JKW-KABAB-17-TSA-025

Previous Text Back to Volume PageLast text in volume.

ལྕེ་བཙུན་སྙིང་ཏིག་ཟབ་ཁྲིད་དཔལ་ལྡན་བླ་མའི་ཞལ་ལུང་བསླད་མེད་ཡིད་ལ་གང་ཟིན་གྱི་ཟིན་ཐོ།

Wylie title	lce btsun snying tig zab khrid dpal ldan bla ma'i zhal lung bslad med yid la gang zin gyi zin tho
Location	mkhyen brtse'i bka' babs Volume 17, Text 25, Pages 747-795 (Folios 1a to 25a1)
Author	མཁན་ཆེན་བཀྲ་ཤིས་འོད་ཟེར་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	mkhan chen bkra shis 'od zer. lce btsun snying tig zab khrid dpal ldan bla ma'i zhal lung bslad med yid la gang zin gyi zin tho. In Rdzong sar 'jam dbyangs mkhyen brtse'i dbang po'i bka' babs, Vol. 17: 747-795. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Notes - zin bris  ·  Revelations - gter ma  ·  Contemplative Guide Books and Instructional Manuals - khrid yig
Cycle	ལྕེ་བཙུན་ཆེན་པོའི་བི་མ་ལའི་ཟབ་ཏིག་ (lce btsun chen po'i bi ma la'i zab tig)
Karchag page	JKW-KABAB-Volume-17-TSA-Karchag
RTZ	In the Rinchen Terdzö: https://rtz.tsadra.org/index.php/Terdzo-LI-012
Colophon	Author colophon: །ཞེས་པའང་ལྕེ་བཙུན་ཆེན་པོའི་རྣམ་འཕྲུལ་འོད་གསལ་སྤྲུལ་པའི་རྡོ་རྗེའམ། འཇམ་དབྱངས་བླ་མ་མཁྱེན་བརྩེའི་དབང་པོས་ལན་གཉིས་ཀྱི་བར་དུ་ཐུགས་བརྩེ་བ་ཆེན་པོས་བདག་ལ་གནང་བ་ཡིན་པས་བརྗེད་ཀྱིས་ཕངས་ནས་རང་བློས་ཟིན་ཚོད་བཀོད་པ་དགེ་ཞིང་བཀྲ་ཤིས་པར་གྱུར་ཅིག Contributor colophon: །ཅེས་པའང་མཁྱེན་སྤྲུལ་མིང་གིས་སྨོན་པ་དགེ །དགེའོ།།
	Author colophon: zhes pa'ang lce btsun chen po'i rnam 'phrul 'od gsal sprul pa'i rdo rje'am/__'jam dbyangs bla ma mkhyen brtse'i dbang pos lan gnyis kyi bar du thugs brtse ba chen pos bdag la gnang ba yin pas brjed kyis phangs nas rang blos zin tshod bkod pa dge zhing bkra shis par gyur cig_ Contributor colophon: ces pa'ang mkhyen sprul ming gis smon pa dge__/dge'o//

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

ལྕེ་བཙུན་སྙིང་ཏིག་ཟབ་ཁྲིད་དཔལ་ལྡན་བླ་མའི་ཞལ་ལུང་བསླད་མེད་ཡིད་ལ་གང་ཟིན་གྱི་ཟིན་ཐོ་བཞུགས་སོ།། ༄༅། །འདིར་ལྕེ་བཙུན་ཆེན་པོའི་བི་མའི་ཟབ་ཏིག་གི་ཁྲིད་ཀྱི་ཟིན་བྲིས་ལ་གསུམ། ལོ་རྒྱུས་ཀྱི་སྒོ་ནས་ངེས་ཤེས་བསྐྱེད་པ། དབང་གི་སྒོ་ནས་སྨིན་པར་བྱེད་པ། གདམས་ངག་གི་སྒོ་ནས་གྲོལ་བར་བྱེད་པ་དང་གསུམ། དང་པོ་ལ་སྔོན་བྱུང་ལོ་རྒྱུས་དང༌། ཕྱིས་འབྱུང་གི་ལོ་རྒྱུས་ལས། དང་པོ་ནི། འདི་སྐད་བདག་གིས་ཐོས་པ་དུས་གཅིག་ན༔ བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་གཟུགས་ཀྱི་རྒྱལ་པོ་དང་༔ ཚོར་བའི་རྒྱལ་པོ་དང་༔ འདུ་ཤེས་ཀྱི་རྒྱལ་པོ་དང་༔ འདུ་བྱེད་ཀྱི་རྒྱལ་པོ་དང་༔ རྣམ་པར་ཤེས་པའི་རྒྱལ་པོ་རྣམས་གཅིག་ཏུ་བསྡུས་པའི་ཡེ་ཤེས་ཀྱི་སྐུ་བརྙེས་པ་དཔལ་ཧེ་རུ་ཀ་རྣལ་འབྱོར་གྱི་དབང་ཕྱུག་སེཾ་ཧེ་ཤྭ་ར་དེ་ཉིད༔ པདྨའི་རིག་མཆོག་གར་གྱི་དབང་པོའི་ཞིང་ཁམས༔ བོད་ཁ་བ་ཅན་གྱི་ལྗོངས༔ ཡུལ་ལ་མིང་དུ་ཆགས་པ་འོ་ཡུག་ཤུག་པའི་གླིང་གི་མགོ༔ བཀྲ་ཤིས་ལ་ཟིལ་ཆེ་བ༔ བྱིན་ཆགས་ལ་རླུང་རིག་དྭངས་པ༔ མཁའ་འགྲོ་ཕྱི་གོང་རྫའི་ར་བ་སྨན་ཤིང་ནགས་ཀྱི་ཚལ་ཆེན་པོར་བསམ་གྱིས་མི་ཁྱབ་པའི་ཏིང་ངེ་འཛིན་རྒྱལ་མཚོ་ལ་སྙོམས་པར་ཞུགས་སོ༔ དེའི་ཚེ་དེའི་དུས་ན༔ ལན་གཅིག་སྟོན་ཟླ་ར་བའི་ཚེས་བཅུ་ལ་ཡེ་ཤེས་དང་༔ ལས་དང་༔ འཇིག་རྟེན་གྱི་མཁའ་འགྲོ་མ་སྤྲིན་བཞིན་དུ་གཏིབས་ནས་ཚོགས་ཀྱི་འཁོར་ལོའི་འདུ་བ་རྒྱ་ཆེན་པོ་ལ་ལོངས་སྤྱོད་པའི་ཚེ༔ ཨོ་རྒྱན་གྱི་ཌཱ་ཀཱི་གཙོ་མོ་དཔལ་གྱི་བློ་གྲོས་མས་རྡོ་རྗེའི་བལྟ་བས་བལྟས་ཏེ༔ ཕྱག་རྣལ་འབྱོར་གྱི་ལུགས་སུ་འཚལ་ནས་འདི་སྐད་ཅེས་གསོལ་ཏོ༔ ཨེ་མ་ཨེ་མ༔ མ་འོངས་པའི་ཚེ་ན་སྙིང་ཏིག་སྙིང་པོའི་རྣལ་འབྱོར་པ་རྣམས་ཀྱི་ཉམས་ལེན་གྱི་མཐར་ཐུག་གང་ལ་བགྱི༔ ཕྲིན་ལས་ཀྱི་གཞུང་གང་ལྟར་བསྲང་༔ སྙིང་པོའི་མཐར་ཐུག་གང་དུ་ལ་བཟླ་ཞེས་གསོལ་བ་ན༔ ཤྲཱི་ཧེ་རུ་ཀཱ་སེཾ་ཧེ་ཤྭ་ར་དར་ཅིག་དབྱིངས་ཀ་དག་ཟང་ཐལ་གྱི་ཏིང་ངེ་འཛིན་ལ་སྙོམས་པར་ཞུགས་པས་སྐུ་མི་སྣང་བ་འོད་ཀྱི་རང་བཞིན་ཏུ་གྱུར་ཏོ༔ དེའི་ཚེ་མཁའ་འགྲོ་མ་རྣམས་ཀྱིས་མགྲིན་གཅིག་ཏུ་གདུང་བའི་དབྱངས་ཀྱིས༔ ཀྱེ་མ་ཀྱི་ཧུད་ཀྱེ་མ་ཀློང་༔ སྟོན་པ་སྒྲོན་མེའི་འོད་ནུབ་ན༔ འཇིག་རྟེན་མུན་པ་གང་གིས་སེལ༔ ཡེ་ཤེས་སྐུ་ཡི་ཉི་མ་ཡིས༔ མ་རིག་འཐིབ་པོ་བསལ་དུ་གསོལ༔ རྡོ་རྗེའི་གསུང་གི་བདུད་རྩི་ཡིས༔ འཁོར་བའི་ཚ་གདུང་བསིལ་བར་མཛོད༔ ཅེས་གསོལ་བ་བཏབ་པས་ལྷུན་གྲུབ་རིག་རྩལ་གྱི་ཏིང་ངེ་འཛིན་ལ་འཕོས་པའི་དེ་མ་ཐག་པར་ཡེ་ཤེས་ཀྱི་སྐུ་མངོན་སུམ་དུ་སྣང་བར་མཛད་ནས་ཆོས་ཉིད་རྡོ་རྗེའི་རང་སྒྲ་འདི་སྐད་ཅེས་བཀའ་རྩལ་ཏོ༔ ཨེ་མ་ཨེ་མ༔ མ་འོངས་པ་ཕྱི་མ་ཕྱི་མའི་དུས་ཀྱི་ཚེ་སྙིང་ཏིག་སྙིང་པོའི་དོན་ལ་སྤྱོད་པའི་རྣལ་འབྱོར་པ་རྣམས་ཀྱིས་ཚེ་འདི་ཁོ་ན་ལ་གྲོལ་བར་འདོད་ན་ལྕེ་བཙུན་སེཾ་ཧེ་ཤྭ་ར་བདག་ཉིད་བསྒོམ་པར་བྱའོ། །ཞེས་པས་བསྟན། གཉིས་པ་ཕྱིས་འབྱུང་གི་ལོ་རྒྱུས། འདི་ནི་མ་འོངས་སྙིགས་མ་ལྔ་སོགས་ནས། ཕན་པར་འགྱུར་རོ༔ ཞེས་པས་བསྟན། གཉིས་པ་དབང་གི་སྒོ་ནས་སྨིན་པར་བྱེད་པ་ནི་དབང་གདམས་ངག་གི་ལུགས་སུ་གདབ་པ་ཡིན་ནོ། །གསུམ་པ་གདམས་ངག་གི་སྒོ་ནས་གྲོལ་བར་བྱེད་པ་ལ་གསུམ། སྔོན་འགྲོས་རྒྱུད་སྦྱོང་བ་དང༌། དངོས་གཞི་ཉམས་སུ་ལེན་པ། རྗེས་ཀྱི་མཐར་དབྱུང་ངོ༌། །དང་པོ་ལ་གཉིས། ཐུན་གྱི་སྔོན་འགྲོ་དང༌། ཁྲིད་ཀྱི་སྔོན་འགྲོའོ། །དང་པོ་ལ་གསུམ། ལུས་རྣལ་དུ་དབབ་པ། ངག་རྣལ་དུ་དབབ་པ། ཡིད་རྣལ་དུ་དབབ་པའོ། །དང་པོ་ལུས་རྣལ་དབབ་རྣམ་སྣང་ཆོས་བདུན་དུ་བཅའ་བའོ། གཉིས་པ་ངག་རྣལ་དབབ་རླུང་རོ་དགུ་སྤྲུགས་བྱའོ། །གསུམ་པ་ཡིད་རྣལ་དབབ་ངེས་འབྱུང་རྣམ་དག་དང༌། དད་པ་རྣམ་དག་དང༌། བྱང་ཆུབ་ཀྱི་སེམས་སོགས་སྒོ་དུ་མ་ནས་ཡིད་ལ་བྱེད་པ་སྔོན་དུ་འགྲོ་བའི་སྒོ་ནས། རང་གི་མདུན་གྱི་ནམ་མཁར་སེང་གེ་ཆེན་པོ་བརྒྱད་ཀྱིས་བཏེགས་པའི་ཁྲི་སྟེང་དུ་སྣ་ཚོགས་པདྨ་ཉི་མ་ཟླ་བའི་གདན་ལ་བི་མ་མི་ཏྲའམ། ལྕེ་བཙུན་ཆེན་པོ་དང༌། ཡང་ན་རང་གི་རྩ་བའི་བླ་མ་རྣམས་སྐྱབས་གནས་ཐམས་ཅད་འདུས་པའི་ངོ་བོ་ཡིན་པར་ཐག་བཅད། ངེས་ཤེས་བསྐྱེད། མོས་གུས་ཀྱིས་གསོལ་བ་དྲག་ཏུ་གདབ། ངག་ཏུ། དུས་གསུམ་གྱི་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེ་མཁྱེན། བདག་གི་རྒྱུད་སྨིན་ཅིང་གྲོལ་བར་བྱིན་གྱིས་བརླབས་ཏུ་གསོལ། ཟབ་ལམ་གྱི་རྟོགས་པ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཚེ་འདི་ཉིད་ལ་འོད་གསལ་རྫོགས་པ་ཆེན་པོའི་ལམ་མཆོག་མཐར་ཕྱིན་པར་བྱིན་གྱིས་བརླབ་ཏུ་གསོལ། ཅེས་གསོལ་བ་དྲག་ཏུ་བཏབ་པས། བླ་མ་ཉིད་དགྱེས་པ་ཆེན་པོས་འོད་དུ་ཞུ་ནས། བླ་མའི་རྡོ་རྗེ་གསུམ་དང་རང་གི་ལུས་ངག་ཡིད་གསུམ་དབྱེར་མེད་དུ་འདྲེས། ཐུགས་ཡིད་བསྲེ་ཞིང་དུས་གསུམ་གྱི་སྤྲོས་པ་ཐམས་ཅད་བཅད་ལ་རིག་སྟོང་རྗེན་པའི་ངང་བསྐྱང་བར་བྱའོ། །གཉིས་པ་ཁྲིད་ཀྱི་སྔོན་འགྲོ་ལ་གཉིས། ཐུན་མོང་གི་སྔོན་འགྲོ་དང༌། ཁྱད་པར་གྱི་སྔོན་འགྲོའོ། །དང་པོ་ལ་སེམས་སྦྱོང་རྣམ་པ་བདུན་ལས། དང་པོ་ནི་འདུས་བྱས་ཐམས་ཅད་མི་རྟག་པར་བསམ་པ་ལ། དང་པོ་ཕྱི་སྣོད་བཅུད་ཀྱི་ཆགས་འཇིག་ལ་བསམ་སྟེ་མི་རྟག་པར་བསྒོམ་པ་དང༌། ནང་རང་གི་སྒྱུ་ལུས་ཕུང་པོ་ལ་བསམ་སྟེ་མི་རྟག་པར་བསྒོམ་པ་དང༌། གསང་བ་རང་གི་གཉེན་གྲོགས་སོགས་ཀྱི་འཆི་རྐྱེན་ལ་བསམ་སྟེ་མི་རྟག་པར་བསྒོམ་པས་དོན་དྲན་པ་དང༌། དཔེར་ན་ཆུའི་ལྦུ་བ་ལྟར་བསམ་ནས་བསྒོམ་པས་དཔེ་དྲན་པ་དང༌། མཐར་དཔེ་དོན་བསྲེས་ཏེ་བསྒོམ་པའོ། །གཉིས་པ་འཁོར་བའི་བདེ་བ་ཐམས་ཅད་ཡུན་དུ་མི་གནས་པར་བསམ་ནས་སེམས་སྦྱོང་བ་ལ། ཁམས་གསུམ་པོ་སྡུག་བསྔལ་གསུམ་ལས་མ་འདས་པར་བསམ་ནས་དོན་དྲན། དཔེར་ན་དུག་གི་འབྲས་བུ་སྨིན་པ་ནི་བལྟ་ན་མཛེས་ཤིང་ཡིད་དུ་འོང་བ་ཟོས་ན་རོ་མངར་བ་སོགས་ཡོད་ཀྱང་ཁོག་ཏུ་སོང་ན་འཆི་བ་ལྟར་བསམ་ནས་དཔེ་དྲན། མཐར་དཔེ་དོན་ཡང་བསྲེས་ཏེ་བསྒོམ་པའོ། །གསུམ་པ་རྐྱེན་སྣ་ཚོགས་ལ་བསམ་ནས་སེམས་སྦྱོང་བ་ལ། ཚེ་འདིའི་བྱ་བའི་བདེ་བ་དང་སྡུག་བསྔལ་དགྲ་འདུལ་གཉེན་སྐྱོང༌། ཚོང་སོ་ནམ་དང་འཇིག་རྟེན་ཆོས་བརྒྱད་སོགས་བྱ་བ་ཐམས་ཅད་ཟིན་དུས་མེད་པ་ལ་བསམ་ནས་ཚེ་འདིའི་བྱ་བ་ཐམས་ཅད་བློས་ཐོང་བ་ཞིག་བསྒོམ་པས་དོན་དྲན། དཔེར་ན་སོས་ཀའི་དུས་སུ་རི་དྭགས་ཀྱིས་སྨིག་རྒྱུའི་ཆུ་ལ་བསྙེག་པ་ལྟར་བསམ་ནས་དཔེ་དྲན། ཡང་དཔེ་དོན་བསྲེས་ཏེ་བསྒོམ་པའོ། །བཞི་པ་ཚེ་འདིའི་བྱ་བ་ཐམས་ཅད་དོན་མེད་པར་བསམ་ནས་སེམས་སྦྱོང་བ་ལ། ཚེ་འདིའི་བྱ་བའི་བདེ་སྐྱིད་དཔལ་འབྱོར་སྙན་གྲགས་ཐམས་ཅད་དོན་མེད་པ་ཁོ་ན་དང༌། དེར་མ་ཟད་ཚངས་དབང་བརྒྱ་བྱིན་འཁོར་ལོས་བསྒྱུར་བ་སོགས་ཀྱི་དཔལ་འབྱོར་ཐོབ་ཀྱང་དོན་མེད་སྙམ་ནས་དོན་དྲན། དཔེར་ན་གཉིད་ཐུན་གཅིག་གི་སྐབས་སུ་བདེ་སྡུག་ཇི་ལྟར་མྱོང་ཡང་སད་པ་ན་ཐམས་ཅད་དོན་ཅིའང་མེད་པ་ལྟར་བསམ་ནས་དཔེ་དྲན། མཐར་དཔེ་དོན་བསྲེས་ཏེ་བསྒོམ་པའོ། །ལྔ་པ་ཐར་པ་དམ་པའི་འབྲས་བུ་ནི་ནམ་ཡང་ལྡོག་ཏུ་མེད་པར་བསམ་ནས་སེམས་སྦྱོང་བ་ལ། ཐར་པ་ལའང་གསུམ། ཐར་པ་ཆུང་ངུ་ཉན་ཐོས། འབྲིང་རང་རྒྱལ། ཁྱད་པར་དུའང་ཐར་པ་དམ་པ་རྫོགས་པའི་སངས་རྒྱས་ཀྱི་གོ་འཕང་ཐོབ་ན་སྡིག་སྒྲིབ་བག་ཆགས་དང་བཅས་པ་སྤངས་པས་རང་དོན་དུ་སྤང་རྟོག་མཐར་ཕྱིན་ནས་ཞི་བ་དམ་པ་ཆོས་ཀྱི་སྐུ་བརྙེས་པ་དང༌། གཞན་དོན་དུ་གཟུགས་སྐུ་རྣམ་པ་གཉིས་ལ་བརྟེན་ནས་གདུལ་བྱའི་དོན་རྟག་ཁྱབ་ལྷུན་གྲུབ་ཏུ་བྱེད་ལ་དེའི་སྤང་རྟོགས་ལ་ནམ་ཡང་ལྡོག་ཏུ་མེད་པས་ན་འབྲས་བུ་དེ་འདྲ་ཞིག་ནམ་ཐོབ་བསམ་ནས་དོན་དྲན། དཔེར་ན་འབྲུམ་ནད་ལས་ཐར་པའི་སྐྱེས་བུ་སླར་ཡང་འབྲུམ་ནད་ཀྱིས་མི་མནར་བ་ལྟར་བསམ་ནས་དཔེ་དྲན། དཔེ་དོན་བསྲེས་ཏེ་བསྒོམ་པའོ། །དྲུག་པ་བླ་མ་དམ་པའི་གདམས་ངག་ལ་བསམ་ནས་སེམས་སྦྱོང་བ་ལ། དེ་ལྟ་བུའི་ཐར་པ་ཐོབ་པའི་རྒྱུ་མེད་དུ་མི་རུང་བ་ནི་བླ་མའི་གདམ་ངག་ཡིན་ཏེ། དེ་ལ་དང་པོ་བླ་མ་བརྟག་པ་ལ་མཁས་པ། གཞན་གྱི་ཚིག་གི་རྗེས་སུ་མི་འབྲང་ཞིང་བླ་མ་རྟོགས་པ་དང་ལྡན་པ། ཉམས་མྱོང་དང་ལྡན་པ། བརྒྱུད་པ་གསུམ་གྱི་བྱིན་བརླབ་དང་ལྡན་པའི་མཚན་ཉིད་དང་ལྡན་པའི་བླ་མ་ལ་བསྟེན་པ། བར་དུ་བླ་མ་བསྟེན་པ་ལ་མཁས་པ་རབ་སྒྲུབ་པས་མཉེས་པ། འབྲིང་ཞབས་ཏོག་གིས་མཉེས་པ། ཐ་མ་ཟང་ཟིང་གིས་མཉེས་པར་བྱས། མི་མཉེས་པ་སྐད་ཅིག་ཙམ་ཡང་མི་སྒྲུབ། ཐ་མ་དགོངས་སྤྱོད་བསླབ་པ་ལ་མཁས་པ་བླ་མ་བྱིན་རླབས་དང་ལྡན་པ་ལས་གདམ་ངག་གི་བདུད་རྩི་ཐོབ་པར་བྱས། ཐོབ་པ་བཞིན་ཉམས་མྱོང་མཐར་དབྱུང་བའི་སྒོ་ནས་བླ་མའི་སྤང་རྟོགས་ཀྱི་ཡོན་ཏན་ཐམས་ཅད་རང་རྒྱུད་ལ་པར་བཏབ་པ་བཞིན་འབྱུང་ཞིང༌། རང་རྒྱུད་ཀྱི་ཡོན་ཏན་ཐམས་ཅད་དབྱར་གྱི་མྱུ་གུ་ལྟར་འཕེལ་ཞིང་བླ་མའི་གདུང་འཚོབ་པར་བྱ་བསམ་ནས་དོན་དྲན། དཔེར་ན་ཁང་བཟང་དུ་འཛེགས་པའི་ཐེམ་སྐས་ལྟར་བསམ་ནས་དཔེ་དྲན། ཡང་དཔེ་དོན་བསྲེས་ཏེ་བསྒོམ་པའོ། །བདུན་པ་རྣམ་པར་མི་རྟོག་པའི་ཏིང་ངེ་འཛིན་ལ་བརྟེན་ནས་སེམས་སྦྱོང་བ་ལ་གསུམ་ལས། བདེ་སྟོང་རྣམ་པར་མི་རྟོག་པ་དང༌། གསལ་སྟོང་རྣམ་པར་མི་རྟོག་པ་དང༌། ཆོས་ཉིད་རྣམ་པར་མི་རྟོག་པའོ། །དང་པོ་ནི། ལུས་ཕྱི་གསལ་ནང་གསལ་འོད་ཀྱི་རང་བཞིན་ཅན་བསྒོམ་ཞིང་ལུས་སེམས་བདེ་ཧྲིལ་གྱིས་སོང་བར་མོས་པ་ནི་བདེ་བས་ཐབས་བྱས་པའི་རྩེ་གཅིག་པའི་ཏིང་ངེ་འཛིན་ཡིན་ནོ། །གཉིས་པ་གསལ་སྟོང་རྣམ་པར་མི་རྟོག་པ་ནི། རང་གི་ལུས་ཀྱི་སྐྱིལ་ཀྲུང་བདེ་ལུགས་སུ་གཞག །ལག་པ་གཉིས་ཀྱིས་པུས་མོ་བཀབ། མིག་ཧ་རེ་བར་སྣང་ལ་བལྟ། ཕྱི་རོལ་གྱི་ཚོགས་དྲུག་གི་སྣང་བ་མི་དགག །ནང་གི་སེམས་དེར་འཛིན་དང་བྲལ་བའི་ངང་དུ་རྣམ་རྟོག་ཐམས་ཅད་ཐོལ་སྐྱེས་རྦད་ཆོད་ཀྱི་ཚུལ་དུ་མི་རྟོག་པའི་ངང་དུ་གཞག་པ་ནི་གསལ་བས་ཐབས་བྱས་པའི་རྩེ་གཅིག་པའི་ཏིང་འཛིན་ཡིན་ནོ། །གསུམ་པ་ཆོས་ཉིད་རྣམ་པར་མི་རྟོག་པ་ནི། སེམས་ཀྱི་ཆོས་ཉིད་གནས་ལུགས་མ་བཅོས་པ་དུས་གསུམ་གྱི་རྟོག་པ་དང་བྲལ་བའི་ངང་དུ་གཞག་པ་ནི་རྩེ་གཅིག་པའི་ཏིང་ངེ་འཛིན་ཡིན་ནོ། །ལས་སུ་རུང་བ་ལ་སྐྱེད་རྫོགས་ཀྱི་ཉམས་ལེན་གང་བྱེད་ཀྱང་དཀའ་ཚེགས་མེད་པར་འགྲུབ་པ་ཡིན་པས་དེ་ལྟར་བསྒོམ་པ་ནི་དོན་དྲན་པ། དཔེར་ན་ཞིང་ས་དུལ་བ་ལ་ས་བོན་བཏབ་ན་དཀའ་ཚེགས་མེད་པར་འབྲས་བུ་འབྱུང་བ་བཞིན་བསམ་པ་ནི་དཔེ་དྲན་པ། མཐར་དཔེ་དོན་བསྲེས་ཏེ་བསྒོམ་པར་བྱའོ། །དེ་ཡན་ཆད་ཐུན་མོང་གི་སྔོན་འགྲོའོ། །གཉིས་པ་ཁྱད་པར་གྱི་སྔོན་འགྲོ་གསག་སྦྱོང་རྣམ་པ་ལྔ་ལས། ཐར་པའི་ལམ་གྱི་རྩ་བ་སྐྱབས་འགྲོ །ཐམས་ཅད་མཁྱེན་པའི་རྩ་བ་བྱང་ཆུབ་ཀྱི་སེམས་སྐྱེད་པ། འགལ་རྐྱེན་སྡིག་སྒྲིབ་སྦྱོང་བར་བྱེད་པ་ནང་གི་རྡོ་རྗེ་སེམས་དཔའི་བསྒོམ་བཟླས། མཐུན་རྐྱེན་ཚོགས་རྫོགས་པར་བྱེད་པ་ནང་གི་མཎྜལ། བྱིན་རླབས་མྱུར་དུ་འཇུག་པར་བྱེད་པ་བླ་མའི་རྣལ་འབྱོར་རོ། །དང་པོ་ནི། ཨ༔ ཀ་དག་གཏིང་གསལ་ཆོས་ཀྱི་སྐུ༔ ལྷུན་གྲུབ་རིག་རྩལ་ལོངས་སྤྱོད་རྫོགས༔ དབྱེར་མེད་ཐུགས་རྗེ་སྤྲུལ་པའི་སྐུར༔ རང་ངོ་ཤེས་པས་སྐྱབས་སུ་མཆི༔ ཞེས་པས་བསྟན་ཏེ། དེ་ལའང་ཀུན་རྫོབ་བརྡར་བཏགས་པའི་སྐྱབས་འགྲོ་དང༌། དོན་དམ་ཡོངས་ཤེས་ཀྱི་སྐྱབས་འགྲོ་གཉིས་ཀྱི་དམིགས་རིམ་ནི་ཐིག་ལེ་གསང་རྫོགས་སུ་གསལ། གཉིས་པ་སེམས་སྐྱེད་ལའང་ཀུན་རྫོབ་དང་དོན་དམ་གཉིས་ལས། དང་པོ་གཞུང་སྤྱི་ལྟར་རོ། །གཉིས་པ་དོན་དམ་ནི། ཧོ༔ གློ་བུར་འཁྲུལ་པའི་འགྲོ་བ་ཀུན༔ གདོད་ནས་རྣམ་དག་དབྱིངས་ཀྱི་ངང་༔ ཡེ་ཤེས་རིག་པས་རང་གྲོལ་ཕྱིར༔ ཅོག་བཞག་ཆེན་པོར་སེམས་བསྐྱེད་དོ༔ ཞེས་པས་བསྟན་པ་ཐིག་ལེ་གསང་རྫོགས་སུ་གསལ། གསུམ་པ་འགལ་རྐྱེན་སྒྲིབ་སྦྱོང་རྡོར་སེམས་སྒོམ་བཟླས་ནི། ཨ༔ བདག་ཉིད་ཐ་མལ་ལུས་ཀྱི་དབུས། རྩ་གསུམ་འཁོར་ལོ་བཞི་དང་བཅས། དྭངས་གསལ་འོད་ཀྱི་རང་བཞིན་གྱི། མར་སྣེ་ལྟེ་འོག་སོར་བཞིའི་སྦུབས། བླ་མ་དཔལ་ལྡན་རྡོ་རྗེ་སེམས། །དམར་གསལ་ཞལ་གཅིག་ཕྱག་གཉིས་པ། །རྡོ་རྗེ་དྲིལ་འཛིན་ལོངས་སྐུའི་ཆས། །རང་འོད་རིག་མའི་བདེ་བས་དགྱེས། །རྡོ་རྗེ་པདྨའི་སྐྱིལ་ཀྲུང་གིས། །པདྨ་ཟླ་བའི་གདན་གྱི་སྟེང༌། །དྭངས་མ་འོད་ལྔའི་ཀློང་ན་བཞུགས། །བླ་མ་རྡོ་རྗེ་སེམས་དཔའ་ལ། །མི་ཕྱེད་གུས་པས་གསོལ་བ་འདེབས། །བདག་གི་སྡིག་སྒྲིབ་ཉེས་ལྟུང་ཀུན། །བྱང་ཞིང་དག་པར་བྱིན་གྱིས་རློབས། །རྩེ་གཅིག་གསོལ་བ་བཏབ་པ་ལས། །ཡེ་ཤེས་མེ་འབར་རྩ་འཁོར་ཁྱབ། །སྒོ་གསུམ་ཆ་མཉམ་སྡིག་སྒྲིབ་ཀུན། །བསྲེགས་སྦྱངས་རང་ལུས་འོད་ཀྱི་སྐུ། །རྡོ་རྗེ་སེམས་དཔའི་གསང་གསུམ་དང༌། །དབྱེར་མེད་མ་བཅོས་ལྷུག་པར་ཤར། །ཞེས་པས་བསྟན་ཏེ། དེའང་རང་ཉིད་གཉུག་མའི་ལྷར་གསལ་བའི་ལུས་སྟོང་ཆེན་སྒྲིབ་གཡོགས་དང་བྲལ་བའི་དབུས་སུ་རྩ་དབུ་མ་ཕྱི་དཀར་ལ་ནང་དམར་བ་སྦོམ་ཕྲ་སྲིན་མཛུབ་གྱི་ཚད་ཙམ་ཡར་སྣེ་སྤྱི་བོར་ཕུག་རྡུག་གི་རྣམ་པ། མར་སྣེ་ལྟེ་འོག་སོར་བཞིའི་ཐད་དུ་ཁ་དོང་ངེ་བའི་རྣམ་པ། གཡས་སུ་རོ་མ་དམར་མོ་རྡུལ་གྱིས་གང་བ། གཡོན་དུ་རྐྱང་མ་དཀར་མོ་ཁུ་བས་གང་བ། གཉིས་ཀ་གཤེར་བག་གི་རང་བཞིན་ཅན། དབུ་མ་ལས་སུམ་འགྱུར་ཙམ་གྱིས་ཕྲ་བ། ཡར་སྣེ་དབུ་མ་ལས་སོར་གཅིག་ཙམ་དམའ་ཞིང་སྣ་བུག་གཡས་གཡོན་དུ་ཟུག་པ། མར་སྣེ་ལྟེ་འོག་ཏུ་ཡི་གེ་ཆའི་འཕོངས་ལྟ་བུའི་ཚུལ་གྱིས་དབུ་མར་ཆུད་པ། དེ་ནས་སྨིན་མཚམས་ནས་སོར་བཞི་འཇལ་བ་དཔྲལ་བ། དེ་ནས་ཡང་སོར་བཞི་འཇལ་བ་མཚོགས་མ། ཡང་སོར་དོ་འཇལ་བའི་མཚམས་སུ་སྤྱི་བོ་བདེ་ཆེན་གྱི་འཁོར་ལོ་རྩ་འདབ་སོ་གཉིས་གདུགས་ཀྱི་རྩེ་མོ་ལྟར་ཁ་ཐུར་བསྟན་གྱི་རྣམ་པ་དང༌། མགྲིན་པ་ཨན་སྟོང་གི་ཐད་དུ་རྩ་འདབ་བཅུ་དྲུག་གདུགས་གན་རྐྱལ་དུ་ལོག་པ་ལྟར་ཁ་གྱེན་བསྟན་ཅན། སྙིང་དཀར་ནག་གི་ཐད་དུ་རྩ་འདབ་བརྒྱད་དང༌། ལྟེ་བའི་བུག་པའི་ཐད་རྩ་འདབ་དྲུག་ཅུ་རེ་བཞི་པོ་དེ་གཉིས་སྔར་ལྟར་གདུགས་ཁ་སྦྱོར་ལྟར་དང༌། རྩ་འཁོར་བཞི་པོ་གནས་ཚུལ་བཞི་ལས་བརྒྱད་སོགས་དང༌། ཡང་ན་རྩ་འཁོར་ལས་རྩ་འདབ་རེ་རེ་བཞིན་གདུགས་ཀྱི་རྩིབས་མ་ལྟར་བསྒོམ་ན་གེགས་ཆུང༌། རྩ་འདབ་ཐམས་ཅད་སྟོང་སིང་ངེ་བ་འོད་ཀྱི་རང་བཞིན་ཅན་གསལ་བཏབ། ལྟེ་བའི་རྩ་འཁོར་གྱི་འོག་ཏུ་དབུ་མའི་ནང་དུ་པདྨ་ཉི་ཟླའི་གདན་ལ་ངོ་བོ་རྩ་བའི་བླ་མ་ལ་རྣམ་པ་བཅོམ་ལྡན་འདས་དཔལ་རྡོ་རྗེ་སེམས་དཔའ། རྣམ་འགྱུར་གསུང་པདྨའི་རིགས་སྐུ་མདོག་དམར་པོ་རྡོ་རྗེ་དང་དྲིལ་བུ་འཛིན་པས་ཡུམ་དང་མཉམ་པར་སྦྱོར་བ། རྒྱུ་གཏུམ་མོའི་གཞི་གནས་ལས་བྱུང་བ་གསལ་གདབ་པ་ནི་རྟེན་གྱི་སྟོབས། རྡོར་སེམས་ལ་མོས་གུས་གདུང་ཤུགས་དྲགས་པོས་གསོལ་བ་གདབ། སྔར་བྱས་པའི་སྡིག་པ་ལ་ཁོང་དུ་དུག་སོང་བ་ལྟར་འགྱོད་སེམས་དྲགས་པོ་བྱས་པ་ནི་རྣམ་པ་སུན་འབྱིན་པའི་སྟོབས། ཕྱིན་ཆད་སྲོག་ལ་བབ་ཀྱང་མི་བྱེད་སྙམ་པ་ནི་ཉེས་པ་ལས་སླར་ལྡོག་པའི་སྟོབས། གསོལ་འདེབས་ཡི་གེ་བརྒྱ་པས་ཐུགས་རྒྱུད་བསྐུལ། རླུང་རོ་བསལ། འོག་རླུང་བསྐུམ། སྟེང་རླུང་མནན་པའི་རྐྱེན་གྱིས་ལྟེ་བའི་རྡོར་སེམས་ལས་ཡེ་ཤེས་ཀྱི་མེ་ལྕེ་དམར་ཧུར་གྱིས་འབར། དེ་ཡར་སོང་ལྟེ་བའི་རྩ་འཁོར་རིམ་གྱིས་གང༌། འཁྲིག་པའི་གནས་སྐབས་ཀྱི་སྙོམས་འཇུག་གི་སྒྲིབ་པ་དང༌། ཉོན་མོངས་པ་འདོད་ཆགས་ཀྱི་སྒྲིབ་པ་བསྲེགས་ཤིང་སྦྱངས། སྙིང་གའི་རྩ་འཁོར་གང༌། གཉིད་འཐུག་གི་སྒྲིབ་པ་དང་གཏི་མུག་གི་སྒྲིབ་པ་བསྲེགས་ཤིང་སྦྱངས། མགྲིན་པའི་རྩ་འཁོར་གང༌། རྨི་ལམ་དང་ཕྲག་དོག་གི་སྒྲིབ་པ་བསྲེགས་ཤིང་སྦྱངས། སྤྱི་བོའི་རྩ་འཁོར་གང༌། སད་པའི་སྒྲིབ་པ་དང་ཞེ་སྡང་དང་ང་རྒྱལ་གྱི་སྒྲིབ་པ་བསྲེགས་ཤིང་སྦྱངས། དེའི་མཉམ་དུ་སེམས་ཅན་ཐམས་ཅད་ཀྱི་སྡིག་ལྟུང་དག་པར་མོས་ལ། མཐར་བཤགས་སྡོམ་བྱ་བ་ནི། རུ་ཏྲའི་སྨྲེ་བཤགས་སམ། ཡང་ན་བདེ་མཆོག་མངོན་འབྱུང་གྱི་རྒྱུད་ལས་བྱུང་བའི། མགོན་པོ་བདག་ནི་སོགས། བསྡུ་ན་འཕགས་པ་རིན་པོ་ཆེའི་གསུང༌། སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་ཆག་ཐམས་ཅད་མཐོལ་ལོ་བཤགས་སོ། །སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ། ཞེས་སོགས་བརྗོད་ལ། བླ་མ་རྡོ་རྗེ་སེམས་དཔས་སྡིག་ལྟུང་དག་པའི་གནང་བ་བྱིན་པར་མོས་པ་རྣམས་གཉེན་པོ་ཀུན་སྤྱོད་ཀྱི་སྟོབས་ཡིན་ནོ། །མཐར་རྡོ་རྗེ་སེམས་དཔའི་གསང་བ་གསུམ་དང་རང་གི་ལུས་ངག་ཡིད་གསུམ་དབྱེར་མེད་དུ་གྱུར་པར་མོས་པའི་ངང་དུ་མཉམ་པར་གཞག །ནང་གི་ཚོགས་བསག་བྱ་ན་བསྡུ་མི་དགོས་སོ། །བཞི་པ་མཐུན་རྐྱེན་ཚོགས་གསག་ནང་གི་མཎྜལ་ནི། མཐར་ནི་ཡེ་ཤེས་མེ་ལྕེ་ཡིས། །སྤྱི་བོའི་ཧྃ་ལས་བདུད་རྩི་དྲངས། །འཁོར་ལོའི་གནས་བཞིར་སོན་པ་ལས། །བླ་མ་སྐུ་བཞིའི་དཀྱིལ་འཁོར་པ། །དགའ་མཆོག་ཁྱད་པར་ལྷན་སྐྱེས་ཀྱི། །ཡེ་ཤེས་ཆེན་པོས་རབ་མཉེས་ནས། །བདེ་ཆེན་འབྲས་བུའི་ཚོགས་ཆེན་རྫོགས། །རྡོ་རྗེ་བཞི་དང་དབྱེར་མེད་གྱུར། །སྔར་ལྟར་གསལ་བའི་སྤྱི་བོའི་རྩ་འཁོར་གྱི་སྟེང་ཙམ་དུ་ཁམས་ཉིས་དྭངས་སུམ་དྭངས་ཀྱི་དྭངས་མ་ཧཾ་མགོ་ཐུར་བསྟན་གྱི་རྣམ་པ་གསལ་གདབ། སྒྲུབ་པའི་མཎྜལ། སྤྱི་བོའི་རྩ་འཁོར་གྱི་དབུས་སུ་བླ་མ་སྐུ་རྡོ་རྗེའི་ངོ་བོ་སྐུ་མདོག་དཀར་པོ། མགྲིན་པར་བླ་མ་གསུང་རྡོ་རྗེ་སྐུ་མདོག་དམར་པོ། སྙིང་གར་བླ་མ་ཐུགས་རྡོ་རྗེ་སྐུ་མདོག་མཐིང་ག །ལྟེ་བར་བླ་མ་ཡེ་ཤེས་རྡོ་རྗེ་སྐུ་མདོག་སེར་པོ། བཞི་ཀའང་ཞལ་གཅིག་ཕྱག་གཉིས་པ་རྡོ་རྗེ་དང་དྲིལ་བུ་འཛིན་པ་ཡུམ་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བ། བདེ་ཆེན་ལྷན་ཅིག་སྐྱེས་པའི་ཡེ་ཤེས་མངོན་དུ་བྱེད་པའི་ཐབས་སྤྱི་མགྲིན་སྙིང་ག་ལྟེ་བ་རྣམས་སུ་རྩ་འདབ་ཀྱི་གྲངས་དང་མཉམ་པའི་འཁོར་ལོ་སོ་སོའི་གཙོ་བོ་དང་ཁ་དོག་མཐུན་པའི་མཁའ་འགྲོ་མ་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བ། མཆོད་པའི་མཎྜལ། བླ་མ་རྡོ་རྗེ་སེམས་དཔའ་ལ་མོས་གུས་བསྐྱེད་ཅིང༌། སྔར་ལྟར་རླུང་སྦྱོར་གྱི་གཏུམ་མོའི་མེ་དང་དབྱེར་མེད་པའི་རྡོ་རྗེ་སེམས་དཔའ་ལས་ཡེ་ཤེས་ཀྱི་མེ་ལྕེ་དམར་ཧུར་གྱིས་འབར། ལྟེ་བ་སྙིང་ག་མགྲིན་པའི་རྩ་འཁོར་རྣམས་ཁྱབ། དེ་ནས་སྤྱི་བོའི་སྟེང་གི་ཧཾ་ཡིག་ལ་ཕོག་པ་ཙམ་གྱིས་ནཱ་དའི་རྩེ་མོ་ནས་བྱང་སེམས་དྭངས་མའི་རྒྱུན་ཝ་ཐིགས་འཛག་པ་ལྟ་བུ་བབ། ཐིགས་པ་བསགས་པས་རྒྱ་མཚོ་བཞིན་དུ་རྩ་འཁོར་གང༌། བླ་མ་སྐུ་རྡོ་རྗེ་འཁོར་དང་བཅས་པ་ལ་ཕོག་པས་དགའ་བའི་མཆོད་པས་མཉེས། རགས་པ་ལུས་དང་ཕྲ་བ་རྩའི་སྒྲིབ་པ་དག །ལུས་དང་རྩ་ལ་བརྟེན་ནས་ཚོགས་རྫོགས། མཐར་ཐུག་འབྲས་བུ་སྣང་སྟོང་སྐུ་རྡོ་རྗེ་དང་དབྱེར་མེད་དུ་གྱུར་པར་མོས། དེ་ནས་རིམ་གྱིས་མགྲིན་པའི་རྩ་འཁོར་གང༌། བླ་མ་གསུང་རྡོ་རྗེ་དང་བཅས་པ་ལ་ཕོག་པ་ཙམ་གྱིས་མཆོག་དགའི་མཆོད་པས་མཉེས། རགས་པ་ངག་དང་ཕྲ་བ་རླུང་གི་སྒྲིབ་པ་དག །ངག་དང་རླུང་ལ་བརྟེན་ནས་ཚོགས་རྫོགས། མཐར་ཐུག་འབྲས་བུ་གྲགས་སྟོང་གསུང་རྡོ་རྗེ་དབྱེར་མེད་དུ་གྱུར་པར་མོས། སྙིང་གའི་རྩ་འཁོར་གང༌། བླ་མ་ཐུགས་རྡོ་རྗེ་འཁོར་དང་བཅས་པ་ལ་ཕོག་པ་ཙམ་གྱིས་དགའ་བྲལ་གྱི་དགའ་བས་མཉེས། རགས་པ་ཡིད་དང་ཕྲ་བ་ཐིག་ལེའི་སྒྲིབ་པ་དག །ཡིད་དང་ཐིག་ལེ་ལ་བརྟེན་ནས་ཚོགས་རྫོགས། མཐར་ཐུག་འབྲས་བུ་རིག་སྟོང་ཐུགས་རྡོ་རྗེ་དང་དབྱེར་མེད་དུ་གྱུར་པར་མོས། ལྟེ་བའི་རྩ་འཁོར་གང༌། བླ་མ་ཡེ་ཤེས་རྡོ་རྗེ་འཁོར་དང་བཅས་པ་ལ་ཕོག་པ་ཙམ་གྱིས་ལྷན་སྐྱེས་ཀྱི་དགའ་བས་མཉེས། སྒོ་གསུམ་ཆ་མཉམ་དང་འཕོ་བའི་སྒྲིབ་པ་དག །སྒོ་གསུམ་ཆ་མཉམ་ལ་བརྟེན་ནས་ཚོགས་རྫོགས། མཐར་ཐུག་འབྲས་བུ་ཡེ་ཤེས་རྡོ་རྗེ་དང་དབྱེར་མེད་དུ་གྱུར་པར་མོས། ཡུལ་ཅན་དགའ་བ་བཞིས་དྲངས་པའི་ཡུལ་སྟོང་པ་ཉིད་མཐར་ཐུག་པའི་བདེ་ཆེན་ལྷན་ཅིག་སྐྱེས་པའི་ཡེ་ཤེས་མངོན་དུ་གྱུར་པ་ཡིན་ནོ་སྙམ་དུ་ང་རྒྱལ་གཟུང་ཞིང༌། མ་ཧཱ་སུ་ཁ་བཛྲ་སཏྭ་ཨ་ཧཾ༔ ཞེས་ཅི་རིགས་བརྗོད། མ་ཧཱ་ཆེན་པོ་དང༌། སུ་ཁ་བདེ་བ། བཛྲ་རྡོ་རྗེ། ས་ཏྭ་སེམས་དཔའ། ཨ་ཧྃ་ངའོ། །ཞེས་བདེ་བ་ཆེན་པོའི་རྡོ་རྗེ་སེམས་དཔའ་ངའོ་ཞེས་པའི་དོན་ནོ། །མཐར་མི་དམིགས་པའི་ངང་དུ་གཞག་པར་བྱའོ། །ལྔ་པ་བླ་མའི་རྣལ་འབྱོར་ནི། རང་ཉིད་སྒྱུ་ལུས་བླ་མ་དང་དབྱེར་མེད་པའི་ལྷར་གསལ་བ་དང༌། མདུན་དུ་ཚོགས་ཞིང་གི་རྟེན་གསལ་གདབ་པ། ཚོགས་གསག་པའི་སླད་དུ་ཡན་ལག་བདུན་པ་འབུལ་བ་དང༌། བྱིན་རླབས་མྱུར་དུ་འཇུག་པར་བྱེད་པའི་ཕྱིར་གསོལ་བ་གདབ་པ། མཇུག་དབང་བཞི་བླང་ཞིང་དེ་ཁོ་ན་ཉིད་ལ་མཉམ་པར་འཇོག་པ་དང་ལྔའོ། །དང་པོ་ནི། ཀ་དག་གི་ངང་ལས་སེང་གེ་དང་པདྨ་ཉི་མའི་ཁྲིའི་སྟེང་དུ་རང་ཉིད་གཉུག་མའི་ལྷ་དང་བླ་མ་དབྱེར་མེད་པའི་ངོ་བོ་སིང་ཧེ་ཤྭ་ར་རྣལ་འབྱོར་སྤྱོད་པ་ཁྲོ་འཛུམ་སྒེག་པའི་ཉམས་ཅན་ཁ་དོག་དམར་སྨུག་མཉམ་གཞག་དང་སྐྱིལ་ཀྲུང་ཅན། དར་དང་རིན་པོ་ཆེ་དང་རུས་པའི་རྒྱན་གྱིས་བརྒྱན་པ། སྐུ་ལུས་ཀྱི་ཆ་ཐམས་ཅད་རྒྱལ་བ་རབ་འབྱམས་ཏིལ་གོང་ཁ་ཕྱེས་པ་ལྟ་བུས་གང་བ། བ་སྤུའི་ཁུང་བུ་ཐམས་ཅད་ནས་རྡོ་རྗེ་ཡེ་ཤེས་ཀྱི་མེ་ཁྲོ་ཆུང་གི་ཚོགས་དང་བཅས་པ་འཕྲོ་བས་བདུད་དང་བར་དུ་གཅོད་པ་ཐམས་ཅད་སྲེག་པར་མཛད་པ། འཁོར་དུ་བརྒྱུད་གསུམ་གྱི་བླ་མ་དང་དཔའ་བོ་དང་མཁའ་འགྲོའི་ཚོགས་ཀྱིས་བསྐོར་བ། སྨིན་མཚམས་སུ་ཆོས་འབྱུང་དཀར་པོ་རྩ་བ་ཕྲ་བ་དབུ་མ་ལ་ཟུག་ཅིང༌། ཁ་གདེངས་གཡེལ་བའི་ཟུར་གཅིག་གྱེན་ལ་བསྟན་པའི་ནང་དུ་བདེ་ཆེན་ཐིག་ལེ་དགའ་བ་འཁྱིལ་བ་དཀར་པོ་འོད་འབར་བ་གཡོན་སྐོར་དུ་དྲག་ཏུ་འཁོར་བ་ཞེས། རང་གི་སེམས་ཉིད་གདོད་མ་ནས་རྣམ་པར་དག་པ་ཀ་དག་གི་ངང་ལས་སྣང་བ་ཐམས་ཅད་འོད་གསལ་གྱི་དབྱིངས་སུ་ཐིམ་པས་སྐད་ཅིག་གིས་རང་ཉིད་གང་དུ་གནས་པའི་གོ་སར་སེང་གེ་པདྨ་ཉི་མ་དང་ཟླ་བའི་གདན་གྱི་སྟེང་དུ། རང་ཉིད་གཉུག་མའི་ལྷ་དང་བླ་མ་དབྱེར་མེད་པའི་ངོ་བོ་སིང་ཧེ་ཤྭ་ར་རྣལ་འབྱོར་སྤྱོད་པའི་བརྟུལ་ཞུགས་ཅན་སྤྱན་ཧུར་བག་ཏུ་གཟིགས་ཤིང་ཚེམས་ཀྱི་མྱུ་གུ་ཅུང་ཟད་གཙིགས་པ་ཁྲོ་བའི་ཉམས་ཅན། ཞལ་གྱི་མཆུ་སྒྲོས་འཛུམ་པའི་ཉམས་ཅན། སྐུ་ཤ་ཤིན་ཏུ་རྒྱས་པའི་ཉམས་ཀྱིས་སྒེག་པ། ཞལ་གཅིག་ཕྱག་གཉིས་མཉམ་གཞག །ཞབས་གཉིས་རྡོ་རྗེའི་སྐྱིལ་ཀྲུང་ཅན། དར་སྔོན་པོའི་སྟོད་གཡོགས། རིན་པོ་ཆེ་དང་རུས་པའི་རྒྱན། སྤྱི་བོར་རུས་པའི་འཁོར་ལོ་དང་༡། སྙན་ཆ་༢། ཕྱག་ཞབས་ཀྱི་གདུ་བུ་༣སྐ་རགས་༤། མགུལ་རྒྱན་༥དོ་ཤལ་དང་༦སེ་མོ་དོ་དང་༧། སྐུ་སྟོད་ལ་རུས་པའི་སེ་རལ་ཁ་ཐོག་པས་བརྒྱན་པ་༨། སྐུ་ལུས་ཐམས་ཅད་ལ་རྩ་གསུམ་རྒྱལ་བ་རབ་འབྱམས་ཏིལ་གོང་ཁ་བྱེ་བ་ལྟ་བུས་གང་བ། ཞིང་ཁམས་ཐམས་ཅད་སྐུ་ལ་རྫོགས་པ། སྐུ་དང་ཞིང་ཁམས་ཐམས་ཅད་སྤྲོ་དང་བསྡུ་བའི་བདག་ཉིད་དུ་གྱུར་པ། སྐུས་ཞིང་ཁམས་ཐམས་ཅད་ལ་ཁྱབ་པ། བ་སྤུའི་ཁུང་བུ་ཐམས་ཅད་ནས་རྡོ་རྗེ་དང་ཡེ་ཤེས་ཀྱི་མེ་ཁྲོ་ཆུང་གི་ཚོགས་དང་བཅས་པ་འཕྲོ་བས་བདུད་དང་བར་དུ་གཅོད་པ་ཐམས་ཅད་སྲེག་པར་མཛད་པ། མཐའ་བསྐོར་ཀུན་དུ་རྒྱལ་བ་དགོངས་པའི་བརྒྱུད་པ། རིག་འཛིན་བརྡའི་བརྒྱུད་པ། གང་ཟག་སྙན་ཁུང་གི་བརྒྱུད་པའི་དཔལ་མགོན་བླ་མ་དམ་པ་རྣམས་དང༌། གནས་གསུམ་གྱི་དཔའ་བོ་མཁའ་འགྲོའི་ཚོགས་དང༌། རྡོ་རྗེའི་ཆོས་སྐྱོང་བའི་སྲུང་མའི་ཚོགས་ཀྱིས་བསྐོར་བར་མོས། རང་གི་སྨིན་མཚམས་སུ་ཆོས་འབྱུང་དཀར་པོ་རྩ་བ་ཕྲ་བ་ཕར་ཐད་ཀར་དབུ་མ་ལ་ཟུག་པ། ཁ་གདེང་གཡེལ་བའི་ཟུར་གཅིག་གྱེན་དུ་དཔྲལ་བར་བསྟན་པ། ཟུར་གཉིས་གཡས་གཡོན་དུ་བསྟན་པའི་དབུས་སུ་བདེ་ཆེན་ཐིག་ལེའི་གཡུང་དྲུང་དགའ་བ་འཁྱིལ་བ་དགའ་བཞི་མཚོན་བྱེད་ཁུག་པ་བཞི་དང་ལྡན་པ། ཁ་དོག་དམར་པོ་འོད་འབར་བ་གཡོན་དུ་དྲག་ཏུ་འཁོར་བར་བསྒོམ་མོ། །གཉིས་པ་མདུན་དུ་ཚོགས་རྟེན་གསལ་གདབ་པ་ནི། སྨིན་མཚམས་ཀྱྀ་ཐད་ཕར་ཁྲུ་གང་དང་ཡར་ཁྲུ་གང་མཚམས་སུ་སྣ་ཚོགས་པདྨ་དང་ཉི་ཟླའི་གདན་གྱི་སྟེང་དུ་སྐྱབས་གནས་ཐམས་ཅད་འདུས་པའི་ངོ་བོ་རྩ་བའི་བླ་མ་ལ། རྣམ་པ་འོད་གསལ་སྣང་བཞི་མཐར་སོན་པར་མཛད་པའི་བི་མ་ལ་མི་ཏྲ་སྐུ་མདོག་དཀར་གསལ་གངས་ཀྱི་རི་ལ་ཉི་མ་འཆར་བ་ལྟ་བུ། ཤངས་རྩེར་སྐྱེ་མེད་མཚོན་བྱེད་ཡི་གེ་ཨ་དཀར་པོ་ཐིགས་ལ་ཁད་པས་མཚན་པ། ཕྱག་གཉིས་མཉམ་གཞག་གིས་ཐོད་པ་བཅུད་ཀྱིས་བཀང་བ་ཐུགས་ཀར་བསྣམས་པ། དར་སྔོན་པོའི་སྟོད་གཡོགས་དང༌། སྐུ་སྨད་ལ་ཐང་ཤམས་དང༌། ཆོས་གོས་རྣམ་གསུམ་གསོལ་བ། ཞབས་གཉིས་སྐྱིལ་མོ་ཀྲུང་གིས་རང་ལ་དགྱེས་ཡེ་རེ་བཞུགས་པ། རིག་པ་ཚད་ཕེབས་ཀྱི་སྣང་བ་ལྟར་སྣང་སྲིད་ཐམས་ཅད་འཇའ་ཟེར་ཐིག་ལེ་མེར་མེར་ཤིག་ཤིག་གཡོ་བར་བསམ་པ་ནི་བདག་མདུན་གྱི་དམ་ཚིག་པ་གསལ་གདབ་པ་དང༌། ཡེ་ཤེས་པ་སྤྱན་དྲང་བ་ནི། བདག་མདུན་གྱི་ཐུགས་ཀ་ནས་འོད་ཟེར་མུ་མཐའ་མེད་པ་འཕྲོས། འོག་མིན་གྱི་ཞིང་ནས་རྩ་གསུམ་རྒྱལ་བ་རབ་འབྱམས་ཐམས་ཅད་ལྕེ་བཙུན་སིང་ཧ་ཤྭ་ར་དང་བི་མ་མི་ཏྲའི་རྣམ་པར་བྱོན་པ་དང༌། ཁྱད་པར་འོད་གསལ་སྙིང་ཐིག་གི་བརྒྱུད་གསུམ་དཔལ་མགོན་བླ་མ་དམ་པ་སོགས་སྤྱན་དྲངས་ཏེ་བདག་མདུན་རྣམས་ལ་ཐིམ་པར་མོས་ལ་ཀུན་བཟང་དོན་ཕྲིན་ལྟར་སྤྱན་འདྲེན་གྱི་ཚིག་བརྗོད་པར་བྱའོ། །གསུམ་པ་ཚོགས་གསག་སླད་ཡན་ལག་བདུན་འབུལ་བ་ནི། ཀུན་རྫོབ་བརྡར་བཏགས་པ་དང༌། དོན་དམ་ཡོངས་ཤེས་གཉིས་ལས། དང་པོ་རང་གི་ལུས་རྡུལ་སྙེད་ཀྱི་ཞིང་ལྟར་སྤྲུལ་ནས་སེམས་ཅན་ཐམས་ཅད་དང་བྱ་བྱེད་འཇུག་པ་གཅིག་པའི་སྒོ་ནས་ཕྱག་འཚལ་བ་དང༌། རང་གི་ལུས་ལོངས་སྤྱོད་དགེ་ཚོགས་རྒྱ་མཚོ་ལྟ་བུའི་རྒྱུ་ལས་བྱུང་བའི་ཕྱི་ཉེར་སྤྱོད། ནང་དམ་རྫས་བདུད་རྩི། གསང་བ་སྙོམས་འཇུག་གི་བདེ་བ། ཡང་གསང་དེ་ཁོ་ན་ཉིད་སོགས་མཆོད་པའི་སྤྲིན་ཕུང་མཐའ་ཡས་པ་འབུལ་བ་དང༌། དྲན་པ་དང་མི་དྲན་པའི་སྡིག་ལྟུང་སྙིང་ཐག་པ་ནས་བཤགས་པ་དང༌། འཁོར་འདས་ལམ་གསུམ་གྱི་ཟག་བཅས་དང་ཟག་མེད་ཀྱི་དགེ་ཚོགས་ལ་ཕྲག་དོག་མེད་པའི་སྒོ་ནས་རྗེས་སུ་ཡི་རང་བ་དང༌། ཕྱོགས་བཅུ་དུས་བཞིའི་རྒྱལ་བ་སྲས་དང་བཅས་པ་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་བསྐུལ་བའི་གསོལ་བ་གདབ་པ་དང༌། དེ་དག་ཐམས་ཅད་འཆི་མེད་རྟག་པ་དམ་པར་བཞུགས་ཤིང་མྱ་ངན་ལས་མི་འདའ་བར་གསོལ་བ་གདབ་པ་དང༌། དུས་གསུམ་དུ་བསགས་ཤིང་བསྒྲུབས་པའི་དགེ་བའི་རྩ་བ་ཆོས་ཀྱི་དབྱིངས་ལ་མི་བསྔོ་བའི་བསྔོ་བ་དམ་པའི་ཚུལ་གྱིས་བསྔོ་བའོ། །གཉིས་པ་དོན་དམ་ནི། ཨ༔ སྣང་བཞི་མཐར་ཕྱིན་བླ་མ་ལ༔ འདུ་འབྲལ་མེད་པར་ཕྱག་འཚལ་ལོ༔ རླུང་སེམས་དག་པའི་མཆོད་སྤྲིན་འབུལ༔ སྡིག་ལྟུང་འདུས་མ་བྱས་པར་བཤགས༔ གཉིས་འཛིན་བྲལ་བས་རྗེས་ཡི་རང་༔ བརྗོད་མེད་ཆོས་འཁོར་བསྐོར་བཞིན་དུ༔ ཡོངས་གྲུབ་ཆེན་པོར་བཞུགས་གསོལ་འདེབས༔ དགེ་ཚོགས་འོད་གསལ་དབྱིངས་སུ་བསྔོ༔ ཞེས་སྣང་བཞི་མཐར་ཕྱིན་པའི་བླ་མ་སངས་རྒྱས་དང༌། རང་གི་རིག་པ་ངོ་བོ་སྟོང་པ་ཆོས་སྐུ་དང༌། རང་བཞིན་གསལ་བ་ལོངས་སྐུ་དང༌། ཐུགས་རྗེ་འགག་མེད་རྩལ་སྣ་ཚོགས་སུ་འཆར་བ་སྤྲུལ་སྐུ་དང༌། སྐུ་གསུམ་དབྱེར་མེད་པའི་ངང་ནས་ཕྱག་འཚལ་བ་དང༌། རླུང་འཇུག་གནས་ལྡང་གསུམ་དབུ་མར་ཞུགས་ཤིང་དག་པའི་སྒོ་ནས་མཆོད་པའི་སྤྲིན་ཕུང་འབུལ་བ་དང༌། སྡིག་ལྟུང་ཐམས་ཅད་ཡེ་ནས་རང་བཞིན་གྱིས་སྟོང་པ་འདུས་མ་བྱས་པའི་ངང་དུ་བཤགས་པ་དང༌། འཁོར་འདས་ལམ་གསུམ་གྱི་དགེ་བ་ལ་རྗེས་སུ་ཡི་རང་བྱ་བ་དང་བྱེད་པ་ཐམས་ཅད་གཉིས་འཛིན་བྲལ་བའི་ཚུལ་གྱིས་རྗེས་སུ་ཡི་རང་བ་དང༌། སྤྲོས་བྲལ་མཉམ་པ་ཆེན་པོ་མི་ཤིགས་ནཱ་དའི་དབྱངས་སུ་ཆོས་འཁོར་བསྐོར་བར་གསོལ་བ་གདབ་པ་དང༌། རྒྱལ་བ་སྲས་བཅས་འཆི་མེད་རྟག་པ་དམ་པའི་ཡོངས་གྲུབ་ཆེན་པོར་བཞུགས་སུ་གསོལ་བ་འདེབས་པ་དང༌། དགེ་ཚོགས་ཐམས་ཅད་འོད་གསལ་ཆོས་ཀྱི་དབྱིངས་སུ་མི་བསྔོ་བའི་ཚུལ་གྱིས་བསྔོ་བ་དམ་པས་བསྔོ་བའོ། །བཞི་པ་བྱིན་རླབས་མྱུར་དུ་འཇུག་ཕྱིར་གསོལ་བ་གདབ་པ་ནི། ཡོན་ཏན་རྗེས་སུ་དྲན་པའི་སྒོ་ནས་གསོལ་བ་གདབ་པ་དང༌། འདོད་པའི་དོན་ལ་གསོལ་བ་གདབ་པ་དང་གཉིས་ལས། དང་པོ་ནི། འོད་གསལ་སྣང་བཞི་མཐར་ཕྱིན་ནས༔ རིག་པ་མི་འགྱུར་སྐུ་ལྔར་བཞེངས༔ འཇའ་ལུས་ཕོ་ཆེན་དྭངས་མའི་གཟུགས༔ འཆི་མེད་བི་མ་མི་ཏྲ་ཀྱེ༔ ཞེས་པས་བསྟན། གཉིས་པ་འདོད་དོན་གསོལ་གདབ་ནི། བདག་ལ་ཐུགས་རྗེས་བརྩེར་དགོངས་ནས༔ མངོན་སུམ་བྱིན་རླབས་དེང་རྩོལ་ཅིག །ཅེས་ཀྱིས་བསྟན། ཞེས་དེ་ལྟར་གསོལ་བ་ཕུར་ཚུགས་སུ་གདབ་ཅིང་འདོད་དོན་གསོལ་བ་སྟེ། འོད་གསལ་སྣང་བཞི་མཐར་ཕྱིན་ཅིང་སངས་རྒྱས་ཐམས་ཅད་དང་དབྱེར་མེད་པའི་བདག་ཉིད་བི་མ་མི་ཏྲ་ཁྱེད་ཀྱི་སྒོ་གསུམ་བདག་གི་ལུས་ངག་ཡིད་གསུམ་དང་དབྱེར་མེད་དུ་དུས་ཕྱི་དུས་ལ་མི་ལྟོས་པར་ད་ལྟ་ཉིད་དུ་འདུག་ས་འདི་ཉིད་དུ་སྟན་ཐོག་འདི་ཉིད་དུ་མྱུར་བ་ཉིད་དུ་བྱིན་གྱིས་བརླབ་པར་མཛོད་ཅིག་ཅེས་གསོལ་བ་གདབ། ཡོན་ཏན་གྱི་ངོས་ནས་སངས་རྒྱས་ཐམས་ཅད་དང་མཉམ་ཞིང༌། བཀའ་དྲིན་གྱི་ངོས་ནས་སངས་རྒྱས་ཐམས་ཅད་ལས་ལྷག་པར་ཐག་བཅད། ངེས་ཤེས་སྐྱེད། ལུས་ཀྱི་བ་སྤུ་ལྡང་བ། མིག་ནས་མཆི་མ་འཁྲུགས་པ། བསམ་རྒྱུ་བླ་མ་ལས་མེད་པ། བློ་སྣ་བླ་མས་འཕྲོག་པ། ཕར་ཐིམ་ཕོད་པ། ཚུར་འབྲལ་མི་ཕོད་པའི་མོས་གུས་ཀྱིས་དུས་འདི་ནས་གཟུང་སྟེ་བྱང་ཆུབ་སྙིང་པོའི་བར་དུ་མཐོར་གཏོང་དམར་གཏོང་སྐྱིད་སྡུག་ལེགས་ཉེས་ཅི་བྱུང་ཡང་ཅི་མཛད་ཁྱེད་མཁྱེན་ནོ་སྙམ་པའི་མོས་གུས་གདུང་ཤུགས་དྲགས་པོའི་སྒོ་ནས་གསོལ་བ་ཡང་ཡང་གདབ། གསོལ་འདེབས་བསྙེན་པའི་ཚུལ་དུ་བཟླ་བ་ནི། ཨོཾ་ཨཱཿཧཱུྃ་གུ་རུ་བི་མ་ལ་མི་ཏྲ་ཧཱུྃ་ཧཱུྃ༔ ཞེས། ཨོཾ་ཨཱཿཧཱུྃ་ནི་སྐུ་གསུམ་གྱི་རང་བཞིན་དང༌། ཡང་ན་རྡོ་རྗེ་གསུམ་གྱི་ས་བོན་གྱིས་ཐོག་དྲངས། གུ་རུ་བླ་མ་དང༌། བི་མ་ལ་དྲི་མེད། མི་ཏྲ་བཤེས་གཉེན། ཧཱུྃ་ཧཱུྃ༔ ཞེས་ཐུགས་རྒྱུད་བསྐུལ་བའི་དོན་ཡིན་ཏེ་མཆོག་ཐུན་མོང་གཉིས་ཀྱི་དངོས་གྲུབ་སྩོལ་ཅིག །ཅེས་པའི་སྒོ་ནས་གསོལ་བ་གདབ་པའོ། །ལྔ་པ་དབང་བཞི་ལེན་ཞིང་དེ་ཁོ་ན་ཉིད་ལ་མཉམ་པར་འཇོག་པ་དང་རྗེས་འབྲེལ་བླ་རྣལ་ལམ་དུ་བྱ་བ་བཅས་ནི། གསོལ་བ་བཏབ་པའི་མཐར་བདག་ལ་དབང་བཞི་བསྐུར་བའི་གནང་བ་བསྩལ་དུ་གསོལ་ཞེས་བསམས་པས། སྨིན་མཚམས་ཀྱི་དཔྲལ་བའི་ཨོཾ་ལས་འོད་ཟེར་དཀར་པོ་ཟླ་བ་ལྟ་བུ་དང༌། དེ་ལས་རང་འདྲའི་སྐུ་ཆུང་ལ་ཡན་ལག་དོད་པ་ཕྱག་མཚན་གསལ་བ་དཔག་ཏུ་མེད་པ་བྱུང༌། རང་གི་དཔྲལ་བར་ཐིམ། ལུས་དང་རྩའི་སྒྲིབ་པ་དག །སྤྲོས་བཅས་བུམ་པའི་དབང་ཐོབ། སྣང་སྲིད་གཞིར་བཞེངས་ཀྱི་དཀྱིལ་འཁོར་བསྒོམ་པ་ལ་དབང༌། ས་བརྒྱད་པ་ནོན། འབྲས་བུ་སྐུ་ལྔ་ཐོབ་པའི་སྐལ་བ་ཅན་དུ་བྱས། བླ་མའི་མགྲིན་པའི་ཨཱཿལས་འོད་ཟེར་དམར་པོ་འཆར་ཁའི་ཟེར་ཐག་ལྟ་བུ་དང༌། དེ་ལས་ཨཱ་ལི་ཀཱ་ལིའི་ཕྲེང་བ་དཔག་ཏུ་མེད་པ་བྱུང༌། རང་གི་མགྲིན་པར་ཐིམ། ངག་དང་རླུང་གི་སྒྲིབ་པ་དག །སྤྲོས་མེད་གསང་བའི་དབང་ཐོབ། སྐྱེ་མེད་རང་བྱུང་རྡོ་རྗེའི་བཟླས་པ་ལ་དབང༌། ས་བཅུ་གཅིག་པ་ནོན། འབྲས་བུ་གསུང་ལྔ་ཐོབ་པའི་སྐལ་བ་ཅན་དུ་བྱས། བླ་མའི་ཐུགས་ཀའི་ཧཱུྃ་ལས་འོད་ཟེར་སྔོན་པོ་མཐིང་ཞུན་གྱི་དྭངས་མ་ལྟ་བུ་དང༌། དེ་ལས་ཨ་ཡིག་མཐིང་གསལ་དཔག་ཏུ་མེད་པ་བྱུང༌། རང་གི་སྙིང་གར་ཐིམ། ཡིད་དང་ཐྀག་ལེའི་སྒྲིབ་པ་དག །ཤིན་ཏུ་སྤྲོས་མེད་ཤེར་དབང་ཐོབ། བདེ་ཆེན་འོད་གསལ་གྱི་ཡེ་ཤེས་བསྒོམ་པ་ལ་དབང༌། ས་བཅུ་གསུམ་པ་ནོན། འབྲས་བུ་ཐུགས་ལྔ་ཐོབ་པའི་སྐལ་བ་ཅན་དུ་བྱས། ཡང་བླ་མའི་གནས་གསུམ་ཀ་ནས་འོད་ཟེར་དཀར་དམར་མཐིང་གསུམ་འཇའ་ཚོན་ཤར་བ་ལྟ་བུ་དང༌། ཙིཏྟ་རིན་པོ་ཆེའི་སྦུབས་ནས་འོད་ལྔའི་གོང་བུ་ཚོན་གང་བ་བྱུང༌། རང་གི་གནས་གསུམ་དང་སྙིང་གི་དབུས་སུ་ཐིམ། ཆ་མཉམ་ཡེ་ཤེས་ཀྱི་སྒྲིབ་པ་དག །རབ་ཏུ་སྤྲོས་མེད་དབང་བཞི་པ་ཐོབ། ཀ་དག་ལྷུན་གྲུབ་ཟུང་འཇུག་བསྒོམ་པ་ལ་དབང༌། ཡེ་ཤེས་བླ་མའི་ས་ནོན། འབྲས་བུ་ཡོན་ཏན་ལྔ་དང་ཕྲིན་ལས་ལྔ་ཐོབ་པའི་སྐལ་བ་ཅན་དུ་བྱས། མཐར་བླ་མ་ཉིད་དགྱེས་པ་ཆེན་པོས་འོད་དུ་ཞུ་སྟེ་རང་གི་སྨིན་མཚམས་སུ་དགའ་བ་འཁྱིལ་བའི་དབུས་སུ་ཐིམ་པས། ཐིག་ལེ་དཀར་པོ་ཨ་ཡིག་གིས་མཚན་པ་སྲན་མ་ཙམ་དྭངས་གསལ་གཡོ་མེད་དུ་གྱུར་པ་ལ་སེམས་རྩེ་གཅིག་ཏུ་གཟུང་བ་ནི་སྔགས་ཀྱི་ཞི་གནས་འགྲུབ་ཐབས་ཡིན་ཞིང༌། མཐར་དེ་ཡང་ནམ་མཁའ་ལ་འཇའ་ཡལ་བ་བཞིན་དུ་མི་དམིགས་པའི་ངང་དུ་བཞག་ཅིང༌། བླ་མའི་ཐུགས་དང་རང་གི་རིག་པ་གཉིས་བསམ་བརྗོད་དང་བྲལ་བའི་རིག་སྟོང་རྗེན་པའི་ངང་དུ་གཞག་པ་ནི་བླ་མ་ཆོས་སྐུའི་རང་ཞལ་བལྟ་བ་ཡིན་ནོ། །སྤྱིར་བླ་མ་ཕྱི་སྤྲུལ་སྐུ་ལ་བསྙེན་པ་མདུན་གྱི་ནམ་མཁའ་ལ་ཚོགས་རྟེན་གསལ་ཞིང་གསག་སྦྱང་བྱ་བ་དང༌། ནང་ལོངས་སྐུ་བསྒྲུབ་པ་དབང་བཞི་བླང་བ། གསང་བ་ཆོས་སྐུ་ལས་ལ་སྦྱར་བ་ཐུགས་ཡིད་དབྱེར་མེད་བསྲེ་བའི་ངང་དུ་གཞག་པར་བྱ་བ་ཡིན་ནོ། །དགེ་བ་བསྔོ་ཞིང་སྨོན་ལམ་གདབ་པར་བྱའོ། །སྐབས་འདིར་བྱིན་རླབས་བླ་མའི་རྣལ་འབྱོར་ལམ་དུ་བྱ་བ་ལ་གསུམ། སྐུ་སྐྱེད་རིམ་ཕྱག་རྒྱའི་རྣལ་འབྱོར། གསུང་བཟླས་པ་སྔགས་ཀྱི་རྣལ་འབྱོར། ཐུགས་འོད་གསལ་དེ་ཁོ་ན་ཉིད་ཀྱི་རྣལ་འབྱོར་རོ། །དང་པོ་ནི། ཚོགས་སོགས་དང་འབྲེལ་ན་སྨན་རཀ་གཏོར་མ་སྤྱི་འགྲོས་ལྟར་བཤམས། དེ་ནས་དོན་གྱི་ཕྲིན་ལས་ལ་འཇུག་པ། རང་ཉིད་རྟ་མཆོག་རོལ་པའི་ང་རྒྱལ་གྱིས་བགེགས་བསྐྲད། སྲུང་འཁོར་བསྒོམ། བྱིན་དབབ། མཆོད་པ་བྱིན་བརླབས། བདག་སྐྱེད་སྔར་ལྟར་བསྒོམས་ཤིང་སྤྱན་འདྲེན་བཞུགས་གསོལ་སོགས་དང༌། ཕྱག་མཆོད་བསྟོད་པའི་བར་དུ་གྲུབ་རྗེས། རང་ཉིད་ལྕེ་བཙུན་ཆེན་པོར་གསལ་བའི་ལྷར་སྣང་ལ་སེམས་རྩེ་གཅིག་ཏུ་གཟུང༌། དེ་ཡང་རྣམ་པ་གསལ་བ། ང་རྒྱལ་བརྟན་པ། རྣམ་དག་དྲན་པ་སོགས་སྤྱི་ལྟར་བྱ། དེ་ལྟར་ལྷའི་གསལ་སྣང་ལ་བརྟན་པ་ཐོབ་ཚེ་གསུང་བཟླས་པ་སྔགས་ལ་འཇུག་པར་བྱའོ། །གཉིས་པ་གསུང་བཟླས་པ་སྔགས་ཀྱི་རྣལ་འབྱོར་ལ་གཉིས། བདག་དོན་བྱིན་རླབས་བསྡུ་བའི་རིམ་པ་དང༌། གཞན་དོན་ཕྲིན་ལས་མཁའ་ཁྱབ་ཏུ་སྤེལ་བའི་རིམ་པ་གཉིས་སོ། །དང་པོ་ནི། སྔགས་དོན་དྲན་པ་སོགས་ཀྱི་སྒོ་ནས་རླུང་འབྱུང་གནས་ལྡང་གསུམ་དང་སྦྱར་ཞིང་གསོལ་འདེབས་བསྙེན་པའི་ཚུལ་དུ་བཟླས་པས་ཐུགས་རྒྱུད་བསྐུལ་ཞིང༌། བུམ་ཅན་རྡོར་བཟླས་སྦྲགས་ཏེ་ཡིད་བཟླས་བྱ་ཞིང་སེམས་འཛིན། སྐྱོ་ན་སྨིན་མཚམས་ཀྱི་ཐིག་ལེ་ལས་འོད་ཟེར་འཕྲོས། དག་པའི་ཞིང་རབ་འབྱམས་ཐམས་ཅད་ལ་ཁྱབ། དེ་དག་ན་གནས་པའི་སྐྱབས་གནས་དཀོན་མཆོག་རྒྱ་མཚོ་ཐམས་ཅད་དང༌། ཁྱད་པར་འོད་གསལ་སྙིང་ཐིག་གི་བརྒྱུད་པའི་བླ་མ་རྣམས་ཀྱི་གསང་བ་གསུམ་གྱི་བྱིན་རླབས་ཐམས་ཅད་སྐུ་དང་ཡིག་འབྲུ་ཕྱག་མཚན་གྱི་རྣམ་པ་ཆར་དྲག་ཏུ་བབས་པ་ཙམ་དུ་སྤྱན་དྲངས་ནས་ཐིག་ལེར་ཐིམ་པས་ལུས་ཐམས་ཅད་ལ་ཁྱབ་པར་བསམ་པའོ། །གཉིས་པ་གཞན་དོན་ཕྲིན་ལས་མཁའ་ཁྱབ་ཏུ་སྤེལ་བའི་རིམ་པ་ནི། ཡང་མར་འཕྲོས་མ་དག་པའི་ཞིང་རབ་འབྱམས་ཐམས་ཅད་ལ་ཁྱབ། བརྟན་གཡོ་སྣོད་བཅུད་ཐམས་ཅད་དག་པའི་ཞིང་རབ་འབྱམས་སུ་བསྒྱུར་བར་བསམ་ཞིང༌། གོང་དུ་སྔོན་འགྲོའི་སྐྱབས་སེམས་ཡིག་བརྒྱ་རྣམས་འབུམ་ཐེར་དང༌། བླ་མའི་རྣལ་འབྱོར་གྱི་བསྙེན་པ་འབུམ་ཕྲག་བཅུ་གཉིས་བརྗོད་པར་བྱ། ཐུན་མཐར་མཆོད་བསྟོད་ཅི་རིགས་བྱའོ། །གསུམ་པ་ཐུགས་འོད་གསལ་དེ་ཁོ་ན་ཉིད་ཀྱི་རྣལ་འབྱོར་ནི། དེ་ནས་སྣོད་བཅུད་ཐམས་ཅད་རིལ་གྱིས་བསྡུས་ཏེ་རང་གི་ལུས་ལ་གཞུག༔ དེ་ཡང་བསྡུས་ཏེ་སྨིན་མཚམས་ཀྱི་ཐིག་ལེ་ལ་ཐིམ་པས་ཤིན་ཏུ་འོད་གསལ་བར་བསམས་ལ་སེམས་ཡུན་རིང་དུ་འཇོག་པས་རྣམ་རྟོག་གི་རྦ་རླབས་ཞི་བའི་ཏིང་ངེ་འཛིན་མུ་མཐའ་མེད་པར་སྐྱེའོ༔ ཞེས་ཐིག་ལེ་ལ་སེམས་འཛིན་པ་ནི་རྟེན་བཅས་ཡིན་ཞིང༌། མཐར་དེ་ཡང་འཇའ་ཚོན་མཁའ་ལ་ཡལ་བ་ལྟར་དམིགས་སུ་མེད་པའི་ངང་དུ་མཉམ་པར་འཇོག་གོ༔ ཞེས་གསར་དུ་གཤེགས་པའི་སྟོང་ཉིད་དང༌། གདོད་ནས་རང་བབས་ཀྱི་སྟོང་ཉིད་གཉིས་དབྱེར་མེད་པའི་ངང་ལ་མཉམ་པར་འཇོག་པ་ནི་ཐུགས་འོད་གསལ་དེ་ཁོ་ན་ཉིད་ཀྱི་རྣལ་འབྱོར་ཡིན་ནོ། །གཉིས་པ་དངོས་གཞིའི་ཁྲིད་ལ་གསུམ། དབང་པོ་རབ་ཚེ་འདིར་གྲོལ་བ། འབྲིང་བར་དོར་གྲོལ་བ། ཐ་མ་རང་བཞིན་སྤྲུལ་སྐུའི་ཞིང་དུ་དབུགས་དབྱུང་བའོ། །དང་པོ་ལ་གསུམ། སྔོན་འགྲོ་འཁྲུལ་གཞི་རྩད་ནས་གཅོད་པའི་གནད༔ དངོས་གཞི་འཁྲུལ་པ་རང་སར་གྲོལ་བའི་གནད༔ རྗེས་འཁྲུལ་སྣང་ཡེ་ཤེས་སུ་རང་ཤར་བའི་གནད་དོ༔ དང་པོ་ལ་བཞི། ལུས་སྦྱོང༌། ངག་སྦྱོང༌། སེམས་སྦྱོང༌། དེ་ཐམས་ཅད་ལ་རྒྱས་འདེབས་པའི་གནད་དོ། །དང་པོ་ནི། ལུས་མི་འགྱུར་བ་རྡོ་རྗེའི་འདུག་སྟངས་ལ་གནས་པར་བྱའོ༔ ཞེས་འབོལ་གདན་ཆེན་པོའི་སྟེང་དུ་རང་གི་ལུས་གཅེར་བུར་ཕྱུང་ཞིང༌། སྨད་དཀྲིས་ཀྱི་རྣམ་པ་གྱོན་ཞིང་རྐང་པའི་མཐིལ་གཉིས་སྤྲད། སོར་རྩེ་གཉིས་ས་ལ་བཙུག །ལག་པ་གཉིས་ཐལ་མོ་སྦྱར་ཞིང་སྤྱི་བོར་མ་རེག་པར་བྱ། ལག་པ་གཉིས་དང་མགོ་རྣམས་རྡོ་རྗེའི་རྭ་ཡར་རྩེ་གསུམ་དང༌། རྐང་པ་གཉིས་དང་འཕོངས་རྣམས་མར་རྩེ་གསུམ། རྐེད་པ་རྡོ་རྗེའི་ལྟེ་བ་མཚོན་བྱེད་ཡིན་ཞིང༌། རང་ལུས་རྡོ་རྗེ་སྔོན་པོ་མེ་འབར་ཞིང་འོད་སྣ་ཚོགས་འཁྲིགས་པའི་རང་བཞིན་བསྒོམས་ལ། ལུས་ཚུགས་མི་ཐུབ་ན་གང་དུ་འགྱེལ་བའི་ས་ལ་རང་བཞག་ནས་རྣམ་པར་མི་རྟོག་པའི་ངང་དུ་གཞག་པར་བྱའོ། །གཉིས་པ་ངག་སྦྱོང་ནི། ངག་མི་སྨྲ་བར་ཧཱུྃ་གི་རང་སྒྲར་འཆར་བར་བྱའོ༔ ཞེས་རང་གི་ལུས་ཕྱི་གསལ་ནང་གསལ་འོད་ཀྱི་ཐིག་ལེ་ཅན་དུ་བསྒོམས་ལ། སྙིང་གའི་ཐད་དུ་ཧཱུྃ་སྔོན་པོ་མཁྱིད་གང་བ་ཙམ་དུ་གསལ་བཏབ་ལ། ཐ་མལ་གྱི་ངག་གི་སྨྲ་བརྗོད་རྦད་ཀྱིས་བཅད་ལ། ངག་ཏུ་ཧཱུྃ་ཧཱུྃ་ཞེས་ཆེ་ཆུང་སྤེལ་མའི་ཚུལ་གྱིས་དལ་བར་བརྗོད། སྙིང་གའི་ཧཱུྃ་ལས་ཧཱུྃ་གྲངས་མེད་པ་འཕྲོས། སྣ་བུག་གཡས་ནས་ཕྱིར་ཐོན་ནས་གནས་ཁང་ཡུལ་ཕྱོགས་སོགས་ཧཱུྃ་གིས་གང་བར་མོས། སླར་ཡང་ཧཱུྃ་དེ་རྣམས་སྣ་བུག་གཡོན་ནས་ཚུར་ལུས་ཀྱི་ནང་དུ་ཞུགས་ནས་ལུས་ཀྱི་ནང་ཐམས་ཅད་བང་བ་འབྲུས་ཁེངས་པ་བཞིན་གང་བར་མོས་པ་ནི་རྒྱས་གདབ་པའི་རིམ་པའོ། །ཡང་སྙིང་གའི་ཧཱུྃ་ལས་ངོ་བོ་ཚ་ཞིང་རྩུབ་པ། རང་བཞིན་མྱུར་བ། རྩེ་མོ་རྣོ་བ། ཤུགས་དྲག་ལྡན་པ་སྟེ་ཁྱད་ཆོས་བཞི་དང་ལྡན་པའི་རྣམ་པ་ཅན་མང་པོ་འཕྲོས། རང་གི་ཡུལ་དང་གནས་ཁང་སོགས་ཁྲལ་ཁྲོལ་གྱི་རྣམ་པར་བྱེད། དེ་ནས་སྟོང་གསུམ་འཇིག་རྟེན་ཚུན་ཆད་ཧཱུྃ་གིས་གང་ཞིང་ཁྲལ་ཁྲོལ་གྱི་རྣམ་པར་བྱས་པར་མོས་པ་ནི་རྩལ་སྦྱོང་བ་དང་གནས་ཡུལ་སོགས་ལ་བདེན་འཛིན་སྦྱོང་བ་ཡིན་ཞིང༌། ངག་སྦྱོང་དང་ངག་རུ་ཤན་དབྱེ་བ་གཉིས་སྟབས་གཅིག་ཏུ་བྱས་པ་ཡིན་ནོ། །གསུམ་པ་སེམས་སྦྱོང་ནི། ཡིད་མ་ཡེངས་པར་བྱུང་གནས་འགྲོ་གསུམ་གཏན་ལ་དབབ་པར་བྱའོ༔ ཞེས་ཐ་མལ་གྱི་ལུས་ངག་ཡིད་གསུམ་གྱི་བྱ་བྱེད་ཐམས་ཅད་ལ་རང་གིས། ལུས་ངག་ཡིད་གསུམ་གཙོ་གང་ཆེ་བརྟགས་པ་ན། ལུས་ནི་བེམ་པོ་དང༌། ངག་ནི་ལུས་སེམས་གཉིས་ཀྱི་རྗེས་སུ་འགྲོ་ལྡོག་གི་རྣམ་པ་ཅན་ཡིན་ཞིང༌། ཡར་མྱ་ངན་ལས་འདའ་བ་དང༌། མར་འཁོར་བར་འཁྱམས་མཁན་ནི་སེམས་ཡིན་པར་རྟོགས་ཤིང༌། སེམས་དེ་ཡང་དང་པོ་བྱུང་ས། བར་དུ་གནས་ས། ཐ་མ་འགྲོ་ས། ཟླུམ་པོ་གྲུ་བཞི་ལ་སོགས་པའི་དབྱིབས་དང༌། དཀར་སེར་ལ་སོགས་པའི་ཁ་དོག་དང༌། གཅིག་དང་དུ་མ་ལ་སོགས་པ་གང་དུ་གྲུབ་བརྟག་ཙ་ན། དང་པོ་སྐྱེ་བའི་རྒྱུའི་སྟོངས། བར་དུ་གནས་པའི་ངོ་བོའི་སྟོངས། ཐ་མ་འགགས་པའི་འབྲས་བུའི་སྟོངས། དབྱིབས་ཁ་དོག་གཅིག་དང་དུ་མ་ལ་སོགས་པ་སྤྲོས་པའི་མཐའ་ཐམས་ཅད་ལས་འདས་པར་ཐག་ཆོད་ཅིང༌། རིག་ཐོག་ཏུ་གདར་ཤ་ཆོད་པར་བྱས་ཤིང་གཞི་མེད་རྩ་བྲལ་དུ་གཏན་ལ་ཕབ་པ་ནི་སེམས་ཀྱི་ཁང་བུ་རྡིབ་པའི་མན་ངག་སེམས་ཀྱི་མཚང་བཙལ་བའི་རིམ་པའོ། །བཞི་པ་དེ་ཐམས་ཅད་ལ་རྒྱས་འདེབས་པའི་གནད་ནི། དེ་ཐམས་ཅད་དབྱིངས་ལས་བྱུང་ཞིང་དབྱིངས་སུ་བསྐྱལ་ལ་དབྱིངས་ལས་མ་གཡོས་པ་ནི་གནད་དོ༔ ཞེས་ནམ་མཁའ་ལས་སྤྲིན་དང་པོ་བྱུང༌། བར་དུ་གནས་ལ། ཐ་མ་ནམ་མཁའི་ངང་དུ་ཐིམ་པ་བཞིན། ལུས་ངག་ཡིད་གསུམ་གྱི་བྱ་བྱེད་ཐམས་ཅད་རིག་པ་དེའི་ངང་ལས་བྱུང་ཞིང༌། བར་དུ་རིག་པའི་ངོ་བོ་ལས་མ་གཡོས། ཐ་མ་རིག་པའི་ངང་དུ་ཐིམ་ཞིང༌། རང་གི་སེམས་ཉིད་རིག་སྟོང་འདུས་མ་བྱས་པའི་གནས་ལུགས་གསལ་སྟོང་རིག་པའི་སྙིང་པོ་ཅན་དེ་ཉིད་ལ་དྲན་པས་མ་ཡེངས་ཙམ་བྱ་བ་གནད་དམ་པ་ཡིན་ནོ། །གཉིས་པ། དངོས་གཞི་འཁྲུལ་པ་རང་སར་གྲོལ་བའི་གནད་ནི༔ ཞེས་པ་དེ་ལ་བཞི། ལུས་མི་འགྱུར་བ་རི་བོ་ཅོག་གཞག་གིས་གཞི་གཟུང་ངོ་༔ ངག་མི་སྨྲ་བར་རྒྱ་མཚོ་ཅོག་གཞག་ཨར་ལ་གཏད་དོ༔ སེམས་མ་ཡེངས་པར་རིག་པ་ཅོག་གཞག་ལ་བཟླའོ༔ དེ་ཐམས་ཅད་ངོ་ཤེས་རྩལ་རྫོགས་བརྟན་པ་ཐོབ་པ་ནི་གནད་དོ༔ ཞེས་པས་ལྟ་བ་རི་བོ་ཅོག་གཞག་རིག་པ་མ་བཅོས་པའི་ངོ་བོ་རི་བོ་བཞིན་དུ་འཕོ་འགྱུར་མེད་པ་དང༌། བསྒོམ་པ་རྒྱ་མཚོ་ཅོག་གཞག་དེའི་ངང་བསྐྱངས་པས་རྣམ་རྟོག་གང་ཤར་ཐམས་ཅད་རྒྱ་མཚོ་ལས་རླབས་བྱུང་ཞིང་སླར་ཐིམ་པ་བཞིན་རང་ཡལ་རྗེས་མེད་དུ་འགྲོ་ཞིང༌། སྤྱོད་པ་མན་ངག་ཅོག་གཞག་རང་གི་རིག་པ་གསལ་སྟོང་རིག་པའི་སྙིང་པོ་ཅན་ཉམས་སུ་མྱོང་བཞིན་དུ་བརྗོད་པའི་མཐའ་ཐམས་ཅད་ལས་འདས་པའི་ངོ་བོ་དེ་ལས་མི་ཡེངས་པ་དང༌། འབྲས་བུ་སྣང་བ་ཅོག་གཞག་ཚོགས་དྲུག་གི་སྣང་བ་ཐམས་ཅད་ཕྱི་རོལ་མ་འགགས་ཤིང་དེར་འཛིན་བྲལ་བའི་ཚུལ་དུ་བསྒོམ་མོ། །དང་པོ་ལུས་རི་བོ་ཅོག་གཞག་ནི། རང་གི་ལུས་རྣམ་སྣང་ཆོས་བདུན་དུ་བཅའ་ཞིང་དཔེར་ན་སོག་ཕོན་གྱི་ཐག་པ་ལྷོད་པ་ལྟར་བདེ་ལུགས་སུ་ལྷོད་ལ་མི་འགྱུར་རི་བོ་བཞིན་དུ་གཞག་པར་བྱ། བྱིང་བའི་ཉམས་བསལ་བའི་ཕྱིར་དུ་ལུས་ཀྱི་ཆ་ནས་སྒྲིམ་ཞིང་སྒྲིམ་ལྷོད་སྤེལ་མའི་ཚུལ་དུ་གཞག་པར་བྱའོ། །གཉིས་པ་མིག་རྒྱ་མཚོ་ཅོག་གཞག་ནི། ཐ་མལ་གྱི་ངག་གི་སྨྲ་བའི་རྒྱུན་དང་པོ་ཇེ་ཉུང་གཏང༌། མཐར་སྨྲ་བརྗོད་ཐམས་ཅད་པི་ཝཾ་གི་རྒྱུན་ཐག་ཆད་པ་བཞིན་རྦད་ཀྱིས་བཅད་ལ། རྒྱ་མཚོ་ཞེས་པ་མིག་གི་ཨ་འབྲས་གཉིས་གླང་པོ་ཆེ་གར་ཆང་གིས་བཟི་བ་ལྟར་མིག་འབྲས་མི་འགུལ་ཞིང་རྫི་མ་མཐའ་རྡེབ་ཙམ་ཡང་མི་བྱེད་པར་ནམ་མཁའི་དབྱིངས་ཀྱི་ཨར་ལ་གཏད་པ་གནད་ཡིན་ནོ། །གསུམ་པ་རིག་པ་ཅོག་གཞག་ནི། རང་གི་སེམས་ཉིད་གདོད་ནས་རང་བཞིན་གྱིས་རྣམ་པར་དག་པ་སྤྲོས་པའི་མཐའ་ཐམས་ཅད་ལས་འདས་པ་ངོ་བོ་སྟོང་པ་ཆོས་སྐུ། སྟོང་ཉིད་ཀྱང་ཅི་མེད་ཅང་མེད་ནམ་མཁའ་ལྟར་མ་ཡིན་པར་གདངས་འགག་མེད་དུ་འཆར་བ་ལོངས་སྐུ། དེ་གཉིས་མར་མེ་དང་མར་མེའི་འོད་བཞིན་དབྱེར་མེད་པའི་རྩལ་སྣ་ཚོགས་སུ་འཆར་བ་སྤྲུལ་སྐུ། འཆར་དུས་ཉིད་ནས་ངོ་བོ་སྟོང་ཉིད་ལས་མ་གཡོས་པ་ཀ་དག་ཁྲེགས་ཆོད་ཀྱི་དགོངས་པ། དཔེ་དང་གཞན་གྱི་ཟེར་སྒྲོས་དང་གོ་བ་ཙམ་མ་ཡིན་པར་བླ་མའི་བྱིན་རླབས་དང་གདམས་ངག་ཁོ་ན་ལ་བརྟེན་ནས་རྟོགས་པར་བྱ་དགོས་ཤིང༌། ཀ་དག་ཅེས་པ་གདོད་མ་ནས་དག་པའམ། ཡེ་གཟོད་མ་ནས་རྣམ་པར་དག་པའི་དོན་ཡིན་ཞིང༌། དེ་ལྟར་གནས་ལུགས་དེ་ཉིད་སངས་རྒྱས་སྒམ་པོས་མ་མཛད། སེམས་ཅན་སྒྲིན་པོས་མ་བསླད་པ། ཡར་མྱ་ངན་ལས་འདས་པའི་དུས་སུ་བཟང་དུ་མ་སོང༌། མར་འཁོར་བར་འཁྱམས་པའི་དུས་སུ་ངན་དུ་མ་སོང༌། ཡུལ་དང་ཡུལ་ཅན་ཤེས་དང་ཤེས་བྱ་རོ་གཅིག་པའི་ཚུལ་གྱིས་ལ་བཟླ་བར་བྱ། ལ་བཟླ་བ་ནི་རྟོགས་པ་དེ་ཉིད་ཐེ་ཚོམ་མེད་པར་ཐག་ཆོད་པར་བྱ་དགོས་ཤིང༌། སྒྲ་ཐལ་འགྱུར་རྩ་བའི་རྒྱུད་ལས། ཤེས་རབ་ཕ་རོལ་ཕྱིན་པ་ནི། །སྣང་བ་ཐད་ཀར་གཅོད་ལ་འདུ། ཞེས་པ་ལྟར་ཐེ་ཚོམ་དང་བཅས་པ་ལ་འབྲས་བུ་འབྱིན་པའི་དུས་ནམ་ཡང་མེད་པས། དཔེར་ན་རང་འཐག་གི་ལྟག་ཆུ་བཅད་པ་བཞིན་དུ། སྟོང་གསལ་འདུས་མ་བྱས་པའི་རིག་པའི་ཡེ་ཤེས་སེམས་ངོ་བྲལ་བ་ཉམས་སུ་མྱོང་བཞིན་དུ་བརྗོད་པའི་མཐའ་ཐམས་ཅད་བྲལ་བ། འདས་པའི་རྣམ་རྟོག་འགགས། མ་འོངས་པའི་རྣམ་རྟོག་མ་སྐྱེས། ད་ལྟའི་ཐ་མལ་གྱི་ཤེས་པ་འདི་ལ་རྩིས་གདབ་མི་བྱ་བར། དུས་གསུམ་གྱི་རྟོག་པ་དང་བྲལ་བའི་བཞི་ཆ་བློ་འདས་ཆོས་སྐུའི་དགོངས་པའི་ངང་བསྐྱང་ཞིང༌། རྣམ་རྟོག་གི་རྙོག་པས་མ་བསླད་པར་དྲན་པ་གསལ་ཙམ་རིག་ཙམ་བྱས་ཏེ་ཅོག་གེར་གཞག་པར་བྱ་བ་སྟེ་དེ་ལ་བཞི། ལྟ་བས་ཐག་བཅད་པ། སྒོམ་པས་ཉམས་སུ་ལེན་པ། སྤྱོད་པས་བོགས་འབྱིན་པ། འབྲས་བུའི་རྟགས་འཆར་ཚུལ་ལོ། །དང་པོ་ནི་གཞུང་རྩ་བ་རྡོ་རྗེའི་ཚིག་རྐང་ལས། འདི་ལྟར་སྣང་བ་ཐམས་ཅད་བློས་བཀོད༔ བྱུང་ཚོར་དང་བཅས་པའི་བློ་ནི་མེད་པ་གསལ་བར་སྣང་༔ དེའི་དབྱིངས་ནི་བསམ་པའི་ཡུལ་ལས་འདས༔ སོ་སོ་རང་རིག་པའི་ཡེ་ཤེས་ཀྱིས་རྟེན་མེད་པར་མཐོང་བ་ནི་ཆོས་ཐམས་ཅད་ཀྱི་གནས་ལུགས་ཀ་དག་གཏིང་གསལ་འདུས་མ་བྱས་པའོ༔ ཞེས་འདི་ལྟར་ཕྱི་གཟུང་བའི་ཡུལ་གྱི་སྣང་བ་ཐམས་ཅད་བློས་བཏགས་ཤིང་བཀོད་པ་ལས་ཡུལ་རང་ངོས་ནས་གྲུབ་པ་མེད། ནང་གི་སེམས་བྱུང་ཚོར་དང་བཅས་པའི་བློ་ནི་མེད་བཞིན་དུ་སྣང་བ་དཔེར་ན་རྨི་ལམ་ལྟ་བུའོ། །སེམས་དེའི་དབྱིངས་རིག་སྟོང་འདུས་མ་བྱས་པའི་རང་བཞིན་ནི་བསམ་པའི་ཡུལ་ལས་འདས། རྟགས་དང་གཏན་ཚིགས་ལ་སོགས་པས་མི་རྟོགས་ཤིང་སོ་སོ་རང་རིག་པའི་ཡེ་ཤེས་རྣམ་ཤེས་ཀྱི་རྟེན་མེད་པ། གཟུང་བ་དང་འཛིན་པས་མ་གོས་ཤིང་ཡུལ་དང་ཡུལ་ཅན་གྱི་རྟོག་པས་མ་བསླད་པར་མཐོང་བ་ནི། ཆོས་ཐམས་ཅད་ཀྱི་གནས་ལུགས་ཡེ་གདོད་མ་ནས་རྣམ་པར་དག་པའི་རང་བཞིན་གཏིང་གསལ་བ་སངས་རྒྱས་ཆོས་ཀྱི་སྐུ་དང་དབྱེར་མེད་དུ་བཞུགས་པ། རྒྱུ་རྐྱེན་གྱིས་འདུས་མ་བྱས་པའི་ངོ་བོ་ཀ་དག །རང་བཞིན་ལྷུན་གྲུབ། དེ་གཉིས་ངོ་བོ་དབྱེར་མེད་དུ་བཞུགས་པ་རིག་པ་མ་བཅོས་པར་ལྟ་བས་ཐག་ཁྲིགས་སེ་ཆོད་པ་ནི་ལྟ་བས་ཐག་བཅད་པ་ཡིན་ནོ། །གཉིས་པ་སྒོམ་པས་ཉམས་སུ་ལེན་པ་ནི། དེའི་འཕྲོས་ལས། དེ་ལྟར་ཁོང་དུ་ཆུད་པས་ནམ་མཁའ་རྣལ་འབྱོར་དུ་བྱ་སྟེ༔ མི་སྒོམ་པའི་ཚུལ་གྱིས་དོན་དང་མི་འབྲལ་བ་ལ་བསླབ་བོ༔ ཞེས་དེ་ལྟར་རིག་པ་ངོ་འཕྲོད་ཕན་ཆད་ནམ་མཁའ་བཞིན་དུ་ཤེས་དང་ཤེས་བྱ་ཡུལ་དང་ཡུལ་ཅན་དབྱེར་མེད་པར་གཞག་པ་ནམ་མཁའི་རྣལ་འབྱོར་བྱ་སྟེ། གཟུང་འཛིན་དང་བཅས་པས་མི་བསྒོམ་པའི་ཚུལ་གྱིས་རིག་པ་རང་གི་ངོ་བོ་དང་མི་འབྲལ་བའི་ཚུལ་གྱིས་བསྒོམ་པར་བྱ་བ་ཡིན་ནོ། །གསུམ་པ་སྤྱོད་པས་བོགས་འབྱིན་པ་ནི། ཡང༌། ཚོགས་དྲུག་གི་སྣང་བ་བཀྲ་ལམ་གྱིས་ཤར་ན་དེ་ལ་མི་དཔྱོད་པར་ཆོས་ཉིད་རང་གི་ངོ་བོའི་ངང་དུ་རྩོལ་བ་ཀློད་ལ་ལས་ཟིན་པའི་སྐྱེས་བུ་ལྟར་སྤྱོད་དོ༔ ཞེས་གཙོ་བོ་ རྗེས་ཐོབ་ཀྱི་ཉམས་ལེན་ཡིན་ཞིང༌། ཕྱི་རོལ་ཚོགས་དྲུག་གི་སྣང་བ་གང་ཤར་ཀྱང་དགག་སྒྲུབ་གང་ཡང་མི་བྱེད་པར་ཕྱི་རོལ་སྣང་བ་ལ་མ་ཞེན་པས་ཕྱི་གཟུང་བའི་ཡུལ་རང་སར་དག་ཅིང༌། ཕར་སྣང་བ་མ་འགགས། ཚུར་དེར་འཛིན་མ་ཞུགས་པས་ནང་གི་སེམས་དེར་འཛིན་བྲལ་བའི་ངང་དུ་གནས་པས་ནང་འཛིན་པ་རང་སར་དག །བར་དུ་རིག་པ་མ་བཅོས་པའི་ངང་དུ་གཞག་པ་ན་བར་དུ་འོད་གསལ་རང་ངོ་ཤེས་པའི་ངང་དུ་ལས་ཟིན་པའི་སྐྱེས་བུ་བཞིན་དུ་སྤྱོད་པར་བྱའོ། །བཞི་པ་འབྲས་བུའི་རྟགས་འཆར་ཚུལ་ནི། ཡང༌། དེའི་ཚེ་རླུང་སེམས་ཟིན་པའི་རྟགས་རྣམས་ཀྱང་རྩོལ་མེད་དུ་འབྱུང་ཞིང་འོད་གསལ་བའི་ལྷག་མཐོང་གྲུབ་པས་ཞི་བར་གནས་པ་ཉིད་དོ༔ ཞེས་སེམས་ཟིན་པ་ན་རླུང་ཟིན། རླུང་ཟིན་པ་ན་རླུང་སེམས་དབུ་མར་ཞུགས་གནས་ཐིམ་གསུམ་ལ་བརྟེན་ནས་ཕྱི་རོལ་གྱི་རྟགས་ནམ་མཁའ་ལ་དུ་བ་མེ་སྟག་སོགས་རྟགས་ལྔ་འཆར་ཞིང༌། རིམ་གྱིས་གོམས་པས་འོད་གསལ་རང་བྱུང་གི་ཡེ་ཤེས་ཀྱི་ལྷག་མཐོང་གྲུབ་པ་ཡིན་ནོ། །བཞི་པ་འབྲས་བུ་སྣང་བ་ཅོག་གཞག་ནི། རིག་པའི་ངོ་བོ་དེ་བླ་མའི་བྱིན་རླབས་ཁོ་ན་ལས་ཤེས་པར་བྱས། བར་དུ་རིག་པའི་རང་ཚོ་ཟིན་པར་བྱས་པ་ན་རྣམ་རྟོག་གང་ཤར་ཐམས་ཅད་སྦྲུལ་གྱི་མདུད་པ་དང་ཆུ་ལ་རི་མོ་བྲིས་པ་བཞིན་དུ་རང་ཡལ་རྗེས་མེད་དུ་འགྲོ་བ་ནི་རྩལ་རྫོགས་པ་ཡིན་ཞིང༌། མཐར་མཉམ་རྗེས་རོ་གཅིག་ཏུ་འདྲེས་ཤིང་རྟོག་པ་ལ་བཟང་ངན་མེད་པ་ནི་བརྟན་པ་ཐོབ་པ་ཡིན་ནོ། །དེ་ལྟར་དགའ་རབ་རྡོ་རྗེའི་ཚིག་གསུམ་གནད་དུ་རྡེག་པའི་མན་ངག་ངོ་རང་ཐོག་ཏུ་སྤྲད། ཐག་གཅིག་ཐོག་ཏུ་བཅད། གདེང་གྲོལ་ཐོག་ཏུ་བཅའ་བ་ཞེས་པ་དང་དོན་གྱི་གནད་གཅིག་པ་ཡིན་ནོ། །དེ་ལྟར་རིག་པ་མ་བཅོས་པའི་ངང་དུ་དུས་རྟག་ཏུ་བསྒོམ་པ་གལ་ཆེ་ཞིང༌། གོ་བ་ཙམ་དང་བཤད་པ་མང་པོ་ཇི་ལྟར་བྱས་ཀྱང་རྣམ་རྟོག་ཇེ་མང་འགྲོ་བའི་རྒྱུ་ཡིན་པས་རྩེ་གཅིག་ཏུ་ཉམས་སུ་ལེན་པ་ནི་གནད་དམ་པ་ཡིན་ནོ། །གསུམ་པ་རྗེས་འཁྲུལ་སྣང་ཡེ་ཤེས་སུ་རང་ཤར་བའི་ཁྲིད་ལ་བཞི། ལུས་མི་གཡོ་བ་བཞུགས་སྟངས་གསུམ་གྱིས་གཞིར་བཟུང་ངོ༌། ངག་མི་སྨྲ་བར་གཟིགས་སྟངས་གསུམ་གྱིས་ཨར་ལ་གཏད་དོ༔ སེམས་མ་འཁྲུལ་བར་རིག་གདངས་རྡོ་རྗེ་ལུ་གུ་རྒྱུད་ཀྱི་སྦུབས་སུ་གཞུག་གོ༔ དེ་ཐམས་ཅད་ཀྱང་དབྱིངས་དང་རིག་པ་དབྱེར་མེད་པར་མཉམ་པར་སྦྱར་བ་ནི་གནད་དོ༔ ཞེས་ལམ་གྱི་བོགས་འབྱིན་པར་བྱེད་པ་ཐོད་རྒལ་གྱི་ལམ་ནི། ཁྲེགས་ཆོད་ཀྱི་ལྟ་བ་གོམས་པའི་གང་ཟག་གིས་ཉམས་སུ་ལེན་དགོས་ཤིང༌། དེ་ལ་དང་པོ་ལུས་ཀྱི་འདུག་སྟངས་གསུམ་ནི། སྐུ་གསུམ་གྱི་བཞུགས་སྟངས་ཡིན་ནོ། །གཉིས་པ་གཟིགས་སྟངས་གསུམ་ནི། ཆོས་སྐུའི་གཟིགས་སྟངས་གཙུག་ཏོར་ལ་བལྟ་བ་ལྟ་བུའོ། །ལོངས་སྐུའི་གཟིགས་སྟངས་མདའ་མཁན་གྱིས་སྨྱུག་མ་བསྲང་བ་ལྟ་བུའོ། །སྤྲུལ་སྐུའི་གཟིགས་སྟངས་དྲང་སྲོང་བསམ་གཏན་བསྒོམ་པ་ལྟ་བུའོ། །གསུམ་པ་སེམས་མ་འཁྲུལ་བར་རིག་གདངས་རྡོ་རྗེ་ལུ་གུ་རྒྱུད་སྦུབས་སུ་གཞུག་པ་ནི། དེ་ལྟར་བཞུགས་སྟངས་དང་གཟིགས་སྟངས་གསུམ་གང་རུང་གི་ཚུལ་གྱི་སྒོ་ཡུལ་རླུང་རིག་གི་གནད་ལ་གཅུན་པ་སྟེ། འཆར་བྱེད་སྒོའི་གནད་ནི། ནང་དབྱིངས་རྩ་ཀ་ཏི་ཤེལ་གྱི་སྦུ་གུ་ཅན་ཞེས་འོད་རྩ་སྙིང་ནས་མིག་ཏུ་འབྲེལ་བ་ཅན་དེ་ལ་བརྟེན། འཆར་གཞི་ཡུལ་གྱི་གནད་ནི། ཕྱི་དབྱིངས་ནམ་མཁའ་སྟོང་པ་སླད་བྱེད་ཀྱི་རྐྱེན་གསུམ་དང་བྲལ་བ་དེ་ཡིན་ནོ། །དེ་ལྟ་བུའི་གནད་ལ་བརྟེན་ནས་དབྱིངས་དང་རིག་པ་རྗེན་པ་སྟོང་གསལ་འདུས་མ་བྱས་པ་དེའི་ངང་དུ་དེར་འཛིན་དང་དམིགས་གཏད་ཐམས་ཅད་དང་བྲལ་བའི་ངང་དུ་སྔ་དྲོ་ཤར་དང༌། ཕྱི་དྲོ་ནུབ་ཏུ་ཉི་མའི་འོག་ཏུ་ཁྲུ་གང་ཙམ་གྱི་ནམ་མཁའ་ལ་བལྟ་ཞིང༌། ཡང་ན་མིག་ལ་གནོད་ན་སྔ་དྲོ་ནུབ། ཕྱི་དྲོ་ཤར་དུ་ཡིད་མིག་རླུང་གསུམ་པོ་རྩེ་གཅིག་ཏུ་དྲིལ་ནས་རིག་གདངས་རྡོ་རྗེ་ལུ་གུ་རྒྱུད་ཀྱི་སྦུབས་སུ་གཟུང་འཛིན་གྱི་རྟོག་པ་ཐམས་ཅད་གཞུག་པར་བྱའོ། །བཞི་པ་དེ་ཐམས་ཅད་ཀྱང་དབྱིངས་དང་རིག་པ་དབྱེར་མེད་པར་མཉམ་པར་སྦྱར་བ་ནི། སྒྲོན་མ་བཞི་དང༌། སྣང་བ་བཞིའི་ལམ་རྟགས་རྣམས་གཞུང་གཞན་དང་འདྲའོ། །དེའི་འཕྲོས་དོན་མཐའ་བརྟེན་གྱི་མན་ངག་གསུམ་དང༌། ཕྱི་ནང་གི་བྱ་བ་དགུ་ཕྲུགས་སུ་གཏང་ཚུལ་གཉིས་སོ། །དང་པོ་ལ་གསུམ། མི་འགུལ་བ་གསུམ་གྱིས་གཞི་བཅའ་བ། སྡོད་པ་གསུམ་གྱིས་ཚད་གཟུང་བ། ཐོབ་པ་གསུམ་གྱིས་གཟེར་གདབ་པའོ། །དང་པོ་ནི། ཆོས་ཉིད་མངོན་སུམ་གྱི་དུས་སུ་ལུས་བཞུགས་སྟངས་གསུམ་ལས་མི་འགུལ་བ་དང༌། མིག་གཟིགས་སྟངས་གསུམ་ལས་མི་འགུལ་བ་དང༌། རིག་པ་དབྱིངས་ལས་མི་གཡོ་བའོ། །གཉིས་པ་སྡོད་པ་གསུམ་གྱིས་ཚད་གཟུང་བ་ནི། ཉམས་གོང་འཕེལ་གྱི་དུས་སུ། ཕྱི་སྣང་བ་སྡོད་པས་རྐྱེན་ངན་གྲོགས་སུ་འཆར། ནང་སྒྱུ་ལུས་སྡོད་པས་འཁྲུལ་པའི་བྱ་བ་ཟད། གསང་བ་རླུང་སེམས་སྡོད་པས་རྣམ་རྟོག་དབྱིངས་སུ་ཞི་བའོ། །གསུམ་པ་ཐོབ་པ་གསུམ་གྱིས་གཟེར་གདབ་པ་ནི། རིག་པ་ཚད་ཕེབས་ཀྱི་དུས་སུ་ཕྱི་སྣང་བ་ལ་དབང་ཐོབ་པས་སྣང་བ་ཞིང་ཁམས་སུ་གྲོལ། ནང་ཕུང་པོ་ལ་དབང་ཐོབ་པས་སྒྱུ་ལུས་འོད་གསལ་དུ་དེངས། གསང་བ་རྟོག་པ་ལ་དབང་ཐོབ་པས་རྟོག་ཚོགས་དབྱིངས་སུ་གྲོལ་ལོ། །ཆོས་ཉིད་ཟད་པའི་དུས་སུ་གདེང་བཞིའི་གྲོལ་ཚད་བསྟན་པ་ནི། འཁོར་འདས་ལམ་གསུམ་གྱི་ཆོས་ཐམས་ཅད་རིག་པ་ལས་གཞན་དུ་མ་གཡོས་པའི་གདེང་ཐོབ་ཙ་ན། ཡར་མྱང་འདས་ཐོབ་པའི་རེ་བ་དང༌། མི་ཐོབ་པའི་དོགས་པ་མེད། མར་འཁོར་བར་ལྟུང་གི་དོགས་པ་དང༌། མི་ལྟུང་བའི་རེ་བ་བྲལ་བའི་གདེང་བཞི་ཐོབ་པའོ། །གཉིས་པ་ཕྱི་ནང་གི་བྱ་བ་དགུ་ཕྲུགས་སུ་གཏང་ཚུལ་ནི། ཆོས་ཉིད་མངོན་སུམ་གྱི་དུས་སུ་ཐ་མལ་གྱི་ལུས་ངག་ཡིད་གསུམ་གྱི་བྱ་བྱེད་བཏང༌། ཉམས་གོང་འཕེལ་གྱི་དུས་སུ་ལུས་ཀྱིས་ཕྱག་བསྐོར་སོགས་དང༌། ངག་གིས་མདོ་བཀླག་པ་དང༌། ཡིད་ཀྱིས་ངེས་འབྱུང་གི་བློ་སོགས་དང༌། རིག་པ་ཚད་ཕེབས་ཀྱི་དུས་སུ་ལུས་ཀྱིས་ཕྱག་རྒྱ་སོགས་དང༌། ངག་གིས་སྔགས་ཀྱི་བཟླས་བརྗོད་སོགས་དང༌། ཡིད་ཀྱིས་མཚན་བཅས་ཀྱི་རྫོགས་རིམ་སོགས་སྤངས་ཤིང་ཕྱི་ནང་གི་བྱ་བ་དགུ་ཕྲུགས་སུ་བཏང་བའོ། །གཉིས་པ་འབྲིང་བར་དོར་གྲོལ་བའི་ཁྲིད་ལ་གཉིས། འཆི་ཁ་དབྱིངས་རིག་སྦུབས་འཇུག་གི་མན་ངག་དང༌། ཆོས་ཉིད་བར་དོའི་ཉམས་ལེན་ནོ། །དང་པོ་ལ་གཉིས། དབྱིངས་རིག་སྦུབས་འཇུག་དང༌། རླུང་སེམས་གོང་འཕོའི་མན་ངག་གོ །དང་པོ་ནི། ཚེ་འདི་ཉིད་ལ་གོ་འཕང་མཆོག་མ་འགྲུབ་ན་ནམ་མཁའ་སུམ་ཕྲུགས་ཀྱི་སྦྱོར་བས་མྱ་ངན་ལས་འདའ་བར་བྱའོ༔ ཞེས་སྤྱིར་བར་དོའི་ཉམས་ལེན་ལ། རང་བཞིན་དང་སྐྱེ་གནས་ཀྱི་བར་དོར་ཐོས་བསམ་ལ་སྒྲོ་འདོགས་ཆོད་པ་སྔར་འདྲིས་ཀྱི་མི་དང་འཕྲད་པ་ལྟ་བུའི་གདམས་ངག་དང༌། འཆི་ཁ་བར་དོར་མི་གསལ་བ་ལ་གསལ་འདེབས་པ་སྒེག་མོ་ལ་མེ་ལོང་བསྟན་པ་ལྟ་བུའི་གདམས་ངག་དང༌། ཆོས་ཉིད་བར་དོར་རང་སྣང་ངོ་ཤེས་པ་མ་པང་དུ་བུ་འཇུག་པ་ལྟ་བུའི་གདམས་ངག་དང༌། སྲིད་པ་བར་དོར་ལམ་གྱི་འཕྲོ་མཐུད་པ་ཡུར་བ་རྐང་ཆད་ལ་ཝ་འཛུག་པ་ལྟ་བུའི་གདམས་ངག་བཞི་ཡོད་པ་ལས། འདིར་འཆི་ཁ་ནམ་མཁའ་སུམ་ཕྲུགས་ཀྱི་དགོངས་པས་མྱང་འདས་བྱེད་ཚུལ་ནི། ཚེ་འདིར་གོ་འཕང་མ་འགྲུབ་ནས་འཆི་བསླུ་སོགས་ཀྱིས་འཆི་བ་བཟློག་མ་ནུས་ན། ལུས་སེང་གེའི་ཉལ་སྟབས་སོགས་ཀྱིས་ནང་གི་དབྱིངས་རིག་པ་རང་བྱུང་གི་ཡེ་ཤེས་ངོ་བོ་རང་བཞིན་ཐུགས་རྗེའི་བདག་ཉིད་ཅན་གྱི་རིག་པ་མ་བཅོས་པར་བཞག་པ་དང༌། གསང་བའི་དབྱིངས་རང་བྱུང་གསང་བ་ཆེན་པོའི་རྩ་ཀ་ཏི་ཤེལ་གྱི་སྦུ་གུ་ཅན་དང༌། ཕྱིའི་དབྱིངས་ནམ་མཁའ་དང་དབྱེར་མེད་དུ་བསྲེས་པའི་ངང་དུ་འཆི་ནས་སློབ་པའི་ཟུང་འཇུག་གི་སྐུར་ལྡང་བའམ། ཡང་ན་མི་སློབ་པའི་ཟུང་འཇུག་གི་སྐུ་མངོན་དུ་བྱས་ནས་གདོད་མའི་བཙན་ས་ཟིན་པར་འགྱུར་རོ། །གཉིས་པ་རླུང་སེམས་གོང་འཕོ་ནི། ཡང་ན་རླུང་སེམས་ཐིག་ལེ་ཨ་ཡིག་དང་བཅས་པ་ལ་སེམས་རྩེ་གཅིག་ཏུ་བསྡུས་ཏེ་ཚངས་པའི་ལམ་ནས་བླ་མའི་ཐུགས་ཀར་བསྟིམས་ལ་མེ་རི་འབར་བ་ལ་སོགས་པར་གཤེགས་སུ་གསོལ་བར་བྱའོ༔ ཞེས་པ་ལ་གཉིས། སྦྱང་བ་དང༌། ལས་ལ་སྦྱར་བའོ། །དང་པོ་ནི། སྔོན་འགྲོ་ཆ་ཚང་བའམ། ཡང་ན་བླ་མའི་རྣལ་འབྱོར་སྔོན་དུ་འགྲོ་བའི་སྒོ་ནས། རང་གི་ལུས་གཉུག་མའི་ལྷ་གང་རུང་དུ་གསལ་བའི་ལུས་ཀྱི་དབུས་སུ་རྩ་དབུ་མ་སྤྱི་ལྟར་བསྒོམས་ལ། དེའི་དབུས་སུ་རླུང་སེམས་ཀྱི་ངོ་བོ་ཐིག་ལེ་ཨ་ཡིག་དང་བཅས་གསལ་བཏབ་ལ། དེ་ནས་སྟེང་གི་ནམ་མཁའ་ལ་ངོ་བོ་རྩ་བའི་བླ་མ་ལ་རྣམ་པ་ལྕེ་བཙུན་ཆེན་པོ་བཞུགས་པར་མོས་ལ། གསོལ་བ་དྲག་ཏུ་གདབ། འོག་རླུང་བསྐུམ། སྟེང་རླུང་མནན་པའི་རྐྱེན་གྱིས་རླུང་སེམས་ཀྱི་ངོ་བོ་ཐིག་ལེ་ཨ་ཡིག་དང་བཅས་པ་དབུ་མའི་ལམ་བརྒྱུད་པར་མོས་པ་དང་མཉམ་དུ་ཕཊ་དང་ཧིག་ཅེས་བརྗོད་པས་བླ་མའི་ཐུགས་དང་དབྱེར་མེད་དུ་འདྲེས་པར་བསམ། ཡང་མར་སྙིང་གའི་ཐིག་ལེ་ལ་བསྲེ་བ་སོགས་དང༌། བླ་མའི་སྐུ་ལས་འཆི་བ་མེད་པའི་བདུད་རྩི་བབས་པས་འཆི་མེད་ཚེའི་དངོས་གྲུབ་ཐོབ་པར་སྒོམ་མོ། །གཉིས་པ་ལས་ལ་སྦྱར་བ་ནི། རང་ཉིད་འཆི་བར་ངེས་པའི་ཚེ་ཡོ་བྱད་ཆོས་ཕྱོགས་སུ་འབུལ་ནས། གནས་ལུས་ཉེ་འབྲེལ་སོགས་ལ་ཞེན་པ་བཅད། ཕྱི་དབུགས་ཆད་ཅིང་ནང་དབུགས་མ་ཆད་པའི་དུས་སུ་ལས་ལ་སྦྱར་བའི་དུས་ཡིན་ཞིང་ལུས་དང་རྩ་དང་རླུང་སེམས་ཀྱི་ངོ་བོ་ཐིག་ལེ་བླ་མ་སོགས་སྔར་ལྟར་གསལ། བླ་མ་ལ་གསོལ་བ་གདབ་ཅིང་རླུང་སྦྱོར་གྱིས་ཐིག་ལེ་ཨ་ཡིག་དང་བཅས་པ་ལྷག་མེད་བླ་མའི་ཐུགས་ཀར་ཡང་ཡང་བསྟིམ་ཞིང་དེའི་ངང་དུ་མཉམ་པར་གཞག །མཐར་བླ་མ་ཡང་ཇེ་མཐོར་སོང་སྟེ་མེ་རི་འབར་བ་སོགས་སུ་གཤེགས་པའི་མོས་པ་བྱའོ། །གཉིས་པ་ཆོས་ཉིད་བར་དོའི་ཉམས་ལེན་ནི། རྩ་བ་ལས། གལ་ཏེ་བར་དོའི་སྣང་བ་ཅི་ཤར་ཡང་རིག་པ་རང་མལ་ལས་མ་གཡོས་པ་མི་འགྱུར་བ་གསེར་གྱི་ཐུར་མ་ལྟ་བུའི་གནད་དྲན་པར་བྱའོ༔ ཞེས་འཆི་ཁ་བར་དོའི་མན་ངག་གིས་མ་གྲོལ་ན། གཞི་ལས་གཞི་སྣང་སྒྲ་དང་འོད་ཟེར་དང་སྐུ་ལ་སོགས་པ་མཐའ་ཡས་པ་འཆར་བའི་དུས་སུ་སྔངས་སྐྲག་དང་གནད་དོན་དྲན་པ་ན་སྒྲ་ཟེར་སྐུའི་སྣང་བ་ཐམས་ཅད་རང་ལ་ཐིམ་ཞིང༌། དེ་ཡང་དང་པོ་རང་སྣང་ཡིན་པར་ངོ་ཤེས། བར་དུ་རྩལ་རྫོགས། མཐར་བརྟན་པ་ཐོབ་ནས་གྲོལ་བར་འགྱུར་རོ། །གསུམ་པ་དབང་པོ་ཐ་མའི་ཁྲིད་ནི། དེ་ལྟར་ཆོས་ཉིད་བར་དོར་མ་གྲོལ་ན། སྲིད་པ་བར་དོར་འཁྲུལ་པའི་སྣང་བ་ཤར་ཞིང༌། དེ་དུས་རི་ཉིལ་བ་དང༌། མཚོ་ལུད་པ་དང༌། མེ་འབར་བ་དང༌། རླུང་གཡོ་བ་སྟེ་འཇིགས་པའི་སྒྲ་བཞི། མེ་ཆུ་ལ་སོགས་པའི་གཡང་ས་གསུམ། གནས་ཡུལ་གྲོགས་ལ་སོགས་པའི་མ་ངེས་པའི་རྟགས་རྣམས་འཆར་བའི་དུས་སུ་བར་དོ་ལ་བར་དོ་ཡིན་པར་ངོ་ཤེས། རྒྱལ་བ་སྲས་བཅས་ཀྱི་བདེན་པ་དང་ཆོས་ཉིད་བསམ་གྱིས་མི་ཁྱབ་པའི་མཐུ་དང༌། སྔར་གྱི་བླ་མའི་གདམ་ངག་སོགས་དྲན་ནས་དག་པའི་ཞིང་ཁམས་ལ་འདུན་པ་གཏད་པ་ན། རྣམ་གྲོལ་དབུགས་ཆེན་འབྱིན་པའི་ཞིང་ལྔ་ལ་སོགས་པར་སྐྱེས་ནས་དེ་བཞིན་གཤེགས་པ་རྣམས་ཀྱི་ཞལ་མཇལ། གསུང་ཐོས། ལུང་བསྟན། དབུགས་དབྱུང༌། གཟེངས་བསྟོད་ནས་ལམ་གྱི་འཕྲོ་མཐུད་ནས་གདོད་མའི་དབྱིངས་སུ་མངོན་པར་བྱང་ཆུབ་བོ། །ཡང་ན་རང་གི་མདུན་གྱི་ནམ་མཁའ་ལ་ཆོས་འབྱུང་དམར་པོ་ཨཿཡིག་དང་བཅས་པ་གསལ་བ་ལ་རླུང་སེམས་བསྲེས་ཏེ་མེ་རི་འབར་བ་ལ་སོགས་སུ་གཤེགས་པར་མོས་པ་བྱའོ། །གསུམ་པ་རྗེས་ཀྱི་མཐར་དབྱུང་བའི་ཁྲིད་ལ་གསུམ། ཉམས་ལེན་སྤྱིར་བསྟན་པ་དང༌། དགེ་སྦྱོར་སྲང་དུ་འཇུག་པའི་་མན་ངག །འབྲས་བུ་མངོན་དུ་བྱ་བའི་ཚུལ་ལོ། །དང་པོ། ཡང༌། རྩ་བ་རྡོ་རྗེའི་ཚིག་རྐང་ལས། ཁྱད་པར་བཅོས་མ་མ་ཡིན་པའི་མོས་གུས་དྲགས་པོས་བླ་མ་ལ་ནན་ཏན་དུ་གསོལ་བ་གདབ་པ་ནི་གེགས་སེལ་དང་བོགས་འདོན་ཐམས་ཅད་ཀྱི་མཆོག་ཏུ་འགྱུར་རོ༔ ངེས་འབྱུང་སྙིང་ལ་གཅག༔ མོས་གུས་རྩལ་དུ་འདོན༔ སྙིང་རྗེ་ཤས་མི་བཟོད་པ་དབྱུང་༔ ཡུལ་གྱི་བདུད་རྩི་བརྟེན༔ སྤྲོས་པ་ནང་དུ་བསྡུ༔ རླུང་རྒྱ་ཡན་དུ་འཇོག༔ ལུས་གནད་དང་མ་བྲལ་བར་བྱ༔ དབང་པོའི་མཆོག་ནི་དབྱིངས་ལ་གཟིར༔ སྐབས་སྐབས་སུ་བུམ་པ་ཅན་འཇམ་པོ་གཟུང་༔ དུས་རྟག་ཏུ་རིག་སྟོང་རྗེན་པའི་ངང་གཟུང་ལ་གནད་དུ་གཏོང་ངོ་༔ ཞེས་དུས་རྟག་ཏུ་བླ་མ་ལ་བཅོས་མ་མ་ཡིན་པའི་སྒོ་ནས་མོས་གུས་དྲག་པོས་དུས་དང་རྣམ་པ་ཀུན་ཏུ་བླ་མའི་སྣང་བ་དང་མི་འབྲལ་བའི་ངང་ནས་བླ་མར་ནན་ཏན་དུ་གསོལ་བ་གདབ་པ་ནི་ལམ་གྱི་གེགས་སེལ་དང་བོགས་འདོན་ཐམས་ཅད་ཀྱི་མཆོག་ཏུ་འགྱུར་ཞིང༌། ལམ་གྱི་བོགས་འདོན་པ་བླ་མའི་བྱིན་རླབས་འབའ་ཞིག་ལ་རག་ལས་པར་འགྱུར་ཏེ། གྲུབ་ཆེན་ཏེ་ལོ་པས། གེགས་སེལ་ཀུན་གྱི་མཆོག་གྱུར་ནི། །བླ་མ་ཡིན་ནོ་ནཱ་རོ་པ། །བོགས་འདོན་ཀུན་གྱི་མཆོག་གྱུར་ནི། །བླ་མ་ཡིན་ནོ་ནཱ་རོ་པ། ཞེས་དང༌། ཡང༌། བླ་མའི་བྱིན་རླབས་སྙིང་ལ་ཞུགས་པ་ན། །ལག་པའི་མཐིལ་ན་གནས་པའི་གཏེར་མཐོང་བཞིན། ཞེས་སོ། །འཁོར་བ་ལ་ངེས་འབྱུང་སྙིང་ལ་གཅག །བླ་མ་དང་དཀོན་མཆོག་ལ་མོས་གུས་རྩལ་གཏོན། སེམས་ཅན་ལ་སྙིང་རྗེ་ཤས་མི་བཟོད་པ་དབྱུང༌། ཚོགས་དྲུག་གི་སྣང་བ་ཐམས་ཅད་ཞེན་པ་མེད་པའི་ཚུལ་གྱིས་དགག་སྒྲུབ་གང་ཡང་མི་བྱེད་པར་སེམས་དང་དབྱེར་མེད་དུ་བསྲེ་བས་ཡུལ་གྱི་བདུད་རྩི་བརྟེན། ཆོས་དང་འཇིག་རྟེན་གྱི་རྣམ་གཡེང་ཐམས་ཅད་ཀྱི་སྤྲོས་པ་བཅད་ལ་ནང་དུ་བསྡུ། སྣའི་རླུང་བཏང་སྙོམས་སུ་གཞག །སོ་དང་མཆུ་མ་རེག་པར་རླུང་བཟོ་བཅོས་མི་བྱ་བར་རྒྱ་ཡན་དུ་འཇོག །ལུས་ལྷོད་ཀྱིས་ཀློད་པ་དང་བཞུགས་སྟངས་ཀྱི་གནད་དང་མ་བྲལ་བར་བྱ། འོད་གསལ་འཆར་བའི་ཕྱིར་མིག་འབྲས་མི་འགུལ། རྫི་མ་མཐའ་རྡེབ་མི་བྱ་བར་ནམ་མཁའི་དབྱིངས་སུ་གཟིར་ཞིང་ནམ་མཁའ་སུམ་ཕྲུགས་ཀྱི་དགོངས་པ་ཉམས་སུ་ལེན། ཡེ་ཤེས་བརྟན་པར་བྱ་བའི་ཕྱིར་སྐབས་སྐབས་སུ་ཡོན་ཏན་རིན་པོ་ཆེ་སྐྱེ་བའི་རླུང་སྦྱོར་འཇམ་རླུང་བུམ་པ་ཅན་གཟུང༌། མདོར་ན་མཉམ་གཞག་རྗེས་ཐོབ་གང་གི་སྐབས་སུའང་དུས་རྟག་ཏུ་ཧ་ཅང་སྒྲིམ་པའང་མི་བྱ། ཧ་ཅང་ལྷོད་པ་མ་ཡིན་པར་རིག་པ་རང་སོ་ཟིན་པ་རིག་སྟོང་རྗེན་པའི་ངང་བཟུང་ལ་མ་ཡེངས་པའི་ངང་བསྐྱང༌། ཅུང་ཟད་སྤྲོས་པ་དང་བཅས་པས་ནི་ཚོགས་ཀྱི་འཁོར་ལོའི་འདུ་བ་སོགས་ཇི་ལྟར་རིགས་པར་བྱའོ། །ཚོགས་ཀྱི་འཁོར་ལོ་མཚན་ཉིད་པ་མ་གྲུབ་ཀྱང་རྫས་ཀྱི་ཡོ་བྱད་ཀྱི་ཚོགས་ཇི་རིགས་པ་ལ་ལོངས་སྤྱོད་པར་བྱའོ། །གཉིས་པ་དགེ་སྦྱོར་སྲང་དུ་འཇུག་པའི་མན་ངག་ལ་གཉིས། ཕྱིའི་དུས་བཞི་སངས་རྒྱས་མཉམ་སྦྱོར་ཐུན་མོང་གི་སྐྱེད་རྫོགས་ཀྱི་རྣལ་འབྱོར་ཉིན་གཅིག་ལ་ཐུན་བཞིར་ཕྱེས་ནས་ཉམས་སུ་ལེན་པར་བྱ་བ་དང༌། ནང་གི་དུས་བཞི་སངས་རྒྱས་མཉམ་སྦྱོར་ཐུན་མོང་མ་ཡིན་པའི་རྫོགས་རིམ་གྱི་རྣལ་འབྱོར་ཐུན་བཞིར་ཉམས་སུ་ལེན་པ་སྟེ་གཉིས་ལས། ཕྱི་མ་ལ་བཞི། ཉིན་མོ་སྣང་བ་རྒྱས་འདེབས་ཀྱི་རྣལ་འབྱོར། ནམ་གུང་ཤེས་པ་བུམ་པར་གཞུག་པ་དང༌། ཐོ་རངས་རིག་པ་རང་སར་གཏོད་པ་དང༌། རྒྱུན་དུ་རིག་པ་སྐད་ཅིག་མ་ཉམས་སུ་ལེན་པའོ། །དང་པོ་ནི། ཉིན་པར་དུས་སུ་སྒོ་ཡུལ་རླུང་རིག་གི་གནད་ལ་བརྟེན་ནས་རླུང་སེམས་རྡོ་རྗེ་ལུ་གུ་རྒྱུད་ཀྱི་དྲྭ་བར་བཙུད་ལ་ལྷུན་གྲུབ་བསྒོམ་མོ༔ ཞེས་པས་བསྟན་པ་ལྟར་ཡིན་ནོ། །གཉིས་པ་ནམ་གུང་ཤེས་པ་བུམ་གཞུག་ནི། མཚན་མོ་སྙིང་དབུས་སམ་སྨིན་མཚམས་ཀྱི་ཐིག་ལེ་ཨ་ཡིག་དང་བཅས་པ་ལ་སེམས་རྩེ་གཅིག་ཏུ་གཟུང་ཞིང་འོད་གསལ་བ་བསྒོམ་མོ༔ ཞེས་ཉལ་ཚེ་འོད་གསལ་གཟུང་ན་སྙིང་དབུས་དང༌། རྨི་ལམ་གཟུང་ན་སྨིན་མཚམས་སུ་བླ་མ་དང་རིག་པ་དབྱེར་མེད་པའི་ངོ་བོ་ཐིག་ལེ་ཨ་ཡིག་དང་བཅས་པ་དཀར་པོ་ཞིག་བསྒོམ་མོ། །གསུམ་པ་ཐོ་རངས་རིག་པ་རང་སར་གཏོད་པ་ནི། ཐོ་རངས་ཧ་ཧ་ཞེས་རླུང་བསངས་ནས་ནམ་མཁའི་དཀྱིལ་དུ་རང་བྱུང་གསང་བ་ཆེན་པོའི་ཡི་གེ་ཨ་གསལ་ཞིང་འབར་བ་ལ་ཡིད་མིག་རླུང་གསུམ་མདུང་ཚུགས་སུ་གཏད་དེ་རིག་པ་གྲུང་དུ་གཞུག་གོ༔ ཐོ་རངས་སད་མ་ཐག་ཏུ་ལུས་གནད་སེང་གེའི་འདུག་སྟངས་ཀྱིས། ངག་ཏུ་ཧ་ཧ་ཞེས་རླུང་བསངས་ནས། སྤྱི་བོར་གཞུ་གང་ཙམ་གྱི་ནམ་མཁའ་ལ་ཨ་ཡིག་དཀར་པོ་འོད་འབར་བར་བསམས་ལ་ཡིད་མིག་རླུང་གསུམ་རྩེ་གཅིག་ཏུ་གཏད་དེ་རིག་པ་གྲུང་དུ་གཞུག་པར་བྱའོ། །བཞི་པ་རྒྱུན་དུ་རིག་པ་སྐད་ཅིག་མ་ཉམས་སུ་ལེན་པ་ནི། རྣམ་པ་ཀུན་དུ་རང་རིག་པ་སྐད་ཅིག་མའི་ངང་བསྐྱངས་པས་འཁྲུལ་པའི་རྟོག་ཚོགས་ཐམས་ཅད་སྤྲིན་ནམ་མཁའ་ལ་དེངས་པ་ལྟར་རང་གྲོལ་བ་ལ་བསླབ་བོ༔ ཞེས་པ་ལྟར་ཡིན་ནོ། །གསུམ་པ་མི་འགྱུར་རྟག་པ་དམ་པའི་འབྲས་བུ་མངོན་དུ་བྱ་བ་ནི། དེ་ལྟར་ནན་ཏན་དུ་བརྩོན་པས་རབ་ཟླ་བ་དྲུག༔ འབྲིང་ལོ་གསུམ༔ ཐ་མའང་ལོ་བཅུ་གཉིས་ནས་ཟག་བཅས་ཀྱི་ཕུང་པོ་འོད་དུ་དེངས་པར་འགྱུར་རོ༔ སྒྲ་ཚིག་དབུ་མ་དེངས་པར་འགྱུར་རོ༔ རྟོག་ཚོགས་ནང་གསལ་དུ་དེངས་པར་འགྱུར་རོ༔ འདོད་ན་ལུས་དང་༔ ངག་དང་༔ ཡིད་ཐམས་ཅད་པའི་མཆོག་འགྲུབ་པར་འགྱུར་རོ༔ དེ་བས་ན་འདི་ཁོ་ན་ལྟར་བཙོན་པར་བྱའོ༔ ཞེས་པ་ལྟར་ཡིན་ནོ། །ཞེས་པའང་ལྕེ་བཙུན་ཆེན་པོའི་རྣམ་འཕྲུལ་འོད་གསལ་སྤྲུལ་པའི་རྡོ་རྗེའམ། འཇམ་དབྱངས་བླ་མ་མཁྱེན་བརྩེའི་དབང་པོས་ལན་གཉིས་ཀྱི་བར་དུ་ཐུགས་བརྩེ་བ་ཆེན་པོས་བདག་ལ་གནང་བ་ཡིན་པས་བརྗེད་ཀྱིས་ཕངས་ནས་རང་བློས་ཟིན་ཚོད་བཀོད་པ་དགེ་ཞིང་བཀྲ་ཤིས་པར་གྱུར་ཅིག །གཞི་དབྱིངས་ཀ་དག་གཞི་སྣང་ལྷུན་གྲུབ་ཏུ། །རང་རིག་ཁྲེགས་ཆོད་ཐོད་རྒལ་ལམ་སྣང་བཞིས། །སྐུ་དང་ཡེ་ཤེས་མངོན་སུམ་གཅར་ཕོག་ཏུ། །སྟོན་མཛད་ལྕེ་བཙུན་ཆེན་པོའི་སྙིང་ཏིག་གི །ཟབ་ཁྲིད་ཞི་བའི་སྙིང་པོས་མཛད་འདི་ཉིད། །འཇམ་དབྱངས་བླ་མའི་ཞལ་རྒྱུན་འཁྲུལ་མེད་ཉིད། །ཡིན་ཞེས་རྡོ་གྲུབ་བསྟན་པའི་ཉི་མས་བསྔགས། །དེ་ཕྱིར་རྗེ་དབོན་བཀྲ་ཤིས་ཚེ་རིང་གིས། །པར་དུ་བཞེངས་ལས་ཆོས་འདིས་འགྲོ་བའི་དོན། །འཁོར་བ་མ་སྟོངས་བར་དུ་ཁྱབ་བརྡལ་གྱིས། །མ་ལུས་འོད་གསལ་རྡོ་རྗེ་སྙིང་པོའི་ཀློང༌། །གདོད་མའི་ཀུན་ཏུ་བཟང་པོར་རོ་གཅིག་ཤོག །ཅེས་པའང་མཁྱེན་སྤྲུལ་མིང་གིས་སྨོན་པ་དགེ །དགེའོ།། །།

[edit]

lce btsun snying tig zab khrid dpal ldan bla ma'i zhal lung bslad med yid la gang zin gyi zin tho bzhugs so//_@#/__/'dir lce btsun chen po'i bi ma'i zab tig gi khrid kyi zin bris la gsum/__lo rgyus kyi sgo nas nges shes bskyed pa/__dbang gi sgo nas smin par byed pa/__gdams ngag gi sgo nas grol bar byed pa dang gsum/__dang po la sngon byung lo rgyus dang*/__phyis 'byung gi lo rgyus las/__dang po ni/__'di skad bdag gis thos pa dus gcig na:__bcom ldan 'das de bzhin gshegs pa thams cad kyi gzugs kyi rgyal po dang :__tshor ba'i rgyal po dang :__'du shes kyi rgyal po dang :__'du byed kyi rgyal po dang :__rnam par shes pa'i rgyal po rnams gcig tu bsdus pa'i ye shes kyi sku brnyes pa dpal he ru ka rnal 'byor gyi dbang phyug seM he shwa ra de nyid:__pad+ma'i rig mchog gar gyi dbang po'i zhing khams:__bod kha ba can gyi ljongs:__yul la ming du chags pa 'o yug shug pa'i gling gi mgo:__bkra shis la zil che ba:__byin chags la rlung rig dwangs pa:__mkha' 'gro phyi gong rdza'i ra ba sman shing nags kyi tshal chen por bsam gyis mi khyab pa'i ting nge 'dzin rgyal mtsho la snyoms par zhugs so:__de'i tshe de'i dus na:__lan gcig ston zla ra ba'i tshes bcu la ye shes dang :__las dang :__'jig rten gyi mkha' 'gro ma sprin bzhin du gtibs nas tshogs kyi 'khor lo'i 'du ba rgya chen po la longs spyod pa'i tshe:__o rgyan gyi DA kI gtso mo dpal gyi blo gros mas rdo rje'i blta bas bltas te:__phyag rnal 'byor gyi lugs su 'tshal nas 'di skad ces gsol to:__e ma e ma:__ma 'ongs pa'i tshe na snying tig snying po'i rnal 'byor pa rnams kyi nyams len gyi mthar thug gang la bgyi:__phrin las kyi gzhung gang ltar bsrang :__snying po'i mthar thug gang du la bzla zhes gsol ba na:__shrI he ru kA seM he shwa ra dar cig dbyings ka dag zang thal gyi ting nge 'dzin la snyoms par zhugs pas sku mi snang ba 'od kyi rang bzhin tu gyur to:__de'i tshe mkha' 'gro ma rnams kyis mgrin gcig tu gdung ba'i dbyangs kyis:__kye ma kyi hud kye ma klong :__ston pa sgron me'i 'od nub na:__'jig rten mun pa gang gis sel:__ye shes sku yi nyi ma yis:__ma rig 'thib po bsal du gsol:__rdo rje'i gsung gi bdud rtsi yis:__'khor ba'i tsha gdung bsil bar mdzod:__ces gsol ba btab pas lhun grub rig rtsal gyi ting nge 'dzin la 'phos pa'i de ma thag par ye shes kyi sku mngon sum du snang bar mdzad nas chos nyid rdo rje'i rang sgra 'di skad ces bka' rtsal to:__e ma e ma:__ma 'ongs pa phyi ma phyi ma'i dus kyi tshe snying tig snying po'i don la spyod pa'i rnal 'byor pa rnams kyis tshe 'di kho na la grol bar 'dod na lce btsun seM he shwa ra bdag nyid bsgom par bya'o/__/zhes pas bstan/__gnyis pa phyis 'byung gi lo rgyus/__'di ni ma 'ongs snyigs ma lnga sogs nas/__phan par 'gyur ro:__zhes pas bstan/__gnyis pa dbang gi sgo nas smin par byed pa ni dbang gdams ngag gi lugs su gdab pa yin no/__/gsum pa gdams ngag gi sgo nas grol bar byed pa la gsum/__sngon 'gros rgyud sbyong ba dang*/__dngos gzhi nyams su len pa/__rjes kyi mthar dbyung ngo*/__/dang po la gnyis/__thun gyi sngon 'gro dang*/__khrid kyi sngon 'gro'o/__/dang po la gsum/__lus rnal du dbab pa/__ngag rnal du dbab pa/__yid rnal du dbab pa'o/__/dang po lus rnal dbab rnam snang chos bdun du bca' ba'o/__gnyis pa ngag rnal dbab rlung ro dgu sprugs bya'o/__/gsum pa yid rnal dbab nges 'byung rnam dag dang*/__dad pa rnam dag dang*/__byang chub kyi sems sogs sgo du ma nas yid la byed pa sngon du 'gro ba'i sgo nas/__rang gi mdun gyi nam mkhar seng ge chen po brgyad kyis btegs pa'i khri steng du sna tshogs pad+ma nyi ma zla ba'i gdan la bi ma mi tra'am/__lce btsun chen po dang*/__yang na rang gi rtsa ba'i bla ma rnams skyabs gnas thams cad 'dus pa'i ngo bo yin par thag bcad/__nges shes bskyed/__mos gus kyis gsol ba drag tu gdab/__ngag tu/__dus gsum gyi sangs rgyas thams cad kyi ngo bo bla ma rin po che mkhyen/__bdag gi rgyud smin cing grol bar byin gyis brlabs tu gsol/__zab lam gyi rtogs pa khyad par can rgyud la skye bar byin gyis brlab tu gsol/__tshe 'di nyid la 'od gsal rdzogs pa chen po'i lam mchog mthar phyin par byin gyis brlab tu gsol/__ces gsol ba drag tu btab pas/__bla ma nyid dgyes pa chen pos 'od du zhu nas/__bla ma'i rdo rje gsum dang rang gi lus ngag yid gsum dbyer med du 'dres/__thugs yid bsre zhing dus gsum gyi spros pa thams cad bcad la rig stong rjen pa'i ngang bskyang bar bya'o/__/gnyis pa khrid kyi sngon 'gro la gnyis/__thun mong gi sngon 'gro dang*/__khyad par gyi sngon 'gro'o/__/dang po la sems sbyong rnam pa bdun las/__dang po ni 'dus byas thams cad mi rtag par bsam pa la/__dang po phyi snod bcud kyi chags 'jig la bsam ste mi rtag par bsgom pa dang*/__nang rang gi sgyu lus phung po la bsam ste mi rtag par bsgom pa dang*/__gsang ba rang gi gnyen grogs sogs kyi 'chi rkyen la bsam ste mi rtag par bsgom pas don dran pa dang*/__dper na chu'i lbu ba ltar bsam nas bsgom pas dpe dran pa dang*/__mthar dpe don bsres te bsgom pa'o/__/gnyis pa 'khor ba'i bde ba thams cad yun du mi gnas par bsam nas sems sbyong ba la/__khams gsum po sdug bsngal gsum las ma 'das par bsam nas don dran/__dper na dug gi 'bras bu smin pa ni blta na mdzes shing yid du 'ong ba zos na ro mngar ba sogs yod kyang khog tu song na 'chi ba ltar bsam nas dpe dran/__mthar dpe don yang bsres te bsgom pa'o/__/gsum pa rkyen sna tshogs la bsam nas sems sbyong ba la/__tshe 'di'i bya ba'i bde ba dang sdug bsngal dgra 'dul gnyen skyong*/__tshong so nam dang 'jig rten chos brgyad sogs bya ba thams cad zin dus med pa la bsam nas tshe 'di'i bya ba thams cad blos thong ba zhig bsgom pas don dran/__dper na sos ka'i dus su ri dwags kyis smig rgyu'i chu la bsnyeg pa ltar bsam nas dpe dran/__yang dpe don bsres te bsgom pa'o/__/bzhi pa tshe 'di'i bya ba thams cad don med par bsam nas sems sbyong ba la/__tshe 'di'i bya ba'i bde skyid dpal 'byor snyan grags thams cad don med pa kho na dang*/__der ma zad tshangs dbang brgya byin 'khor los bsgyur ba sogs kyi dpal 'byor thob kyang don med snyam nas don dran/__dper na gnyid thun gcig gi skabs su bde sdug ji ltar myong yang sad pa na thams cad don ci'ang med pa ltar bsam nas dpe dran/__mthar dpe don bsres te bsgom pa'o/__/lnga pa thar pa dam pa'i 'bras bu ni nam yang ldog tu med par bsam nas sems sbyong ba la/__thar pa la'ang gsum/__thar pa chung ngu nyan thos/__'bring rang rgyal/__khyad par du'ang thar pa dam pa rdzogs pa'i sangs rgyas kyi go 'phang thob na sdig sgrib bag chags dang bcas pa spangs pas rang don du spang rtog mthar phyin nas zhi ba dam pa chos kyi sku brnyes pa dang*/__gzhan don du gzugs sku rnam pa gnyis la brten nas gdul bya'i don rtag khyab lhun grub tu byed la de'i spang rtogs la nam yang ldog tu med pas na 'bras bu de 'dra zhig nam thob bsam nas don dran/__dper na 'brum nad las thar pa'i skyes bu slar yang 'brum nad kyis mi mnar ba ltar bsam nas dpe dran/__dpe don bsres te bsgom pa'o/__/drug pa bla ma dam pa'i gdams ngag la bsam nas sems sbyong ba la/__de lta bu'i thar pa thob pa'i rgyu med du mi rung ba ni bla ma'i gdam ngag yin te/__de la dang po bla ma brtag pa la mkhas pa/__gzhan gyi tshig gi rjes su mi 'brang zhing bla ma rtogs pa dang ldan pa/__nyams myong dang ldan pa/__brgyud pa gsum gyi byin brlab dang ldan pa'i mtshan nyid dang ldan pa'i bla ma la bsten pa/__bar du bla ma bsten pa la mkhas pa rab sgrub pas mnyes pa/__'bring zhabs tog gis mnyes pa/__tha ma zang zing gis mnyes par byas/__mi mnyes pa skad cig tsam yang mi sgrub/__tha ma dgongs spyod bslab pa la mkhas pa bla ma byin rlabs dang ldan pa las gdam ngag gi bdud rtsi thob par byas/__thob pa bzhin nyams myong mthar dbyung ba'i sgo nas bla ma'i spang rtogs kyi yon tan thams cad rang rgyud la par btab pa bzhin 'byung zhing*/__rang rgyud kyi yon tan thams cad dbyar gyi myu gu ltar 'phel zhing bla ma'i gdung 'tshob par bya bsam nas don dran/__dper na khang bzang du 'dzegs pa'i them skas ltar bsam nas dpe dran/__yang dpe don bsres te bsgom pa'o/__/bdun pa rnam par mi rtog pa'i ting nge 'dzin la brten nas sems sbyong ba la gsum las/__bde stong rnam par mi rtog pa dang*/__gsal stong rnam par mi rtog pa dang*/__chos nyid rnam par mi rtog pa'o/__/dang po ni/__lus phyi gsal nang gsal 'od kyi rang bzhin can bsgom zhing lus sems bde hril gyis song bar mos pa ni bde bas thabs byas pa'i rtse gcig pa'i ting nge 'dzin yin no/__/gnyis pa gsal stong rnam par mi rtog pa ni/__rang gi lus kyi skyil krung bde lugs su gzhag__/lag pa gnyis kyis pus mo bkab/__mig ha re bar snang la blta/__phyi rol gyi tshogs drug gi snang ba mi dgag__/nang gi sems der 'dzin dang bral ba'i ngang du rnam rtog thams cad thol skyes rbad chod kyi tshul du mi rtog pa'i ngang du gzhag pa ni gsal bas thabs byas pa'i rtse gcig pa'i ting 'dzin yin no/__/gsum pa chos nyid rnam par mi rtog pa ni/__sems kyi chos nyid gnas lugs ma bcos pa dus gsum gyi rtog pa dang bral ba'i ngang du gzhag pa ni rtse gcig pa'i ting nge 'dzin yin no/__/las su rung ba la skyed rdzogs kyi nyams len gang byed kyang dka' tshegs med par 'grub pa yin pas de ltar bsgom pa ni don dran pa/__dper na zhing sa dul ba la sa bon btab na dka' tshegs med par 'bras bu 'byung ba bzhin bsam pa ni dpe dran pa/__mthar dpe don bsres te bsgom par bya'o/__/de yan chad thun mong gi sngon 'gro'o/__/gnyis pa khyad par gyi sngon 'gro gsag sbyong rnam pa lnga las/__thar pa'i lam gyi rtsa ba skyabs 'gro__/thams cad mkhyen pa'i rtsa ba byang chub kyi sems skyed pa/__'gal rkyen sdig sgrib sbyong bar byed pa nang gi rdo rje sems dpa'i bsgom bzlas/__mthun rkyen tshogs rdzogs par byed pa nang gi maN+Dal/__byin rlabs myur du 'jug par byed pa bla ma'i rnal 'byor ro/__/dang po ni/__a:__ka dag gting gsal chos kyi sku:__lhun grub rig rtsal longs spyod rdzogs:__dbyer med thugs rje sprul pa'i skur:__rang ngo shes pas skyabs su mchi:__zhes pas bstan te/__de la'ang kun rdzob brdar btags pa'i skyabs 'gro dang*/__don dam yongs shes kyi skyabs 'gro gnyis kyi dmigs rim ni thig le gsang rdzogs su gsal/__gnyis pa sems skyed la'ang kun rdzob dang don dam gnyis las/__dang po gzhung spyi ltar ro/__/gnyis pa don dam ni/__ho:__glo bur 'khrul pa'i 'gro ba kun:__gdod nas rnam dag dbyings kyi ngang :__ye shes rig pas rang grol phyir:__cog bzhag chen por sems bskyed do:__zhes pas bstan pa thig le gsang rdzogs su gsal/__gsum pa 'gal rkyen sgrib sbyong rdor sems sgom bzlas ni/__a:__bdag nyid tha mal lus kyi dbus/__rtsa gsum 'khor lo bzhi dang bcas/__dwangs gsal 'od kyi rang bzhin gyi/__mar sne lte 'og sor bzhi'i sbubs/__bla ma dpal ldan rdo rje sems/__/dmar gsal zhal gcig phyag gnyis pa/__/rdo rje dril 'dzin longs sku'i chas/__/rang 'od rig ma'i bde bas dgyes/__/rdo rje pad+ma'i skyil krung gis/__/pad+ma zla ba'i gdan gyi steng*/__/dwangs ma 'od lnga'i klong na bzhugs/__/bla ma rdo rje sems dpa' la/__/mi phyed gus pas gsol ba 'debs/__/bdag gi sdig sgrib nyes ltung kun/__/byang zhing dag par byin gyis rlobs/__/rtse gcig gsol ba btab pa las/__/ye shes me 'bar rtsa 'khor khyab/__/sgo gsum cha mnyam sdig sgrib kun/__/bsregs sbyangs rang lus 'od kyi sku/__/rdo rje sems dpa'i gsang gsum dang*/__/dbyer med ma bcos lhug par shar/__/zhes pas bstan te/__de'ang rang nyid gnyug ma'i lhar gsal ba'i lus stong chen sgrib g.yogs dang bral ba'i dbus su rtsa dbu ma phyi dkar la nang dmar ba sbom phra srin mdzub gyi tshad tsam yar sne spyi bor phug rdug gi rnam pa/__mar sne lte 'og sor bzhi'i thad du kha dong nge ba'i rnam pa/__g.yas su ro ma dmar mo rdul gyis gang ba/__g.yon du rkyang ma dkar mo khu bas gang ba/__gnyis ka gsher bag gi rang bzhin can/__dbu ma las sum 'gyur tsam gyis phra ba/__yar sne dbu ma las sor gcig tsam dma' zhing sna bug g.yas g.yon du zug pa/__mar sne lte 'og tu yi ge cha'i 'phongs lta bu'i tshul gyis dbu mar chud pa/__de nas smin mtshams nas sor bzhi 'jal ba dpral ba/__de nas yang sor bzhi 'jal ba mtshogs ma/__yang sor do 'jal ba'i mtshams su spyi bo bde chen gyi 'khor lo rtsa 'dab so gnyis gdugs kyi rtse mo ltar kha thur bstan gyi rnam pa dang*/__mgrin pa an stong gi thad du rtsa 'dab bcu drug gdugs gan rkyal du log pa ltar kha gyen bstan can/__snying dkar nag gi thad du rtsa 'dab brgyad dang*/__lte ba'i bug pa'i thad rtsa 'dab drug cu re bzhi po de gnyis sngar ltar gdugs kha sbyor ltar dang*/__rtsa 'khor bzhi po gnas tshul bzhi las brgyad sogs dang*/__yang na rtsa 'khor las rtsa 'dab re re bzhin gdugs kyi rtsibs ma ltar bsgom na gegs chung*/__rtsa 'dab thams cad stong sing nge ba 'od kyi rang bzhin can gsal btab/__lte ba'i rtsa 'khor gyi 'og tu dbu ma'i nang du pad+ma nyi zla'i gdan la ngo bo rtsa ba'i bla ma la rnam pa bcom ldan 'das dpal rdo rje sems dpa'/__rnam 'gyur gsung pad+ma'i rigs sku mdog dmar po rdo rje dang dril bu 'dzin pas yum dang mnyam par sbyor ba/__rgyu gtum mo'i gzhi gnas las byung ba gsal gdab pa ni rten gyi stobs/__rdor sems la mos gus gdung shugs drags pos gsol ba gdab/__sngar byas pa'i sdig pa la khong du dug song ba ltar 'gyod sems drags po byas pa ni rnam pa sun 'byin pa'i stobs/__phyin chad srog la bab kyang mi byed snyam pa ni nyes pa las slar ldog pa'i stobs/__gsol 'debs yi ge brgya pas thugs rgyud bskul/__rlung ro bsal/__'og rlung bskum/__steng rlung mnan pa'i rkyen gyis lte ba'i rdor sems las ye shes kyi me lce dmar hur gyis 'bar/__de yar song lte ba'i rtsa 'khor rim gyis gang*/__'khrig pa'i gnas skabs kyi snyoms 'jug gi sgrib pa dang*/__nyon mongs pa 'dod chags kyi sgrib pa bsregs shing sbyangs/__snying ga'i rtsa 'khor gang*/__gnyid 'thug gi sgrib pa dang gti mug gi sgrib pa bsregs shing sbyangs/__mgrin pa'i rtsa 'khor gang*/__rmi lam dang phrag dog gi sgrib pa bsregs shing sbyangs/__spyi bo'i rtsa 'khor gang*/__sad pa'i sgrib pa dang zhe sdang dang nga rgyal gyi sgrib pa bsregs shing sbyangs/__de'i mnyam du sems can thams cad kyi sdig ltung dag par mos la/__mthar bshags sdom bya ba ni/__ru tra'i smre bshags sam/__yang na bde mchog mngon 'byung gyi rgyud las byung ba'i/__mgon po bdag ni sogs/__bsdu na 'phags pa rin po che'i gsung*/__sku gsung thugs rtsa ba dang yan lag gi dam tshig nyams chag thams cad mthol lo bshags so/__/sdig sgrib nyes ltung dri ma'i tshogs thams cad byang zhing dag par mdzad du gsol/__zhes sogs brjod la/__bla ma rdo rje sems dpas sdig ltung dag pa'i gnang ba byin par mos pa rnams gnyen po kun spyod kyi stobs yin no/__/mthar rdo rje sems dpa'i gsang ba gsum dang rang gi lus ngag yid gsum dbyer med du gyur par mos pa'i ngang du mnyam par gzhag__/nang gi tshogs bsag bya na bsdu mi dgos so/__/bzhi pa mthun rkyen tshogs gsag nang gi maN+Dal ni/__mthar ni ye shes me lce yis/__/spyi bo'i ha~M las bdud rtsi drangs/__/'khor lo'i gnas bzhir son pa las/__/bla ma sku bzhi'i dkyil 'khor pa/__/dga' mchog khyad par lhan skyes kyi/__/ye shes chen pos rab mnyes nas/__/bde chen 'bras bu'i tshogs chen rdzogs/__/rdo rje bzhi dang dbyer med gyur/__/sngar ltar gsal ba'i spyi bo'i rtsa 'khor gyi steng tsam du khams nyis dwangs sum dwangs kyi dwangs ma haM mgo thur bstan gyi rnam pa gsal gdab/__sgrub pa'i maN+Dal/__spyi bo'i rtsa 'khor gyi dbus su bla ma sku rdo rje'i ngo bo sku mdog dkar po/__mgrin par bla ma gsung rdo rje sku mdog dmar po/__snying gar bla ma thugs rdo rje sku mdog mthing ga__/lte bar bla ma ye shes rdo rje sku mdog ser po/__bzhi ka'ang zhal gcig phyag gnyis pa rdo rje dang dril bu 'dzin pa yum gri gug dang thod pa 'dzin pa dang mnyam par sbyor ba/__bde chen lhan cig skyes pa'i ye shes mngon du byed pa'i thabs spyi mgrin snying ga lte ba rnams su rtsa 'dab kyi grangs dang mnyam pa'i 'khor lo so so'i gtso bo dang kha dog mthun pa'i mkha' 'gro ma gri gug dang thod pa 'dzin pa dang mnyam par sbyor ba/__mchod pa'i maN+Dal/__bla ma rdo rje sems dpa' la mos gus bskyed cing*/__sngar ltar rlung sbyor gyi gtum mo'i me dang dbyer med pa'i rdo rje sems dpa' las ye shes kyi me lce dmar hur gyis 'bar/__lte ba snying ga mgrin pa'i rtsa 'khor rnams khyab/__de nas spyi bo'i steng gi haM yig la phog pa tsam gyis nA da'i rtse mo nas byang sems dwangs ma'i rgyun wa thigs 'dzag pa lta bu bab/__thigs pa bsags pas rgya mtsho bzhin du rtsa 'khor gang*/__bla ma sku rdo rje 'khor dang bcas pa la phog pas dga' ba'i mchod pas mnyes/__rags pa lus dang phra ba rtsa'i sgrib pa dag__/lus dang rtsa la brten nas tshogs rdzogs/__mthar thug 'bras bu snang stong sku rdo rje dang dbyer med du gyur par mos/__de nas rim gyis mgrin pa'i rtsa 'khor gang*/__bla ma gsung rdo rje dang bcas pa la phog pa tsam gyis mchog dga'i mchod pas mnyes/__rags pa ngag dang phra ba rlung gi sgrib pa dag__/ngag dang rlung la brten nas tshogs rdzogs/__mthar thug 'bras bu grags stong gsung rdo rje dbyer med du gyur par mos/__snying ga'i rtsa 'khor gang*/__bla ma thugs rdo rje 'khor dang bcas pa la phog pa tsam gyis dga' bral gyi dga' bas mnyes/__rags pa yid dang phra ba thig le'i sgrib pa dag__/yid dang thig le la brten nas tshogs rdzogs/__mthar thug 'bras bu rig stong thugs rdo rje dang dbyer med du gyur par mos/__lte ba'i rtsa 'khor gang*/__bla ma ye shes rdo rje 'khor dang bcas pa la phog pa tsam gyis lhan skyes kyi dga' bas mnyes/__sgo gsum cha mnyam dang 'pho ba'i sgrib pa dag__/sgo gsum cha mnyam la brten nas tshogs rdzogs/__mthar thug 'bras bu ye shes rdo rje dang dbyer med du gyur par mos/__yul can dga' ba bzhis drangs pa'i yul stong pa nyid mthar thug pa'i bde chen lhan cig skyes pa'i ye shes mngon du gyur pa yin no snyam du nga rgyal gzung zhing*/__ma hA su kha badz+ra satwa a haM:__zhes ci rigs brjod/__ma hA chen po dang*/__su kha bde ba/__badz+ra rdo rje/__sa twa sems dpa'/__a ha~M nga'o/__/zhes bde ba chen po'i rdo rje sems dpa' nga'o zhes pa'i don no/__/mthar mi dmigs pa'i ngang du gzhag par bya'o/__/lnga pa bla ma'i rnal 'byor ni/__rang nyid sgyu lus bla ma dang dbyer med pa'i lhar gsal ba dang*/__mdun du tshogs zhing gi rten gsal gdab pa/__tshogs gsag pa'i slad du yan lag bdun pa 'bul ba dang*/__byin rlabs myur du 'jug par byed pa'i phyir gsol ba gdab pa/__mjug dbang bzhi blang zhing de kho na nyid la mnyam par 'jog pa dang lnga'o/__/dang po ni/__ka dag gi ngang las seng ge dang pad+ma nyi ma'i khri'i steng du rang nyid gnyug ma'i lha dang bla ma dbyer med pa'i ngo bo sing he shwa ra rnal 'byor spyod pa khro 'dzum sgeg pa'i nyams can kha dog dmar smug mnyam gzhag dang skyil krung can/__dar dang rin po che dang rus pa'i rgyan gyis brgyan pa/__sku lus kyi cha thams cad rgyal ba rab 'byams til gong kha phyes pa lta bus gang ba/__ba spu'i khung bu thams cad nas rdo rje ye shes kyi me khro chung gi tshogs dang bcas pa 'phro bas bdud dang bar du gcod pa thams cad sreg par mdzad pa/__'khor du brgyud gsum gyi bla ma dang dpa' bo dang mkha' 'gro'i tshogs kyis bskor ba/__smin mtshams su chos 'byung dkar po rtsa ba phra ba dbu ma la zug cing*/__kha gdengs g.yel ba'i zur gcig gyen la bstan pa'i nang du bde chen thig le dga' ba 'khyil ba dkar po 'od 'bar ba g.yon skor du drag tu 'khor ba zhes/__rang gi sems nyid gdod ma nas rnam par dag pa ka dag gi ngang las snang ba thams cad 'od gsal gyi dbyings su thim pas skad cig gis rang nyid gang du gnas pa'i go sar seng ge pad+ma nyi ma dang zla ba'i gdan gyi steng du/__rang nyid gnyug ma'i lha dang bla ma dbyer med pa'i ngo bo sing he shwa ra rnal 'byor spyod pa'i brtul zhugs can spyan hur bag tu gzigs shing tshems kyi myu gu cung zad gtsigs pa khro ba'i nyams can/__zhal gyi mchu sgros 'dzum pa'i nyams can/__sku sha shin tu rgyas pa'i nyams kyis sgeg pa/__zhal gcig phyag gnyis mnyam gzhag__/zhabs gnyis rdo rje'i skyil krung can/__dar sngon po'i stod g.yogs/__rin po che dang rus pa'i rgyan/__spyi bor rus pa'i 'khor lo dang 1/__snyan cha 2/__phyag zhabs kyi gdu bu 3ska rags 4/__mgul rgyan 5do shal dang 6se mo do dang 7/__sku stod la rus pa'i se ral kha thog pas brgyan pa 8/__sku lus thams cad la rtsa gsum rgyal ba rab 'byams til gong kha bye ba lta bus gang ba/__zhing khams thams cad sku la rdzogs pa/__sku dang zhing khams thams cad spro dang bsdu ba'i bdag nyid du gyur pa/__skus zhing khams thams cad la khyab pa/__ba spu'i khung bu thams cad nas rdo rje dang ye shes kyi me khro chung gi tshogs dang bcas pa 'phro bas bdud dang bar du gcod pa thams cad sreg par mdzad pa/__mtha' bskor kun du rgyal ba dgongs pa'i brgyud pa/__rig 'dzin brda'i brgyud pa/__gang zag snyan khung gi brgyud pa'i dpal mgon bla ma dam pa rnams dang*/__gnas gsum gyi dpa' bo mkha' 'gro'i tshogs dang*/__rdo rje'i chos skyong ba'i srung ma'i tshogs kyis bskor bar mos/__rang gi smin mtshams su chos 'byung dkar po rtsa ba phra ba phar thad kar dbu ma la zug pa/__kha gdeng g.yel ba'i zur gcig gyen du dpral bar bstan pa/__zur gnyis g.yas g.yon du bstan pa'i dbus su bde chen thig le'i g.yung drung dga' ba 'khyil ba dga' bzhi mtshon byed khug pa bzhi dang ldan pa/__kha dog dmar po 'od 'bar ba g.yon du drag tu 'khor bar bsgom mo/__/gnyis pa mdun du tshogs rten gsal gdab pa ni/__smin mtshams ky-i thad phar khru gang dang yar khru gang mtshams su sna tshogs pad+ma dang nyi zla'i gdan gyi steng du skyabs gnas thams cad 'dus pa'i ngo bo rtsa ba'i bla ma la/__rnam pa 'od gsal snang bzhi mthar son par mdzad pa'i bi ma la mi tra sku mdog dkar gsal gangs kyi ri la nyi ma 'char ba lta bu/__shangs rtser skye med mtshon byed yi ge a dkar po thigs la khad pas mtshan pa/__phyag gnyis mnyam gzhag gis thod pa bcud kyis bkang ba thugs kar bsnams pa/__dar sngon po'i stod g.yogs dang*/__sku smad la thang shams dang*/__chos gos rnam gsum gsol ba/__zhabs gnyis skyil mo krung gis rang la dgyes ye re bzhugs pa/__rig pa tshad phebs kyi snang ba ltar snang srid thams cad 'ja' zer thig le mer mer shig shig g.yo bar bsam pa ni bdag mdun gyi dam tshig pa gsal gdab pa dang*/__ye shes pa spyan drang ba ni/__bdag mdun gyi thugs ka nas 'od zer mu mtha' med pa 'phros/__'og min gyi zhing nas rtsa gsum rgyal ba rab 'byams thams cad lce btsun sing ha shwa ra dang bi ma mi tra'i rnam par byon pa dang*/__khyad par 'od gsal snying thig gi brgyud gsum dpal mgon bla ma dam pa sogs spyan drangs te bdag mdun rnams la thim par mos la kun bzang don phrin ltar spyan 'dren gyi tshig brjod par bya'o/__/gsum pa tshogs gsag slad yan lag bdun 'bul ba ni/__kun rdzob brdar btags pa dang*/__don dam yongs shes gnyis las/__dang po rang gi lus rdul snyed kyi zhing ltar sprul nas sems can thams cad dang bya byed 'jug pa gcig pa'i sgo nas phyag 'tshal ba dang*/__rang gi lus longs spyod dge tshogs rgya mtsho lta bu'i rgyu las byung ba'i phyi nyer spyod/__nang dam rdzas bdud rtsi/__gsang ba snyoms 'jug gi bde ba/__yang gsang de kho na nyid sogs mchod pa'i sprin phung mtha' yas pa 'bul ba dang*/__dran pa dang mi dran pa'i sdig ltung snying thag pa nas bshags pa dang*/__'khor 'das lam gsum gyi zag bcas dang zag med kyi dge tshogs la phrag dog med pa'i sgo nas rjes su yi rang ba dang*/__phyogs bcu dus bzhi'i rgyal ba sras dang bcas pa thams cad la chos kyi 'khor lo bskor bar bskul ba'i gsol ba gdab pa dang*/__de dag thams cad 'chi med rtag pa dam par bzhugs shing mya ngan las mi 'da' bar gsol ba gdab pa dang*/__dus gsum du bsags shing bsgrubs pa'i dge ba'i rtsa ba chos kyi dbyings la mi bsngo ba'i bsngo ba dam pa'i tshul gyis bsngo ba'o/__/gnyis pa don dam ni/__a:__snang bzhi mthar phyin bla ma la:__'du 'bral med par phyag 'tshal lo:__rlung sems dag pa'i mchod sprin 'bul:__sdig ltung 'dus ma byas par bshags:__gnyis 'dzin bral bas rjes yi rang :__brjod med chos 'khor bskor bzhin du:__yongs grub chen por bzhugs gsol 'debs:__dge tshogs 'od gsal dbyings su bsngo:__zhes snang bzhi mthar phyin pa'i bla ma sangs rgyas dang*/__rang gi rig pa ngo bo stong pa chos sku dang*/__rang bzhin gsal ba longs sku dang*/__thugs rje 'gag med rtsal sna tshogs su 'char ba sprul sku dang*/__sku gsum dbyer med pa'i ngang nas phyag 'tshal ba dang*/__rlung 'jug gnas ldang gsum dbu mar zhugs shing dag pa'i sgo nas mchod pa'i sprin phung 'bul ba dang*/__sdig ltung thams cad ye nas rang bzhin gyis stong pa 'dus ma byas pa'i ngang du bshags pa dang*/__'khor 'das lam gsum gyi dge ba la rjes su yi rang bya ba dang byed pa thams cad gnyis 'dzin bral ba'i tshul gyis rjes su yi rang ba dang*/__spros bral mnyam pa chen po mi shigs nA da'i dbyangs su chos 'khor bskor bar gsol ba gdab pa dang*/__rgyal ba sras bcas 'chi med rtag pa dam pa'i yongs grub chen por bzhugs su gsol ba 'debs pa dang*/__dge tshogs thams cad 'od gsal chos kyi dbyings su mi bsngo ba'i tshul gyis bsngo ba dam pas bsngo ba'o/__/bzhi pa byin rlabs myur du 'jug phyir gsol ba gdab pa ni/__yon tan rjes su dran pa'i sgo nas gsol ba gdab pa dang*/__'dod pa'i don la gsol ba gdab pa dang gnyis las/__dang po ni/__'od gsal snang bzhi mthar phyin nas:__rig pa mi 'gyur sku lngar bzhengs:__'ja' lus pho chen dwangs ma'i gzugs:__'chi med bi ma mi tra kye:__zhes pas bstan/__gnyis pa 'dod don gsol gdab ni/__bdag la thugs rjes brtser dgongs nas:__mngon sum byin rlabs deng rtsol cig__/ces kyis bstan/__zhes de ltar gsol ba phur tshugs su gdab cing 'dod don gsol ba ste/__'od gsal snang bzhi mthar phyin cing sangs rgyas thams cad dang dbyer med pa'i bdag nyid bi ma mi tra khyed kyi sgo gsum bdag gi lus ngag yid gsum dang dbyer med du dus phyi dus la mi ltos par da lta nyid du 'dug sa 'di nyid du stan thog 'di nyid du myur ba nyid du byin gyis brlab par mdzod cig ces gsol ba gdab/__yon tan gyi ngos nas sangs rgyas thams cad dang mnyam zhing*/__bka' drin gyi ngos nas sangs rgyas thams cad las lhag par thag bcad/__nges shes skyed/__lus kyi ba spu ldang ba/__mig nas mchi ma 'khrugs pa/__bsam rgyu bla ma las med pa/__blo sna bla mas 'phrog pa/__phar thim phod pa/__tshur 'bral mi phod pa'i mos gus kyis dus 'di nas gzung ste byang chub snying po'i bar du mthor gtong dmar gtong skyid sdug legs nyes ci byung yang ci mdzad khyed mkhyen no snyam pa'i mos gus gdung shugs drags po'i sgo nas gsol ba yang yang gdab/__gsol 'debs bsnyen pa'i tshul du bzla ba ni/__oM AHhU~M gu ru bi ma la mi tra hU~M hU~M:__zhes/__oM AHhU~M ni sku gsum gyi rang bzhin dang*/__yang na rdo rje gsum gyi sa bon gyis thog drangs/__gu ru bla ma dang*/__bi ma la dri med/__mi tra bshes gnyen/__hU~M hU~M:__zhes thugs rgyud bskul ba'i don yin te mchog thun mong gnyis kyi dngos grub stsol cig__/ces pa'i sgo nas gsol ba gdab pa'o/__/lnga pa dbang bzhi len zhing de kho na nyid la mnyam par 'jog pa dang rjes 'brel bla rnal lam du bya ba bcas ni/__gsol ba btab pa'i mthar bdag la dbang bzhi bskur ba'i gnang ba bstsal du gsol zhes bsams pas/__smin mtshams kyi dpral ba'i oM las 'od zer dkar po zla ba lta bu dang*/__de las rang 'dra'i sku chung la yan lag dod pa phyag mtshan gsal ba dpag tu med pa byung*/__rang gi dpral bar thim/__lus dang rtsa'i sgrib pa dag__/spros bcas bum pa'i dbang thob/__snang srid gzhir bzhengs kyi dkyil 'khor bsgom pa la dbang*/__sa brgyad pa non/__'bras bu sku lnga thob pa'i skal ba can du byas/__bla ma'i mgrin pa'i AHlas 'od zer dmar po 'char kha'i zer thag lta bu dang*/__de las A li kA li'i phreng ba dpag tu med pa byung*/__rang gi mgrin par thim/__ngag dang rlung gi sgrib pa dag__/spros med gsang ba'i dbang thob/__skye med rang byung rdo rje'i bzlas pa la dbang*/__sa bcu gcig pa non/__'bras bu gsung lnga thob pa'i skal ba can du byas/__bla ma'i thugs ka'i hU~M las 'od zer sngon po mthing zhun gyi dwangs ma lta bu dang*/__de las a yig mthing gsal dpag tu med pa byung*/__rang gi snying gar thim/__yid dang th-ig le'i sgrib pa dag__/shin tu spros med sher dbang thob/__bde chen 'od gsal gyi ye shes bsgom pa la dbang*/__sa bcu gsum pa non/__'bras bu thugs lnga thob pa'i skal ba can du byas/__yang bla ma'i gnas gsum ka nas 'od zer dkar dmar mthing gsum 'ja' tshon shar ba lta bu dang*/__tsit+ta rin po che'i sbubs nas 'od lnga'i gong bu tshon gang ba byung*/__rang gi gnas gsum dang snying gi dbus su thim/__cha mnyam ye shes kyi sgrib pa dag__/rab tu spros med dbang bzhi pa thob/__ka dag lhun grub zung 'jug bsgom pa la dbang*/__ye shes bla ma'i sa non/__'bras bu yon tan lnga dang phrin las lnga thob pa'i skal ba can du byas/__mthar bla ma nyid dgyes pa chen pos 'od du zhu ste rang gi smin mtshams su dga' ba 'khyil ba'i dbus su thim pas/__thig le dkar po a yig gis mtshan pa sran ma tsam dwangs gsal g.yo med du gyur pa la sems rtse gcig tu gzung ba ni sngags kyi zhi gnas 'grub thabs yin zhing*/__mthar de yang nam mkha' la 'ja' yal ba bzhin du mi dmigs pa'i ngang du bzhag cing*/__bla ma'i thugs dang rang gi rig pa gnyis bsam brjod dang bral ba'i rig stong rjen pa'i ngang du gzhag pa ni bla ma chos sku'i rang zhal blta ba yin no/__/spyir bla ma phyi sprul sku la bsnyen pa mdun gyi nam mkha' la tshogs rten gsal zhing gsag sbyang bya ba dang*/__nang longs sku bsgrub pa dbang bzhi blang ba/__gsang ba chos sku las la sbyar ba thugs yid dbyer med bsre ba'i ngang du gzhag par bya ba yin no/__/dge ba bsngo zhing smon lam gdab par bya'o/__/skabs 'dir byin rlabs bla ma'i rnal 'byor lam du bya ba la gsum/__sku skyed rim phyag rgya'i rnal 'byor/__gsung bzlas pa sngags kyi rnal 'byor/__thugs 'od gsal de kho na nyid kyi rnal 'byor ro/__/dang po ni/__tshogs sogs dang 'brel na sman raka gtor ma spyi 'gros ltar bshams/__de nas don gyi phrin las la 'jug pa/__rang nyid rta mchog rol pa'i nga rgyal gyis bgegs bskrad/__srung 'khor bsgom/__byin dbab/__mchod pa byin brlabs/__bdag skyed sngar ltar bsgoms shing spyan 'dren bzhugs gsol sogs dang*/__phyag mchod bstod pa'i bar du grub rjes/__rang nyid lce btsun chen por gsal ba'i lhar snang la sems rtse gcig tu gzung*/__de yang rnam pa gsal ba/__nga rgyal brtan pa/__rnam dag dran pa sogs spyi ltar bya/__de ltar lha'i gsal snang la brtan pa thob tshe gsung bzlas pa sngags la 'jug par bya'o/__/gnyis pa gsung bzlas pa sngags kyi rnal 'byor la gnyis/__bdag don byin rlabs bsdu ba'i rim pa dang*/__gzhan don phrin las mkha' khyab tu spel ba'i rim pa gnyis so/__/dang po ni/__sngags don dran pa sogs kyi sgo nas rlung 'byung gnas ldang gsum dang sbyar zhing gsol 'debs bsnyen pa'i tshul du bzlas pas thugs rgyud bskul zhing*/__bum can rdor bzlas sbrags te yid bzlas bya zhing sems 'dzin/__skyo na smin mtshams kyi thig le las 'od zer 'phros/__dag pa'i zhing rab 'byams thams cad la khyab/__de dag na gnas pa'i skyabs gnas dkon mchog rgya mtsho thams cad dang*/__khyad par 'od gsal snying thig gi brgyud pa'i bla ma rnams kyi gsang ba gsum gyi byin rlabs thams cad sku dang yig 'bru phyag mtshan gyi rnam pa char drag tu babs pa tsam du spyan drangs nas thig ler thim pas lus thams cad la khyab par bsam pa'o/__/gnyis pa gzhan don phrin las mkha' khyab tu spel ba'i rim pa ni/__yang mar 'phros ma dag pa'i zhing rab 'byams thams cad la khyab/__brtan g.yo snod bcud thams cad dag pa'i zhing rab 'byams su bsgyur bar bsam zhing*/__gong du sngon 'gro'i skyabs sems yig brgya rnams 'bum ther dang*/__bla ma'i rnal 'byor gyi bsnyen pa 'bum phrag bcu gnyis brjod par bya/__thun mthar mchod bstod ci rigs bya'o/__/gsum pa thugs 'od gsal de kho na nyid kyi rnal 'byor ni/__de nas snod bcud thams cad ril gyis bsdus te rang gi lus la gzhug:__de yang bsdus te smin mtshams kyi thig le la thim pas shin tu 'od gsal bar bsams la sems yun ring du 'jog pas rnam rtog gi rba rlabs zhi ba'i ting nge 'dzin mu mtha' med par skye'o:__zhes thig le la sems 'dzin pa ni rten bcas yin zhing*/__mthar de yang 'ja' tshon mkha' la yal ba ltar dmigs su med pa'i ngang du mnyam par 'jog go:__zhes gsar du gshegs pa'i stong nyid dang*/__gdod nas rang babs kyi stong nyid gnyis dbyer med pa'i ngang la mnyam par 'jog pa ni thugs 'od gsal de kho na nyid kyi rnal 'byor yin no/__/gnyis pa dngos gzhi'i khrid la gsum/__dbang po rab tshe 'dir grol ba/__'bring bar dor grol ba/__tha ma rang bzhin sprul sku'i zhing du dbugs dbyung ba'o/__/dang po la gsum/__sngon 'gro 'khrul gzhi rtsad nas gcod pa'i gnad:__dngos gzhi 'khrul pa rang sar grol ba'i gnad:__rjes 'khrul snang ye shes su rang shar ba'i gnad do:__dang po la bzhi/__lus sbyong*/__ngag sbyong*/__sems sbyong*/__de thams cad la rgyas 'debs pa'i gnad do/__/dang po ni/__lus mi 'gyur ba rdo rje'i 'dug stangs la gnas par bya'o:__zhes 'bol gdan chen po'i steng du rang gi lus gcer bur phyung zhing*/__smad dkris kyi rnam pa gyon zhing rkang pa'i mthil gnyis sprad/__sor rtse gnyis sa la btsug__/lag pa gnyis thal mo sbyar zhing spyi bor ma reg par bya/__lag pa gnyis dang mgo rnams rdo rje'i rwa yar rtse gsum dang*/__rkang pa gnyis dang 'phongs rnams mar rtse gsum/__rked pa rdo rje'i lte ba mtshon byed yin zhing*/__rang lus rdo rje sngon po me 'bar zhing 'od sna tshogs 'khrigs pa'i rang bzhin bsgoms la/__lus tshugs mi thub na gang du 'gyel ba'i sa la rang bzhag nas rnam par mi rtog pa'i ngang du gzhag par bya'o/__/gnyis pa ngag sbyong ni/__ngag mi smra bar hU~M gi rang sgrar 'char bar bya'o:__zhes rang gi lus phyi gsal nang gsal 'od kyi thig le can du bsgoms la/__snying ga'i thad du hU~M sngon po mkhyid gang ba tsam du gsal btab la/__tha mal gyi ngag gi smra brjod rbad kyis bcad la/__ngag tu hU~M hU~M zhes che chung spel ma'i tshul gyis dal bar brjod/__snying ga'i hU~M las hU~M grangs med pa 'phros/__sna bug g.yas nas phyir thon nas gnas khang yul phyogs sogs hU~M gis gang bar mos/__slar yang hU~M de rnams sna bug g.yon nas tshur lus kyi nang du zhugs nas lus kyi nang thams cad bang ba 'brus khengs pa bzhin gang bar mos pa ni rgyas gdab pa'i rim pa'o/__/yang snying ga'i hU~M las ngo bo tsha zhing rtsub pa/__rang bzhin myur ba/__rtse mo rno ba/__shugs drag ldan pa ste khyad chos bzhi dang ldan pa'i rnam pa can mang po 'phros/__rang gi yul dang gnas khang sogs khral khrol gyi rnam par byed/__de nas stong gsum 'jig rten tshun chad hU~M gis gang zhing khral khrol gyi rnam par byas par mos pa ni rtsal sbyong ba dang gnas yul sogs la bden 'dzin sbyong ba yin zhing*/__ngag sbyong dang ngag ru shan dbye ba gnyis stabs gcig tu byas pa yin no/__/gsum pa sems sbyong ni/__yid ma yengs par byung gnas 'gro gsum gtan la dbab par bya'o:__zhes tha mal gyi lus ngag yid gsum gyi bya byed thams cad la rang gis/__lus ngag yid gsum gtso gang che brtags pa na/__lus ni bem po dang*/__ngag ni lus sems gnyis kyi rjes su 'gro ldog gi rnam pa can yin zhing*/__yar mya ngan las 'da' ba dang*/__mar 'khor bar 'khyams mkhan ni sems yin par rtogs shing*/__sems de yang dang po byung sa/__bar du gnas sa/__tha ma 'gro sa/__zlum po gru bzhi la sogs pa'i dbyibs dang*/__dkar ser la sogs pa'i kha dog dang*/__gcig dang du ma la sogs pa gang du grub brtag tsa na/__dang po skye ba'i rgyu'i stongs/__bar du gnas pa'i ngo bo'i stongs/__tha ma 'gags pa'i 'bras bu'i stongs/__dbyibs kha dog gcig dang du ma la sogs pa spros pa'i mtha' thams cad las 'das par thag chod cing*/__rig thog tu gdar sha chod par byas shing gzhi med rtsa bral du gtan la phab pa ni sems kyi khang bu rdib pa'i man ngag sems kyi mtshang btsal ba'i rim pa'o/__/bzhi pa de thams cad la rgyas 'debs pa'i gnad ni/__de thams cad dbyings las byung zhing dbyings su bskyal la dbyings las ma g.yos pa ni gnad do:__zhes nam mkha' las sprin dang po byung*/__bar du gnas la/__tha ma nam mkha'i ngang du thim pa bzhin/__lus ngag yid gsum gyi bya byed thams cad rig pa de'i ngang las byung zhing*/__bar du rig pa'i ngo bo las ma g.yos/__tha ma rig pa'i ngang du thim zhing*/__rang gi sems nyid rig stong 'dus ma byas pa'i gnas lugs gsal stong rig pa'i snying po can de nyid la dran pas ma yengs tsam bya ba gnad dam pa yin no/__/gnyis pa/__dngos gzhi 'khrul pa rang sar grol ba'i gnad ni:__zhes pa de la bzhi/__lus mi 'gyur ba ri bo cog gzhag gis gzhi gzung ngo :__ngag mi smra bar rgya mtsho cog gzhag ar la gtad do:__sems ma yengs par rig pa cog gzhag la bzla'o:__de thams cad ngo shes rtsal rdzogs brtan pa thob pa ni gnad do:__zhes pas lta ba ri bo cog gzhag rig pa ma bcos pa'i ngo bo ri bo bzhin du 'pho 'gyur med pa dang*/__bsgom pa rgya mtsho cog gzhag de'i ngang bskyangs pas rnam rtog gang shar thams cad rgya mtsho las rlabs byung zhing slar thim pa bzhin rang yal rjes med du 'gro zhing*/__spyod pa man ngag cog gzhag rang gi rig pa gsal stong rig pa'i snying po can nyams su myong bzhin du brjod pa'i mtha' thams cad las 'das pa'i ngo bo de las mi yengs pa dang*/__'bras bu snang ba cog gzhag tshogs drug gi snang ba thams cad phyi rol ma 'gags shing der 'dzin bral ba'i tshul du bsgom mo/__/dang po lus ri bo cog gzhag ni/__rang gi lus rnam snang chos bdun du bca' zhing dper na sog phon gyi thag pa lhod pa ltar bde lugs su lhod la mi 'gyur ri bo bzhin du gzhag par bya/__bying ba'i nyams bsal ba'i phyir du lus kyi cha nas sgrim zhing sgrim lhod spel ma'i tshul du gzhag par bya'o/__/gnyis pa mig rgya mtsho cog gzhag ni/__tha mal gyi ngag gi smra ba'i rgyun dang po je nyung gtang*/__mthar smra brjod thams cad pi waM gi rgyun thag chad pa bzhin rbad kyis bcad la/__rgya mtsho zhes pa mig gi a 'bras gnyis glang po che gar chang gis bzi ba ltar mig 'bras mi 'gul zhing rdzi ma mtha' rdeb tsam yang mi byed par nam mkha'i dbyings kyi ar la gtad pa gnad yin no/__/gsum pa rig pa cog gzhag ni/__rang gi sems nyid gdod nas rang bzhin gyis rnam par dag pa spros pa'i mtha' thams cad las 'das pa ngo bo stong pa chos sku/__stong nyid kyang ci med cang med nam mkha' ltar ma yin par gdangs 'gag med du 'char ba longs sku/__de gnyis mar me dang mar me'i 'od bzhin dbyer med pa'i rtsal sna tshogs su 'char ba sprul sku/__'char dus nyid nas ngo bo stong nyid las ma g.yos pa ka dag khregs chod kyi dgongs pa/__dpe dang gzhan gyi zer sgros dang go ba tsam ma yin par bla ma'i byin rlabs dang gdams ngag kho na la brten nas rtogs par bya dgos shing*/__ka dag ces pa gdod ma nas dag pa'am/__ye gzod ma nas rnam par dag pa'i don yin zhing*/__de ltar gnas lugs de nyid sangs rgyas sgam pos ma mdzad/__sems can sgrin pos ma bslad pa/__yar mya ngan las 'das pa'i dus su bzang du ma song*/__mar 'khor bar 'khyams pa'i dus su ngan du ma song*/__yul dang yul can shes dang shes bya ro gcig pa'i tshul gyis la bzla bar bya/__la bzla ba ni rtogs pa de nyid the tshom med par thag chod par bya dgos shing*/__sgra thal 'gyur rtsa ba'i rgyud las/__shes rab pha rol phyin pa ni/__/snang ba thad kar gcod la 'du/__zhes pa ltar the tshom dang bcas pa la 'bras bu 'byin pa'i dus nam yang med pas/__dper na rang 'thag gi ltag chu bcad pa bzhin du/__stong gsal 'dus ma byas pa'i rig pa'i ye shes sems ngo bral ba nyams su myong bzhin du brjod pa'i mtha' thams cad bral ba/__'das pa'i rnam rtog 'gags/__ma 'ongs pa'i rnam rtog ma skyes/__da lta'i tha mal gyi shes pa 'di la rtsis gdab mi bya bar/__dus gsum gyi rtog pa dang bral ba'i bzhi cha blo 'das chos sku'i dgongs pa'i ngang bskyang zhing*/__rnam rtog gi rnyog pas ma bslad par dran pa gsal tsam rig tsam byas te cog ger gzhag par bya ba ste de la bzhi/__lta bas thag bcad pa/__sgom pas nyams su len pa/__spyod pas bogs 'byin pa/__'bras bu'i rtags 'char tshul lo/__/dang po ni gzhung rtsa ba rdo rje'i tshig rkang las/__'di ltar snang ba thams cad blos bkod:__byung tshor dang bcas pa'i blo ni med pa gsal bar snang :__de'i dbyings ni bsam pa'i yul las 'das:__so so rang rig pa'i ye shes kyis rten med par mthong ba ni chos thams cad kyi gnas lugs ka dag gting gsal 'dus ma byas pa'o:__zhes 'di ltar phyi gzung ba'i yul gyi snang ba thams cad blos btags shing bkod pa las yul rang ngos nas grub pa med/__nang gi sems byung tshor dang bcas pa'i blo ni med bzhin du snang ba dper na rmi lam lta bu'o/__/sems de'i dbyings rig stong 'dus ma byas pa'i rang bzhin ni bsam pa'i yul las 'das/__rtags dang gtan tshigs la sogs pas mi rtogs shing so so rang rig pa'i ye shes rnam shes kyi rten med pa/__gzung ba dang 'dzin pas ma gos shing yul dang yul can gyi rtog pas ma bslad par mthong ba ni/__chos thams cad kyi gnas lugs ye gdod ma nas rnam par dag pa'i rang bzhin gting gsal ba sangs rgyas chos kyi sku dang dbyer med du bzhugs pa/__rgyu rkyen gyis 'dus ma byas pa'i ngo bo ka dag__/rang bzhin lhun grub/__de gnyis ngo bo dbyer med du bzhugs pa rig pa ma bcos par lta bas thag khrigs se chod pa ni lta bas thag bcad pa yin no/__/gnyis pa sgom pas nyams su len pa ni/__de'i 'phros las/__de ltar khong du chud pas nam mkha' rnal 'byor du bya ste:__mi sgom pa'i tshul gyis don dang mi 'bral ba la bslab bo:__zhes de ltar rig pa ngo 'phrod phan chad nam mkha' bzhin du shes dang shes bya yul dang yul can dbyer med par gzhag pa nam mkha'i rnal 'byor bya ste/__gzung 'dzin dang bcas pas mi bsgom pa'i tshul gyis rig pa rang gi ngo bo dang mi 'bral ba'i tshul gyis bsgom par bya ba yin no/__/gsum pa spyod pas bogs 'byin pa ni/__yang*/__tshogs drug gi snang ba bkra lam gyis shar na de la mi dpyod par chos nyid rang gi ngo bo'i ngang du rtsol ba klod la las zin pa'i skyes bu ltar spyod do:__zhes gtso bo _rjes thob kyi nyams len yin zhing*/__phyi rol tshogs drug gi snang ba gang shar kyang dgag sgrub gang yang mi byed par phyi rol snang ba la ma zhen pas phyi gzung ba'i yul rang sar dag cing*/__phar snang ba ma 'gags/__tshur der 'dzin ma zhugs pas nang gi sems der 'dzin bral ba'i ngang du gnas pas nang 'dzin pa rang sar dag__/bar du rig pa ma bcos pa'i ngang du gzhag pa na bar du 'od gsal rang ngo shes pa'i ngang du las zin pa'i skyes bu bzhin du spyod par bya'o/__/bzhi pa 'bras bu'i rtags 'char tshul ni/__yang*/__de'i tshe rlung sems zin pa'i rtags rnams kyang rtsol med du 'byung zhing 'od gsal ba'i lhag mthong grub pas zhi bar gnas pa nyid do:__zhes sems zin pa na rlung zin/__rlung zin pa na rlung sems dbu mar zhugs gnas thim gsum la brten nas phyi rol gyi rtags nam mkha' la du ba me stag sogs rtags lnga 'char zhing*/__rim gyis goms pas 'od gsal rang byung gi ye shes kyi lhag mthong grub pa yin no/__/bzhi pa 'bras bu snang ba cog gzhag ni/__rig pa'i ngo bo de bla ma'i byin rlabs kho na las shes par byas/__bar du rig pa'i rang tsho zin par byas pa na rnam rtog gang shar thams cad sbrul gyi mdud pa dang chu la ri mo bris pa bzhin du rang yal rjes med du 'gro ba ni rtsal rdzogs pa yin zhing*/__mthar mnyam rjes ro gcig tu 'dres shing rtog pa la bzang ngan med pa ni brtan pa thob pa yin no/__/de ltar dga' rab rdo rje'i tshig gsum gnad du rdeg pa'i man ngag ngo rang thog tu sprad/__thag gcig thog tu bcad/__gdeng grol thog tu bca' ba zhes pa dang don gyi gnad gcig pa yin no/__/de ltar rig pa ma bcos pa'i ngang du dus rtag tu bsgom pa gal che zhing*/__go ba tsam dang bshad pa mang po ji ltar byas kyang rnam rtog je mang 'gro ba'i rgyu yin pas rtse gcig tu nyams su len pa ni gnad dam pa yin no/__/gsum pa rjes 'khrul snang ye shes su rang shar ba'i khrid la bzhi/__lus mi g.yo ba bzhugs stangs gsum gyis gzhir bzung ngo*/__ngag mi smra bar gzigs stangs gsum gyis ar la gtad do:__sems ma 'khrul bar rig gdangs rdo rje lu gu rgyud kyi sbubs su gzhug go:__de thams cad kyang dbyings dang rig pa dbyer med par mnyam par sbyar ba ni gnad do:__zhes lam gyi bogs 'byin par byed pa thod rgal gyi lam ni/__khregs chod kyi lta ba goms pa'i gang zag gis nyams su len dgos shing*/__de la dang po lus kyi 'dug stangs gsum ni/__sku gsum gyi bzhugs stangs yin no/__/gnyis pa gzigs stangs gsum ni/__chos sku'i gzigs stangs gtsug tor la blta ba lta bu'o/__/longs sku'i gzigs stangs mda' mkhan gyis smyug ma bsrang ba lta bu'o/__/sprul sku'i gzigs stangs drang srong bsam gtan bsgom pa lta bu'o/__/gsum pa sems ma 'khrul bar rig gdangs rdo rje lu gu rgyud sbubs su gzhug pa ni/__de ltar bzhugs stangs dang gzigs stangs gsum gang rung gi tshul gyi sgo yul rlung rig gi gnad la gcun pa ste/__'char byed sgo'i gnad ni/__nang dbyings rtsa ka ti shel gyi sbu gu can zhes 'od rtsa snying nas mig tu 'brel ba can de la brten/__'char gzhi yul gyi gnad ni/__phyi dbyings nam mkha' stong pa slad byed kyi rkyen gsum dang bral ba de yin no/__/de lta bu'i gnad la brten nas dbyings dang rig pa rjen pa stong gsal 'dus ma byas pa de'i ngang du der 'dzin dang dmigs gtad thams cad dang bral ba'i ngang du snga dro shar dang*/__phyi dro nub tu nyi ma'i 'og tu khru gang tsam gyi nam mkha' la blta zhing*/__yang na mig la gnod na snga dro nub/__phyi dro shar du yid mig rlung gsum po rtse gcig tu dril nas rig gdangs rdo rje lu gu rgyud kyi sbubs su gzung 'dzin gyi rtog pa thams cad gzhug par bya'o/__/bzhi pa de thams cad kyang dbyings dang rig pa dbyer med par mnyam par sbyar ba ni/__sgron ma bzhi dang*/__snang ba bzhi'i lam rtags rnams gzhung gzhan dang 'dra'o/__/de'i 'phros don mtha' brten gyi man ngag gsum dang*/__phyi nang gi bya ba dgu phrugs su gtang tshul gnyis so/__/dang po la gsum/__mi 'gul ba gsum gyis gzhi bca' ba/__sdod pa gsum gyis tshad gzung ba/__thob pa gsum gyis gzer gdab pa'o/__/dang po ni/__chos nyid mngon sum gyi dus su lus bzhugs stangs gsum las mi 'gul ba dang*/__mig gzigs stangs gsum las mi 'gul ba dang*/__rig pa dbyings las mi g.yo ba'o/__/gnyis pa sdod pa gsum gyis tshad gzung ba ni/__nyams gong 'phel gyi dus su/__phyi snang ba sdod pas rkyen ngan grogs su 'char/__nang sgyu lus sdod pas 'khrul pa'i bya ba zad/__gsang ba rlung sems sdod pas rnam rtog dbyings su zhi ba'o/__/gsum pa thob pa gsum gyis gzer gdab pa ni/__rig pa tshad phebs kyi dus su phyi snang ba la dbang thob pas snang ba zhing khams su grol/__nang phung po la dbang thob pas sgyu lus 'od gsal du dengs/__gsang ba rtog pa la dbang thob pas rtog tshogs dbyings su grol lo/__/chos nyid zad pa'i dus su gdeng bzhi'i grol tshad bstan pa ni/__'khor 'das lam gsum gyi chos thams cad rig pa las gzhan du ma g.yos pa'i gdeng thob tsa na/__yar myang 'das thob pa'i re ba dang*/__mi thob pa'i dogs pa med/__mar 'khor bar ltung gi dogs pa dang*/__mi ltung ba'i re ba bral ba'i gdeng bzhi thob pa'o/__/gnyis pa phyi nang gi bya ba dgu phrugs su gtang tshul ni/__chos nyid mngon sum gyi dus su tha mal gyi lus ngag yid gsum gyi bya byed btang*/__nyams gong 'phel gyi dus su lus kyis phyag bskor sogs dang*/__ngag gis mdo bklag pa dang*/__yid kyis nges 'byung gi blo sogs dang*/__rig pa tshad phebs kyi dus su lus kyis phyag rgya sogs dang*/__ngag gis sngags kyi bzlas brjod sogs dang*/__yid kyis mtshan bcas kyi rdzogs rim sogs spangs shing phyi nang gi bya ba dgu phrugs su btang ba'o/__/gnyis pa 'bring bar dor grol ba'i khrid la gnyis/__'chi kha dbyings rig sbubs 'jug gi man ngag dang*/__chos nyid bar do'i nyams len no/__/dang po la gnyis/__dbyings rig sbubs 'jug dang*/__rlung sems gong 'pho'i man ngag go__/dang po ni/__tshe 'di nyid la go 'phang mchog ma 'grub na nam mkha' sum phrugs kyi sbyor bas mya ngan las 'da' bar bya'o:__zhes spyir bar do'i nyams len la/__rang bzhin dang skye gnas kyi bar dor thos bsam la sgro 'dogs chod pa sngar 'dris kyi mi dang 'phrad pa lta bu'i gdams ngag dang*/__'chi kha bar dor mi gsal ba la gsal 'debs pa sgeg mo la me long bstan pa lta bu'i gdams ngag dang*/__chos nyid bar dor rang snang ngo shes pa ma pang du bu 'jug pa lta bu'i gdams ngag dang*/__srid pa bar dor lam gyi 'phro mthud pa yur ba rkang chad la wa 'dzug pa lta bu'i gdams ngag bzhi yod pa las/__'dir 'chi kha nam mkha' sum phrugs kyi dgongs pas myang 'das byed tshul ni/__tshe 'dir go 'phang ma 'grub nas 'chi bslu sogs kyis 'chi ba bzlog ma nus na/__lus seng ge'i nyal stabs sogs kyis nang gi dbyings rig pa rang byung gi ye shes ngo bo rang bzhin thugs rje'i bdag nyid can gyi rig pa ma bcos par bzhag pa dang*/__gsang ba'i dbyings rang byung gsang ba chen po'i rtsa ka ti shel gyi sbu gu can dang*/__phyi'i dbyings nam mkha' dang dbyer med du bsres pa'i ngang du 'chi nas slob pa'i zung 'jug gi skur ldang ba'am/__yang na mi slob pa'i zung 'jug gi sku mngon du byas nas gdod ma'i btsan sa zin par 'gyur ro/__/gnyis pa rlung sems gong 'pho ni/__yang na rlung sems thig le a yig dang bcas pa la sems rtse gcig tu bsdus te tshangs pa'i lam nas bla ma'i thugs kar bstims la me ri 'bar ba la sogs par gshegs su gsol bar bya'o:__zhes pa la gnyis/__sbyang ba dang*/__las la sbyar ba'o/__/dang po ni/__sngon 'gro cha tshang ba'am/__yang na bla ma'i rnal 'byor sngon du 'gro ba'i sgo nas/__rang gi lus gnyug ma'i lha gang rung du gsal ba'i lus kyi dbus su rtsa dbu ma spyi ltar bsgoms la/__de'i dbus su rlung sems kyi ngo bo thig le a yig dang bcas gsal btab la/__de nas steng gi nam mkha' la ngo bo rtsa ba'i bla ma la rnam pa lce btsun chen po bzhugs par mos la/__gsol ba drag tu gdab/__'og rlung bskum/__steng rlung mnan pa'i rkyen gyis rlung sems kyi ngo bo thig le a yig dang bcas pa dbu ma'i lam brgyud par mos pa dang mnyam du phaT dang hig ces brjod pas bla ma'i thugs dang dbyer med du 'dres par bsam/__yang mar snying ga'i thig le la bsre ba sogs dang*/__bla ma'i sku las 'chi ba med pa'i bdud rtsi babs pas 'chi med tshe'i dngos grub thob par sgom mo/__/gnyis pa las la sbyar ba ni/__rang nyid 'chi bar nges pa'i tshe yo byad chos phyogs su 'bul nas/__gnas lus nye 'brel sogs la zhen pa bcad/__phyi dbugs chad cing nang dbugs ma chad pa'i dus su las la sbyar ba'i dus yin zhing lus dang rtsa dang rlung sems kyi ngo bo thig le bla ma sogs sngar ltar gsal/__bla ma la gsol ba gdab cing rlung sbyor gyis thig le a yig dang bcas pa lhag med bla ma'i thugs kar yang yang bstim zhing de'i ngang du mnyam par gzhag__/mthar bla ma yang je mthor song ste me ri 'bar ba sogs su gshegs pa'i mos pa bya'o/__/gnyis pa chos nyid bar do'i nyams len ni/__rtsa ba las/__gal te bar do'i snang ba ci shar yang rig pa rang mal las ma g.yos pa mi 'gyur ba gser gyi thur ma lta bu'i gnad dran par bya'o:__zhes 'chi kha bar do'i man ngag gis ma grol na/__gzhi las gzhi snang sgra dang 'od zer dang sku la sogs pa mtha' yas pa 'char ba'i dus su sngangs skrag dang gnad don dran pa na sgra zer sku'i snang ba thams cad rang la thim zhing*/__de yang dang po rang snang yin par ngo shes/__bar du rtsal rdzogs/__mthar brtan pa thob nas grol bar 'gyur ro/__/gsum pa dbang po tha ma'i khrid ni/__de ltar chos nyid bar dor ma grol na/__srid pa bar dor 'khrul pa'i snang ba shar zhing*/__de dus ri nyil ba dang*/__mtsho lud pa dang*/__me 'bar ba dang*/__rlung g.yo ba ste 'jigs pa'i sgra bzhi/__me chu la sogs pa'i g.yang sa gsum/__gnas yul grogs la sogs pa'i ma nges pa'i rtags rnams 'char ba'i dus su bar do la bar do yin par ngo shes/__rgyal ba sras bcas kyi bden pa dang chos nyid bsam gyis mi khyab pa'i mthu dang*/__sngar gyi bla ma'i gdam ngag sogs dran nas dag pa'i zhing khams la 'dun pa gtad pa na/__rnam grol dbugs chen 'byin pa'i zhing lnga la sogs par skyes nas de bzhin gshegs pa rnams kyi zhal mjal/__gsung thos/__lung bstan/__dbugs dbyung*/__gzengs bstod nas lam gyi 'phro mthud nas gdod ma'i dbyings su mngon par byang chub bo/__/yang na rang gi mdun gyi nam mkha' la chos 'byung dmar po aHyig dang bcas pa gsal ba la rlung sems bsres te me ri 'bar ba la sogs su gshegs par mos pa bya'o/__/gsum pa rjes kyi mthar dbyung ba'i khrid la gsum/__nyams len spyir bstan pa dang*/__dge sbyor srang du 'jug pa'i man ngag__/'bras bu mngon du bya ba'i tshul lo/__/dang po/__yang*/__rtsa ba rdo rje'i tshig rkang las/__khyad par bcos ma ma yin pa'i mos gus drags pos bla ma la nan tan du gsol ba gdab pa ni gegs sel dang bogs 'don thams cad kyi mchog tu 'gyur ro:__nges 'byung snying la gcag:__mos gus rtsal du 'don:__snying rje shas mi bzod pa dbyung :__yul gyi bdud rtsi brten:__spros pa nang du bsdu:__rlung rgya yan du 'jog:__lus gnad dang ma bral bar bya:__dbang po'i mchog ni dbyings la gzir:__skabs skabs su bum pa can 'jam po gzung :__dus rtag tu rig stong rjen pa'i ngang gzung la gnad du gtong ngo :__zhes dus rtag tu bla ma la bcos ma ma yin pa'i sgo nas mos gus drag pos dus dang rnam pa kun tu bla ma'i snang ba dang mi 'bral ba'i ngang nas bla mar nan tan du gsol ba gdab pa ni lam gyi gegs sel dang bogs 'don thams cad kyi mchog tu 'gyur zhing*/__lam gyi bogs 'don pa bla ma'i byin rlabs 'ba' zhig la rag las par 'gyur te/__grub chen te lo pas/__gegs sel kun gyi mchog gyur ni/__/bla ma yin no nA ro pa/__/bogs 'don kun gyi mchog gyur ni/__/bla ma yin no nA ro pa/__zhes dang*/__yang*/__bla ma'i byin rlabs snying la zhugs pa na/__/lag pa'i mthil na gnas pa'i gter mthong bzhin/__zhes so/__/'khor ba la nges 'byung snying la gcag__/bla ma dang dkon mchog la mos gus rtsal gton/__sems can la snying rje shas mi bzod pa dbyung*/__tshogs drug gi snang ba thams cad zhen pa med pa'i tshul gyis dgag sgrub gang yang mi byed par sems dang dbyer med du bsre bas yul gyi bdud rtsi brten/__chos dang 'jig rten gyi rnam g.yeng thams cad kyi spros pa bcad la nang du bsdu/__sna'i rlung btang snyoms su gzhag__/so dang mchu ma reg par rlung bzo bcos mi bya bar rgya yan du 'jog__/lus lhod kyis klod pa dang bzhugs stangs kyi gnad dang ma bral bar bya/__'od gsal 'char ba'i phyir mig 'bras mi 'gul/__rdzi ma mtha' rdeb mi bya bar nam mkha'i dbyings su gzir zhing nam mkha' sum phrugs kyi dgongs pa nyams su len/__ye shes brtan par bya ba'i phyir skabs skabs su yon tan rin po che skye ba'i rlung sbyor 'jam rlung bum pa can gzung*/__mdor na mnyam gzhag rjes thob gang gi skabs su'ang dus rtag tu ha cang sgrim pa'ang mi bya/__ha cang lhod pa ma yin par rig pa rang so zin pa rig stong rjen pa'i ngang bzung la ma yengs pa'i ngang bskyang*/__cung zad spros pa dang bcas pas ni tshogs kyi 'khor lo'i 'du ba sogs ji ltar rigs par bya'o/__/tshogs kyi 'khor lo mtshan nyid pa ma grub kyang rdzas kyi yo byad kyi tshogs ji rigs pa la longs spyod par bya'o/__/gnyis pa dge sbyor srang du 'jug pa'i man ngag la gnyis/__phyi'i dus bzhi sangs rgyas mnyam sbyor thun mong gi skyed rdzogs kyi rnal 'byor nyin gcig la thun bzhir phyes nas nyams su len par bya ba dang*/__nang gi dus bzhi sangs rgyas mnyam sbyor thun mong ma yin pa'i rdzogs rim gyi rnal 'byor thun bzhir nyams su len pa ste gnyis las/__phyi ma la bzhi/__nyin mo snang ba rgyas 'debs kyi rnal 'byor/__nam gung shes pa bum par gzhug pa dang*/__tho rangs rig pa rang sar gtod pa dang*/__rgyun du rig pa skad cig ma nyams su len pa'o/__/dang po ni/__nyin par dus su sgo yul rlung rig gi gnad la brten nas rlung sems rdo rje lu gu rgyud kyi drwa bar btsud la lhun grub bsgom mo:__zhes pas bstan pa ltar yin no/__/gnyis pa nam gung shes pa bum gzhug ni/__mtshan mo snying dbus sam smin mtshams kyi thig le a yig dang bcas pa la sems rtse gcig tu gzung zhing 'od gsal ba bsgom mo:__zhes nyal tshe 'od gsal gzung na snying dbus dang*/__rmi lam gzung na smin mtshams su bla ma dang rig pa dbyer med pa'i ngo bo thig le a yig dang bcas pa dkar po zhig bsgom mo/__/gsum pa tho rangs rig pa rang sar gtod pa ni/__tho rangs ha ha zhes rlung bsangs nas nam mkha'i dkyil du rang byung gsang ba chen po'i yi ge a gsal zhing 'bar ba la yid mig rlung gsum mdung tshugs su gtad de rig pa grung du gzhug go:__tho rangs sad ma thag tu lus gnad seng ge'i 'dug stangs kyis/__ngag tu ha ha zhes rlung bsangs nas/__spyi bor gzhu gang tsam gyi nam mkha' la a yig dkar po 'od 'bar bar bsams la yid mig rlung gsum rtse gcig tu gtad de rig pa grung du gzhug par bya'o/__/bzhi pa rgyun du rig pa skad cig ma nyams su len pa ni/__rnam pa kun du rang rig pa skad cig ma'i ngang bskyangs pas 'khrul pa'i rtog tshogs thams cad sprin nam mkha' la dengs pa ltar rang grol ba la bslab bo:__zhes pa ltar yin no/__/gsum pa mi 'gyur rtag pa dam pa'i 'bras bu mngon du bya ba ni/__de ltar nan tan du brtson pas rab zla ba drug:__'bring lo gsum:__tha ma'ang lo bcu gnyis nas zag bcas kyi phung po 'od du dengs par 'gyur ro:__sgra tshig dbu ma dengs par 'gyur ro:__rtog tshogs nang gsal du dengs par 'gyur ro:__'dod na lus dang :__ngag dang :__yid thams cad pa'i mchog 'grub par 'gyur ro:__de bas na 'di kho na ltar btson par bya'o:__zhes pa ltar yin no/__/zhes pa'ang lce btsun chen po'i rnam 'phrul 'od gsal sprul pa'i rdo rje'am/__'jam dbyangs bla ma mkhyen brtse'i dbang pos lan gnyis kyi bar du thugs brtse ba chen pos bdag la gnang ba yin pas brjed kyis phangs nas rang blos zin tshod bkod pa dge zhing bkra shis par gyur cig__/gzhi dbyings ka dag gzhi snang lhun grub tu/__/rang rig khregs chod thod rgal lam snang bzhis/__/sku dang ye shes mngon sum gcar phog tu/__/ston mdzad lce btsun chen po'i snying tig gi__/zab khrid zhi ba'i snying pos mdzad 'di nyid/__/'jam dbyangs bla ma'i zhal rgyun 'khrul med nyid/__/yin zhes rdo grub bstan pa'i nyi mas bsngags/__/de phyir rje dbon bkra shis tshe ring gis/__/par du bzhengs las chos 'dis 'gro ba'i don/__/'khor ba ma stongs bar du khyab brdal gyis/__/ma lus 'od gsal rdo rje snying po'i klong*/__/gdod ma'i kun tu bzang por ro gcig shog__/ces pa'ang mkhyen sprul ming gis smon pa dge__/dge'o//__//_______