འདུས་པ་མདོའི་ཡབ་ཡུམ་ཁྲོ་མཁར་གྱི་དྲིས་ལན་སོགས་གསར་རྙིང་གི་སྔགས་ཕྱོགས་ཟིན་བྲིས་དང་ལོ་རྒྱུས་སྣ་ཚོགས།

🚧 This website is under continued development. We appreciate your patience!

Previous Text Back to Volume PageNext Text

Wylie title	'dus pa mdo'i yab yum khro mkhar gyi dris lan sogs gsar rnying gi sngags phyogs zin bris dang lo rgyus sna tshogs
Location	mkhyen brtse'i bka' 'bum Volume 4, sde tshan 1, Text 26, Pages 400-409 (Folios 200b6 to 205a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. 'dus pa mdo'i yab yum khro mkhar gyi dris lan sogs gsar rnying gi sngags phyogs zin bris dang lo rgyus sna tshogs. In 'jam dbyangs mkhyen brtse'i dbang po'i bka' 'bum, Vol. 4: 400-409. Khams sde dge rdzong sar dgon: Rdzong sar blo gros phun tshogs, 2020.
Genre	History Texts - lo rgyus  ·  Notes - zin bris  ·  Replies to Questions - dris lan

1 Texts in this Section (sde tshan or chos tshan)

26 400-409	འདུས་པ་མདོའི་ཡབ་ཡུམ་ཁྲོ་མཁར་གྱི་དྲིས་ལན་སོགས་གསར་རྙིང་གི་སྔགས་ཕྱོགས་ཟིན་བྲིས་དང་ལོ་རྒྱུས་སྣ་ཚོགས། 'dus pa mdo'i yab yum khro mkhar gyi dris lan sogs gsar rnying gi sngags phyogs zin bris dang lo rgyus sna tshogs History Texts - lo rgyus   ·   Notes - zin bris   ·   Replies to Questions - dris lan	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཨོཾ་སྭ་སྟི། གང་གི་ཚེ་ཡེ་ཤེས་ཤིན་ཏུ་རྣམ་པར་དག་པས་ཆོས་དང་ཆོས་ཅན་རོ་གཅིག་ཏུ་གཟིགས་པའི་གོ་འཕང་ཐམས་ཅད་མཁྱེན་པའི་མཚན་གྱི་སྣང་བས་ས་གསུམ་ན་ཁྱབ་པ་བསྟན་པའི་ཉིན་བྱེད་ཆེན་པོར་གདོད་མ་ནས་གྲུབ་པས། ཆེས་མི་མཁས་ཤིང་མ་སྦྱངས་པའི་སོ་སྐྱེ་ཐ་ཤལ་བ་ཙ་ན་ཀའི་སྲིན་བུ་ཕྲ་མོའི་འདུ་ཤེས་ཅན་ལ་མཁྱེན་བཞིན་དུ་རྨེད་པའི་བཀའ་འཕྲིན་ནོར་བུའི་ཅོད་པན་སྤྱི་བོར་སྩལ་བ་ནི་འཕགས་རྣམས་དམན་ལས་ཆེས་དམན་པ་ལ་བརྩེ་བ་ཆོས་ཉིད་ཀྱི་ངང་ཚུལ་ནི་འདི་ལྟ་བུའོ་ཞེས་མཚོན་པ་ལས་གཞན་དུ་མ་དམིགས་མོད། དེ་ལྟ་ནའང་རང་ངོས་ནས་ཀྱང་བྱིས་པ་མའི་གམ་དུ་སྨྲ་བ་ལྟར་སྐལ་བ་བཟང་པོར་ཤེས་ནས་གང་དྲན་ཅལ་ཅོལ་དུ་གསོལ་བ་ནི་འདི་ཡིན་ཏེ།། །། ༈

དང་པོ་ཚོགས་ཆེན་འདུས་པའི་ཡབ་ཡུམ་ཁྲོ་མཁར་རྣམས་ཀྱི་དོན། འདི་དང་སྒྲུབ་ཆེན་བཀའ་བརྒྱད་ཀྱི་སྨན་སྒྲུབ་སྐབས་སྦྱོར་བ་བརྒྱད་ལྡན་གསུངས་པ་རྣམས་གནད་གཅིག་པས། སྤྱིར་ཞེ་སྡང་ལ་བརྟེན་ནས་གཙོ་བོར་སྒྲོལ་བ་ལམ་དུ་བྱེད་པ་མ་ཧཱ། འདོད་ཆགས་ལ་བརྟེན་ནས་གཙོ་བོར་སྦྱོར་བ་ལམ་དུ་བྱེད་པ་ཨ་ནུ། གཏི་མུག་ལ་བརྟེན་ནས་གཙོ་བོར་འོད་གསལ་རྣམ་པར་མི་རྟོག་པའི་ཡེ་ཤེས་ལམ་དུ་བྱེད་པ་ཨ་ཏི་ཡོ་ག་ཞེས་རྒྱུད་ཀྱི་རྡོ་རྗེའི་གནས་དང་མཆོག་གཟིགས་རྣམས་ལ་གྲགས་པ་བརྟན་པ་དང་། སྒྲུབ་སྡེ་བརྒྱད་ཀྱི་བདུད་རྩི་ཡོན་ཏན་གྱི་སྐོར་རྣམས་ཀྱང་གཙོ་བོར་ལུང་གི་ཆོས་སྐད་དང་ཉེ་ཞིང་། ཨ་ནུའི་སྐོར་གསར་མ་དང་བསྟུན་ན་ཆོས་སྐད་ཕལ་ཆེར་མ་རྒྱུད་འཁོར་ལོ་སྡོམ་པ་སོགས་དང་མཐུན་ཤས་ཆེ་བས། དོན་འདི་ལ་དགོངས་ནས་ཐམས་ཅད་མཁྱེན་པ་པྲཛྙཱ་ར་སྨིས་ཀྱང་ཨ་ནུ་དང་མ་རྒྱུད་ཀྱི་ལམ་རིམ་སྦྱར་ཏེ་སྨོན་ལམ་དུ་མཛད་པ་ཡིན་ལ། རྒྱུ་མཚན་དེས་ན་མ་རྒྱུད་བདེ་མཆོག་འཁོར་ལོར་རྫོགས་རིམ་གྱི་གཙོ་བོ་ཐབས་ལམ་ཟབ་མོ་གཏན་ལ་འབེབས་པའི་སྐབས་སུ། ཇི་ལྟར་འཇིག་རྟེན་ན་འདོད་པའི་སྒྱུ་རྩལ་དྲུག་ཅུ་རྩ་བཞི་འམ། འཁྲིག་ཐབས་དྲུག་ཅུ་རྩ་བཞི་དང་། དེ་རྣམས་ཀྱི་གཙོ་བོའང་རོལ་ཐབས་མི་འདྲ་བ་བརྒྱད་དུ་འདུས་པས་བྱང་སེམས་བཙན་ཐབས་སུ་དབབ་པའི་འཁྲུལ་འཁོར་ཀྱང་དེ་ཙམ་དུ་འདུས་པར་དགོངས་ནས་རོལ་ཐབས་དྲུག་ཅུ་རྩ་བཞིའམ། ཁ་སྦྱོར་བརྒྱད་དུ་གསུངས་ཤིང་། དེ་མཚོན་པའི་སླད་བདེ་མཆོག་ལཱུ་ནག་སོགས་ཀྱི་མཆོད་པའི་སྐབས་སུ། གསང་བ་སྙོམས་འཇུག་གི་མཆོད་པར་ཁ་སྦྱོར་བརྒྱད་ཀྱི་མཆོད་པ་གསུངས་པ་སོགས་རྒྱུད་དང་མན་ངག་རྣམས་ལས་རྣམ་བཞག་རྒྱ་ཆེར་གསུངས་པ་ལྟར། སྐབས་འདིར་ཡང་སྦྱོར་བ་ལམ་དུ་བྱེད་པ་ལ་གཙོ་བོར་དགོངས་ནས་ཡེ་ཤེས་པའི་ཐུགས་རྒྱུད་བདེ་བ་ཆེན་པོའི་གཟི་བྱིན་ལྷག་པར་བསྐུལ་བའི་ཕྱིར་བདེ་སྟོང་གི་ལྷ་སྐུ་ཁྲོ་མཁར་གྱི་ཚུལ་དུ་བསྒོམ་པ་དང་། བྱེ་བྲག་ཏུ་ཡུམ་ཞལ་ཡབ་ཀྱི་རྡོ་རྗེར་སྦྱོར་བའང་རྗེས་ཆགས་ཀྱི་ཉམས་ཆེས་ཆེར་བསྐུལ་བ་མཚོན་ལ། ཁྱད་པར་བདུད་རྩི་སྨན་གྱི་སྐབས་སུ། བྱང་ཆུབ་སེམས་ཀྱི་བདུད་རྩི་དམ་ཚིག་པའི་ཚུལ་དུ་འཁྱིལ་པར། ཡེ་ཤེས་པའི་བྱང་སེམས་རྡོ་རྗེ་བདེ་བ་ཆེན་པོའི་རྒྱུན་འབེབས་ལ། ཁ་སྦྱོར་བརྒྱད་ཀྱི་སྒོ་ནས་དབབ་པས་བྱང་སེམས་འབེབས་འཕུལ་ལྷག་པར་ཆེ་བ་ལ་དགོངས་ནས་དེ་ལྟ་བུའི་རྣམ་པར་གཞག་པ་གསུངས་སོ་སྙམ་པ་ནི་བདག་གི་རྣམ་པར་རྟོག་པ་སྟེ། ཞིབ་པར་གསར་འགྱུར་མ་རྒྱུད་ཀྱི་གཞུང་སྤྱི་དང་བྱེ་བྲག་སྒྲོལ་མ་རྣལ་འབྱོར་མའི་རྒྱུད་སོགས་དང་སྦྱར་ཏེ་དཔྱད་པ་ཞིབ་མོས་བཙལ་ན་ངེས་ཤེས་ཁྱད་པར་ཅན་སྐྱེ་བར་འགྱུར་རམ་སྙམ་ལགས།། །། ༈ གཉིས་པ་སློབ་དཔོན་སངས་རྒྱས་གསང་བའི་ལམ་རིམ་ལེའུ་གཉིས་པ་རང་གནས་མཐོང་བའི་ལེའུ་ཞེས་རྒྱུ་ཤེས་པའི་མཚན་ཉིད་ལྟ་བ་གཏན་ལ་འབེབས་པའི་སྐབས། ཐོས་བསམ་གྱི་ལྟ་བ་མཐར་ཕྱིན་པའི་ཚད། རྒྱ་མཚོ་དྭངས་བའི་གཟུགས་བརྙན་ལྟར། སོགས་ཀྱི་དོན། དཔེར་ན་རྒྱ༷་མཚོ༷་དྭང༷ས་པ༷འི་ནང་དུ་ཉི་ཟླ་གཟའ་སྐར་གྱི་གཟུགས་བརྙན་འཆར་བ་ལྟར༷། ཚིག་སྒྲ༷་ལ་བརྟེན་ནས་དོན་སྤྱིའི་རྣམ་པ་ཙམ་ཡིད༷་ལ༷་བྱེ༷ད་པ༷་མིན༷་པར༷་དོན་རང་གི་མཚན་ཉིད་རང༷་རིག༷་པའི་མངོན༷་སུམ༷་དུ་རྟོག་པས་དམིག༷ས་པའི་ཡུལ་དང་བྲལ༷་བ༷ར་རྟོགས་པ་ནི་སེམས་རང༷་གསལ༷་དུ་མ༷ཐོང་ཞིང་སྒྲོ་སྐུར་ལུང་མ་བསྟན་གསུམ༷་དང་བྲལ༷་བའམ། བལྟ་བའི་ཡུལ་ལྟ་བྱེད་ཀྱི་མཁན་པོ། ལྟ་བའི་དངོས་པོ་སྟེ་འཁོར་གསུམ་དང་བྲལ་ཞིང་གྲུབ་མཐའ་གཞན་རྐྱེན་གྱིས་མི༷་བསྐུལ༷་བར༷། །ངེས༷་པར་བློའི་གདིང་རྟོགས་ཤིང་གདིང༷ས་སུ༷་གང༷་བྱས༷་པ༷་དེ་ནི། དང་པོར་རྒྱུ་ཐོས༷་བས༷མ་ལ་བརྟེན༷་པའི་ལྟ་བ་མཐར་ཕྱིན་པའོ། །ཞེས་པའི་དོན་དུ་སྔ་རབས་ཀྱི་མཁས་པ་ཆེན་པོ་དངོས་གྲུབ་བརྙེས་པ་དག་གིས་བཀྲལ་གདའ། ལར་གསང་སྙིང་གི་སྤྱི་དོན་མཐའ་ཆོད་པར་ཤེས་པ་ལ་ལམ་རིམ་འདི་མ་ཤེས་ཀ་མེད་དུ་སྣང་ཞིང་། དེའང་ཚིག་དོན་ཐད་ཀར་བརྡ་རྙིང་དུ་སོང་བ་སོགས་ཅུང་རྟོགས་དཀའང་། བུ་འབོར་བ་མཁས་གྲུབ་ཡེ་ཤེས་རྒྱལ་མཚན་གྱི་འགྲེལ་པ་དང་། ཀཿཐོག་པ་ཤཱཀྱ་རྡོ་རྗེའི་མཆན་འགྲེལ་སོགས་སྦྱར་ན་ཕལ་ཆེར་ཤེས་པར་སླ་སྙམ་མོ།། །། ༈ གསུམ་པ་ལོངས་སྐུའི་གླེང་གཞི་སྐབས། དུས་བཞིས་གོ་ཕྱེ་ནས་དབང་པོ་བཞི་བསྐྱེད་ལུགས་ནི། སྐབས་འདིའི་ཆོས་སྐད་དམིགས་བསལ་བ་སྟེ། རྔམས་གློག་ལས། འདས་པ་ནི་དཔྱིད་ཀྱི་དུས་ཏེ་དྷཱུ་པེ་མའོ། །ཞེས་སོགས་སྦྱར་བའི་དོད། རེ་ཞིག་ལོ་གཅིག་ལ་མཚོན་ཏེ་དུས་བཞིར་ཕྱེ་བའི་སྐབས། དབྱར་དུས་རྩི་ཤིང་མེ་ཏོག་སོགས་རྒྱས་པ་དུས་ཀྱི་དངོས་གཞིར་བྱས་སྟེ་ད་ལྟ་བ་དང་། དེ་ལ་ལྟོས་ནས་སྟོན་དཔྱིད་གཉིས་དེའི་སྦྱོར་མཇུག་ཡིན་པས་འདས་པ་དང་། མ་འོངས་པ། དགུན་གསུམ་ཀ་ཡོད་ལ་མ་ཚོགས་པས་མ་ངེས་པར་བཞག་ཅིང་། དེ་ལྟ་བུའི་དུས་བཞིའི་ཡུལ་ལ་ཉེ་བར་ལོངས་སྤྱོད་པའི་རྣམ་ཤེས་ཀྱི་ཆེར་དབང་པོ་ཡིན་པས་བསྐྱེད་པའི་སྒྲས་སྨོས་པ་ཙམ་ལས་སོ་སོར་སྦྱར་དུ་མེད་པར་སེམས་མོད། ཡེ་ཤེས་གཟིགས་པས་ཞིབ་ཏུ་བཙའ་བར་བྱ་བའི་འོས་སོ།། །། ༈ བཞི་པ་དགོངས་པའི་རྩལ་བདུན་གྱིས་ནམ་མཁའ་ལ་རྒྱས་གདབ་ཅེས་པའི་རྩལ་བདུན་ནི་གསེར་གྱི་བྱང་བུ་བྲི་གཞི་ཕུན་སུམ་ཚོགས་པར་དགོངས་པ། བཻཌཱུཪྻ་ཞུན་མས་བྲིས་པ་རྒྱུ་༢ཕུན་སུམ་ཚོགས་པར་དགོངས་པ། རིན་པོ་ཆེ་སྣ་ཚོགས་པའི་སྒྲོམ་བུ་༣སྣོད་ངོ་མཚར་བར་དགོངས་པ། ནམ་མཁའ་འབྱུང་བཞིས་མི་འཇིག་པས་གཏེར་གནས་༤ཕུན་སུམ་ཚོགས་པར་དགོངས་པ། མ་དང་མཁའ་འགྲོ་རྣམས་ཡེ་ཤེས་ཀྱི་སྤྱན་དང་ལྡན་པས་གཏེར་སྲུང་༥ཁྱད་པར་ཅན་དུ་དགོངས་པ། ཆོས་བདག་རྒྱལ་པོ་ཛཿལས་ཅན་དབང་པོ་ཡང་རབ་རྟོགས་གྲོལ་དུས་མཉམ་དུ་དགོངས་པ། སྐྱེ་འཕགས་བྱང་སེམས་ལ་གནས་པ་སོགས་གྲུབ་བརྙེས་བརྒྱུད་༧འཛིན་དར་རྒྱས་འབྱུང་བ་ལ་དགོངས་པ་སྟེ། ཇི་སྐད་དུ་བློ་གྲོས་ཐབས་ལྡན་ཚུལ་དེས་ནམ་མཁའ་རུ། །གསེར་གྱི་གླེགས་བམ་བྲི་གཞི་ཕུན་སུམ་ཚོགས། །རིན་ཆེན་བཻཌཱུཪྻ་ཡི་ཞུན་མ་རྒྱུ། །རིན་ཆེན་སྣ་ཚོགས་སྒྲོམ་བུ་གཏེར་སྣོད་དེ། །མཁའ་དབྱིངས་འབྱུང་བཞིས་མི་འཇིག་གཏེར་གནས་མཆོག །ལྷ་དང་དེར་གནས་གཏེར་སྲུང་ཕུན་སུམ་ཚོགས། །ཨིནྡྲ་བོ་དྷི་ལས་ཅན་ཆོས་བདག་ཉིད། །བརྒྱུད་འཛིན་གྲུབ་བརྙེས་དར་རྒྱས་འབྱུང་བར་དགོངས། གཞི་༡རྒྱུ་༢སྣོད་༣གནས་༤སྲུང་༥མ་བདག་༦ཉིད་དང་། །འཛིན་༧བྱེད་དགོངས་པའི་རྩལ་ལྡན་བདུན་རྫོགས་པས། །ཏནྟྲ་སྦས་པ་རྒྱལ་པོའི་ཁང་སྟེང་བབས། །ཞེས་གསུངས་ཤིང་གཞན་དུ་ན་ས་མ་ཡ་དམ་ཚིག་གི་མནའ་རྒྱ་སོགས་བདུན་ལ་བཞེད་པར་སྣང་ནའང་སྐབས་འདིར་སྔ་མ་ཉིད་གཟིགས་པ་ལྔ་སོགས་དང་བརྡ་ཁྱད་མཐུན་ཅིང་སྔ་འགྱུར་བཀའ་མའི་གཞུང་ལ་གྲགས་ཆེ་བས་དབང་བཙན་པར་སེམས་ལ། ཡིག་རྙིང་ཁ་ཅིག་ལས་སྐུ་གསུང་ཐུགས་ཡོན་ཏན་ཕྲིན་ལས་དབྱིངས་ཡེ་ཤེས་ཏེ་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པའི་རིག་རྩལ་གྱི་ཕྱག་རྒྱས་གདབ་སྟེ། དེ་མཚོན་པ་རྟགས་ཀྱི་རྒྱ་བདུན་དང་བཅས་ཏེ་སྦས་སོ། །ཞེས་འབྱུང་བའང་། ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྒྱ་བདུན་གྱིས་གདབ་པར་གསུངས་པ་དང་ཚུལ་མཐུན་པས་འདིའང་ལེགས་པར་བཤད་པའི་རྣམ་གྲངས་སུ་བཟུང་དུ་རུང་ངམ་སྙམ་མོ།། །། ༈ ལྔ་པ་རྒྱུད་ལྔ་བསྒྲལ་བའི་ཁྲག་ཅེས་པ་ནི། སྤྱི་དོན་ལྟར་ན། ལྷ་མ་ཡིན་སྟོད་རིས་ལྷ་དང་སྨད་རིས་དུད་འགྲོར་བསྡུ་བའི་ལྷག་མ་འགྲོ་བ་རྒྱུད་ལྔ་ཐུགས་རྗེ་ཆེན་པོའི་ཐབས་ཀྱིས་བསྒྲལ་བའི་ཁྲག་ཅེས་པ་དང་། སྦས་དོན་ལྟར་ན། དེ་རྣམས་སུ་སྐྱེ་བའི་ལྷན་ཅིག་བྱེད་རྐྱེན་རླུང་ལྔ་ལ་རྒྱུད་ལྔར་བཏགས་ཏེ་དེ་ཉིད་དབུ་མར་འཆིང་བ་ལ་བསྒྲལ་བ་དང་། དྭངས་མ་སྟོབས་སུ་གྱུར་པར་ཁྲག་གི་སྒྲས་སྨོས་པ་དང་། མཐར་ཐུག་གི་དོན་ལྟར་ན། འགྲོ་བ་རྒྱུད་ལྔར་འཁོར་བའི་རྒྱུ་དུག་ལྔ་འོད་གསལ་གྱི་དབྱིངས་སུ་བསྒྲལ་བ་ལས་ཡེ་ཤེས་ལྔ་སྟོབས་སུ་གྱུར་པ་ཁྲག་གིས་སྨོས་པར་འགྲེལ་དུ་རུང་ངམ་སྙམ་པ་ལགས།། །། ༈

དྲུག་པ་ངེས་དོན་རིན་པོ་ཆེའི་རྩ་རླུང་ཁྲིད་དང་སྙིང་ཏིག་གི་འཁྲུལ་འཁོར་སྐབས། སྒྲ་ཐལ་འགྱུར་རྩ་བའི་རྒྱུད་ཀྱི་ལུང་དྲངས་པ་ཚིག་རྣམས་ཅུང་མི་མཐུན་ཙམ་བྱུང་ནའང་། སྙིང་ཏིག་གི་དགོངས་པ་ལྟར་ན། ལྟེམ་པས་འགགས་ལ་བཙིར་བས་འཆིང་། །མནན་པས་གནད་ལ་གཅུས་པས་གསལ། །ཞེས་པའི་དོན། ཀྱེ་རྡོར་བརྟག་གཉིས་ལས་ཀྱང་ལོངས་སྤྱོད་ཀྱི་ནི་རླབས་གཉིས་ལ། །རང་གི་གཡས་དང་ལག་གཞན་གྱི། །མཐེ་བོང་དང་ནི་སྲིན་ལག་གིས། །དེ་ནི་རྣལ་འབྱོར་པ་ཡིས་བཙིར། །དེ་ནས་ཡེ་ཤེས་སྐྱེ་བར་འགྱུར། །ཅེས་སོགས་གསུངས་པ་ལྟར་གསུང་ངག་རིན་པོ་ཆེའི་འཁོར་འདས་དབྱེར་མེད་ཀྱི་ལྟ་བའི་སྐབས་ལོངས་སྤྱོད་ཀྱི་རླབས་ལ་བརྟེན་ནས་བདེ་བ་བསྒོམ་པས་བརྗོད་བྲལ་ལ་ངེས་ཤེས་བསྐྱེད་པར་གསུངས་པ་དང་ཚུལ་མཐུན་པ་སྟེ། མགྲིན་པ་ན་རྩ་འདྲ་བ་གསུམ་ཡོད་པའི་བདུད་རྩི་དང་ཁྲག་རྒྱུ་བའི་རྩ་བོར་ནས། ཐོག་མར་རླུང་རྒྱུ་བའི་རྩ་མནན་པས་སྣང་བ་མ་འགག་ལ་རྟོག་པ་འགགས་པ་ལ་སོགས་པའི་གསལ་སྟོང་བརྗོད་བྲལ་གྱི་ཉམས་མྱོང་སྐྱེ་བར་འགྱུར་ལ། དེ་ཡང་ལག་ཡ་གཅིག་གི་མཐེབ་སྲིན་གྱིས་ལྟེམ་༡པའི་ཐབས་ཀྱིས་ཡུལ་ལྔའི་རྟོག་པ་འགགས་པ་རྣམ་ཤེས་སྣང་བ་ལ་ཐིམ་པ་སྟོང་པའི་ཉམས། ལག་གཉིས་ཀས་བཙིར་༢བ་འཆིང་བའི་ཐབས་ཀྱིས་སྣང་བ་མཆེད་པ་ལ་ཐིམ་པ་ཤིན་ཏུ་སྟོང་པའི་ཉམས། སླར་ཡང་དྲག་ཏུ་མནན་༣པས་གནད་ལ་བོར་པའི་ཐབས་ཀྱིས་མཆོད་པ་ཉེར་ཐོབ་ལ་ཐིམ་པ་སྟོང་པ་ཆེན་པོའི་ཉམས། དེ་ཉིད་དར་ཟབ་ལྟ་བུའི་ཐག་པས་གཅུད་༤པའི་ཐབས་ཀྱིས་ཉེར་ཐོབ་འོད་གསལ་ལ་ཐིམ་པས་རབ་ཏུ་སྟོང་པའི་ཉམས་རྣམས་རིམ་བཞིན་འཆར་བར་བཞེད་པར་མངོན་ལ། ངེས་དོན་རིན་པོ་ཆེས་ལུང་གི་འཕྲོར་གཅུན་པས་རྒལ་བ་དྲངས་པར་ཤེས། ཞེས་འདུག་པ་ཡི་གེ་ཉམས་པའི་སྐྱོན་མིན་ན་རྦ་རླབས་རེངས་པའི་དོན་དུ་གོ་ཞིང་། ཕུར་པ་གཏོད་ལ་དྲག་ལ་གཟིར། ཞེས་པ་ནི་གོང་གི་གཅུད་པའི་དོན་གསལ་བར་བྱས་པ་སྟེ། དར་ཟབ་ལྟ་བུའི་ཐག་པའི་སྣེ་ཕུར་བ་ལ་གཏོད་ཅིང་གཅུས་ཏེ་བསྐོར་བའི་དོན་དང་། དེ་ལྟར་རྩ་ཡི་གནད་ཀྱིས་ཀྱང་། སངས་རྒྱས་ཉིད་ནི་མཚོན་པའོ། །ཞེས་པ་ནི། དེ་ལྟར་རྩ་གཉིད་ལོག་ལྟེམ་པའི་གནད་ཀྱིས་ཀྱང་། རང་བཞིན་བརྒྱད་ཅུའི་རྟོག་པ་རགས་རིམ་དབྱིངས་སུ་འགགས་པའི་གསལ་སྟོང་རྣམ་པར་མི་རྟོག་པའི་ངང་དུ། སངས་རྒྱས་ཀྱི་དེ་ཁོ་ན་ཉིད་མཚོན་བྱ་དོན་གྱི་ཡེ་ཤེས་གང་ཡིན་པ་དེ་ནི་མཚོན་བྱེད་དཔེའི་ཚུལ་གྱིས་མཚོན་པའོ། །ཞེས་པའི་དོན་དུ་འགྱུར་སྙམ་ཞིང་། འདི་ལ་སྙིང་ཏིག་གི་ཁྲིད་གཞུང་སོགས་སུ་རྡོ་རྗེའི་རྦ་རླབས་ཞེས་གསུངས་ནའང་། ལམ་འབྲས་པའི་ལུགས་ཀྱི་དབང་བཞི་པའི་ལམ་རྡོ་རྗེའི་རྦ་རླབས་དང་ནི་མིང་གཅིག་པ་ཙམ་ལས་དོན་ཐ་དད་པ་ལགས། དེ་ལྟར་གོང་འོག་གི་ཟབ་མོའི་དོན་རྣམས་ལ་བདག་ལྟ་བུ་སོ་སྐྱེ་ལས་དང་པོ་པ་རྣམ་ཤེས་ཤིན་ཏུ་ལྐོག་ཏུ་གྱུར་པའི་རིགས་ཅན་གྱིས་མ་རྟོགས་པ་དང་ལོག་པར་རྟོག་པ་ཁོ་ན་ལས་ཕྱོགས་ཙམ་རྟོགས་པའང་མི་སྲིད་ན། དོན་དང་འགལ་བའི་ཕུང་པོ་ཆེན་པོའི་ཉེས་པ་མཐའ་དག་ཡེ་ཤེས་གཟིགས་པ་དམ་པས་བཟོད་པར་བཞེས་པ་དང་། བླུན་པོའི་སྤྱི་བརྟོལ་གྱི་ཚིག་ལ་སླར་ཡང་བརྩེ་བ་མཆོག་གི་སྤྱན་རས་ཀྱིས་རྣམ་ཀུན་རྗེས་སུ་བཟུང་བའི་རྒྱུར་འགྱུར་བར་ཅི་གནང་། སརྦ་དཱ་མངྒ་ལཾ་བྷ་བ་ཏུ།། །། ༈

[edit]

'dus pa mdo'i yab yum khro mkhar gyi dris lan sogs gsar rnying gi sngags phyogs zin bris dang lo rgyus sna tshogs/__ oM swa sti/__gang gi tshe ye shes shin tu rnam par dag pas chos dang chos can ro gcig tu gzigs pa'i go 'phang thams cad mkhyen pa'i mtshan gyi snang bas sa gsum na khyab pa bstan pa'i nyin byed chen por gdod ma nas grub pas/__ches mi mkhas shing ma sbyangs pa'i so skye tha shal ba tsa na ka'i srin bu phra mo'i 'du shes can la mkhyen bzhin du rmed pa'i bka' 'phrin nor bu'i cod pan spyi bor stsal ba ni 'phags rnams dman las ches dman pa la brtse ba chos nyid kyi ngang tshul ni 'di lta bu'o zhes mtshon pa las gzhan du ma dmigs mod/__de lta na'ang rang ngos nas kyang byis pa ma'i gam du smra ba ltar skal ba bzang por shes nas gang dran cal col du gsol ba ni 'di yin te//____//__! dang po tshogs chen 'dus pa'i yab yum khro mkhar rnams kyi don/__'di dang sgrub chen bka' brgyad kyi sman sgrub skabs sbyor ba brgyad ldan gsungs pa rnams gnad gcig pas/__spyir zhe sdang la brten nas gtso bor sgrol ba lam du byed pa ma hA/__'dod chags la brten nas gtso bor sbyor ba lam du byed pa a nu/__gti mug la brten nas gtso bor 'od gsal rnam par mi rtog pa'i ye shes lam du byed pa a ti yo ga zhes rgyud kyi rdo rje'i gnas dang mchog gzigs rnams la grags pa brtan pa dang /__sgrub sde brgyad kyi bdud rtsi yon tan gyi skor rnams kyang gtso bor lung gi chos skad dang nye zhing /__a nu'i skor gsar ma dang bstun na chos skad phal cher ma rgyud 'khor lo sdom pa sogs dang mthun shas che bas/__don 'di la dgongs nas thams cad mkhyen pa pradz+nyA ra smis kyang a nu dang ma rgyud kyi lam rim sbyar te smon lam du mdzad pa yin la/__rgyu mtshan des na ma rgyud bde mchog 'khor lor rdzogs rim gyi gtso bo thabs lam zab mo gtan la 'bebs pa'i skabs su/__ji ltar 'jig rten na 'dod pa'i sgyu rtsal drug cu rtsa bzhi 'am/__'khrig thabs drug cu rtsa bzhi dang /__de rnams kyi gtso bo'ang rol thabs mi 'dra ba brgyad du 'dus pas byang sems btsan thabs su dbab pa'i 'khrul 'khor kyang de tsam du 'dus par dgongs nas rol thabs drug cu rtsa bzhi'am/__kha sbyor brgyad du gsungs shing /__de mtshon pa'i slad bde mchog lU nag sogs kyi mchod pa'i skabs su/__gsang ba snyoms 'jug gi mchod par kha sbyor brgyad kyi mchod pa gsungs pa sogs rgyud dang man ngag rnams las rnam bzhag rgya cher gsungs pa ltar/__skabs 'dir yang sbyor ba lam du byed pa la gtso bor dgongs nas ye shes pa'i thugs rgyud bde ba chen po'i gzi byin lhag par bskul ba'i phyir bde stong gi lha sku khro mkhar gyi tshul du bsgom pa dang /__bye brag tu yum zhal yab kyi rdo rjer sbyor ba'ang rjes chags kyi nyams ches cher bskul ba mtshon la/__khyad par bdud rtsi sman gyi skabs su/__byang chub sems kyi bdud rtsi dam tshig pa'i tshul du 'khyil par/__ye shes pa'i byang sems rdo rje bde ba chen po'i rgyun 'bebs la/__kha sbyor brgyad kyi sgo nas dbab pas byang sems 'bebs 'phul lhag par che ba la dgongs nas de lta bu'i rnam par gzhag pa gsungs so snyam pa ni bdag gi rnam par rtog pa ste/__zhib par gsar 'gyur ma rgyud kyi gzhung spyi dang bye brag sgrol ma rnal 'byor ma'i rgyud sogs dang sbyar te dpyad pa zhib mos btsal na nges shes khyad par can skye bar 'gyur ram snyam lags//____//__! gnyis pa slob dpon sangs rgyas gsang ba'i lam rim le'u gnyis pa rang gnas mthong ba'i le'u zhes rgyu shes pa'i mtshan nyid lta ba gtan la 'bebs pa'i skabs/__thos bsam gyi lta ba mthar phyin pa'i tshad/__rgya mtsho dwangs ba'i gzugs brnyan ltar/__sogs kyi don/__dper na rgyaX mtshoX dwangaXs paX'i nang du nyi zla gza' skar gyi gzugs brnyan 'char ba ltaraX/__tshig sgraX la brten nas don spyi'i rnam pa tsam yidaX laX byeXd paX minaX paraX don rang gi mtshan nyid rangaX rigaX pa'i mngonaX sumaX du rtog pas dmigaXs pa'i yul dang bralaX baXr rtogs pa ni sems rangaX gsalaX du maXthong zhing sgro skur lung ma bstan gsumaX dang bralaX ba'am/__blta ba'i yul lta byed kyi mkhan po/__lta ba'i dngos po ste 'khor gsum dang bral zhing grub mtha' gzhan rkyen gyis miX bskulaX b.raX/__/ngesaX par blo'i gding rtogs shing gdingaXs suX gangaX byasaX paX de ni/__dang por rgyu thosaX bsaXm la brtenaX pa'i lta ba mthar phyin pa'o/__/zhes pa'i don du snga rabs kyi mkhas pa chen po dngos grub brnyes pa dag gis bkral gda'/__lar gsang snying gi spyi don mtha' chod par shes pa la lam rim 'di ma shes ka med du snang zhing /__de'ang tshig don thad kar brda rnying du song ba sogs cung rtogs dka'ang /__bu 'bor ba mkhas grub ye shes rgyal mtshan gyi 'grel pa dang /__kaHthog pa shAkya rdo rje'i mchan 'grel sogs sbyar na phal cher shes par sla snyam mo//____//__! gsum pa longs sku'i gleng gzhi skabs/__dus bzhis go phye nas dbang po bzhi bskyed lugs ni/__skabs 'di'i chos skad dmigs bsal ba ste/__rngams glog las/__'das pa ni dpyid kyi dus te d+hU pe ma'o/_/zhes sogs sbyar ba'i dod/__re zhig lo gcig la mtshon te dus bzhir phye ba'i skabs/__dbyar dus rtsi shing me tog sogs rgyas pa dus kyi dngos gzhir byas ste da lta ba dang /__de la ltos nas ston dpyid gnyis de'i sbyor mjug yin pas 'das pa dang /__ma 'ongs pa/__dgun gsum ka yod la ma tshogs pas ma nges par bzhag cing /__de lta bu'i dus bzhi'i yul la nye bar longs spyod pa'i rnam shes kyi cher dbang po yin pas bskyed pa'i sgras smos pa tsam las so sor sbyar du med par sems mod/__ye shes gzigs pas zhib tu btsa' bar bya ba'i 'os so//____//__! bzhi pa dgongs pa'i rtsal bdun gyis nam mkha' la rgyas gdab ces pa'i rtsal bdun ni gser gyi byang bu bri gzhi phun sum tshogs par dgongs pa/__baiDUR+Ya zhun mas bris pa rgyu 2phun sum tshogs par dgongs pa/__rin po che sna tshogs pa'i sgrom bu 3snod ngo mtshar bar dgongs pa/__nam mkha' 'byung bzhis mi 'jig pas gter gnas 4phun sum tshogs par dgongs pa/__ma dang mkha' 'gro rnams ye shes kyi spyan dang ldan pas gter srung 5khyad par can du dgongs pa/__chos bdag rgyal po dzaHlas can dbang po yang rab rtogs grol dus mnyam du dgongs pa/__skye 'phags byang sems la gnas pa sogs grub brnyes brgyud 7'dzin dar rgyas 'byung ba la dgongs pa ste/__ji skad du blo gros thabs ldan tshul des nam mkha' ru/__/gser gyi glegs bam bri gzhi phun sum tshogs/__/rin chen baiDUR+Ya yi zhun ma rgyu/__/rin chen sna tshogs sgrom bu gter snod de/__/mkha' dbyings 'byung bzhis mi 'jig gter gnas mchog__/lha dang der gnas gter srung phun sum tshogs/__/in+d+ra bo d+hi las can chos bdag nyid/__/brgyud 'dzin grub brnyes dar rgyas 'byung bar dgongs/__gzhi 1rgyu 2snod 3gnas 4srung 5ma bdag 6nyid dang /__/'dzin 7byed dgongs pa'i rtsal ldan bdun rdzogs pas/__/tan+t+ra sbas pa rgyal po'i khang steng babs/__/zhes gsungs shing gzhan du na sa ma ya dam tshig gi mna' rgya sogs bdun la bzhed par snang na'ang skabs 'dir snga ma nyid gzigs pa lnga sogs dang brda khyad mthun cing snga 'gyur bka' ma'i gzhung la grags che bas dbang btsan par sems la/__yig rnying kha cig las sku gsung thugs yon tan phrin las dbyings ye shes te dkor bdun ngo bo nyid du lhun gyis grub pa'i rig rtsal gyi phyag rgyas gdab ste/__de mtshon pa rtags kyi rgya bdun dang bcas te sbas so/__/zhes 'byung ba'ang /__ji ltar shes rab kyi pha rol tu phyin pa la rgya bdun gyis gdab par gsungs pa dang tshul mthun pas 'di'ang legs par bshad pa'i rnam grangs su bzung du rung ngam snyam mo//___//__! lnga pa rgyud lnga bsgral ba'i khrag ces pa ni/__spyi don ltar na/__lha ma yin stod ris lha dang smad ris dud 'gror bsdu ba'i lhag ma 'gro ba rgyud lnga thugs rje chen po'i thabs kyis bsgral ba'i khrag ces pa dang /__sbas don ltar na/__de rnams su skye ba'i lhan cig byed rkyen rlung lnga la rgyud lngar btags te de nyid dbu mar 'ching ba la bsgral ba dang /__dwangs ma stobs su gyur par khrag gi sgras smos pa dang /__mthar thug gi don ltar na/__'gro ba rgyud lngar 'khor ba'i rgyu dug lnga 'od gsal gyi dbyings su bsgral ba las ye shes lnga stobs su gyur pa khrag gis smos par 'grel du rung ngam snyam pa lags//____//__! drug pa nges don rin po che'i rtsa rlung khrid dang snying tig gi 'khrul 'khor skabs/__sgra thal 'gyur rtsa ba'i rgyud kyi lung drangs pa tshig rnams cung mi mthun tsam byung na'ang /__snying tig gi dgongs pa ltar na/__ltem pas 'gags la btsir bas 'ching /__/mnan pas gnad la gcus pas gsal/__/zhes pa'i don/__kye rdor brtag gnyis las kyang longs spyod kyi ni rlabs gnyis la/__/rang gi g.yas dang lag gzhan gyi/__/mthe bong dang ni srin lag gis/__/de ni rnal 'byor pa yis btsir/__/de nas ye shes skye bar 'gyur/__/ces sogs gsungs pa ltar gsung ngag rin po che'i 'khor 'das dbyer med kyi lta ba'i skabs longs spyod kyi rlabs la brten nas bde ba bsgom pas brjod bral la nges shes bskyed par gsungs pa dang tshul mthun pa ste/__mgrin pa na rtsa 'dra ba gsum yod pa'i bdud rtsi dang khrag rgyu ba'i rtsa bor nas/__thog mar rlung rgyu ba'i rtsa mnan pas snang ba ma 'gag la rtog pa 'gags pa la sogs pa'i gsal stong brjod bral gyi nyams myong skye bar 'gyur la/__de yang lag ya gcig gi mtheb srin gyis ltem 1pa'i thabs kyis yul lnga'i rtog pa 'gags pa rnam shes snang ba la thim pa stong pa'i nyams/__lag gnyis kas btsir 2ba 'ching ba'i thabs kyis snang ba mched pa la thim pa shin tu stong pa'i nyams/__slar yang drag tu mnan 3pas gnad la bor pa'i thabs kyis mchod pa nyer thob la thim pa stong pa chen po'i nyams/__de nyid dar zab lta bu'i thag pas gcud 4pa'i thabs kyis nyer thob 'od gsal la thim pas rab tu stong pa'i nyams rnams rim bzhin 'char bar bzhed par mngon la/__nges don rin po ches lung gi 'phror gcun pas rgal ba drangs par shes/__zhes 'dug pa yi ge nyams pa'i skyon min na rba rlabs rengs pa'i don du go zhing /__phur pa gtod la drag la gzir/__zhes pa ni gong gi gcud pa'i don gsal bar byas pa ste/__dar zab lta bu'i thag pa'i sne phur ba la gtod cing gcus te bskor ba'i don dang /__de ltar rtsa yi gnad kyis kyang /__sangs rgyas nyid ni mtshon pa'o/__/zhes pa ni/__de ltar rtsa gnyid log ltem pa'i gnad kyis kyang /__rang bzhin brgyad cu'i rtog pa rags rim dbyings su 'gags pa'i gsal stong rnam par mi rtog pa'i ngang du/__sangs rgyas kyi de kho na nyid mtshon bya don gyi ye shes gang yin pa de ni mtshon byed dpe'i tshul gyis mtshon pa'o/__/zhes pa'i don du 'gyur snyam zhing /__'di la snying tig gi khrid gzhung sogs su rdo rje'i rba rlabs zhes gsungs na'ang /__lam 'bras pa'i lugs kyi dbang bzhi pa'i lam rdo rje'i rba rlabs dang ni ming gcig pa tsam las don tha dad pa lags/__de ltar gong 'og gi zab mo'i don rnams la bdag lta bu so skye las dang po pa rnam shes shin tu lkog tu gyur pa'i rigs can gyis ma rtogs pa dang log par rtog pa kho na las phyogs tsam rtogs pa'ang mi srid na/__don dang 'gal ba'i phung po chen po'i nyes pa mtha' dag ye shes gzigs pa dam pas bzod par bzhes pa dang /__blun po'i spyi brtol gyi tshig la slar yang brtse ba mchog gi spyan ras kyis rnam kun rjes su bzung ba'i rgyur 'gyur bar ci gnang /__sarba dA mang+ga laM b+ha ba tu//____//__!