JKW-KABUM-22-ZA-012-010

Previous Text Back to Volume PageNext Text

འཆི་མེད་པདྨ་ཐོད་ཕྲེང་ལ་གསོལ་འདེབས་རྡོ་རྗེའི་ཐོལ་གླུ་ཕྱིན་དྲུག་མི་ཤིགས་སྒྲ་དབྱངས།

Wylie title	'chi med pad+ma thod phreng la gsol 'debs rdo rje'i thol glu phyin drug mi shigs sgra dbyangs
Location	mkhyen brtse'i bka' 'bum Volume 22, sde tshan 12, Text 10, Pages 374-376 (Folios 15b1 to 16b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. 'chi med pad+ma thod phreng la gsol 'debs rdo rje'i thol glu phyin drug mi shigs sgra dbyangs. In 'jam dbyangs mkhyen brtse'i dbang po'i bka' 'bum, Vol. 22: 374-376. Khams sde dge rdzong sar dgon: Rdzong sar blo gros phun tshogs, 2020.
Genre	Supplications - gsol 'debs  ·  Vajra Songs - rdo rje'i glu
Deity	pad+ma thod phreng rtsal
Colophon	།ཅེས་དུས་གསུམ་ཀུན་མཁྱེན་ཨོ་རྒྱན་ཆེན་པོའི་ངེས་དོན་གྱི་རྟོགས་པ་བརྗོད་པ་དང་མཐུན་པའི་རྡོ་རྗེའི་ཐོལ་གླུ་འདིའང་། འཇམ་དཔལ་དབྱངས་དངོས་ལྷ་བཙད་པོ་ཁྲི་སྲོང་ལྡེའུ་བཙན་གྱི་ཐུགས་བསྐྱེད་ལས་གྲུབ་པའི་འོག་མིན་དཔལ་གྱི་བསམ་ཡས་སུ་རིག་འཛིན་གྱི་བཙུན་པ་པདྨའི་མིང་གིས་གང་ཤར་གླུར་བླངས་པའི་འཆར་གཞིའོ།།
	ces dus gsum kun mkhyen o rgyan chen po'i nges don gyi rtogs pa brjod pa dang mthun pa'i rdo rje'i thol glu 'di'ang /__'jam dpal dbyangs dngos lha btsad po khri srong lde'u btsan gyi thugs bskyed las grub pa'i 'og min dpal gyi bsam yas su rig 'dzin gyi btsun pa pad+ma'i ming gis gang shar glur blangs pa'i 'char gzhi'o/

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

འཆི་མེད་པདྨ་ཐོད་ཕྲེང་ལ་གསོལ་བ་འདེབས་པའི་རྡོ་རྗེའི་ཐོལ་གླུ་ཕྱིན་དྲུག་མི་ཤིགས་སྒྲ་དབྱངས་ཅེས་བྱ་བ། ཨེ་མ་ཧོ། ཨེ་དབྱིངས་ཤེས་རབ་འབར་བའི་ཙཎྜ་ལཱིའི་རེག་བྱས། །ཝྃ་ཡིག་ཐབས་མཆོག་དབང་པོའི་སྣང་ཆ་ལ་འཁྱུད་པས། །འབར་འཛག་དགའ་བཞིའི་ཆུ་རྒྱུན་དབུ་མ་རུ་འཇོ་བའི། །བདེ་སྟོང་སྦྱིན་པའི་ཕ་རོལ་ཕྱིན་པ་ལ་འདུད་དོ། །ལུགས་འབྱུང་འཕོ་བ་བཅུ་གཉིས་རྟེན་འབྲེལ་གྱི་ཕོ་ཉ། །ལུགས་ལྡོག་ཛ་ལནྡྷཱ་རའི་དགའ་ཚལ་དུ་བཅིངས་པས། །ཆར་ཡར་འཕོ་འཛགས་སྦར་བའི་ལང་ཚོ་ཡིས་སྒེག་པའི། །ཟག་བྲལ་ཚུལ་ཁྲིམས་ཕ་རོལ་ཕྱིན་པ་ལ་འདུད་དོ། །སེམས་དང་སེམས་བྱུང་རྒྱུ་བ་ཁམས་གསུམ་གྱི་རྟོག་པ། །གཟོད་ནས་རྣམ་པར་དག་པའི་གཤིས་ལུགས་སུ་བསྡམས་པས། །ནང་གསལ་ཤིན་ཏུ་ཕྲ་བའི་ཡེ་ཤེས་ལ་རོལ་པའི། །འོད་གསལ་བཟོད་པའི་ཕ་རོལ་ཕྱིན་པ་ལ་འདུད་དོ། །སྣ་ཚོགས་ཀུན་ཏུ་འགྲོ་བའི་ཕྲ་རྒྱས་ཀྱི་ཚོགས་ཀུན། །རླུང་སེམས་དྷཱུ་ཏཱིར་འཆིང་བའི་ཐབས་མཁས་ཀྱིས་སྤངས་པས། །སྣང་སྟོང་སྒྱུ་འཕྲུལ་དྲྭ་བའི་ཟློས་གར་ལ་ཆགས་པའི། །ཟུང་འཇུག་བརྩོན་འགྲུས་ཕ་རོལ་ཕྱིན་པ་ལ་འདུད་དོ། །འཁོར་འདས་གཉིས་སུ་འཛིན་པའི་འཁྲུལ་ཆོས་ཀྱི་ཡོ་ལང་། །གཉིས་མེད་བརྟུལ་ཞུགས་གྲུབ་པའི་ཞགས་པ་ཡིས་བཟུང་བས། །བདེ་སྟོང་ཕྱག་རྒྱ་ཆེན་པོའི་ངལ་གསོ་ལ་སྦྱར་བའི། །ཞི་གནས་བསམ་གཏན་ཕ་རོལ་ཕྱིན་པ་ལ་འདུད་དོ། །ཀ་དག་གཞི་དབྱིངས་རིག་པ་སྒྲིབ་བྲལ་གྱི་རང་རྩལ། །ལྷུན་གྲུབ་སྐུ་དང་ཡེ་ཤེས་ཕྲིན་ལས་སུ་ཤར་བས། །འཕོ་ཆེན་འཇའ་ལུས་རྡོ་རྗེའི་དགའ་བ་ཡིས་བསྙེམས་པའི། །ལྷག་མཐོང་ཤེས་རབ་ཕ་རོལ་ཕྱིན་པ་ལ་འདུད་དོ། །ཀོ་ཊ་ཁྱཱ་སོགས་སྲོག་རྩོལ་འཇུག་ལྡངས་ཀྱི་རྒྱུ་བ། །ཐབས་ཤེས་ཁ་སྦྱོར་ལམ་གྱིས་གཞོམ་མེད་དུ་དག་པས། །འཆི་མེད་གཉུག་མའི་མཚན་དཔེ་ཡོངས་གྲུབ་ཏུ་ཤར་བའི། །མཐོང་ལམ་ཚེ་ལ་དབང་བའི་རིག་འཛིན་ལ་འདུད་དོ། །དཀར་དམར་ཐིག་ལེ་ལྡོག་ཁྱབ་བསྲེ་བ་ཡི་སྦྱོར་བས། །ཟག་བཅས་བརྟན་པ་འཕྲོག་པའི་བདེ་ཆེན་གྱི་ལང་ཚོས། །སྟོང་ཉིད་ཤེས་རབ་མཛེས་མའི་བཞིན་རས་ལ་འཁྱུད་པའི། །སྒོམ་ལམ་ཕྱག་རྒྱ་ཆེན་པོའི་རིག་འཛིན་ལ་འདུད་དོ། །གཅིག་པུ་མ་ཡིན་ཀུན་ཁྱབ་ལྷན་སྐྱེས་ཀྱི་རྣམ་འགྱུར། །དུ་མར་མི་གནས་བློ་བྲལ་རང་བྱུང་གི་ཡེ་ཤེས། །ཟུང་འཇུག་རྣམ་ཀུན་མཆོག་ལྡན་ཕ་མཐའ་རུ་གཤེགས་པའི། །མཐར་ལམ་ལྷུན་གྱིས་གྲུབ་པའི་རིག་འཛིན་ལ་འདུད་དོ། །དེ་ལྟར་སྐྱབས་ཀུན་འདུས་ཞལ་མཚོ་སྐྱེས་ཀྱི་རྡོ་རྗེར། །སྙིང་ནས་གུས་པའི་གསོལ་འདེབས་ཐོལ་གླུ་རུ་བླངས་པས། །འགྲོ་ཀུན་གདོད་མའི་བཙན་ས་ཟིན་པ་རུ་ཤོག་ཅིག །ཅེས་དུས་གསུམ་ཀུན་མཁྱེན་ཨོ་རྒྱན་ཆེན་པོའི་ངེས་དོན་གྱི་རྟོགས་པ་བརྗོད་པ་དང་མཐུན་པའི་རྡོ་རྗེའི་ཐོལ་གླུ་འདིའང་། འཇམ་དཔལ་དབྱངས་དངོས་ལྷ་བཙད་པོ་ཁྲི་སྲོང་ལྡེའུ་བཙན་གྱི་ཐུགས་བསྐྱེད་ལས་གྲུབ་པའི་འོག་མིན་དཔལ་གྱི་བསམ་ཡས་སུ་རིག་འཛིན་གྱི་བཙུན་པ་པདྨའི་མིང་གིས་གང་ཤར་གླུར་བླངས་པའི་འཆར་གཞིའོ།། །། ༈

[edit]

'chi med pad+ma thod phreng la gsol 'debs rdo rje'i thol glu phyin drug mi shigs sgra dbyangs/__ 'chi med pad+ma thod phreng la gsol ba 'debs pa'i rdo rje'i thol glu phyin drug mi shigs sgra dbyangs ces bya ba/__e ma ho/__e dbyings shes rab 'bar ba'i tsaN+Da lI'i reg byas/__/wa~M yig thabs mchog dbang po'i snang cha la 'khyud pas/__/'bar 'dzag dga' bzhi'i chu rgyun dbu ma ru 'jo ba'i/__/bde stong sbyin pa'i pha rol phyin pa la 'dud do/__/lugs 'byung 'pho ba bcu gnyis rten 'brel gyi pho nya/__/lugs ldog dza lan+d+hA ra'i dga' tshal du bcings pas/__/char yar 'pho 'dzags sbar ba'i lang tsho yis sgeg pa'i/__/zag bral tshul khrims pha rol phyin pa la 'dud do/__/sems dang sems byung rgyu ba khams gsum gyi rtog pa/__/gzod nas rnam par dag pa'i gshis lugs su bsdams pas/__/nang gsal shin tu phra ba'i ye shes la rol pa'i/__/'od gsal bzod pa'i pha rol phyin pa la 'dud do/__/sna tshogs kun tu 'gro ba'i phra rgyas kyi tshogs kun/__/rlung sems d+hU tIr 'ching ba'i thabs mkhas kyis spangs pas/__/snang stong sgyu 'phrul drwa ba'i zlos gar la chags pa'i/__/zung 'jug brtson 'grus pha rol phyin pa la 'dud do/__/'khor 'das gnyis su 'dzin pa'i 'khrul chos kyi yo lang /__/gnyis med brtul zhugs grub pa'i zhags pa yis bzung bas/__/bde stong phyag rgya chen po'i ngal gso la sbyar ba'i/__/zhi gnas bsam gtan pha rol phyin pa la 'dud do/__/ka dag gzhi dbyings rig pa sgrib bral gyi rang rtsal/__/lhun grub sku dang ye shes phrin las su shar bas/__/'pho chen 'ja' lus rdo rje'i dga' ba yis bsnyems pa'i/__/lhag mthong shes rab pha rol phyin pa la 'dud do/__/ko Ta khyA sogs srog rtsol 'jug ldangs kyi rgyu ba/__/thabs shes kha sbyor lam gyis gzhom med du dag pas/__/'chi med gnyug ma'i mtshan dpe yongs grub tu shar ba'i/__/mthong lam tshe la dbang ba'i rig 'dzin la 'dud do/__/dkar dmar thig le ldog khyab bsre ba yi sbyor bas/__/zag bcas brtan pa 'phrog pa'i bde chen gyi lang tshos/__/stong nyid shes rab mdzes ma'i bzhin ras la 'khyud pa'i/__/sgom lam phyag rgya chen po'i rig 'dzin la 'dud do/__/gcig pu ma yin kun khyab lhan skyes kyi rnam 'gyur/__/du mar mi gnas blo bral rang byung gi ye shes/__/zung 'jug rnam kun mchog ldan pha mtha' ru gshegs pa'i/__/mthar lam lhun gyis grub pa'i rig 'dzin la 'dud do/__/de ltar skyabs kun 'dus zhal mtsho skyes kyi rdo rjer/__/snying nas gus pa'i gsol 'debs thol glu ru blangs pas/__/'gro kun gdod ma'i btsan sa zin pa ru shog cig__/ces dus gsum kun mkhyen o rgyan chen po'i nges don gyi rtogs pa brjod pa dang mthun pa'i rdo rje'i thol glu 'di'ang /__'jam dpal dbyangs dngos lha btsad po khri srong lde'u btsan gyi thugs bskyed las grub pa'i 'og min dpal gyi bsam yas su rig 'dzin gyi btsun pa pad+ma'i ming gis gang shar glur blangs pa'i 'char gzhi'o//___//__!