ཕྱག་རྡོར་འཁོར་ཆེན་གྱི་རྗེས་གནང་དང་བསྙེན་པ་བྱ་ཚུལ།

🚧 This website is under continued development. We appreciate your patience!

Previous Text Back to Volume PageNext Text

Wylie title	phyag rdor 'khor chen gyi rjes gnang dang bsnyen pa bya tshul
Location	mkhyen brtse'i bka' 'bum Volume 9, sde tshan 9, Text 6, Pages 412-423 (Folios 28b6 to 34a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. phyag rdor 'khor chen gyi rjes gnang dang bsnyen pa bya tshul. In 'jam dbyangs mkhyen brtse'i dbang po'i bka' 'bum, Vol. 9: 412-423. Khams sde dge rdzong sar dgon: Rdzong sar blo gros phun tshogs, 2020.
Genre	Permission to Invoke (anujñā) - rjes gnang  ·  Recitation Manual - bsnyen yig  ·  Activity Practices - las tshogs
Deity	phyag na rdo rje
Colophon	།ཞེས་པའང་རྗེས་སུ་གནང་བའི་རིམ་པ་བླ་མའི་ཕྱག་གཞེས་དང་མཐུན་པར་བྲིས་ཤིང་། ཞར་བྱུང་བསྙེན་ཐབས་དང་ལས་ཚོགས་མདོ་ཙམ་ཡི་གེ་རྙིང་པ་རྣམས་ཀྱི་སྙིང་པོ་ཅུང་ཟད་བསྡུས་ཏེ། བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་སྦྱར་བའི་དགེ་བས་འགྲོ་ཀུན་རྡོ་རྗེ་འཛིན་པའི་ཡེ་ཤེས་ཀྱི་སྐུ་མྱུར་དུ་འགྲུབ་པའི་རྒྱུར་གྱུར་ཅིག།
	zhes pa'ang rjes su gnang ba'i rim pa bla ma'i phyag gzhes dang mthun par bris shing /__zhar byung bsnyen thabs dang las tshogs mdo tsam yi ge rnying pa rnams kyi snying po cung zad bsdus te/__bya bral ba 'jam dbyangs mkhyen brtse'i dbang pos sbyar ba'i dge bas 'gro kun rdo rje 'dzin pa'i ye shes kyi sku myur du 'grub pa'i rgyur gyur cig

1 Texts in this Section (sde tshan or chos tshan)

6 412-423	ཕྱག་རྡོར་འཁོར་ཆེན་གྱི་རྗེས་གནང་དང་བསྙེན་པ་བྱ་ཚུལ། phyag rdor 'khor chen gyi rjes gnang dang bsnyen pa bya tshul Permission to Invoke (anujñā) - rjes gnang   ·   Recitation Manual - bsnyen yig   ·   Activity Practices - las tshogs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །ན་མོ་གུ་རུ་བཛྲ་པཱ་ཎཱ་ཡ། དཔལ་ཕྱག་ན་རྡོ་རྗེ་འཁོར་ལོ་ཆེན་པོའི་རྗེས་སུ་གནང་བ་བསྒྲུབ་པར་འདོད་པས། སྟེགས་བུའི་དབུས་སུ་མཎྜ་ལར་མེ་ཏོག་གི་ཚོམ་བུ་གཅིག་དགོད། དེའི་སྟེང་དུ་གཏོར་མ་དཀར་ཟླུམ་ཐེབ་ཀྱུས་བསྐོར་བ་དར་སྔོན་པོའི་གདུགས་ཀྱིས་སྤྲས་པ་དང་། མདུན་དུ་འབུལ་གཏོར། ཆུ་གཉིས་སྔོན་འགྲོའི་ཉེར་སྤྱོད་རྣམས་བཀོད་མཛེས་སུ་བཤམ། རང་གི་མདུན་དུ་རྡོ་རྗེ་དྲིལ་བུ་ནང་མཆོད་སོགས་འདུ་བྱ། བདག་བསྐྱེད་སྔོན་ཏུ་འགྲོ་བས། མདུན་རྟེན་བསང་སྦྱང་། སྟོང་པའི་ངང་ལས་པྃ་ལས་སོགས་ནས། ཡོངས་སུ་གྱུར་པ་ལས། སངས་རྒྱས་འཁོར་ལོ་ཆེན་པོ་སོགས་ཀྱིས་གསལ་གདབ་ཅིང་། བསྟོད་པའི་བར་བདག་བསྐྱེད་ལྟར་དང་། མདུན་བསྐྱེད་ལ་དམིགས་པའི་བཟླས་པའང་ཅི་རིགས་པས་ཐུགས་རྒྱུད་བསྐུལ། འབུལ་གཏོར་བསང་སྦྱང་། ཨོཾ་ཨཱཿཧཱུྃ་ཧ་ཧོ་ཧྲཱིཿས་བརླབ། སྙིང་པོའི་མཐར། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ། ཨོཾ་བཛྲ་པཱ་ཎི་ས་པ་རི་ཝཱ་ར་ཨརྒྷཾ་སོགས་ནས། ཤབྡ་པྲ་ཏཱི་ཙྪ་སྭཱ་ཧཱས་མཆོད། ཕྱག་ན་རྡོ་རྗེ་དྲག་པོ་ཆེ། རྡོ་རྗེ་ཁྲོ་བོ་དྲག་ཆེན་འཇོམས། །རྡོ་རྗེ་མི་ཐུབ་འཇིགས་བྱེད་ཆེ། །རྡོ་རྗེ་གཟི་བརྗིད་སྔགས་ཀྱི་གཙོ། །རྡོ་རྗེ་ཕྲིན་ལས་དོན་ཀུན་མཛད། །ཐབས་འདུལ་འཁོར་ལོ་ཆེ་ལ་བསྟོད། །ཅེས་བསྟོད། མཆོད་སྦྱིན་གཏོར་མ་འདི་བཞེས་ལ། །ཞེས་སོགས་ཀྱིས་ཕྲིན་ལས་གསོལ་བ་ནི་སློབ་དཔོན་གྱི་བྱ་བའོ། །དེ་ནས་སློབ་མ་རྣམས་ཁྲུས་བྱས་གྲལ་ལ་འཁོད་ནས་མཎྜལ་ཕུལ། སློབ་དཔོན་གྱིས་ངེས་འབྱུང་དང་བྱང་ཆུབ་སེམས་ཀྱི་གཏམ་ཅི་རིགས་པས་མཚམས་སྦྱར་ཏེ། དེ་ལ་འདིར་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་སངས་རྒྱས་གངྒཱའི་ཀླུང་གི་བྱེ་མ་སྙེད་ཀྱིས་རྗེས་སུ་གནང་བ། དེ་བཞིན་གཤེགས་པ་ཐམས་ཅད་ཀྱི་མཐུ་སྟོབས་གཅིག་ཏུ་བསྡུས་པའི་བདག་ཉིད། མདོ་སྡེ་དང་རྒྱུད་སྡེའི་གསུང་གི་གསང་བ་མཐའ་དག་རྫོགས་པར་འཛིན་པའི་འཁོར་ལོའི་བདག་པོ་དང་རྒྱལ་བའི་སྲས་སུ་རྣམ་པར་འཕྲུལ་པ་ལའང་སྒྲུབ་ཐབས་དང་མན་ངག་གི་བཀའ་སྲོལ་བསམ་གྱིས་མི་ཁྱབ་པ་ཞིག་བྱུང་བ་ལས། གངས་ཅན་གྱི་ལྗོངས་སུ་དཔལ་ཕྱག་ན་རྡོ་རྗེ་ལ་ཆེ་བ་དྲུག་གམ་དགུར་གྲགས་པའི་ཡ་གྱལ། འཁོར་ལོ་ཆེན་པོ་དབང་གིས་ཆེ་བ་ཞེས། དྲག་པོ་སུམ་འདུལ་གྱི་རྒྱུད་དང་། དེའི་གསང་བ་རྣམ་པར་འབྱེད་པའི་རྒྱུད་སོགས་ལ་བརྟེན་ནས་གྲུབ་ཆེན་ཛ་བ་རིས་ལེགས་པར་བཀྲལ་ཞིང་ལོ་ཙཱ་བ་འགར་ཆོས་ཀྱི་བཟང་པོས་བསྒྱུར་བཤད་འཆད་ཉན་གྱིས་གཏན་ལ་ཕབས་པ་ནས་བཟུང་། །དམར་སྟོན་རིམ་བྱོན་དང་། རྗེ་བདག་ཉིད་ཆེན་པོ་སོགས་ལམ་འདི་ལ་མཁས་ཤིང་དངོས་གྲུབ་མཆོག་བརྙེས་པའི་བརྒྱུད་པ་བར་མ་ཆད་པ་ལས་བྱུང་བའི་སྨིན་གྲོལ་མན་ངག་དང་བཅས་པའི་བཀའ་སྲོལ་ཅི་རིགས་པར་བཞུགས་པ་ལས། འདིར་དཔལ་ཕྱག་ན་རྡོ་རྗེ་འཁོར་ལོ་ཆེན་པོ་གཙོ་རྐྱང་གི་རྗེས་སུ་གནང་བ་བསྒྲུབ་པ་ལ། སློབ་དཔོན་གྱི་བྱ་བ་གྲུབ་ནས། ཁྱེད་རང་རྣམས་ཀྱི་ངོ་སྐལ་དུ་གྱུར་པ་ཐོག་མར་གསོལ་བ་འདེབས་པ་འདིའི་རྗེས་ཟློས་མཛོད། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་བ། །དེ་རིང་བཤད་པའི་རིན་ཆེན་གཏེར། །གཙོ་བོས་བདག་ལ་བཀའ་དྲིན་སྩོལ། །ལན་གསུམ། རྒྱུད་སྦྱང་བའི་སླད་དུ། བླ་མ་དང་དཔལ་ཕྱག་ན་རྡོ་རྗེ་ཐ་མི་དད་པའི་སྤྱན་སྔར་སྐྱབས་སུ་འགྲོ་བ་དང་སེམས་བསྐྱེད་པའི་སྡོམ་པ་གཟུང་སྙམ་པས་འདིའི་རྗེས་ཟློས་མཛོད། དཀོན་མཆོག་གསུམ་ལ་སོགས་ལན་གསུམ། དངོས་གཞིའི་སླད་དུ་སློབ་དཔོན་དང་མདུན་བསྐྱེད་ཀྱི་རྟེན་བསྒྲུབས་ཟིན་པ་ལྟར་སྣ་ཚོགས་པདྨ་འདབ་མ་བརྒྱད་པའི་ལྟེ་བར། ཚངས་པ་དང་བརྒྱ་བྱིན་གཡོན་དུ་བསྒྱེལ་བའི་སོག་ཕྲག་ཏུ་ཟླ་ཉིའི་གདན་ལ། སངས་རྒྱས་འཁོར་ལོ་ཆེན་པོ་སོགས་ནས། ཐུགས་ཀར་ཧཱུྃ་སྔོན་པོས་མཚན་པའི་སྐུ་ཅན་དུ་བཞུགས་པ་ལ་མི་ཕྱེད་དད་པའི་གདུང་ཤུགས་དྲག་པོས་མེ་ཏོག་དང་བཅས་པས་ཐལ་མོ་སྦྱར་ཏེ་སྐུའི་རྗེས་གནང་གི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། །དུས་གསུམ་སངས་རྒྱས་ཐམས་ཅད་ཀྱི། །སྐུ་ཡི་རྡོ་རྗེ་སློབ་དཔོན་གྱིས། །བདག་ལ་འཁོར་ལོ་ཆེན་པོ་ཡི། །སྐུ་ཡི་རྗེས་གནང་སྩལ་དུ་གསོལ། །ལན་གསུམ། ཞེས་གསོལ་བ་བཏབ་ནས། ཁྱེད་རང་རྣམས་ལྷར་གསལ་གདབ་པ་ཡིན་པས་བདག་གི་ཚིག་རིས་དང་མཐུན་པར་དམིགས་པ་འདི་བཞིན་དུ་གནང་བར་ཞུ། སློབ་མ་བསང་སྦྱང་། སྟོང་པའི་ངང་ལས་པྃ་ལས་སོགས་ནས། ཡོངས་སུ་གྱུར་པ་ལས། སློབ་མ་སངས་རྒྱས་འཁོར་ལོ་ཆེན་པོ་སོགས་ནས། ཐུགས་ཀར་ཧཱུྃ་སྔོན་པོས་མཚན་པ། སླར་ཡང་རང་གི་ཐུགས་ཀའི་ཧཱུྃ་ཡིག་གི་འོད་ཟེར་གྱིས་ཡི་དམ་གྱི་ལྷ་དཔལ་གསང་བའི་བདག་པོ་འཁོར་ལོ་ཆེན་པོ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་སྤྱན་དྲངས། སློབ་མའི་ལུས་ལ་ཆར་ཆེན་པོ་བབས་པ་བཞིན་དུ་སིབ་སིབ་ཐིམ་པས་ལུས་ཀྱི་ནད་གདོན་སྡིག་སྒྲིབ་དག །སྐུའི་བྱིན་རླབས་ཞུགས། སློབ་མའི་ལུས་དང་ཡི་དམ་གྱི་སྐུ་དབྱེར་མེད་དུ་གྱུར་པར་བསམས་ལ། སྙིང་པོའི་སྔགས་ཀྱི་མཐར། ཨོཾ་བཛྲ་ཨཱ་བེ་ཤ་ཡ་ཨ་ཨཿ ཛཿཧཱུྃ་བྃ་ཧོ། ཞེས་ཡང་ཡང་བརྗོད་ཅིང་སྤོས་རོལ་བྱ། དེ་ནི་སྐུའི་རྗེས་གནང་ངོ་། །གསུང་གི་རྗེས་གནང་གི་དོན་ཏུ་གསོལ་བ་འདེབས་པ་འདིའི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་ཀྱི། །གསུང་གི་རྡོ་རྗེ་སློབ་དཔོན་གྱིས། །བདག་ལ་འཁོར་ལོ་ཆེན་པོ་ཡི། །གསུང་གི་རྗེས་གནང་སྩལ་དུ་གསོལ། །ལན་གསུམ། རང་གི་ཐུགས་ཀའི་ས་བོན་ལས་སྔགས་ཀྱི་ཕྲེང་བ་བྱུང་། སྣ་བུག་གཡས་ནས་ཐོན། སློབ་མའི་སྣ་བུག་གཡོན་ནས་ཞུགས། སྙིང་གར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ཡིག་གི་མཐར་བསྐོར་བ་ལས་འོད་ཟེར་འཕྲོས། ངག་གི་ནད་གདོན་སྡིག་སྒྲིབ་ཐམས་ཅད་དག །གསུང་གི་བྱིན་རླབས་ཞུགས། སློབ་མའི་ངག་དང་ཡི་དམ་གྱི་གསུང་དབྱེར་མེད་དུ་གྱུར། སྔགས་འདིའི་རྗེས་ཟློས་ལན་གསུམ་མཛོད། སྙིང་པོ་དང་ཉེ་སྙིང་གི་རྗེས་ཟློས་བྱར་གཞུག །དེ་ནི་གསུང་གི་རྗེས་གནང་ངོ་། །ཐུགས་ཀྱི་རྗེས་གནང་གི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་ཀྱི། །ཐུགས་ཀྱི་རྡོ་རྗེ་སློབ་དཔོན་གྱིས། །བདག་ལ་འཁོར་ལོ་ཆེན་པོ་ཡི། །ཐུགས་ཀྱི་རྗེས་གནང་སྩལ་དུ་གསོལ། །ལན་གསུམ། རང་གི་ཐུགས་ཀའི་ས་བོན་ལས་ཡི་དམ་གྱི་ལྷ་སངས་རྒྱས་འཁོར་ལོ་ཆེན་པོའི་ཐུགས་ཀྱི་བྱིན་རླབས་ཐམས་ཅད་ཕྱག་མཚན་ཁྲོ་བོའི་རྡོ་རྗེ་རྩེ་ལྔ་པ་ནམ་མཁའི་ཁམས་གང་བར་སྤྲོས། སློབ་མའི་སྙིང་གའི་ས་བོན་ལ་ཐིམ་པས་ཡིད་ཀྱི་ནད་གདོན་སྡིག་སྒྲིབ་ཐམས་ཅད་དག །ཐུགས་ཀྱི་བྱིན་རླབས་ཞུགས། སློབ་མའི་ཡིད་དང་ཡི་དམ་གྱི་ཐུགས་དབྱེར་མེད་དུ་གྱུར། །ཅེས་བརྗོད་ཅིང་བསམས་ལ་ཅུང་ཟད་རེ་མཉམ་པར་གཞག །དེ་ནི་ཐུགས་ཀྱི་རྗེས་གནང་ངོ་། །དེ་རྣམས་བརྟན་པར་བྱེད་པ་དབང་ལྷ་བསྟིམ་པའི་རྗེས་གནང་གི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། བཅོམ་ལྡན་བདག་ལ་སྩལ་ལགས་ཀྱི། །བདག་ལ་ཉེ་བར་མཛད་དུ་གསོལ། ལན་གསུམ། དེ་ལྟར་གསོལ་བ་བཏབ་པས་གཏོར་མ་ལྷར་གསལ་བ་ཁྱེད་རང་རྣམས་ཀྱི་སྤྱི་བོར་སྤྱན་དྲངས་ཤིང་བྱིན་གྱིས་བརླབས་པའི་མོས་པ་མཛོད། གཏོར་མ་སྤྱི་བོར་བཞག་ལ། བཅོམ་ལྡན་འདི་ལ་སྩལ་ལགས་ཀྱི། །འདི་ལ་ཉེ་བར་མཛད་དུ་གསོལ། དུས་འདི་ནས་ནི་བཟུང་ནས་སུ། །བྱང་ཆུབ་སྙིང་པོར་མཆིས་ཀྱི་བར། །ལྷག་པའི་ལྷར་ནི་མཛད་དུ་གསོལ། །རྐྱེན་ངན་བར་ཆད་ཐམས་ཅད་སོལ། །དངོས་གྲུབ་ཐམས་ཅད་སྩལ་དུ་གསོལ། །ཞེས་གསོལ་བ་བཏབ་པས་གཏོར་མའི་ལྷ་འོད་དུ་ཞུ་ནས་སློབ་མ་ལ་ཐིམ་པས། དཔལ་གསང་བའི་བདག་པོ་འཁོར་ལོ་ཆེན་པོའི་སྐུ་གསུང་ཐུགས་དང་སློབ་མའི་ལུས་ངག་ཡིད་གསུམ་དབྱེར་མེད་དུ་གྱུར། དེ་ནི་དབང་ལྷ་བསྟིམ་པའི་རྗེས་གནང་ངོ་། །དེས་རྗེས་གནང་གི་དངོས་གཞི་གྲུབ་ནས། དམ་ཚིག་ཁས་བླང་། གཏང་རག་གི་མཎྜལ། ལུས་ལོངས་སྤྱོད་འབུལ་བ། དགེ་བ་བསྔོ་བ་རྣམས་སྤྱི་ལྟར་བྱས་ལ་སློབ་མ་གྱེས། སློབ་དཔོན་གྱིས་མདུན་བསྐྱེད་ཚོམ་བུའི་ལྷ་ལ་མཆོད་བསྟོད། ནོངས་བཤགས། ཡེ་ཤེས་པ་གཤེགས། དམ་ཚིག་པ་རང་ལ་བསྟིམ། རང་གི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་སྣོད་བཅུད་ཐམས་ཅད་འོད་དུ་ཞུ་ནས་རང་ལ་ཐིམ། རང་ཡེ་ཤེས་སེམས་དཔའ་ལ་ཐིམ། དེ་ཏིང་ངེ་འཛིན་སེམས་དཔའ་ལ་ཐིམ། དེ་ཡང་མི་དམིགས་པ་འོད་གསལ་སྟོང་པ་ཉིད་དུ་གྱུར། སླར་ཡང་རང་སྐད་ཅིག་གིས་སངས་རྒྱས་འཁོར་ལོ་ཆེན་པོའི་སྐུར་བཞེངས་པར་བསམས་ལ་བསྔོ་སྨོན་ཤིས་བརྗོད་ཇི་ལྟར་རིགས་པར་བྱའོ། །ཞར་བྱུང་བསྙེན་པ་བྱ་ཚུལ་ནི། རྟེན་གྱི་གང་ཟག་དབང་དང་རྗེས་སུ་གནང་བ་ཐོབ་ཅིང་དམ་ཚིག་དང་སྡོམ་པ་རྣམ་པར་དག་པས། དགྲ་རྐུན་ལ་སོགས་པའི་བར་ཆད་མེད་པ་དབེན་ཞིང་ཉམས་དགའ་བའི་གནས་སུ། །ཟས་གོས་སོགས་འཚོ་བའི་ཡོད་བྱད་རྣམས་ཚགས་སུ་ཚུད་པར་བྱ། གནས་ཀྱི་བདག་པོ་ལ་གཏོར་མ་དང་ཆུ་སྦྱིན་ལ་སོགས་པས་མཉེས་པར་བྱ་ཞིང་བར་ཆད་མི་བྱེད་པའི་ཕྲིན་ལས་བཅོལ། བྱང་ཆུབ་ཀྱི་སེམས་རིན་པོ་ཆེ་སྒོ་དུ་མ་ནས་ཡིད་ལ་བྱེད་བཞིན་པའི་ངང་། བསམ་གཏན་གྱི་ཁང་བུར་ཕྱགས་དར་ལེགས་པར་བྱས་ཏེ། འབྱོར་ན་རང་གི་མདུན་དུ་འདིའི་བྲིས་སྐུ་མཚན་ཉིད་དང་ལྡན་པ་དགྲམ་པའི་མདུན་དང་། གང་ལྟར་ཡང་འབུལ་གཏོར་མཆོད་པ་བཅས། རྡོར་དྲིལ་ནང་མཆོད་སོགས་འདུ་བྱ། དེ་ནས་ཕྱི་དྲོའི་ཆ་ལ་བབས་པ་ན་མཚམས་དམ་པར་བཅད་དེ་ཐུན་བཞིའི་རིམ་པས་རྣལ་འབྱོར་ལ་འཇུག །བཟླས་པའི་སྐབས་སུ། སྤྱིར་ཕྱིའི་བཟླས་པ་སྔགས་ཀྱི་ཡན་ལག་མ་ཉམས་པར་བཟླ་བ། ནང་གི་བཟླས་པ། རང་འཁོར་ལོ་ཆེན་པོར་གསལ་བའི་ཐུགས་ཀར་ཡེ་ཤེས་སེམས་དཔའི་ཐུགས་དབུས་ཉི་མ་ལ་གནས་པའི་ཧཱུྃ་ཡིག་གི་མཐར་སྔགས་ཀྱི་ཕྲེང་བ་མཐིང་གས་གཡས་སུ་བསྐོར་བར་གྱུར་པར་བསམས་ལ་དེ་ལ་སེམས་རྩེ་གཅིག་ཏུ་གཏད་དེ་བཟླ། གསང་བའི་བཟླས་པ། རང་གི་ཐུགས་ཀ་ནས་སྔགས་ཀྱི་ཕྲེང་བ་འོད་ཟེར་དཀར་པོའི་ཚོགས་འཕྲོ་བཞིན་པ་བྱུང་། ཞལ་ནས་ཐོན། ཡུམ་གྱི་ཞལ་དུ་ཞུགས། སྐུའི་དབྱིབས་བརྒྱུད། པདྨའི་ལམ་ནས་བྱུང་། རང་གི་རྡོ་རྗེ་ནོར་བུའི་ལམ་ནས་ཞུགས། ཐུགས་ཀའི་སྔགས་ཕྲེང་ལ་ཐིམ། སླར་ཡང་དེ་ལྟ་བུ་རྒྱུན་མི་འཆད་པར་འཁོར་བས་ནད་གདོན་སྡིག་སྒྲིབ་བག་ཆགས་དང་བཅས་པ་སྦྱངས་པར་མོས་ཏེ་བཟླ་བ་དང་། གཞན་ཡང་ཚེ་བསོད་དཔལ་འབྱོར་ཡེ་ཤེས་སོགས་རྒྱས་པར་འདོད་ན་སྔགས་ཕྲེང་འོད་ཟེར་སེར་པོ། ཁམས་གསུམ་དབང་དུ་བསྡུ་བ་ལ་དམར་པོ། གདུགས་པ་ཅན་ཚར་གཅོད་པར་འདོད་ན་ནག་པོར་བསྒོམ་པར་གསུངས་ལ། བསྙེན་པའི་སྐབས་འདིར་གཙོ་བོར་སྡིག་སྒྲིབ་ཞི་བའི་ཆེད་དཀར་པོ་དང་། མཇུག་ཏུ་ལྷ་དབང་དུ་བྱ་བའི་ཕྱིར་ཁ་དོག་དམར་པོར་བསྒོམ། བཟླ་བྱའི་སྔགས་ནི། ཐོག་མར་ཉེ་སྙིང་བཞི་ཁྲི་སོགས་ཅི་རིགས་པ་སྔོན་ཏུ་སོང་ནས། སྙིང་པོ་ཡི་གེ་ཉེར་གཉིས་པ་འབྲུ་འབུམ་མམ། འབུམ་ཕྲག་བཞི་བཟླ་བ་ལས་རུང་དང་། གྲུབ་ན་རྩ་སྔགས་རིང་པོའང་འབུམ་ཕྲག་བཞིའམ་ཁྲི་ཕྲག་བཞི་ཙམ་བཟླ་བ་ཤིན་ཏུ་གལ་ཆེའོ། །དེ་ཁོ་ན་ཉིད་ཀྱི་བཟླས་པ་ནི་རྡོ་རྗེའི་བཟླས་པ་སྟེ་གཙོ་བོར་རྫོགས་པའི་རིམ་པ་དང་འབྲེལ་བ་ཡིན་ནོ། །ཐུན་ཐམས་ཅད་ཀྱི་མཇུག་ཏུ་མཆོད་ཅིང་བསྟོད་ལ། བཅོམ་ལྡན་འདས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་གདབ། འོད་གསལ་དུ་བསྡུ་ཞིང་ཟུང་འཇུག་གི་སྐུར་ལྡང་ལ་བསྔོ་སྨོན་ཤིས་བརྗོད་བྱ། སྣང་གྲགས་རྟོག་གསུམ་དཔལ་ཕྱག་ན་རྡོ་རྗེའི་སྐུ་གསུང་ཐུགས་སུ་ཤེས་པའི་ངང་ནས་སྤྱོད་ལམ་ལ་འཇུག །སྲོད་ཐུན་གྱི་མཇུག་ཏུ་གཏོར་མ་བྱིན་གྱིས་བརླབ། རང་གི་སྙིང་གའི་ཧཱུྃ་ལས་འོད་ཟེར་འཕྲོས་པས་བཅོམ་ལྡན་འདས་དཔལ་གསང་བའི་བདག་པོ་སངས་རྒྱས་འཁོར་ལོ་ཆེན་པོ་ལ་ཡི་དམ་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་ཆོས་སྐྱོང་འཇིག་རྟེན་སྐྱོང་བའི་ཚོགས་ཀྱིས་བསྐོར་བ་མདུན་གྱི་ནམ་མཁའ་ཨོཾ་བཛྲ་ས་མཱ་ཛཿས་གཏོར་མགྲོན་སྤྱན་དྲང་། པདྨ་ཀ་མ་ལཱ་ཡ་སྟྭཾ་གྱིས་གདན་དབུལ། མགྲོན་དེ་རྣམས་ལྗགས་ཀྱི་རྩེ་མོར་ཨྃ་གིས་མཚན་པས་གཏོར་མ་གསོལ་བར་བསམས་ལ། སྙིང་པོའི་སྔགས་ཀྱི་མཐར་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་བཏགས་པས་ཡི་དམ་དང་། ཨ་ཀཱ་རོས་ཆོས་སྐྱོང་འབྱུང་པོ་དང་བཅས་པ་ལ་དབུལ། མཆོད་བསྟོད་འདོད་དོན་གསོལ། ནོངས་པ་བཤགས། རྟེན་ཡོད་ན་བརྟན་བཞུགས་དང་། མེད་ན་གཤེགས་གསོལ་བྱ། བདག་བསྐྱེད་འོད་གསལ་དུ་བསྡུས་ལ་ཉལ། ནངས་པར་ཟུང་འཇུག་གི་སྐུར་ལྡང་སྟེ་ཐུན་བཞིའི་རིམ་པས་བརྩོན་པར་བྱའོ། །ཁ་སྐོང་གི་སྦྱིན་སྲེག་བྱེད་ན་རྣལ་འབྱོར་བླ་མེད་ཀྱི་སྦྱིན་སྲེག་སྤྱི་ལྟར་ལ་ལྷ་སྔགས་ཀྱི་འབྱིན་འཇུག་སྦྱར་བས་འགྲུབ། ལས་ཚོགས་ཉེར་མཁོ་བུམ་པའི་ཆོ་ག་ནི། ཡུངས་ཀར། ཤུ་དག །རུ་རྟ། གི་ཝཾ། དྲི་བཟང་དང་བཅས་པའི་ཆུས་དགང་བའི་བུམ་པ་སྤྱི་ལྟར་བསྒྲུབས་ནས་རང་ཉིད་ཀྱིས་འཐོར་འཐུང་བཀྲུ་བ་སོགས་བགྱིས་པས་བདག་སྲུང་བ་དང་། ཞི་བའི་མཆོག་ཡིན་ལ། གཞན་ནད་པ་དང་སྲིའུ་སོགས་ལ་སྦྱོང་བ་གསུམ་སྔོན་དུ་འགྲོ་བས་བཀྲུ་བྱབ་བསྲུང་གསུམ་སྤྱི་ལྟར་དང་། སྐུ་གསུང་ཐུགས་ཀྱི་རྗེས་སུ་གནང་བ་བྱ། དབང་ལྷ་བསྟིམ་པའི་སྐབས་འབྱོར་ན་བྲིས་སྐུ་སྤྱི་བོར་བཞག་ཅིང་རིགས་འདྲ་བསྟིམ་ལ་ཤིས་པ་བརྗོད། བྲིས་སྐུ་སྔས་སྲུང་གི་ཚུལ་དུ་བཞུགས་སུ་གསོལ་པའམ་མ་འབྱོར་ན་གཏོར་མས་ཀྱང་རུང་། གཞན་ཡང་སྐུད་པ་སྔོན་པོ་ལ་རྡོ་རྗེའི་མདུད་པ་བོར་ཏེ་སྔགས་ཀྱིས་བཏབ་པ་གང་གི་མགུལ་ལམ་དཔུང་པར་གདགས་པས་ནད་གདོན་ཐམས་ཅད་ལས་སྲུང་བའི་མཆོག་ཏུ་འགྱུར་བ་དང་། བྱིས་པའི་གདོན་གྱིས་ཉེན་པ་ལ་ཚོན་སྐུད་སྣ་ལྔ་སྔགས་ཀྱིས་བཏབ་པ་མགུལ་དུ་གདགས་པས་སྲུང་བ་དང་། རྩི་མར་རྙིང་པ་ལ་སྦྱིན་སྲེག་གི་ཐལ་བ་དང་ཡུངས་ཀར་བསྲེས་པ་ལ་སྔགས་ཀྱིས་བཏབ་ནས་བྱུགས་པས་འཇིགས་པ་ཐམས་ཅད་ལས་སྲུང་ཞིང་ཞི་བར་འགྱུར་རོ། །དེ་བཞིན་དུ་མེའི་སྒོ་ནས་ལས་བསྒྲུབ་པ་ནི་སྲེག་བླུག་གི་ཆོ་ག་སྟེ། འདི་ཉིད་ཀྱི་རྒྱུད་དང་མན་ངག་གི་ཡི་གེར་གསུངས་པའི་དམིགས་ཀྱིས་བསལ་བའམ། ལས་བཞིའི་སྦྱིན་སྲེག་སྤྱི་ལྟར་བགྱིས་པས་ཀྱང་ཕྲིན་ལས་ཐམས་ཅད་མཐར་ཕྱིན་པར་བྱེད་དོ། །ཞེས་པའང་རྗེས་སུ་གནང་བའི་རིམ་པ་བླ་མའི་ཕྱག་གཞེས་དང་མཐུན་པར་བྲིས་ཤིང་། ཞར་བྱུང་བསྙེན་ཐབས་དང་ལས་ཚོགས་མདོ་ཙམ་ཡི་གེ་རྙིང་པ་རྣམས་ཀྱི་སྙིང་པོ་ཅུང་ཟད་བསྡུས་ཏེ། བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་སྦྱར་བའི་དགེ་བས་འགྲོ་ཀུན་རྡོ་རྗེ་འཛིན་པའི་ཡེ་ཤེས་ཀྱི་སྐུ་མྱུར་དུ་འགྲུབ་པའི་རྒྱུར་གྱུར་ཅིག། །།

[edit]

phyag rdor 'khor chen gyi rjes gnang dang bsnyen pa bya tshul/_ @#/_/na mo gu ru badz+ra pA NA ya/_dpal phyag na rdo rje 'khor lo chen po'i rjes su gnang ba bsgrub par 'dod pas/__stegs bu'i dbus su maN+Da lar me tog gi tshom bu gcig dgod/__de'i steng du gtor ma dkar zlum theb kyus bskor ba dar sngon po'i gdugs kyis spras pa dang /__mdun du 'bul gtor/__chu gnyis sngon 'gro'i nyer spyod rnams bkod mdzes su bsham/__rang gi mdun du rdo rje dril bu nang mchod sogs 'du bya/__bdag bskyed sngon tu 'gro bas/__mdun rten bsang sbyang /__stong pa'i ngang las pa~M las sogs nas/__yongs su gyur pa las/__sangs rgyas 'khor lo chen po sogs kyis gsal gdab cing /__bstod pa'i bar bdag bskyed ltar dang /__mdun bskyed la dmigs pa'i bzlas pa'ang ci rigs pas thugs rgyud bskul/__'bul gtor bsang sbyang /__oM AHhU~M ha ho hrIHsa brlab/__snying po'i mthar/__i daM ba liM ta kha kha khA hi khA hi/__lan gsum/__oM badz+ra pA Ni sa pa ri wA ra ar+g+haM sogs nas/__shab+da pra tI ts+tsha swA hAs mchod/__phyag na rdo rje drag po che/__rdo rje khro bo drag chen 'joms/__/rdo rje mi thub 'jigs byed che/__/rdo rje gzi brjid sngags kyi gtso/__/rdo rje phrin las don kun mdzad/__/thabs 'dul 'khor lo che la bstod/__/ces bstod/__mchod sbyin gtor ma 'di bzhes la/__/zhes sogs kyis phrin las gsol ba ni slob dpon gyi bya ba'o/__/de nas slob ma rnams khrus byas gral la 'khod nas maN+Dal phul/__slob dpon gyis nges 'byung dang byang chub sems kyi gtam ci rigs pas mtshams sbyar te/__de la 'dir gnod sbyin gyi sde dpon chen po lag na rdo rje gos sngon po can sangs rgyas gang+gA'i klung gi bye ma snyed kyis rjes su gnang ba/__de bzhin gshegs pa thams cad kyi mthu stobs gcig tu bsdus pa'i bdag nyid/__mdo sde dang rgyud sde'i gsung gi gsang ba mtha' dag rdzogs par 'dzin pa'i 'khor lo'i bdag po dang rgyal ba'i sras su rnam par 'phrul pa la'ang sgrub thabs dang man ngag gi bka' srol bsam gyis mi khyab pa zhig byung ba las/__gangs can gyi ljongs su dpal phyag na rdo rje la che ba drug gam dgur grags pa'i ya gyal/__'khor lo chen po dbang gis che ba zhes/__drag po sum 'dul gyi rgyud dang /__de'i gsang ba rnam par 'byed pa'i rgyud sogs la brten nas grub chen dza ba ris legs par bkral zhing lo tsA ba 'gar chos kyi bzang pos bsgyur bshad 'chad nyan gyis gtan la phabs pa nas bzung /__/dmar ston rim byon dang /__rje bdag nyid chen po sogs lam 'di la mkhas shing dngos grub mchog brnyes pa'i brgyud pa bar ma chad pa las byung ba'i smin grol man ngag dang bcas pa'i bka' srol ci rigs par bzhugs pa las/__'dir dpal phyag na rdo rje 'khor lo chen po gtso rkyang gi rjes su gnang ba bsgrub pa la/__slob dpon gyi bya ba grub nas/__khyed rang rnams kyi ngo skal du gyur pa thog mar gsol ba 'debs pa 'di'i rjes zlos mdzod/__kun mkhyen ye shes phung po can/__/srid pa'i 'khor lo rnam sbyong ba/__/de ring bshad pa'i rin chen gter/__/gtso bos bdag la bka' drin stsol/__/lan gsum/__rgyud sbyang ba'i slad du/__bla ma dang dpal phyag na rdo rje tha mi dad pa'i spyan sngar skyabs su 'gro ba dang sems bskyed pa'i sdom pa gzung snyam pas 'di'i rjes zlos mdzod/__dkon mchog gsum la sogs lan gsum/__dngos gzhi'i slad du slob dpon dang mdun bskyed kyi rten bsgrubs zin pa ltar sna tshogs pad+ma 'dab ma brgyad pa'i lte bar/__tshangs pa dang brgya byin g.yon du bsgyel ba'i sog phrag tu zla nyi'i gdan la/__sangs rgyas 'khor lo chen po sogs nas/__thugs kar hU~M sngon pos mtshan pa'i sku can du bzhugs pa la mi phyed dad pa'i gdung shugs drag pos me tog dang bcas pas thal mo sbyar te sku'i rjes gnang gi don du gsol ba 'debs pa 'di'i rjes zlos mdzod/__/dus gsum sangs rgyas thams cad kyi/__/sku yi rdo rje slob dpon gyis/_/bdag la 'khor lo chen po yi/__/sku yi rjes gnang stsal du gsol/__/lan gsum/__zhes gsol ba btab nas/__khyed rang rnams lhar gsal gdab pa yin pas bdag gi tshig ris dang mthun par dmigs pa 'di bzhin du gnang bar zhu/__slob ma bsang sbyang /__stong pa'i ngang las pa~M las sogs nas/__yongs su gyur pa las/__slob ma sangs rgyas 'khor lo chen po sogs nas/__thugs kar hU~M sngon pos mtshan pa/__slar yang rang gi thugs ka'i hU~M yig gi 'od zer gyis yi dam gyi lha dpal gsang ba'i bdag po 'khor lo chen po la sangs rgyas dang byang chub sems dpa'i tshogs kyis bskor ba spyan drangs/__slob ma'i lus la char chen po babs pa bzhin du sib sib thim pas lus kyi nad gdon sdig sgrib dag__/sku'i byin rlabs zhugs/__slob ma'i lus dang yi dam gyi sku dbyer med du gyur par bsams la/__snying po'i sngags kyi mthar/__oM badz+ra A be sha ya a aH__dzaHhU~M ba~M ho/__zhes yang yang brjod cing spos rol bya/__de ni sku'i rjes gnang ngo /__/gsung gi rjes gnang gi don tu gsol ba 'debs pa 'di'i rjes zlos mdzod/__dus gsum sangs rgyas thams cad kyi/__/gsung gi rdo rje slob dpon gyis/__/bdag la 'khor lo chen po yi/__/gsung gi rjes gnang stsal du gsol/__/lan gsum/__rang gi thugs ka'i sa bon las sngags kyi phreng ba byung /__sna bug g.yas nas thon/__slob ma'i sna bug g.yon nas zhugs/__snying gar nyi ma'i dkyil 'khor gyi steng du hU~M yig gi mthar bskor ba las 'od zer 'phros/__ngag gi nad gdon sdig sgrib thams cad dag__/gsung gi byin rlabs zhugs/__slob ma'i ngag dang yi dam gyi gsung dbyer med du gyur/__sngags 'di'i rjes zlos lan gsum mdzod/__snying po dang nye snying gi rjes zlos byar gzhug__/de ni gsung gi rjes gnang ngo /__/thugs kyi rjes gnang gi don du gsol ba 'debs pa 'di'i rjes zlos mdzod/__dus gsum sangs rgyas thams cad kyi/__/thugs kyi rdo rje slob dpon gyis/__/bdag la 'khor lo chen po yi/__/thugs kyi rjes gnang stsal du gsol/__/lan gsum/__rang gi thugs ka'i sa bon las yi dam gyi lha sangs rgyas 'khor lo chen po'i thugs kyi byin rlabs thams cad phyag mtshan khro bo'i rdo rje rtse lnga pa nam mkha'i khams gang bar spros/__slob ma'i snying ga'i sa bon la thim pas yid kyi nad gdon sdig sgrib thams cad dag__/thugs kyi byin rlabs zhugs/__slob ma'i yid dang yi dam gyi thugs dbyer med du gyur/__/ces brjod cing bsams la cung zad re mnyam par gzhag__/de ni thugs kyi rjes gnang ngo /__/de rnams brtan par byed pa dbang lha bstim pa'i rjes gnang gi don du gsol ba 'debs pa 'di'i rjes zlos mdzod/__bcom ldan bdag la stsal lags kyi/__/bdag la nye bar mdzad du gsol/__lan gsum/__de ltar gsol ba btab pas gtor ma lhar gsal ba khyed rang rnams kyi spyi bor spyan drangs shing byin gyis brlabs pa'i mos pa mdzod/__gtor ma spyi bor bzhag la/__bcom ldan 'di la stsal lags kyi/__/'di la nye bar mdzad du gsol/__dus 'di nas ni bzung nas su/__/byang chub snying por mchis kyi bar/__/lhag pa'i lhar ni mdzad du gsol/_/rkyen ngan bar chad thams cad sol/__/dngos grub thams cad stsal du gsol/__/zhes gsol ba btab pas gtor ma'i lha 'od du zhu nas slob ma la thim pas/__dpal gsang ba'i bdag po 'khor lo chen po'i sku gsung thugs dang slob ma'i lus ngag yid gsum dbyer med du gyur/__de ni dbang lha bstim pa'i rjes gnang ngo /__/des rjes gnang gi dngos gzhi grub nas/__dam tshig khas blang /__gtang rag gi maN+Dal/__lus longs spyod 'bul ba/__dge ba bsngo ba rnams spyi ltar byas la slob ma gyes/__slob dpon gyis mdun bskyed tshom bu'i lha la mchod bstod/__nongs bshags/__ye shes pa gshegs/__dam tshig pa rang la bstim/__rang gi thugs ka'i hU~M las 'od zer 'phros pas snod bcud thams cad 'od du zhu nas rang la thim/__rang ye shes sems dpa' la thim/__de ting nge 'dzin sems dpa' la thim/__de yang mi dmigs pa 'od gsal stong pa nyid du gyur/__slar yang rang skad cig gis sangs rgyas 'khor lo chen po'i skur bzhengs par bsams la bsngo smon shis brjod ji ltar rigs par bya'o/__/zhar byung bsnyen pa bya tshul ni/__rten gyi gang zag dbang dang rjes su gnang ba thob cing dam tshig dang sdom pa rnam par dag pas/__dgra rkun la sogs pa'i bar chad med pa dben zhing nyams dga' ba'i gnas su/__/zas gos sogs 'tsho ba'i yod byad rnams tshags su tshud par bya/__gnas kyi bdag po la gtor ma dang chu sbyin la sogs pas mnyes par bya zhing bar chad mi byed pa'i phrin las bcol/__byang chub kyi sems rin po che sgo du ma nas yid la byed bzhin pa'i ngang /__bsam gtan gyi khang bur phyags dar legs par byas te/__'byor na rang gi mdun du 'di'i bris sku mtshan nyid dang ldan pa dgram pa'i mdun dang /__gang ltar yang 'bul gtor mchod pa bcas/__rdor dril nang mchod sogs 'du bya/__de nas phyi dro'i cha la babs pa na mtshams dam par bcad de thun bzhi'i rim pas rnal 'byor la 'jug__/bzlas pa'i skabs su/__spyir phyi'i bzlas pa sngags kyi yan lag ma nyams par bzla ba/__nang gi bzlas pa/__rang 'khor lo chen por gsal ba'i thugs kar ye shes sems dpa'i thugs dbus nyi ma la gnas pa'i hU~M yig gi mthar sngags kyi phreng ba mthing gas g.yas su bskor bar gyur par bsams la de la sems rtse gcig tu gtad de bzla/__gsang ba'i bzlas pa/__rang gi thugs ka nas sngags kyi phreng ba 'od zer dkar po'i tshogs 'phro bzhin pa byung /__zhal nas thon/__yum gyi zhal du zhugs/__sku'i dbyibs brgyud/__pad+ma'i lam nas byung /__rang gi rdo rje nor bu'i lam nas zhugs/__thugs ka'i sngags phreng la thim/__slar yang de lta bu rgyun mi 'chad par 'khor bas nad gdon sdig sgrib bag chags dang bcas pa sbyangs par mos te bzla ba dang /__gzhan yang tshe bsod dpal 'byor ye shes sogs rgyas par 'dod na sngags phreng 'od zer ser po/__khams gsum dbang du bsdu ba la dmar po/__gdugs pa can tshar gcod par 'dod na nag por bsgom par gsungs la/__bsnyen pa'i skabs 'dir gtso bor sdig sgrib zhi ba'i ched dkar po dang /__mjug tu lha dbang du bya ba'i phyir kha dog dmar por bsgom/__bzla bya'i sngags ni/__thog mar nye snying bzhi khri sogs ci rigs pa sngon tu song nas/__snying po yi ge nyer gnyis pa 'bru 'bum mam/__'bum phrag bzhi bzla ba las rung dang /__grub na rtsa sngags ring po'ang 'bum phrag bzhi'am khri phrag bzhi tsam bzla ba shin tu gal che'o/__/de kho na nyid kyi bzlas pa ni rdo rje'i bzlas pa ste gtso bor rdzogs pa'i rim pa dang 'brel ba yin no/__/thun thams cad kyi mjug tu mchod cing bstod la/__bcom ldan 'das bdag dang sems can thams cad la mchog dang thun mong gi dngos grub ma lus pa stsal du gsol/__zhes gsol ba gdab/__'od gsal du bsdu zhing zung 'jug gi skur ldang la bsngo smon shis brjod bya/__snang grags rtog gsum dpal phyag na rdo rje'i sku gsung thugs su shes pa'i ngang nas spyod lam la 'jug__/srod thun gyi mjug tu gtor ma byin gyis brlab/__rang gi snying ga'i hU~M las 'od zer 'phros pas bcom ldan 'das dpal gsang ba'i bdag po sangs rgyas 'khor lo chen po la yi dam dkyil 'khor gyi lha tshogs sangs rgyas dang byang chub sems dpa' chos skyong 'jig rten skyong ba'i tshogs kyis bskor ba mdun gyi nam mkha' oM badz+ra sa mA dzaHsa gtor mgron spyan drang /__pad+ma ka ma lA ya s+t+waM gyis gdan dbul/__mgron de rnams ljags kyi rtse mor a~M gis mtshan pas gtor ma gsol bar bsams la/__snying po'i sngags kyi mthar sa pa ri wA ra i daM ba liM ta kha kha khA hi khA hi btags pas yi dam dang /__a kA ros chos skyong 'byung po dang bcas pa la dbul/__mchod bstod 'dod don gsol/__nongs pa bshags/__rten yod na brtan bzhugs dang /__med na gshegs gsol bya/__bdag bskyed 'od gsal du bsdus la nyal/__nangs par zung 'jug gi skur ldang ste thun bzhi'i rim pas brtson par bya'o/__/kha skong gi sbyin sreg byed na rnal 'byor bla med kyi sbyin sreg spyi ltar la lha sngags kyi 'byin 'jug sbyar bas 'grub/__las tshogs nyer mkho bum pa'i cho ga ni/__yungs kar/__shu dag__/ru rta/__gi waM/__dri bzang dang bcas pa'i chus dgang ba'i bum pa spyi ltar bsgrubs nas rang nyid kyis 'thor 'thung bkru ba sogs bgyis pas bdag srung ba dang /__zhi ba'i mchog yin la/__gzhan nad pa dang sri'u sogs la sbyong ba gsum sngon du 'gro bas bkru byab bsrung gsum spyi ltar dang /__sku gsung thugs kyi rjes su gnang ba bya/__dbang lha bstim pa'i skabs 'byor na bris sku spyi bor bzhag cing rigs 'dra bstim la shis pa brjod/__bris sku sngas srung gi tshul du bzhugs su gsol pa'am ma 'byor na gtor mas kyang rung /__gzhan yang skud pa sngon po la rdo rje'i mdud pa bor te sngags kyis btab pa gang gi mgul lam dpung par gdags pas nad gdon thams cad las srung ba'i mchog tu 'gyur ba dang /__byis pa'i gdon gyis nyen pa la tshon skud sna lnga sngags kyis btab pa mgul du gdags pas srung ba dang /__rtsi mar rnying pa la sbyin sreg gi thal ba dang yungs kar bsres pa la sngags kyis btab nas byugs pas 'jigs pa thams cad las srung zhing zhi bar 'gyur ro/__/de bzhin du me'i sgo nas las bsgrub pa ni sreg blug gi cho ga ste/__'di nyid kyi rgyud dang man ngag gi yi ger gsungs pa'i dmigs kyis bsal ba'am/__las bzhi'i sbyin sreg spyi ltar bgyis pas kyang phrin las thams cad mthar phyin par byed do/__/zhes pa'ang rjes su gnang ba'i rim pa bla ma'i phyag gzhes dang mthun par bris shing /__zhar byung bsnyen thabs dang las tshogs mdo tsam yi ge rnying pa rnams kyi snying po cung zad bsdus te/__bya bral ba 'jam dbyangs mkhyen brtse'i dbang pos sbyar ba'i dge bas 'gro kun rdo rje 'dzin pa'i ye shes kyi sku myur du 'grub pa'i rgyur gyur cig/__//