JKW-KABUM-17-TSA-001-006

Previous Text Back to Volume PageNext Text

གསུང་རྟེན་ཡི་གེའི་རྣམ་བཞག།

Wylie title	gsung rten yi ge'i rnam bzhag
Location	mkhyen brtse'i bka' 'bum Volume 17, sde tshan 1, Text 6, Pages 79-80 (Folios 40a1 to 40b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. gsung rten yi ge'i rnam bzhag. In 'jam dbyangs mkhyen brtse'i dbang po'i bka' 'bum, Vol. 17: 79-80. Khams sde dge rdzong sar dgon: Rdzong sar blo gros phun tshogs, 2020.
Genre	Detailed Classification - rnam bzhag

Tibetan Text

Wylie

[edit]

གཉིས་པ་གསུང་རྟེན་ལའང་གསུམ། ངོ་བོ་ནི། བསླབ་པ་གསུམ་གྱི་གཞི་འཛིན་པར་བྱེད་ཅིང་རིག་བྱེད་ལ་སོགས་པ་བརྗོད་པའི་རྒྱུར་གྱུར་པ་ཡི་གེ་འདུས་པ་ལས་མིང་དང་། དེ་འདུས་པ་ལས་ཚིག་དང་། དེ་ལས་ཚིག་སུ་བཅད་པ་ནས་ལེའུ་དང་གླེགས་བམ་གྱི་བར་དུ་ཤར་བའི་རིག་གནས། ངེས་ཚིག་ནི། གང་བྲི་བར་བྱ་བ་ཡི་གེའི་དབང་དུ་བྱས་ན། བྱཉྫ་ན་དང་། ཨཀྵ་ར་དང་། བརྞྞ་ཞེས་པའི་སྒྲ་ལས། གསལ་བ་དང་། མི་འགྱུར་བ་དང་། བྱེད་པའི་ཕྱིར་ན་ཡི་གེ་ཞེས་བྱ། དེས་གྲུབ་པའི་གླེགས་བམ་ནི། པུསྟ་ཀཿཞེས་པའི་སྒྲ་ལས་དྲངས་ན་མིང་ཚིག་ཡི་གེའི་བདག་ཉིད་མང་པོ་ལྷན་ཅིག་ཏུ་འདུས་པའམ་ཚོགས་པའི་དོན་ལས་བཏགས་སོ། །དབྱེ་ན། རྒྱ་གར་འཕགས་པའི་ཡུལ་དུ་ཡིག་རིགས་དྲུག་ཅུ་རྩ་བཞི་ལ་སོགས་པ་འབྱུང་མོད་ཀྱང་། གངས་ཅན་གྱི་ལྗོངས་འདིར་དེ་རྣམས་ཀྱི་ནང་ཚན་ལས་ཚངས་པའི་ཡི་གེ་སྟེ་ལཉྩ་ན་དང་། དྷ་རི་ཀ་སྟེ་འཛིན་མའི་ཡི་གེ་དང་། ན་ག་ར་སྟེ་གྲོང་ཁྱེར་ཕལ་བའི་ཡི་གེ་དང་། ཀླུའི་ཡི་གེ་ཝརྟུ་ལ་སོགས་པ་ནང་གསེས་དང་བཅས་པ་ཁ་ཤས་ཞིག་ལས་ཡོངས་སུ་རྫོགས་པར་མ་དར་ཅིང་། བོད་ལྗོངས་རང་དུ་འཇམ་དཔལ་དབྱངས་དངོས་ཐུ་མི་སཾ་བྷོ་ཊས་སྲོལ་བཏོད་པ་ནས་རིམ་པར་དར་བའི་རྫབ་ཆེན་རྫབ་ཆུང་། འབྲུ་ཆེན་འབྲུ་ཆུང་། འབྲུ་ཆེན་ལ་ལི་ལུགས། ལྡན་ལུགས། ཤར་མ་དང་དཀྱུས་ཡིག་སོགས་ཏེ། དེ་ལའང་གདོན་ས་བཅུ། གཅེས་སོ་བརྒྱད། མ་ཆོས་ཉེར་གཅིག །བུ་ཆོས་བཅུ་དྲུག །སྤྱི་ཆོས་གསུམ་ལ་སོགས་པ་ཚང་ཞིང་ཐིག་གི་སྒོ་ནས་གཏན་ལ་ཕབ་སྟེ། རྒྱལ་བའི་ཞལ་ནས་གསུངས་པའི་བཀའ་ཡི་རིགས་ཐམས་ཅད་རྫབ་ཆེན་དང་རྫབ་ཆུང་གིས་བྲི་ཞིང་གླེགས་བམ་གྱི་ཚད་ཀྱང་སྒོ་ཚད་དང་། རྒྱ་གར་གྱི་བསྟན་བཅོས་རྣམས་འབྲུ་ཆེན་དང་མདའ་ཚད། བོད་གཞུང་རྣམས་འབྲུ་ཆུང་དང་ཁྲུ་ཚད་དུ་བྱ་བར་སྔོན་ཆོས་རྒྱལ་རྣམས་ཀྱིས་བཀས་བཅད་པར་གྲགས་པ་ལྟར་དང་། བྲི་བའི་རྫས་ཀྱང་རབ་རིན་པོ་ཆེ་གསེར། འབྲིང་མཚལ་སོགས་ཚོན་བཟང་པོ། ཐ་མ་སྣག་ཚ་ལ་སོགས་པས་ཀྱང་རུང་སྟེ་གཅིག་ཏུ་ཡིད་གཞུངས་ཞིང་ལག་གི་འདུ་བྱེད་མ་ཉམས་པས་མཛེས་ཤིང་ཚུལ་དང་མཐུན་པར་བྲི་བར་བྱ་བ་ཉིད་དོ། །

[edit]

gsung rten yi ge'i rnam bzhag/ gnyis pa gsung rten la'ang gsum/__ngo bo ni/__bslab pa gsum gyi gzhi 'dzin par byed cing rig byed la sogs pa brjod pa'i rgyur gyur pa yi ge 'dus pa las ming dang /__de 'dus pa las tshig dang /__de las tshig su bcad pa nas le'u dang glegs bam gyi bar du shar ba'i rig gnas/__nges tshig ni/__gang bri bar bya ba yi ge'i dbang du byas na/__byany+dza na dang /__ak+Sha ra dang /__bar+N+Na zhes pa'i sgra las/__gsal ba dang /__mi 'gyur ba dang /__byed pa'i phyir na yi ge zhes bya/__des grub pa'i glegs bam ni/__pusta kaHzhes pa'i sgra las drangs na ming tshig yi ge'i bdag nyid mang po lhan cig tu 'dus pa'am tshogs pa'i don las btags so/__/dbye na/__rgya gar 'phags pa'i yul du yig rigs drug cu rtsa bzhi la sogs pa 'byung mod kyang /__gangs can gyi ljongs 'dir de rnams kyi nang tshan las tshangs pa'i yi ge ste lany+tsa na dang /__d+ha ri ka ste 'dzin ma'i yi ge dang /__na ga ra ste grong khyer phal ba'i yi ge dang /__klu'i yi ge wartu la sogs pa nang gses dang bcas pa kha shas zhig las yongs su rdzogs par ma dar cing /__bod ljongs rang du 'jam dpal dbyangs dngos thu mi saM b+ho Tas srol btod pa nas rim par dar ba'i rdzab chen rdzab chung /__'bru chen 'bru chung /__'bru chen la li lugs/__ldan lugs/__shar ma dang dkyus yig sogs te/__de la'ang gdon sa bcu/__gces so brgyad/__ma chos nyer gcig__/bu chos bcu drug__/spyi chos gsum la sogs pa tshang zhing thig gi sgo nas gtan la phab ste/__rgyal ba'i zhal nas gsungs pa'i bka' yi rigs thams cad rdzab chen dang rdzab chung gis bri zhing glegs bam gyi tshad kyang sgo tshad dang /_rgya gar gyi bstan bcos rnams 'bru chen dang mda' tshad/__bod gzhung rnams 'bru chung dang khru tshad du bya bar sngon chos rgyal rnams kyis bkas bcad par grags pa ltar dang /__bri ba'i rdzas kyang rab rin po che gser/__'bring mtshal sogs tshon bzang po/_tha ma snag tsha la sogs pas kyang rung ste gcig tu yid gzhungs zhing lag gi 'du byed ma nyams pas mdzes shing tshul dang mthun par bri bar bya ba nyid do/__/