བླ་མའི་རྣལ་འབྱོར་ཡེ་ཤེས་ཆར་འབེབས་ཀྱི་སྨིན་བྱེད་ཡེ་ཤེས་བཅུད་སྦྱིན།

🚧 This website is under continued development. We appreciate your patience!

Previous Text Back to Volume PageNext Text

Wylie title	bla ma'i rnal 'byor ye shes char 'bebs kyi smin byed ye shes bcud sbyin
Location	mkhyen brtse'i bka' babs Volume 18, Text 19, Pages 133-137 (Folios 1a1 to 3a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	'jam dbyangs mkhyen brtse'i dbang po. bla ma'i rnal 'byor ye shes char 'bebs kyi smin byed ye shes bcud sbyin. In Rdzong sar 'jam dbyangs mkhyen brtse'i dbang po'i bka' babs, Vol. 18: 133-137. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Guru Yoga Texts - bla ma'i rnal 'byor  ·  Empowerment Ritual - dbang chog - dbang skur
Cycle	བླ་མའི་རྣལ་འབྱོར་ཡེ་ཤེས་ཆར་འབེབས་ (bla ma'i rnal 'byor ye shes char 'bebs)
Karchag page	JKW-KABAB-Volume-18-TSHA-Karchag

Tibetan Text

Wylie

[edit]

༄༅། །བླ་མའི་རྣལ་འབྱོར་ཡེ་ཤེས་ཆར་འབེབས་ཀྱི་སྨིན་བྱེད་ཡེ་ཤེས་བཅུད་སྦྱིན་ཞེས་བྱ་བ།། ན་མཿཤྲཱི་གུ་ར་ཝེ། བློ་འདས་གཉུག་མ་དོན་དམ་གྱི། །ཡོངས་གྲུབ་བླ་མར་ཕྱག་བྱས་ནས། །འདི་ན་དེ་ཡི་སྨིན་བྱེད་ནི། །ཡེ་ཤེས་མཆོག་གི་བཅུད་ལེན་སྦྱིན། །དབེན་པའི་གནས་སུ་སྟེགས་བུའི་ཁར། །འབྲུ་ཚོམ་དམར་པོའི་སྟེང་ཉིད་དུ། །བྷནྡྷ་བདུད་རྩིས་བཀང་བའི་ཁར། །རྡོ་རྗེ་སེམས་དཔའི་མེ་ལོང་བཀོད། །མཐའ་བསྐོར་ཕྱི་ནང་མཆོད་པས་བསྐོར། །དེ་ནས་ཡེ་ཤེས་བྱིན་འབེབས་ལྟར། །བདག་མདུན་བུམ་གསུམ་དབྱེར་མེད་པའི། །བསྐྱེད་བཟླས་ལྷ་ཚོགས་འོད་དུ་ཞུ། །ལས་བུམ་བདུད་རྩི་འཁྱིལ་པས་བསྒྲུབ། །ཐུན་མཐར་མཆོད་བསྟོད་བདག་འཇུག་བླང༌། །དེ་ནས་སློབ་མ་གྲལ་ལ་འཁོད། །ཁྲུས་བྱས་བགེགས་བསྐྲད་སྲུང་འཁོར་བསྒོམ། །དེ་ནས་ལོ་རྒྱུས་མཚམས་སྦྱོར་ནི། །ད་ལམ་འདིར་ནི་ཡང་གསང་བླ་མའི་དཀྱིལ་འཁོར་དུ་སྨིན་པར་བྱེད་པ་ཡིན་ཏེ། དེ་ཡང་དཔལ་ཀྱེ་རྡོ་རྗེའི་རྩ་རྒྱུད་བརྟག་པ་གཉིས་པ་ལས། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་པས། །བླ་མའི་དུས་ཐབས་བསྟན་པ་དང༌། །རང་གི་བསོད་ནམས་ལས་ཤེས་བྱ། །ཞེས་དང༌། ཡེ་ཤེས་གྲུབ་པ་ལས། །སྐྱ་བ་འཛིན་པ་མེད་པར་ནི། །གྲུས་ཀྱང་ཕ་རོལ་ཕྱིན་མི་ནུས། །ཡོན་ཏན་ཐམས་ཅད་ཀུན་རྫོགས་ཀྱང༌། །བླ་མ་མེད་ན་སྲིད་མཐར་མིན། །ཞེས་གསུངས་པ་ལྟར། དུས་གསུམ་དུ་གཤེགས་ཤིང་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་ཀྱང་དཔལ་ལྡན་བླ་མ་དམ་པའི་བཀའ་དྲིན་ཁོ་ན་ལ་བརྟེན་ཅིང་གནས་ཏེ། ཡང་དག་པར་འབྱུང་བའི་ཕྱིར་དང༌། ཁྱད་པར་གསང་སྔགས་ཀྱི་རྩ་བ་ནི་བླ་མ་ཡིན་ཞིང༌། དེ་ལ་མོས་གུས་ཀྱི་རྟེན་འབྲེལ་གནད་དུ་སྨིན་ན་རིང་པོར་མི་ཐོགས་པར་རྡོ་རྗེ་འཆང་གི་གོ་འཕང་ལ་འཛེགས་པར་འགྱུར་བ་བཅས་དགོངས་ནས་ལམ་ཐམས་ཅད་ཀྱི་རྩ་བ་ཟབ་མོ་བླ་མའི་རྣལ་འབྱོར་དུ་གསུངས་ཤིང༌། དེ་ཡང་སྔོན་དུ་རྒྱུ་དུས་ཀྱི་དབང་གིས་སྨིན་པར་བྱས་ནས་ཕྱིས་ལམ་དབང་ཐོད་རྒལ་དུ་བླངས་པས་འབྲས་བུ་སངས་རྒྱས་རྣམས་ལས་འོད་ཟེར་ཆེན་པོའི་དབང་ནོད་དེ་སྣང་གསུམ་འཕོ་ཆགས་ཀྱི་སྤྲོས་པ་ལས་བརྒལ་བའི་གོ་འཕང་མངོན་དུ་བརྙེས་པ་བྱིན་རླབས་ཟབ་མོ་བགྱི་བ་ལ་བདག་ཉིད་ཀྱིས་བྱ་བར་འོས་པ་ཐམས་ཅད་སྔོན་དུ་སོང་ནས། ཁྱེད་རང་རྣམས་ཀྱི་ངོ་སྐལ་དུ་གྱུར་པ་བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པའི་སྤྱན་སྔར་མཎྜལ་ཞིག་ཕུལ་མཛོད། མཎྜལ་ཕུལ་ནས་གསོལ་བ་གདབ་པ་ནི། ཨེ་མ། རིགས་དང་དཀྱིལ་འཁོར་ཐམས་ཅད་ཀྱི། །ཁྱབ་བདག་རྡོ་རྗེ་སློབ་དཔོན་དགོངས། །བདག་ལ་ཡེ་ཤེས་བླ་མེད་ཀྱིས། །བྱིན་རླབས་བཅུད་ཆེན་དབབ་ཏུ་གསོལ། །ལན་གསུམ་རྗེས་སུ་སྐྱབས་སེམས་དང༌། །ཡན་ལག་བདུན་གྱིས་ཚོགས་གཉིས་འདུམས། །དེ་ནས་དབང་གི་དོན་པོ་ནི། །ཡེ་ཤེས་དབབ་པ་ཉིད་ཡིན་ཕྱིར། །སློབ་མ་ལུས་གནད་བསྲངས་བྱས་ལ། །ཁ་སྦྱོར་རླུང་བསྡམ་འདི་བཞིན་དམིགས། །ཨོཾ་མ་ཧཱ་ཤཱུའུ་ནྱ་ཏཱ་སོགས། སློབ་དཔོན་གྱི་ཐུགས་ཀ་ནས་བྱུང་བའི་འོད་ཟེར་གྱིས། ཁྱེད་རང་རྣམས་ཀྱི་ཕུང་པོ་ཁམས་དང་སྐྱེ་མཆེད་ཀྱི་ཟག་པ་ཆ་དང་བཅས་པ་སྦྱངས། རྣམ་པར་ཤེས་པ་ཧཱུྃ་ཡིག་མཐིང་གར་གྱུར་པ་རྡོ་རྗེ་འཛིན་པ་ཀུན་བཟང་ཡབ་ཡུམ་དུ་གསལ་བའི་ཞལ་ནས་ཞུགས། སྐུའི་དབྱིབས་བརྒྱུད་རྡོ་རྗེའི་ལམ་ནས་ཡུམ་གྱི་མཁའ་གསང་དུ་བབས་པ་ལས་བདེ་སྟོང་སྲས་ཀྱི་རྣམ་པར་གྱུར་པ་ནི་ངོ་བོ་ཁྱབ་བདག་དཔལ་ལྡན་བླ་མ་ལ་རྣམ་པ་ཐོག་མའི་མགོན་པོ་ཀུན་བཟང་འོད་མི་འགྱུར་བ་སྟང་དཔྱལ་དུ་གསལ་བའི་གསང་བ་གསུམ་གྱི་གནས་ནས་འོད་ཟེར་ལྕགས་ཀྱུ་ལྟ་བུར་འཕྲོས་པས་ཕྱོགས་བཅུ་དུས་བཞིའི་རྒྱལ་བ་སྲས་དང་བཅས་པ་རིགས་མཐའ་དག་གི་བདག་ཉིད་འཁོར་ལོའི་མགོན་པོའི་རྣམ་པར་བྱོན་ནས་ཁྱེད་རང་རྣམས་ཀྱི་ཚངས་བུག་ནས་ཞུགས་ཏེ་སྙིང་གར་ཡེ་ཤེས་པའི་ཚུལ་གྱིས་བཞུགས་པའི་མོས་པ་མཛོད། ཧཱུྃ། ཕྱོགས་བཅུའི་ཞིང་ཁམས་དག་པ་རབ་འབྱམས་ནས། །བདེ་གཤེགས་རྒྱལ་བ་སྲས་དང་བཅས་པ་ཀུན། །ཡེ་ཤེས་བླ་མའི་གསང་གསུམ་རྣམ་པ་རུ། །གནས་འདིར་བྱིན་ཕོབ་རྡོ་རྗེའི་ཡེ་ཤེས་སྐྱེད། ཨོཾ་ཨཱཿཧཱུྃབཛྲ་གུ་རུ་བཛྲ་ཛྙཱ་ན་ཨཱ་བེ་ཤ་ཡ་ཨ་ཨཿ བརྟན་པར་གྱུར་ཅིག་སུ་པྲ་ཏིཥྛ་བཛྲཱ་ཡེ་སྭཱ་ཧཱ། དེ་ནས་ཐོད་བུམ་སྤྱི་བོར་གཏུགས། ཧཱུྃ། རྣམ་པ་ཐམས་ཅད་མཁྱེན་པའི་ཆོས་ཉིད་ནི། །ཟུང་འཇུག་སྒྱུ་མའི་དཀྱིལ་འཁོར་ཆེན་པོ་སྟེ། །མཐའ་དག་སྒྱུ་འཕྲུལ་དྲཱ་བར་རྫོགས་པ་ཡི། །སྐུ་ཡི་དབང་མཆོག་དམ་པ་ཁྱོད་ལ་སྦྱིན། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཀཱ་ཡ་ཨ་བྷི་ཥིཉྩ་ཨོཾ། དེས་ལུས་ཀྱི་ལས་དང་རྩ་ཡི་སྒྲིབ་པ་སྦྱངས། ལམ་སྣང་སྟོང་ཟུང་འཇུག་གི་བསྐྱེད་རིམ་བསྒོམ་པ་ལ་དབང༌། འབྲས་བུ་བླ་མ་སྤྲུལ་པའི་སྐུ་འགྲུབ་པའི་ས་བོན་རྒྱུད་ལ་བཞག་པའོ། །གཉིས་པ་བྷནྡྷའི་བདུད་རྩི་སྦྱིན། ཧཱུྃ། བདེ་ཆེན་དགའ་བ་བཞི་ཡི་བདུད་རྩིའི་སྤྲིན། །ཐབས་ཤེས་མཉམ་པར་རོལ་པའི་དངོས་གྲུབ་དབྱིག །འགག་མེད་གསུང་གི་རྡོ་རྗེར་རྫོགས་གྱུར་པའི། །སྔགས་ཀྱི་དབང་མཆོག་དམ་པ་ཁྱོད་ལ་སྦྱིན། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཝཱ་ཀ་ཨ་བྷི་ཥིཉྩ་ཨཱཿ དེས་ངག་གི་ལས་དང་རླུང་གི་སྒྲིབ་པ་སྦྱངས། བདེ་སྟོང་ཟུང་འཇུག་རྩ་རླུང་དང་འཕོ་བའི་ལམ་བསྒོམ་པ་ལ་དབང༌། འབྲས་བུ་བླ་མ་ལོངས་སྤྱོད་རྫོགས་པའི་སྐུ་འགྲུབ་པའི་སྐལ་བ་རྒྱུད་ལ་བཞག་གོ །གསུམ་པ་དྭངས་ཤེལ་བསྟན་བྱས་ལ། ཧཱུྃ། རྟག་ཏུ་ཐིག་ལེ་ཆེན་པོ་གཅིག་གི་ངང༌། །སྤྲོ་དང་བསྡུ་བའི་བྱ་རྩོལ་མ་དམིགས་ཀྱང༌། །འགགས་མེད་སྣང་ཆ་སྒྱུ་མར་རང་གྲོལ་བའི། །ཀ་དག་གཉུག་མའི་དབང་བསྐུར་ཁྱོད་ལ་སྦྱིན། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཙིཏྟ་ཨ་བྷི་ཥིཉྩ་ཧཱུྃ། དེས་ཡིད་ཀྱི་ལས་དང་ཉོན་ཤེས་ཀྱི་སྒྲིབ་པ་སྦྱངས། རིག་སྟོང་ཟུང་འཇུག་འོད་གསལ་གྱི་ལམ་སྒོམ་པ་ལ་དབང༌། འབྲས་བུ་བླ་མ་ཆོས་ཀྱི་སྐུ་འགྲུབ་པའི་སྐལ་བ་རྒྱུད་ལ་བཞག་གོ །དེ་ནས་ཁྱད་པར་ཚིག་ཙམ་གྱི། །བརྡ་དང་ཐབས་ལ་བརྟེན་ནས་ཀྱང༌། །དོན་དམ་དགོངས་པར་ངོ་སྤྲོད་པའི། །རྡོ་རྗེའི་གླུ་ནི་ལན་གསུམ་བླང༌། །གཟུང་བའི་ཡུལ་གྱིས་མ་གོས་ཤིང༌། །འཛིན་པའི་རྟོག་པས་མ་བསླད་པར། །རིག་སྟོང་རྗེན་པར་བསྐྱང་བ་ནི། །སངས་རྒྱས་ཀུན་གྱི་དགོངས་པའོ། ལན་གསུམ། །མཉམ་གཞག་དགོངས་པའི་དྲོད་གཏད་ཅིང༌། །རྗེས་ཐོབ་སྒྱུ་མའི་རྟོགས་པ་སྤར། །རྗེས་ལ་དམ་ཚིག་ཁས་བླང་དང༌། །གཏང་རག་མཎྜལ་རྒྱས་པར་ཕུལ། །ཤིས་པ་བརྗོད་ཅིང་དགེ་བ་བསྔོ། །དགོངས་བརྒྱུད་བྱིན་རླབས་ལྡན་པ་ཡི། །རྡོ་རྗེའི་སློབ་དཔོན་མཆོག་ཉིད་ཀྱིས། །མོས་གུས་ལྡན་པའི་སློབ་མ་ལ། །ཚུལ་བཞིན་འདི་ནི་སུས་བསྐུར་བས། །ཆོས་ཉིད་དགོངས་པ་རང་གྲོལ་བའི། །རྡོ་རྗེའི་རྣལ་འབྱོར་བསླུ་བ་མེད། ས་མ་ཡཿ ལམ་ཟབ་མོ་བླ་མའི་བྱིན་རླབས་ཀྱི་རིམ་པའོ།

[edit]

@#/__/bla ma'i rnal 'byor ye shes char 'bebs kyi smin byed ye shes bcud sbyin zhes bya ba//__na maHshrI gu ra we/__blo 'das gnyug ma don dam gyi/__/yongs grub bla mar phyag byas nas/__/'di na de yi smin byed ni/__/ye shes mchog gi bcud len sbyin/__/dben pa'i gnas su stegs bu'i khar/__/'bru tshom dmar po'i steng nyid du/__/b+han+d+ha bdud rtsis bkang ba'i khar/__/rdo rje sems dpa'i me long bkod/__/mtha' bskor phyi nang mchod pas bskor/__/de nas ye shes byin 'bebs ltar/__/bdag mdun bum gsum dbyer med pa'i/__/bskyed bzlas lha tshogs 'od du zhu/__/las bum bdud rtsi 'khyil pas bsgrub/__/thun mthar mchod bstod bdag 'jug blang*/__/de nas slob ma gral la 'khod/__/khrus byas bgegs bskrad srung 'khor bsgom/__/de nas lo rgyus mtshams sbyor ni/__/da lam 'dir ni yang gsang bla ma'i dkyil 'khor du smin par byed pa yin te/__de yang dpal kye rdo rje'i rtsa rgyud brtag pa gnyis pa las/__gzhan gyis brjod min lhan cig skyes/__/gang du yang ni mi rnyed pas/__/bla ma'i dus thabs bstan pa dang*/__/rang gi bsod nams las shes bya/__/zhes dang*/__ye shes grub pa las/__/skya ba 'dzin pa med par ni/__/grus kyang pha rol phyin mi nus/__/yon tan thams cad kun rdzogs kyang*/__/bla ma med na srid mthar min/__/zhes gsungs pa ltar/__dus gsum du gshegs shing bzhugs pa'i rgyal ba sras dang bcas pa thams cad kyang dpal ldan bla ma dam pa'i bka' drin kho na la brten cing gnas te/__yang dag par 'byung ba'i phyir dang*/__khyad par gsang sngags kyi rtsa ba ni bla ma yin zhing*/__de la mos gus kyi rten 'brel gnad du smin na ring por mi thogs par rdo rje 'chang gi go 'phang la 'dzegs par 'gyur ba bcas dgongs nas lam thams cad kyi rtsa ba zab mo bla ma'i rnal 'byor du gsungs shing*/__de yang sngon du rgyu dus kyi dbang gis smin par byas nas phyis lam dbang thod rgal du blangs pas 'bras bu sangs rgyas rnams las 'od zer chen po'i dbang nod de snang gsum 'pho chags kyi spros pa las brgal ba'i go 'phang mngon du brnyes pa byin rlabs zab mo bgyi ba la bdag nyid kyis bya bar 'os pa thams cad sngon du song nas/__khyed rang rnams kyi ngo skal du gyur pa bla ma dang dkyil 'khor gyi gtso bo tha mi dad pa'i spyan sngar maN+Dal zhig phul mdzod/__maN+Dal phul nas gsol ba gdab pa ni/__e ma/__rigs dang dkyil 'khor thams cad kyi/__/khyab bdag rdo rje slob dpon dgongs/__/bdag la ye shes bla med kyis/__/byin rlabs bcud chen dbab tu gsol/__/lan gsum rjes su skyabs sems dang*/__/yan lag bdun gyis tshogs gnyis 'dums/__/de nas dbang gi don po ni/__/ye shes dbab pa nyid yin phyir/__/slob ma lus gnad bsrangs byas la/__/kha sbyor rlung bsdam 'di bzhin dmigs/__/oM ma hA shU'u n+ya tA sogs/__slob dpon gyi thugs ka nas byung ba'i 'od zer gyis/__khyed rang rnams kyi phung po khams dang skye mched kyi zag pa cha dang bcas pa sbyangs/__rnam par shes pa hU~M yig mthing gar gyur pa rdo rje 'dzin pa kun bzang yab yum du gsal ba'i zhal nas zhugs/__sku'i dbyibs brgyud rdo rje'i lam nas yum gyi mkha' gsang du babs pa las bde stong sras kyi rnam par gyur pa ni ngo bo khyab bdag dpal ldan bla ma la rnam pa thog ma'i mgon po kun bzang 'od mi 'gyur ba stang dpyal du gsal ba'i gsang ba gsum gyi gnas nas 'od zer lcags kyu lta bur 'phros pas phyogs bcu dus bzhi'i rgyal ba sras dang bcas pa rigs mtha' dag gi bdag nyid 'khor lo'i mgon po'i rnam par byon nas khyed rang rnams kyi tshangs bug nas zhugs te snying gar ye shes pa'i tshul gyis bzhugs pa'i mos pa mdzod/__hU~M/__phyogs bcu'i zhing khams dag pa rab 'byams nas/__/bde gshegs rgyal ba sras dang bcas pa kun/__/ye shes bla ma'i gsang gsum rnam pa ru/__/gnas 'dir byin phob rdo rje'i ye shes skyed/__oM AHhU~Mbadz+ra gu ru badz+ra dz+nyA na A be sha ya a aH__brtan par gyur cig su pra tiSh+Tha badz+rA ye swA hA/__de nas thod bum spyi bor gtugs/__hU~M/__rnam pa thams cad mkhyen pa'i chos nyid ni/__/zung 'jug sgyu ma'i dkyil 'khor chen po ste/__/mtha' dag sgyu 'phrul drA bar rdzogs pa yi/__/sku yi dbang mchog dam pa khyod la sbyin/__oM AHhU~M badz+ra gu ru pad+ma sid+d+hi hU~M/__kA ya a b+hi Shiny+tsa oM/__des lus kyi las dang rtsa yi sgrib pa sbyangs/__lam snang stong zung 'jug gi bskyed rim bsgom pa la dbang*/__'bras bu bla ma sprul pa'i sku 'grub pa'i sa bon rgyud la bzhag pa'o/__/gnyis pa b+han+d+ha'i bdud rtsi sbyin/__hU~M/__bde chen dga' ba bzhi yi bdud rtsi'i sprin/__/thabs shes mnyam par rol pa'i dngos grub dbyig__/'gag med gsung gi rdo rjer rdzogs gyur pa'i/__/sngags kyi dbang mchog dam pa khyod la sbyin/__oM AHhU~M badz+ra gu ru pad+ma sid+d+hi hU~M/__wA ka a b+hi Shiny+tsa AH__des ngag gi las dang rlung gi sgrib pa sbyangs/__bde stong zung 'jug rtsa rlung dang 'pho ba'i lam bsgom pa la dbang*/__'bras bu bla ma longs spyod rdzogs pa'i sku 'grub pa'i skal ba rgyud la bzhag go__/gsum pa dwangs shel bstan byas la/__hU~M/__rtag tu thig le chen po gcig gi ngang*/__/spro dang bsdu ba'i bya rtsol ma dmigs kyang*/__/'gags med snang cha sgyu mar rang grol ba'i/__/ka dag gnyug ma'i dbang bskur khyod la sbyin/__oM AHhU~M badz+ra gu ru pad+ma sid+d+hi hU~M/__tsit+ta a b+hi Shiny+tsa hU~M/__des yid kyi las dang nyon shes kyi sgrib pa sbyangs/__rig stong zung 'jug 'od gsal gyi lam sgom pa la dbang*/__'bras bu bla ma chos kyi sku 'grub pa'i skal ba rgyud la bzhag go__/de nas khyad par tshig tsam gyi/__/brda dang thabs la brten nas kyang*/__/don dam dgongs par ngo sprod pa'i/__/rdo rje'i glu ni lan gsum blang*/__/gzung ba'i yul gyis ma gos shing*/__/'dzin pa'i rtog pas ma bslad par/__/rig stong rjen par bskyang ba ni/__/sangs rgyas kun gyi dgongs pa'o/__lan gsum/__/mnyam gzhag dgongs pa'i drod gtad cing*/__/rjes thob sgyu ma'i rtogs pa spar/__/rjes la dam tshig khas blang dang*/__/gtang rag maN+Dal rgyas par phul/__/shis pa brjod cing dge ba bsngo/__/dgongs brgyud byin rlabs ldan pa yi/__/rdo rje'i slob dpon mchog nyid kyis/__/mos gus ldan pa'i slob ma la/__/tshul bzhin 'di ni sus bskur bas/__/chos nyid dgongs pa rang grol ba'i/__/rdo rje'i rnal 'byor bslu ba med/__sa ma yaH__lam zab mo bla ma'i byin rlabs kyi rim pa'o/_