JKW-KABUM-12-NA-014-003

Previous Text Back to Volume PageNext Text

རྡོར་སེམས་ཐུགས་ཀྱི་སྒྲུབ་པའི་བསྙེན་པ་གཏོང་ལུགས།

Wylie title	rdor sems thugs kyi sgrub pa'i bsnyen pa gtong lugs
Location	mkhyen brtse'i bka' 'bum Volume 12, sde tshan 14, Text 3, Pages 496-500 (Folios 8b6 to 10b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	གཏེར་བདག་གླིང་པ་འགྱུར་མེད་རྡོ་རྗེ་ (Gter bdag gling pa 'gyur med rdo rje)
Citation	'jam dbyangs mkhyen brtse'i dbang po. rdor sems thugs kyi sgrub pa'i bsnyen pa gtong lugs. In 'jam dbyangs mkhyen brtse'i dbang po'i bka' 'bum, Vol. 12: 496-500. Khams sde dge rdzong sar dgon: Rdzong sar blo gros phun tshogs, 2020.
Genre	Recitation Manual - bsnyen yig
Cycle	དཔལ་རྡོ་རྗེ་སེམས་དཔའ་ཐུགས་ཀྱི་སྒྲུབ་པ་ (dpal rdo rje sems dpa' thugs kyi sgrub pa)
Deity	rdo rje sems dpa'
Recension Link	Other Versions on this site: JKW-KABAB-01-KA-010
Colophon	།ཞེས་པའང་བློ་དམན་གསར་བུ་འགའ་ལ་ཕན་ཕྱིར་མཁྱེན་བརྩེའི་དབང་པོས་སོ།
	zhes pa'ang blo dman gsar bu 'ga' la phan phyir mkhyen brtse'i dbang pos so

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

རྡོར་སེམས་ཐུགས་ཀྱི་སྒྲུབ་པའི་བསྙེན་པ་གཏོང་ལུགས་བཞུགས་སོ། །རྡོར་སེམས་ཐུགས་ཀྱི་སྒྲུབ་པའི་བསྙེན་པ་གཏོང་ལུགས། ཐོག་མར་གནས་ཁང་ཕྱག་དར་བྱ། གཏོར་སྒམ་ལྟ་བུ་བྱི་བས་མི་གནོད་པར། སྨན་རག་གཏོར་གསུམ། དམ་ཅན་སྤྱི་གཏོར། ཉེར་སྤྱོད་བཅས་རྒྱུན་བཞག་རྒྱུར་བཤམ། གུང་དུ་རྡོར་སེམས་ཕྱག་རྒྱ་གཅིག་པའི་བྲིས་སྐུ་ཡོད་ན་དགྲམ། རང་ཉིད་དང་ཞལ་སྤྲོད་བྱུང་ན་ལེགས། མར་ངོའི་གཟའ་ཚེས་དགེ་བར་ཕྱི་དྲོའི་ཆར་སྒོ་དྲུང་དུ་ཐོ་བརྟན་པོར་བཙུགས། མལ་དུ་འཁོད་ནས་སྔོན་འགྲོ་གཏོང་། ཆོ་ག་ལྟར་བསང་ཆུ་བསྒྲུབ། གཞི་བགེགས་ལ་དཀར་དམར་གཏོར་མ་གཏོང་། ཕྱི་རོལ་དུ་རྒྱལ་ཆེན་ཐོ་འཛུགས་བྱ། ནང་དུ་ལོག་ལ་སྲུང་འཁོར་བསྒོམ། མཆོད་པ་བྱིན་རླབས་བྱ། དམ་ཚིག་གི་འཁོར་ལོ་བསྐྱེད་པ་ནས་བཟླས་པའི་བར་བདག་བསྐྱེད་ལྟར། བཟླས་པ་ཅི་ནུས་བྱ། མཇུག་གི་གསོལ་གདབ་སོགས་མཐར་དབྱུང་། དམ་ཅན་སྤྱི་གཏོར་བཀྲ་ཤིས་བར་འདོན། ཐུན་གྲོལ། སླར་སྲོད་ཐུན་ལ་འཇུག །དེའང་བདག་བསྐྱེད་བརྒྱུད་འདེབས་ནས་བཀྲ་ཤིས་བར། སང་ཉིན་སྔ་བར་ལངས་ལ། ཐོར་ཐུན་གྱི་མགོར་སྔོན་འགྲོ་སོགས་ཁ་ཏོན་གཞན་ཅི་རིགས་དང་། དེ་ནས་རྡོར་སེམས་སྔོན་འགྲོ། དལ་འབྱོར་རྙེད་དཀའ་སོགས་ཀྱི་གསལ་འདེབས་སྔོན་དུ་འགྲོ་བས་སྐྱབས་འགྲོ་གཙོ་བོར་བསགས། ཐུན་གྲོལ་རན་པ་ན་སེམས་བསྐྱེད་མན་སྔོན་འགྲོ་མཐར་དབྱུང་། དངོས་གཞི་བརྒྱུད་འདེབས་ནས་བཀྲ་ཤིས་བར་བདག་བསྐྱེད་ཁྱུགས་ཙམ་རེ་བྱ། དེ་ནས་ཐོར་ཐུན་གྲོལ། དེ་བཞིན་དུ་སྔ་ཐུན། ཕྱི་ཐུན། སྲོད་ཐུན་རྣམས་ལ་མ་གཞི་འདོན་ལུགས་འདྲ། ཕྱི་ཐུན་གྱི་མཇུག་ཏུ་དམ་ཅན་སྤྱི་གཏོར་བྱ། དེ་ལྟ་བུའི་རིམ་པས་སྐྱབས་འགྲོ། སེམས་བསྐྱེད། ཡིག་བརྒྱ། མཎྜལ། བླ་མའི་རྣལ་འབྱོར་ཡན་ལག་བདུན་པ་དང་སྦྲགས་ནས་ཕྱག །བླ་མའི་གསོལ་འདེབས་ཤྭ་ལོ་ཀ་གང་རུང་རྣམས་ཁྲི་སོགས་འདོན། དེ་ལྟར་སྔོན་འགྲོ་གྲུབ་ནས་བསྙེན་པ་དངོས་ལ་འཇུག །དེའང་ཐུན་བཞི་ཀའི་མགོར་སྔོན་འགྲོ་ཁྱུགས་ཙམ་རེ་བྱ་བའམ། ཡང་ན་ཐོར་ཐུན་གྱི་མགོར་ཚར་གཅིག་བྱས་ཀྱང་ཆོག གང་ལྟར་ཡང་བདག་བསྐྱེད་བརྒྱུད་འདེབས་ནས་བཀྲ་ཤིས་པར་ཐུན་རེ་བཞིན་བྱ། ཐུན་གྱི་དངོས་གཞིར། དང་པོ་ཡིག་དྲུག་འབུམ་ཕྲག་བདུན་མ་གྲུབ་པར་བསགས། མཇུག་ཏུ་ཡིག་བརྒྱ་ཅུང་ཟད་རེས་ཆོག །དེ་ཚར་ནས་ཡིག་དྲུག་ཅུང་ཟད་རེ་སྔོན་དུ་འགྲོ་བས་ཡིག་བརྒྱ་ཁོ་ན་གསོག །གྲངས་འབུམ་ཕྲག་གཅིག་དང་ཁྲི་ཕྲག་གཅིག་ལས་མི་ཉུང་བ་བཟླ། དམ་ཅན་སྤྱི་གཏོར་ཕྱི་ཐུན་ཐམས་ཅད་ཀྱི་མཇུག་ཏུ་མ་ཆག་པར་བྱ་དགོས། ཚེས་བརྒྱད་དང་ཡར་མར་ཚེས་བཅུ་སོགས་དུས་བཟང་སྐབས་ཚོགས་མཆོད་མདོར་བསྡུས་རེ་གྲུབ་ན་ལེགས་པས། དམ་ཅན་སྤྱི་གཏོར་གྱི་གཞི་བདག་གཏོར་མ་ཚར་རྗེས། ཡེ་ཤེས་སྐུ་མཆོག་སྔོན་དུ་འགྲོ་བས་ཚོགས་བྱིན་རླབས་ནས་བསྒྲལ་སྟོབ་བར་དཀྱུས་ལྟར། དེ་རྗེས་ཚོགས་ལ་རོལ། ལྷག་མ་གཏོང་། དམ་ཅན་སྤྱི་གཏོར་གཏོར་འབུལ་མན་མཐར་དབྱུང་། དེ་ལྟར་ཐུན་བཞིའི་རིམ་པས་བསྙེན་སྒྲུབ་ཀྱི་སྔགས་གྲངས་རྫོགས་ནས་དངོས་གྲུབ་ལེན་ཆོག་མདོར་བསྡུས་བསྙེན་ཡིག་ལྟར་བྱ། དེ་སྔ་དྲོ་གྲུབ་འཕྲལ་མདུན་བསྐྱེད་སྒྲུབ་མཆོད་ཉིན་ཞག་བདུན་ཙམ་བྱུང་ན་ལེགས་པས། རང་གི་མདུན་དུ་སྟེགས་ཇི་ལྟར་རིགས་པར་དཀྱིལ་འཁོར་མཆོད་གཏོར་སོགས་བཤམས། ཕྱི་ཐུན་ནས་དབུ་བཟུང་སྒྲུབ་མཆོད་ཚར་རེ་རྣམ་གྲོལ་ལམ་བཟང་ལྟར་བྱ། སང་ཉིན་ནས་བཟུང་ཐོར་ཐུན་དང་སྲོད་ཐུན་ལ་བདག་བསྐྱེད་ཚར་རེ་གཏོང་། སྔ་ཐུན་དང་ཕྱི་ཐུན་ལ་སྒྲུབ་མཆོད་ཚར་རེ་བྱེད། དེ་ལྟར་ཉིན་བདུན་དང་དང་པོའི་ཕྱི་ཐུན་བཅས་བསྡོམས་པས་ཆོ་ག་ཚར་བཅོ་ལྔ་འགྲོ། སྒྲུབ་མཆོད་ཚར་བའི་ཕྱི་ཉིན་ནས་ཞག་གསུམ་ལ་སྔ་ཐུན་དང་ཕྱི་ཐུན་ལ་ཞི་བའི་སྦྱིན་སྲེག་ཚར་རེ་བྱ། གྲངས་རྫས་ཏིལ་སྔགས་ཡིག་དྲུག་ཕྲེང་སྐོར་རེའི་གཤམ་དུ། ཨོཾ་སརྦ་པཱ་པཾ་ད་ཧ་ན་བཛྲ་ཡ་སྭཱ་ཧཱ། སྡིག་པ་དང་སྒྲིབ་པ་སྔགས་ཀྱི་ལྷག་ཆད་ཐམས་ཅད་ཤཱནྟིཾ་ཀུ་རུ་སྭཱ་ཧཱ། ཞེས་སྦྱར། དེ་ལྟ་བུའི་རིམ་པས་ཐུན་རེར་སྟོང་ཕྲག་ལྔ་རེ་ཙམ་བྱ། དེ་ལྟར་བྱས་པས་ཉིན་གསུམ་ལ་ཆོ་ག་ཚར་དྲུག །ཉིན་བཞི་པར་སྔ་ཆོག་ཚར་གཅིག་བཅས་བདུན་འགྲོ་བར་བྱས་ནས། སྔ་དྲོ་རྒྱལ་ཐོ་ལེན་འཚམས་གྲོལ་བས་གྲུབ། སྤྱིར་བསྙེན་པ་ཐམས་ཅད་མར་ངོའི་ཕྱི་དྲོ་ལ་མགོ་བཙུགས། ཡར་ངོའི་སྔ་དྲོ་ལ་གྲོལ་བ་ཕྱག་ལེན་དང་། ཚེ་སྒྲུབ་རིགས་ལ་ཡར་ངོའི་སྔ་དྲོ་ལ་མགོ་བཙུགས། ཡར་ངོའི་སྔ་དྲོ་ཞིག་ལ་གྲོལ་བར་མཛད་སྲོལ་སྣང་ངོ་། །ཞེས་པའང་བློ་དམན་གསར་བུ་འགའ་ལ་ཕན་ཕྱིར་མཁྱེན་བརྩེའི་དབང་པོས་སོ། ། ༈

[edit]

rdor sems thugs kyi sgrub pa'i bsnyen pa gtong lugs/ rdor sems thugs kyi sgrub pa'i bsnyen pa gtong lugs bzhugs so/__/rdor sems thugs kyi sgrub pa'i bsnyen pa gtong lugs/__thog mar gnas khang phyag dar bya/__gtor sgam lta bu byi bas mi gnod par/__sman rag gtor gsum/__dam can spyi gtor/__nyer spyod bcas rgyun bzhag rgyur bsham/__gung du rdor sems phyag rgya gcig pa'i bris sku yod na dgram/__rang nyid dang zhal sprod byung na legs/__mar ngo'i gza' tshes dge bar phyi dro'i char sgo drung du tho brtan por btsugs/__mal du 'khod nas sngon 'gro gtong /__cho ga ltar bsang chu bsgrub/__gzhi bgegs la dkar dmar gtor ma gtong /__phyi rol du rgyal chen tho 'dzugs bya/__nang du log la srung 'khor bsgom/__mchod pa byin rlabs bya/__dam tshig gi 'khor lo bskyed pa nas bzlas pa'i bar bdag bskyed ltar/__bzlas pa ci nus bya/__mjug gi gsol gdab sogs mthar dbyung /__dam can spyi gtor bkra shis bar 'don/__thun grol/__slar srod thun la 'jug__/de'ang bdag bskyed brgyud 'debs nas bkra shis bar/__sang nyin snga bar langs la/__thor thun gyi mgor sngon 'gro sogs kha ton gzhan ci rigs dang /__de nas rdor sems sngon 'gro/__dal 'byor rnyed dka' sogs kyi gsal 'debs sngon du 'gro bas skyabs 'gro gtso bor bsags/__thun grol ran pa na sems bskyed man sngon 'gro mthar dbyung /__dngos gzhi brgyud 'debs nas bkra shis bar bdag bskyed khyugs tsam re bya/__de nas thor thun grol/__de bzhin du snga thun/__phyi thun/__srod thun rnams la ma gzhi 'don lugs 'dra/__phyi thun gyi mjug tu dam can spyi gtor bya/__de lta bu'i rim pas skyabs 'gro/__sems bskyed/__yig brgya/__maN+Dal/__bla ma'i rnal 'byor yan lag bdun pa dang sbrags nas phyag__/bla ma'i gsol 'debs shwa lo ka gang rung rnams khri sogs 'don/__de ltar sngon 'gro grub nas bsnyen pa dngos la 'jug__/de'ang thun bzhi ka'i mgor sngon 'gro khyugs tsam re bya ba'am/__yang na thor thun gyi mgor tshar gcig byas kyang chog__gang ltar yang bdag bskyed brgyud 'debs nas bkra shis par thun re bzhin bya/__thun gyi dngos gzhir/__dang po yig drug 'bum phrag bdun ma grub par bsags/__mjug tu yig brgya cung zad res chog__/de tshar nas yig drug cung zad re sngon du 'gro bas yig brgya kho na gsog__/grangs 'bum phrag gcig dang khri phrag gcig las mi nyung ba bzla/__dam can spyi gtor phyi thun thams cad kyi mjug tu ma chag par bya dgos/__tshes brgyad dang yar mar tshes bcu sogs dus bzang skabs tshogs mchod mdor bsdus re grub na legs pas/__dam can spyi gtor gyi gzhi bdag gtor ma tshar rjes/__ye shes sku mchog sngon du 'gro bas tshogs byin rlabs nas bsgral stob bar dkyus ltar/__de rjes tshogs la rol/__lhag ma gtong /__dam can spyi gtor gtor 'bul man mthar dbyung /__de ltar thun bzhi'i rim pas bsnyen sgrub kyi sngags grangs rdzogs nas dngos grub len chog mdor bsdus bsnyen yig ltar bya/__de snga dro grub 'phral mdun bskyed sgrub mchod nyin zhag bdun tsam byung na legs pas/__rang gi mdun du stegs ji ltar rigs par dkyil 'khor mchod gtor sogs bshams/__phyi thun nas dbu bzung sgrub mchod tshar re rnam grol lam bzang ltar bya/__sang nyin nas bzung thor thun dang srod thun la bdag bskyed tshar re gtong /__snga thun dang phyi thun la sgrub mchod tshar re byed/__de ltar nyin bdun dang dang po'i phyi thun bcas bsdoms pas cho ga tshar bco lnga 'gro/__sgrub mchod tshar ba'i phyi nyin nas zhag gsum la snga thun dang phyi thun la zhi ba'i sbyin sreg tshar re bya/__grangs rdzas til sngags yig drug phreng skor re'i gsham du/__oM sarba pA paM da ha na badz+ra ya swA hA/__sdig pa dang sgrib pa sngags kyi lhag chad thams cad shAn+tiM ku ru swA hA/__zhes sbyar/__de lta bu'i rim pas thun rer stong phrag lnga re tsam bya/__de ltar byas pas nyin gsum la cho ga tshar drug__/nyin bzhi par snga chog tshar gcig bcas bdun 'gro bar byas nas/__snga dro rgyal tho len 'tshams grol bas grub/__spyir bsnyen pa thams cad mar ngo'i phyi dro la mgo btsugs/__yar ngo'i snga dro la grol ba phyag len dang /__tshe sgrub rigs la yar ngo'i snga dro la mgo btsugs/__yar ngo'i snga dro zhig la grol bar mdzad srol snang ngo /__/zhes pa'ang blo dman gsar bu 'ga' la phan phyir mkhyen brtse'i dbang pos so/__/_!