རྡོ་རྗེའི་ཐོལ་གླུ་ལམ་གྱི་རིམ་པ་ཉེ་བར་བསྡུས་པ།

🚧 This website is under continued development. We appreciate your patience!

Previous Text Back to Volume PageNext Text

Wylie title	rdo rje'i thol glu lam gyi rim pa nye bar bsdus pa
Location	mkhyen brtse'i bka' 'bum Volume 22, sde tshan 12, Text 73, Pages 546-549 (Folios 101b5 to 103a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rdo rje'i thol glu lam gyi rim pa nye bar bsdus pa. In 'jam dbyangs mkhyen brtse'i dbang po'i bka' 'bum, Vol. 22: 546-549. Khams sde dge rdzong sar dgon: Rdzong sar blo gros phun tshogs, 2020.
Genre	Stages of the Path - lam rim  ·  Vajra Songs - rdo rje'i glu
Colophon	།ཅེས་པའང་ཟབ་མོའི་དོན་གྱི་གསལ་འདེབས་སུ་གང་ཤར་ལྷུག་པར་བརྗོད་པའོ།།
	ces pa'ang zab mo'i don gyi gsal 'debs su gang shar lhug par brjod pa'o

1 Texts in this Section (sde tshan or chos tshan)

73 546-549	རྡོ་རྗེའི་ཐོལ་གླུ་ལམ་གྱི་རིམ་པ་ཉེ་བར་བསྡུས་པ། rdo rje'i thol glu lam gyi rim pa nye bar bsdus pa Stages of the Path - lam rim   ·   Vajra Songs - rdo rje'i glu	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

རྡོ་རྗེའི་ཐོལ་གླུ་ལམ་གྱི་རིམ་པ་ཉེ་བར་བསྡུས་པ་ཞེས་བྱ་བ། ཨ་ཧོ། རིག་སྟོང་སྤྲོས་བྲལ་འོད་གསལ་གཉུག་མ་ཡི་སྦུབས་ནས། །དབྱིངས་རིག་དབྱེར་མེད་སྐུ་གསུམ་བདེ་ཆེན་གྱི་ཌཱ་ཀི །ང་ཡི་སྙིང་དབུས་གཞོན་ནུ་བུམ་སྐུ་རུ་བཞུགས་དང་། །གཏད་མེད་གསང་སྔགས་ལམ་གྱི་ཐོལ་གླུ་རུ་བསྒྱུར་བཏང་། །དལ་བ་བརྒྱད་ཀྱི་འཁྲི་ཤིང་འབྱོར་བཅུ་ཡི་མེ་ཏོག །འཕྲལ་རྐྱེན་རིས་ཆད་མི་ཁོམས་ཚ་གདུང་གིས་སྤངས་པས། །སྐྱོན་བྲལ་མི་ལུས་རིན་ཆེན་རྙེད་དཀའ་ཡི་བསིལ་ཡབ། །གཏན་བདེའི་ངལ་བསོ་བསྟེན་པའི་སྐྱོ་གྲོགས་སུ་ཕེབས་སོ། །དེ་ཡང་ཕྱི་སྣོད་མི་རྟག་རྣམ་བཞི་ལ་སྤྱོད་ཅིང་། །ནང་བཅུད་མཆོག་དམན་བར་མ་འཆི་བདག་གིས་བཟུང་ཕྱིར། །སྙིང་པོ་མེད་པའི་ངང་ཚུལ་མཐའ་བཞི་ཡིས་བསྡུས་པས། །སྐད་ཅིག་དལ་མེད་ཐར་པའི་གོ་འཕང་ལ་སྦྱོར་འཚལ། །དཀར་ནག་ལས་ཀྱི་ས་བོན་སོ་སོ་རུ་བཏབ་པས། །བདེ་སྡུག་འབྲས་བུ་མི་བསླུ་ཐ་དད་དུ་སྨིན་ནས། །གཞི་དང་བསམ་སྦྱོར་མཐར་ཐུག་ཡན་ལག་ཀུན་རྫོགས་ཕྱིར། །ཐར་པའི་དཔག་བསམ་དབང་པོ་བསྐྱེད་པ་རུ་མཛོད་ཅིག །སྣ་ཚོགས་ལས་ཀྱིས་སྣ་ཚོགས་སྣང་ཚུལ་ལ་སྤྱོད་པའི། །འགྲོ་དྲུག་སྡུག་བསྔལ་གསུམ་གྱིས་མནར་སྤྱོད་དེ་མཐོང་ནས། །བདེན་པ་བཞི་ཡི་ཤིང་རྟ་དམ་པ་ལ་ཞོན་ཏེ། །ངེས་ལེགས་ཐར་པའི་གླིང་དུ་ཕྱིན་པ་རུ་མཛོད་ཅིག །གང་ཞིག་བསྟེན་ན་འཕྲལ་ཡུན་ཕན་བདེ་ཀུན་སྦྱིན་པའི། །དགེ་བའི་གྲོགས་དང་བཤེས་གཉེན་འབྲལ་མེད་དུ་བསྟེན་ཅིང་། །ངེས་ལེགས་ལམ་ཀུན་བསོད་ནམས་ཚོགས་ཀུན་ཏུ་སྤེལ་བའི། །འཁོར་ལོ་བཞི་ཡི་བདོག་པ་ཐོབ་པ་རུ་མཛོད་ཅིག །ཞི་བསིལ་བླ་ན་མེད་པའི་ཡོན་ཏན་གྱིས་ཕྱུག་ཅིང་། །སྲིད་ལས་རྣམ་གྲོལ་གཞན་དོན་ལྷུན་གྲུབ་ཀྱི་མཛད་པ། །མངོན་དུ་བརྙེས་པའི་འཕགས་པ་རྣམ་གསུམ་གྱི་གོ་འཕང་། །ཚད་མེད་འབྲས་བུ་ལྡན་པས་ཉེ་བ་རུ་བླང་མཛོད། །ཁྱད་པར་སྐྱབས་གསུམ་ཟོལ་མེད་དད་པ་ཡིས་བསྟེན་ཏེ། །སྨོན་འཇུག་སེམས་གཉིས་འབྲལ་མེད་ཐེག་ཆེན་གྱི་སྐྱེས་བུ། །སྡིག་ལྟུང་ཞི་བྱེད་སྟོབས་བཞིའི་གོ་ཆ་དང་བཅས་ཏེ། །ཚོགས་གཉིས་སྤེལ་ཕྱིར་བསོད་ནམས་བསགས་པ་ལ་འབད་མཛོད། །དབང་བཞི་ཡོངས་རྫོགས་འཁོར་ལོའི་མགོན་པོ་མཆོག་དེ་ཉིད། །ཟབ་མོའི་རྒྱུད་ལས་རྒྱལ་བ་ཀུན་དངོས་སུ་གསུངས་ཕྱིར། །རྟག་ཏུ་བསྒོམ་ནས་གསོལ་གདབ་ལམ་དབང་དང་འབྲེལ་བར། །ཁྱེད་ཤེས་དད་པས་བསྐྱེད་པ་མདོ་སྔགས་ཀྱི་དགོངས་བཅུད། །དེ་ལྟར་སྔོན་འགྲོའི་ཆོས་ཀྱི་བློ་སྦྱོང་ལ་ཞུགས་ཏེ། །ཁྱད་པར་དབྱིབས་ཀྱི་རྗེས་འགྲོ་སྣང་སྟོང་གི་བསྐྱེད་རིམ། །རང་བཞིན་སྟོང་པའི་ལམ་འགྲོ་རྫོགས་རིམ་གྱི་ལམ་དང་། །ཟུང་འཇུག་འོད་གསལ་ངང་ནས་རྫོགས་ཆེན་གྱི་གསང་བ། །དམ་ཚིག་གྲོགས་བཅས་འབྲལ་མེད་འབད་པ་རུ་མཛོད་ཅིག །གདན་གསུམ་དབྱེར་མེད་རྡོ་རྗེ་ཕུང་པོ་ཡི་གྲོང་ཁྱེར། །ཉི་ཁྲི་ཆིག་སྟོང་སྲོག་རྩོལ་སྐྱེ་མེད་ཀྱི་བཟླས་པ། །བརྒྱད་ཁྲི་བཞི་སྟོང་རྟོག་ཚོགས་གཉུག་མ་རུ་རོལ་པའི། །དཀྱིལ་འཁོར་གསུམ་ལྡན་ཟབ་མོའི་གསང་ལམ་གྱི་དགོངས་བཅུད། །སྦྱོར་བ་བྱང་ཆུབ་སེམས་ཀྱི་ཀུན་སློང་གིས་བསྐྱེད་དེ། །དངོས་གཞི་འཁོར་གསུམ་མི་དམིགས་འཛིན་བྲལ་གྱི་ལམ་མཆོག །དེ་ལྟར་ཐོས་བསམ་སྒོམ་པའི་རྗེས་འགྲོ་ཡི་སྤྱོད་ཚུལ། །བསླབ་གསུམ་དོན་དང་ལྡན་པའི་སྐལ་བཟང་ལ་བསྙེན་ནས། །རང་གཞན་ཐར་བར་སྦྱོར་བའི་ཕྲིན་ལས་ཀྱིས་འབྱོར་པས། །ལེགས་གསུངས་དམ་ཆོས་རྒྱ་མཚོའི་སྙིང་པོ་རང་ཡིན་ནོ། །དེ་སྐད་ལམ་ཀུན་བསྡུས་པའི་རྡོ་རྗེ་ཡི་ཐོལ་གླུ། །རང་གཞན་དོན་དུ་སྨྲས་པའི་ཚོགས་གཉིས་ཀྱི་འབྲས་བུ། །དེང་ནས་འགྲོ་ཀུན་བླ་མེད་བྱང་ཆུབ་ཀྱི་ཤུལ་ལས། །རྒྱལ་ཀུན་གཤེགས་པའི་ས་དེར་བགྲོད་པ་རུ་ཤོག་ཅིག །ཅེས་པའང་ཟབ་མོའི་དོན་གྱི་གསལ་འདེབས་སུ་གང་ཤར་ལྷུག་པར་བརྗོད་པའོ།། །། ༈

[edit]

rdo rje'i thol glu lam gyi rim pa nye bar bsdus pa/__ rdo rje'i thol glu lam gyi rim pa nye bar bsdus pa zhes bya ba/__a ho/__rig stong spros bral 'od gsal gnyug ma yi sbubs nas/__/dbyings rig dbyer med sku gsum bde chen gyi DA ki__/nga yi snying dbus gzhon nu bum sku ru bzhugs dang /__/gtad med gsang sngags lam gyi thol glu ru bsgyur btang /__/dal ba brgyad kyi 'khri shing 'byor bcu yi me tog__/'phral rkyen ris chad mi khoms tsha gdung gis spangs pas/__/skyon bral mi lus rin chen rnyed dka' yi bsil yab/__/gtan bde'i ngal bso bsten pa'i skyo grogs su phebs so/__/de yang phyi snod mi rtag rnam bzhi la spyod cing /__/nang bcud mchog dman bar ma 'chi bdag gis bzung phyir/__/snying po med pa'i ngang tshul mtha' bzhi yis bsdus pas/__/skad cig dal med thar pa'i go 'phang la sbyor 'tshal/__/dkar nag las kyi sa bon so so ru btab pas/__/bde sdug 'bras bu mi bslu tha dad du smin nas/__/gzhi dang bsam sbyor mthar thug yan lag kun rdzogs phyir/__/thar pa'i dpag bsam dbang po bskyed pa ru mdzod cig__/sna tshogs las kyis sna tshogs snang tshul la spyod pa'i/__/'gro drug sdug bsngal gsum gyis mnar spyod de mthong nas/__/bden pa bzhi yi shing rta dam pa la zhon te/__/nges legs thar pa'i gling du phyin pa ru mdzod cig__/gang zhig bsten na 'phral yun phan bde kun sbyin pa'i/__/dge ba'i grogs dang bshes gnyen 'bral med du bsten cing /__/nges legs lam kun bsod nams tshogs kun tu spel ba'i/__/'khor lo bzhi yi bdog pa thob pa ru mdzod cig__/zhi bsil bla na med pa'i yon tan gyis phyug cing /__/srid las rnam grol gzhan don lhun grub kyi mdzad pa/__/mngon du brnyes pa'i 'phags pa rnam gsum gyi go 'phang /__/tshad med 'bras bu ldan pas nye ba ru blang mdzod/__/khyad par skyabs gsum zol med dad pa yis bsten te/__/smon 'jug sems gnyis 'bral med theg chen gyi skyes bu/__/sdig ltung zhi byed stobs bzhi'i go cha dang bcas te/__/tshogs gnyis spel phyir bsod nams bsags pa la 'bad mdzod/__/dbang bzhi yongs rdzogs 'khor lo'i mgon po mchog de nyid/__/zab mo'i rgyud las rgyal ba kun dngos su gsungs phyir/__/rtag tu bsgom nas gsol gdab lam dbang dang 'brel bar/__/khyed shes dad pas bskyed pa mdo sngags kyi dgongs bcud/__/de ltar sngon 'gro'i chos kyi blo sbyong la zhugs te/__/khyad par dbyibs kyi rjes 'gro snang stong gi bskyed rim/__/rang bzhin stong pa'i lam 'gro rdzogs rim gyi lam dang /__/zung 'jug 'od gsal ngang nas rdzogs chen gyi gsang ba/__/dam tshig grogs bcas 'bral med 'bad pa ru mdzod cig__/gdan gsum dbyer med rdo rje phung po yi grong khyer/__/nyi khri chig stong srog rtsol skye med kyi bzlas pa/__/brgyad khri bzhi stong rtog tshogs gnyug ma ru rol pa'i/__/dkyil 'khor gsum ldan zab mo'i gsang lam gyi dgongs bcud/__/sbyor ba byang chub sems kyi kun slong gis bskyed de/__/dngos gzhi 'khor gsum mi dmigs 'dzin bral gyi lam mchog__/de ltar thos bsam sgom pa'i rjes 'gro yi spyod tshul/__/bslab gsum don dang ldan pa'i skal bzang la bsnyen nas/__/rang gzhan thar bar sbyor ba'i phrin las kyis 'byor pas/__/legs gsungs dam chos rgya mtsho'i snying po rang yin no/__/de skad lam kun bsdus pa'i rdo rje yi thol glu/__/rang gzhan don du smras pa'i tshogs gnyis kyi 'bras bu/__/deng nas 'gro kun bla med byang chub kyi shul las/__/rgyal kun gshegs pa'i sa der bgrod pa ru shog cig__/ces pa'ang zab mo'i don gyi gsal 'debs su gang shar lhug par brjod pa'o//__//___!_