JKW-KABAB-11-DA-014

From Khyentse Lineage - A Tsadra Foundation Project

‎‎

རྟ་མགྲིན་དྲེགས་པ་ཀུན་སྒྲོལ་གྱི་ལྷག་མ་དང་བྲོ་རབས།
Wylie title rta mgrin dregs pa kun sgrol gyi lhag ma dang bro rabs JKW-KABAB-11-DA-014.pdf
Location mkhyen brtse'i bka' babs
Volume 11, Text 14, Pages 381-392 (Folios 1a to 6b4)
Author འཇམ་དབྱངས་མཁྱེན་བརྩེའི་དབང་པོ་
Less details More details
Tertön གྲུ་གུ་ཡང་དབང་, འཇམ་དབྱངས་མཁྱེན་བརྩེའི་དབང་པོ་ (gru gu yang dbang, 'jam dbyangs mkhyen brtse'i dbang po)
Citation 'jam dbyangs mkhyen brtse'i dbang po. rta mgrin dregs pa kun sgrol gyi lhag ma dang bro rabs. In Rdzong sar 'jam dbyangs mkhyen brtse'i dbang po'i bka' babs, Vol. 11: 381-392. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre
Cycle རྟ་མགྲིན་དྲེགས་པ་ཀུན་སྒྲོལ་ (rta mgrin dregs pa kun sgrol)
Deity rta mgrin
Karchag page JKW-KABAB-Volume-11-DA-Karchag
RTZ In the Rinchen Terdzö: https://rtz.tsadra.org/index.php/Terdzo-RA-041
[edit]
༄༅། །རྟ་མགྲིན་དྲེགས་པ་ཀུན་སྒྲོལ་གྱི་ལྷག་མ་དང་བྲོ་རབས་བཞུགས་སོ༔

དེ་ནས་ལྷག་མ་བྱིན་གྱིས་བརླབ་པ་ནི༔ མ་སཱུརྻ་མཎྜ་ལ་ཧཱུྃ༔ ཞེས་བརྗོད་པས་ཕུད་གཞོང་ཉི་མའི་ད་ལར་གྱུར་པ་ལས༔ གཏོར་མ་བྱང་ཆུབ་སེམས་ཀྱི་རང་བཞིན༔ ཧཱུྃ་གི་ཚོགས་འཕྲོ་བར་བསམ༔ པཾ་པདྨ་མཎྜ་ལ་ཧཱུྃ༔ ཞེས་བརྗོད་པས་ལྷག་མའི་གཞོང་པ་པདྨ་འདབ་བརྒྱད་དུ་གྱུར་པ་ལ་ཞལ་ཟས་ནི་བྱང་ཆུབ་སེམས་ཀྱི་རང་བཞིན༔ ཧྲཱིཿའབར་བ་འཕྲོ་ཞིང་འདུ་བར་བསམ༔ དེ་ནས་སྐུལ་ཚིག་འདི་སྐད་གྱེར་རོ༔ ཧཱུྃ༔ བྱང་ཆུབ་སེམས་ཀྱི་སྤྲིན་ཚོགས་ལས༔ འབྱུང་བ་ཆུ་བོའི་རྒྱུན་འབྱུང་བའི༔ མཁའ་འགྲོ་པདྨའི་གཞལ་ཡས་སུ༔ བདེ་བ་ཐུགས་ཀྱི་དཀྱིལ་འཁོར་སྤྲོས༔ མཁའ་འགྲོའི་འཁོར་ཚོགས་ཐམས་ཅད་ལ༔ དགྱེས་མཉེས་མཆོག་གི་སྦྱིན་པས་ཚིམ༔ ཞེས་བརྗོད་ལ་ཁ་ཆུ་གདབ་བོ༔ ཛྙཱ་ན་ཧཱུྃ༔ ཞེས་བརྗོད་པས༔ ཧཱུྃ་དང་ཧྲཱིཿགཉིས་འདྲེས་པ་ལས་འདོད་ཡོན་དུ་བསྒྱུར་ནས་ཕུད་དང་ལྷག་མ་བསྲེའོ༔ འདོད་ཡོན་དེ་ལས་སོ་སོ་ཅི་ལ་དགའ་བའི་མཆོད་སྦྱིན་དུ་གྱུར་པར་བསམས་ནས༔ ཡང་འདི་སྐད་བརྗོད་པར་བྱའོ༔ ཧཱུྃ༔ ཕུད་དང་གཙང་མ་མི་སྦྲགས་རྒྱུ༔ གར་གྱི་དབང་ཕྱུག་ཕུད་ཀྱི་བདག༔ དེ་ཕྱིར་ཕུད་དང་གཙང་མར་སྦྲགས༔ ལྷག་མ་ཁ་ཆུས་མི་གདབ་རྒྱུ༔ ཁྱེད་དང་འོ་སྐོལ་དམ་ཚིག་གཅིག༔ བཀའ་ཡི་ཕ་འབབ་མི་སྩལ་རྒྱུ༔ དབང་ཕྱུག་མ་ནི་བྲན་གྱི་ཚུལ༔ ཧཱུྃ༔ དབང་ཆེན་པདྨ་གསེར་གྱི་གདན་ཁྲི་ལ༔ གསེར་གྱི་སེང་གེ་འདེགས་པའི་རྔམས་ཚུལ་ཅན༔ ཁ་རླངས་ཧྲཱིཿཡི་འོད་ཟེར་སྣ་ཚོགས་འཕྲོ༔ རྩལ་གྱི་རྔམས་ཀྱིས་འཁོར་བའི་འབྲོས་ཁུངས་གཅོད༔ སྟོབས་ཀྱི་རླབས་ཀྱིས་རྒྱལ་བའི་ཕོ་བྲང་འདེགས༔ སྐད་ཀྱི་བཅོམ་གྱིས་གསང་བའི་ཐུགས་དམ་བསྐུལ༔ གསེར་གྱི་འོད་ཀྱིས་མ་རིག་མུན་པ་སེལ༔ ཧེ་རུ་མ་བདུན་ཕྲ་མེན་ཚོགས་དང་བཅས༔ ཕྱག་བརྙན་གཏུམ་ཆེན་ཁྱུང་གི་ཁྲ་ཐབས་ཐོགས༔ བསྐལ་པ་མེ་རི་ཁྱབ་པའི་རྩེ་འཇོམས་ཤིང་༔ ཀེང་རོ་གསར་རྙིང་བཅད་འདྲལ་ཁྲ་ལ་ལ༔ ཚར་གསུམ་ལྕང་ལོ་རཀྟའི་རྦ་ཀློང་འཁྱིལ༔ རྔམས་པའི་ཞལ་ནས་འབྲུག་སྒྲ་གསུང་སྒྲོགས་པས༔ བོད་ཁམས་སྐྱོང་བའི་བརྟན་མ་དམ་ཅན་རྣམས༔ རྣམ་དག་ཡུལ་གྱི་མཁའ་ལས་བཞེངས་ནས་སུ༔ བདུད་རྩི་སྨན་གྱི་ཕྱག་རྒྱས་གཡབ་འདོར་ན༔ གླུ་དང་སྤྱུགས་པའི་བརྡ་ཡིས་མཚོན་ནས་ཀྱང་༔ མ་ཚོགས་ནང་གི་དམ་ལ་བཏགས་སོ་འཚལ༔ བཀའ་དང་དམ་ཚིག་བཞིན་དུ་གཤེགས་སུ་གསོལ༔ གསང་སྔགས་ཧེ་རུ་ཀ་དཔལ་བཀའ་བསྒོས་པའི༔ དབང་ཕྱུག་མ་དང་བརྟན་མ་གིང་གི་ཚོགས༔ ལྷག་མའི་མཆོད་སྦྱིན་བཞེས་པར་དམ་བཅས་རྣམས༔ དམ་ཚིག་ཚུལ་བཞིན་མཆོད་ཀྱིས་གཤེགས་སུ་གསོལ༔ ཧཱུྃ༔ ཐབས་ཆེན་ཟླ་གསང་ཐིག་ལེ་ལས༔ ཡལ་གམ་ཅན་ལ་རབ་དགོངས་པའི༔ འབུམ་ཕྲག་ཡངས་པའི་མཁའ་འགྲོ་མཆེད༔ སྟོང་གསུམ་མ་ལུས་དགེ་བྱེད་པའི༔ བདག་ཉིད་ཆེན་མོ་གཤེགས་སུ་གསོལ༔ བྱང་གི་འབྲོག་ཆེན་འཁོར་འདུལ་མ༔ གློག་ཕྲེང་འབར་བའི་དཀྱིལ་འཁོར་ནས༔ འཇིགས་བྱེད་རྔམས་པའི་ཚུལ་སྟོན་ཅིང་༔ ཕོ་ཉ་འཁོར་བཅས་གཤེགས་སུ་གསོལ༔ དམར་གྱི་ཨརྒྷཾ་སྦྲེང་བ་དང་༔ བཤུགས་པ་བླང་ཞིང་གཡབ་འདོར་ན༔ ཕྲ་མེན་མཁའ་འགྲོ་མ་ལུས་ཀུན༔ སྤྲིན་ཕུང་བཞིན་དུ་གཤེགས་སུ་གསོལ༔ མཆེད་ལ་གདུང་སྟེ་གཤེགས་སུ་གསོལ༔ དམ་ལ་གནས་ཏེ་གཤེགས་སུ་གསོལ༔ བཅོལ་བའི་ཕྲིན་ལས་འགྲུབ་པར་མཛོད༔ དམ་ཚིག་དུས་ལ་བབ་པོ་ས་མ་ཡ༔ བྷྱོ་མ་མ་མ་ཧཱ་རཀྵ་སཱི་ས་མ་ཡ་ཛ་ཛ༔ ཅེས་དབང་ཕྱུག་མའི་སྙིང་པོ་བསྒྲང་༔ དེ་ནས་གཏོར་བསྐྱང་ནི༔ བྷྱོ༔ ཤར་ཕྱོགས་རིག་པའི་རྒྱལ་མོ་བདུན༔ སྲིན་མོ་གཡག་དང་ཚངས་པ་སྤྲུལ༔ ཁྲོ་མོ་གཟིགས་དང་ཁྱབ་འཇུག་སྲེ༔ གཞོན་ནུ་ཕ་ཝང་དབང་མོ་དྲེད༔ ནག་མོ་ཁུ་བྱུག་རལ་པ་ཅན༔ རྡོ་རྗེ་རིགས་ཀྱི་དབང་ཕྱུག་མ༔ དམ་ཚིག་ཚུལ་བཞིན་མཆོད་པར་འབུལ༔ ཐུགས་དམ་བཞིན་དུ་བཞེས་སུ་གསོལ༔ བྷྱོཿ ལྷོ་ཡི་ཕྱོགས་ནས་བློན་མོ་བདུན༔ དམར་མོ་དབང་མོ་བདུད་རྩི་ཆུ༔ ཟླ་བ་སྡིག་པ་བེ་ཅོན་ཁྲ༔ སྲིན་མོ་ཝ་དང་ཟ་བའི་ཁྱི༔ སེར་མོ་ར་དང་ཞགས་འདྲེན་མ༔ རིན་ཆེན་རིགས་ཀྱི་དབང་ཕྱུག་མ༔ དམ་ཚིག་ཚུལ་བཞིན་མཆོད་པར་འབུལ༔ ཐུགས་དམ་བཞིན་དུ་བཞེས་སུ་གསོལ༔ བྷྱོ༔ ནུབ་ཀྱི་ཕྱོགས་ནས་དབང་མོ་བདུན༔ དགའ་མེ་འདོད་དང་ཁྲག་འཐུང་རྟ༔ གཅིག་སྤྱོད་བྱི་ལ་མདངས་སྤེལ་དང་༔ གྲུབ་པའི་པུ་ཤུད་རླུང་མོ་སྤྲ༔ བུམ་རྣ་སེང་མགོ་ལྕགས་སྒྲོག་མ༔ པདྨ་རིགས་ཀྱི་དབང་ཕྱུག་མ༔ དམ་ཚིག་ཚུལ་བཞིན་མཆོད་པར་འབུལ༔ ཐུགས་དམ་བཞིན་དུ་བཞེས་སུ་གསོལ༔ བྷྱོ༔ བྱང་གི་ཕྱོགས་ན་གཡོག་མོ་བདུན༔ གསོད་བྱེད་སྐྱིན་དང་འདོད་པ་མོ༔ ནག་མོ་ཕག་དང་གཤིན་རྗེ་གླང་༔ སྣ་ཚོགས་གླང་དང་རླུང་མོ་ཆུ༔ ནག་མོ་དྲེད་མགོ་དྲིལ་འཁྲོལ་དགྱེས༔ ལས་ཀྱི་རིགས་ཀྱི་དབང་ཕྱུག་མ༔ དམ་ཚིག་ཚུལ་བཞིན་མཆོད་པར་འབུལ༔ ཐུགས་དམ་བཞིན་དུ་བཞེས་སུ་གསོལ༔ ཅེས་ལྷག་མ་བསྐྱང་ངོ་༔ དེ་ནས་བཤལ་ཆུས་བརྟན་མ་བསྐྱང་བ་ནི༔ བྷྱོ༔ བརྟན་མ་སྐྱོང་མ་མ་དང་སྲིང་༔ དཔལ་ལྡན་མ་དང་ཡང་དག་ཤེས༔ ཁྱུང་བཙུན་ཀོང་ལྷ་གཡུ་བུན་མ༔ མེ་ཏོག་ཟླ་འོད་བྱང་རྒྱལ་མ༔ གསེར་ཐང་ཀུན་བཟང་ཤན་ཏིང་དཔལ༔ ཀླུ་མོ་གཟི་འབར་ལ་སོགས་ཏེ༔ བརྟན་མ་བཅུ་གཉིས་བཤལ་ཆུ་བཞེས༔ མི་མཐུན་གནོད་པའི་རྐྱེན་རྣམས་ཟློག༔ ཆོས་དང་མཐུན་པའི་དོན་རྣམས་སྒྲུབས༔ བཅོལ་བའི་ཕྲིན་ལས་གྲུབ་པར་མཛོད༔ དེ་ནས་ཆད་མདོ་ནི་ལས་གཏོར་ལ་བྱའོ༔ བྷྱོ་སྔོན་གྱི་འདས་དུས་བསྐལ་པ་དང་པོ་ལ༔ འོག་མིན་ཆོས་ཀྱི་དབྱིངས་ཀྱི་ཕོ་ཕྲང་དུ༔ དཔལ་ཆེན་པདྨ་གར་གྱི་དབང་ཕྱུག་དེས༔ སྲིད་པ་མ་མོ་དམ་ལ་བཏགས་པའི་ཚེ༔ ཀེ་རཱི་ལ་སོགས་གནས་ཀྱི་མ་མོ་བརྒྱད༔ སིཾ་ཧ་ལ་སོགས་ཡུལ་གྱི་ཕྲ་མེན་བརྒྱད༔ རྟ་གདོང་ལ་སོགས་སྒོ་མ་བཞི་རྣམས་ཀྱིས༔ སོ་སོའི་གཟུགས་བསྟན་དམ་ལ་བཏགས་ནས་ཀྱང་༔ བཀའ་ཡི་གཏོར་མ་བླང་བར་མ་ཆད་དམ༔ རྣལ་འབྱོར་སྐུ་ཚེ་བསྲིང་བར་མ་ཆད་དམ༔ བཅོལ་བའི་ལས་རྣམས་བྱ་བར་མ་ཆད་དམ༔ སྔོན་ཚེ་ཞལ་བཞེས་དམ་ལ་མ་འདའ་བར༔ བ་ལིང་རྒྱན་གྱི་གཏོར་མ་འདི་བཞེས་ལ༔ སྒྲུབ་མཆོག་བཅོལ་བའི་ཕྲིན་ལས་འགྲུབ་པར་མཛོད༔ དུས་བསྐལ་འདས་པ་དེའི་འོག་ཙམ་ན༔ རྒྱ་གར་རྡོ་རྗེ་གདན་གྱི་དབེན་གནས་སུ༔ སློབ་དཔོན་ཆེན་པོ་དགའ་རབ་རྡོ་རྗེ་ཡིས༔ རྡོ་རྗེ་དབྱིངས་ཀྱི་དཀྱིལ་འཁོར་ཞལ་ཕྱེས་ཚེ༔ མཁའ་འགྲོ་ཆེན་མོ་སུམ་ཅུ་རྩ་གཉིས་ཀྱིས༔ སོ་སོའི་གཟུགས་བསྟན་དམ་ལ་བཏགས་ནས་ཀྱང་༔ བཀའ་ཡི་གཏོར་མ་ལེན་པར་མ་ཆད་དམ༔ རྣལ་འབྱོར་སྐུ་ཚེ་བསྲིང་༴ བཅོལ་བའི་ལས༴ སྔོན་ཚེ་ཞལ་བཞེས༴ བ་ལིང་རྒྱན་གྱི་གཏོར༴ སྒྲུབ་མཆོག་བཅོལ་བའི༴ དུས་དང་བསྐལ་པ་དེ་ཡི་འོག་རོལ་དུ༔ སློབ་དཔོན་ཆེན་པོ་ནམ་མཁའི་སྙིང་པོ་ཡིས༔ ལྷོ་བྲག་མཁར་ཆུ་གཉན་གྱི་དབེན་གནས་སུ༔ རྡོ་རྗེ་གཞོན་ནུའི་དཀྱིལ་འཁོར་ཞལ་ཕྱེས་ནས༔ གནམ་ལྕགས་ཕུར་པ་བྲག་ལ་བཏབ་པའི་ཚེ༔ མ་བདུན་སྲིང་བཞི་འཁོར་དང་བཅས་རྣམས་ཀྱིས༔ སོ་སོའི་གཟུགས་བསྟན༴ བཀའ་ཡི་གཏོར་མ༴ རྣལ་འབྱོར་སྐུ་ཚེ་བསྲིང་༴ བཅོལ་བའི༴ སྔོན་ཚེ༴ བ་ལིཾ༴ སྒྲུབ་མཆོག་བཅོལ༴ དུས་སྐབས་འདས་པ་དེ་ཡི་འོག་རོལ་དུ༔ སྤ་གྲོ་སྟག་ཚང་སེང་གེའི་ཡང་ཕུག་ཏུ༔ སློབ་དཔོན་ཆེན་པོ་རླངས་ཆེན་དཔལ་སེང་གིས༔ ཡང་དག་སྒྲུབ་པའི་དཀྱིལ་འཁོར་ཞལ་ཕྱེས་ཚེ༔ དབང་ཕྱུག་ཆེན་མོ་ཉི་ཤུ་རྩ་བརྒྱད་ཀྱིས༔ སོ་སོའི་གཟུགས༴ བཀའ་ཡི་གཏོར༴ རྣལ་འབྱོར་སྐུ་ཚེ༴ བཅོལ་བའི༴ སྔོན་ཚེ༴ བ་ལིང་༴ སྒྲུབ་མཆོག་བཅོལ་བའི༴ དུས་སྐབས་འདས་པ་དེ་ཡི་འོག་ཙམ་དུ༔ སློབ་དཔོན་གཉགས་ཀྱི་ཛྙཱ་ན་ཀུ་མཱ་རས༔ ཡར་མོ་ལུང་གི་གང་བའི་ཕུག་རིང་དུ༔ ཕུན་སུམ་ཚོགས་པའི་དཀྱིལ་འཁོར་ཞལ་ཕྱེས་ཚེ༔ དམ་སྲི་རྣམ་གསུམ་རྡུལ་དུ་བརླག་པའི་དུས༔ ལྕེ་སྤྱང་ནག་མོ་འཁོར་དང་བཅས་རྣམས་ཀྱིས༔ སོ་སོའི༴ བཀའ་ཡི༴ རྣལ་འབྱོར་སྐུ་ཚེ༴ བཅོལ་བའི༴ སྔོན་ཚེ༴ བ་ལིང་༴ རྣལ་འབྱོར་བཅོལ་བའི་ཕྲིན་ལས༴ དུས་སྐབས་འདས་པ་དེ་ཡི་ཕྱི་རོལ་དུ༔ སློབ་དཔོན་ཆེན་པོ་པདྨ་འབྱུང་གནས་ཀྱིས༔ བྲག་དམར་བསམ་ཡས་ཨཱརྱ་པ་གླིང་དུ༔ མན་ངག་ལྟ་བའི་ཕྲེང་བ་བཤད་པའི་ཚེ༔ བོད་ཁམས་སྐྱོང་བའི་བརྟན་མ་བཅུ་གཉིས་ཀྱིས༔ སོ་སོའི་གཟུགས་བསྟན༴ བཀའ་ཡི་གཏོར་མ་བླང་༴ བཅོལ་བའི༴ སྔོན་ཚེ་ཞལ་བཞེས༴ དོ་ནུབ་རྒྱན་གྱི་གཏོར་མ་འདི་བཞེས་ལ༔ རྣལ་འབྱོར་བཅོལ་བའི་ལས་རྣམས་འགྲུབ་པར་མཛོད༔ བདག་ཅག་རིག་འཛིན་སྔགས་འཆང་གི༔ ལོ་ཀག་ཟླ་ཀག་བཟློག་ཏུ་གསོལ༔ འཁོར་སྲུང་རྐྱེན་ཟློག་བར་ཆད་སོལ༔ ཚེ་སྲིང་ནོར་སྤེལ་བསམ་པ་སྒྲུབས༔ ལས་དང་འབྲས་བུ་མཆིས་པར་མཛོད༔ ཅེས་ཆད་མདོ་བྱའོ༔ དེ་ནས་བྲོ་དང་ཚས་ཀྱིས་དགྲ་བགེགས་མནན་པ་ནི༔ ཧཱུྃ༔ ནུབ་ཕྱོགས་སྣང་བ་མཐའ་ཡས་ཞིང་ཁམས་ན༔ དབང་གི་ཟླ་གམ་གདེངས་པའི་གཞལ་ཡས་སུ༔ གཟི་ལྡན་འབར་བའི་དཀྱིལ་འཁོར་ཆེན་པོ་རུ༔ གདུག་པའི་ཀླུ་བརྒྱད་བརྩེགས་པའི་ཁྲི་སྟེང་ནས༔ ལས་ལ་མངའ་མཛད་པདྨ་ཧེ་རུ་ཀ༔ ཁྲག་འཐུང་ཁྲོ་བོ་རབ་འབྱམས་དབྱིངས་ནས་བཞེངས༔ ཧཱུྃ༔ འཛུམ་པའི་མདངས་ཀྱིས་མཆོད་པ་འབུལ༔ དགྱེས་པའི་ཚུལ་གྱིས་མཆོད་པར་བཞེས༔ ཆེ་མཆོག་བཛྲ་ཧེ་རུ་ཀ༔ ཕྱི་མཆོད་རྡོ་རྗེའི་གླུ་དྲུག་བྲོ༔ གླུ་ཡང་དྲུག་ལ་བྲོ་ཡང་དྲུག༔ གླུ་དྲུག་གསང་བའི་དབྱིངས་དང་སྦྱོར༔ བྲོ་དྲུག་འདུལ་བའི་ལས་དང་སྦྱོར༔ གླུ་དྲུག་དབྱངས་སུ་བླང་བ་ནི༔ ཚངས་པའི་གླུས་ནི་ཞིང་ཁམས་སྦྱོང་༔ དཔལ་གྱི་གླུས་ནི་འཕྲོ་འདུ་གསལ༔ ཁྲོ་བོའི་གླུས་ནི་བདུད་བཞི་འདུལ༔ གདུང་བའི་གླུས་ནི་མ་སྲིང་བསྟེན༔ ཧཱུྃ་སྒྲའི་གླུས་ནི་འཕྲོ་འདུ་འཁྲུགས༔ དབུ་མའི་གླུས་ནི་དགོངས་རྒྱུད་གསལ༔་་་་་་འདི་ཡན་གླུ་དྲུག་གོ༔ དབང་གི་གླུས་ནི་སྲིན་པོ་འདུལ༔ ལས་ཀྱི་གླུས་ནི་ཕོ་ཉ་འགྱེད༔ གླུ་དྲུག་རྫོགས་པར་ལྡན་པར་བཤད༔ བྲོ་དྲུག་རྫོགས་པར་ལྡན་པར་བརྡུང་༔ ཁྲོ་བོའི་བྲོ་བརྡུང་དྲེགས་པ་འཇོམས༔ དཔལ་གྱི་བྲོ་བརྡུང་བདུད་བཞི་འདུལ༔ མ་སྲིང་བྲོ་བརྡུང་གདུག་པ་འདུལ༔ དབང་གི་བྲོ་བརྡུང་སྲིན་པོ་འདུལ༔ ལས་ཀྱི་བྲོ་བརྡུང་ཕོ་ཉར་འགྱེད༔ རྣལ་འབྱོར་བྲོ་བརྡུང་ཐུགས་དམ་བསྐུལ༔ འདི་ནི་དཔལ་གྱི་ཐུགས་དམ་ཡིན༔ འདི་ནི་ཡུམ་གྱི་གསང་ཚིག་ཡིན༔ འདི་ནི་མ་སྲིང་དངོས་གྲུབ་ཡིན༔ འདི་ནི་ཕོ་ཉའི་ལོངས་སྤྱོད་ཡིན༔ འདི་ནི་རྣལ་འབྱོར་ལྟ་བའི་བྲོ༔ དགྲ་ནི་ཐལ་བར་བརླག་པའི་བྲོ༔ བདུད་ནི་ཕྱེ་མར་གཏོང་བའི་བྲོ༔ རྒྱུ་དྲུག་གནས་སུ་སྦྱོང་བའི་བྲོ༔ འགྲོ་དྲུག་གཡང་ས་གཅོད་པའི་བྲོ༔ འཇིགས་པའི་བདུད་བཞི་འདུལ་བའི་བྲོ༔ གསང་བའི་དགྲ་གསུམ་གསོད་བའི་བྲོ༔ ཏིང་འཛིན་དགོངས་རྒྱུད་དག་པས་བརྡུང་༔ ད་ནི་མར་ལ་དགྲ་བགེགས་ཚར་གཅོད་པའི་བྲོ་བརྡུང་བ་ནི༔ ཧཱུྃ༔ འཇིག་རྟེན་དྲུག་གི་ཡུལ་དྲུག་ནས༔ འཁོར་ཡུག་དུར་ཁྲོད་ཆེན་པོ་ན༔ མ་ཏྲྃ་རུ་དྲ་བསྒྲལ་བའི་ཚེ༔ ང་ནི་ཡ་མཱནྟ་ཀ་ཡིན༔ ཆེ་བ་ཟིལ་གྱིས་གནོན་པའི་ཚེ༔ ང་ནི་ཆེ་མཆོག་ཧེ་རུ་ཀ༔ དུས་གསུམ་སངས་རྒྱས་བརྒྱུད་པའི་ཚེ༔ ང་ནི་རིགས་ལྔའི་སངས་རྒྱས་ཡིན༔ ཁམས་གསུམ་དབང་དུ་སྡུད་པའི་ཕྱིར༔ ང་ནི་རྟ་མགྲིན་རྒྱལ་པོ་ཡིན༔ ཆོས་སྐུ་འགྱུར་བ་མེད་པའི་ཕྱིར༔ ང་ནི་རྡོ་རྗེ་གཞོན་ནུ་ཡིན༔ དགྲ་བགེགས་རྡུལ་དུ་བརླག་པའི་ཕྱིར༔ ང་ནི་ཕྱག་ན་རྡོ་རྗེ་ཡིན༔ ཧཱུྃ༔ སྟོང་གསུམ་སྟོང་གི་འཇིག་རྟེན་ན༔ ཤར་ཕྱོགས་སྟོང་གི་འཇིག་རྟེན་ན༔ ཞེ་སྡང་རྡོ་རྗེ་འཁོར་བཅས་ཀྱིས༔ རྡོ་རྗེའི་རིགས་ཀྱི་བྲོ་བརྡུངས་པས༔ དགྲ་ནི་ཐལ་བར་བརླག་པའི་བྲོ༔ བདུད་ནི་ཕྱེ་མར་བཏང་བའི་བྲོ༔ དངུལ་ལམ་དཀར་པོའི་ཤིང་དག་ལ༔ མགོ་བོ་རྒྱ་མདུད་རྩེ་ཟླུམ་པོ༔ ལོགས་ལ་ཞི་བའི་ལྷ་བསྒོམས་ནས༔ བཏབ་ན་ཐམས་ཅད་ཞི་བར་མཛད༔ ཞི་མཛད་ལྷ་ལ་ཕྱག་འཚལ་བསྟོད༔ བདག་ཅག་དགེ་སྡེ་གྲྭ་ཚན་གྱི༔ དགྲ་བགེགས་འབྱུང་པོ་ཞི་བར་མཛོད༔ ཞི་བར་གྱུར་ཅིག་ཤཱིནྟིཾ་ཀུ་རུ་ཡེ་སྭཱ་ཧཱ༔ ཧཱུྃ༔ སྟོང་གསུམ་སྟོང་གི་འཇིག་རྟེན་ན༔ ལྷོ་ཕྱོགས་སྟོང་གི་འཇིག་རྟེན་ན༔ ང་རྒྱལ་རིན་ཆེན་འཁོར་བཅས་ཀྱིས༔ རིན་ཆེན་རིགས་ཀྱི་བྲོ་བརྡུངས་པས༔ དགྲ་ནི་ཐལ་བར་བརླག་པའི་བྲོ༔ བདུད་ནི་ཕྱེ་མར་བཏང་བའི་བྲོ༔ གསེར་རམ་སེར་པོའི་ཤིང་དག་ལ༔ མགོ་བོ་རྒྱ་མདུད་རྩེ་གྲུ་བཞི༔ ལོགས་ལ་རྒྱས་པའི་ལྷ་བསྒོམས་ནས༔ བཏབ་ན་ཐམས་ཅད་རྒྱས་པར་མཛད༔ རྒྱས་མཛད་ལྷ་ལ་ཕྱག་འཚལ་ལོ༔ བདག་ཅག་དགེ་སྡེ་གྲྭ་ཚན་གྱི༔ ཚེ་དང་ལོངས་སྤྱོད་རྒྱས་པར་མཛོད༔ རྒྱས་པར་གྱུར་ཅིག་པུཥྟིཾ་ཀུ་རུ་ཡེ་སྭཱ་ཧཱ༔ ཧཱུྃ༔ སྟོང་གསུམ་སྟོང་གི་འཇིག་རྟེན་ན༔ ནུབ་ཕྱོགས་སྟོང་གི་འཇིག་རྟེན་ན༔ འདོད་ཆགས་པདྨ་འཁོར་བཅས་ཀྱིས༔ པདྨ་རིགས་ཀྱི་བྲོ་བརྡུངས་པས༔ དགྲ་ནི་ཐལ་བར་བརླག་པའི་བྲོ༔ བདུད་ནི་ཕྱི་མར་བཏང་བའི་བྲོ༔ ཟངས་སམ་དམར་པོའི་ཤིང་དག་ལ༔ མགོ་བོ་རྒྱ་མདུད་རྩེ་ཟླ་གམ༔ ལོགས་ལ་དབང་གི་ལྷ་བསྒོམས་ནས༔ བཏབ་ན་ཐམས་ཅད་དབང་དུ་མཛད༔ དབང་མཛད་ལྷ་ལ་ཕྱག་འཚལ་བསྟོད༔ བདག་ཅག་དགེ་སྡེ་གྲྭ་ཚན་གྱི༔ དགྲ་བགེགས་འབྱུང་པོ་དབང་དུ་སྡུས༔ དབང་དུ་སྡུས་ཤིག་བ་ཤཾ་ཀུ་རུ་ཡེ་སྭཱ་ཧཱ༔ ཧཱུྃ༔ སྟོང་གསུམ་སྟོང་གི་འཇིག་རྟེན་ན༔ བྱང་ཕྱོགས་སྟོང་གི་འཇིག་རྟེན་ན༔ ཕྲག་དོག་ཕྲིན་ལས་འཁོར་བཅས་ཀྱིས༔ ལས་ཀྱི་རིགས་ཀྱི་བྲོ་བརྡུངས་པས༔ དགྲ་ནི་ཐལ་བར་བརླག་པའི་བྲོ༔ བདུད་ནི་ཕྱེ་མར་བཏང་བའི་བྲོ༔ ལྕགས་སམ་དྲག་པོའི་ཤིང་དག་ལ༔ མགོ་བོ་རྒྱ་མདུད་རྩེ་ཟུར་གསུམ༔ ལོགས་ལ་དྲག་པོའི་ལྷ་བསྒོམས་ནས༔ བཏབ་ན་ཐམས་ཅད་བརླག་པར་མཛོད༔ བདག་ཅག་དགེ་སྡེ་གྲྭ་ཚན་གྱི༔ དགྲ་བགེགས་འབྱུང་པོ་བརླག་པར་མཛོད༔ བརླག་པར་གྱུར་ཅིག་ཨ་མུ་ཀཾ་མཱ་ར་ཡ་ཕཊ༔ ཕྲིན་ལས་རྣམ་བཞིའི་བྲོ་རབས་རྫོགས་སོ༔

[edit]

@#/__/rta mgrin dregs pa kun sgrol gyi lhag ma dang bro rabs bzhugs so:__de nas lhag ma byin gyis brlab pa ni:__ma sUr+Ya maN+Da la hU~M:__zhes brjod pas phud gzhong nyi ma'i da lar gyur pa las:__gtor ma byang chub sems kyi rang bzhin:__hU~M gi tshogs 'phro bar bsam:__paM pad+ma maN+Da la hU~M:__zhes brjod pas lhag ma'i gzhong pa pad+ma 'dab brgyad du gyur pa la zhal zas ni byang chub sems kyi rang bzhin:__hrIH'bar ba 'phro zhing 'du bar bsam:__de nas skul tshig 'di skad gyer ro:__hU~M:__byang chub sems kyi sprin tshogs las:__'byung ba chu bo'i rgyun 'byung ba'i:__mkha' 'gro pad+ma'i gzhal yas su:__bde ba thugs kyi dkyil 'khor spros:__mkha' 'gro'i 'khor tshogs thams cad la:__dgyes mnyes mchog gi sbyin pas tshim:__zhes brjod la kha chu gdab bo:__dz+nyA na hU~M:__zhes brjod pas:__hU~M dang hrIHgnyis 'dres pa las 'dod yon du bsgyur nas phud dang lhag ma bsre'o:__'dod yon de las so so ci la dga' ba'i mchod sbyin du gyur par bsams nas:__yang 'di skad brjod par bya'o:__hU~M:__phud dang gtsang ma mi sbrags rgyu:__gar gyi dbang phyug phud kyi bdag:__de phyir phud dang gtsang mar sbrags:__lhag ma kha chus mi gdab rgyu:__khyed dang 'o skol dam tshig gcig:__bka' yi pha 'bab mi stsal rgyu:__dbang phyug ma ni bran gyi tshul:__hU~M:__dbang chen pad+ma gser gyi gdan khri la:__gser gyi seng ge 'degs pa'i rngams tshul can:__kha rlangs hrIHyi 'od zer sna tshogs 'phro:__rtsal gyi rngams kyis 'khor ba'i 'bros khungs gcod:__stobs kyi rlabs kyis rgyal ba'i pho brang 'degs:__skad kyi bcom gyis gsang ba'i thugs dam bskul:__gser gyi 'od kyis ma rig mun pa sel:__he ru ma bdun phra men tshogs dang bcas:__phyag brnyan gtum chen khyung gi khra thabs thogs:__bskal pa me ri khyab pa'i rtse 'joms shing :__keng ro gsar rnying bcad 'dral khra la la:__tshar gsum lcang lo rak+ta'i rba klong 'khyil:__rngams pa'i zhal nas 'brug sgra gsung sgrogs pas:__bod khams skyong ba'i brtan ma dam can rnams:__rnam dag yul gyi mkha' las bzhengs nas su:__bdud rtsi sman gyi phyag rgyas g.yab 'dor na:__glu dang spyugs pa'i brda yis mtshon nas kyang :__ma tshogs nang gi dam la btags so 'tshal:__bka' dang dam tshig bzhin du gshegs su gsol:__gsang sngags he ru ka dpal bka' bsgos pa'i:__dbang phyug ma dang brtan ma ging gi tshogs:__lhag ma'i mchod sbyin bzhes par dam bcas rnams:__dam tshig tshul bzhin mchod kyis gshegs su gsol:__hU~M:__thabs chen zla gsang thig le las:__yal gam can la rab dgongs pa'i:__'bum phrag yangs pa'i mkha' 'gro mched:__stong gsum ma lus dge byed pa'i:__bdag nyid chen mo gshegs su gsol:__byang gi 'brog chen 'khor 'dul ma:__glog phreng 'bar ba'i dkyil 'khor nas:__'jigs byed rngams pa'i tshul ston cing :__pho nya 'khor bcas gshegs su gsol:__dmar gyi ar+g+haM sbreng ba dang :__bshugs pa blang zhing g.yab 'dor na:__phra men mkha' 'gro ma lus kun:__sprin phung bzhin du gshegs su gsol:__mched la gdung ste gshegs su gsol:__dam la gnas te gshegs su gsol:__bcol ba'i phrin las 'grub par mdzod:__dam tshig dus la bab po sa ma ya:__b+h+yo ma ma ma hA rak+Sha sI sa ma ya dza dza:__ces dbang phyug ma'i snying po bsgrang :__de nas gtor bskyang ni:__b+h+yo:__shar phyogs rig pa'i rgyal mo bdun:__srin mo g.yag dang tshangs pa sprul:__khro mo gzigs dang khyab 'jug sre:__gzhon nu pha wang dbang mo dred:__nag mo khu byug ral pa can:__rdo rje rigs kyi dbang phyug ma:__dam tshig tshul bzhin mchod par 'bul:__thugs dam bzhin du bzhes su gsol:__b+h+yoH__lho yi phyogs nas blon mo bdun:__dmar mo dbang mo bdud rtsi chu:__zla ba sdig pa be con khra:__srin mo wa dang za ba'i khyi:__ser mo ra dang zhags 'dren ma:__rin chen rigs kyi dbang phyug ma:__dam tshig tshul bzhin mchod par 'bul:__thugs dam bzhin du bzhes su gsol:__b+h+yo:__nub kyi phyogs nas dbang mo bdun:__dga' me 'dod dang khrag 'thung rta:__gcig spyod byi la mdangs spel dang :__grub pa'i pu shud rlung mo spra:__bum rna seng mgo lcags sgrog ma:__pad+ma rigs kyi dbang phyug ma:__dam tshig tshul bzhin mchod par 'bul:__thugs dam bzhin du bzhes su gsol:__b+h+yo:__byang gi phyogs na g.yog mo bdun:__gsod byed skyin dang 'dod pa mo:__nag mo phag dang gshin rje glang :__sna tshogs glang dang rlung mo chu:__nag mo dred mgo dril 'khrol dgyes:__las kyi rigs kyi dbang phyug ma:__dam tshig tshul bzhin mchod par 'bul:__thugs dam bzhin du bzhes su gsol:__ces lhag ma bskyang ngo :__de nas bshal chus brtan ma bskyang ba ni:__b+h+yo:__brtan ma skyong ma ma dang sring :__dpal ldan ma dang yang dag shes:__khyung btsun kong lha g.yu bun ma:__me tog zla 'od byang rgyal ma:__gser thang kun bzang shan ting dpal:__klu mo gzi 'bar la sogs te:__brtan ma bcu gnyis bshal chu bzhes:__mi mthun gnod pa'i rkyen rnams zlog:__chos dang mthun pa'i don rnams sgrubs:__bcol ba'i phrin las grub par mdzod:__de nas chad mdo ni las gtor la bya'o:__b+h+yo sngon gyi 'das dus bskal pa dang po la:__'og min chos kyi dbyings kyi pho phrang du:__dpal chen pad+ma gar gyi dbang phyug des:__srid pa ma mo dam la btags pa'i tshe:__ke rI la sogs gnas kyi ma mo brgyad:__siM ha la sogs yul gyi phra men brgyad:__rta gdong la sogs sgo ma bzhi rnams kyis:__so so'i gzugs bstan dam la btags nas kyang :__bka' yi gtor ma blang bar ma chad dam:__rnal 'byor sku tshe bsring bar ma chad dam:__bcol ba'i las rnams bya bar ma chad dam:__sngon tshe zhal bzhes dam la ma 'da' bar:__ba ling rgyan gyi gtor ma 'di bzhes la:__sgrub mchog bcol ba'i phrin las 'grub par mdzod:__dus bskal 'das pa de'i 'og tsam na:__rgya gar rdo rje gdan gyi dben gnas su:__slob dpon chen po dga' rab rdo rje yis:__rdo rje dbyings kyi dkyil 'khor zhal phyes tshe:__mkha' 'gro chen mo sum cu rtsa gnyis kyis:__so so'i gzugs bstan dam la btags nas kyang :__bka' yi gtor ma len par ma chad dam:__rnal 'byor sku tshe bsring =__bcol ba'i las=__sngon tshe zhal bzhes=__ba ling rgyan gyi gtor=__sgrub mchog bcol ba'i=__dus dang bskal pa de yi 'og rol du:__slob dpon chen po nam mkha'i snying po yis:__lho brag mkhar chu gnyan gyi dben gnas su:__rdo rje gzhon nu'i dkyil 'khor zhal phyes nas:__gnam lcags phur pa brag la btab pa'i tshe:__ma bdun sring bzhi 'khor dang bcas rnams kyis:__so so'i gzugs bstan=__bka' yi gtor ma=__rnal 'byor sku tshe bsring =__bcol ba'i=__sngon tshe=__ba liM=__sgrub mchog bcol=__dus skabs 'das pa de yi 'og rol du:__spa gro stag tshang seng ge'i yang phug tu:__slob dpon chen po rlangs chen dpal seng gis:__yang dag sgrub pa'i dkyil 'khor zhal phyes tshe:__dbang phyug chen mo nyi shu rtsa brgyad kyis:__so so'i gzugs=__bka' yi gtor=__rnal 'byor sku tshe=__bcol ba'i=__sngon tshe=__ba ling =__sgrub mchog bcol ba'i=__dus skabs 'das pa de yi 'og tsam du:__slob dpon gnyags kyi dz+nyA na ku mA ras:__yar mo lung gi gang ba'i phug ring du:__phun sum tshogs pa'i dkyil 'khor zhal phyes tshe:__dam sri rnam gsum rdul du brlag pa'i dus:__lce spyang nag mo 'khor dang bcas rnams kyis:__so so'i=__bka' yi=__rnal 'byor sku tshe=__bcol ba'i=__sngon tshe=__ba ling =__rnal 'byor bcol ba'i phrin las=__dus skabs 'das pa de yi phyi rol du:__slob dpon chen po pad+ma 'byung gnas kyis:__brag dmar bsam yas Ar+ya pa gling du:__man ngag lta ba'i phreng ba bshad pa'i tshe:__bod khams skyong ba'i brtan ma bcu gnyis kyis:__so so'i gzugs bstan=__bka' yi gtor ma blang =__bcol ba'i=__sngon tshe zhal bzhes=__do nub rgyan gyi gtor ma 'di bzhes la:__rnal 'byor bcol ba'i las rnams 'grub par mdzod:__bdag cag rig 'dzin sngags 'chang gi:__lo kag zla kag bzlog tu gsol:__'khor srung rkyen zlog bar chad sol:__tshe sring nor spel bsam pa sgrubs:__las dang 'bras bu mchis par mdzod:__ces chad mdo bya'o:__de nas bro dang tshas kyis dgra bgegs mnan pa ni:__hU~M:__nub phyogs snang ba mtha' yas zhing khams na:__dbang gi zla gam gdengs pa'i gzhal yas su:__gzi ldan 'bar ba'i dkyil 'khor chen po ru:__gdug pa'i klu brgyad brtsegs pa'i khri steng nas:__las la mnga' mdzad pad+ma he ru ka:__khrag 'thung khro bo rab 'byams dbyings nas bzhengs:__hU~M:__'dzum pa'i mdangs kyis mchod pa 'bul:__dgyes pa'i tshul gyis mchod par bzhes:__che mchog badz+ra he ru ka:__phyi mchod rdo rje'i glu drug bro:__glu yang drug la bro yang drug:__glu drug gsang ba'i dbyings dang sbyor:__bro drug 'dul ba'i las dang sbyor:__glu drug dbyangs su blang ba ni:__tshangs pa'i glus ni zhing khams sbyong :__dpal gyi glus ni 'phro 'du gsal:__khro bo'i glus ni bdud bzhi 'dul:__gdung ba'i glus ni ma sring bsten:__hU~M sgra'i glus ni 'phro 'du 'khrugs:__dbu ma'i glus ni dgongs rgyud gsal: 'di yan glu drug go:__dbang gi glus ni srin po 'dul:__las kyi glus ni pho nya 'gyed:__glu drug rdzogs par ldan par bshad:__bro drug rdzogs par ldan par brdung :__khro bo'i bro brdung dregs pa 'joms:__dpal gyi bro brdung bdud bzhi 'dul:__ma sring bro brdung gdug pa 'dul:__dbang gi bro brdung srin po 'dul:__las kyi bro brdung pho nyar 'gyed:__rnal 'byor bro brdung thugs dam bskul:__'di ni dpal gyi thugs dam yin:__'di ni yum gyi gsang tshig yin:__'di ni ma sring dngos grub yin:__'di ni pho nya'i longs spyod yin:__'di ni rnal 'byor lta ba'i bro:__dgra ni thal bar brlag pa'i bro:__bdud ni phye mar gtong ba'i bro:__rgyu drug gnas su sbyong ba'i bro:__'gro drug g.yang sa gcod pa'i bro:__'jigs pa'i bdud bzhi 'dul ba'i bro:__gsang ba'i dgra gsum gsod ba'i bro:__ting 'dzin dgongs rgyud dag pas brdung :__da ni mar la dgra bgegs tshar gcod pa'i bro brdung ba ni:__hU~M:__'jig rten drug gi yul drug nas:__'khor yug dur khrod chen po na:__ma tra~M ru dra bsgral ba'i tshe:__nga ni ya mAn+ta ka yin:__che ba zil gyis gnon pa'i tshe:__nga ni che mchog he ru ka:__dus gsum sangs rgyas brgyud pa'i tshe:__nga ni rigs lnga'i sangs rgyas yin:__khams gsum dbang du sdud pa'i phyir:__nga ni rta mgrin rgyal po yin:__chos sku 'gyur ba med pa'i phyir:__nga ni rdo rje gzhon nu yin:__dgra bgegs rdul du brlag pa'i phyir:__nga ni phyag na rdo rje yin:__hU~M:__stong gsum stong gi 'jig rten na:__shar phyogs stong gi 'jig rten na:__zhe sdang rdo rje 'khor bcas kyis:__rdo rje'i rigs kyi bro brdungs pas:__dgra ni thal bar brlag pa'i bro:__bdud ni phye mar btang ba'i bro:__dngul lam dkar po'i shing dag la:__mgo bo rgya mdud rtse zlum po:__logs la zhi ba'i lha bsgoms nas:__btab na thams cad zhi bar mdzad:__zhi mdzad lha la phyag 'tshal bstod:__bdag cag dge sde grwa tshan gyi:__dgra bgegs 'byung po zhi bar mdzod:__zhi bar gyur cig shIn+tiM ku ru ye swA hA:__hU~M:__stong gsum stong gi 'jig rten na:__lho phyogs stong gi 'jig rten na:__nga rgyal rin chen 'khor bcas kyis:__rin chen rigs kyi bro brdungs pas:__dgra ni thal bar brlag pa'i bro:_bdud ni phye mar btang ba'i bro:__gser ram ser po'i shing dag la:__mgo bo rgya mdud rtse gru bzhi:__logs la rgyas pa'i lha bsgoms nas:__btab na thams cad rgyas par mdzad:__rgyas mdzad lha la phyag 'tshal lo:__bdag cag dge sde grwa tshan gyi:__tshe dang longs spyod rgyas par mdzod:__rgyas par gyur cig puSh+tiM ku ru ye swA hA:__hU~M:__stong gsum stong gi 'jig rten na:__nub phyogs stong gi 'jig rten na:__'dod chags pad+ma 'khor bcas kyis:__pad+ma rigs kyi bro brdungs pas:__dgra ni thal bar brlag pa'i bro:__bdud ni phyi mar btang ba'i bro:__zangs sam dmar po'i shing dag la:__mgo bo rgya mdud rtse zla gam:__logs la dbang gi lha bsgoms nas:__btab na thams cad dbang du mdzad:__dbang mdzad lha la phyag 'tshal bstod:__bdag cag dge sde grwa tshan gyi:__dgra bgegs 'byung po dbang du sdus:__dbang du sdus shig ba shaM ku ru ye swA hA:__hU~M:__stong gsum stong gi 'jig rten na:__byang phyogs stong gi 'jig rten na:__phrag dog phrin las 'khor bcas kyis:__las kyi rigs kyi bro brdungs pas:__dgra ni thal bar brlag pa'i bro:__bdud ni phye mar btang ba'i bro:__lcags sam drag po'i shing dag la:__mgo bo rgya mdud rtse zur gsum:__logs la drag po'i lha bsgoms nas:__btab na thams cad brlag par mdzod:__bdag cag dge sde grwa tshan gyi:__dgra bgegs 'byung po brlag par mdzod:__brlag par gyur cig a mu kaM mA ra ya phaT:__phrin las rnam bzhi'i bro rabs rdzogs so:_

Footnotes

Other Information