ཡང་གསང་བླ་མའི་སྒྲུབ་པ་ཐིག་ལེའི་རྒྱ་ཅན་གྱི་བསྙེན་ཡིག་གྲུབ་གཉིས་ཤིང་རྟ།

🚧 This website is under continued development. We appreciate your patience!

Previous Text Back to Volume PageNext Text

Wylie title	yang gsang bla ma'i sgrub pa thig le'i rgya can gyi bsnyen yig grub gnyis shing rta
Location	mkhyen brtse'i bka' babs Volume 18, Text 37, Pages 229-236 (Folios 1a1 to 4b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	འཇིགས་མེད་གླིང་པ་ ('jigs med gling pa)
Associated People	ཀློང་ཆེན་རབ་འབྱམས་ (Klong chen pa)
Citation	'jam dbyangs mkhyen brtse'i dbang po. yang gsang bla ma'i sgrub pa thig le'i rgya can gyi bsnyen yig grub gnyis shing rta. In Rdzong sar 'jam dbyangs mkhyen brtse'i dbang po'i bka' babs, Vol. 18: 229-236. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Recitation Manual - bsnyen yig
Cycle	ཡང་གསང་བླ་མའི་སྒྲུབ་པ་ཐིག་ལེའི་རྒྱ་ཅན་ (yang gsang bla ma'i sgrub pa thig le'i rgya can)
Parent Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)
Karchag page	JKW-KABAB-Volume-18-TSHA-Karchag
Recension Link	Other Versions on this site: ཡང་གསང་བླ་མའི་སྒྲུབ་པ་ཐིག་ལེའི་རྒྱ་ཅན་གྱི་བསྙེན་ཡིག་གྲུབ་གཉིས་ཤིང་རྟ།
RTZ	In the Rinchen Terdzö: https://rtz.tsadra.org/index.php/Terdzo-DA-048
Colophon	།ཅེས་པའང་དད་པ་དང་དམ་ཚིག་གིས་རྒྱུད་ཕྱུག་ཅིང་རྣམ་པར་དཔྱོད་པའི་བློ་གྲོས་ཅན་ཨ་བྷཱ་ཡ་ཤྲཱི་མཱཾ་གྱིས་ནན་ཏན་ཆེན་པོས་གསོལ་བ་བཏབ་པ་ལས། ཀུན་མཁྱེན་བླ་མ་དགྱེས་པའི་འབངས་བྱ་བྲལ་བ་མཁྱེན་བརྩེའི་དབང་པོས་འོག་མིན་བླ་མའི་གདན་ས་དཔལ་ལྡན་པདྨ་འོད་གླིང་དུ་སྣང་གསལ་ཞིག་གི་ངོགས་སུ་ཤར་མར་བྲིས་པ་དགེ་ལེགས་ཀྱི་སྣང་བ་མཆོག་ཏུ་འབར་བའི་རྒྱུར་གྱུར་ཅིག །། ཤུབྷཾ།
	ces pa'ang dad pa dang dam tshig gis rgyud phyug cing rnam par dpyod pa'i blo gros can a b+hA ya shrI mAM gyis nan tan chen pos gsol ba btab pa las/__kun mkhyen bla ma dgyes pa'i 'bangs bya bral ba mkhyen brtse'i dbang pos 'og min bla ma'i gdan sa dpal ldan pad+ma 'od gling du snang gsal zhig gi ngogs su shar mar bris pa dge legs kyi snang ba mchog tu 'bar ba'i rgyur gyur cig__//__shub+haM/

Tibetan Text

Wylie

[edit]

ཡང་གསང་བླ་མའི་སྒྲུབ་པ་ཐིག་ལེའི་རྒྱ་ཅན་གྱི་བསྙེན་ཡིག་གྲུབ་གཉིས་ཤིང་རྟ་ཞེས་བྱ་བ་བཞུགས་སོ། །ན་མོ་གུ་རུ་བི་མ་ལ་རསྨི་པཱ་དཱ་ཡ། །དྲི་མེད་འོད་གསལ་རྡོ་རྗེའི་སྙིང་པོའི་དབྱིངས། །སྣང་བཞིའི་འཛུམ་ཟེར་གསར་པ་དང་སྦྱར་བས། །འཇའ་ལུས་འཕོ་བ་ཆེན་པོའི་གསེང་ལམ་མཆོག །དབྱེ་མཛད་རིག་འཛིན་བླ་མས་རྟག་ཏུ་སྐྱོངས། །དེ་ལ་འདིར་རིག་འཛིན་བླ་མའི་སྒྲུབ་པ་ཡང་གསང་ཐིག་ལེའི་རྒྱ་ཅན་གྱི་ལམ་ཟབ་མོ་ལ་བརྟེན་ནས་བྱིན་རླབས་དོན་གྱི་ཡེ་ཤེས་སྙིང་དབུས་སུ་ཞུགས་པས་ཚེ་གཅིག་གིས་འཇའ་ལུས་རྡོ་རྗེའི་གོ་འཕང་ཐོབ་པར་འདོད་པའི་གང་ཟག་གིས། ཤིན་ཏུ་དབེན་ཞིང་ཉམས་དགའ་ལ་ཡིད་དང་རྗེས་སུ་མཐུན་པའི་ནགས་ཁྲོད་དམ། གངས་ཁྲོད་དམ། རི་སུལ་ལ་སོགས་གྲུབ་པའི་སྐྱེ་བོས་བསྟེན་པའི་སྨན་ལྗོངས་སུ་སྦྱོར་བ། དངོས་གཞི། རྗེས་ཀྱི་རིམ་པ་གསུམ་གྱིས་ཉམས་སུ་བླང་བར་བྱ་བ་ལས། དང་པོ་ནི། དལ་འབྱོར་གྱི་རྟེན་འདི་ཉིད་རྙེད་དཀའ་ཞིང་ནམ་འཆི་བའི་ཆ་མེད་པ་དང༌། ཤི་བའི་འོག་ཏུ་ལས་འབའ་ཞིག་གི་རྗེས་སུ་འབྲངས་ཏེ་ཁམས་གསུམ་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ལས་མ་འདས་པས། ད་རེས་སྡུག་བསྔལ་ཅན་གྱི་འཁོར་བ་འདི་ལས་བདག་གཞན་སེམས་ཅན་ཐམས་ཅད་ཐར་པ་ཞིག་ཅི་ནས་ཀྱང་བགྱིའོ་སྙམ་པའི་སྐྱེས་བུ་ཆེན་པོའི་བློས། སྐྱབས་སེམས་ནས་བླ་མའི་རྣལ་འབྱོར་གྱི་བར་སྔོན་འགྲོའི་རིམ་པ་རྣམས་མཐར་ཕྱིན་པ་སྔོན་ཏུ་སོང་བས་ལམ་འདིར་འཇུག་པའི་ཚེ། མར་ངོའི་ཚེས་བཅུ་སོགས་དམར་ཕྱོགས་ཀྱི་གཟའ་སྐར་སྦྱོར་བྱེད་ཤེས་པའི་ཉིན། གནས་ཁང་བྱི་དོར་བྱ་ཞིང༌། རིག་འཛིན་བླ་མའི་དམ་ཚིག་གི་སྣང་བརྙན་བྲིས་འབུར་གང་རིགས་འབྱོར་ན་བཤམས་པའི་མདུན་དུ་སྟེགས་ཀྱི་ཁར་འོད་ལྔའི་ཐིག་ལེའི་དཀྱིལ་འཁོར་རྡུལ་ཚོན་ནམ་རས་བྲིས་སྐབས་དང་སྦྱར་བའི་དབུས་སུ་མཉྫིའི་སྟེང་བྷནྡྷ་དུམ་བུ་གསུམ་པ་དཔྲལ་བ་རང་ལ་བསྟན་པའི་ནང་རིག་འཛིན་གྱི་སྲོག་འཁོར་དཔལ་གྱི་གདུ་བུ་བྲིས་སྒྲུབ་ཚད་ལྡན་བགྱིས་པ་དང༌། བརྒྱུད་པ་འདི་ཉིད་ལས་འོངས་པའི་སེལ་མེད་ཀྱི་བདུད་རྩི་ཆོས་སྨན། རིན་པོ་ཆེ་སྣ་ཚོགས། སྨན་སྣ་ཚོགས། འབྲུ་སྣ་ཚོགས་བཅས་ཀྱིས་གཏམས་པའི་ཁར་དར་དམར་གྱི་ལྡིང་གུར་དབུབ། དེའི་མདུན་དུ་བླ་གཏོར་དམར་པོ་པད་འདབ་བཞི་པ་རྒྱན་ལྡན། གཡས་གཡོན་དུ་སྨན་རཀ །མཐའ་བསྐོར་དུ་ཉེར་སྤྱོད་དང༌། ཚོགས་ཀྱི་འཁོར་ལོའི་ཡོ་བྱད་ཇི་ལྟར་རིགས་པ་བཤམས་པས་མཚོན་ཉེ་བར་མཁོ་བའི་ཡོ་བྱད་རྣམས་ཚགས་སུ་ཚུད་པར་བྱའོ། །གཉིས་པ་དངོས་གཞི་ནི། དེ་ནས་སྲོད་ཐུན་གྱི་སྔ་ལོགས་སུ་སྟན་བདེ་བ་ལ་བསམ་གཏན་གྱི་སྤྱོད་ལམ་དང་ལྡན་པས་འཁོད་ནས་སྔོན་འགྲོའི་རིམ་པས་བློ་རྒྱུད་སྦྱངས་པའི་མཐར། རང་ཉིད་སྐད་ཅིག་གིས་དཔལ་རྟ་མཆོག་རོལ་པ་སོགས་ལས་ཀྱི་ཁྲོ་བོ་གཉུག་མའི་ཧེ་རུ་ཀ་གང་ཡང་རུང་བའི་ང་རྒྱལ་གྱིས་གཞི་བགེགས་ལ་གཏོར་མ་བྱིན་ཞིང་རྡོ་རྗེའི་སྲུང་བའི་འཁོར་ལོས་ཕྱོགས་མཚམས་ཐམས་ཅད་བཅིངས་པ་དང༌། རྒྱལ་ཆེན་བཞི་ལ་བར་ཆད་ཞི་བའི་ཕྲིན་ལས་བཅོལ་ནས་ཐོ་འཛུགས་པ་སོགས་བསྙེན་ཡིག་སྤྱི་འགྲོ་ལྟར་ཤེས་པར་བྱས་ནས། སྐབས་དོན་གྱི་ཁྱད་པར། མདུན་གྱི་ནམ་མཁར་སྐྱབས་གནས་ཀུན་འདུས་རྩ་བའི་བླ་མ་དང་དབྱེར་མེད་ཀུན་མཁྱེན་ཆོས་ཀྱི་རྒྱལ་པོ་ཞི་འཛུམ་མཚན་དཔེའི་གཟི་བྱིན་ཕུན་སུམ་ཚོགས་པར་གསལ་བཏབ་ལ། བདག་གཞན་སེམས་ཅན་ཐམས་ཅད་སྒོ་གསུམ་འཇུག་པ་གཅིག་པས་སྐྱབས་སུ་འགྲོ་བའི་དམིགས་རྣམ་ཀུན་རྫོབ་ཙམ་དུ་བྱས་པའི་མཐར། སྐྱབས་ཡུལ་དང་རང་སེམས་དབྱེར་མེད་པའི་ཆོས་ཉིད་བསམ་གྱིས་མི་ཁྱབ་པའི་ཡེ་ཤེས་ངོ་བོ་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། ཐུགས་རྗེ་ཟུང་འཇུག་སྤྲུལ་པའི་སྐུ་སྟེ་སྐུ་གསུམ་རང་ཆས་སུ་བཞུགས་པའི་དོན་ལ་དྲན་པ་ཉེ་བར་བཞག་པ་དོན་དམ་པའི་སྐྱབས་འགྲོ། རང་གཞན་སེམས་ཅན་ཐམས་ཅད་འཁོར་བ་ལས་བསྒྲལ་འདོད་ཀྱི་ཀུན་རྫོབ་བྱང་ཆུབ་ཀྱི་སེམས་དེ་ཉིད། དོན་དམ་པར་ཅིར་ཡང་མ་གྲུབ་ཅིང༌། ཀུན་རྫོབ་ཏུ་ཅིར་ཡང་འཆར་བའི་གནས་ལུགས་སྟོང་དང་རྟེན་འབྱུང་དབྱེར་མེད་པའི་ངང་དུ་མཉམ་པར་འཇོག་པ་དོན་དམ་གྱི་སེམས་བསྐྱེད། གཟོད་མ་ནས་གཟུང་འཛིན་གྱི་འཁྲུལ་པས་གོས་མ་མྱོང་བའི་འོད་གསལ་གཉུག་མའི་ངང་དུ་ཀུན་བརྟགས་གློ་བུར་གྱི་གདོན་བགེགས་ཐམས་ཅད་རང་བཞིན་མེད་པའི་ལྟ་བས་རྒྱས་འདེབས་པ་ཁྱད་པར་གྱི་སྲུང་འཁོར། ཚོགས་དྲུག་གི་སྣང་བ་གང་ཤར་ཐམས་ཅད། ཤར་ཙམ་ནས་གཟུང་འཛིན་གྱི་མདུད་པ་རང་གྲོལ་དུ་ཞིག་པས་ཅིར་སྣང་ཕྱི་ནང་གསང་བའི་མཆོད་སྤྲིན་དུ་ཤར་བ་དག་པ་རབ་འབྱམས་ཡེ་ཤེས་ཆེན་པོའི་བྱིན་འབེབས་པ་རྣམས་གཞུང་གི་ཚིག་དོན་དང་རྗེས་སུ་མཐུན་པར་ནན་ཏན་གྱིས་གསལ་གདབ་རྗེས། བསྐྱེད་རིམ་དངོས་གཞིའི་ཆར། ཉམས་སུ་མྱོང་ཡང་བསམ་བརྗོད་ཀྱི་སྤྲོས་པ་ལས་འདས་པའི་རིག་སྟོང་རྗེན་པ་སྐད་ཅིག་མའི་རང་རྩལ་ལས་སྣང་བཞིའི་འཆར་ཚུལ་ཕ་མཐར་སོན་པའི་རྟེན་འབྱུང་གི་སྣང་ཆ་མ་འགགས་པ་རང་ཤར་བའི་ཚུལ་གྱིས་ཡོངས་གྲུབ་དག་མཉམ་ཆེན་པོའི་ལྷའི་གསལ་སྣང་ལ་སེམས་ཟིན་པ་ན། འོད་ཟེར་གྱི་འཕྲོ་འདུས་ཀུན་རྫོབ་ཙམ་དུ་ཡེ་ཤེས་པ་སྤྱན་དྲངས་ཤིང་བསྟིམས་ལ། དོན་དམ་པར་ལྷ་དང་རང་སེམས་དབྱེར་མེད་དུ་ཤེས་པས་རབ་ལྟ་བ་མཇལ་བའི་ཕྱག་དང༌། ཅིར་སྣང་ནམ་མཁའ་མཛོད་ཀྱི་མཆོད་པའི་སྤྲིན་ཆེན་པོར་སྤྲོ་བ་དང༌། སྒྱུ་མ་དང་རྨི་ལམ་གྱི་ཚུལ་ལྟར་སྣང་ཡང་ཞེན་པ་མ་གྲུབ་པའི་ཡེ་ཤེས་སྒྱུ་མའི་གསང་གསུམ་གྱི་ཡོན་ཏན་རྗེས་སུ་དྲན་པས་བསྟོད་པ་རྣམས་ལས་གཞུང་ལས་འབྱུང་བ་ལྟར་དང༌། བཟླས་དམིགས་དངོས་ནི། རང་གི་ལུས་ཀྱི་ནང་སྟོང་ཆེན་སྒྲིབ་ཐོགས་དང་བྲལ་བ་ཕྲུ་མ་ཕུས་བཏབ་པ་ལྟ་བུའི་དབུས་ཀྱི་ཐུགས་ཀའི་ཐད་དྲང་དུ་འོད་ལྔའི་ཐིག་ལེ་ཟླུམ་འཁྱིལ་གྱི་དབུས་མཐིང་ག་ཁྱབ་པ་ཆེན་པོའི་ཀློང་ན་ཡེ་ཤེས་སེམས་དཔའ་ཀུན་བཟང་ཡབ་ཡུམ་གྱི་ཐུགས་དབུས་ཙིཏྟ་མཆོང་གུར་ཕུབ་པ་ལྟ་བུའི་དབུས་སུ་པདྨ་ཉི་ཟླའི་གདན་གྱི་སྟེང་དུ་སེམས་ཉིད་གཉུག་མའི་དབྱིངས་ཀྱི་ངོ་བོ་ཧཱུྃ་ཡིག་མཐིང་གསལ་གྱི་མཐར་རིག་པ་རྡོ་རྗེ་ལུ་གུ་རྒྱུད་ཡི་གེའི་གཟུགས་སུ་ཤར་བའི་སྔགས་ཕྲེང་སྤུ་ཤད་ཀྱིས་བྲིས་པ་ལྟ་བུ་མཐིང་གསལ་འོད་ཟེར་ཁ་དོག་ལྔ་ལྡན་དུ་འཕྲོ་བ་གཡས་སྐོར་དུ་གནས་པ་ལས་འོད་ཟེར་བུན་ལོང་གིས་འཕྲོས་པའི་རྩེ་ལས་མཆོད་པའི་རྣམ་གྲངས་བསམ་གྱིས་མི་ཁྱབ་པ་སྤྲོས་ཏེ་དུས་གསུམ་གྱི་བདེ་བར་གཤེགས་པ་སྲས་དང་བཅས་པ་དང༌། ཁྱད་པར་དུ་འོད་གསལ་རྫོགས་པ་ཆེན་པོ་སྙིང་ཏིག་གི་བརྒྱུད་པའི་བླ་མ་རྣམས་ལ་ཐུགས་མཉེས་པའི་མཆོད་པ་ཕུལ་བར་བསམ་པ་བསྙེན་པ། འོད་ཟེར་མར་འཕྲོས་རིགས་དྲུག་གི་སེམས་ཅན་ཐམས་ཅད་ལ་ཕོག་པས་སྡིག་སྒྲིབ་བག་ཆགས་དང་བཅས་པ་སྦྱངས་ཏེ་ཕྱི་སྣོད་འོག་མིན་གྱི་ཞིང་དང༌། ནང་བཅུད་རིག་འཛིན་བླ་མའི་སྐུར་ལམ་ལམ་གསལ་འདེབས་པ་སྒྲུབ་པ། འོད་ཟེར་ཚུར་འདུས་བདག་ལ་ཐིམ་པས་རང་གི་ལུས་ངག་ཡིད་གསུམ་ཐ་མལ་དུ་འཛིན་པའི་དྲི་མ་སྦྱངས་ཏེ། སྒོ་གསུམ་རྡོ་རྗེ་གསུམ་གྱི་ངོ་བོར་བྱིན་གྱིས་བརླབས་པས་མཆོག་དང་ཐུན་མོང་གི་དངོས་གྲུབ་ཐམས་ཅད་ལྷུན་གྱིས་གྲུབ་པར་བསམ་པ་སྒྲུབ་ཆེན། དེ་ལས་འོད་ཟེར་སྤྲོ་བསྡུས་མཚོན་པའི་འཁོར་གསུམ་གྱི་རྟོག་ཚོགས་ཐམས་ཅད་གཟོད་མ་ནས་རང་བཞིན་གྱིས་མ་གྲུབ་པའི་འོད་གསལ་རྫོགས་པ་ཆེན་པོ་ཀ་དག་གི་གནས་ལུགས་ལ་མཉམ་པར་འཇོག་པ་ལས་སྦྱོར་ཏེ། ཚུལ་དེ་ལྟ་བུའི་དམིགས་གནད་དང་མ་བྲལ་བའི་ངང་ནས་བཟླས་པ་ཅི་ནུས་བྱས་རྗེས་མཆོད་བསྟོད་དངོས་གྲུབ་བླང་ཞིང་ཚོགས་ཀྱི་མཆོད་པའང་བྱས་ལ། སྣོད་བཅུད་ཐམས་ཅད་འོད་གསལ་དུ་སྦྱངས་པའི་ནང་གསལ་གྱི་རིག་པ་ཐིམ་ལ་མ་རྨུགས་པའི་ངང་དུ་ཁམས་གསོ། ཐོ་རངས་ལྡང་བའི་དུས་ལ་བབས་པ་ན་སྐད་ཅིག་གིས་དྭངས་བའི་མཁའ་ལ་འཇའ་ཚོན་ཤར་བ་ལྟར་སྣང་སྟོང་ཟུང་འཇུག་སྒྱུ་མའི་ལྷ་སྐུར་ལྡང་ཞིང་ཐོར་ཐུན། སྔ་ཐུན། དགོངས་ཐུན། སྲོད་ཐུན་ཏེ་ཐུན་བཞིའི་རིམ་པས་འབུམ་ཕྲག་བཅུ་གཉིས་ཁ་སྐོང་དང་བཅས་པ་བཟླ་བ་ནི་གྲངས་ཀྱི་བསྙེན་པ་དང༌། ཟླ་བ་དྲུག་ལ་སོགས་པར་བརྩོན་པ་དུས་ཀྱི་བསྙེན་པ་དང༌། གཞུང་ནས་གསུངས་པའི་རྟགས་རྣམས་རྫོགས་པའི་བར་བསླབ་པ་མཚན་མའི་བསྙེན་པ་སྟེ། བརྩོན་འགྲུས་དང་དབང་པོའི་རིམ་པ་ལྟར་ཉམས་སུ་བླངས་པས། དོན་བརྒྱུད་ཀྱི་བྱིན་རླབས་སྙིང་དབུས་སུ་ཞུགས་པས་སྡེ་གསུམ་རྫོགས་པ་ཆེན་པོའི་ཚིག་དང་དོན་གྱི་ཆ་ལ་སྤོབས་པའི་གཏེར་ཆེན་པོ་གྲོལ་ཞིང༌། རིང་པོར་མི་ཐོགས་པར་སྣང་བཞིའི་ཡེ་ཤེས་མཐར་ཕྱིན་པར་འགྱུར་བ་ནི་ངེས་པའོ། །དེ་ལྟར་ཉམས་སུ་བླང་བའི་ཐུན་མཚམས་སུ་སྔ་དགོངས་ཀྱི་ཟེར་གཉིས་ལ་ལྷུན་གྲུབ་རྡོ་རྗེ་ལུ་གུ་རྒྱུད་ཀྱི་སྣང་བ་ལ་གཟིར་ཞིང༌། སྲོད་དང་ཐོ་རངས་སོགས་རླུང་རིག་དྭངས་པའི་སྐབས་གཏུམ་མོ་བསྒོམ་པ་དང་ཁྲེགས་ཆོད་ཀྱི་ལྟ་བ་བསྐྱངས་ཏེ། མདོར་ན་སྟན་ཐོག་གཅིག་ཏུ་དབང་བཞིའི་ལམ་རྫོགས་པར་ཉམས་སུ་བྱང་བར་བྱའོ། །གསུམ་པ་རྗེས་ནི། སྒྲུབ་པ་ཐོན་པའི་ཚེ་ཡར་ངོའི་ཚེས་བཅུ་སོགས་དུས་ཚེས་ཤིས་པའི་སྔར་ཉིན་ནས་ཚོགས་ཀྱི་ཡོ་བྱད་དང༌། དངོས་གྲུབ་ལེན་པའི་རྫས་སོགས་འདུ་བྱས་ལ། ཐོ་རངས་སྔ་བར་ལངས་ནས་ལས་གཞུང་བསྲངས་ཤིང་བཟླས་པ་འོས་མཚམས་ཀྱི་རྗེས་ཚོགས་ཀྱི་མཆོད་པ་བྱ་ཞིང༌། སྐྱ་རེངས་ཤར་བའི་དུས་ལ་བབས་པ་ན་སྤྱི་བཤགས་ཡེ་ཤེས་སྐུ་མཆོག་གིས་དམ་ཚིག་ཉམས་ཆགས་བཤགས། སྒྲུབ་པའི་རྫས་ལ་བྱིན་འབེབས་དང༌། མཆོད་བསྟོད་སྔོན་དུ་འགྲོ་བས་དངོས་གྲུབ་བླང་ཞིང༌། སྒྲུབ་རྫས་རྣམས་གནས་གསུམ་དུ་གཏུགས་ལ་མྱང༌། བྷནྡྷ་སྲོག་འཁོར་དང་བཅས་པ་འབྲལ་མེད་དུ་འཆང༌། ནོངས་བཤགས་ནས་བཟུང་སྟེ་ཤིས་པ་བརྗོད་པའི་བར་ཚོགས་མཆོད་ནས་འབྱུང་བ་ལྟར་དང༌། གཞན་ཡང་བཀྲ་ཤིས་པ་རྒྱ་ཆེར་བརྗོད་ཅིང་རྒྱལ་ཆེན་ལ་གཏང་རག་གི་མཆོད་བསྟོད་དང་གཤེགས་གསོལ་བྱ། དེ་ནས་རང་གི་ཆོས་དང་མཐུན་པའི་གྲོགས་དམ་ཚིག་ལྡན་པ་རེ་གཉིས་དང་རིམ་གྱིས་འཕྲད་པ་སོགས་གསང་བ་སྤྱིའི་ལུགས་བཞིན་ཤེས་པར་བྱའོ། །གང་དུ་ཞུགས་པས་མཆོག་དང་ཐུན་མོང་གི །གྲུབ་གཉིས་ནོར་བུའི་དོ་ཤལ་འཛིན་བཟོད་པ། །ཡང་གསང་བླ་མ་བསྙེན་ཅིང་སྒྲུབ་པའི་ཚུལ། །རིག་པ་འཛིན་པ་དགའ་བའི་ཤིང་རྟ་ཆེ། །ཉུང་གསལ་སྙིང་པོར་དྲིལ་ནས་བཀོད་པ་ཡི། །བསོད་ནམས་ཟླ་ཤེལ་བྱེ་བའི་སྙེམས་འཆང་བས། །སྲིད་ཞིའི་རྒུད་པའི་མུན་པ་ཀུན་བཅིལ་ནས། །འཇའ་ལུས་རྡོ་རྗེའི་ངལ་འཚོ་རྒྱས་གྱུར་ཅིག །ཅེས་པའང་དད་པ་དང་དམ་ཚིག་གིས་རྒྱུད་ཕྱུག་ཅིང་རྣམ་པར་དཔྱོད་པའི་བློ་གྲོས་ཅན་ཨ་བྷཱ་ཡ་ཤྲཱི་མཱཾ་གྱིས་ནན་ཏན་ཆེན་པོས་གསོལ་བ་བཏབ་པ་ལས། ཀུན་མཁྱེན་བླ་མ་དགྱེས་པའི་འབངས་བྱ་བྲལ་བ་མཁྱེན་བརྩེའི་དབང་པོས་འོག་མིན་བླ་མའི་གདན་ས་དཔལ་ལྡན་པདྨ་འོད་གླིང་དུ་སྣང་གསལ་ཞིག་གི་ངོགས་སུ་ཤར་མར་བྲིས་པ་དགེ་ལེགས་ཀྱི་སྣང་བ་མཆོག་ཏུ་འབར་བའི་རྒྱུར་གྱུར་ཅིག །། ཤུབྷཾ།

[edit]

___yang gsang bla ma'i sgrub pa thig le'i rgya can gyi bsnyen yig grub gnyis shing rta zhes bya ba bzhugs so/__/na mo gu ru bi ma la rasmi pA dA ya/__/dri med 'od gsal rdo rje'i snying po'i dbyings/__/snang bzhi'i 'dzum zer gsar pa dang sbyar bas/__/'ja' lus 'pho ba chen po'i gseng lam mchog__/dbye mdzad rig 'dzin bla mas rtag tu skyongs/__/de la 'dir rig 'dzin bla ma'i sgrub pa yang gsang thig le'i rgya can gyi lam zab mo la brten nas byin rlabs don gy-i ye shes snying dbus su zhugs pas tshe gcig gis 'ja' lus rdo rje'i go 'phang thob par 'dod pa'i gang zag gis/__shin tu dben zhing nyams dga' la yid dang rjes su mthun pa'i nags khrod dam/__gangs khrod dam/__ri sul la sogs grub pa'i skye bos bsten pa'i sman ljongs su sbyor ba/__dngos gzhi/__rjes kyi rim pa gsum gyis nyams su blang bar bya ba las/__dang po ni/__dal 'byor gyi rten 'di nyid rnyed dka' zhing nam 'chi ba'i cha med pa dang*/__shi ba'i 'og tu las 'ba' zhig gi rjes su 'brangs te khams gsum gang du skyes kyang sdug bsngal gyi rang bzhin las ma 'das pas/__da res sdug bsngal can gyi 'khor ba 'di las bdag gzhan sems can thams cad thar pa zhig ci nas kyang bgyi'o snyam pa'i skyes bu chen po'i blos/__skyabs sems nas bla ma'i rnal 'byor gyi bar sngon 'gro'i rim pa rnams mthar phyin pa sngon tu song bas lam 'dir 'jug pa'i tshe/__mar ngo'i tshes bcu sogs dmar phyogs kyi gza' skar sbyor byed shes pa'i nyin/__gnas khang byi dor bya zhing*/__rig 'dzin bla ma'i dam tshig gi snang brnyan bris 'bur gang rigs 'byor na bshams pa'i mdun du stegs kyi khar 'od lnga'i thig le'i dkyil 'khor rdul tshon nam ras bris skabs dang sbyar ba'i dbus su many+dzi'i steng b+han+d+ha dum bu gsum pa dpral ba rang la bstan pa'i nang rig 'dzin gyi srog 'khor dpal gyi gdu bu bris sgrub tshad ldan bgyis pa dang*/__brgyud pa 'di nyid las 'ongs pa'i sel med kyi bdud rtsi chos sman/__rin po che sna tshogs/__sman sna tshogs/__'bru sna tshogs bcas kyis gtams pa'i khar dar dmar gyi lding gur dbub/__de'i mdun du bla gtor dmar po pad 'dab bzhi pa rgyan ldan/__g.yas g.yon du sman raka__/mtha' bskor du nyer spyod dang*/__tshogs kyi 'khor lo'i yo byad ji ltar rigs pa bshams pas mtshon nye bar mkho ba'i yo byad rnams tshags su tshud par bya'o/__/gnyis pa dngos gzhi ni/___de nas srod thun gyi snga logs su stan bde ba la bsam gtan gyi spyod lam dang ldan pas 'khod nas sngon 'gro'i rim pas blo rgyud sbyangs pa'i mthar/__rang nyid skad cig gis dpal rta mchog rol pa sogs las kyi khro bo gnyug ma'i he ru ka gang yang rung ba'i nga rgyal gyis gzhi bgegs la gtor ma byin zhing rdo rje'i srung ba'i 'khor los phyogs mtshams thams cad bcings pa dang*/__rgyal chen bzhi la bar chad zhi ba'i phrin las bcol nas tho 'dzugs pa sogs bsnyen yig spyi 'gro ltar shes par byas nas/__skabs don gyi khyad par/__mdun gyi nam mkhar skyabs gnas kun 'dus rtsa ba'i bla ma dang dbyer med kun mkhyen chos kyi rgyal po zhi 'dzum mtshan dpe'i gzi byin phun sum tshogs par gsal btab la/__bdag gzhan sems can thams cad sgo gsum 'jug pa gcig pas skyabs su 'gro ba'i dmigs rnam kun rdzob tsam du byas pa'i mthar/__skyabs yul dang rang sems dbyer med pa'i chos nyid bsam gyis mi khyab pa'i ye shes ngo bo stong pa chos sku/__rang bzhin gsal ba longs sku/__thugs rje zung 'jug sprul pa'i sku ste sku gsum rang chas su bzhugs pa'i don la dran pa nye bar bzhag pa don dam pa'i skyabs 'gro/__rang gzhan sems can thams cad 'khor ba las bsgral 'dod kyi kun rdzob byang chub kyi sems de nyid/__don dam par cir yang ma grub cing*/__kun rdzob tu cir yang 'char ba'i gnas lugs stong dang rten 'byung dbyer med pa'i ngang du mnyam par 'jog pa don dam gyi sems bskyed/__gzod ma nas gzung 'dzin gyi 'khrul pas gos ma myong ba'i 'od gsal gnyug ma'i ngang du kun brtags glo bur gyi gdon bgegs thams cad rang bzhin med pa'i lta bas rgyas 'debs pa khyad par gyi srung 'khor/__tshogs drug gi snang ba gang shar thams cad/__shar tsam nas gzung 'dzin gyi mdud pa rang grol du zhig pas cir snang phyi nang gsang ba'i mchod sprin du shar ba dag pa rab 'byams ye shes chen po'i byin 'bebs pa rnams gzhung gi tshig don dang rjes su mthun par nan tan gyis gsal gdab rjes/__bskyed rim dngos gzhi'i char/__nyams su myong yang bsam brjod kyi spros pa las 'das pa'i rig stong rjen pa skad cig ma'i rang rtsal las snang bzhi'i 'char tshul pha mthar son pa'i rten 'byung gi snang cha ma 'gags pa rang shar ba'i tshul gyis yongs grub dag mnyam chen po'i lha'i gsal snang la sems zin pa na/__'od zer gyi 'phro 'dus kun rdzob tsam du ye shes pa spyan drangs shing bstims la/__don dam par lha dang rang sems dbyer med du shes pas rab lta ba mjal ba'i phyag dang*/__cir snang nam mkha' mdzod kyi mchod pa'i sprin chen por spro ba dang*/__sgyu ma dang rmi lam gyi tshul ltar snang yang zhen pa ma grub pa'i ye shes sgyu ma'i gsang gsum gyi yon tan rjes su dran pas bstod pa rnams las gzhung las 'byung ba ltar dang*/__bzlas dmigs dngos ni/__rang gi lus kyi nang stong chen sgrib thogs dang bral ba phru ma phus btab pa lta bu'i dbus kyi thugs ka'i thad drang du 'od lnga'i thig le zlum 'khyil gyi dbus mthing ga khyab pa chen po'i klong na ye shes sems dpa' kun bzang yab yum gyi thugs dbus tsit+ta mchong gur phub pa lta bu'i dbus su pad+ma nyi zla'i gdan gyi steng du sems nyid gnyug ma'i dbyings kyi ngo bo hU~M yig mthing gsal gyi mthar rig pa rdo rje lu gu rgyud yi ge'i gzugs su shar ba'i sngags phreng spu shad kyis bris pa lta bu mthing gsal 'od zer kha dog lnga ldan du 'phro ba g.yas skor du gnas pa las 'od zer bun long gis 'phros pa'i rtse las mchod pa'i rnam grangs bsam gyis mi khyab pa spros te dus gsum gyi bde bar gshegs pa sras dang bcas pa dang*/__khyad par du 'od gsal rdzogs pa chen po snying tig gi brgyud pa'i bla ma rnams la thugs mnyes pa'i mchod pa phul bar bsam pa bsnyen pa/__'od zer mar 'phros rigs drug gi sems can thams cad la phog pas sdig sgrib bag chags dang bcas pa sbyangs te phyi snod 'og min gyi zhing dang*/__nang bcud rig 'dzin bla ma'i skur lam lam gsal 'debs pa sgrub pa/__'od zer tshur 'dus bdag la thim pas rang gi lus ngag yid gsum tha mal du 'dzin pa'i dri ma sbyangs te/__sgo gsum rdo rje gsum gyi ngo bor byin gyis brlabs pas mchog dang thun mong gi dngos grub thams cad lhun gyis grub par bsam pa sgrub chen/__de las 'od zer spro bsdus mtshon pa'i 'khor gsum gyi rtog tshogs thams cad gzod ma nas rang bzhin gyis ma grub pa'i 'od gsal rdzogs pa chen po ka dag gi gnas lugs la mnyam par 'jog pa las sbyor te/__tshul de lta bu'i dmigs gnad dang ma bral ba'i ngang nas bzlas pa ci nus byas rjes mchod bstod dngos grub blang zhing tshogs kyi mchod pa'ang byas la/__snod bcud thams cad 'od gsal du sbyangs pa'i nang gsal gyi rig pa thim la ma rmugs pa'i ngang du khams gso/__tho rangs ldang ba'i dus la babs pa na skad cig gis dwangs ba'i mkha' la 'ja' tshon shar ba ltar snang stong zung 'jug sgyu ma'i lha skur ldang zhing thor thun/__snga thun/__dgongs thun/__srod thun te thun bzhi'i rim pas 'bum phrag bcu gnyis kha skong dang bcas pa bzla ba ni grangs kyi bsnyen pa dang*/__zla ba drug la sogs par brtson pa dus kyi bsnyen pa dang*/__gzhung nas gsungs pa'i rtags rnams rdzogs pa'i bar bslab pa mtshan ma'i bsnyen pa ste/__brtson 'grus dang dbang po'i rim pa ltar nyams su blangs pas/__don brgyud kyi byin rlabs snying dbus su zhugs pas sde gsum rdzogs pa chen po'i tshig dang don gyi cha la spobs pa'i gter chen po grol zhing*/__ring por mi thogs par snang bzhi'i ye shes mthar phyin par 'gyur ba ni nges pa'o/__/de ltar nyams su blang ba'i thun mtshams su snga dgongs kyi zer gnyis la lhun grub rdo rje lu gu rgyud kyi snang ba la gzir zhing*/__srod dang tho rangs sogs rlung rig dwangs pa'i skabs gtum mo bsgom pa dang khregs chod kyi lta ba bskyangs te/__mdor na stan thog gcig tu dbang bzhi'i lam rdzogs par nyams su byang bar bya'o/__/gsum pa rjes ni/__sgrub pa thon pa'i tshe yar ngo'i tshes bcu sogs dus tshes shis pa'i sngar nyin nas tshogs kyi yo byad dang*/__dngos grub len pa'i rdzas sogs 'du byas la/__tho rangs snga bar langs nas las gzhung bsrangs shing bzlas pa 'os mtshams kyi rjes tshogs kyi mchod pa bya zhing*/__skya rengs shar ba'i dus la babs pa na spyi bshags ye shes sku mchog gis dam tshig nyams chags bshags/__sgrub pa'i rdzas la byin 'bebs dang*/__mchod bstod sngon du 'gro bas dngos grub blang zhing*/__sgrub rdzas rnams gnas gsum du gtugs la myang*/__b+han+d+ha srog 'khor dang bcas pa 'bral med du 'chang*/__nongs bshags nas bzung ste shis pa brjod pa'i bar tshogs mchod nas 'byung ba ltar dang*/__gzhan yang bkra shis pa rgya cher brjod cing rgyal chen la gtang rag gi mchod bstod dang gshegs gsol bya/__de nas rang gi chos dang mthun pa'i grogs dam tshig ldan pa re gnyis dang rim gyis 'phrad pa sogs gsang ba spyi'i lugs bzhin shes par bya'o/__/gang du zhugs pas mchog dang thun mong gi__/grub gnyis nor bu'i do shal 'dzin bzod pa/__/yang gsang bla ma bsnyen cing sgrub pa'i tshul/__/rig pa 'dzin pa dga' ba'i shing rta che/__/nyung gsal snying por dril nas bkod pa yi/__/bsod nams zla shel bye ba'i snyems 'chang bas/__/srid zhi'i rgud pa'i mun pa kun bcil nas/__/'ja' lus rdo rje'i ngal 'tsho rgyas gyur cig__/ces pa'ang dad pa dang dam tshig gis rgyud phyug cing rnam par dpyod pa'i blo gros can a b+hA ya shrI mAM gyis nan tan chen pos gsol ba btab pa las/__kun mkhyen bla ma dgyes pa'i 'bangs bya bral ba mkhyen brtse'i dbang pos 'og min bla ma'i gdan sa dpal ldan pad+ma 'od gling du snang gsal zhig gi ngogs su shar mar bris pa dge legs kyi snang ba mchog tu 'bar ba'i rgyur gyur cig__//__shub+haM/__