་ཁའི་ཧྲཱིཿལས་ཧྲཱིཿཡིག་གཉིས་པ་ཞིག་ཐོན་རྣ་བ་གཡས་བརྒྱུད་དེ་མདའི་སྟོང་ནས་ཞུགས་ཏེ་མདེའུ་རྩེ་ནས་ཐོན་དམིགས་བྱའི་སྣ་བུག་གཡས་པ་ནས་བརྒྱུད་སྙིང་གར་ཞུགས་ཏེ་ཚེ་བསོད་དཔལ་འབྱོར་ཐམས་ཅད་འོད་ཟེར་དམར་པོའི་རྣམ་པར་ཧྲཱིཿཡིག་ལ་འདུས་ཏེ་ཐིམ་པས་དབང་དུ་གྱུར་ཅིང་ལྟེ་བ་ལ་སོགས་པའི་རྩ་འཁོར་ཀུན་འོད་ཟེར་གྱིས་དྲག་ཏུ་དཀྲུག་པར་བསམ། སླར་ཡི་གེ་སྣ་བུག་གཡོན་པ་ནས་ཐོན་མདེའུ་རྩེ་ནས་རྒྱུད་དེ་རྣ་བ་གཡོན་པར་ཞུགས་ཏེ་སྙིང་གའི་ཧྲཱིཿཡིག་ལ་ཐིམ་པ་ཧྲཱིཿཡིག་སྔགས་ཕྲེང་དང་བཅས་གཟི་བྱིན་ལྷག་པར་འཕེལ་ཏེ་སྲིད་ཞི་ཀུན་གྱི་བདག་པོར་གྱུར་པར་དམིགས་ལ་སྔགས་ལ་དམིགས་བྱའི་མིང་སྤེལ་བ་བགྲང་། ཙནྡན་གྱི་མེ་ལ་སྦྱིན་སྲེག་བྱའོ། །འདི་ལ་དམིགས་གནད་འདྲ་མིན་གཞན་ཡང་ཡོད་དོ། །ཐུན་མཚམས་རྣམས་སུ་མཎྜལ་ལེགས་པོ་ལ་ཙནྡན་དམར་པོའམ་ཆུས་བྱུག །མེ་ཏོག་དམར་པོ་སིལ་མ་དགྲམ་པ་ཅི་ནུས་དབུལ་ཞིང་འདོད་དོན་གསོལ་བ་གདབ། སྔར་གྱི་མཆོད་བསྟོད་བྱ། གཏོར་མ་འབུལ་བར་འདོད་ན། །ཨོཾ་ཨཱཿཧཱུྃ་ཧ་ཧོ་ཧྲཱིཿ ཞེས་ལན་གསུམ་གྱིས་བརླབ། རྩ་སྔགས་འཇུག་ཏུ། ཨི་དཾ་བ་ལིང་ཏ་ཁ་ཧཱི། ཅེས་ལན་བདུན་གསུམ་ཉེར་གཅིག་གང་རིགས་ཀྱིས་དབུལ་ལ་འདོད་དོན་གསོལ་བ་གདབ་པ་ནི། ཧྲཱིཿ ཀུན་ཏུ་སྒེག་ཅིང་ནུ་འབུར་བྷ་ག་རྒྱས། །དགའ་བ་བཅུ་དྲུག་ལང་ཚོའི་གཞན་ཡིད་འཕྲོག །རྗེས་ཆགས་མཚམས་སྤྲིན་གཞོན་ནུའི་མཚར་སྡུག་ལ། །དམར་སེར་རལ་པའི་གེ་སར་མཛེས་པས་འཁྱུད། །ཕྱག་གི་དཀྱིལ་འཁོར་རྣམ་བཞིའི་འཁྲི་ཤིང་རྩེར། །ཨུཏྤལ་དམར་པོ་གསར་པ་ལས་གྲུབ་པའི། །བདེ་སྟོང་མདའ་གཞུ་སྙིང་རྗེའི་ཞགས་པ་དང་། །ཐབས་ལ་མཁས་པའི་ལྕགས་ཀྱུ་རྣམ་པར་འཛིན། །ཕ་རོལ་ཕྱིན་དྲུག་རྫོགས་པའི་རུས་རྒྱན་དང་། །འདུ་བྱེད་ལྔ་བཅུ་དག་པའི་མགོ་བོའི་ཕྲེང་། །སྣ་ཚོགས་ཕྲིན་ལས་དར་དང་རིན་པོ་ཆེ། །མེ་ཏོག་ཕྲེང་བས་རབ་ཏུ་མཛེས་པར་བརྒྱན། །རྣམ་ཐར་གསུམ་ལྡན་འབར་བའི་སྤྱན་གསུམ་གཡོ། །རིགས་ལྔ་ཡབ་ཡུམ་ཞལ་སྦྱོར་དབང་བསྐུར་ཕྱིར། །ཀུནྡའི་མདོག་ཅན་ཐོད་པ་ལྔ་ཡིས་བརྒྱན། །ཐབས་ཤེས་ཞབས་གཉིས་བརྐྱང་བསྐུམ་རོལ་པ་ཡིས། །སྲིད་པའི་བམ་རོ་ཆོས་ཀྱི་དབྱིངས་སུ་གནོན། །ཁྲོ་དང་ཆགས་དང་སྒེག་པའི་ཉམས་འབར་བའི། །རྗེ་བཙུན་ཌཱཀྐི་ཁྱོད་སྐུ་རྟག་སྒོམས་ཤིང་། །གྲགས་སྟོང་སྔགས་ཀྱི་སྒྲ་ལ་ཀུན་ཏུ་གོམ། །རིག་སྟོང་གཉུག་མའི་ངང་དུ་མཉམ་བཞག་མཐུས། །བདེ་བ་ཆེན་པོས་བདག་རྒྱུད་འཁྱུད་པར་མཛོད། །སྙིང་རྗེས་སེམས་ཅན་ཁམས་ཀུན་མི་སྤང་ཞིང་། །རྟོགས་པས་རྟག་ཏུ་ཟུང་འཇུག་ཆེན་པོར་རོལ། །བླང་དང་དོར་བྱའི་ཆོས་རྣམས་མ་དམིགས་པའི། །ཁྱེད་ཀྱི་དགོངས་པ་ཡོངས་སུ་འགྲུབ་པར་མཛོད། །རྗེས་སུ་ཆགས་པའི་རཱ་གའི་ཞགས་པ་ཡིས། །ལུས་མེད་འདོད་པའི་འཁྲི་ཤིང་བཅིངས་ནས་ཀྱང་། ཁམས་གསུམ་སྐྱེ་དགུ་བསྡུས་པའི་གཟུགས་ཅན་གྱིས། །བསྟོད་བསྔགས་ཆུ་སྐྱེས་གསར་པ་འཇོ་བར་མཛོད། །ཚེ་བསོད་དཔལ་འབྱོར་རྒྱས་པའི་ཨུཏྤལླ། །མཚར་སྡུག་སྤྱན་གྱི་ཉི་གཞོན་གྱིས་རོལ་པས། །རྟག་ཏུ་དགའ་བདེ་དྭང་བའི་སྦྲང་རྩི་ཡིས། །ལུས་ཅན་རཿཡིག་ཚོགས་རྣམས་ཚིམ་པར་མཛོད། །ཡིད་སྲུབ་ཁྲག་གི་མྱོས་པའི་སྐྱེ་འགྲོ་རྣམས། །དཀར་མིན་ལས་ལ་གོམས་པའི་བསམ་སྦྱོར་དབང་། །ཀུན་ཏུ་བཅིང་ནས་མངོན་མཐོ་ངེས་ལེགས་ཀྱི། །གོ་འཕང་ཐེམ་སྐས་མཆོག་ལ་འཇོག་པར་མཛོད། །མདོར་ན་ཕན་བདེའི་ནོར་བུའི་འཁྲི་ཤིང་གིས། །བདག་ཅག་འདོད་པའི་ཤིང་རྟ་འགེངས་པ་དང་། །མཐར་ཐུག་ལྷན་སྐྱེས་ཌཱཀྐིའི་ངོ་བོ་ཉིད། །བློ་བྲལ་ཕྱག་རྒྱ་ཆེན་པོར་རོ་གཅིག་ཤོག །ཞེས་བས་གསོལ་བ་བཏབ་རྗེས་སྣོད་བཅུད་སྣང་སྲིད་ཐམས་ཅད་འོད་ཟེར་དམར་བོའི་རྣམ་པར་གྱུར་ཏེ་དུར་ཁྲོད་བརྒྱད་ལ་ཐིམ། དེ་ཉིད་གདན་ལ་ཐིམ་ཅིང་དེ་ཉིད་ལས་རིམ་གྱིས་ཐིམ་པའི་མཐར་ཐུགས་སྲོག་ཧྲཱིཿཡིག་ལ་ཐིམ་པར་བསམ་ལ་སེམས་བཟུང་། དེ་ཉིད་བསམ་གྱིས་མི་ཁྱབ་པའི་ཕྱག་རྒྱ་ཆེན་པོར་བཞག་པར་བྱའོ། །སླར་ཡང་ཚུལ་རླབས་ཀྱི་ཚུལ་དུ་ལྷའི་སྐུར་ལྡང་ལ་ཐུན་མཚམས་ཀྱི་སྤྱོད་ལམ་བྱ། རྗེས་ལ་དགེ་བ་བསྔོ་ཞིང་། སྨོན་ལམ་གདབ་པ་ནི། བདག་གི་རིམ་པ་གཉིས་ཀྱི་ལམ་མཆོག་ལ། །རྟག་ཏུ་མཉམ་པར་བཞག་མཐུས་ཐུན་མོང་དང་། །མཆོག་གི་དངོས་གྲུབ་མ་ལུས་ཉེར་ཐོབ་སྟེ། །ཡེ་ཤེས་ཌཱཀྐིའི་རང་ཞལ་མྱུར་མཐོབ་ཤོག །བཀྲ་ཤིས་ནི། ཧྲཱིཿ བརྟན་གཡོ་ཀུན་ཁྱབ་བདེ་ཆེན་ཧེ་རུ་ཀས། །ཟུང་འཇུག་ཕྱག་རྒྱ་རོལ་པའི་ལང་ཚོ་ནི། །རྗེས་ཆགས་ཡིད་འཕྲོག་པདྨ་རཱ་གའི་མདངས། །རིག་བྱེད་ཌཱཀྐིའི་བཀྲ་ཤིས་དེང་འདིར་སྩོལ། །གཞན་ཡང་བཀྲ་ཤིས་ཅི་རིགས་པར་བརྗོད་དོ། །གང་ཞིག་མཐོང་ཐོས་དྲན་པས་མཆོག་ཐུན་དཔལ། །མངོན་སྩོལ་རིག་བྱེད་ཌཱཀྐིའི་སྒྲུབ་པའི་ཐབས། །ཡིད་འཕྲོག་པདྨ་རཱ་གའི་ཕྲེང་བ་འདི། །སྐལ་བཟང་དོན་གཉེར་མཛེས་མའི་མགུལ་བར་སྦྱིན། དེ་ཡི་མཐུ་ལས་བྱུང་བའི་རྣམ་དཀར་དགེ། །ཉི་མ་གཞོན་ནུའི་དཔལ་ལ་འགྲན་པ་དེས། །འདོད་དགུའི་མཚར་སྡུག་རྫོགས་པའི་ཨུཏྤལླ། །ཉེར་དྲངས་ཕན་བདེའི་དགའ་སྟོན་ཐོབ་གྱུར་ཅིག །ཞེས་རྗེ་བཙུན་རིག་བྱེད་དབང་མོའི་སྒྲུབས་ཐབས་ཡིད་འཕྲོག་པདྨ་རཱ་གའི་ཕྲེང་བ་འདི་ཉིད་གཞུང་གཞན་དག་ལས་ཉེ་བར་བསྡུས་ཏེ་གཞོན་ནུ་ཨ་བྷ་ཡས་རང་ལོ་བཅུ་བཞི་པར་སྦྱར་བ་ཀུན་ཏུ་ཤིས་པར་གྱུར་ཅིག། །།

[edit]

rje btsun rig byed dbang mo'i sgrub thabs yid 'phrog pad+ma rA ga'i phreng ba/ @#/_/rje btsun rig byed dbang mo'i sgrub thabs yid 'phrog pad+ma rA ga'i phreng ba bzhugs so// na ma ku ru kul+le ye/__kun nas sgeg pa'i lang tsho ni/__/rjes chags pad+ma rA ga'i mdangs/__/dran pas yid kyi dpal ster ba/__/ku ru kul+le la btud nas/__/de nyid nye bar sgrub pa'i thabs/__/'chings byed zhags pa 'di spros pas/__/skye dgu'i yid dbang 'phrog bgyid nas/__/thar pa mchog gi dpal la sbyor/__/de yang 'dir nyams su len par 'dod pa'i rnal 'byor pas sngon du dbang bskur ba thob cing dam tshig la gnas pas/__stan bde ba la sdod de/__skyabs sems dang tshogs bsags thun mong ba gang yang rung ba'i rjes/__oM shun+ya ta dz+nyA na badz+ra swA b+ha wa ad+ma ko\u0f85haM/__gzung 'dzin gnyis snang gis bsdus pa'i chos thams cad mi dmigs pa stong pa nyid du gyur/__stong pa'i ngang las pa~M las pad+ma dang ra~M las byung ba'i nyi ma'i dkyil 'khor phyi rol dur khrod brgyad dang bcas pa gsal ba'i dbus su snying rje chen pos rjes su chags pa'i ngo bo yi ge hrIHdmar po las 'od zer dpag tu med pa 'phros pas 'phags pa mchod/__sems can thams cad kyi don byas/__srid dang zhi ba'i dpal 'byor mtha' dag 'od zer dmar po'i rnam par bsdus te thim pa de yongs su gyur pa las rang nyid rje btsun ma ku ru kul+le sku mdog pad+ma rA ga'i lhun po la nyi ma 'bum gyis 'khyud pa'i 'od zer dang ldan pa/__brgyad gnyis lon pa'i lang tshos sgeg cing /__dbu skra dmar ser gyen du brdzes pa la rigs lnga yab yum mnyam par sbyor ba'i rang bzhin thod pa lngas mtshan pa/__zhal gyi dkyil 'khor mtshams sprin gzhon nu ltar gsal cing cung zad gnag pa'i nyams dang bcas pa'i mchu sgros bim pa ltar dmar la/__tshem dkar kun+dA'i phreng ba lta bur bcing pa'i bar du ro 'dzin gyi bung ba g.yo ba/__dmar la zlum pa'i spyan gsum g.yon du g.yo zhing /__khro ba dang chags pa sgeg pa'i nyams can/__pha rol tu phyin pa drug gi rang bzhin mtshon pa'i rus pa'i rgyan dang /__dar dang rin po che'i rgyan gyis brgyan pa/__chu skyes gsar pa'i phreng bas mdzes par byas pa'i phyag gi dkyil 'khor dang po gnyis na bde stong gi mda' gzhu snyan gyi thad sor 'gengs shing /__'og ma gnyis kyis zhags pa dang lcags kyu bsnams pa/__kun kyang ut+pal dmar po gzhon nu kha bye ma thag pa lo 'dab dang bcas pa las grub cing /__zhabs gnyis brkyang bskum dang bcas pa'i gar gyis nyi ma la gnas pa'i bam ro'i snying khar brdzis par gsal ba'i spyi bor oM dkar po/__mgrin par A dmar po/__thugs kar hU~M sngon po/__thugs ka'i smad du hrIHyig bye ru'i mdog dang ldan pa las 'od zer bsam gyis mi khyab pa 'phros pas dus gsum gyi rgyal ba sras dang bcas pa thams cad rje btsun ma rig byed DAk+ki'i rnam par badz+ra sa mA dzaH__rdo rje dril bu 'dzin pas/__hrIH__'og min zhing dang nyi shu rtsa bzhi'i yul/__/dur khrod brgyad sogs sprul pa'i dkyil 'khor nas/__/yid 'phrog kun tu sgeg pa'i DAk+ki ni/__/rjes su chags pa'i tshul gyis gnas 'dir gshegs/__e h+ye hi badz+ra sa ma ya dzaH__dzaHhU~M ba~M hoH__dbang bskur ba ni/__slar yang dbang gi lha rigs lnga 'khor dang bcas pa spyan drangs/__bdud rtsi chu'i spyi bo nas dbang bskur/__sku gang /__dri ma dag__/chu'i lhag ma spyi bor brtan pa las sangs rgyas snang ba mtha' yas kyis dbu brgyan par gyur/__thun mong phyi yi mchod pa ni/__hrIH__yan lag brgyad ldan kun tu dwangs pa'i mtsho/__/chu skyes lo 'dab g.yo ba'i gzhon nu dang /_/tsan+dan dri mchog 'thul ba'i bdug spos sprin/__/nyi zla'i sgron me zil gnon mar me'i phreng /__/gur gum sar pas bgos pa'i rdzing bu dang /__/ro mchog brgya ldan mdzes pa'i lha yi bshos/__/snyan cing 'jeb pa'i rol mo'i tshogs rnams kyis/__/rje btsun DAk+kir rtag tu mchod par bgyi/__/oM ku ru kul+le sa pa ri wA ra ar+g+haM sogs kyi mchod la rol mo bya/__khyad par gyi mchod pa ni/__sha lnga bdud rtsi lnga dngos su 'byor ram/__ma dA nas kyang rung ste/__mtheb srin sbyar bas mchod la/__oM hU~M tra~M hrIHAH__rigs lnga yab yum mnyam sbyor bde ba'i sprin/__/zung 'jug ye shes bdud rtsir bskyil ba las/__/zag med bde ba mchog ster rlabs phreng can/__/dbang mdzad DAk+ki 'khor dang bcas la 'bul/__/hU~M yig rdul gyi thig le nyer bskyod pa'i/__/ro 'dzin kun+dA'i 'jo sgeg g.yo ba der/__/rdo rje 'od kyi sbu gu ke sa ras/__/rjes su chags pa'i stobs kyis rol par mdzod/__/bstod pa ni rdo rje dril bu 'dzin pas/__khyod skur rab dmar pad+ma rA ga'i mdog__/khro chags sgeg ldan 'bar ba'i spyan gsum g.yo/__/zhal gcig phyag bzhi dmar ser ral pas mdzes/_/mthong bas yid kyi brtan pa 'phrog la 'dud/__/gang gsung sgra tshig rnam spangs dbu ma'i mkhar/__/gsang sngags 'bru brgyad 'bar ba'i nyin mor byed/__/rjes chags 'od dmar zhags pa ring spro bas/__/brtan g.yo'i ut+pal gzhon nu 'gugs la 'dud/__khyod thugs gzod nas spros bral chos sku'i klong /__/lhan skyes bde ba mchog gi rgyas btab pas/__/zag bral kha sbyor yan lag bdun gyi gar/__/rnam pa kun gyi mchog dang ldan la 'dud/__/khyod la rtag tu gus pas nyer bstod pas/__/rigs gzugs 'byor ba'i yon tan phun sum tshogs/__/srid zhi'i legs tshogs thugs rje'i mchil pa yis/__/myur du sdud pa'i dge mtshan mchog sbyin mdzod/__bzlas pa bya ba ni/__thugs kar ut+pal dmar po 'dab ma brgyad pa'i steng du nyi ma la gnas pa'i hrIHyig mthar/__oM ku ru kul+le hrIHswA hA/__zhes nyi ma dang mar me'i 'od ltar gnas pa la sems gtad de bzla'o/__/las la sbyor ba ni/__snying kha'i hrIHlas hrIHyig gnyis pa zhig thon rna ba g.yas brgyud de mda'i stong nas zhugs te mde'u rtse nas thon dmigs bya'i sna bug g.yas pa nas brgyud snying gar zhugs te tshe bsod dpal 'byor thams cad 'od zer dmar po'i rnam par hrIHyig la 'dus te thim pas dbang du gyur cing lte ba la sogs pa'i rtsa 'khor kun 'od zer gyis drag tu dkrug par bsam/__slar yi ge sna bug g.yon pa nas thon mde'u rtse nas rgyud de rna ba g.yon par zhugs te snying ga'i hrIHyig la thim pa hrIHyig sngags phreng dang bcas gzi byin lhag par 'phel te srid zhi kun gyi bdag por gyur par dmigs la sngags la dmigs bya'i ming spel ba bgrang /__tsan+dan gyi me la sbyin sreg bya'o/__/'di la dmigs gnad 'dra min gzhan yang yod do/__/thun mtshams rnams su maN+Dal legs po la tsan+dan dmar po'am chus byug__/me tog dmar po sil ma dgram pa ci nus dbul zhing 'dod don gsol ba gdab/__sngar gyi mchod bstod bya/__gtor ma 'bul bar 'dod na/__/oM AHhU~M ha ho hrIH__zhes lan gsum gyis brlab/__rtsa sngags 'jug tu/__i daM ba ling ta kha hI/__ces lan bdun gsum nyer gcig gang rigs kyis dbul la 'dod don gsol ba gdab pa ni/__hrIH__kun tu sgeg cing nu 'bur b+ha ga rgyas/__/dga' ba bcu drug lang tsho'i gzhan yid 'phrog__/rjes chags mtshams sprin gzhon nu'i mtshar sdug la/__/dmar ser ral pa'i ge sar mdzes pas 'khyud/__/phyag gi dkyil 'khor rnam bzhi'i 'khri shing rtser/__/ut+pal dmar po gsar pa las grub pa'i/__/bde stong mda' gzhu snying rje'i zhags pa dang /__/thabs la mkhas pa'i lcags kyu rnam par 'dzin/__/pha rol phyin drug rdzogs pa'i rus rgyan dang /__/'du byed lnga bcu dag pa'i mgo bo'i phreng /__/sna tshogs phrin las dar dang rin po che/__/me tog phreng bas rab tu mdzes par brgyan/__/rnam thar gsum ldan 'bar ba'i spyan gsum g.yo/__/rigs lnga yab yum zhal sbyor dbang bskur phyir/__/kun+da'i mdog can thod pa lnga yis brgyan/__/thabs shes zhabs gnyis brkyang bskum rol pa yis/__/srid pa'i bam ro chos kyi dbyings su gnon/__/khro dang chags dang sgeg pa'i nyams 'bar ba'i/__/rje btsun DAk+ki khyod sku rtag sgoms shing /__/grags stong sngags kyi sgra la kun tu gom/__/rig stong gnyug ma'i ngang du mnyam bzhag mthus/__/bde ba chen pos bdag rgyud 'khyud par mdzod/__/snying rjes sems can khams kun mi spang zhing /__/rtogs pas rtag tu zung 'jug chen por rol/__/blang dang dor bya'i chos rnams ma dmigs pa'i/__/khyed kyi dgongs pa yongs su 'grub par mdzod/__/rjes su chags pa'i rA ga'i zhags pa yis/__/lus med 'dod pa'i 'khri shing bcings nas kyang /__khams gsum skye dgu bsdus pa'i gzugs can gyis/__/bstod bsngags chu skyes gsar pa 'jo bar mdzod/__/tshe bsod dpal 'byor rgyas pa'i ut+pal+la/__/mtshar sdug spyan gyi nyi gzhon gyis rol pas/__/rtag tu dga' bde dwang ba'i sbrang rtsi yis/__/lus can raHyig tshogs rnams tshim par mdzod/__/yid srub khrag gi myos pa'i skye 'gro rnams/__/dkar min las la goms pa'i bsam sbyor dbang /__/kun tu bcing nas mngon mtho nges legs kyi/__/go 'phang them skas mchog la 'jog par mdzod/__/mdor na phan bde'i nor bu'i 'khri shing gis/__/bdag cag 'dod pa'i shing rta 'gengs pa dang /__/mthar thug lhan skyes DAk+ki'i ngo bo nyid/__/blo bral phyag rgya chen por ro gcig shog__/zhes bas gsol ba btab rjes snod bcud snang srid thams cad 'od zer dmar bo'i rnam par gyur te dur khrod brgyad la thim/__de nyid gdan la thim cing de nyid las rim gyis thim pa'i mthar thugs srog hrIHyig la thim par bsam la sems bzung /__de nyid bsam gyis mi khyab pa'i phyag rgya chen por bzhag par bya'o/__/slar yang tshul rlabs kyi tshul du lha'i skur ldang la thun mtshams kyi spyod lam bya/__rjes la dge ba bsngo zhing /__smon lam gdab pa ni/__bdag gi rim pa gnyis kyi lam mchog la/__/rtag tu mnyam par bzhag mthus thun mong dang /_/mchog gi dngos grub ma lus nyer thob ste/__/ye shes DAk+ki'i rang zhal myur mthob shog_/bkra shis ni/__hrIH__brtan g.yo kun khyab bde chen he ru kas/__/zung 'jug phyag rgya rol pa'i lang tsho ni/__/rjes chags yid 'phrog pad+ma rA ga'i mdangs/__/rig byed DAk+ki'i bkra shis deng 'dir stsol/__/gzhan yang bkra shis ci rigs par brjod do/__/gang zhig mthong thos dran pas mchog thun dpal/__/mngon stsol rig byed DAk+ki'i sgrub pa'i thabs/_/yid 'phrog pad+ma rA ga'i phreng ba 'di/__/skal bzang don gnyer mdzes ma'i mgul bar sbyin/__de yi mthu las byung ba'i rnam dkar dge/__/nyi ma gzhon nu'i dpal la 'gran pa des/__/'dod dgu'i mtshar sdug rdzogs pa'i ut+pal+la/__/nyer drangs phan bde'i dga' ston thob gyur cig__/zhes rje btsun rig byed dbang mo'i sgrubs thabs yid 'phrog pad+ma rA ga'i phreng ba 'di nyid gzhung gzhan dag las nye bar bsdus te gzhon nu a b+ha yas rang lo bcu bzhi par sbyar ba kun tu shis par gyur cig/__//