ཕྱག་རྡོར་ཨུ་ཙརྻའི་བསྙེན་སྒྲུབ་ལས་སྦྱོར་རྡོ་རྗེའི་མེ་ཆར།

🚧 This website is under continued development. We appreciate your patience!

Previous Text Back to Volume PageNext Text

Wylie title	phyag rdor u tsar+Ya'i bsnyen sgrub las sbyor rdo rje'i me char
Location	mkhyen brtse'i bka' 'bum Volume 9, sde tshan 9, Text 7, Pages 423-434 (Folios 34a6 to 39b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. phyag rdor u tsar+Ya'i bsnyen sgrub las sbyor rdo rje'i me char. In 'jam dbyangs mkhyen brtse'i dbang po'i bka' 'bum, Vol. 9: 423-434. Khams sde dge rdzong sar dgon: Rdzong sar blo gros phun tshogs, 2020.
Genre	Recitation Manual - bsnyen yig  ·  Activity Practices - las tshogs
Deity	phyag na rdo rje
Colophon	།ཞེས་པའང་ཚུལ་འདིའི་རྗེས་གནང་དང་མན་ངག་གི་ལག་ལེན་ཅུང་ཟད་ཐོབ་པ་འཇམ་དབྱངས་མཁྱེན་བརྩེའི་དབང་པོས་དཔལ་གསང་བའི་བདག་པོས་མངོན་སུམ་དུ་རྗེས་སུ་བཟུང་བའི་གྲུབ་པའི་སློབ་དཔོན་སྙེ་མདོ་པ་བླ་ཆེན་ཤཱཀྱ་དཔལ་སོགས་ཀྱིས་མཛད་པའི་ཡིག་རྙིང་མང་པོ་ལས་ཉེར་མཁོ་མདོ་ཙམ་བཏུས་པ་འདིས་ཀྱང་འགྲོ་ཀུན་དངོས་གྲུབ་རྣམ་པ་གཉིས་ལ་དབང་འབྱོར་བའི་རྒྱུར་གྱུར་ཅིག
	zhes pa'ang tshul 'di'i rjes gnang dang man ngag gi lag len cung zad thob pa 'jam dbyangs mkhyen brtse'i dbang pos dpal gsang ba'i bdag pos mngon sum du rjes su bzung ba'i grub pa'i slob dpon snye mdo pa bla chen shAkya dpal sogs kyis mdzad pa'i yig rnying mang po las nyer mkho mdo tsam btus pa 'dis kyang 'gro kun dngos grub rnam pa gnyis la dbang 'byor ba'i rgyur gyur cig

1 Texts in this Section (sde tshan or chos tshan)

7 423-434	ཕྱག་རྡོར་ཨུ་ཙརྻའི་བསྙེན་སྒྲུབ་ལས་སྦྱོར་རྡོ་རྗེའི་མེ་ཆར། phyag rdor u tsar+Ya'i bsnyen sgrub las sbyor rdo rje'i me char Recitation Manual - bsnyen yig   ·   Activity Practices - las tshogs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །དཔལ་ཕྱག་ན་རྡོ་རྗེ་ཨུ་ཙརྻའི་བསྙེན་སྒྲུབ་ལས་སྦྱོར་ཉེར་མཁོའི་ཡི་གེ་རྡོ་རྗེའི་མེ་ཆར་ཞེས་བྱ་བ་བཞུགས་སོ། །ན་མོ་གུ་རུ་ཤྲཱི་བཛྲ་པཱ་ཎི་ཡེ། དཔལ་གསང་བའི་བདག་པོ་ཕྱག་ན་རྡོ་རྗེའི་སྐོར་ལས་ཨུ་ཙཱཪྻ་དྲག་སྔགས་ཀྱི་ཆེ་བ་ཞེས་ཡོངས་སུ་གྲགས་པའི་གདམས་ཟབ་ལ་ཉེར་མཁོའི་མན་ངག་ཅུང་ཟད་འཆད་པ་ལ་གསུམ་ལས། དང་པོ་བསྙེན་པ་ནི། ཕྱག་ན་རྡོ་རྗེ་གང་ཡང་རུང་བའི་དཀྱིལ་འཁོར་དུ་དབང་བསྐུར་བ་དང་། འདི་ཉིད་ཀྱི་རྗེས་སུ་གནང་བ་ཐོབ་ཅིང་དམ་ཚིག་དང་ལྡན་པས་གནས་དབེན་ཞིང་ཡིད་དང་མཐུན་པར་འདིའི་བྲིས་སྐུའམ་རྟེན་དགྲམ་པའི་མདུན་དུ་གཏོར་མ་གཉིས་མཆོད་པ་དང་བཅས་པ་བཤམ། མར་ངོའི་གཟའ་སྐར་དྲག་པོའི་ལས་ལ་ཤིས་པའི་སྲོད་ཐུན་ནས་བརྩམས་ཏེ་བསྙེན་པ་ལ་འཇུག །དེ་ཡང་དད་པ་དང་ངེས་འབྱུང་དང་སྙིང་རྗེ་ཤུགས་དྲག་ཏུ་བསྐྱེད་དེ། གནས་སྐབས་དམ་ཆོས་སྒྲུབ་པའི་འགལ་རྐྱེན་ཐམས་ཅད་ཞི་བ་དང་། མཐར་ཐུག་ཕྱག་རྒྱ་ཆེན་པོ་མཆོག་གི་དངོས་གྲུབ་དཔལ་གསང་བའི་བདག་པོའི་གོ་འཕང་ཐོབ་པར་བྱ་བའི་ཕྱིར་བསྙེན་སྒྲུབ་ལ་འཇུག་པར་བགྱིའོ་སྙམ་པའི་བློས་སྐྱབས་འགྲོ་ནས་བཟླས་པའི་བར་ཐམས་ཅད་མཁྱེན་པ་དཀོན་མཆོག་ལྷུན་གྲུབ་པས་མཛད་པའི་སྒྲུབ་ཐབས་ལྟར་བྱ། བཟླས་དམིགས་ཀྱི་སྐབས་རང་གི་ལྕེ་ཧཱུྃ་ལས་གནམ་ལྕགས་ཀྱི་རྡོ་རྗེ་རྩེ་དགུ་རྭ་གདེངས་པ། རྭ་རེ་རེ་བཞིན་སྔགས་ཀྱི་ཕྲེང་བས་མཚན་ཅིང་ཡེ་ཤེས་ཀྱི་མེའི་ཚྭ་ཚྭ་འཕྲོ་བར་གསལ་བཏབ་ལ་བཟླ། སྐབས་སུ་ཐུགས་ཀའི་སྔགས་ཕྲེང་ལས་འོད་ཟེར་དང་མེ་ཕུང་གི་ཚོགས་བསམ་གྱིས་མི་ཁྱབ་པ་འཕྲོས་པས་ལུས་ཀྱི་ནང་ཐམས་ཅད་གང་། ནད་གདོན་སྡིག་སྒྲིབ་ཐམས་ཅད་བསྲེགས་ཤིང་སྦྱངས། བ་སྤུའི་བུ་ག་རྣམས་སུ་ཁྲོ་ཆུང་དཔག་ཏུ་མེད་པས་གང་བས་སྔགས་ཀྱི་སྒྲ་དི་རི་རི་སྒྲོག་པར་བསམ། ཡང་ཁྲོ་ཆུང་རྣམས་ལས་རང་འདྲ་བ་བསམ་གྱིས་མི་ཁྱབ་པ་འཕྲོས། རང་ལ་གནོད་པའི་གདོན་བགེགས་ཐམས་ཅད་ཚར་བཅད་ཅིང་ཞལ་དུ་གསོལ། དགེས་པའི་ཉམས་དང་བཅས་ཏེ་བ་སྤུའི་རྩ་བའི་ཁྲོ་ཆུང་རྣམས་ལ་ཐིམ་པར་བསམས་ཏེ་བཟླ་བའང་མན་ངག་གོ། །དེ་ལྟ་བུའི་རིམ་པས་ཐུན་བཞིར་བཅད་ལ་ཉམས་སུ་བླང་། ཕྱི་ཐུན་གྱི་མཇུག་ཏུ་གཏོར་མ་སྒྲུབ་ཐབས་ལས་འབྱུང་བ་ལྟར་ཕུལ། གཏོར་མགྲོན་གྱི་ཡེ་ཤེས་པ་རྟེན་ཡོད་ན་བརྟན་བཞུགས་དང་། མེད་ན་གཤེགས་གསོལ་སོགས་དཀྱུས་ལྟར་བྱ། གྲངས་བསྙེན་གྱི་ཚད་སྔགས་ཐུང་འབུམ་ཕྲག་བཅུ་དྲུག་གམ་བཅུ་བདུན། དུས་བསྙེན་ཟླ་བ་གསུམ། མཚན་མའི་བསྙེན་པ་རབ་དངོས་སུ་བྲིས་སྐུ་བཞད་པ་དང་། འོད་འབྱུང་བ་དང་། སྒྲ་འབྱིན་པ་དང་། མངོན་ཤེས་འཆར་བ་སོགས་འབྱུང་བར་གསུངས་ལ། འབྲིང་ཉམས་ཀྱི་སྐབས་སུ་དེ་ལྟར་འཆར་བ་དང་། ཐ་མའང་རྨི་ལམ་དུ་གླེགས་བམ་མང་དུ་མཐོང་ཞིང་ལག་ཏུ་ལེན་པ་དང་། རོལ་མོ་སྒྲོག་པ། ཆོས་ཉན་བཤད་བྱེད་པ། དཀྱིལ་འཁོར་འབྲི་བ། ཡི་དམ་གྱི་སྐུ་དང་ཕྱག་མཚན་རྙེད་པ། ལོ་མ་དང་། མེ་ཏོག་དང་། འབྲས་བུ་དང་། ཉི་ཟླ་དང་། གཟའ་སྐར་མཐོང་བ། རྫིང་དང་ཁྲོན་པ་ནས་ཆུ་འདྲེན་པ། གཅན་གཟན་གྱི་པགས་པའི་གོས་གྱོན་པ། །རྒྱན་ཐོགས་པ། མཚོན་ཆ་རྣོན་པོ་བཟུང་བ་སོགས་བྱུང་ནའང་ངེས་པར་དངོས་གྲུབ་ཅི་རིགས་པ་ཐོབ་པར་འགྱུར་པར་གསུངས་སོ། །དེ་ལྟ་བུའི་རྟགས་མཐོང་བའམ། བསྙེན་པ་སུམ་ཆ་ཙམ་གྲུབ་ནས་ཐུན་ཐམས་ཅད་ཀྱི་མཐར་སྔགས་རིང་སྦྲེལ་བའང་ཅུང་ཟད་རེ་བཟླ། གཉིས་པ་སྒྲུབ་པ་ནི། རང་གི་མདུན་དུ་འདིའི་བྲིས་སྐུ་མཚན་ཉིད་དང་ལྡན་པ་དཀྲམ། འབུར་སྐུ་ཡིན་ན་མཎྜལ་གྱི་དབུས་བཞུགས་སུ་གསོལ། མདུན་དུ་གཏོར་མ་དང་མཆོད་པ་བཤམ། བདག་བསྐྱེད་སྔོན་དུ་འགྲོ་བའི་མདུན་གྱི་རྟེན་རྗེས་གནང་གི་སྐབས་ལྟར་ལྷར་བསྐྱེད། ཐུགས་ཀའི་སྔགས་འཁོར་གསལ་བཏབ། དེ་ནས་རང་གི་ཐུགས་ཀའི་ས་བོན་སྔགས་ཕྲེང་དང་བཅས་པ་ལས་སྔགས་ཕྲེང་གཉིས་པ་མེ་འབར་བ་དང་བཅས་ཏེ་བྱུང་། ཞལ་ནས་ཐོན། མདུན་བསྐྱེད་ཀྱི་ཞལ་དུ་ཞུགས། ཐུགས་ཀའི་ས་བོན་ལ་ཐིམ་པས་ཐུགས་རྒྱུད་བསྐུལ། སླར་ཡང་ཐུགས་ཀའི་ས་བོན་སྔགས་ཕྲེང་དང་བཅས་པ་ལས་སྔགས་ཕྲེང་བྱུང་། ལྟེ་བ་ནས་ཐོན། རང་གི་ལྟེ་བ་ནས་ཞུགས་ཐུགས་ཀའི་ས་བོན་ལ་ཐིམ་པས་ལྷ་དབང་དུ་འདུས་ཏེ་རྒྱུད་བྱིན་གྱིས་བརླབ་པར་བསམས་ལ། དེ་ལྟ་བུའི་འོད་ཟེར་སྤྲོ་བསྡུ་རྒྱུན་མ་ཆད་པའི་ངང་ནས་བཟླ། ཐུན་བཞི་ཀའི་མཐར་མདུན་བསྐྱེད་ལ་མཆོད་བསྟོད་གཏོར་འབུལ་ནོངས་བཤགས་བརྟན་བཞུགས་བསྔོ་སྨོན་ཤིས་བརྗོད་རྒྱས་པར་བྱ། དེའང་བསྙེན་པའི་སྐབས་སུ་རྟགས་མ་བྱུང་ན་འདིར་རྟགས་མ་མཐོང་གི་བར་དང་། བསྙེན་རྟགས་བྱུང་ན་ཞག་བདུན་ནམ་ཉེར་གཅིག་སོགས་ཅི་ནུས་སུ་བཟླས་པས་དོན་འགྲུབ་བོ། །གསུམ་པ་ལས་སྦྱོར་ལ། ཏིང་ངེ་འཛིན་ལ་བརྟེན་པའི་ལས་སྦྱོར་དངོས་དང་། དེ་ལས་གཞན་པའི་ལས་ཚོགས་སོ། །དང་པོ་ནི། བསྙེན་སྒྲུབ་ལ་རྟགས་ཐོན་ནས་གདུག་པ་ཅན་ཚར་བཅད་པའི་སླད་དུ་མེ་དམིགས་རྣམ་པ་བཞི་བསྒོམ་པ་སྟེ། དེ་ལ་དང་པོ་མེ་འབར་ཀློང་ཆེན་གྱི་ཏིང་༡ངེ་འཛིན་ནི། བདག་བསྐྱེད་བཟླས་པ་དང་བཅས་པའི་མཇུག་ཏུ། །ཐུགས་ཀའི་ཏིང་ངེ་འཛིན་སེམས་དཔའ་ཧཱུྃ་ལ་སེམས་གཏད་པས་མེ་འབར། དེས་ཡེ་ཤེས་སེམས་དཔའ་ཉིད་ཀྱང་མེར་གྱུར་ཏེ་ལུས་ཀྱི་ནང་ཐམས་ཅད་གང་། ནད་གདོན་སྡིག་སྒྲིབ་རྟོག་ཚོགས་དང་བཅས་པ་བསྲེགས། ཕྱིར་འཕྲོས་ས་གསུམ་ཁྱབ་ཅིང་སྔགས་ཀྱི་རང་སྒྲ་སྒྲོག་པར་བསམས་ལ་བཟླ། འཕྲོ་འདུ་ཁྲོ་བོའི་ཏིང་༢འཛིན་ནི། རང་གི་སྐུའི་ཆ་ཤས་དང་ཁྲོ་ཆུང་ཐམས་ཅད་ལས་རང་འདྲ་བའི་སྐུ་དཔག་ཏུ་མེད་པ་འཕྲོས། བདག་དང་སེམས་ཅན་ཐམས་ཅད་ཀྱི་ནད་གདོན་སྡིག་སྒྲིབ་རྟོག་ཚོགས་དང་བཅས་པ་ཐམས་ཅད་བསད་བསྐྲད་མནན་ཟོས་བསྲེག་གཏུབ་ཚར་བཅད། སླར་རང་ལུས་ལ་ཐིམ། ལུས་ཐམས་ཅད་ཀྱང་ཁྲོ་བོའི་སྐུ་དཔག་ཏུ་མེད་པ་དང་། ཚར་བཅད་པའི་རྣམ་ཤེས་རྣམས་ཀྱང་ཕྱག་ན་རྡོ་རྗེའི་སྐུར་གྱུར། སྒྲར་གྲགས་པ་རྣམས་དྲག་པོའི་སྔགས་སུ་བསམས་ལ་བཟླ། མགལ་མེ་ལྟ་བུའི་ཏིང་༣འཛིན་ནི། ཐུགས་ཀའི་ཧཱུྃ་ལས་འབར་བའི་མེ་སྟེང་འོག་ཏུ་སྤྲོས་པས་ལུས་ཀྱི་རྩ་གནས་ཐམས་ཅད་གང་། ལྷག་མ་སྤྱི་གཙུག་དང་གསང་གནས་ནས་སྒྲ་བཅས་འཕྲོས། ལུས་ཀྱི་ཕྱི་ནང་ཐམས་ཅད་ཁྱབ་ཅིང་མགལ་མེ་ལྟར་འཁོར་བས་མི་མཐུན་པའི་ཕྱོགས་ཐམས་ཅད་བསྲེགས་ཤིང་སྦྱངས། དེ་ལས་འོད་ཟེར་ཕྱོགས་བཅུར་འཕྲོས་པས་སེམས་ཅན་ཐམས་ཅད་ཀྱི་སྡིག་སྒྲིབ་དང་ནད་གདོན་ཚར་བཅད་པར་བསམས་ལ་བཟླ། ནམ་མཁའ་གནམ་ལྕགས་ཀྱི་ཏིང་༤འཛིན་ནི། ཐུགས་ཀའི་ཧཱུྃ་དང་སྔགས་ཕྲེང་ལས་འབར་བའི་མེས་རང་ལུས་ཡེ་ཤེས་སེམས་དཔའ་དང་བཅས་པ་ལྕགས་གོང་མེར་བསྲེགས་པ་བཞིན་དམར་ལམ་གྱིས་སོང་བར་བསམས་ལ་བཟླ། དེ་ལྟར་བཟླ་ལུགས་རྣམ་པ་བཞི་པོ་ལ་དམིགས་པ་ཅུང་ཟད་བརྟན་པས་སྐབས་འགའ་ཞིག་ཏུ་ཕྱོགས་གཅིག་ཏུ་དྲིལ་ནས་བཟླ་བ་ནི། ཐུགས་ཀའི་སེམས་དཔའ་གཉིས་པོ་ཧཱུྃ་ལས་འབར་བའི་མེས་ལྕགས་བསྲེགས་པ་བཞིན་དམར་ལམ་གྱིས་སོང་བ་ལས་མེ་དམར་ནག་ཏུ་འབར། ལུས་ཀྱི་ནང་ཐམས་ཅད་གང་། རྩ་ཕྲན་བདུན་ཅུ་རྩ་གཉིས་མེར་འབར། གདོན་བགེགས་ཐམས་ཅད་བསྲེགས་པའི་ཐལ་བ་སྟོད་སྨད་ནས་མེ་ལྕེས་ཕྱིར་དེད་དེ་ལུས་ཀྱི་ཕྱི་ནང་ཐམས་ཅད་མེ་ལྕེས་ཁྱབ་བ་སྤུའི་རྩ་བ་ན་བཞུགས་པའི་ཁྲོ་ཆུང་རྣམས་ལས་རང་འདྲ་བསམ་གྱིས་མི་ཁྱབ་པ་འཕྲོས། མཐར་སྣང་གྲགས་ཐམས་ཅད་ལྷ་སྔགས་སུ་གྱུར་ཏེ་བདག་དང་སེམས་ཅན་ཐམས་ཅད་ཀྱི་ནད་གདོན་སྡིག་སྒྲིབ་ཐམས་ཅད་བསྲེགས། གདོན་བགེགས་རྣམས་ཞལ་དུ་གསོལ། སྐུ་ལས་སྐྱེས་པའི་མེས་སྣང་བའི་དངོས་པོ་ཐམས་ཅད་ཡེ་ཤེས་ཀྱི་མེ་ཕུང་གཅིག་ཏུ་གྱུར་པར་བསམས་ལ་དྲག་སྔགས་གཙོ་བོར་བཟླ། དྲག་པོའི་སྔགས་འདི་འབུམ་ཕྲག་གཅིག་བཟླས་པས་ལས་ཐམས་ཅད་འགྲུབ་པར་གསུངས་སོ། །གཉིས་པ་དེ་ལས་གཞན་པའི་ལས་ཚོགས་ལ། ཐོག་མར་རྫས་ཀྱི་སྦྱོར་བ་ནི། དྲི་ཆེན༡། རྣལ་འབྱོར་པ་རང་གི། གླ་༢རྩི། སྤྱང་ཀིའི་བྲུན༣། མི་ཚིལ༤། གུ་གུལ་ནག་༥པོ། སྤྲུ་བ་ནག་༦པོ། ཆུ་རྩ༧། ཐར་ནུ༨། སྟག་༩ཤ །མཚལ་༡༠དཀར། རྟ་རྨིག་༡༡གི་གཞོབ། སྒོག་སྐྱ་ནུས་༡༢བསྲེགས་ཀྱི་ཐལ་བ། ར་རུའི་༡༣གཞོབ། རྡོ་དྲེག་༡༤དམར་པོ། མུ་ཟི་ནག་༡༥པོ། རེ་ལྕག་༡༦པའི་རྩ་བ། རྒྱ་༡༧ཚྭ། ཤིང་ཀུན་༡༨ཏེ་རྫས་སྣ་བཅོ་བརྒྱད་པོ་ཚུལ་བཞིན་ཏུ་སྦྱར་ལ་ཞིབ་པར་བཏགས། རྣལ་འབྱོར་པ་རང་གི་དྲི་ཆུ་བར་པས་རིལ་བུ་དྲིལ་བ་ཐོད་པའི་ནང་དུ་བླུགས། དེའི་སྟེང་དུ་ཉི་དཀྱིལ་ལ་སྔགས་ཕྲེང་བཀོད་ནས་བཟླས་པས་རིལ་བུའི་མ་དག་པ་ཐམས་ཅད་སྦྱངས་ཤིང་ནུས་པ་མཆོག་ཏུ་བསྐྱེད་པར་བསམས་ལ་སྔགས་རིང་གཙོ་བོར་བཟླ། ཐུན་འཇོག་པ་ན་སྔགས་ཕྲེང་གདན་དང་བཅས་པ་རིལ་བུ་ལ་ཐིམ་པར་བསམས་ནས་ཧས་བཏབ་ལ་བསྔགས། དེ་ལྟར་བརྩོན་པས་གྲུབ་པའི་རྟགས་རིལ་བུ་ལ་དྲོད་དང་རླངས་པ་སོགས་འབྱུང་བར་འགྱུར་རོ། །དེ་ནས་ལས་ལ་སྦྱར་བ་དངོས་ནི། མཛེ་ནད་གསོ་བ་ལ། དང་པོར་ལེགས་པར་བརྟག །ངོས་ཟིན་ནས་སྒྲིབ་སྦྱོང་དང་ཞི་བའི་ཆོ་ག་ཡུན་དུ་བྱ། དེས་མ་ཕན་ན་རྟེན་འབྲེལ་རྫས་ཀྱིས་ལུས་གཞོམ་པ་ཞེས་གོང་གི་རིལ་བུ་ཉིད་དྲི་ཆུ་བར་པའམ་མར་ནག་དང་སྦྱར་ནས་ལུས་ལ་ཁྱབ་པར་བྱུག །མ་ཁྱབ་ན་སྤྱི་བོ། དཔྲལ་བ། མགྲིན་པ། སྙིང་ག །ལྟེ་བ། རྐང་མཐིལ་གཉིས་ཏེ་གནས་བདུན་དུ་བྱུག །ཁྱད་པར་གང་མི་བདེ་བའི་སར་བྱུགས་ལ་མེའམ་ཉི་མས་བདུག་པས་ལྤགས་པའི་ནད་ཐམས་ཅད་ལ་ཕན། རིལ་བུ་བདུན་ལ་སོགས་པ་ཐོ་རངས་རོ་སོལ་གྱི་མེར་བསྲེགས་ནས་བདུག་པས་བགེགས་ཐམས་ཅད་དཔག་ཚད་དུ་བྱེར་རོ། །དྲི་ཆུ་བར་པ་དང་སྦྱར་ཏེ་ཁྲུས་བྱས་པས་མི་གཙང་བ་ཐམས་ཅད་སེལ། ཉ་མིག་ཙམ་རེ་དྲི་ཆུ་བར་པ་ལ་སྦྱར་ནས་ལྟོ་སྟོང་ལ་ཁོང་དུ་བཏང་བས་ཁོང་སྲུང་དུ་འགྱུར། རྫས་ཀྱི་ཐུམ་བུ་རང་གཞན་ལ་གདགས་ན་ནད་གདོན་ཐམས་ཅད་སྲུང་བར་འགྱུར་རོ། །ནུས་པའི་རྣོ་སོ་འདོན་པ་ལ། ཤུ་དག་ནག་པོ། རུ་རྟ། བོང་ང་། སྒོག་སྐྱ། ཕག་ཚིལ། རོའི་བདུད་རྩི། བྱིན་རླབས་ཅན་གྱི་གདུང་རུས། ཉ་མཁྲིས་རྣམས་ཆ་མཉམ་པར་སྦྱར་རོ། །ནུས་པ་སྔགས་ཀྱིས་ངག་གཞོམ་པ་ནི་དྲག་སྔགས་བར་མེད་དུ་བཟླ། རིག་པ་སེམས་ཀྱིས་ཡིད་གཞོམ་པ་ནི་མེ་དམིགས་ཀྱི་ཏིང་འཛིན་ཤིན་ཏུ་གསལ་བར་བྱ་སྟེ། དེ་རྣམས་ཐམས་ཅད་མཚུངས་ལྡན་དུ་ཉམས་སུ་བླངས་པས་འོག་གདོན་མཛེ་ནད་ལས་གྲོལ་བ་ནི་ངེས་པའོ། །བར་གདོན་སྨྱོ་འབོག་གསོན། རོ་རས་སམ་རོ་སྐྲ་ལས་བྱས་པའི་ཐག་པས་ནད་པའི་སྲིན་ལག་བསྡམས་པའི་སྣེ་ནས་བཟུང་། རང་ཡི་དམ་གྱི་ང་རྒྱལ་དྲག་པོ་དང་བཅས་བོང་བུའམ་རོ་སོལ་གྱི་མེ་ལ་རྫས་སྣ་བཅོ་བརྒྱད་བསྲེགས་པའི་དུད་པས་འདོམ་དང་སྣ་བུག་ནས་བདུག །དྲག་སྔགས་དང་ཏིང་ངེ་འཛིན་གྱི་མཚོན་ཆས་གཟིར་བས་སྐད་ངན་ཙེ་རེ་རེ་འོང་སྟེ། དེ་ཙ་ན་གདོན་གང་ཡིན་དྲིས་ལ་ཕྱིན་ཆད་གནོད་པ་མི་བྱེད་པའི་མནའ་དགག་གོ། །གལ་ཏེ་སྐད་མི་འདོན་པ་བརྒྱལ་ན། རྫས་རྣམས་ཁྱི་ལུད་ཀྱི་མེ་ལ་བསྲེགས་ནས་བདུག །དྲག་སྔགས་ལ་སྡེ་བརྒྱད་ཀྱི་སྲོག་སྔགས་ཧཱུྃ་ཕཊྲ་ཀྱི་བར་དུ་བཏགས་པས་གཟིར་བས་ངོ་སྟོན་པར་འགྱུར་ལ། དེའི་ཚེ་མནའ་དགག །རྫས་ཀྱི་ཐུམ་བུ་མགུལ་དུ་གདགས་ཤིང་གནས་བདུན་དུ་ཐིག་ལེ་བྱས་པས་བསྲུང་ངོ་། སྲིའུ་གསོན། རྫས་ཀྱི་ཐུམ་བུ་མགུལ་དུ་གདགས་ཤིང་ལུས་ལ་བྱུག །སྲིའུ་མ་དང་བཅས་པ་མེ་འབར་ཀློང་ཆེན་གྱི་ཏིང་ངེ་འཛིན་གྱི་ཁོངས་སུ་བཅུག་ནས་དྲག་སྔགས་བཟླ། སྲུང་འཁོར་ཀྱང་གདགས་སོ། །སྲུང་འཁོར་ནི། ཕྱག་རྡོར་གྱི་ཐུགས་ཀར་འཁོར་ལོ་རྩིབས་བཅུ་མུ་ཁྱུད་དང་བཅས་པའི་ལྟེ་བར་བསྲུང་བྱའི་མིང་དང་སྤེལ་ཚིག །རྩིབས་བཅུ་ལ་སྔགས་ཐུང་། མུ་ཁྱུད་ལ་སྔགས་རིང་དགོད། གླ་རྩི་དང་གུར་གུམ་གྱིས་བྱུག །བདག་བསྐྱེད་སྔོན་དུ་འགྲོ་བའི་འཁོར་ལོའི་ཡིག་འབྲུ་རྣམས་ཁྲོ་བོར་བསྐྱེད་ལ་སྔགས་བརྒྱ་རྩ་བཟླ་གཏོར་མ་ཕུལ། ལྷ་རྣམས་ཡིག་འབྲུར་བསམས་ལ་རྟེན་སྙིང་བདུན་གྱིས་བརྟན་བཞུགས་བྱ། རིམས་ནད་སྲུང་ན། རྫས་ཀྱི་ཐུམ་པོ་མགུལ་དུ་གདགས། དྲི་ཆུ་བར་པ་དང་སྦྱར་ཏེ་ལུས་ཀྱི་གནས་རྣམས་སུ་བྱུགས་པ་དང་། བདུག་པ་དང་། ཐོ་རངས་ཁོང་སྲུང་རིལ་བུ་རེ་རེ་བཏང་ངོ་། །གདོན་ཕྲ་མོ་གསོ་བ་དང་སྲུང་ན། རྫས་ལ་སྔགས་བཏབ་པའི་ཆུས་བྱུགས་པ་དང་ཁོང་དུ་བཏང་བ་དང་། སྣར་བདུག་པ་སོགས་བགྱིས་པས་འབྲས་དང་། ཤུ་བའི་རིགས། གག་ལྷོག །རྨ་རྙིང་འཚོར་མི་འདོད་པ་སོགས་ཐམས་ཅད་ལ་ཕན་ནོ། །ལྟོ་སྲུང་ནི། ཐོ་རངས་དྲི་ཆུ་བར་པ་ལ་རྫས་ཉ་མིག་ཙམ་རེ་བཏབ་པའམ། ཡང་ན་སྔགས་ཉེར་གཅིག་བཟླས་ནས་བཏང་བས་བགེགས་རིགས་སྟོང་ཕྲག་བརྒྱད་ཅུས་མི་ཚུགས་ཤིང་། ཞུགས་པའང་ཕྱིར་ཐོན་པར་འགྱུར་རོ། །གཞན་ཡང་མངོན་སྤྱོད་ཀྱི་ལས་དང་། སྲུང་འཁོར་ཆེན་མོ་སོགས་ལག་ལེན་བཏབ་དཀའ་བས་གཞན་དུ་ཤེས་པར་བྱའོ། །ཡང་འདིའི་རྗེས་གནང་གི་སྐབས་ནད་གདོན་དྲག་པོས་གཟིར་པ་ལ། ཐུན་མོང་མ་ཡིན་པའི་རྗེས་གནང་བྱེད་ན། བཟླས་ལུང་གི་མཇུག་ཏུ་དཔོན་སློབ་གཉིས་ཀ་མེ་དམིགས་རྣམ་པ་བཞི་གསལ་བཏབ། མཚམས་རྣམས་སུ་དྲག་སྔགས་ལན་གསུམ་རེ་བཟླ། རྫས་དུད་ཀྱིས་བདུག །རོལ་མོ་བྱ། དེ་ནས་ཐུགས་ཀྱི་རྗེས་གནང་སོགས་དཀྱུས་ལྟར་སྦྱར་བར་བྱ་གསུངས། བཟླས་པའི་སྐབས་ཡིག་རྙིང་ཕལ་ཆེར་དུ་སྙིང་གར་རྡོ་རྗེ་རྩེ་དགུ་པའི་ལྟེ་བར་ཡེ་ཤེས་སེམས་དཔའ་དང་། དེའི་ཐུགས་ཀར་ཉི་གདན་ལ་ཏིང་འཛིན་སེམས་དཔའི་མཐར་སྔགས་འཁོར་བཀོད་པ་དང་། དྲག་སྔགས་བཟླས་སྐབས། མདུན་དུ་སྤྲུལ་པའི་ཁྱུང་ནག་མགོ་དགུ། གཡས་སུ་མགོན་པོ་གྲི་གུག །གཡོན་དུ་ལྷ་མོ་བོང་ཞོན་མ། མཐའ་སྐོར་ཀུན་ཏུ་དཔལ་མགོན་བདུན་ཅུ་རྩ་ལྔ་རྣམས་གུས་པས་འཁོད་པར་བསམས་ལ་བཀའ་བསྒོ་བའི་ཚུལ་གྱིས་བཟླ་བར་གསུངས་པའང་སྣང་། །མདོར་ན་ལྷག་པའི་ལྷ་འདིའི་བསྙེན་སྒྲུབ་ལས་གསུམ་ཚུལ་བཞིན་དུ་བྱས་ཏེ། རྒྱུན་དུའང་བསྙེན་པ་དང་། །ལས་སྦྱོར་བཞི་པོ་གཅིག་ཏུ་དྲིལ་བའི་བཟླས་པ་བྱས་ན་ཀླུ་གདོན་གཙོ་བོར་གྱུར་པའི་གདུག་པ་ཅན་ཐམས་ཅད་ཞི་ཞིང་ནུས་པ་བསམ་གྱིས་མི་ཁྱབ་པ་འབྱུང་བ་དང་། མཐར་ཐུགས་ཡི་དམ་ལྷ་ཡིས་རྒྱུད་བྱིན་གྱིས་བརླབས་ནས་དངོས་གྲུབ་མཆོག་ཐོབ་པར་འགྱུར་བ་ནི་ངེས་པའོ། །ཞེས་པའང་ཚུལ་འདིའི་རྗེས་གནང་དང་མན་ངག་གི་ལག་ལེན་ཅུང་ཟད་ཐོབ་པ་འཇམ་དབྱངས་མཁྱེན་བརྩེའི་དབང་པོས་དཔལ་གསང་བའི་བདག་པོས་མངོན་སུམ་དུ་རྗེས་སུ་བཟུང་བའི་གྲུབ་པའི་སློབ་དཔོན་སྙེ་མདོ་པ་བླ་ཆེན་ཤཱཀྱ་དཔལ་སོགས་ཀྱིས་མཛད་པའི་ཡིག་རྙིང་མང་པོ་ལས་ཉེར་མཁོ་མདོ་ཙམ་བཏུས་པ་འདིས་ཀྱང་འགྲོ་ཀུན་དངོས་གྲུབ་རྣམ་པ་གཉིས་ལ་དབང་འབྱོར་བའི་རྒྱུར་གྱུར་ཅིག ། ༈

[edit]

phyag rdor u tsaR+Ya'i bsnyen sgrub las sbyor rdo rje'i me char/ @#/_/dpal phyag na rdo rje u tsAR+Ya'i bsnyen sgrub las sbyor nyer mkho'i yi ge rdo rje'i me char zhes bya ba bzhugs so/__/na mo gu ru shrI badz+ra pA Ni ye/__dpal gsang ba'i bdag po phyag na rdo rje'i skor las u tsAR+Ya drag sngags kyi che ba zhes yongs su grags pa'i gdams zab la nyer mkho'i man ngag cung zad 'chad pa la gsum las/__dang po bsnyen pa ni/__phyag na rdo rje gang yang rung ba'i dkyil 'khor du dbang bskur ba dang /__'di nyid kyi rjes su gnang ba thob cing dam tshig dang ldan pas gnas dben zhing yid dang mthun par 'di'i bris sku'am rten dgram pa'i mdun du gtor ma gnyis mchod pa dang bcas pa bsham/__mar ngo'i gza' skar drag po'i las la shis pa'i srod thun nas brtsams te bsnyen pa la 'jug__/de yang dad pa dang nges 'byung dang snying rje shugs drag tu bskyed de/__gnas skabs dam chos sgrub pa'i 'gal rkyen thams cad zhi ba dang /__mthar thug phyag rgya chen po mchog gi dngos grub dpal gsang ba'i bdag po'i go 'phang thob par bya ba'i phyir bsnyen sgrub la 'jug par bgyi'o snyam pa'i blos skyabs 'gro nas bzlas pa'i bar thams cad mkhyen pa dkon mchog lhun grub pas mdzad pa'i sgrub thabs ltar bya/__bzlas dmigs kyi skabs rang gi lce hU~M las gnam lcags kyi rdo rje rtse dgu rwa gdengs pa/__rwa re re bzhin sngags kyi phreng bas mtshan cing ye shes kyi me'i tshwa tshwa 'phro bar gsal btab la bzla/__skabs su thugs ka'i sngags phreng las 'od zer dang me phung gi tshogs bsam gyis mi khyab pa 'phros pas lus kyi nang thams cad gang /__nad gdon sdig sgrib thams cad bsregs shing sbyangs/__ba spu'i bu ga rnams su khro chung dpag tu med pas gang bas sngags kyi sgra di ri ri sgrog par bsam/__yang khro chung rnams las rang 'dra ba bsam gyis mi khyab pa 'phros/__rang la gnod pa'i gdon bgegs thams cad tshar bcad cing zhal du gsol/__dges pa'i nyams dang bcas te ba spu'i rtsa ba'i khro chung rnams la thim par bsams te bzla ba'ang man ngag go/__/de lta bu'i rim pas thun bzhir bcad la nyams su blang /__phyi thun gyi mjug tu gtor ma sgrub thabs las 'byung ba ltar phul/__gtor mgron gyi ye shes pa rten yod na brtan bzhugs dang /__med na gshegs gsol sogs dkyus ltar bya/__grangs bsnyen gyi tshad sngags thung 'bum phrag bcu drug gam bcu bdun/__dus bsnyen zla ba gsum/__mtshan ma'i bsnyen pa rab dngos su bris sku bzhad pa dang /__'od 'byung ba dang /__sgra 'byin pa dang /__mngon shes 'char ba sogs 'byung bar gsungs la/__'bring nyams kyi skabs su de ltar 'char ba dang /__tha ma'ang rmi lam du glegs bam mang du mthong zhing lag tu len pa dang /__rol mo sgrog pa/__chos nyan bshad byed pa/__dkyil 'khor 'bri ba/__yi dam gyi sku dang phyag mtshan rnyed pa/__lo ma dang /__me tog dang /__'bras bu dang /__nyi zla dang /__gza' skar mthong ba/__rdzing dang khron pa nas chu 'dren pa/__gcan gzan gyi pags pa'i gos gyon pa/__/rgyan thogs pa/__mtshon cha rnon po bzung ba sogs byung na'ang nges par dngos grub ci rigs pa thob par 'gyur par gsungs so/__/de lta bu'i rtags mthong ba'am/__bsnyen pa sum cha tsam grub nas thun thams cad kyi mthar sngags ring sbrel ba'ang cung zad re bzla/__gnyis pa sgrub pa ni/__rang gi mdun du 'di'i bris sku mtshan nyid dang ldan pa dkram/__'bur sku yin na maN+Dal gyi dbus bzhugs su gsol/__mdun du gtor ma dang mchod pa bsham/__bdag bskyed sngon du 'gro ba'i mdun gyi rten rjes gnang gi skabs ltar lhar bskyed/__thugs ka'i sngags 'khor gsal btab/__de nas rang gi thugs ka'i sa bon sngags phreng dang bcas pa las sngags phreng gnyis pa me 'bar ba dang bcas te byung /__zhal nas thon/__mdun bskyed kyi zhal du zhugs/__thugs ka'i sa bon la thim pas thugs rgyud bskul/__slar yang thugs ka'i sa bon sngags phreng dang bcas pa las sngags phreng byung /__lte ba nas thon/__rang gi lte ba nas zhugs thugs ka'i sa bon la thim pas lha dbang du 'dus te rgyud byin gyis brlab par bsams la/__de lta bu'i 'od zer spro bsdu rgyun ma chad pa'i ngang nas bzla/__thun bzhi ka'i mthar mdun bskyed la mchod bstod gtor 'bul nongs bshags brtan bzhugs bsngo smon shis brjod rgyas par bya/__de'ang bsnyen pa'i skabs su rtags ma byung na 'dir rtags ma mthong gi bar dang /__bsnyen rtags byung na zhag bdun nam nyer gcig sogs ci nus su bzlas pas don 'grub bo/__/gsum pa las sbyor la/__ting nge 'dzin la brten pa'i las sbyor dngos dang /__de las gzhan pa'i las tshogs so/__/dang po ni/__bsnyen sgrub la rtags thon nas gdug pa can tshar bcad pa'i slad du me dmigs rnam pa bzhi bsgom pa ste/__de la dang po me 'bar klong chen gyi ting 1nge 'dzin ni/__bdag bskyed bzlas pa dang bcas pa'i mjug tu/__/thugs ka'i ting nge 'dzin sems dpa' hU~M la sems gtad pas me 'bar/__des ye shes sems dpa' nyid kyang mer gyur te lus kyi nang thams cad gang /__nad gdon sdig sgrib rtog tshogs dang bcas pa bsregs/__phyir 'phros sa gsum khyab cing sngags kyi rang sgra sgrog par bsams la bzla/__'phro 'du khro bo'i ting 2'dzin ni/__rang gi sku'i cha shas dang khro chung thams cad las rang 'dra ba'i sku dpag tu med pa 'phros/__bdag dang sems can thams cad kyi nad gdon sdig sgrib rtog tshogs dang bcas pa thams cad bsad bskrad mnan zos bsreg gtub tshar bcad/__slar rang lus la thim/__lus thams cad kyang khro bo'i sku dpag tu med pa dang /__tshar bcad pa'i rnam shes rnams kyang phyag na rdo rje'i skur gyur/__sgrar grags pa rnams drag po'i sngags su bsams la bzla/__mgal me lta bu'i ting 3'dzin ni/__thugs ka'i hU~M las 'bar ba'i me steng 'og tu spros pas lus kyi rtsa gnas thams cad gang /__lhag ma spyi gtsug dang gsang gnas nas sgra bcas 'phros/__lus kyi phyi nang thams cad khyab cing mgal me ltar 'khor bas mi mthun pa'i phyogs thams cad bsregs shing sbyangs/__de las 'od zer phyogs bcur 'phros pas sems can thams cad kyi sdig sgrib dang nad gdon tshar bcad par bsams la bzla/__nam mkha' gnam lcags kyi ting 4'dzin ni/__thugs ka'i hU~M dang sngags phreng las 'bar ba'i mes rang lus ye shes sems dpa' dang bcas pa lcags gong mer bsregs pa bzhin dmar lam gyis song bar bsams la bzla/__de ltar bzla lugs rnam pa bzhi po la dmigs pa cung zad brtan pas skabs 'ga' zhig tu phyogs gcig tu dril nas bzla ba ni/__thugs ka'i sems dpa' gnyis po hU~M las 'bar ba'i mes lcags bsregs pa bzhin dmar lam gyis song ba las me dmar nag tu 'bar/__lus kyi nang thams cad gang /__rtsa phran bdun cu rtsa gnyis mer 'bar/__gdon bgegs thams cad bsregs pa'i thal ba stod smad nas me lces phyir ded de lus kyi phyi nang thams cad me lces khyab ba spu'i rtsa ba na bzhugs pa'i khro chung rnams las rang 'dra bsam gyis mi khyab pa 'phros/__mthar snang grags thams cad lha sngags su gyur te bdag dang sems can thams cad kyi nad gdon sdig sgrib thams cad bsregs/__gdon bgegs rnams zhal du gsol/__sku las skyes pa'i mes snang ba'i dngos po thams cad ye shes kyi me phung gcig tu gyur par bsams la drag sngags gtso bor bzla/__drag po'i sngags 'di 'bum phrag gcig bzlas pas las thams cad 'grub par gsungs so/__/gnyis pa de las gzhan pa'i las tshogs la/__thog mar rdzas kyi sbyor ba ni/__dri chen1/__rnal 'byor pa rang gi/__gla 2rtsi/__spyang ki'i brun3/__mi tshil4/__gu gul nag 5po/__spru ba nag 6po/__chu rtsa7/__thar nu8/__stag 9sha__/mtshal 10dkar/__rta rmig 11gi gzhob/__sgog skya nus 12bsregs kyi thal ba/__ra ru'i 13gzhob/__rdo dreg 14dmar po/__mu zi nag 15po/__re lcag 16pa'i rtsa ba/__rgya 17tshwa/__shing kun 18te rdzas sna bco brgyad po tshul bzhin tu sbyar la zhib par btags/__rnal 'byor pa rang gi dri chu bar pas ril bu dril ba thod pa'i nang du blugs/__de'i steng du nyi dkyil la sngags phreng bkod nas bzlas pas ril bu'i ma dag pa thams cad sbyangs shing nus pa mchog tu bskyed par bsams la sngags ring gtso bor bzla/__thun 'jog pa na sngags phreng gdan dang bcas pa ril bu la thim par bsams nas has btab la bsngags/__de ltar brtson pas grub pa'i rtags ril bu la drod dang rlangs pa sogs 'byung bar 'gyur ro/__/de nas las la sbyar ba dngos ni/__mdze nad gso ba la/__dang por legs par brtag__/ngos zin nas sgrib sbyong dang zhi ba'i cho ga yun du bya/__des ma phan na rten 'brel rdzas kyis lus gzhom pa zhes gong gi ril bu nyid dri chu bar pa'am mar nag dang sbyar nas lus la khyab par byug__/ma khyab na spyi bo/__dpral ba/__mgrin pa/__snying ga__/lte ba/__rkang mthil gnyis te gnas bdun du byug__/khyad par gang mi bde ba'i sar byugs la me'am nyi mas bdug pas lpags pa'i nad thams cad la phan/__ril bu bdun la sogs pa tho rangs ro sol gyi mer bsregs nas bdug pas bgegs thams cad dpag tshad du byer ro/__/dri chu bar pa dang sbyar te khrus byas pas mi gtsang ba thams cad sel/__nya mig tsam re dri chu bar pa la sbyar nas lto stong la khong du btang bas khong srung du 'gyur/__rdzas kyi thum bu rang gzhan la gdags na nad gdon thams cad srung bar 'gyur ro/__/nus pa'i rno so 'don pa la/__shu dag nag po/__ru rta/__bong nga /__sgog skya/__phag tshil/__ro'i bdud rtsi/__byin rlabs can gyi gdung rus/__nya mkhris rnams cha mnyam par sbyar ro/__/nus pa sngags kyis ngag gzhom pa ni drag sngags bar med du bzla/__rig pa sems kyis yid gzhom pa ni me dmigs kyi ting 'dzin shin tu gsal bar bya ste/__de rnams thams cad mtshungs ldan du nyams su blangs pas 'og gdon mdze nad las grol ba ni nges pa'o/__/bar gdon smyo 'bog gson/__ro ras sam ro skra las byas pa'i thag pas nad pa'i srin lag bsdams pa'i sne nas bzung /__rang yi dam gyi nga rgyal drag po dang bcas bong bu'am ro sol gyi me la rdzas sna bco brgyad bsregs pa'i dud pas 'dom dang sna bug nas bdug__/drag sngags dang ting nge 'dzin gyi mtshon chas gzir bas skad ngan tse re re 'ong ste/__de tsa na gdon gang yin dris la phyin chad gnod pa mi byed pa'i mna' dgag go/__/gal te skad mi 'don pa brgyal na/__rdzas rnams khyi lud kyi me la bsregs nas bdug__/drag sngags la sde brgyad kyi srog sngags hU~M phaT+ra kyi bar du btags pas gzir bas ngo ston par 'gyur la/__de'i tshe mna' dgag__/rdzas kyi thum bu mgul du gdags shing gnas bdun du thig le byas pas bsrung ngo /___sri'u gson/__rdzas kyi thum bu mgul du gdags shing lus la byug__/sri'u ma dang bcas pa me 'bar klong chen gyi ting nge 'dzin gyi khongs su bcug nas drag sngags bzla/__srung 'khor kyang gdags so/_/srung 'khor ni/__phyag rdor gyi thugs kar 'khor lo rtsibs bcu mu khyud dang bcas pa'i lte bar bsrung bya'i ming dang spel tshig__/rtsibs bcu la sngags thung /__mu khyud la sngags ring dgod/__gla rtsi dang gur gum gyis byug__/bdag bskyed sngon du 'gro ba'i 'khor lo'i yig 'bru rnams khro bor bskyed la sngags brgya rtsa bzla gtor ma phul/__lha rnams yig 'brur bsams la rten snying bdun gyis brtan bzhugs bya/__rims nad srung na/__rdzas kyi thum po mgul du gdags/__dri chu bar pa dang sbyar te lus kyi gnas rnams su byugs pa dang /__bdug pa dang /__tho rangs khong srung ril bu re re btang ngo /__/gdon phra mo gso ba dang srung na/__rdzas la sngags btab pa'i chus byugs pa dang khong du btang ba dang /__snar bdug pa sogs bgyis pas 'bras dang /__shu ba'i rigs/__gag lhog__/rma rnying 'tshor mi 'dod pa sogs thams cad la phan no/__/lto srung ni/__tho rangs dri chu bar pa la rdzas nya mig tsam re btab pa'am/__yang na sngags nyer gcig bzlas nas btang bas bgegs rigs stong phrag brgyad cus mi tshugs shing /__zhugs pa'ang phyir thon par 'gyur ro/__/gzhan yang mngon spyod kyi las dang /__srung 'khor chen mo sogs lag len btab dka' bas gzhan du shes par bya'o/__/yang 'di'i rjes gnang gi skabs nad gdon drag pos gzir pa la/__thun mong ma yin pa'i rjes gnang byed na/__bzlas lung gi mjug tu dpon slob gnyis ka me dmigs rnam pa bzhi gsal btab/__mtshams rnams su drag sngags lan gsum re bzla/__rdzas dud kyis bdug__/rol mo bya/__de nas thugs kyi rjes gnang sogs dkyus ltar sbyar bar bya gsungs/__bzlas pa'i skabs yig rnying phal cher du snying gar rdo rje rtse dgu pa'i lte bar ye shes sems dpa' dang /__de'i thugs kar nyi gdan la ting 'dzin sems dpa'i mthar sngags 'khor bkod pa dang /__drag sngags bzlas skabs/__mdun du sprul pa'i khyung nag mgo dgu/__g.yas su mgon po gri gug__/g.yon du lha mo bong zhon ma/__mtha' skor kun tu dpal mgon bdun cu rtsa lnga rnams gus pas 'khod par bsams la bka' bsgo ba'i tshul gyis bzla bar gsungs pa'ang snang /__/mdor na lhag pa'i lha 'di'i bsnyen sgrub las gsum tshul bzhin du byas te/__rgyun du'ang bsnyen pa dang /__/las sbyor bzhi po gcig tu dril ba'i bzlas pa byas na klu gdon gtso bor gyur pa'i gdug pa can thams cad zhi zhing nus pa bsam gyis mi khyab pa 'byung ba dang /__mthar thugs yi dam lha yis rgyud byin gyis brlabs nas dngos grub mchog thob par 'gyur ba ni nges pa'o/__/zhes pa'ang tshul 'di'i rjes gnang dang man ngag gi lag len cung zad thob pa 'jam dbyangs mkhyen brtse'i dbang pos dpal gsang ba'i bdag pos mngon sum du rjes su bzung ba'i grub pa'i slob dpon snye mdo pa bla chen shAkya dpal sogs kyis mdzad pa'i yig rnying mang po las nyer mkho mdo tsam btus pa 'dis kyang 'gro kun dngos grub rnam pa gnyis la dbang 'byor ba'i rgyur gyur cig___/__!