JKW-KABUM-09-TA-009-008

Previous Text Back to Volume PageNext Text

ཕྱག་རྡོར་གཏུམ་པོའི་རྗེས་གནང་སྒྲུབ་ཐབས་རྡོ་རྗེའི་མེ་ཕྲེང་།

Wylie title	phyag rdor gtum po'i rjes gnang sgrub thabs rdo rje'i me phreng
Location	mkhyen brtse'i bka' 'bum Volume 9, sde tshan 9, Text 8, Pages 434-446 (Folios 39b5 to 45b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. phyag rdor gtum po'i rjes gnang sgrub thabs rdo rje'i me phreng. In 'jam dbyangs mkhyen brtse'i dbang po'i bka' 'bum, Vol. 9: 434-446. Khams sde dge rdzong sar dgon: Rdzong sar blo gros phun tshogs, 2020.
Genre	Permission to Invoke (anujñā) - rjes gnang  ·  Sadhanas - Evocation Ritual - sgrub thabs
Deity	phyag na rdo rje
Colophon	།ཞེས་པ་འདིའང་མཁྱེན་བརྩེའི་དབང་པོས་སོ།
	zhes pa 'di'ang mkhyen brtse'i dbang pos so

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། །དཔལ་ཕྱག་ན་རྡོ་རྗེ་གཏུམ་པོའི་རྗེས་གནང་སྒྲུབ་ཐབས་ཀྱི་ཡི་གེ་རྡོ་རྗེའི་མེ་ཕྲེང་ཞེས་བྱ་བ་བཞུགས་སོ། །རྒྱ་གར་སྐད་དུ། ཤྲཱི་བཛྲ་ཙཎྜ་སཱ་དྷ་ནཾ། བོད་སྐད་དུ། དཔལ་རྡོ་རྗེ་གཏུམ་པོའི་སྒྲུབ་ཐབས། བཅོམ་ལྡན་འདས་དཔལ་གསང་བ་འཛིན་པའི་བདག་པོ་ལ་ཕྱག་འཚལ་ལོ། །རྒྱལ་ཀུན་ཐུགས་ཀྱི་གསང་བ་གཅིག་པུ་ཤིན་ཏུ་ཞི་བ་དམ་པའི་བདག །གདུལ་དཀའི་མུན་པ་སྟུག་པོ་འཇིལ་སླད་རྡོ་རྗེ་གཏུམ་པོའི་ཉིན་མོར་བྱེད། །གང་གི་ཡིད་མཁར་ཤར་བའི་མོད་ནས་གྲུབ་པ་བྱེ་བའི་སྣང་སྟེར་བ། །བླ་མ་མཆོག་དང་རྣམ་དབྱེར་མེད་པས་ཤིས་པའི་པདྨོ་རྒྱས་པར་མཛོད། །རྗེས་སུ་གནང་བས་རྒྱུད་སྨིན་ནས། །བསྙེན་དང་སྒྲུབ་དང་ལས་སྦྱོར་གྱིས། །དངོས་གྲུབ་རྒྱ་མཚོའི་ཆར་འབེབས་པ། །གསང་བ་འཛིན་དང་མཚུངས་པར་འགྱུར། །དེ་ལ་དང་པོ་ནི། ལམ་ཐུན་མོང་པས་རྒྱུད་སྦྱངས་ཤིང་། གཞན་དོན་ཁོ་ནར་རིག་སྔགས་ཀྱི་དངོས་གྲུབ་དོན་དུ་གཉེར་བས། དཀྱིལ་འཁོར་ཆེན་པོར་སྨིན་བྱེད་ཀྱི་དབང་བསྐུར་བ་ནོས་ཏེ། དམ་ཚིག་དང་སྡོམ་པའི་ཀུན་སྤྱོད་ལ་ཉེ་བར་གནས་པས་རྗེས་སུ་གནང་བ་ནོད་པར་བྱའོ། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། གནས་དབེན་པར་སྟེགས་བུའི་དབུས་སུ་མཎྜ་ལར་མེ་ཏོག་གི་ཚོམ་བུ་ལྔ་བཀོད་པའི་སྟེང་དུ་མཉྫིའི་ཁར་དཔལ་གཏོར་གཙོ་འཁོར་ལྔ་པ་དར་གདུགས་སྔོན་པོས་བརྒྱན་པ། དེའི་མདུན་དུ་བུམ་པ་བཅུད་ལྡན་ཁ་རྒྱན་མགུལ་ཆིངས་དུང་ཆོས་གཟུངས་རྡོར་དང་བཅས་པ་དང་། འབུལ་གཏོར་གཅིག །ཆུ་གཉིས་སྔོན་འགྲོའི་ཉེར་སྤྱོད་རྣམས་བཀོད་མཛེས་སུ་བཤམ། སློབ་དཔོན་གྱི་མདུན་དུ་རྡོ་རྗེ་དྲིལ་བུ་མེ་ཏོག་གི་སྣོད་སོགས་དགོས་པའི་ཡོ་བྱད་རྣམས་འདུ་བྱའོ། །གཉིས་པ་ལ་གསུམ། བདག་བསྐྱེད། མདུན་བསྐྱེད། རྗེས་སུ་གནང་བའོ། །དང་པོ་ནི། མཆོད་པ་བྱིན་རླབས་སྤྱི་ལྟར་སྔོན་དུ་འགྲོ་བས། སྐྱབས་འགྲོ་ནས་བཟུང་བཟླས་པ་བསྡུ་བའི་བར་འོག་ནས་འབྱུང་བ་ལྟར་ཉམས་སུ་བླང་ངོ་། །གཉིས་པ་ནི། མདུན་རྟེན་ཚོམ་བུ་དང་གཏོར་མ་བསང་སྦྱང་། སྟོང་པའི་ངང་ལས་པད་ཉིའི་གདན་ལ་ཧཱུྃ་ལས་རྡོ་རྗེ་གཏུམ་པོ་མཐིང་ནག་སོགས་ནས། རིགས་སོ་སོས་དབུ་བརྒྱན་པར་གྱུར་ཅེས་པའི་བར་བདག་བསྐྱེད་ལྟར་གསལ་གདབ། མཆོད་པ་བྱིན་གྱིས་བརླབས་ལ་མཆོད་བསྟོད་དང་། །མདུན་བསྐྱེད་ཀྱི་ཐུགས་ཀར་ཉི་མ་ལ་ཧཱུྃ་གི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་སྤྲོས་བསྡུས་སངས་རྒྱས་ཀྱི་མཛད་པ་བསྒྲུབས་པར་བསམས་ལ་བཟླས་པ་ཅི་ནུས་བྱ། བུམ་པ་བསང་སྦྱང་། སྟོང་པའི་ངང་ལས་བྷྲཱུྃ་ལས་རིན་པོ་ཆེ་བཻ་ཌཱུཪྻའི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་ཤིང་བདུད་རྩིའི་བཅུད་ཀྱིས་གང་བའི་དབུས་སུ་པད་ཉིའི་གདན་ལ་ཧཱུྃ་ལས་རྡོ་རྗེ་གཏུམ་པོ་སོགས་ནས། མཆོད་བསྟོད་ཀྱི་བར་བདག་བསྐྱེད་ལྟར་བྱ། གཟུངས་ཐག་བླངས་ལ། བུམ་ལྷའི་ཐུགས་ཀར་ཉི་མ་ལ་གནས་པའི་ཧཱུྃ་གི་མཐར་སྔགས་ཀྱི་ཕྲེང་བས་བསྐོར་བ། རང་གི་ཐུགས་ཀ་ནས་སྔགས་ཀྱི་ཕྲེང་བ་བྱུང་། ཞལ་ནས་ཐོན། གཟུངས་ཐག་ལ་འཁྲིལ་ཏེ་བུམ་ནང་གི་ལྷའི་ཐུགས་ཀར་ཐིམ་པས་ཐུགས་རྒྱུད་བསྐུལ། དེ་ལས་འོད་ཟེར་འཕྲོས་པས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། རྡོ་རྗེ་གཏུམ་པོའི་སྐུར་གྱུར། དེ་བཞིན་གཤེགས་པ་ཐམས་ཅད་ཀྱི་བྱིན་རླབས་བསྡུས་ཏེ་བུམ་པའི་ལྷ་ལ་ཐིམ། ཐུགས་ཀའི་སྔགས་ཕྲེང་དང་སྐུའི་ཆ་ཐམས་ཅད་ལས་བདུད་རྩིའི་རྒྱུན་བབས་པས་བུམ་པ་གང་བར་གྱུར། སྔགས་ཅི་ནུས་བཟླས་མཐར་མཆོད་ཅིང་བསྟོད། ཨོཾ་ཨཱཿཧཱུྃ་གིས་མཆོད་ཡོན་ཕུལ་བས་ལྷ་འོད་དུ་ཞུ་བ་བུམ་པའི་ཆུར་གྱུར་པར་བསམ། མདུན་བསྐྱེད་ལ་གཏོར་མ་བསང་སྦྱང་བྱིན་གྱིས་བརླབས་ནས་ཕུལ། མཆོད་བསྟོད་འདོད་དོན་གསོལ། གསུམ་པ་ནི། དབང་གིས་སྨིན་པའི་སློབ་མ་རྣམས་ཁྲུས་བྱས་གྲལ་ལ་འཁོད་པར། །སེམས་བསྐྱེད་གསལ་གདབ་སོགས་ཆོས་ཀྱི་གཏམ་ཅི་རིགས་པས་མཚམས་སྦྱར་ཏེ། དེ་ལ་འདིར་དུས་གསུམ་གྱི་རྒྱལ་བ་སྲས་དང་བཅས་པའི་ཐུགས་ཀྱི་གསང་བ་བསམ་གྱིས་མི་ཁྱབ་པའི་རང་གཟུགས་ནུས་པའི་ཡེ་ཤེས་གཅིག་ཏུ་བསྡུས་པའི་བདག་ཉིད་བཅོམ་ལྡན་འདས་དཔལ་ལག་ན་རྡོ་རྗེ་ཞེས་གྲགས་པ་འདི་ནི། བྱང་ཆུབ་སེམས་དཔའ་ཐམས་ཅད་ཀྱི་གཙོ་བོར་གྱུར་པ་ཀུན་ཏུ་བཟང་པོ་ཉིད། རྡོ་རྗེ་ཐེག་པར་སངས་རྒྱས་ཐམས་ཅད་ཀྱི་བདག་པོ་རྣམ་པར་སྣང་མཛད་ཀྱིས་རྡོ་རྗེའི་རིགས་སུ་མངོན་པར་དབང་བསྐུར། རྡོ་རྗེ་རིན་པོ་ཆེའི་མྱུ་གུའི་ཅོད་པན་བཅིངས། དེ་བཞིན་གཤེགས་པ་ཐམས་ཅད་ཀྱི་མཐུ་སྟོབས་གཅིག་ཏུ་གྱུར་པའི་རྡོ་རྗེ་ཕྱག་མཚན་དུ་གཏད། དེའི་ཚེ་འོག་མིན་གྱི་བར་གྱི་ལྷ་དང་ཞིང་ཁམས་ཐམས་ཅད་དུ་འདི་ནི་ལག་ན་རྡོ་རྗེའོ་ཞེས་མགྲིན་གཅིག་ཏུ་བསྒྲགས་པས་མིང་གི་དབང་བསྐུར་ཞིང་གསང་སྔགས་ཐམས་ཅད་ཀྱི་བདག་པོར་གཉེར་དུ་བསྐོས། མ་རུངས་པ་རྣམས་གདུལ་བར་བཀའ་བསྒོས་པ་ལ་བརྟེན་ནས་ཁྲོ་བོའི་རྣམ་རོལ་མཐའ་ཡས་པས་གདུག་པ་ཅན་དཔུང་དང་བཅས་པ་ཐམས་ཅད་བཏུལ་བར་ཕྱག་ན་རྡོ་རྗེ་དབང་བསྐུར་གྱི་རྒྱུད་ལས་གསུངས་པས་མཚོན་མཚན་དང་སྐུའི་རྣམ་འགྱུར་འདོད་རྒུར་བསྒྱུར་པས་ཞི་བ་དང་། ཁྲོ་བོ་དང་། དཀྱིལ་འཁོར་གྱི་གཙོ་བོ་དང་། འཁོར་གྱི་རྣམ་པར་བསྟན་པའི་བསྒྲུབ་བྱའི་ལྷ་དང་། རྒྱུད་སྡེ་ཆེན་པོ་བཞི་དང་རྗེས་སུ་འབྲེལ་བའི་སྒྲུབ་བྱེད་ཐབས་ཀྱི་ཁྱད་པར་བསམ་གྱིས་མི་ཁྱབ་པ་ཞིག་གསུངས་པ་ལས། གངས་ཅན་གྱི་ལྗོངས་འདིར་སྔོན་གྱི་དུས་ན་ཕྱག་རྡོར་ཆེ་བ་དྲུག་གམ་དགུར་གྲགས་པ་འདི་རྣམས་བྱིན་རླབས་ཀྱི་བཀའ་བབས་མཆོག་དང་ལྡན་པ་ཡིན་ཏེ། དེ་ལ་ཕྱག་ན་རྡོ་རྗེ་འཁོར་ལོ་ཆེན་པོ་དབང་གིས་ཆེ་བ་ཞེས་དྲག་པོ་སུམ་འདུལ་གྱི་རྒྱུད་ལ་བརྟེན་ནས་གྲུབ་པའི་སློབ་དཔོན་ཛ་བ་རིས་ལེགས་པར་བཀྲལ་ཞིང་དབང་བཞི་དང་བསྐྱེད་རྫོགས་སོགས་ཞིབ་རྒྱས་སུ་ཡོད་པ་བླ་མེད་བརྒྱུད་མི་བསྐྱོད་པའི་རིགས་ཀྱི་ཁྲོ་བོར་གཏོགས་པ་དང་། བེ་ཅོན་རྒྱུད་ཀྱིས་ཆེ་བ་ཞེས་རྩ་བ་དང་བཤད་པའི་རྒྱུད་སྡེ་བཅོ་ལྔ་ཙམ་ཡོད་པར་གྲགས་པ་དང་གཏུམ་པོ་ཁྱུང་གིས་ཆེ་བ་ཞེས་གསང་བ་མངོན་པར་བསྟན་པ་སོགས་ཀྱི་རྒྱུད་ལ་བརྟེན་ནས་གྲུབ་ཆེན་ལས་ཀྱི་རྡོ་རྗེས་བཀྲལ་ཞིང་ཁྱུང་ལྔ་དང་ཉེར་གཅིག་ལ་སོགས་པའི་སྤྲུལ་པ་སྤྲོ་ཞིང་། ཁྱུང་སྔགས་ཀྱི་ཤམ་འདོགས་པས་ཁྱད་པར་དུ་བྱས་པ་དང་། ཨུ་ཙཪྻ་དྲག་སྔགས་ཀྱིས་ཆེ་བ་ཞེས་འདིའི་བརྟེན་གཞིའི་རྒྱུད་རྡོ་རྗེ་ཁྲོས་པར་དྲེགས་པ་ཅན་རྣམས་ཀྱི་སྲོག་ནས་འདྲེན་པའི་དྲག་སྔགས་དུ་མ་ཡོད་པ་གྲགས་པ་དང་། འབྱུང་པོ་འདུལ་བྱེད་ནུས་མཐུས་ཆེ་བའམ་མེ་དམིགས་ཀྱིས་ཆེ་བ་ཞེས་སྤྱོད་རྒྱུད་ཀྱི་ཁོངས་སུ་གཏོགས་པའི་འབྱུང་པོ་འདུལ་བྱེད་ཀྱི་རྒྱུད་དང་། རྣལ་འབྱོར་བླ་མེད་མཁའ་འགྲོ་མ་རྡོ་རྗེ་གུར་གྱི་རྒྱུད་སོགས་ལ་བརྟེན་ནས་གྲུབ་པའི་སློབ་དཔོན་རྣམས་ཀྱིས་ལེགས་པར་བཀྲལ་ཞིང་། འཕགས་བོད་དུ་ལྷག་པའི་ལྷ་འདི་ལ་བརྟེན་ནས་ནུས་མཐུའི་རྩལ་འཆང་བ་ཇི་སྙེད་ཅིག་ད་ལྟའི་བར་དུ་བྱོན་པ་དང་། འགྲོ་བཟང་ཆོས་སྐྱོང་གིས་ཆེ་བ་ཞེས་གྲུབ་པའི་སློབ་དཔོན་འགྲོ་བཟང་སྙིང་པོའི་ལུགས་ཀྱི་ཕྱག་ན་རྡོ་རྗེ་གོས་སྔོན་ཅན་འདི་དང་རྗེས་སུ་འབྲེལ་བར་རྒྱལ་པོ་ཆེན་པོ་རྣམ་ཐོས་སྲས་ཞི་ཁྲོའི་སྒྲུབ་པའི་ཐབས་དང་མན་ངག་གི་བཀའ་སྲོལ་བསམ་གྱིས་མི་ཁྱབ་པར་བཞུགས་པ་དང་། གཞན་ཡང་ཕྱག་རྡོར་མདོ་ལུགས་མཛེ་གསོས་ཀྱིས་ཆེ་བ་ཞེས་གོས་སྔོན་ཅན་གྱི་གཟུངས་མདོ་ལ་བརྟེན་ནས་ཇོ་བོ་བཀའ་གདམས་པ་རྣམས་ཀྱིས་ཐུགས་དམ་གྱི་སྙིང་པོར་མཛད་པ་དང་། རྡོ་རྗེ་བདེ་ཁྲོས་ཀླུ་འདུལ་བའི་ཆེ་བ་ཞེས་མཛེ་སོགས་ཀླུའི་ནད་གསོ་བ་ལ་ཁྱད་པར་དུ་བསྔགས་ཤིང་དཔལ་ལྡན་ཤངས་པ་བཀའ་བརྒྱུད་པ་སོགས་ལ་དར་རྒྱས་སུ་བྱུང་བ་དང་། རྡོ་རྗེ་མེ་ལྕེ་སྡེ་བརྒྱད་གནད་ལ་དབབ་པའི་ཆེ་བ་ཞེས་སྡེ་བརྒྱད་ཀྱི་རིགས་མཐའ་དག་གནད་ལ་དབབ་ཅིང་འདུལ་བ་ལ་ལྷག་པར་སྟོབས་ཆེ་བ་ཞིག་སྟེ། དེ་ལྟ་བུའི་ལུགས་སྲོལ་མང་དུ་བྱུང་བ་ལས་འདིར་སྐབས་སུ་བབ་པ་ནི། རྗེ་བཙུན་རྣལ་འབྱོར་གྱི་དབང་ཕྱུག་མི་ལ་རས་པའི་ཐུགས་སྲས་ཀྱི་ཐུ་བོ་ཟླ་བ་ལྟ་བུ་རས་ཆུང་རྡོ་རྗེ་གྲགས་པ་ཞེས་ཚེ་གཅིག་ལུས་གཅིག་ཁོ་ནས་འཇའ་ལུས་རྡོ་རྗེའི་གོ་འཕང་མངོན་དུ་མཛད་པའི་གྲུབ་ཆེན་དེ་ཉིད་སྐུ་ན་ཕྲ་མོའི་དུས་སུ་ཀླུ་གདོན་གྱིས་བསྙུན་ཚུལ་བསྟན་པ་ན། སྔོན་ལས་ཀྱི་འཕྲོ་སད་དེ་རྒྱ་གར་འཕགས་པའི་ཡུལ་དུ་བྱོན། གྲུབ་པའི་སློབ་དཔོན་བ་ལ་ཙནྡྲ་ལས་དྲག་སྔགས་ཀྱི་ནུས་པ་མེ་དང་འདྲ་བའི་དཔལ་ཕྱག་ན་རྡོ་རྗེ་གཏུམ་པོ་ཁྱུང་གིས་ཆེ་བའི་སྐོར་ཡོངས་སུ་རྫོགས་པ་གསན་ནས་གདུག་པའི་ཀླུ་གདོན་ལས་གྲོལ། བོད་དུ་ཕེབས་ནས་སློབ་མའི་མཆོག་དག་ལ་ཅི་རིགས་པ་སྩལ་བ་ལས་རིམ་པར་བརྒྱུད་པ་བར་མ་ཆད་པར་བྱོན་པ་ལའང་ཕྱི་ནང་གསང་བའི་སྒྲུབ་སྐོར་དང་། དབང་དང་རྗེས་གནང་མན་ངག་གི་བཀའ་སྲོལ་མང་དུ་ཡོད་པ་ལས། འདིར་ཕྱི་སྒྲུབ་ལྷ་ལྔ་ཁྱུང་ཤམ་ཅན་གྱི་རྗེས་སུ་གནང་བ་ཟབ་མོ་བགྱི་བ་ལ་སློབ་དཔོན་གྱི་བྱ་བ་གྲུབ་ནས། ཁྱོད་རང་རྣམས་ཀྱི་ངོ་སྐལ་དུ་གྱུར་པ་ཐོག་མར་མཎྜལ་ཕུལ། བླ་མ་དང་རྡོ་རྗེ་གཏུམ་པོ་ཐ་མི་དད་པ་སྐྱབས་གནས་རྒྱ་མཚོའི་ཚོགས་ཀྱིས་བསྐོར་བའི་སྤྱན་སྔར་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཀུན་མཁྱེན་ཡེ་ཤེས་སོགས། རྒྱུད་སྡོམ་པ་དང་ལྡན་པར་བྱ་བའི་སླད་དུ་ཚོགས་ཞིང་རྣམས་ཀྱི་སྤྱན་སྔར་སྐྱབས་གསུམ་སྔོན་དུ་འགྲོ་བས་ཐེག་པ་ཆེན་པོའི་སེམས་བསྐྱེད་པར་བགྱིའོ་སྙམ་པས་འདིའི་རྗེས་ཟློས་ལན་གསུམ་མཛོད། དཀོན་མཆོག་གསུམ་ལ་བདག་སྐྱབས་མཆི་སོགས། རྗེས་གནང་གི་གཞི་དགོད་པའི་སླད་དུ་ཁྱེད་རང་རྣམས་ལྷར་གསལ་གདབ་པ་ཡིན་པས་དམིགས་པ་འདི་བཞིན་དུ་མཛོད། སྭ་བྷཱ་བ་སོགས། སྟོང་པའི་ངང་ལས་པད་ཉིའི་གདན་ལ་ཁྱེད་རང་རྣམས་སྐད་ཅིག་གིས་དཔལ་རྡོ་རྗེ་གཏུམ་པོ་སོགས་ནས། ཡེ་ཤེས་ཀྱི་མེ་འབར་བའི་སྐུར་གྱུར་པའི་གཙོ་འཁོར་ཐམས་ཅད་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། ཐུགས་ཀའི་ཧཱུྃ་ལས་འོད་ཟེར་འཕྲོས་པས་བྱང་ཕྱོགས་ལྕང་ལོ་ཅན་གྱི་ཞིང་ཁམས་ནས་བཅོམ་ལྡན་འདས་རྡོ་རྗེ་གཏུམ་པོ་རིགས་ལྔ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་དཔག་ཏུ་མེད་པ་སྤྱན་དྲངས། ཁྱེད་རང་རྣམས་ལ་སིབ་སིབ་ཐིམ་པས་རྒྱུད་བྱིན་གྱིས་བརླབས་པའི་མོས་པ་མཛོད། སྔགས་ཀྱི་མཐར་ས་པ་རི་ཝཱ་ར་ཨོཾ་བཛྲ་ཨཱ་བེ་ཤ་ཡ་ཨཱ་བེ་ཤ་ཡཱ་ཛཿཧཱུྃ་བྃ་ཧོཿ ཞེས་སྤོས་རོལ་དང་བཅས་ཡང་ཡང་བརྗོད། དེ་བརྟན་པར་བྱ་བའི་ཕྱིར་སྤྱི་བོར་རྡོ་རྗེ་རྒྱ་གྲམ་དུ་བཞག་སྟེ། ཏིཥྛ་བཛྲ། ཞེས་པས་བརྟན་པར་བྱས་པའི་མོས་པ་མཛོད། དེ་ལྟར་ཡེ་ཤེས་དབབ་ཅིང་བརྟན་པར་བྱས་པས་རྗེས་གནང་གི་གཞི་བཀོད་ནས། དངོས་གཞིའི་རྗེས་སུ་གནང་བའི་སླད་དུ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། དུས་གསུམ་སངས་རྒྱས་ངོ་བོ་ཉིད། །དཔལ་ལྡན་བླ་མ་རིན་པོ་ཆེས། །བདག་ལ་རྡོ་རྗེ་གཏུམ་པོ་ཡི། །སྐུ་གསུང་ཐུགས་ཀྱི་བྱིན་རླབས་དང་། །རྗེས་སུ་གནང་བ་སྩལ་དུ་གསོལ། །ཞེས་པས་གསོལ་བ་བཏབ་ནས། རྗེས་གནང་དངོས་ལ་སྐུ་གསུང་ཐུགས་ཀྱི་རྗེས་གནང་མཐའ་རྟེན་དང་བཅས་པ་རྣམས་སུ་ཡོད་པ་ལས། ཐོག་མར་སྐུའི་རྗེས་གནང་གི་སླད་དུ་སློབ་དཔོན་དང་ཁྱེད་རང་རྣམས་ལྷར་གསལ་བའི་ཐུགས་ཀའི་ས་བོན་ལས་འོད་ཟེར་འཕྲོས་པས་རང་བཞིན་གྱི་གནས་ནས་དབང་གི་ལྷ་རིགས་ལྔ་འཁོར་དང་བཅས་པ། ཨོཾ་པཉྩ་ཀུ་ལ་ས་པ་རི་ཝཱ་ར་བཛྲ་ས་མཱ་ཛཿ ཨོཾ་པཉྩ་ཀུ་ལ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། ཆོས་སྐུ་ནམ་མཁའ་བཞིན་དུ་སོགས་ཀྱིས་བསྟོད། བཅོམ་ལྡན་འདས་རིགས་ལྔ་འཁོར་བཅས་ཀྱིས་བདག་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། རིགས་ལྔ་འཁོར་བཅས་ཀྱིས་དབང་བསྐུར་བྱུང་སྙམ་པའི་མོས་པ་མཛོད། ཇི་ལྟར་བལྟམས་པ་སོགས་ནས། ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར་བས། སྐུ་གང་དྲི་མ་དག་བདུད་རྩིའི་རྒྱུན་ཡར་ལུད་དེ་སྤྱི་བོར་འཁྱིལ་བ་མི་བསྐྱོད་པ་སྤྲུལ་སྐུའི་ཆ་བྱད་ཅན་དང་། གཏུམ་པོ་བཞི་ལ་རིགས་སོ་སོས་དབུ་བརྒྱན་པར་གྱུར། དེ་ལྟར་སྐུའི་རྗེས་གནང་ཐོབ་པས་ལུས་ཀྱི་སྒྲིབ་པ་དག །ལུས་ཀྱི་སྒོ་ནས་ཕྱག་ན་རྡོ་རྗེའི་བསྐྱེད་རིམ་བསྒོམ་པ་ལ་དབང་ཞིང་། འབྲས་བུའི་ཕན་ཡོན་གནས་སྐབས་སུ་ལུས་ཀྱི་ནད་གདོན་སྡིག་སྒྲིབ་བར་ཆད་ཐམས་ཅད་ཞི་བ་དང་། མཐར་ཐུག་མཐུ་སྟོབས་དང་ལྡན་པའི་ཕྱག་ན་རྡོ་རྗེའི་སྐུ་འགྲུབ་པར་འགྱུར་རོ། །གཉིས་པ་གསུང་གི་རྗེས་གནང་གི་དོན་དུ་དམིགས་པ་འདི་བཞིན་མཛོད། མདུན་བསྐྱེད་ཀྱི་ལྷའི་ཐུགས་ཀའི་སྔགས་ཕྲེང་དང་། སློབ་དཔོན་གྱི་ལྷའི་སྔགས་ཕྲེང་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱོན། བཻ་ཌཱུཪྻའི་ཕྲེང་བ་ལྟར་ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། ཐུགས་ཀའི་ས་བོན་གྱི་མཐར་འཁོར་བར་མོས་ལ་འདིའི་རྗེས་ཟློས་མཛོད། ཨོཾ་བཛྲ་པཱ་ཎི་ཧཱུྃ་ཕཊ་སྭཱ་ཧཱ། །ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། བཅོམ་ལྡན་བདག་གིས་གཟུང་ལགས་ཀྱི། །བདག་ལ་འགོ་བར་མཛད་དུ་གསོལ། ལན་གསུམ། སློབ་དཔོན་གྱིས་ཀྱང་མེ་ཏོག་གི་ཕྲེང་བ་སྔགས་སུ་བྱས་ནས་སྤྱི་བོར་བཞག་བྱུང་སྙམ་པའི་མོས་པ་མཛོད། བཅོམ་ལྡན་འདི་ལ་སྩལ་ལགས་ཀྱི། །འདི་ལ་འགོ་བར་མཛད་དུ་གསོལ། སྔགས་ཀྱི་དངོས་གྲུབ་སྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ། དེ་ལྟར་གསུང་གི་རྗེས་གནང་ཐོབ་པས། ངག་གི་སྡིག་སྒྲིབ་དག །ངག་གི་སྒོ་ནས་ཕྱག་ན་རྡོ་རྗེའི་སྔགས་བཟླ་བ་སོགས་ལ་དབང་ཞིང་། གནས་སྐབས་སུ་ངག་གི་ནུས་པ་ཆེ་ཞིང་འཆད་རྩོད་སོགས་ལ་མཁས་པ་དང་། མཐར་ཐུག་བདེན་པའི་ཚིག་འགྲུབ་ཅིང་། གསུང་དབྱངས་ཡན་ལག་དྲུག་ཅུའི་དངོས་གྲུབ་ཐོབ་པར་འགྱུར་རོ། །གསུམ་པ་ཐུགས་ཀྱི་རྗེས་གནང་གི་དོན་དུ་དམིགས་པ་འདི་བཞིན་མཛོད། བླ་མ་དང་མདུན་བསྐྱེད་ཀྱི་ལྷའི་ཐུགས་ཀ་ནས་འོད་ཟེར་གྱི་ཚོགས་དཔག་ཏུ་མེད་པ་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་འོད་ཟེར་དཀར་དམར་མཐིང་གསུམ་གྱི་རྣམ་པར་སྤྱན་དྲངས། ཁྱེད་རང་རྣམས་ཀྱི་གནས་གསུམ་དུ་ཐིམ་པས། བཅོམ་ལྡན་འདས་ཕྱག་ན་རྡོ་རྗེ་གཏུམ་པོའི་སྐུ་གསུང་ཐུགས་དང་། ཁྱེད་རང་རྣམས་ཀྱི་ལུས་ངག་ཡིད་གསུམ་དབྱེར་མེད་དུ་གྱུར་སོང་སྙམ་པ་མཛོད་ལ། སེམས་གསལ་སྟོང་འཛིན་མེད་ཀྱི་ངང་དུ་འཇོག་པར་ཞུ། དེ་ལྟར་ཐུགས་ཀྱི་རྗེས་གནང་ཐོབ་པས་ཡིད་ཀྱི་སྡིག་སྒྲིབ་དག །ཡིད་ཀྱི་སྒོ་ནས་ཕྱག་ན་རྡོ་རྗེའི་ཏིང་ངེ་འཛིན་སྒོམ་པ་ལ་དབང་ཞིང་། གནས་སྐབས་སུ་ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེས་ཏེ། མཐར་ཐུག་འོད་གསལ་ཆོས་སྐུའི་གནས་ལུགས་མངོན་དུ་བྱེད་པར་འགྱུར་རོ། །བཞི་པ་གཏོར་དབང་གི་སྒོ་ནས་ཡོན་ཏན་ཕྲིན་ལས་ཀྱི་རྗེས་གནང་ཞུ་བའི་དོན་དུ་དམིགས་པ་འདི་བཞིན་མཛོད། བདག་གིས་གཏོར་མ་འདི་སྤྱི་བོར་བཞག་པའི་ཚེ། བཅོམ་ལྡན་འདས་ཕྱག་ན་རྡོ་རྗེ་གཏུམ་པོ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་སྤྲིན་ཕུང་གཏིབས་པ་ལྟར་བཞུགས་ཡོད་པར་བསམ། ཁྱེད་རང་རྣམས་ཀྱི་ལུས་ངག་ཡིད་གསུམ་གྱི་སྟེང་ན་ཡོད་པའི་ནད་གདོན་སྡིག་སྒྲིབ་མི་མཐུན་པའི་ཕྱོགས་ཐམས་ཅད་དེ་དག་གི་ཞལ་དུ་གསོལ་ནས་མེད་པར་བསམ། སྐུ་གསུང་ཐུགས་ཀྱི་བྱིན་རླབས་མ་ལུས་པ་ཞུགས་བྱུང་སྙམ་པའི་མོས་པ་མཛོད། ཨོཾ་བཛྲ་པཱ་ཎི་སོགས་དང་། སྤྲོ་ན་བརྒྱུད་པའི་རིམ་པའང་བརྗོད་དེ། རྡོ་རྗེ་འཆང་སོགས་ནས། རྗེ་བཙུན་བླ་མ་ངག་དབང་ཀུན་དགའ་བཀྲ་ཤིས་ལ་སོགས་ཏེ་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། བཅོམ་ལྡན་འདས་ཕྱག་ན་རྡོ་རྗེ་གཏུམ་པོའི་ལྷ་ཚོགས་འཁོར་དང་བཅས་པ་རྣམས་ཀྱིས་རྡོ་རྗེ་སློབ་མ་འདི་རྣམས་ཀྱི་རྒྱུད་ལ་བྱིན་གྱིས་བརླབ་པར་མཛད་དུ་གསོལ། དེས་རྗེས་གནང་གི་དངོས་གཞི་གྲུབ་ནས། དམ་ཚིག་ཁས་བླང་། གཏང་རག་གི་མཎྜལ། ལུས་ལོངས་སྤྱོད་འབུལ་བ། དགེ་བ་བསྔོ་བ་རྣམས་སྤྱི་ལྟར་བྱས་ལ་སློབ་མ་གྱེས། སློབ་དཔོན་གྱིས་མདུན་བསྐྱེད་ལ་མཆོད་བསྟོད། ནོངས་བཤགས། རྟེན་ཡོད་ན་བརྟན་བཞུགས། མེད་ན་གཤེགས་གསོལ་རྣམས་བྱ། མངོན་རྟོགས་ཀྱི་མཇུག་ནས་འབྱུང་བ་ལྟར་བདག་བསྐྱེད་འོད་གསལ་དུ་བསྡུ། ཐུན་མཚམས་ཀྱི་ལྷ་སྐུར་ལྡང་། གནས་གསུམ་བསྲུང་བ་དང་བསྔོ་སྨོན་ཤིས་བརྗོད་ཇི་ལྟར་རིགས་པས་མཐའ་བརྒྱན་པར་བྱའོ། །ཞེས་པ་འདིའང་མཁྱེན་བརྩེའི་དབང་པོས་སོ།། །། ༈

[edit]

phyag rdor gtum po'i rjes gnang sgrub thabs rdo rje'i me phreng / @#/_/dpal phyag na rdo rje gtum po'i rjes gnang sgrub thabs kyi yi ge rdo rje'i me phreng zhes bya ba bzhugs so/__/rgya gar skad du/__shrI badz+ra tsaN+Da sA d+ha naM/__bod skad du/__dpal rdo rje gtum po'i sgrub thabs/__bcom ldan 'das dpal gsang ba 'dzin pa'i bdag po la phyag 'tshal lo/__/rgyal kun thugs kyi gsang ba gcig pu shin tu zhi ba dam pa'i bdag__/gdul dka'i mun pa stug po 'jil slad rdo rje gtum po'i nyin mor byed/__/gang gi yid mkhar shar ba'i mod nas grub pa bye ba'i snang ster ba/__/bla ma mchog dang rnam dbyer med pas shis pa'i pad+mo rgyas par mdzod/__/rjes su gnang bas rgyud smin nas/__/bsnyen dang sgrub dang las sbyor gyis/__/dngos grub rgya mtsho'i char 'bebs pa/__/gsang ba 'dzin dang mtshungs par 'gyur/__/de la dang po ni/__lam thun mong pas rgyud sbyangs shing /__gzhan don kho nar rig sngags kyi dngos grub don du gnyer bas/__dkyil 'khor chen por smin byed kyi dbang bskur ba nos te/__dam tshig dang sdom pa'i kun spyod la nye bar gnas pas rjes su gnang ba nod par bya'o/__/'di la gsum/__sbyor ba/__dngos gzhi/__rjes so/__/dang po ni/__gnas dben par stegs bu'i dbus su maN+Da lar me tog gi tshom bu lnga bkod pa'i steng du many+dzi'i khar dpal gtor gtso 'khor lnga pa dar gdugs sngon pos brgyan pa/__de'i mdun du bum pa bcud ldan kha rgyan mgul chings dung chos gzungs rdor dang bcas pa dang /__'bul gtor gcig__/chu gnyis sngon 'gro'i nyer spyod rnams bkod mdzes su bsham/__slob dpon gyi mdun du rdo rje dril bu me tog gi snod sogs dgos pa'i yo byad rnams 'du bya'o/__/gnyis pa la gsum/__bdag bskyed/__mdun bskyed/__rjes su gnang ba'o/__/dang po ni/__mchod pa byin rlabs spyi ltar sngon du 'gro bas/__skyabs 'gro nas bzung bzlas pa bsdu ba'i bar 'og nas 'byung ba ltar nyams su blang ngo /__/gnyis pa ni/__mdun rten tshom bu dang gtor ma bsang sbyang /__stong pa'i ngang las pad nyi'i gdan la hU~M las rdo rje gtum po mthing nag sogs nas/__rigs so sos dbu brgyan par gyur ces pa'i bar bdag bskyed ltar gsal gdab/__mchod pa byin gyis brlabs la mchod bstod dang /__/mdun bskyed kyi thugs kar nyi ma la hU~M gi mthar sngags kyi phreng bas bskor ba las 'od zer spros bsdus sangs rgyas kyi mdzad pa bsgrubs par bsams la bzlas pa ci nus bya/__bum pa bsang sbyang /__stong pa'i ngang las b+h+rU~M las rin po che bai DUR+Ya'i bum pa mtshan nyid thams cad yongs su rdzogs shing bdud rtsi'i bcud kyis gang ba'i dbus su pad nyi'i gdan la hU~M las rdo rje gtum po sogs nas/__mchod bstod kyi bar bdag bskyed ltar bya/__gzungs thag blangs la/__bum lha'i thugs kar nyi ma la gnas pa'i hU~M gi mthar sngags kyi phreng bas bskor ba/__rang gi thugs ka nas sngags kyi phreng ba byung /__zhal nas thon/__gzungs thag la 'khril te bum nang gi lha'i thugs kar thim pas thugs rgyud bskul/__de las 'od zer 'phros pas sems can thams cad kyi sdig sgrib sbyangs/__rdo rje gtum po'i skur gyur/__de bzhin gshegs pa thams cad kyi byin rlabs bsdus te bum pa'i lha la thim/__thugs ka'i sngags phreng dang sku'i cha thams cad las bdud rtsi'i rgyun babs pas bum pa gang bar gyur/__sngags ci nus bzlas mthar mchod cing bstod/__oM AHhU~M gis mchod yon phul bas lha 'od du zhu ba bum pa'i chur gyur par bsam/__mdun bskyed la gtor ma bsang sbyang byin gyis brlabs nas phul/__mchod bstod 'dod don gsol/__gsum pa ni/__dbang gis smin pa'i slob ma rnams khrus byas gral la 'khod par/__/sems bskyed gsal gdab sogs chos kyi gtam ci rigs pas mtshams sbyar te/__de la 'dir dus gsum gyi rgyal ba sras dang bcas pa'i thugs kyi gsang ba bsam gyis mi khyab pa'i rang gzugs nus pa'i ye shes gcig tu bsdus pa'i bdag nyid bcom ldan 'das dpal lag na rdo rje zhes grags pa 'di ni/__byang chub sems dpa' thams cad kyi gtso bor gyur pa kun tu bzang po nyid/__rdo rje theg par sangs rgyas thams cad kyi bdag po rnam par snang mdzad kyis rdo rje'i rigs su mngon par dbang bskur/__rdo rje rin po che'i myu gu'i cod pan bcings/__de bzhin gshegs pa thams cad kyi mthu stobs gcig tu gyur pa'i rdo rje phyag mtshan du gtad/__de'i tshe 'og min gyi bar gyi lha dang zhing khams thams cad du 'di ni lag na rdo rje'o zhes mgrin gcig tu bsgrags pas ming gi dbang bskur zhing gsang sngags thams cad kyi bdag por gnyer du bskos/__ma rungs pa rnams gdul bar bka' bsgos pa la brten nas khro bo'i rnam rol mtha' yas pas gdug pa can dpung dang bcas pa thams cad btul bar phyag na rdo rje dbang bskur gyi rgyud las gsungs pas mtshon mtshan dang sku'i rnam 'gyur 'dod rgur bsgyur pas zhi ba dang /__khro bo dang /__dkyil 'khor gyi gtso bo dang /__'khor gyi rnam par bstan pa'i bsgrub bya'i lha dang /__rgyud sde chen po bzhi dang rjes su 'brel ba'i sgrub byed thabs kyi khyad par bsam gyis mi khyab pa zhig gsungs pa las/__gangs can gyi ljongs 'dir sngon gyi dus na phyag rdor che ba drug gam dgur grags pa 'di rnams byin rlabs kyi bka' babs mchog dang ldan pa yin te/__de la phyag na rdo rje 'khor lo chen po dbang gis che ba zhes drag po sum 'dul gyi rgyud la brten nas grub pa'i slob dpon dza ba ris legs par bkral zhing dbang bzhi dang bskyed rdzogs sogs zhib rgyas su yod pa bla med brgyud mi bskyod pa'i rigs kyi khro bor gtogs pa dang /__be con rgyud kyis che ba zhes rtsa ba dang bshad pa'i rgyud sde bco lnga tsam yod par grags pa dang gtum po khyung gis che ba zhes gsang ba mngon par bstan pa sogs kyi rgyud la brten nas grub chen las kyi rdo rjes bkral zhing khyung lnga dang nyer gcig la sogs pa'i sprul pa spro zhing /__khyung sngags kyi sham 'dogs pas khyad par du byas pa dang /__u tsaR+Ya drag sngags kyis che ba zhes 'di'i brten gzhi'i rgyud rdo rje khros par dregs pa can rnams kyi srog nas 'dren pa'i drag sngags du ma yod pa grags pa dang /__'byung po 'dul byed nus mthus che ba'am me dmigs kyis che ba zhes spyod rgyud kyi khongs su gtogs pa'i 'byung po 'dul byed kyi rgyud dang /__rnal 'byor bla med mkha' 'gro ma rdo rje gur gyi rgyud sogs la brten nas grub pa'i slob dpon rnams kyis legs par bkral zhing /__'phags bod du lhag pa'i lha 'di la brten nas nus mthu'i rtsal 'chang ba ji snyed cig da lta'i bar du byon pa dang /__'gro bzang chos skyong gis che ba zhes grub pa'i slob dpon 'gro bzang snying po'i lugs kyi phyag na rdo rje gos sngon can 'di dang rjes su 'brel bar rgyal po chen po rnam thos sras zhi khro'i sgrub pa'i thabs dang man ngag gi bka' srol bsam gyis mi khyab par bzhugs pa dang /__gzhan yang phyag rdor mdo lugs mdze gsos kyis che ba zhes gos sngon can gyi gzungs mdo la brten nas jo bo bka' gdams pa rnams kyis thugs dam gyi snying por mdzad pa dang /__rdo rje bde khros klu 'dul ba'i che ba zhes mdze sogs klu'i nad gso ba la khyad par du bsngags shing dpal ldan shangs pa bka' brgyud pa sogs la dar rgyas su byung ba dang /__rdo rje me lce sde brgyad gnad la dbab pa'i che ba zhes sde brgyad kyi rigs mtha' dag gnad la dbab cing 'dul ba la lhag par stobs che ba zhig ste/__de lta bu'i lugs srol mang du byung ba las 'dir skabs su bab pa ni/__rje btsun rnal 'byor gyi dbang phyug mi la ras pa'i thugs sras kyi thu bo zla ba lta bu ras chung rdo rje grags pa zhes tshe gcig lus gcig kho nas 'ja' lus rdo rje'i go 'phang mngon du mdzad pa'i grub chen de nyid sku na phra mo'i dus su klu gdon gyis bsnyun tshul bstan pa na/__sngon las kyi 'phro sad de rgya gar 'phags pa'i yul du byon/__grub pa'i slob dpon ba la tsan+d+ra las drag sngags kyi nus pa me dang 'dra ba'i dpal phyag na rdo rje gtum po khyung gis che ba'i skor yongs su rdzogs pa gsan nas gdug pa'i klu gdon las grol/__bod du phebs nas slob ma'i mchog dag la ci rigs pa stsal ba las rim par brgyud pa bar ma chad par byon pa la'ang phyi nang gsang ba'i sgrub skor dang /__dbang dang rjes gnang man ngag gi bka' srol mang du yod pa las/__'dir phyi sgrub lha lnga khyung sham can gyi rjes su gnang ba zab mo bgyi ba la slob dpon gyi bya ba grub nas/__khyod rang rnams kyi ngo skal du gyur pa thog mar maN+Dal phul/__bla ma dang rdo rje gtum po tha mi dad pa skyabs gnas rgya mtsho'i tshogs kyis bskor ba'i spyan sngar gsol ba 'debs pa 'di'i rjes zlos lan gsum mdzod/__kun mkhyen ye shes sogs/__rgyud sdom pa dang ldan par bya ba'i slad du tshogs zhing rnams kyi spyan sngar skyabs gsum sngon du 'gro bas theg pa chen po'i sems bskyed par bgyi'o snyam pas 'di'i rjes zlos lan gsum mdzod/__dkon mchog gsum la bdag skyabs mchi sogs/__rjes gnang gi gzhi dgod pa'i slad du khyed rang rnams lhar gsal gdab pa yin pas dmigs pa 'di bzhin du mdzod/__swa b+hA ba sogs/__stong pa'i ngang las pad nyi'i gdan la khyed rang rnams skad cig gis dpal rdo rje gtum po sogs nas/__ye shes kyi me 'bar ba'i skur gyur pa'i gtso 'khor thams cad kyi spyi bor oM dkar po/__mgrin par AHdmar po/__thugs kar hU~M sngon po/__thugs ka'i hU~M las 'od zer 'phros pas byang phyogs lcang lo can gyi zhing khams nas bcom ldan 'das rdo rje gtum po rigs lnga la sangs rgyas dang byang chub sems dpa'i tshogs kyis bskor ba dpag tu med pa spyan drangs/__khyed rang rnams la sib sib thim pas rgyud byin gyis brlabs pa'i mos pa mdzod/__sngags kyi mthar sa pa ri wA ra oM badz+ra A be sha ya A be sha yA dzaHhU~M ba~M hoH__zhes spos rol dang bcas yang yang brjod/__de brtan par bya ba'i phyir spyi bor rdo rje rgya gram du bzhag ste/__tiSh+Tha badz+ra/__zhes pas brtan par byas pa'i mos pa mdzod/__de ltar ye shes dbab cing brtan par byas pas rjes gnang gi gzhi bkod nas/__dngos gzhi'i rjes su gnang ba'i slad du gsol ba 'debs pa 'di'i rjes zlos lan gsum mdzod/__dus gsum sangs rgyas ngo bo nyid/__/dpal ldan bla ma rin po ches/__/bdag la rdo rje gtum po yi/__/sku gsung thugs kyi byin rlabs dang /__/rjes su gnang ba stsal du gsol/__/zhes pas gsol ba btab nas/__rjes gnang dngos la sku gsung thugs kyi rjes gnang mtha' rten dang bcas pa rnams su yod pa las/__thog mar sku'i rjes gnang gi slad du slob dpon dang khyed rang rnams lhar gsal ba'i thugs ka'i sa bon las 'od zer 'phros pas rang bzhin gyi gnas nas dbang gi lha rigs lnga 'khor dang bcas pa/__oM pany+tsa ku la sa pa ri wA ra badz+ra sa mA dzaH__oM pany+tsa ku la sa pa ri wA ra ar+g+haM sogs kyis mchod/__chos sku nam mkha' bzhin du sogs kyis bstod/__bcom ldan 'das rigs lnga 'khor bcas kyis bdag la mngon par dbang bskur du gsol/__zhes gsol ba btab pas/__rigs lnga 'khor bcas kyis dbang bskur byung snyam pa'i mos pa mdzod/__ji ltar bltams pa sogs nas/__a b+hi She ka ta sa ma ya shri ye hU~M/__zhes gsung zhing bum pa'i chus spyi bo nas dbang bskur bas/__sku gang dri ma dag bdud rtsi'i rgyun yar lud de spyi bor 'khyil ba mi bskyod pa sprul sku'i cha byad can dang /__gtum po bzhi la rigs so sos dbu brgyan par gyur/__de ltar sku'i rjes gnang thob pas lus kyi sgrib pa dag__/lus kyi sgo nas phyag na rdo rje'i bskyed rim bsgom pa la dbang zhing /__'bras bu'i phan yon gnas skabs su lus kyi nad gdon sdig sgrib bar chad thams cad zhi ba dang /__mthar thug mthu stobs dang ldan pa'i phyag na rdo rje'i sku 'grub par 'gyur ro/__/gnyis pa gsung gi rjes gnang gi don du dmigs pa 'di bzhin mdzod/__mdun bskyed kyi lha'i thugs ka'i sngags phreng dang /__slob dpon gyi lha'i sngags phreng las mar me gcig las gnyis mched kyi tshul du byon/__bai DUR+Ya'i phreng ba ltar zhal nas thon/__khyed rang rnams kyi zhal du zhugs/__thugs ka'i sa bon gyi mthar 'khor bar mos la 'di'i rjes zlos mdzod/__oM badz+ra pA Ni hU~M phaT swA hA/__/oM badz+ra tsaN+Da ma hA ro Sha Na hU~M phaT/__bcom ldan bdag gis gzung lags kyi/__/bdag la 'go bar mdzad du gsol/__lan gsum/__slob dpon gyis kyang me tog gi phreng ba sngags su byas nas spyi bor bzhag byung snyam pa'i mos pa mdzod/__bcom ldan 'di la stsal lags kyi/__/'di la 'go bar mdzad du gsol/__sngags kyi dngos grub stsal du gsol/__/brtul zhugs brtan par mdzad du gsol/__/oM su pra tiSh+Tha badz+rA ya swA hA/__de ltar gsung gi rjes gnang thob pas/__ngag gi sdig sgrib dag__/ngag gi sgo nas phyag na rdo rje'i sngags bzla ba sogs la dbang zhing /__gnas skabs su ngag gi nus pa che zhing 'chad rtsod sogs la mkhas pa dang /__mthar thug bden pa'i tshig 'grub cing /__gsung dbyangs yan lag drug cu'i dngos grub thob par 'gyur ro/__/gsum pa thugs kyi rjes gnang gi don du dmigs pa 'di bzhin mdzod/__bla ma dang mdun bskyed kyi lha'i thugs ka nas 'od zer gyi tshogs dpag tu med pa 'phros/__phyogs bcu'i sangs rgyas dang byang chub sems dpa' thams cad 'od zer dkar dmar mthing gsum gyi rnam par spyan drangs/__khyed rang rnams kyi gnas gsum du thim pas/__bcom ldan 'das phyag na rdo rje gtum po'i sku gsung thugs dang /__khyed rang rnams kyi lus ngag yid gsum dbyer med du gyur song snyam pa mdzod la/__sems gsal stong 'dzin med kyi ngang du 'jog par zhu/__de ltar thugs kyi rjes gnang thob pas yid kyi sdig sgrib dag__/yid kyi sgo nas phyag na rdo rje'i ting nge 'dzin sgom pa la dbang zhing /__gnas skabs su ting nge 'dzin khyad par can rgyud la skyes te/__mthar thug 'od gsal chos sku'i gnas lugs mngon du byed par 'gyur ro/__/bzhi pa gtor dbang gi sgo nas yon tan phrin las kyi rjes gnang zhu ba'i don du dmigs pa 'di bzhin mdzod/__bdag gis gtor ma 'di spyi bor bzhag pa'i tshe/__bcom ldan 'das phyag na rdo rje gtum po la sangs rgyas dang byang chub sems dpa'i tshogs kyis bskor ba sprin phung gtibs pa ltar bzhugs yod par bsam/__khyed rang rnams kyi lus ngag yid gsum gyi steng na yod pa'i nad gdon sdig sgrib mi mthun pa'i phyogs thams cad de dag gi zhal du gsol nas med par bsam/__sku gsung thugs kyi byin rlabs ma lus pa zhugs byung snyam pa'i mos pa mdzod/__oM badz+ra pA Ni sogs dang /__spro na brgyud pa'i rim pa'ang brjod de/__rdo rje 'chang sogs nas/__rje btsun bla ma ngag dbang kun dga' bkra shis la sogs te rtsa ba dang brgyud par bcas pa'i dpal ldan bla ma dam pa rnams dang /__bcom ldan 'das phyag na rdo rje gtum po'i lha tshogs 'khor dang bcas pa rnams kyis rdo rje slob ma 'di rnams kyi rgyud la byin gyis brlab par mdzad du gsol/__des rjes gnang gi dngos gzhi grub nas/__dam tshig khas blang /__gtang rag gi maN+Dal/__lus longs spyod 'bul ba/__dge ba bsngo ba rnams spyi ltar byas la slob ma gyes/__slob dpon gyis mdun bskyed la mchod bstod/__nongs bshags/__rten yod na brtan bzhugs/__med na gshegs gsol rnams bya/__mngon rtogs kyi mjug nas 'byung ba ltar bdag bskyed 'od gsal du bsdu/__thun mtshams kyi lha skur ldang /__gnas gsum bsrung ba dang bsngo smon shis brjod ji ltar rigs pas mtha' brgyan par bya'o/__/zhes pa 'di'ang mkhyen brtse'i dbang pos so//___//__!_