འཆི་མེད་འཕགས་མའི་སྙིང་ཏིག་གི་བསྙེན་སྒྲུབ་ལས་བརྩམས་པའི་དྲིས་ལན་ཅུང་ཟད།

🚧 This website is under continued development. We appreciate your patience!

Previous Text Back to Volume PageNext Text

Wylie title	'chi med 'phags ma'i snying tig gi bsnyen sgrub las brtsams pa'i dris lan cung zad
Location	mkhyen brtse'i bka' babs Volume 13, Text 32, Pages 393-400 (Folios 1a1 to 4b2)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	'jam dbyangs mkhyen brtse chos kyi blo gros. 'chi med 'phags ma'i snying tig gi bsnyen sgrub las brtsams pa'i dris lan cung zad. In Rdzong sar 'jam dbyangs mkhyen brtse'i dbang po'i bka' babs, Vol. 13: 393-400. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Recitation Manual - bsnyen yig
Cycle	འཆི་མེད་འཕགས་མའི་སྙིང་ཐིག་ ('chi med 'phags ma'i snying thig)
Deity	sgrol ma yid bzhin 'khor lo
Karchag page	JKW-KABAB-Volume-13-PA-Karchag

Tibetan Text

Wylie

[edit]

༄༅། །འཆི་མེད་འཕགས་མའི་སྙིང་ཏིག་གི་བསྙེན་སྒྲུབ་ལས་བརྩམས་པའི་དྲིས་ལན་ཅུང་ཟད་བཞུགས་སོ།། ༈ །ཨོཾ་སྭ་སྟི་སིདྡྷཾ། ཇི་ཕེབས་འཕགས་མའི་སྙིང་ཏིག་གི་བསྙེན་པའི་སྐབས། ལམ་མོས་སྒོམ་གཙོ་བོར་བཏོན་པའི་དབང་དུ་བྱས་ནས་བསྙེན་སྒྲུབ་ལས་གསུམ་དང་སྦྱར་བའི་བསྙེན་པ་དཀྱུས་མ་དང༌། ངེས་རྫོགས་ཁྱད་པར་ཅན་གྱི་དབང་དུ་བྱས་ན། བསྙེན་སྒྲུབ་ཡན་ལག་བཞིའི་སྒྲོམ་ནས་འདོན་པ་སོགས་རྣམས་བཞག་མང་པོ་མཆིས་ཀྱང༌། སྐབས་དོན་ལས་བྱང་རང་གིས་དངོས་བསྟན་ཙམ་གྱིས་བསྙེན་སྒྲུབ་ལས་གསུམ་ལ། དུས་གྲངས་རྟགས་གསུམ་ལས། དུས་དབང་པོ་རབ་ཀྱི་དབང་དུ་བྱས་ཏེ། བསྙེན་པ་ལ་བདུན་གསུམ། བསྒྲུབ་པ་ལ་བདུན་གཅིག་ལས་སྦྱོར་ལ་ཞག་གཅིག་གཅས། དངོས་གྲུབ་བླང་བ་དང་བཅས་ཟླ་བ་གཅིག་ཏུ་གསུངས། འབྲིང་ལ་དེ་སུམ་འགྱུར་དུ་བྱས་པས་ཟླ་བ་གསུམ། ཐ་མ་ཟླ་བ་དྲུག་ཤུགས་ཀྱིས་ཐོབ། གྲངས་བསྙེན་ཀྱང་རབ་འབྲིང་ཐ་མའི་དབང་པོའི་ངོ་སྐལ་དུ་བྱས་ན། དེ་དང་དེའི་དུས་ཀྱི་ཡུན་ཚད་ལ་ཇི་ཙམ་འགྲུབ་པ་ཡིན་མོད། སྤྱིར་བཏང་གྲངས་གཙོ་ཆེ་བའི་དབང་དུ་བྱས་ན་གཙོ་མོའི་ཡིག་བཅུ་འབྲུ་འབུམ། དྲིལ་སྒྲུབ་ཀྱི་བསྙེན་སྔགས་འབྲུ་བཅུ་དགུ་པ་འབུམ་ཕྲག་བདུན། ཡེ་ཤེས་སེམས་དཔའ་དང༌། སྤྲུལ་པའི་སེམས་མའི་སྔགས་འབུམ་ཕྲག་བཞི་རེ། སྒྲོལ་མ་རིགས་བཞིའི་སྒྲུབ་སྔགས་འབུམ་ཕྲག་རེ་རེ། ལས་སྦྱོར་སྒོ་མ་བཞིའི་སྔགས་ཁྲི་ཕྲག་བཞི་རེ་ལས་ཉུང་མཐའ་བྱས་པ་བཟླས་ནས་གྲངས་བསྙེན་འབྲིང་པོ་དང༌། དུས་བསྙེན་དབང་པོ་འབྲིང་གི་ཟླ་བ་གསུམ་དང་གཞི་མཐུན་པར་འགྱུར་བ་ཤིན་ཏུ་ལེགས། ལས་རུང་ཙམ་ལ་ནི་གཙོ་མོའི་ཡིག་བཅུ་འབུམ་ཕྲ་བཞི། དྲིལ་སྒྲུབ་འབུམ་ཕྲག །ཡེ་སེམས་དང་སྤྲུལ་པའི་སྔགས་ཁྲི་བཞི། སྒྲུབ་སྔགས་ཁྲི་རེ། ལས་སྦྱོར་ཉིན་གཅིག་ཅི་འགྲུབ་བྱས་པས་དབང་པོ་རབ་ཀྱི་དུས་བསྙེན་དང་གཞི་མཐུན། རྟག་བསྙེན་རབ་འབྲིང་ཐ་གསུམ་ནི་སྤྱི་ལྟར། དངོས་གྲུབ་ལེན་ལུགས་ནི། ཁྱད་པར་བ་ལ་སྒྲུབ་ཆེན་ཁོག་དབུབ་དང་སྦྱར་བའི་ཚུལ་ཡོད་ཀྱང༌། དཀྱུས་ཙམ་ལ་ལས་སྦྱོར་གྱི་སྔགས་གྲངས་དེ་རིང་ཐེམས་པའི་ནངས་པར་སྔ་བར་མཆོད་གཏོར་སོགས་གསར་པ་བཤམས། དངོས་གྲུབ་ཀྱི་རྫས་འདུ་བྱ། བཟླས་པ་རྫོགས་ནས་སྟོང་ཚིག་གིས་མཆོད་བསྟོད་རྗེས། དངོས་གྲུབ་བསྐུར་བའི་ཛབ྄་དྲིལ་སྒྲུབ་མཐར། ཀཱ་ཡ་ཝཱ་ཀ་ཙིཏྟ་སོགས་བཏགས་པ་ཅི་རིགས་པ་བཟླ། དེ་ནས་ཡེ་ཤེས་སྐུ་མཆོག་ནི་བཤགས་པ་དང༌། གཞུང་གི་བྱིན་འབེབས་བཅས་སྔོན་དུ་འགྲོ་བས། མཆོད་བསྟོད་རྒྱས་པའི་མཐར། ཨོཾ་རྗེ་བཙུན་མ་འཕགས་མ་སོགས་ཀྱིས་དངོས་གྲུབ་གསོལ་ཏེ། དམིགས་པ་སྤྱི་ལྟར་དང་བཅས་བུམ་པ་མགོ་ཐོག་བཞག་ཅིང་བུམ་ཆུ་མྱང༌། བདུད་རྩི་མགྲིན་པར་བཞག་ཅིང་རོལ། ཚེ་འབྲང་སྙིང་གར་བཞག །ཐོད་པའི་རྫས་མྱང་ཞིང་ལྷག་མ་ཡུན་དུ་བསྟེན་པ་སྤྱི་ལྟར། དེ་ནས་ཚོགས་མཆོད་རྒྱས་པས་མཚོན་ལས་མཇུག་བསྡུ་བ་ལགས། ༈ །དཀྱིལ་འཁོར་ཞི་དཀྱིལ་རྟ་བབ་སྣམ་བརྒྱད་མ་སྤྱི་འགྲེ། འདོད་སྣམ་དམར་པོ་མཆོད་ལྷ་བཅུ་དྲུག །རྡོ་རྗེའི་རྭ་བའི་ནང་དུ་འཇིག་རྟེན་པའི་ཁོར་ཡུག་ལ་དཔལ་མགོན་དོན་ལྔ་སོགས་དཀར་ཕྱོགས་སྐྱོང་བའི་ཚོགས་ཀྱིས་བསྐོར་བ་ཡིན་ཀྱང༌། བྲིས་ཆའི་ཚེ་ཁོར་ཡུག་མ་གཏོགས་ལྷ་མཚན་བྲི་མི་དགོས། ༈ །ཡབ་གར་དབང་སྐུ་མདོག་གཞུང་དུ། །རང་འོད་ཐབས་མཆོག་གར་གྱི་དབང༌། ཞེས་རང་གི་འོད་ལས་སྐྱེས་པའི་ཐབས་ཀྱི་སྣང་ཆ་ལགས་པས་དཀར་པོ་ཡིན་པ་གཞིར་བཞག་ལ། ཡབ་ཡུམ་གོ་ལྡོག་ལྷན་སྐྱེས་འདི་རིགས་ཡུམ་ལས་ཡབ་ཆགས་ཉམས་ཆེ་བར་བཤད་པས་དམར་མདངས་ཆགས་པ་ཞིག་བསྒོམ་པ་དང༌། བྲི་བའི་སྐབས་སུའང་འདི་ཁོ་ན་ལེགས་སྣང༌། ༈ །རྣམ་རྒྱལ་མ་ལ་ཕྱག་གཡས་སྐྱབས་སྦྱིན་པུས་མོ་གཡས་པའི་སྟེང་དུ་བརྐྱངས་ཏེ་སྡིགས་མཛུབ་ཀྱིས་ལྕགས་ཀྱུ་འགུགས་ཐབས་སུ་བསྣམས་པ། གཡོན་པས་ཐུགས་ཀའི་ཐད་དུ་མཆོག་སྦྱིན་གྱི་ཕྱག་རྒྱས་ཚེའི་བུམ་པ་བདུད་རྩིའི་རྒྱུན་འབེབས་བཞིན་པ་བསྣམས་པ། ཞབས་སེམས་མའི་སྐྱིལ་ཀྲུང་ཅན་དུ་བསྒོམ་པས་ཁྱབ། བྲིས་འབུར་ལྟ་བུར་མཛེས་པ་བཙལ་ན་ཐུགས་ཀར་མཆོག་སྦྱིན་གྱི་རྒྱས་མེ་ཏོག་ཨུཏྤལ་ཡུ་བ་བཟུང་བའི་འདབ་མ་སྙན་གྱི་ཐད་ཀར་མཆོག་སྦྱིན་གྱི་རྒྱས་འཕྱར་སྟབས་སུ་མཛད་ཀྱང་རུང་ངོ༌། ༈ །སྒོ་བཞིའི་སྒྲོལ་མ་ནི། ཞབས་གཡས་བསྐུམ་པའི་སྐྱིལ་ཀྲུང་ཕྱེད་པའི་གར་སྟབས། ཕྱག་གཡས་པུས་མོ་གཡས་པའི་སྟེང་དུ་བརྐྱངས་ནས་སྐྱབས་སྦྱིན་སྡིགས་མཛུབ་དང་བཅས་པས་རང་རྟགས་ལྕགས་ཀྱུ་གདེངས་པ་སོགས་རྣམ་འགྱུར་ཅན། གཡོན་ཐུགས་ཀར་མཆོག་སྦྱིན་གྱི་རྒྱས་ཨུཏྤལ་ལ་འདབ་མ་སྙན་གྱི་ཐད་དུ་ཁ་བྱེ་བ་བསྣམས་པ་ཡིན། སྔགས་ཕྲེང་འཁོར་ལུགས། བསྙེན་པ་ལ་བཀོད་པ། ཉེ་བསྙེན་ལ་འཁོར་བ། སྒྲུབ་པ་ལ་དོ་ལི། སྒྲུབ་ཆེན་སྤྲོ་བསྡུ་གཙོ་བོར་གསུངས་མོད། དཀྱུས་ཙམ་ལ་བཀོད་པའི་དམིགས་པ་ཁོ་ནས་འཐུས། དེའི་ཚེ་ལྷ་མོའི་རིགས་དང༌། མ་རྒྱུད་སྐོར་ཕལ་ཆེར་ལ་གཡོན་བསྐོར་དུ་བཀོད་པ་ཤས་ཆེ་མོད། འདིར་ནི་གསར་མའི་རྒྱུད་སྒྲུབ་ཐབས་རྣམས་ལས་ཀྱང་གཡས་བསྐོར་དུ་བཀོད་པ་ཤ་སྟག་བཤད་པས། རྩ་སྔགས། དྲིལ་སྒྲུབ། ཡེ་སེམས་དང༌། སྤྲུལ་པའི་སྔགས་བཅས་གཡས་སྐོར་དུ་བཀོད་ཅིང༌། དེ་ལ་སེམས་བཟུང་ནས་ཟིན་པ་ན་འོད་ཟེར་སྤྲོ་བསྡུ་དང་བཅས་བཟླས་པ་མཛད་པས་འཐུས། བཀོད་པའི་དམིགས་པ་ཤིན་ཏུ་གསལ་ན་འཁོར་བའི་དམིགས་པ་གསལ་བཏབ་ཀྱང་རུང༌། དེ་ཡང་རྩ་སྔགས་བཟླ་སྐབས་དེ་རྐྱང་དང༌། དྲིལ་སྒྲུབ་སྐབས་དེའི་མཇུག་ཏུ་སྔགས་དེ་མཐུད་ནས་གསལ་བཏབ། ཡེ་ཤེས་སེམས་དཔའི་སྐབས་དེའི་དམིགས་པ་གཞག་ནས་ཐུགས་སྟོན། ཏཱྃ་ཧྲཱིཿར་བསྒྱུར་བའི་མཐར་རང་སྔགས་དགོད། སྤྲུལ་པར་ཐུགས་ཀར་ཉི་ཟླའི་གའུའི་དབུས་སུ་བྷྲཱུྃ་མཐར་སྔགས་ཕྲེང་བཀོད་པ་ལགས། སྒྲུབ་པའི་སྔགས་སོགས་ལའང་རང་གི་ཐུགས་ཀར་པད་ཟླའི་སྟེང་དུ་ཐུགས་སྲོག །ཏཱྃ་བྷྲཱུྃ་ཧྲཱིཿཧཱུྃ། ཛཿཧཱུྃ་བྃ་ཧོ། བཅས་རང་མདོག་གི་མཐར་སྔགས་ཕྲེང་བཀོད་པ་སོགས་མཛད་པས་མཐུས། ༈ །བཟླ་ལུགས་བསྙེན་པའི་སྐབས་བསྙེན་དམིགས་རྐྱང་པ་མ་གཏོགས་སྒྲུབ་པ་མན་ཆད་མི་དགོས། སྔགས་ཀྱང་ཐོག་མར་ཡིག་བཅུ་ཁོ་ན་གཙོ་བོར་བཟླ། ཐུན་ཞབས་སུ་བསྙེན་སྔགས་གཞན་རྣམས་ཅུང་ཟད་རེ་བཟླས་པས་མཐུས། སྒྲུབ་པའི་སྐབས་བསྙེན་པའི་སྔགས་གཙོ་མོ། ཡེ་སེམས་སྤྲུལ་པའི་ལྷ་མོའི་བཟླས་པ་བཅས་ཅུང་ཟད་རེ་བྱས་ནས་ལྷ་སོ་སོར་སེམས་བཟུང་གསལ་སྣང་ཐོན་པ་ན་གཙོ་མོའི་ཐུགས་ཀའི་འོད་ཀྱིས་འཁོར་བསྐུལ་བའི་སྤྲོ་བསྡུའི་དམིགས་པ་དང་སྦྱར་ཏེ། ཐོག་མར་ཐུན་གྱི་དངོས་གཞིར་རྡོ་རྗེ་སྒྲོལ་མའི་སྔགས་ཁོ་ན་བསགས། ཐུན་མཐར་གཞན་གསུམ་ཡང་ཅུང་ཟད་རེ་བཟླ། རྡོ་རྗེ་སྒྲོལ་མའི་སྔགས་རྫོགས་ནས། དེ་ཅུང་ཟད་དང་དངོས་གཞིར་རིན་ཆེན་སྒྲོལ་མའི་སྔགས་བཟླ་བ་སོགས་འདྲ། ལས་སྦྱོར་མི་དགོས། འདི་སྐབས་དྲིལ་སྒྲུབ་ཀྱི་སྔགས་མ་བཟླས་ཀྱང་རུང༌། ལས་སྦྱོར་སྐབས་ཉིན་རེར་ཐུན་བཞི་རེ་བཅད། དུས་གནད་དང་མཐུན་པར། ཐོ་རེངས་ལ་མཚོན་ན་བསྙེན་སྒྲུབ་གཉིས་བཟླས་དམིགས་འཁྱུགས་ཙམ་རེ་བྱས་ནས། གཙོ་འཁོར་ལྔའི་འོད་ཀྱི་ལྕགས་ཀྱུས་སྒྲོལ་མའི་ཐུགས་རྒྱུད་བསྐུལ་ནས་ཞི་བའི་ལས་བསྒྲུབ་པའི་དམིགས་པ་དེའི་སྔགས་གཙོ་བོར་བཟླ། ཐུན་མཐར་གཞན་གསུམ་ཅུང་ཟད་རེ་བཟླས་པས་འཐུས་ཤིང༌། ཉི་ཤར་དུ་ཞགས་པའི་སྒྲོལ་མའི་སྔགས་གཙོ་བོར་བྱེད་པ་སོགས་འགྲེ། ༈ །རང་བཞིན་སྒྲུབ་མཆོད་སོགས་ཀྱི་སྐབས། སྤྱིར་བཏང་གི་སྒྲུབ་མཆོད་དཀྱུས་མ་ཡིན་ན། ཐུན་རེར་གཙོ་མོའི་ཡིག་བཅུ་སྟོང་ཕྲག་གཅིག་བཟླ་བའི་དབང་དུ་བྱས་ན། དྲིལ་སྒྲུབ། ཡེ་སེམས། སྤྲུལ་པའི་སྔགས་བཅས་སུམ་བརྒྱ། །རིགས་བཞི་བརྒྱ་ཕྲག་ལས་བཞི་ཉེར་གཅིག་ཙམ་བཟླས་ན་འཚམས་པར་འོང༌། ཚེ་སྒྲུབ་གཙོ་བོར་བཏོན་པ་ཡིན་ན་གཞན་གོང་ལྟར་ལ་ཡིག་བཅུ་སུམ་བརྒྱ། ཚེ་སྒྲུབ་སྔགས་དམིགས་ཀྱིས་བསལ་བ་དྲིལ་སྒྲུབ་ཡིན་པས་སྟོང་ཕྲག་བཟླ། གཞན་འདྲ། ༈ །རྒྱུན་ཁྱེར་ཆགས་མེད་ལྟ་བུ་ལ་བསྙེན་པའི་སྔགས་ཁོ་ན་ལས་སྒྲུབ་པ་ལས་སྦྱོར་མ་བྱས་ཀྱང་རུང༌། བསྙེན་སྔགས་ཀྱང་དྲིལ་སྒྲུབ་གཙོ་བོར་བྱེད་ན་ལེགས། སྤྲོ་ན་སྒྲུབ་པ་ལས་སྦྱོར་གྱི་ཟླས་དམིགས་འཁྱུགས་ཙམ་གྱིས་ཀྱང་འགལ་བ་མེད་པར་མ་ཟད་བསྙེན་སྒྲུབ་ལས་གསུམ་གྱི་གཞི་བསྙེན་སྔོན་དུ་སོང་བ་ཡིན་ན། ངེས་པར་སྒྲུབ་པ་དང་ལས་སྦྱོར་ཅུང་ཟད་རེ་བཏགས་ན་ལེགས་པ་ཡིན་ནོ། ༈ །སྒྲུབ་པའི་དངུལ་ཆུ་ནི། བཅུད་ལེན་གྱི་རྫས་གྲུབ་པ་སྟེ་སྟོན་ཟླ་ལྟར་དཀར་བ། ཉི་མ་ལྟ་བུའི་འོད་ཟེར་ཅན་གཡས་སྐོར་དུ་འཁྱིལ་ཞིང་གྲུབ་པའི་རྟགས་གཡུང་དྲུང་དང༌། དགའ་འཁྱིལ་ལ་སོགས་པ་བཀྲ་ཤིས་པའི་རི་མོ་སྣ་ཚོགས་པ་བཀྲ་བ། ནུས་པ་གང་ལ་རེག་པ་ཙམ་གྱིས་གླང་པོ་ཆེའི་སྟོབས། ཉི་ཟླའི་ཚེ། རྡོ་རྗེའི་ལུས། བཅུ་དྲུག་གི་ལང་ཚོ་ཅན་དུ་བསྒྱུར་ནུས་ཤིང༌། ལྕགས་ལ་རེག་པ་ཙམ་གྱིས་གསེར་དུ་འགྱུར་བ་དང༌། ཤིང་སྐམ་ལ་གཏོར་བ་ཙམ་གྱིས་ལོ་འབྲས་མེ་ཏོག་ཕུན་སུམ་ཚོགས་པ་སྐད་ཅིག་གིས་འབྱུང་བ་ཞིག་སྟེ། དེ་ལྟ་བུའི་རྣམ་པ་བདེ་བ་ཆེན་པོའི་གཟི་བྱིན་འབར་བར་བསྒོམ་པ་ལགས། ༈ །སྒྲུབ་གཏོར་ཆེན་མོ་ནི། འདིའི་སྒྲུབ་ཁོག་གཏེར་ཆེན་མཆོག་གླིང་པའི་ས་གཏེར་ལས་བྱོན་པའི་ཤོག་སེར་མ་ལས་རྒྱས་པར་བཤད་ཀྱང༌། སྒྲུབ་ཆེན་དུས་ཡིན་ན་ལས་དཀྱུས་སུ་མི་དགོས་ཤིང༌། དཔེའུ་རིས་ལྟ་བུ་ཞིབ་ཆ་ཞིག་བྱས་ན་མ་གཏོགས་བཅའ་བཟོ་དཀའ་བ་ཞིག་ལགས། དཀྱུས་སུ་དཀྱིལ་ཐང་ཡོད་ན་དགྲམ་པའམ། མེད་ན་མཎྜལ་ཚོམ་བུ་ཙམ་དང༌། གཙོ་བོར་ཐོད་པ་རིལ་བུ་བཅས་སྒྲུབ་རྟེན་ཁྱད་པར་བ་ལགས་པས། སྒྲུབ་གཏོར་ལོགས་སུ་མ་དགོས། མཆོད་གཏོར་ནི་རིན་ཆེན་འབར་བ་སྤྱི་འགྲེས་འཐུས། དེ་ལ་ཤེས་པ་བཞི་ལྡན་སོགས་ཀྱི་ཐ་སྙད་སྦྱར་ན་སྒྲུབ་གཏོར་དང་མཆོད་གཏོར་གཞི་མཐུན་པར་དབྱིབས་རིན་པོ་ཆེར་མངའ་བ་ལྟར་ལགས། ཚེ་འབྲང་ནི། ཚེ་ཞེས་ནས་རྗེན་འཐག །གལ་ཆེན་ཆང་གིས་སྦྲུས་པའི་ཟན་བུམ་དབྱིབས་སྤྱི་འགྲེ་མཐའ་རིལ་བུས་བསྐོར་བ་ཁ་དོག་དམར་པོ་བྱས་པ་དེ་ག་ལགས། ཀཱ་ཡ་ཨཱ་ཡུུ་ཥཿདྷྭ་ཛ་ཏིཥྛནྟུ།། །།

[edit]

@#/__/'chi med 'phags ma'i snying tig gi bsnyen sgrub las brtsams pa'i dris lan cung zad bzhugs so//__!__/oM swa sti sid+d+haM/__ji phebs 'phags ma'i snying tig gi bsnyen pa'i skabs/__lam mos sgom gtso bor bton pa'i dbang du byas nas bsnyen sgrub las gsum dang sbyar ba'i bsnyen pa dkyus ma dang*/__nges rdzogs khyad par can gyi dbang du byas na/__bsnyen sgrub yan lag bzhi'i sgrom nas 'don pa sogs rnams bzhag mang po mchis kyang*/__skabs don las byang rang gis dngos bstan tsam gyis bsnyen sgrub las gsum la/__dus grangs rtags gsum las/__dus dbang po rab kyi dbang du byas te/__bsnyen pa la bdun gsum/__bsgrub pa la bdun gcig las sbyor la zhag gcig gcas/__dngos grub blang ba dang bcas zla ba gcig tu gsungs/__'bring la de sum 'gyur du byas pas zla ba gsum/__tha ma zla ba drug shugs kyis thob/__grangs bsnyen kyang rab 'bring tha ma'i dbang po'i ngo skal du byas na/__de dang de'i dus kyi yun tshad la ji tsam 'grub pa yin mod/__spyir btang grangs gtso che ba'i dbang du byas na gtso mo'i yig bcu 'bru 'bum/__dril sgrub kyi bsnyen sngags 'bru bcu dgu pa 'bum phrag bdun/__ye shes sems dpa' dang*/__sprul pa'i sems ma'i sngags 'bum phrag bzhi re/__sgrol ma rigs bzhi'i sgrub sngags 'bum phrag re re/__las sbyor sgo ma bzhi'i sngags khri phrag bzhi re las nyung mtha' byas pa bzlas nas grangs bsnyen 'bring po dang*/__dus bsnyen dbang po 'bring gi zla ba gsum dang gzhi mthun par 'gyur ba shin tu legs/__las rung tsam la ni gtso mo'i yig bcu 'bum phra bzhi/__dril sgrub 'bum phrag__/ye sems dang sprul pa'i sngags khri bzhi/__sgrub sngags khri re/__las sbyor nyin gcig ci 'grub byas pas dbang po rab kyi dus bsnyen dang gzhi mthun/__rtag bsnyen rab 'bring tha gsum ni spyi ltar/__dngos grub len lugs ni/__khyad par ba la sgrub chen khog dbub dang sbyar ba'i tshul yod kyang*/__dkyus tsam la las sbyor gyi sngags grangs de ring thems pa'i nangs par snga bar mchod gtor sogs gsar pa bshams/__dngos grub kyi rdzas 'du bya/__bzlas pa rdzogs nas stong tshig gis mchod bstod rjes/__dngos grub bskur ba'i dzaba? dril sgrub mthar/__kA ya wA ka tsit+ta sogs btags pa ci rigs pa bzla/__de nas ye shes sku mchog ni bshags pa dang*/__gzhung gi byin 'bebs bcas sngon du 'gro bas/__mchod bstod rgyas pa'i mthar/__oM rje btsun ma 'phags ma sogs kyis dngos grub gsol te/__dmigs pa spyi ltar dang bcas bum pa mgo thog bzhag cing bum chu myang*/__bdud rtsi mgrin par bzhag cing rol/__tshe 'brang snying gar bzhag__/thod pa'i rdzas myang zhing lhag ma yun du bsten pa spyi ltar/__de nas tshogs mchod rgyas pas mtshon las mjug bsdu ba lags/__!__/dkyil 'khor zhi dkyil rta bab snam brgyad ma spyi 'gre/__'dod snam dmar po mchod lha bcu drug__/rdo rje'i rwa ba'i nang du 'jig rten pa'i khor yug la dpal mgon don lnga sogs dkar phyogs skyong ba'i tshogs kyis bskor ba yin kyang*/__bris cha'i tshe khor yug ma gtogs lha mtshan bri mi dgos/__!__/yab gar dbang sku mdog gzhung du/__/rang 'od thabs mchog gar gyi dbang*/__zhes rang gi 'od las skyes pa'i thabs kyi snang cha lags pas dkar po yin pa gzhir bzhag la/__yab yum go ldog lhan skyes 'di rigs yum las yab chags nyams che bar bshad pas dmar mdangs chags pa zhig bsgom pa dang*/__bri ba'i skabs su'ang 'di kho na legs snang*/__!__/rnam rgyal ma la phyag g.yas skyabs sbyin pus mo g.yas pa'i steng du brkyangs te sdigs mdzub kyis lcags kyu 'gugs thabs su bsnams pa/__g.yon pas thugs ka'i thad du mchog sbyin gyi phyag rgyas tshe'i bum pa bdud rtsi'i rgyun 'bebs bzhin pa bsnams pa/__zhabs sems ma'i skyil krung can du bsgom pas khyab/__bris 'bur lta bur mdzes pa btsal na thugs kar mchog sbyin gyi rgyas me tog ut+pal yu ba bzung ba'i 'dab ma snyan gyi thad kar mchog sbyin gyi rgyas 'phyar stabs su mdzad kyang rung ngo*/__!__/sgo bzhi'i sgrol ma ni/__zhabs g.yas bskum pa'i skyil krung phyed pa'i gar stabs/__phyag g.yas pus mo g.yas pa'i steng du brkyangs nas skyabs sbyin sdigs mdzub dang bcas pas rang rtags lcags kyu gdengs pa sogs rnam 'gyur can/__g.yon thugs kar mchog sbyin gyi rgyas ut+pal la 'dab ma snyan gyi thad du kha bye ba bsnams pa yin/__sngags phreng 'khor lugs/__bsnyen pa la bkod pa/__nye bsnyen la 'khor ba/__sgrub pa la do li/__sgrub chen spro bsdu gtso bor gsungs mod/__dkyus tsam la bkod pa'i dmigs pa kho nas 'thus/__de'i tshe lha mo'i rigs dang*/__ma rgyud skor phal cher la g.yon bskor du bkod pa shas che mod/__'dir ni gsar ma'i rgyud sgrub thabs rnams las kyang g.yas bskor du bkod pa sha stag bshad pas/__rtsa sngags/__dril sgrub/__ye sems dang*/__sprul pa'i sngags bcas g.yas skor du bkod cing*/__de la sems bzung nas zin pa na 'od zer spro bsdu dang bcas bzlas pa mdzad pas 'thus/__bkod pa'i dmigs pa shin tu gsal na 'khor ba'i dmigs pa gsal btab kyang rung*/__de yang rtsa sngags bzla skabs de rkyang dang*/__dril sgrub skabs de'i mjug tu sngags de mthud nas gsal btab/__ye shes sems dpa'i skabs de'i dmigs pa gzhag nas thugs ston/__tA~M hrIHra bsgyur ba'i mthar rang sngags dgod/__sprul par thugs kar nyi zla'i ga'u'i dbus su b+h+rU~M mthar sngags phreng bkod pa lags/__sgrub pa'i sngags sogs la'ang rang gi thugs kar pad zla'i steng du thugs srog__/tA~M b+h+rU~M hrIHhU~M/__dzaHhU~M ba~M ho/___bcas rang mdog gi mthar sngags phreng bkod pa sogs mdzad pas mthus/__!__/bzla lugs bsnyen pa'i skabs bsnyen dmigs rkyang pa ma gtogs sgrub pa man chad mi dgos/__sngags kyang thog mar yig bcu kho na gtso bor bzla/__thun zhabs su bsnyen sngags gzhan rnams cung zad re bzlas pas mthus/__sgrub pa'i skabs bsnyen pa'i sngags gtso mo/__ye sems sprul pa'i lha mo'i bzlas pa bcas cung zad re byas nas lha so sor sems bzung gsal snang thon pa na gtso mo'i thugs ka'i 'od kyis 'khor bskul ba'i spro bsdu'i dmigs pa dang sbyar te/__thog mar thun gyi dngos gzhir rdo rje sgrol ma'i sngags kho na bsags/__thun mthar gzhan gsum yang cung zad re bzla/__rdo rje sgrol ma'i sngags rdzogs nas/__de cung zad dang dngos gzhir rin chen sgrol ma'i sngags bzla ba sogs 'dra/__las sbyor mi dgos/__'di skabs dril sgrub kyi sngags ma bzlas kyang rung*/__las sbyor skabs nyin rer thun bzhi re bcad/__dus gnad dang mthun par/__tho rengs la mtshon na bsnyen sgrub gnyis bzlas dmigs 'khyugs tsam re byas nas/__gtso 'khor lnga'i 'od kyi lcags kyus sgrol ma'i thugs rgyud bskul nas zhi ba'i las bsgrub pa'i dmigs pa de'i sngags gtso bor bzla/__thun mthar gzhan gsum cung zad re bzlas pas 'thus shing*/__nyi shar du zhags pa'i sgrol ma'i sngags gtso bor byed pa sogs 'gre/__!__/rang bzhin sgrub mchod sogs kyi skabs/__spyir btang gi sgrub mchod dkyus ma yin na/__thun rer gtso mo'i yig bcu stong phrag gcig bzla ba'i dbang du byas na/__dril sgrub/__ye sems/__sprul pa'i sngags bcas sum brgya/__/rigs bzhi brgya phrag las bzhi nyer gcig tsam bzlas na 'tshams par 'ong*/__tshe sgrub gtso bor bton pa yin na gzhan gong ltar la yig bcu sum brgya/__tshe sgrub sngags dmigs kyis bsal ba dril sgrub yin pas stong phrag bzla/__gzhan 'dra/__!__/rgyun khyer chags med lta bu la bsnyen pa'i sngags kho na las sgrub pa las sbyor ma byas kyang rung*/___bsnyen sngags kyang dril sgrub gtso bor byed na legs/__spro na sgrub pa las sbyor gyi zlas dmigs 'khyugs tsam gyis kyang 'gal ba med par ma zad bsnyen sgrub las gsum gyi gzhi bsnyen sngon du song ba yin na/__nges par sgrub pa dang las sbyor cung zad re btags na legs pa yin no/__!__/sgrub pa'i dngul chu ni/___bcud len gyi rdzas grub pa ste ston zla ltar dkar ba/__nyi ma lta bu'i 'od zer can g.yas skor du 'khyil zhing grub pa'i rtags g.yung drung dang*/__dga' 'khyil la sogs pa bkra shis pa'i ri mo sna tshogs pa bkra ba/__nus pa gang la reg pa tsam gyis glang po che'i stobs/__nyi zla'i tshe/__rdo rje'i lus/__bcu drug gi lang tsho can du bsgyur nus shing*/__lcags la reg pa tsam gyis gser du 'gyur ba dang*/__shing skam la gtor ba tsam gyis lo 'bras me tog phun sum tshogs pa skad cig gis 'byung ba zhig ste/__de lta bu'i rnam pa bde ba chen po'i gzi byin 'bar bar bsgom pa lags/__!__/sgrub gtor chen mo ni/__'di'i sgrub khog gter chen mchog gling pa'i sa gter las byon pa'i shog ser ma las rgyas par bshad kyang*/__sgrub chen dus yin na las dkyus su mi dgos shing*/__dpe'u ris lta bu zhib cha zhig byas na ma gtogs bca' bzo dka' ba zhig lags/__dkyus su dkyil thang yod na dgram pa'am/__med na maN+Dal tshom bu tsam dang*/__gtso bor thod pa ril bu bcas sgrub rten khyad par ba lags pas/__sgrub gtor logs su ma dgos/__mchod gtor ni rin chen 'bar ba spyi 'gres 'thus/__de la shes pa bzhi ldan sogs kyi tha snyad sbyar na sgrub gtor dang mchod gtor gzhi mthun par dbyibs rin po cher mnga' ba ltar lags/__tshe 'brang ni/__tshe zhes nas rjen 'thag__/gal chen chang gis sbrus pa'i zan bum dbyibs spyi 'gre mtha' ril bus bskor ba kha dog dmar po byas pa de ga lags/__kA ya A yu+u ShaHd+h+wa dza tiSh+Than+tu//__//__