བཅུ་ཕྲག་རིག་པའི་གནས་ཀྱི་སྤྱི་དོན་ལས་འཕྲོས་པའི་འབེལ་བའི་གཏམ་ཉུང་ངུ་ལས་ལུས་བཟོ་སྐུ་རྟེན་ལྷ་སྐུའི་ཐིག་རྩ།

🚧 This website is under continued development. We appreciate your patience!

Previous Text Back to Volume PageNext Text

Wylie title	bcu phrag rig pa'i gnas kyi spyi don las 'phros pa'i 'bel ba'i gtam nyung ngu las lus bzo sku rten lha sku'i thig rtsa
Location	mkhyen brtse'i bka' 'bum Volume 17, sde tshan 1, Text 5, Pages 76-79 (Folios 38b4 to 40a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bcu phrag rig pa'i gnas kyi spyi don las 'phros pa'i 'bel ba'i gtam nyung ngu las lus bzo sku rten lha sku'i thig rtsa. In 'jam dbyangs mkhyen brtse'i dbang po'i bka' 'bum, Vol. 17: 76-79. Khams sde dge rdzong sar dgon: Rdzong sar blo gros phun tshogs, 2020.
Genre	Overviews - spyi don

1 Texts in this Section (sde tshan or chos tshan)

5 76-79	བཅུ་ཕྲག་རིག་པའི་གནས་ཀྱི་སྤྱི་དོན་ལས་འཕྲོས་པའི་འབེལ་བའི་གཏམ་ཉུང་ངུ་ལས་ལུས་བཟོ་སྐུ་རྟེན་ལྷ་སྐུའི་ཐིག་རྩ། bcu phrag rig pa'i gnas kyi spyi don las 'phros pa'i 'bel ba'i gtam nyung ngu las lus bzo sku rten lha sku'i thig rtsa Overviews - spyi don	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ན་མཿསརྦ་ཛྙཱ་ཡ། ཨེ་ཝཾ་གཉིས་མེད་བདེ་བ་ཆེས། །ཤེས་དང་ཤེས་བྱ་ཀུན་སྡོམ་པ། །ཐམས་ཅད་མཁྱེན་པའི་ཡེ་ཤེས་མཚོ། །ཁྱབ་བདག་འཇམ་མགོན་བླ་མར་འདུད། །གང་གི་ཐུགས་རྗེའི་ཉི་གཞོན་གྱིས། །བློ་གྲོས་པད་རྫིངས་གསོས་པ་ལས། །བྱུང་བའི་ལེགས་བཤད་སྦྲང་རྩི་ཡིས། །དོན་མཐུན་བུང་བའི་དགའ་སྟོན་བྱ། །འདི་ལྟར་གནས་སྐབས་ཐར་པ་དང་མཐར་ཐུག་རྣམ་མཁྱེན་གྱི་གོ་འཕང་ཉེ་བར་སྒྲུབ་པའི་ལམ་གྱི་གཙོ་བོ། བདག་ལྟ་དང་མཚུངས་པར་ལྡན་པའི་ཀུན་ཉོན་དྲུངས་ནས་འབྱིན་པ་སོ་སོར་རྟོག་པའི་ཤེས་རབ་སྐྱེད་པར་བྱེད་པའི་ཕྱི་མོ། །གནས་སྐབས་སུའང་ཕྱོགས་དང་ཕྱོགས་བྲལ་གྱི་དཔྱོད་ལྡན་གཟུ་བོར་གནས་པ་དག་གིས་ལེགས་སོའི་ཤིས་བརྗོད་ཀྱི་དབྱངས་སྙན་པོས་མངའ་གསོལ་བའི་མཁས་པའི་རྒྱལ་ཐབས་ལ་འཛེགས་པར་འདོད་པ་དག་གིས་དོན་དུ་གཉེར་བྱ་གཅིག་པུར་གྱུར་པ་བཅུ་ཕྲག་རིག་པའི་གནས་ཀྱི་སྤྱི་དོན་ལས་འཕྲོས་པའི་འབེལ་བའི་གཏམ་ཉུང་ངུ་ཞིག་སྤྲོ་ན། དང་པོ་དོན་གཉེར་རིས་སུ་མ་ཆད་པ་རྗེས་སུ་འཛིན་པ་བཟོ་རིག་པའི་ངོ་བོ་ནི། སྒོ་གསུམ་གྱི་བྱ་བས་བསྐྲུན་པའི་རིག་གནས། དབྱེ་ན། ལུས། ངག་ཡིད་ཀྱིས་བསྡུས་པ་གསུམ་ལས། དང་པོ་ལའང་མཆོག་དམན་གཉིས། མཆོག་གམ་གཙོ་བོ་ནི། དཀོན་མཆོག་གསུམ་གྱི་སྐུ་གསུང་ཐུགས་ཀྱི་རྟེན་བཞེངས་པ་དང་། རྡོ་རྗེ་ཐེག་པའི་རྒྱུད་ཀྱི་རྡོ་རྗེའི་གནས་ཆེན་པོ་རྣམས་ལས་བསྟན་པའི་དཀྱིལ་འཁོར་བྲི་ཐིག་ལས་རབ་འབྱམས་མཆོད་པའི་གར་སོགས་ལུས་ཀྱི་རྣམ་འགྱུར་ལས་བྱུང་བ་རྣམས་ཏེ། དེ་ཡང་སྐུ་རྟེན་ལའང་གཞལ་བྱ། འཇལ་བྱེད། ཇི་ལྟར་གཞལ་བའི་ཚུལ་གྱིས་གྲུབ་པའི་དོན་ཏེ་གསུམ་གྱི། དང་པོ་ནི། རྫོགས་པའི་སངས་རྒྱས་སྲས་དང་སློབ་མར་བཅས་པ་ལ་སོགས་པའི་སྐུ་ཡི་རྣམ་འགྱུར་བྲིས་འབུར་ལུགས་སོགས་ཀྱིས་རྩོམ་པ་ནི་གང་ཚད་ཀྱིས་གཏན་ལ་དབབ་པར་བྱེ་བའི་ཡུལ། གཉིས་པ་ནི། འདིར་སོར་མོ་བརྒྱད་ཆ་ལ་ནས་དང་། ནས་གཉིས་ལ་རྐང་པ། རྐང་པ་བཞི་ལ་སོར་གང་ངམ་ཆ་ཕྲན་དེ་ཕྱེད་བཅས་བཅུ་གཉིས་སམ་བཅུ་གསུམ་སྐབས་སུ་གང་བབས་ཀྱིས་གདོང་ངམ། ཞལ་ལམ། ཐལ་མོའམ། མཐོ་ཞེས་བྱ་སྟེ། གང་གིས་ཚད་གཏན་ལ་འབེབས་པར་བྱེད་པའི་བདག་པོའི་རྐྱེན་ནོ། །གསུམ་པ་ནི། ཐིག་ཆེན་དང་པོ་སྤང་རྟོགས་མཐར་ཕྱིན་པ་རྫོགས་པའི་སངས་རྒྱས་རྣམས་སོར་མོ་བརྒྱ་ཉེར་ལྔ་པ་དང་། ཐིག་ཆེན་གཉིས་པ་ཡིད་ཙམ་ཁྲོ་བའམ། དྲང་སྲོང་ལྟར་ཁྲོས་པའི་རྒྱུད་སྡེའི་དཀྱིལ་འཁོར་གྱི་གཙོ་བོ་ཕལ་མོ་ཆེ་སོར་མོ་བརྒྱ་ཉེར་ལྔར་བྱ་བའི་ཚུལ་གྱིས་འཆད་པ་དང་། ཐིག་ཆེན་གསུམ་པ་དེ་ལས་གཞན་པ་བྱང་ཆུབ་སེམས་དཔའ་སོགས་ཞི་བ་ཐུན་མོང་པ་འཁོར་ལོས་སྒྱུར་བའི་ཆ་བྱད་ཅན་རྣམས་སོར་མོ་བརྒྱ་དང་ཉི་ཤུ་པ། ཐིག་ཆེན་བཞི་པ་རྒྱལ་ཡུམ་ཡིད་འཕྲོག་མའི་གཟུགས་ཅན་རྣམས་སོར་མོ་བརྒྱ་བརྒྱད་པ་དང་། ཐིག་ཆེན་ལྔ་པར་སྦོམ་ཐུང་གཏུམ་དྲག་ཅན་རྣམས་སོར་མོ་གོ་དྲུག །ཐིག་ཆེན་དྲུག་པ་མིའུ་ཐུང་ལྟར་ཁྲོས་པ་རྣམས་སོར་མོ་དོན་གཉིས། ཐིག་ཆེན་བདུན་པ་ཉན་ཐོས་དང་རང་རྒྱལ་མི་ལ་སོགས་པ་རྣམས་སོར་དགུ་བཅུ་རྩ་དྲུག་དམིགས་བསལ་དང་བཅས་པ། ཐིག་ཆེན་བརྒྱད་པ་སྐུའི་རྣམ་འགྱུར་དང་། བཞུགས་སྟངས་དང་། རྒྱན་ལ་སོགས་པའི་ཚད་དེ། དེ་ལྟར་རྣམ་པ་བརྒྱད་ཀྱི་སྒོ་ནས་གཏན་ལ་ཕབ་ནས་ཞི་བ་དང་། སྒེག་པ་དང་། གཏུམ་པ་ལ་སོགས་པའི་ཉམས་ཀྱིས་སྐབས་སུ་བབ་པར་མཛེས་ཤིང་ཡིད་འཕྲོག་པར་བྱ་བ་ཉིད་དོ། །

[edit]

bcu phrag rig pa'i gnas kyi spyi don las 'phros pa'i 'bel ba'i gtam nyung ngu las lus bzo sku rten lha sku'i thig rtsa/ na maHsarba dz+nyA ya/__e waM gnyis med bde ba ches/__/shes dang shes bya kun sdom pa/_/thams cad mkhyen pa'i ye shes mtsho/__/khyab bdag 'jam mgon bla mar 'dud/__/gang gi thugs rje'i nyi gzhon gyis/__/blo gros pad rdzings gsos pa las/__/byung ba'i legs bshad sbrang rtsi yis/__/don mthun bung ba'i dga' ston bya/__/'di ltar gnas skabs thar pa dang mthar thug rnam mkhyen gyi go 'phang nye bar sgrub pa'i lam gyi gtso bo/__bdag lta dang mtshungs par ldan pa'i kun nyon drungs nas 'byin pa so sor rtog pa'i shes rab skyed par byed pa'i phyi mo/__/gnas skabs su'ang phyogs dang phyogs bral gyi dpyod ldan gzu bor gnas pa dag gis legs so'i shis brjod kyi dbyangs snyan pos mnga' gsol ba'i mkhas pa'i rgyal thabs la 'dzegs par 'dod pa dag gis don du gnyer bya gcig pur gyur pa bcu phrag rig pa'i gnas kyi spyi don las 'phros pa'i 'bel ba'i gtam nyung ngu zhig spro na/__dang po don gnyer ris su ma chad pa rjes su 'dzin pa bzo rig pa'i ngo bo ni/__sgo gsum gyi bya bas bskrun pa'i rig gnas/__dbye na/__lus/__ngag yid kyis bsdus pa gsum las/__dang po la'ang mchog dman gnyis/__mchog gam gtso bo ni/__dkon mchog gsum gyi sku gsung thugs kyi rten bzhengs pa dang /__rdo rje theg pa'i rgyud kyi rdo rje'i gnas chen po rnams las bstan pa'i dkyil 'khor bri thig las rab 'byams mchod pa'i gar sogs lus kyi rnam 'gyur las byung ba rnams te/__de yang sku rten la'ang gzhal bya/__'jal byed/__ji ltar gzhal ba'i tshul gyis grub pa'i don te gsum gyi/__dang po ni/__rdzogs pa'i sangs rgyas sras dang slob mar bcas pa la sogs pa'i sku yi rnam 'gyur bris 'bur lugs sogs kyis rtsom pa ni gang tshad kyis gtan la dbab par bye ba'i yul/__gnyis pa ni/__'dir sor mo brgyad cha la nas dang /__nas gnyis la rkang pa/__rkang pa bzhi la sor gang ngam cha phran de phyed bcas bcu gnyis sam bcu gsum skabs su gang babs kyis gdong ngam/__zhal lam/__thal mo'am/__mtho zhes bya ste/__gang gis tshad gtan la 'bebs par byed pa'i bdag po'i rkyen no/__/gsum pa ni/__thig chen dang po spang rtogs mthar phyin pa rdzogs pa'i sangs rgyas rnams sor mo brgya nyer lnga pa dang /__thig chen gnyis pa yid tsam khro ba'am/__drang srong ltar khros pa'i rgyud sde'i dkyil 'khor gyi gtso bo phal mo che sor mo brgya nyer lngar bya ba'i tshul gyis 'chad pa dang /__thig chen gsum pa de las gzhan pa byang chub sems dpa' sogs zhi ba thun mong pa 'khor los sgyur ba'i cha byad can rnams sor mo brgya dang nyi shu pa/__thig chen bzhi pa rgyal yum yid 'phrog ma'i gzugs can rnams sor mo brgya brgyad pa dang /__thig chen lnga par sbom thung gtum drag can rnams sor mo go drug__/thig chen drug pa mi'u thung ltar khros pa rnams sor mo don gnyis/__thig chen bdun pa nyan thos dang rang rgyal mi la sogs pa rnams sor dgu bcu rtsa drug dmigs bsal dang bcas pa/__thig chen brgyad pa sku'i rnam 'gyur dang /__bzhugs stangs dang /__rgyan la sogs pa'i tshad de/__de ltar rnam pa brgyad kyi sgo nas gtan la phab nas zhi ba dang /__sgeg pa dang /__gtum pa la sogs pa'i nyams kyis skabs su bab par mdzes shing yid 'phrog par bya ba nyid do/__/