བཅོམ་ལྡན་འདས་གཉེན་པོ་ལྷ་བཞི་ལ་བརྟེན་ནས་ཀླུའི་གདོན་དགྲོལ་གྱི་ཆོ་ག་བྱ་ཚུལ་བདུད་རྩིའི་ལྗོན་བཟང་།

🚧 This website is under continued development. We appreciate your patience!

Previous Text Back to Volume PageLast text in section.

Wylie title	bcom ldan 'das gnyen po lha bzhi la brten nas klu'i gdon dgrol gyi cho ga bya tshul bdud rtsi'i ljon bzang
Location	mkhyen brtse'i bka' 'bum Volume 13, sde tshan 19, Text 2, Pages 355-371 (Folios 17a2 to 35a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	ངག་དབང་བློ་བཟང་རྒྱ་མཚོ་ (Dalai Lama, 5th)
Citation	'jam dbyangs mkhyen brtse'i dbang po. bcom ldan 'das gnyen po lha bzhi la brten nas klu'i gdon dgrol gyi cho ga bya tshul bdud rtsi'i ljon bzang. In 'jam dbyangs mkhyen brtse'i dbang po'i bka' 'bum, Vol. 13: 355-371. Khams sde dge rdzong sar dgon: Rdzong sar blo gros phun tshogs, 2020.
Genre	Ritual and Liturgical Texts - cho ga phyag len  ·  Activity Practices - las tshogs
Cycle	རྒྱ་ཅན་བཅོམ་ལྡན་འདས་གཉེན་པོ་ལྷ་བཞི་ (rgya can bcom ldan 'das gnyen po lha bzhi)
Parent Cycle	དག་སྣང་རྒྱ་ཅན་ (dag snang rgya can)
Deity	gnyen po lha bzhi
Colophon	།ཞེས་པའང་ཀུན་མཁྱེན་ཆེན་པོ་ཉིད་ཀྱི་གསུངས་རྡོ་རྗེའི་ཚིག་རྐང་རྩ་བར་བཟུང་། བཀའ་གཏེར་དག་སྣང་གི་མན་ངག་ཟབ་མོ་དུ་མས་ཟུར་བརྒྱན་ཏེ་རིག་འཛིན་གྱི་བཙུན་པ་རྡོ་རྗེ་ཐུགས་མཆོག་རྩལ་གྱིས་སྦྱར་བའི་དགེ་བས་མཐའ་ཀླས་པའི་འགྲོ་བ་ཐམས་ཅད་འོག་གདོན་གྱི་འཇིགས་པ་ལས་མྱུར་དུ་གྲོལ་བའི་རྒྱུར་གྱུར་ཅིག །སརྦ་དཱ་ཤྲེ་ཡོ་བྷ་བ་ཏུ།།
	zhes pa'ang kun mkhyen chen po nyid kyi gsungs rdo rje'i tshig rkang rtsa bar bzung /__bka' gter dag snang gi man ngag zab mo du mas zur brgyan te rig 'dzin gyi btsun pa rdo rje thugs mchog rtsal gyis sbyar ba'i dge bas mtha' klas pa'i 'gro ba thams cad 'og gdon gyi 'jigs pa las myur du grol ba'i rgyur gyur cig__/sarba dA shre yo b+ha ba tu/

1 Texts in this Section (sde tshan or chos tshan)

2 355-371	བཅོམ་ལྡན་འདས་གཉེན་པོ་ལྷ་བཞི་ལ་བརྟེན་ནས་ཀླུའི་གདོན་དགྲོལ་གྱི་ཆོ་ག་བྱ་ཚུལ་བདུད་རྩིའི་ལྗོན་བཟང་། bcom ldan 'das gnyen po lha bzhi la brten nas klu'i gdon dgrol gyi cho ga bya tshul bdud rtsi'i ljon bzang Ritual and Liturgical Texts - cho ga phyag len   ·   Activity Practices - las tshogs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །བཅོམ་ལྡན་འདས་གཉེན་པོ་ལྷ་བཞི་ལ་བརྟེན་ནས་ཀླུའི་གདོན་དགྲོལ་གྱི་ཆོ་ག་བྱ་ཚུལ་བདུད་རྩིའི་ལྗོན་བཟང་བཞུགས་སོ། །ན་མོ་གུ་རུ་བྷྱཿ རྒྱལ་བ་ཀུན་གྱི་སྐུ་གསུང་ཐུགས། །གཅིག་བསྡུས་ཁྲག་འཐུང་རོལ་པའི་ལྷར། །བཏུད་ནས་འོག་གདོན་འགྲོལ་བའི་ཚུལ། །བདུད་རྩིའི་ལྗོན་བཟང་འདི་ན་འཁྲུངས། དེ་ལ་གནས་དབེན་པར་སྟེགས་ཀྱི་ཁར་རས་བྲིས་ཀྱི་དཀྱིལ་འཁོར་དང་། དེའི་དབུས་སུ་མཉྫིའི་སྟེང་དུ་བུམ་པ་བཅུད་ལྡན་ཁ་རྒྱན་མགུལ་ཆིངས་ཅན་བཀོད་པའི་ཁ་རྒྱན་གྱི་མདུན་དུ་ལྷ་ཙཀྲ། བུམ་པའི་མདུན་དུ་སྔགས་བྱང་། གཡས་སུ་ཕྱག་མཚན། གཡོན་དུ་ནོར་བུ་དབང་གི་རྒྱལ་པོའི་གཟུགས་ཀྱི་ཙཀ྄་ལི། ཉེ་ལོགས་ཅི་བདེ་བར། བྲུབ་ཁུང་དུ་ལིངྒ་དང་། སྒྲོལ་གྲི། ཕུར་པ། མེ་ཧོམ་སོགས་དང་། མཐར་སྨན་རཀ་གཏོར་མཆོད་ཀྱིས་བསྐོར་བ་ནི་ཡི་དམ་གྱི་དཀྱིལ་འཁོར་དང་། གཡས་གཡོན་སོགས་གང་རིགས་སུ་ཀླུའི་དཀྱིལ་འཁོར་ནི། གྲུབ་ན་དོགས་གནས་ཀྱིས་བཀྲམས་པའི་ཁར་ནེའུ་གསེང་མཚོན་པའི་སྤང་ཙྭ་སྔོན་ཅན་དྲས་པའི་མཐའ་བསྐོར་དུ་ཤིང་སྣ་གང་འཛོམས་བཀོད་པས་མཛེས་པར་བཙུགས། དར་དམར་པོ་དང་རས་དར་གྱི་འཕན་ལ་སོགས་པས་མཛེས་པར་བགྱིས་པའི་གཞིར་རྡུལ་ཚོན་གྱིས་པདྨ་འདབ་བརྒྱད་བྲིས་པའི་དབུས་སུ་ཀླུ་གཟུགས་སྦྲུལ་མགོའི་གདེངས་ཀ་ཅན། སྟོད་ལྷའི་ལུས་ཅན་ཐལ་མོ་སྦྱར་བ་སྨད་སྦྲུལ་མཇུག་འཁྱིལ་པའི་རྣམ་པ་ཅན་དང་། འདབ་མ་བརྒྱད་ལའང་ཀླུ་གཟུགས་དེ་ལས་ཆུང་བ་རེ་རེའམ། བཤོས་བུ་སྦྲུལ་དཀྲིས་ཅན་བརྒྱད། དེ་དག་གི་ཕྱོགས་བཞིར་ཀླུ་གདོན་གྱི་གཟུགས་གླང་། སྡིགས་པ། སྦལ་པ། ཆུ་སྲིན་གྱི་མགོ་ཅན་རེའམ་བཤོས་བུ་རེ། མ་གྲུབ་ན་ཟངས་གཞོང་སོགས་སྣོད་གཙང་མར་འབྲས་དཀར་གྱི་ཚོམ་བུ་དགུ་བཀོད་པའི་དབུས་སུ་ཀླུ་གཟུགས་དང་། ཕྱོགས་མཚམས་རྣམས་སུ་བཤོས་བུ་རེ་རེ། གང་ལྟར་ཡང་དེའི་མདུན་དུ་ཟངས་གཞོང་གི་ནང་སྒྲུབ་བྱའི་གླུད་གཟུགས་ཆེ་བ་ཀླུ་སྨན་ཁྲོལ་བུ་དཀར་ཆབ་དང་བཅས་པ། སྣོད་གཞན་གཙང་མ་ཞིག་ཏུ་སྦྲུལ། སྦལ་པ། ལྕང་མོ། ཉ། སྨྲིག་བུ། ཙངས་པ། དུང་། ཆུ་སྲིན། རུས་སྦལ། སྡོམ། སྡིགས་པ། རྟ་བླ། མགྲོན་བུ། ཉ་ལྕིབས། ཆུ་རྟ། ཆུ་ལུག །ཆུ་ར། སྲམ། ཆུ་བྱ། ཆུ་སྲེག །ཆུ་བྱི་སྟེ་ཀླུ་ནོར་ཉེར་གཅིག་དང་། རིལ་བུ་ཉེར་གཅིག །གླུད་ཆུང་ཉེར་གཅིག །སྣོད་གཞན་ཞིག་ཏུ་འོ་ཆོལ་ཀླུ་སྨན་བཏབ་པ་སྤྲོ་ན་སྐྱོགས་དང་བཅས་པ་བཞག །ཀླུའི་དཀྱིལ་འཁོར་གྱི་སྟེང་དུ་ཁྲུས་བུམ་གྱི་ཁར་སྨྱག་ཤད། བལ་བུ། ལྕང་མ། འོམ་བུ། ཀུ་ཤ །རྨ་བྱའི་མདངས་རྣམས་ཕོན་བོར་བསྡམས་པའི་བྱབས་རྫས་སམ། ཡང་ན་རྨ་བྱའི་མདངས་རྐྱང་པས་ཀྱང་འཐུས། སློབ་དཔོན་གྱི་མདུན་དུ་ལས་བུམ། རྡོར་དྲིལ། ཌཱ་མ་རུ། བྱད་ཐག་སྔོ་དམར། གུལ་ཡུངས་སོགས་འོག་ཏུ་མཁོ་བའི་ཡོ་བྱད་རྣམས་ཚོགས་པར་བྱས་ནས། བདག་མདུན་དབྱེར་མེད་ཀྱི་བསྐྱེད་བཟླས་སྔོན་དུ་འགྲོ་བས། རྣམ་བུམ་ལ་དམིགས་ཀྱིས་བསལ་བའི་བཟླས་པ་ཅི་འགྲུབ་དང་། ལས་བུམ་དུ་སྐད་ཅིག་གིས་ཁྲོ་བོ་བདུད་རྩི་འཁྱིལ་པ་གསལ་བའི་སྐུ་ལས་རྡོ་རྗེ་བདུད་རྩིའི་རྡུལ་ཕྲ་རབ་བབས་པས་བུམ་པ་གང་བར་བསམ་ལ། ཨ་མྲྀ་ཏ། ཅི་ནུས་བཟླས་མཐར་མཆོད་ཅིང་བསྟོད། ཨོཾ་ཨཱཿཧཱུྃ་གིས་དུང་ཆོས་ཀྱི་ཆུ་མཆོད་ཡོན་གྱི་ཚུལ་དུ་ཕུལ་བས་བུམ་པའི་ལྷ་འོད་དུ་ཞུ་བས་བུམ་ཆུ་དང་རོ་གཅིག་ཏུ་གྱུར་པར་བསམ། བདག་འཇུག་རྒྱས་པར་བླངས་བའམ། རིག་པའི་མེ་ཏོག་དོར་བ་ཙམ་གྱིས་འཇུག་པ་སྔོན་དུ་འགྲོ་བས་སློབ་མ་འཇུག་པར་གསོལ་བ་གདབས། ཁྲུས་བུམ། ཨ་མྲྀ་ཏས་བསངས། སྭ་བྷཱ་ཝས་སྦྱངས། བུམ་པ་མི་དམིགས་སྟོང་པའི་ངང་ལས༔ གཞལ་ཡས་མཚན་ཉིད་རྫོགས་པའི་དབུས་སུ༔ སིཾ་ལས་སེང་གེ་དཀར་མོའི་སྟེང་དུ༔ ཐུགས་རྗེ་ཆེན་པོ་སེང་གེ་སྒྲ་ནི༔ སྐུ་མདོག་དཀར་གསལ་གངས་རི་ལྟ་བུ༔ རིན་ཆེན་པདྨའི་རྒྱན་གྱིས་མཛེས་པ༔ ཞལ་གཅིག་ཕྱག་གཉིས་ཕྱག་གཡས་གདན་གནོན༔ གཡོན་པས་སྡིག་མཛུབ་པུས་མོའི་ཐད་དུ༔ བསྒྲེང་པའི་རྩེ་ལ་སྦྲུལ་དཀར་རབ་དཀྲིས༔ རི་དྭགས་པགས་པས་ནུ་མ་བཀབ་ཅིང་༔ སྐུ་སྨད་དར་དམར་སྟོད་གཡོགས་དང་བཅས༔ ཕྱེད་སྐྱིལ་ཞབས་གཉིས་མངོན་པར་འགྱིང་བའི༔ གནས་གསུམ་འབྲུ་ལས་འོད་ཟེར་འཕྲོས་པས༔ པོ་ཏཱ་ལ་ནས་སྤྱན་འདྲེན་ཛཿཧཱུྃ་བྃ་ཧོཿས་གཉིས་མེད་རྟེན་ལ་བཞུགས་མཛོད༔ ཅེས་དམ་ཚིག་པ་བསྐྱེད། ཧྲཱིཿ རིགས་མཆོག་དག་པ་འོད་དཔག་མེད་མགོན་གྱི༔ དྲུང་དུ་འགྲོ་བ་འདུལ་བར་དམ་བཅས་པའི༔ ཐུགས་རྗེ་ཆེན་པོ་འཕགས་པ་སྤྱན་རས་གཟིགས༔ དེང་འདིར་འགྲོ་བའི་དོན་དུ་སྤྱན་འདྲེན་ནོ༔ འགྲོ་བའི་ཉོན་མོངས་སེལ་བར་ཞལ་བཞེས་པའི༔ ཐུགས་རྗེ་བརྩེ་ལྡན་འཕགས་པ་སྤྱན་རས་གཟིགས༔ དེང་འདིར་འགྲོ་བའི་ཉོན་མོངས་གྲིབ་སེལ་ཕྱིར༔ མ་ཐོག་མྱུར་དུ་གནས་འདིར་གཤེགས་སུ་གསོལ༔ བཛྲ་ས་མ་ཡ་ཛཿཛཿས་སྤྱན་དྲངས། ཛཿཧཱུྃ་བྃ་ཧོཿས་བསྟིམས། པདྨ་ཀ་མ་ལ་ཡེ་སྟྭཾཿགྱིས་གདན་འབུལ། ཨ་ཏི་པུ་ཧོཿ པྲ་ཏི་པུ་ཧོཿས་ཕྱག་བྱ། ཨོཾ་ཨཱཪྻ་ལོ་ཀེ་ཤྭ་ར་སེདྷ་ནཱ་ད་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། ཧྲཱིཿ དྲི་མེད་སྐུ་ཡི་མདངས་ཀྱིས་གདོན་ཚོགས་ཞི༔ རྣམ་དག་གསུང་གི་ཟེར་གྱིས་སྒྲིབ་གཉིས་བཀྲུ༔ མཁྱེན་བརྩེས་འགྲོ་ཀུན་སྨིན་ཅིང་གྲོལ་བར་མཛད༔ ཐུགས་ཆེན་སེང་གེ་སྒྲ་ལ་ཕྱག་འཚལ་བསྟོད༔ ཅེས་པས་བསྟོད། ཐུགས་ཀར་ཟླ་བའི་དཀྱིལ་འཁོར་གྱི་དབུས་སུ་ཧྲཱིཿཡིག་གི་མཐར་སྔགས་ཀྱི་ཕྲེང་བས་བསྐོར་བ། དེ་ལས་བདུད་རྩིའི་རྒྱུན་བབས་པས་བུམ་པ་གང་བར་བསམ་ལ། ཨོཾ་ཨཱཿཧྲཱི་སིདྷ་ནཱ་ད་ཧཱུྃ་ཕཊཿ ཅི་ནུས་དང་། མཐར། ན་མོ་རཏྣ་ཏྲ་ཡཱ་ཡ། ན་མོ་ཨཱཪྻ་ཨ་བ་ལོ་ཀི་ཏེ་ཤྭཱ་རཱ་ཡ། བོ་དྷི་སཏྭ་ཡ། མཧཱ་སཏྭ་ཡ། མཧཱ་ཀ་རུ་ཎི་ཀ་ཡ། ཏདྱ་ཐཱ། ཨོཾ་ཨ་ཀ་ཊེ། བི་ཀ་ཊེ། ནི་ཀ་ཊེ། ཀ་ཊཾ་ཀ་ཊེ། ཀ་རོ་ཊེ། ཀ་རོ་ཊ། བིདྱཱ་སྭཱ་ཧཱ། ཞེས་པའང་བཟླས། སྔར་བཞིན་མཆོད་ཅིང་བསྟོད་ལ་ནོངས་པ་བཤགས། མཆོད་ཡོན་ཕུལ་ལ། ལྷ་འོད་དུ་ཞུ་ནས་བུམ་ཆུ་བདུད་རྩིའི་རང་བཞིན་དུ་གྱུར་པར་བསམ། དེ་ནས་ཀླུའི་ཡོ་བྱད་རྣམས་ལ་དམིགས་ཏེ། རྡོ་རྗེ་གནོད་སྦྱིན་གྱིས་ཕྱག་རྒྱ་དང་། ཨོཾ་བཛྲ་ཡཀྵ་ཧཱུྃ་གིས་བསངས། རྡོ་རྗེ་མེ་ཡི་ཕྱག་རྒྱ། ཨོཾ་བཛྲ་ཛྭ་ལ་ཨ་ན་ལ་ཧ་ན་ད་ཧ་པ་ཙ་མ་ཐ་བྷཉྫ་ར་ཎ་ཧཱུྃ་ཕཊཿཅེས་དང་། སྭ་བྷཱ་བས་སྦྱངས། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། བཅུད་རྣམས་བདུད་རྩིའི་རྒྱ་མཚོ་ཆེན་པོ་ཀླུ་རྣམས་ཚིམ་ཞིང་ནད་ཀུན་གསོ་བའི་བདེ་བར་སྐྱེད་པར་བྱེད་པའི་བྱེད་ལས་དང་ལྡན་པར་གྱུར། རྡོ་རྗེ་བསྡམ་པའི་ཕྱག་རྒྱས། ཨ་ཀཱ་རོ་དང་། ནམ་མཁའ་མཛོད་ཀྱི་སྔགས་རྒྱས་བྱིན་གྱིས་བརླབ། མདུན་དཀྱིལ་ལ་དམིགས་ཏེ། ཨ་མྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་མདུན་དུ་བྲག་གསེར་གྱི་བྱ་སྐྱིབས་ཅན་གྱི་འོག་ཏུ། མཚོ། རྫི ལྟེང་ཀ །ཆུ་མིག །ཁྲོན་པ། འབབས་ཆུ། ནེའུ་གསེངས། སྤངས་ལྗོངས། སྐྱེད་ཚལ། ཁང་བཟང་སོགས་ཉམས་དགའ་བའི་ནང་དུ་ཀླུ་རྒྱལ་ཝཱ་རུ་ཎས་གཙོ་བྱས་ཀླུ་ཆེན་བརྒྱད་སྟོད་མི་ལ་སྨད་སྦྲུལ་མཇུག་ཅན། རིན་པོ་ཆེའི་རྒྱན་གྱིས་སྤྲས་པ། ཀླུ་རིགས་གྲངས་མེད་པས་བསྐོར་བར་བསམ་ལ། ལྕགས་ཀྱུའི་ཕྱག་རྒྱ་དང་བཅས། རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་ཀླུ་རྒྱལ་ཝཱ་རུ་ཎ་ལ་ཀླུ་ཆེན་བརྒྱད་དང་། གཞན་ཡང་འཇིག་རྟེན་གྱི་ཁམས་ཀྱི་ཀླུ་གཉན་ས་བདག་གྲངས་མེད་པའི་འཁོར་གྱིས་བསྐོར་བ་ཟླ་བའི་གདན་ལ་རླུང་གིས་བསྐྱོད་དེ་འུར་སྒྲ་དང་བཅས་བཛྲ་ས་མཱ་ཛཿ ཨོཾ་བ་ཏཱ་ལི་བ་ཏཱ་ལི་མ་ཧཱ་བ་ཏཱ་ལི་ཧཱུྃ་ཧཱུྃ་ཛཿཛཿསྭཱ་ཧཱ། ཕྱག་ན་རྡོ་རྗེའི་མཐུ་སྟོབས་དང་། །རྟ་མགྲིན་དབང་གི་བྱིན་རླབས་ཀྱིས། །གཙོ་བོ་ཀླུ་ཆེན་བརྒྱད་པོ་དང་། །རྒྱལ་རིགས་རྗེ་རིགས་དམངས་རིགས་དང་། །བྲམ་ཟེ་གདོལ་པ་ལ་སོགས་པ། །རི་རབ་རྩེ་དང་རྒྱ་མཚོའི་གཏིང་། །སྟེང་འོག་ཕྱོགས་མཚམས་གང་གནས་ཀླུ། །གནས་འདིར་སྤྱན་འདྲེན་གཤེགས་སུ་གསོལ། །ཨོཾ་ཨཱ་གཙྪ་ཨཱ་གཙྪ་ནཱ་ག་ཨདྷི་པ་ཏཱ་ཡེ་སརྦ་བྷཱུརྦྷུ་པ་ཕྲུཾ་ཕུ་སྭཱ་ཧཱ། ནཱ་ག་རཱ་ཛ་ས་པ་རི་ཝཱ་ར་ས་མ་ཡ་ཧཱུྃ་ཛཾཿཛཿ ཛཿཧཱུྃ་བྃ་ཧོཿ ཞེས་པས་མགྲོན་ཐབས་སུ་བཀུག་ནས་གཟུགས་ལ་བསྟིམས། དེ་དག་གི་མཐའ་མར་འོད་ཀྱི་ལྕགས་རིས་བསྐོར་ནས་ལས་མ་གྲུབ་པར་ཕྱིར་འགྲོ་ས་མེད་པར་བསམ་སྟེ། དེ་ནི་ཀླུའི་འཁུ་ལྡོག་མི་འོང་བའི་གདམས་པ་ཡིན་ནོ། །རང་རང་དགྱེས་པ་བསྐྱེད་ནུས་པའི། །ཡིད་ཀྱིས་སྤྲུལ་པའི་གནས་མཆོག་འདིར། །པདྨའི་གདན་ལ་རབ་བཞུགས་ནས། །མཆོད་པའི་ཚོགས་རྣམས་བཞེས་སུ་གསོལ། །པདྨ་ཀ་མ་ལ་ཡེ་སྟྭཾ་གྱིས་གདན་ཕུལ། མ་ཧཱ་ནཱ་ག་ཨ་དྷི་པ་ཏ་ཡེ་གྲྀཧྞེ་དཾ་ཨརྒྷཾ་སྭཱ་ཧཱ། དེ་བཞིན་དུ། པུཥྤཾ། དྷཱུ་པཾ། དཱི་པཾ། གནྡྷཾ་རྣམས་སྦྱར་བས་སྤྱིར་མཆོད། གདེངས་ཀ་ནོར་བུ་འབར་བའི་འོད་ཀྱིས་ནི། །ས་འོག་མུན་པ་མ་ལུས་སེལ་མཛད་ཅིང་། །བསྟན་ལ་རབ་དགའ་མཐུ་སྟོབས་བསམ་མི་ཁྱབ། །ཀླུ་རྒྱལ་འཁོར་དང་བཅས་ལ་བསྟོད་པར་བགྱི། །ཅེས་བསྟོད། བྱེ་བྲག་ཏུ་དཀོར་ཆ་རྣམས། སམྦྷ་ར་ལན་བདུན་རེའི་མཐར། དེ་བཞིན་གཤེགས་པ་བཞིའི་མཚན་བརྗོད་ལ་བསྔོས། ཨོཾ། མཐའ་ཡས་དང་ནི་འཇོག་པོ་དང་། །སྟོབས་ཀྱི་རྒྱུ་དང་རིགས་ལྡན་དང་། །ནོར་རྒྱས་དང་ནི་དུང་སྐྱོང་དང་། །པདྨ་དང་ནི་ཆུ་ལྷ་དང་། རྒྱ་མཚོ་རྒྱ་མཚོ་ཆེན་པོ་དང་། །དཔལ་གྱི་འོད་དང་འོད་པོ་དང་། །ཀླུ་རྒྱལ་གཙུག་ན་རིན་ཆེན་སོགས། །ཀླུ་ཆེན་འཁོར་བཅས་གཏོར་མ་བཞེས། །མཛེས་པའི་དཀར་གསུམ་གཏོར་མ་ནི། །མངར་གསུམ་འོ་མའི་རྒྱ་མཚོ་ཆེ། །རིན་ཆེན་ཕྲེང་བའི་ཐེམ་སྐས་ཅན། །ཀླུ་ཡི་གནོད་པ་སྐྱོབ་བྱེད་པ། །མཐུན་པའི་རྫས་སུ་འདི་གྱུར་ཅིག །བདག་ཅག་འཁོར་དང་བཅས་རྣམས་ལ། །ཀླུ་ལས་གྱུར་པའི་གནོད་པ་ནི། །མཐོང་བའི་དུག་དང་རེག་པའི་དུག །བསམ་ངན་དུག་དང་ཁ་རླངས་དུག །དེ་ལ་སོགས་པའི་དུག་རྣམས་ཀུན། །ཡུད་ཙམ་གཅིག་ལ་ཞི་གྱུར་ཅིག །བདག་བས་གཅེས་པའི་རྫས་ཁྱེར་ལ། །བདག་ལ་གནོད་པར་མ་བྱེད་ཅིག །ཅེས་པས་ཕྲིན་ལས་བཅོལ་བས། ཀླུ་རྒྱལ་འཁོར་བཅས་དགེས་ཤིང་ཐལ་མོ་སྦྱར་ནས་བཀའ་ཉན་པའི་ཚུལ་གྱིས་འཁོད་པར་བསམ་ལ། སེངྒེ་སྒྲའི་རྩ་སྔགས་དང་གཟུངས་སྔགས་མཐར། ནཱ་ག་རཱ་ཛ་ས་པ་རི་ཝ་ར་སརྦ་དུཿཁ་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་བཏགས་པ་ལན་བདུན་གྱིས་ཁྲུས་བུམ་གྱི་ཆུ་དང་ཀླུ་སྨན་བསྲེས་པ་ཀླུ་གཟུགས་རྣམས་ལ་སྦྲེང་ཞིང་། ཀླུ་གཉན་ས་བདག་རྣམས་ཀྱི་ནད་དང་སྡུག་བསྔལ་ཐམས་ཅད་ཞི་ནས་ལུས་སེམས་བདེ་བས་ཁྱབ་པར་བསམ། ཆོས་རྣམས་ཐམས་ཅད་རྒྱུ་ལས་བྱུང་། ཞེས་སོགས་ཀྱིས་ཆོས་སྦྱིན་བྱ། དེ་ལྟར་ན་ཆོས་དང་ཟང་ཟིང་གི་སྦྱིན་པ་འདིའི་མཐུ་ལ་བརྟེན་ནས་ཀླུ་གཉན་ས་བདག་གི་རིགས་སུ་གྱུར་པ་ཐམས་ཅད་དང་། བྱེ་བྲག་ཏུ་ཡང་བདག་ཅག་འཁོར་དང་བཅས་པ་ལ་གནོད་ཅིང་ལན་ཆགས་པའི་ཀླུ་གཉན་ས་བདག་ཐམས་ཅད་ཚིམ་ཞིང་མཉེས་པར་གྱུར་ནས། གནོད་པ་དང་གདུག་པའི་བསམ་པ་ཞི་ཞིང་ཕན་པ་དང་ཞི་བའི་བྱང་ཆུབ་ཀྱི་སེམས་དང་ལྡན་པར་གྱུར་ཅིག །ཞེས་སྨོན་ལམ་གདབ། དེ་ནས་དཀྱིལ་འཁོར་ཡོལ་བས་སྒྲིབས། སྒྲུབས་བྱ་རྣམས་མདུན་དུ་འཁོད་པར། ཡན་ལག་དང་ཉིང་ལག་རྣམས་བྱད་ཐག་སྔོ་དམར་གྱིས་བཅིངས་པའི་སྣེ་མོ་ཀླུ་གཟུགས་ལ་གཏད་དེ་འདི་སྐད་ཅེས་མཚམས་སྦྱར་བར་བྱའོ། །འོ། ད་ལམ་འདིར་ཁྱེད་རང་རྣམས་ལ་ཐོག་མར་ཀླུའི་གདོན་དགྲོལ་བྱེད་པའི་སྐབས་སུ་བབ་པ་ཡིན་པས། མདུན་དུ་ཡོད་པའི་ཀླུའི་གཟུགས་བརྙན་ཀླུ་ཆེན་བརྒྱད་འཁོར་དང་བཅས་པར་དངོས་སུ་མོས་ཤིང་། ཁྱེད་རང་རྣམས་ཀྱང་ཀླུའི་བྱད་དུ་བཅུག་པའི་མཚོན་བྱེད་བྱད་ཐག་སྦྲུལ་སྔོ་དམར་གྱི་རྣམ་པས་ཡན་ལག་དང་ཉིང་ལག་ཐམས་ཅད་བཅིངས་ཏེ་མགུལ་བསྐྱོད་མི་ནུས་པ་དང་། ལུས་ནད་ཀྱི་ཐེབས། ངག་ལྐུག །ཡིད་མྱོས་ཏེ། མགོན་སྐྱབས་དང་བྲལ་བ་ལ། སློབ་དཔོན་ཁྲོ་བོའི་རྒྱལ་པོ་དཔལ་རྟ་མཆོག་རོལ་པ་གཉེན་པོ་ལྷ་བཞིའི་བདག་ཉིད་ཅན་དུ་བཞུགས་པས་ས་བདག་ཀླུ་གཉན་རྣམས་དཀོར་ཆས་ཚིམ་པར་བགྱིས་ཏེ་བཀའ་བསྒོས་པའི་མོས་པ་མཛོད། ཧྲཱིཿ ང་ནི་རྟ་མགྲིན་རྒྱལ་པོ་ཡིན། །ང་ནི་ཕྱག་ན་རྡོ་རྗེ་ཡིན། །ང་ནི་བྱ་ཁྱུང་རྒྱལ་པོ་ཡིན། །ང་ནི་ཀླུ་ཡི་གཉེན་པོ་ཡིན། །ཀྱེ། ཀླུ་བརྒྱད་ཟས་སུ་ཟ་བ་ཡིན། །ཀླུ་འབུམ་གདན་དུ་བཏིང་བ་ཡིན། །ཀླུ་ལྔས་དབུ་ལ་བརྒྱན་པ་ཡིན། །ཀླུ་རྣམས་ང་ཡི་བཀའ་ལ་ཉོན། །ཚུར་གཤེགས་ཚུར་གཤེགས་ཀླུ་ཡི་གཙོ། །ཝཱ་རུ་ཎ་སོགས་ཀླུ་ཆེན་བརྒྱད། །སྲས་དང་བཙུན་མོ་གཡོག་འཁོར་བཅས། །སོ་སོའི་བཀའ་ཉན་སྡོད་བྱེད་ཚོགས། །སྤྲུལ་པ་འཛམ་གླིང་ཁྱབ་པར་སྟོན། །གནོད་པའི་སྦྱོར་བ་མི་ལ་གཏོང་། །གདུག་རྩུབ་ནད་དུ་མཛེ་ནད་དང་། །ཞ་བོ་གྲུམ་པོ་ཡན་ལག་གཟེངས། །གདོན་གྱི་བསམ་སྦྱོར་ངན་པས་འཛིན། །ཀླུ་ཡི་གདོན་དུ་གྱུར་པ་ལ། །རྩི་སྨན་འོ་མའི་བདུད་རྩི་འབུལ། །ཁྱེད་ཀྱི་ལུས་སེམས་ཚིམ་གྱུར་ཅིག །ངན་སེམས་གདུག་རྩུབ་གདོན་འདི་ཁྲོལ། །ཀླུ་གཏོར་རིལ་བུ་གཏོར་མ་འབུལ། །ཁྱོད་ཀྱི་གསོལ་ཟས་དམ་པར་བཞེས། །རྒྱུ་སྦྱོར་གདོན་གྱིས་ཟིན་པ་ཁྲོལ། །ངར་གླུད་རྣམ་ཤེས་ལྡན་པ་འདི། །ཁྱེད་ལ་འདོད་པའི་རྫས་སུ་འབུལ། །རྒྱུ་སྦྱོར་གདོན་གྱིས་ཟིན་པ་ཁྲོལ། །གནོད་དང་ནད་ལས་ཐར་བར་མཛོད། །ཁྲོལ་ཅིག་ཁྲོལ་ཅིག་ཀླུ་ཡི་བུ། །དེ་རིང་མི་འདི་མི་གཏོང་ཞིང་། །དེ་རིང་གདོན་འདི་འགྲོལ་མི་བྱེད། །དེ་རིང་ནད་འདི་མི་འགྲོལ་ན། །རྟ་མཆོག་རྒྱལ་པོའི་བཀའ་བཅག་ཅིང་། །ཕྱག་ན་རྡོ་རྗེའི་བཀའ་ཡང་བཅག །བྱ་ཁྱུང་རྒྱལ་པོའི་བཀའ་བཅག་པས། །མཛེ་ནད་སྣ་དགུ་ཁྱེད་ལ་འོང་། །མིག་ནད་མེ་འབར་ཁྱོད་ལ་འོང་། །ལོང་བ་འོན་པ་ཁྱོད་ལ་འོང་། །མཛེ་ནད་ཤུ་བ་ཁྱེད་ལ་འོང་། །བླ་མེད་འབྲས་བུ་ཐོབ་མི་འགྱུར། །འོན་ཀྱང་དེ་ལ་མ་ཐུག་གི། །དེ་རིང་མི་འདི་ཁྱོད་ཀྱིས་ཐོང་། །དེ་རིང་གདོན་འདི་ལྷོད་ཀྱིས་ཁྲོལ། །ཀླུ་ཡི་གདོན་གྱིས་ཟིན་པ་ཁྲོལ། །གཉན་གྱི་གདོན་གྱིས༴ ས་བདག་གདོན་གྱིས༴ ཀླུ་བདུད་གདོན་གྱིས༴ ཀླུ་བཙན་གདོན༴ ཀླུ་སྲིན་གདོན༴ གཟའ་ཀླུའི་གདོན༴ རྒྱལ་བསེན་གདོན་གྱིས་ཟིན་པ་ཁྲོལ། །ཨོཾ་པྲ་ཏི་རཾ་སྭཱ་ཧཱ། ཕྱི་ནཱ་ག་གུ་ལེ་རཾ་སྭཱ་ཧཱ། ནཱ་ག་རཱ་ཛ་ཧཱུྃ་ཕཊཿ ཅེས་བརྗོད་ཅིང་། རྩི་སྨན་འོ་མའི་བདུད་རྩི་འབུལ། ཞེས་པའི་ཚིག་བྱུང་རེས་དང་བསྟུན། ལས་རྡོར་གྱིས་ཀླུ་སྨན་རེ་ཐུར་མས་བཅུས་སྟེ་གླུད་ཆེ་བའི་ཟངས་གཞོང་ནང་དུ་འབུལ། །དེ་བཞིན་དུ། ཀླུ་གཏོར་རིལ་བུའི་གཏོར་མ་འབུལ། ཞེས་པ་དང་བསྟུན་པའི་རིལ་བུ་རེ་དང་། ངར་གླུད་རྣམས་ཤེས་ལྡན་པ་འབུལ། །ཞེས་པ་དང་བསྟུན་ཏེ་གླུད་ཆུང་རེ་རྣམས་ཟངས་གཞོང་དུ་འབུལ་བ་ལན་ཉེར་གཅིག་གི་བར་བྱ། ནད་པ་མིན་པའི་བསྒྲུབ་བྱ་སྤྱི་འགྲོས་ལ་འོ་ཆོལ་དང་རིལ་བུ་གླུད་དང་བཅས་པ་སྡེབས་སུ་ཕུལ་ཀྱང་མཐུས་སོ། །དེ་ནས་ཁྲུས་བུམ་དུ་རྣམ་རྒྱལ་བུམ་པའི་ཆུ་ཅུང་ཟད་བསྲེས་པ་ཐོགས་ཏེ། དེ་ལྟར་མགྲོན་རྣམས་དཀོར་ཆས་ཚིམ་པར་བགྱིས་ཏེ་བཀའ་བསྒོ་བ་སྔོན་དུ་སོང་ནས། སློབ་དཔོན་གྱི་ཕྱག་ཏུ་བུམ་པ་ཡེ་ཤེས་ཀྱི་བདུད་རྩིས་གང་བ་རེ་ཐོགས་ཏེ་ཁྱེད་རང་རྣམས་ལ་ཁྲུས་བྱས་པ་ལ་བརྟེན་ནས། སྤྱི་བོ་ཚངས་པའི་བུ་ག་ནས་མར་བྱུང་། ལུས་ཀྱི་ནང་ཐམས་ཅད་གང་། ཚེ་འཁོར་བ་ཐོག་མ་མེད་པ་ནས་བསགས་པའི་ནད་གདོན་སྡིག་སྒྲིབ་བག་ཆགས་དང་བཅས་པ་ཐམས་ཅད་བྱང་ཞིང་དག་པར་བྱས། ཁྱད་པར་དུ་ལུས་ལ་གནས་པའི་ཀླུ་གདོན་ཐམས་ཅད་སྦྲུལ་ནག །གཉན་རྣམས་སྡིག་པ། ས་བདག་རྣམས་སྦལ་ལྕོང་། གདོན་ཕྲ་མོ་རྣམས་སཱ་ཀུ་ཙཱིའི་རྣམ་པར་འཐོན་ནས་མདུན་གྱི་གདོན་གཟུགས་སོ་སོར་ཐིམ་པས་ལུས་ངག་ཡིད་གསུམ་ཉེར་འཚེ་དང་བྲལ་བའི་མོས་པ་མཛོད། ཅེས་བརྡ་སྦྱར་ལ། ཇི་ལྟར་བལྟམས་པ། སོགས་ཀྱི་མཐར། ཧྲཱིཿཨ་པ་རི་མི་ཏཱ་ཨཱ་ཡུརྫྙཱ་ན་པདྨ་ཀྲོ་དྷ་ཧྱ་གྲཱྀ་བ་བཛྲ་པཱ་ཎི་ག་རུ་ཌཱ་ཧཱུྃ་ཕཊ྄ཿ ཅེས་ཡི་དམ་གྱི་སྔགས་དང་། སེང་གེ་སྒྲ་ཡི་རྩ་སྔགས་དང་གཟུངས་སྔགས་མཐར། ན་མོ་བུདྡྷཱ་ཡ། ནཱ་ག་དུ། ཙནྡྷེ་ཙནྡྷེ་མི་ལི་མི་ལི་མི་ལི། བྷནྡྷ་བྷནྡྷ། ནཱ་ག་ནི་སྭཱ་ཧཱ། ཞེས་ལས་སྦྱོར་གྱི་སྔགས་གཤམས་སུ། རྡོ་རྗེ་སློབ་མའམ། སྦྱིན་པའི་བདག་པོ་འདི་རྣམས་ཀྱི་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབས་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ནད་ཐམས་ཅད་ཤཱནྟིཾ་ཀུ་རུ༴ རིམས་ཐམས་ཅད༴ གྲིབ་དང་མི་གཙང་བ་ཐམས༴ རྨི་ལམ་དང་མཚན་མ་ངན་པ་ཐམས༴ ལྟས་དང་བསྐལ་བ་ངན་པ༴ དུས་མ་ཡིན་པའི་འཆི་བའི་འཇིགས་པ༴ གཟའ་དང་རྒྱུ་སྐར་གྱི་གནོད་པ༴ ཀླུ་གཉན་ས་བདག་གི་གནོད་པ་ཐམས་ཅད༴ བཙན་དང་རྒྱལ་བསེན་གྱི་གནོད་པ་ཐམས་ཅད༴ གདོན་དང་བགེགས་དང་ལོག་པར་འདྲེན་པ་ཐམས༴ བར་དུ་གཅོད་པ་དང་མི་མཐུན་པའི་ཕྱོགས་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་དང་། སྤྲོ་ན། འདི་ནི་སྦྱིན་པའི་རང་བཞིན་ཆུ། ཞེས་སོགས་དང་། མཚམས་རྣམས་སུ་སྔགས་སྤེལ་ཚིག་དང་བཅས་པས་བཀྲུ། བུམ་ཆུ་ཅུང་ཟད་གཅིག་ཁར་འཛིན་དུ་བཅུག་ལ། དེ་ནས་བྱབས་པའི་སླད་དུ་སློབ་དཔོན་གྱི་ཕྱག་གི་རྨ་བྱའི་མདངས་ཀྱི་ཐིག་ལེའི་དབུས་སུ་ཟླ་བའི་གདན་ལ་ཧཱུྃཿཡིག་གི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས། ཁྱེད་རང་རྣམས་ཀྱི་ལུས་ལ་ཕོག་པས་ནད་གདོན་བར་གཅོད་མི་མཐུན་པའི་ལྷག་མ་ཐམས་ཅད་རྡོ་ཁབ་ལེན་གྱི་ལྕགས་ཕྱེ་བླངས་པ་ལྟར་བསྡུས་སྟེ་ཁ་ནང་གི་ཆུ་ལ་ཐིམ་པ་དེ་ཉིད་ཕྱིའི་རྒྱ་མཚོ་ཆེན་པོར་དོར་པའི་མོས་པ་མཛོད། བཞི་བརྒྱ་རྩ་བཞིའི་ནད་རྣམས་དང་༔ འགལ་རྐྱེན་ཉི་ཁྲི་ཆིག་སྟོང་དང་༔ ཡེ་འདྲོག་སུམ་བརྒྱ་དྲུག་བཅུ་དང་༔ བགེགས་རིགས་སྟོང་ཕྲག་བརྒྱད་ཅུ་སོགས༔ མི་མཐུན་བྱང་ཞིང་དག་གྱུར་ཅིག །ཅེས་དང་། སྔར་བཞིན་སྔགས་སྤེལ་ཚིག་དང་བཅས་པའི། ཤཱནྟིཾ་ཀུ་རུའི་ཚབ་ཏུ། ཨ་པ་ན་ཡེ་སྭཱ་ཧཱ། སྦྱར་བས་བྱབ་རྫས་ཀྱིས་བྱབས་མཐར་ཁ་ནང་གི་ཆུ་ཁྲུས་ཁུའི་གསེབ་ཏུ་འདོར། སླར་ཡང་གནོད་བྱ་དང་གནོད་བྱེད་ཀྱི་འབྲེལ་པ་བཅད་པའི་སླད་དུ། སློབ་དཔོན་དཔལ་རྟ་མཆོག་རོལ་པ་གཉེན་པོ་ལྷ་བཞིའི་བདག་ཉིད་ཅན་གྱི་ཕྱག་ན་ཐོགས་པའི་ཡེ་ཤེས་ཀྱི་རལ་གྲི་མེ་རབ་ཏུ་འབར་བས་བྱད་ཐག་རྣམས་བཅད་དེ། འོད་ཀྱི་རྣམ་པར་གདོན་གཟུགས་རྣམས་ལ་སྤྲད་པས། ཁྱེད་རང་རྣམས་ཀྱི་ལུས་ངག་ཡིད་གསུམ་བདེ་བ་དང་ལྡན་པར་གྱུར་པའི་མོས་པ་མཛོད། ཅེས་བརྡ་སྦྱར་ལ། ཡི་དམ་གྱི་སྔགས་གཤམ་དུ། ལས་སྦྱོར་གྱི་སྔགས་དང་། ཧཱུྃ་ནཱ་ག་རཱ་ཛ་ས་མ་ཡ་ཛཿཛཿ ཤིག་ཤིག །ཁྲོལ་ཁྲོལ། ཆོད་ཆོད། བྱད་ཁྲོལ་ཅེས་བརྗོད་བཞིན་དུ་བྱད་ཐག་རྣམས་དུམ་བུར་བཅད། ནཱ་ག་རཱ་ཛ་བྱད་ཁྲོལ་ཁྲོལ། ཞེས་པས་སྐུད་རོ་རྣམས་ཀླུ་གཟུགས་ཀྱི་ཕྱོགས་སུ་བསྐྱལ། མ་འབྱོར་པ་དང་སོགས་ནས། དེ་ཀུན་ཁྱོད་ཀྱིས་བཟོད་མཛད་རིགས། ཞེས་དང་། ཡིག་བརྒྱ་ལན་གསུམ་གྱིས་ནོངས་པ་བཤགས། སྔར་བསྒོམས་པའི་འོད་ཀྱི་ལྕགས་རི་མི་དམིགས་པར་བསམ་ལ། གཏོར་གླུད་རྣམས་ཁ་ཕྱིར་ལ་བསྟན། སྨན་དང་སྔགས་སོགས་བྱིན་རླབས་ཀྱིས། །ནད་དང་ཉེར་འཚེ་ཀུན་སྤངས་ནས། །དྲིན་ལན་དམ་ཚིག་དྲན་གྱིས་ལ། །རང་རང་གནས་སུ་འགྲོ་བར་གྱིས། །ཨོཾ་མ་ཧཱ་ནཱ་ག་ཨ་དྷི་པ་ཏ་ས་པ་རཱི་ཝཱ་ར་གཙྪ ས་དཀར་ཕྱོགས་ཀྱི་ཀླུ་རྣམས་གཤེགས། གལ་ཏེ་གདུག་པ་ཅན་ད་དུང་སྡོད་སྲིད་པས། གཞན་ཡང་ལས་ལས་གྲུབ་པ་ཡི། །བཀའ་དང་དམ་ལ་མ་ཐོགས་པའི། །གདུག་པ་ཅན་གྱི་ཀླུ་ཚོགས་ཀུན། །བཀའ་ཡི་ཕམ་ཕབ་འདི་ལོངས་ལ། །སོ་སོ་རང་རང་གནས་སུ་དེངས། ཞེས་དང་། ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི༴ ཆོས་ཀྱི༴ དགེ་འདུན༴ ཆོས་ཉིད་གདོད་ནས་དག་ཀྱང་ཆོས་ཅན་རྟེན་ཅིང་འབྲེལ་འབྱུང་བསླུ་བ་མེད་པའི་བདེན་པ་དང་། ཁྱད་པར་དུའང་བཅོམ་ལྡན་འདས་དཔལ་རྟ་མཆོག་རོལ་པ་གཉེན་པོ་ལྷ་བཞིའི་ལྷ་ཚོགས་བཀའ་སྡོད་ཕྱག་བརྙན་སྤྲུལ་པ་ཡང་སྤྲུལ་དང་བཅས་པ་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་རླབས་ཀྱིས། བསྒྲུབ་བྱ་འདི་རྣམས་ལ་གནོད་ཅིང་འཚེ་བར་བྱེད་པའི་ཀླུ་གཉན་ས་བདག་གི་རིགས་སུ་གྱུར་པ་ཐམས་ཅད་དང་བགེགས་དང་ལོག་པར་འདྲེན་པའི་ཚོགས་གང་ཡིན་པ་དེ་དག་འདོད་ཡོན་གྱི་དངོས་པོ་ཟད་མི་ཤེས་པ་བྱིན་པ་འདིས་ཚིམ་པར་གྱིས་ལ་སའི་ཕྱོགས་འདིར་མ་གནས་པར་སོ་སོ་རང་གི་གནས་སུ་བདེ་བར་དེངས་ཤིག །གལ་ཏེ་མི་འགྲོ་ཞིང་འདུག་པ་གྱུར་ན་ཁྲོ་བོའི་ཡེ་ཤེས་ཀྱི་རྡོ་རྗེ་མེ་རབ་ཏུ་འབར་བ་འདིས་ཁྱེད་རྣམས་ཀྱི་མགོ་བོ་ཚལ་པ་བརྒྱར་འགས་པར་འགྱུར་ཏ་རེ། ཧཱུྃཿ གཉེན་པོ་ལྷ་བཞི་ཡོངས་རྫོགས་དཀྱིལ་འཁོར་དུ། །སྣང་སྲིད་རྣམ་དག་ཡེ་ཤེས་ལྷ་ཡི་ཚོགས། །ཀུན་བཟང་ཆོས་ཀྱི་དབྱིངས་ལས་མ་གཡོས་ཀྱང་། །རིག་རྩལ་རྣམ་དག་ཐབས་ཤེས་གཡུང་དྲུང་ལྷ། །འདི་ལ་ལོག་པར་ལྟ་བའི་དགྲ་དང་བགེགས། །བདུད་སྡེ་དཔུང་བཅས་ཐམས་ཅད་ཕྱིར་དེངས་ཤིག །རྩ་སྔགས་མཐར། སུམ་བྷ་ནི། བརྗོད་ཅིང་། གུལ་གུལ་གྱིས་བདུག །ཡུངས་དཀར་གྱིས་བྲབས། རོལ་མོའི་སྒྲ་དྲག་པོ་དང་བཅས་ཏེ་གཏོར་གླུད་རྣམས་ཀླུ་གནས་པའི་སར་ཆུ་མིག་གམ་རྒྱ་མཚོར་འབབས་པའི་ཆུ་ཀླུང་དུ་བསྐྱལ། བྱ་ཁྱུང་གི་ཕྱག་རྒྱ་དང་བཅས། ག་རུ་ཌཱ་ཧཾ་སེ་ཧཾ་སེ་ཙ་ལེ་ཙ་ལེ་སྭཱ་ཧཱ། ཞེས་པས་བདག་སྲུངས་ལ། ཧཱུྃཿ བདག་ཉིད་དབང་ཆེན་ཁྲོ་བོའི་ཐུགས་ཀ་ནས། །དྲག་པོའི་བྱིན་རླབས་མཚོན་ཆའི་འོད་ཟེར་འཕྲོ། །མཚོན་ཆའི་གུར་ཁང་ཡེ་ཤེས་མེ་དཔུང་འབར། །ཕྱོགས་མཚམས་སྟེང་འོག་ཀུན་ཏུ་ཁྱབ་པར་སྲུངས། །ཨོཾ་བཛྲ་ཙ་ཀྲ་ཏིཀྵྞཱ་ཀརྨ་ཀཱི་ལ་ཡ་ཛྭ་ལ་རཾཿ ཞེས་བརྗོད་པས་ཕྱོགས་མཚམས་སྟེང་འོག་ཐམས་ཅད་རྡོ་རྗེའི་ས་གཞི་རྭ་བ་དྲྭ་བ་གུར་བླ་བྲེ་ཡེ་ཤེས་ཀྱི་མེ་རི་མེ་དཔུང་མཚོན་ཆ་སྣ་ཚོགས་པའི་སྲུང་བའི་འཁོར་ལོ་ཡངས་ཤིང་རྒྱ་ཆེ་བ་ཅིས་ཀྱང་མི་ཆོད་མི་ཤིགས་པར་གྱུར་པའི་མོས་པ་མཛོད། དེ་ལྟར་ཕྱི་རོལ་གྱི་ཕྱོགས་ཐམས་ཅད་རྡོ་རྗེའི་སྲུང་བའི་གུར་གྱིས་བཅིངས་ཏེ། སླར་ཡང་ཁྱེད་རང་རྣམས་ཀྱི་སྒོ་གསུམ་ལ་བསྲུང་པར་བྱ་བའི་སླད་དུ། སློབ་དཔོན་གྱི་ཕྱག་ན་ཐོགས་པའི་ཡེ་ཤེས་ཀྱི་རྡོ་རྗེ་དེ་ཉིད་གནས་བདུན་དུ་རེག་པ་ལ་བརྟེན་ནས། རྡོ་རྗེ་དེ་ལས་དེ་འདྲ་བ་དཔག་ཏུ་མེད་པ་བྱུང་སྟེ། ཁྱེད་རང་རྣམས་ཀྱི་ལུས་ལ་རྡོ་རྗེའི་གོ་ཁྲབ་བཞུ་བླུགས་ཀྱི་ཚུལ་དུ་གྱུར་ནས། དེང་ཕྱིན་ཆད་ནད་གདོན་ཉེར་འཚེ་གང་གིས་ཀྱང་གླགས་མི་རྙེད་པར་བསྲུང་བར་བྱས་པའི་མོས་པ་མཛོད། བསྙེན་སྔགས་དང་། ལས་སྦྱོར་གྱི་མཐར། བཛྲ་རཀྵ་རཀྵཿ བཏགས་སྟེ། སྤྱི་བོ། མདུན་རྒྱབ། དཔུང་པ་གཡས་གཡོན། དཔྱིའམ་པུས་མོ་གཡས་གཡོན་སྟེ་གནས་བདུན་དུ་རྡོ་རྗེ་རྒྱ་གྲམ་དུ་བཞག་ལ་བསྲུང་། དེ་ལྟར་འགལ་རྐྱེན་ཀླུ་གཉན་ས་བདག་གི་གདོན་གྱིས་བཅིངས་པ་འགྲོལ་བ་སྔོན་དུ་སོང་ནས། སླར་ཡང་ནམ་མཁའ་དང་མཉམ་པའི་ཞེས་སོགས་སེམས་བསྐྱེད་གསལ་གདབ་ནས་མཚམས་སྦྱར་ལ། འཇུག་པ་དངོས་གཞི་དང་བཅས་པའི་དབང་བསྐུར་བ་ལོག་ནས་འབྱུང་བ་ལྟར་བྱའོ། །ཕྱག་ན་པདྨོ་ཞི་དྲག་གིས། །ཐུགས་རྗེའི་བདུ༷ད་རྩི༷འི་རོལ་པའི་མཚོ། བསྲུབས་སྐྱེས་ཕྲིན་ལས་ལྗོན༷་བཟ༷ང་འདིས། །ཉེར་འཚོའི་ཚ་གདུངས་འཇིལ་གྱུར་ཅིག །ཞེས་པའང་ཀུན་མཁྱེན་ཆེན་པོ་ཉིད་ཀྱི་གསུངས་རྡོ་རྗེའི་ཚིག་རྐང་རྩ་བར་བཟུང་། བཀའ་གཏེར་དག་སྣང་གི་མན་ངག་ཟབ་མོ་དུ་མས་ཟུར་བརྒྱན་ཏེ་རིག་འཛིན་གྱི་བཙུན་པ་རྡོ་རྗེ་ཐུགས་མཆོག་རྩལ་གྱིས་སྦྱར་བའི་དགེ་བས་མཐའ་ཀླས་པའི་འགྲོ་བ་ཐམས་ཅད་འོག་གདོན་གྱི་འཇིགས་པ་ལས་མྱུར་དུ་གྲོལ་བའི་རྒྱུར་གྱུར་ཅིག །སརྦ་དཱ་ཤྲེ་ཡོ་བྷ་བ་ཏུ།། །།

[edit]

bcom ldan 'das gnyen po lha bzhi la brten nas klu'i gdon dgrol gyi cho ga bya tshul bdud rtsi'i ljon bzang / @#/_/bcom ldan 'das gnyen po lha bzhi la brten nas klu'i gdon dgrol gyi cho ga bya tshul bdud rtsi'i ljon bzang bzhugs so/__/na mo gu ru b+h+yaH__rgyal ba kun gyi sku gsung thugs/__/gcig bsdus khrag 'thung rol pa'i lhar/__/btud nas 'og gdon 'grol ba'i tshul/__/bdud rtsi'i ljon bzang 'di na 'khrungs/__de la gnas dben par stegs kyi khar ras bris kyi dkyil 'khor dang /__de'i dbus su many+dzi'i steng du bum pa bcud ldan kha rgyan mgul chings can bkod pa'i kha rgyan gyi mdun du lha tsakra/__bum pa'i mdun du sngags byang /__g.yas su phyag mtshan/__g.yon du nor bu dbang gi rgyal po'i gzugs kyi tsaka? li/__nye logs ci bde bar/__brub khung du ling+ga dang /__sgrol gri/__phur pa/__me hom sogs dang /__mthar sman raka gtor mchod kyis bskor ba ni yi dam gyi dkyil 'khor dang /__g.yas g.yon sogs gang rigs su klu'i dkyil 'khor ni/__grub na dogs gnas kyis bkrams pa'i khar ne'u gseng mtshon pa'i spang tswa sngon can dras pa'i mtha' bskor du shing sna gang 'dzoms bkod pas mdzes par btsugs/__dar dmar po dang ras dar gyi 'phan la sogs pas mdzes par bgyis pa'i gzhir rdul tshon gyis pad+ma 'dab brgyad bris pa'i dbus su klu gzugs sbrul mgo'i gdengs ka can/__stod lha'i lus can thal mo sbyar ba smad sbrul mjug 'khyil pa'i rnam pa can dang /__'dab ma brgyad la'ang klu gzugs de las chung ba re re'am/__bshos bu sbrul dkris can brgyad/__de dag gi phyogs bzhir klu gdon gyi gzugs glang /__sdigs pa/__sbal pa/__chu srin gyi mgo can re'am bshos bu re/__ma grub na zangs gzhong sogs snod gtsang mar 'bras dkar gyi tshom bu dgu bkod pa'i dbus su klu gzugs dang /__phyogs mtshams rnams su bshos bu re re/__gang ltar yang de'i mdun du zangs gzhong gi nang sgrub bya'i glud gzugs che ba klu sman khrol bu dkar chab dang bcas pa/__snod gzhan gtsang ma zhig tu sbrul/__sbal pa/__lcang mo/__nya/__smrig bu/__tsangs pa/__dung /__chu srin/__rus sbal/__sdom/__sdigs pa/__rta bla/__mgron bu/__nya lcibs/__chu rta/__chu lug__/chu ra/__sram/__chu bya/__chu sreg__/chu byi ste klu nor nyer gcig dang /__ril bu nyer gcig__/glud chung nyer gcig__/snod gzhan zhig tu 'o chol klu sman btab pa spro na skyogs dang bcas pa bzhag__/klu'i dkyil 'khor gyi steng du khrus bum gyi khar smyag shad/__bal bu/__lcang ma/__'om bu/__ku sha__/rma bya'i mdangs rnams phon bor bsdams pa'i byabs rdzas sam/__yang na rma bya'i mdangs rkyang pas kyang 'thus/__slob dpon gyi mdun du las bum/__rdor dril/__DA ma ru/__byad thag sngo dmar/__gul yungs sogs 'og tu mkho ba'i yo byad rnams tshogs par byas nas/__bdag mdun dbyer med kyi bskyed bzlas sngon du 'gro bas/__rnam bum la dmigs kyis bsal ba'i bzlas pa ci 'grub dang /__las bum du skad cig gis khro bo bdud rtsi 'khyil pa gsal ba'i sku las rdo rje bdud rtsi'i rdul phra rab babs pas bum pa gang bar bsam la/__a mr-i ta/__ci nus bzlas mthar mchod cing bstod/__oM AHhU~M gis dung chos kyi chu mchod yon gyi tshul du phul bas bum pa'i lha 'od du zhu bas bum chu dang ro gcig tu gyur par bsam/__bdag 'jug rgyas par blangs ba'am/__rig pa'i me tog dor ba tsam gyis 'jug pa sngon du 'gro bas slob ma 'jug par gsol ba gdabs/__khrus bum/__a mr-i tas bsangs/__swa b+hA was sbyangs/__bum pa mi dmigs stong pa'i ngang las:__gzhal yas mtshan nyid rdzogs pa'i dbus su:__siM las seng ge dkar mo'i steng du:__thugs rje chen po seng ge sgra ni:__sku mdog dkar gsal gangs ri lta bu:__rin chen pad+ma'i rgyan gyis mdzes pa:__zhal gcig phyag gnyis phyag g.yas gdan gnon:__g.yon pas sdig mdzub pus mo'i thad du:__bsgreng pa'i rtse la sbrul dkar rab dkris:__ri dwags pags pas nu ma bkab cing :__sku smad dar dmar stod g.yogs dang bcas:__phyed skyil zhabs gnyis mngon par 'gying ba'i:__gnas gsum 'bru las 'od zer 'phros pas:__po tA la nas spyan 'dren dzaHhU~M ba~M hoHsa gnyis med rten la bzhugs mdzod:__ces dam tshig pa bskyed/__hrIH__rigs mchog dag pa 'od dpag med mgon gyi:__drung du 'gro ba 'dul bar dam bcas pa'i:__thugs rje chen po 'phags pa spyan ras gzigs:__deng 'dir 'gro ba'i don du spyan 'dren no:__'gro ba'i nyon mongs sel bar zhal bzhes pa'i:__thugs rje brtse ldan 'phags pa spyan ras gzigs:__deng 'dir 'gro ba'i nyon mongs grib sel phyir:__ma thog myur du gnas 'dir gshegs su gsol:__badz+ra sa ma ya dzaHdzaHsa spyan drangs/__dzaHhU~M ba~M hoHsa bstims/__pad+ma ka ma la ye s+t+waMHgyis gdan 'bul/__a ti pu hoH__pra ti pu hoHsa phyag bya/__oM AR+Ya lo ke shwa ra sed+ha nA da sa pa ri wA ra ar+g+haM sogs kyis mchod/__hrIH__dri med sku yi mdangs kyis gdon tshogs zhi:__rnam dag gsung gi zer gyis sgrib gnyis bkru:__mkhyen brtses 'gro kun smin cing grol bar mdzad:__thugs chen seng ge sgra la phyag 'tshal bstod:__ces pas bstod/__thugs kar zla ba'i dkyil 'khor gyi dbus su hrIHyig gi mthar sngags kyi phreng bas bskor ba/__de las bdud rtsi'i rgyun babs pas bum pa gang bar bsam la/__oM AHhrI sid+ha nA da hU~M phaTaH__ci nus dang /__mthar/__na mo rat+na tra yA ya/__na mo AR+Ya a ba lo ki te shwA rA ya/__bo d+hi satwa ya/__mahA satwa ya/__mahA ka ru Ni ka ya/__tad+ya thA/__oM a ka Te/__bi ka Te/__ni ka Te/__ka TaM ka Te/__ka ro Te/__ka ro Ta/__bid+yA swA hA/__zhes pa'ang bzlas/__sngar bzhin mchod cing bstod la nongs pa bshags/__mchod yon phul la/__lha 'od du zhu nas bum chu bdud rtsi'i rang bzhin du gyur par bsam/__de nas klu'i yo byad rnams la dmigs te/__rdo rje gnod sbyin gyis phyag rgya dang /__oM badz+ra yak+Sha hU~M gis bsangs/__rdo rje me yi phyag rgya/__oM badz+ra dz+wa la a na la ha na da ha pa tsa ma tha b+hany+dza ra Na hU~M phaTaHces dang /__swa b+hA bas sbyangs/__stong pa'i ngang las b+h+rU~M las rin po che'i snod yangs shing rgya che ba'i nang du/__bcud rnams bdud rtsi'i rgya mtsho chen po klu rnams tshim zhing nad kun gso ba'i bde bar skyed par byed pa'i byed las dang ldan par gyur/__rdo rje bsdam pa'i phyag rgyas/__a kA ro dang /__nam mkha' mdzod kyi sngags rgyas byin gyis brlab/__mdun dkyil la dmigs te/__a mr-i tas bsang /__swa b+hA was sbyang /__stong pa'i ngang las mdun du brag gser gyi bya skyibs can gyi 'og tu/__mtsho/__rdzi__lteng ka__/chu mig__/khron pa/__'babs chu/__ne'u gsengs/__spangs ljongs/__skyed tshal/__khang bzang sogs nyams dga' ba'i nang du klu rgyal wA ru Nas gtso byas klu chen brgyad stod mi la smad sbrul mjug can/__rin po che'i rgyan gyis spras pa/__klu rigs grangs med pas bskor bar bsam la/__lcags kyu'i phyag rgya dang bcas/__rang gi thugs ka'i sa bon las 'od zer 'phros pas klu rgyal wA ru Na la klu chen brgyad dang /__gzhan yang 'jig rten gyi khams kyi klu gnyan sa bdag grangs med pa'i 'khor gyis bskor ba zla ba'i gdan la rlung gis bskyod de 'ur sgra dang bcas badz+ra sa mA dzaH__oM ba tA li ba tA li ma hA ba tA li hU~M hU~M dzaHdzaHswA hA/__phyag na rdo rje'i mthu stobs dang /__/rta mgrin dbang gi byin rlabs kyis/__/gtso bo klu chen brgyad po dang /__/rgyal rigs rje rigs dmangs rigs dang /_/bram ze gdol pa la sogs pa/__/ri rab rtse dang rgya mtsho'i gting /__/steng 'og phyogs mtshams gang gnas klu/__/gnas 'dir spyan 'dren gshegs su gsol/__/oM A gats+tsha A gats+tsha nA ga ad+hi pa tA ye sarba b+hUr+b+hu pa phruM phu swA hA/__nA ga rA dza sa pa ri wA ra sa ma ya hU~M dzaMHdzaH__dzaHhU~M ba~M hoH__zhes pas mgron thabs su bkug nas gzugs la bstims/__de dag gi mtha' mar 'od kyi lcags ris bskor nas las ma grub par phyir 'gro sa med par bsam ste/__de ni klu'i 'khu ldog mi 'ong ba'i gdams pa yin no/__/rang rang dgyes pa bskyed nus pa'i/__/yid kyis sprul pa'i gnas mchog 'dir/__/pad+ma'i gdan la rab bzhugs nas/__/mchod pa'i tshogs rnams bzhes su gsol/__/pad+ma ka ma la ye s+t+waM gyis gdan phul/__ma hA nA ga a d+hi pa ta ye gr-ih+Ne daM ar+g+haM swA hA/__de bzhin du/__puSh+paM/__d+hU paM/__dI paM/__gan+d+haM rnams sbyar bas spyir mchod/__gdengs ka nor bu 'bar ba'i 'od kyis ni/__/sa 'og mun pa ma lus sel mdzad cing /___/bstan la rab dga' mthu stobs bsam mi khyab/__/klu rgyal 'khor dang bcas la bstod par bgyi/__/ces bstod/__bye brag tu dkor cha rnams/__sam+b+ha ra lan bdun re'i mthar/__de bzhin gshegs pa bzhi'i mtshan brjod la bsngos/__oM/__mtha' yas dang ni 'jog po dang /__/stobs kyi rgyu dang rigs ldan dang /__/nor rgyas dang ni dung skyong dang /__/pad+ma dang ni chu lha dang /__rgya mtsho rgya mtsho chen po dang /__/dpal gyi 'od dang 'od po dang /__/klu rgyal gtsug na rin chen sogs/__/klu chen 'khor bcas gtor ma bzhes/__/mdzes pa'i dkar gsum gtor ma ni/__/mngar gsum 'o ma'i rgya mtsho che/__/rin chen phreng ba'i them skas can/__/klu yi gnod pa skyob byed pa/__/mthun pa'i rdzas su 'di gyur cig__/bdag cag 'khor dang bcas rnams la/__/klu las gyur pa'i gnod pa ni/__/mthong ba'i dug dang reg pa'i dug__/bsam ngan dug dang kha rlangs dug__/de la sogs pa'i dug rnams kun/__/yud tsam gcig la zhi gyur cig__/bdag bas gces pa'i rdzas khyer la/__/bdag la gnod par ma byed cig__/ces pas phrin las bcol bas/__klu rgyal 'khor bcas dges shing thal mo sbyar nas bka' nyan pa'i tshul gyis 'khod par bsam la/__seng+ge sgra'i rtsa sngags dang gzungs sngags mthar/__nA ga rA dza sa pa ri wa ra sarba duHkha shAn+tiM ku ru ye swA hA/__zhes btags pa lan bdun gyis khrus bum gyi chu dang klu sman bsres pa klu gzugs rnams la sbreng zhing /__klu gnyan sa bdag rnams kyi nad dang sdug bsngal thams cad zhi nas lus sems bde bas khyab par bsam/__chos rnams thams cad rgyu las byung /__zhes sogs kyis chos sbyin bya/__de ltar na chos dang zang zing gi sbyin pa 'di'i mthu la brten nas klu gnyan sa bdag gi rigs su gyur pa thams cad dang /__bye brag tu yang bdag cag 'khor dang bcas pa la gnod cing lan chags pa'i klu gnyan sa bdag thams cad tshim zhing mnyes par gyur nas/__gnod pa dang gdug pa'i bsam pa zhi zhing phan pa dang zhi ba'i byang chub kyi sems dang ldan par gyur cig__/zhes smon lam gdab/__de nas dkyil 'khor yol bas sgribs/__sgrubs bya rnams mdun du 'khod par/__yan lag dang nying lag rnams byad thag sngo dmar gyis bcings pa'i sne mo klu gzugs la gtad de 'di skad ces mtshams sbyar bar bya'o/__/'o/__da lam 'dir khyed rang rnams la thog mar klu'i gdon dgrol byed pa'i skabs su bab pa yin pas/__mdun du yod pa'i klu'i gzugs brnyan klu chen brgyad 'khor dang bcas par dngos su mos shing /__khyed rang rnams kyang klu'i byad du bcug pa'i mtshon byed byad thag sbrul sngo dmar gyi rnam pas yan lag dang nying lag thams cad bcings te mgul bskyod mi nus pa dang /__lus nad kyi thebs/__ngag lkug__/yid myos te/__mgon skyabs dang bral ba la/__slob dpon khro bo'i rgyal po dpal rta mchog rol pa gnyen po lha bzhi'i bdag nyid can du bzhugs pas sa bdag klu gnyan rnams dkor chas tshim par bgyis te bka' bsgos pa'i mos pa mdzod/__hrIH__nga ni rta mgrin rgyal po yin/__/nga ni phyag na rdo rje yin/__/nga ni bya khyung rgyal po yin/__/nga ni klu yi gnyen po yin/__/kye/__klu brgyad zas su za ba yin/__/klu 'bum gdan du bting ba yin/__/klu lngas dbu la brgyan pa yin/__/klu rnams nga yi bka' la nyon/__/tshur gshegs tshur gshegs klu yi gtso/__/wA ru Na sogs klu chen brgyad/__/sras dang btsun mo g.yog 'khor bcas/__/so so'i bka' nyan sdod byed tshogs/__/sprul pa 'dzam gling khyab par ston/__/gnod pa'i sbyor ba mi la gtong /__/gdug rtsub nad du mdze nad dang /__/zha bo grum po yan lag gzengs/__/gdon gyi bsam sbyor ngan pas 'dzin/__/klu yi gdon du gyur pa la/__/rtsi sman 'o ma'i bdud rtsi 'bul/__/khyed kyi lus sems tshim gyur cig__/ngan sems gdug rtsub gdon 'di khrol/__/klu gtor ril bu gtor ma 'bul/__/khyod kyi gsol zas dam par bzhes/__/rgyu sbyor gdon gyis zin pa khrol/__/ngar glud rnam shes ldan pa 'di/__/khyed la 'dod pa'i rdzas su 'bul/__/rgyu sbyor gdon gyis zin pa khrol/__/gnod dang nad las thar bar mdzod/__/khrol cig khrol cig klu yi bu/__/de ring mi 'di mi gtong zhing /__/de ring gdon 'di 'grol mi byed/__/de ring nad 'di mi 'grol na/__/rta mchog rgyal po'i bka' bcag cing /__/phyag na rdo rje'i bka' yang bcag__/bya khyung rgyal po'i bka' bcag pas/__/mdze nad sna dgu khyed la 'ong /__/mig nad me 'bar khyod la 'ong /__/long ba 'on pa khyod la 'ong /__/mdze nad shu ba khyed la 'ong /__/bla med 'bras bu thob mi 'gyur/__/'on kyang de la ma thug gi/__/de ring mi 'di khyod kyis thong /__/de ring gdon 'di lhod kyis khrol/__/klu yi gdon gyis zin pa khrol/__/gnyan gyi gdon gyis=__sa bdag gdon gyis=__klu bdud gdon gyis=__klu btsan gdon=__klu srin gdon=__gza' klu'i gdon=__rgyal bsen gdon gyis zin pa khrol/__/oM pra ti raM swA hA/__phyi nA ga gu le raM swA hA/__nA ga rA dza hU~M phaTaH__ces brjod cing /__rtsi sman 'o ma'i bdud rtsi 'bul/__zhes pa'i tshig byung res dang bstun/__las rdor gyis klu sman re thur mas bcus ste glud che ba'i zangs gzhong nang du 'bul/__/de bzhin du/__klu gtor ril bu'i gtor ma 'bul/__zhes pa dang bstun pa'i ril bu re dang /__ngar glud rnams shes ldan pa 'bul/__/zhes pa dang bstun te glud chung re rnams zangs gzhong du 'bul ba lan nyer gcig gi bar bya/__nad pa min pa'i bsgrub bya spyi 'gros la 'o chol dang ril bu glud dang bcas pa sdebs su phul kyang mthus so/__/de nas khrus bum du rnam rgyal bum pa'i chu cung zad bsres pa thogs te/__de ltar mgron rnams dkor chas tshim par bgyis te bka' bsgo ba sngon du song nas/__slob dpon gyi phyag tu bum pa ye shes kyi bdud rtsis gang ba re thogs te khyed rang rnams la khrus byas pa la brten nas/__spyi bo tshangs pa'i bu ga nas mar byung /__lus kyi nang thams cad gang /__tshe 'khor ba thog ma med pa nas bsags pa'i nad gdon sdig sgrib bag chags dang bcas pa thams cad byang zhing dag par byas/__khyad par du lus la gnas pa'i klu gdon thams cad sbrul nag__/gnyan rnams sdig pa/__sa bdag rnams sbal lcong /__gdon phra mo rnams sA ku tsI'i rnam par 'thon nas mdun gyi gdon gzugs so sor thim pas lus ngag yid gsum nyer 'tshe dang bral ba'i mos pa mdzod/__ces brda sbyar la/__ji ltar bltams pa/__sogs kyi mthar/__hrIHa pa ri mi tA A yur+dz+nyA na pad+ma kro d+ha h+ya gr-I ba badz+ra pA Ni ga ru DA hU~M phaTa?H__ces yi dam gyi sngags dang /__seng ge sgra yi rtsa sngags dang gzungs sngags mthar/__na mo bud+d+hA ya/__nA ga du/__tsan+d+he tsan+d+he mi li mi li mi li/__b+han+d+ha b+han+d+ha/__nA ga ni swA hA/__zhes las sbyor gyi sngags gshams su/__rdo rje slob ma'am/__sbyin pa'i bdag po 'di rnams kyi tshe 'khor ba thog ma med pa nas bsags pa'i sdig pa dang sgribs pa thams cad shAn+tiM ku ru ye swA hA/__nad thams cad shAn+tiM ku ru=__rims thams cad=__grib dang mi gtsang ba thams=__rmi lam dang mtshan ma ngan pa thams=__ltas dang bskal ba ngan pa=__dus ma yin pa'i 'chi ba'i 'jigs pa=__gza' dang rgyu skar gyi gnod pa=__klu gnyan sa bdag gi gnod pa thams cad=__btsan dang rgyal bsen gyi gnod pa thams cad=__gdon dang bgegs dang log par 'dren pa thams=__bar du gcod pa dang mi mthun pa'i phyogs thams cad shAn+tiM ku ru ye swA hA/__zhes dang /__spro na/__'di ni sbyin pa'i rang bzhin chu/__zhes sogs dang /__mtshams rnams su sngags spel tshig dang bcas pas bkru/__bum chu cung zad gcig khar 'dzin du bcug la/__de nas byabs pa'i slad du slob dpon gyi phyag gi rma bya'i mdangs kyi thig le'i dbus su zla ba'i gdan la hU~MHyig gi mthar sngags kyi phreng bas bskor ba las 'od zer 'phros/__khyed rang rnams kyi lus la phog pas nad gdon bar gcod mi mthun pa'i lhag ma thams cad rdo khab len gyi lcags phye blangs pa ltar bsdus ste kha nang gi chu la thim pa de nyid phyi'i rgya mtsho chen por dor pa'i mos pa mdzod/__bzhi brgya rtsa bzhi'i nad rnams dang :__'gal rkyen nyi khri chig stong dang :__ye 'drog sum brgya drug bcu dang :__bgegs rigs stong phrag brgyad cu sogs:__mi mthun byang zhing dag gyur cig__/ces dang /__sngar bzhin sngags spel tshig dang bcas pa'i/__shAn+tiM ku ru'i tshab tu/__a pa na ye swA hA/__sbyar bas byab rdzas kyis byabs mthar kha nang gi chu khrus khu'i gseb tu 'dor/__slar yang gnod bya dang gnod byed kyi 'brel pa bcad pa'i slad du/__slob dpon dpal rta mchog rol pa gnyen po lha bzhi'i bdag nyid can gyi phyag na thogs pa'i ye shes kyi ral gri me rab tu 'bar bas byad thag rnams bcad de/__'od kyi rnam par gdon gzugs rnams la sprad pas/__khyed rang rnams kyi lus ngag yid gsum bde ba dang ldan par gyur pa'i mos pa mdzod/__ces brda sbyar la/__yi dam gyi sngags gsham du/__las sbyor gyi sngags dang /__hU~M nA ga rA dza sa ma ya dzaHdzaH__shig shig__/khrol khrol/__chod chod/__byad khrol ces brjod bzhin du byad thag rnams dum bur bcad/__nA ga rA dza byad khrol khrol/__zhes pas skud ro rnams klu gzugs kyi phyogs su bskyal/__ma 'byor pa dang sogs nas/__de kun khyod kyis bzod mdzad rigs/__zhes dang /__yig brgya lan gsum gyis nongs pa bshags/__sngar bsgoms pa'i 'od kyi lcags ri mi dmigs par bsam la/__gtor glud rnams kha phyir la bstan/__sman dang sngags sogs byin rlabs kyis/__/nad dang nyer 'tshe kun spangs nas/__/drin lan dam tshig dran gyis la/__/rang rang gnas su 'gro bar gyis/__/oM ma hA nA ga a d+hi pa ta sa pa rI wA ra gats+tsha_sa dkar phyogs kyi klu rnams gshegs/__gal te gdug pa can da dung sdod srid pas/__gzhan yang las las grub pa yi/__/bka' dang dam la ma thogs pa'i/__/gdug pa can gyi klu tshogs kun/__/bka' yi pham phab 'di longs la/__/so so rang rang gnas su dengs/__zhes dang /__na mo rje btsun rtsa ba dang brgyud par bcas pa'i dpal ldan bla ma dam pa rnams kyi bka' bden pa dang /__sangs rgyas kyi=__chos kyi=__dge 'dun=__chos nyid gdod nas dag kyang chos can rten cing 'brel 'byung bslu ba med pa'i bden pa dang /__khyad par du'ang bcom ldan 'das dpal rta mchog rol pa gnyen po lha bzhi'i lha tshogs bka' sdod phyag brnyan sprul pa yang sprul dang bcas pa rnams kyi bden pa dang /__bden pa chen po'i byin rlabs kyis/__bsgrub bya 'di rnams la gnod cing 'tshe bar byed pa'i klu gnyan sa bdag gi rigs su gyur pa thams cad dang bgegs dang log par 'dren pa'i tshogs gang yin pa de dag 'dod yon gyi dngos po zad mi shes pa byin pa 'dis tshim par gyis la sa'i phyogs 'dir ma gnas par so so rang gi gnas su bde bar dengs shig__/gal te mi 'gro zhing 'dug pa gyur na khro bo'i ye shes kyi rdo rje me rab tu 'bar ba 'dis khyed rnams kyi mgo bo tshal pa brgyar 'gas par 'gyur ta re/__hU~MH__gnyen po lha bzhi yongs rdzogs dkyil 'khor du/__/snang srid rnam dag ye shes lha yi tshogs/__/kun bzang chos kyi dbyings las ma g.yos kyang /__/rig rtsal rnam dag thabs shes g.yung drung lha/__/'di la log par lta ba'i dgra dang bgegs/__/bdud sde dpung bcas thams cad phyir dengs shig__/rtsa sngags mthar/__sum b+ha ni/__brjod cing /__gul gul gyis bdug__/yungs dkar gyis brabs/__rol mo'i sgra drag po dang bcas te gtor glud rnams klu gnas pa'i sar chu mig gam rgya mtshor 'babs pa'i chu klung du bskyal/__bya khyung gi phyag rgya dang bcas/__ga ru DA haM se haM se tsa le tsa le swA hA/__zhes pas bdag srungs la/__hU~MH__bdag nyid dbang chen khro bo'i thugs ka nas/__/drag po'i byin rlabs mtshon cha'i 'od zer 'phro/__/mtshon cha'i gur khang ye shes me dpung 'bar/__/phyogs mtshams steng 'og kun tu khyab par srungs/__/oM badz+ra tsa kra tik+Sh+NA karma kI la ya dz+wa la raMH__zhes brjod pas phyogs mtshams steng 'og thams cad rdo rje'i sa gzhi rwa ba drwa ba gur bla bre ye shes kyi me ri me dpung mtshon cha sna tshogs pa'i srung ba'i 'khor lo yangs shing rgya che ba cis kyang mi chod mi shigs par gyur pa'i mos pa mdzod/__de ltar phyi rol gyi phyogs thams cad rdo rje'i srung ba'i gur gyis bcings te/__slar yang khyed rang rnams kyi sgo gsum la bsrung par bya ba'i slad du/__slob dpon gyi phyag na thogs pa'i ye shes kyi rdo rje de nyid gnas bdun du reg pa la brten nas/__rdo rje de las de 'dra ba dpag tu med pa byung ste/__khyed rang rnams kyi lus la rdo rje'i go khrab bzhu blugs kyi tshul du gyur nas/__deng phyin chad nad gdon nyer 'tshe gang gis kyang glags mi rnyed par bsrung bar byas pa'i mos pa mdzod/__bsnyen sngags dang /__las sbyor gyi mthar/__badz+ra rak+Sha rak+ShaH__btags ste/__spyi bo/__mdun rgyab/__dpung pa g.yas g.yon/__dpyi'am pus mo g.yas g.yon ste gnas bdun du rdo rje rgya gram du bzhag la bsrung /__de ltar 'gal rkyen klu gnyan sa bdag gi gdon gyis bcings pa 'grol ba sngon du song nas/__slar yang nam mkha' dang mnyam pa'i zhes sogs sems bskyed gsal gdab nas mtshams sbyar la/__'jug pa dngos gzhi dang bcas pa'i dbang bskur ba log nas 'byung ba ltar bya'o/__/phyag na pad+mo zhi drag gis/_/thugs rje'i bduXd rtsiX'i rol pa'i mtsho/__bsrubs skyes phrin las ljonaX bzaXng 'dis/__/nyer 'tsho'i tsha gdungs 'jil gyur cig__/zhes pa'ang kun mkhyen chen po nyid kyi gsungs rdo rje'i tshig rkang rtsa bar bzung /__bka' gter dag snang gi man ngag zab mo du mas zur brgyan te rig 'dzin gyi btsun pa rdo rje thugs mchog rtsal gyis sbyar ba'i dge bas mtha' klas pa'i 'gro ba thams cad 'og gdon gyi 'jigs pa las myur du grol ba'i rgyur gyur cig__/sarba dA shre yo b+ha ba tu//__//